ಪಞ್ಚತಿಂಸತಿಮಪರಿಚ್ಛೇದ

ದ್ವಾದಸರಾಜಕೋ

೧.

ಆಮಣ್ಡಗಾಮಣ್ಯಭಯೋ, ಮಹಾದಾಠಿಕಅಚ್ಚಯೇ।

ನವವಸ್ಸನಟ್ಠಮಾಸೇ, ರಜ್ಜಂ ಕಾರೇಸಿ ತಂ ಸುತೋ॥

೨.

ಛತ್ತಾತಿ ಛತ್ತಂ ಕಾರೇಸಿ, ಮಹಾಥೂಪೇ ಮನೋರಮೇ।

ತಥೇವ ಪಾದವೇದಿಞ್ಚ, ಮುದ್ಧವೇದಿಞ್ಚ ಕಾರಯಿ॥

೩.

ತಥೇವ ಲೋಹಪಾಸಾದ, ಥೂಪವ್ಹೇ ಪೋಸಥವ್ಹಯೇ।

ಕಾರೇಸಿ ಕುಚ್ಛಿಆಜಿರಂ, ಕುಚ್ಛಿಆಳಿನ್ದಮೇವ ಚ॥

೪.

ಉಭಯತ್ಥಾಪಿ ಕಾರೇಸಿ, ಚಾರುಂ ರತನಪಣ್ಡಪಂ।

ರಜತಲೇಣ ವಿಹಾರಞ್ಚ, ಕಾರಾಪೇಸಿ ನರಾಧಿಪೇ॥

೫.

ಮಹಾಗಾಮೇಣ್ಡವಾಪಿಂಸೋ, ಪಸ್ಸೇ ಕಾರಿಯ ದಕ್ಖಿಣೇ।

ದಕ್ಖಿಣಸ್ಸ ವಿಹಾರಸ್ಸ, ಅದಾಸಿ ಪುಞ್ಞದಕ್ಖಿಣೋ॥

೬.

ಮಾಘಾತಂ ಸಕಲೇ ದೀಪೇ, ಕಾರೇಸಿ ಮನುಜಾಧಿಪೋ।

ವಲ್ಲಿಫಲಾನಿ ಸಬ್ಬಾನಿ, ರೋಪಾಪೇತ್ವಾ ತಹಿಂ ತಹಿಂ॥

೭.

ಮಂ ಸಕುಭಣ್ಡಕಂ ನಾಮ, ಆಮಣ್ಡಿಯ ಮಹೀಪತಿ।

ಪತ್ತಂ ಪೂರಾಪಯಿತ್ವಾನ, ಕಾರೇತ್ವಾ ವತ್ಥಚುಮ್ಬಟಂ॥

೮.

ದಾಪೇಸಿ ಸಬ್ಬಸಙ್ಘಸ್ಸ, ವಿಪ್ಪಸನ್ನೇನ ಚೇತಸಾ।

ಪತ್ತೇ ಪೂರಾಪಯಿತ್ವಾ ಸೋ, ಆಮಣ್ಡ ಗಾಮಣಿವಿದೂ॥

೯.

ತಙ್ಕನಿಟ್ಠೋಕಣಿರಾಜಾ-ತಿಸ್ಸೋ ಘಾತಿಯ ತಾತರಂ।

ತೀಣಿ ವಸ್ಸಾನಿ ನಗರೇ, ರಜ್ಜಂ ಕಾರೇಸಿ ಖತ್ತಿಯೋ॥

೧೦.

ಉಪೋಸಥಘರಟ್ಟಂ ಏಸಾ, ನಿಚ್ಛಿನಿ ಚೇಕಿಯವ್ಹಯೇ।

ರಾಜಾಪರಾಧಕಮ್ಮಮ್ಹಿ, ಪುತ್ತೇ ಸಟ್ಠಿತು ಭಿಕ್ಖವೋ॥

೧೧.

ಸಹೋಡ್ಡೇ ಗಾಹಯಿತ್ವಾನ, ರಾಜಾ ಚೇತಿಯ ಪಬ್ಬತೇ।

ಖಿಪಾಪೇಸಿ ಕಣಿರವ್ಹೇ, ಪಬ್ಭಾರಮ್ಹಿ ಅಸೀಲಕೇ॥

೧೨.

ಕಣಿರಾಜಾ ಅಚ್ಚಯೇನ, ಆಮಣ್ಡಗಾಮಣಿ ಸುತೋ।

ಚೂಳಾಭಯೋ ವಸ್ಸಮೇಕಂ, ರಜ್ಜಂ ಕಾರೇಸಿ ಖತ್ತಿಯೋ॥

೧೩.

ಸೋ ಗೋಣಕನದೀತೀರೇ, ಪುರಪಸ್ಸಮ್ಹಿ ದಕ್ಖಿಣೇ।

ಕಾರಾಪೇಸಿ ಮಹೀಪಾಲೋ, ವಿಹಾರೇ ಚೂಳಗಲ್ಲಕಂ॥

೧೪.

ಚೂಳಾಭಯಸ್ಸ’ಚ್ಚ ಯೇನ, ಸೀವಲಿ ತಂ ಕನಿಟ್ಠಿಕಾ।

ಆಮಣ್ಡಧೀತಾ ಚತುರೋ, ಮಾಸೇ ರಜ್ಜಮಕಾರಯಿ॥

೧೫.

ಆಮಣ್ಡ ಭಾಗಿನೇಯ್ಯಾ ತು, ಸೀವಲಿಂ ಅಪನೀಯತಂ।

ಇಳನಾಗೋತಿ ನಾಮೇನ, ಛತ್ತಂ ಉಸ್ಸಾಪಯಿ ಪುರೇ॥

೧೬.

ತಿಸ್ಸವಾಪಿಂ ಗತೇ ತಸ್ಮಿಂ, ಆದಿವಸ್ಸೇ ನರಾಧಿಪೇ।

ತಂ ಹಿತ್ವಾ ಪುರಮಾಗಞ್ಛುಂ, ಬಹವೋಲಮ್ಬಕಣ್ಣಕಾ॥

೧೭.

