೧. ಸನ್ಧಿಕಪ್ಪ
ಪಠಮಕಣ್ಡ
(ಕ)
ಸೇಟ್ಠಂ
ಬುದ್ಧಞ್ಚ ಧಮ್ಮಮಮಲಂ ಗಣಮುತ್ತಮಞ್ಚ।
ಸತ್ಥುಸ್ಸ ತಸ್ಸ ವಚನತ್ಥವರಂ ಸುಬುದ್ಧುಂ,
ವಕ್ಖಾಮಿ ಸುತ್ತಹಿತಮೇತ್ಥ ಸುಸನ್ಧಿಕಪ್ಪಂ॥
(ಖ)
ಸೇಯ್ಯಂ ಜಿನೇರಿತನಯೇನ ಬುಧಾ ಲಭನ್ತಿ,
ತಞ್ಚಾಪಿ ತಸ್ಸ ವಚನತ್ಥಸುಬೋಧನೇನ।
ಅತ್ಥಞ್ಚ ಅಕ್ಖರಪದೇಸು ಅಮೋಹಭಾವಾ,
ಸೇಯ್ಯತ್ಥಿಕೋ ಪದಮತೋ ವಿವಿಧಂ ಸುಣೇಯ್ಯಂ॥
೧, ೧. ಅತ್ಥೋ ಅಕ್ಖರಸಞ್ಞಾತೋ।
ಸಬ್ಬವಚನಾನಮತ್ಥೋ ಅಕ್ಖರೇಹೇವ ಸಞ್ಞಾಯತೇ। ಅಕ್ಖರವಿಪತ್ತಿಯಂ ಹಿ ಅತ್ಥಸ್ಸ ದುನ್ನಯಥಾ ಹೋತಿ, ತಸ್ಮಾ ಅಕ್ಖರಕೋಸಲ್ಲಂ ಬಹೂಪಕಾರಂ ಸುತ್ತನ್ತೇಸು।
೨, ೨. ಅಕ್ಖರಾಪಾದಯೋ ಏಕಚತ್ತಾಲೀಸಂ।
ತೇ ಚ ಖೋ ಅಕ್ಖರಾ ಅಪಿ ಅಕಾರಾದಯೋ ಏಕಚತ್ತಾ ಲೀಸ ಸುತ್ತನ್ತೇಸು ಸೋಪಕಾರಾ।
ತಂ ಯಥಾ? ಅ ಆ ಇ ಈ ಉ ಊ ಏ ಓ, ಕ ಖ ಗ ಘ ಙ, ಚ ಛ ಜ ಝ ಞ, ಟ ಠ ಡ ಢ ಣ, ತ ಥ ದ ಧ ನ, ಪ ಫ ಬ ಭ ಮ, ಯ ರ ಲ ವ ಸ ಹ ಳ ಅಂ, ಇತಿ ಅಕ್ಖರಾ ನಾಮ।
ತೇನ ಕ್ವತ್ಥೋ? ಅತ್ಥೋ ಅಕ್ಖರಸಞ್ಞಾತೋ।
೩, ೩. ತತ್ಥೋದನ್ತಾ ಸರಾ ಅಟ್ಠ।
ತತ್ಥ ಅಕ್ಖರೇಸು ಅಕಾರಾದೀಸು ಓದನ್ತಾ ಅಟ್ಠ ಅಕ್ಖರಾ ಸರಾ ನಾಮ ಹೋನ್ತಿ।
ತಂ ಯಥಾ? ಅ ಆ ಇ ಈ ಉ ಊ ಏ ಓ, ಇತಿ ಸರಾ ನಾಮ।
ತೇನ ಕ್ವತ್ಥೋ? ಸರಾ ಸರೇ ಲೋಪಂ।
೪, ೪. ಲಹುಮತ್ತಾ ತಯೋ ರಸ್ಸಾ।
ತತ್ಥ ಅಟ್ಠಸು ಸರೇಸು ಲಹುಮತ್ತಾ ತಯೋ ಸರಾ ರಸ್ಸಾ ನಾಮ ಹೋನ್ತಿ।
ತಂ ಯಥಾ? ಅ ಇ ಉ, ಇತಿ ರಸ್ಸಾ ನಾಮ।
ತೇನ ಕ್ವತ್ಥೋ? ರಸ್ಸಂ।
೫, ೫. ಅಞ್ಞೇ ದೀಘಾ।
ತತ್ಥ ಅಟ್ಠಸು ಸರೇಸು ರಸ್ಸೇಹಿ ಅಞ್ಞೇ ಪಞ್ಚ ಸರಾ ದೀಘಾ ನಾಮ ಹೋನ್ತಿ।
ತಂ ಯಥಾ? ಆ ಈ ಊ ಏ ಓ, ಇತಿ ದೀಘಾ ನಾಮ।
ತೇನ ಕ್ವತ್ಥೋ? ದೀಘಂ।
೬, ೮. ಸೇಸಾ ಬ್ಯಞ್ಜನಾ।
ಠಪೇತ್ವಾ ಅಟ್ಠ ಸರೇ ಸೇಸಾ ಅಕ್ಖರಾ ಕಕಾರಾದಯೋ ನಿಗ್ಗಹಿತನ್ತಾ ಬ್ಯಞ್ಜನಾ ನಾಮ ಹೋನ್ತಿ।
