೬. ಆಖ್ಯಾತಕಪ್ಪ
ಪಠಮಕಣ್ಡ
(ಕ)
ಆಖ್ಯಾತಸಾಗರಮಥಜ್ಜತನೀತರಙ್ಗಂ
ಧಾತುಜ್ಜಲಂ ವಿಕರಣಾಗಮಕಾಲಮೀನಂ।
ಲೋಪಾನುಬನ್ಧರಿಯಮತ್ಥವಿಭಾಗತೀರಂ,
ಧೀರಾ ತರನ್ತಿ ಕವಿನೋ ಪುಥುಬುದ್ಧಿನಾವಾ॥
(ಖ)
ವಿಚಿತ್ತಸಙ್ಖಾರಪರಿಕ್ಖಿತಂ ಇಮಂ,
ಆಖ್ಯಾತಸದ್ದಂ ವಿಪುಲಂ ಅಸೇಸತೋ।
ಪಣಮ್ಯ ಸಮ್ಬುದ್ಧಮನನ್ತಗೋಚರಂ,
ಸುಗೋಚರಂ ಯಂ ವದತೋ ಸುಣಾಥ ಮೇ॥
(ಗ)
ಅಧಿಕಾರೇ ಮಙ್ಗಲೇ ಚೇವ, ನಿಪ್ಫನ್ನೇ ಚಾವಧಾರಣೇ।
ಅನನ್ತರೇ ಚ ಪಾದಾನೇ, ಅಥಸದ್ದೋ ಪವತ್ತತಿ॥
೪೧೬, ೪೨೯. ಅಥ ಪುಬ್ಬಾನಿ ವಿಭತ್ತೀನಂ ಛ ಪರಸ್ಸಪದಾನಿ।
ಅಥ ಸಬ್ಬಾಸಂ ವಿಭತ್ತೀನಂ ಯಾನಿ ಯಾನಿ ಪುಬ್ಬಕಾನಿ ಛ ಪದಾನಿ, ತಾನಿ ತಾನಿ ಪರಸ್ಸಪದಸಞ್ಞಾನಿ ಹೋನ್ತಿ।
ತಂ ಯಥಾ? ತಿ ಅನ್ತಿ, ಸಿ ಥ, ಮಿ ಮ।
ಪರಸ್ಸಪದಮಿಚ್ಚನೇನ ಕ್ವತ್ಥೋ? ಕತ್ತರಿ ಪರಸ್ಸಪದಂ।
೪೦೭, ೪೩೯. ಪರಾಣ್ಯತ್ತನೋಪದಾನಿ
ಸಬ್ಬಾಸಂ ವಿಭತ್ತೀನಂ ಯಾನಿ ಯಾನಿ ಪರಾನಿ ಛ ಪದಾನಿ। ತಾನಿ ತಾನಿ ಅತ್ತನೋಪದಸಞ್ಞಾನಿ ಹೋನ್ತಿ।
ತಂ ಯಥಾ? ತೇ ಅನ್ತೇ, ಸೇ ವ್ಹೇ, ಏ ಮ್ಹೇ।
ಅತ್ತನೋಪದಮಿಚ್ಚನೇನ ಕ್ವತ್ಥೋ? ಅತ್ತನೋಪದಾನಿ ಭಾವೇ ಚ ಕಮ್ಮನಿ।
೪೦೮, ೪೩೧. ದ್ವೇ ದ್ವೇ ಪಠಮ ಮಜ್ಝಿಮುತ್ತಮಪುರಿಸಾ।
ತಾಸಂ ಸಬ್ಬಾಸಂ ವಿಭತ್ತೀನಂ ಪರಸ್ಸಪದಾನಂ, ಅತ್ತನೋಪದಾನಞ್ಚ ದ್ವೇ ದ್ವೇ ಪದಾನಿ ಪಠಮಮಜ್ಝಿಮುತ್ತಮಪುರಿಸಸಞ್ಞಾನಿ ಹೋನ್ತಿ।
ತಂ ಯಥಾ? ತಿ ಅನ್ತಿ ಇತಿ ಪಠಮಪುರಿಸಾ, ಸಿ ಥ ಇತಿ ಮಜ್ಝಿಮಪುರಿಸಾ, ಮಿ ಮ ಇತಿ ಉತ್ತಮಪುರಿಸಾ। ಅತ್ತನೋಪದಾನಮ್ಪಿ ತೇ ಅನ್ತೇ ಇತಿ ಪಠಮಪುರಿಸಾ, ಸೇ ವ್ಹೇ ಇತಿ ಮಜ್ಝಿಮಪುರಿಸಾ, ಏ ಮ್ಹೇ ಇತಿ ಉತ್ತಮಪುರಿಸಾ। ಏವಂ ಸಬ್ಬತ್ಥ।
ಪಠಮಮಜ್ಝಿಮುತ್ತಮಪುರಿಸಮಿಚ್ಚನೇನ ಕ್ವತ್ಥೋ? ನಾಮಮ್ಹಿ ಪಯುಜ್ಜಮಾನೇಪಿ ತುಲ್ಯಾಧಿಕರಣೇ ಪಠಮೋ, ತುಮ್ಹೇ ಮಜ್ಝಿಮೋ, ಅಮ್ಹೇ ಉತ್ತಮೋ।
೪೦೯, ೪೪೧. ಸಬ್ಬೇಸಮೇಕಾಭಿಧಾನೇ ಪರೋ ಪುರಿಸೋ।
ಸಬ್ಬೇಸಂ ತಿಣ್ಣಂ ಪಠಮಮಜ್ಝಿಮುತ್ತಮ ಪುರಿಸಾನಂ ಏಕಾಭಿಧಾನೇ ಪರೋ ಪುರಿಸೋ ಗಹೇತಬ್ಬೋ।
ಸೋ ತುಮ್ಹೇ ಪಠಥ। ಸೋ ಚ ಪಚತಿ, ತ್ವಞ್ಚ ಪಚಸಿ। ತುಮ್ಹೇ ಪಚಥ। ಏವಂ ಸೇಸಾಸು ವಿಭತ್ತೀಸು ಪರೋ ಪುರಿಸೋ ಯೋಜೇತಬ್ಬೋ।
೪೧೦, ೪೩೨. ನಾಮಮ್ಹಿ ಪಯುಜ್ಜಮಾನೇಪಿ ತುಲ್ಯಾಧಿಕರಣೇ ಪಠಮೋ।
ನಾಮಮ್ಹಿ ಪಯುಜ್ಜಮಾನೇಪಿ ಅಪ್ಪಯುಜ್ಜಮಾನೇಪಿ ತುಲ್ಯಾಧಿಕರಣೇ ಪಠಮಪುರಿಸೋ ಹೋತಿ।
ಸೋ ಗಚ್ಛತಿ, ತೇ ಗಚ್ಛನ್ತಿ।
ಅಪ್ಪಯುಜ್ಜಮಾನೇಪಿ – ಗಚ್ಛತಿ, ಗಚ್ಛನ್ತಿ।
ತುಲ್ಯಾಧಿಕರಣೇತಿ ಕಿಮತ್ಥಂ? ತೇನ ಹಞ್ಞಸೇ ತ್ವಂ ದೇವದತ್ತೇನ।
೪೧೧, ೪೩೬. ತುಮ್ಹೇ ಮಜ್ಝಿಮೋ।
ತುಮ್ಹೇ ಪಯುಜ್ಜಮಾನೇಪಿ ಅಪ್ಪಯುಜ್ಜಮಾನೇಪಿ ತುಲ್ಯಾಧಿಕರಣೇ ಮಜ್ಝಿಮಪುರಿಸೋ ಹೋತಿ।
ತ್ವಂ ಯಾಸಿ, ತುಮ್ಹೇ ಯಾಥ।
ಅಪ್ಪಯುಜ್ಜಮಾನೇಪಿ – ಯಾಸಿ, ಯಾಥ।
ತುಲ್ಯಾಧಿಕರಣೇತಿ ಕಿಮತ್ಥಂ? ತಯಾ ಪಚ್ಚತೇ ಓದನೋ।
೪೧೨, ೪೩೭. ಅಮ್ಹೇ ಉತ್ತಮೋ।
ಅಮ್ಹೇ ಪಯುಜ್ಜಮಾನೇಪಿ ಅಪ್ಪಯುಜ್ಜಮಾನೇಪಿ ತುಲ್ಯಾಧಿಕರಣೇ ಉತ್ತಮಪುರಿಸೋ ಹೋತಿ।
ಅಹಂ ಯಜಾಮಿ, ಮಯಂ ಯಜಾಮ।
ಅಪ್ಪಯುಜ್ಜಮಾನೇಪಿ – ಯಜಾಮಿ, ಯಜಾಮ।
ತುಲ್ಯಾಧಿಕರಣೇತಿ ಕಿಮತ್ಥಂ? ಮಯಾ ಇಜ್ಜತೇ ಬುದ್ಧೋ।
೪೧೩, ೪೨೭. ಕಾಲೇ।
‘‘ಕಾಲೇ’’ ಇಚ್ಚೇತಂ ಅಧಿಕಾರತ್ಥಂ ವೇದಿತಬ್ಬಂ।
೪೧೪, ೪೨೮. ವತ್ತಮಾನಾ ಪಚ್ಚುಪ್ಪನ್ನೇ।
ಪಚ್ಚುಪ್ಪನ್ನೇ ಕಾಲೇ ವತ್ತಮಾನಾವಿಭತ್ತಿ ಹೋತಿ।
ಪಾಟಲಿಪುತ್ತಂ ಗಚ್ಛತಿ, ಸಾವತ್ಥಿಂ ಪವಿಸತಿ।
೪೧೫, ೪೫೧. ಆಣತ್ಯಾ ಸಿಟ್ಠೇ’ನುತ್ತಕಾಲೇ ಪಞ್ಚಮೀ।
ಆಣತ್ಯತ್ಥೇ ಚ ಆಸೀಸತ್ಥೇ ಚ ಅನುತ್ತಕಾಲೇ ಪಞ್ಚಮೀ ವಿಭತ್ತಿ ಹೋತಿ।
ಕರೋತು ಕುಸಲಂ, ಸುಖಂ ತೇ ಹೋತು।
೪೧೬, ೪೫೪. ಅನುಮತಿಪರಿಕಪ್ಪತ್ಥೇಸು ಸತ್ತಮೀ।
ಅನುಮತ್ಯತ್ಥೇ ಚ ಪರಿಕಪ್ಪತ್ಥೇ ಚ ಅನುತ್ತಕಾಲೇ ಸತ್ತಮೀ ವಿಭತ್ತಿ ಹೋತಿ।
ತ್ವಂ
