೫. ತದ್ಧಿತಕಪ್ಪ

ಅಟ್ಠಮಕಣ್ಡ

೩೪೪, ೩೬೧. ವಾಣ’ಪಚ್ಚೇ ।

ಣಪಚ್ಚಯೋ ಹೋತಿ ವಾ ‘‘ತಸ್ಸಾಪಚ್ಚ’’ ಮಿಚ್ಚೇತಸ್ಮಿಂ ಅತ್ಥೇ।

ವಸಿಟ್ಠಸ್ಸ ಅಪಚ್ಚಂ ವಾಸಿಟ್ಠೋ, ವಸಿಟ್ಠಸ್ಸ ಅಪಚ್ಚಂ ವಾ, ವಸಿಟ್ಠಸ್ಸ ಅಪಚ್ಚಂ ವಾಸಿಟ್ಠೀ, ವಸಿಟ್ಠಸ್ಸ ಅಪಚ್ಚಂ ವಾಸಿಟ್ಠಂ। ಏವಂ ಭಾರದ್ವಾಜೋ, ಭಾರದ್ವಾಜೀ, ಭಾರದ್ವಾಜಂ। ಗೋತಮೋ, ಗೋತಮೀ, ಗೋತಮಂ। ವಾಸುದೇವೋ, ವಾಸುದೇವೀ, ವಾಸುದೇವಂ। ಬಾಲದೇವೋ, ಬಾಲದೇವೀ, ಬಾಲದೇವಂ। ವೇಸಾಮಿತ್ತೋ, ವೇಸಾಮಿತ್ತೀ ವೇಸಾಮಿತ್ತಂ।

೩೪೫, ೩೬೬. ಣಾಯನ ಣಾನ ವಚ್ಛಾದಿತೋ।

ತಸ್ಮಾ ವಚ್ಛಾದಿತೋ ಗೋತ್ತಗಣತೋ ಣಾಯನಣಾನಪಚ್ಚಯಾ ಹೋನ್ತಿ ವಾ ‘‘ತಸ್ಸಾಪಚ್ಚ’’ಮಿಚ್ಚೇತಸ್ಮಿಂ ಅತ್ಥೇ।

ವಚ್ಛಸ್ಸ ಅಪಚ್ಚಂವಚ್ಛಾಯನೋ, ವಚ್ಛಾನೋ, ವಚ್ಛಸ್ಸ ಅಪಚ್ಚಂ ವಾ, ವಚ್ಛಸ್ಸ ಅಪಚ್ಚಂ ವಚ್ಛಾಯನೀ, ವಚ್ಛಾನೀ, ವಚ್ಛಸ್ಸ ಅಪಚ್ಚಂ ವಚ್ಛಾಯನಂ, ವಚ್ಛಾನಂ। ಸಕಟಸ್ಸ ಅಪಚ್ಚಂ ಸಾಕಟಾಯನೋ, ಸಾಕಟಾನೋ , ಸಕಟಸ್ಸ ಅಪಚ್ಚಂ ವಾ, ಸಾಕಟಾಯನೀ, ಸಾ ಕಟಾನೀ, ಸಾಕಟಾಯನಂ, ಸಾಕಟಾನಂ। ಏವಂ ಕಣ್ಹಾಯನೋ, ಕಣ್ಹಾನೋ, ಕಣ್ಹಸ್ಸ ಅಪಚ್ಚಂ ವಾ। ಕಣ್ಹಾಯನೀ, ಕಣ್ಹಾನೀ, ಕಣ್ಹಾಯನಂ, ಕಣ್ಹಾನಂ। ಅಗ್ಗಿವೇಸ್ಸಾಯನೋ, ಅಗ್ಗಿವೇಸ್ಸಾನೋ, ಅಗ್ಗಿವೇಸ್ಸಾಯನೀ, ಅಗ್ಗಿವೇಸ್ಸಾನೀ, ಅಗ್ಗಿವೇಸ್ಸಾಯನಂ, ಅಗ್ಗಿವೇಸ್ಸಾನಂ। ಗಚ್ಛಾಯನೋ, ಗಚ್ಛಾನೋ, ಗಚ್ಛಾಯನೀ, ಗಚ್ಛಾನೀ, ಗಚ್ಛಾಯನಂ, ಗಚ್ಛಾನಂ। ಕಪ್ಪಾಯನೋ, ಕಪ್ಪಾನೋ, ಕಪ್ಪಾಯನೀ, ಕಪ್ಪಾನೀ, ಕಪ್ಪಾಯನಂ, ಕಪ್ಪಾನಂ। ಮೋಗ್ಗಲ್ಲಾಯನೋ, ಮೋಗ್ಗಲ್ಲಾನೋ, ಮೋಗ್ಗಲ್ಲಾಯನೀ, ಮೋಗ್ಗಲ್ಲಾನೀ, ಮೋಗ್ಗಲ್ಲಾಯನಂ, ಮೋಗ್ಗಲ್ಲಾನಂ। ಮುಞ್ಚಾಯನೋ, ಮುಞ್ಚಾನೋ, ಮುಞ್ಚಾಯನೀ, ಮುಞ್ಚಾನೀ, ಮುಞ್ಚಾಯನಂ, ಮುಞ್ಚಾನಂ। ಸಙ್ಘಾಯನೋ, ಸಙ್ಘಾನೋ, ಸಙ್ಘಾಯನೀ, ಸಙ್ಘಾನೀ, ಸಙ್ಘಾಯನಂ, ಸಙ್ಘಾನಂ। ಲೋಮಾಯನೋ, ಲೋಮಾನೋ, ಲೋಮಾಯನೀ, ಲೋಮಾನೀ, ಲೋಮಾಯನಂ, ಲೋಮಾನಂ, ಸಾಕಮಾಯನೋ, ಸಾಕಮಾನೋ, ಸಾಕಮಾಯನೀ, ಸಾಕಮಾನೀ, ಸಾಕಮಾಯನಂ, ಸಾಕಮಾನಂ। ನಾರಾಯನೋ, ನಾರಾನೋ, ನಾರಾಯನೀ, ನಾರಾನೀ, ನಾರಾಯನಂ, ನಾರಾನಂ। ಚೋರಾಯನೋಚೋರಾನೋ, ಚೋರಾಯನೀ, ಚೋರಾನೀ, ಚೋರಾಯನಂ, ಚೋರಾನಂ, ಆವಸಾಲಾಯನೋ, ಆವಸಾಲಾನೋ, ಆವಸಾಲಾಯನೀ, ಆವಸಾಲಾನೀ, ಆವಸಾಲಾಯನಂ, ಆವಸಾಲಾನಂ। ದ್ವೇಪಾಯನೋ, ದ್ವೇಪಾನೋ, ದ್ವೇಪಾಯನೀ, ದ್ವೇಪಾನೀ, ದ್ವೇಪಾಯನಂ, ದ್ವೇಪಾನಂ। ಕುಞ್ಚಾಯನೋ, ಕುಞ್ಚಾನೋ, ಕುಞ್ಚಾಯನೀ, ಕುಞ್ಚಾನೀ, ಕುಞ್ಚಾಯನಂ, ಕುಞ್ಚಾನಂ। ಕಚ್ಚಾಯನೋ, ಕಚ್ಚಾನೋ, ಕಚ್ಚಾಯನೀ, ಕಚ್ಚಾನೀ, ಕಚ್ಚಾಯನಂ, ಕಚ್ಚಾನಂ।

೩೪೬, ೩೬೭. ಣೇಯ್ಯೋ ಕತ್ತಿಕಾದೀಹಿ।

ತೇಹಿ ಗೋತ್ತಗಣೇಹಿ ಕತ್ತಿಕಾದೀಹಿ ಣೇಯ್ಯಪಚ್ಚಯೋ ಹೋತಿ ವಾ ‘‘ತಸ್ಸಾಪಚ್ಚ’’ಮಿಚ್ಚೇತಸ್ಮಿಂ ಅತ್ಥೇ।

ಕತ್ತಿಕಾಯ ಅಪಚ್ಚಂ ಕತ್ತಿಕೇಯ್ಯೋ, ಕತ್ತಿಕಾಯ ಅಪಚ್ಚಂ ವಾ। ಏವಂ ವೇನತೇಯ್ಯೋ, ರೋಹಿಣೇಯ್ಯೋ, ಗಙ್ಗೇಯ್ಯೋ, ಕದ್ದಮೇಯ್ಯೋ, ನಾದೇಯ್ಯೋ, ಆಲೇಯ್ಯೋ, ಆಹೇಯೋ, ಕಾಮೇಯ್ಯೋ, ಸುಚಿಯಾ ಅಪಚ್ಚಂ ಸೋಚೇಯ್ಯೋ, ಸಾಲೇಯ್ಯೋ, ಬಾಲೇಯ್ಯೋ, ಮಾಲೇಯ್ಯೋ, ಕಾಲೇಯ್ಯೋ।

೩೪೭, ೩೬೮. ಅತೋ ಣಿ ವಾ।

ತಸ್ಮಾ ಅಕಾರತೋ ಣಿಪಚ್ಚಯೋ ಹೋತಿ ವಾ ‘‘ತಸ್ಸಾಪಚ್ಚ’’ಮಿಚ್ಚೇತಸ್ಮಿಂ ಅತ್ಥೇ।

ದಕ್ಖಸ್ಸ ಅಪಚ್ಚಂ ದಕ್ಖಿ, ದಕ್ಖಸ್ಸ ಅಪಚ್ಚಂ ವಾ। ದುಣಸ್ಸ ಅಪಚ್ಚಂ ದೋಣಿ, ದುಣಸ್ಸ ಅಪಚ್ಚಂ ವಾ, ಏವಂ ವಾಸವಿ, ಸಕ್ಯಪುತ್ತಿ, ನಾಟಪುತ್ತಿ, ದಾಸಪುತ್ತಿ, ದಾಸವಿ, ವಾರುಣಿ, ಗಣ್ಡಿ, ಬಾಲದೇವಿ, ಪಾವಕಿ, ಜೇನದತ್ತಿ, ಬುದ್ಧಿ, ಧಮ್ಮಿ, ಸಙ್ಘಿ, ಕಪ್ಪಿ, ಅನುರುದ್ಧಿ।

ವಾತಿ ವಿಕಪ್ಪನತ್ಥೇನ ಣಿಕಪಚ್ಚಯೋ ಹೋತಿ ‘‘ತಸ್ಸಾಪಚ್ಚ’’ಮಿಚ್ಚೇತಸ್ಮಿಂ ಅತ್ಥೇ। ಸಕ್ಯಪುತ್ತಸ್ಸ ಅಪಚ್ಚಂ ಸಕ್ಯಪುತ್ತಿಕೋ। ಏವಂ ನಾಟಪುತ್ತಿಕೋ, ಜೇನದತ್ತಿಕೋ।

