ಪಞ್ಞಾಸತಿಮ ಪರಿಚ್ಛೇದ

ದ್ವಿರಾಜಕೋನಾಮ

೧.

ತತೋ ರಜ್ಜೇ ಪತಿಟ್ಠಾಯ, ಕಸ್ಸಪೋ ದಕ್ಖಿಣಂ ದಿಸಂ।

ಅದಾ ಕಸ್ಸಪನಾಮಸ್ಸ, ಯುವರಾಜಸ್ಸ ಧೀಮತೋ॥

೨.

ಅಗ್ಗಾಭಿಸೇಕಂ ದಾಪೇಸಿ, ಯುವರಾಜಸ್ಸ ಧೀತುಯಾ।

ರಾಜಕಞ್ಞಾಯ ತಿಸ್ಸಾಯ, ಭರಿಯಾಯೇ’ವ ಅತ್ತನೋ॥

೩.

ಯಾಚಕಾನಞ್ಚ ಸಿಪ್ಪೀನಂ, ಆಗತಾನಂ ತತೋ ತತೋ।

ದಾನಂ ದಣ್ಡಿಸ್ಸರಂ ನಾಮ, ಸದಾ ದಾಪೇಸಿ ಭೂಪತಿ॥

೪.

ಆದಿಪಾದೋ ಮಹಿನ್ದೋ ಸೋ,

ವಸನ್ತೋ ರೋಹಣೇ ತದಾ।

ಗಹೇತುಂ ರಾಜಿನೋರಟ್ಠ-

ಮಾದಾಯ ಬಲಮಾಗತೋ॥

೫.

ತಂ ಸುತ್ವಾ ಕುಪಿತೋ ರಾಜಾ, ಬಲಂ ಪೇಸೇಸಿ ಅತ್ತನೋ।

ಯುಜ್ಝಿತ್ವಾ ತಂ ಪರಾಜೇಸಿ, ಮಹಿನ್ದೋ ಸೋ ಮಹಾಭಟೋ॥

೬.

ತತೋ ರಾಜಾ ನಿವತ್ತೇತುಂ, ಪಿತರಂ ತಸ್ಸ ಪೇಸಯಿ।

ಕಸ್ಸಪಂ ಯುವರಾಜಂ ತಂ, ಸೋ ಗನ್ತ್ವಾ ಪುತ್ತಸನ್ತಿಕಂ॥

೭.

ನಾನಾಧಮ್ಮಕಥೋಪೇತಂ, ವತ್ವಾ ಯುತ್ತಿಮನೇಕಧಾ।

ಸಙ್ಘಾಮತೋ ನಿವತ್ತೇತ್ವಾ, ಪುತ್ತಂ ಸೋ ಪುನರಾಗಮಿ॥

೮.

ಆದಿಪಾದೋ ತು ಸೋ ಪಚ್ಛಾ, ಘಾತೇತ್ವಾ ಮಣ್ಡಲಾಧಿಪೇ।

ಕುದ್ಧೇಜನಪದೇ ದಿಸ್ವಾ, ಅಗಮಾಸಿ ಪುರನ್ತಿಕಂ॥

೯.

ಭಿಕ್ಖುಸಙ್ಘೋ ತಮಾನೇತ್ವಾ, ದಸ್ಸೇಸಿ ವಸುಧಾಧಿಪಂ।

ದತ್ವಾ ಸೋ ಧೀತರಂ ತಸ್ಸಾ, ಪೇಸೇಸಿ ಪುನ ರೋಹಣಂ॥

೧೦.

ನೀಹರಿತ್ವಾನ ದುಸ್ಸೀಲೇ, ನಿಕಾಯತ್ತಯವಾಸೀಸು।

ಗಾಹಾಪೇಸಿ ನವೇ ಭಿಕ್ಖೂ, ಆವಾಸೇ ತತ್ಥ ತತ್ಥ ಸೋ॥

೧೧.

