೬. ಛಟ್ಠೋ ಕಣ್ಡೋ (ತ್ಯಾದಿ)

೧. ವತ್ತಮಾನೇ ತಿ ಅನ್ತಿ ಸಿ ಥ ಮಿ ಮ ತೇ ಅನ್ತೇ ಸೇ ವ್ಹೇ ಏ ಮ್ಹೇ।

ವತ್ತಮಾನೇ ಆರದ್ಧಾಪರಿಸಮತ್ತೇ ಅತ್ಥೇ ವತ್ತಮಾನತೋ ಕ್ರಿಯತ್ಥಾ ತ್ಯಾದಯೋ ಹೋನ್ತಿ। ಗಚ್ಛತಿ, ಗಚ್ಛನ್ತಿ, ಗಚ್ಛಸಿ ಗಚ್ಛಥ, ಗಚ್ಛಾಮಿ ಗಚ್ಛಾಮ, ಗಚ್ಛತೇ ಗಚ್ಛನ್ತೇ, ಗಚ್ಛಸೇ ಗಚ್ಛವ್ಹೇ, ಗಚ್ಛೇ ಗಚ್ಛಾಮ್ಹೇ। ಕಥಂ ‘ಪುರೇ ಅಧಮ್ಮೋ ದಿಪ್ಪತಿ, ಪುರಾ ಮರಾಮೀ’ತಿ? ವತ್ತಮಾನಸ್ಸೇವವತ್ತುಮಿಟ್ಠತ್ತಾ ತಂಸಮೀಪಸ್ಸ ತಗ್ಗಹಣೇನ ಗಹಣಾ, ಪುರೇಪುರಾಸದ್ದೇಹಿ ವಾ ಅನಾಗತತ್ತಾವಗಮೇ ತದಾ ತಸ್ಸ ವತ್ತಮಾನತ್ತಾ, ಕಾಲಬ್ಯತ್ತಯೋ ವಾ ಏಸೋ, ಭವನ್ತೇವ ಹಿ ಕಾಲನ್ತರೇಪಿ ತ್ಯಾದಯೋ ಬಾಹುಲಕಾ ‘ಸನ್ತೇಸು ಪರಿಗೂಹಾಮಿ, ಮಾ ಚ ಕಿಞ್ಚ ಇತೋ ಅದಂ’ ‘ಕಾಯಸ್ಸ ಭೇದಾ ಅಭಿಸಮ್ಪರಾಯಂ, ಸಹಬ್ಯತಂ ಗಚ್ಛತಿ ವಾಸವಸ್ಸ, ‘ಅನೇಕಜಾತಿಸಂಸಾರಂ ಸನ್ಧಾವಿಸ್ಸಂ’ ಅತಿವೇಲಂ ನ ಮಸ್ಸಿಸ್ಸ’ನ್ತಿ।

೨. ಭವಿಸ್ಸತಿ ಸ್ಸತಿ ಸ್ಸನ್ತಿ ಸ್ಸಸಿ ಸ್ಸಥ ಸ್ಸಾಮಿ ಸ್ಸಾಮ ಸ್ಸತೇ ಸ್ಸನ್ತೇ ಸ್ಸಸೇ ಸ್ಸವ್ಹೇ ಸ್ಸಂ ಸ್ಸಾಮ್ಹೇ।

ಭವಿಸ್ಸತಿ ಅನಾರದ್ಧೇ ಅತ್ಥೇ ವತ್ತಮಾನತೋ ಕ್ರಿಯತ್ಥಾ ಸ್ಸತ್ಯಾದಯೋ ಹೋನ್ತಿ। ಗಮಿಸ್ಸತಿ ಗಮಿಸ್ಸನ್ತಿ, ಗಮಿಸ್ಸಸಿ ಗಮಿಸ್ಸಥ, ಗಮಿಸ್ಸಾಮಿ ಗಮಿಸ್ಸಾಮ, ಗಮಿಸ್ಸತೇ ಗಮಿಸ್ಸನ್ತೇ, ಗಮಿಸ್ಸಸೇ ಗಮಿಸ್ಸವ್ಹೇ, ಗಮಿಸ್ಸಂ ಗಮಿಸ್ಸಾಮ್ಹೇ।

೩. ನಾಮೇ ಗರಹಾವಿಮ್ಹಯೇಸು।

ನಾಮಸದ್ದೇ ನಿಪಾತೇ ಸತಿ ಗರಹಾಯಂ ವಿಮ್ಹಯೇ ಚ ಗಮ್ಯಮಾನೇ ಸ್ಸತ್ಯಾದಯೋ ಹೋನ್ತಿ। ಇಮೇ ಹಿ ನಾಮ ಕಲ್ಯಾಣಧಮ್ಮಾ ಪಟಿಜಾನಿಸ್ಸನ್ತಿ, ನ ಹಿ ನಾಮ ಭಿಕ್ಖವೇ ತಸ್ಸ ಮೋಘಪುರಿಸಸ್ಸ ಪಾಣೇಸು ಅನುದ್ದಯಾ ಭವಿಸ್ಸತಿ, ಕಥಂ ಹಿ ನಾಮ ಸೋ ಭಿಕ್ಖವೇ ಮೋಘಪುರಿಸೋ ಸಬ್ಬಮತ್ತಿಕಾಮಯಂ ಕುಟಿಕಂ ಕರಿಸ್ಸತಿ? ತತ್ಥ ನಾಮ ತ್ವಂ ಮೋಘಪುರಿಸ ಮಯಾ ವಿರಾಗಾಯ ಧಮ್ಮೇ ದೇಸಿತೇ ಸರಾಗಾಯ ಚೇತೇಸ್ಸಸಿ? ಅತ್ಥಿ ನಾಮ ತಾತ ಸುದಿನ್ನ ಆಭಿದೋಸಿಕಂ ಕುಮ್ಮಾಸಂ ಪರಿಭುಞ್ಜಿಸ್ಸಸಿ, ಅತ್ಥಿಯೇವಿಹಾಪಿ ನಿನ್ದಾವಗಮೋ। ವಿಮುಯೇ-ಅಚ್ಛರಿಯಂ ವತ ಭೋ ಅಬ್ಭುತಂ ವತ ಭೋ ಸನ್ತೇನ ವತ ಭೋ ಪಬ್ಬಜಿತಾ ವಿಹಾರೇನ ವಿಹರನ್ತಿ, ಯತ್ರ ಹಿ ನಾಮ ಸಞ್ಞೀ ಸಮಾನೋ ಜಾಗರೋ ಪಞ್ಚಮತ್ತಾನಿ ಸಕಟಸತಾನಿ ನಿಸ್ಸಾಯ ನಿಸ್ಸಾಯ ಅಭಿಕ್ಕನ್ತಾನಿ ನೇವ ದಕ್ಖತಿ ನ ಪನ ಸದ್ದಂ ಸೋಸ್ಸತಿ, ಅಚ್ಛರಿಯಂ ಅನ್ಧೋ ನಾಮ ಪಬ್ಬತಮಾರೋಹಿಸ್ಸತಿ, ಬಧಿರೋ ನಾಮ ಸದ್ದಂ ಸೋಸ್ಸತಿ।

