॥ ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ॥

ಸುತ್ತನ್ತಪಿಟಕ

ಸಂಯುತ್ತನಿಕಾಯೇ

ಸಗಾಥಾವಗ್ಗಪಾಳಿ

ಸಂಗಾಯನಸ್ಸ ಪುಚ್ಛಾ ವಿಸ್ಸಜ್ಜನಾ

ಪುಚ್ಛಾ – ಪಠಮಮಹಾಸಂಗೀತಿಕಾಲೇ ಆವುಸೋ ಧಮ್ಮಸಂಗಾಹಕಾ ಮಹಾಕಸ್ಸಪಾದಯೋ ಮಹಾಥೇರವರಾ ಪೋರಾಣಸಂಗೀತಿಕಾರಾ ಪಠಮಂ ವಿನಯಪಿಟಕಂ ಸಂಗಾಯಿತ್ವಾ ತದನನ್ತರಂ ಸುತ್ತನ್ತಪಿಟಕಂ ಸಂಗಾಯನ್ತಾ ದೀಘನಿಕಾಯಞ್ಚ ಮಜ್ಝಿಮನಿಕಾಯಞ್ಚ ಸಂಗಾಯಿತ್ವಾ ತದನನ್ತರಂ ಕಿಂನಾಮ ಪಾವಚನಂ ಸಂಗಾಯಿಂಸು।

ವಿಸ್ಸಜ್ಜನಾ – ಪಠಮಮಹಾಸಂಗೀತಿಕಾಲೇ ಭನ್ತೇ ಧಮ್ಮಸಂಗಾಹಕಾ ಮಹಾಕಸ್ಸಪಾದಯೋ ಪೋರಾಣಥೇರವರಾ ಪಠಮಂ ವಿನಯಪಿಟಕಂ ಸಂಗಾಯಿತ್ವಾ ತದನನ್ತರಂ ಸುತ್ತನ್ತಪಿಟಕಂ ಸಂಗಾಯನ್ತಾ ದೀಘನಿಕಾಯಞ್ಚ ಮಜ್ಝಿಮನಿಕಾಯಞ್ಚ ಸಂಗಾಯಿತ್ವಾ ತದನನ್ತರಂ ಸತ್ತಹಿ ಚ ಸುತ್ತಸಹಸ್ಸೇಹಿ ಸತ್ತಹಿ ಚ ಸುತ್ತಸತೇಹಿ ದ್ವಾಸಟ್ಠಿಯಾ ಚ ಸುತ್ತೇಹಿ ಪಟಿಮಣ್ಡಿತಂ ಭಾಣವಾರಸತಪರಿಮಾಣಂ ಸಂಯುತ್ತನಿಕಾಯಂ ನಾಮ ಪಾವಚನಂ ಸಂಗಾಯಿಂಸು।

ಪುಚ್ಛಾ – ಸಂಯುತ್ತನಿಕಾಯೇ ಚ ಆವುಸೋ ಸಗಾಥಾವಗ್ಗೋ ನಿದಾನವಗ್ಗೋ ಖನ್ಧವಗ್ಗೋ ಸಳಾಯತನವಗ್ಗೋ ಮಹಾವಗ್ಗೋತಿ ಪಞ್ಚಸಂಯುತ್ತಪ್ಪಕರಣಾನಿ, ತೇಸು ಪಠಮಂ ಕತರಂ ಸಂಯುತ್ತಪ್ಪಕರಣಂ ತೇ ಸಂಗಾಯಿಂಸು।

ವಿಸ್ಸಜ್ಜನಾ – ಪಞ್ಚಸು ಭನ್ತೇ ಸಂಯುತ್ತಪ್ಪಕರಣೇಸು ಪಠಮಂ ಸಗಾಥಾವಗ್ಗಸಂಯುತ್ತಪ್ಪಕರಣಂ ಸಂಗಾಯಿಂಸು।

ಪುಚ್ಛಾ – ಸಗಾಥಾವಗ್ಗೇಪಿ ಆವುಸೋ ದೇವತಾಸಂಯುತ್ತಾದಿವಸೇನ ಏಕಾದಸಸಂಯುತ್ತಾನಿ, ತೇಸು ಪಠಮಂ ಕತರಂ ಸಂಯುತ್ತಂ ತೇ ಸಂಗಾಯಿಂಸು।

ವಿಸ್ಸಜ್ಜನಾ – ಏಕಾದಸಸು ಭನ್ತೇ ಸಂಯುತ್ತೇಸು ಪಠಮಂ ದೇವತಾಸಂಯುತ್ತಂ ಸಂಗಾಯಿಂಸು।

ಪುಚ್ಛಾ – ದೇವತಾಸಂಯುತ್ತೇಪಿ ಆವುಸೋ ನಳವಗ್ಗಾದಯೋ ಅಟ್ಠ ವಗ್ಗಾ, ಓಘತರಣಸುತ್ತಾದೀನಿ ಚ ಏಕಾಸೀತಿ ಸುತ್ತಾನಿ, ತೇಸು ಪಠಮಂ ಕತರಂ ವಗ್ಗಂ ಕತರಞ್ಚ ಸುತ್ತಂ ಸಗಾಯಿಂಸು।

ವಿಸ್ಸಜ್ಜನಾ – ಅಟ್ಠಸು ಭನ್ತೇ ವಗ್ಗೇಸು ಪಠಮಂ ನಳವಗ್ಗಂ ಏಕಾಸೀತಿಯಾ ಚ ಸುತ್ತೇಸು ಪಠಮಂ ಓಘತರಣಸುತ್ತಂ ಸಂಗಾಯಿಂಸು।

ಸಾಧು ಸಾಧು ಆವುಸೋ, ಮಯಮ್ಪಿ ದಾನಿ ತತೋಯೇವ ಪಟ್ಠಾಯ ಸಂಗೀತಿಪುಬ್ಬಙ್ಗಮಾನಿ ಪುಚ್ಛನವಿಸ್ಸಜ್ಜನಕಿಚ್ಚಾನಿ ಆವಹಿತುಂ ಸಮಾರಭಾರ।

ದೇವತಾಸಂಯುತ್ತ

ಓಘತರಣಸುತ್ತ

ಪುಚ್ಛಾ – ತೇನಾವುಸೋ ಭಗವತಾ ಜಾನತಾ ಪಸ್ಸತಾ ಅರಹತಾ ಸಮ್ಮಾಸಮ್ಬುದ್ಧೇನ ಓಘತರಣಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ದೇವತಂ ಆರಬ್ಭ ಭಾಸಿತಂ, ಅಞ್ಞತರಾ ಭನ್ತೇ ದೇವತಾ ಅಭಿಕ್ಕನ್ತಾಯ ರತ್ತಿಯಾ ಅಭಿಕ್ಕನ್ತವಣ್ಣಾ ಕೇವಲಕಪ್ಪಂ ಜೇತವನಂ ಓಭಾಸೇತ್ವಾ ಯೇನ ಭಗವಾ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ಅಟ್ಠಾಸಿ, ಏಕಮನ್ತಂ ಠಿತಾ ಖೋ ಸಾ ದೇವತಾ ಭಗವನ್ತಂ ಏತದವೋಚ ‘‘ಕಥಂ ನು ತ್ವಂ ಮಾರಿಸ ಓಘಮತರೀ’’ತಿ,

ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಅಪತಿಟ್ಠಂ ಖ್ವಾಹಂ ಆವುಸೋ ಅನಾಯೂಹಂ ಓಘಮತರಿಂ’’ತಿ, ಏವಂ ಖೋ ಭನ್ತೇ ಭಗವತಾ ಭಾಸಿತಂ।

ಅಚ್ಚೇನ್ತಿಸುತ್ತ

ಪುಚ್ಛಾ – ಅಚ್ಚೇನ್ತಿಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ದೇವತಂ ಆರಬ್ಭ ಭಾಸಿತಂ। ಅಞ್ಞತರಾ ಭನ್ತೇ ದೇವತಾ ಭಗವನ್ತಂ ಏತದವೋಚ–

‘‘ಅಚ್ಚೇನ್ತಿ ಕಾಲಾ ತರಯನ್ತಿ ರತ್ತಿಯೋ,

ವಯೋಗುಣಾ ಅನುಪುಬ್ಬಂ ಜಹನ್ತಿ,

ಏತಂ ಭಯಂ ಮರಣೇ ಪೇಕ್ಖಮಾನೋ,

ಪುಞ್ಞಾನಿ ಕಯಿರಾಥ ಸುಖಾವಹಾನೀ’’ತಿ–

ತಸ್ಮಿಂ ಭನ್ತೇ ವತ್ಥುಸ್ಮಿಂ –

‘‘ಅಚ್ಚೇನ್ತಿ ಕಾಲಾ ತರಯನ್ತಿ ರತ್ತಿಯೋ,

ವಯೋಗುಣಾ ಅನುಪುಬ್ಬಂ ಜಹನ್ತಿ,

ಏತಂ ಭಯಂ ಮರಣೇ ಪೇಕ್ಖಮಾನೋ,

ಲೋಕಾಮಿಸಂ ಪಜಹೇ ಸನ್ತಿಪೇಕ್ಖೋ’’ತಿ –

ಏವಂ ಖೋ ಭನ್ತೇ ಭಗವತಾ ಭಾಸಿತಂ।

ಸತ್ತಿಸುತ್ತ

ಪುಚ್ಛಾ – ಸತ್ತಿಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ದೇವತಂ ಆರಬ್ಭ ಭಾಸಿತಂ, ಅಞ್ಞತರಾ ಭನ್ತೇ ದೇವತಾ ಭಗವನ್ತಂ ಏತದವೋಚ–