ದ್ವಯಾಭಿಸೇಕಜಾತೇನ, ಆದಿಪಾದೇನ ಸುನುನಾ।

ಮಹಾವಿಹಾರೇ ಬೋಧಿಮ್ಹಿ, ಪಂಸುಂ ವಡ್ಢೇಸಿ ಪೂಜಯಂ॥

೧೨.

ಅಕಾಸಿ ಚ ನಿಕಾಯೇಸು, ತೀಸು ಬಿಮ್ಬೇ ಸಿಲಾಮಯೇ।

ಸೋವಣ್ಣಯೇ ರಂಸಿಜಾಲೇ, ಛತ್ತಂ ಚೂಳಾಮಣಿಂ ತಥಾ॥

೧೩.

ಅಭಯಗಿರಿವಿಹಾರಮ್ಹಿ, ಪಾಸಾದಂ ಸಕನಾಮಕಂ।

ಕತ್ವಾ ತತ್ಥ ನಿವಾಸೇತ್ವಾ, ಭಿಕ್ಖು ಗಾಮಮದಾಪಯಿ॥

೧೪.

ಮಹಿಯಙ್ಗಣವಿಹಾರಸ್ಮಿಂ, ಗಾಮಂ ಸೋ ಚೇತಿಯಸ್ಸ’ದಾ।

ಸವತ್ಥಂ ಪಟಿಮಾಭತ್ತಂ, ಸಬ್ಬಭಿಕ್ಖೂನ ದಾಪಯಿ॥

೧೫.

ಥಲೇ ಜಲೇ ಚ ಸತ್ತಾನಂ, ಅದಾಸಿ ಅಭಯಂ ತದಾ।

ಚಾರಿತ್ತಪುಬ್ಬರಾಜೂನಂ, ಪರಿಪಾಲೇಸಿ ಸಬ್ಬದಾ॥

೧೬.

ತಸ್ಸ ಸೇನಾಪತಿ ಸೇನೋ, ಇಲಙ್ಗೋರಾಜವಂಸಜೋ।

ಥೇರಿಯಾನಂ ಅಕಾ’ವಾಸಂ। ಥೂಪಾರಾಮಸ್ಸ ಪಚ್ಛತೋ॥

೧೭.

ಧಮ್ಮಾರುಚಿಕಭಿಕ್ಖೂನಂ, ಧಮ್ಮಾರಾಮಮಕಾರಯಿ।

ತಥಾ ಸಾಗಲಿಕಾನಞ್ಚ, ಕಸ್ಸಪಸೇನನಾಮಕಂ॥

೧೮.

ಹದಯುಣ್ಹಾಭಿಧಾನಂ ಸೋ, ಕತ್ವಾ ಚೇತಿಯಪಬ್ಬತೇ।

ಪರಿವೇಣಂ ಅದಾಧಮ್ಮ-ರುಚಿಕಾನಞ್ಚ ಭಿಕ್ಖೂನಂ॥

೧೯.

ಆರಾಮಿಕಾನಂ ಭಿಕ್ಖೂನಂ, ಆರಾಮೇಸು ತಹಿಂ ತಹಿಂ।

ಏಕಮೇಕಂ ಕುಟಿಂ ಕತ್ವಾ, ದಾಪೇಸಿ ಚ ಚಮೂಪತಿ॥

೨೦.

ರತ್ತಮಾಲಗಿರಿಸ್ಮಿಂ ಸೋ, ಕತ್ವಾ ರಮ್ಮಂ ತರಂ ಸುಭಂ।

ಕುಚಿಂ ಅದಾ ಸಾಸನಸ್ಸ, ಸಾಮಿಕಾನಂ ತಪಸ್ಸಿನಂ॥

೨೧.

