೩. ಗುಣಾವಬೋಧ-ತತಿಯಪರಿಚ್ಛೇದ
ಅನುಸನ್ಧಿ
೧೧೬.
ಸಮ್ಭವನ್ತಿ
ದಸ್ಸೇಸ್ಸಂ ತೇ ತತೋ ದಾನಿ, ಸದ್ದೇ ಸಮ್ಭೂಸಯನ್ತಿ ಯೇ॥
ಸದ್ದಾಲಙ್ಕಾರ ಉದ್ದೇಸ
೧೧೭.
ಪಸಾದೋ’ಜೋ, ಮಧುರತಾ, ಸಮತಾ, ಸುಖುಮಾಲತಾ।
ಸಿಲೇಸೋ’ದರತಾ, ಕನ್ತಿ, ಅತ್ಥಬ್ಯತ್ತಿ, ಸಮಾಧಯೋ॥
ಸದ್ದಾಲಙ್ಕಾರ ಪಯೋಜನ
೧೧೮.
ಗುಣೇಹೇ’ತೇಹಿ ಸಮ್ಪನ್ನೋ, ಬನ್ಧೋ ಕವಿಮನೋಹರೋ।
ಸಮ್ಪಾದಿಯತಿ ಕತ್ತೂನಂ, ಕಿತ್ತಿ ಮಚ್ಚನ್ತನಿಮ್ಮಲಂ॥
ಸದ್ದಾಲಙ್ಕಾರ ನಿದ್ದೇಸ
೧೧೯.
ಅದೂರಾಹಿತಸಮ್ಬನ್ಧ, ಸುಭಗಾ ಯಾ ಪದಾ’ವಲಿ।
ಸುಪಸಿದ್ಧಾ’ಭಿಧೇಯ್ಯಾ’ಯಂ, ಪಸಾದಂ ಜನಯೇ ಯಥಾ॥
೧೨೦.
ಅಲಙ್ಕರೋನ್ತಾ ವದನಂ, ಮುನಿನೋ’ಧರರಂಸಿಯೋ।
ಸೋಭನ್ತೇ’ರುಣರಂಸೀ’ವ, ಸಮ್ಪತನ್ತಾ’ಮ್ಬುಜೋ’ದರೇ॥
೧೨೧.
ಓಜೋ ಸಮಾಸಬಾಹುಲ್ಯ, ಮೇಸೋ ಗಜ್ಜಸ್ಸ ಜೀವಿತಂ।
ಪಜ್ಜೇಪ್ಯ’ನಾ’ಕುಲೋ ಸೋ’ಯಂ,
ಕನ್ತೋ ಕಾಮೀಯತೇ ಯಥಾ॥
೧೨೨.
ಮುನಿನ್ದ ಮನ್ದ ಸಞ್ಜಾತ, ಹಾಸ ಚನ್ದನ ಲಿಮ್ಪಿತಾ।
ಪಲ್ಲವಾ ಧವಲಾ ತಸ್ಸೇ, ವೇಕೋ ನಾ’ಧರಪಲ್ಲವೋ॥
೧೨೩.
ಪದಾ’ಭಿಧೇಯ್ಯವಿಸಯಂ, ಸಮಾಸ ಬ್ಯಾಸ ಸಮ್ಭವಂ।
ಯಂ ಪಾರಿಣತ್ಯಂ ಹೋತೀ’ಹ, ಸೋಪಿ ಓಜೋ’ವ ತಂ ಯಥಾ॥
೧೨೪.
ಜೋತಯಿತ್ವಾನ ಸದ್ಧಮ್ಮಂ, ಸನ್ತಾರೇತ್ವಾ ಸದೇವಕೇ।
ಜಲಿತ್ವಾ ಅಗ್ಗಿಖನ್ಧೋ’ವ, ನಿಬ್ಬುತೋ ಸೋ ಸಸಾವಕೋ॥
೧೨೫.
