ತಿಸಟ್ಠಿಮ ಪರಿಚ್ಛೇದ

ಸೇನಾಪತಿವಧೋ

೧.

ನಿಜಾಯುಧದುತಿಯಸ್ಸ , ನಿಕ್ಖಮನ್ತಸ್ಸ ತಸ್ಸ ಹಿ।

ತಂ ಖಣಂ ಪುರತೋ ಕೋ’ಪಿ, ಸಙ್ಖಸದ್ದೋ ಸಮುಗ್ಗತೋ॥

೨.

ತತೋ ನೇಕನಿಮಿತ್ತಞ್ಞೂ, ಕುಮಾರೋ ತಂ ಸುಣಿ ತ್ವ ಸೋ।

ನಿಪ್ಫಜ್ಜಿಸ್ಸತಿ ಸಙ್ಕಪ್ಪೋ, ಖಿಪ್ಪಂ ಯೇವೇತಿ ಮೋದವಾ॥

೩.

ತತ್ಥ ತತ್ಥ ನಿಯುತ್ತಾನಂ, ರಕ್ಖಕಾನಮಜಾನತಂ।

ನಿಕ್ಖಮಿತ್ವಾ ಪುರಾವೀತ-ಭಯೋ ಸೀಹಪರಕ್ಕಮೋ॥

೪.

ವೇಗೇನ ಮಗ್ಗಂ ಗನ್ತ್ವಾನ, ಪಞ್ಚಗಾವುತಮತ್ತಕಂ।

ಬದಲತ್ಥಲಗಾಮಸ್ಸ, ಪದೇಸೇನಾತಿ ದೂರಕೇ॥

೫.

ಗಾಮ ಮೇಕಮುಪಾಗಞ್ಚಿ, ಪಿಲಿಂ ವತ್ಥೂತಿ ಸಞ್ಞಿತಂ।

ಜನಾನಂ ಸನ್ನಿಪಾತಾಯ, ನಿಜಾನಂ ಸೋ ಕತಾವಧಿ॥

೬.

ನಿಜಾಗಮನತೋ ಪುಬ್ಬಂ, ಪಟಿಮಗ್ಗೇ ನಿಸೀದಿತುಂ।

ಪಟಿಲದ್ಧನಿಯೋಗಾನಂ, ಯೇಚಿ ದೇವಾಗತೇ ತದಾ॥

೭.

ತಹಿಂ ಠಿತೇ ಸೋ ಪಸ್ಸಿತ್ವಾ, ಏತ್ತಕಾ ಕಿನ್ನು ಆಗತಾ।

ಇತಿ ಪುಚ್ಛಿ ಕುಮಾರೋಥ, ತೇಪಿ ತಂ ಇದ ಮಬ್ರವುಂ॥

೮.

ಲೋಕಪ್ಪವತ್ತಿಂ ಸಕಲಂ, ಜಾನನ್ತೇನಾಪಿ ಸಾಮಿನಾ।

ಕಿಮೇವ ಮುಚ್ಚತೇ ಮಚ್ಚು-ಭಯಂ ಕೇಸಂ ನ ವಿಜ್ಜತಿ॥

೯.

ಬಾಲಾತಾನುಗತೋ ಸಾಮಿ, ಠಿತೋ ವಯಸಿ ಈದಿಸೇ।

ಅಜ್ಜಾಪಿ ಹಿ ಮುಖೇ ತುಯ್ಹಂ, ಖೀರಗನ್ಧೋ ಪವಾಯತಿ॥

೧೦.

ನ ಹೇವತ್ಥಿ ವಿಸುಂ ವಿತ್ತ-ಜಾತಂ ಸಙ್ಗಹಿತಂ ತವ।

ತದಞ್ಞಾ ಚೋಪಕರಣ-ಸಾಮಗ್ಗೀ ನೇವ ವಿಜ್ಜತೇ॥

೧೧.

ಚಿರಮ್ಪರಿಚಿತತ್ತೇಹಿ, ದಳ್ಹಂ ಸಾರುಳಭತ್ತಿಹಿ।

ವಿನಾ’ಮ್ಹೇಹಿ ವಿಸುಂ ಕೇವಾ’ನುಗನ್ತಾರೋ ಜನಾತುವಂ॥

೧೨.