ಮಹಾವಿಹಾರೇ ಕಾರೇತ್ವಾ, ಪವಿವೇಣಂ ವರಂ ಅದಾ।

ಪಂಸುಕೂಲಿಕಭಿಕ್ಖೂನಂ, ಸಮುದ್ದಗಿರಿನಾಮಕಂ॥

೨೨.

ವಾಸಂ ಅರಞ್ಞೇ ಕಾರೇತ್ವಾ, ಅತ್ತನೋ ವಂಸನಾಮಕಂ।

ಮಹಾವಿಹಾರೇ ಭಿಕ್ಖೂನಂ, ವನೇ ನಿವಾಸತಂ ಅದಾ॥

೨೩.

ವಿಹಾರೇಸೂ ಚ ಜಿಣ್ಣೇಸು, ನವಕಮ್ಮಮಕಾರಯಿ।

ದಾಪೇಸಿ ಅಗ್ಗಲಂ ಸಬ್ಬ-ಭಿಕ್ಖೂನಂ ಜಿಣ್ಣಚೀವರೇ॥

೨೪.

ತಿಸ್ಸಾರಾಮಂ ಕರಿತ್ವಾನ, ಭಿಕ್ಖೂನೀನಮುಪಸ್ಸಯಂ।

ಮರಿಚವಟ್ಟಿಮಹಾಬೋಧಿ, ಪರಿಹಾರೇ ನಿವೇಸಯಿ॥

೨೫.

ಅನುರಾಧಪುರೇ ಚೇವ, ಪುಲತ್ಥಿನಗರೇಪಿ ಚ।

ಉಪಸಗ್ಗರೋಗನಾಸಾಯ, ವೇಜ್ಜಸಾಲಾಪಿ ಕಾರಯಿ॥

೨೬.

ಅತ್ತನಾ ಕತವಾಸನಂ, ಭೋಗಗಾಮೇ ಚ ದಾಪಯಿ।

ತಥಾರಾಮಿಕಗಾಮೇ ಚ, ಪಟಿಮಾಭರಣಞ್ಚ ಸೋ॥

೨೭.

ಭೇಸಜ್ಜಗೇಹಂ ಕಾರೇಸಿ, ನಗರೇ ತತ್ಥ ತತ್ಥ ಸೋ।

ಪಂಸುಕೂಲಿಕಭಿಕ್ಖೂನಂ, ಭತ್ತಂ ವತ್ಥಞ್ಚ ದಾಪಯಿ॥

೨೮.

ಖನ್ಧೀಕತೇ ಅಮೋಚೇಸಿ, ತಿರಚ್ಛಾನಗತೇ ಬಹೂ।

ಕಪಣಾನಞ್ಚ ದಾಪೇಸಿ, ಮಹಾದಾನಂ ಚಮೂಪತಿ॥

೨೯.

ವಿಚಿತ್ತಂ ಬ್ಯಞ್ಜನಂ ಭತ್ತಂ, ಯಾಗುಂ ವಿವಿಧಖಜ್ಜಕಂ।

ಕತ್ವಾ ಸೂಕರರೂಪಞ್ಚ, ಗುಳಂ ಭಿಕ್ಖೂನಂ ದಾಪಯಿ॥

೩೦.

ಏವಾಮಾದೀನಿ ಪುಞ್ಞಾನಿ, ಕತ್ವಾ ಸೇನಾಯ ನಾಯಕೋ।

ಸೇನೋ ಕಿತ್ತಿನ್ದುಪಾದೇಹಿ, ಸಬ್ಬಾ ಓಭಾಸಯೀ ದಿಸಾ॥

೩೧.

ತಸ್ಸೇವ ಞಾತಕೋ ಕತ್ವಾ, ನಾಯಕೋ ರಕ್ಖಸವ್ಹಯೋ।

ಸವಾರಕಮ್ಹಿ ಗಾಮಮ್ಹಿ, ವಿಹಾರಂ ಸುಮನೋಹರಂ॥

೩೨.

