ಏಕಪಞ್ಞಾಸತಿಮ ಪರಿಚ್ಛೇದ

ಪಞ್ಚರಾಜಕೋ ನಾಮ

೧.

ಯುವರಾಜಾ ತದಾ ಹುತ್ವಾ, ರಾಜಾ ದಪ್ಪುಳನಾಮಕೋ।

ಠಪೇಸಿ ಓಪರಜ್ಜಮ್ಹಿ, ಆದಿಪದಂ ಸನಾಮಕಂ॥

೨.

ಮರಿಚವಟ್ಟಿವಿಹಾರಸ್ಸ, ಗಾಮಂ ದತ್ವಾ ತತೋ ಪುರೇ।

ಚಾರಿತ್ತಂ ಪುಬ್ಬರಾಜೂನಂ, ರಕ್ಖಿತ್ವಾನ ಮಹಿಂ ಇಮಂ॥

೩.

ಅಭುತ್ವಾ ದೀಘಕಾಲಞ್ಹಿ, ಪುಬ್ಬಕಮ್ಮೇನ ಅತ್ತನೋ।

ರಾಜಾ ಸೋ ಸತ್ತಮೇ ಮಾಸೇ, ಪವಿಟ್ಠೋ ಪಚ್ಚುನೋ ಮುಖಂ॥

೪.

ಉಪರಾಜಾ ಅಹುರಾಜಾ, ದಪ್ಪುಳೋ ತದನನ್ತರಂ।

ಉದಯಸ್ಸಾದಿಪಾದಸ್ಸ, ಯುವರಾಜಪದಂ ಅದಾ॥

೫.

ತದಾ ಚೋಳಭಯಾ ಪಣ್ಡು-ರಾಜಂ ಜನಪದಂ ಸಕಂ।

ಚಜಿತ್ವಾ ನಾವಮಾರುಯ್ಹ, ಮಹಾತಿತ್ಥಮುಪಾಗಮಿ॥

೬.

ಆಣಾಪೇತ್ವಾನ ತಂ ರಾಜಾ, ದಿಸ್ವಾ ಸನ್ತುಟ್ಠಮಾನಸೋ।

ಮಹಾಭೋಗಂ ಅದಾ ತಸ್ಸ, ನಿವಾಸೇಸಿ ಪುರಾ ಬಹಿ॥

೭.

ಚೋಳರಾಜೇನ ಯುಜ್ಝಿತ್ವಾ, ಗಹೇತ್ವಾ ಪಟ್ಟನದ್ವಯಂ।

ಪಣ್ಡುರಾಜಸ್ಸ ದಮ್ಮೀತಿ, ಸನ್ನದ್ಧೇ ಲಙ್ಕರಾಜಿನಿ॥

೮.

ಕೇನಾ’ಪಿ ಕರಣೀಯೇನ, ಖತ್ತಿಯಾ ದೀಪವಾಸಿನೋ।

ಅಕಂಸು ವಿಗ್ಗಹಂ ಘೋರಂ, ಪಾಪಕಮ್ಮೇನ ಪಣ್ಡುನೋ॥

೯.

ಪಣ್ಡುರಾಜೇ’ತ್ಥ ವಾಸೇನ, ಕಮ್ಮಂ ನತ್ಥೀತಿ ಚಿನ್ತಿಯ।

ಠಪೇತ್ವಾ ಮಕುಟಾದೀನಿ, ಗತೋ ಕೇರಳಸನ್ತಿಕಂ॥

೧೦.

ವಿಗ್ಗಹೇ ನಿಟ್ಠಿತೇ ರಾಜಾ, ಮಹಾಮೇಘವನೇ ತದಾ।

ಮಹಾಬೋಧಿಘರಸ್ಸಾ’ದಾ, ಗಾಮಂ ನಗರಸನ್ತಿಕೇ॥

೧೧.