೪. ಭೂತೇ ಈಉಂ ಓತ್ಥ ಇಂ ಮ್ಹಾ ಆ ಊ ಸೇ ವ್ಹಂ ಅ ಮ್ಹೇ।

ಭೂತೇ ಪರಿಸಮತ್ತೇ ಅತ್ಥೇ ವತ್ತಮಾನತೋ ಕ್ರಿಯತ್ಥಾ ಈ ಆದಯೋ ಹೋನ್ತಿ। ಅಗಮೀ ಅಗಮುಂ, ಅಗಮೋ ಅಗಮಿತ್ಥ, ಅಗಮಿಂ ಅಗಮಿಮ್ಹಾ , ಅಗಮಾ ಅಗಮೂ, ಅಗಮಿಸೇ ಅಗಮಿವ್ಹಂ, ಅಗಮ ಅಗಮಿಮ್ಹೇ। ಭೂತಸಾಮಞ್ಞವಚನಿಚ್ಛಾಯಮನಜ್ಜತನೇಪಿ ‘ಸುವೋ ಅಹೋಸಿ ಆನನ್ದೋ’।

೫. ಅನಜ್ಜತನೇ ಆ ಊ ಓ ತ್ಥ ಅ ಮ್ಹಾ ತ್ಥ ತ್ಥುಂ ಸೇ ವ್ಹಂ ಇಂ ಮ್ಹಸೇ।

ಅವಿಜ್ಜಮಾನಜ್ಜತನೇ ಭೂತೇ-ತ್ಥೇ ವತ್ತಮಾನತೋ ಕ್ರಿಯತ್ಥಾ ಆಆದಯೋ ಹೋನ್ತಿ।

ಆಞಾಯ್ಯಾ ಚ ಉಟ್ಠಾನಾ, ಆಞಾಯ್ಯಾ ಚ ಸಂವೇಸನಾ।

ಏಸಜ್ಜತನೋ ಕಾಲೋ, ಅಹರುಭತಡ್ಢರತ್ತಂ ವಾ॥

ಅಗಮಾ ಅಗಮೂ, ಅಗಮೋ, ಅಗಮತ್ಥ, ಅಗಮ ಅಗಮಮ್ಹಾ, ಅಗಮತ್ಥ ಅಗಮತ್ಥುಂ, ಅಗಮಸೇ ಅಗಮವ್ಹಂ, ಅಗಮಿಂ ಅಗಮಮ್ಹಸೇ। ಅಞ್ಞಪದತ್ಥೋ ಕಿಂ? ಅಜ್ಜ ಹಿಯ್ಯೋ ವಾ ಅಗಮಾಸಿ।

೬. ಪರೋಕ್ಖೇ ಅ ಉ ಏ ತ್ಥ ಅ ಮ್ಹ ತ್ಥ ರೇ ತ್ಥೋ ವ್ಹೋ ಇ ಮ್ಹೇ।

ಅಪಚ್ಚಕ್ಖೇ ಭೂತಾನಜ್ಜತನೇ-ತ್ಥೇ ವುತ್ತಮಾನತೋ ಕ್ರಿಯಾತ್ಥಾ ಅ ಆದಯೋ ಹೋನ್ತಿ। ಜಗಾಮ ಜಗಮು, ಜಗಮೇ ಜಗಪಿತ್ಥ, ಜಗಮ ಜಗಮಿಮ್ಹ, ಜಗಮಿತ್ಥ ಜಗಮಿರೇ, ಜಗಮಿತ್ಥೋ ಜಗಮಿವ್ಹೋ, ಜಗಮಿ ಜಗಮಿಮ್ಹೇ। ಮೂಳ್ಹವಿಕ್ಖಿತ್ತಬ್ಯಾಸತ್ತಚಿತ್ತೇನ ಅತ್ತನಾಪಿ ಕ್ರಿಯಾಕತಾಭಿನಿಬ್ಬತ್ತಿತಕಾಲೇ-ನುಪಲದ್ಧಾ ಸಮಾನಾ ಫಲೇನಾ-ನುಮೀಯಮಾನಾ ಪರೋಕ್ಖಾವ ವತ್ಥುತೋ, ತೇನುತ್ತಮವಿಸಯೇಪಿ ಪಯೋಗಸಮವೋ।

೭. ಏಯ್ಯಾದೋ ವಾತಿಪತ್ತಿಯಂ ಸ್ಸಾ ಸ್ಸಂ ಸು ಸ್ಸೇ ಸ್ಸಥ ಸ್ಸಂ ಸ್ಸಾಮ್ಹಾ ಸ್ಸಥ ಸ್ಸಿಂಸು ಸಸ್ಸೇ ಸ್ಸವ್ಹೇ ಸ್ಸಿಂ ಸ್ಸಾಮ್ಹಸೇ।

ಏಯ್ಯಾದೋ ವಿಸಯೇ ಕ್ರಿಯಾತಿಪತ್ತಿಯಂ ಸ್ಸಾದಯೋ ಹೋನ್ತಿ ವಿಭಾಸಾ। ವಿಧುರಪ್ಪಚ್ಚಯೋಪನಿಪಾತತೋ ಕಾರಣವೇಕಲ್ಲತೋ ವಾ ಕ್ರಿಯಾಯಾತಿಪತನಮನಿಪ್ಫತ್ತಿ ಕ್ರಿಯಾತಿಪತ್ತಿ, ಏತೇ ಚ ಸ್ಸಾದಯೋ ಸಾಮತ್ಥಿಯಾತೀತಾನಾಗತೇಸ್ವೇವ ಹೋನ್ತಿ ನ ವತ್ತಮಾನೇ ತತ್ರ… ಕ್ರಿಯಾತಿಪತ್ಯಸಮ್ಭವಾ, ಸಚೇ ಪಠಮವಯೇ ಪಬ್ಬಜ್ಜಂ ಅಲಭಿಸ್ಸಾ ಅರಹಾ ಅಭವಿಸ್ಸಾ, ದಕ್ಖಿಣೇನ ಚೇ ಅಗಮಿಸ್ಸಾ ನ ಸಕಟಂ ಪರಿಯಾ ಭವಿಸ್ಸಾ, ದಕ್ಖಿಣೇನ ಚೇ ಅಗಮಿಸ್ಸಂಸು, ಅಗಮಿಸ್ಸೇ ಅಗಮಿಸ್ಸಥ, ಅಗಮಿಸ್ಸಂ ಅಗಮಿಸ್ಸಾಮ್ಹಾ, ಅಗಮಿಸ್ಸಥ ಅಗಮಿಸ್ಸಿಂಸು, ಅಗಮಿಸ್ಸಸೇ ಅಗಮಿಸ್ಸವ್ಹೇ, ಅಗಮಿಸ್ಸಿಂ ಅಗಮಿಸ್ಸಾಮ್ಹಸೇ, ನ ಸಕಟಂ ಪರಿಯಾಭವಿಸ್ಸಾ, ವಾತಿಕಿಂ? ದಕ್ಖಿಣೇ ನ ಚೇ ಗಮಿಸ್ಸತಿ ನ ಸಕಟಂ ಪರಿಯಾ ಭವಿಸ್ಸತಿ।

೮. ಹೇತುಫಲೇಸ್ವೇಯ್ಯ ಏಯ್ಯುಂ ಏಯ್ಯಾಸಿ ಏಯ್ಯಾಥ ಏಯ್ಯಾಮಿ ಏಯ್ಯಾಮ ಏಥ ಏರಂ ಏಥೋ ಏಯ್ಯವ್ಹೋ ಏಯ್ಯಂ ಏಯ್ಯಾಮ್ಹೇ।

