ನವಮ ಪರಿಚ್ಛೇದ

ಅಭಯಾಭಿಸೇಕೋ

೧.

ಮಹೇಸೀ ಜನಯೀ ಪುತ್ತೇ, ದಸ ಏಕಞ್ಚ ಧೀತರಂ।

ಸಬ್ಬಜೇಟ್ಠೋ’ಭಯೋ ನಾಮ, ಚಿತ್ತಾನಾಮ ಕನಿಟ್ಠಿಕಾ॥

೨.

ಪಸ್ಸಿತ್ವಾ ತಂ ವಿಯಾಕಂಸು, ಬ್ರಾಹ್ಮಣಾ ಮನ್ತಪಾರಗಾ।

‘‘ರಜ್ಜಹೇತು ಸುತೋ ಅಸ್ಸಾ, ಘಾತಯಿಸ್ಸತಿ ಮಾತುಲೇ’’॥

೩.

ಘಾತೇಸ್ಸಾಮಿ ಕನಿಟ್ಠಿನ್ತಿ, ನಿಚ್ಛಿತೇ ಭಾತರಾ’ಭಯೋ।

ವಾರೇಸಿ ಕಾಲೇ ವಾಸೇಸುಂ, ಗೇಹಂ ತಂ ಏಕಥುಣಿಕೇ॥

೪.

ರಞ್ಞೋ ಚ ಸಿರಿಗಬ್ಭೇನ, ತಸ್ಸ ದ್ವಾರಮಕಾರಯುಂ।

ಅನ್ತೋ ಠಪೇಸುಂ ಏಕಞ್ಚ, ದಾಸಿಂ ನರಸತಂ ಬಹಿ॥

೫.

ರೂಪೇನು’ಮ್ಮಾದಯೀ ನರೇ, ದಿಟ್ಠಮತ್ತಾವ ಸಾಯತೋ।

ತತೋ ಉಮ್ಮಾದಚಿತ್ತಾ’ತಿ, ನಾಮಂ ಸೋಪಪದಂ ಲಭಿ॥

೬.

ಸುತ್ವಾನ ಲಂಕಾಗಮನಂ, ಭದ್ದಕಚ್ಚಾನದೇವಿಯಾ।

ಮಾತರಾ ಚೋದಿತಾ ಪುತ್ತಾ, ಠಪೇತ್ವೇ’ಕಞ್ಚ ಆಗಮುಂ॥

೭.

ದಿಸ್ವಾನ ತೇ ಪಣ್ಡುವಾಸು-ದೇವಂ ಲಙ್ಕಿನ್ದಮಾಗತಾ।

ದಿಸ್ವಾನ ತಂ ಕನಿಟ್ಠಿಞ್ಚ, ರೋದಿತ್ವಾ ಸಹ ತಾಯ ಚ॥

೮.

ರಞ್ಞಾ ಸುಕತಸಕ್ಕಾರಾ, ರಞ್ಞೋ’ನುಞ್ಞಾಯ ಚಾರಿಕಂ।

ಚರಿಂಸು ಲಂಕಾದೀಪಮ್ಹಿ, ನಿವಸುಞ್ಚ ಯಥಾರುಚಿಂ॥

೯.

ರಾಮೇನ ವುಸಿತಠಾನಂ, ರಾಮಗೋಣನ್ತಿ ವುಚ್ಚತಿ।

ಉರುವೇಲಾ’ನುರಾಧಾನಂ, ನಿವಾಸಾ ಚ ತಥಾ ತಥಾ॥

೧೦.

ತಥಾ ವಿಜಿತದೀಘಾಯು-ರೋಹಣಾನಂ ನಿವಾಸಕಾ।

ವಿಜಿತಗಾಮೋ ದೀಘಾಯು-ರೋಹಣನ್ತಿ ಚ ವುಚ್ಚತಿ॥

೧೧.

