ಚತ್ತಾಲೀಸತಿಮ ಪರಿಚ್ಛೇದ

ಅಟ್ಠರಾಜಕೋ

೧.

ತಸ್ಸಚ್ಚಯೇ ಕುಮಾರಾದಿ-ಧಾತುಸೇನೋತಿ ವಿಸ್ಸುತೋ।

ಅಹು ತಸ್ಸ ಸುತೋ ರಾಜಾ, ದೇವರೂಪೋ ಮಹಾಬಲೋ॥

೨.

ಕಾರಿತೇ ಪಿತರಾ’ಕಾಸಿ, ವಿಹಾರೇ ನವಕಮ್ಮಕಂ।

ಕಾರೇತ್ವಾ ಧಮ್ಮಸಙ್ಗೀತಿಂ ಪರಿಸೋಧೇತಿ ಸಾಸನಂ॥

೩.

ಸನ್ತಪ್ಪೇಸಿ ಮಹಾಸಙ್ಘಂ, ಪಚ್ಚಯೇಹಿ ಚತೂಹಿಪಿ।

ಕತ್ವಾ ಪುಞ್ಞಾನಿ’ನೇಕಾನಿ, ನವಮೇ ಹಾಯನೇ’ತಿಗಾ॥

೪.

ತಿತ್ತಿಸೇನೋ ಸುತೋ ತಸ್ಸ, ರಾಜಾ ಹುತ್ವಾ ಅನೇಕಧಾ।

ಕತ್ವಾ ಪುಞ್ಞಾನಿ ರಜ್ಜಂ ತಂ, ಮಾಸಮ್ಪಿ ನವಮೇ ಜಹಿ॥

೫.

ಸಿವೋ ತಂ ಮಾತುಲೋ ಹನ್ತ್ವಾ, ಹುತ್ವಾ ರಾಜಾ ಅನಪ್ಪಕಂ।

ಪುಞ್ಞಂ ಕತ್ವೋ’ಪತಿಸ್ಸೇನ, ಪಞ್ಚವೀಸ ದಿನೇ ಹತೋ॥

೬.

ಉಪತಿಸ್ಸೋ ತತೋ ಆಸಿ, ರಾಜಾ ಹನ್ತ್ವಾನ ಸೀವಕಂ।

ಮೋಗ್ಗಲ್ಲಾನಸ್ಸ ಭಗಿನೀ, ಸಾಮಿಕೋ ಧಜಿನೀಪತಿ॥

೭.

ರಾಜಾ ಠಾನನ್ತರಾದೀಹಿ, ಕತ್ವಾನ ಜನಸಙ್ಗಹಂ।

ಸೀಲಾಕಾಳಸ್ಸ ಪಾದಾಸಿ, ಸಹ ಭೋ ಕನಧೀವರಂ॥

೮.

ಏಕೋ ಪುತ್ತೋ ಅಹು ರಞ್ಞೋ, ಉಪತಿಸ್ಸಸ್ಸ ಕಸ್ಸಪೋ।

ಸಸೋಳಸ ಸಹಾಯೇಹಿ, ಸೂರೋ ಸೂಪೇಹಿ ಸಞ್ಞುತೋ॥

೯.

ಏಕ ವುತ್ತಿಸಹಾಯೇಹಿ, ದಾನಮಾನ ಮಹಾಧನೋ।

ಧಮ್ಮಟ್ಠೋ ವೀರಿಯಾಜೀವಿ, ಸಾಧು ಜೇಟ್ಠಪಚಾಯಕೋ॥

೧೦.

ಸಿಲಾ ಕಾಳೋತತೋ ರಜ್ಜ-ಲೋಭವಞ್ಚಿತ ಮಾನಸೋ।

ದಕ್ಖಿಣಂ ಮಲಯಂ ಗನ್ತ್ವಾ, ಸಙ್ಗಣ್ಹಿತ್ವಾ ಮಹಾ ಬಲಂ॥

೧೧.

ವಿಲುಮ್ಪಮಾನೋ ಪಚ್ಚನ್ತಿ, ಸಮ್ಪತ್ತೋ ನಗರನ್ತಿಕಂ।

ತಂ ಸುತ್ವಾ ಕಸ್ಸಪೋ ಜೇಟ್ಠೋ, ವರಮಾರುಯ್ಹ ಕುಞ್ಜರಂ॥

೧೨.

ಅಸ್ಸಾ ಸೇತ್ವಾನ ಪಿತರಂ, ಸಮಾದಾಯ ಸಹಾಯಕೇ।

ನಿಕ್ಖಮ್ಮ ನಗರಾ ಗಚ್ಛಿ, ಸಿಲಾಕಾಲಸ್ಸ ದಸ್ಸನಂ॥

೧೩.

ಏವಂ ಸತ್ತ’ಟ್ಠ ವಾರೇಸು, ಪಲಾತೋ ಲೀನವುತ್ತಿಕೋ।

ಹತ್ಥೇ ಕತ್ವಾ ಉಪಾಯೇನ, ದೇಸೇ ಪಾಚಿನ ಪಚ್ಛಿಮೇ॥

೧೪.