ಮಹಾವಿಹಾರವಾಸೀನಂ, ಸಾರಾನಂ ಪಟಿಪತ್ತಿಯಾ।

ಭಿಕ್ಖೂನಂ ಸೋ ಅದಾ ಸಾಧು, ಠಪೇತ್ವಾ ವತ್ತಮುತ್ತಮಂ॥

೩೩.

ಸೇನೋ ನಾಮ ಮಹಾಲೇಖೋ, ಮಹಾಲೇಖಕಪಬ್ಬತಂ।

ಮಹಾವಿಹಾರೇ ಕಾರೇಸಿ, ಭಿಕ್ಖೂನಂ ವಾಸಮುತ್ತಮಂ॥

೩೪.

ಚೋಳರಾಜಾಭಿಧಾನೋ, ಚ, ಅಮಚ್ಚೋ ತಸ್ಸ ರಾಜಿನೋ।

ಪರಿವೇಣಂ ಅಕಾರಮ್ಮಂ, ನಟ್ಠಂ ತಂ ಸುಪ್ಪತಿಟ್ಠಿತಂ॥

೩೫.

ರಾಜಾ ತೀಸು ನಿಕಾಯೇಸು, ರೂಪಕಮ್ಮಮನೋರಮಂ।

ಮಣ್ಡಪಾನಿ ವಿಚಿತ್ತಾನಿ, ವೇಜಯನ್ತೋ ಪಮಾನಿ ಚ॥

೩೬.

ಕಾರೇತ್ವಾ ಧಾತುಪೂಜಾಯೋ, ಕತ್ವಾ ಜನಮನೋಹರಾ।

ಯಥಾ ಕಮ್ಮಂ ಗತೋ ಠತ್ವಾ, ವಸ್ಸಾನಿ ದಸಸತ್ತ ಚ॥

೩೭.

ದ್ವಯಾಭಿಸೇಕಸಞ್ಜಾತೋ, ಯುವರಾಜಾಥ ಕಸ್ಸಪೋ।

ಆಸಿ ಲದ್ಧಾಭಿಸೇಕೋ ಸೋ, ಲಂಕಾರಜ್ಜೇಕಮಾಗತೇ॥

೩೮.

ಸದ್ಧೋ ಆಗತಮಗ್ಗೋವ, ಸಾಭಿಞ್ಞೋ ವಿಯ ಪಞ್ಞವಾ।

ವತ್ತಾ ಸೋ ಮರಮನ್ತಿವ, ಚಾಗವಾ ಧನದೋ ವಿಯ॥

೩೯.

ಬಹುಸ್ಸುತೋ ಧಮ್ಮಕಥೀ, ಸಬ್ಬಸಿಪ್ಪವಿಸಾರದೋ।

ಯುತ್ತಾಯುತ್ತವಿಚಾರಾಯ, ನಿಪುಣೋ ನಯಕೋವಿದೋ॥

೪೦.

ಅಚಲೋ ಇನ್ದಲೀಲೋ’ವ, ಠಿತೋ ಸುಗತಸಾಸನೇ।

ಪರಪ್ಪವಾದಿವಾತೇಹಿ, ಸಬ್ಬೇಹಿ’ಪಿ ಅಕಮ್ಪಿಯೋ॥

೪೧.

ಮಾಯಾಸಾಠೇಯ್ಯಮಾನಾದಿ, ಪಾಪಾನಞ್ಚ ಅಗೋಚರೋ।

ಗುಣಾನಂ ಆಕರೋ ಸಬ್ಬ-ರತನಾನಂ ವಸಾಗರೋ॥

೪೨.

ಭೂಮಿಚನ್ದೋ ನರಿನ್ದೋ ಸೋ, ವಂಸೇ ಜಾತಸ್ಸ ಅತ್ತನೋ।

ದಪ್ಪುಳಸ್ಸಾದೀಪಾದಸ್ಸ, ಯುವರಾಜಪದಂ ಅದಾ॥

೪೩.

