೧. ಸನ್ಧಿ ಕಣ್ಡ

ಸಞ್ಞಾ

೨. ಅಕ್ಖರಾಪಾದಯೋ ಏಕಚತ್ತಾಲೀಸಂ।

ಅಕ್ಖರಾಪಿ ಅಕಾರಾದಯೋ ಏಕಚತ್ತಾಲೀಸಂ ಸುತ್ತನ್ತೋಪಕಾರಾ। ತಂ ಯಥಾ-ಅ ಆ-ಇ ಈ-ಉ ಊ-ಏ ಓ, ಕ ಖ ಗ ಘ ಙ, ಚ ಛ ಜ ಝ ಞ, ಟ ಠ ಡ ಢ ಣ, ತ ಥ ದ ಧ ನ, ಪ ಫ ಬ ಭ ಮ, ಯ ರ ಲ ವ ಸ ಹ ಳ ಅಂ-ಇತಿ।

೩. ತತ್ಥೋದನ್ತಾಸರಾ ಅಟ್ಠ।

ತತ್ಥ ಅಕ್ಖರೇಸು ಓಕಾರನ್ತಾ ಅಟ್ಠ ಸರಾ ನಾಮ। ತತ್ಥೇತಿ ವತ್ತತೇ।

೪. ಲಹುಮತ್ತಾ ತಯೋ ರಸ್ಸಾ।

ತತ್ಥ ಸರೇಸು ಲಹುಮತ್ತಾ ಅ, ಇ, ಉ ಇತಿ ತಯೋ ರಸ್ಸಾ।

೫. ಅಞ್ಞೇ ದೀಘಾ।

ತತ್ಥ ಸರೇಸು ರಸ್ಸೇಹಞ್ಞೇ ದೀಘಾ।

ಸಂಯೋಗತೋ ಪುಬ್ಬೇ ಏಓ ರಸ್ಸಾ ಇವೋಚ್ಚನ್ತೇ, ಅನನ್ತರಾ ಬ್ಯಞ್ಜನಾ ಸಂಯೋಗೋ। ಏತ್ಥ, ಸೇಯ್ಯೋ, ಓಟ್ಠೋ, ಸೋತ್ಥಿ।

೬. ಸೇಸಾ ಬ್ಯಞ್ಜನಾ।

ಸರೇ ಠಪೇತ್ವಾ ಸೇಸಾ ಕಾದಯೋ ನಿಗ್ಗಹೀತನ್ತಾ ಬ್ಯಞ್ಜನಾ।

೭. ವಗ್ಗಾ ಪಞ್ಚಪಞ್ಚಸೋ ಮನ್ತಾ।

ಬ್ಯಞ್ಜನಾನಂ ಕಾದಯೋ ಮಕಾರನ್ತಾ ಪಞ್ಚಪಞ್ಚಸೋ ಅಕ್ಖರವನ್ತೋ ವಗ್ಗಾ।

೮. ವಗ್ಗಾನಂ ಪಠಮದುತಿಯಾ ಸೋ ಚಾಘೋಸೋ। ಳನ್ತಾಞ್ಞೇ ಘೋಸಾ। ಘೋಸಾಘೋಸಸಞ್ಞಾ ಚ ‘‘ಪರಸಮಞ್ಞಾ ಪಯೋಗೇ’’ತಿ ಸಙ್ಗಹೀತಾ। ಏವಂ ಲಿಙ್ಗ, ಸಬ್ಬನಾಮ, ಪದ, ಉಪಸಗ್ಗ, ನಿಪಾತ, ತದ್ಧಿತ, ಆಖ್ಯಾತ, ಕಮ್ಮಪ್ಪವಚನೀಯಾದಿಸಞ್ಞಾ ಚ।