ಯುಜ್ಝಿತುಂ ಪುನ ಪಾಚಿನ-ತಿಸ್ಸ ಪಬ್ಬತಮಾಗಮಿ।

ಕಸ್ಸಪೋಪಿ ಸಹಾಯೇಹಿ, ಸದ್ಧಿಮಾರುಯ್ಹ ದನ್ತಿನಂ॥

೧೫.

ತತ್ಥ ಗನ್ತ್ವಾ ಪಲಾಪೇತ್ವಾ, ಚೋರಂ ಪಬ್ಬತಮತ್ಥಕಂ।

ಆರೋಪೇಸಿ ಮಹಾನಾಗಂ, ತೇನಾ’ಸಿ ಗಿರಿಕಸ್ಸಪೋ॥

೧೬.

ಮಾನತ್ಥದ್ಧೋ ಸಿಲಾಕಾಳೋ, ಭಿಯ್ಯೋ ರಟ್ಠಂ ಪಭಿನ್ದಿಯ।

ಸಬ್ಬಂ ಹತ್ಥಗತಂ ಕತ್ವಾ, ಅಜೇಯ್ಯ ಬಲವಾಹನೋ॥

೧೭.

ಆಗಮ್ಮ ನಗರಂ ರುನ್ಧಿ, ಸತ್ಥಾಹಂ ರಾಜಸೇವಕಾ।

ಯುಜ್ಝಿತ್ವಾ ವಿರಲಾ ಆಸುಂ, ತತೋ ಚಿನ್ತೇಸಿ ಕಸ್ಸಪೋ॥

೧೮.

ಏತೇ ನಗರರೋಧೇನ, ಸಬ್ಬೇ ಭಿಜ್ಜನ್ತಿ ಪಾಣಿನೋ।

ಪರಿಹೀನಂ ಬಲಂ ರಾಜಾ, ಅನ್ಧಕೋ ಚ ಮಹಲ್ಲಕೋ॥

೧೯.

ಮೇರುಕನ್ದರಕೇ ಕತ್ವಾ, ಮಾತರಂ ಪಿತರಞ್ಚ ಮೇ।

ಅಙ್ಗಹೇತ್ವಾ ಬಲಂ ಪಚ್ಛಾ, ಚೋರೋ ನಿಗ್ಗಣ್ಹಿ ಯೋ ಇತಿ॥

೨೦.

ರತ್ತಿಯಂ ಸೋ ಸಹಾಯೇ ಚ, ರಾಜಸಾಧನಮೇವಚ।

ಆದಾಯ ಪಿತರೋ ಚೇವ, ಮಲಯಂ ಗನ್ತುಮಾರಭಿ॥

೨೧.

ತದಾ ಮಗ್ಗಮಜಾನನ್ತಾ, ಸಮ್ಮೂಳಾ ಮಗ್ಗದೇಸಕಾ।

ನಗರಸ್ಸ ಸಮೀಪೇವ, ಸಮ್ಭಮಿಂಸು ಇತೋ ತತೋ॥

೨೨.

ಸಿಲಾಕಾಳೋ ಪವತ್ತಿಂ ತಂ, ಸುತ್ವಾ ಸಙ್ಗಮ್ಮ ವೇಗಸಾ।

ಪರಿವಾರೇಸಿ ಸಙ್ಗಾಮೋ, ತತ್ಥ ಭಿಂಸನಕೋ ಅಹು॥

೨೩.

ದೇವಾಸುರರಣಾಕಾರೇ, ವತ್ತಮಾನೇ ಮಹಾಹವೇ।

ಪತಿತೇಸು ಸಹಾಯೇಸು, ಸೀದಮಾನೇ ಮಹಾಗಜೇ॥

೨೪.

ಹತ್ಥಾರೋಹಸ್ಸ ದತ್ವಾ, ಛಿನ್ದಿತ್ವಾ ಸೀಸಮತ್ತನೋ।

ಪುಞ್ಛಿತ್ವಾ ಲೋಹಿತಂ ಕತ್ವಾ, ಕೋಸಿಯಂ ಅಸಿ ಪುತ್ತಿಕಂ॥

೨೫.

ಹತ್ಥಿಕುಮ್ಭೇ ಉಭೋ ಹತ್ಥೇ, ಠಪೇತ್ವಾನ ಅವತ್ಥರಿ।

ಉಪತಿಸ್ಸೋಪಿ ತಂ ಸುತ್ವಾ, ಸೋಕಸಲ್ಲಾಹತೋ ಮರಿ॥

೨೬.

ಏವಂ ದಿಯಡ್ಢವಸ್ಸೇನ, ಉಪತಿಸ್ಸೇ ದಿವಂಗತೇ।

ರಾಜಾ’ಹೋಸಿ ಸಿಲಾಕಾಳೋ, ಪುಬ್ಬನಾಮೇನ ಏಕತೋ॥

೨೭.