೪೧೭, ೪೬೦. ಅಪಚ್ಚಕ್ಖೇ ಪರೋಕ್ಖಾತೀತೇ।
ಅಪಚ್ಚಕ್ಖೇ ಅತೀತೇ ಕಾಲೇ ಪರೋಕ್ಖಾವಿಭತ್ತಿ ಹೋತಿ।
ಸುಪಿನೇ ಕಿಲಮಾಹ, ಏವಂ ಕಿಲ ಪೋರಾಣಾಹು।
೪೧೮, ೪೫೬. ಹಿಯ್ಯೋಪಭುತಿ ಪಚ್ಚಕ್ಖೇ ಹಿಯ್ಯತ್ತನೀ।
ಹಿಯ್ಯೋಪಭುತಿ ಅತೀತೇ ಕಾಲೇ ಪಚ್ಚಕ್ಖೇ ವಾ ಅಪಚ್ಚಕ್ಖೇ ವಾ ಹಿಯ್ಯತ್ತನೀ ವಿಭತ್ತಿ ಹೋತಿ।
ಸೋ ಅಗಮಾ ಮಗ್ಗಂ, ತೇ ಅಗಮೂ ಮಗ್ಗಂ।
೪೧೯, ೪೬೯. ಸಮೀಪೇ’ಜ್ಜತನೀ।
ಅಜ್ಜಪ್ಪಭುತಿ ಅತೀತೇ ಕಾಲೇ ಪಚ್ಚಕ್ಖೇ ವಾ ಅಪಚ್ಚಕ್ಖೇ ವಾ ಸಮೀಪೇ ಅಜ್ಜತನೀವಿಭತ್ತಿ ಹೋತಿ।
ಸೋ ಮಗ್ಗಂ ಅಗಮೀ, ತೇ ಮಗ್ಗಂ ಅಗಮುಂ।
೪೨೦, ೪೭೧. ಮಾಯೋಗೇ ಸಬ್ಬಕಾಲೇ ಚ।
ಹಿಯ್ಯತ್ತನೀಅಜ್ಜತನೀಇಚ್ಚೇತಾ ವಿಭತ್ತಿಯೋ ಯದಾ ಮಾಯೋಗಾ, ತದಾ ಸಬ್ಬಕಾಲೇ ಚ ಹೋನ್ತಿ।
ಮಾ ಗಮಾ, ಮಾ ವಚಾ, ಮಾ ಗಮೀ, ಮಾ ವಚೀ।
ಚಗ್ಗಹಣೇನ
೪೨೧, ೪೭೩. ಅನಾಗತೇ ಭವಿಸ್ಸನ್ತೀ।
ಅನಾಗತೇ ಕಾಲೇ ಭವಿಸ್ಸನ್ತೀ ವಿಭತ್ತಿ ಹೋತಿ।
ಸೋ ಗಚ್ಛಿಸ್ಸತಿ, ಕರಿಸ್ಸತಿ। ತೇ ಗಚ್ಛಿಸ್ಸನ್ತಿ, ಕರಿಸ್ಸನ್ತಿ।
೪೨೨, ೪೭೫. ಕ್ರಿಯಾತಿಪನ್ನೇ’ತೀತೇ ಕಾಲಾತಿಪತ್ತಿ।
ಕ್ರಿಯಾತಿಪನ್ನಮತ್ತೇ ಅತೀತೇ ಕಾಲೇ ಕಾಲಾತಿಪತ್ತಿ ವಿಭತ್ತಿ ಹೋತಿ।
ಸೋ ಚೇ ತಂ ಯಾನಂ ಅಲಭಿಸ್ಸಾ, ಅಗಚ್ಛಿಸ್ಸಾ। ತೇ ಚೇ ತಂ ಯಾನಂ ಅಲಭಿಸ್ಸಂಸು, ಅಗಚ್ಛಿಸ್ಸಂಸು।
೪೨೩, ೪೨೬. ವತ್ತಮಾನಾ ತಿ ಅನ್ತಿ, ಸಿ ಥ, ಮಿ ಮ, ತೇ ಅನ್ತೇ, ಸೇ ವ್ಹೇ, ಏ ಮ್ಹೇ।
ವತ್ತಮಾನಾ ಇಚ್ಚೇಸಾ ಸಞ್ಞಾ ಹೋತಿ ತಿ ಅನ್ತಿ, ಸಿ ಥ, ಮಿ ಮ, ತೇ ಅನ್ತೇ, ಸೇ ವ್ಹೇ, ಏ ಮ್ಹೇ ಇಚ್ಚೇತೇಸಂ ದ್ವಾದಸನ್ನಂ ಪದಾನಂ।
ವತ್ತಮಾನಾ ಇಚ್ಚನೇನ ಕ್ವತ್ಥೋ? ವತ್ತಮಾನಾ ಪಚ್ಚುಪ್ಪನ್ನೇ।
೪೨೪, ೪೫೦. ಪಞ್ಚಮೀ ತು ಅನ್ತು, ಹಿಥ, ಮಿಮ, ತಂ ಅನ್ತಂ, ಸ್ಸು ವ್ಹೋ, ಏ ಆಮಸೇ।
ಪಞ್ಚಮೀಇಚ್ಚೇಸಾ ದ್ವಾದಸನ್ನಂ ಪದಾನಂ।
ಪಞ್ಚಮೀಇಚ್ಚನೇನ ಕ್ವತ್ಥೋ? ಆಣತ್ಯಾಸಿಟ್ಠೇ, ನುತ್ತಕಾಲೇ ಪಞ್ಚಮೀ।
೪೨೫, ೪೫೩. ಸತ್ತಮೀ ಏಯ್ಯ ಏಯ್ಯುಂ, ಏಯ್ಯಾ ಸಿ ಏಯ್ಯಾ ಥ, ಏಯ್ಯಾಮಿ ಏಯ್ಯಾಮ, ಏಥ ಏರಂ, ಏಥೋ ಏಯ್ಯಾವ್ಹೋ, ಏಯ್ಯಂ ಏಯ್ಯಾಮ್ಹೇ।
ಸತ್ತಮೀ ಇಚ್ಚೇಸಾ ಸಞ್ಞಾ ಹೋತಿ ಏಯ್ಯ ಏಯ್ಯುಂ, ಏಯ್ಯಾಸಿ ಏಯ್ಯಾಥ, ಏಯ್ಯಾಮಿ ಏಯ್ಯಾಮ, ಏಥ ಏರಂ, ಏಥೋ, ಏಯ್ಯಾವ್ಹೋ, ಏಯ್ಯಂ ಏಯ್ಯಾಮ್ಹೇ ಇಚ್ಚೇತೇಸಂ ದ್ವಾದಸನ್ನಂ ಪದಾನಂ।
ಸತ್ತಮೀ ಇಚ್ಚನೇನ ಕ್ವತ್ಥೋ? ಅನುಮತಿಪರಿಕಪ್ಪತ್ಥೇಸು ಸತ್ತಮೀ।
೪೨೬, ೪೫೯. ಪರೋಕ್ಖಾ ಅಉ ಏತ್ಥ, ಅಂಮ್ಹ, ತ್ಥರೇ, ತ್ಥೋ ವ್ಹೋ, ಇಂ ಮ್ಹೇ।
ಪರೋಕ್ಖಾ ಇಚ್ಚೇಸಾ ಸಞ್ಞಾ ಹೋತಿ ಅ ಉ, ಏತ್ಥ, ಅಂ ಮ್ಹ, ತ್ಥ ರೇ ತ್ಥೋ ವ್ಹೋ, ಇಂ ಮ್ಹೇ ಇಚ್ಚೇತೇಸಂ ದ್ವಾದಸನ್ನಂ ಪದಾನಂ।
ಪರೋಕ್ಖಾ ಇಚ್ಚನೇನ ಕ್ವತ್ಥೋ? ಅಪಚ್ಚಕ್ಖೇ ಪರೋಕ್ಖಾತೀತೇ।
೪೨೭, ೪೫೫. ಹಿಯ್ಯತ್ತನೀ ಆಊ, ಓತ್ಥ, ಅಂಮ್ಹಾ, ತ್ಥತ್ಥುಂ, ಸೇ ವ್ಹಂ, ಇಂ ಮ್ಹಸೇ।
ಹಿಯ್ಯತ್ತನೀ ಇಚ್ಚೇಸಾ ಸಞ್ಞಾ ಹೋತಿ ಆ ಊ, ಓ ತ್ಥ, ಅಂ ಮ್ಹಾ, ತ್ಥ ತ್ಥುಂ, ಸೇ ವ್ಹಂ, ಇಂ ಮ್ಹಸೇ ಇಚ್ಚೇತೇಸಂ ದ್ವಾದಸನ್ನಂ ಪದಾನಂ।
ಹಿಯ್ಯತ್ತನೀ ಇಚ್ಚನೇನ ಕ್ವತ್ಥೋ? ಹಿಯ್ಯೋಪಭುತಿ ಪಚ್ಚಕ್ಖೇ ಹಿಯ್ಯತ್ತನೀ।
೪೨೮, ೪೬೮. ಅಜ್ಜತನೀ ಈ ಉಂ, ಓ ತ್ಥ, ಇಂ ಮ್ಹಾ, ಆ ಊ, ಸೇ ವ್ಹಂ, ಅಂ ಮ್ಹೇ।
ಅಜ್ಜತನೀ ಇಚ್ಚೇಸಾ ಸಞ್ಞಾ ಹೋತಿ ಈ ಉಂ, ಓ ತ್ಥ, ಇಂಮ್ಹಾ, ಆ ಊ, ಸೇವ್ಹಂ, ಅಂ ಮ್ಹೇ ಇಚ್ಚೇತೇಸಂ ದ್ವಾದಸನ್ನಂ ಪದಾನಂ।
ಅಜ್ಜತನೀ ಇಚ್ಚನೇನ ಕ್ವತ್ಥೋ? ಸಮೀಪೇಜ್ಜತನೀ।
೪೨೯, ೪೭೨. ಭವಿಸ್ಸನ್ತೀ ಸ್ಸತಿ ಸ್ಸನ್ತಿ, ಸ್ಸಸಿ ಸ್ಸಥ, ಸ್ಸಾಮಿ ಸ್ಸಾಮ, ಸ್ಸತೇ ಸ್ಸನ್ತೇ, ಸ್ಸಸೇ ಸ್ಸವ್ಹೇ, ಸ್ಸಂ ಸ್ಸಾಮ್ಹೇ।
ಭವಿಸ್ಸನ್ತೀ ಇಚ್ಚೇಸಾ ಸಞ್ಞಾ ಹೋತಿ ಸ್ಸತಿ ಸ್ಸನ್ತಿ, ಸ್ಸಸಿ ಸ್ಸಥ, ಸ್ಸಾಮಿ ಸ್ಸಾಮ, ಸ್ಸತೇ ಸ್ಸನ್ತೇ, ಸ್ಸಸೇ ಸ್ಸವ್ಹೇ, ಸ್ಸಂ ಸ್ಸಾಮ್ಹೇ ಇಚ್ಚೇತೇಸಂ ದ್ವಾದಸನ್ನಂ ಪದಾನಂ।