ತಂ ಯಥಾ? ಕ ಖ ಗ ಘ ಙ, ಚ ಛ ಜ ಝ ಞ, ಟ ಠ ಡ ಢ ಣ, ತ ಥ ದ ಧ ನ, ಪ ಫ ಬ ಭ ಮ, ಯ ರ ಲ ವ ಸ ಹ ಳ ಅಂ, ಇತಿ ಬ್ಯಞ್ಜನಾ ನಾಮ।
ತೇನ ಕ್ವತ್ಥೋ? ಸರಾ ಪಕತಿ ಬ್ಯಞ್ಜನೇ।
೭, ೯. ವಗ್ಗಾ ಪಞ್ಚಪಞ್ಚಸೋ ಮನ್ತಾ।
ತೇಸಂ ಖೋ ಬ್ಯಞ್ಜನಾನಂ ಕಕಾರಾದಯೋ ಮಕಾರನ್ತಾ ಪಞ್ಚಪಞ್ಚಸೋ ಅಕ್ಖರವನ್ತೋ ವಗ್ಗಾ ನಾಮ ಹೋನ್ತಿ।
ತಂ ಯಥಾ? ಕ ಖ ಗ ಘ ಙ, ಚ ಛ ಜ ಝ ಞ, ಟ ಠ ಡ ಢ ಣ, ತ ಥ ದ ಧ ನ, ಪ ಫ ಬ ಭ ಮ, ಇತಿ ವಗ್ಗಾ ನಾಮ।
ತೇನ ಕ್ವತ್ಥೋ? ವಗ್ಗನ್ತಂ ವಾ ವಗ್ಗೇ।
೮, ೧೦. ಅಂ ಇತಿ ನಿಗ್ಗಹಿತಂ।
ಅಂ ಇತಿ ನಿಗ್ಗಹಿತಂ ನಾಮ ಹೋತಿ।
ತೇನ ಕ್ವತ್ಥೋ? ಅಂ ಬ್ಯಞ್ಜನೇ ನಿಗ್ಗಹಿತಂ।
೯, ೧೧. ಪರಸಮಞ್ಞಾ ಪಯೋಗೇ।
ಯಾ ಚ ಪನ ಪರೇಸು ಸಕ್ಕತಗನ್ಥೇಸು ಸಮಞ್ಞಾ ಘೋಸಾತಿ ವಾ ಅಘೋಸಾತಿ ವಾ, ತಾ ಪಯೋಗೇ ಸತಿ ಏತ್ಥಾಪಿ ಯುಜ್ಜನ್ತೇ।
ತತ್ಥ ಘೋಸಾ ನಾಮ-ಗ ಘ ಙ, ಜ ಝ ಞ, ಡ ಢ ಣ, ದ ಧ ನ, ಬ ಭ ಮ, ಯ ರ ಲ ವ ಹ ಳ, ಇತಿ ಘೋಸಾ ನಾಮ। ಅಘೋಸಾ ನಾಮ-ಕ ಖ, ಚ ಛ, ಟ ಠ, ತ ಥ, ಪ ಫ, ಸ, ಇತಿ ಅಘೋಸಾ ನಾಮ।
ತೇನ ಕ್ವತ್ಥೋ? ವಗ್ಗೇ ಘೋಸಾಘೋಸಾನಂ ತತಿಯಪಠಮಾ।
೧೦, ೧೨. ಪುಬ್ಬಮಧೋಠಿತ ಮಸ್ಸರಂ ಸರೇನ ವಿಯೋಜಯೇ।
ತತ್ಥ ಸನ್ಧಿಂ ಕತ್ತುಕಾಮೋ ಪುಬ್ಬಬ್ಯಞ್ಜನಂ ಅಧೋಠಿತಂ ಅಸ್ಸರಂ ಕತ್ವಾ ಸರಞ್ಚ ಉಪರಿ ಕತ್ವಾ ಸರೇನ ವಿಯೋಜಯೇ।
ತತ್ರಾಯಮಾದಿ।
೧೧, ೧೪. ನಯೇ ಪರಂ ಯುತ್ತೇ।
ಅಸ್ಸರಂ ಖೋ ಬ್ಯಞ್ಜನಂ ಅಧೋಠತಂ ಪರಕ್ಖರಂ ನಯೇ ಯುತ್ತೇ। ತತ್ರಾಭಿರತಿಮಿಚ್ಛೇಯ್ಯ।
ಯುತ್ತೇತಿಕಸ್ಮಾ? ಅಕ್ಕೋಚ್ಛಿ ಮಂ ಅವಧಿ ಮಂ, ಅಜಿನಿ ಮಂ ಅಹಾಸಿ ಮೇ। ಏತ್ಥ ಪನ ಯುತ್ತಂ ನ ಹೋತಿ।
ಇತಿ ಸನ್ಧಿಕಪ್ಪೇ ಪಠಮೋ ಕಣ್ಡೋ।
ದುತಿಯಕಣ್ಡ
೧೨, ೧೩. ಸರಾ ಸರೇ ಲೋಪಂ।
ಸರಾ ಖೋ ಸರೇ ಪರೇ ಲೋಪಂ ಪಪ್ಪೋನ್ತಿ।
ಯಸ್ಸಿನ್ದ್ರಿಯಾನಿ ಸಮಥಙ್ಗತಾನಿ। ನೋ ಹೇತಂ ಭನ್ತೇ ಸಮೇತಾಯಸ್ಮಾ ಸಙ್ಘೇನ।
೧೩, ೧೫. ವಾ ಪರೋ ಅಸರೂಪಾ।
