ಸತ್ತಚತ್ತಾಲೀಸತಿಮ ಪರಿಚ್ಛೇದ

ಪಞ್ಚರಾಜಕೋ

೧.

ಅಚ್ಚಯೇ ಪಿತುನೋ ರಾಜಾ, ಉಪರಾಜಾ ಅಹೋಸಿ ಸೋ।

ಸಮತ್ಥೋ ಸಕ್ಕುಮಿತ್ತಾನಂ, ಕಾತುಂ ನಿಗ್ಗಹ ಸಂಗಹೇ॥

೨.

ಸೇನಾ ನಾಮಸಿ ಸಪ್ಪಞ್ಞಾ, ಮಹೇಸೀ ತಸ್ಸ ರಾಜಿನೋ।

ಖುದ್ದಪುತ್ತಾ ಪೀಯಾ’ತೀವ, ರಞ್ಞೋ ಕಲ್ಯಾಣದಸ್ಸನಾ॥

೩.

ಅದಾಸಿ ಯುವರಾಜತ್ತಂ, ಜೇಟ್ಠಪುತ್ತಸ್ಸ ಅತ್ತನೋ।

ಆದಿಪಾದೇ’ಪರೇಕಾಸಿ, ರಾಜಿನೀಪಿ ಚ ಧೀತರೋ॥

೪.

ದತ್ವಾ ಠಾನನ್ತರಂ ರಾಜಾ, ತೇಸಂ ತೇಸಂ ಯಥಾರಹಂ।

ಜನಂ ಸಙ್ಗಹವತ್ಥೂಹಿ, ಸಙ್ಗಹೇಸಿ ಚತೂಹಿಪಿ॥

೫.

ಅಥ ಕೇನಾಪಿ ಸೋ ಗನ್ತ್ವಾ, ಹೇತುನಾ ಮಣಿಹೀರಕಂ।

ವಸನ್ತೋ ಕಿರ ಅಸ್ಸೋಸಿ, ಪಚ್ಚನ್ತೋ ಕುಪಿತೋ ಇತಿ॥

೬.

ತತೋ ಸೇನಾಪತಿಞ್ಚೇವ, ಜೇಟ್ಠಪುತ್ತಞ್ಚ ಅತ್ತನೋ।

ಗನ್ತ್ವಾ ಸಾಧೇಥ ತಂ ದೇಸ-ಮೀತಿ ಪೇಸೇಸಿ ಸಜ್ಜುಕಂ॥

೭.

ತೇಸು ತತ್ಥೋಪಯಾತೇಸು, ಪಿಸುನಾ ಭೇದಚಿನ್ತಕಾ।

ವತ್ವಾ ಯಂಕಿಞ್ಚಿ ಭಿನ್ದಿಂಸು, ತೇ ಉಭೋಪಿ ನರಾಧಿಪೇ॥

೮.

ತತೋ ದ್ವೇ ವೇರಿನೋ ಹುತ್ವಾ, ದೇಸಂ ಗಣ್ಹಿತುಮಾರಭುಂ।

ರಾಜಾ ಸುತ್ವಾ ಖಣೇನೇವ, ದುರತಿಸ್ಸ ಮುಪಾಗಮಿ॥

೯.

ತೇ ಉಭೋ ತತ್ಥ ಘಾತೇತ್ವಾ, ತೇಸಂ ಸಬ್ಬಂ ಸಮಾದಿಯ।

ಹನ್ತ್ವಾ ತಂ ಪಕ್ಖಿಯೇ ಸಬ್ಬೇ, ಪುಳತ್ಥಿನಗರಂ ಗಮಿ॥

೧೦.

ತದಾ ರೋಹಣದೇಸಮ್ಹಿ, ಭೋಗಾಧಿಪತಿನೋ ಸುತೋ।

ದಾಠಾಸಿವಾದಿಪಾದಸ್ಸ, ಮಹಿನ್ದೋ ನಾಮ ಖತ್ತಿಯೋ॥

೧೧.

ಪಿತುನೋ ಸೋ’ಪರಿಜ್ಝಿತ್ವಾ, ರಞ್ಞೋ ಸನ್ತಿಕಮಾಗಮಾ।

ದಿಸ್ವಾ ರಾಜಾಪಿ ಸನ್ತುಟ್ಠೋ, ತಂ ಸಙ್ಗಣ್ಹಿ ಯಥಾರಹಂ॥

೧೨.