ತಹಿಂ ಅದಿಸ್ವಾ ತೇ ರಾಜಾ, ಕುದ್ಧೋ ತೇಹಿ ಅಕಾರಯಿ।

ಮದ್ದಯಂ ವಾಪಿಯಾ ಪಸ್ಸೇ, ಮಹಾಥೂಪಞ್ಜಸಂಸಯಂ॥

೧೮.

ತೇಸಂ ವಿಚಾರಕೇ ಕತ್ವಾ, ಚಣ್ಡಾಲೇ ಚ ಠಪಾಪಯಿ।

ತೇನ ಕುದ್ಧಾಲಮ್ಬಕಣ್ಣಾ, ಸಬ್ಬೇ ಹುತ್ವಾನ ಏಕತೋ॥

೧೯.

ರಾಜಾನಂ ತಂ ಗಹೇತ್ವಾನ, ರುನ್ಧಿತ್ವಾನ ಸಕೇ ಘರೇ।

ಸಯಂ ರಜ್ಜಂ ವಿಚಾರೇಸುಂ, ರಞ್ಞೋ ದೇವೀ ತದಾ ಸಕಂ॥

೨೦.

ಪುತ್ತಂ ಚನ್ದಮುಖಸಿವಂ, ಮಣ್ಡಯಿತ್ವಾ ಕುಮಾರಕಂ।

ದತ್ವಾನ ಹತ್ಥೇ ಧಾತೀನಂ, ಮಙ್ಗಲಹತ್ಥಿ ಸನ್ತಿಕೇ॥

೨೧.

ಪೇಸೇಸಿ ವತ್ವಾ ಸನ್ದೇಸಂ, ನೇತ್ವಾ ತಂ ಧಾತಿಯೋ ತಹಿಂ।

ವದಿಂಸು ದೇವಿಸನ್ದೇಸಂ, ಸಬ್ಬಂ ಮಙ್ಗಲ ಹತ್ಥಿನೋ॥

೨೨.

‘‘ಅಯಂ ತೇ ಸಾಧಿನೋ ಪುತ್ತೋ,

ಸಾಮಿಕೋ ಚಾರಕೇ ಠಿತೋ।

ಅರಿಹಿ ಘಾತತೋ ಸೇಸೋ,

ತಯಾ ಘಾತೋ ಇಮಸ್ಸ ತು॥

೨೩.

ತ್ವಮೇನಂ ಕಿರ ಘಾತೇಹಿ, ಇದಂ ದೇವಿವಚೋ’’ಇತಿ।

ವತ್ವಾ ತು ಸಯಾಪೇಸುಂ, ಪಾದಮೂಲಮ್ಹಿ ಹತ್ಥಿನೋ॥

೨೪.

ದುಕ್ಖಿತೋ ಸೋ ರುದಿತ್ವಾನ, ನಾಗೋ ಭೇತ್ವಾನ ಆಳಕಂ।

ಪವಿಸಿತ್ವಾ ಮಹಾವತ್ಥುಂ, ದ್ವಾರಂ ಪಾತಿಯ ಥಾಮಸಾ॥

೨೫.

ರಞ್ಞೋ ನಿಸಿನ್ನಙ್ಗಣಮ್ಹಿ, ಉಗ್ಘಾಟೇತ್ವಾ ಕವಾಟಕಂ।

ನಿಸೀದಾಪಿಯ ತಂ ಖನ್ಧೇ, ಮಹಾತಿತ್ಥಮುಪಾಗಮಿ॥

೨೬.

ನಾವಂ ಆರೋ ಪಯಿತ್ವಾನ, ರಾಜಾನಂ ತತ್ಥ ಕುಞ್ಜರೋ।

ಪಚ್ಛಿಮೋ ದಧಿತೀರೇನ, ಸಯಂ ಮಲಯ ಮಾರುಹೀ॥

೨೭.

ಪರತೀರೇ ವಸಿತ್ವಾ ಸೋ, ತೀಣಿವಸ್ಸಾನಿ ಖತ್ತಿಯೋ।

ಬಲಕಾಯಂ ಗಹೇತ್ವಾನ, ಆಗಾ ನಾವಾತಿ ರೋಹಣಂ॥

೨೮.

ತಿತ್ಥೇ ಸಕ್ಖರಸೋಬ್ಭಮ್ಹಿ, ಓತರಿತ್ವಾನ ಭೂಪತಿ।

ಅಕಾಸಿ ರೋಹಣೇ ತತ್ಥ, ಮಹನ್ತಂ ಬಲಸಙ್ಗಹಂ॥

೨೯.

ರಞ್ಞೋ ಮಙ್ಗಲಹತ್ಥಿಸೋ, ದಕ್ಖಿಣಂ ಮಲಯಂ ತತೋ।

ರೋಹಣಂಯೇ’ವುಪಾಗಞ್ಛಿ, ತಸ್ಸ ಕಮ್ಮಾನಿ ಕಾತವೇ॥

೩೦.

ಮಹಾಪದುಮನಾಮಸ್ಸ, ತತ್ಥ ಜಾತಕಭಾಣಿನೋ।

ತುಲಾಧಾರವ್ಹವಾಸಿಸ್ಸ, ಮಹಾಥೇರಸ್ಸ ಸನ್ತಿಕೇ॥

೩೧.

ಕಪಿಜಾತಕಂ ಸುತ್ವಾನ, ಬೋಧಿಸತ್ತೇ ಪಸಾದವಾ।

ನಾಗಮಹಾವಿಹಾರಂ ಸೋ, ಜಿಯಾಮುತ್ತಧನುಸ್ಸತಂ॥

೩೨.

ಕತ್ವಾ ಕಾರೇಸಿ ಥೂಪಞ್ಚ, ವಡ್ಢಾಪೇಸಿ ಯಥಾಠಿತಂ।

ತಿಸ್ಸವಾಪಿಞ್ಚ ಕಾರೇಸಿ, ತಥಾ ದುರವ್ಹವಾಪಿಕಂ॥

೩೩.