ಆವಾಸಂ ರಕ್ಖಕೋ ನಾಮ, ತಸ್ಸ ಸೇನಾಪತೀ ಅಕಾ।

ಥೂಪಾರಾಮಸಮೀಪಮ್ಹಿ, ಇಳಙ್ಗೋ ರಾಜನಾಮಕಂ॥

೧೨.

ಕತಂ ತಂ ಪುಬ್ಬರಾಜೇಹಿ, ರಾಜಾ ಸೋ ಪರಿಪಾಲಿಯ।

ಪತ್ತೋ ದ್ವಾದಸಮಂ ವಸ್ಸಂ, ಯಥಾಕಮ್ಮಮುಪಾಗಮಿ॥

೧೩.

ಉದಯೋ ಯುವರಾಜಾ’ಸಿ, ಲಂಕಾವಾಸೀನಮಿಸ್ಸರೋ।

ಸೇನನಾಮಾದಿಪಾದಂ ಸೋ, ಓಪರಜ್ಜೇ’ಭಿಸೇಚಯಿ॥

೧೪.

ರಞ್ಞೋ ಭೀತಾ ತದಾಮಚ್ಚಾ, ಪವಿಸಿಂಸು ತಪೋವನಂ।

ರಾಜೋಪರಾಜಾ ಗನ್ತ್ವಾನ, ತೇಸಂ ಸೀಸಾನಿ ಛೇದಯುಂ॥

೧೫.

ತೇನ ಕಮ್ಮೇನ ನಿಬ್ಬಿನ್ನಾ, ಯತಯೋ ತನ್ನಿವಾಸಿನೋ।

ಹಿತ್ವಾ ಜನಪದಂ ರಞ್ಞೋ, ತದಾಗಚ್ಛಿಂಸು ರೋಹಣಂ॥

೧೬.

ತದಾ ಜಾನಪದಾ ಚೇವ, ನಾಗರಾ ಚ ಬಲಾನಿ ಚ।

ಕುಪಿತಾ ಚಣ್ಡುವಾತೇನ, ಸಾಗರೋ ವಿಯ ಕಮ್ಪಿತೋ॥

೧೭.

ರತನಪಾಸಾದಮಾರುಯ್ಹ, ವಿಹಾರೇ ಅಭಯುತ್ತರೇ।

ಸನ್ತಾಸೇತ್ವಾನ ರಾಜಾನಂ, ದಸ್ಸೇತ್ವಾನ ವಿಭೀಸಿಕಂ॥

೧೮.

ಉಪತ್ಥಮ್ಭಕಮಚ್ಚಾನಂ, ವಿಗ್ಗಹಸ್ಸ ತಪೋವನೇ।

ತದಾ ಸೀಸಾನಿ ಛಿನ್ದಿತ್ವಾ, ಕವಾತೇನ ನಿಪಾತಯುಂ॥

೧೯.

ತಂ ಸುತ್ವಾ ಯುವರಾಜಾ ಚ, ಆದಿಪಾದೋ ಚ ತಂ ಸಖಾ।

ಉಲ್ಲಙ್ಘಿತ್ವಾನ ಪಾಕಾರಂ, ಸೀಘಂ ಗಚ್ಛಿಂಸು ರೋಹಣಂ॥

೨೦.

ಬಲಕಾಯೋನುಬನ್ಧಿತ್ವಾ, ಯಾವ ಕಣ್ಹನದೀತಟಾ।

ಅಲಾಭೇನ ಚ ನಾವಾನಂ, ತಿಣ್ಣತ್ತಾ ತೇಸಮಾಗಮಿ॥

೨೧.

ರಾಜಪುತ್ತಾಗತಾ ತತ್ಥ, ವನೇ ಅಭಯಭೇದಿನೋ।

ಯತೀನಂ ಪುರತೋ ತೇಸಂ, ನಿಪಜ್ಜಿತ್ವಾ ಉರೇನ ತೇ॥

೨೨.