ಮತ್ಥಕಟ್ಠೀ ಮತಸ್ಸಾ’ಪಿ, ರಜೋಭಾವಂ ವಜನ್ತು ಮೇ।
ಯತೋ ಪುಞ್ಞೇನ ತೇ ಸೇನ್ತು, ಜಿನ ಪಾದ’ಮ್ಬುಜದ್ವಯೇ॥
೧೨೬.
ಇಚ್ಚತ್ರ
ಜಾಯತೇ’ಯಂ ಗುಣೋ ತಿಕ್ಖ, ಪಞ್ಞಾನಮಭಿಯೋಗತೋ॥
೧೨೭.
ಮಧುರತ್ತಂ ಪದಾಸತ್ತಿ, ರ’ನುಪ್ಪಾಸವಸಾ ದ್ವಿಧಾ।
ಸಿಯಾ ಸಮಸುತಿ ಪುಬ್ಬಾ, ವಣ್ಣಾ’ವುತ್ತಿ ಪರೋ ಯಥಾ॥
೧೨೮.
ಯದಾ ಏಸೋ’ಭಿಸಮ್ಬೋಧಿಂ, ಸಮ್ಪತ್ತೋ ಮುನಿಪುಙ್ಗವೋ।
ತದಾ ಪಭುತಿ ಧಮ್ಮಸ್ಸ, ಲೋಕೇ ಜಾತೋ ಮಹು’ಸ್ಸವೋ॥
೧೨೯.
ಮುನಿನ್ದಮನ್ದಹಾಸಾ ತೇ, ಕುನ್ದ ಸನ್ದೋಹವಿಬ್ಭಮಾ।
ದಿಸನ್ತ ಮನುಧಾವನ್ತಿ, ಹಸನ್ತಾ ಚನ್ದಕನ್ತಿಯೋ॥
೧೩೦.
ಸಬ್ಬಕೋಮಲವಣ್ಣೇಹಿ, ನಾ’ನುಪ್ಪಾಸೋ ಪಸಂಸಿಯೋ।
ಯಥಾ’ಯಂ ಮಾಲತೀಮಾಲಾ, ಲಿನ ಲೋಲಾ’ಲಿಮಾಲಿನೀ॥
೧೩೧.
ಮುದೂಹಿ ವಾ ಕೇವಲೇಹಿ, ಕೇವಲೇಹಿ ಫುಟೇಹಿ ವಾ,
ಮಿಸ್ಸೇಹಿ ವಾ ತಿಧಾ ಹೋತಿ, ವಣ್ಣೇಹಿ ಸಮತಾ ಯಥಾ॥
ಕೇವಲಮುದುಸಮತಾ
೧೩೨.
ಕೋಕಿಲಾ’ಲಾಪಸಂವಾದೀ, ಮುನಿನ್ದಾ’ಲಾಪವಿಬ್ಭಮೋ।
ಹದಯಙ್ಗಮತಂ ಯಾತಿ, ಸತಂ ದೇತಿ ಚ ನಿಬ್ಬುತಿಂ॥
ಕೇವಲಫುಟಸಮತಾ
೧೩೩.
ಸಮ್ಭಾವನೀಯಸಮ್ಭಾವಂ, ಭಗವನ್ತಂ ಭವನ್ತಗುಂ।
ಭವನ್ತಸಾಧನಾ’ಕಙ್ಖೀ, ಕೋ ನ ಸಮ್ಭಾವಯೇ ವಿಭುಂ॥
ಮಿಸ್ಸಕಸಮತಾ
೧೩೪.
ಲದ್ಧಚನ್ದನಸಂಸಗ್ಗ, ಸುಗನ್ಧಿ ಮಲಯಾ’ನಿಲೋ।
ಮನ್ದ ಮಾಯಾತಿ ಭೀತೋ’ವ, ಮುನಿನ್ದಮುಖಮಾರುತಾ॥
೧೩೫.
ಅನಿಟ್ಠುರ’ಕ್ಖರ’ಪ್ಪಾಯಾ, ಸಬ್ಬಕೋಮಲ ನಿಸ್ಸಟಾ।
ಕಿಚ್ಛಮುಚ್ಚಾರಣಾ’ಪೇತ, ಬ್ಯಞ್ಜನಾ ಸುಖುಮಾಲತಾ॥
೧೩೬.