ತಂ ಅಮ್ಬಸಾಮಣೇರಾದಿ-ಸಿಲಾಕಾಳೋತಿ ವೋಹರುಂ।

ತಿತ್ಥಂ ತೇರಸವಸ್ಸಾನಿ, ದಿಪಂ ಧಮ್ಮೇನ ಪಾಲಯಿ॥

೨೮.

ಮಹಾಪಾಳಿಮ್ಹಿ ದಾಪೇಸಿ, ಪಚ್ಚಗ್ಘಂ ರಾಜಭೋಜನಂ।

ವೇಜ್ಜಸಾಲಾಸು ಭೋಗೇ ಚ, ವಡ್ಢೇಸಿ ಜನತಾಹಿತೋ॥

೨೯.

ಅನ್ವಹಂ ಪೂಜಯಿ ಬೋಧಿಂ, ಪಟಿಮಾಯೋ ಚ ಕಾರಯಿ।

ಸಬ್ಬೇಸಂ ದೀಪವಾಸೀನಂ, ಭಿಕ್ಖೂನಂ’ದಾ ತಿಚೀವರಂ॥

೩೦.

ಮಾಘಾತಂ ಕಾರಯಿದೀಪೇ, ಸಬ್ಬೇಸಂಯೇವ ಪಾಣಿನಂ।

ಆನಿತಂ ಅತ್ತನಾ ಕೇಸ-ಧಾತುಂ ಸಮ್ಮಾ ಅಪೂಜಯಿ॥

೩೧.

ರಹೇರದಕವಾರಞ್ಚ, ಅದಾಸಿ ಅಭಯುತ್ತರೇ।

ಪುರತ್ಥಿಮಾ ಥೇರೀಯಾನಂ, ವಿಹಾರಕುನ್ಥನಾಮ ಸೋ॥

೩೨.

ಆನೇತ್ವಾ ಆಸನಂ ತತ್ಥ, ಠಪೇಸಿ ದುಮರಾಜಕೇ।

ಯಾವಜೀವಂ ಪವತ್ತೇಸಿ, ಪುಞ್ಞಕಮ್ಮಮಸಙ್ಖಿಯಂ॥

೩೩.

ಮೋಗ್ಗಲ್ಲಾನೋ ತಥಾ ದಾಠಾ, ಪಭುತಿ ಚೋ’ಪತಿಸ್ಸಕೋ।

ಪುತ್ತೋ ತಸ್ಸಾ’ಸುಮಗ್ಗಸ್ಸ, ದೇಸಂ ದತ್ವಾ ಪುರತ್ಥಿಮಂ॥

೩೪.

ದತ್ವಾ ಠಾನನ್ತರಞ್ಚಾದಿ-ಪಾದಸಞ್ಞಂ ವಿಸಜ್ಜಯಿ।

ಗನ್ತ್ವಾ ತತ್ಥ ವಸಾಹೀತಿ, ಸೋಪಿ ಗನ್ತ್ವಾ ತಹಿಂ ವಸಿ॥

೩೫.

ಠಾನಂ ಮಲಯರಾಜಗ್ಗಂ, ದೇಸಂ ದತ್ವಾನ ದಕ್ಖಿಣಂ।

ರಕ್ಖಣತ್ಥಂ ಸಮುದ್ದಸ್ಸ, ಮಜ್ಝಿಮಂ ತು ನಿಯೋಜಯಿ॥

೩೬.

ಉಪತಿಸ್ಸಂ ತು ವಾಸೇಸಿ, ಸನ್ತಿಕೇಯೇವ ಅತ್ತನೋ।

ವಿಸೇಸೇನ ಮಮಾಯನ್ತೋ, ಯೂನಂ ಕಲ್ಯಾನದಸ್ಸನಂ॥

೩೭.

ತಸ್ಸ ದ್ವಾದಸಮೇ ವಸ್ಸೇ, ಇತೋ ಕಾಸಿ ಪುರಂ ಗತೋ।

ಧಮ್ಮಾತು ಮಿಧಾ’ನೇಸಿ, ತತೋ ವಾಣಿಜ ಮಾಣವೋ॥

೩೮.

ರಾಜಾ ದಿಸ್ವಾ’ಸಮತ್ಥೋ ಸೋ, ಧಮ್ಮಾಧಮ್ಮವಿಚಾರಣೇ।

ಹೇಮಸಞ್ಞಾಯ ದೀಪಮ್ಹಿ, ಪತನ್ತೋ ಸಲಭೋ ವಿಯ॥

೩೯.

ಬುದ್ಧಧಮ್ಮೋತಿ ಸಞ್ಞಾಯ, ತಂ ಗಹೇತ್ವಾನ ಸಾಧುಕಂ।

ಕತ್ವಾ ಸಕ್ಕಾರಸಮ್ಮಾನಂ, ಗೇಹೇ ರಾಜಘರನ್ತಿಕೇ॥

೪೦.