ಹೇತುಭೂತಾಯಂ ಏಲಭೂತಾಯಞ್ಚ ಕ್ರಿಯಾಯಂ ವತ್ತಮಾನತೋ ಕ್ರಿಯತ್ಥಾ ಏಯ್ಯಾದಯೋ ವಾ ಹೋನ್ತಿ, ಸಚೇ ಸಙ್ಖಾರಾ ನಿಚ್ಚಾ ಭವೇಯ್ಯುಂ ನ ನಿರುಜ್ಝೇಯ್ಯುಂ, ದಕ್ಖಿಣೇನ ಚೇ ಗಚ್ಛೇಯ್ಯ ನ ಸಕಟಂ ಪರಿಯಾಭವೇಯ್ಯ, ದಕ್ಖಿಣೇನ ಚೇ ಗಚ್ಛೇಯ್ಯುಂ, ಗಚ್ಛೇಯ್ಯಾಸಿ ಗಚ್ಛೇಯ್ಯಾಥ, ಗಚ್ಛೇಯ್ಯಾಮಿ ಗಚ್ಛೇಯ್ಯಾಮ, ಗಚ್ಛೇಥ ಗಚ್ಛೇರಂ, ಗಚ್ಛೇಥೋ ಗಚ್ಛೇಯ್ಯವ್ಹೋ, ಗಚ್ಛೇಯ್ಯಂ ಗಚ್ಛೇಯ್ಯಾಮ್ಹೇ, ನ ಸಕಟಂ ಪರಿಯ್ಯಾಭವೇಯ್ಯ, ಭವನಂ ಗಮನಂ ಚ ಹೇತು, ಅನಿರುಜ್ಝನಂ ಅಪರಿಯಾಭವನಂ ಚ ಫಲಂ, ಇಹ ಕಸ್ಮಾ ನ ಹೋತಿ ‘ಹನ್ತೀಹಿ ಪಲಾಯತಿ, ವಸ್ಸತೀತಿ ಧಾವತಿ, ಹನಿಸ್ಸತೀತಿ ಪಲಾಯಿಸ್ಸತೀ’ತಿ? ಇತಿ ಸದ್ದೇನೇವ ಹೇತುಹೇತುಮನ್ತತಾಯ ಜೋತಿತತ್ತಾ, ವಾತಿ ಕಿಂ? ದಕ್ಖಿಣೇನ ಚೇ ಗಮಿಸ್ಸತಿ ನ ಸಕಟಂ ಪರಿಯಾಭವಿಸ್ಸತಿ।

೯. ಪಞ್ಹಪತ್ಥನಾವಿಧೀಸು।

ಪಞ್ಹೋ=ಸಮ್ಪುಚ್ಛನಂ ಸಮ್ಪಧಾರಣಂ ನಿರೂಪಣಂ ಕಾರಿಯಾನಿಚ್ಛಯನಂ ಪತ್ಥನಾ=ಯಾಚನಂ ಇಟ್ಠಾಸಿಂ ಭನಞ್ಚ, ವಿಧಿ=ವಿಧಾನಂ ನಿಯೋಜನಂ ಕ್ರಿಯಾಸು ಬ್ಯಾಪಾರಣಾ, ಸಾ ಚ ದುವಿಧಾವ ಸಾದರಾನಾದರವಸೇನ… ವಿಸಯಭೇದೇನ ಭಿನ್ನಾಯಪಿ ತದುಭಯಾನತಿವತ್ತನತೋ, ಏತೇಸು ಪಞ್ಹಾದೀಸು ಕ್ರಿಯತ್ಥತೋ ಏಯ್ಯೋದಯೋ ಹೋನ್ತಿ, ಪಞ್ಹೇ - ಕಿಮಾಯಸ್ಮಾ ವಿನಯಂ ಪರಿಯಾಪುಣೇಯ್ಯ? ಉದಾಹು ಧಮ್ಮಂ, ಗಚ್ಛೇಯ್ಯಂ ವಾಹಂ ಉಪೋಸಥಂ ನ ವಾ ಗಚ್ಛೇಯ್ಯಂ, ಪತ್ಥನಾಯಂ-ಲಭೇಯ್ಯಾ-ಹಂ ಭನ್ತೇ ಭಗವತೋ ಸನ್ತಿಕೇ ಪಬ್ಬಜ್ಜಂ ಲಭೇಯ್ಯಂ ಉಪಸಮ್ಪದಂ, ಪಸ್ಸೇಯ್ಯಂ ತಂ ವಸ್ಸಸತಂ ಅರೋಗಂ, ವಿಧಿಮ್ಹಿ-ಭವಂ ಪತ್ತಂ ಪಚೇಯ್ಯ, ಭವಂ ಪುಞ್ಞಂ ಕರೇಯ್ಯ, ಇಹ ಭವಂ ಭುಞ್ಜೇಯ್ಯ, ಇಹ ಭವಂ ನಿಸೀದೇಯ್ಯ, ಮಾಣವಕಂ ಭವಂ ಅಜ್ಝಾಪೇಯ್ಯ, ಅನುಞ್ಞಾಪತ್ತಕಾಲೇಸುಪಿ ಸಿದ್ಧಾವ… ತತ್ಥಾಪಿ ವಿಧಿಪ್ಪತೀತಿತೋ, ಅನುಞ್ಞಾಯಂ-ಏವಂ ಕರೇಯ್ಯಾಸಿ, ಪತ್ತಕಾಲೇ-ಕಟಂ ಕರೇಯ್ಯಾಸಿ, ಪತ್ತೋ ತೇ ಕಾಲೋ ಕಟಕರಣೇ, ಯದಿ ಸಙ್ಘಸ್ಸ ಪತ್ತಕಲ್ಲಂ ಸಙ್ಘೋ ಉಪೋಸಥಂ ಕರೇಯ್ಯ, ಏತಸ್ಸ ಭಗವಾ ಕಾಲೋ ಏತಸ್ಸ ಸುಗತ ಕಾಲೋ ಯಂ ಭಗವಾ ಸಾವಕಾನಂ ಸಿಕ್ಖಾಪದಂ ಪಞ್ಞಪೇಯ್ಯ, ಪೇಸನೇಪಿಚ್ಛನ್ತಿ ‘ಗಾಮಂ ತ್ವಂ ಭಣೇ ಗಚ್ಛೇಯ್ಯಾಸಿ’।

೧೦. ತು ಅನ್ತು ಹಿ ಥ ಮಿ ಮ ತಂ ಅನ್ತಂ ಸ್ಸು ವ್ಹೋ ಏ ಆಮಸೇ।

ಪಞ್ಹಾದೀಸ್ವೇತೇ ಹೋನ್ತಿ ಕ್ರಿಯತ್ಥತೋ। ಗಚ್ಛತು ಗಚ್ಛನ್ತು, ಗಚ್ಛಾಹಿ ಗಚ್ಛಥ, ಗಚ್ಛಾಮಿ ಗಚ್ಛಾಮ, ಗಚ್ಛತಂ ಗಚ್ಛನ್ತಂ, ಗಚ್ಛಸ್ಸು ಗಚ್ಛವ್ಹೋ, ಗಚ್ಛೇ, ಗಚ್ಛಾಮಸೇ, ಪಞ್ಹೇ-ಕಿನ್ನು ಖಲು ಭೋ ಬ್ಯಾಕರಣಮಧೀಯಸ್ಸು, ಪತ್ಥನಾಯಂ-ದದಾಹಿ ಮೇ, ಜೀವತು ಭವಂ, ವಿಧಿಮ್ಹಿ-ಕಟಂ ಕರೋತು ಭವಂ, ಪುಞ್ಞಂ ಕರೋತು ಭವಂ, ಇಹ ಭವಂ ಭುಞ್ಜತು, ಇಹ ಭವಂ ನಿಸೀದತು, ಉದ್ದಿಸತು ಭನ್ತೇ ಭಗವಾ ಭಿಕ್ಖೂನಂ ಪಾತಿಮೋಕ್ಖಂ, ಪೇಸನೇ-ಗಚ್ಛ ಭಣೇ ಗಾಮಂ, ಅನುಮತಿಯಂ - ಏವಂ ಕರೋಹಿ, ಪತ್ತಕಾಲೇ-ಕಾಲೋ-ಯಂ ತೇ ಮಹಾವೀರ ಉಪ್ಪಜ್ಜ ಮಾತುಕುಚ್ಛಿಯಂ।