೯. ಅಂಇತಿ ನಿಗ್ಗಹೀತಂ।

ಅಂಇತಿ ಅಕಾರತೋ ಪರಂ ಯೋ ಬಿನ್ದು ಸೂಯತೇ, ತಂ ನಿಗ್ಗಹೀತಂ ನಾಮ।

ಬಿನ್ದು ಚೂಳಾಮಣಾಕಾರೋ, ನಿಗ್ಗಹೀತನ್ತಿ ವುಚ್ಚತೇ।

ಕೇವಲಸ್ಸಾ ಪ್ಪಯೋಗತ್ತಾ, ಅಕಾರೋ ಸನ್ನಿಧೀಯತೇ।

೧೦. ಅ, ಕವಗ್ಗ, ಹಾ ಕಣ್ಡಜಾ, ಇ, ಚವಗ್ಗ, ಯಾ ತಾಲುಜಾ, ಉ, ಪವಗ್ಗಾ ಓಟ್ಠಜಾ, ಟವಗ್ಗ, ರ, ಳಾ ಮುದ್ಧಜಾ, ತವಗ್ಗ, ಲ, ಸಾ ದನ್ತಜಾ, ಏ ಕಣ್ಠತಾಲುಜೋ, ಓ ಕಣ್ಠೋಟ್ಠಜೋ, ವೋ ದನ್ತೋಟ್ಠಜೋ।

ಸಞ್ಞಾ॥

ಸರಸನ್ಧಿ

೧೧. ಲೋಕ ಅಗ್ಗೋಇತ್ಯಸ್ಮಿಂ – ‘‘ಪುಬ್ಬಮಧೋಠಿತ ಮಸ್ಸರಂ ಸರೇನ ವಿಯೋಜಯೇ’’ತಿ ಪುಬ್ಬಬ್ಯಞ್ಜನಂ ಸರತೋ ಪುಥಕ್ಕಾತಬ್ಬಂ।

ಸರಾ ಸರೇ ಲೋಪಂ।

ಅನನ್ತರೇ ಸರೇ ಪರೇ ಸರಾ ಲೋಪಂ ಪಪ್ಪೋನ್ತಿ।

‘‘ನರೇ ಪರಂ ಯುತ್ತೇ’’ತಿ ಅಸ್ಸರೋ ಬ್ಯಞ್ಜನೋ ಪರಕ್ಖರಂ ನೇತಬ್ಬೋ ಲೋಕಗ್ಗೋ।

ಸರೇತ್ಯಸ್ಮಿಂ ಓಪಸಿಲೇಸಿಕೋ ಕಾಸಸತ್ತಮೀ, ತತೋ ವಣ್ಣಕಾಲಬ್ಯವಧಾನೇ ಕಾರಿಯಂ ನ ಹೋತಿ। ಯಥಾ-ಮಂ ಅಹಾ ಸೀತಿ, ‘‘ಪಮಾದಮನುಯುಞ್ಜನ್ತೀ’’ತ್ಯಾದಿಗಾಥಾಯಂ ‘ಜನಾ ಅಪ್ಪಮಾದ’ನ್ತಿ ಚ। ಏವಂ ಸಬ್ಬಸನ್ಧೀಸು।

ಅನನ್ತರಂ ಪರಸ್ಸ ಸರಸ್ಸ ಲೋಪಂ ವಕ್ಖತಿ, ತಸ್ಮಾನೇನ ಪುಬ್ಬಸ್ಸ ಲೋಪೋ ಞಾಯತಿ, ತೇನೇವ ಸತ್ತಮೀನಿದ್ದಿಟ್ಠಸ್ಸ ಪರತಾಪಿ ಗಮ್ಯತೇ।

೧೨. ಸರೇತ್ಯಧಿಕಾರೋ। ಪನ ಇಮೇ ಪನ ಇಮೇತೀಹ-ಸರಾ ಲೋಪಂ ಇತ್ವೇವ।

ವಾ ಪರೋ ಅಸರೂಪೋ।

ಅಸಮಾನರೂಪಾಸರಮ್ಹಾ ಪರೋ ಸರೋ ವಾ ಲುಪ್ಯತೇ, ಪನಮೇ, ಪನಿಮೇ।

೧೩. ಬನ್ಧುಸ್ಸ ಇವ, ನ ಉಪೇತೀತೀಧ –

ಕ್ವಚಾಸವಣ್ಣಂ ಲುತ್ತೇ।

ಸರೇ ಲುತ್ತೇ ಪರಸರಸ್ಸ ಕ್ವಚಿ ಅಸವಣ್ಣೋ ಹೋತೀತಿ ಇ ಉ ಇಚ್ಚೇತೇಸಂ ಠಾನಾಸನ್ನಾ ಏ ಓ। ಬನ್ಧುಸ್ಸೇವ। ನೋಪೇತಿ।