ಅಲ್ಲವತ್ಥಾ’ಲ್ಲಕೇಸಾ ಚ, ಪರಿದೇವಿತ್ಥ’ನೇಕಧಾ।

ಕನ್ದೀತ್ವಾ ರೋದನಂ ಕತ್ವಾ, ಖಮಾಪೇಸುಂ ತಪಸ್ಸಿನೋ॥

೨೩.

ಖನ್ತಿಮೇತ್ತಾನುಭಾವೇನ, ತೇಸಂ ಸಾಸನಸಾಮಿನಂ।

ಪುಞ್ಞೋದಯೋ ಅಹು ತೇಸಂ, ಉಭಿನ್ನಂ ದೀಪಸಾಮಿನಂ॥

೨೪.

ಯುವರಾಜಬಲಞ್ಚೇವ, ನಿಕಾಯತ್ತಯವಾಸಿನೋ।

ಗಮಿಂಸು ತೇಸಮಾನೇತುಂ, ಸನ್ತಿಭೂತೇ ಮಹಾಬಲೇ॥

೨೫.

ರಾಜಪುತ್ತಾ ಉಭೋ ಬ್ಯತ್ತಾ, ಪಣ್ಡಿತಾ ಪಂಸುಕೂಲಿನೋ।

ಯಾಚಿತ್ವಾ ತೇಸಮಾದಾಯ, ಅಗಮಂಸು ಸಕಂ ಪುರಂ॥

೨೬.

ಭಿಕ್ಖೂನಂ ಪುರತೋ ಮಗ್ಗಂ, ರಾಜಾಗನ್ತಾ ಖಮಾಪಯಿ।

ಆದಾಯ ತೇ ವನಂ ತೇಸಂ, ನೇತ್ವಾ ರಾಜಘರಂ ಗತೋ॥

೨೭.

ತತೋ ಪಟ್ಠಾಯ ಚಾರಿತ್ಥಂ, ಪಾಲೇತ್ವಾ ಪುಬ್ಬರಾಜುನಂ।

ರಾಜಾ ಸೋ ತತಿಯೇ ವಸ್ಸೇ, ಯಥಾಕಮ್ಮಮುಪಾಗಮಿ॥

೨೮.

ಲಂಕಾಭಿಸೇಕಂ ಪತ್ವಾನ, ಸೇನೋ ಸೋ ಮತಿಮಾ ತತೋ।

ಉದಯಂ ಆದಿಪಾದಂ ತಂ, ಯುವರಾಜಂ ಅಕಾ ಸಖಂ॥

೨೯.

ಕಹಾಪಣಸಹಸ್ಸಂ ಸೋ, ದುಗ್ಗತಾನಂ ಉಪೋಸಥೇ।

ಹೋತು’ಪೋಸಥಿಕೋ ದತ್ವಾ, ಯಾವಜೀವಂ ನರಾಧಿಪೋ॥

೩೦.

ಪಟಿಮಾ ಭತ್ತವತ್ಥಾನಿ, ಭಿಕ್ಖೂನಂ ಧರಣೀ ಪತಿ।

ಅದಾ ದಣ್ಡಿಸ್ಸರಂ ದಾನಂ, ಯಾಚಕಾನಞ್ಚ ಸಿಪ್ಪೀನಂ॥

೩೧.

ಠಾನೇ ಕತ್ಥಚಿ ಸಿಪ್ಪೀನಂ, ಪಾಸಾದೇಸು ಮನೋಹರೇ।

ಕಾರೇತ್ವಾ ಭೋಗಗಾಮೇ ಚ, ಅದಾಪೇಸಿ ಮಹಾಮತಿ॥

೩೨.

ಕಹಾಪಣಸಹಸ್ಸಂ ವಾ, ದತ್ವಾ ಪಞ್ಚಸತಾನಿ ವಾ।

ಲಙ್ಕಾಯಂ ಜಿಣ್ಣಕಾವಾಸೇ, ನವಕಮ್ಮಮಕಾರಯೀ॥

೩೩.