ತೇನ ಮೇತ್ತಿಂ ಥಿರಂ ಕಾತುಂ, ಧೀತರಂ ದೇವ ನಾಮಿಕಂ।

ತಸ್ಸ ದತ್ವಾನ ಪಾಹೇಸಿ, ಬಲಂ ರೋಹಣಮೇವಸೋ॥

೧೩.

ಸೋ ಗನ್ತ್ವಾ ರಾಜಸೇನಾಯ, ಮದ್ದಾಪೇತ್ವಾನ ರೋಹಣಂ।

ಜಮ್ಬುದೀಪಂ ಪಲಾಪೇತ್ವಾ, ಪಿತರಂ ರೋಹಣಂ ಲಭಿ॥

೧೪.

ಮಹಾವಿಹಾರೇ ಕಾರೇಸಿ, ಸಲಾಕಗ್ಗಂ ಥಿರಂ ಸುಭಂ।

ಖೋಲಕ್ಖಿಯಮುನಿನ್ದಸ್ಸ, ಪರಿಹಾರಾಯ ದಾಪಯಿ॥

೧೫.

ಮಹಾನಾಮವ್ಹಯಂ ಗಾಮಂ, ಪೂಜಯಿತ್ವಾ ಯಥಾಬಲಂ।

ವಡ್ಢಮಾನದುಮಿನ್ದಸ್ಸ, ಜಿಣ್ಣಂ ಗೇಹಞ್ಚ ಕಾರಿಯ॥

೧೬.

ರುಕ್ಖಣತ್ಥಾಯ ತಸ್ಸಾ;ದಾ, ಕೋಟ್ಠಾಗಾಮಂ ಬಹುದಯಂ।

ನೀಲಾರಾಮಸ್ಸ ಪಾದಾಸಿ, ಕಾಳುಸ್ಸಂ ನಾಮ ಗಾಮಕಂ॥

೧೭.

ಲೋಹರೂಪಸ್ಸ ಪಾದಾಸಿ, ಆರಾಮಸ್ಸ ಚ ಗಾಮಕಂ।

ಜಿಣ್ಣಞ್ಚ ಪಟಿಸಙ್ಖಾಸಿ, ಪಟಿಮಾಯೋ ಚ ಕಾರಯಿ॥

೧೮.

ಪಾಸಾದೇ ಚೇತಿಯೋ ಚೇವ, ವಿಹಾರೇ ಚ ಅನಪ್ಪಕೇ।

ಪುಳತ್ಥಿನಗರೇ’ಕಾಸಿ, ವೇಜ್ಜಸಾಲಂ ಮಹಾದಯೋ॥

೧೯.

ತಥಾ ಪಣ್ಡಾ ವಿಯಞ್ಚೇವ, ಭೋಗಗಾಮಸಮಾಯುತಂ।

ಪಿಟ್ಠಸಪ್ಪಿನಮನ್ಧಾನಂ, ಸಾಲಾಯೋ ಚ ತಹಿಂ ತಹಿಂ॥

೨೦.

ಪೋತ್ಥಕೇಸು ಲಿಖಾಪೇತ್ವಾ, ಅಟ್ಟೇ ಸಮ್ಮಾ ವಿನಿಚ್ಛಿತೇ।

ರಾಜಗೇಹೇ ಠಪಾಪೇಸಿ, ಉಕ್ಕೋಟನಭಯೇನ ಸೋ॥

೨೧.

ನಾಗವಡ್ಢನನಾಮಸ್ಸ, ಭೋಗಗಾಮೇ ಬಹೂ ಅದಾ।

ಲೇಖೇ’ಪುಬ್ಬೇ ನ ವಾರೇತ್ವಾ, ಪಾಲೇತ್ವಾ ಪುಬ್ಬಸಾಸನಂ॥

೨೨.

ಪಿತರಾ ಚ ಮಹಾದಾನಂ, ಪುಞ್ಞಮಞ್ಞಮ್ಪಿ ವಾ ಕತಂ।

ಸಬ್ಬಂ ತಮವಿನಾಸೇತ್ವಾ, ನಿಚ್ಚಂ ಸೋ ರಕ್ಖಿ ಸಾದರೋ॥

೨೩.

ಮಹೇಸೀ ಚ ಮಹಾರಞ್ಞೋ, ಪುಞ್ಞಾನಿ ಬಹುಕಾರಯಿ।

ಕಣ್ಟಕಂ ಚೇತಿಯಂ ಕಾಸಿ, ದೇವೀ ಚೇತಿಯಪಬ್ಬತೇ॥

೨೪.