೧೪. ತತ್ರ ಅಯಂ, ಯಾನಿ ಇಧ, ಬಹು ಉಪಕಾರಂ, ಸದ್ಧಾ ಇಧ, ತಥಾ ಉಪಮನ್ತ್ಯೇತಸ್ಮಿಂ –

ದೀಘಂ।

ಸರೇ ಲುತ್ತೇ ಪರೋ ಸರೋ ಕ್ವಚಿ ಠಾನಾಸನ್ನಂ ದೀಘಂ ಯಾತಿ। ತತ್ರಾಯಂ, ಯಾನೀಧ, ಬಹೂಪಕಾರಂ, ಸದ್ಧೀಧ, ತಥೂಪಮಂ।

೧೫. ಕಿಂಸು ಇಧೇತ್ಯತ್ರ –

ಪುಬ್ಬೋ ಚ।

ಸರೇ ಲುತ್ತೇ ಪುಬ್ಬೋ ಚ ಕ್ವಚಿ ದೀಘಂ ಯಾತಿ। ಕಿಂ ಸೂಧ।

೧೬. ತೇ ಅಜ್ಜ, ತೇ ಅಹಂತೇತ್ಥ –

ಯಮೇದನ್ತಸ್ಸಾದೇಸೋ।

ಸರೇ ಪರೇ ಅನ್ತಸ್ಸ ಏಕಾರಸ್ಸ ಕ್ವಚಿ ಯೋ ಆದೇಸೋ ಹೋತಿ, ತ್ಯಜ್ಜ, ‘‘ದೀಘ’’ನ್ತಿ ಬ್ಯಞ್ಜನೇ ಪರೇ ಕ್ವಚಿ ದೀಘೋ, ತ್ಯಾಹಂ।

ಕ್ವಚೀತಿ ಕಿಂ। ನೇತ್ಥ।

೧೭. ಸೋ ಅಸ್ಸ, ಅನು ಏತಿತ್ಯೇತ್ಥ –

ವಮೋದುದನ್ತಾನಂ।

ಸರೇ ಪರೇ ಅನ್ತೋ ಕಾರುಕಾರಾನಂ ಕ್ವಚಿ ವೋ ಆದೇಸೋ ಹೋತಿ। ಸ್ವಸ್ಸ, ಅನ್ವೇತಿ।

ಕ್ವಚೀತಿ ಕಿಂ। ತಯಸ್ಸು, ಸಮೇತಾಯಸ್ಮಾ।

೧೮. ಇಧ ಅಹಂ ತೀಧ –

ದೋ ಧಸ್ಸ ಚ।

ಸರೇ ಪರೇ ಧಸ್ಸ ಕ್ವಚಿ ದೋ ಹೋತಿ। ದೀಘೇ – ಇದಾಹಂ। ಕ್ವಚೀತಿ ಕಿಂ। ಇಧೇವ। ಚಕಾರೇನ ಬ್ಯಞ್ಜನೇಪಿ, ಇಧ ಭಿಕ್ಖವೇ।

೧೯. ಪತಿ ಅನ್ತುಂ, ವುತ್ತಿ ಅಸ್ಸೇತೀಹ –

ಇವಣ್ಣೋ ಯನ್ನವಾ।

ಸರೇ ಪರೇ ಇವಣ್ಣಸ್ಸ ಯೋ ನವಾ ಹೋತಿ। ಕತ ಯಕಾರಸ್ಸ ತಿಸ್ಸ ‘‘ಸಬ್ಬೋ ಚನ್ತೀ’’ತಿ ಕ್ವಚಿ ಚಾದೇಸೇ ‘‘ಪರದ್ವೇಭಾವೋ ಠಾನೇ’’ತಿ ಸರತೋ ಪರಬ್ಯಞ್ಜನಸ್ಸ ಠಾನಾಸನ್ನವಸಾ ದ್ವಿತ್ತಂ। ಪಚ್ಚನ್ತಂ, ವುತ್ಯಸ್ಸ।