‘‘ಸತ್ತಿಯಾ ವಿಯ ಓಮಟ್ಠೋ, ಡಯ್ಹಮಾನೋವ ಮತ್ಥಕೇ।

ಕಾಮರಾಗಪ್ಪಹಾನಾಯ, ಸತೋ ಭಿಕ್ಖು ಪರಿಬ್ಬಜೇ’’ತಿ–

ತಸ್ಮಿಂ ಭನ್ತೇ ವತ್ಥುಸ್ಮಿಂ–

ಸತ್ತಿಯಾ ವಿಯ ಓಮಟ್ಠೋ ಡಯ್ಹಮಾನೋವ ಮತ್ಥಕೇ।

ಸಕ್ಕಾಯದಿಟ್ಠಿಪ್ಪಹಾನಾಯ, ಸತೋ ಭಿಕ್ಖು ಪರಿಬ್ಬಜೇತಿ।

ಏವಂ ಖೋ ಭನ್ತೇ ಭಗವತಾ ಭಾಸಿತಂ।

ಸತ್ತಿಯಾ ವಿಯ ಓಮಟ್ಠೋ, ಡಯ್ಹಮಾನೋವ ಮತ್ಥಕೇ।

ಕಾಮರಾಗಪ್ಪಹಾನಾಯ, ಸತೋ ಭಿಕ್ಖು ಪರಿಬ್ಬಜೇ –

ಸತ್ತಿಯಾ ವಿಯ ಓಮಟ್ಠೋ, ಡಯ್ಹಮಾನೋವ ಮತ್ಥಕೇ,

ಸಕ್ಕಾಯದಿಟ್ಠಿಪ್ಪಮಾನಾಯ, ಸತೋ ಭಿಕ್ಖು ಪರಿಬ್ಬಜೇ –

ಜಟಾಸುತ್ತ

ಪುಚ್ಛಾ – ಜಟಾಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ದೇವತಂ ಆರಬ್ಭ ಭಾಸಿತಂ, ಅಞ್ಞತರಾ ಭನ್ತೇ ದೇವತಾ ಭವಗನ್ತಂ ಏತದವೋಚ–

‘‘ಅನ್ತೋ ಜಟಾ ಬಹಿಜಟಾ, ಜಟಾಯ ಜಟಿತಾ ಪಜಾ।

ತಂ ತಂ ಗೋತಮ ಪುಚ್ಛಾಮಿ, ಕೋ ಇಮಂ ವಿಜಟಯೇ ಜಟ’’ನ್ತಿ–

ತಸ್ಮಿಂ ಭನ್ತೇ ವತ್ಥುಸ್ಮಿಂ –

ಸೀಲೇ ಪತಿಟ್ಠಾಯ ನರೋ ಸಪಞ್ಞೋ, ಚಿತ್ತಂ ಪಞ್ಞಞ್ಚ ಭಾವಯಂ।

ಆತಾಪೀ ನಿಪಕೋ ಭಿಕ್ಖು, ಸೋ ಇಮಂ ವಿಜಟಯೇ ಜಟಂ॥

ಯೇಸಂ ರಾಗೋ ಚ ದೋಸೋ ಚ, ಅವಿಜ್ಜಾ ಚ ವಿರಾಜಿತಾ।

ಖೀಣಾಸವಾ ಅರಹನ್ತೋ, ತೇಸಂ ವಿಜಟಿತಾ ಜಟಾತಿ।

ಏವಮಾದಿನಾ ಭನ್ತೇ ಭಗವತಾ ಭಾಸಿತಂ।

ಸೀಲೇ ಪತಿಟ್ಠಾಯ ನರೋ ಸಪಞ್ಞೋ, ಚಿತ್ತಂ ಪಞ್ಞಞ್ಚ ಭಾವಯಂ।

ಆತಾಪೀ ನಿಪಕೋ ಭಿಕ್ಖು, ಸೋ ಇಮಂ ವಿಜಟಯೇ ಜಟಂ–

ಯೇಸಂ ರಾಗೋ ಚ ದೋಸೋ ಚ, ಅವಿಜ್ಜಾ ಚ ವಿರಾಜಿತಾ।

ಖೀಣಾಸವಾ ಅರಹನ್ತೋ, ತೇಸಂ ವಿಜಟಿತಾ ಜಟಾ–

ಯತ್ಥ ನಾಮಞ್ಚ ರೂಪಞ್ಚ, ಅಸೇಸಂ ಉಪರುಜ್ಝತಿ।

ಪಟಿಘಂ ರೂಪಸಞ್ಞಾ ಚ, ಏತ್ಥೇಸಾ ಛಿಜ್ಜತೇ ಜಟಾ॥

ಅಚ್ಛರಾಸುತ್ತ

ಪುಚ್ಛಾ – ಅಚ್ಛರಾಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ದೇವಪುತ್ತಂ ಆರಬ್ಭ ಭಾಸಿತಂ। ಅಞ್ಞತರೋ ಭನ್ತೇ ದೇವಪುತ್ತೋ ಭಗವನ್ತಂ ಏತದವೋಚ–

‘‘ಅಚ್ಛರಾಗಣಸಙ್ಘಟ್ಠಂ, ಪಿಸಾಚ ಗಣಸೇವಿತಂ।

ವನನ್ತಂ ಮೋಹನಂ ನಾಮ, ಕಥಂ ಯಾತ್ರಾ ಭವಿಸ್ಸತೀ’’ತಿ॥

ತಸ್ಮಿಂ ಭನ್ತೇ ವತ್ಥುಸ್ಮಿಂ–

‘‘ಉಜುಕೋ ನಾಮ ಸೋ ಮಗ್ಗೋ, ಅಭಯಾ ನಾಮ ಸಾ ದಿಸಾ,

ರಥೋ ಅಕೂಜನೋ ನಾಮ, ಧಮ್ಮಚಕ್ಕೇಹಿ ಸಂಯುತೋ॥

ಹಿರೀ ತಸ್ಸ ಅಪಾಲಮ್ಬೋ, ಸತ್ಯಸ್ಸ ಪರಿವಾರಣಂ।

ಧಮ್ಮಾಹಂ ಸಾರಥಿಂ ಬ್ರೂಮಿ, ಸಮ್ಮಾದಿಟ್ಠಿ ಪುರೇಜವಂ॥

ಯಸ್ಸ ಏತಾದಿಸಂ ಯಾನಂ, ಇತ್ಥಿಯಾ ಪುರಿಸಸ್ಸ ವಾ।

ಸ ವೇ ಏತೇನ ಯಾನೇನ, ನಿಬ್ಬಾನಸ್ಸೇವ ಸನ್ತಿಕೇ’’ತಿ॥

ಏವಂ ಖೋ ಭನ್ತೇ ಭಗವತಾ ಭಾಸಿತಂ।

ಅಚ್ಛರಾಗಣಸಙ್ಘುಟ್ಠಂ , ಪಿಸಾಚಗಣಸೇವಿತಂ।

ವನನ್ತಂ ಮೋಹನಂ ನಾಮ, ಕಥಂ ಯಾತ್ರಾ ಭವಿಸ್ಸತಿ–

ಜರಾಸುತ್ತ

ಪುಚ್ಛಾ – ಜರಾಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ದೇವತಂ ಆರಬ್ಭ ಭಾಸಿತಂ। ಅಞ್ಞತರಾ ಭನ್ತೇ ದೇವತಾ ಭಗವನ್ತಂ ಏತದವೋಚ–

‘‘ಕಿಂ ಸು ಯಾವ ಜರಾ ಸಾಧು, ಕಿಂ ಸು ಸಾಧು ಪತಿಟ್ಠಿತಂ।

ಕಿಂ ಸು ನರಾನಂ ರತನಂ, ಕಿಂ ಸು ಚೋರೇಹಿ ದೂಹರ’’ನ್ತಿ॥

ತಸ್ಮಿಂ ಭನ್ತೇ ವತ್ಥುಸ್ಮಿಂ–

‘‘ಸೀಲಂ ಯಾವ ಜರಾ ಸಾಧು, ಸದ್ಧಾ ಸಾಧು ಪತಿಟ್ಠಿತಾ।

ಪಞ್ಞಾ ನರಾನಂ ರತನಂ, ಪುಞ್ಞಂ ಚೋರೇಹಿ ದೂಹರ’’ನ್ತಿ॥

ಏವಂ ಖೋ ಭನ್ತೇ ಭಗವತಾ ಭಾಸಿತಂ।

ಕಿಂ ಸು ಯಾವ ಜರಾ ಸಾಧು।

ಕಿಂ ಸು ಸಾಧು ಪತಿಟ್ಠಿತಂ।

ಕಿಂ ಸು ನರಾನಂ ರತನಂ।

ಕಿಂ ಸು ಚೋರೇಹಿ ದೂಹರಂ।

ದೇವಪುತ್ತಸಂಯುತ್ತ

ಸುಬ್ರಹ್ಮಸುತ್ತ

ಪುಚ್ಛಾ – ತೇನಾವುಸೋ ಭಗವತಾ ಜಾನತಾ ಪಸ್ಸತಾ ಅರಹತಾ ಸಮ್ಮಾಸಮ್ಬುದ್ಧೇನ ಸುಬ್ರಹ್ಮಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕತಞ್ಚ ಭಾಸಿತಂ। ಕೀದಿಸೋ ಚ ತತ್ಥ ಧಮ್ಮಪಟಿಗ್ಗಾಹಕಸ್ಸ ಧಮ್ಮಸ್ಸವನಾನಿಸಂಸೋ ಅಧಿಗತೋ।