ಕಾರೇತ್ವಾ ಜಯಸೇನಞ್ಚ, ಪಬ್ಬತಂ ಗಾಮಿಕಸ್ಸದಾ।

ಭಿಕ್ಖುಸಙ್ಘಸ್ಸ ಸಾ ಗಾಮಂ, ಮಹುಮ್ಮಾರಞ್ಚ ತಸ್ಸ ದಾ॥

೨೫.

ಸಿಲಾಮೇಘವ್ಹಯಂ ಕತ್ವಾ, ಭಿಕ್ಖುನೀನಮುಪಸ್ಸಯಂ।

ಸಿಲಾಮೇಘವ್ಹಯೇ ದಾಸಿ, ಭಿಕ್ಖುನೀನಞ್ಚ ಪಚ್ಚಯೇ॥

೨೬.

ಗಾಮಾಯೇ’ಸುಂ ಪುರಾಕೀತಾ, ವಿಹಾರೋ ತತ್ಥ ಸಾಧನಂ।

ದತ್ವಾ ತೇ ಮೇ ಚಯಿತ್ವಾನ, ವಿಹಾರಸ್ಸೇವ ದಾಪಯಿ॥

೨೭.

ಛಾದಯಿತ್ವಾ ಮಹಾರುಕ್ಖೇ, ಸಬ್ಬೇ ಚೇತಿಯಪಬ್ಬತೇ।

ನಾನಾರಾಗೇ ಧಜೇ ಚೇವ, ಪಟಾಕಾಯೋ ಚ ಪೂಜಯಿ॥

೨೮.

ಪುಬ್ಬಾರಾಮಕಭಾಗಮ್ಪಿ, ಪಾಸಾದಂ ಪಟಿಸಙ್ಖರಿ।

ಉಸ್ಸಾನವಿಟ್ಠಿಂ ದುಬ್ಭೋಗಂ, ಸುಭೋಗಂ ತಸ್ಸ ಕಾರಯಿ॥

೨೯.

ವಿಹಾರಂ ಗಿರಿಭಣ್ಡಞ್ಚ, ನಟ್ಠಂ ಪಾಕತಿಕಂ ಕರಿ।

ಭೋಗಗಾಮೇ ಚ ದಾಪೇಸಿ, ಭಿಕ್ಖೂನಂ ತನ್ನಿವಾಸಿನಂ॥

೩೦.

ಅಮ್ಬುಯ್ಯಾನಮ್ಹಿ ಆವಾಸಂ, ಕತ್ವಾ ದಪ್ಪುಳಪಬ್ಬತಂ।

ಭಿಕ್ಖೂನಂ ತಿಸತಸ್ಸಾ’ದಾ, ಸಮ್ಪನ್ನಚತುಪಚ್ಚಯಂ॥

೩೧.

ಕಾರೇತ್ವಾ ನೀಲಗಲ್ಲಞ್ಚ, ಆರಾಮಂ ಸೋ ಮನೋರಮಂ।

ದಕವಾರಂ ಬಹುಪ್ಪಾದಂ, ತಸ್ಸ ದಾಪೇಸಿ ಕಾರಿಯ॥

೩೨.

ಅರಿಕಾರಿ ವಿಹಾರೇ ಚ, ಪಟಿಸಙ್ಖಾಸಿ ಜಿಣ್ಣಕಂ।

ಸಲಾಕಗ್ಗಞ್ಚ ಪಾಸಾದಂ, ಅಪುಬ್ಬಂಯೇವ ಕಾರಯಿ॥

೩೩.

ವಾಹದೀಪೇ ಸಕಾರೇಸಿ, ಸೇನಗ್ಗಬೋಧಿಪಬ್ಬತಂ।

ಧಮ್ಮಂ ತೀಸು ನಿಕಾಯೇಸು, ವಾಚಯಿತ್ಥ ಬಹುಸ್ಸುತೇ॥

೩೪.

ಗಣ್ಹಾಪೇಸಿ ಚ ಭಿಕ್ಖೂನಂ, ಅಯೋಪತ್ತೇಸು ಗಣ್ಠಿಕೇ।

ಪುಞ್ಞನ್ತಿ ವುತ್ತಂ ಸಬ್ಬಂ ಸೋ, ನ ಕಿಞ್ಚಿ ಪರಿವಜ್ಜಯಿ॥

೩೫.

ಕುಲೀನಾನಮನಾಥಾನಂ, ಇತ್ಥೀನಂ’ದಾ ಪಿಳನ್ಧನಂ।

ಭೋಜನಂ ಭೋಜನತ್ಥೀನಂ, ಬಹು ಸೋ ದಾಸಿ ರತ್ತಿಯಂ॥

೩೬.