ನವಾತಿ ಕಿಂ। ಪಟಗ್ಗಿ,

ಏತ್ಥ ‘‘ಕ್ವಚಿ ಪಟಿ ಪತಿಸ್ಸೇ’’ತಿ ಪತಿಸ್ಸ ಪಟಿ, ವಣ್ಣಗ್ಗಹಣಂ ಸಬ್ಬತ್ಥ ರಸ್ಸದೀಘ ಸಙ್ಗಹಣತ್ಥಂ।

೨೦. ಯಥಾ ಏವೇತೀಹ –

ಏವಾದಿಸ್ಸ ರಿ ಪುಬ್ಬೋ ಚ ರಸ್ಸೋ।

ಸರತೋ ಪರಸ್ಸ ಏವಸ್ಸಾದಿಏಕಾರೋ ರಿತ್ತಂ ನವಾ ಯಾತಿ। ಪುಬ್ಬೋ ಚ ಠಾನಾಸನ್ನಂ ರಸ್ಸಂ। ಯಥರಿವ। ಯಥೇವ।

೨೧. ನ ಇಮಸ್ಸ, ತಿ ಅಙ್ಗಿಕಂ, ಲಹು ಏಸ್ಸತಿ, ಅತ್ಥ ಅತ್ಥಂ, ಇತೋ ಆಯತಿ, ತಸ್ಮಾ ಇಹ, ಸಬ್ಭಿ ಏವ, ಛ ಅಭಿಞ್ಞಾ, ಪುಥ ಏವ, ಪಾ ಏವತೀಹ ವಾ ತ್ವೇವ –

ಯ ವ ಮ ದ ನ ತ ರ ಳಾ ಚಾಗಮಾ।

ಸರೇ ಪರೇ ಯಾದಯೋ ಆಗಮಾ ವಾ ಹೋನ್ತಿ, ಚಕಾರೇನ ಗೋ ಚ। ನಯಿಮಸ್ಸ, ತಿವಙ್ಗಿಕಂ, ಲಹುಮೇಸ್ಸತಿ, ಅತ್ತದತ್ಥಂ, ಇತೋನಾಯತಿ, ತಸ್ಮಾತಿಹ, ಸಬ್ಭಿರೇವ, ಛಳಭಿಞಾ, ಪುಥಗೇವ, ‘‘ರಸ್ಸ’’ನ್ತಿ ಬ್ಯಞ್ಜನೇ ಪರೇ ಕ್ವಚಿ ರಸ್ಸೋ। ಪಗೇವ।

ವಾತಿ ಕಿಂ। ಛ ಅಭಿಞ್ಞಾ, ಪುಥ ಏವ, ಪಾ ಏವ।

ಏತ್ಥ ‘‘ಸರೇ ಕ್ವಚೀ’’ತಿ ಸರಾನಂ ಪಕತಿ ಹೋತಿ, ಸಸ್ಸರೂಪಮೇವ, ನ ವಿಕಾರೋತ್ಯತ್ಥೋ।

೨೨. ಅಭಿ ಉಗ್ಗತೋತ್ಯತ್ರ –

‘‘ಅಬ್ಭೋ ಅಭೀ’’ತಿ ಅಭಿಸ್ಸ ಅಬ್ಭೋ। ಅಬ್ಭುಗ್ಗತೋ।

ಸರಸನ್ಧಿ॥

ಬ್ಯಞ್ಜನಸನ್ಧಿ

೨೩. ಬ್ಯಞ್ಜನೇತ್ಯಧಿಕಾರೋ। ಕ್ವಚೀತ್ವೇವ। ಸೋ ಭಿಕ್ಖು, ಕಚ್ಚಿ ನು ತ್ವಂ, ಜಾನೇಮ ತನ್ತೀಹ –

ಲೋಪಞ್ಚ ತತ್ರಾಕಾರೋ।

ಬ್ಯಞ್ಜನೇ ಪರೇ ಸರಾನಂ ಕ್ವಚಿ ಲೋಪೋಹೋತಿ, ತತ್ರ ಲುತ್ತೇ ಠಾನೇ ಅಕಾರಾಗಮೋ, ಚಕಾರೇನ ಓಕಾರುಕಾರಾಪಿ। ಸಭಿಕ್ಖು ಕಚ್ಚಿನೋ ತ್ವಂ, ಜಾನೇಮು ತಂ।