೧೪೮, ೩೭೧. ಣವೋ’ ಪಕ್ವಾದೀಹಿ।

ಉಪಕುಇಚ್ಚೇವಮಾದೀಹಿ ಣವಪಚ್ಚಯೋ ಹೋತಿ ವಾ ‘‘ತಸ್ಸಾಪಚ್ಚ’’ಮಿಚ್ಚೇತಸ್ಮಿಂ ಅತ್ಥೇ।

ಉಪಕುಸ್ಸ ಅಪಚ್ಚಂ ಓಪಕವೋ, ಉಪಕುಸ್ಸ ಅಪಚ್ಚಂ ವಾ। ಮನುನೋ ಅಪಚ್ಚಂ ಮಾನವೋ, ಮನುನೋ ಅಪಚ್ಚಂ ವಾ। ಭಗ್ಗುಸ್ಸ ಅಪಚ್ಚಂ ಭಗ್ಗವೋ, ಭಗ್ಗುಸ್ಸ ಅಪಚ್ಚಂ ವಾ, ಪಣ್ಡುಸ್ಸ ಅಪಚ್ಚಂ ಪಣ್ಡವೋ, ಪಣ್ಡುಸ್ಸ ಅಪಚ್ಚಂ ವಾ, ಬಹುಸ್ಸ ಅಪಚ್ಚಂ ಬಾಹವೋ, ಬಹುಸ್ಸ ಅಪಚ್ಚಂ ವಾ।

೩೪೯, ೩೭೨. ಣೇರ ವಿಧವಾದಿತೋ।

ತಸ್ಮಾ ವಿಧವಾದಿತೋ ಣೇರಪಚ್ಚಯೋ ಹೋತಿ ವಾ ‘‘ತಸ್ಸಾಪಚ್ಚ’’ಮಿಚ್ಚೇತಸ್ಮಿಂ ಅತ್ಥೇ।

ವಿಧವಾಯ ಅಪಚ್ಚಂ ವೇಧವೇರೋ, ವಿಧವಾಯ ಅಪಚ್ಚಂ ವಾ। ಬನ್ಧುಕಿಯಾ ಅಪಚ್ಚಂ ಬನ್ಧುಕೇರೋ, ಬನ್ಧುಕಿಯಾ ಅಪಚ್ಚಂ ವಾ। ಸಮಣಸ್ಸ ಅಪಚ್ಚಂ ಸಾಮಣೇರೋ, ಸಮಣಸ್ಸ ಅಪಚ್ಚಂ ವಾ। ಏವಂ ಸಾಮಣೇರೀ, ಸಾಮಣೇರಂ, ನಾಳಿಕೇರೋ, ನಾಳಿಕೇರೀ, ನಾಳಿಕೇರಂ।

೩೫೦, ೩೭೩. ಯೇನ ವಾ ಸಂಸಟ್ಠಂ ತರತಿ ಚರತಿ ವಹತಿ ಣಿಕೋ।

ಯೇನ ವಾ ಸಂಸಟ್ಠಂ, ಯೇನ ವಾ ತರತಿ, ಯೇನ ವಾ ಚರತಿ, ಯೇನ ವಾ ವಹತಿ ಇಚ್ಚೇತೇಸ್ವತ್ಥೇಸು ಣಿಕಪಚ್ಚಯೋ ಹೋತಿ ವಾ।

ತಿಲೇನ ಸಂಸಟ್ಠಂ ಭೋಜನಂ ತೇಲಿಕಂ, ತಿಲೇನ ಸಂಸಟ್ಠಂ ವಾ। ಏವಂ ಗೋಳಿಕಂ, ಘಾತಿಕಂ।

ನಾವಾಯ ತರತೀತಿ ನಾವಿಕೋ, ನಾವಾಯ ತರತಿ ವಾ। ಏವಂ ಓಳುಮ್ಪಿಕೋ।

ಸಕಟೇನ ಚರತೀತಿ ಸಾಕಟಿಕೋ, ಸಕಟೇನ ಚರತಿ ವಾ। ಏವಂ ಪತ್ತಿಕೋ, ದಣ್ಡಿಕೋ, ಧಮ್ಮಿಕೋ, ಪಾದಿಕೋ।

ಸೀಸೇನ ವಹತೀತಿ ಸೀಸಿಕೋ, ಸೀಸೇನ ವಹತಿ ವಾ। ಅಂಸೇನ ವಹತೀತಿ ಅಂಸಿಕೋ, ಅಂಸೇನ ವಹತಿ ವಾ। ಏವಂ ಖನ್ಧಿಕೋ, ಅಙ್ಗುಲಿಕೋ।

ವಾತಿ ವಿಕಪ್ಪನತ್ಥೇನ ಅಞ್ಞೇಸುಪಿ ಣಿಕಪಚ್ಚಯೋ ಹೋತಿ। ರಾಜಗಹೇ ವಸತೀತಿ ರಾಜಗಹಿಕೋ, ರಾಜಗಹೇ ವಸತಿ ವಾ। ರಾಜಗಹೇ ಜಾತೋ ರಾಜಗಹಿಕೋ, ರಾಜಗಹೇ ಜಾತೋ ವಾ। ಏವಂ ಮಾಗಧಿಕೋ, ಸಾವತ್ಥಿಕೋ, ಕಾಪಿಲ ವತ್ಥಿಕೋ, ಪಾಟಲಿಪುತ್ತಿಕೋ, ವೇಸಾಲಿಕೋ।

೩೫೧, ೩೭೪. ತಮಧೀತೇ ತೇನಕತಾದಿ ಸನ್ನಿಧಾನ ನಿಯೋಗ ಸಿಪ್ಪ ಭಣ್ಡ ಜೀವಿಕತ್ಥೇಸು ಚ।

ತಮಧೀತೇ, ತೇನಕತಾದಿಅತ್ಥೇ, ತಮ್ಹಿ ಸನ್ನಿಧಾನಾ, ತತ್ಥ ನಿಯುತ್ತೋ, ತಮಸ್ಸ ಸಿಪ್ಪಂ, ತಮಸ್ಸ ಭಣ್ಡಂ, ತಮಸ್ಸ ಜೀವಿಕಂ ಇಚ್ಚೇತೇಸ್ವತ್ಥೇಸು ಚ ಣಿಕಪಚ್ಚಯೋ ಹೋತಿ ವಾ।

ವಿನಯಮಧೀತೇ ವೇನಯಿಕೋ, ವಿನಯಮಧೀತೇ ವಾ। ಏವಂ ಸುತ್ತನ್ತಿಕೋ, ಆಭಿಧಮ್ಮಿಕೋ, ವೇಯ್ಯಾಕರಣಿಕೋ।

ಕಾಯೇನ ಕತಂ ಕಮ್ಮಂ ಕಾಯಿಕಂ, ಕಾಯೇನ ಕತಂ ಕಮ್ಮಂ ವಾ। ಏವಂ ವಾಚಸಿಕಂ, ಮಾನಸಿಕಂ।

ಸರೀರೇ ಸನ್ನಿಧಾನಾ ವೇದನಾ ಸಾರೀರಿಕಾ, ಸರೀರೇ ಸನ್ನಿಧಾನಾ ವಾ, ಏವಂ ಮಾನಸಿಕಾ।

ದ್ವಾರೇ ನಿಯುತ್ತೋ ದೋವಾರಿಕೋ, ದ್ವಾರೇ ನಿಯುತ್ತೋ ವಾ। ಏವಂ ಭಣ್ಡಾಗಾರಿಕೋ, ನಾಗರಿಕೋ, ನಾವಕಮ್ಮಿಕೋ।

ವೀಣಾ ಅಸ್ಸ ಸಿಪ್ಪಂ ವೇಣಿಕೋ, ವೀಣಾ ಅಸ್ಸ ಸಿಪ್ಪಂ ವಾ। ಏವಂ ಪಾಣವಿಕೋ, ಮೋದಿಙ್ಗಿಕೋ, ವಂಸಿಕೋ।

ಗನ್ಧೋ ಅಸ್ಸ ಭಣ್ಡಂ ಗನ್ಧಿಕೋ, ಗನ್ಧೋ ಅಸ್ಸ ಭಣ್ಡಂ ವಾ। ಏವಂ ತೇಲಿಕೋ, ಗೋಳಿಕೋ।

ಉರಬ್ಭಂ ಹನ್ತ್ವಾ ಜೀವತೀತಿ ಓರಬ್ಭಿಕೋ, ಉರಬ್ಭಂ ಹನ್ತ್ವಾ ಜೀವತಿ ವಾ। ಮಗಂ ಹನ್ತ್ವಾ ಜೀವತೀತಿ ಮಾಗವಿಕೋ, ಮಗಂ ಹನ್ತ್ವಾ ಜೀವತಿ ವಾ। ಏವಂ ಸೋಕರಿಕೋ, ಸಾಕುಣಿಕೋ।

ಆದಿಗ್ಗಹಣೇನ ಅಞ್ಞತ್ಥಾಪಿ ಣಿಕ ಪಚ್ಚಯೋ ಯೋಜೇತಬ್ಬೋ। ಜಾಲೇನ ಹತೋ ಜಾಲಿಕೋ, ಜಾಲೇನ ಹತೋ ವಾ।

ಸುತ್ತೇನ ಬನ್ಧೋ ಸುತ್ತಿಕೋ, ಸುತ್ತೇನ ಬನ್ಧೋ ವಾ।

ಚಾಪೋ ಅಸ್ಸ ಆವುಧೋ ಚಾಪಿಕೋ, ಚಾಪೋ ಅಸ್ಸ ಆವುಧೋ ವಾ। ಏವಂ ತೋಮರಿಕೋ, ಮುಗ್ಗರಿಕೋ, ಮೋಸಲಿಕೋ।

ವಾತೋ ಅಸ್ಸ ಆಬಾಧೋ ವಾತಿಕೋ, ವಾತೋ ಅಸ್ಸ ಆಬಾಧೋ ವಾ। ಏವಂ ಸೇಮ್ಹಿಕೋ, ಪಿತ್ತಿಕೋ।

ಬುದ್ಧೇ ಪಸನ್ನೋ ಬುದ್ಧಿಕೋ, ಬುದ್ಧೇ ಪಸನ್ನೋ ವಾ। ಏವಂ ಧಮ್ಮಿಕೋ, ಸಙ್ಘಿಕೋ।

ಬುದ್ಧಸ್ಸ ಸನ್ತಕಂ ಬುದ್ಧಿಕಂ, ಬುದ್ಧಸ್ಸ ಸನ್ತಕಂ ವಾ। ಏವಂ ಧಮ್ಮಿಕಂ, ಸಙ್ಘಿಕಂ।

ವತ್ಥೇನ ಕೀತಂ ಭಣ್ಡಂ ವತ್ಥಿಕಂ, ವತ್ಥೇನ ಕೀತಂ ಭಣ್ಡಂ ವಾ। ಏವಂ ಕುಮ್ಭಿಕಂ, ಫಾಲಿಕಂ, ಕಿಂ ಕಣಿಕಂ, ಸೋವಣ್ಣಿಕಂ।