೧೧. ಸತ್ಯರಹೇಸ್ವೇಯ್ಯಾದೀ।

ಸತ್ತಿಯಂ ಅರ ಹತ್ಥೇ ಚ ಕ್ರಿಯತ್ಥಾ ಏಯ್ಯಾದಯೋ ಹೋನ್ತಿ। ಭವಂ ಖಲು ರಜ್ಜಂ ಕರೇಯ್ಯ, ಭವಂ ಸತ್ತೋ ಅರಹೋ।

೧೨. ಸಮ್ಭಾವನೇ ವಾ।

ಸಮ್ಭಾವನೇ ಗಮ್ಯಮಾನೇ ಧಾತುನಾ ವುಚ್ಚಮಾನೇ ಚ ಏಯ್ಯಾದಯೋ ಹೋನ್ತಿ ವಿಭಾಸಾ। ಅಪಿ ಪಬ್ಬತಂ ಸಿರಸಾ ಭಿನ್ದೇಯ್ಯ, ಕ್ರಿಯಾತಿಪತ್ತಿಯನ್ತು ಸ್ಸಾದೀ-ಅಸನಿಯಾಪಿ ಹತೋ ನಾಪತಿಸ್ಸಾ, ಸಮ್ಭಾವೇಮಿ ಸದ್ದಹಾಮಿ ಅವಕಪ್ಪೇಮಿ ಭುಞ್ಜೇಯ್ಯ ಭವಂ ಭುಞ್ಜಿಸ್ಸತಿ ಭವಂ ಅಭುಞ್ಜಿ ಭವಂ, ಕ್ರಿಯಾತಿಪತ್ತಿಯನ್ತು ಸ್ಸಾದೀ-ಸಮ್ಭಾವೇಮಿ ನಾಭುಞ್ಜಿಸ್ಸಾ ಭವಂ।

೧೩. ಮಾಯೋಗೇ ಈಆಆದೀ।

ಮಾ ಯೋಗೇ ಸತಿ ಈಆದಯೋ ಆಆದಯೋ ಚ ವಾ ಹೋನ್ತಿ। ಮಾ ಸು ಪುನಪಿ ಏವರೂಪಮಕಾಸಿ, ಮಾ ಭವಂ ಅಗಮಾ ವನಂ, ವಾತ್ವೇವ? ಮಾ ತೇ ಕಾಮಗುಣೇ ಭಮಸ್ಸು ಚಿತ್ತಂ, ಮಾ ತ್ವಂ ಕರಿಸ್ಸಸಿ, ಮಾ ತ್ವಂ ಕರೇಯ್ಯಾಸಿ, ಅಸಕಕಾಲತ್ಥೋಯಮಾರಮ್ಭೋ, ಬುದ್ಧೋ ಭವಿಸ್ಸತೀತಿ ಪದನ್ತರಸಮ್ಬನ್ಧೇನಾನಾಗತಕಾಲತಾ ಪತೀಯತೇ, ಏವಂ ಕತೋ ಕಟೋ ಸ್ವೇ ಭವಿಸ್ಸತಿ, ಭಾವಿ ಕಿಚ್ಚಮಾಸೀತಿ।

ಲುನಾಹಿ ಲುನಾಹಿತ್ವೇವಾಯಂ ಲುನಾತಿ, ಲುನಸ್ಸು ಲುನಸ್ಸುತ್ವೇವಾಯಂ ಲುನಾ-ತೀತಿ ತ್ವಾದೀನಮೇವೇತಂ ಮಜ್ಝಿಮಪುರಿಸೇಕವಚನಾನಮಾಭಿಕ್ಖಞ್ಞೇ ದ್ವಿಬ್ಬವಚನಂ, ಇದಂ ವುತ್ತಂ ಹೋತಿ ‘ಏವ ಮೇಸ ತುರಿತೋ ಅಞ್ಞೇಪಿ ನಿಯೋಜೇನ್ತೋವಿಯ ಕಿರಿಯಂ ಕರೋತೀ’ತಿ, ಏವಂ ಲುನಾಥ ಲುನಾಥತ್ವೇವಾಯಂ ಲುನಾತಿ, ಲುನವ್ಹೋ ಲುನವ್ಹೋತ್ವೇವಾಯಂ ಲುನಾತಿ, ತಥಾ ಕಾಲನ್ತರೇಸುಪಿ ಲುನಾಹಿ ಲುನಾಹಿತ್ವೇವಾಯಂ ಅಲುನಿ, ಅಲುನಾ, ಲುಲಾವ, ಲುನಿಸ್ಸತೀತಿ, ಏವಂ ಸ್ಸುಮ್ಹಿ ಚ ಯೋಜನೀಯಂ, ತಥಾ ಸಮುಚ್ಚಯೇಪಿ ಮಠಮಟ, ವಿಹಾರಮಟೇತ್ವೇವಾಯಮಟತಿ, ಮಠಮಟಸ್ಸು, ವಿಹಾರಮಟಸ್ಸುತ್ವೇವಾಯಮಟತಿ, ಬ್ಯಾಪಾರಭೇದೇ ತುಸಾಮಞ್ಞವಚನಸ್ಸೇವ ಬ್ಯಾಪಕತ್ತಾ ಅನುಪ್ಪಯೋಗೋ ಭವತಿ, ಓದನಂ ಭುಞ್ಜ, ಯಾಗುಂ ಪಿವ, ಧಾನಾ ಖಾದೇತ್ವೇವಾಯ-ಮಜ್ಝೋಹರತಿ।

೧೪. ಪುಬ್ಬಪರಚ್ಛಕ್ಕಾನಮೇಕಾನೇಕೇಸು ತುಮ್ಹಾಮ್ಹಸೇಸೇಸು ದ್ವೇ ದ್ವೇ ಮಜ್ಝಿಮುತ್ತಮಪಠಮಾ।

ಏಕಾನೇಕೇಸು ತುಮ್ಹಾಮ್ಹಸದ್ದವಚನೀಯೇಸು ತದಞ್ಞಸದ್ದವಚನೀಯೇಸು ಚ ಕಾರಕೇಸು ಪುಬ್ಬಚ್ಛಕ್ಕಾನಂ ಪರಚ್ಛಕ್ಕಾನಂ ಮಜ್ಝಿಮುತ್ತಮಪಠಮಾ ದ್ವೇ ದ್ವೇ ಹೋನ್ತಿ ಯಥಾಕ್ಕಮಂ ಕ್ರಿಯತ್ಥಾ, ಉತ್ತಮಸದ್ದೋ-ಯಂ ಸಭಾವತೋ ತತಿಯದುಕೇ ರುಳ್ಹೋ, ತ್ವಂ ಗಚ್ಛಸಿ, ತುಮ್ಹೇ ಗಚ್ಛಥ, ತ್ವಂ ಗಚ್ಛಸೇ, ತುಮ್ಹೇ ಗಚ್ಛವ್ಹೇ, ಅಹಂ ಗಚ್ಛಾಮಿ, ಮಯಂ ಗಚ್ಛಾಮ, ಅಹಂ ಗಚ್ಛೇ, ಮಯಂ ಗಚ್ಛಾಮ್ಹೇ, ಸೋ ಗಚ್ಛತಿ, ತೇ ಗಚ್ಛನ್ತಿ, ಸೋ ಗಚ್ಛತೇ, ತೇ ಗಚ್ಛನ್ತೇ, ಸಾಮತ್ಥಿಯಾ ಲದ್ಧತ್ತಾ ಅಪ್ಪಯುಜ್ಜಮಾನೇಸುಪಿ ತುಮ್ಹಾಮ್ಹಸೇಸೇಸು ಭವನ್ತಿ। ಗಚ್ಛಸಿ, ಗಚ್ಛಥ, ಗಚ್ಛಸೇ, ಗಚ್ಛವ್ಹೇ, ಗಚ್ಛಾಮಿ, ಗಚ್ಛಾಮ, ಗಚ್ಛೇ, ಗಚ್ಛಾಮ್ಹೇ, ಗಚ್ಛತಿ, ಗಚ್ಛನ್ತಿ, ಗಚ್ಛತೇ, ಗಚ್ಛನ್ತೇ।