ಠಪೇತ್ವಾ ಅನುವಸ್ಸಂ ತು, ನೇತ್ವಾ ಜೇತವನಂ ಮಹಂ।

ಕಾತುಂ ಕಾರೇಸಿ ಚಾರಿತ್ತಂ, ಹಿತಂ ಮನ್ತ್ವಾನ ಪಾಣಿನಂ॥

೪೧.

ಏವಂ ಕತ್ವಾ ಸಿಲಾಕಾಳೋ, ಪುಞ್ಞಕಮ್ಮಮನಪ್ಪಕಂ।

ಪತ್ತೇ ತೇರಸಮೇ ವಸ್ಸೇ, ಯಥಾಕಮ್ಮಮುಪಾಗಮಿ॥

೪೨.

ದಾಠಪ್ಪಭುತಿಕೋ ರಜ್ಜಂ, ಗಹೇತ್ವಾ ಭಾತರಂಸಕಂ।

ಅಕ್ಕಮೋತಿ ನಿವಾರೇನ್ತಂ, ಮಾರಾಪೇಸಿ ವಿಬುದ್ಧಿಕೋ॥

೪೩.

ಮೋಗ್ಗಲ್ಲಾನೋ’ಥ ತಂ ಸುತ್ವಾ, ಅಪ್ಪತ್ತಂ ರಜ್ಜಮಗ್ಗಹಿ।

ಅಕಾರಣೇ ಮೇ ಮಾರೇಸಿ, ಕಣಿಟ್ಠಂ ಧಮ್ಮವಾದೀನಂ॥

೪೪.

ಕಾರಾಪೇಸ್ಸಾಮಹಮ್ಪಜ್ಜ, ರಜ್ಜನ್ತಿ ಪರಿಕುಪ್ಪಿಯ।

ಸಮಾದಾಯ ಮಹಾಸೇನಂ, ಅಗಾರಾಹೇರ ಪಬ್ಬತಂ॥

೪೫.

ರಾಜಾಪಿ ಸುತ್ವಾ ಸನ್ನದ್ಧ-ಬಲಕಾಯೋ ಕರಿನ್ದಕೇ।

ಪಬ್ಬತೇ ಸಿವಿರಂ ಬನ್ಧಿ, ಮೋಗ್ಗಲ್ಲಾನೋ ನಿಸಮ್ಮತಂ॥

೪೬.

ಸಾಪರಾಧಾನ ತೇ ಮೇ ವಾ, ಮನುಸ್ಸಾ ದೀಪವಾಸಿನೋ।

ಏಕಸ್ಮಿಞ್ಚ ಮತೇ ರಜ್ಜ-ಮುಭಿನ್ನಂಯೇವ ನೋಸಿಯಾ॥

೪೭.

ತಸ್ಮಾ ಅಞ್ಞೇನ ಯುಜ್ಝನ್ತು, ಉಭೋಯೇವ ಮಯಂ ಇಧ।

ಹತ್ಥಿಯುದ್ಧಂ ಕರೋಮಾತಿ, ರಞ್ಞೋ ಪೇಸೇಸಿ ಸಾಸನಂ॥

೪೮.

ಸೋಪಿ ಸಾಧೂತಿ ವತ್ವಾನ, ಬದ್ಧಪಞ್ಚಾಯುಧೋ ಗಜಂ।

ಆರುಯ್ಹ ಮುನಿನೋ ಮಾರೋ ವಿಯ ಓತ್ಥರಿ ತಾವದೇ॥

೪೯.

ಮೋಗ್ಗಲ್ಲಾನೋಪಿ ಸನ್ನದ್ಧೋ, ಆರುಯ್ಹ ಕರೀನಂ ವರಂ।

ತತ್ಥಾ’ಗೋ ಅಞ್ಞಮಞ್ಞಂ ತೇ, ಪಾಪುಣಿಂಸು ಮಹಾಗಜಾ॥

೫೦.

ಸದ್ದೋ ಸೂಯಿತ್ಥ ಸಙ್ಘಟ್ಟೇ, ಅಸನಿರಾವ ಸನ್ನಿಭೋ।

ದನ್ತಘಾತೇನ ಉಟ್ಠಾಸಿ, ಜಾಲಾ ವಿಜ್ಜುಲ್ಲತಾ ವಿಯ॥

೫೧.

ಸಞ್ಝಾಘನಸಭಾಗಾ’ಸುಂ, ಗಜಾ ಲೋಹಿತಮಕ್ಖಿತಾ।

ಮೋಗ್ಗಲ್ಲಾನಗಜಾವಿದ್ಧೋ, ರಞ್ಞೋಓಸಕ್ಕಿ ಕುಞ್ಜರೋ॥

೫೨.

ರಾಜಾ ಆರಭಿ ತಂ ದಿಸ್ವಾ, ಛಿನ್ದಿತುಂ ಸೀಸಮತ್ತನೋ।

ಮೋಗ್ಗಲ್ಲಾನೋ’ಥ ವನ್ದನ್ತೋ, ಯಾಚಿ’ಮೇ’ವಂ ಕಿರೀಇತಿ॥

೫೩.