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸುಬ್ರಹ್ಮದೇವಪುತ್ತಂ ಆರಬ್ಭ ಭಾಸಿತಂ। ಸುಬ್ರಹ್ಮಾ ಭನ್ತೇ ದೇವಪುತ್ತೋ ಮರಣಭಯಭೀತೋ ಭಗವನ್ತಂ ಉಪಸಙ್ಕಮಿತ್ವಾ ಏತದವೋಚ–

‘‘ನಿಚ್ಚಂ ಉತ್ರಸ್ತಮಿದಂ ಚಿತ್ತಂ, ನಿಚ್ಚಂ ಉಬ್ಬಿಗ್ಗಮಿದಂ ಮನೋ।

ಅನುಪ್ಪನ್ನೇಸು ಕಿಚ್ಛೇಸು, ಅಥೋ ಉಪ್ಪತಿತೇಸು ಚ।

ಸಚೇ ಅತ್ಥಿ ಅನುತ್ರಸ್ತಂ, ತಂ ಮೇ ಅಕ್ಖಾಹಿ ಪುಚ್ಛಿತೋ’’ತಿ–

ತಸ್ಮಿಂ ಭನ್ತೇ ವತ್ಥುಸ್ಮಿಂ।

‘‘ನಾಞ್ಞತ್ರ ಬೋಜ್ಜಾ ತಪಸಾ, ನಾಞ್ಞತ್ರಿನ್ದ್ರಿಯಸಂವರಾ।

ನಾಞ್ಞತ್ರ ಸಬ್ಬನಿಸ್ಸಗ್ಗಾ, ಸೋತ್ಥಿಂ ಪಸ್ಸಾಮಿ ಪಾಣಿನ’’ನ್ತಿ॥

ಏವಂ ಖೋ ಭನ್ತೇ ಭಗವತಾ ಭಾಸಿತಂ। ದೇಸನಾಪರಿಯೋಸಾನೇ ಚ ಭನ್ತೇ ಸುಬ್ರಹ್ಮಸ್ಸ ದೇವಪುತ್ತಸ್ಸ ತಸ್ಮಿಂಯೇವ ಆಸನೇ ವಿರಜಂ ವೀತಮಲಂ ಧಮ್ಮಚಕ್ಖುಂ ಉದಪಾದಿ, ‘‘ಯಂಕಿಞ್ಚಿ ಸಮುದಯಧಮ್ಮಂ, ಸಬ್ಬಂ ತಂ ನಿರೋಧಧಮ್ಮ’’ನ್ತಿ।

ನಿಚ್ಚಂ ಉತ್ರಸ್ತಮಿದಂ ಚಿತ್ತಂ, ನಿಚ್ಚಂ ಉಬ್ಬಿಗ್ಗಮಿದಂ ಮನೋ।

ಅನುಪ್ಪನ್ನೇಸು ಕಿಚ್ಛೇಸು, ಅಥೋ ಉಪ್ಪತಿತೇಸು ಚ।

ಸಚೇ ಅತ್ಥಿ ಅನುತ್ರಸ್ತ, ತಂ ಮೇ ಅಕ್ಖಾಹಿ ಪುಚ್ಛಿತೋ-ಹು–

ನಾಞ್ಞತ್ರ ಬೋಜ್ಜಾ ತಪಸಾ, ನಾಞ್ಞತ್ರಿನ್ದ್ರಿಯಸಂವರಾ।

ನಾಞ್ಞತ್ರ ಸಬ್ಬನಿಸ್ಸಗ್ಗಾ, ಸೋತ್ಥಿಂ ಪಸ್ಸಾಮಿ ಪಾಣಿನಂ–

ರೋಹಿತಸ್ಸಸುತ್ತ

ಪುಚ್ಛಾ – ರೋಹಿತಸ್ಸಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ರೋಹಿತಸ್ಸಂ ದೇವಪುತ್ತಂ ಆರಬ್ಭ ಭಾಸಿತಂ। ರೋಹಿತಸ್ಸೋ ಭನ್ತೇ ದೇವಪುತ್ತೋ ಭಗವನ್ತಂ ಏತದವೋಚ ‘‘ಯತ್ಥ ನು ಖೋ ಭನ್ತೇ ನ ಜಾಯತಿ ನ ಜೀಯತಿ ನ ಮೀಯತಿ ನ ಚವತಿ ನ ಉಪಪಜ್ಜತಿ, ಸಕ್ಕಾ ನು ಖೋ ಸೋ ಭನ್ತೇ ಗಮನೇನ ಲೋಕಸ್ಸ ಅನ್ತೋ ಞಾತುಂ ವಾ ದಟ್ಠುಂ ವಾ ಪಾಪುಣಿತುಂ ವಾ’’ತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಯತ್ಥ ಖೋ ಆವುಸೋ ನ ಜಾಯತಿ ನ ಜೀಯತಿ ನ ಮೀಯತಿ ನ ಚವತಿ ನ ಉಪಪಜ್ಜತಿ, ನಾಹಂ ತಂ ಗಮನೇನ ಲೋಕಸ್ಸ ಅನ್ತಂ ಞಾತೇಯ್ಯಂ ಅಟ್ಠೇಯ್ಯಂ ಪತ್ತೇಯ್ಯನ್ತಿ ವದಾಮೀ’’ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ।

ಕೋಸಲಸಂಯುತ್ತ

ದಹರಸುತ್ತ

ಪುಚ್ಛಾ – ದಹರಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ರಾಜಾನಂ ಪಸೇನದಿಂ ಕೋಸಲಂ ಆರಬ್ಭ ಭಾಸಿತಂ। ರಾಜಾ ಭನ್ತೇ ಪಸೇನದಿ ಕೋಸಲೋ ಯೇನ ಭಗವಾ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಭಗವತಾ ಸದ್ಧಿಂ ಸಮ್ಮೋದಿ, ಏಕಮನ್ತಂ ನಿಸಿನ್ನೋ ಖೋ ಭನ್ತೇ ರಾಜಾ ಪಸೇನದಿ ಕೋಸಲೋ ಭಗವನ್ತಂ ಏತದವೋಚ ‘‘ಭವಮ್ಪಿ ನೋ ಗೋತಮೋ ‘ಅನುತ್ತರಂ ಸಮ್ಮಾಸಮ್ಬೋಧಿಂ ಅಭಿಸಮ್ಬುದ್ಧೋ’ತಿ ಪಟಿಜಾನಾತೀ’’ತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಯಞ್ಹಿ ತಂ ಮಹಾರಾಜ ಸಮ್ಮಾ ವದಮಾನೋವದೇಯ್ಯ ‘ಅನುತ್ತರಂ ಸಮ್ಮಾಸಮ್ಬೋಧಿಂ ಅಭಿಸಮ್ಬುದ್ಧೋ’ತಿ , ಮಮೇವ ತಂ ಸಮ್ಮಾ ವದಮಾನೋ ವದೇಯ್ಯಾ’’ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ।

ತಸ್ಮಾ ಹಿ ಪಣ್ಡಿತೋ ಪೋಸೋ, ಸಮ್ಪಸ್ಸಂ ಅತ್ಥಮತ್ತನೋ।

ಭುಜಙ್ಗಮಂ ಪಾವಕಞ್ಚ, ಖತ್ತಿಯಞ್ಚ ಯಸಸ್ಸಿನಂ।

ಭಿಕ್ಖುಞ್ಚ ಸೀಲಸಮ್ಪನ್ನಂ, ಸಮ್ಮದೇವ ಸಮಾಚರೇ–

ಅತ್ತರಕ್ಖಿತಸುತ್ತ

ಪುಚ್ಛಾ – ಅತ್ತರಕ್ಖಿತಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ರಾಜಾನಂಯೇವ ಪಸೇನದಿಂ ಕೋಸಲಂ ಆರಬ್ಭ ಭಾಸಿತಂ। ರಾಜಾ ಭನ್ತೇ ಪಸೇನದಿ ಕೋಸಲೋ ಭಗವನ್ತಂ ಉಪಸಙ್ಕಮಿತ್ವಾ ‘‘ಇಧ ಮಯ್ಹಂ ಭನ್ತೇ ರಹೋಗತಸ್ಸ ಪಟಿಸಲ್ಲೀನಸ್ಸ ಏವಂ ಚೇತಸೋ ಪರಿವಿತಕ್ಕೋ ಉದಪಾದೀ’’ತಿ ಏವಮಾದಿಕಂ ವಚನಂ ಅವೋಚ। ಭಗವಾ ಚ ಭನ್ತೇ ಏವಮೇತಂ ಮಹಾರಾಜ ಏವಮೇತಂ ಮಹಾರಾಜಾತಿ ಏವಮಾದಿನಾ ವಿಭಜಿತ್ವಾ ಭಾಸಿತಂ।