ಭವಿಸ್ಸನ್ತೀ ಇಚ್ಚನೇನ ಕ್ವತ್ಥೋ? ಅನಾಗತೇ ಭವಿಸ್ಸನ್ತೀ।
೪೩೦, ೩೭೩. ಕಾಲಾತಿಪತ್ತಿ ಸ್ಸಾ ಸ್ಸಂಸು, ಸ್ಸೇ ಸ್ಸಥ, ಸ್ಸಂ ಸ್ಸಾಮ್ಹಾ, ಸ್ಸಥ ಸಿಸ್ಸು, ಸ್ಸಸೇ ಸ್ಸವ್ಹೇ, ಸ್ಸಿಂ ಸ್ಸಾಮ್ಹಸೇ।
ಕಾಲಾತಿಪತ್ತಿ ಇಚ್ಚೇಸಾ ಸಞ್ಞಾ ಹೋತಿ ಸ್ಸಾ ಸ್ಸಂಸು, ಸ್ಸೇ ಸ್ಸಥ, ಸ್ಸಂ ಸ್ಸಾಮ್ಹಾ, ಸ್ಸಥ ಸ್ಸಿಸು, ಸ್ಸಸೇ ಸ್ಸವ್ಹೇ, ಸ್ಸಿಂ ಸ್ಸಾಮ್ಹಸೇ ಇಚ್ಚೇತೇಸಂ ದ್ವಾದಸನ್ನಂ ಪದಾನಂ।
ಕಾಲಾತಿಪತ್ತಿ ಇಚ್ಚನೇನ ಕ್ವತ್ಥೋ? ಕ್ರಿಯಾತಿಪನ್ನೇ’ ತೀತೇ ಕಾಲಾತಿಪತ್ತಿ।
೪೩೧, ೪೫೮. ಹಿಯ್ಯತ್ತನೀ ಸತ್ತಮೀ ಪಞ್ಚಮೀ ವತ್ತಮಾನಾ ಸಬ್ಬಧಾತುಕಂ।
ಹಿಯ್ಯತ್ತನಾದಯೋ ಚತಸ್ಸೋ ವಿಭತ್ತಿಯೋ ಸಬ್ಬಧಾತುಕ ಸಞ್ಞಾ ಹೋನ್ತಿ।
ಅಗಮಾ, ಗಚ್ಛೇಯ್ಯ, ಗಚ್ಛತು, ಗಚ್ಛತಿ।
ಸಬ್ಬಧಾತುಕ ಇಚ್ಚನೇನ ಕ್ವತ್ಥೋ? ಇಕಾರಾಗಮೋ ಅಸಬ್ಬಧಾತುಕಮ್ಹಿ।
ಇತಿ ಆಖ್ಯಾತಕಪ್ಪೇ ಪಠಮೋ ಕಣ್ಡೋ।
ದುತಿಯಕಣ್ಡ
೪೩೨, ೩೬೨. ಧಾತುಲಿಙ್ಗೇಹಿ ಪರಾ ಪಚ್ಚಯಾ।
ಧಾತುಲಿಙ್ಗಇಚ್ಚೇತೇಹಿ ಪರಾ ಪಚ್ಚಯಾ ಹೋನ್ತಿ।
ಕರೋತಿ, ಗಚ್ಛತಿ। ಯೋ ಕೋಚಿ ಕರೋತಿ, ತಂ ಅಞ್ಞೋ ‘‘ಕರೋಹಿ ಕರೋಹಿ’’ ಇಚ್ಚೇವಂ ಬ್ರವೀತಿ, ಅಥ ವಾ ಕರೋನ್ತಂ ಪಯೋಜಯತಿ = ಕಾರೇತಿ। ಸಙ್ಘೋ ಪಬ್ಬತಮಿವ ಅತ್ತಾನಮಾಚರತಿ = ಪಬ್ಬತಾಯತಿ। ತಳಾಕಂ ಸಮುದ್ದಮಿವ ಅತ್ತಾನಮಾಚರತಿ = ಸಮುದ್ದಾಯತಿ, ಸದ್ದೋ ಚಿಚ್ಚಿಟಮಿವ ಅತ್ತಾನಮಾಚರತಿ = ಚಿಚ್ಚಿಟಾಯತಿ, ವಸಿಟ್ಠಸ್ಸ ಅಪಚ್ಚಂ ವಾಸಿಟ್ಠೋ। ಏವಮಞ್ಞೇಪಿ ಯೋಜೇತಬ್ಬಾ।
೪೩೩, ೫೨೮. ತಿಜ ಗುಪ ಕಿತ ಮಾನೇ ಹಿ ಖ ಛ ಸಾ ವಾ।
ತಿಜ ಗುಪ ಕಿತ ಮಾನು ಇಚ್ಚೇತೇಹಿ ಧಾತೂಹಿ ಖ ಛ ಸ ಇಚ್ಚೇತೇ ಪಚ್ಚಯಾ ಹೋನ್ತಿ ವಾ।
ತಿತಿಕ್ಖತಿ, ಜಿಗುಚ್ಛತಿ, ತಿಕಿಚ್ಛತಿ, ವೀಮಂಸತಿ।
ವಾತಿ ಕಿಮತ್ಥಂ? ತೇಜತಿ, ಗೋಪತಿ, ಮಾನೇತಿ।
೪೩೪, ೫೩೪. ಭುಜ ಘಸ ಹರ ಸು ಪಾದೀಹಿ ತುಮಿಚ್ಛತ್ಥೇಸು।
ಭುಜ ಘಸ ಹರ ಸು ಪಾಇಚ್ಚೇವಮಾದೀಹಿ ಧಾತೂಹಿ ತುಮಿಚ್ಛತ್ಥೇಸು ಖ ಛ ಸಇಚ್ಚೇತೇ ಪಚ್ಚಯಾ ಹೋನ್ತಿ ವಾ।
ಭೋತ್ತುಮಿಚ್ಛತಿ=ಬುಭುಕ್ಖತಿ, ಘಸಿತುಮಿಚ್ಛತಿ=ಜಿಘಚ್ಛತಿ, ಹರಿತುಮಿಚ್ಛತಿ=ಜಿಗೀಸತಿ, ಸೋತುಮಿಚ್ಛತಿ=ಸುಸ್ಸುಸತಿ, ಪಾತುಮಿಚ್ಛತಿ=ಪಿವಾಸತಿ।
ವಾತಿ ಕಿಮತ್ಥಂ? ಭೋತ್ತುಮಿಚ್ಛತಿ।
ತುಮಿಚ್ಛತ್ಥೇಸೂತಿ ಕಿಮತ್ಥಂ? ಭುಞ್ಜತಿ।
೪೩೫, ೫೩೬. ಆಯ ನಾಮತೋ ಕತ್ತೂಪಮಾನಾದಾಚಾರೇ।
ನಾಮತೋ ಕತ್ತೂಪಮಾನಾ ಆಚಾರತ್ಥೇ ಆಯಪಚ್ಚಯೋ ಹೋತಿ।
ಸಙ್ಘೋ ಪಬ್ಬತಮಿವ ಅತ್ತಾನಮಾಚರತಿ = ಪಬ್ಬತಾಯತಿ, ತಳಾಕಂ ಸಮುದ್ದಮಿವ ಅತ್ತಾನಮಾಚರತಿ = ಸಮುದ್ದಾಯತಿ, ಸದ್ದೋ ಚಿಚ್ಚಿಟಮಿವ ಅತ್ತಾನಮಾಚರತಿ = ಚಿಚ್ಚಿಟಾಯತಿ। ಏವಮಞ್ಞೇಪಿ ಯೋಜೇತಬ್ಬಾ।
೪೩೬, ೫೩೭. ಈಯೂಪಮಾನಾ ಚ।
ನಾಮತೋ ಉಪಮಾನಾ ಆಚಾರತ್ಥೇ ಚ ಈಯಪಚ್ಚಯೋ ಹೋತಿ।
ಅಛತ್ತಂ
ಉಪಮಾನಾತಿ ಕಿಮತ್ಥಂ? ಧಮ್ಮಂ ಆಚರತಿ।
ಆಚಾರೇತಿ ಕಿಮತ್ಥಂ? ಅಛತ್ತಂ ಛತ್ತಮಿವ ರಕ್ಖತಿ। ಏವಮಞ್ಞೇಪಿ ಯೋಜೇತಬ್ಬಾ।
೪೩೭, ೫೩೮. ನಾಮಮ್ಹಾ’ತ್ತಿಚ್ಛತ್ಥೇ।
ನಾಮಮ್ಹಾ ಅತ್ತನೋ ಇಚ್ಛತ್ಥೇ ಈಯಪಚ್ಚಯೋ ಹೋತಿ।
ಅತ್ತನೋ ಪತ್ತಮಿಚ್ಛತಿ = ಪತ್ತೀಯತಿ। ಏವಂ ವತ್ಥೀಯತಿ, ಪರಿಕ್ಖಾರೀಯತಿ, ಚೀವರೀಯತಿ, ಧನೀಯತಿ, ಘಟೀಯತಿ।
ಅತ್ತಿಚ್ಛತ್ಥೇತಿ ಕಿಮತ್ಥಂ? ಅಞ್ಞಸ್ಸ ಪತ್ತಮಿಚ್ಛತಿ। ಏವಮಞ್ಞೇಪಿ ಯೋಜೇತಬ್ಬಾ।
೪೩೮, ೫೪೦. ಧಾತೂಹಿ ಣೇ ಣಯ ಣಾಪೇ ಣಾಪಯಾ ಕಾರಿತಾನಿ ಹೇತ್ವತ್ಥೇ।
ಸಬ್ಬೇಹಿ ಧಾತೂಹಿ ಣೇಣಯ ಣಾಪೇ ಣಾಪಯಇಚ್ಚೇತೇ ಪಚ್ಚಯಾ ಹೋನ್ತಿ ಕಾರಿತಸಞ್ಞಾ ಚ ಹೇತ್ವತ್ಥೇ।
ಯೋ ಕೋಚಿ ಕರೋತಿ, ತಂ ಅಞ್ಞೋ ‘‘ಕರೋಹಿ ಕರೋಹಿ’’ ಇಚ್ಚೇವಂ ಬ್ರವೀತಿ, ಅಥ ವಾ ಕರೋನ್ತಂ ಪಯೋಜಯತಿ
ಹೇತ್ವತ್ಥೇತಿ ಕಿಮತ್ಥಂ? ಕರೋತಿ, ಪಚತಿ।
ಅತ್ಥಗ್ಗಹಣೇನ ಅಲಪಚ್ಚಯೋ ಹೋತಿ, ಜೋತಲತಿ।