ಸರಮ್ಹಾ ಅಸರೂಪಾ ಪರೋ ಸರೋ ಲೋಪಂ ಪಪ್ಪೋತಿ ವಾ।
ಚತ್ತಾರೋ’ಮೇ ಭಿಕ್ಖವೇ ಧಮ್ಮಾ, ಕಿನ್ನು’ ಮಾವಸಮಣಿಯೋ। ವಾತಿ ಕಸ್ಮಾ? ಪಞ್ಚಿನ್ದ್ರಿಯಾನಿ, ತಯಸ್ಸು ಧಮ್ಮಾ ಜಹಿತಾ ಭವನ್ತಿ।
೧೪, ೧೬. ಕ್ವಚಾಸಚಣ್ಣಂ ಲುತ್ತೇ।
ಸರೋ ಖೋ ಪರೋ ಪುಬ್ಬಸರೇ ಲುತ್ತೇ ಕ್ವಚಿ ಅಸವಣ್ಣಂ ಪಪ್ಪೋತಿ।
ಸಙ್ಖ್ಯಂ ನೋಪೇತಿ ವೇದಗೂ, ಬನ್ಧುಸ್ಸೇವ ಸಮಾಗಮೋ।
ಕ್ವಚೀತಿ ಕಸ್ಮಾ? ಯಸ್ಸಿನ್ದ್ರಿಯಾನಿ, ತಥೂಪಮಂ ಧಮ್ಮವರಂ ಅದೇಸಯಿ।
೧೫, ೧೭. ದೀಘಂ।
ಸರೋ ಖೋ ಪರೋ ಪುಬ್ಬಸರೇ ಲುತ್ತೇ ಕ್ವಚಿ ದೀಘಂ ಪಪ್ಪೋತಿ। ಸದ್ಧೀಧ ವಿತ್ತಂ ಪುರಿಸಸ್ಸ ಸೇಟ್ಠಂ, ಅನಾಗಾರೇಹಿ ಚೂಭಯಂ।
ಕ್ವಚೀತಿ ಕಸ್ಮಾ? ಪಞ್ಚಹುಪಾಲಿ ಅಙ್ಗೇಹಿ ಸಮನ್ನಾಗತೋ। ನತ್ಥಞ್ಞಂ ಕಿಞ್ಚಿ।
೧೬, ೧೮. ಪುಬ್ಬೋ ಚ।
ಪುಬ್ಬೋ ಚ ಸರೋ ಪರಸರಲೋಪೇ ಕತೇ ಕ್ವಚಿ ದೀಘಂ ಪಪ್ಪೋತಿ।
ಕಿಂಸೂಧ ವಿತ್ತಂ ಪುರಿಸಸ್ಸ ಸೇಟ್ಠಂ, ಸಾಧೂತಿ ಪಟಿಸ್ಸುಣಿತ್ವಾ, ಕ್ವಚೀತಿ ಕಸ್ಮಾ? ಇತಿಸ್ಸ ಮುಹುತ್ತಮ್ಪಿ।
೧೭, ೧೯. ಯಮೇದನ್ತಸ್ಸಾದೇಸೋ
ಏಕಾರಸ್ಸ ಅನ್ತಭೂತಸ್ಸ ಸರೇ ಪರೇ ಕ್ವಚಿ ಯಕಾರಾದೇಸೋ ಹೋತಿ।
ಅಧಿಗತೋ ಖೋ ಮ್ಯಾಯಂ ಧಮ್ಮೋ, ತ್ಯಾಹಂ ಏವಂ ವದೇಯ್ಯಂ, ತ್ಯಾಸ್ಸ ಪಹೀನಾ ಹೋನ್ತಿ।
ಕ್ವಚೀತಿ ಕಸ್ಮಾ? ನೇ’ನಾಗತಾ, ಇತಿ ನೇತ್ಥ।
೧೮, ೨೦. ವಮೋದುದನ್ತಾನಂ।
ಓಕಾರುಕಾರಾನಂ ಅನ್ತಭೂತಾನಂ ಸರೇ ಪರೇ ಕ್ವಚಿ ವಕಾರಾದೇಸೋ ಹೋತಿ।
ಅಥ ಖ್ವಸ್ಸ, ಸ್ವಸ್ಸ ಹೋತಿ, ಬಹ್ವಾಬಾಧೋ, ವತ್ಥ್ವೇತ್ಥ ವಿಹಿತಂ ನಿಚ್ಚಂ ಚಕ್ಖಾಪಾಥಮಾಗಚ್ಛತಿ।
ಕ್ವಚೀತಿಕಸ್ಮಾ? ಚತ್ತಾರೋ’ಮೇ ಭಿಕ್ಖವೇ ಧಮ್ಮಾ, ಕಿನ್ನುಮಾವ ಸಮಣಿಯೋ।
೧೯, ೨೨. ಸಬ್ಬೋ ಚಂತಿ।
ಸಬ್ಬೋ ಇಚ್ಚೇಸೋ ತಿಸದ್ದೋ ಬ್ಯಞ್ಜನೋ ಸರೇ ಪರೇ ಕ್ವಚಿ ಚಕಾರಂ ಪಪ್ಪೋತಿ।
ಇಚ್ಚೇತಂ
ಕ್ವಚೀತಿ ಕಸ್ಮಾ? ಇತಿಸ್ಸ ಮುಹುತ್ತಮ್ಪಿ।
೨೦, ೨೭. ದೋ ಧಸ್ಸ ಚ।
ಧಇಚ್ಚೇತಸ್ಸ ಸರೇ ಪರೇ ಕ್ವಚಿ ದಕಾರಾದೇಸೋ ಹೋತಿ।
