ಏಕಸಟ್ಠಿಮ ಪರಿಚ್ಛೇದ

ಸಙ್ಖತ್ಥಲಿಪುರಾಭಿಗಮನೋ

೧.

ಸುತ್ವಾ ದ್ವೇ ಭಾತರೋ ಅಞ್ಞೇ, ಜೇಟ್ಠಸ್ಸೋ ಪರತಿಂಸದಾ।

ಖಿಪ್ಪಂ ಸರಟ್ಠಾ ಆಗಮ್ಮ, ಕಾರೇಸುಂ ಅನ್ತಿಮಂ ವಿಧಿಂ॥

೨.

ಅಥ ಕಿತ್ತಿಸಿರಿಮೇಘೋ, ರಟ್ಠಂ ಜೇಟ್ಠಸ್ಸ ಭಾತುನೋ।

ಅತ್ತಾಧೀನಂ ಕರಿತ್ವಾನ, ಆಮನ್ತಿಯ ಕಣಿಟ್ಠಕಂ॥

೩.

ದತ್ವಾ ರಟ್ಠದ್ವಯಂ ಅಞ್ಞಂ, ವತ್ಥುಂ ತತ್ಥೇವ ಆದಿಸಿ।

ಸೋ’ಪಿ ಜೇಟ್ಠಸ್ಸ ಭಾತುಸ್ಸ, ವಚನಂ ಸಮ್ಪಟಿಚ್ಛಿಯ॥

೪.

ಸಮಾದಾಯ ಕುಮಾರಞ್ಚ, ದೇವಿಞ್ಚ ರತನಾವಲಿಂ।

ಧೀತರೋ ದ್ವೇ ಚ ಗನ್ತಾನ, ಮಹಾ ನಾಮಹುಲಂ ಪುರಂ॥

೫.

ಸಮಗ್ಗಾ ನಿವಸಂ ತತ್ಥ, ಕುಮಾರಸ್ಸ ಸಿಖಾಮಹಂ।

ಕಾರೇತ್ವಾ ಪರಿಹಾರೇನ, ವಡ್ಢೇಸಿ ಮಹತಾ ಸದಾ॥

೬.

ತತೋ ಸೋ ದೇವಿಯಾ ಜೇಟ್ಠಂ-ಧೀತರಂ ಮಿತ್ತನಾಮಿಕಂ।

ದಾತುಕಾಮೋ ಸಪುತ್ತಸ್ಸ, ಸಹಾಮಚ್ಚೇಹಿ ಮನ್ತಯಿ॥

೭.

ಕಾಲಿಙ್ಗನ್ವಯಸಮ್ಭೂತಾ, ಪಾಯೇನಖಲು ಭೂಮಿಪಾ।

ಸಾಮಿಭಾವಂ ಗತಾ ಅಸ್ಮಿಂ, ಲಙ್ಕಾದೀಪಮ್ಹೀ ಭೂಯಸೋ॥

೮.

ಕಾಲಿಙ್ಗಗೋತ್ತ ಸಮ್ಭೂತ, ಗಜಬಾಹುಸ್ಸ ದಾತವೇ।

ಗೂಳರೂಪೇನ ದೇವೀ’ಯಂ, ಯದಿ ಪೇಸೇಯ್ಯ ಧೀತರಂ॥

೯.

ಭಿಯ್ಯೋ ವಿವಾಹಸಮ್ಬದ್ಧೋ, ಬಲವಾ ಸೋ ಭವಿಸ್ಸತಿ।

ಮಯ್ಹಂ ಏಸೋ ನಿರಾಲಮ್ಬೋ, ಪುತ್ತೋ ಹೇಹೀತಿ ಸಬ್ಬಥಾ॥

೧೦.

ತಸ್ಮಾ ಮೇ ಸುನೂನೋ ಏಸಾ, ದಾತುಂ ಯುತ್ತಾ ಕುಮಾರಿಕಾ।

ಏವಂ ಸತಿ ವತಮ್ಹಾಕಂ, ವಡ್ಢಿಯೇ’ವ ಸಿಯಾ ‘‘ಇತಿ’’॥

೧೧.