ಕಿಞ್ಚಾಗತಾನಮಮ್ಹಾಕಂ, ಪಿತಾ ತುಯ್ಹಂ ನರಿಸ್ಸರೋ।

ಕಾರೇಸ್ಸತಿ ಇದಂ ನಾಮ, ಸಬ್ಬಥಾ ನೇವ ಞಾಯತೇ॥

೧೩.

ಅಮ್ಹಾಕಮನ್ತರಾಮಗ್ಗೇ , ಸಙ್ಖೋ ನಾಮ ಚಮೂಪತಿ।

ಮಹಬ್ಬಲೋ ಮಹಾವೀರೋ, ರಜ್ಜಸೀಮಂ ತಮಾವಸಂ॥

೧೪.

ಪಚ್ಚತ್ಥಿತೇ ಠಪೇತ್ವಞ್ಞೇ, ಏತೇ ಕತಿಪಯಾ ಮಯಂ।

ಅಞ್ಞಮಞ್ಞಮ್ಹಿ ನಿಯತ-ಮಾಸಙ್ಕೀ ಹದಯಾ ಭುಸಂ॥

೧೫.

ಅರುಣುಗ್ಗಮವೇಲಾ ಚ, ಸಮಾಸನ್ನತರಾಧುನಾ।

ಇತಿ ಭೀತಿಂ ಪಕಾಸೇಸುಂ, ಪಚ್ಚೇಕಂ ಹದಯಸ್ಸಿತಂ॥

೧೬.

ನಿಸಮ್ಮ ತೇಸಂ ವಚನಂ, ವಿಧಾಯ ಮಧುರಂ ಸಿತಂ।

ವೀತಸಙ್ಕೋ ಕುಮಾರೋ ಸೋ, ಮುಖಾನೇ’ಸಂ ವಿಲೋಕಿಯ॥

೧೭.

ಚರಿತ್ವಾಪಿ ಮಯಾ ಸದ್ಧಿ-ಮೇತೇ’ಹೋ ಕಾಲಮೇತ್ತಕಂ।

ನ ಜಾನಿಂಸು ಮಮಂ ಸಬ್ಬೇ, ಯೇಸಞ್ಹಿ ಭಯಮಿದಿಸಂ॥

೧೮.

ಇತಿ ವತ್ವಾ ಭಯಂ ತೇಸಂ, ವಿನೋದೇತು ಮುಪಟ್ಠಿತಂ।

ಸೀಹನಾದಂ ತದಾ’ಕಾಸಿ, ಮಹನ್ತಂ ಸೀಹವಿಕ್ಕಮೋ॥

೧೯.

ತಿಟ್ಠನ್ತು ಮಾನುಸಾ ಸಬ್ಬೇ, ಮಯಿ ಹತ್ಥಗತಾಯುಧೇ।

ಸಕ್ಕೋ ದೇವಾನಮಿನ್ದೋಪಿ, ಕುಪಿತೋ ಕಿಂ ಕರಿಸ್ಸತಿ॥

೨೦.

ಬಾಲೋತಿ ಮಂ ಚಿನ್ತಯ ತಂ, ಜಾತಾ ವೋ ಕುಮತೀದಿಸೀ।

ಪರಿಕ್ಖೀಯತಿ ತೇ ಜಾಣಾ, ನವಯೋ’ತಿ ನ ಕಿಂ ಸುತಂ॥

೨೧.

ಅಜ್ಜೇವ ಕಾತುಮೇಕೇನ, ಕಮ್ಮುನಾ ಚಿನ್ತಿತೇನ ಮೇ।

ಸದೇಸಪರ ದೇಸಟ್ಠಾ, ಭಯಭತ್ತೀ ಯಥಾಮಯಿ॥

೨೨.

ಕರಿಸ್ಸನ್ತಿ ಯಥಾ ವೇದಂ, ಭಯಂ ತುಮ್ಹೇ ಜಹಿಸ್ಸಥ।

ತಥಾ ರತ್ತಿಯಮೇತಾಯ, ವಿಭಾತಾಮಯ ಖಣೇನ ಮೇ॥

೨೩.