ಏಕಮಿದಾಹಂ ಭಿಕ್ಖವೇ ಸಮಯಂ।
ಕ್ವಚೀತಿ ಕಸ್ಮಾ? ಇಧೇವ ಮರಣಂ ಭವಿಸ್ಸತಿ।
ವಗ್ಗಹಣೇನ ಧಕಾರಸ್ಸ ಹಕಾರಾದೇಸೋ ಹೋತಿ ಸಾಹು ದಸ್ಸನ ಮರಿಯಾನಂ।
ಸುತ್ತವಿಭಾಗೇನ ಬಹುಧಾ ಸಿಯಾ-
ತೋ ದಸ್ಸ, ಯಥಾ? ಸುಗತೋ।
ಟೋ ತಸ್ಸ, ಯಥಾ? ದುಕ್ಕಟಂ।
ಧೋ ತಸ್ಸ, ಯಥಾ? ಗನ್ಧಬ್ಬೋ।
ತ್ರೋ ತ್ತಸ್ಸ, ಯಥಾ? ಅತ್ರಜೋ।
ಕೋ ಗಸ್ಸ, ಯಥಾ? ಕುಲೂಪಕೋ।
ಲೋ
ಜೋ ಯಸ್ಸ, ಯಥಾ? ಗವಜೋ।
ಬ್ಬೋ ವಸ್ಸ, ಯಥಾ? ಕುಬ್ಬತೋ।
ಕೋ ಯಸ್ಸ, ಯಥಾ? ಸಕೇ।
ಯೋ ಜಸ್ಸ, ಯಥಾ? ನಿಯಂಪುತ್ತಂ।
ಕೋ ತಸ್ಸ, ಯಥಾ? ನಿಯಕೋ।
ಚ್ಚೋ ತ್ತಸ್ಸ, ಯಥಾ ಭಚ್ಚೋ।
ಫೋ ಪಸ್ಸ, ಯಥಾ? ನಿಪ್ಫತ್ತಿ।
ಖೋ ಕಸ್ಸ, ಯಥಾ? ನಿಕ್ಖಮತಿ। ಇಚ್ಚೇವಮಾದೀ ಯೋಜೇತಬ್ಬಾ।
೨೧, ೨೧. ಇವಣ್ಣೋ ಯಂ ನವಾ।
ಪುಬ್ಬೋ ಇವಣ್ಣೋ ಸರೇ ಪರೇ ಯಕಾರಂ ಪಪ್ಪೋತಿ ನವಾ। ಪಟಿಸುನ್ಥಾರವುತ್ಯಸ್ಸ, ಸಬ್ಬಾ ವಿತ್ಯಾನುಭೂಯತೇ।
ನವಾತಿ ಕಸ್ಮಾ? ಪಞ್ಚಹಙ್ಗೇಹಿ ಸಮನ್ನಾಗತೋ, ಮುತ್ತಚಾಗೀ ಅನುದ್ಧತೋ।
೨೨, ೨೮. ಏವಾದಿಸ್ಸ ರಿ ಪುಬ್ಬೋ ಚ ರಸ್ಸೋ।
ಸರಮ್ಹಾ ಪರಸ್ಸ ಏವಸ್ಸ ಏಕಾರಸ್ಸ ಆದಿಸ್ಸ ರಿಕಾರೋ ಹೋತಿ, ಪುಬ್ಬೋ ಚ ಸರೋ ರಸ್ಸೋ ಹೋತಿ ನವಾ।
ಯಥರಿವ
ನವಾತಿ ಕಸ್ಮಾ? ಯಥಾ ಏವ, ತಥಾ ಏವ।
ಇತಿ ಸನ್ಧಿಕಪ್ಪೇ ದುತಿಯೋ ಕಣ್ಡೋ।
ತತಿಯಕಣ್ಡ
೨೩, ೨೬. ಸರಾ ಪಕತಿ ಬ್ಯಞ್ಜನೇ।
ಸರಾ ಖೋ ಬ್ಯಞ್ಜನೇ ಪರೇ ಪಕತಿರೂಪಾನಿ ಹೋನ್ತಿ।
ಮನೋಪುಬ್ಬಙ್ಗಮಾ ಧಮ್ಮಾ, ಪಮಾದೋ ಮಚ್ಚುನೋ ಪದಂ, ತಿಣ್ಣೋ ಪಾರಙ್ಗತೋ ಅಹು।
೨೪, ೩೫. ಸರೇ ಕ್ವಚಿ।
ಸರಾ ಖೋ ಸರೇ ಪರೇ ಕ್ವಚಿ ಪಕತಿರೂಪಾನಿ ಹೋನ್ತಿ।
ಕೋ ಇಮಂ ಪಥವಿಂ ವಿಚೇಸ್ಸತಿ।
ಕ್ವಚೀತಿ ಕಸ್ಮಾ? ಅಪ್ಪಸ್ಸುತಾಯಂ ಪುರಿಸೋ।
೨೫, ೩೭. ದೀಘಂ।
ಸರಾ ಖೋ ಬ್ಯಞ್ಜನೇ ಪರೇ ಕ್ವಚಿ ದೀಘಂ ಪಪ್ಪೋನ್ತಿ।
ಸಮ್ಮಾ
ಕ್ವಚೀತಿ ಕಸ್ಮಾ? ಇಧ ಮೋದತಿ ಪೇಚ್ಚ ಮೋದತಿ, ಪತಿಲೀಯತಿ, ಪಟಿಹಞ್ಞತಿ।