ಚತ್ತಾಲೀಸಸಹಸ್ಸಾನಿ, ಅಭಯುತ್ತರಚೇತಿಯೇ।

ಸಿಲಾಪತ್ಥರಣತ್ಥಾಯ, ದಾಪೇಸಿ ಚ ಮಹೀಪತಿ॥

೩೪.

ಮಹಾವಾಪೀಸು ಲಂಕಾಯಂ, ಜಿಣ್ಣನಿದ್ಧಮನೇ ಅಕಾ।

ನವಕಮ್ಮಞ್ಚ ಮರಿಯಾದಂ, ಥಿಯಂ ಪಾಸಾಣಪಂಸುನಾ॥

೩೫.

ಅಕಾ ರಾಜಘರೇ ರಮ್ಮಂ, ಮಾಲಾಗೇಹಂ ಮಹಾರಹಂ।

ಠಪಿತಂ ಪುನರಾಜೂಹಿ, ದಾನಂ ಸಮ್ಮಾಪವತ್ತಯಿ॥

೩೬.

ಕತಂ ಮಲಯರಾಜೇನ, ಅಮಚ್ಚೇನ’ಗ್ಗ ಬೋಧಿನಾ।

ಪರಿವೇಣಂ ನಾಗಸಾಲಂ, ದಿಸ್ವಾ ಗಾಮ ಮದಾ ತದಾ॥

೩೭.

ಕತ್ವಾ ಚತುವಿಹಾರೇಸು, ರೂಪಕಮ್ಮಾನಿ ಸಾಧುಕಂ।

ಮಣ್ಡಪಾನಿ ಚ ರಮ್ಮಾನಿ, ಧಾತುಪೂಜಂ ಅಕಾ ಸದಾ॥

೩೮.

ಏವಮಾದೀನಿ ಪುಞ್ಞಾನಿ, ಅನೇಕಾನಿ ಅನೇಕಧಾ।

ಕತ್ವಾ ಸೋ ನವಮೇ ವಸ್ಸೇ, ಯಥಾಕಮ್ಮಮುಪಾಗಮಿ॥

೩೯.

ಲಂಕಾಭಿಸೇಕಂ ಪತ್ವಾನ, ಯುವರಾಜೋದಯೋ ತತೋ।

ಸೇನನಾಮಾದಿಪಾದಂ ಸೋ, ಓಪರಜ್ಜೇ’ಭಿ ಸೇಚಯಿ॥

೪೦.

ನಿದ್ದಾಲು ಮಜ್ಜಪೋ ಆಸಿ, ರಾಜಾ ಪಾಪೇನ ಜನ್ತುನಂ।

ಚೋಳೋ ಪಮತ್ತತಂ ತಸ್ಸ, ಸುತ್ವಾ ಸನ್ತುಟ್ಠಮಾನಸೋ॥

೪೧.

ಪಣ್ಡುದೇಸಾತಿಸೇಕಂ ಸೋ, ಪತ್ತುಕಾ ಮೇತ್ಥ ಪೇಸಯಿ।

ಮಕುಟಾದೀನಮತ್ಥಾಯ, ಠಪಿತಾನಂವ ಪಣ್ಡುನಾ॥

೪೨.

ತಾನಿ ನಾದಾಸಿ ಸೋ ರಾಜಾ, ತೇನ ಚೋಳೋ ಮಹಬ್ಬಲೋ।

ಬಲಂ ಸನ್ನಯ್ಹ ಪೇಸೇಸಿ, ಬಲಕ್ಕಾರೇನ ಗಣ್ಹಿತುಂ॥

೪೩.

ತದಾ ಸೇನಾಪತಿ ಏತ್ಥ, ಪಚ್ಚನ್ತೇ ಕುಪಿತೇ ಗತೋ।

ಆಣಾಪೇತ್ವಾನ ತಂ ರಾಜಾ, ಯುಜ್ಝನತ್ಥಾಯ ಪೇಸಯಿ॥

೪೪.