ಉನ್ನತೇ ದಸ್ಸಯಿಸ್ಸಾಮಿ, ಬುದ್ಧಿ ಸಾಹಸವಿಕ್ಕಮೇ।

ಅನುಧಾವತಿ ಮಂ ತಾತ, ಸೇತೇಹಿ ಯದಿ ವೋ ಭಯಂ॥

೨೪.

ಪುರತೋ ಹೋಥ ತುಮ್ಹೇಹಿ, ವತ್ವಾ ತೇ ಗಹಿತಾಯುಧೋ।

ಸಾಹಸೇಕರಸೋ ವೀರೋ, ತಮ್ಹಾ ನಿಕ್ಖಮ್ಮ ಗಾಮತೋ॥

೨೫.

ಉದಯಾ’ಚಲಸೀಸಟ್ಠಂ, ಜೇತುಮಾದಿಚ್ಚಮಣ್ಡಲಂ।

ಅಪರಂ ರವಿ ಬಿಮ್ಬಂವ, ಪಚ್ಛಿಮಾ ಸಾ ಮುಖೋದಿತಂ॥

೨೬.

ತೇಜಸಾ ಪಸರನ್ತೇನ, ಜನಾನಂ ಪವಿಕಾಸಯಂ।

ನೇತಮ್ಬುಜವನಂ ಪಾತೋ, ಬದಲತ್ಥಲಿಮಾಗಮಿ॥

೨೭.

ಜಘಸಙ್ಖಸ್ಸರೇನಾ’ಥ, ಸೇನಾ ನಾಥೋ ಪಬುಜ್ಝಿಯ।

ಸಞ್ಜಾತಸಮ್ಭಮೋ ಞತ್ವಾ, ರಾಜಪುತ್ತಮುಪಾಗತಂ॥

೨೮.

ಸದ್ಧಿಂ ಬಲೇನ ಮಹತಾ, ಪಧುಗ್ಗಮ್ಮಕತಾದರೋ।

ಪಣಾಮಮುಚಿತಂ ಕತ್ತು-ಮಾನತೋ ವಸುಧಾತಲೇ॥

೨೯.

ಅಮ್ಹಾಕಮೇಸಜೀವನ್ತೋ, ಕಿಂ ನಾಮತ್ಥಂ ಕರಿಸ್ಸತಿ।

ಮಾರೇತಬ್ಬೋ’ಧುನೇವೇತಿ, ಪಸ್ಸನ್ತೇ ಸಮುಖಂ ಭಟೇ॥

೩೦.

ನೇವಾ’ದಿಟ್ಠಾಪರಾಧಸ್ಸ, ಮರಣಂ ಪುರಿಸೋ ಚಿತಂ।

ವಧೋ ವಿರೋಧೇ ಸಕ್ಕಾ’ತಿ, ಇಙ್ಗಿತೇನ ನಿವಾರಿಯ॥

೩೧.

ಸೇನಾಪತಿಸ್ಸ ಸೋ ಹತ್ಥಂ, ಗಹೇತ್ವಾ ಸೀಹಸನ್ನಿಭೋ।

ಭಾಸನ್ತೋ ಮಧುರಂ ವಾಚಂ, ತಸ್ಸೇವಾ’ಗಞ್ಛಿ ಮನ್ದಿರಂ॥

೩೨.

ಅಥಸ್ಸ ಗಮನಂ ರಞ್ಞೋ, ಭವಿತಬ್ಬಮಜಾನತಾ।

ಸರೂಪಂ ಯಾವ ಜಾನಾಮಿ, ತಾವಸ್ಸೇತೇ ಸಹಾಗತಾ॥

೩೩.

ಯಥಾ ನ ಸಹಿತಾ ಹೋನ್ತಿ, ಠಪೇತಬ್ಬಾ ವಿಸುಂ ವಿಸುಂ।

ಕುಮಾರೋ’ವ ಮಮಾಗಾರೇ, ವಸತೂ’ತಿ ವಿಚಿನ್ತಿಯ॥

೩೪.

ತಥಾ ಸೇನಾಪತಿ ಕತ್ವಾ, ವಞ್ಚೇತುಂ ತಂ ಮಹಾಮತಿಂ।

ದಸ್ಸೇತ್ವಾ’ತಿ ಥೀಸಕ್ಕಾರಂ, ರಞ್ಞೋ ದೂತೇ ಸ ಪೇಸಯಿ॥

೩೫.