ಕಾಯೇನ ಸಂವರೋ ಸಾಧು, ಸಾಧು ವಾಚಾಯ ಸಂವರೋ।

ಮನಸಾ ಸಂವರೋ ಸಾಧು, ಸಾಧು, ಸಬ್ಬತ್ಥ ಸಂವರೋ।

ಸಬ್ಬತ್ಥ ಸಂವುತೋ ಲಜ್ಜೀ, ರಕ್ಖಿತೋತಿ ಪವುಚ್ಚತಿ॥

ಅಪ್ಪಕಸುತ್ತ

ಪುಚ್ಛಾ – ಅಪ್ಪಕಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ರಾಜಾನಂಯೇವ ಪಸೇನದಿಂ ಕೋಸಲಂ ಆರಬ್ಭ ಭಾಸಿತಂ। ರಾಜಾ ಭನ್ತೇ ಪಸೇನದಿ ಕೋಸಲೋ ಭಗವನ್ತಂ ಉಪಸಙ್ಕಮಿತ್ವಾ ‘‘ಇಧ ಮಯ್ಹಂ ಭನ್ತೇ ರಹೋಗತಸ್ಸ ಪಟಿಸಲ್ಲೀನಸ್ಸ ಏವಂ ಚೇತಸೋ ಪರಿವಿತಕ್ಕೋ ಉದಪಾದಿ ಅಪ್ಪಕಾ ತೇ ಸತ್ತಾ ಲೋಕಸ್ಮಿಂ, ಯೇ ಉಳಾರೇ ಉಳಾರೇ ಭೋಗೇ ಲಭಿತ್ವಾ ನ ಚೇವ ಮಜ್ಜನ್ತಿ ನ ಚ ಪಮಜ್ಜನ್ತಿ, ನ ಚ ಕಾಮೇಸು ಗೇಧಂ ಆಪಜ್ಜನ್ತೀ’’ತಿ ಏವಮಾದಿಕಂ ವಚನಂ ಅವೋಚ। ಭಗವಾ ಚ ಭನ್ತೇ ‘‘ಏವಮೇತಂ ಮಹಾರಾಜ ಏವಮೇತಂ ಮಹಾರಾಜಾ’’ತಿ ಏವಮಾದಿನಾ ಅಪ್ಪಕಸುತ್ತಂ ಭಾಸಿತಂ।

ಮಲ್ಲಿಕಾಸುತ್ತ

ಪುಚ್ಛಾ – ಮಲ್ಲಿಕಾಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ರಾಜಾನಂಯೇವ ಪಸೇನದಿಂ ಕೋಸಲಂ ಆರಬ್ಭ ಭಾಸಿತಂ। ರಾಜಾ ಭನ್ತೇ ಪಸೇನದಿ ಕೋಸಲೋ ಮಲ್ಲಿಕಂ ದೇವಿಂ ಏತದವೋಚ ‘‘ಅತ್ಥಿ ನು ಖೋ ತೇ ಮಲ್ಲಿಕೇ ಕೋಚಞ್ಞೋ ಅತ್ತನಾ ಪಿಯತರೋ’’ತಿ। ತಸ್ಮಿಂ ವತ್ಥುಸ್ಮಿಂ ಸಬ್ಬಾದಿಸಾ ಅನುಪರಿಗಮ್ಮ ಚೇತಸಾತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ।

ಸಬ್ಬಾ ದಿಸಾ ಅನುಪರಿಗಮ್ಮ ಚೇತಸಾ, ನೇವಜ್ಝಗಾ ಪಿಯತರಮತ್ತನಾ ಕ್ವಚಿ। ಏವಂ ಪಿಯೋ ಪುಥು ಅತ್ತಾ ಪರೇಸಂ, ತಸ್ಮಾ ನ ಹಿಂಸೇ ಪರಮತ್ತಕಾಮೋ–

ಸತ್ತಜಟಿಲಸುತ್ತ

ಪುಚ್ಛಾ – ತೇನಾವುಸೋ ಭಗವತಾ…ಪೇ॰… ಸಮ್ಮಾಸಮ್ಬುದ್ಧೇನ ಸತ್ತಜಟಿಲಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ರಾಜಾನಂ ಪಸೇನದಿಂ ಕೋಸಲಂ ಆರಬ್ಭ ಭಾಸಿತಂ। ರಾಜಾ ಭನ್ತೇ ಪಸೇನದಿ ಕೋಸಲೋ ಅಚಿರಪಕ್ಕನ್ತೇಸು ಸತ್ತಸು ಚ ಜಟಿಲೇಸು ಸತ್ತಸು ಚ ನಿಗಣ್ಠೇಸು ಸತ್ತಸು ಚ ಅಚೇಲಕೇಸು ಸತ್ತಸು ಚ ಏಕಸಾಟಕೇಸು ಸತ್ತಸು ಚ ಪರಿಬ್ಬಾಜಕೇಸು ಯೇನ ಭಗವಾ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ, ಏಕಮನ್ತಂ ನಿಸಿನ್ನೋ ಖೋ ಭನ್ತೇ ರಾಜಾ ಪಸೇನದಿ ಕೋಸಲೋ ಭಗವನ್ತಂ ಏತದವೋಚ ‘‘ಯೇ ತೇ ಭನ್ತೇ ಲೋಕೇ ಅರಹನ್ತೋ ವಾ ಅರಹತ್ತಮಗ್ಗಂ ವಾ ಸಮಾಪನ್ನಾ, ಏತೇ ತೇಸಂ ಅಞ್ಞತರಾ’’ತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ದುಜ್ಜಾನಂ ಖೋ ಏತಂ ಮಹಾರಾಜ ತಯಾ ಗಿಹಿನಾ ಕಾಮಭೋಗಿನಾ ಪುತ್ತಸಮ್ಬಾಧಸಯನಂ ಅಜ್ಝಾವಸನ್ತೇನ ಕಾಸಿಣಚನ್ದನಂ ಪಚ್ಚನುಭೋನ್ತೇನ ಮಾಲಾಗನ್ಧವಿಲೇಪನಂ ಧಾರಯನ್ತೇನ ಜಾತರೂಪರಜತಂ ಸಾದಿಯನ್ತೇನ ‘‘ಇಮೇ ವಾ ಅರಹನ್ತೋ, ಇಮೇ ವಾ ಅರಹತ್ತಮಗ್ಗಂ ಸಮಾಪನ್ನಾ’’ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ।

ನ ವಣ್ಣರೂಪೇನ ನರೋ ಸುಜಾನೋ, ನ ವಿಸ್ಸಸೇ ಇತ್ತರದಸ್ಸನೇನ।

ಸುಸಞ್ಞತಾನಞ್ಹಿ ವಿಯಞ್ಜನೇನ, ಅಸಞ್ಞತಾ ಲೋಕಮಿಮಂ ಚರನ್ತಿ॥

ಪತಿರೂಪಕೋ ಮತ್ತಿಕಾಕುಣ್ಡಲೋವ, ಲೋಹಡ್ಢಮಾಸೋವ ಸುವಣ್ಣಛನ್ನೋ।

ಚರನ್ತಿ ಲೋಕೇ ಪರಿವಾರಛನ್ನಾ, ಅನ್ತೋ ಅಸುದ್ಧಾ ಬಹಿಸೋಭಮಾನಾ-ಹೂ

ಪಞ್ಚರಾಜಸುತ್ತ

ಪುಚ್ಛಾ – ಪಞ್ಚರಾಜಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ರಾಜಾನಂಯೇವ ಪಸೇನದಿಂ ಕೋಸಲಂ ಆರಬ್ಭ ಭಾಸಿತಂ। ರಾಜಾ ಭನ್ತೇ ಪಸೇನದಿ ಕೋಸಲೋ ಭಗವನ್ತಂ ಏತದವೋಚ ‘‘ಕಿಂ ನು ಖೋ ಭನ್ತೇ ಕಾಮಾನಂ ಅಗ್ಗ’’ನ್ತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಮನಾಪಪರಿಯನ್ತಂ ಖ್ವಾಹಂ ಮಹಾರಾಜ ಪಞ್ಚಸು ಕಾಮಗುಣೇಸು ಅಗ್ಗನ್ತಿ ವದಾಮೀ’’ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ।

ಇಧ ಭನ್ತೇ ಅಮ್ಹಾಕಂ ಪಞ್ಚನ್ನಂ ರಾಜೂನಂ ಪಞ್ಚಹಿ ಕಾಮಗುಣೇಹಿ ಸಮಪ್ಪಿತಾನಂ ಸಮಙ್ಗೀಭೂತಾನಂ ಪರಿಚಾರಯಮಾನಾನಂ ಅಯಮನ್ತರಾಕಥಾ ಉದಪಾದಿಂ ‘ಕಿಂ ನು ಖೋ ಕಾಮಾನಂ ಅಗ್ಗ’ನ್ತಿ–

ಪದುಮಂ ಯಥಾ ಕೋಕನದಂ ಸುಗನ್ಧಂ, ಪಾತೋ ಸಿಯಾ ಫುಲ್ಲಮವೀತಗನ್ಧಂ। ಅಙ್ಗೀರಸಂ ಪಸ್ಸ ವಿರೋಚಮಾನಂ, ತಪನ್ತಮಾದಿಚ್ಚಮಿವನ್ತಲಿಕ್ಖೇ–

ದುತಿಯಅಪುತ್ತಕಸುತ್ತ

ಪುಚ್ಛಾ – ದುತಿಯಅಪುತ್ತಕಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ರಾಜಾನಂಯೇವ ಪಸೇನದಿಂ ಕೋಸಲಂ ಆರಬ್ಭ ಭಾಸಿತಂ। ರಾಜಾ ಭನ್ತೇ ಪಸೇನದಿ ಕೋಸಲೋ ಭಗವನ್ತಂ ಉಪಸಙ್ಕಮಿತ್ವಾ ‘‘ಇಧ ಭನ್ತೇ ಸಾವತ್ಥಿಯಂ ಸೇಟ್ಠಿ ಗಹಪತಿ ಕಾಲಙ್ಕತೋ, ತಮಹಂ ಅಪುತ್ತಕಂ ಸಾಪತೇಯ್ಯಂ ರಾಜನ್ತೇಪುರಂ ಅತಿಹರಿತ್ವಾ ಆಗಚ್ಛಾಮೀ’’ತಿ ಏವಮಾದಿಕಂ ವಚನಂ ಅವೋಚ। ಭಗವಾ ಚ ಭನ್ತೇ ‘‘ಏವಮೇತಂ ಮಹಾರಾಜ, ಏವಮೇತಂ ಮಹಾರಾಜ, ಭೂತಪುಬ್ಬಂ ಸೋ ಮಹಾರಾಜ ಸೇಟ್ಠಿ ಗಹಪತಿ ತಗ್ಗರಸಿಖಿಂ ನಾಮ ಪಚ್ಚೇಕಸಮ್ಬುದ್ಧಂ ಪಿಣ್ಡಪಾತೇನ ಪಟಿಪಾದೇಸೀ’’ತಿ ಏವಮಾದಿನಾ ತಸ್ಸ ಸೇಟ್ಠಿಸ್ಸ ಗಹಪತಿಸ್ಸ ಅತೀತಂ ವತ್ಥುಂ ಆಹರಿತ್ವಾ ಪರಿಯೋಸಾನೇ ಚತೂಹಿ ಗಾಥಾಹಿ ಭಾಸಿತಂ।