ಯಾಚಮಾನೇಪಿ ಸೋಮಾನಂ, ಮಾನೇನ್ತೋ ಛಿನ್ದಿಕನ್ಧರಂ।

ಛಡ್ಡೇಸಿ ಛಹಿ ಸೋ ರಜ್ಜಂ, ಮಾಸೇಹಿ ದಿವಸೇಹಿ ಚ॥

೫೪.

ಮೋಗ್ಗಲ್ಲಾನೋ ತತೋ ರಾಜಾ, ಆಸಿ ದೀಪೇ ಮಹಾಬಲೋ।

ಮಾತುಲಞ್ಚ ಪಟಿಚ್ಚೇಮಂ, ಚೂಲನಾಮೇನ ವೋಹರುಂ॥

೫೫.

ಆಸಾಧಾರಣಕಾವೇಯ್ಯೋ, ವತ್ಥುತ್ತಯ ಪರಾಯಣೋ।

ದಾನಸಂಯಮ ಸೋಚೇಯ್ಯೋ, ಸೋರಚ್ಚಾದಿಗುಣಾಲಯೋ॥

೫೬.

ದಾನೇನ ಪಿಯವಾಚಾಯ, ಅತ್ಥಸ್ಸ ಚರಿಯಾಯ ಚ।

ಸಮಾನತ್ತಸ್ಸಭಾವೇನ, ಸಙ್ಗಹೇಸಿ ಮಹಾಜನಂ॥

೫೭.

ಪಿಣ್ಡಪಾತವಿಹಾರೇಹಿ, ಭೇಸಜ್ಜಚ್ಛಾದನೇಹಿ ಚ।

ಭಿಕ್ಖುಸಙ್ಘಞ್ಹಿ ಸಙ್ಗಣ್ಹಿ, ಧಮ್ಮಿಕಾಯ ಚ ಗುತ್ತಿಯಾ॥

೫೮.

ಅತಿರೇಕಾಯ ಪೂಜಾಯ, ಪೂಜೇತ್ವಾ ಧಮ್ಮಭಾಣಕೇ।

ಪಿಟಕೇ ತೀಣಿ ವಾಚೇಸಿ, ಸದ್ಧಿಮಟ್ಠಕಥಾಯ ಸೋ॥

೫೯.

ಕುಮಾರೇ ಉಪಲಾಲೇತ್ವಾ, ನಿವಾಪೇನ ಯಥಾರುಚಿಂ।

ಸಜ್ಝಾಪೇಸಿ ಸದಾ ಧಮ್ಮಂ, ಧಮ್ಮದೀಪೋ ಮಹಾಮತಿ॥

೬೦.

ಧಮ್ಮದೀಪಞ್ಚ ಸೋ ಕತ್ವಾ, ಕುಞ್ಜರಸೇಖರೇನಿ ಸಾ।

ಧಮ್ಮಾವಾಸಾನೇ ವಾಚೇಸಿ, ಪುರಮ್ಹಿ ಪುರಿಸುತ್ತಮೋ॥

೬೧.

ಬನ್ಧಾಪೇಸಿ ಕದಮ್ಬಞ್ಚ, ನದಿಂಪಬ್ಬತಮಜ್ಝತೋ।

ಪತ್ತಪಸಾಣವಾಪಿಞ್ಚ, ಧನವಾಪಿಂ ಗರಿತರಂ॥

೬೨.

ಗಣ್ಹಾಪೇಸಿ ಸದೀಘಾಯು-ಹೇತು ಕಮ್ಮನ್ತಿ ಸಾದರೋ।

ಲಿಖಾಪೇಸಿ ಚ ಸದ್ಧಮ್ಮಂ, ವತ್ಥುಪೂಜಞ್ಚ ಕಾರಯಿ॥

೬೩.

ಲೋಕಂ ಸೋ ಅನುಕಮ್ಪಿತ್ವಾ, ಮಾತಾಪುತ್ತಂವ ಓರಸಂ।

ದತ್ವಾ ಭುತ್ವಾ ಯಥಾಕಾಮಂ, ವಸ್ಸೇ ವೀಸತಿಮೇ ಮರಿ॥

೬೪.

ಮಹೇಸೀ ತಸ್ಸ ಘಾತೇತ್ವಾ, ವಿಸಯೋಗೇನ ಞಾತಕೇ।

ಪುತ್ತಂ ರಜ್ಜೇ’ಭಿಸಿಞ್ಚಿತ್ವಾ, ಸಯಂ ರಜ್ಜಂ ವಿಚಾರಯಿ॥

೬೫.

ತಥಾಭಿಸಿತ್ತೋ ಸೋ ಕಿತ್ತಿ-ಸಿರಿಮೇಘೋ ನರಾಧಿಪೋ।

ತಿಪುಪತ್ತೇಹಿ ಛಾದೇಸಿ, ದುಮಿನ್ದಧರಮಾದಿತೋ॥

೬೬.