ಸೋ ಗಹೇತ್ವಾ ಬಲಂ ರಾಜಾ, ಯುದ್ಧಾಯ ಅಭಿನಿಕ್ಖಮಿ।

ತಂ ಸುತ್ವಾ ಲಮ್ಬಕಣ್ಣಾ ಚ, ಯುದ್ಧಾಯ ಅಭಿಸಂಯುತಾ॥

೩೪.

ಪಪಲ್ಲಕ್ಖನ್ಧದ್ವಾರಮ್ಹಿ, ಖೇತ್ತೇ ಹಿಙ್ಕರವಾಪಿಕೇ।

ಯುದ್ಧಂ ಉಭಿನ್ನಂ ವತ್ತಿತ್ಥ, ಅಞ್ಞಮಞ್ಞವಿಹೇಸನಂ॥

೩೫.

ನಾವಾಕಿಲನ್ತದೇಹತ್ತಾ, ಪೋಸಾ ಸೀದನ್ತಿ ರಾಜಿನೋ।

ರಾಜಾ ನಾಮಂ ಸಾವಯಿತ್ವಾ, ಸಯಂ ಪಾವಿಸಿ ತೇನ ಸೋ॥

೩೬.

ತೇನ ಭೀತಾಲಮ್ಬಕಣ್ಣಾ, ಸಯಿಂಸು ಉದರೇನ ಸೋ।

ತೇಸಂ ಸೀಸಾನಿ ಛಿನ್ದಿತ್ವಾ, ರತನಾಭಿಸಮಂಕರಿ॥

೩೭.

ತಿಕ್ಖತ್ತುಮೇವನ್ತುಕತೇ, ಕರುಣಾಯ ಮಹೀಪತಿ।

‘‘ಅಮಾರೇತ್ವಾ’ವ ಗಣ್ಹಾಥ, ಜೀವಗ್ಗಾಹ’ನ್ತಿ ಅಬ್ರುವಿ॥

೩೮.

ತತೋ ವಿಜಿತಸಙ್ಗಾಮೋ, ಪುರಂ ಆಗಮ್ಮ ಭೂಪತಿ।

ಛತ್ತಂ ಉಸ್ಸಾಪಯಿತ್ವಾನ ತಿಸ್ಸವಾಪಿ ಛಣಂ ಅಗಾ॥

೩೯.

ಜಲಕೀಳಾಯ ಉಗ್ಗನ್ತ್ವಾ, ಸುಮಣ್ಡಿತಪಸಾಧಿತೋ।

ಅತ್ತನೋ ಸಿರಿಸಮ್ಪತ್ತಿಂ, ದಿಸ್ವಾ ತಸ್ಸನ್ತರಾಯಿಕೇ॥

೪೦.

ಲಮ್ಬಕಣ್ಣೇ ಸರಿತ್ವಾನ, ಕುದ್ಧೋ ಸೋ ಯೋಜಯೀರಥೇ।

ಯುಗಪರಮ್ಪರಾ ತೇಸಂ, ಪುರತೋ ಪಾವಿಸೀ ಪುರಂ॥

೪೧.

ಮಹಾವತ್ಥುಸ್ಸ ಉಮ್ಮಾರೇ, ಠತ್ವಾ ರಾಜಾಣಪೇಸಿ ಸೋ।

‘‘ಇಮೇಸಂ ಸೀಸಮುಮ್ಮಾರೇ, ಅಸ್ಮಿಂ ಛಿನ್ದಥ ಭೋ’’ಇತಿ॥

೪೨.

ಗೋಣಾ ಏತೇರಥೇ ಯುತ್ತಾ, ತವ ಹೋನ್ತಿ ರಥೇಸಭ।

ಸಿಙ್ಗಂಖುರಞ್ಚ ಏತೇಸಂ, ಛೇದಾಪಯತ ಭೋ’’ಇತಿ॥

೪೩.

ಮಾತುಯಾ ಅಥ ಸಞ್ಞತ್ತೋ, ಸೀಸಚ್ಛೇದಂ ನಿವಾರಿಯ।

ನಾಸಞ್ಚ ಪಾದಙ್ಗುಟ್ಠಞ್ಚ, ತೇಸಂ ರಾಜಾ ಅಛೇದಯಿ॥

೪೪.

ಹತ್ಥಿವುತ್ಥಂ ಜನಪದಂ, ಅದಾ ಹತ್ಥಿಸ್ಸ ಖತ್ತಿಯೋ।

ಹತ್ಥಿಭೋಗೋ ಜನಪದೋ, ಇತಿ ತೇನಾಸಿ ನಾಮತೋ॥

೪೫.

ಏವಂ ಅನುರಾಧಪುರೇ, ಇಳಾನಾಗೋ ಮಹೀಪತಿ।

ಛಬ್ಬಸ್ಸಾನಿ ಅನುನಾನಿ, ರಜ್ಜಂ ಕಾರೇಸಿ ಖತ್ತಿಯೋ॥

೪೬.

ಇಳನಾಗಚ್ಚಯೇ ತಸ್ಸ, ಪುತ್ತೋ ಚನ್ದಮುಖೋಸಿವೋ।

ಅಟ್ಠವಸ್ಸಂ ಸತ್ತಮಾಸಂ, ರಾಜಾ ರಜ್ಜಮಕಾರಯಿ॥

೪೭.

ಮಣಿಕಾರಗಾಮೇ ವಾಪಿ, ಕಾರಾಪೇತ್ವಾ ಮಹೀಪತಿ।

ಇಸ್ಸರಸಮಣವ್ಹಸ್ಸ, ವಿಹಾರಸ್ಸ ಅದಾಸಿ ಸೋ॥

೪೮.