ಹತೋ ಸೇನಾಪತಿ ತತ್ಥ, ಯುಜ್ಝಿ ನ ರಣೇ ಮತೋ।

ಕಕೂಟಾದೀನಿ ಆದಾಯ, ರಾಜಾ ಸೋ ರೋಹಣಂ ಅಗಾ॥

೪೫.

ಗನ್ತ್ವಾ ಚೋಳಬಲಂ ತತ್ಥ, ಅಲಭಿತ್ವಾ ಪವೇಸನಂ।

ನಿವತ್ತಿತ್ವಾ ಸಕಂ ರಟ್ಠಂ, ಅಗಮಾಸಿ ಇಧತಾ ಭಯಾ॥

೪೬.

ತತೋ ಸೇನಾಪತಿಟ್ಠಾನೇ, ವಿದುರಗ್ಗಂ ತು ನಾಯಕಂ।

ಠಪೇಸಿ ರಾಜಾ ಲಂಕಿನ್ದೋ, ತೇಜವನ್ತಂ ಮಹಾಮತಿಂ॥

೪೭.

ಪಚ್ಚನ್ತಂ ಚೋಳರಾಜಸ್ಸ, ಘಾತೇತ್ವಾ ಸೋ ಚಮೂಪತಿ।

ಆಣಾಪೇಸಿ ಇತೋ ನೀತಂ, ದಸ್ಸೇತ್ವಾನ ವಿಭೀಸಿತಂ॥

೪೮.

ತತೋ ದಾಪೇಸಿ ಸೋ ಸಬ್ಬ-ಪರಿಕ್ಖಾರಂ ಮಹಾರಹಂ।

ಪಂಸುಕೂಲಿಕಭಿಕ್ಖೂನಂ, ಸಬ್ಬೇಸಂ ದೀಪವಾಸಿನಂ॥

೪೯.

ಮಹಾವಿಹಾರೇ ಲಂಕಿನ್ದೋ, ಪಟಿಬಿಮ್ಬಸ್ಸ ಸತ್ಥುನೋ।

ಜಲನ್ತಂ ಮಣಿರಂಸೀಹಿ, ಅಕಾ ಚೂಳಾಮಣಿಂ ತದಾ॥

೫೦.

ಓರೋಧಾ ವಿದುರಾ ತಸ್ಸ, ಪಾದಜಾಲೇನ ಪೂಜಯಿ।

ಮಣೀಹಿ ಪಜ್ಜಲನ್ತೇಹಿ, ಪಟಿಮಂ ತಂ ಸಿಲಾಮಯಂ॥

೫೧.

ಝಾಪಿತಂ ಚೋಳರಾಜಸ್ಸ, ಬಲೇನ ಮಣಿನಾಮಕಂ।

ಪಾಸಾದಂ ಕಾತುಮಾರದ್ಧೋ, ಚುತೋ ವಸ್ಸಮ್ಹಿ ಅಟ್ಠಮೇ॥

೫೨.

ಪಞ್ಚೇತೇ ವಸುಧಾಧಿಪಾ ವಸುಮಹಿಂ ಏಕಾತಪತ್ತಙ್ಕಿತಂ।

ಭುತ್ವಾ ನಿಗ್ಗಹಸಙ್ಗಹೇಹಿ ಸಕಲಂ ಲೋಕಂ ವಸೇ ವತ್ತಿಯ।

ಯಾ ತಾ ಮಚ್ಚುವಸಂ ಸಪುತ್ತವಣಿತಾ ಸಾಮಚ್ಚಮಿತ್ತಾನುಗಾ।

ಇಚ್ಚೇವಂ ಸತತಂ ಸರನ್ತು ಸುಜನಾ ಹಾತುಂ ಪಮಾದಂ ಮದಂ॥

ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ

ಪಞ್ಚರಾಜಕೋ ನಾಮ

ಏಕಪಞ್ಞಾಸತಿಮೋ ಪರಿಚ್ಛೇದೋ।