ಕುಮ್ಭೋ ಅಸ್ಸ ಪರಿಮಾಣಂ ಕುಮ್ಭಿಕಂ, ಕುಮ್ಭೋ ಅಸ್ಸ ಪರಿಮಾಣಂ ವಾ।

ಕುಮ್ಭಸ್ಸ ರಾಸಿ ಕುಮ್ಭಿಕಂ, ಕುಮ್ಭಸ್ಸ ರಾಸಿ ವಾ।

ಕುಮ್ಭಂ ಅರಹತೀತಿ ಕುಮ್ಭಿಕೋ, ಕುಮ್ಭಂ ಅರಹತಿ ವಾ।

ಅಕ್ಖೇನ ದಿಬ್ಬತೀತಿ ಅಕ್ಖಿಕೋ, ಅಕ್ಖೇನ ದಿಬ್ಬತಿ ವಾ। ಏವಂ ಸಾಲಾಕಿಕೋ, ತಿನ್ದುಕಿಕೋ, ಅಮ್ಬಫಲಿಕೋ। ಕಪಿಟ್ಠಫಲಿಕೋ, ನಾಳಿಕೇರಿಕೋ ಇಚ್ಚೇವಮಾದಿ।

೩೫೨, ೩೭೬. ಣ ರಾಗಾ ತಸ್ಸೇ ದಮಞ್ಞತ್ಥೇಸು ಚ।

ಣಪಚ್ಚಯೋ ಹೋತಿ ವಾ ರಾಗಮ್ಹಾ ‘‘ತೇನ ರತ್ತಂ’’ ಇಚ್ಚೇತಸ್ಮಿಂ ಅತ್ಥೇ, ‘‘ತಸ್ಸೇದಂ’’ ಅಞ್ಞತ್ಥೇಸು ಚ।

ಕಸಾವೇನ ರತ್ತಂ ವತ್ಥಂ ಕಾಸಾವಂ, ಕಸಾವೇನ ರತ್ತಂ ವತ್ಥಂ ವಾ। ಏವಂ ಕೋಸುಮ್ಭಂ, ಹಾಲಿದ್ದಂ, ಪಾಟಙ್ಗಂ, ರತ್ತಙ್ಗ, ಮಞ್ಜಿಟ್ಠಂ, ಕುಙ್ಕುಮಂ।

ಸೂಕರಸ್ಸ ಇದಂ ಮಂಸಂ ಸೋಕರಂ, ಸೂಕರಸ್ಸ ಇದಂ ಮಂಸಂ ವಾ। ಏವಂ ಮಾಹಿಸಂ।

ಉದುಮ್ಬರಸ್ಸ ಅವಿದೂರೇ ಪವತ್ತಂ ವಿಮಾನಂ ಓದುಮ್ಬರಂ, ಉದುಮ್ಬರಸ್ಸ ಅವಿದೂರೇ ಪವತ್ತಂ ವಿಮಾನಂ ವಾ।

ವಿದಿಸಾಯ ಅವಿದೂರೇ ನಿವಾಸೋ ವೇದಿಸೋ, ವಿದಿಸಾಯ ಅವಿದೂರೇ ನಿವಾಸೋ ವಾ।

ಮಥುರಾಯ ಜಾತೋ ಮಾಥುರೋ, ಮಥುರಾಯ ಜಾತೋ ವಾ।

ಮಥುರಾಯ ಆಗತೋ ಮಾಥುರೋ, ಮಥುರಾಯ ಆಗತೋ ವಾ।

ಕತ್ತಿಕಾಯ ನಿಯುತ್ತೋ ಮಾಸೋ ಕತ್ತಿಕೋ, ಕತ್ತಿಕಾಯ ನಿಯುತ್ತೋ ಮಾಸೋ ವಾ। ಏವಂ ಮಾಗಸಿರೋ, ಫುಸ್ಸೋ, ಮಾಘೋ, ಫಗ್ಗುನೋ, ಚಿತ್ತೋ, ವೇಸಾಖೋ, ಜೇಟ್ಠೋ, ಆಸಳ್ಹೋ, ಸಾವಣೋ, ಭದ್ದೋ, ಅಸ್ಸಯುಜೋ।

ನ ವುದ್ಧಿ ನೀಲಪೀತಾದೋ, ಪಚ್ಚಯೇ ಸಣಕಾರಕೇ।

ಫಕಾರೋ ಫುಸ್ಸಸದ್ದಸ್ಸ, ‘‘ಸಿರೋ’’ತಿ ಸಿರಸಂ ವದೇ।

ಸಿಕ್ಖಾನಂ ಸಮೂಹೋ ಸಿಕ್ಖೋ, ಭಿಕ್ಖಾನಂ ಸಮೂಹೋ ಭಿಕ್ಖೋ। ಏವಂ ಕಾಪೋತೋ, ಮಾಯೂರೋ, ಕೋಕಿಲೋ।

ಬುದ್ಧೇ, ಅಸ್ಸ ದೇವತಾ ಬುದ್ಧೋ। ಏವಂ ಭದ್ದೋ, ಮಾರೋ, ಮಾಹಿನ್ದೋ, ವೇಸ್ಸವಣೋ, ಯಾಮೋ, ಸೋಮೋ, ನಾರಾಯಣೋ।

ಸಂವಚ್ಛರಮಧೀತೇ ಸಂವಚ್ಛರೋ। ಏವಂ ಮೋಹುತ್ತೋ, ನೇಮಿತ್ತೋ, ಅಙ್ಗವಿಜ್ಜೋ, ವೇಯ್ಯಾಕರಣೋ, ಛನ್ದೋ, ಭಾಸ್ಸೋ, ಚನ್ದೋ।

ವಸಾದಾನಂ ವಿಸಯೋ ದೇಸೋ ವಾಸಾದೋ। ಏವಂ ಕುಮ್ಭೋ, ಸಾಕುನ್ತೋ, ಆತಿಸಾರೋ।

ಉದುಮ್ಬರಾ ಅಸ್ಮಿಂ ಪದೇಸೇ ಸನ್ತೀತಿ ಓದುಮ್ಬರೋ। ಸಾಗರೇಹಿ ನಿಬ್ಬತ್ತೋ ಸಾಗರೋ। ಸಾಗಲಮಸ್ಸ ನಿವಾಸೋ ಸಾಗಲೋ। ಮಥುರಾ ಅಸ್ಸ ನಿವಾಸೋ ಮಾಥುರೋ। ಮಥುರಾಯ ಇಸ್ಸರೋ ಮಾಥುರೋ। ಇಚ್ಚೇವಮಾದಯೋ ಯೋಜೇತಬ್ಬಾ।

೩೫೩, ೩೭೮. ಜಾತಾದೀನಮಿಮಿಯಾ ಚ।

ಜಾತಇಚ್ಚೇವಮಾದೀನಮತ್ಥೇ ಇಮಇಯಪಚ್ಚಯಾ ಹೋನ್ತಿ।

ಪಚ್ಛಾ ಜಾತೋ ಪಚ್ಛಿಮೋ। ಏವಂ ಅನ್ತಿಮೋ, ಮಜ್ಝಿಮೋ, ಪುರಿಮೋ, ಉಪರಿಮೋ, ಹೇಟ್ಠಿಮೋ, ಗೋಪ್ಫಿಮೋ। ಬೋಧಿಸತ್ತಜಾತಿಯಾ ಜಾತೋ ಬೋಧಿಸತ್ತಜಾತಿಯೋ, ಏವಂ ಅಸ್ಸಜಾತಿಯೋ, ಹತ್ಥಿಜಾತಿಯೋ, ಮನುಸ್ಸಜಾತಿಯೋ।

ಆದಿಗ್ಗಹಣೇನ ನಿಯುತ್ತತ್ಥಾದಿತೋಪಿ ತದಸ್ಸತ್ಥಾದಿತೋಪಿ ಇಮ ಇಯ ಇಕ ಇಚ್ಚೇತೇ ಪಚ್ಚಯಾ ಹೋನ್ತಿ। ಅನ್ತೋ ನಿಯುತ್ತೋ ಅನ್ತಿಮೋ। ಏವಂ ಅನ್ತಿಯೋ, ಅನ್ತಿಕೋ।

ಪುತ್ತೋ ಅಸ್ಸ ಅತ್ಥಿ, ತಸ್ಮಿಂ ವಾ ವಿಜ್ಜತೀತಿ ಪುತ್ತಿಮೋ। ಏವಂ ಪುತ್ತಿಯೇವ, ಪುತ್ತಿಕೋ, ಕಪ್ಪಿಮೋ, ಕಪ್ಪಿಯೋ, ಕಪ್ಪಿಕೋ।

ಚಗ್ಗಹಣೇನ ಕಿಯಪಚ್ಚಯೋ ಹೋತಿ ನಿಯುತ್ತತ್ಥೇ। ಜಾತಿಯಂ ನಿಯುತ್ತೋ ಜಾತಿಕಿಯೋ, ಅನ್ಧೇ ನಿಯುತ್ತೋ ಅನ್ಧಕಿಯೋ, ಜಾತಿಯಾ ಅನ್ಧೋ ಜಚ್ಚನ್ಧೋ, ಜಚ್ಚನ್ಧೇ ನಿಯುತ್ತೋ ಜಚ್ಚನ್ಧಕಿಯೋ।

೩೫೪, ೩೭೯. ಸಮೂಹತ್ಥೇ ಕಣ ಣಾ।

ಸಮೂಹತ್ಥೇ ಕಣ ಣಇಚ್ಚೇತೇ ಪಚ್ಚಯಾ ಹೋನ್ತಿ।

ರಾಜಪುತ್ತಾನಂ ಸಮೂಹೋ ರಾಜಪುತ್ತಕೋ। ಏವಂ ರಾಜಪುತ್ತೋ, ಮಾನುಸ್ಸಕೋ, ಮಾನುಸ್ಸೋ, ಮಾಯೂರಕೋ, ಮಾಯೂರೋ, ಮಾಹಿಂಸಕೋ, ಮಾಹಿಂಸೋ।