ಕಾರೇಸಿ ಅನುರಾಧೋ ಸೋ, ವಾಪಿಂ ದಕ್ಖಿಣತೋ ತತೋ।

ಕಾರಾಪೇತ್ವಾ ರಾಜಗೇಹಂ, ತತ್ಥ ವಾಸಮಕಪ್ಪಯೀ॥

೧೨.

ಮಹಾರಾಜಾ ಪಣ್ಡುವಾಸು-ದೇವೋ ಜಟ್ಠಸುತಂ ಸಕಂ।

ಅಭಯಂ ಉಪರಜ್ಜಮ್ಹಿ, ಕಾಲೇ ಸಮಭಿಸೇಚಯಿ॥

೧೩.

ದೀಘಾಯುಸ್ಸ ಕುಮಾರಸ್ಸ, ತನಯೋ ದೀಘಗಾಮಣಿ।

ಸುತ್ವಾ ಉಮ್ಮಾದಚಿತ್ತಂ ತಂ, ತಸ್ಸಂ ಜಾತಕುತೂಹಲೋ॥

೧೪.

ಗಹೇತ್ವಾ’ಪತಿಸ್ಸ ಗಾಮಂ, ತಂ ಅಪಸ್ಸಿ ಮನುಜಾಧಿಪಂ।

ಅದಾ ಸಹೋಪರಾಜೇನ, ರಾಜುಪಟ್ಠಾನಮಸ್ಸಸೋ॥

೧೫.

ಗವಕ್ಖಾಭಿಮುಖಟ್ಠಾನೇ, ತಂ ಉಪೇಚ್ಚ ಠಿತಂ ತುಸಾ।

ದಿಸ್ವಾನ ಗಾಮಿಣಿಂ ಚಿತ್ತಾ, ರತ್ತಚಿತ್ತಾ’ಹ ದಾಸಿಕಂ॥

೧೬.

‘‘ಕೋ ಏಸೋ’’ತಿ ತತೋ ಸುತ್ವಾ,

ಮಾತುಲಸ್ಸ ಸುತೋಇತಿ।

ದಾಸಿಂ ತತ್ಥ ನಿಯೋಜೇಸಿ,

ಸದ್ಧಿಂಕತ್ವಾನ ಸೋ ತತೋ॥

೧೭.

ಗವಕ್ಖಮ್ಹಿ ಡಸಾಪೇತ್ವಾ, ರತ್ತಿಂ ಕಕ್ಕಟಯನ್ತಕಂ।

ಆರುಯ್ಹ ಛಿನ್ದಯಿತ್ವಾನ, ಕವಾಟಂ ತೇನ ಪಾವಿಸಿ॥

೧೮.

ತಾಯ ಸದ್ಧಿಂ ವಸಿತ್ವಾನ, ಪಚ್ಚೂಸೇಯೇವ ನಿಕ್ಖಮಿ।

ಏವಂ ನಿಚ್ಚಂ ವಸೀ ತತ್ಥ, ಛಿದ್ದಾಭಾವಾ ಅಪಾಕಟೋ॥

೧೯.

ಸಾ ತೇನ ಅಗ್ಗಹೀ ಗಬ್ಭಂ, ಗಬ್ಭೇ ಪರಿಣತೇ ತತೋ।

ಮಾತು ಆರೋಚಯೀ ದಾಸೀ, ಮಾತಾ ಪುಚ್ಛಿಯ ಧೀತರಂ॥

೨೦.

ರಞ್ಞೋ ಆರೋಚಯೀ ರಾಜಾ, ಅಮನ್ತೇತ್ವಾ ಸುತೇ’ಬ್ರಹ್ಮಾ।

ಪೋಸಿಯೋಸೋ’ಪಿ ಅಮ್ಹೇಹಿ, ದೇವ ತಸ್ಸೇವ ತಂ ಇತಿ॥

೨೧.