ದೇವೀಪಿ ಸುತ್ವಾ ತಂ ಸಬ್ಬ-ಮಾದಿಚ್ಚನ್ವಯ ಮಣ್ಡನಾ।

ಸಬ್ಬಥಾ ತಮನಿಚ್ಛನ್ತಿ, ಇದಮಾಹ ಮಹೀಪತಿಂ॥

೧೨.

ಘಾತೇತ್ವಾ ಸಕಲೇ ಯಕ್ಖೇ, ಕುಮಾರೋ ವಿಜಯವ್ಹಯೋ।

ಲಂಕಾದೀಪಮಿಮಂ’ಕಾಸಿ, ಮನುಸ್ಸಾವಾಸಕಂ ಸದಾ॥

೧೩.

ತತೋ ಪಭುತಿ ಅಮ್ಹಾಕಂ, ಘಟೇಸುಂ ವಿಜಯನ್ವಯಂ।

ಕಾಲಿಙ್ಗವಂಸಜೇಹೇವ, ಸಮ್ಬನ್ಧಂ ಕತ್ವ ಪುಬ್ಬಕಂ॥

೧೪.

ಅಞ್ಞಭೂಪಾಲ ಸಮ್ಬನ್ಧೋ, ಸುತಪುಬ್ಬೋ ಪಿನತ್ಥಿನೋ।

ಸೋಮವಂಸ ಸಮುಮ್ಭೂತೇ, ಠಪೇತ್ವಾ ಧರಣಿಸ್ಸರೇ॥

೧೫.

ತುಯ್ಹಂ ಜಾತೋತಿ ಅಮ್ಹಾಕಂ, ಸಮ್ಬನ್ಧೋ ಸೋ ಕಥಂ ಸಿಯಾ।

ಅರಿಯನ್ವಯ ಸಮ್ಭೂತ, ಕುಮಾರೇನ ಸಹಾಮುನಾ॥

೧೬.

ಏವಂ ಸೋ ದೇವಿಯಾ ತಾಯ, ನೇಕಸೋ ವಾರಯನ್ತಿಯಾ।

ಪಸಯ್ಹಸಕ ಪುತ್ಥಸ್ಸ, ತಂ ಕುಮಾರಿಮದಾಪಯಿ॥

೧೭.

ಸೋ ಅನೇಕಗುಣೋದಾರ- ಭರಿಯಾನುಗತೋ ತತೋ।

ರಞ್ಜಯನ್ತೋ ಜನೇ ಸಬ್ಬೇ, ಜನಕಸನ್ತಿಕೇ ವಸಿ॥

೧೮.

ಏಕವೀಸತಿಂ ವಸ್ಸಾನಿ, ರಜ್ಜಂ ವಿಕ್ಕಮ ಬಾಹುಸೋ।

ಅನುಭೋತ್ವಾ ಯಥಾಕಮ್ಮಂ, ಕಾಯಭೇದಾ ಗತೋ ಪರಂ॥

೧೯.

ತತೋ ಗಜಭುಜೋ ಠಿತಂ, ಸಮ್ಪನ್ನಬಲವಾಹನಂ।

ರಜ್ಜಂ ಹತ್ಥಗತಂ ಕತ್ವಾ, ಪುಲತ್ತಿನಗರೇ ವಸೀ॥

೨೦.

ತತೋ ಕಿತ್ತಿಸಿರೀಮೇಘ, ಸಿರೀವಲ್ಲಭ ಭೂಮಿಪಾ।

ವುತ್ತನ್ತ ಮೇತಂ ವಿಞ್ಞಾಯ, ಏವಂ ಸಮನುಚಿನ್ತಯುಂ॥

೨೧.

ತಸ್ಸ ವಿಕ್ಕಮ ಬಾಹುಸ್ಸ, ವುದ್ಧಭಾವೇನ ನೇಕಧಾ।

ಮೂಲರಜ್ಜಾಧಿಪಚ್ಚಂ ತಂ, ಅಮ್ಮಂ ನಿನ್ದಾಕರಂ ನ ಹಿ॥

೨೨.