ಕ್ವಚೀತಿ ಕಿಂ, ಸೋಮುನಿ।

೨೪. ಉಘೋಸೋ , ಆಖಾತನ್ತೀಹ – ದ್ವೇಭಾವೇ ಠಾನೇ ಇತ್ವೇವ।

ವಗ್ಗೇ ಘೋಸಾಘೋಸಾನಂ ತತಿಯಪಠಮಾ।

ವಗ್ಗೇ ಘೋಸಾಘೋಸಾನಂ ಚತುತ್ಥದುತಿಯಾನಂ ತಬ್ಬಗ್ಗೇ ತತಿಯಪಠಮಾ ಹೋನ್ತಿ ಯಥಾಸಙ್ಖ್ಯಂ ಯುತ್ತೇ ಠಾನೇ, ಉಗ್ಘೋಸೋ, ರಸ್ಸೇ ಅಕ್ಖಾತಂ।

೨೫. ಪರ ಸಹಸ್ಸಂ, ಅತಿಪ್ಪಖೋತೀಹ – ‘‘ಕ್ವಚಿ ಓ ಬ್ಯಞ್ಜನೇ’’ತಿ ಓಕಾರಾಗಮೋ। ಪರೋಸಹಸ್ಸಂ। ಗಾಗಮೇ ಚ, ಅತಿಪ್ಪಗೋಖೋ।

೨೬. ಅವ ನದ್ಧಾತ್ಯತ್ರ – ‘‘ಓ ಅವಸ್ಸೇ’’ತಿ ಕ್ವಚಿ ಅವಸ್ಸ ಓ। ಓನದ್ಧಾ।

ಕ್ವಚೀತಿ ಕಿಂ। ಅವಸುಸ್ಸತು।

ಬ್ಯಞ್ಜನಸನ್ಧಿ।

ನಿಗ್ಗಹೀತಸನ್ಧಿ

೨೭. ನಿಗ್ಗಹೀತನ್ತ್ಯಧಿಕಾರೋ । ಕಿಂ ಕತೋ, ಸಂ ಜಾತೋ, ಸಂ ಠಿತೋ, ತಂ ಧನಂ, ತಂ ಮಿತ್ತನ್ತಿಹ –

ವಗ್ಗನ್ತಂ ವಾ ವಗ್ಗೇ।

ವಗ್ಗಬ್ಯಞ್ಜನೇ ಪರೇ ಬಿನ್ದುಸ್ಸ ತಬ್ಬಗ್ಗನ್ತೋ ವಾ ಹೋತಿ। ಕಿಙ್ಕತೋ, ಸಞ್ಜಾತೋ, ಸಣ್ಠಿತೋ, ತನ್ಧನಂ, ತಮ್ಮಿತ್ತಂ।