೧೫. ಆಈಸ್ಸಾದೀಸ್ವಞ ವಾ।

ಆಆದೋ ಈಆದೋ ಸ್ಸಾ ಆದೋ ಚ ಕ್ರಿಯತ್ಥಸ್ಸ ವಾ ಅಞ ಹೋತಿ। ಞಕಾರೋ-ನುಬನ್ಧೋ, ಅಗಮಾ, ಗಮಾ, ಅಗಮೀ, ಗಮೀ, ಅಗಮಿಸ್ಸಾ, ಗಮಿಸ್ಸಾ।

೧೬. ಅಆದೀಸ್ವಾಹೋ ಬ್ರೂಸ್ಸ।

ಬ್ರೂಸ್ಸ ಆಹೋ ಹೋತಿ ಅಆದೀಸು। ಆಹ, ಆಹು।

೧೭. ಭೂಸ್ಸ ವುಕ।

ಅಆದೀಸು ಭೂಸ್ಸ ವುಕ ಹೋತಿ। ಕಕಾರೋ-ನುಬನ್ಧೋ, ಉಕಾರೋ ಉಚ್ಚಾರಣತ್ಥೋ, ಬಭೂವ।

೧೮. ಪುಬ್ಬಸ್ಸ ಅ।

ಅಆದೀಸು ದ್ವಿತ್ತೇ ಪುಬ್ಬಸ್ಸ ಭೂಸ್ಸ ಅ ಹೋತಿ, ಬಭೂವ।

೧೯. ಉಸ್ಸಂಸ್ವಾಹಾ ವಾ।

ಆಹಾದೇಸಾ ಪರಸ್ಸ ಉಸ್ಸ ಅಂಸುವಾ ಹೋತಿ। ಅಹಂಸು, ಆಹು।

೨೦. ತ್ಯನ್ತೀನಂ ಟಟೂ।

ಆಹಾ ಪರೇಸಂ ತಿಅನ್ತೀನಂ ಟಟೂ ಹೋನ್ತಿ। ಟಕಾರಾ ಸಬ್ಬಾದೇಸತ್ಥಾ, ಆಹ, ಆಹು, ಅತೋಯೇವ ಚ ಞಾಪಕಾ ತಿಅನ್ತೀಸು ಚ ಬ್ರೂಸ್ಸಾ-ಹೋ।

೨೧. ಈಆದೋ ವಚಸ್ಸೋಮ।

ಈಆದೀಸು ವಚಸ್ಸ ಓಮ ಹೋತಿ। ಮಕಾರೋ-ನುಬನ್ಧೋ, ಅವೋಚ, ಈಆದೋತಿ ಕಿಂ? ಅವಚಾ।

೨೨. ದಾಸ್ಸ ದಂ ವಾ ಮಿಮೇಸ್ವದ್ವಿತ್ತೇ।

ಅದ್ವಿತೇ ವತ್ತಮಾನಸ್ಸ ದಾಸ್ಸ ದಂ ವಾ ಹೋತಿ ಮಿಮೇಸು। ದಮ್ಮಿ ದೇಮಿ, ದಮ್ಮ ದೇಮ, ಅದ್ವಿತ್ತೇತಿ ಕಿಂ? ದದಾಧಿ ದದಾಮ।

೨೩. ಕರಸ್ಸ ಸೋಸ್ಸ ಕುಂ।

ಕರಸ್ಸ ಸಓಕಾರಸ್ಸ ಕುಂ ವಾ ಹೋತಿ ಮಿಮೇಸು। ಕುಮ್ಮಿ ಕುಮ್ಮ, ಕರೋಮಿ ಕರೋಮ।

೨೪. ಕಾ ಈಆದೀಸು।

ಕರಸ್ಸ ಸಓಕಾರಸ್ಸ ಕಾ ಹೋತಿ ವಾ ಈಆದೀಸು। ಅಕಾಸಿ ಅಕರಿ, ಅಕಂಸು ಅಕರಿಂಸು, ಅಕಾ ಅಕರಾ।

೨೫. ಹಾಸ್ಸ, ಚಾಹಙ ಸ್ಸೇನ।

ಕರಸ್ಸ ಸೋಸ್ಸ ಹಾಸ್ಸ ಚ ಆಹಙ ವಾ ಹೋತಿ ಸ್ಸೇನ ಸಹ। ಕಾಹತಿ ಕರಿಸ್ಸತಿ, ಅಕಾಹಾ ಅಕರಿಸ್ಸಾ, ಹಾಹತಿ ಹಾಯಿಸ್ಸತಿ, ಅಹಾಹಾ ಅಹಾಯಿಸ್ಸಾ।

೨೬. ಲಭವಸಚ್ಛಿದಭಿದರುದಾನಂ ಚ್ಛಙ।

ಲಭಾದೀನಂ ಚ್ಛಙ ವಾ ಹೋತಿ ಸ್ಸೇನಸಹ। ಅಲಚ್ಛಾ ಅಲಭಿಸ್ಸಾ, ಲಚ್ಛತಿ ಲಭಿಸ್ಸಾತಿ, ಅವಚ್ಛಾ ಅವಸಿಸ್ಸಾ, ವಚ್ಛತಿ ವಸಿಸ್ಸತಿ, ಅಚ್ಛೇಚ್ಛಾ ಅಚ್ಛಿನ್ದಿಸ್ಸಾ, ಛೇಚ್ಛತಿ ಛಿನ್ದಿಸ್ಸತಿ, ಅಭೇಚ್ಛಾ ಅಭಿನ್ದಿಸ್ಸಾ, ಭೇಚ್ಛತಿ ಭಿನ್ದಿಸ್ಸತಿ, ಅರುಚ್ಛಾ ಅರೋದಿಸ್ಸಾ, ರುಚ್ಛತಿ ರೋದಿಸ್ಸತೀ , ಅಞ್ಞಸ್ಮಿಮ್ಪಿ ಛಿದಸ್ಸ ವಾ ಚ್ಛಙ ಯೋಗವಿಭಾಗಾ, ಅಚ್ಛೇಚ್ಛುಂ ಅಚ್ಛನ್ತಿಂಸು, ಅಞ್ಞೇಸಞ್ಚ ಗಚ್ಛಂ ಗಚ್ಛಿಸ್ಸಂ।

೨೭. ಭುಜ ಮುಚ ವಚ ವಿಸಾನಂ ಕ್ಖಙ।

ಭುಜಾದೀನಂ ಕ್ಖಙ ವಾ ಹೋತಿ ಸ್ಸೇನ ಸಹ। ಅಭೋಕ್ಖಾ ಅಭುಞ್ಜಿಸ್ಸಾ, ಭೋಕ್ಖತಿ ಭುಞ್ಜಿಸ್ಸತಿ, ಅಮೋಕ್ಖಾ ಅಮುಞ್ಚಿಸ್ಸಾ, ಮೋಕ್ಖತಿಮುಞ್ಚಿಸ್ಸತಿ, ಅವಕ್ಖಾ ಅವಚಿಸ್ಸಾ, ವಕ್ಖತಿ ವಚ್ಚಿಸ್ಸತಿ, ಪಾವೇಕ್ಖಾ ಪಾವಿಸಿಸ್ಸಾ, ಪವೇಕ್ಖತಿ ಪವಿಸಿಸ್ಸತಿ, ವಿಸಸ್ಸಾ-ಞ್ಞಸ್ಮಿಮ್ಪಿ ವಾ ಕ್ಖಙ ಯೋಗವಿಭಾಗಾ ಪಾವೇಕ್ಖಿ, ಪಾವಿಸಿ।