ತದತ್ಥಜಸ್ಸ ಬಾಲಸ್ಸ, ಮೂಲರಜ್ಜಂ ಪಸಾಸನೋ।

ಉಪೇಕ್ಖಣಂ ಪನಮ್ಹಾಕಂ, ನೇವಾನುಚ್ಛವಿಕಂ ವತ॥

೨೩.

ತೇ ಸೋಯಾವ ಸರಜ್ಜಮ್ಹಿ, ಬದ್ಧಮೂಲೋ ಭವಿಸ್ಸತಿ।

ಪಸಯ್ಹ ತಾವ ತಂ ರಜ್ಜಂ, ವಟ್ಟತಿ ಗಣ್ಹಿತುಂ ಇತಿ॥

೨೪.

ವೇಲಕ್ಕಾರ ಬಲಂ ಸಬ್ಬಂ, ಭಿನ್ದಿಂಸು ಧನ ದಾನತೋ।

ಠಪೇತ್ವಾ ಸೇವಕೇ ಕೇಚಿ, ತಸ್ಸಬ್ಭನ್ತರಿಕೇ ತದಾ॥

೨೫.

ಗಜಬಾಹು ಮಹೀಪಾಲೇ, ವಿರತ್ತಾ ರಟ್ಠವಾಸಿನೋ।

ಉಭಿನ್ನಂ ರಾಜೂನಂ ದೂತೇ, ಪೇಸಯುಂ ನೇಕಸೋ ತತೋ॥

೨೬.

ರಜ್ಜಂ ಸಾಧೇತ್ವಾ ದಸ್ಸಾಮ, ಏಕೀಭೂತಾ ಮಯಂ ಪನ।

ಉಪತ್ಥಮ್ಭಕಭಾವೋ’ವ, ಕಾತಬ್ಬೋ ಕೇವಲಂ ಇತಿ॥

೨೭.

ತತೋ ದ್ವೇ ಭಾತುಕಾ ಸೇನಂ, ಸಕಂ ಸನ್ನಯ್ಹ ವೇಗಸಾ।

ಉಭತೋ ಮುಖತೋ ತಸ್ಸ, ರಟ್ಠಮಜ್ಝಮುಪಾಗಮುಂ॥

೨೮.

ಪಹಿಣಿಂಸು ಚ ತೇ ದೂತೇ, ತತೋ ಗಜಬೋಹುವ್ಹಯೋ।

ಭೂಮಿಪಾಲೋ ನಿಜಾಮಚ್ಚೇ, ಸನ್ನಿಪಾತಿಯ ಮನ್ತಯಿ॥

೨೯.

ವೇಳಕ್ಕಾರಬಲಂ ಸಬ್ಬ-ಮುಜುಪಚ್ಚತ್ತಿಕಂ ಅಹು।

ರಾಜಾನೋ ದ್ವೇ ಚ ನೋ ರಟ್ಠಂ, ಸಙ್ಗಾಮತ್ಥಮುಪಾಗತಾ॥

೩೦.

ಪಠಮಂ ತೇಸು ಪಕ್ಖಸ್ಸ, ಏಕಸ್ಸ ಬಲಿನೋ ಭುಸಂ।

ಮುಖಭಙ್ಗೇ ಕತೇ ಖಿಪ್ಪಂ, ತತೋ ಅಞ್ಞೇ ಸುಸಾಧಿಯಾ॥

೩೧.

ಇತಿ ನಿಚ್ಛಿಯ ಸೇನಙ್ಗಂ, ಸಬ್ಬಮಾದಾಯ ಅತ್ತನೋ।

ಸಿರಿವಲ್ಲಭರಾಜಾಭಿ-ಮುಖಂ ಯುದ್ಧಾ’ಯುಪಾಗಮಿ॥

೩೨.

ಸಿರಿವಲ್ಲಭರಾಜಾಪಿ, ಸಙ್ಗಾಮ ಮಹಿಭಿಂಸನಂ।

ಪಾತೋ ಪಟ್ಠಾಯ ಸಾಯನ್ಹ-ಕಾಲಂ ಯಾವ ಪವತ್ತಯಂ॥

೩೩.