ಗುನ್ನಂ ಸಸ್ಸಾನಿ ಪಾದಾಸಿ, ಕಾಕಾದೀನಞ್ಚ ಭತ್ತಕಂ।

ತಣ್ಡುಲಞ್ಚ ಕುಮಾರಾನಂ, ಮಧುಫಾಣಿತಸಂಯುತ್ತಂ॥

೩೭.

ಏವಂ ಪುಞ್ಞಾನಿ ಕತ್ವಾನ, ನರಿನ್ದೋ ಸೋ ಸಪಾರಿಸೋ।

ಭುತ್ವಾ ಪಞ್ಚಸು ವಸ್ಸೇಸು, ಮೇದಿನಿಂ ಸಮ್ಪರಿಚ್ಚಜಿ॥

೩೮.

ತತೋ ತಸ್ಸ ಸುತೋ ಆಸಿ, ಸೀಹಳಾನಂ ರಥೇಸತೋ।

ಸಬ್ಬರೂಪಗುಣೋಪೇತೋ, ಮಹಿನ್ದೋ ನಾಮ ಖತ್ತಿಯೋ॥

೩೯.

ಸೋ ಧಮ್ಮಿಕಸೀಲಾಮೇಘೋ, ಇಚ್ಚಾಸಿ ಧರಣೀತಲೇ।

ಧಮ್ಮದೀಪೋ ಧಮ್ಮಧಜೋ, ಸುದ್ಧಧಮ್ಮಪರಾಯನೋ॥

೪೦.

ಪುಬ್ಬಕೇಹಿ ನರಿನ್ದೇಹಿ, ಕತಂ ಧಮ್ಮಪಥಾನುಗಂ।

ಸಬ್ಬಂ ಕಾಸಿ ಅಹಾಪೇತ್ವಾ, ಅಧಮ್ಮಂ ತು ವಿವಜ್ಜಯಿ॥

೪೧.

ರಾಜಾರತನಪಾಸಾದೇ, ಕಾತುಂ ಸೋ ನವಕಮ್ಮಕಂ।

ಸಬ್ಬಕಾಲೇಸು ದಾಪೇಸಿ, ಗೇಟ್ಠುಮ್ಬದಕವಾರಕಂ॥

೪೨.

ಜಿಣ್ಣಞ್ಚ ಪಟಿಸಙ್ಖಾಸಿ, ಪುಞ್ಞಕಮ್ಮಮಕಾಸಿ ಚ।

ರಜ್ಜಂ ಕತ್ವಾನ ಚತೂಸು, ವಸ್ಸೇಸು ನಿಧನಂ ಗತೋ॥

೪೩.

ಅಗ್ಗಬೋಧಿ ತತೋ ರಾಜಾ, ಛತ್ತಂ ಉಸ್ಸಾಪಯಿ ಪುರೇ।

ಕಾರೇನ್ತೋ ಸಬ್ಬಸತ್ತಾನಂ, ಹಿತಂ ಸುಖಮಸೇಸತೋ॥

೪೪.

ಧಾತುಪೂಜಂ ಸಕಾರೇಸಿ, ಸತ್ಥುಸಬ್ಬಗುಣಾರಹಂ।

ಪಿತಾಮಹಕತಸ್ಸಾ’ಪಿ, ಸಮ್ಬುದ್ಧಸ್ಸ ಮಹಾಮಹಂ॥

೪೫.

ಉದಯಗ್ಗಾದಿಬೋಧಿಞ್ಚ, ಪರಿವೇಣಂ ಸಕಾರಯಿ।

ನಾಮಂ ಗಹೇತ್ವಾ ಪಿತುನೋ, ಅತ್ತನೋ ಚ ನರಾಧಿಪೋ॥

೪೬.

ಸಭೋಗಂ ಪರಿವೇಣಞ್ಚ, ಕತ್ವಾ ತಂ ಭೂತನಾಮಕಂ।

ಸಕಾಚರಿಯಕಸ್ಸಾ’ದಾ, ಭಿಕ್ಖೂನಂ ತಿಸತಸ್ಸ ಚ॥

೪೭.

ರಾಜಸಾಲಾಯ ದಾಪೇಸಿ, ಚೂಳವಾಪಿಯಗಾಮಕಂ।

ಗಾಮದ್ವಯಞ್ಚ ದಾಪೇಸಿ, ಕಾಳೂಲಮಲ್ಲವಾತಕೇ॥

೪೮.

