॥ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ॥
ವುತ್ತೋದಯಂ
೧. ಸಞ್ಞಾಪರಿಭಾಸಾನಿದ್ದೇಸ-ಪಠಮಪರಿಚ್ಛೇದ
ರತನತ್ತಯಪ್ಪಣಾಮ
೧.
ನಮ’ತ್ಥು ಜನ ಸನ್ತಾನ, ತಮ ಸನ್ತಾನ ಭೇದಿನೋ।
ಧಮ್ಮು’ಜ್ಜಲನ್ತ ರುಚಿನೋ, ಮುನಿನ್ದೋ’ದಾತ ರೋಚಿನೋ॥
ನಿಮಿತ್ತ
೨.
ಪಿಙ್ಗಲಾ’ಚರಿಯಾದೀಹಿ, ಛನ್ದಂ ಯ ಮುದಿತಂ ಪುರಾ।
ಸುದ್ಧಮಾಗಧಿಕಾನಂ ತಂ, ನ ಸಾಧೇತಿ ಯಥಿಚ್ಛಿತಂ
ಗನ್ಥಪರಿಮಾಣ
೩.
ತತೋ ಮಾಗಧಭಾಸಾಯ, ಮತ್ತಾ,ವಣ್ಣ,ವಿಭೇದನಂ।
ಲಕ್ಖ್ಯ ಲಕ್ಖಣ ಸಂಯುತ್ತಂ, ಪಸನ್ನ’ತ್ಥ,ಪದ,ಕ್ಕಮಂ॥
ಅಭಿಧಾನಾದಿ
೪.
ಇದಂ ವುತ್ತೋದಯಂ ನಾಮ, ಲೋಕಿಯ’ಚ್ಛನ್ದನಿಸ್ಸಿತಂ।
ಆರಭಿಸ್ಸ’ಮಹಂ ದಾನಿ, ತೇಸಂ ಸುಖವಿಬುದ್ಧಿಯಾ॥
ಗಣಸಙ್ಕೇತಸಞ್ಞಾ
೫.
ಸಬ್ಬಗ್ಲಾ ಮ್ನಾ,’ದಿಗಲಹೂ, ಭ್ಯಾ’,ಮಜ್ಝ’ನ್ತ ಗರೂ ಜಸಾ।
ಮಜ್ಝ’ನ್ತಲಾ ರ,ತೇ’ತೇ’ಟ್ಠ, ಗಣಾ ಗೋ ಗರು,ಲೋ ಲಹು॥
ಗಣನಿಯಮ
೬.
ಭ,ಜ,ಸಾ
ಅರಿಯಾದಿಮ್ಹಿ ವಿಞ್ಞೇಯ್ಯಾ, ಗಣೋ ಇಧ ಚತು’ಕ್ಕಲೋ॥
ಗರು,ಲಹುಸರೂಪ
೭.
ಸಂಯೋಗಾ’ದಿ ಚ, ದೀಘೋ ಚ, ನಿಗ್ಗಹೀತಪರೋ ಚ, ಯೋ।
ಗರು, ವಙ್ಕೋ, ಪಾದನ್ತೋ,ವಾ, ರಸ್ಸೋ’ಞ್ಞೋ ಮತ್ತಿಕೋ ಲು’ಜು॥
೮.
ಪರೇ ಪಾದಾದಿಸಂಯೋಗೇ, ಯೋ ಪುಬ್ಬೋ ಗರುಕ’ಕ್ಖರೋ।
ಲಹು ಸ ಕ್ವಚಿ ವಿಞ್ಞೇಯ್ಯೋ, ತದುದಾಹರಣಂ ಯಥಾ॥
೯.
ದಸ್ಸನರಸಾ’ನುಭಾವನೇ, ನಿಬದ್ಧಗೇಧಾ ಜಿನಸ್ಸ’ಯಂ ಜನತಾ।
ವಿಮ್ಹಯಜನನೀ ಸಞ್ಞತ, ಕ್ರಿಯಾ ನು ಕಂ ನಾ’ನುರಞ್ಜಯತಿ॥
೧೦.
ವಿಞ್ಞೇಯ್ಯಾ ಲೋಕತೋ ಸಞ್ಞಾ, ಸಮುದ್ದೋ,ಸು,ರಸಾದಿನಂ।
ಪಾದೋಞೇಯ್ಯೋ ಚತುತ್ಥಂ’ಸೋ, ಪದಚ್ಛೇದೋ ಯತೀ ಭವೇ॥
೧೧.
ಸಮ,ಮಡ್ಢಸಮಂ, ವುತ್ತಂ, ವಿಸಮಂ ಚಾ’ಪರಂ ತಿಧಾ।
ಸಮಾ ಲಕ್ಖಣತೋ ಪಾದಾ, ಚತ್ತಾರೋ ಯಸ್ಸ ತಂ ಸಮಂ॥
೧೨.
ಯಸ್ಸ’ನ್ತಿಮೇನ ದುತಿಯೋ, ತತಿಯೇನಾ’ದಿಮೋ ಸಮೋ।
ತ’ದಡ್ಢಸಮ, ಮಞ್ಞಂ ತು, ಭಿನ್ನ ಲಕ್ಖಣ ಪಾದಿಕಂ॥
೧೩.
ಪಾದ’ಮೇಕಕ್ಖರಾ’ರಬ್ಭ, ಯಾವ ಛಬ್ಬೀಸತ’ಕ್ಖರಾ।
ಭವೇ ಪಾದೇಹಿ ತಂ ಛನ್ದಂ, ನಾನಾನಾಮೋ’ದಿತಂ ತತೋ॥
೧೪.
ದಣ್ಡಕಾ ಚಣ್ಡವುಟ್ಠ್ಯಾ’ದಿ, ಪಾದೇಹಿ ಛಹಿ, ತೀಹಿ ತು।
‘ಗಾಥಾ’ತಿ ಚ ಪರತ್ಥೇ’ವಂ, ಛನ್ದೋ ಸಞ್ಞಾ ಪಕಾಸಿತಾ॥
೧೫.
ಅನನ್ತರೋ’ದಿತಂ ಚ’ಞ್ಞ, ಮೇತಂ ಸಾಮಞ್ಞ ನಾಮತೋ।
‘ಗಾಥಾ’ಇಚ್ಚೇವ ನಿದ್ದಿಟ್ಠಂ, ಮುನಿನ್ದವಚನೇ ಪನ॥
೧೬.
ವಿಸೇಸನಾಮತೋ ಕಿಞ್ಚಿ, ಗಹೇತ್ವಾ ಸಬ್ಬಥೋ’ಚಿತಂ।
ದಸ್ಸಯಿಸ್ಸಾಮ’ಹಂ ತೇ’ತ್ಥ, ನಾಮಾನಾ’ವಿ ಭವಿಸ್ಸರೇ॥
ಇತಿ ವುತ್ತೋದಯೇ ಛನ್ದಸಿ ಸಞ್ಞಾಪರಿಭಾಸಾ ನಿದ್ದೇಸೋ ನಾಮ
ಪಠಮೋ ಪರಿಚ್ಛೇದೋ।