೪೩೯, ೫೩೯. ಧಾತುರೂಪೇ ನಾಮಸ್ಮಾ ಣಯೋ ಚ।
ತಸ್ಮಾ ನಾಮಸ್ಮಾ ಣಯಪಚ್ಚಯೋ ಹೋತಿ ಕಾರಿತಸಞ್ಞೋ ಚ ಧಾತುರೂಪೇ ಸತಿ।
ಹತ್ಥಿನಾ ಅತಿಕ್ಕಮತಿ ಮಗ್ಗಂ = ಅತಿಹತ್ಥಯತಿ, ವೀಣಾಯ ಉಪಗಾಯತಿ ಗೀತಂ = ಉಪವೀಣಯತಿ, ದಳ್ಹಂ ಕರೋತಿ ವೀರಿಯಂ
ಚಗ್ಗಹಣೇನ ಆರ ಆಲಇಚ್ಚೇತೇ ಪಚ್ಚಯಾ ಹೋನ್ತಿ। ಸನ್ತಂ ಕರೋತಿ = ಸನ್ತಾರತಿ, ಉಪಕ್ಕಮಂ ಕರೋತಿ = ಉಪಕ್ಕಮಾಲತಿ।
೪೪೦, ೪೪೫. ಭಾವಕಮ್ಮೇಸು ಯೋ।
ಸಬ್ಬೇಹಿ ಧಾತೂಹಿ ಭಾವಕಮ್ಮೇಸು ಯಪಚ್ಚಯೋ ಹೋತಿ।
ಠೀಯತೇ, ಬುಜ್ಝತೇ, ಪಚ್ಚತೇ, ಲಬ್ಭತೇ, ಕರೀಯತೇ, ಯುಜ್ಜತೇ, ಉಚ್ಚತೇ।
ಭಾವಕಮ್ಮೇಸೂತಿ ಕಿಮತ್ಥಂ? ಕರೋತಿ, ಪಚತಿ, ಪಠತಿ।
೪೪೧, ೪೪೭. ತಸ್ಸ ಚವಗ್ಗಯಕಾರವಕಾರತ್ತಂ ಸಧಾತ್ವನ್ತಸ್ಸ।
ತಸ್ಸ ಯಪಚ್ಚಯಸ್ಸ ಚವಗ್ಗಯಕಾರವಕಾರತ್ತಂ ಹೋತಿ ಧಾತೂನಂ ಅನ್ತೇನ ಸಹ ಯಥಾಸಮ್ಭವಂ।
ವುಚ್ಚತೇ, ವುಚ್ಚನ್ತೇ, ಉಚ್ಚತೇ, ಉಚ್ಚನ್ತೇ, ಪಚ್ಚತೇ, ಪಚ್ಚನ್ತೇ। ಮಜ್ಜತೇ, ಮಜ್ಜನ್ತೇ, ಯುಜ್ಜತೇ, ಯುಜ್ಜನ್ತೇ। ಬುಜ್ಝತೇ, ಬುಜ್ಝನ್ತೇ, ಕುಜ್ಝತೇ, ಕುಜ್ಝನ್ತೇ, ಉಜ್ಝತೇ, ಉಜ್ಝನ್ತೇ। ಹಞ್ಞತೇ, ಹಞ್ಞನ್ತೇ। ಕಯ್ಯತೇ, ಕಯ್ಯನ್ತೇ। ದಿಬ್ಬತೇ, ದಿಬ್ಬನ್ತೇ।
೪೪೨, ೪೪೮. ಇವಣ್ಣಾಗಮೋ ವಾ।
ಸಬ್ಬೇಹಿ ಧಾತೂಹಿ ಯಮ್ಹಿ ಪಚ್ಚಯೇ, ಪರೇ ಇವಣ್ಣಾಗಮೋ ಹೋತಿ ವಾ।
ಕರೀಯತೇ, ಕರೀಯತಿ, ಗಚ್ಛೀಯತೇ, ಗಚ್ಛೀಯತಿ।
ವಾತಿ ಕಿಮತ್ಥಂ? ಕಯ್ಯತೇ।
೪೪೩, ೪೪೯. ಪುಬ್ಬರೂಪಞ್ಚ।
ಸಬ್ಬೇಹಿ ಧಾತೂಹಿ ಯಪಚ್ಚಯೋ ಪುಬ್ಬರೂಪಮಾಪಜ್ಜತೇ ವಾ।
ವುಡ್ಢತೇ, ಫಲ್ಲತೇ, ದಮ್ಮತೇ, ಸಕ್ಕತೇ, ಲಬ್ಭತೇ, ದಿಸ್ಸತೇ।
೪೪೪, ೫೦೧. ತಥಾ ಕತ್ತರಿ ಚ।
ಯಥಾ ಹೇಟ್ಠಾ ಭಾವಕಮ್ಮೇಸು ಯಪಚ್ಚಯಸ್ಸ ಆದೇಸೋ ಹೋತಿ ತಥಾ ಕತ್ತರಿಪಿ ಯಪಚ್ಚಯಸ್ಸ ಆದೇಸೋ ಕಾತಬ್ಬೋ।
ಬುಜ್ಝತಿ, ವಿಜ್ಝತಿ, ಮಞ್ಞತಿ, ಸಿಬ್ಬತಿ।
೪೪೫, ೪೩೩. ಭೂವಾದಿತೋ ಅ।
ಭೂಇಚ್ಚೇವಮಾದಿತೋ ಧಾತುಗಣತೋ ಅಪಚ್ಚಯೋ ಹೋತಿ ಕತ್ತರಿ।
ಭವತಿ
೪೪೬, ೫೦೯. ರುಧಾದಿತೋ ನಿಗ್ಗಹಿತಪುಬ್ಬಞ್ಚ।
ರುಧಇಚ್ಚೇವಮಾದಿತೋ ಧಾತುಗಣತೋ ಅಪಚ್ಚಯೋ ಹೋತಿ ಕತ್ತರಿ, ಪುಬ್ಬೇ ನಿಗ್ಗಹಿತಾಗಮೋ ಹೋತಿ।
ರುನ್ಧತಿ, ಛಿನ್ದತಿ, ಭಿನ್ದತಿ।
ಚಗ್ಗಹಣೇನ ಇ ಈ ಏ ಓಇಚ್ಚೇತೇ ಪಚ್ಚಯಾ ಹೋನ್ತಿ ನಿಗ್ಗಹಿತಪುಬ್ಬಞ್ಚ।
ರುನ್ಧಿತಿ, ರುನ್ಧೀತಿ, ರುನ್ಧೇತಿ, ರುನ್ಧೋತಿ, ಸುಮ್ಭೋತಿ, ಪರಿಸುಮ್ಭೋತಿ।
೪೪೭, ೫೧೦. ದಿವಾದಿತೋ ಯೋ।
ದಿವುಇಚ್ಚೇವಮಾದಿತೋ ಧಾತುಗಣತೋ ಯಪಚ್ಚಯೋ ಹೋತಿ ಕತ್ತರಿ।
ದಿಬ್ಬತಿ, ಥಿಬ್ಬತಿ, ಯುಜ್ಝತಿ, ವಿಜ್ಝತಿ, ಬುಜ್ಝತಿ।
೪೪೮, ೫೧೨. ಸ್ವಾದಿತೋ ಣು ಣಾ ಉಣಾ ಚ।
ಸುಇಚ್ಚೇವಮಾದಿತೋ ಧಾತುಗಣತೋ ಣು ಣಾ ಉ ಣಾಇಚ್ಚೇತೇ ಪಚ್ಚಯಾ ಹೋನ್ತಿ ಕತ್ತರಿ।
ಅಭಿಸುಣೋತಿ
೪೪೯, ೫೧೩. ಕಿಯಾದಿತೋ ನಾ।
ಕೀಇಚ್ಚೇವಮಾದಿತೋ ಧಾತುಗಣತೋ ನಾಪಚ್ಚಯೋ ಹೋತಿ ಕತ್ತರಿ।
ಕಿಣಾತಿ, ಜಿನಾತಿ, ಧುನಾತಿ, ಮುನಾತಿ, ಲುನಾತಿ, ಪುನಾತಿ।
೪೫೦, ೫೧೭. ಗಹಾದಿತೋ ಪ್ಪ ಣ್ಹಾ।
ಗಹಇಚ್ಚೇವಮಾದಿತೋ ಧಾತುಗಣತೋ ಪ್ಪಣ್ಹಾಇಚ್ಚೇತೇ ಪಚ್ಚಯಾ ಹೋನ್ತಿ ಕತ್ತರಿ।
ಘೇಪ್ಪತಿ, ಗಣ್ಹಾತಿ।
೪೫೧, ೫೨೦. ತನಾದಿತೋ ಓಯಿರಾ।
ತನುಇಚ್ಚೇವಮಾದಿತೋ ಧಾತುಗಣತೋ ಓ ಯಿರಇಚ್ಚೇತೇ ಪಚ್ಚಯಾ ಹೋನ್ತಿ ಕತ್ತರಿ।
ತನೋತಿ
೪೫೨, ೫೨೫. ಚುರಾದಿತೋ, ಣೇ ಣಯಾ।
ಚುರಇಚ್ಚೇವಮಾದಿತೋ ಧಾತುಗಣತೋ ಣೇ ಣಯಇಚ್ಚೇತೇ ಪಚ್ಚಯಾ ಹೋನ್ತಿ ಕತ್ತರಿ, ಕಾರಿತಸಞ್ಞಾ ಚ।
ಚೋರೇತಿ, ಚೋರಯತಿ, ಚಿನ್ತೇತಿ, ಚಿನ್ತಯತಿ, ಮನ್ತೇತಿ, ಮನ್ತಯತಿ।
೪೫೩, ೪೪೪. ಅತ್ತನೋಪದಾನಿ ಭಾವೇ ಚ ಕಮ್ಮನಿ।
ಭಾವೇ ಚ ಕಮ್ಮನಿ ಚ ಅತ್ತನೋಪದಾನಿ ಹೋನ್ತಿ।
ಉಚ್ಚತೇ, ಉಚ್ಚನ್ತೇ, ಮಜ್ಜತೇ, ಮಜ್ಜನ್ತೇ, ಯುಜ್ಜತೇ, ಯುಜ್ಜನ್ತೇ, ಕುಜ್ಝತೇ, ಕುಜ್ಝನ್ತೇ, ಲಬ್ಭತೇ, ಲಬ್ಭನ್ತೇ, ಕಯ್ಯತೇ, ಕಯ್ಯನ್ತೇ।