ಪವೇಸಂ ವಿನಿವಾರೇಸಿ, ಉಪೋಸಥದಿನೇಸು ಸೋ।

ಮಚ್ಛಮಂಸಸುರಾದೀನಂ, ಅನ್ತೋನಗರಮತ್ತನೋ॥

೪೯.

ಭಿಕ್ಖೂ ವಾ ಚೇತಿಯೇ ವಾ ಸೋ, ವನ್ದಿತ್ವಾ ನಿಕ್ಖಮಂ ತತೋ।

ವಾಲುಕಾ ಹಾ ವಿನಸ್ಸನ್ತು, ಇತಿ ಪಾದೇಸು ವೋಧಯೀ॥

೫೦.

ಯಂ ಯಂ ಸೋವಗ್ಗಿಯಂ ಕಮ್ಮಂ, ಕಮ್ಮಂ ನಿಸ್ಸರಣವಹಂ।

ವತ್ಥುತ್ತಯೇ ಪಸನ್ನೋ ಸೋ, ಕಮ್ಮಂ ತಂ ಸಬ್ಬಮಾಚರಿ॥

೫೧.

ಮಾತುಪಟ್ಠಾನನಿರತೋ, ರತ್ತಿನ್ದಿವಮಹೋಸಿಸೋ।

ಗನ್ತ್ವಾ ತಸ್ಸಾ ಉಪಟ್ಠಾನಂ, ಪಾತೋವ ಕಿರ ಭೂಪತಿ॥

೫೨.

ಸೀಸಂ ತೇಲೇನ ಮಕ್ಖೇತ್ವಾ, ಉಬ್ಬಟ್ಟೇತ್ವಾನ ಜಲ್ಲಿಕಂ।

ನಖೇ ವಿಸುದ್ಧೇ ಕತ್ವಾನ, ನಹಾಪೇತ್ವಾನ ಸಾದರಂ॥

೫೩.

ಅಚ್ಛಾದೇತ್ವಾ ನವಂ ವತ್ಥಂ, ಸುಖಸಮ್ಫಸ್ಸಮತ್ತನೋ।

ವತ್ಥಂ ಛಡ್ಡಿತಮಾದಾಯ, ಪೇಲ್ಲೇತ್ವಾ ಸಯಮೇವ ತಂ॥

೫೪.

ತಸ್ಸ ತೋಯೇನ ಸಿಞ್ಚಿತ್ವಾ, ಸೀಸಂ ಸಮಕುಟಂ ಸಕಂ।

ಗನ್ಧಮಾಲಾಹಿ ತಂ ಸಮ್ಮಾ, ಚೇತಿಯಂ ವಿಹ ಪೂಜಿಯ॥

೫೫.

ನಮಸ್ಸಿತ್ವಾನ ತಿಕ್ಖತ್ತುಂ, ಕತ್ವಾ ತಂ ಸೋ ಪದಕ್ಖಿಣಂ।

ದಾಪೇತ್ವಾ ಪರಿಸಾಯ’ಸ್ಸಾ, ವತ್ಥಾದೀನಿ ಯಥಾರುಚಿಂ॥

೫೬.

ಸಹತ್ಥೇನೇವ ಭೋಜೇತ್ವಾ, ಭೋಜನಂ ತಂ ಮಹಾರಹಂ।

ಭುತ್ಥಾವಸೇಸಂ ಭುಞ್ಜಿತ್ವಾ, ಸಮಾಕಿರಿಯಮತ್ಥಕೇ॥

೫೭.

ಭೋಜೇತ್ವಾ ಪರಿಸಂ ತಸ್ಸಾ, ರಾಜಭೋಜನಮುತ್ತಮಂ।

ಸಜ್ಜೇತ್ವಾ ವಾಸಗೇಹಞ್ಚ, ಸುಗನ್ಧಪರಿವಾಸಿತಂ॥

೫೮.

ಸಹತ್ಥಾ ಪಞ್ಞಪೇತ್ವಾನ, ಸಯನಂ ತತ್ಥ ಸಾಧುಕಂ।

ಪಾದೇ ಧೋವಿಯ ಮಕ್ಖೇತ್ವಾ, ಗನ್ಧತೇಲೇನ ಸಣ್ಹಕಂ॥

೫೯.

ಸಮ್ಬಾಹೇನ್ತೋ ನಿಸೀದಿತ್ವಾ, ಕತ್ವಾ ನಿದ್ದಮುಪೇತಕಂ।

ಕತ್ವಾ ಪದಕ್ಖಿಣಂ ಮಞ್ಚಂ, ತಿಕ್ಖತ್ತುಂ ಸಾಧುವನ್ದಿಯ॥

೬೦.