ತಸ್ಸ ರಞ್ಞೋ ಮಹೇಸೀ ಚ, ಸಙ್ಗಾಮೇ ಪತ್ತಿಮತ್ತನೋ।

ತಸ್ಸೇವಾ’ದಾ ವಿಹಾರಸ್ಸ, ದಮಿಳದೇವೀತಿ ವಿಸ್ಸುತಾ॥

೪೯.

ತಂ ತಿಸ್ಸವಾಪೀ ಕೀಳಾಯ, ಹನ್ತ್ವಾ ಚನ್ದಮುಖಂ ಸಿವಂ।

ಯಸಳಾಲಕತಿಸ್ಸೋ’ತಿ, ವಿಸ್ಸುತೋ ತಙ್ಕನಿಟ್ಠಕೋ॥

೫೦.

ಅನುರಾಧಪುರೇ ರಮ್ಮೇ, ಲಙ್ಕಾಭುವದನೇ ಸುಭೇ।

ಸತ್ತವಸ್ಸಾನಟ್ಠಮಾಸೇ, ರಾಜಾ ರಜ್ಜಮಕಾರಯಿ॥

೫೧.

ದೋವಿರಿಕಸ್ಸ ದತ್ತಸ್ಸ, ಪುತ್ಥೋ ದೋವಾರಿಕೋ ಸಯಂ।

ರಞ್ಞೋ ಸದಿಸರೂಪೇನ, ಅಹೋಸಿ ಸುಭನಾಮವಾ॥

೫೨.

ಸುಭಂ ಬಲತ್ಥಂ ತಂ ರಾಜಾ, ರಾಜಭೂಸಾಯ ಭೂಸಿಯ।

ನಿಸಿದಾಪಿಯ ಪಲ್ಲಙ್ಕೇ, ಹಾಸತ್ಥಂ ಯಸಳಾಲಕೋ॥

೫೩.

ಸೀಸಚೋಳಂ ಬಲತ್ಥಸ್ಸ, ಸಸೀಸೇ ಪಟಿಮುಞ್ಚಿಯ।

ಯಟ್ಠಿಂ ಗಹೇತ್ವಾ ಹತ್ಥೇನ, ದ್ವಾರಮೂಲೇ ಠಿತೋ ಸಯಂ॥

೫೪.

ವನ್ದನ್ತೇಸು ಅಮಚ್ಚೇಸು, ನಿಸಿನ್ನಂ ಆಸನಮ್ಹಿ ತಂ।

ರಾಜಾ ಹಸತಿ ಏವಂ ಸೋ, ಕುರುತೇ ಅನ್ತರನ್ತರಾ॥

೫೫.

‘‘ಬಲತ್ಥೋ ಏಕದಿವಸಂ, ರಾಜಾನಂ ಹಸಮಾನಕಂ।

ಅಯಂ ಬಲತ್ಥೋ ಕಸ್ಮಾ ಮೇ, ಸಮ್ಮುಖಾಹಸತೀ’’ತಿ ಸೋ॥

೫೬.

ಮಾರಾಪಯಿತ್ವಾ ರಾಜಾನಂ, ಬಲತ್ಥೋ ಸೋ ಸುಭೋ ಇಧ।

ರಜ್ಜಂ ಕಾರೇಸಿ ಛಬ್ಬಸ್ಸಂ, ಸುಭರಾಜಾತಿ ವಿಸ್ಸುತೋ॥

೫೭.

ದ್ವಿಸು ಮಹಾವಿಹಾರೇಸು, ಸುಭರಾಜಾ ಮನೋರಮಂ।

ಪರಿವೇಣಪನ್ತಿಂ ಸುಭ-ನಾಮಕಂಯೇವ ಕಾರಯಿ॥

೫೮.

ಉರುವೇಲಸಮೀಪಮ್ಹಿ, ತಥಾ ವೇಲ್ಲಿವಿಹಾರಕಂ।

ಪುರತ್ಥಿಮೇ ಏಕದ್ವಾರಂ, ಗಙ್ಗನ್ತೇ ನನ್ದಿಗಾಮಕಂ॥

೫೯.

ಲಮ್ಬಕಣ್ಣಸುತೋ ಏಕೋ, ಉತ್ತರಪಸ್ಸವಾಸಿಕೋ।

ಸೇನಾಪತಿಮುಪಟ್ಠಾಸಿ, ವಸಭೋ ನಾಮ ಮಾತುಲಂ॥

೬೦.

ಹೇಸ್ಸತಿ ವಸಭೋ ನಾಮ, ರಾಜಾ’ತಿ ಸುತಿಯಾಸದಾ।

ಘಾತೇತಿ ರಾಜಾದೀಪಮ್ಹಿ, ಸಬ್ಬೇ ವಸಭನಾಮಕೇ॥

೬೧.

‘‘ರಞ್ಞೋ ದಸ್ಸಾಮ ವಸತಂ, ಇಮ’’ನ್ತಿ ಭರಿಯಾಯ ಸೋ।

ಸೇನಾಪತಿಮನ್ತಯಿತ್ವಾ, ಪಾತೋ ರಾಜಕುಲಂ ಅಗಾ॥

೬೨.

ಗಚ್ಛತೋ ತೇನ ಸಹಸಾ, ತಮ್ಬುಲಂ ಚುಣ್ಣವಜ್ಜಿತಂ।

ಹತ್ಥಮ್ಹಿ ವಸಭಸ್ಸಾ’ದಾ, ತಂ ಸಾಧು ಪರಿರಕ್ಖಿತುಂ॥

೬೩.

ರಾಜಗೇಹಸ್ಸ ದ್ವಾರಮ್ಹಿ, ತಮ್ಬುಲಂ ಚುಣ್ಣವಜ್ಜಿತಂ।

ಸೇನಾಪತಿ ಉದಿಕ್ಖಿತ್ವಾ, ತಂ ಚುಣ್ಣತ್ಥಂ ವಿಸಜ್ಜಯಿ॥

೬೪.