೪೫೪, ೪೪೦. ಕತ್ತರಿ ಚ।
ಕತ್ತರಿ ಚ ಅತ್ತನೋಪದಾನಿ ಹೋನ್ತಿ।
ಮಞ್ಞತೇ, ರೋಚತೇ, ಸೋಚತೇ, ಬುಜ್ಝತೇ, ಜಾಯತೇ।
೪೫೫, ೫೩೦. ಧಾತುಪ್ಪಚ್ಚಯೇಹಿ ವಿಭತ್ತಿಯೋ।
ಧಾತುನಿದ್ದಿಟ್ಠೇಹಿ ಪಚ್ಚಯೇಹಿ ಖಾದಿಕಾರಿತನ್ತೇಹಿ ವಿಭತ್ತಿಯೋ ಹೋನ್ತಿ।
ತಿತಿಕ್ಖತಿ
೪೫೬, ೪೩೦. ಕತ್ತರಿ ಪರಸ್ಸಪದಂ।
ಕತ್ತರಿ ಪರಸ್ಸಪದಂ ಹೋತಿ।
ಕರೋತಿ, ಪಚತಿ, ಪಠತಿ, ಗಚ್ಛತಿ।
೪೫೭, ೪೨೪. ಭೂವಾದಯೋ ಧಾತವೋ।
ಭೂಇಚ್ಚೇವಮಾದಯೋ ಯೇ ಸದ್ದಗಣಾ, ತೇ ಧಾತುಸಞ್ಞಾ ಹೋನ್ತಿ।
ಭವತಿ, ಭವನ್ತಿ, ಚರತಿ, ಚರನ್ತಿ, ಪಚತಿ, ಪಚನ್ತಿ, ಚಿನ್ತಯತಿ, ಚಿನ್ತಯನ್ತಿ, ಹೋತಿ, ಹೋನ್ತಿ, ಗಚ್ಛತಿ, ಗಚ್ಛನ್ತಿ।
ಇತಿ ಆಖ್ಯಾತಕಪ್ಪೇ ದುತಿಯೋ ಕಣ್ಡೋ।
ತತಿಯಕಣ್ಡ
೪೫೮, ೪೬೧. ಕ್ವಚಾದಿವಣ್ಣಾನಮೇಕಸ್ಸರಾನಂ ದ್ವೇಭಾವೋ।
ಆದಿಭೂತಾನಂ ವಣ್ಣಾನಂ ಏಕಸ್ಸರಾನಂ ಕ್ವಚಿ ದ್ವೇಭಾವೋ ಹೋತಿ।
ತಿತಿಕ್ಖತಿ
ಕ್ವಚೀತಿ ಕಿಮತ್ಥಂ? ಕಮ್ಪತಿ, ಚಲತಿ।
೪೫೯, ೪೬೨. ಪುಬ್ಬೋ’ಬ್ಭಾಸೋ।
ದ್ವೇಭೂತಸ್ಸ ಧಾತುಸ್ಸ ಯೋ ಪುಬ್ಬೋ, ಸೋ ಅಬ್ಭಾಸಸಞ್ಞೋ ಹೋತಿ।
ದಧಾತಿ, ದದಾತಿ, ಬಭೂವ।
೪೬೦, ೫೦೬. ರಸ್ಸೋ।
ಅಬ್ಭಾಸೇ ವತ್ತಮಾನಸ್ಸ ಸರಸ್ಸ ರಸ್ಸೋ ಹೋತಿ। ದಧಾತಿ, ಜಹಾತಿ।
೪೬೧, ೪೬೪. ದುತಿಯಚತುತ್ಥಾನಂ ಪಠಮತತಿಯಾ।
ಅಬ್ಭಾಸಗತಾನಂ ದುತಿಯಚತುತ್ಥಾನಂ ಪಠಮತತಿಯಾ ಹೋನ್ತಿ।
ಚಿಚ್ಛೇದ, ಬುಭುಕ್ಖತಿ, ಬಭೂವ, ದಧಾತಿ।
೪೬೨, ೪೭೬. ಕವಗ್ಗಸ್ಸ ಚವಗ್ಗೋ।
ಅಬ್ಭಾಸೇ ವತ್ತಮಾನಸ್ಸ ಕವಗ್ಗಸ್ಸ ಚ ವಗ್ಗೋ ಹೋತಿ।
ಚಿಕಿಚ್ಛತಿ
೪೬೩, ೫೩೨. ಮಾನಕಿತಾನಂ ವತತ್ತಂ ವಾ।
ಮಾನಕಿತಇಚ್ಚೇತೇಸಂ ಧಾತೂನಂ ಅಬ್ಭಾಸಗತಾನಂ ವಕಾರ ತಕಾರತ್ತಂ ಹೋತಿ ವಾ ಯಥಾಸಙ್ಖ್ಯಂ।
ವೀಮಂಸತಿ, ತಿಕಿಚ್ಛತಿ।
ವಾತಿ ಕಿಮತ್ಥಂ? ಚಿಕಿಚ್ಛತಿ।
೪೬೪, ೫೦೪. ಹಸ್ಸ ಜೋ।
ಅಬ್ಭಾಸೇ ವತ್ತಮಾನಸ್ಸ ಹಕಾರಸ್ಸ ಜೋ ಹೋತಿ।
ಜಹಾತಿ, ಜುಹ್ವತಿ, ಜುಹೋತಿ, ಜಹಾರ।
೪೬೫, ೪೬೩. ಅನ್ತಸ್ಸಿವಣ್ಣಾಕಾರೋ ವಾ।
ಅಬ್ಭಾಸಸ್ಸ ಅನ್ತಸ್ಸ ಇವಣ್ಣೋ ಹೋತಿ, ಅಕಾರೋ ವಾ।
ಜಿಗುಚ್ಛತಿ, ಪಿವಾಸತಿ, ವೀಮಂಸತಿ, ಜಿಘಚ್ಛತಿ, ಬಭೂವ, ದಧಾತಿ।
ವಾತಿ ಕಿಮತ್ಥಂ? ಬುಭುಕ್ಖತಿ।
೪೬೬, ೪೮೯. ನಿಗ್ಗಹಿತಞ್ಚ
ಅಬ್ಭಾಸಸ್ಸ ಅನ್ತೇ ನಿಗ್ಗಹಿತಾಗಮೋ ಹೋತಿ ವಾ।
ಚಙ್ಕಮತಿ, ಚಞ್ಚಲತಿ, ಜಙ್ಗಮತಿ।
ವಾತಿ ಕಿಮತ್ಥಂ? ಪಿವಾಸತಿ, ದದ್ದಲ್ಲತಿ।
೪೬೭, ೫೩೩. ತತೋ ಪಾಮಾನಾನಂ ವಾ ಮಂ ಸೇಸು।
ತತೋ ಅಬ್ಭಾಸತೋ ಪಾಮಾನಇಚ್ಚೇತೇಸಂ ಧಾತೂನಂ ವಾಮಂಇಚ್ಚೇತೇ ಆದೇಸಾ ಹೋನ್ತಿ ಯಥಾಸಙ್ಖ್ಯಂ ಸಪಚ್ಚಯೇ ಪರೇ।
ಪಿವಾಸತಿ, ವೀಮಂಸತಿ।
೪೬೮, ೪೬೨. ಠಾ ತಿಟ್ಠೋ।
ಠಾಇಚ್ಚೇತಸ್ಸ ಧಾತುಸ್ಸ ತಿಟ್ಠಾದೇಸೋ ಹೋತಿ ವಾ।
ತಿಟ್ಠತಿ, ತಿಟ್ಠತು, ತಿಟ್ಠೇಯ್ಯ, ತಿಟ್ಠೇಯ್ಯುಂ।
ವಾತಿ ಕಿಮತ್ಥಂ? ಠಾತಿ।
೪೬೯, ೪೯೪. ಪಾ ಪಿವೋ।
ಪಾಇಚ್ಚೇತಸ್ಸ ಧಾತುಸ್ಸ ಪಿವಾದೇಸೋ ಹೋತಿ ವಾ।
ಪಿವತಿ, ಪಿವತು, ಪಿವೇಯ್ಯ, ಪಿವೇಯ್ಯುಂ।
ವಾತಿ ಕಿಮತ್ಥಂ? ಪಾತಿ।
೪೭೦, ೫೧೪. ಞಾಸ್ಸ ಜಾ ಜಂ ನಾ।
ಞಾಇಚ್ಚೇತಸ್ಸ ಧಾತುಸ್ಸ ಜಾ ಜಂ ನಾಆದೇಸಾ ಹೋನ್ತಿ ವಾ।
ಜಾನಾತಿ, ಜಾನೇಯ್ಯ, ಜಾನಿಯಾ, ಜಞ್ಞಾ, ನಾಯತಿ।
೪೭೧, ೪೮೩. ದಿಸಸ್ಸ ಪಸ್ಸ ದಿಸ್ಸ ದಕ್ಖಾ ವಾ।
ದಿಸಇಚ್ಚೇತಸ್ಸ ಧಾತುಸ್ಸ ಪಸ್ಸ ದಿಸ್ಸ ದಕ್ಖಇಚ್ಚೇತೇ ಆದೇಸಾ ಹೋನ್ತಿ ವಾ।
ಪಸ್ಸತಿ, ದಿಸ್ಸತಿ, ದಕ್ಖತಿ, ಅದಕ್ಖ।
ವಾತಿ ಕಿಮತ್ಥಂ? ಅದ್ದಸ।
೪೭೨, ೫೩೧. ಬ್ಯಞ್ಜನನ್ತಸ್ಸ ಚೋ ಛಪಚ್ಚಯೇಸು ಚ।
ಬ್ಯಞ್ಜನನ್ತಸ್ಸ ಧಾತುಸ್ಸ ಚೋ ಹೋತಿ ಛಪಚ್ಚಯೇಸು ಪರೇಸು।
ಜಿಗುಚ್ಛತಿ, ತಿಕಿಚ್ಛತಿ, ಜಿಘಚ್ಛತಿ।
೪೭೩, ೫೨೯. ಕೋ ಖೇ ಚ।
ಬ್ಯಞ್ಜನನ್ತಸ್ಸ ಧಾತುಸ್ಸ ಕೋ ಹೋತಿ ಖಪಚ್ಚಯೇ ಪರೇ।
ತಿತಿಕ್ಖತಿ
೪೭೪, ೫೩೫. ಹರಸ್ಸ ಗೀಸೇ।
ಹರಇಚ್ಚೇತಸ್ಸ ಧಾತುಸ್ಸ ಸಬ್ಬಸ್ಸೇವ ಗೀಆದೇಸೋ ಹೋತಿ ಸಪಚ್ಚಯೇ ಪರೇ।