ಧಞ್ಞಂ ಧನಂ ರಜತಂ ಜಾತರೂಪಂ, ಪರಿಗ್ಗಹಂ ವಾಪಿ ಯದತ್ಥಿ ಕಿಞ್ಚಿ,

ದಾಸಾ ಕಮ್ಮಕರಾ ಪೇಸ್ಸಾ, ಯೇ ಚಸ್ಸ ಅನುಜೀವಿನೋ॥

ಸಬ್ಬಂ ನಾದಾಯ ಗನ್ತಬ್ಬಂ, ಸಬ್ಬಂ ನಿಕ್ಖಿಪ್ಪಗಾಮಿನಂ।

ಯಞ್ಚ ಕರೋತಿ ಕಾಯೇನ, ವಾಚಾಯ ಉದಚೇತಸಾ॥

ತಞ್ಹಿ ತಸ್ಸ ಸಕಂ ಹೋತಿ, ತಂವ ಆದಾಯ ಗಚ್ಛತಿ।

ತಂವಸ್ಸ ಅನುಗಂ ಹೋತಿ, ಛಾಯಾವ ಅನಪಾಯಿನೀ॥

ತಸ್ಮಾ ಕರೇಯ್ಯ ಕಲ್ಯಾಣಂ, ನಿಚಯಂ ಸಮ್ಪರಾಯಿಕಂ।

ಪುಞ್ಞಾನಿ ಪರಲೋಕಸ್ಮಿಂ, ಪತಿಟ್ಠಾ ಹೋನ್ತಿ ಪಾಣಿನಂ –

ಮಾರಸಂಯುತ್ತ

ತಪೋಕಮ್ಮಸುತ್ತ

ಪುಚ್ಛಾ – ತಪೋಕಮ್ಮಸುತ್ತಂ ಪನಾವುಸೋ ಭಗವತಾ ಜಿನೇನ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಉರುವೇಲಾಯಂ ಭನ್ತೇ ಮಾರಂ ಪಾಪಿಮನ್ತಂ ಆರಬ್ಭ ಭಾಸಿತಂ। ಮಾರೋ ಭನ್ತೇ ಪಾಪಿಮಾ ಭಗವನ್ತಂ ಉಪಸಙ್ಕಮಿತ್ವಾ ಗಾಥಾಯ ಅಜ್ಝಭಾಸಿ।

‘‘ತಪೋಕಮ್ಮಾ ಅಪಕ್ಕಮ್ಮ, ಯೇನ ಸುಜ್ಝನ್ತಿ ಮಾಣವಾ।

ಅಸುದ್ಧೋ ಮಞ್ಞಸಿ ಸುದ್ಧೋ, ಸುದ್ಧಿಮಗ್ಗಾ ಅಪರದ್ಧೋ’’ತಿ॥

ತಸ್ಮಿಂ ಭನ್ತೇ ವತ್ಥುಸ್ಮಿಂ–

‘‘ಅನತ್ತಸಂಹಿತಂ ಞತ್ವಾ, ಯಂ ಕಿಞ್ಚಿ ಅಮರಂ ತಪಂ।

ಸಬ್ಬಂ ನತ್ಥಾವಹಂ ಹೋತಿ, ಫಿಯಾರಿತ್ತಂವ ಧಮ್ಮನಿ।

ಸೀಲಂ ಸಮಾಧಿ ಪಞ್ಞಞ್ಚ, ಮಗ್ಗಂ ಬೋಧಾಯ ಭಾವಯಂ।

ಪತ್ತೋಸ್ಮಿ ಪರಮಂ ಸುದ್ಧಿಂ, ನಿಹತೋ ತ್ವಮಸಿ ಅನ್ತಕಾ’’ತಿ॥

ಏವಂ ಖೋ ಭನ್ತೇ ಭಗವತಾ ಜಿನೇನ ಭಾಸಿತಂ।

ತಪೋಕಮ್ಮಾ ಅಪಕ್ಕಮ್ಮ, ಯೇ ನ ಸುಜ್ಝನ್ತಿ ಮಾಣವಾ।

ಅಸುದ್ಧೋ ಮಞ್ಞಸಿ ಸುದ್ಧೋ, ಸುದ್ಧಿಮಗ್ಗಾ ಅಪರದ್ಧೋ–

ಅನತ್ಥಸಂಹಿತಂ ಉತ್ವಾ, ಯಂಕಿಞ್ಚಿ ಅಮರಂ ತಪಂ।

ಸಬ್ಬಂ ನತ್ಥಾವಹಂ ಹೋತಿ, ಫಿಯಾರಿತ್ತಂವ ಧಮ್ಮನಿ।

ಹತ್ಥಿರಾಜವಣ್ಣಸುತ್ತ

ಪುಚ್ಛಾ – ಹತ್ಥಿರಾಜವಣ್ಣಸುತ್ತಂ ಪನಾವುಸೋ ಭವಗತಾ ಜಿನೇನ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಉರುವೇಲಾಯಂ ಭನ್ತೇ ಮಾರಕಂಯೇವ ಪಾಪಿಮನ್ತಂ ಆರಬ್ಭ ಭಾಸಿತಂ। ಮಾರೋ ಭನ್ತೇ ಪಾಪಿಮಾ ಭಗವತೋ ಭಯಂ ಛಮ್ಭಿತತ್ತಂ ಲೋಮಹಂಸಂ ಉಪ್ಪಾದೇತುಕಾಮೋ ಮಹನ್ತಂ ಹತ್ಥಿರಾಜವಣ್ಣಂ ಅಭಿನಿಮ್ಮಿನಿತ್ವಾ ಯೇನ ಭಗವಾ ತೇನುಪಸಙ್ಕಮಿ।

ತಸ್ಮಿಂ ಭನ್ತೇ ವತ್ಥುಸ್ಮಿಂ–

‘‘ಸಂಸರಂ ದೀಘಮದ್ಧಾನಂ, ವಣ್ಣಂ ಕತ್ವಾ ಸುಭಾಸುಭಂ।

ಅಲಂ ತೇ ತೇನ ಪಾಪಿಮ, ನಿಹತೋ ತ್ವಮಸಿ ಅನ್ತಕಾ’’ತಿ॥

ಏವಂ ಖೋ ಭನ್ತೇ ಭಗವತಾ ಜಿನೇನ ಭಾಸಿತಂ।

ಸಂಸರಂ ದೀಘಮದ್ಧಾನಂ, ವಣ್ಣಂ ಕತ್ವಾ ಸುಭಾಸುಭಂ,

ಅಲಂ ತೇ ತೇನ ಪಾಪಿಮ, ನಿಹತೋ ತ್ವಮಸಿ ಅನ್ತಕ –

ಭಿಕ್ಖುನೀಸಂಯುತ್ತ

ಆಳವಿಕಾಸುತ್ತ

ಪುಚ್ಛಾ – ಇದಾನಿ ಆವುಸೋ ಭಿಕ್ಖುನೀ ಸಂಯುತ್ತಂ ಪುಚ್ಛಾಮಿ, ಯಂ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ ಸಾವಿಕಾಹಿ ಥೇರೀಹಿ ಅತ್ತನೋ

ಚ ಬುದ್ಧಸಾಸನಸ್ಸ ಚ ಯಥಾಭೂತಂ ಗುಣಂ ಪಕಾಸೇತ್ವಾ ಭಾಸಿತಂ। ತತ್ಥಾವುಸೋ ಪಠಮಂ ಪೋರಾಣಕೇಹಿ ಮಹಾಕಸ್ಸಪಾದೀಹಿ ಧಮ್ಮಸಂಗಾಹಕೇಹಿ ಥೇರವರೇಹಿ ಸಂಗೀತಂ ಆಳವಿಕಾಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಮಾರಂ ಪಾಪಿಮನ್ತಂ ಆರಬ್ಭ ಆಳವಿಕಾಯ ಭಿಕ್ಖುನಿಯಾ ಭಾಸಿತಂ। ಮಾರೋ ಭನ್ತೇ ಪಾಪಿಮಾ ಆಳವಿಕಾಯ ಭಿಕ್ಖುನಿಯಾ ಭಯಂ ಛಮ್ಭಿತತ್ತಂ ಲೋಮಹಂಸಂ ಉಪ್ಪಾದೇತುಕಾಮೋ ವಿವೇಕಮ್ಹಾ ಚಾವೇತುಕಾಮೋ ಆಳವಿಕಂ ಭಿಕ್ಖುನಿಂ ಗಾಥಾಯ ಅಜ್ಝಭಾಸಿ–