ಅಸಕ್ಕುಣನ್ತೋ’ಭಿಭವಂ, ವಿಧಾತುಂ ತಸ್ಸ ಕಞ್ಚಿಪಿ।

ತತೋವ ಸೋ ನಿವತ್ತಿತ್ವಾ, ಸಕಂ ರಟ್ಠಂ ಗತೋ ಲಹುಂ॥

೩೪.

ಗಜಬಾಹುಸ್ಸಗೋಕಣ್ಣ-ಸಚಿವೇನ ಪರಾಜಿತೋ।

ಅಗಾ ರಟ್ಠಂ ಸಕಂ ಕಿತ್ತಿ-ಸಿರಿಮೇಘೋ’ಪಿ ಭೂಪತಿ॥

೩೫.

ಗಜಬಾಹುನರಿನ್ದೋಪಿ, ಸಙ್ಗಾಮೇ ತಮ್ಹಿ ಕಿಞ್ಚಿಪಿ।

ಪರಿಹಾನಿಮಸಮ್ಪತ್ತೋ, ಪುನಾ’ಗಮ್ಮ ಪುರನ್ತಿಕಂ॥

೩೬.

ಬಲನಾಥೇ ವಿನಿಗ್ಗಯ್ಹ, ಸಾಪರಾಧೇ ಬಹೂ ಬಲೀ।

ರಟ್ಠಂ ವೂಪಸಮೇತ್ವಾನ, ಪಾವೇಕ್ಖಿ ನಗರಂ ಸಕಂ॥

೩೭.

ರಟ್ಠೇ ಸಕೇ ಸಕೇಯೇವ, ತತೋ ಪಭೂತಿ ಭೂಮಿಪಾ।

ಅಞ್ಞೋಞ್ಞಮಿತ್ತೇ ಸಮ್ಬನ್ಧಂ, ವಿಧಾಯ ವಿಹರಿಂಸು ತೇ॥

೩೮.

ತತೋ ಪರಕ್ಕಮಭುಜೋ, ಧರಣೀ ಪಾಲನನ್ದನೋ।

ಮೇಧಾವೀನೇಕಸಿಪ್ಪೇಸು, ಸಿಕ್ಖಮಾನೋ ಸುಸಾಧುಕಂ॥

೩೯.

ವಿಚಾರಕ್ಖಮಪಞ್ಞತ್ತಾ , ಕಿಚ್ಚಾ ಕಿಚ್ಚೇಸು ನೇಕಸೋ।

ಅಚ್ಚುಳಾರಾಸಯತ್ತಾ ಚ, ಮಹಾಭಾಗತ್ತನೇನ ಚ॥

೪೦.

ಅತ್ತನೋ ಮಾತುಭಗಿನೀ, ಸಹವಾಸ ಸುಖಮ್ಹಿ ಚ।

ಅಲಗ್ಗಮಾನಸೋನೇಕ, ಬಲಾಕೀಳಾರಸೇಸು ಚ॥

೪೧.

ಸೂರಭಾವಾದಿಸಂಯುತ್ತಾ, ರಾಜಪುತ್ತಾ ತು ಮಾದಿಸಾ।

ಪಚ್ಚನ್ತೇ ಈದಿಸೇ ದೇಸೇ, ಕಥಂ ನಾಮ ವಸಿಸ್ಸರೇ॥

೪೨.

ಜಾತದೇಸಞ್ಚ ಮೇ ದಾನಿ, ಯುವರಾಜಪಭೋಗಿಯಂ।

ಗಮಿಸ್ಸಾಮೀತಿ ನಿಗ್ಗಞ್ಛಿ, ತಮ್ಹಾ ಪರಿಜನತ್ಥಿತೋ॥

೪೩.

ಕಮೇನ ಸನ್ತಿಕಂ ಸಙ್ಖ-ನಾಯಕತ್ಥಲಿಸಞ್ಞಿನೋ।

ಗಾಮಸ್ಸಾಗಾ ಅಹಿಂ ಕಿತ್ತಿ-ಸಿರಿಮೇಘೋ ನಿಸಮ್ಮ ತಂ॥

೪೪.