ರಜ್ಜಂ ದಸಹಿ ಧಮ್ಮೇಹಿ, ಚತುಸಙ್ಗಹವತ್ಥೂಹಿ।

ಕರೋನ್ತೋ ಪರಿಪಾಲೇಸಿ, ಲೋಕಂ ನೇತ್ತಂವ ಅತ್ತನೋ॥

೪೪.

ಸೋ ಧೇತ್ವಾ ಸಾಸನಂ ಸಬ್ಬಂ, ಧಮ್ಮಕಮ್ಮೇನ ಸತ್ಥುನೋ।

ಗಹೇತ್ವಾ ನವಕೇ ಭಿಕ್ಖೂ, ಅಕಾಸಾ’ವಾಸಪೂರಣಂ॥

೪೫.

ದುಟ್ಠಗಾಮಣಿರಾಜೇನ, ಕತಂ ಮರಿಚವಟ್ಟಿಕಂ।

ನಟ್ಠಂ ವಿಹಾರಂ ಕಾರೇತ್ವಾ, ನಾನಾಆವಾಸ ಭೂಸಿತಂ॥

೪೬.

ಥೇರವಂಸಜಭಿಕ್ಖೂನಂ, ಅದಾ ಕತ್ವಾ ಮಹಾಮಹಂ।

ತೇಸಂ ಪಞ್ಚಸತಾನಞ್ಚ, ಭೋಗಗಾಮೇ ಚ ದಾಪಯಿ॥

೪೭.

ತತ್ಥ ಸೋ ತುಸಿತೇ ರಮ್ಮೇ, ದೇವಸಙ್ಘಪುರಕ್ಖತಂ।

ಮೇತ್ತೇಯ್ಯಂ ಲೋಕನಾಥಂ ತಂ, ದೇಸೇನ್ತಂ ಧಮ್ಮಮುತ್ತಮಂ॥

೪೮.

ದಸ್ಸೇನ್ತೋ ವಿಯ ಲೋಕಸ್ಸ, ವಿಹಾರೇ ಸಬ್ಬಸಜ್ಜಿತೇ।

ನಿಸಿನ್ನೋ ಮಣ್ಡಪೇ ರಮ್ಮೇ, ನಾನಾರತನಭೂಸಿತೇ॥

೪೯.

ನಗರೇಹಿ ಚ ಸಬ್ಬೇಹಿ, ಭಿಕ್ಖೂಹಿ ಪರಿವಾರಿತೋ।

ಬುದ್ಧಲಿಲಾಯ ಲಂಕಿನ್ದೋ, ಅಭಿಧಮ್ಮ ಮಭಾಸಯಿ॥

೫೦.

ಸೋಣ್ಣಪಟ್ಟೇ ಲಿಖಾಪೇತ್ವಾ-ಭಿಧಮ್ಮಪಿಟಕಂ ತದಾ।

ಧಮ್ಮಸಙ್ಗಣಿಕಂ ಪೋತ್ಥಂ, ನಾನಾರತನ ಭೂಸಿತಂ॥

೫೧.

ಕತ್ವಾ ನಗರಮಜ್ಝಮ್ಹಿ, ಕಾರೇತ್ವಾ ಹೇಮಮುತ್ತಮಂ।

ತಂ ತತ್ಥ ಠಪಯಿತ್ವಾನ, ಪರಿಹಾರಮದಾಪಯಿ॥

೫೨.

ಸಕ್ಕಸೇನಾಪತಿಟ್ಠಾನಂ, ದತ್ವಾ ಪುತ್ತಸ್ಸ ಅತ್ತನೋ।

ಪರಿಹಾರೇ ನಿಯೋಜೇಸಿ, ತತ್ಥ ತಂ ಧಮ್ಮಪೋತ್ಥಕೇ॥

೫೩.