೨೬, ೩೮. ರಸ್ಸಂ।
ಸರಾ ಖೋ ಬ್ಯಞ್ಜನೇ ಪರೇ ಕ್ವಚಿ ರಸ್ಸಂ ಪಪ್ಪೋನ್ತಿ।
ಭೋವಾದಿನಾಮ ಸೋ ಹೋತಿ, ಯಥಾಭಾವಿ ಗುಣೇನ ಸೋ।
ಕ್ವಚೀತಿ ಕಸ್ಮಾ? ಸಮ್ಮಾಸಮಾಧಿ, ಸಾವಿತ್ತೀ ಛನ್ದಸೋ ಮುಖಂ, ಉಪನೀಯತಿ ಜೀವಿತಮಪ್ಪಮಾಯು।
೨೭, ೩೯. ಲೋಪಞ್ಚ ತತ್ರಾಕಾರೋ।
ಸರಾ ಖೋ ಬ್ಯಞ್ಜನೇ ಪರೇ ಕ್ವಚಿ ಲೋಪಂ ಪಪ್ಪೋನ್ತಿ। ತತ್ರ ಚ ಲೋಪೇ ಕತೇ ಅಕಾರಾಗಮೋ ಹೋತಿ।
ಸ ಸೀಲವಾ। ಸ ಪಞ್ಞವಾ ಏಸ ಧಮ್ಮೋ ಸನನ್ತನೋ, ಸ ವೇ ಕಸಾವಮರಹತಿ, ಸ ಮಾನಕಾಮೋಪಿ ಭವೇಯ್ಯ, ಸ ವೇ ಮುನಿ ಜಾತಿಭಯಂ ಅದಸ್ಸಿ।
ಕ್ವಚೀತಿ
೨೮, ೪೦. ಪರ ದ್ವೇಭಾವೋ ಠಾನೇ।
ಸರಮ್ಹಾ ಪರಸ್ಸ ಬ್ಯಞ್ಜನಸ್ಸ ದ್ವೇಭಾವೋ ಹೋತಿ ಠಾನೇ।
ಇಧಪ್ಪಮಾದೋ, ಪುರಿಸಸ್ಸ ಜನ್ತುನೋ, ಪಬ್ಬಜ್ಜಂ ಕಿತ್ತಯಿಸ್ಸಾಮಿ, ಚಾತುದ್ದಸಿ, ಪಞ್ಚದ್ದಸಿ, ಅಭಿಕ್ಕನ್ತತರೋ ಚನ್ದೋ।
ಠಾನೇತಿ ಕಸ್ಮಾ? ಇಧ ಮೋದತಿ ಪೇಚ್ಚ ಮೋದತಿ।
೨೯, ೪೨. ವಗ್ಗೇ ಘೋಸಾಘೋಸಾನಂ ತತಿಯಪಠಮಾ।
ವಗ್ಗೇ ಖೋ ಪುಬ್ಬೇಸಂ ಬ್ಯಞ್ಜನಾನಂ ಘೋಸಾಘೋಸಭೂತಾನಂ ಸರಮ್ಹಾ ಯಥಾಸಙ್ಖ್ಯಂ ತತಿಯಪಠಮಕ್ಖರಾ ದ್ವೇಭಾವಂ ಗಚ್ಛನ್ತಿ ಠಾನೇ।
ಏಸೇವ ಚಜ್ಝಾನಪ್ಫಲೋ, ಯತ್ರಟ್ಠಿತಂ ನಪ್ಪಸಹೇಯ್ಯ ಮಚ್ಚು, ಸೇಲೇ ಯಥಾ ಪಬ್ಬತಮುದ್ಧನಿಟ್ಠಿತೋ, ಚತ್ತಾರಿಟ್ಠಾನಾನಿ ನರೋ ಪಮತ್ತೋ।
ಠಾನೇತಿ ಕಸ್ಮಾ? ಇಧ ಚೇತಸೋ ದಳ್ಹಂ ಗಣ್ಹಾತಿ ಥಾಮಸಾ।
ಇತಿ ಸನ್ಧಿಕಪ್ಪೇ ತತಿಯೋ ಕಣ್ಡೋ।
ಚತುತ್ಥಕಣ್ಡ
೩೦, ೫೮. ಅಂ ಬ್ಯಞ್ಜನೇ ನಿಗ್ಗಹಿತಂ।
ನಿಗ್ಗಹಿತಂ ಖೋ ಬ್ಯಞ್ಜನೇ ಪರೇ ಅಂ ಇತಿ ಹೋತಿ।
ಏವಂ ವುತ್ತೇ, ತಂ ಸಾಧೂತಿ ಪಟಿಸ್ಸುಣಿತ್ವಾ।
೩೧, ೪೯. ವಗ್ಗನ್ತಂ ವಾ ವಗ್ಗೇ।
ವಗ್ಗಭೂತೇ ಬ್ಯಞ್ಜನೇ ಪರೇ ನಿಗ್ಗಹಿತಂ ಖೋ ವಗ್ಗನ್ತಂ ವಾ ಪಪ್ಪೋತಿ।
ತನ್ನಿಚ್ಚುತಂ, ಧಮ್ಮಞ್ಚರೇ ಸುಚರಿತಂ, ಚಿರಪ್ಪವಾಸಿಂ ಪುರಿಸಂ। ಸನ್ತನ್ತಸ್ಸ ಮನಂ ಹೋತಿ, ತಙ್ಕಾರುಣಿಕಂ, ಏವಙ್ಖೋ ಭಿಕ್ಖವೇ ಸಿಕ್ಖಿತಬ್ಬಂ।