ವಾತಿ ಕಿಂ। ನ ತಂ ಕಮ್ಮಂ।

ವಾಕಾರೇನೇವ ಲೇ ಲೋ ಚ। ಪುಲ್ಲಿಙ್ಗಂ।

೨೮. ವಾತ್ಯಧಿಕಾರೋ । ಏವಂ ಅಸ್ಸ, ಏತಂ ಅವೋಚೇತೀಹ –

ಮದಾ ಸರೇ।

ಸರೇ ಪರೇ ಬಿನ್ದುನೋ ಮ ದಾ ವಾ ಹೋನ್ತಿ। ಏವಮಸ್ಸ, ಏತದವೋಚ।

ವಾತಿ ಕಿಂ। ಮಂ ಅಜಿನಿ।

೨೯. ತಂ ಏವ, ತಂ ಹೀತೀಹ –

ಏಹೇಞಂ।

ಏಕಾರೇ, ಹೇ ಚ ಪರೇ ಬಿನ್ದುನೋ ಞೋ ವಾ ಹೋತಿ। ದ್ವಿತ್ತೇ – ತಞ್ಞೇವ, ತಮೇವ। ತಞ್ಹಿ, ತಂ ಹಿ।

೩೦. ಸಂಯೋಗೋತೀಹ –

ಸಯೇ ಚ।

ಯಕಾರೇ ಪರೇ ತೇನ ಸಹ ಬಿನ್ದುನೋ ಞೋ ವಾ ಹೋತಿ। ದ್ವಿತ್ತೇ – ಸಞ್ಞೋಗೋ, ಸಂಯೋಗೋ।

೩೧. ಚಕ್ಖು ಅನಿಚ್ಚಂ, ಅವ ಸಿರೋತೀಹ - ಆಗಮೋ, ಕ್ವಚಿತ್ವೇವ।

ನಿಗ್ಗಹೀತಞ್ಚ।

ಸರೇ, ಬ್ಯಞ್ಜನೇ ವಾ ಪರೇ ಕ್ವಚಿ ಬಿನ್ದ್ವಾಗಮೋ ಹೋತಿ। ಚಕ್ಖುಂಅನಿಚ್ಚಂ, ಅವಂಸಿರೋ।

೩೨. ವಿದೂನಂ ಅಗ್ಗಂ, ತಾಸಂ ಅಹಂತೀಹ –

‘‘ಕ್ವಚಿ ಲೋಪಂ’’ತಿ ಸರೇ ಬಿನ್ದುಲೋಪೋ, ವಿದೂನಗ್ಗಂ। ದೀಘೇತಾಸಾಹಂ।

೩೩. ಬುದ್ಧಾನಂ ಸಾಸನಂ, ಸಂ ರಾಗೋತೀಹ –

‘‘ಬ್ಯಞ್ಜನೇ ಚೇ’’ತಿ ಬಿನ್ದುಲೋಪೋ, ಬುದ್ಧಾನಸಾಸನಂ। ದೀಘೇಸಾರಾಗೋ।

೩೪. ಬೀಜಂ ಇವೇತೀಹ –

ಪರೋ ವಾ ಸರೋ।

ಬಿನ್ದುತೋ ಪರೋ ಸರೋ ವಾ ಲುಪ್ಯತೇ, ಬೀಜಂವ।

೩೫. ಏವಂ ಅಸ್ಸೇತೀಹ –

ಬ್ಯಞ್ಜನೋ ಚ ವಿಸಞ್ಞೋಗೋ।

ಬಿನ್ದುತೋ ಪರೇ ಸರೇ ಲುತ್ತೇ ಸಂಯೋಗೋ ಬ್ಯಞ್ಜನೋ ವಿನಟ್ಠಸಂಯೋಗೋ ಹೋತೀತಿ ಪುಬ್ಬಸಲೋಪೋ। ಏವಂಸ।

ನಿಗ್ಗಹೀತಸನ್ಧಿ।

ವೋಮಿಸ್ಸಕ ಸನ್ಧೀ

೩೬. ಅನುಪದಿಟ್ಠಾನಂ ವುತ್ತಯೋಗತೋ।

ಇಧಾನಿದ್ದಿಟ್ಠಾ ಸನ್ಧಯೋ ವುತ್ತಾನುಸಾರೇನ ಞೇ ಯ್ಯಾ, ಯಥಾ – ಯದಿ ಏವಂ, ಬೋಧಿ ಅಙ್ಗಾತೀಹ – ಯಾದೇಸೇ ಇಮಿನಾ ಸುತ್ತೇನ ದಯಕಾರಸಂಯೋಗಸ್ಸ ಜೋ, ಧಯಕಾರಸಂಯೋಗಸ್ಸ ಝೋ, ದ್ವಿತ್ತೇ – ಯಜ್ಜೇವಂ, ಬೋಜ್ಝಙ್ಗಾ।