ಆರಕ್ಖಕೇ ನಿಯೋಜೇತ್ವಾ, ದಾಸೇಕಮ್ಮಕರೇಪಿ ಚ।

ತಸ್ಸಾ ಪಿಟ್ಠಿಮಕತ್ವಾನ, ಅಪಕ್ಕಮೇವ ಪಿಟ್ಠಿತೋ॥

೬೧.

ಠತ್ವಾ ಅದಸ್ಸನೇ ಠಾನೇ, ತಿಕ್ಖತ್ತುಂ ಪುನ ವನ್ದಿಯ।

ಸನ್ತುಟ್ಠೋ ತೇನ ಕಮ್ಮೇನ, ಸರನ್ತೋ ತಂ ಪುನಪ್ಪುನಂ॥

೬೨.

ಗೇಹಂ ಯಾತಿ ಸಜೀವನ್ತಂ, ಏವಮೇವ ಉಪಟ್ಠಹಿ।

ಏಕದಾ ದಾಸವಾದೇನ, ವನ್ದಿತ್ವಾ ದಾಸಮತ್ತನೋ॥

೬೩.

ತೇನತ್ತನೋ ಕಥಾಪೇಸಿ, ಖಮಾಪೇತುಂ ಸಯಂ ವಚೋ।

ಅತ್ತಾನಂ ಭಿಕ್ಖುಸಙ್ಘಸ್ಸ, ದಾಪಯಿತ್ವಾನ ಮಾತರಾ॥

೬೪.

ಧನಮತ್ಥಗ್ಘನಂ ಞತ್ವಾ, ಭುಜಿಸ್ಸೋ ಆಸಿ ಬುದ್ಧಿಮಾ।

ಏವಂ ಪುಞ್ಞಪರೋ ಹುತ್ವಾ, ಕತ್ವಾ ದೀಪಸ್ಸ ಸಙ್ಗಹಂ॥

೬೫.

ಏಕಾದಸಹಿ ವಸ್ಸೇಹಿ, ದೇವಲೋಕಮುಪಾಗಮಿ।

ತಸ್ಸಾನುಜೋ ದಪ್ಪುಳೋ’ಥ, ರಾಜಾ ಹೋಸಿ ತದಚ್ಚಯೇ॥

೬೬.

ಸಬ್ಬಂ ಪುಬ್ಬಕರಾಜೂನಂ, ಚರಿಯಂ ಸೋ ಸಮಾಚರಿ।

ತದಾ ಮಹಿನ್ದನಾಮಸ್ಸ, ಪುತ್ತಾರೋಹಣಸಾಮಿನೋ॥

೬೭.

ಪಿತರಾ ನಿಹಟಾ’ಗಞ್ಛುಂ, ರಾಜಾನಂ ಮಾತುಲಂ ಸಕಂ।

ಸೋ ತೇ ದಿಸ್ವಾ ಪವತ್ತಿಂ ತಂ, ಸುತ್ವಾ ದತ್ವಾ ಮಹಾಬಲಂ॥

೬೮.

ಪಾಹೇಸಿ ಪಿತರಾ ಯುದ್ಧಂ, ಕಾತುಂ ಬನ್ಧು ಹಿತೇ ರತೇ।

ಮಹಿನ್ದೋಪಿ ತಥಾಭಾವಂ, ವಿದಿತ್ವಾ ರೋಹಣಾಧಿಪೋ॥

೬೯.

ಯುದ್ಧಂ ಪಟಿಪದೇಯೇವ, ತೇಸಂ’ಕಾಸಿ ಮಹಾಬಲೋ।

ತೇ ಉಭೋಪಿ ಪಲಾಯಿಂಸು, ದತ್ವಾ ಸೇನಾಯ ನಾಯಕಂ॥

೭೦.

ಪುನಾಗನ್ತ್ವಾ ಮಹೀಪಾಲಂ, ಸೇವಮಾನಾ ಇಧಾ’ವಸುಂ।

ಪಿತಾಪಿ ತೇನ ಸನ್ತುಟ್ಠೋ, ಅಞ್ಞೇನ ಸಕಬನ್ಧುನಾ॥

೭೧.

ಯುಜ್ಝನ್ತೋ ಮರಣಂ ಗಞ್ಛಿ, ಞಾತಿಸೋಪಿ ಮತೋ ಕಿರ।

ತದಾ’ದಾ ಭಾಗಿನೇಯ್ಯಸ್ಸ, ರಾಜಾ ಕಿತ್ತಗ್ಗಬೋಧಿನೋ॥

೭೨.