೨೮. ಆಈಆದೀಸು ಹರಸ್ಸಾ।

ಆಆದೋ ಈಆದೋ ಅ ಹರಸ್ಸ ಆ ಹೋತಿ ವಾ। ಅಹಾ ಅಹರಾ, ಅಹಾಸಿ ಅಹರಿ।

೨೯. ಗಮಿಸ್ಸ।

ಆಆದೋ ಈಆದೋ ಅ ಗಮಿಸ್ಸ ಆ ಹೋತಿ ವಾ। ಅಗಾ ಅಗಮಾ, ಅಗಾ ಅಗಮೀ।

೩೦. ಡಂಸಸ್ಸ ಚ ಛಙ।

ಡಂಸಸ್ಸ ಗಮಿಸ್ಸ ಚ ಛಙ ವಾ ಹೋತಿ ಆಈಆದೀಸು। ಅಡಞ್ಛಾ ಅಡಂಸಾ, ಅಡಞ್ಛಿ ಅಡಂಸೀ, ಅಗಞ್ಛಾ ಅಗಚ್ಛಾ, ಅಗಞ್ಛಿ ಅಗಚ್ಛೀ।

೩೧. ಹೂಸ್ಸ ಹೇಹೇಹಿಹೋಹಿ ಸ್ಸತ್ಯಾದೋ।

ಹೂಸ್ಸ ಹೇಆದಯೋ ಹೋನ್ತಿ ಸ್ಸತ್ಯಾದೋ। ಹೇಸ್ಸತಿ, ಹೇಹಿಸ್ಸತಿ, ಹೋಹಿಸ್ಸತಿ।

೩೨. ಣಾನಾಸು ರಸ್ಸೋ।

ಕ್ಣಾಕ್ನಾಸು ಕ್ರಿಯತ್ಥಸ್ಸ ರಸ್ಸೋ ಹೋತಿ। ಕಿಣಾತಿ, ಧುನಾತಿ।

೩೩. ಆ ಈ ಞು ಮ್ಹಾ ಸ್ಸಾ ಸ್ಸಮ್ಹಾನಂ ವಾ।

ಏಸಂ ವಾ ರಸ್ಸೋ ಹೋತಿ। ಗಮ ಗಮಾ, ಗಮಿ ಗಮೀ, ಗಮು ಗಮೂ, ಗಮಿಮ್ಹ ಗಮಿಮ್ಹಾ, ಗಮಿಸ್ಸ ಗಮಿಸ್ಸಾ, ಗಮಿಸ್ಸಮ್ಹ ಗಮಿಸ್ಸಮ್ಹಾ।

೩೪. ಕುಸರುಹೇಹೀಸ್ಸ ಛಿ।

ಕುಸಾ ರುಹಾ ಚ ಪರಸ್ಸ ಈಸ್ಸ ಛಿ ವಾ ಹೋತಿ। ಅಕ್ಕೋಚ್ಛಿ ಅಕ್ಕೋಸಿ, ಅಭಿರುಚ್ಛಿ ಅಭಿರುಹಿ।

೩೫. ಅ ಈ ಸ್ಸಾಆದೀನಂ ಬ್ಯಞ್ಜನಸ್ಸಿಞ।

ಕ್ರಿಯತ್ಥಾ ಪರೇಸಂ ಅಆದೀನಂ ಈಆದೀನಂ ಸ್ಸಆದೀನಞ್ಚ-ಬ್ಯಞ್ಜನಸ್ಸ ಇಞ ಹೋತಿ ವಿಭಾಸಾ। ಬಭುವಿತ್ಥ, ಅಭವಿತ್ಥಾ, ಅನುಭವಿಸ್ಸಾ, ಅನುಭವಿಸ್ಸತಿ ಅನುಭೋಸ್ಸತಿ ಹರಿಸತಿ ಹಸ್ಸತಿ, ಏತೇಸನ್ತಿ ಕಿಂ? ಭವತಿ, ಬ್ಯಞ್ಜನಸ್ಸಾತಿ ಕಿಂ? ಬಭೂವ।

೩೬. ಬ್ರೂತೋ ತಿಸ್ಸೀಞ।

ಬ್ರೂತೋ ಪರಸ್ಸ ತಿಸ್ಸ ಈಞ ವಾ ಹೋತಿ। ಬ್ರವೀತಿ, ಬ್ರೂತಿ।

೩೭. ಕ್ಯಸ್ಸ।

ಕ್ರಿಯತ್ಥಾ ಪರಸ್ಸ ಕ್ಯಸ್ಸ ಈಞ ವಾ ಹೋತಿ। ಪಚೀಯತಿ, ಪಚ್ಚತಿ।

೩೮. ಏಯ್ಯಾಥ ಸ್ಸೇ ಅ ಆ ಈಥಾನಂ ಓ, ಅ, ಅಂ, ತ್ಥ, ತ್ಥೋ, ವ್ಹೋಕ।

ಏಯ್ಯಾಥಾದೀನಂ ಓಆದಯೋ ವಾ ಹೋನ್ತಿ ಯಥಾಕ್ಕಮಂ। ತುಮ್ಹೇ ಭವೇಯ್ಯಾಥೋ ಭವೇಯ್ಯಾಥ, ತ್ವಂ ಅಭವಿಸ್ಸ ಅಭವಿಸ್ಸೇ, ಅಹಂ ಅಭವಂ ಅಭವ, ಸೋ ಅಭವಿತ್ಥ ಅಭವಾ, ಸೋ ಅಭವಿತ್ಥೋ, ಅಭವೀ, ತುಮ್ಹೇ ಭವಥವ್ಹೋ ಭವಥ, ಆಸಹಚರಿತೋವ ಅಕಾರೋ ಗಯ್ಹತೇ, ಥೋ ಪನ-ನ್ತೇ ನಿದ್ದೇಸಾ ತ್ವಾದಿಸಮ್ಬನ್ಧೀಯೇವ, ತಸ್ಸೇವ ವಾ ನಿಸ್ಸಿತತ್ತಾ, ನಿಸ್ಸಯಕರಣಮ್ಪಿ ಹಿ ಸುತ್ತಕಾರಾಚಿಣ್ಣಂ।

೩೯. ಉಂಸ್ಸಿಂ ಸ್ವಂಸು।

ಉಮೀಚ್ಚಸ್ಸ ಇಂಸು ಅಂಸು ವಾ ಹೋನ್ತಿ। ಅಗಮಿಂಸು, ಅಗಮಂಸು, ಅಗಮುಂ।

೪೦. ಏಓತ್ತಾ ಸುಂ।

ಏಆದೇಸತೋ ಓಆದೇಸತೋ ಚ ಪರಸ್ಸ ಉಮಿಚ್ಚಸ್ಸ ಸುಂ ವಾ ಹೋತಿ। ನೇಸುಂ, ನಯಿಂಸು, ಅಸ್ಸೋಸುಂ, ಅಸ್ಸುಂ, ಆದೇಸತ್ತಾಖ್ಯಾಪನತ್ಥಂತ್ತಗ್ಗಹಣಂ।