ಜಿಗೀಸತಿ।
೪೭೫, ೫೬೫. ಬ್ರೂಭೂನಮಾಹಭೂವಾ ಪರೋಕ್ಖಾಯಂ।
ಬ್ರೂಭೂಇಚ್ಚೇತೇಸಂ ಧಾತೂನಂ ಆಹಭೂವಇಚ್ಚೇತೇ ಆದೇಸಾ ಹೋನ್ತಿ ಯಥಾಸಙ್ಖ್ಯಂ ಪರೋಕ್ಖಾಯಂ ವಿಭತ್ತಿಯಂ।
ಆಹ, ಆಹು, ಬಭೂವ, ಬಭೂವು।
ಪರೋಕ್ಖಾಯಮಿತಿ ಕಿಮತ್ಥಂ? ಅಬ್ರಚುಂ।
೪೭೬, ೪೪೨. ಗಮಿಸ್ಸನ್ತೋ ಚ್ಛೋ ವಾ ಸಬ್ಬಾಸು।
ಗಮುಇಚ್ಚೇತಸ್ಸ ಧಾತುಸ್ಸ ಅನ್ತೋ ಮಕಾರೋ ಚ್ಛೋ ಹೋತಿ ವಾ ಸಬ್ಬಾಸು ಪಚ್ಚಯವಿಭತ್ತೀಸು।
ಗಚ್ಛಮಾನೋ, ಗಚ್ಛನ್ತೋ। ಗಚ್ಛತಿ, ಗಮೇತಿ। ಗಚ್ಛತು, ಗಮೇತು। ಗಚ್ಛೇಯ್ಯ। ಗಮೇಯ್ಯ। ಅಗಚ್ಛಾ, ಅಗಮಾ। ಅಗಚ್ಛೀ, ಅಗಮೀ। ಗಚ್ಛಿಸ್ಸತಿ, ಗಮಿಸ್ಸತಿ। ಅಗಚ್ಛಿಸ್ಸಾ, ಅಗಮಿಸ್ಸಾ।
ಗಮಿಸ್ಸೇತಿ
೪೭೭, ೪೭೯. ವಚಸ್ಸಜ್ಜತನಿಮ್ಹಿ ಮಕಾರೋ ಓ।
ವಚಇಚ್ಚೇತಸ್ಸ ಧಾತುಸ್ಸ ಅಕಾರೋ ಓತ್ತಮಾಪಜ್ಜತೇ ಅಜ್ಜತನಿಮ್ಹಿ ವಿಭತ್ತಿಮ್ಹಿ।
ಅವೋಚ। ಅವೋಚುಂ।
ಅಜ್ಜತನಿಮ್ಹೀತಿ ಕಿಮತ್ಥಂ? ಅವಚ, ಅವಚೂ।
೪೭೮, ೪೩೮. ಅಕಾರೋ ದೀಘಂ ಹಿ ಮಿ ಮೇಸು।
ಅಕಾರೋ ದೀಘಮಾಪಜ್ಜತೇ ಹಿಮಿಮಇಚ್ಚೇತೇಸು ವಿಭತ್ತೀಸು।
ಗಚ್ಛಾಹಿ, ಗಚ್ಛಾಮಿ, ಗಚ್ಛಾಮ, ಗಚ್ಛಾಮ್ಹೇ।
ಮಿಕಾರಗ್ಗಹಣೇನ ಹಿವಿಭತ್ತಿಮ್ಹಿ ಅಕಾರೋ ಕ್ವಚಿ ನ ದೀಘಮಾಪಜ್ಜತೇ। ಗಚ್ಛಹಿ।
೪೭೯, ೪೫೨. ಹ ಲೋಪಂ ವಾ।
ಹಿವಿಭತ್ತಿ ಲೋಪಮಾಪಜ್ಜತೇ ವಾ।
ಗಚ್ಛ, ಗಚ್ಛಾಹಿ, ಗಮ, ಗಮಾಹಿ, ಗಮಯ, ಗಮಯಾಹಿ।
ಹೀತಿ ಕಿಮತ್ಥಂ? ಗಚ್ಛತಿ, ಗಮಯತಿ।
೪೮೦, ೪೯೦. ಹೋತಿಸ್ಸರೇಹೋಹೇ ಭವಿಸ್ಸನ್ತಿಮ್ಹಿಸ್ಸಸ್ಸ ಚ।
ಹೂಇಚ್ಚೇತಸ್ಸ ಏ ಹ ಓಹ ಏತ್ತಮಾಪಜ್ಜ ತೇ ಭವಿಸ್ಸನ್ತಿಮ್ಹಿ, ಸ್ಸಸ್ಸ ಚ ಲೋಪೋ ಹೋತಿ ವಾ।
ಹೇಹಿತಿ, ಹೇಹಿನ್ತಿ, ಹೋಹಿತಿ, ಹೋಹಿನ್ತಿ, ಹೇತಿ, ಹೇನ್ತಿ, ಹೇಹಿಸ್ಸತಿ, ಹೇಹಿಸ್ಸನ್ತಿ, ಹೋಹಿಸ್ಸತಿ, ಹೋಹಿಸ್ಸನ್ತಿ, ಹೇಸ್ಸತಿ, ಹೇಸ್ಸನ್ತಿ।
ಹೂತಿ ಕಿಮತ್ಥಂ? ಭವಿಸ್ಸತಿ, ಭವಿಸ್ಸನ್ತಿ।
ಭವಿಸ್ಸನ್ತಿಮ್ಹೀತಿ ಕಿಮತ್ಥಂ? ಹೋತಿ।
೪೮೧, ೫೨೪. ಕರಸ್ಸ ಸಪಚ್ಚಯಸ್ಸ ಕಾಹೋ।
ಕರಇಚ್ಚೇತಸ್ಸ ಧಾತುಸ್ಸ ಸಪಚ್ಚಯಸ್ಸ ಕಾಹಾದೇಸೋ ಹೋತಿ ವಾ ಭವಿಸ್ಸನ್ತಿಮ್ಹಿ ವಿಭತ್ತಿಮ್ಹಿ, ಸಸ್ಸ ಚ ನಿಚ್ಚಂ ಲೋಪೋ ಹೋತಿ।
ಕಾಹತಿ, ಕಾಹಿತಿ, ಕಾಹಸಿ, ಕಾಹಿಸಿ, ಕಾಹಾಮಿ, ಕಾಹಾಮ।
ವಾತಿ ಕಿಮತ್ಥಂ? ಕರಿಸ್ಸತಿ, ಕರಿಸ್ಸನ್ತಿ।
ಸಪಚ್ಚಯಗ್ಗಹಣೇನ ಅಞ್ಞೇಹಿಪಿ ಭವಿಸ್ಸನ್ತಿಯಾ ವಿಭತ್ತಿಯಾ ಖಾಮಿ ಖಾಮ ಛಾಮಿ ಛಾಮಇಚ್ಚಾದಯೋ ಆದೇಸಾ ಹೋನ್ತಿ। ವಕ್ಖಾಮಿ, ವಕ್ಖಾಮ, ವಚ್ಛಾಮಿ, ವಚ್ಛಾಮ।
ಇತಿ ಆಖ್ಯಾತಕಪ್ಪೇ ತತಿಯೋ ಕಣ್ಡೋ।
ಚತುತ್ಥಕಣ್ಡ
೪೮೨, ೫೦೮. ದಾದನ್ತಸ್ಸಂ ಮಿ ಮೇಸು।
ದಾಇಚ್ಚೇತಸ್ಸ ಧಾತುಸ್ಸ ಅನ್ತಸ್ಸ ಅಂ ಹೋತಿ ಮಿಮಇಚ್ಚೇತೇಸು।
ದಮ್ಮಿ, ದಮ್ಮ।
೪೮೩, ೫೨೭. ಅಸಂಯೋಗನ್ತಸ್ಸ ವುದ್ಧಿ ಕಾರಿತೇ।
ಅಸಂಯೋಗನ್ತಸ್ಸ ಧಾತುಸ್ಸ ಕಾರಿತೇ ವುದ್ಧಿ ಹೋತಿ।
ಕಾರೇತಿ, ಕಾರೇನ್ತಿ, ಕಾರಯತಿ, ಕಾರಯನ್ತಿ, ಕಾರಾಪೇತಿ, ಕಾರಾಪೇನ್ತಿ, ಕಾರಾಪಯತಿ, ಕಾರಾಪಯನ್ತಿ।
ಅಸಂಯೋಗನ್ತಸ್ಸೇತಿ ಕಿಮತ್ಥಂ? ಚಿನ್ತಯತಿ, ಮನ್ತಯತಿ।
೪೮೪, ೫೪೨. ಘಟಾದೀನಂ ವಾ।
ಘಟಾದೀನಂ ಧಾತೂನಂ ಅಸಂಯೋಗನ್ತಾನಂ ವುದ್ಧಿ ಹೋತಿ ವಾ ಕಾರಿತೇ।
ಘಾಟೇತಿ, ಘಟೇತಿ, ಘಾಟಯತಿ, ಘಟಯತಿ, ಘಾಟಾಪೇತಿ, ಘಟಾಪೇತಿ, ಘಾಟಾಪಯತಿ, ಘಟಾಪಯತಿ, ಗಾಮೇತಿ, ಗಮೇತಿ, ಗಾಮಯತಿ, ಗಮಯತಿ, ಗಾಮಾಪೇತಿ, ಗಮಾಪೇತಿ। ಗಾಮಾಪಯತಿ, ಗಮಾಪಯತಿ।
ಘಟಾದೀನಮಿತಿ ಕಿಮತ್ಥಂ? ಕಾರೇತಿ।
೪೮೫, ೪೩೪. ಅಞ್ಞೇಸು ಚ।
ಅಞ್ಞೇಸು ಚ ಪಚ್ಚಯೇಸು ಸಬ್ಬೇಸಂ ಧಾತೂನಂ ಅಸಂಯೋಗನ್ತಾನಂ ವುದ್ಧಿ ಹೋತಿ।
ಜಯತಿ, ಹೋತಿ, ಭವತಿ।
ಚಗ್ಗಹಣೇನ ಣುಪಚ್ಚಯಸ್ಸಾಪಿ ವುದ್ಧಿ ಹೋತಿ। ಅಭಿಸುಣೋತಿ।
೪೮೬, ೫೪೩. ಗುಹ ದುಸಾನಂ ದೀಘಂ।
ಗುಹ ದುಸಇಚ್ಚೇತೇಸಂ ಧಾತೂನಂ ಸರೋ ದೀಘಮಾಪಜ್ಜತೇ ಕಾರಿತೇ।
ಗೂಹಯತಿ, ದೂಸಯತಿ।