ಕಪಣದ್ಧಿವಣಿಬ್ಬಾನಂ, ಮಹಾದಾನಂ ಪವತ್ತಯಿ।

ಮಗ್ಗಪಾಲೋ ತಥಾಕಾರೋ, ಅಹು ಸಬ್ಬೋಪಭೋಗಿಯೋ॥

೬೭.

ಮಹೇಸೀ ಸಾ ಸದಾ ಆಸಿ, ಪಧಾನಾ ಸಬ್ಬಕಮ್ಮಸು।

ರಜ್ಜಂ ತಸ್ಸಾ’ಸಿ ತೇನೇವ, ಹೇಟ್ಠುಪರಿಯವತ್ತಿಕಂ॥

೬೮.

ರಾಜಾಪಾದಾ ಮಹಾಮಚ್ಚಾ’-ಹೇಸುಂ ಲಞ್ಚಪರಾಯನಾ।

ದುಬ್ಬಲೇ ಚ ವಿಹೇಠೇಸುಂ, ಬಲೀ ಜಾನಪದಾ ನರಾ॥

೬೯.

ಸಿಲಾಕಾಳಸ್ಸ ಕಾಲಮ್ಹಿ, ಗಾಮೇ ಸಙ್ಗಿಲ್ಲನಾಮಕೇ।

ಭಯವಸೀವ್ಹಯೋ ಪೋಸೋ, ಅಹು ಮೋರಿಯವಂಸಜೋ॥

೭೦.

ಅಹೋಸಿ ಪುತ್ತೋ ಸೀವಸ್ಸ, ಅಗ್ಗಬೋಧಿ ಸನಾಮಕೋ।

ಭಾಗಿನೇಯ್ಯೋಪಿ ತಸ್ಸಾಸಿ, ಮಹಾನಾಗೋತಿ ವಿಸ್ಸುತೋ॥

೭೧.

ಭಾಗಿನೇಯೋ ಮಹಾನಾಗೋ, ಅಗ್ಗಬೋಧಿ ಚ ಸುನ್ದರೋ।

ಉಳಾರಜ್ಝಾಸಯತ್ತಾ ಸೋ, ಮಹಾನಾಗೋ ಮಹಬ್ಬಲೋ॥

೭೨.

ಹಿತ್ವಾ ಕಸ್ಸಕಕಮ್ಮಾನಿ, ಚೋರಕಮ್ಮಮಕಾ ವನೇ।

ಗೋಧಂ ಲದ್ಧಾನ ಪೇಸೇಸಿ, ಮಾತುಲಾನಿಯ ಸನ್ತಿಕಂ॥

೭೩.

ಗೋಧಂ ದಿಸ್ವಾ’ವಸಾ ಞತ್ವಾ, ಧಞ್ಞಪಚ್ಛಿಮಪೇಸಯಿ।

ಕಮ್ಮಾರಸ್ಸಾ’ಪಿ ಪೇಸೇಸಿ, ಸಸಂ ಸೋಪಿ ತಥೇವಕಾ॥

೭೪.

ಬೀಜಂ ಭಗಿನೀ ಮಾಯಾಚಿ, ಬೀಜಗಾಹಞ್ಚ ತಸ್ಸ ಸಾ।

ದಾಸಞ್ಚ ಞತ್ವಾ ಪೇಸೇಸಿ, ಅನ್ನಪಾನಾದಿನಾ ರಹೋ॥

೭೫.

ತದಾ ದುಬ್ಭಿಕ್ಖಕಾಲಮ್ಹಿ, ಏಕೋ ಮನ್ತಧರೋ ನರೋ।

ಭಿಕ್ಖಾಲಾಭಾಯ ಸದ್ಧೇಹಿ, ಭಿಕ್ಖುವೇಸೇನ ಭಿಕ್ಖತಿ॥

೭೬.

ತಂ ಗಾಮಂ ಪವಿಸಿತ್ವಾ ಸೋ, ಅಲದ್ಧಾ ಕಿಞ್ಚಿ ಭೋಜನಂ।

ಅಭಿಭೂತೋ ಜಿಘಚ್ಛಾಯ, ಕಮ್ಪಮಾನೋ ನಿಗಚ್ಛತಿ॥

೭೭.

ತಂ ದಿಸ್ವಾ ಕರುಣಾಯನ್ತೋ, ಮಹಾನಾಗೋ ಮಹಾದಯೋ।

ಪತ್ತಮಾದಾಯ ಗಾಮನ್ತ-ಮಾಹಿಣ್ಡಿತ್ವಾಪಿ ಸಬ್ಬಸೋ॥

೭೮.

ಯಾಗುಮತ್ತಮ್ಪಿ ನಾಲತ್ಥ, ತತೋ ಉತ್ತರಸಾಟಕಂ।

ದತ್ವಾ ಆಹರಿ ಆಹಾರಂ, ಸೋ ತಂ ಭುತ್ವಾ ಪಸೀದಿಯ॥

೭೯.

ರಜ್ಜಾರಹಮಿಮಂ ದೀಪೇ, ಕರಿಸ್ಸಾಮೀತಿ ಚಿನ್ತಿಯ।

ತಮಾದಾಯ ಖಣೇನಾ’ಗಾ, ಗೋಕಣ್ಣಕಮಹಣ್ಣವಂ॥

೮೦.