೩೫೫, ೩೮೦. ಗಾಮ ಜನ ಬನ್ಧು ಸಹಾಯಾದೀಹಿತಾ।

ಗಾಮ ಜನ ಬನ್ಧು ಸಹಾಯಇಚ್ಚೇವಮಾದೀಹಿ ತಾಪಚ್ಚಯೋ ಹೋತಿ ಸಮೂಹತ್ಥೇ।

ಗಾಮಾನಂ ಸಮೂಹೋ ಗಾಮತಾ। ಏವಂ ಜನತಾ, ಬನ್ಧುತಾ, ಸಹಾಯತಾ, ನಗರತಾ।

೩೫೬, ೩೮೧. ತದಸ್ಸ ಠಾನಮಿಯೋ ಚ।

‘‘ತದಸ್ಸ ಠಾನ’’ ಮಿಚ್ಚೇತಸ್ಮಿಂ ಅತ್ಥೇ ಇಯಪಚ್ಚಯೋ ಹೋತಿ।

ಮದನಸ್ಸ ಠಾನಂ ಮದನಿಯಂ, ಬನ್ಧನಸ್ಸ ಠಾನಂ ಬನ್ಧನಿಯಂ, ಮುಚ್ಛನಸ್ಸ ಠಾನಂ ಮುಚ್ಛನಿಯಂ, ಏವಂ ರಜನಿಯಂ, ಕಮನಿಯಂ, ಗಮನಿಯಂ, ದುಸ್ಸನಿಯಂ, ದಸ್ಸನಿಯಂ।

೩೫೭, ೩೮೨. ಉಪಮತ್ಥಾಯಿತತ್ತಂ।

ಉಪಮತ್ಥೇ ಆಯಿತತ್ತಪಚ್ಚಯೋ ಹೋತಿ।

ಧೂಮೋ ವಿಯ ದಿಸ್ಸತಿ ಅದುಂ ವನಂ ತದಿದಂ ಧೂಮಾಯಿತತ್ತಂ, ತಿಮಿರಂ ವಿಯ ದಿಸ್ಸತಿ ಅದುಂ ವನಂ ತದಿದಂ ತಿಮಿರಾಯಿತತ್ತಂ।

೩೫೮, ೩೮೩. ತನ್ನಿಸ್ಸಿತತ್ಥೇ ಲೋ।

‘‘ತನ್ನಿಸ್ಸಿತತ್ಥೇ, ತದಸ್ಸ ಠಾನ’’ಮಿಚ್ಚೇತಸ್ಮಿಂ ಅತ್ಥೇ ಚ ಲಪಚ್ಚಯೋ ಹೋತಿ।

ದುಟ್ಠು ನಿಸ್ಸಿತಂ ದುಟ್ಠುಲ್ಲಂ, ವೇದಂ ನಿಸ್ಸಿತಂ ವೇದಲ್ಲಂ, ದುಟ್ಠು ಠಾನಂ ದುಟ್ಠುಲ್ಲಂ, ವೇದಸ್ಸ ಠಾನಂ ವೇದಲ್ಲಂ।

೩೫೯, ೩೮೪. ಆಲು ತಬ್ಬಹುಲೇ।

ಆಲುಪಚ್ಚಯೋ ಹೋತಿ ತಬ್ಬಹುಲತ್ಥೇ।

ಅಭಿಜ್ಝಾ ಅಸ್ಸ ಪಕತಿ ಅಭಿಜ್ಝಾಲು, ಅಭಿಜ್ಝಾ ಅಸ್ಸ ಬಹುಲಾ ವಾ ಅಭಿಜ್ಝಾಲು। ಏವಂ ಸೀತಾಲು, ಧಜಾಲು, ದಯಾಲು।

೩೬೦, ೩೮೭. ಣ್ಯ ತ್ತ ತಾ ಭಾವೇ ತು।

ಣ್ಯತ್ತತಾಇಚ್ಚೇತೇ ಪಚ್ಚಯಾ ಹೋನ್ತಿ ಭಾವತ್ಥೇ।

ಅಲಸಸ್ಸ ಭಾವೋ ಆಲಸ್ಯಂ, ಅರೋಗಸ್ಸ ಭಾವೋ ಆರೋಗ್ಯಂ। ಪಂಸುಕೂಲಿಕಸ್ಸ ಭಾವೋ ಪಂಸುಕೂಲಿಕತ್ತಂ, ಅನೋದರಿಕಸ್ಸ ಭಾವೋ ಅನೋದರಿಕತ್ತಂ। ಸಙ್ಗಣಿಕಾರಾಮಸ್ಸ ಭಾವೋ ಸಙ್ಗಣಿಕಾರಾಮತಾ, ನಿದ್ದಾರಾಮಸ್ಸ ಭಾವೋ ನಿದ್ದಾರಾಮತಾ।

ತುಗ್ಗಹಣೇನ ತ್ತನಪಚ್ಚಯೋ ಹೋತಿ। ಪುಥುಜ್ಜನತ್ತನಂ, ವೇದನತ್ತನಂ।

೩೬೧, ೩೮೮. ಣ ವಿಸಮಾದೀಹಿ।

ಣಪಚ್ಚಯೋ ಹೋತಿ ವಿಸಮಾದೀಹಿ ‘‘ತಸ್ಸ ಭಾವೋ’’ಇಚ್ಚೇತಸ್ಮಿಂ ಅತ್ಥೇ।

ವಿಸಮಸ್ಸ ಭಾವೋ ವೇಸಮಂ, ಸುಚಿಸ್ಸ ಭಾವೋ ಸೋಚಂ।

೩೬೨, ೩೮೯. ರಮಣೀಯಾದಿತೋ ಕಣ।

ರಮಣೀಯಇಚ್ಚೇವಮಾದಿತೋ ಕಣ ಪಚ್ಚಯೋ ಹೋತಿ ‘‘ತಸ್ಸ ಭಾವೋ’’ಇಚ್ಚೇತಸ್ಮಿಂ ಅತ್ಥೇ।

ರಮಣೀಯಸ್ಸ ಭಾವೋ ರಾಮಣೀಯಕಂ, ಮನುಞ್ಞಸ್ಸ ಭಾವೋ ಮಾನುಞ್ಞಕಂ।

೩೬೩, ೩೯೦. ವಿಸೇಸೇ ತರತಮಿಸಿಕಿಯಿಟ್ಠಾ।

ವಿಸೇಸತ್ಥೇ ತರ ತಮ ಇಸಿಕ ಇಯ ಇಟ್ಠಇಚ್ಚೇತೇ ಪಚ್ಚಯಾ ಹೋನ್ತಿ।

ಸಬ್ಬೇ ಇಮೇ ಪಾಪಾ, ಅಯಮಿಮೇಸಂ ವಿಸೇಸೇನ ಪಾಪೋತಿ ಪಾಪತರೋ। ಏವಂ ಪಾಪತಮೋ, ಪಾಪಿಸಿಕೋ, ಪಾಪಿಯೋ, ಪಾಪಿಟ್ಠೋ।

೩೬೪, ೩೯೮. ತದಸ್ಸತ್ಥೀತಿ ವೀ ಚ।

‘‘ತದಸ್ಸತ್ಥಿ’’ಇಚ್ಚೇತಸ್ಮಿಂ ಅತ್ಥೇ ವೀಪಚ್ಚಯೋ ಹೋತಿ।

ಮೇಧಾ ಯಸ್ಸ ಅತ್ಥಿ, ತಸ್ಮಿಂ ವಾ ವಿಜ್ಜತೀತಿಮೇಧಾವೀ। ಏವಂ ಮಾಯಾವೀ।

ಚಗ್ಗಹಣೇನ ಸೋಪಚ್ಚಯೋ ಹೋತಿ। ಸುಮೇಧಾ ಯಸ್ಸ ಅತ್ಥಿ, ತಸ್ಮಿಂ ವಾ ವಿಜ್ಜತೀತಿ ಸುಮೇಧಸೋ।

೩೬೫, ೩೯೯. ತಪಾದಿತೋ ಸೀ।

ತಪಾದಿತೋ ಸೀಪಚ್ಚಯೋ ಹೋತಿ ‘‘ತದಸ್ಸತ್ಥಿ’’ಇಚ್ಚೇತಸ್ಮಿಂ ಅತ್ಥೇ।

ತಪೋ ಯಸ್ಸ ಅತ್ಥಿ ತಸ್ಮಿಂ ವಾ ವಿಜ್ಜತೀತಿ ತಪಸ್ಸೀ। ಏವಂ ಯಸಸ್ಸೀ, ತೇಜಸ್ಸೀ।

೨೬೬, ೪೦೦. ದಣ್ಡಾದಿತೋ ಇಕಈ।

ದಣ್ಡಾದಿತೋ ಇಕ ಈಇಚ್ಚೇತೇ ಪಚ್ಚಯಾ ಹೋನ್ತಿ ‘‘ತದಸ್ಸತ್ಥಿ’’ಇಚ್ಚೇತಸ್ಮಿಂ ಅತ್ಥೇ।

ದಣ್ಡೋ ಯಸ್ಸ ಅತ್ಥಿ, ತಸ್ಮಿಂ ವಾ ವಿಜ್ಜತೀತಿ ದಣ್ಡಿಕೋ, ದಣ್ಡೀ। ಏವಂ ಮಾಲಿಕೋ, ಮಾಲೀ।

೩೬೭, ೪೦೧. ಮಧ್ವಾದಿತೋ ರೋ।

ಮಧುಇಚ್ಚೇವಮಾದಿತೋ ರಪಚ್ಚಯೋ ಹೋತಿ ‘‘ತದಸ್ಸತ್ಥಿ’’ಇಚ್ಚೇತಸ್ಮಿಂ ಅತ್ಥೇ।

ಮಧು ಯಸ್ಸ ಅತ್ಥಿ, ತಸ್ಮಿಂ ವಾ ವಿಜ್ಜತೀತಿ ಮಧುರೋ। ಏವಂ ಕುಞ್ಜರೋ, ಮುಗ್ಗರೋ, ಮುಖರೋ, ಸುಸಿರೋ, (ಸೀಸರೋ, ಸುಕರೋ, ಸುಙ್ಕರೋ), ಸುಭರೋ, ಸುಚಿರೋ, ರುಚಿರೋ।

