ಅಟ್ಠಮ ಪರಿಚ್ಛೇದ

ಪಣ್ಡುವಾಸುದೇವಾಭಿಸೇಕೋ

೧.

ವಿಜಯೋ ಸೋ ಮಹಾರಾಜಾ, ವಸ್ಸೇ ಅನ್ತಿಮಕೇ ಠಿತೋ।

ಇತಿ ಚಿನ್ತಯಿ ‘‘ವುದ್ಧೋ’ಹಂ, ನ ಚ ವಿಜ್ಜತಿ ಮೇ ಸುತೋ॥

೨.

ಕಿಚ್ಛೇನ ವಾಸಿತಂ ರಟ್ಠಂ, ನಸ್ಸೇಯ್ಯ ಮಮ ಅಚ್ಚಯೇ।

ಆಣಾಪೇಯ್ಯಂ ರಜ್ಜಹೇತು-ಸುಮಿತ್ತಂ ಭಾತರಂ ಮಮ॥

೩.

ಅಥಾ’ಮಚ್ಚೇಹಿ ಮನ್ತೇತ್ವಾ, ಲೇಖಂ ತತ್ಥ ವಿಸಜ್ಜಯಿ।

ಲೇಖಂ ದತ್ವಾನ ವಿಜಯೋ, ನ ಚಿರೇನ ದಿವಙ್ಗತೋ॥

೪.

ತಸ್ಮಿಂ ಮತೇ ಅಮಚ್ಚಾ ತೇ, ಪೇಕ್ಖನ್ತಾ ಖತ್ತಿಯಾಗಮಂ।

ಉಪತಿಸ್ಸಗಾಮೇ ಠತ್ವಾನ, ರಟ್ಠಂ ಸಮುನುಸಾಸಿಸುಂ॥

೫.

ಮತೇ ವಿಜಯರಾಜಮ್ಹಿ, ಖತ್ತಿಯಾಗಮನಾ ಪುರಾ।

ಏಕಂ ವಸ್ಸಂ ಅಯಂ ಲಂಕಾ-ದೀಪೋ ಆಸಿ ಅರಾಜಕೋ॥

೬.

ತಸ್ಮಿಂ ಸೀಹಪುರೇ ತಸ್ಸ, ಸೀಹಬಾಹುಸ್ಸ ರಾಜಿನೋ।

ಅಚ್ಚಯೇನ ಸುಮಿತ್ತೋ ಸೋ, ರಾಜಾ ತಸ್ಸ ಸುತೋ ಅಹು॥

೭.

ತಸ್ಸ ಪುತ್ತಾ ತಯೋ ಆಸುಂ, ಮದ್ದರಾಜಸ್ಸ ಧೀತುಯಾ।

ದೂತಾ ಸೀಹಪುರಂ ಗನ್ತ್ವಾ, ರಞ್ಞೋ ಲೇಖಂ ಅದಂಸು ತೇ॥

೮.

ಲೇಖಂ ಸುತ್ವಾನ ಸೋ ರಾಜಾ, ಪುತ್ತೇ ಆಮನ್ತಯೀ ತಯೋ।

ಅಹಂ ಮಹಲ್ಲಕೋ ತಾತಾ, ಏಕೋ ತುಮ್ಹೇಸು ಗಚ್ಛತು॥

೯.

ಲಂಕಂ ನೇಕಗುಣಂ ಕನ್ತಂ, ಮಮ ಭಾತುಸ್ಸ ಸನ್ತಕಂ।

ತಸ್ಸ’ಚ್ಚ ಯೇನ ತತ್ಥೇವ, ರಜ್ಜಂ ಕಾರೇತು ಸೋಭನಂ॥

೧೦.

ಕಣಿಟ್ಠಕೋ ಪಣ್ಡುವಾಸು-ದೇವೋ ರಾಜಕುಮಾರಕೋ।

‘‘ಗಮಿಸ್ಸಾಮೀತಿ ಚಿನ್ತೇತ್ವಾ, ಞತ್ವಾ ಸೋತ್ಥಿ ಗತಮ್ಪಿ ಚ॥

೧೧.

ಪಿತರಾ ಸಮನುಞ್ಞಾತೋ, ದ್ವತ್ತಿಂಸಾಮಚ್ಚ ದಾರಕೇ।

ಆದಾಯ ಆರುಹೀ ನಾವಂ, ಪರಿಬ್ಬಾಜಕಲಿಙ್ಗವಾ॥

೧೨.

ಮಹಾಕನ್ದರನಜ್ಜಾ ತೇ, ಮುಖದ್ವಾರಮ್ಹಿ ಓತರಂ।

ತೇ ಪರಿಬ್ಬಾಜಕೇ ದಿಸ್ವಾ, ಜನೋ ಸಕ್ಕರಿ ಸಾಧುಕಂ॥

೧೩.

ಪುಚ್ಛಿತ್ವಾ ನಗರಂ ಏತ್ಥ, ಉಪಯನ್ತಂ ಕಮೇನ ತೇ।

ಉಪತಿಸ್ಸ ಗಾಮಂ ಸಮ್ಪತ್ತಾ, ದೇವತಾ ಪರಿಪಾಲಿತಾ॥

೧೪.

ಅಮಚ್ಚಾ’ನುಮತೋ’ಮಚ್ಚೋ, ಪುಚ್ಛಿ ನೇಮಿತ್ತಕಾ ತಹಿಂ।

ಖತ್ತಿಯಾ’ಗಮನಂ ತಸ್ಸ, ಸೋ ಬ್ಯಾಕಾಸಿ ಪರಂಪಿ ಚ॥

೧೫.