೪೮೭, ೪೭೮. ವಚ ವಸ ವಹಾದೀನಮುಕಾರೋ ವಸ್ಸ ಯೇ।
ವಚ ವಸ ವಹಇಚ್ಚೇವಮಾದೀನಂ ಧಾತೂನಂ ವಕಾರಸ್ಸ ಉಕಾರೋ ಹೋತಿ ಯಪಚ್ಚಯೇ ಪರೇ।
ಉಚ್ಚತೇ, ವುಚ್ಚತಿ, ಗುಸ್ಸತಿ, ವುಯ್ಹತಿ।
೪೮೮, ೪೮೧. ಹ ವಿಪರಿಯಯೋ ಲೋ ವಾ।
ಹಕಾರಸ್ಸ ವಿಪರಿಯಯೋ ಹೋತಿ ಯಪಚ್ಚಯೇ ಪರೇ, ಯಪಚ್ಚಯಸ್ಸ ಚ ಲೋ ಹೋತಿ ವಾ।
ವುಲ್ಹತಿ, ವುಯ್ಹತಿ।
೪೮೯, ೫೧೯. ಗಹಸ್ಸ ಘೇ ಪ್ಪೇ।
ಗಹಇಚ್ಚೇತಸ್ಸ ಧಾತುಸ್ಸ ಸಬ್ಬಸ್ಸ ಘೇಕಾರೋ ಹೋತಿ ಪ್ಪಪಚ್ಚಯೇ ಪರೇ।
ಘೇಪ್ಪತಿ।
೪೯೦, ೫೧೮. ಹಲೋ ಪೋ ಣ್ಹಾಮ್ಹಿ।
ಗಹಇಚ್ಚೇತಸ್ಸ ಧಾತುಸ್ಸ ಹಕಾರಸ್ಸ ಲೋಪೋ ಹೋತಿ ಣ್ಹಾಮ್ಹಿ ಪಚ್ಚಯೇ ಪರೇ।
ಗಣ್ಹಾತಿ।
೪೯೧, ೫೨೩. ಕರಸ್ಸ ಕಾಸತ್ತಮಜ್ಜತನಿಮ್ಹಿ।
ಕರಇಚ್ಚೇತಸ್ಸ ಧಾತುಸ್ಸ ಸಬ್ಬಸ್ಸ ಕಾಸತ್ತಂ ಹೋತಿ ವಾ ಅಜ್ಜತನಿಮ್ಹಿ ವಿಭತ್ತಿಮ್ಹಿ।
ಅಕಾಸಿ, ಅಕಾಸುಂ। ಅಕರಿ, ಅಕರುಂ।
ಕಾಸತ್ತಮಿತಿಭಾವನಿದ್ದೇಸೇನ ಅಞ್ಞತ್ಥಾಪಿ ಸಾಗಮೋ ಹೋತಿ। ಅಹೋಸಿ, ಅದಾಸಿ।
೪೯೨, ೪೯೯. ಅಸಸ್ಮಾ ಮಿಮಾನಂ ಮ್ಹಿಮ್ಹಾ’ ನ್ತಲೋಪೋ ಚ।
ಅಸಇಚ್ಚೇತಾಯ ಧಾತುಯಾ ಮಿಮಇಚ್ಚೇತೇಸಂ ವಿಭತ್ತೀನಂ ಮ್ಹಿಮ್ಹಾದೇಸಾ ಹೋನ್ತಿ ವಾ, ಧಾತ್ವನ್ತಸ್ಸ ಲೋಪೋ ಚ।
ಅಮ್ಹಿ
೪೯೩, ೪೯೮. ಥಸ್ಸ ತ್ಥತ್ತಂ।
ಅಸಇಚ್ಚೇತಾಯ ಧಾತುಯಾ ಥಸ್ಸ ವಿಭತ್ತಿಸ್ಸ ತ್ಥತ್ತಂ ಹೋತಿ, ಧಾತ್ವನ್ತಸ್ಸ ಲೋಪೋ ಚ।
ಅತ್ಥ।
೪೯೪, ೪೯೫. ತಿಸ್ಸ ತ್ಥಿತ್ತಂ।
ಅಸಇಚ್ಚೇತಾಯ ಧಾತುಯಾ ತಿಸ್ಸ ವಿಭತ್ತಿಸ್ಸ ತ್ಥಿತ್ತಂ ಹೋತಿ, ಧಾತ್ವನ್ತಸ್ಸ ಲೋಪೋ ಚ।
ಅತ್ಥಿ।
೪೯೫, ೫೦೦. ತುಸ್ಸ ತ್ಥುತ್ತಂ।
ಅಸಇಚ್ಚೇತಾಯ ಧಾತುಯಾ ತುಸ್ಸ ವಿಭತ್ತಿಸ್ಸ ತ್ಥುತ್ತಂ ಹೋತಿ, ಧಾತ್ವನ್ತಸ್ಸ ಲೋಪೋ ಚ।
ಅತ್ಥು।
೪೯೬, ೪೯೭. ಸಿಮ್ಹಿ ಚ।
ಅಸಸ್ಸೇವ ಧಾತುಸ್ಸ ಸಿಮ್ಹಿ ವಿಭತ್ತಿಮ್ಹಿ ಅನ್ತಸ್ಸ ಲೋಪೋ ಚ ಹೋತಿ।
ಕೋ ನು ತ್ವಮಸಿ ಮಾರಿಸ।
೪೯೭, ೪೭೭. ಲಭಸ್ಮಾ ಈ ಇಂನಂ ತ್ಥ ತ್ಥಂ।
ಲಭಇಚ್ಚೇತಾಯ ಧಾತುಯಾ ಈ ಇಂನಂ ವಿಭತ್ತೀನಂ ತ್ಥ ತ್ಥಂಆದೇಸಾ ಹೋನ್ತಿ, ಧಾತ್ವನ್ತಸ್ಸ ಲೋಪೋ ಚ।
ಅಲತ್ಥ, ಅಲತ್ಥಂ।
೪೯೮, ೪೮೦. ಕುಸಸ್ಮಾ ದೀ ಚ್ಛಿ।
ಕುಸಇಚ್ಚೇತಾಯ ಧಾತುಯಾ ಈವಿಭತ್ತಿಸ್ಸ ಚ್ಛಿಹೋತಿ, ಧಾತ್ವನ್ತಸ್ಸ ಲೋಪೋ ಚ।
ಅಕ್ಕೋಚ್ಛಿ।
೪೯೯, ೫೦೭. ದಾಧಾತುಸ್ಸ ದಜ್ಜಂ।
ದಾಇಚ್ಚೇತಸ್ಸ ಧಾತುಸ್ಸ ಸಬ್ಬಸ್ಸ ದಜ್ಜಾದೇಸೋ ಹೋತಿ ವಾ।
ದಜ್ಜಾಮಿ, ದಜ್ಜೇಯ್ಯ, ದದಾಮಿ, ದದೇಯ್ಯ।
೫೦೦, ೪೮೬. ವದಸ್ಸ ವಜ್ಜಂ।
ವದಇಚ್ಚೇತಸ್ಸ ಧಾತುಸ್ಸ ಸಬ್ಬಸ್ಸ ವಜ್ಜಾದೇಸೋ ಹೋತಿ ವಾ।
ವಜ್ಜಾಮಿ, ವಜ್ಜೇಯ್ಯ, ವದಾಮಿ, ವದೇಯ್ಯ।
೫೦೧, ೪೪೩. ಗಮಿಸ್ಸ ಘಮ್ಮಂ।
ಗಮುಇಚ್ಚೇತಸ್ಸ ಧಾತುಸ್ಸ ಸಬ್ಬಸ್ಸ ಘಮ್ಮಾದೇಸೋ ಹೋತಿ ವಾ।
ಘಮ್ಮತು। ಘಮ್ಮಾಹಿ, ಘಮ್ಮಾಮಿ।
ವಾತಿ ಕಿಮತ್ಥಂ? ಗಚ್ಛತು, ಗಚ್ಛಾಹಿ, ಗಚ್ಛಾಮಿ।
೫೦೨, ೪೯೩. ಯಮ್ಹಿ ದಾ ಧಾ ಮಾ ಠಾ ಹಾ ಪಾ ಮಹಮಥಾದೀನಮೀ।
ಯಮ್ಹಿ ಪಚ್ಚಯೇ ಪರೇ ದಾ ಧಾ ಮಾ ಠಾ ಹಾ ಪಾ ಮಹ ಮಥ ಇಚ್ಚೇವಮಾದೀನಂ ಧಾತೂನಂ ಅನ್ತೋ ಈಕಾರಮಾಪಜ್ಜತೇ।
ದೀಯತಿ, ಧೀಯತಿ, ಮೀಯತಿ, ಠೀಯತಿ, ಹೀಯತಿ, ಪೀಯತಿ, ಮಹೀಯತಿ, ಮಥೀಯತಿ।
೫೦೩, ೪೮೫. ಯಜಸ್ಸಾದಿಸ್ಸಿ।
ಯಜಇಚ್ಚೇತಸ್ಸ ಧಾತುಸ್ಸ ಆದಿಸ್ಸ ಇಕಾರಾದೇಸೋ ಹೋತಿ ಯಪಚ್ಚಯೇ ಪರೇ।
ಇಜ್ಜತೇ ಮಯಾ ಬುದ್ಧೋ।
೫೦೪, ೪೭೦. ಸಬ್ಬತೋ ಉಂ ಇಂಸು।
ಸಬ್ಬೇಹಿ ಧಾತೂಹಿ ಉಂವಿಭತ್ತಿಸ್ಸ ಇಂಸುಆದೇಸೋ ಹೋತಿ।
ಉಪಸಙ್ಕಮಿಂಸು
೫೦೫, ೪೮೨. ಜರ ಮರಾನಂ ಜೀರ ಜಿಯ್ಯ ಮಿಯ್ಯಾ ವಾ।
ಜರ ಮರ ಇಚ್ಚೇತೇಸಂ ಧಾತೂನಂ ಜೀರ ಜಿಯ್ಯ ಮಿಯ್ಯಾದೇಸಾ ಹೋನ್ತಿ ವಾ।
ಜೀರತಿ, ಜೀರನ್ತಿ, ಜಿಯ್ಯತಿ, ಜಿಯ್ಯನ್ತಿ, ಮಿಯ್ಯತಿ, ಮಿಯ್ಯನ್ತಿ, ಮರತಿ, ಮರನ್ತಿ।
೫೦೬, ೪೯೬. ಸಬ್ಬತ್ಥಾ’ ಸಸ್ಸಾದಿಲೋಪೋ ಚ।
ಸಬ್ಬತ್ಥ ವಿಭತ್ತಿಪಚ್ಚಯೇಸು ಅಸಇಚ್ಚೇತಸ್ಸ ಧಾತುಸ್ಸ ಆದಿಸ್ಸ ಲೋಪೋ ಹೋತಿ ವಾ।