೩೬೮, ೪೦೨. ಗುಣಾದಿತೋ ವನ್ತು।

ಗುಣಇಚ್ಚೇವಮಾದಿತೋ ವನ್ತುಪಚ್ಚಯೋ ಹೋತಿ ‘‘ತದಸ್ಸತ್ಥಿ’’ಇಚ್ಚೇತಸ್ಮಿಂ ಅತ್ಥೇ।

ಗುಣೋ ಯಸ್ಸ ಅತ್ಥಿ, ತಸ್ಮಿಂ ವಾ ವಿಜ್ಜತೀತಿ ಗುಣವಾ। ಏವಂ ಯಸವಾ, ಧನವಾ, ಪಞ್ಞವಾ, ಬಲವಾ, ಭಗವಾ।

೩೬೯, ೪೦೩. ಸತ್ಯಾದೀಹಿ ಮನ್ತು।

ಸತಿಇಚ್ಚೇವಮಾದೀಹಿ ಮನ್ತುಪಚ್ಚಯೋಹೋತಿ ‘‘ತದಸ್ಸತ್ಥಿ’’ ಇಚ್ಚೇತಸ್ಮಿಂ ಅತ್ಥೇ।

ಸತಿ ಯಸ್ಸ ಅತ್ಥಿ, ತಸ್ಮಿಂ ವಾ ವಿಜ್ಜತೀತಿ ಸತಿಮಾ, ಏವಂ ಜುತಿಮಾ, ರುಚಿಮಾ, ಥುತಿಮಾ, ಧಿತಿಮಾ, ಮತಿಮಾ, ಭಾಣುಮಾ।

೩೭೦, ೪೦೫. ಸದ್ಧಾದಿತೋಣ।

ಸದ್ಧಾಇಚ್ಚೇವಮಾದಿತೋ ಣ ಪಚ್ಚಯೋ ಹೋತಿ ‘‘ತದಸ್ಸತ್ಥಿ’’ಇಚ್ಚೇತಸ್ಮಿಂ ಅತ್ಥೇ।

ಸದ್ಧಾ ಯಸ್ಸ ಅತ್ಥಿ, ತಸ್ಮಿಂ ವಾ ವಿಜ್ಜತೀಭಿ ಸದ್ಧೋ, ಏವಂ ಪಞ್ಞೋ, ಅಮಚ್ಛರೋ।

೩೭೧, ೪೦೪. ಆಯುಸ್ಸುಕಾರಾಸ ಮನ್ತುಮ್ಹಿ।

ಆಯುಸ್ಸ ಅನ್ತೋ ಉಕಾರೋ ಅಸಾದೇಸೋ ಹೋತಿಮನ್ತುಮ್ಹಿ ಪಚ್ಚಯೇ ಪರೇ।

ಆಯು ಅಸ್ಸ ಅತ್ಥಿ, ತಸ್ಮಿಂ ವಾ ವಿಜ್ಜತೀತಿ ಆಯಸ್ಮಾ।

೩೭೨, ೩೮೫. ತಪ್ಪಕತಿವಚನೇ ಮಯೋ।

ತಪ್ಪಕತಿವಚನತ್ಥೇ ಮಯಪಚ್ಚಯೋ ಹೋತಿ।

ಸುವಣ್ಣೇನ ಪಕತಂ ಕಮ್ಮಂ ಸೋವಣ್ಣಮಯಂ। ಏವಂ ರೂಪಿಯಮಯಂ ಜತುಮಯಂ, ರಜತಮಯಂ, ಇಟ್ಠಕಮಯಂ, ಅಯೋಮಯಂ, ಮತ್ತಿಕಾ ಮಯಂ, ದಾರುಮಯಂ, ಗೋಮಯಂ।

೩೭೩, ೪೦೬. ಸಙ್ಖ್ಯಾಪೂರಣೇ ಮೋ।

ಸಙ್ಖ್ಯಾಪೂರಣತ್ಥೇ ಮಪಚ್ಚಯೋ ಹೋತಿ।

ಪಞ್ಚನ್ನಂ ಪೂರಣೋ ಪಞ್ಚಮೋ, ಏವಂ ಸತ್ತಮೋ, ಅಟ್ಠಮೋ, ನವಮೋ, ದಸಮೋ।

೩೭೪, ೪೦೮. ಸ ಛಸ್ಸವಾ।

ಛಸ್ಸ ಸಕಾರಾದೇಸೋ ಹೋತಿ ವಾ ಸಙ್ಖ್ಯಾಪೂರಣತ್ಥೇ।

ಛನ್ನಂ ಪೂರಣೋ ಸಟ್ಠೋ, ಛಟ್ಠೋ ವಾ।

೩೭೫, ೪೧೨. ಏಕಾದಿತೋ ದಸಸ್ಸೀ।

ಏಕಾದಿತೋ ದಸಸ್ಸ ಅನ್ತೇ ಈಪಚ್ಚಯೋ ಹೋತಿ ವಾ ಸಙ್ಖ್ಯಾಪೂರಣತ್ಥೇ।

ಏಕೋ ಚ ದಸ ಚ ಏಕಾದಸ, ಏಕಾದಸನ್ನಂ ಪೂರಣೀ ಏಕಾದಸೀ। ಪಞ್ಚಚ ದಸ ಚ ಪಞ್ಚದಸ, ಪಞ್ಚದಸನ್ನಂ ಪೂರಣೀ ಪಞ್ಚದಸೀ। ಚತ್ತಾರೋ ಚ ದಸ ಚ ಚತುದ್ದಸ, ಚತುದ್ದಸನ್ನಂ ಪೂರಣೀ ಚಾತುದ್ದಸೀ।