ಸಬ್ಬರೂಪಗುಣೋಪೇತಂ, ಧಿತರಂ ದೇವ ನಾಮಿಕಂ।

ಸೋ ದಪ್ಪುಳಂ ಠಪೇತ್ವಾನ, ಸೇವತ್ಥಂ ತಸ್ಸ ರಾಜಿನೋ॥

೭೩.

ಸಯಂ ಸೇನಙ್ಗಮಾದಾಯ, ರೋಹಣಂ ಸಮುಪಾಗಮಿ।

ರೋಹಣಾಧಿಪತಿ ಹುತ್ವಾ, ಸಬ್ಬಾಕಾರಸಮಪ್ಪಿತೋ॥

೭೪.

ಪುತ್ತಧೀತಾಹಿ ವಡ್ಢೇನ್ತೋ, ವಾಸಂ ತತ್ಥೇವ ಕಪ್ಪಯಿ।

ರಾಜಾಕಾಸಿ ದುಮಿನ್ದಸ್ಸ, ಘರಂ ಜಿಣ್ಣಂ ನವಂ ಥಿರಂ॥

೭೫.

ಸೋವಣ್ಣಖಚಿತಂ ಕಮ್ಮಂ, ಮಙ್ಗಲೇನ ಚ ತಸ್ಸ ಸೋ।

ಅತ್ತನೋ ರಾಜಭಾವಸ್ಸ, ಸತ್ಥುಪಾರಮಿತಾಯ ಚ॥

೭೬.

ಸಮ್ಮಾನುಚ್ಛವಿಕಂ ಕತ್ವಾ, ಮಹಾಪೂಜಂ ಪವತ್ತಯಿ।

ಜಿಣ್ಣಂ ಕಾರೇಸಿ ಪಾಸಾದಂ, ಹತ್ಥಿಕುಚ್ಛಿವಿಹಾರಕೇ॥

೭೭.

ವಾಹದೀಪಸ್ಸ ಆರಾಮಂ, ಲಾವರಾವಞ್ಚ ಪಬ್ಬತಂ।

ವಿಹಾರೇ ಜೇತನಾಮೇ ಚ, ಕತ್ವಾ ಸೋವಣ್ಣಯಂ ಮುನಿಂ॥

೭೮.

ವಡ್ಢೇತ್ವಾ ಬೋಧಿಗೇಹಮ್ಹಿ, ಪೂಜಂಕಾಸಿ ಅಚಿನ್ತಿಯಂ।

ಅನುಸಂವಚ್ಛರಂ ದೀಪೇ, ವತ್ಥದಾನಂ ಪವತ್ತಯಿ॥

೭೯.

ಮಹಾಪಾಳಿಞ್ಚ ವಡ್ಢೇಸಿ, ಭತ್ತಗ್ಗಮವಲೋಕಯೀ।

ತುಲಾಭಾರಞ್ಚ ದಾಪೇಸಿ, ಜಿಣ್ಣಞ್ಚ ಪಟಿಸಙ್ಖರಿ॥

೮೦.

ಚಾರಿತ್ತಂ ಪುಬ್ಬರಾಜೂನಂ, ಪಾಲೇಸಿ ಮನವಜ್ಜಿಯಂ।

ತಸ್ಸಾ’ಸಿ ವಜಿರೋ ನಾಮ, ಸೇನಾಪತಿ ಮಹಾಪತಿ॥

೮೧.

ಕಚ್ಛವಾಲಂ ಸಕಾರೇಸಿ, ಆರಾಮಂ ಪಂಸುಕೂಲಿನಂ।

ಥೂಪಾರಾಮಮ್ಹಿ ಥೂಪಸ್ಸ, ಘರಂ ಛಾದೇಸಿ ಸಾಧುಕಂ॥

೮೨.

ಇಟ್ಠಕಾಹಿ ಸುವಣ್ಣಾಹಿ, ಹೇಮದ್ವಾರೇ ಚ ಕಾರಯಿ।

ಏವಂ ಸೋಳಸವಸ್ಸಾನಿ, ಕತ್ವಾ ರಜ್ಜಂ ನರಾಧಿಪೋ॥

೮೩.

ಅಗಮಾ ಸಬ್ಬಸತ್ತಾನಂ, ಗನ್ತಬ್ಬಂ ದೇಸಮೇವ ಸೋ।

ತಸ್ಮಿಂ ರಾಜಿನಿ ಸಮ್ಪತ್ತೇ, ದೇವಲೋಕಂ ತದಾ ಅಹು॥

೮೪.