ಪಸ್ಸನ್ತಾ ರೂಪವಿಭವಂ, ಸುಣನ್ತಾ ಮಧುರಂ ಗಿರಂ।
ಚರನ್ತಿ ಸಾಧೂ ಸಮ್ಬುದ್ಧ, ಕಾಲೇ ಕೇಳಿಪರಮ್ಮುಖಾ॥
೧೩೭.
ಅಲಙ್ಕಾರವಿಹೀನಾ’ಪಿ, ಸತಂ ಸಮ್ಮುಖತೇ’ದಿಸೀ।
ಆರೋಹತಿ ವಿಸೇಸೇನ, ರಮಣೀಯಾ ತ’ದುಜ್ಜಲಾ॥
೧೩೮.
ರೋಮಞ್ಚ ಪಿಞ್ಛ ರಚನಾ, ಸಾಧು ವಾದಾಹಿತದ್ಧನೀ।
ಲಳನ್ತಿ’ಮೇ ಮುನಿಮೇಘು, ಮ್ಮದಾ ಸಾಧು ಸಿಖಾವಲಾ॥
೧೩೯.
ಸುಖುಮಾಲತ್ತ ಮತ್ಥೇ’ವ, ಪದತ್ಥವಿಸಯಮ್ಪಿ ಚ।
ಯಥಾ ಮತಾದಿಸದ್ದೇಸು, ಕಿತ್ತಿಸೇಸಾದಿಕಿತ್ತನಂ॥
೧೪೦.
ಸಿಲಿಟ್ಠ ಪದ ಸಂಸಗ್ಗ, ರಮಣೀಯ ಗುಣಾ’ಲಯೋ।
ಸಬನ್ಧಗಾರವೋ ಸೋ’ಯಂ, ಸಿಲೇಸೋ ನಾಮ ತಂ ಯಥಾ॥
೧೪೧.
ಬಾಲಿ’ನ್ದುವಿಬ್ಭಮ’ಚ್ಛೇದಿ, ನಖರಾ’ವಲಿ ಕನ್ತಿಭಿ।
ಸಾ ಮುನಿನ್ದಪದ’ಮ್ಭೋಜ, ಕನ್ತಿ ವೋ ವಲಿತಾ’ವತಂ॥
೧೪೨.
ಉಕ್ಕಂಸವನ್ತೋ ಯೋಕೋಚಿ, ಗುಣೋ ಯದಿ ಪತೀಯತೇ।
ಉದಾರೋ’ಯಂ ಭವೇ ತೇನ, ಸನಾಥಾ ಬನ್ಧಪದ್ಧತಿ॥
೧೪೩.
ಪಾದಮ್ಭೋಜ ರಜೋ ಲಿತ್ತ, ಗತ್ತಾ ಯೇ ತವ ಗೋತಮ।
ಅಹೋ! ತೇ ಜನ್ತವೋ ಯನ್ತಿ, ಸಬ್ಬಥಾ ನಿರಜತ್ತನಂ॥
೧೪೪.
ಏವಂ ಜಿನಾ’ನುಭಾವಸ್ಸ, ಸಮುಕ್ಕಂಸೋ’ತ್ರ ದಿಸ್ಸತಿ।
ಪಞ್ಞವಾ ವಿಧಿನಾ’ನೇನ, ಚಿನ್ತಯೇ ಪರ ಮೀದಿಸಂ॥
೧೪೫.
ಉದಾರೋ ಸೋಪಿ ವಿಞ್ಞೇಯ್ಯೋ, ಯಂ ಪಸತ್ಥ ವಿಸೇಸನಂ।
ಯಥಾ ಕೀಳಾಸರೋ ಲೀಲಾ, ಹಾಸೋ ಹೇಮಙ್ಗದಾ’ದಯೋ॥
೧೪೬.