ವಾಗ್ಗಹಣೇನನಿಗ್ಗಹಿತಂ ಖೋ ಲಕಾರಾದೇಸೋ ಹೋತಿ। ಪುಗ್ಗಲಂ।
ವಾತಿ ಕಸ್ಮಾ? ನ ತಂ ಕಮ್ಮಂ ಕತಂ ಸಾಧು।
೩೨, ೫೦. ಏಹೇ ಉಂ।
ಏಕಾರಹಕಾರೇ ಪರೇ ನಿಗ್ಗಹಿತಂ ಖೋ ಞಕಾರಂ ಪಪ್ಪೋತಿ ವಾ।
ಪಚ್ಚತ್ತಞ್ಞೇವ ಪರಿನಿಬ್ಬಾಯಿಸ್ಸಾಮಿ, ತಞ್ಞೇವೇತ್ಥ ಪಟಿಪುಚ್ಛಿಸ್ಸಾಮಿ, ಏವಞ್ಹಿ ವೋ ಭಿಕ್ಖವೇ ಸಿಕ್ಖಿತಬ್ಬಂ। ತಞ್ಹಿ ತಸ್ಸ ಮುಸಾ ಹೋತಿ।
ವಾತಿ
೩೩, ೫೦. ಸಯೇ ಚ।
ನಿಗ್ಗಹಿತಂ ಖೋ ಯಕಾರೇ ಪರೇ ಸಹ ಯಕಾರೇನ ಞಕಾರಂ ಪಪ್ಪೋತಿ ವಾ।
ಸಞ್ಞೋಗೋ, ಸಞ್ಞುತ್ತಂ।
ವಾತಿ ಕಸ್ಮಾ? ಸಂಯೋಗೋ, ಸಂಯುತ್ತಂ।
೩೪, ೫೨. ಮದಾ ಸರೇ।
ನಿಗ್ಗಹಿತಸ್ಸ ಖೋ ಸರೇ ಪರೇ ಮಕಾರದಕಾರಾದೇಸಾ ಹೋನ್ತಿ ವಾ।
ತಮಹಂ ಬ್ರೂಮಿ ಬ್ರಾಹ್ಮಣಂ, ಏತದವೋಚ ಸತ್ಥಾ।
ವಾತಿ ಕಸ್ಮಾ? ಅಕ್ಕೋಚ್ಛಿ ಮಂ ಅವಧಿ ಮಂ, ಅಜಿನಿ ಮಂ ಅಹಾಸಿ ಮೇ।
೩೫, ೩೪. ಯ ವ ಮ ದ ನ ತ ರ ಲಾ ಚಾಗಮಾ।
ಸರೇ ಪರೇ ಯಕಾರೋ ವಕಾರೋ ಮಕಾರೋ ದಕಾರೋ ನಕಾರೋ ತಕಾರೋ ರಕಾರೋ ಲಕಾರೋ ಇಮೇ ಆಗಮಾ ಹೋನ್ತಿ ವಾ।
ನಯಿಮಸ್ಸ ವಿಜ್ಜಾ, ಯಥಯಿದಂ ಚಿತ್ತಂ। ಮಿಗೀ ಭನ್ತಾ ವುದಿಕ್ಖತಿ, ಸಿತ್ತಾ ತೇ ಲಹು ಮೇಸ್ಸತಿ, ಅಸಿತ್ತಾ ತೇ ಗರು ಮೇಸ್ಸತಿ। ಅಸ್ಸೋ
ವಾತಿ ಕಸ್ಮಾ? ಏವಂ ಮಹಿದ್ಧಿಯಾ ಏಸಾ, ಅಕ್ಕೋಚ್ಛಿ ಮಂ ಅವಧಿ ಮಂ, ಅಜಿನಿ ಮಂ ಅಹಾಸಿ ಮೇ, ಅಜೇಯ್ಯೋ ಅನುಗಾಮಿಕೋ।
ಚಗ್ಗಹಣೇನ ಇಧೇವ ಮಕಾರಸ್ಸ ಪಕಾರೋ ಹೋತಿ। ಚಿರಪ್ಪವಾಸಿಂ ಪುರಿಸಂ।
ಕಕಾರಸ್ಸ ಚ ದಕಾರೋ ಹೋತಿ। ಸದತ್ಥಪಸುತೋ ಸಿಯಾ।
ದಕಾರಸ್ಸ ಚ ತಕಾರೋ ಹೋತಿ, ಸುಗತೋ।
೩೬, ೪೭. ಕ್ವಚಿ ಓ ಬ್ಯಞ್ಜನೇ।
ಬ್ಯಞ್ಜನೇ ಪರೇ ಕ್ವಚಿ ಓಕಾರಾಗಮೋ ಹೋತಿ।
ಅತಿಪ್ಪಗೋ ಖೋ ತಾವ ಸಾವತ್ಥಿಯಂ ಪಿಣ್ಡಾಯ ಚರಿತುಂ। ಪರೋಸಹಸ್ಸಂ।
ಕ್ವಚೀಕಿ
೩೭, ೫೭. ನಿಗ್ಗಹಿತಞ್ಚ।
ನಿಗ್ಗಹಿತಞ್ಚಾಗಮೋ ಹೋತಿ ಸರೇ ವಾ ಬ್ಯಞ್ಜನೇ ವಾ ಪರೇ ಕ್ವಚಿ।