ಕುಮಾರೋ’ಥ ವಿದಿತ್ವಾನ, ತೇನ ತಂ ವಞ್ಚನಂ ಕತಂ।

ಕತ್ತಬ್ಬಮೇತ್ಥಾ’ಕತ್ವಾಹ, ಮುದಾಸೀನೋ ಭವೇ ಯದಿ॥

೩೬.

ಇಚ್ಛಿತತ್ಥಸ್ಸ ನಿಪ್ಫತ್ತಿ, ನ ಮೇ ಜಾತು ಭವಿಸ್ಸತಿ।

ಅಯಂ ತಾವಾ’ಧುನಾವಸ್ಸಂ, ಮಾರೇತಬ್ಬೋತಿ ಚಿನ್ತಿಯ॥

೩೭.

ಸಹಾಗತಂ ಪಯೋಜೇತ್ವಾ, ಘಾತಾಪಯಿ ಚಮೂಪತಿಂ।

ಹತೋ ಸೇನಾಧಿನಾಥೋ’ತಿ, ಮಹನ್ತಂ ಖುಭಿತಂ ಅಹು॥

೩೮.

ಸೇನಾನಾಥಭಟೋ ಏಕೋ, ಸುತ್ವಾ ಸೇನಾಪತಿಂ ಹತಂ।

ಮಾರಣಂ ಸಾಮಿನೋ ಮಯ್ಹಂ, ಕಿಂ ನಿಮಿತ್ತಮೀತಿ ಬ್ರವಿ॥

೩೯.

ನೇತ್ತಿಂ ಸಪಾಣೀ ಸಹಸಾ, ಕುಮಾರಂ ಠಿತಮೇಕಕಂ।

ಅಭಿದಾವಿ ಸಸಾಮಿಸ್ಸ, ಪರಿಚತ್ತತ್ತಜೀವಿನೋ॥

೪೦.

ಕುಮಾರಸ್ಸ ಮುಖಂ ದಿಸ್ವಾ, ವೇಧಮಾನೋ ಭಯೇನ ಸೋ।

ಪುರೇ ಠಾತುಮಸಕ್ಕೋನ್ತೋ, ಪಾದಮೂಲೇ ತತೋ ಸಯಿ॥

೪೧.

ಗಣ್ಹಥೇ’ತನ್ತಿವಚನಾ-ಕುಮಾರಸ್ಸ ಪುರೇತರಂ।

ತಸ್ಸೇವೇಕೋ ಸಹಚರೋ, ಭಟಮೇತಂ ವಿಘಾತಯಿ॥

೪೨.

ನಿಯೋಗಂ ಮೇ ವಿನಾ ತೇನ, ಕತಂ ಕಮ್ಮಂ ನ ಯುಜ್ಜತಿ।

ಇತಿ ದಣ್ಡನಮೇತಸ್ಸ, ಕಾರಾಪೇಸಿಯಥೋಚಿತಂ॥

೪೩.

ಅಥ ತಂ ಕಾಲಯಮ್ಭೂತ-ಸಙ್ಖೋಭಮತಿಭಿಂಸನಂ।

ಭಮುಕ್ಖಿಪನಮತ್ತೇನ, ರಾಜಪುತ್ತೋ ಸಮಂ ನಯಿ॥

೪೪.

ವೀರೋ ಯಸೋಧರಧನೋ ಧಿತಿಮಾ ಕುಮಾರೋ।

ವೀರೋಪಕಾರಚತುರೋ ವರಕಿತ್ತಿಸಾರೋ।

ಸೇನಿನ್ದಸಞ್ಚಿತಮನಪ್ಪಧನಂ ಭಟಾನಂ।

ಸಬ್ಬಂ ವಿಸಜ್ಜಯಿ ಯಥಾರುಚಿಯಾ ಗಹೇತುಂ॥

ಸುಜನಪ್ಪಸಾದಸಂವೇಗತ್ಥಾಯ ಕತೇ ಮಹಾವಂಸೇ

ಸೇನಾಪತಿವಧೋ ನಾಮ

ತಿಸಟ್ಠಿಮೋ ಪರಿಚ್ಛೇದೋ।