ಲೋಕಿಯ’ತ್ಥಾ’ನ’ತಿಕ್ಕನ್ತಾ, ಕನ್ತಾ ಸಬ್ಬಜನಾನಪಿ।
ಕನ್ತಿ ನಾಮಾ’ತಿವುತ್ತಸ್ಸ, ವುತ್ತಾ ಸಾ ಪರಿಹಾರತೋ॥
ಯಥಾ ಮುನಿನ್ದ ಇಚ್ಚಾದಿ।
೧೪೭.
ಅತ್ಥಬ್ಯತ್ತಾ’ಭಿಧೇಯ್ಯಸ್ಸಾ,
ನೇಯ್ಯತಾ ಸದ್ದತೋ’ತ್ಥತೋ।
ಸಾ’ಯಂ ತದುಭಯಾ ನೇಯ್ಯ, ಪರಿಹಾರೇ ಪದಸ್ಸಿತಾ।
ಯಥಾ ಮರೀಚಿಚ್ಚಾದಿ ಚ, ಮನೋನುರಞ್ಜನೋಚ್ಚಾದಿ॥
ಪುನ ಅತ್ಥೇನ ಯಥಾ
೧೪೮.
ಸಭಾವಾ’ಮಲತಾ ಧೀರ, ಮುಧಾ ಪಾದನಖೇಸು ತೇ।
ಯತೋ ತೇ’ವನತಾ’ನನ್ತ, ಮೋಳಿಚ್ಛಾಯಾ ಜಹನ್ತಿ ನೋ॥
೧೪೯.
‘ಬನ್ಧಸಾರೋ’ತಿ ಮಞ್ಞನ್ತಿ, ಯಂ ಸಮಗ್ಗಾಪಿ ವಿಞ್ಞುನೋ।
ದಸ್ಸನಾ’ವಸರಂ ಪತ್ತೋ, ಸಮಾಧಿ ನಾಮ’ಯಂ ಗುಣೋ॥
೧೫೦.
ಅಞ್ಞಧಮ್ಮೋ ತತೋ’ಞ್ಞತ್ಥ, ಲೋಕಸೀಮಾ’ನುರೋಧತೋ।
ಸಮ್ಮಾ ಆಧೀಯತೇ’ಚ್ಚೇ’ಸೋ, ‘ಸಮಾಧೀ’ತಿ ನಿರುಚ್ಚತಿ॥
ಸಮಾಧಿ ಉದ್ದೇಸ
೧೫೧.
ಅಪಾಣೇ
ನಿರೂಪೇ ರೂಪಯುತ್ತಸ್ಸ, ನಿರಸೇ ಸರಸಸ್ಸ, ಚ॥
೧೫೨.
ಅದ್ರವೇ ದ್ರವಯುತ್ತಸ್ಸ, ಅಕತ್ತರಿಪಿ ಕತ್ತುತಾ,।
ಕಠಿನಸ್ಸಾ’ಸರೀರೇ,ಪಿ, ರೂಪಂ ತೇಸಂ ಕಮಾ ಸಿಯಾ॥
ಸಮಾಧಿನಿದ್ದೇಸ
ಅಪಾಣೇ ಪಾಣೀನಂ ಧಮ್ಮೋ
೧೫೩.
ಉಣ್ಣಾ ಪುಣ್ಣಿ’ನ್ದುನಾ ನಾಥ! ದಿವಾಪಿ ಸಹ ಸಙ್ಗಮಾ।
ವಿನಿದ್ದಾ ಸಮ್ಪಮೋದನ್ತಿ, ಮಞ್ಞೇ ಕುಮುದಿನೀ ತವ॥
ನಿರುಪೇ ರೂಪಯುತ್ತಸ್ಸ
೧೫೪.
ದಯಾರಸೇಸು ಮುಜ್ಜನ್ತಾ, ಜನಾ’ಮತರಸೇಸ್ವಿ’ವ।
ಸುಖಿತಾ ಹತದೋಸಾ ತೇ, ನಾಥ! ಪಾದ’ಮ್ಬುಜಾ’ನತಾ॥
ನಿರಸೇ ಸರಸಸ್ಸ
೧೫೫.