ಅಗ್ಗಬೋಧಿಸನಾಮೋ’ಥ, ಆಣಾಭೇರಿಂ ಚರಾಪಯಿ।

ಪಿತಾ ತಸ್ಸ ಸಭಾತುಸ್ಸ, ಪುತ್ತಂ ಮಹಿನ್ದನಾಮಕಂ॥

೮೫.

ರಜ್ಜತ್ಥಂ ಸಕಪುತ್ತಾನಂ, ಆದಿಪಾದಂ ನ ಕಾರಯೀ।

ಆದರಂ ಸೋ ಸಬನ್ಧೂನಂ, ಕನಿಟ್ಠಾನಮ್ಪಿ ಕಾತವೇ॥

೮೬.

ಅಸಹನ್ತೋ ಪಲಾಯಿತ್ಥ, ಪರತೀರಂ ಸಮಾಕುಲೋ।

ತೇ ಸಮಾಗಮನಂ ಸುತ್ವಾ, ಪೇಸಯಿತ್ವಾ ಮಹಾಬಲಂ॥

೮೭.

ಕಾರೇತ್ವಾ ಯುದ್ಧಮೇತೇಹಿ, ಸೀಸಂ ತೇಸಂ ಸಗಣ್ಹಯಿ।

ನಿಕಾಯೇಸು ವಿಚಾರೇತ್ವಾ, ಕತ್ತಬ್ಬಂ ಸಬ್ಬಮೇವ ಸೋ॥

೮೮.

ದೀಪೇ’ಪಿ ಸಕಲೇ ಕಾಸಿ, ಪಾಪಾಚಾರನಿವಾರಣಂ।

ಭಿಕ್ಖೂ ಚೂಳವಿಹಾರೇಸು, ಯಾಗುಂ ಗಣ್ಹನ್ತಿ ಸಬ್ಬದಾ॥

೮೯.

ಮಹಾವಿಹಾರೇ ತಂ ಸುತ್ವಾ, ರಾಜಾ ನಿಬ್ಬಿನ್ನಮಾನಸೋ।

ಕಣ್ಠಪಿಟ್ಠಿಮಹಾಗಾಮಂ ತಥಾ ಯಾಬಾಲಗಾಮಕಂ॥

೯೦.

ತೇಲಗಾಮಂ ಬಹುದಞ್ಚ, ದಕವಾರಂ ಪದಾಪಿಯ।

ಯಾಗುಂ ಗಹೇತುಂ ಯೋಜೇಸಿ, ವಿಹಾರೇಸು’ಪಿ ಭಿಕ್ಖವೋ॥

೯೧.

ತತೋ ಪಟ್ಠಾಯ ತಂ ಯಾಗುಂ, ಸಬ್ಬೇ ಗಣ್ಹಿಂಸು ಸಾದರಾ।

ದೀಪೇ ಭೇರಿಂಚ ರಾಪೇತ್ವಾ, ಸನ್ನಿಪಾತಿಯ ಯಾಚಕೇ॥

೯೨.

ಸುವಣ್ಣಂ ಸೋಪದಾಪೇಸಿ, ಯಥಿಚ್ಛಂ ದಿವಸತ್ತಯಂ।

ಏವಮಾದಿಂ ಸ ಕತ್ವಾನ, ಪುಞ್ಞವಂ ವಸ್ಸೇಹಿ ತೀಹಿ ಚ॥

೯೩.

ವತ್ಥುತ್ತಯಪಸಾದಸ್ಸ, ಫಲಂ ಪಸ್ಸಿತುಮತ್ತನೋ।

ರಾಜಾ ದಿಬ್ಬೇನ ಯಾನೇನ, ಗಚ್ಛನ್ತೋ ವಿಯ ಸೋ ಮರಿ॥

೯೪.

ಏವಂ ಅನಿಚ್ಚಾ ವತ ಸಬ್ಬದೇಹಿನೋ।

ಸಬ್ಬಞ್ಞೂನೋಪೇವ ಮುಪೇತಿ ಮಚ್ಚುಂ।

ಪಹಾಯ ತಸ್ಮಾ ಭವರಾಗಜಾತಂ।

ಬುಧೋ ಸುಬುದ್ಧಿವಿಭವೇ ಭವೇಯ್ಯ॥

ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ

ಪಞ್ಚರಾಜಕೋ ನಾಮ

ಸತ್ತಚತ್ತಾಲೀಸತಿಮೋ ಪರಿಚ್ಛೇದೋ।