ಸೇನಾಪತಿಸ್ಸ ಭರಿಯಾ, ಚುಣ್ಣತ್ಥಂ ವಸಭಂ ಗತಂ।

ವತ್ವಾ ರಹಸ್ಸಂ ದತ್ವಾ ಚ, ಸಹಸ್ಸಂ ತಂ ಪಲಾಪಯಿ॥

೬೫.

ಮಹಾವಿಹಾರಠಾನಂ ಸೋ, ಗನ್ತ್ವಾನ ವಸಭೋ ಪನ।

ತತ್ಥ ಥೇರೇಹಿ ಖಿರನ್ನ-ವತ್ಥೇಹಿ ಕತಸಙ್ಗಹೋ॥

೬೬.

ತತೋ ಪರಂ ಕುಟ್ಠಿನೋ ಚ, ರಾಜಭಾವಾಯ ನಿಚ್ಛಿತಂ।

ಸುತ್ವಾನ ವಚನಂಹಟ್ಠೋ, ‘‘ಚೋರೋ ಹೇಸ್ಸ’’ನ್ತಿ ನಿಚ್ಛಿತೋ॥

೬೭.

ಲದ್ಧಸಮತ್ಥಪುರಿಸೇ, ಗಾಮಘಾತಂ ತತೋ ಪರಂ।

ಕರೋನ್ತೋ ರೋಹಣಂ ಗನ್ತ್ವಾ, ಕಪಲ್ಲಪುವೋಪದೇಸತೋ॥

೬೮.

ಕಮೇನ ರಟ್ಠಂ ಕಣ್ಹನ್ಥೋ, ಸಮ್ಪತ್ತಬಲವಾಹನೋ।

ಸೋ ರಾಜಾ ದ್ವೀಹಿ ವಸ್ಸೇಹಿ, ಆಗಮ್ಮ ಪುರಸನ್ತಿಕಂ॥

೬೯.

ಸುಭರಾಜಂ ರಣೇ ಹನ್ತ್ವಾ, ವಸಭೋ ಸೋ ಮಹಬ್ಬಲೋ।

ಉಸ್ಸಾಪಯಿ ಪುರೇಭತ್ತಂ, ಮಾತುಲೋ’ಪಿ ರಣೇ ಪತಿ॥

೭೦.

ತಂ ಮಾತುಲಸ್ಸ ಸರಿರಂ, ಪುಬ್ಬಭೂತೋಪಕಾರಿಕಂ।

ಅಕಾಸಿ ವಸಭೋ ರಾಜಾ, ಮಹೇಸಿಂ ಮೇತ್ತನಾಮಿಕಂ॥

೭೧.

ಸೋಹೋರಪಾಠಕಂ ಪುಚ್ಛಿ, ಆಯುಪ್ಪಮಾಣಮತ್ತನೋ।

‘‘ಆಹ ದ್ವಾದಸವಸ್ಸಾನಿ’’, ರಹೋಯೇವಸ್ಸ ಸೋಪಿ ಚ॥

೭೨.

ರಹಸ್ಸಂ ರಕ್ಖಣತ್ಥಾಯ, ಸಹಸ್ಸಂ ತಸ್ಸಾ ದಾಪಿಯ।

ಸಙ್ಘಂ ಸೋ ಸನ್ನಿಪಾತೇತ್ವಾ, ವನ್ದಿತ್ವಾ ಪುಚ್ಛಿ ಭೂಪತಿ॥

೭೩.

‘‘ಸಿಯಾನು ಭನ್ತೇ ಆಯುಸ್ಸ, ವಡ್ಢನಕಾರಣಂ’’ಇತಿ।

‘‘ಅತ್ಥೀ’’ತಿ ಸಙ್ಘೋ ಆಚಿಕ್ಖಿ, ಅನ್ತರಾಯವಿಮೋಚನಂ॥

೭೪.

ಪರಿಸ್ಸಾವನದಾನಞ್ಚ, ಆವಾಸದಾನ ಮೇವ ಚ।

ಗಿಲಾನವತ್ತದಾನಞ್ಚ, ದಾತಬ್ಬಂ ಮನುಜಾಧಿಪ॥

೭೫.

‘‘ಕಾತಬ್ಬಂ ಜಿಣ್ಣಕಾವಾಸ-ಪಟಿಸಙ್ಖರಣಂ ತಥಾ।

ಪಞ್ಚಸೀಲಸಮಾದಾನಂ, ಕತ್ವಾ ತಂ ಸಾಧುರಕ್ಖಿಯಂ॥

೭೬.

ಉಪೋಸಥೂಪವಾಸೋ ಚ, ಕತ್ತಬ್ಬೋ’ ಪೋಸಥೇ’’ಇತಿ।

ರಾಜಾ ಸಾಧೂತಿ ಗನ್ತ್ವಾನ, ತಥಾ ಸಬ್ಬಂ ಮಕಾಸಿ ಸೋ॥

೭೭.

ತಿಣ್ಣಂ ತಿಣ್ಣಞ್ಚ ವಸ್ಸಾನಂ, ಅಚ್ಚಯೇನ ಮಹೀಪತಿ।

ದೀಪಮ್ಹಿ ಸಬ್ಬಸಙ್ಘಸ್ಸ, ತಿಚೀವರಮದಾಪಯಿ॥

೭೮.

ಅನಾಗತಾನಂ ಥೇರಾನಂ, ಪೇಸಯಿತ್ವಾನ ದಾಪಯಿ।

ದ್ವತ್ತಿಂಸಾಯಹಿ ಠಾನೇಸು, ದಾಪೇಸಿ ಮಧುಪಾಯಸಂ॥

೭೯.

ಚತುಸಟ್ಠಿಯಾ ಚ ಠಾನೇಸು, ಮಹಾದಾನಂತು ಮಿಸ್ಸಕಂ।

ಸಹಸ್ಸವಟ್ಟಿ ಚತುಸು, ಠಾನೇಸು ಚ ಜಲಾಪಯಿ॥

೮೦.