ಸತ್ತಮೇ ದೀವಸೇಯೇವ, ಆಗಮಿಸ್ಸತಿ ಖತ್ತಿಯೋ।

ಬುದ್ಧಸಾಸನ ಮೇತಸ್ಸ, ವಂಸಜೋ’ವ ಠಪೇಸ್ಸತಿ॥

೧೬.

ಸತ್ತಮೇ ದಿವಸೇಯೇವ, ತೇ ಪರಿಬ್ಬಾಜಕೇ ತಹಿಂ।

ಪತ್ತೇ ದಿಸ್ವಾನ ಪುಚ್ಛಿತ್ವಾ, ಅಮಚ್ಚಾ ತೇ ವಿಜಾನಿಯ॥

೧೭.

ತಂ ಪಣ್ಣುವಾಸುದೇವಂ ತೇ, ಲಂಕಾರಜ್ಜೇನ ಅಪ್ಪಯುಂ।

ಮಹೇಸಿಯಾ ಅಭಾವಾಸೋ, ನ ತಾವ ಅಭಿಸೇಚಯಿ॥

೧೮.

ಅಮಿತೋದನಸಕ್ಕಸ್ಸ, ಪಣ್ಡುಸಕ್ಕೋ ಸುತೋ ಅಹು।

ಞತ್ವಾ ವಿನಾಸಂ ಸಕ್ಯಾನಂ, ಸೋ ಆದಾಯ ಸಕಂ ಜನಂ॥

೧೯.

ಗನ್ತ್ವಾ ಅಞ್ಞಾಪದೇಸೇನ, ಗಙ್ಗಾಪಾರಂ ತಹಿಂ ಪುರಂ।

ಮಾಪೇತ್ವಾ ತತ್ಥ ಕಾರೇಸಿ, ರಜ್ಜಂ ತಸ್ಸ ಸುತೇ ಲಭಿ॥

೨೦.

ಧೀತಾ ಕಣಿಟ್ಠಿತಾ ಆಸಿ, ಭದ್ದಕಚ್ಚಾನ ನಾಮಿಕಾ।

ಸಬ್ಬಲಕ್ಖಣಸಮ್ಪನ್ನಾ, ಸುರೂಪಾ ಅಭಿಪತ್ಥಿತಾ॥

೨೧.

ತದತ್ಥಂ ಸತ್ತರಾಜಾನೋ, ಪಣ್ಣಾಕಾರೇ ಮಹಾರಹೇ।

ಪೇಸೇಸುಂ ರಾಜಿನೋ ತಸ್ಸ, ಭೀತೋ ರಾಜೂಹಿ ಸೋ ಪನ॥

೨೨.

ಞತ್ವಾನ ಸೋತ್ಥಿಗಮನಂ, ಅಭಿಸೇಕಫಲಮ್ಪಿ ಚ।

ಸಹದ್ವತ್ತಿಂಸ ಇತ್ಥೀಹಿ, ನಾವಂ ಆರೋಪಿಯಾ’ಸುತಂ॥

೨೩.

ಗಙ್ಗಾಯ ಖಿಪಿ ಗಣ್ಹಾತು, ಪಹು ಮೇ ಧೀತರಂ ಇತಿ।

ಗಹೇತುಂ ತೇ ನ ಸಕ್ಖಿಂಸು, ನಾವಾಸಾಪನ ಸೀಘಗಾ॥

೨೪.

ದುತಿಯೇ ದಿವಸೇಯೇವ, ಗೋಣಾಗಾಮಕ ಪಟ್ಟನಂ।

ಪತ್ತಾಪಬ್ಬಜಿತಾ ಕಾರಾ, ಸಬ್ಬಾ ತಾ ತತ್ಥ ಓತರುಂ॥

೨೫.

ಪುಚ್ಛಿತ್ವಾ ನಗರಂ ಏತ್ಥ, ತಾ ಕಮೇನೋಪಯನ್ತಿಯೋ।

ಉಪತಿಸ್ಸಗಾಮಂ ಸಮ್ಪತ್ತಾ, ದೇವತಾ ಪರಿಪಾಲಿತಾ॥

೨೬.

ನೇಮಿತ್ತಕಸ್ಸ ವಚನಂ, ಸುತ್ವಾ ತತ್ಥಾ’ಗತಾ ತು ತಾ।

ದಿಸ್ವಾ ಅಮಚ್ಚೋ ಪುಚ್ಛಿತ್ವಾ, ಞತ್ವಾ ರಞ್ಞೋ ಸಮಪ್ಪಯಿ॥

೨೭.

ತಂ ಪಣ್ಡುವಾಸುದೇವಂ ತೇ, ಅಮಚ್ಚಾ ಸುದ್ಧಬುದ್ಧಿನೋ।

ರಜ್ಜೇ ಸಮಭಿಸಿಞ್ಚಿಂಸು, ಪುಣ್ಣಸಬ್ಬಮನೋರಥಂ॥

೨೮.

ಸುಭದ್ದಕಚ್ಚಾನ ಮನೋಮರೂಪಿನಿಂ।

ಮಹೇಸೀಭಾವೇ ಅಭಿಸಿಞ್ಚಿಯ’ತ್ತನೋ।

ಸಹಗತಾ ತಾಯ ಪದಾಸಿ ಅತ್ತನಾ।

ಸಹಾಗತಾನಂ ವಸಿ ಭೂಮಿಪೋ ಸುಖನ್ತೀ॥

ಸುಜನಪ್ಪಸಾದ ಸಂವೇಗತ್ಥಾಯ ಕತೇ ಮಹಾವಂಸೇ

ಪಣ್ಡುವಾಸುದೇವಾಭಿಸೇಕೋ ನಾಮ

ಅಟ್ಠಮೋ ಪರಿಚ್ಛೇದೋ।