ಚಕ್ಖುಂಉದಪಾದಿ, ಅವಂಸಿರೋ, ಯಾವಞ್ಚಿಧ ಭಿಕ್ಖವೇ ಪುರಿಮಂ ಜಾತಿಂ ಸರಾಮಿ, ಅಣುಂಥೂಲಾನಿ ಸಬ್ಬಸೋ, ಮನೋಪುಬ್ಬಙ್ಗಮಾ ಧಮ್ಮಾ।
ಕ್ವಚೀತಿ ಕಸ್ಮಾ? ಇಧೇವ ನಂ ಪಸಂಸನ್ತಿ, ಪೇಚ್ಚ ಸಗ್ಗೇ ಪಮೋದತಿ, ನ ಹಿ ಏತೇಹಿ ಯಾನೇಹಿ, ಗಚ್ಛೇಯ್ಯ ಅಗತಂ ದಿಸಂ।
ಚಗ್ಗಹಣೇನ ವಿಸದ್ದಸ್ಸ ಚ ಪಕಾರೋ ಹೋತಿ। ಪಚೇಸ್ಸತಿ, ವಿಚೇಸ್ಸತಿ ವಾ।
೩೮, ೫೩. ಕ್ವಚಿ ಲೋಪಂ।
ನಿಗ್ಗಹಿತಂ ಖೋ ಸರೇ ಪರೇ ಕ್ವಚಿ ಲೋಪಂ ಪಪ್ಪೋತಿ।
ತಾಸಾಹಂ ಸನ್ತಿಕೇ, ವಿದೂನಗ್ಗಮಿತಿ।
ಕ್ವಚೀತಿ ಕಸ್ಮಾ? ಅಹಮೇವ ನೂನ ಬಾಲೋ ಏತಮತ್ಥಂ ವಿದಿತ್ವಾನ।
೩೯, ೫೪. ಬ್ಯಞ್ಜನೇ ಚ।
ನಿಗ್ಗಹಿತಂ ಖೋ ಬ್ಯಞ್ಜನೇ ಪರೇ ಕ್ವಚಿ ಲೋಪಂ ಪಪ್ಪೋತಿ।
ಅರಿಯಸಚ್ಚಾನದಸ್ಸನಂ, ಏತಂ ಬುದ್ಧಾನಸಾಸನಂ।
ಕ್ವಚೀತಿ ಕಸ್ಮಾ? ಏತಂ ಮಙ್ಗಲಮುತ್ತಮಂ, ತಂ ವೋ ವದಾಮಿ ಭದ್ದನ್ತೇ।
೪೦, ೫೫. ಪರೋ ವಾಸರೋ।
ನಿಗ್ಗಹಿತಮ್ಹಾ ಪರೋ ಸರೋ ಲೋಪಂ ಪಪ್ಪೋತಿ ವಾ।
ಭಾಸಿತಂ ಅಭಿನನ್ದುನ್ತಿ, ಉತ್ತತ್ತಂವ, ಯಥಾಬೀಜಂವ, ಯಥಾಧಞ್ಞಂವ।
ವಾತಿ ಕಸ್ಮಾ? ಅಹಮೇವ ನೂನ ಬಾಲೋ, ಏತದಹೋಸಿ।
೪೧, ೫೬. ಬ್ಯಞ್ಜನೋ ಚ ವಿಸಞ್ಞೋಗೋ।
ನಿಗ್ಗಹಿತಮ್ಹಾ ಪರಸ್ಮಿಂ ಸರೇ ಲುತ್ತೇ ಯದಿ ಬ್ಯಞ್ಜನೋ ಸಸಞ್ಞೋಗೋ ವಿಸಞ್ಞೋಗೋ ಹೋತಿ।
ಏವಂಸ ತೇ ಆಸವೋ, ಪುಪ್ಫಂಸಾ ಉಪ್ಪಜ್ಜಿ।
ಲುತ್ತೇತಿ ಕಸ್ಮಾ? ಏವಮಸ್ಸ ವಿದೂನಗ್ಗಮಿತಿ।
ಚಗ್ಗಹಣೇನ
ಇತಿ ಸನ್ಧಿಕಪ್ಪೇ ಚತುತ್ಥೋ ಕಣ್ಡೋ।
ಪಞ್ಚಮಕಣ್ಡ
೪೨, ೩೨. ಗೋಸರೇ ಪುಥಸ್ಸಾಗಮೋ ಕ್ವಚಿ।
ಪುಥಇಚ್ಚೇತಸ್ಸ ಅನ್ತೇ ಸರೇ ಪರೇ ಕ್ವಚಿ ಗಕಾರಾಗಮೋ ಹೋತಿ।
ಪುಥಗೇ ವ।
೪೩, ೩೩. ಪಾಸ್ಸ ಚನ್ತೋ ರಸ್ಸೋ।
ಪಾಇಚ್ಚೇತಸ್ಸ ಅನ್ತೇ ಸರೇ ಪರೇ ಕ್ವಚಿ ಗಕಾರಾಗಮೋ ಹೋತಿ, ಅನ್ತೋ ಚ ಸರೋ ರಸ್ಸೋ ಹೋತಿ।
ಪಗೇವ ವುತ್ಯಸ್ಸ।
ಕ್ವಚೀತಿ ಕಸ್ಮಾ? ಪಾ ಏವ ವುತ್ಯಸ್ಸ।
೪೪, ೨೪. ಅಬ್ಭೋ ಅಭಿ।