ಮಧುರೇಪಿ ಗುಣೇ ಧೀರ, ನ’ಪ್ಪಸೀದನ್ತಿ ಯೇ ತವ।
ಕೀದಿಸೀ ಮನಸೋವುತ್ತಿ, ತೇಸಂ ಖಾರಗುಣಾನ ಭೋ’॥
ಅದ್ರವೇ ದ್ರವಯುತ್ತಸ್ಸ
೧೫೬.
ಸಬ್ಬತ್ಥಸಿದ್ಧ! ಚೂಳಕ, ಪುಟಪೇಯ್ಯಾ ಮಹಾಗುಣಾ।
ದಿಸಾ ಸಮನ್ತಾ ಧಾವನ್ತಿ, ಕುನ್ದಸೋಭಾ ಸ ಲಕ್ಖಣಾ॥
ಅಕತ್ತರಿಪಿ ಕತ್ತುತಾ
೧೫೭.
ಮಾರಾ’ರಿಬಲವಿಸ್ಸಟ್ಠಾ, ಕುಣ್ಠಾ ನಾನಾವಿಧಾ’ಯುಧಾ।
ಲಜ್ಜಮಾನಾ’ಞ್ಞವೇಸೇನ, ಜಿನ! ಪಾದಾ’ನತಾ ತವ॥
ಕಠಿನಸ್ಸಾ ಸರೀರೇ
೧೫೮.
ಮುನಿನ್ದಭಾಣುಮಾ ಕಾಲೋ,
ದಿತೋ ಬೋಧೋ’ದಯಾ’ಚಲೇ।
ಸದ್ಧಮ್ಮರಂಸಿನಾ ಭಾತಿ, ಭಿನ್ದ ಮನ್ದತಮಂ ಪರಂ॥
೧೫೯.
ವಮನು’ಗ್ಗಿರನಾದ್ಯೇ’ತಂ, ಗುಣವುತ್ಯ’ಪರಿಚ್ಚುತಂ।
ಅತಿಸುನ್ದರ ಮಞ್ಞಂ ತು, ಕಾಮಂ ವಿನ್ದತಿ ಗಾಮ್ಮತಂ॥
೧೬೦.
ಕನ್ತೀನಂ ವಮನಬ್ಯಾಜಾ, ಮುನಿಪಾದನಖಾ’ವಲೀ।
ಚನ್ದಕನ್ತೀ ಪಿವನ್ತೀ’ವ, ನಿಪ್ಪಭಂ ತಂ ಕರೋನ್ತಿಯೋ॥
೧೬೧.
ಅಚಿತ್ತಕತ್ತುಕಂ
ಸಚಿತ್ತಕತ್ತುಕಂ ಪೇ’ತಂ, ಗುಣಕಮ್ಮಂ ಯದು’ತ್ತಮಂ॥
೧೬೨.
ಉಗ್ಗಿರನ್ತೋ’ವ ಸಸ್ನೇಹ, ರಸಂ ಜಿನವರೋ ಜನೇ।
ಭಾಸನ್ತೋ ಮಧುರಂ ಧಮ್ಮಂ, ಕಂ ನ ಸಪ್ಪೀಣಯೇ ಜನಂ॥
೧೬೩.
ಯೋ ಸದ್ದಸತ್ಥಕುಸಲೋ ಕುಸಲೋ ನಿಘಣ್ಡು,
ಛನ್ದೋಅಲಙ್ಕತಿಸು ನಿಚ್ಚಕತಾ’ಭಿಯೋಗೋ।
ಸೋ’ಯಂ ಕವಿತ್ತವಿಕಲೋಪಿ ಕವೀಸು ಸಙ್ಖ್ಯ,
ಮೋಗ್ಗಯ್ಹ ವಿನ್ದತಿ ಹಿ ಕಿತ್ತಿ’ ಮಮನ್ದರೂಪಂ॥
ಇತಿ ಸಙ್ಘರಕ್ಖಿತಮಹಾಸಾಮಿವಿರಚಿತೇ ಸುಬೋಧಾಲಙ್ಕಾರೇ
ಗುಣಾವಬೋಧೋ ನಾಮ
ತತಿಯೋ ಪರಿಚ್ಛೇದೋ।