‘‘ನತ್ಥಿ ನಿಸ್ಸರಣಂ ಲೋಕೇ, ಕಿಂ ವಿವೇಕೇನ ಕಾಹಸಿ।

ಭುಞ್ಜಸ್ಸ ಕಾಮರತಿಯೋ, ಮಾಹು ಪಚ್ಛಾನುತಾಪಿನೀ’’ತಿ॥

ತಸ್ಮಿಂ ಭನ್ತೇ ವತ್ಥುಸ್ಮಿಂ–

‘‘ಅತ್ಥಿ ನಿಸ್ಸರಣಂ ಲೋಕೇ, ಪಞ್ಞಾಯ ಮೇ ಸುಫುಸ್ಸಿತಂ।

ಪಮತ್ತಬನ್ಧು ಪಾಪಿಮ, ನ ತ್ವಂ ಜಾನಾಸಿ ತಂ ಪದಂ।

ಸತ್ತಿಸೂಲೂಪಮಾ ಕಾಮಾ, ಖನ್ಧಾಸಂ ಅಧಿಕುಟ್ಟನಾ।

ಯಂ ತ್ವಂ ಕಾಮರತಿಂ ಬ್ರೂಸಿ, ಅರಹಿ ಮಯ್ಹ ಸಾ ಅಹೂ’’ತಿ॥

ಏವಂ ಖೋ ಭನ್ತೇ ಆಳವಿಕಾಯ ಭಿಕ್ಖುನಿಯಾ ಭಾಸಿತಂ।

ನತ್ಥಿ ನಿಸ್ಸರಣಂ ಲೋಕೇ, ಕಿಂ ವಿವೇಕೇನ ಕಾಹಸಿ।

ಭುಞ್ಜಸ್ಸು ಕಾಮರತಿಯೋ, ಮಾಹು ಪಚ್ಛಾನುತಾಪಿನೀ-ಹು–

ಅತ್ಥಿ ನಿಸ್ಸರಣಂ ಲೋಕೇ, ಪಞ್ಞಾಯ ಮೇ ಸುಫುಸ್ಸಿತಂ।

ಪಮತ್ತಬನ್ಧು ಪಾಪಿಮ, ನ ತ್ವಂ ಜಾನಾಸಿ ತಂ ಪದಂ॥

ಸತ್ತಿಸೂಲೂಪಮಾ ಕಾಮಾ, ಖನ್ಧಾಸಂ ಅಧಿಕುಟ್ಟನಾ।

ಯಂ ತ್ವಂ ಕಾಮರತಿಂ ಬ್ರೂಸಿ, ಅರತಿ ಮಯ್ಹ ಸಾ ಅಹು–

ಸೋಮಾಸುತ್ತ

ಪುಚ್ಛಾ – ಸೋಮಾಸುತ್ತಂ ಪನಾವುಸೋ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂಯೇವ ಭನ್ತೇ ಅನ್ಧವನೇ ಮಾರಂ ಪಾಪಿಮನ್ತಂ ಆರಬ್ಭ ಸೋಮಾಯ ಭಿಕ್ಖುನಿಯಾ ಭಾಸಿತಂ। ಮಾರೋ ಭನ್ತೇ ಪಾಪಿಮಾ ಸೋಮಾಯ ಭಿಕ್ಖುನಿಯಾ ಭಯಂ ಛಮ್ಭಿತತ್ತಂ ಲೋಮಹಂಸಂ ಉಪ್ಪಾದೇತುಕಾಮೋ ಸಮಾಧಿಮ್ಹಾ ಚಾವೇತುಕಾಮೋ ಸೋಮಂ ಭಿಕ್ಖುನಿಂ ಗಾಥಾಯ ಅಜ್ಝಭಾಸಿ।

‘‘ಯಂ ತಂ ಇಸೀಹಿ ಪತ್ತಬ್ಬಂ, ಠಾನಂ ದುರಭಿಸಮ್ಭವಂ।

ನ ತಂ ದ್ವಙ್ಗುಲಪಞ್ಞಾಯ, ಸಕ್ಕಾ ಪಪ್ಪೋತುಮಿತ್ಥಿಯಾ’’ತಿ॥

ತಸ್ಮಿಂ ಭನ್ತೇ ವತ್ಥುಸ್ಮಿಂ–

‘‘ಇತ್ಥಿಭಾವೋ ಕಿಂ ಕಯಿರಾ, ಚಿತ್ತಮ್ಹಿ ಸುಸಮಾಹಿತೇ।

ಞಾಣಮ್ಹಿ ವತ್ತಮಾನಮ್ಹಿ, ಸಮ್ಮಾ ಧಮ್ಮಂ ವಿಪಸ್ಸತೋ।

ಯಸ್ಸ ನೂನ ಸಿಯಾ ಏವಂ, ಇತ್ಥಾಹಂ ಪುರಿಸೋತಿ ವಾ।

ಕಿಞ್ಚಿ ವಾ ಪನ ಅಞ್ಞಸ್ಮಿ, ತಂ ಮಾರೋ ವತ್ತುಮರಹತೀ’’ತಿ॥

ಏವಂ ಖೋ ಭನ್ತೇ ಸೋಮಾಯ ಭಿಕ್ಖುನಿಯಾ ಅರಿಯಸಾವಿಕಾಯ ಭಾಸಿತಂ।

ಯಂ ತಂ ಇಸೀಹಿ ಪತ್ತಬ್ಬಂ, ಠಾನಂ ದುರಭಿಸಮ್ಭವಂ।

ನ ತಂ ದ್ವಙ್ಗುಲಪಞ್ಞಾಯ, ಸಕ್ಕಾ ಪಪ್ಪೋತುಮಿತ್ಥಿಯಾ–

ಇತ್ಥಿ ಭಾವೋ ಕಿಂ ಕಯಿರಾ, ಚಿತ್ತಮ್ಹಿ ಸುಸಮಾಹಿತೇ।

ಞಾಣಮ್ಹಿ ವತ್ತ ಮಾನಮ್ಹಿ, ಸಮ್ಮಾ ಧಮ್ಮಂ ವಿಪಸ್ಸತೋ॥

ಯಸ್ಸ ನೂನ ಸಿಯಾ ಏವಂ, ಇತ್ಥಾಹಂ ಪುರಿಸೋತಿ ವಾ।

ಕಿಞ್ಚಿ ವಾ ಪನ ಅಞ್ಞಸ್ಮಿ, ತಂ ಮಾರೋ ವತ್ತುಮರಹತಿ॥

ಕಿಸಾಗೋತಮೀಸುತ್ತ

ಪುಚ್ಛಾ – ತತ್ಥಾವುಸೋ ಕಿಸಾಗೋತಮೀಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂಯೇವ ಭನ್ತೇ ಅನ್ಧವನೇ ಮಾರಂ ಪಾಪಿಮನ್ತಂ ಆರಬ್ಭ ಕಿಸಾಗೋತಮಿಯಾ ಭಿಕ್ಖುನಿಯಾ ಥೇರಿಯಾ ಭಾಸಿತಂ। ಮಾರೋ ಭನ್ತೇ ಪಾಪಿಮಾ ಕಿಸಾಗೋತಮಿಯಾ ಭಿಕ್ಖುನಿಯಾ ಭಯಂ ಛಮ್ಭಿತತ್ತಂ ಲೋಮಹಂಸಂ ಉಪ್ಪಾದೇತುಕಾಮೋ ಸಮಾಧಿಮ್ಹಾ ಚಾವೇತುಕಾಮೋ ಕಿಸಾಗೋತಮಿಂ ಭಿಕ್ಖುನಿಂ ಗಾಥಾಯ ಅಜ್ಝಭಾಸಿ–

‘‘ಕಿಂ ನು ತ್ವಂ ಮತಪುತ್ತಾವ, ಏಕಮಾಸಿ ರುದಮ್ಮುಖೀ।

ವನಮಜ್ಝಗತಾ ಏಕಾ, ಪುರಿಸಂ ನು ಗವೇಸಸೀ’’ತಿ॥

ತಸ್ಮಿಂ ಭನ್ತೇ ವತ್ಥುಸ್ಮಿಂ–

ಅಚ್ಚನ್ತಂ ಮತಪುತ್ತಾಮ್ಹಿ, ಪುರಿಸಾ ಏಕದನ್ತಿಕಾ।

ನ ಸೋಚಾಮಿ ನ ರೋದಾಮಿ, ನ ತಂ ಭಾಯಾಮಿ ಆವುಸೋ॥

ಸಬ್ಬತ್ಥ ವಿಹತಾ ನನ್ದೀ, ತಮೋಕ್ಖನ್ಧೋ ಪದಾಲಿತೋ।

ಜೇತ್ವಾನ ಮಚ್ಚುನೋ ಸೇನಂ, ವಿಹರಾಮಿ ಅನಾಸವಾ’’ತಿ॥

ಏವಂ ಖೋ ಭನ್ತೇ ಕಿಸಾಗೋತಮಿಯಾ ಭಿಕ್ಖುನಿಯಾ ಭಾಸಿತಂ।

ಕಿಂ ನು ತ್ವಂ ಮತಪುತ್ತಾವ, ಏಕಮಾಸಿ ರುದಮ್ಮುಖೀ।

ವನಮಜ್ಝಗತಾ ಏಕಾ, ಪುರಿಸಂ ನು ಗಸೇಸಸಿ-ಹು–

ಅಚ್ಚನ್ತಂ ಮತಪುತ್ತಾಮ್ಹಿ, ಪುರಿಸಾ ಏತದನ್ತಿಕಾ।

ನ ಸೋಚಾಮಿ ನ ರೋದಾಮಿ, ನ ತಂ ಭಾಯಾಮಿ ಆವುಸೋ॥

ಸಬ್ಬತ್ಥ ವಿಹತಾ ನನ್ದೀ, ತಮೋಕ್ಖನ್ಧೋ ಪದಾಲಿತೋ।

ಜೇತ್ವಾನ ಮಚ್ಚುನೋ ಸೇನಂ, ವಿಹರಾಮಿ ಅನಾಸವಾ॥

ಉಪ್ಪಲವಣ್ಣಾಸುತ್ತ

ಪುಚ್ಛಾ – ತತ್ಥಾವುಸೋ ಪೋರಾಣೇಹಿ ಸಂಗೀತಿಕಾರಮಹಾಥೇರವರೇಹಿ ಸಂಗೀತಂ ಉಪ್ಪಲವಣ್ಣಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂಯೇವ ಭನ್ತೇ ಅನ್ಧವನೇ ಮಾರಂ ಪಾಪಿಮನ್ತಂ ಆರಬ್ಭ ಉಪ್ಪಲವಣ್ಣಾಯ ಭಿಕ್ಖುನಿಯಾ ಭಾಸಿತಂ। ಮಾರೋ ಭನ್ತೇ ಪಾಪಿಮಾ ಉಪ್ಪಲವಣ್ಣಾಯ ಭಿಕ್ಖುನಿಯಾ ಭಯಂ ಛಮ್ಭಿತತ್ತಂ ಲೋಮಹಂಸಂ ಉಪ್ಪಾದೇತುಕಾಮೋ ಸಮಾಧಿಮ್ಹಾ ಚಾವೇತುಕಾಮೋ ಉಪ್ಪಲವಣ್ಣಂ ಭಿಕ್ಖುನಿಂ ಗಾಥಾಯ ಅಜ್ಝಭಾಸಿ–