೪೧. ಹೂತೋ ರೇಸುಂ।

ಹೂತೋ ಪರಸ್ಸ ಉಮಿಚ್ಚಸ್ಸ ರೇಸುಂ ವಾ ಹೋತಿ। ಅಹೇಸುಂ, ಅಹವುಂ।

೪೨. ಓಸ್ಸ ಅ ಇ ತ್ಥ ತ್ಥೋ।

ಓಸ್ಸ ಅಆದಯೋ ವಾ ಹೋನ್ತಿ। ತ್ವಂ ಅಭವ, ಅಭವಿ, ಅಭವಿತ್ಥ, ಅಭವಿತ್ಥೋ ಅಭವೋ।

೪೩. ಸಿ।

ಓಸ್ಸ ಸಿ ವಾ ಹೋತಿ। ಅಹೋಸಿ ತ್ವಂ ಅಹುವೋ।

೪೪. ದೀಘಾ ಈಸ್ಸ।

ದೀಘತೋ ಪರಸ್ಸ ಈಸ್ಸ ಸಿ ವಾ ಹೋತಿ। ಅಕಾಸಿ ಅಕಾ, ಅದಾಸಿ ಅದಾ।

೪೫. ಮ್ಹಾತ್ಥಾನಮುಞ।

ಮ್ಹಾತ್ಥಾನಮ್ಹಞ ವಾ ಹೋತಿ। ಅಗಮ್ಹಮ್ಹಾ ಅಗಮಿಮ್ಹಾ, ಅಗಮುತ್ಥ ಅಗಮಿತ್ಥ।

೪೬. ಇಂಸ್ಸ ಚ ಸಿಞ।

ಇಮಿಚ್ಚಸ್ಸ ಸಿಞ ವಾ ತೋತಿ ಮ್ಹಾತ್ಥಾನಞ್ಚ ಬಹುಲಂ। ಅಕಾಸಿಂ ಅಕರಿಂ, ಅಕಾಸಿಮ್ಹಾ ಅಕರಿಮ್ಹಾ ಅಕಾಸಿತ್ಥ ಅಕರಿತ್ಥ।

೪೭. ಏಯ್ಯುಂಸ್ಸುಂ।

ಏಯ್ಯುಮಿಚ್ಚಸ್ಸ ಞಂ ವಾ ಹೋತಿ। ಗಚ್ಛುಂ ಗಚ್ಛೇಯ್ಯುಂ।

೪೮. ಹಿಸ್ಸ-ತೋ ಲೋಪೋ।

ಅತೋ ಪರಸ್ಸ ಹಿಸ್ಸ ಲೋಪೋ ವಾ ಹೋತಿ। ಗಚ್ಛ ಗಚ್ಛಾಹಿ, ಅತೋತಿ ಕಿಂ? ಕರೋಹಿ।

೪೯. ಕ್ಯಸ್ಸ ಸ್ಸೇ।

ಕ್ಯಸ್ಸ ವಾ ಲೋಪೋ ಹೋತಿ ಸ್ಸೇ। ಅನ್ವಭವಿಸ್ಸಾ ಅನ್ವಭೂಯಿಸ್ಸಾ, ಅನುಭವಿಸ್ಸತಿ ಅನುಛೂಯಿಸ್ಸತಿ।

೫೦. ಅತ್ಥಿತೇಯ್ಯಾದಿಚ್ಛನ್ನಂ ಸ ಸು ಸ ಸಥ ಸಂ ಸಾಮ।

ಅಸ=ಭುವಿಚ್ಚಸ್ಮಾ ಪರೇಸಂ ಏಯ್ಯಾದಿಚ್ಛನ್ನಂ ಸಾದಯೋ ಹೋನ್ತಿ ಯಥಾಕ್ಕಮಂ। ಅಸ್ಸ, ಅಸ್ಸು, ಅಸ್ಸ, ಅಸ್ಸಥ, ಅಸ್ಸಂ, ಅಸ್ಸಾಮ।

೫೧. ಆದಿದ್ವಿನ್ನಮಿಯಾಇಯುಂ।

ಅತ್ಥಿತೇಯ್ಯಾದಿಚ್ಛನ್ನಂ ಆದಿಭೂತಾನಂ ದ್ವಿನ್ನಂ ಇಯಾ ಇಯುಂ ಹೋನ್ತಿ ಯಥಾಕ್ಕಮಂ। ಸಿಯಾ, ಸಿಯುಂ।

೫೨. ತಸ್ಸ ಥೋ।

ಅತ್ಥಿತೋ ಪರಸ್ಸ ತಕಾರಸ್ಸ ಥೋ ಹೋತಿ। ಅತ್ಥಿ, ಅತ್ಥು।

೫೩. ಸಿಹಿಸ್ವಟ।

ಅತ್ಥಿಸ್ಸ ಅಟ ಹೋತಿ ಸಿಹಿಸು, ಟೋ ಸಬ್ಬಾದೇಸತ್ಥೋ। ಅಸಿ ಅಹಿ।

೫೪. ಮಿಮಾನಂ ವಾ ಮ್ಹಿಮ್ಹಾ ಚ।

ಅತ್ಥಿಸ್ಮಾ ಪರೇಸಂ ಮಿಮಾನಂ ಮ್ಹಿಮ್ಹಾ ವಾ ಹೋನ್ತಿ, ತಂಸನ್ನಿಯೋಗೇನಅತ್ಥಿಸ್ಸ ಅಟ ಚ। ಅಮ್ಹಿ ಅಸ್ಮಿ, ಅಮ್ಹ ಅಸ್ಮ।

೫೫. ಏಸು ಸಿ।

ಏಸು ಮಿಮೇಸು ಅತ್ಥಿಸ್ಸ ಸಕಾರೋ ಹೋತಿ। ಅಸ್ಮಿ ಅಸ್ಮ, ಪರರೂಪಬಾಧನತ್ಥಂ।

೫೬. ಈಆದೋ ದೀಘೋ।

ಅತ್ಥಿಸ್ಸ ದೀಘೋ ಹೋತಿ ಈಆದಿಮ್ಹಿ। ಆಸಿ, ಆಸುಂ, ಆಸಿ, ಆಸಿತ್ಥ, ಆಸಿಂ, ಆಸಿಂ ಮ್ಹಾ।

೫೭. ಹಿಮಿಮೇಸ್ವಸ್ಸ।

ಅಕಾರಸ್ಸ ದೀಘೋ ಹೋತಿ ಹಿಮಿಮೇಸು। ಪಚಾಹಿ, ಪಚಾಮಿ, ಪಚಾಮ, ಮುಯ್ಹಾಮಿ।

೫೮. ಸಕಾ ಣಾಸ್ಸ ಖ ಈಆದೋ।

ಸಕಸ್ಮಾ ಕ್ಣಾಸ್ಸಖೋಹೋತಿ ಈಆದೀಸು। ಅಸಕ್ಖಿ, ಅಸಕ್ಖಿಂಸು।

೫೯. ಸ್ಸೇ ವಾ।

ಸಕಸ್ಮಾ ಕ್ಣಸ್ಸಖೋ ವಾ ಹೋತಿ ಸ್ಸೇ। ಸಕ್ಖಿಸ್ಸಾ ಸಕ್ಕುಣಿಸ್ಸಾ, ಸಕ್ಖಿಸ್ಸತಿ, ಸಕ್ಕುಣಿಸ್ಸತಿ।

೬೦. ತೇಸು ಸುತೋ ಕ್ಣೋಕ್ಣಾನಂ ರೋಟ।

ತೇಸು ಈಆದಿಸ್ಸೇಸು ಸುತೋ ಪರೇಸಂ ಕ್ಣೋಕ್ಣಾನಂ ರೋಟ ವಾ ಹೋತಿ। ಅಸ್ಸೋಸಿ ಅಸುಣಿ, ಅಸ್ಸೋಸ್ಸಾ ಅಸುಣಿಸ್ಸಾ, ಸೋಸ್ಸತಿ ಸುಣಿಸ್ಸತಿ।