ಅಥ ತತ್ಥ ನಿಸೀದಿತ್ವಾ, ಸಞ್ಜಪನ್ತೋ ಯಥಾವಿಧಿಂಮ।

ಮನ್ತೋನಾ’ನೇಸಿ ನಾಗಿನ್ದಂ, ಫುಸ್ಸಪುಣ್ಣಮರತ್ತಿಯಂ॥

೮೧.

ಮಹಾನಾಗಂ ಫುಸಾಹೀತಿ, ಮಹಾನಾಗಂ ನಿಯೋಜಯಿ।

ಸೋ ಭೀತೋ ಪುರಿಮೇ ಯಾಮೇ, ಆಗತಂ ತಂ ನ ಸಮ್ಭುಸೀ॥

೮೨.

ತಥಾ ಮಜ್ಝಿಮಯಾಮೇಪಿ, ಪಚ್ಛಿಮೇ ಪನ ನಙ್ಗಲೇ।

ಗಹೇತ್ವಾ ಖಿಪಿ ತೀಹೇವ, ಅಙ್ಗುಲೀಹಿ ಸತಂ ಛುಪಿ॥

೮೩.

ಸೋ ತಂ ಬ್ಯಾಕಾಸಿ ತಂ ದಿತ್ವಾ, ಸಬಲಂ ಮೇ ಪರಿಸ್ಸಮಂ।

ತೀಹಿ ರಾಜೂಹಿ ಯುಜ್ಝಿತ್ವಾ, ಚತುತ್ಥಂ ತ್ವಂ ನಿಘಾತಿಯ॥

೮೪.

ವುಡ್ಢೋ ತೀಣೇವ ವಸ್ಸಾನಿ, ರಾಜಾ ಹುತ್ವಾ ನ ಜೀವಸಿ।

ತಥಾ ಹೇಸ್ಸನ್ತಿ ರಾಜಾನೋ, ತಯೋ ತೇ ವಂಸಜಾ ನರಾ॥

೮೫.

ಗನ್ತ್ವಾ ಸೇವಸ್ಸು ರಾಜಾನಂ, ಪಚ್ಛಾ ಪಸ್ಸಸಿ ಮೇಖಲಂ।

ಇತಿ ವತ್ವಾನ ಪೇಸೇಸಿ, ಸೋಪಿ ಗನ್ತ್ವಾ ನರಿಸ್ಸರಂ॥

೮೬.

ಪಸ್ಸಿತ್ವಾ ತಮುಪಟ್ಠಾಸಿ, ರಾಜಾ ರೋಹಣಕಮ್ಮಿಕಂ।

ತಂ ಅಕಾಸಿ ತದುಟ್ಠಾನಂ, ಭಣ್ಡಮಾಹರಿ ಸೋ ಬಹುಂ॥

೮೭.

ರಾಜಾ ತಸ್ಮಿಂ ಪಸೀದಿತ್ವಾ, ಅನ್ಧಸೇನಾಪತಿವ್ಹಯಂ।

ದತ್ವಾ ಠಾನನ್ತರಂ ತಸ್ಸ, ಗನ್ತುಂ ತತ್ಥೇವ ಯೋಜಯಿ॥

೮೮.

ಭಯಸೀವಸ್ಸ ಪುತ್ತಞ್ಚ, ಭಾಗಿನೇಯ್ಯಞ್ಚ ಅತ್ತನೋ।

ಆದಾಯ ಗನ್ತ್ವಾ ತಂ ದೇಸಂ, ಪರಿವತ್ತೇಸಿ ಸಬ್ಬಸೋ॥

೮೯.

ಪಚ್ಚೇಕಭೋಗಂ ಕತ್ವಾನ, ರೋಹಣಂ ತತ್ಥ ಸೋ ವಸಂ।

ದಾಠಪ್ಪಭೂತಿನಾ ಕಾತುಂ, ಯುದ್ಧಂಗನ್ತ್ವಾ ಮಹಬ್ಬಲೋ॥

೯೦.

ಮೋಗ್ಗಲ್ಲಾನಭಯಾ ಗನ್ತ್ವಾ, ರೋಹಣಞ್ಚ ತಹಿಂ ವಸೀ।

ಸುತ್ವಾ ಕಿತ್ತಿಸಿರೀಮೇಘವಣ್ಣ-ರಞ್ಞೋ ರಜ್ಜೇ ಸಮಞ್ಜಸಂ॥

೯೧.

ರಜ್ಜಂ ಗಹೇತುಂ ಕಾಲೋತಿ, ಸೀಘಂ ಆಗಮ್ಮ ರೋಹಣಾ।

ಏಕೂನವಿಸೇ ದಿವಸೇ, ಮಾರಯಿತ್ವಾ ಮಹೀಪತಿಂ॥

೯೨.