ಪೂರಣೇತಿ ಕಿಮತ್ಥಂ? ಏಕಾದಸ, ಪಞ್ಚದಸ।

೩೭೬, ೨೫೭. ದಸೇ ಸೋ ನಿಚ್ಚಞ್ಚ।

ದಸಸದ್ದೇ ಪರೇ ನಿಚ್ಚಂ ಛಸ್ಸ ಸೋ ಹೋತಿ।

ಸೋಳಸ।

೩೭೭, ೦. ಅನ್ತೇ ನಿಗ್ಗಹಿತಞ್ಚ।

ತಾಸಂ ಸಙ್ಖ್ಯಾನಂ ಅನ್ತೇ ನಿಗ್ಗಹಿತಾಗಮೋ ಹೋತಿ।

ಪಞ್ಚದಸಿ, ಚಾತುದ್ದಸಿ।

೩೭೮, ೪೧೪. ತಿ ಚ।

ತಾಸಂ ಸಙ್ಖ್ಯಾನಂ ಅನ್ತೇ ತಿಕಾರಾಗಮೋ ಹೋತಿ। ವೀಸತಿ, ತಿಂಸತಿ।

೩೭೯, ೨೫೮. ಲ ದರಾನಂ।

ದಕಾರ ರಕಾರಾನಂ ಸಙ್ಖ್ಯಾನಂ ಲಕಾರಾದೇಸೋ ಹೋತಿ। ಸೋಳಸ, ಚತ್ತಾಲೀಸಂ।

೩೮೦, ೨೫೫. ವೀಸತಿ ದಸೇಸು ಬಾ ದ್ವಿಸ್ಸ ತು।

ವೀಸತಿ ದಸಇಚ್ಚೇತೇಸು ದ್ವಿಸ್ಸ ಬಾ ಹೋತಿ।

ಬಾವೀಸತಿನ್ದ್ರಿಯಾನಿ, ಬಾರಸ ಮನುಸ್ಸಾ।

ತುಗ್ಗಹಣೇನ ದ್ವಿಸ್ಸ ದು ದಿ ದೋ ಆದೇಸಾ ಚ ಹೋನ್ತಿ। ದುರತ್ತಂ, ದಿರತ್ತಂ, ದಿಗುಣಂ, ದೋಹಳಿನೀ।

೩೮೧, ೨೫೪. ಏಕಾದಿತೋ ದಸ್ಸ ರ ಸಙ್ಖ್ಯಾನೇ।

ಏಕಾದಿತೋ ದಸಸ್ಸ ದಕಾರಸ್ಸ ರಕಾರೋ ಹೋತಿ ವಾ ಸಙ್ಖ್ಯಾನೇ।

ಏಕಾರಸ, ಏಕಾದಸ, ಬಾರಸ, ದ್ವಾದಸ।

ಸಙ್ಖ್ಯಾನೇತಿ ಕಿಮತ್ಥಂ? ದ್ವಾದಸಾಯತನಾನಿ।

೩೮೨, ೨೫೯. ಅಟ್ಠಾದಿತೋ ಚ।

ಅಟ್ಠಇಚ್ಚೇವಮಾದಿತೋ ಚ ದಸಸದ್ದಸ್ಸ ದಕಾರಸ್ಸ ರಕಾರಾದೇಸೋ ಹೋತಿ ವಾ ಸಙ್ಖ್ಯಾನೇ।

ಅಟ್ಠಾರಸ, ಅಟ್ಠದಸ।

ಅಟ್ಠಾದಿತೋತಿ ಕಿಮತ್ಥಂ? ಪಞ್ಚದಸ, ಸೋಳಸ।

ಸಙ್ಖ್ಯಾನೇತಿ ಕಿಮತ್ಥಂ? ಅಟ್ಠದಸಿಕೋ।

೩೮೩, ೨೫೩. ದ್ವೇಕಟ್ಠಾನಮಾಕಾರೋ ವಾ।

ದ್ವಿ ಏಕ ಅಟ್ಠಇಚ್ಚೇತೇಸಮನ್ತೋ ಆಕಾರೋ ಹೋತಿ ವಾ ಸಙ್ಖ್ಯಾನೇ।

ದ್ವಾದಸ, ಏಕಾದಸ, ಅಟ್ಠಾರಸ।

ಸಙ್ಖ್ಯಾನೇತಿ ಕಿಮತ್ಥಂ? ದ್ವಿದನ್ತೋ, ಏಕದನ್ತೋ, ಏಕಚ್ಛನ್ನೋ, ಅಟ್ಠತ್ಥಮ್ಭೋ।

೩೮೪, ೪೦೭. ಚತುಚ್ಛೇಹೀ ಥ ಠಾ।

ಚತು ಛಇಚ್ಚೇತೇಹಿ ಥ ಠಇಚ್ಚೇತೇ ಪಚ್ಚಯಾ ಹೋನ್ತಿ ಸಙ್ಖ್ಯಾಪೂರಣತ್ಥೇ।

ಚತುತ್ಥೋ, ಛಟ್ಠೋ।

೩೮೫, ೪೦೯. ದ್ವಿತೀಹಿ ತಿಯೋ।

ದ್ವಿ ತಿಇಚ್ಚೇತೇಹಿ ತಿಯಪಚ್ಚಯೋ ಹೋತಿ ಸಙ್ಖ್ಯಾಪೂರಣತ್ಥೇ।

ದುತಿಯೋ, ತತಿಯೋ।

೩೮೬, ೪೧೦. ತಿಯೇ ದುತಾಪಿ ಚ।

ದ್ವಿ ತಿಇಚ್ಚೇತೇಸಂ ದು ತಇಚ್ಚೇತೇ ಆದೇಸಾ ಹೋನ್ತಿ ತಿಯಪಚ್ಚಯೇ ಪರೇ।

ದುತಿಯೋ, ತತಿಯೋ।

ಅಪಿಗ್ಗಹಣೇನ ಅಞ್ಞೇಸುಪಿ ದ್ವಿಇಚ್ಚೇತಸ್ಸ ದುಆದೇಸೋ ಹೋತಿ। ದುರತ್ತಂ।

ಚಗ್ಗಹಣೇನ ದ್ವಿಇಚ್ಚೇತಸ್ಸ ದಿಕಾರೋ ಹೋತಿ। ದಿರತ್ತಂ, ದಿಗುಣಂ ಸಙ್ಘಾಟಿಂ ಪಾರುಪೇತ್ವಾ।

೩೮೭, ೪೧೧. ತೇಸಮಡ್ಢೂಪಪದೇನ ಅಡ್ಢುಡ್ಢ ದಿವಡ್ಢ ದಿಯಡ್ಢಡ್ಢತಿಯಾ।

ತೇಸಂ ಚತುತ್ಥ ದುತಿಯ ತತಿಯಾನಂ ಅಡ್ಢೂಪಪದಾನಂ ಅಡ್ಢಡ್ಢುದಿವಡ್ಢ ದಿಯಡ್ಢ ಅಡ್ಢತಿಯಾದೇಸಾ ಹೋನ್ತಿ, ಅಡ್ಢೂಪಪದೇನ ಸಹನಿಪ್ಪಜ್ಜನ್ತೇ।

ಅಡ್ಢೇನ ಚತುತ್ಥೋ ಅಡ್ಢುಡ್ಢೋ, ಅಡ್ಢೇನ ದುತಿಯೋ ದಿವಡ್ಢೋ, ಅಡ್ಢೇನ ದುತಿಯೋ ದಿಯಡ್ಢೋ, ಅಡ್ಢೇನ ತತಿಯೋ ಅಡ್ಢತಿಯೋ।

೩೮೮, ೬೮. ಸರೂಪಾನಮೇಕಸೇಸ್ವಸಕಿಂ।

ಸರೂಪಾನಂ ಪದಬ್ಯಞ್ಜನಾನಂ ಏಕಸೇಸೋ ಹೋತಿ ಅಸಕಿಂ। ಪುರಿಸೋ ಚ ಪುರಿಸೋ ಚ ಪುರಿಸಾ।

ಸರೂಪಾನಮಿತಿ ಕಿಮತ್ಥಂ? ಹತ್ಥೀ ಚ ಅಸ್ಸೋ ಚ ರಥೋ ಚ ಪತ್ತಿಕೋ ಚ ಹತ್ಥಿಅಸ್ಸರಥಪತ್ತಿಕಾ,

ಅಸಕಿನ್ತಿ ಕಿಮತ್ಥಂ? ಪುರಿಸೋ।

೩೮೯, ೪೧೩. ಗಣನೇ ದಸಸ್ಸ ದ್ವಿತಿಚತುಪಞ್ಚಛಸತ್ತಅಟ್ಠನವಕಾನಂ ವೀ ತಿ ಚತ್ತಾರ ಪಞ್ಞಾ ಛ ಸತ್ತಾಸನವಾ ಯೋಸು, ಯೋನಞ್ಚೀಸಮಾಸಂ ಠಿ ರಿ ತೀ ತುತಿ।

ಗಣನೇ ದಸಸ್ಸ ದ್ವಿಕ ತಿಕ ಚತುಕ್ಕ ಪಞ್ಚಕ ಛಕ್ಕ ಸತ್ತಕಅಟ್ಠಕ ನವಕಾನಂ ಸರೂಪಾನಂ ಕತೇಕಸೇಸಾನಂ ಯಥಾಸಙ್ಖ್ಯಂ ವೀ ತಿ ಚತ್ತಾರ ಪಞ್ಞಾ ಛ ಸತ್ತ ಅಸ ನವಇಚ್ಚಾದೇಸಾ ಹೋನ್ತಿ ಅಸಕಿಂ ಯೋಸು, ಯೋನಞ್ಚ ಈಸಂ ಆಸಂ ಠಿ ರಿ ತಿ ಈತಿ ಉತಿಇಚ್ಚಾದೇಸಾ ಹೋನ್ತಿ। ಪಚ್ಛಾ ಪುನ ನಿಪ್ಪಜ್ಜನ್ತೇ।

ವೀಸಂ , ತಿಂಸಂ, ಚತ್ತಾಲೀಸಂ, ಪಞ್ಞಾಸಂ, ಸಟ್ಠಿ, ಸತ್ತರಿ, ಸತ್ತತಿ, ಅಸೀತಿ, ನವುತಿ।

ಅಸಕಿನ್ತಿ ಕಿಮತ್ಥಂ? ದಸ।

ಗಣನೇತಿ ಕಿಮತ್ಥಂ? ದಸದಸಕಾ ಪುರಿಸಾ।

೩೯೦, ೨೫೬. ಚತೂಪಪದಸ್ಸ ಲೋಪೋ ತುತ್ತರಪದಾದಿಚಸ್ಸ ಚುಚೋಪಿ ನವಾ।

ಚತೂಪಪದಸ್ಸ ಗಣನೇ ಪರಿಯಾಪನ್ನಸ್ಸ ತುಕಾರಸ್ಸ ಲೋಪೋ ಹೋತಿ, ಉತ್ತರಪದಾದಿಚಕಾರಸ್ಸ ಚುಚೋಪಿ ಆದೇಸಾ ಹೋನ್ತಿ ನವಾ।

ಚುದ್ದಸ, ಚೋದ್ದಸ, ಚತುದ್ದಸ।

ಅಪಿಗ್ಗಹಣೇನ ಅನುಪಪದಸ್ಸಾಪಿ ಪದಾದಿಚಕಾರಸ್ಸ। ಲೋಪೋಹೋತಿ ನವಾ, ಚಸ್ಸ ಚುಚೋಪಿ ಹೋನ್ತಿ। ತಾಲೀಸಂ, ಚತ್ತಾಲೀಸಂ, ಚುತ್ತಾಲೀಸಂ, ಚೋತ್ತಾಲೀಸಂ।

೩೯೧, ೪೨೩. ಯದನುಪಪನ್ನಾ ನಿಪಾತನಾ ಸಿಜ್ಝನ್ತಿ।

ಯೇ ಸದ್ದಾ ಅನಿದ್ದಿಟ್ಠಲಕ್ಖಣಾ, ಅಕ್ಖರಪದಬ್ಯಞ್ಜನತೋ, ಇತ್ಥಿಪುಮನಪುಂಸಕಲಿಙ್ಗತೋ , ನಾಮುಪಸಗ್ಗನಿಪಾತತೋ, ಅಬ್ಯಯೀಭಾವಸಮಾಸತದ್ಧಿತಾಖ್ಯಾತತೋ, ಗಣನಸಙ್ಖ್ಯಾಕಾಲಕಾರಕಪ್ಪಯೋಗಸಞ್ಞಾತೋ, ಸನ್ಧಿಪಕತಿವುದ್ಧಿಲೋಪಾಗಮವಿಕಾರವಿಪರಿತತೋ, ವಿಭತ್ತಿವಿಭಜನತೋ ಚ, ತೇ ನಿಪಾತನಾ ಸಿಜ್ಝನ್ತಿ।

೩೯೨, ೪೧೮. ದ್ವಾದಿತೋ ಕೋ’ನೇಕತ್ಥೇಚ।

ದ್ವಿಇಚ್ಚೇವಮಾದಿತೋ ಕಪಚ್ಚಯೋ ಹೋತಿ ಅನೇಕತ್ಥೇ ಚ, ನಿಪಾತನಾ ಸಿಜ್ಝನ್ತಿ।

ಸತಸ್ಸ ದ್ವಿಕಂ ದ್ವಿಸತಂ, ಸತಸ್ಸ ತಿಕಂ ತಿಸತಂ, ಸತಸ್ಸ ಚತುಕ್ಕಂ ಚತುಸತಂ, ಸತಸ್ಸ ಪಞ್ಚಕಂ ಪಞ್ಚಸತಂ, ಸತಸ್ಸ ಛಕ್ಕಂ ಛಸತಂ, ಸತಸ್ಸ ಸತ್ತಕಂ ಸತ್ತಸತಂ, ಸತಸ್ಸ ಅಟ್ಠಕಂ ಅಟ್ಠಸತಂ, ಸತಸ್ಸ ನವಕಂ ನವಸತಂ, ಸತಸ್ಸ ದಸಕಂ ದಸಸತಂ, ಸಹಸ್ಸಂ ಹೋತಿ।

೩೯೩, ೪೧೫. ದಸದಸಕಂ ಸತಂ ದಸಕಾನಂ ಸತಂ ಸಹಸ್ಸಞ್ಚ ಯೋಮ್ಹಿ।

ಗಣನೇ ಪರಿಯಾಪನ್ನಸ್ಸ ದಸದಸಕಸ್ಸ ಸತಂ ಹೋತಿ, ಸತದಸಕಸ್ಸ ಸಹಸ್ಸಂ ಹೋತಿ ಯೋಮ್ಹಿ ಪರೇ।

ಸತಂ, ಸಹಸ್ಸಂ।

ದ್ವಿಕಾದೀನಂ ತದುತ್ತರಪದಾನಞ್ಚ ನಿಪ್ಪಜ್ಜನ್ತೇ ಯಥಾಸಙ್ಖ್ಯಂ। ಸತಸ್ಸ ದ್ವಿಕಂ (ತದಿದಂ ಹೋತಿ) ದ್ವಿಸತಂ, ಏವಂ ತಿಸತಂ, ಚತುಸತಂ , ಪಞ್ಚಸತಂ, ಛಸತಂ, ಸತ್ತಸತಂ, ಅಟ್ಠಸತಂ, ನವಸತಂ, ದಸಸತಂ, ಸಹಸ್ಸಂ ಹೋತಿ।