‘‘ಸುಪುಪ್ಫಿತಗ್ಗಂ ಉಪಗಮ್ಮ ಭಿಕ್ಖುನಿ, ಏಕಾ ತುವಂ ತಿಟ್ಠಸಿ ಸಾಲಮೂಲೇ। ನ ಚತ್ಥಿ ತೇ ದುತಿಯಾ ವಣ್ಣಧಾತು, ಬಾಲೇ ನ ತ್ವಂ ಭಾಯಸಿ ಧುತ್ತಕಾನ’’ನ್ತಿ।

ತಸ್ಮಿಂ ಭನ್ತೇ ವತ್ಥುಸ್ಮಿಂ–

‘‘ಸತಂ ಸಹಸ್ಸಾನಿಪಿ ಧುತ್ತಕಾನಂ,

ಇಧಾಗತಾ ತಾದಿಸಕಾ ಭವೇಯ್ಯುಂ।

ಲೋಮಂ ನ ಇಞ್ಜಾಮಿ ನ ಸನ್ತಸಾಮಿ,

ನ ಮಾರ ಭಾಯಾಮಿ ತಮೇಕಿಕಾಪಿ॥

ಏಸಾ ಅನ್ತರಧಾಯಾಮಿ, ಕುಚ್ಛಿಂ ವಾ ಪವಿಸಾಮಿ ತೇ।

ಪಖುಮನ್ತರಿಕಾಯಮ್ಪಿ, ತಿಟ್ಠನ್ತಿಂ ಮಂ ನ ದಕ್ಖಸಿ॥

ಚಿತ್ತಸ್ಮಿಂ ವಸೀಭೂತಾಮ್ಹಿ, ಇದ್ಧಿಪಾದಾ ಸುಭಾವಿತಾ।

ಸಬ್ಬಬನ್ಧನಮುತ್ತಾಮ್ಹಿ, ನ ತಂ ಭಾಯಾಮಿ ಆವುಸೋ’’ತಿ॥

ಏವಂ ಖೋ ಭನ್ತೇ ಉಪ್ಪಲವಣ್ಣಾಯ ಭಿಕ್ಖುನಿಯಾ ಭಾಸಿತಂ।

ಚಾಲಾಸುತ್ತ

ಪುಚ್ಛಾ – ತತ್ಥಾವುಸೋ ಚಾಲಾಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅನ್ಧವನೇ ಮಾರಂಯೇವ ಪಾಪಿಮನ್ತಂ ಆರಬ್ಭ ಚಾಲಾಯ ಭಿಕ್ಖುನಿಯಾ ಅರಿಯಸಾವಿಕಾಯ ಭಾಸಿತಂ। ಮಾರೋ ಭನ್ತೇ ಪಾಪಿಮಾ ಚಾಲಂ ಭಿಕ್ಖುನಿಂ ಉಪಸಙ್ಕಮಿತ್ವಾ ಏತದವೋಚ ‘‘ಕಿಂ ನು ತ್ವಂ ಭಿಕ್ಖುನಿ ನ ರೋಚೇಸೀ’’ತಿ। ಜಾತಿಂ ಖ್ವಾಹಂ ಆವುಸೋ ನ ರೋಚೇಮೀ’’ತಿ।

ಕಿಂ ನು ಜಾತಿಂ ನ ರೋಚೇಸಿ, ಜಾತೋ ಕಾಮಾನಿ ಭುಞ್ಜತಿ।

ಕೋ ನು ತಂ ಇದಮಾದಪಯಿ, ಜಾತಿಂ ಮಾ ರೋಚ ಭಿಕ್ಖುನೀತಿ॥

ತಸ್ಮಿಂ ಭನ್ತೇ ವತ್ಥುಸ್ಮಿಂ–

ಜಾತಸ್ಸ ಮರಣಂ ಹೋತಿ, ಜಾತೋ ದುಕ್ಖಾನಿ ಫುಸ್ಸತಿ।

ಬನ್ಧಂ ವಧಂ ಪರಿಕ್ಲೇಸಂ, ತಸ್ಮಾ ಜಾತಿಂ ನ ರೋಚಯೇ॥

ಬುದ್ಧೋ ಧಮ್ಮಮದೇಸೇಸಿ, ಜಾತಿಯಾ ಸಮತಿಕ್ಕಮಂ।

ಸಬ್ಬದುಕ್ಖಪ್ಪಹಾನಾಯ, ಸೋ ಮಂ ಸಚ್ಚೇ ನಿವೇಸಯಿ॥

ಯೇ ಚ ರೂಪೂಪಗಾ ಸತ್ತಾ, ಯೇ ಚ ಅರೂಪಟ್ಠಾಯಿನೋ।

ನಿರೋಧಂ ಅಪ್ಪಜಾನನ್ತಾ, ಆಗನ್ತಾರೋ ಪುನಬ್ಭವನ್ತಿ॥

ಏವಂ ಖೋ ಭನ್ತೇ ಚಾಲಾಯ ಭಿಕ್ಖುನಿಯಾ ಭಾಸಿತಂ।

ಕಿಂ ನು ಜಾತಿಂ ನ ರೋಚೇಸಿ, ಜಾತೋ ಕಾಮಾನಿ ಭುಞ್ಜತಿ।

ಕೋ ನು ತಂ ಇದಮಾದಪಯಿ, ಜಾತಿಂ ಮಾ ರೋಚ ಭಿಕ್ಖುನೀ॥

ಜಾತಸ್ಸ ಮರಣಂ ಹೋತಿ, ಜಾತೋ ದುಕ್ಖಾನಿ ಫುಸ್ಸತಿ।

ಬನ್ಧಂ ವಧಂ ಪರಿಕ್ಲೇಸಂ, ತಸ್ಮಾ ಜಾತಿಂ ನ ರೋಚಯೇ॥

ಬುದ್ಧೋ ಧಮ್ಮಮದೇಸೇಸಿ, ಜಾತಿಯಾ ಸಮತಿಕ್ಕಮಂ,

ಸಬ್ಬದುಕ್ಖಪ್ಪಹಾನಾಯ, ಸೋ ಮಂ ಸಚ್ಚೇ ನಿವೇಸಯಿ॥

ಸೇಲಾಸುತ್ತ

ಪುಚ್ಛಾ – ತತ್ಥಾವುಸೋ ಸೇಲಾಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಮಾರಂಯೇವ ಪಾಪಿಮನ್ತಂ ಆರಬ್ಬ್ಭ ಸೇಲಾಯ ಭಿಕ್ಖುನಿಯಾ ಅರಿಯಸಾವಿಕಾಯ ಭಾಸಿತಂ। ಮಾರೋ ಭನ್ತೇ ಪಾಪಿಮಾ ಸೇಲಾಯ ಭಿಕ್ಖುನಿಯಾ ಭಯಂ ಛಮ್ಭಿತತ್ತಂ ಲೋಮಹಂಸಂ ಉಪ್ಪಾದೇತುಕಾಮೋ ಸಮಾಧಿಮ್ಹಾ ಚಾವೇತುಕಾಮೋ ಸೇಲಂ ಭಿಕ್ಖುನಿಂ ಗಾಥಾಯ ಅಜ್ಝಭಾಸಿ–