ಅನುಸಂವಚ್ಛರಂ ರಾಜಾ, ಪುರಂ ದೇವಪುರೀ ವಿಯ।

ವಿಭೂಸಿತಾಯ ಸೇನಾಯ, ಸಜ್ಜೇತ್ವಾ ಪರಿವಾರಿತೋ॥

೫೪.

ದೇವರಾಜಾವ ಸೋಭನ್ತೋ, ಸಬ್ಬಾಭರಣಭೂಸಿತೋ।

ಹತ್ಥಿಖಣ್ಡೇ ನಿಸೀದಿತ್ವಾ, ಚರನ್ತೋ ಪುರವೀಥಿಯಂ॥

೫೫.

ಮಹತಾ ಪರಿಹಾರೇನ, ನೇತ್ವಾ ತಂ ಧಮ್ಮಸಙ್ಗಹಂ।

ಅತ್ತನಾ ಕಾರಿತಂ ರಮ್ಮಂ, ವಿಹಾರಂ ಸಬ್ಬಸಜ್ಜಿತಂ॥

೫೬.

ತತ್ಥ ಧಾತುಗತೇ ರಮ್ಮೇ, ನಾನಾರತನಭೂಸಿತೇ।

ಮಣ್ಡಪೇ ಧಾತುಪಿಠಸ್ಮಿಂ, ಪತಿಟ್ಠಾಪಿಯ ಪೂಜಯಿ॥

೫೭.

ಗನ್ಥಾಕರಪರಿವೇಣಂ , ಮಹಾಮೇಘವನೇ ಅಕಾ।

ನಗರೇ ವಜ್ಜಸಾಲಾ ಚ, ತೇಸಂ ಗಾಮೇ ಚ ದಾಪಯಿ॥

೫೮.

ಭಣ್ಡಿಕಪರಿವೇಣಞ್ಚ, ಸಿಲಾಮೇಘಞ್ಚ ಪಬ್ಬತಂ।

ಕತ್ವಾ’ಭಯಗಿರಿಸ್ಮಿಂ ಸೋ, ತೇಸಂ ಗಾಮಮದಾಪಯಿ॥

೫೯.

ಜೋತಿವನವಿಹಾರಸ್ಮಿಂ, ರಾಜಾ ಲಙ್ಕಾಯ ನಾಯಕೋ।

ಭತ್ತಗ್ಗಸ್ಸ ಅದಾ ಗಾಮಂ, ತಥಾ’ಭಯಗಿರಿಮ್ಹಿ ಚ॥

೬೦.

ದಕ್ಖಿಣಗಿರಿನಾಮಸ್ಸ, ವಿಹಾರಸ್ಸ ಚ ದಾಪಯಿ।

ಗಾಮಂ ಕತಞ್ಞುಭಾವೇನ, ರಾಜಾ ಪರಮಧಮ್ಮಿಕೋ॥

೬೧.

ಸಕ್ಕಸೇನಾಪತಿ ರಮ್ಮಂ, ಪರಿವೇಣಂ ಸುಮಾಪಿಯ।

ಅದಾಸಿ ಸಹಗಾಮೇಹಿ, ಥೇರಿಯಾನಂ ಸನಾಮಿಕಂ॥

೬೨.

ಭರಿಯಾ ವಜಿರಾ ತಸ್ಸ, ತೇಸಂಯೇವ ಅದಾಪಯಿ।

ಪರಿವೇಣಂ ಕರಿತ್ವಾನ, ಸಗಾಮಂ ಸಕನಾಮಕಂ॥

೬೩.

ಉಪಸ್ಸಯಂ ಕರಿತ್ವಾನ, ಸಾ ಏವ ಪದಲಞ್ಛನೇ।

ಭಿಕ್ಖೂನೀನಂ ಅದಾ ಥೇರ-ವಂಸೇ ಸಬ್ಬತ್ಥ ಪೂಜಿತೇ॥

೬೪.