೬೧. ಞಾಸ್ಸ ಸನಾಸ್ಸ ನಾಯೋ ತಿಮ್ಹಿ। ಸನಾಸ್ಸ ಞಾಸ್ಸ ನಾಯೋ ವಾ ಹೋತಿ ತಿಮ್ಹಿ। ನಾಯತಿ, ಜಾನಾತಿ।

೬೨. ಞಾಮ್ಹಿ ಜಂ।

ಞಾದೇಸೇ ಸನಾಸ್ಸ ಞಾಸ್ಸ ಜಂ (ವಾ) ಹೋತಿ। ಜಞ್ಞಾ (ಜಾನೇಯ್ಯ)।

೬೩. ಏಯ್ಯಾಸ್ಸಿಯಾಞಾ ವಾ।

ಞಾತೋ ಏಯ್ಯಾಸ್ಸ ಇಯಾಞಾ ಹೋನ್ತಿ ವಾ। ಜಾನಿಯಾ, ಜಞ್ಞಾ ಜಾನೇಯ್ಯ।

೬೪. ಈಸ್ಸತ್ಯಾದೀಸು ಕ್ನಾಲೋಪೋ।

ಈಆದೋ ಸ್ಸತ್ಯಾದೋ ಚ ಞಾತೋ ಕ್ನಾಲೋಪೋ ವಾ ಹೋತಿ। ಅಞ್ಞಾಸಿ ಅಜಾನಿ, ಞಸ್ಸತಿ ಜಾನಿಸ್ಸತಿ।

೬೫. ಸ್ಸಸ್ಸ ಹಿ ಕಮ್ಮೇ।

ಞಾತೋ ಪರಸ್ಸ ಸ್ಸಸ್ಸ ಹಿ ವಾ ಹೋತಿ ಕಮ್ಮೇ। ಪಞ್ಞಾಯಿಹಿತಿ ಪಞ್ಞಾಯಿಸ್ಸತಿ।

೬೬. ಏತಿಸ್ಮಾ।

ಏತಿಸ್ಮಾ ಪರಸ್ಸ ಸ್ಸಸ್ಸ ಹಿ ಹೋತಿ ವಾ। ಏಹಿತಿ ಏಸ್ಸತಿ।

೬೭. ಹನಾ ಛಖಾ।

ಹನಾ ಸ್ಸಸ್ಸ ಛಖಾ ವಾ ಹೋನ್ತಿ। ಹಞ್ಛಾಮಿ ಹನಿಸ್ಸಾಮಿ, ಪಟಿಹಙ್ಖಾಮಿ ಪಟಿಹನಿಸ್ಸಾಮಿ।

೬೮. ಹಾತೋ ಹ।

ಹಾತೋ ಪರಸ್ಸ ಸ್ಸಸ್ಸ ಹ ಹೋತಿ ವಾ। ಹಾಹತಿ ಜಹಿಸ್ಸತಿ।

೬೯. ದಕ್ಖ ಖ ಹೇಹಿ ಹೋಹೀಹಿ ಲೋಪೋ।

ದಕ್ಖಾದೀಹಿ ಆದೇಸೇಹಿ ಪರಸ್ಸ ಸ್ಸಸ್ಸ ಲೋಪೋ ವಾ ಹೋತಿ। ದಕ್ಖತಿ ದಕ್ಖಿಸ್ಸತಿ, ಸಕ್ಖತಿ ಸಕ್ಖಿಸ್ಸತಿ, ಹೇಹಿತಿ ಹೇಹಿಸ್ಸತಿಹೋಹಿತಿ ಹೋಹಿಸ್ಸತಿ।

೭೦. ಕಯಿರೇಯ್ಯಸ್ಸೇಯ್ಯುಮಾದೀನಂ।

ಕಯಿರಾ ಪರಸ್ಸ ಏಯ್ಯುಮಾದೀನಂ ಏಯ್ಯಸ್ಸ ಲೋಪೋ ಹೋತಿ। ಕಯಿರುಂ, ಕಯಿರಾಸಿ, ಕಯಿರಾಥ, ಕಹಿರಾಮಿ, ಕಯಿರಾಮ।

೭೧. ಟಾ।

ಕಯಿರಾ ಪರಸ್ಸ ಏಯ್ಯಸ್ಸ ಟಾ ಹೋತಿ। ಸೋ ಕಯಿರಾ।

೭೨. ಏಥಸ್ಸಾ।

ಕಯಿರಾ ಪರಸ್ಸ ಏಥಸ್ಸ ಆ ಹೋತಿ। ಕಯಿರಾಥ।

೭೩. ಲಭಾ ಇಂ ಈನಂ ಥಂ ಥಾ ವಾ।

ಲಭಸ್ಮಾ ಇಂಈಇಚ್ಚೇಸಂ ಥಂಥಾ ಹೋನ್ತಿ ವಾ। ಅಲತ್ಥಂ ಅಲಭಿಂ, ಅಲತ್ಥ ಅಲಭಿ।

೭೪. ಗುರುಪುಬ್ಬಾ ರಸ್ಸಾ ರೇ ನ್ತೇನ್ತೀನಂ।

ಗುರುಪುಬ್ಬಸ್ಮಾ ರಸ್ಸಾ ಪರೇಸಂ ನ್ತೇನ್ತೀನಂ ರೇ ವಾ ಹೋತಿ। ಗಚ್ಛರೇ ಗಚ್ಛನ್ತಿ, ಗಚ್ಛರೇ ಗಚ್ಛನ್ತೇ, ಗಮಿಸ್ಸರೇ ಗಮಿಸ್ಸನ್ತಿ, ಗಮಿಸ್ಸರೇ ಗಮಿಸ್ಸನ್ತೇ, ಗುರುಪುಬ್ಬಾತಿ ಕಿಂ? ಪಚ, ರಸ್ಸತಿ ಕಿಂ? ಹೋನ್ತಿ।

೭೫. ಏಯ್ಯೇಯ್ಯಾಸೇಯ್ಯನ್ನಂ ಟೇ।

ಏಯ್ಯಾದೀನಂ ಟೇ ವಾ ಹೋತಿ। ಸೋ ಕರೇ ಕರೇಯ್ಯ, ತ್ವಂ ಕರೇ ಕರೇಯ್ಯಾಸಿ, ಅಹಂ ಕರೇ ಕರೇಯ್ಯಂ।

೭೬. ಓವಿಕರಣಸ್ಸು ಪರಚ್ಛಕ್ಕೇ।

ಓವಿಕರಣಸ್ಸ ಉ ಹೋತಿ ಪರಚ್ಛಕ್ಕೇ ವಿಸಯೇ। ತನುತೇ।

೭೭. ಪುಬ್ಬಚ್ಛಕ್ಕೇ ವಾ ಕ್ವಚಿ।

ಓವಿಕರಣಸ್ಸ ಉ ಹೋತಿ ವಾ ಕ್ವಚಿ ಪುಬ್ಬಚ್ಛಕ್ಕೇ। ವನುತಿ ವನೋತಿ।

೭೮. ಏಯ್ಯಾಮಸ್ಸೇಮು ಚ।

ಏಯ್ಯಾಮಸ್ಸೇಮು ವಾ ಹೋತಿ ಉ ಚ। ಭವೇಮ್ಹ, ಭವೇಯ್ಯಾಮು ಭವೇಯ್ಯಾಮ।

ಇತಿ ಮೋಗ್ಗಲ್ಲಾನೇ ಬ್ಯಾಕರಣೇ ವುತ್ತಿಯಂ

ತ್ಯಾದಿಕಣ್ಡೋ ಛಟ್ಠೋ।