ಚೇತಿಯಪಬ್ಬತೇ ಚೇವ, ಥೂಪಾರಾಮೇ ಚ ಚೇತಿಯೇ।

ಮಹಾಥೂಪೇ ಮಹಾಬೋಧಿ-ಘರೇ ಇತಿ ಇಮೇಸು ಹಿ॥

೮೧.

ಚಿತ್ತಲಕೂಟೇ ಕಾರೇಸಿ, ದಸಥೂಪೇ ಮನೋರಮೇ।

ದೀಪೇ’ಖಿಲಮ್ಹಿ ಆವಾಸೇ, ಜಿಣ್ಣೇ ಚ ಪಟಿಸಙ್ಖರಿ॥

೮೨.

ವಲ್ಲಿಯೇರವಿಹಾರೇ ಚ, ಥೇರಸ್ಸ ಸೋ ಪಸೀದಿಯ।

ಮಹಾವಲ್ಲಿಗೋತ್ತಂ ನಾಮ, ವಿಹಾರಞ್ಚ ಅಕಾರಯಿ॥

೮೩.

ಕಾರೇಸಿ ಅನುರಾರಾಮಂ, ಮಹಾಗಾಮಸ್ಸ ಸನ್ತಿಕೇ।

ಹೇಳಿಗಾಮಟ್ಠಕರಿಸ, ಸಹಸ್ಸಂ ತಸ್ಸ ದಾಪಯಿ॥

೮೪.

ಮುಚೇಲವಿಹಾರಂ ಕಾರೇತ್ವಾ, ಸೋ ತಿಸ್ಸವಡ್ಢಮಾನಕೇ।

ಆಳಿಸಾರೋದಕಭಾಗಂ, ವಿಹಾರಸ್ಸ ಅದಾಪಯಿ॥

೮೫.

ಕಲಮ್ಬತಿತ್ಥೇ ಥೂಪಮ್ಹಿ, ಕಾರೇಸಿಟ್ಠಿಕಕಞ್ಚುಕಂ।

ಕಾರೇಸುಪೋಸಥಾ ಗಾರಂ, ವಟ್ಟಿತೇಲತ್ಥ ಮಸ್ಸತು॥

೮೬.

ಸಹಸ್ಸಕರೀಸವಾಪಿಂಸೋ , ಕಾರಾಪೇತ್ವಾ ಅದಾಸಿ ಚ।

ಕಾರೇಸುಪೋಸಥಾಗಾರಂ, ವಿಹಾರೇ ಕುಮ್ಭಿಗಲ್ಲಕೇ॥

೮೭.

ಸೋಯೇ’ವು ಪೋಸಥಾಗಾರಂ, ಇಸ್ಸರಸಮಣಕೇ ಇಧ।

ಥೂಪಾರಾಮೇಥೂಪಘರಂ, ಕಾರಾಪೇಸಿ ಮಹೀಪತಿ॥

೮೮.

ಮಹಾವಿಹಾರೇ ಪರಿವೇಣ, ಪನ್ತಿಂ ಪಚ್ಛಿಮಪೇಕ್ಖಿನಿಂ।

ಕಾರೇಸಿ ಚ ಚತುಸಾಲಞ್ಚ, ಜಿಣ್ಣಕಂ ಪಟಿಸಙ್ಖರಿ॥

೮೯.

ಚತುಬುದ್ಧಪಟಿಮಾರಮ್ಮಂ, ಪಟಿಮಾನಂಘರಂತಥಾ।

ಮಹಾಬೋಧಿಙ್ಗಣೇ ರಮ್ಮೇ, ರಾಜಾ ಸೋಯೇವ ಕಾರಯಿ॥

೯೦.

ತಸ್ಸ ರಞ್ಞೋ ಮಹೇಸೀ ಸಾ, ವುತ್ತನಾಮಾ ಮನೋರಮಂ।

ಥೂಪಂ ಥೂಪಘರಞ್ಚೇವ, ರಮ್ಮಂ ತಥೇವ ಕಾರಯಿ॥

೯೧.

ಥೂಪಾರಾಮೇ ಥೂಪಘರಂ, ನಿಟ್ಠಾಪೇತ್ವಾ ಮಹೀಪತಿ।

ತಸ್ಸ ನಿಟ್ಠಾಪಿತಮಹೇ, ಮಹಾದಾನಮದಾಸಿ ಚ॥

೯೨.

ಯುತ್ತಾನಂ ಬುದ್ಧವಚನೇ, ಭಿಕ್ಖೂನಂ ಪಚ್ಚಯಮ್ಪಿ ಚ।

ಭಿಕ್ಖೂನಂ ಧಮ್ಮಕಥಿಕಾನಂ, ಸಪ್ಪಿಫಾಣಿತಮೇವ ಚ॥

೯೩.

ನಗರಸ್ಸ ಚತುದ್ವಾರೇ, ಕಪಣವಟ್ಟಞ್ಚ ದಾಪಯಿ।

ಗಿಲಾನಾನಞ್ಚ ಭಿಕ್ಖೂನಂ, ಗಿಲಾನವಟ್ಟಮೇವ ಚ॥

೯೪.

ಮಯೇತ್ತಿಂ ರಾಜುಪ್ಪಲವಾಪಿಂ, ವಹಕೋಲಮ್ಬಗಾಮಕಂ।

ಮಹಾನಿಕ ವಿತ್ತವಾಪಿಂ, ಮಹಾರಾಮೋತ್ತಿ ಮೇವ ಚ॥

೯೫.

ಕೇಹಾಲಂ ಕಾಳಿವಾಪಿಞ್ಚ, ಚಮ್ಬುಟ್ಠಿಂ ವಾತಮಙ್ಗನಂ।

ಅಭಿವಡ್ಢಮಾನಕಞ್ಚ, ಇಚ್ಚೇಕಾದಸ ವಾಪಿಯೋ॥

೯೬.

ದ್ವಾದಸ ಮಾತಿಕಾ ಚೇವ, ಸುಭಿಕ್ಖತ್ಥಮಕಾರಯಿ।

ಗುತ್ತತ್ಥ ಪುರಪಾಕಾರಂ, ಚೇವ ಮುಚ್ಚಮಕಾರಯಿ॥

೯೭.