ಪುತ್ತೋ ಚೇ ಮಾರಯಿಸ್ಸಾಮ, ತ’ನ್ತಿ ತಸ್ಸ ಅದಂಸು ತಂ।

ಸಾ ಸೂತಿಕಾಲಸಮ್ಪತ್ತೇ, ಸೂತಿ ಗೇಹಞ್ಚ ಪಾವಿಸಿಂ॥

೨೨.

ಸಙ್ಕಿತ್ವಾ ಗೋಪಕಂ ಚಿತ್ತಂ, ಕಾಲವೇಲಞ್ಚ ದಾಸಕಂ।

ತಸ್ಮಿಂ ಕಮ್ಮೇ ನಿಸ್ಸಾಯಾ’ತಿ, ಗಾಮಣಿ ಪರಿಚಾರಕೇ॥

೨೩.

ತೇ ಪಟಿಞ್ಞಂ ಅದೇನ್ತೇ ತೇ, ರಾಜಪುತ್ತಾ ಅಘಾತಯುಂ।

ಯಕ್ಖಾ ಹುತ್ವಾನ ರಕ್ಖಿಂಸು, ಉಭೋ ಗಬ್ಭೇ ಕುಮಾರಕಂ॥

೨೪.

ಅಞ್ಞಂ ಉಪವಿಜಞ್ಞಂ ಸಾ, ಸಲ್ಲಕ್ಖಾ ಪೇಸಿ ದಾಸಿಯಾ।

ಚಿತ್ತಾ ಸಾ ಜನಯೀ ಪುತ್ತಂ, ಸಾ ಇತ್ಥಿ ಪನ ಧೀತರಂ॥

೨೫.

ಚಿತ್ತಂ ಸಹಸ್ಸಂ ದಾಪೇತ್ವಾ, ತಸ್ಸಾ ಪುತ್ತಂ ಸಕಮ್ಪಿ ಚ।

ಆಣಾಪೇತ್ವಾ ಧೀತರಂ ತಂ, ನಿಪಜ್ಜಾಪೇಸಿ ಸನ್ತಿಕೇ॥

೨೬.

ಧೀತಾ ಲದ್ಧಾ’ತಿ ಸುತ್ವಾನ, ತುಟ್ಠಾ ರಾಜಸುತಾ ಅಹುಂ।

ಮಾತಾ ಚ ಮಾತುಮಾತಾ ಚ, ಉಭೋ ಪನ ಕುಮಾರಕಂ॥

೨೭.

ಮಾತಾಮಹಸ್ಸ ನಾಮಞ್ಚ, ಜೇಟ್ಠಸ್ಸ ಮಾತುಲಸ್ಸ ಚ।

ಏಕಂ ಕತ್ವಾ ತಮಕರುಂ, ಪಣ್ಡುಕಾಭಯನಾಮಕಂ॥

೨೮.

ಲಂಕಾ ಪಾಲೋ ಪಣ್ಡುವಾಸು-ದೇವೋ ರಜ್ಜಮಕಾರಯಿ।

ತಿಂಸ ವಸ್ಸಮ್ಹಿ ಜಾತಮ್ಹಿ, ಮತೋ ಸೋ ಪಣ್ಡುಕಾಭಯೇ॥

೨೯.

ತಸ್ಮಿಂ ಮತಸ್ಮಿಂ ಮನುಜಾಧಿಪಸ್ಮಿಂ,

ಸಬ್ಬೇ ಸಮಾಗಮ್ಮ ನರಿನ್ದಪುತ್ತಾ।

ತಸ್ಸಾಭಯಸ್ಸಾಭಯದಸ್ಸ ಭಾತು,

ರಾಜಾಭಿಸೇಕಂ ಅಕರುಂ ಉಳಾರಾತಿ॥

ಸುಜನಪ್ಪಸಾದ ಸಂವೇಗತ್ಥಾಯ ಕತೇ ಮಹಾವಂಸೇ

ಅಭಯಾಭಿಸೇಕೋ ನಾಮ

ನವಮೋ ಪರಿಚ್ಛೇದೋ।