೩೯೪, ೪೧೬. ಯಾವ ತದುತ್ತರಿ ದಸಗುಣಿತಞ್ಚ।

ಯಾವ ತಾಸಂ ಸಙ್ಖ್ಯಾನಂ ಉತ್ತರಿ ದಸಗುಣಿತಞ್ಚ ಕಾತಬ್ಬಂ।

ತಂ ಯಥಾ? ದಸಸ್ಸ ಗಣನಸ್ಸ ದಸಗುಣಿತಂ ಕತ್ವಾ ಸತಂ ಹೋತಿ, ಸತಸ್ಸ ದಸಗುಣಿತಂ ಕತ್ವಾ ಸಹಸ್ಸಂ ಹೋತಿ, ಸಹಸ್ಸಸ್ಸ ದಸಗುಣಿತಂ ಕತ್ವಾ ದಸಸಹಸ್ಸಂ ಹೋತಿ, ದಸಸಹಸ್ಸಸ್ಸ ದಸಗುಣಿತಂ ಕತ್ವಾಸತಸಹಸ್ಸಂ ಹೋತಿ, ಸತಸಹಸ್ಸಸ್ಸ ದಸಗುಣಿತಂ ಕತ್ವಾದಸಸತಸಹಸ್ಸಂ ಹೋತಿ, ದಸಸತಸಹಸ್ಸಸ್ಸದಸಗುಣಿತಂ ಕತ್ವಾ ಕೋಟಿ ಹೋತಿ, ಕೋಟಿಸತಸಹಸ್ಸಸ್ಸ ಸತಗುಣಿತಂ ಕತ್ವಾ ಪಕೋಟಿ ಹೋತಿ। ಏವಂ ಸೇಸಾಪಿ ಯೋಜೇತಬ್ಬಾ।

ಚಗ್ಗಹಣಂ ವಿಸೇಸನತ್ಥಂ।

೩೯೫, ೪೧೭. ಸಕನಾಮೇಹಿ।

ಯಾಸಂ ಪನ ಸಙ್ಖ್ಯಾನಂ ಅನಿದ್ದಿಟ್ಠನಾಮಧೇಯ್ಯಾನಂ ಸಕೇಹಿ ಸಕೇಹಿ ನಾಮೇಹಿ ನಿಪ್ಪಜ್ಜನ್ತೇ।

ಸತಸಹಸ್ಸಾನಂ ಸತಂ ಕೋಟಿ, ಕೋಟಿಸತಸಹಸ್ಸಾನಂ ಸತಂ ಪಕೋಟಿ, ಪಕೋಟಿಸತಸಹಸ್ಸಾನಂ ಸತಂ ಕೋಟಿಪಕೋಟಿ , ಕೋಟಿಪಕೋಟಿಸತಸಹಸ್ಸಾನಂ ಸತಂ ನಹುತಂ, ನಹುತಸತಸಹಸ್ಸಾನಂ ಸತಂ ನಿನ್ನಹುತಂ, ನಿನ್ನಹುತಸತಸಹಸ್ಸಾನಂ ಸತಂ ಅಕ್ಖೋಭಿಣೀ। ತಥಾ ಬಿನ್ದು, ಅಬ್ಬುದಂ, ನಿರಬ್ಬುದಂ, ಅಹಹಂ, ಅಬಬಂ, ಅಟಟಂ, ಸೋಗನ್ಧಿಕಂ, ಉಪ್ಪಲಂ, ಕುಮುದಂ, ಪದುಮಂ, ಪುಣ್ಡರಿಕಂ, ಕಥಾನಂ, ಮಹಾಕಥಾನಂ, ಅಸಙ್ಖ್ಯೇಯ್ಯಂ।

೩೯೬, ೩೬೩. ತೇಸಂ ಣೋ ಲೋಪಂ।

ತೇಸಂ ಪಚ್ಚಯಾನಂ ಣೋ ಲೋಪಮಾಪಜ್ಜತೇ।

ಗೋತಮಸ್ಸ ಅಪಚ್ಚಂ ಗೋತಮೋ। ಏವಂ ವಾಸಿಟ್ಠೋ। ವೇನತೇಯ್ಯೋ, ಆಲಸ್ಯಂ, ಆರೋಗ್ಯಂ।

೩೯೭, ೪೨೦. ವಿಭಾಗೇ ಧಾ ಚ।

ವಿಭಾಗತ್ಥೇ ಚ ಧಾಪಚ್ಚಯೋ ಹೋತಿ।

ಏಕೇನ ವಿಭಾಗೇನ ಏಕಧಾ। ಏವಂ ದ್ವಿಧಾ, ತಿಧಾ, ಚತುಧಾ, ಪಞ್ಚಧಾ, ಛಧಾ।

ಚೇತಿ ಕಿಮತ್ಥಂ? ಸೋಪಚ್ಚಯೋ ಹೋತಿ। ಸುತ್ತಸೋ, ಬ್ಯಞ್ಜನಸೋ, ಪದಸೋ।

೩೯೮, ೪೨೧. ಸಬ್ಬನಾಮೇಹಿ ಪಕಾರವಚನೇ ತು ಥಾ।

ಸಬ್ಬನಾಮೇಹಿ ಪಕಾರವಚನತ್ಥೇ ಥಾಪಚ್ಚಯೋ ಹೋತಿ।

ಸೋ ಪಕಾರೋ ತಥಾ, ತಂ ಪಕಾರಂ ತಥಾ, ತೇನ ಪಕಾರೇನ ತಥಾ, ತಸ್ಸ ಪಕಾರಸ್ಸ ತಥಾ, ತಸ್ಮಾ ಪಕಾರಾ ತಥಾ, ತಸ್ಸ ಪಕಾರಸ್ಸ ತಥಾ, ತಸ್ಮಿಂ ಪಕಾರೇ ತಥಾ। ಏವಂ ಯಥಾ, ಸಬ್ಬಥಾ, ಅಞ್ಞಥಾ, ಇತರಥಾ।

ತುಗ್ಗಹಣಂ ಕಿಮತ್ಥಂ? ತತ್ಥಾಪಚ್ಚಯೋ ಹೋತಿ। ಸೋ ಪಕಾರೋ ತಥತ್ಥಾ। ಏವಂ ಯಥತ್ಥಾ। ಸಬ್ಬಥತ್ಥಾ, ಅಞ್ಞಥತ್ಥಾ, ಇತರಥತ್ಥಾ।

೩೯೯, ೪೨೨. ಕಿಮಿಮೇಹಿ ಥಂ।

ಕಿಂ ಇಮಇಚ್ಚೇತೇಹಿ ಥಂಪಚ್ಚಯೋ ಹೋತಿ ಪಕಾರವಚನತ್ಥೇ।

ಕೋ ಪಕಾರೋ ಕಥಂ, ಕಂ ಪಕಾರಂ ಕಥಂ, ಕೇನ ಪಕಾರೇನ ಕಥಂ, ಕಸ್ಸ ಪಕಾರಸ್ಸ ಕಥಂ, ಕಸ್ಮಾ ಪಕಾರಾ ಕಥಂ। ಕಸ್ಸ ಪಕಾರಸ್ಸ ಕಥಂ, ಕಸ್ಮಿಂ ಪಕಾರೇ ಕಥಂ, ಅಯಂ ಪಕಾರೋ ಇತ್ಥಂ, ಇಮಂ ಪಕಾರಂ ಇತ್ಥಂ, ಇಮಿನಾ ಪಕಾರೇನ ಇತ್ಥಂ, ಇಮಸ್ಸ ಪಕಾರಸ್ಸ ಇತ್ಥಂ, ಇಮಸ್ಮಾ ಪಕಾರಾ ಇತ್ಥಂ, ಇಮಸ್ಸ ಪಕಾರಸ್ಸ ಇತ್ಥಂ, ಇಮಸ್ಮಿಂ ಪಕಾರೇ ಇತ್ಥಂ।

೪೦೦, ೩೬೪. ವುದ್ಧಾದಿಸರಸ್ಸ ವಾ’ಸಂಯೋಗನ್ತಸ್ಸ ಸಣೇ ಚ।

ಆದಿಸರಸ್ಸ ವಾ ಅಸಂಯೋಗನ್ತಸ್ಸ ಆದಿಬ್ಯಞ್ಜನಸ್ಸ ವಾ ಸರಸ್ಸ ವುದ್ಧಿ ಹೋತಿ ಸಣಕಾರಕೇ ಪಚ್ಚಯೇ ಪರೇ।

ಆಭಿಧಮ್ಮಿಕೋ, ವೇನತೇಯ್ಯೋ, ವಾಸಿಟ್ಠೋ, ಆಲಸ್ಯಂ, ಆರೋಗ್ಯಂ।

ಅಸಂಯೋಗನ್ತಸ್ಸೇತಿ ಕಿಮತ್ಥಂ? ಭಗ್ಗವೋ, ಮನ್ತೇಯ್ಯೋ, ಕುನ್ತೇಯ್ಯೋ।

೪೦೧, ೩೭೫. ಮಾಯೂನಮಾಗಮೋ ಠಾನೇ।

ಇಉಇಚ್ಚೇತೇಸಂ ಆದಿಭೂತಾನಂ ಮಾ ವುದ್ಧಿ ಹೋತಿ। ತೇಸು ಚ ಏ ಓ ವುದ್ಧಾಗಮೋ ಹೋತಿ ಠಾನೇ।

ಬ್ಯಾಕರಣಮಧೀತೇ ವೇಯ್ಯಾಕರಣಿಕೋ, ನ್ಯಾಯಮಧೀತೇ ನೇಯ್ಯಾಯಿಕೋ, ಬ್ಯಾವಚ್ಛಸ್ಸ ಅಪಚ್ಚಂ ವೇಯ್ಯಾವಚ್ಛೋ, ದ್ವಾರೇ ನಿಯುತ್ತೋ ದೋವಾರಿಕೋ।

೪೦೨, ೩೭೭. ಆತ್ತಞ್ಚ ।

ಇಉಇಚ್ಚೇತೇಸಂ ಆತ್ತಞ್ಚ ಹೋತಿ, ರಿಕಾರಾಗಮೋ ಚ ಠಾನೇ।

ಇಸಿಸ್ಸ ಭಾವೋ ಆರಿಸ್ಯಂ, ಇಣಸ್ಸ ಭಾವೋ ಆಣ್ಯಂ, ಉಸಭಸ್ಸ ಭಾವೋ ಆಸಭಂ, ಉಜುನೋ ಭಾವೋ ಅಜ್ಜವಂ, ಇಚ್ಚೇವಮಾದೀ ಯೋಜೇತಬ್ಬಾ।