ಅಭಿಇಚ್ಚೇತಸ್ಸ ಸರೇ ಪರೇ ಅಬ್ಭಾದೇಸೋ ಹೋತಿ। ಅಬ್ಭುದೀರಿತಂ, ಅಬ್ಭುಗ್ಗಚ್ಛತಿ।
೪೫, ೨೫. ಅಜ್ಝೋ ಅಧಿ।
ಅಧಿಇಚ್ಚೇತಸ್ಸ ಸರೇ ಪರೇ ಅಜ್ಝಾದೇಸೋ ಹೋತಿ।
ಅಜ್ಝೋಕಾಸೇ, ಅಜ್ಝಾಗಮಾ।
೪೬, ೨೬. ತೇ ನ ವಾ ಇವಣ್ಣೇ।
ತೇ ಚ ಖೋ ಅಭಿಅಧಿಇಚ್ಚೇತೇ ಇವಣ್ಣೇ ಪರೇ ಅಬ್ಭೋ ಅಜ್ಝೋಇತಿವುತ್ತರೂಪಾ ನಂ ಹೋನ್ತಿ ವಾ।
ಅಭಿಚ್ಛಿತಂ, ಅಧೀರಿತಂ।
ವಾತಿ ಕಸ್ಮಾ? ಅಬ್ಭೀರಿತಂ, ಅಜ್ಝಿಣಮುತ್ತೋ।
೪೭, ೨೩. ಅತಿಸ್ಸ ಚನ್ತಸ್ಸ।
ಅತಿಇಚ್ಚೇತಸ್ಸ ಅನ್ತಭೂತಸ್ಸ ತಿಸದ್ದಸ್ಸ ಇವಣ್ಣೇ ಪರೇ ‘‘ಸಬ್ಬೋ ಚಂ ತೀ’’ತಿ ವುತ್ತರೂಪಂ ನ ಹೋತಿ।
ಅತೀಸಿಗಣೋ, ಅತೀರಿತಂ।
ಇವಣ್ಣೇತಿ ಕಸ್ಮಾ? ಅಚ್ಚನ್ತಂ।
೪೮, ೪೩. ಕ್ವಚಿ ಪಟಿ ಪತಿಸ್ಸ।
ಪತಿಇಚ್ಚೇತಸ್ಸ ಸರೇ ವಾ ಬ್ಯಞ್ಜನೇ ವಾ ಪರೇ ಕ್ವಚಿ ಪಟಿಆದೇಸೋ ಹೋತಿ।
ಪಟಗ್ಗಿ ದಾತಬ್ಬೋ, ಪಟಿಹಞ್ಞತಿ।
ಕ್ವಚೀತಿ
೪೯, ೪೪. ಪುಥಸ್ಸು ಬ್ಯಞ್ಜನೇ।
ಪುಥಇಚ್ಚೇತಸ್ಸ ಅನ್ತೋ ಸರೋ ಬ್ಯಞ್ಜನೇ ಪರೇ ಉಕಾರೋ ಹೋತಿ।
ಪುಥುಜ್ಜನೋ, ಪುಥುಭೂತಂ।
ಅನ್ತಗ್ಗಹಣೇನ ಅಪುಥಸ್ಸಾಪಿ ಸರೇ ಪರೇ ಅನ್ತಸ್ಸ ಉಕಾರೋ ಹೋತಿ, ಮನುಞ್ಞಂ।
೫೦, ೪೫. ಓ ಅವಸ್ಸ।
ಅವಇಚ್ಚೇತಸ್ಸ ಬ್ಯಞ್ಜನೇ ಪರೇ ಕ್ವಚಿ ಓಕಾರೋ ಹೋತಿ।
ಅನ್ಧಕಾರೇನ ಓನದ್ಧಾ।
ಕ್ವಚೀತಿ ಕಸ್ಮಾ? ಅವಸುಸ್ಸತು ಮೇ ಸರೀರೇ ಮಂಸಲೋಹಿತಂ।
೫೧, ೫೯. ಅನುಪದಿಟ್ಠಾನಂ ವುತ್ತಯೋಗತೋ।
ಅನುಪದಿಟ್ಠಾನಂ ಉಪಸಗ್ಗನಿಪಾತಾನಂ ಸರಸನ್ಧೀಹಿ ಬ್ಯಞ್ಜನಸನ್ಧೀಹಿ ವುತ್ತಸನ್ಧೀಹಿ ಚ ಯಥಾಯೋಗಂ ಯೋಜೇತಬ್ಬಂ।
ಪಾಪನಂ
ಪರಿಗ್ಗಹೋ, ಪಗ್ಗಹೋ, ಪಕ್ಕಮೋ, ಪರಕ್ಕಮೋ, ನಿಕ್ಕಮೋ, ನಿಕ್ಕಸಾವೋ, ನಿಲ್ಲಯನಂ, ದುಲ್ಲಯನಂ, ದುಮ್ಭಿಕ್ಖಂ, ದುಬ್ಬುತ್ತಂ, ಸನ್ದಿಟ್ಠಂ, ದುಗ್ಗಹೋ, ವಿಗ್ಗಹೋ, ನಿಗ್ಗತೋ, ಅಭಿಕ್ಕಮೋ, ಪಟಿಕ್ಕಮೋ, ಏವಂ ಬ್ಯಞ್ಜನೇ ಚ। ಸೇಸಾ ಸಬ್ಬೇ ಯೋಜೇತಬ್ಬಾ।
ಇತಿ ಸನ್ಧಿಕಪ್ಪೇ ಪಞ್ಚಮೋ ಕಣ್ಡೋ।
ಸನ್ಧಿಕಪ್ಪೋ ನಿಟ್ಠಿತೋ।