೩೭. ಅಸದಿಸಸಂಯೋಗೇ ಏಕಸರೂಪತಾ ಚ।

ಪರಿ ಏಸನಾತೀಹ – ಯಾದೇಸೇ ರಕಾರಸ್ಸ ಯೋ, ಪಯ್ಯೇಸ ನಾ।

೩೮. ವಣ್ಣಾನಂ ಬಹುತ್ತಂ, ವಿಪರೀತತಾ ಚ।

ಸರತಿ, ಇತಿ ಏವ, ಸಾ ಇತ್ಥೀ, ಬುಸಂ ಏವ, ಬಹು ಆಬಾಧೋ, ಅಧಿ ಅಭವಿ, ಸುಖಂ, ದುಕ್ಖಂ, ಜೀವೋತೀಹ –

ಮಾಗಮೋ ಸಕಾರೇ ಅಕಾರಸ್ಸ ಉ ಚ, ಸುಮರತಿ।

ಇಸ್ಸ ವೋ, ಇತ್ವೇವ।

ಪರಲೋಪೇ ಆಕಾರಸ್ಸ ಓ, ಸೋತ್ಥೀ।

ಮಾದೇಸೇ , ಪುಬ್ಬದೀಘೇ ಚ ಏಕಾರಸ್ಸ ಇ। ಬುಸಾಮಿವ।

ವಾದೇಸೇ ಹವಕಾರವಿಪರಿಯಯೋ। ಬಹ್ವಾಬಾಧೋ।

ಅಧಿಸ್ಸ ಕ್ವಚಿ ಅದ್ಧೋ, ದೀಘೇ-ಅದ್ಧಾಭವಿ।

ಬಿನ್ದುನೋ, ಓಕಾರಸ್ಸ ಚ ಏ। ಸುಖೇ, ದುಕ್ಖೇ, ಜೀವೇ।

೩೯. ರದಾನಂ ಳೋ, ಪಟಿಬೋಧೋ, ಪರಿಳಾಹೋ।

೪೦. ಸರೇ, ಬ್ಯಞ್ಜನೇ ವಾ ಪರೇ ಬಿನ್ದುನೋ ಕ್ವಚಿ ಮೋ। ಮಮ ಅಭಾಸಿ, ಬುದ್ಧಮ ಸರಣಂ, ಪುಬ್ಬೇ ಮೋ ಪರಂ ನ ನೇತಬ್ಬೋ ಅಯುತ್ತತ್ತಾ।

೪೧. ಬಿನ್ದುತೋ ಪರಸರಾನ ಮಞ್ಞಸ್ಸರತಾಪಿ।

ತಂ ಇಮಿನಾ, ಏವಂ ಇಮಂ, ಕಿಂ ಅಹಂ ತೀಹ-ಇಸ್ಸ ಅ। ತದಮಿನಾ।

ಇಸ್ಸ ಉ, ಅಕಾರಸ್ಸ ಚ ಏ, ಬಿನ್ದುಲೋಪಾದೋ। ಏವುಮಂ, ಕೇಹಂ।

೪೨. ವಾಕ್ಯಸುಖುಚ್ಚಾರಣತ್ಥಂ, ಛನ್ದಹಾನಿತ್ಥಞ್ಚ ವಣ್ಣಲೋಪೋಪಿ।

ಪಟಿಸಙ್ಖಾಯ ಯೋನಿಸೋತೀಹ – ಪುಬ್ಬಯಲೋಪೋ, ಪಟಿಸಙ್ಖಾಯೋನಿಸೋ।

೪೩. ಅಲಾಬೂನಿತ್ಯಾದೋ ಅಕಾರಲೋಪೋ। ಲಾಬೂನಿ ಸೀದನ್ತಿ, ಸಿಲಾ ಪ್ಲವನ್ತಿ।

೪೪. ವುತ್ಯಭೇದಾಯ ವಿಕಾರೋಪಿ।

ಅಕರಮ್ಹಸೇ ತೇತ್ಯಾದೋ ಸಕಾರೇ ಗರುನೋ ಏಕಾರಸ್ಸ ಇಮಿನಾ ಲಹುಅಕಾರೋ, ಅಕರಮ್ಹಸ ತೇ ಕಿಚ್ಚಂ।

೪೫. ಅಕ್ಖರನಿಯಮೋ ಛನ್ದಂ, ಗರುಲಹುನಿಯಮೋ ಭವೇ ವುತ್ತಿ,

ದೀಘೋ, ಸಂಯೋಗಾದಿಪುಬ್ಬೋ ರಸ್ಸೋ ಚ ಗರು, ಲಹು ತು ರಸ್ಸೋ। ಯಥಾ- ಆ, ಅಸ್ಸ, ಅಂ, ಅ।

೪೬.

ಏವಮಞ್ಞಾಪಿ ವಿಞ್ಞೇಯ್ಯಾ, ಸಂಹಿತಾ ತನ್ತಿಯಾ ಹಿತಾ।

ಸಂಹಿತಾತಿ ಚ ವಣ್ಣಾನಂ, ಸನ್ನಿಧಬ್ಯವಧಾನತೋ॥

ವೋಮಿಸ್ಸಕಸನ್ಧಿ।