ಯೂನಮಿತಿ ಕಿಮತ್ಥಂ? ಅಪಾಯೇಸು ಜಾತೋ ಆಪಾಯಿ ಕೋ।

ಠಾನೇತಿ ಕಿಮತ್ಥಂ? ವೇಮತಿಕೋ, ಓಪನಯಿಕೋ, ಓಪಮಾಯಿಕೋ, ಓಪಾಯಿಕೋ।

೪೦೩, ೩೫೪. ಕ್ವಚಾದಿಮಜ್ಝುತ್ತರಾನಂ ದೀಘರಸ್ಸಾ ಪಚ್ಚಯೇಸು ಚ।

ಕ್ವಚಿ ಆದಿಮಜ್ಝಉತ್ತರಇಚ್ಚೇತೇಸಂ ದೀಘರಸ್ಸಾ ಹೋನ್ತಿ ಪಚ್ಚಯೇಸು ಚ ಅಪಚ್ಚಯೇಸು ಚ।

ಆದಿದೀಘೋ ತಾವ – ಪಾಕಾರೋ, ನೀವಾರೋ, ಪಾಸಾದೋ, ಪಾಕಟೋ, ಪಾತಿಮೋಕ್ಖೋ, ಪಾಟಿಕಙ್ಖೋ ಇಚ್ಚೇವಮಾದಿ।

ಮಜ್ಝೇದೀಘೋ ತಾವ – ಅಙ್ಗಮಾಗಧಿಕೋ, ಓರಬ್ಭಮಾಗವೀಕೋ ಇಚ್ಚೇವಮಾದಿ।

ಉತ್ತರದೀಘೋ ತಾವ – ಖನ್ತೀ ಪರಮಂ ತಪೋ ತಿತಿಕ್ಖಾ, ಅಞ್ಜನಾ ಗಿರಿ, ಕೋಟರಾ ವನಂ, ಅಙ್ಗುಲೀ ಇಚ್ಚೇವಮಾದಿ।

ಆದಿರಸ್ಸೋ ತಾವ – ಪಗೇವ ಇಚ್ಚೇವಮಾದಿ।

ಮಜ್ಝೇರಸ್ಸೋ ತಾವ – ಸುಮೇಧಸೋ ಸುವಣ್ಣಧರೇಹಿ ಇಚ್ಚೇವಮಾದಿ।

ಉತ್ತರರಸ್ಸೋ ತಾವ – ಭೋವಾದಿ ನಾಮ ಸೋ ಹೋತಿ, ಯಥಾಭಾವಿ ಗುಣೇನ ಸೋ ಇಚ್ಚೇವಮಾದಿ। ಅಞ್ಞೇಪಿ ಯಥಾಜಿನವಚನಾನುಪರೋಧೇನ ಯೋಜೇತಬ್ಬಾ।

ಚಗ್ಗಹಣೇನ ಅಪಚ್ಚಯೇಸು ಚಾತಿ ಅತ್ಥಂ ಸಮುಚ್ಚೇತಿ,

೪೦೪, ೩೭೦. ತೇಸು ವುದ್ಧಿಲೋಪಾಗಮವಿಕಾರವಿಪರೀತಾದೇಸಾ ಚ।

ತೇಸು ಆದಿಮಜ್ಝುತ್ತರೇಸು ಯಥಾಜಿನವಚನಾನುಪರೋಧೇನ ಕ್ವಚಿ ವುದ್ಧಿ ಹೋತಿ, ಕ್ವಚಿ ಲೋಪೋ ಹೋತಿ, ಕ್ವಚಿ ಆಗಮೋ ಹೋತಿ, ಕ್ವಚಿ ವಿಕಾರೋ ಹೋತಿ, ಕ್ವಚಿ ವಿಪರೀತೋ ಹೋತಿ, ಕ್ವಚಿ ಆದೇಸೋ ಹೋತಿ।

ಆದಿವುದ್ಧಿ ತಾವ – ಆಭಿಧಮ್ಮಿಕೋ, ವೇನತೇಯ್ಯೋ ಇಚ್ಚೇವಮಾದಿ।

ಮಜ್ಝೇವುದ್ಧಿ ತಾವ – ಸುಖಸೇಯ್ಯಂ, ಸುಖಕಾರಿ ದಾನಂ, ಸುಖಕಾರಿ ಸೀಲಂ ಇಚ್ಚೇವಮಾದಿ।

ಉತ್ತರವುದ್ಧಿ ತಾವ – ಕಾಲಿಙ್ಗೋ, ಮಾಗಧಿಕೋ, ಪಚ್ಚಕ್ಖಧಮ್ಮಾ ಇಚ್ಚೇವಮಾದಿ।

ಆದಿಲೋಪೋ ತಾವ – ತಾಲೀಸಂ ಇಚ್ಚೇವಮಾದಿ।

ಮಜ್ಝೇಲೋಪೋ ತಾವ – ಕತ್ತುಕಾಮೋ, ಕುಮ್ಭಕಾರಪುತ್ತೋ, ವೇದಲ್ಲಂ ಇಚ್ಚೇವಮಾದಿ।

ಉತ್ತರಲೋಪೋ ತಾವ – ಭಿಕ್ಖು, ಭಿಕ್ಖುನೀ ಇಚ್ಚೇವಮಾದಿ।

ಆದಿಆಗಮೋ ತಾವ – ವುತ್ತೋ ಭಗವತಾ ಇಚ್ಚೇವಮಾದಿ।

ಮಜ್ಝೇಆಗಮೋ ತಾವ – ಸಸೀಲವಾ, ಸಪಞ್ಞವಾಇಚ್ಚೇವಮಾದಿ।

ಉತ್ತರಆಗಮೋ ತಾವ – ವೇದಲ್ಲಂ ಇಚ್ಚೇವಮಾದಿ।

ಆದಿವಿಕಾರೋ ತಾವ – ಆರಿಸ್ಯಂ, ಆಣ್ಯಂ, ಆಸಭಂ, ಅಜ್ಜವಂ ಇಚ್ಚೇವಮಾದಿ।

ಮಜ್ಝೇವಿಕಾರೋ ತಾವ – ವರಾರಿಸ್ಯಂ, ಪರಾರಿಸ್ಯಂ ಇಚ್ಚೇವಮಾದಿ।

ಉತ್ತರವಿಕಾರೋ ತಾವ – ಯಾನಿ, ತಾನಿ, ಸುಖಾನಿ ಇಚ್ಚೇವಮಾದಿ।

ಆದಿವಿಪರೀತೋ ತಾವ – ಉಗ್ಗತೇ ಸೂರಿಯೇ ಉಗ್ಗಚ್ಛತಿ ಇಚ್ಚೇವಮಾದಿ।

ಮಜ್ಝೇವಿಪರೀತೋ ತಾವ – ಸಮುಗ್ಗಚ್ಛತಿ, ಸಮುಗ್ಗತೇ ಸೂರಿಯೇ ಇಚ್ಚೇವಮಾದಿ।

ಉತ್ತರವಿಪರೀತೋ ತಾವ – ದಿಗು, ದಿಗುಣಂ ಇಚ್ಚೇವಮಾದಿ।

ಆದಿಆದೇಸೋ ತಾವ – ಯೂನಂ ಇಚ್ಚೇವಮಾದಿ।

ಮಜ್ಝೇಆದೇಸೋ ತಾವ – ನ್ಯಾಯೋಗಾ ಇಚ್ಚೇವಮಾದಿ।

ಉತ್ತರಆದೇಸೋ ತಾವ – ಸಬ್ಬಸೇಯ್ಯೋ, ಸಬ್ಬಸೇಟ್ಠೋ, ಚಿತ್ತಂ ಇಚ್ಚೇವಮಾದಿ। ಏವಂ ಯಥಾಜಿನವಚನಾನುಪರೋಧೇನ ಸಬ್ಬತ್ಥ ಯೋಜೇತಬ್ಬಾ।

೪೦೫, ೩೬೫. ಅಯುವಣ್ಣಾನಞ್ಚಾಯೋ ವುದ್ಧಿ।

ಅ ಇತಿ ಅಕಾರೋ, ಇ ಈಇತಿ ಇವಣ್ಣೋ, ಉ ಊಇತಿ ಉವಣ್ಣೋ, ತೇಸಂ ಅಕಾರಇವಣ್ಣುವಣ್ಣಾನಂ ಆ ಏ ಓವುದ್ಧಿಯೋ ಹೋನ್ತಿ ಯಥಾಸಙ್ಖ್ಯಂ, ಆ ಈ ಊವುದ್ಧಿ ಚ।

ಆಭಿಧಮ್ಮಿಕೋ, ವೇನತೇಯ್ಯೋ, ಓಳುಮ್ಪಿಕೋ।

ಪುನ ವುದ್ಧಿಗ್ಗಹಣಂ ಕಿಮತ್ಥಂ? ಉತ್ತರಪದವುದ್ಧಿಭಾವತ್ಥಂ, ಅಙ್ಗಮಗಧೇಹಿ ಆಗತಾತಿ ಅಙ್ಗಮಾಗಧಿಕಾ। ನಿಗಮಜನಪದೇಸು ಜಾತಾತಿ ನೇಗಮಜಾನಪದಾ। ಪುರಿಮಜನಪದೇಸು ಜಾತಾತಿ ಪೋರಿಮಜಾನಪದಾ। ಸತ್ತಾಹೇ ನಿಯುತ್ತೋತಿ ಸತ್ತಾಹಿಕಾ, ಚತುವಿಜ್ಜೇ ನಿಯುತ್ತೋತಿ ಚಾತುವಿಜ್ಜಿಕಾ। ಇಚ್ಚೇವಮಾದೀ ಯೋಜೇತಬ್ಬಾ।

ವುದ್ಧಿಇಚ್ಚನೇನ ಕ್ವತ್ಥೋ? ವುದ್ಧಾದಿಸರಸ್ಸ ವಾ’ಸಂಯೋಗನ್ತಸ್ಸ ಸಣೇ ಚ।

ಇತಿ ನಾಮಕಪ್ಪೇ ತದ್ಧಿತಕಪ್ಪೋ ಅಟ್ಠಮೋ ಕಣ್ಡೋ।

ತದ್ಧಿತಕಪ್ಪೋ ನಿಟ್ಠಿತೋ।