ಗೋಪುರಞ್ಚ ಚತುದ್ವಾರೇ, ಮಹಾವತ್ಥುಞ್ಚ ಕಾರಯಿ।

ಸರಂ ಕಾರೇಸಿ ಉಯ್ಯಾನೇ, ಹಂಸೇತತ್ಥವಿಸಜ್ಜಯಿ॥

೯೮.

ಪುರೇ ಬಹೂ ಪೋಕ್ಖರಣೀ, ಕಾರಾಪೇತ್ವಾ ತಹಿಂ ತಹಿಂ।

ಉಮ್ಮಗ್ಗೇನ ಜಲಂ ತತ್ಥ, ಪವೇಸೇಸಿ ಮಹೀಪತಿ॥

೯೯.

ಏವಂ ನಾನಾವಿಧಂ ಪುಞ್ಞಂ, ಕತ್ವಾ ವಸಭಭೂಪತಿ।

ಹತನ್ತರಾಯೋ ಸೋ ಹುತ್ವಾ, ಪುಞ್ಞಕಮ್ಮೇ ಸದಾದರೋ॥

೧೦೦.

ಚತುತ್ತಾಸೀಸವಸ್ಸಾನಿ, ಪುರೇ ರಜ್ಜಮಕಾರಯಿ।

ಚತುತ್ತಾಲೀಸವೇಸಾಖ, ಪೂಜಾ ಯೋ ಚ ಅಕಾರಯಿ॥

೧೦೧.

ಸುಭರಾಜಾ ಧರನ್ತೋ ಸೋ, ಅತ್ತನೋ ಏಕಧೀತರಂ।

ವಸಭೇನ ಭಯಾಸಂಕೀ, ಅಪ್ಪೇಸಿ’ಠಿಕ ವಡ್ಢಕಿಂ॥

೧೦೨.

ಅತ್ತನೋ ಕಮ್ಬಲಞ್ಚೇವ, ರಾಜಾ ಭಣ್ಡಾನಿ ಚ’ಪ್ಪಯಿ।

ವಸಭೇನ ಹತೇ ತಸ್ಮಿಂ, ತಮಾದಾಸಿಟ್ಠವಡ್ಢಕೀ॥

೧೦೩.

ಧೀತಿಠಾನೇ ಠಪೇತ್ವಾನ, ವಡ್ಢೇತಿ ಅತ್ತನೋ ಘರೇ।

ಸಕಮ್ಮಂ ಕರತೋ ತಸ್ಸ, ಭತ್ತಂ ಆಹರಿ ದಾರಿಕಾ॥

೧೦೪.

ಸಾ ನಿರೋಧಸಮಾಪನ್ನಂ, ತದಮ್ಬಪುಪ್ಫ ಗುಮ್ಬಕೇ।

ಸತ್ತಮೇ ದಿವಸೇ ದಿಸ್ವಾ, ಭತ್ತಂ ಮೇಧಾವೀನೀ ಅದಾ॥

೧೦೫.

ಪುನ ಭತ್ತಂ ರನ್ಧಯಿತ್ವಾ, ಪಿತುನೋ ಭತ್ತಮಾಹರಿ।

ಪಪಞ್ಚಕಾರಣಂ ಪುಟ್ಠಾ, ತಮತ್ಥಂ ಪಿತುನೋ ವದಿ॥

೧೦೬.

ತುಟ್ಠೋ ಪುನಪ್ಪುನಞ್ಚೇ’ಸೋ, ಭತ್ತಂ ಥೇರಸ್ಸ ದಾಪಯಿ।

ವಿಸ್ಸತ್ಥೋ’ನಾಗತಂ ದಿಸ್ವಾ, ಥೇರೋ ಆಹ ಕುಮಾರಿಕಂ॥

೧೦೭.

‘‘ತವಇಸ್ಸರಿಯೇಜಾತೇ, ಇಮಂ ಠಾನಂ ಕುಮಾರಿಕೇ।

ಸರೇಯ್ಯಾಸೀ’ತಿ ಥೇರೋ ತು, ತದಾ ಚ ಪರಿನಿಬ್ಬುತೋ॥

೧೦೮.

ಸಕೇ ಸೋ ವಸಭೋ ರಾಜಾ, ವಯಪ್ಪತ್ತಮ್ಹಿ ಪುತ್ತಕೇ।

ವಙ್ಕನಾಸಿಕತಿಸ್ಸಮ್ಹಿ, ಕಞ್ಞಂತಸ್ಸಾನುರೂಪಿಕಂ॥

೧೦೯.

ಗವೇಸಾಪೇಸಿ ಪುರಿಸಾ, ತಂ ದಿಸ್ವಾನ ಕುಮಾರಿಕಂ।

ಇಟ್ಠಕವಡ್ಢಕೀಗಾಮೇ, ಇತ್ಥಿಲಕ್ಖಣ ಕೋವಿದಾ॥

೧೧೦.

ರಞ್ಞೋ ನಿವೇದಯುಂ ರಾಜಾ, ತಮಾಣಾಪೇತುಮಾರಭಿ।

ತಸ್ಸಾಹ ರಾಜಧೀತತ್ತಂ, ಇಟ್ಠಕವಡ್ಢಕೀ ತದಾ॥

೧೧೧.

ಸುಭರಞ್ಞೋ ತು ಧೀತತ್ತಂ, ಕಮ್ಬಲಾದೀಹಿ ಞಾಪಯಿ।

ರಾಜಾ ತುಟ್ಠೋ ಸುತಸ್ಸಾ’ದಾ, ತಂ ಸಾಧು ಕತಮಙ್ಗಲಂ॥

೧೧೨.