ಸಕ್ಕಸೇನಾಪತಿ ಮಾತಾ, ದೇವಾ’ರಞ್ಞಕ ಭಿಕ್ಖೂನಂ।

ಥೇರವಂಸಪ್ಪದೀಪಾನಂ, ಅಕಾ’ವಾಸಂ ಸನಾಮಕಂ॥

೬೫.

ಸಾ ಏವ ಪಟಿಬಿಮ್ಬಸ್ಸ, ಸತ್ಥು ಮರಿಚವಟ್ಟಿಯಂ।

ಚೂಳಾಮಣಿಂ ಪಾದಜಲಂ, ಅಕಾ ಛತ್ತಞ್ಚ ಚೀವರಂ॥

೬೬.

ರಾಜಾ ರಾಜಾಲಯೇಯೇವ, ರಾಜವಂಸಂ ಸನಾಮಕಂ।

ಅಕಾಸಿ ಪಾಳಿಕಂ ನಾಮ, ಪಾಸಾದಂ ಸುಮನೋ ಹರಂ॥

೬೭.

ಪೂಜೇಸಿ ರಾಜಿನೀ ನಾಮ, ರಾಜಿನೋ ಭರಿಯಾ’ಪರಾ।

ಪಟ್ಟಕಞ್ಚುಕಪೂಜಾಯ, ಹೇಮಮಾಲಿಕ ಚೇತಿಯಂ॥

೬೮.

ತಸ್ಸಾ ಪುತ್ತೋಸಿ ಸಿದ್ಧತ್ಥೋ, ನಾಮ ಇಸ್ಸರಿಯೇ ಠಿತೋ।

ಸುತೋ ಮಲಯರಾಜಾತಿ, ರೂಪೇನ ಮಕರದ್ಧಜೋ॥

೬೯.

ರಾಜಾ ತಸ್ಮಿಂ ಮತೇ ಕತ್ವಾ, ಸಾಲಂ ಭಿಕ್ಖುನಮುತ್ತಮಂ।

ದಾನವಟ್ಟಂ ಪಟ್ಠಪೇತ್ವಾ, ತಸ್ಸ ಪತ್ತಿಮದಾ ತದಾ॥

೭೦.

ಏವಂ ಧಮ್ಮೇನ ಕಾರೇನ್ತೇ, ರಜ್ಜಂ ಲಙ್ಕಾದೀಪೇ ತದಾ।

ಚೋಳರಾಜೇನ ಯುಜ್ಝಿತ್ವಾ, ಪಣ್ಡುರಾಜಾ ಪರಾಜಿತೋ॥

೭೧.

ಪಣ್ಣಾಕಾರಾನಿ ನೇಕಾನಿ, ಬಲಂ ಸನ್ಧಾಯ ಪೇಸಯಿ।

ರಾಜಾಲಂಕಿಸ್ಸರೋ ಸದ್ಧಿಂ, ಮನ್ತೇತ್ವಾ ಸಚಿವೇಹಿ ಸೋ॥

೭೨.

ಸನ್ನಯ್ಹ ಬಲಕಾಯಂ ಸೋ, ಸಕ್ಕಸೇನಾಪತಿಂ ಸಕಂ।

ಬಲಸ್ಸ ನಾಯಕಂ ಕತ್ವಾ, ಮಹಾಯಿತ್ಥಮುಪಾಗಮಿ॥

೭೩.

ವಿಜಯಂ ಪುಬ್ಬರಾಜೂನಂ, ವತ್ವಾ ವೇಲಾತಟೇ ಠಿತೋ।

ಉಸ್ಸಾಹಂ ಜನಯಿತ್ವಾನ, ನಾವಂ ಆರೋಪಯೀ ಬಲಂ॥

೭೪.