ಸಯಂ ಹುತ್ವಾ ಮಹೀಪಾಲೋ, ದೇಸಂ ಕತ್ವಾ ಯಥಾ ಪುರೇ।

ಭಾಗಿನೇಯ್ಯಸ್ಸ ಪಾಹೇಸಿ, ಪಣ್ಣಮಾಗಚ್ಛತೂತಿ ಸೋ॥

೯೩.

ಆಗಚ್ಛನ್ತೋ ನಿಮಿತ್ತೇನ, ನಿವತ್ತಿತ್ವಾ ಮರಿತ್ಥ ಸೋ।

ತತೋ ಮಾತುಲಪುತ್ತಂ’ಕಾ, ಉಪರಜ್ಜಂ ಕತಞ್ಞುಕೋ॥

೯೪.

ಆಲವಾಲಂ ದುಮಿನ್ದಸ್ಸ, ಕತ್ವಾ ಹೇಮಮಯಂ ಘರಂ।

ಛಾದಾಪೇಸಿ ಮುನಿನ್ದಸ್ಸ, ಪಟಿಮಾಯೋ ಚ ಸನ್ದಹಿ॥

೯೫.

ಮಹಾಚೇತಿತ್ತಯೇ ಕಾಸಿ, ಸುಧಾಕಮ್ಮಞ್ಚ ಚುಮ್ಬಟಂ।

ಹತ್ಥಿವೇದಿಞ್ಚ ಕಾರೇತ್ವಾ, ಚಿತ್ತಕಮ್ಮಮಕಾರಯಿ॥

೯೬.

ಪೇಸಕಾರಕಗಾಮಂ ಸೋ, ಜಮ್ಬೇಲವ್ಹಯಮುತ್ತರೇ।

ಮಹಾವಿಹಾರೇಚಾಬನ್ಧಿ, ಗಾಮಂ ತಿನ್ತಿಣಿಕವ್ಹಯಂ॥

೯೭.

ಉದ್ಧಗಾಮಮ್ಹಿ ವಸಭ-ಗಾಮಂ ಜೇತವನಸ್ಸ’ದಾ।

ವತ್ಥದಾನಂ ನಿಕಾಯೇಸು, ತೀಸು ಚೇವ ಪವತ್ತಯಿ॥

೯೮.

ಖೇತ್ತಾನಂ ಹಿಸತಂ ದತ್ವಾ, ವಿಹಾರೇ ಜೇತನಾಮಕೇ।

ಯಾಗುಂ ತತ್ಥ ಪವತ್ತೇಸಿ, ಭಿಕ್ಖೂನಂ ಸಬ್ಬಕಾಲಿಕಂ॥

೯೯.

ಸಹಸ್ಸ ದೂರತಿಸ್ಸವ್ಹಾ, ಖೇತ್ತಂ ದತ್ವಾ ತಪಸ್ಸಿನಂ।

ಮಹಾವಿಹಾರವಾಸೀನಂ, ಯಾಗುಂ ನಿಚ್ಚಂ ಪವತ್ತಯಿ॥

೧೦೦.

ಚಿರಮಾತಿಕವಾರಞ್ಚ, ತತ್ಥೇವ’ದಾ ಗುಣೇ ರತೋ।

ಮಯೂರಪರಿವೇಣೇ ಚ, ನವಕಮ್ಮಮಕಾರಯಿ॥

೧೦೧.

ಕಾಸಿಖಣ್ಡೇ ಮಹಾದೇವ-ರತ್ತಕುರವನಾಮಕೇ।

ವಿಹಾರೇ ಅನುರಾರಾಮಂ, ಜಿಣ್ಣಞ್ಚ ಪಟಿಸಙ್ಖರೀ॥

೧೦೨.

ಕಮಂ ಸೋವಗ್ಗಿಕಂ ಕತ್ವಾ, ಏವಮಾದಿಂ ನರಿಸ್ಸರೋ।

ಅಗಮಾ ತೀಹಿ ವಸ್ಸೇಹಿ, ದೇವರಾಜಸಹಬ್ಯತಂ॥

೧೦೩.

ಅಟ್ಠೇತೇ ಕುಟ್ಠಚಿತ್ತಾ’ಪರಿಮಿತವಿಭವಾ ರಾಜರಾಜೇನರೂಪಾ।

ರಾಜಾನೋ ರಾಜಮಾನಾ ನರಕರಿತುರಗಾಸೂರಸೇನಾರಥೇಹಿ।

ಅನ್ತೇ ಹಿತ್ವಾ’ಖಿಲಂ ತಂ ವಿಗತಪರಿಜನಾ’ಳಾಹನಂ ಸಙ್ಖತಾಸುಂ।

ಸಪ್ಪಞ್ಞೋ ತಂ ಸರನ್ತೋ ಭವತು ಭವಸುಖಂ ವನ್ತುಕಾಮೋ ಹಿತೇಸೀ॥

ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ

ಅಟ್ಠರಾಜಕೋ ನಾಮ

ಚತ್ತಾಲೀಸತಿಮೋ ಪರಿಚ್ಛೇದೋ।