ಅಭಾವಾ ರಜ್ಜ ದಾಯಾದ-ಸಮಾನಸ್ಸ’ತ್ರಜಸ್ಸ ಮೇ।

ಏಕಾಕೀ’ಹನ್ತಿ ಯೋ ಚಿತ್ತ-ಸನ್ತಾಪೋ ಸನ್ತತಂ ಗತೋ॥

೪೫.

ಜೇಟ್ಠಂವ ಭಾತರಂ ಮಯ್ಹಂ, ತಂ ದೇಹಪಟಿಬಿಮ್ಬಕಂ।

ದಟ್ಠುಂ ಮೇ ಸತ್ತತಂ ಪುಞ್ಞಂ, ಮಹನ್ತಮುದಿತಂತಿಚ॥

೪೬.

ಪಾಮುಜ್ಜವೇಗವಸಗೋ, ನಗರಂ ತಂ ಮನೋಹರಂ।

ಅಲಙ್ಕಾರಾ ಪಯಿತ್ವಾನ, ತೋರಣಾದೀಹಿ ನೇಕಧಾ॥

೪೭.

ಗನ್ತ್ವಾ ಪಟಿಪಥಂಯೇವ, ಬಲೋಘಪರಿವಾರಿತೋ।

ನರಿನ್ದೋ ತಿಥಿನಕ್ಖತ್ತ-ವಿಸೇಸೇ ಸುಭಸಮ್ಮತೇ॥

೪೮.

ಅನಞ್ಞಸಾಧಾರಣತಂ, ಸಮ್ಪತ್ತೇಹಿ ಗುಣೇಹಿ ಚ।

ಲಕ್ಖಣೇಹಿ ಚ ಸಬ್ಬೇಹಿ, ಕಲ್ಯಾಣೇಯಿ ಸುಸಂಯುತಂ॥

೪೯.

ದಿಸ್ವಾ ಕುಮಾರಂ ಸನ್ತುಟ್ಠೋ, ಆಲಿಙ್ಗಿತ್ವಾನ ಪೇಮತೋ।

ಉರೇ ಕತ್ವಾನ ಚುಮ್ಬಿತ್ವಾ, ಮತ್ಥಕಮ್ಹಿ ಪುನಪ್ಪುನಂ॥

೫೦.

ಜನಸ್ಸ ಬಲತೋ ತಸ್ಸ, ಪಸ್ಸತೋ ಲೋಚನೇಹಿ ಸೋ।

ಸನ್ತೋಸ ಅಸ್ಸುಧಾರಾಯೋ, ವಸ್ಸಾಪೇನ್ತೋ ನಿರನ್ತರಂ॥

೫೧.

ಮನುಞ್ಞಮೇಕ ಮಾರುಯ್ಹ, ವಾಹನಂ ಸಹ ಸೂನುನಾ।

ಭೇರಿನಿ ದೇನ ಪೂರೇನ್ತೋ, ದಿಸಾ ದಸ ಸಮನ್ತತೋ॥

೫೨.

ಪವಿಸಿತ್ವಾ ಪುರಂ ತತ್ಥ, ಅಲಙ್ಕಾರೇ ಮನೋರಮೇ।

ದಸ್ಸಯನ್ತೋ ಸಪುತ್ತಸ್ಸ, ಪಾವಿಸಿ ರಾಜಮನ್ದಿರಂ॥

೫೩.

ಲದ್ಧಾ ತತೋ ಕಞ್ಚುಕೀ-ಸುಪಕಾರ,

ವಗಾದಿನೇಕೇ ಪರಿಚಾರಕೇ ಸೋ।

ನಾನಾಗುಣಾ ರಾಧಿತಮಾನಸಸ್ಸ,

ವಸೀಸಕಾಸೇ ಪಿತುನೋ ಸುಖೇನ॥

ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ

ಸಙ್ಖತ್ಥಲಿಪುರಾಭಿಗಮನೋ ನಾಮ

ಏಕಸಟ್ಠಿಮೋ ಪರಿಚ್ಛೇದೋ।