ಬಲಕಾಯಂ ಸಮಾದಾಯ, ಸಕ್ಕಸೇನಾಪತಿಂ ತದಾ।

ಸುಖೇನ ಸಾಗರಂ ತಿಣ್ಣೋ, ಪಣ್ಡುದೇಸಮುಪಾಗಮಿ॥

೭೫.

ದಿಸ್ವಾ ಬಲಞ್ಚ ತಞ್ಚೇವ, ಪಣ್ಡುರಾಜಾ ಸುಮಾನಸೋ।

ಏಕಚ್ಛತ್ತಂ ಕರಿಸ್ಸಾಮಿ, ಜಮ್ಬುದೀಪನ್ತಿ ಅಬ್ರವಿ॥

೭೬.

ಬಲದ್ವಯಂ ಗಹೇತ್ವಾನ, ರಾಜಾ ಸೋ ಚೋಳವಂಸಜಂ।

ಜೇತುಂ ಅಸಕ್ಕುಣಿತ್ವಾನ ಯುದ್ಧಮುಜ್ಝಿಯ ನಿಕ್ಖಮಿ॥

೭೭.

ಯುಜ್ಝಿಸ್ಸಾಮೀತಿ ಗನ್ತಾನ, ಸಕ್ಕಸೇನಾಪತೀ ಪುನ।

ನಿಸಿನ್ನೋ ಉಪಸಗ್ಗೇನ, ಮತೋ ಪಾಪೇನ ಪಣ್ಡುತೋ॥

೭೮.

ಲಂಕಿಸ್ಸರೋ ಬಲಸ್ಸಾಪಿ, ತೇನ ರೋಗೇನ ನಾನಸಂ।

ಸುತ್ವಾ ದಯಾಲುಭಾವೇನ, ಸೇನಂ ಆಣಾಪಯೀ ತತೋ॥

೭೯.

ಸಕ್ಕ ಸೇನಾಪತಿಟ್ಠಾನಂ, ತಸ್ಸ ಪುತ್ತಸ್ಸ’ದಾ ತದಾ।

ವಡ್ಢೇಸಿ ತೇನ ತಂ ಪುತ್ತಂ, ಕತ್ವಾ ಸೇನಾಯ ನಾಯಕಂ॥

೮೦.

ನಿಕಾಯತ್ತಯವಾಸೀಹಿ, ಪರಿತ್ತಂ ನಗರೇ ತದಾ।

ಕಾರೇತ್ವಾ ರೋಗದುಬ್ಬುಟ್ಠಿ-ಭಯಂ ನಾಸೇಸಿ ಜನ್ತುನಂ॥

೮೧.

ಸಾಸನಸ್ಸ ಚ ಲೋಕಸ್ಸ, ಸನ್ತಿಂ ಕತ್ವಾ ಅನೇಕಧಾ।

ರಾಜಾ ಸೋ ದಸಮೇ ವಸ್ಸೇ, ಸುಖೇನ ತಿದಿವಂ ಗತೋ॥

೮೨.

ಲಂಕಾರಜ್ಜೇಪಿ ಠತ್ವಾ ಕಥಿತತಿಪಿಟಕೋ ಸಬ್ಬವಿಜ್ಜಾಪದೀಪೋ,

ವತ್ತಾವಾದೀ ಕವೀ ಸೋ ಸತಿಧೀತಿವಿಸದೋ ದೇಸಕೋ ಭಾವಕೋ ಚ।

ಪಞ್ಞಾಸದ್ಧಾದಯಾ ವಾ ಪರಹಿತನಿರತೋ ಲೋಕವೇದೀವದಞ್ಞೂ।

ರಾಜಿನ್ದೋ ಕಸ್ಸಪೋ’ಯಂ ವಿಯ ವಿಮಲಗುಣೋ ಹೋತುಲೋಕೋಪಿ ಸಬ್ಬೋ॥

ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ

ದ್ವಿರಾಜಕೋ ನಾಮ

ಪಞ್ಞಾಸತಿಮೋ ಪರಿಚ್ಛೇದೋ।