ಸಿಯಾ, ಸನ್ತಿ, ಸನ್ತೇ, ಸಮಾನೋ।
ವಾತಿ ಕಿಮತ್ಥಂ? ಅಸಿ।
೫೦೭, ೫೦೧. ಅಸಬ್ಬಧಾತುಕೇ ಭೂ।
ಅಸಸ್ಸೇವ ಧಾತುಸ್ಸ ಭೂಹೋತಿ ವಾ ಅಸಬ್ಬಧಾತುಕೇ।
ಭವಿಸ್ಸತಿ। ಭವಿಸ್ಸನ್ತಿ।
ವಾತಿ ಕಿಮತ್ಥಂ? ಆಸುಂ।
೫೦೮, ೫೧೫. ಏಯ್ಯಸ್ಸ ಞಾತೋ ಇಯಾ ಞಾ।
ಏಯ್ಯಸ್ಸ ವಿಭತ್ತಿಸ್ಸ ಞಾಇಚ್ಚೇತಾಯ ಧಾತುಯಾ ಪರಸ್ಸ ಇಯಾ ಞಾಆದೇಸಾ ಹೋನ್ತಿ ವಾ।
ಜಾನಿಯಾ, ಜಞ್ಞಾ।
ವಾತಿ ಕಿಮತ್ಥಂ? ಜಾನೇಯ್ಯ।
೫೦೯, ೫೧೬. ನಾಸ್ಸ ಲೋಪೋ ಯಕಾರತ್ತಂ।
ಞಾಇಚ್ಚೇತಾಯ ಧಾತುಯಾ ಪರಸ್ಸ ನಾಪಚ್ಚಯಸ್ಸ ಲೋಪೋ ಹೋತಿ ವಾ, ಯಕಾರತ್ತಞ್ಚ।
ಜಞ್ಞಾ, ನಾಯತಿ।
ವಾತಿ ಕಿಮತ್ಥಂ? ಜಾನಾತಿ।
೫೧೦, ೪೮೭. ಲೋಪಞ್ಚೇತ್ತಮಕಾರೋ।
ಅಕಾರಪಚ್ಚಯೋ ಲೋಪಮಾಪಜ್ಜತೇ, ಏತ್ತಞ್ಚ ಹೋತಿ ವಾ।
ವಜ್ಜೇಮಿ, ವದೇಮಿ, ವಜ್ಜಾಮಿ, ವದಾಮಿ।
೫೧೧, ೫೨೧. ಉತ್ತಮೋಕಾರೋ।
ಓಕಾರಪಚ್ಚಯೋ ಉತ್ತಮಾಪಜ್ಜತೇ ವಾ।
ಕುರುತೇ, ಕರೋತಿ।
ಓಕಾರೋತಿ
೫೧೨, ೫೨೨. ಕರಸ್ಸಾಕಾರೋ ಚ।
ಕರಇಚ್ಚೇತಸ್ಸ ಧಾತುಸ್ಸ ಅಕಾರೋ ಉತ್ತಮಾಪಜ್ಜತೇ ವಾ।
ಕುರುತೇ, ತರೋತಿ, ತುಬ್ಬನ್ತಿ, ಕಯಿರತಿ।
ಕರಸ್ಸೇತಿ ಕಿಮತ್ಥಂ? ಸರತಿ, ಮರತಿ।
೫೧೩, ೪೩೫. ಓ ಅವ ಸರೇ।
ಓಕಾರಸ್ಸ ಧಾತ್ವನ್ತಸ್ಸ ಸರೇ ಪರೇ ಅವಾದೇಸೋ ಹೋತಿ।
ಚವತಿ। ಭವತಿ।
ಓತಿ ಕಿಮತ್ಥಂ? ಜಯತಿ।
೫೧೪, ೪೯೧. ಏ ಅಯ।
ಏಕಾರಸ್ಸ ಧಾತ್ವನ್ತಸ್ಸ ಸರೇ ಪರೇ ಅಯಾದೇಸೋ ಹೋತಿ।
ನಯತಿ, ಜಯತಿ।
೫೧೫, ೫೪೧. ತೇ ಆವಾಯಾ ಕಾರಿತೇ।
ತೇ ಓ ಏಇಚ್ಚೇತೇ ಆವ ಆಯಾದೇಸೇ ಪಾಪುಣನ್ತಿ ಕಾರಿತೇ।
ಲಾವೇತಿ, ನಾಯೇತಿ।
ಯೋಗವಿಭಾಗೇನ ಅಞ್ಞಸ್ಮಿಮ್ಪಿ ಏಕಾರಸ್ಸ ಆಯಾದೇಸೋ ಹೋತಿ। ಗಾಯತಿ, ಗಾಯನ್ತಿ।
೫೧೬, ೪೬೬. ಇಕಾರಾಗಮೋ ಅಸಬ್ಬಧಾತುಕಮ್ಹಿ।
ಸಬ್ಬಸ್ಮಿಂ ಅಸಬ್ಬಧಾತುಕಮ್ಹಿ ಇಕಾರಾಗಮೋ ಹೋತಿ।
ಗಮಿಸ್ಸತಿ, ಕರಿಸ್ಸತಿ, ಲಭಿಸ್ಸತಿ, ಪಚಿಸ್ಸತಿ।
ಅಸಬ್ಬಧಾತುಕಮ್ಹೀತಿ ಕಿಮತ್ಥಂ? ಗಚ್ಛತಿ, ಕರೋತಿ, ಲಭತಿ, ಪಚತಿ।
೫೧೭, ೪೮೮. ಕ್ವಚಿ ಧಾತುವಿಭತ್ತಿಪಚ್ಚಯಾನಂ ದೀಘ ವಿಪರೀತಾದೇಸಲೋಪಾಗಮಾ ಚ।
ಇಧ ಆಖ್ಯಾತೇ ಅನಿದ್ದಿಟ್ಠೇಸು ಸಾಧನೇಸು ಕ್ವಚಿ ಧಾತುವಿಭತ್ತಿಪಚ್ಚಯಾನಂ ದೀಘವಿಪರೀತಾದೇಸಲೋಪಾಗಮಇಚ್ಚೇತಾನಿ ಕಾರಿಯಾನಿ ಜಿನವಚನಾನುರೂಪಾನಿ ಕಾತಬ್ಬಾನಿ।
ಜಾಯತಿ
೫೧೮, ೪೪೬. ಅತ್ತನೋಪದಾನಿ ಪರಸ್ಸಪದತ್ತಂ।
ಅತ್ತನೋಪದಾನಿ ಕ್ವಚಿ ಪರಸ್ಸಪದತ್ತಮಾಪಜ್ಜನ್ತೇ।
ವುಚ್ಚತಿ, ಲಬ್ಭತಿ, ಪಚ್ಚತಿ।
ಕ್ವಚೀತಿ ಕಿಮತ್ಥಂ? ಕರೀಯತೇ, ಲಬ್ಭತೇ, ಪಚ್ಚತೇ।
೫೧೯, ೪೫೭. ಅಕಾರಾಗಮೋ ಹಿಯ್ಯತ್ತನೀಅಜ್ಜತನೀಕಾಲಾತಿಪತ್ತೀಸು।
ಕ್ವಚಿ ಅಕಾರಾಗಮೋ ಹೋತಿ ಹಿಯ್ಯತ್ತನೀ ಅಜ್ಜತನೀಕಾಲಾತಿಪತ್ತಿಇಚ್ಚೇತಾಸು ವಿಭತ್ತೀಸು।
ಅಗಮಾ, ಅಗಮೀ, ಅಗಮಿಸ್ಸಾ।
ಕ್ವಚೀತಿ ಕಿಮತ್ಥಂ? ಗಮಾ, ಗಮೀ, ಗಮಿಸ್ಸಾ।
೫೨೦, ೫೦೨. ಬ್ರೂತೋ ಈ ತಿಮ್ಹಿ।
ಬ್ರೂಇಚ್ಚೇತಾಯ ಧಾತುಯಾ ಈಕಾರಾಗಮೋ ಹೋತಿ ತಿಮ್ಹಿ ವಿಭತ್ತಿಮ್ಹಿ।
ಬ್ರವೀತಿ।
೫೨೧, ೪೨೫. ಧಾತುಸ್ಸನ್ತೋ ಲೋಪೋ’ನೇಕಸರಸ್ಸ।
ಧಾತುಸ್ಸ ಅನ್ತೋ ಕ್ವಚಿ ಲೋಪೋ ಹೋತಿ ಅನೇಕಸರಸ್ಸ।
ಗಚ್ಛತಿ, ಸರತಿ, ಮರತಿ।
ಅನೇಕಸರಸ್ಸೇತಿ ಕಿಮತ್ಥಂ? ಪಾತಿ, ಯಾತಿ, ವಾತಿ।
ಕ್ವಚೀತಿ ಕಿಮತ್ಥಂ? ಮಹೀಯತಿ, ಮಥೀಯತಿ।
೫೨೨, ೪೭೬. ಇಸುಯಮೂನಮನ್ತೋ ಚ್ಛೋ ವಾ।
ಇಸು ಯಮು ಇಚ್ಚೇತೇಸಂ ಧಾತೂನಂ ಅನ್ತೋ ಚ್ಛೋ ಹೋತಿ ವಾ। ಇಚ್ಛತಿ, ನಿಯಚ್ಛತಿ।
ವಾತಿ ಕಿಮತ್ಥಂ? ಏಸತಿ, ನಿಯಮತಿ।
೫೨೩, ೫೨೬. ಕಾರಿತಾನಂ ಣೋ ಲೋಪಂ।
ಕಾರಿತಇಚ್ಚೇತೇಸಂ ಪಚ್ಚಯಾನಂ ಣೋ ಲೋಪಮಾಪಜ್ಜತೇ।
ಕಾರೇತಿ, ಕಾರಯತಿ, ಕಾರಾಪೇತಿ, ಕಾರಾಪಯತಿ।
ಸಾಸನತ್ಥಂ ಸಮುದ್ದಿಟ್ಠಂ, ಮಯಾಖ್ಯಾತಂ ಸಮಾಸತೋ।
ಸಕಂ ಬುದ್ಧಿವಿಸೇಸೇನ, ಚಿನ್ತಯನ್ತು ವಿಚಕ್ಖಣಾ॥
ಇತಿ ಆಖ್ಯಾತಕಪ್ಪೇ ಚತುತ್ಥೋ ಕಣ್ಡೋ।
ಆಖ್ಯಾತಕಪ್ಪೋ ನಿಟ್ಠಿತೋ।