ವಸಭಸ್ಸಚ್ಚಯೇ ಪುತ್ತೋ, ವಙ್ಕನಾಸಿಕ ತಿಸ್ಸಕೋ।

ಅನುರಾಧಪುರೇ ರಜ್ಜಂ, ತೀಣಿ ವಸ್ಸಾನಿ ಕಾರಯಿ॥

೧೧೩.

ಸೋ ಗೋಣನದಿಯಾ ತೀರೇ, ಮಹಾಮಙ್ಗಲನಾಮಕಂ।

ವಿಹಾರಂ ಕಾರಯಿ ರಾಜಾ, ವಙ್ಕನಾಸಿಕತಿಸ್ಸಕೋ॥

೧೧೪.

ಮಹಾಮತ್ತಾ ತು ದೇವೀ ಸಾ, ಸರನ್ತೀ ಥೇರಭಾಸಿತಂ।

ವಿಹಾರಕಾರಣತ್ಥಾಯ, ಅಕಾಸಿ ಧನಸಞ್ಚಯಂ॥

೧೧೫.

ವಙ್ಕನಾಸಿಕತಿಸ್ಸಸ್ಸ, ಅಚ್ಚಯೇ ಕಾರಯೀ ಸುತೋ।

ರಜ್ಜಂ ಬಾವೀಸವಸ್ಸಾನಿ, ಗಜ್ಜಬಾಹುಕಗಾಮಣಿ॥

೧೧೬.

ಸುತ್ವಾ ಸೋ ಮಾತುವಚನಂ, ಮಾತುದತ್ಥಾಯ ಕಾರಯಿ।

ಕದಮ್ಬಪುಪ್ಫಠಾನಮ್ಹಿ, ರಾಜಮಾತುವಿಹಾರಕಂ॥

೧೧೭.

ಮಾತಾ ಸತಸಹಸ್ಸಂ ಸಾ, ಭೂಮಿಅತ್ಥೋಯ ಪಣ್ಡಿತಾ।

ಅದಾ ಮಹಾವಿಹಾರಸ್ಸ, ವಿಹಾರಞ್ಚ ಅಕಾರ ಯಿ॥

೧೧೮.

ಸಯಮೇವ ಅಕಾರೇಸಿ, ತತ್ಥ ಥೂಪಂ ಸಿಲಾಮಯಂ।

ಸಙ್ಘಭೋಗಞ್ಚ ಪಾದಾಸಿ, ಕಿಣಿತ್ವಾನ ತತೋ ತತೋ॥

೧೧೯.

ಅಭಯುತ್ತರ ಮಹಾಥೂಪಂ, ವಡ್ಢಾಪೇತ್ವಾ ಚಿತಾಪಯಿ।

ಚತುದ್ವಾರೇ ಚ ತತ್ಥೇವ, ಆದಿಮುಖಮಕಾರಯಿ॥

೧೨೦.

ಗಾಮಣಿತಿಸ್ಸವಾಪಿಂ ಸೋ, ಕಾರಾಪೇತ್ವಾ ಮಹೀಪತಿ।

ಅಭಯಗಿರಿ ವಿಹಾರಸ್ಸ, ಪಾಕವಟ್ಟಾಯ’ದಾಸಿ ಚ॥

೧೨೧.

ಮರಿಚವಟ್ಟಿಕಥೂಪಮ್ಹಿ, ಕಞ್ಚುಕಞ್ಚ ಅಕಾರಯಿ।

ಕಿಣಿತ್ವಾ ಸತಸಹಸ್ಸೇನ, ಸಙ್ಘಭೋಗಮದಾಸಿ ಚ॥

೧೨೨.

ಕಾರೇಸಿ ಪಚ್ಛಿಮೇ ವಸ್ಸೇ, ವಿಹಾರಂ ರಾಮಕವ್ಹಯಂ।

ಮಹೇಜಸನಸಾಲಞ್ಚ, ನಗರಮ್ಹಿ ಅಕಾರಯಿ॥

೧೨೩.

ಗಜಬಾಹುಸ್ಸಚ್ಚಯೇನ, ಸಸುರೋ ತಸ್ಸ ರಾಜಿನೋ।

ರಜ್ಜಂ ಮಹಲ್ಲಕೋ ನಾಗೋ, ಛಬ್ಬಸ್ಸಾನಿ ಅಕಾರಯಿ॥

೧೨೪.

ಪುರತ್ಥಿಮೇ ಪೇಜಲಕಂ, ದಕ್ಖಿಣೇ ಕೋಟಿ ಪಬ್ಬತಂ।

ಪಚ್ಛಿಮೇ ದಕಪಾಸಾಣೇ, ನಾಗದೀಪೇ ಸಾಲಿಪಬ್ಬತಂ॥

೧೨೫.

ಬೀಜಗಾಮೇ ತನವೇಳಿಂ, ರೋಹಣೇ ಜನಪದೇ ಪನ।

ತೋಬ್ಬಲನಾಗಪಬ್ಬತಞ್ಚ, ಅನ್ತೋಟ್ಠೇ ಗಿರಿಹಾಲಿಕಂ॥

೧೨೬.

ಏತೇ ಸತ್ತ ವಿಹಾರೇ ಸೋ, ಮಹಲ್ಲನಾಗಭೂಪತಿ।

ಪರಿತ್ತೇನಪಿ ಕಾಲೇನ, ಕಾರಾಪೇಸಿ ಮಹಾಮತೀ॥

೧೨೭.

ಏವಂ ಅಸಾರೇಹಿ ಧನೇಹಿ ಸಾರಂ,

ಪುಞ್ಞಾನಿ ಕತ್ವಾನ ಬಹೂನಿ ಪಞ್ಞಾ।

ಆದೇನ್ತಿ ಬಾಲಾ ಪನ ಕಾಮ ಹೇತು,

ಬಹೂನಿ ಪಾಪಾನಿ ಕರೋನ್ತಾ ಮೋಹಾ’ತಿ॥

ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ

ದ್ವಾದಸ ರಾಜಕೋ ನಾಮ

ಪಞ್ಚತಿಂಸತಿಮೋ ಪರಿಚ್ಛೇದೋ।