ಕೇನಿದಂ ಪಕತಂ ಬಿಮ್ಬಂ, ಕ್ವನು ಬಿಮ್ಬಸ್ಸ ಕಾರಕೋ।

ಕ್ವನು ಬಿಮ್ಬಂ ಸಮುಪ್ಪನ್ನಂ, ಕ್ವನು ಬಿಮ್ಬಂ ನಿರುಜ್ಝತೀತಿ॥

ತಸ್ಮಿಂ ಭನ್ತೇ ವತ್ಥುಸ್ಮಿಂ–

ನಯಿದಂ ಅತ್ತಕತಂ ಬಿಮ್ಬಂ, ನಯಿದಂ ಪರಕತಂ ಅಘಂ।

ಹೇತುಂ ಪಟಿಚ್ಚ ಸಮ್ಭೂತಂ, ಹೇತುಭಙ್ಗಾ ನಿರುಜ್ಝತೀತಿ॥

ಏವಮಾದಿನಾ ಭನ್ತೇ ಸೇಲಾಯ ಭಿಕ್ಖುನಿಯಾ ಭಾಸಿತಂ।

ಕೇನಿದಂ ಪಕತಂ ಬಿಮ್ಬಂ, ಕ್ವನು ಬಿಮ್ಬಸ್ಸ ಕಾರಕೋ।

ಕ್ವನು ಬಿಮ್ಬಂ ಸಮುಪ್ಪನ್ನಂ, ಕ್ವನು ಬಿಮ್ಬಂ ನಿರುಜ್ಝತಿ-ಹು–

ನಯಿದಂ ಅತ್ತಕತಂ ಬಿಮ್ಬಂ, ನಯಿದಂ ಪರಕತಂ ಅಘಂ।

ಹೇತುಂ ಪಟಿಚ್ಚ ಸಮ್ಭೂತಂ, ಹೇತುಭಙ್ಗಾ ನಿರುಜ್ಝತಿ॥

ವಜಿರಾಸುತ್ತ

ಪುಚ್ಛಾ – ತತ್ಥಾವುಸೋ ಪೋರಾಣಕೇಹಿ ಮಹಾಕಸ್ಸಪಾದೀಹಿ ಧಮ್ಮಸಂಗಾಹಕಥೇರವರೇಹಿ ಸಂಗೀತಂ ವಜಿರಾಸುತ್ತಂ ಕತ್ಥ ಕಂ ಆರಬ್ಭ ಕೇನ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಮಾರಂ ಪಾಪಿಮನ್ತಂ ಆರಬ್ಭ ವಜಿರಾಯ ಥೇರಿಯಾ ಭಿಕ್ಖುನಿಯಾ ಭಾಸಿತಂ। ಮಾರೋ ಭನ್ತೇ ಪಾಪಿಮಾ ಪುರಿಮನಯೇನೇವ ವಜಿರಂ ಭಿಕ್ಖುನಿಂ ಗಾಥಾಯ ಅಜ್ಝಭಾಸಿ–

ಕೇನಾಯಂ ಪಕತೋ ಸತ್ತೋ, ಕುವಂ ಸತ್ತಸ್ಸ ಕಾರಕೋ,

ಕುವಂ ಸತ್ತೋ ಸಮುಪ್ಪನ್ನೋ, ಕುವಂ ಸತ್ತೋ ನಿರುಜ್ಝತೀತಿ॥

ತಸ್ಮಿಂ ಭನ್ತೇ ವತ್ಥುಸ್ಮಿಂ–

ಕಿಂ ನು ಸತ್ತೋತಿ ಪಚ್ಚೇಸಿ, ಮಾರದಿಟ್ಠಿಗತಂ ನು ತೇ।

ಸುದ್ಧಸಙ್ಖಾರಪುಞ್ಜೋಯಂ, ನಯಿಧ ಸತ್ತುಪಲಬ್ಭತಿ॥

ಯಥಾ ಹಿ ಅಙ್ಗಸಮ್ಭಾರಾ, ಹೋತಿ ಸದ್ದೋ ರಥೋ ಇತಿ।

ಏವಂ ಖನ್ಧೇಸು ಸನ್ತೇಸು, ಹೋತಿ ಸತ್ತೋತಿ ಸಮ್ಮುತಿ॥

ದುಕ್ಖಮೇವ ಹಿ ಸಮ್ಭೋತಿ, ದುಕ್ಖಂ ತಿಟ್ಠತಿ ವೇತಿ ಚ,

ನಾಞ್ಞತ್ರ ದುಕ್ಖಾ ಸಮ್ಭೋತಿ, ನಾಞ್ಞಂ ದುಕ್ಖಾ ನಿರುಜ್ಝತೀತಿ॥

ಏವಂ ಖೋ ಭನ್ತೇ ವಜಿರಾಯ ಭಿಕ್ಖುನಿಯಾ ಭಾಸಿತಂ।

ಕೇನಾಯಂ ಪಕತೋ ಸತ್ತೋ, ಕುವಂ ಸತ್ತಸ್ಸಕಾರಕೋ।

ಕುವಂ ಸತ್ತೋ ಸಮುಪ್ಪನ್ನೋ, ಕುವಂ ಸತ್ತೋ ನಿರುಜ್ಝತಿ-ಹು–

ಕಿಂ ನು ಸತ್ತೋತಿ ಪಚ್ಚೇಸಿ, ಮಾರ ದಿಟ್ಠಿಗತಂ ನು ತೇ।

ಸುದ್ಧಸಙ್ಖಾರಪುಞ್ಜೋಯಂ, ನಯಿಧ ಸತ್ತುಪಲಬ್ಭತಿ॥

ಬ್ರಹ್ಮಸಂಯುತ್ತ

ಗಾರವಸುತ್ತ

ಪುಚ್ಛಾ – ಬ್ರಹ್ಮಸಂಯುತ್ತೇ ಆವುಸೋ ಪೋರಾಣೇಹಿ ಮಹಾಕಸ್ಸಪಥೇರಾದೀಹಿ ಧಮ್ಮಸಂಗಾಹಕಥೇರವರೇಹಿ ದುತಿಯಂ ಸಂಗೀತಂ ಗಾರವಸುತ್ತಂ ಕತ್ಥ ಕಥಞ್ಚ ಸಮುಪ್ಪನ್ನಂ।

ವಿಸ್ಸಜ್ಜನಾ – ಉರುವೇಲಾಯಂ ಭನ್ತೇ ಸಮುಪ್ಪನ್ನಂ। ಭಗವಾ ಭನ್ತೇ ಉರುವೇಲಾಯಂ ವಿಹರತಿ ನಜ್ಜಾ ನೇರಞ್ಜರಾಯ ತೀರೇ ಅಜಪಾಲನಿಗ್ರೋಧಮೂಲೇ ಪಠಮಾಭಿಸಮ್ಬುದ್ಧೋ। ಅಥ ಖೋ ಭಗವತೋ ರಹೋಗತಸ್ಸ ಪಟಿಸಲ್ಲೀನಸ್ಸ ಏವಂ ಚೇತಸೋ ಪರಿವಿತಕ್ಕೋ ಉದಪಾದಿ ‘‘ದುಕ್ಖಂ ಖೋ ಅಗಾರವೋ ವಿಹರತಿ ಅಪ್ಪತಿಸ್ಸೋ, ಕಂ ನು ಖ್ವಾಹಂ ಸಮಣಂ ವಾ ಬ್ರಾಹ್ಮಣಂ ವಾ ಸಕ್ಕತ್ವಾ ಗರುಂ ಕತ್ವಾ ಉಪನಿಸ್ಸಾಯ ವಿಹರೇಯ್ಯ’’ನ್ತಿ।

ಅಥ ಖೋ ಭನ್ತೇ ಭಗವತೋ ಏತದಹೋಸಿ ‘‘ಅಪರಿಪುಣ್ಣಸ್ಸ ಖೋ ಸೀಲಕ್ಖನ್ಧಸ್ಸ ಪಾರಿಪೂರಿಯಾ ಅಞ್ಞಂ ಸಮಣಂ ವಾ ಬ್ರಾಹ್ಮಣಂ ವಾ ಸಕ್ಕತ್ವಾ ಗರುಂ ಕತ್ವಾ ಉಪನಿಸ್ಸಾಯ ವಿಹರೇಯ್ಯುಂ, ನ ಖೋ ಪನಾಹಂ ಪಸ್ಸಾಮಿ ಸದೇವಕೇ ಲೋಕೇ ಸಮಾರಕೇ ಸಬ್ರಹ್ಮಕೇ ಸಸ್ಸಮಣಬ್ರಾಹ್ಮಣಿಯಾ ಪಜಾಯ ಸದೇವಮನುಸ್ಸಾಯ ಅತ್ತನಾ ಸೀಲಸಮ್ಪನ್ನತರಂ ಅಞ್ಞಂ ಸಮಣಂ ವಾ

ಬ್ರಾಹ್ಮಣಂ ವಾ, ಯಮಹಂ ಸಕ್ಕತ್ವಾ ಗರುಂ ಕತ್ವಾ ಉಪನಿಸ್ಸಾಯ ವಿಹರೇಯ್ಯುಂ।

ಅಪರಿಪುಣ್ಣಸ್ಸ ಖೋ ಸಮಾಧಿಕ್ಖನ್ಧಸ್ಸ।

ಅಪರಿಪುಣ್ಣಸ್ಸ ಖೋ ಪಞ್ಞಾಕ್ಖನ್ಧಸ್ಸ।

ಅಪರಿಪುಣ್ಣಸ್ಸ ಖೋ ವಿಮುತ್ತಿಕ್ಖನ್ಧಸ್ಸ॥

ಅಪರಿಪುಣ್ಣಸ್ಸ ಖೋ ವಿಮುತ್ತಿಞಾಣದಸ್ಸನಕ್ಖನ್ಧಸ್ಸ ಪಾರಿಪೂರಿಯಾ ಅಞ್ಞಂ ಸಮಣಂ ವಾ ಬ್ರಾಹ್ಮಣಂ ವಾ ಸಕ್ಕತ್ವಾ ಗರುಂ ಕತ್ವಾ ಉಪನಿನಿಸ್ಸಾಯ ವಿಹರೇಯ್ಯಂ। ನ ಖೋ ಪನಾಹಂ ಪಸ್ಸಾಮಿ ಸದೇವಕೇ ಲೋಕೇ ಸಮಾರಕೇ ಸಬ್ರಹ್ಮಕೇ ಸಸ್ಸಮಣಬ್ರಾಹ್ಮಣಿಯಾ ಪಜಾಯ ಸದೇವಮನುಸ್ಸಾಯ ಅತ್ತನಾ ವಿಮುತ್ತಿಞಾಣದಸ್ಸನಸಮ್ಪನ್ನತರಂ ಅಞ್ಞಂ ಸಮಣಂ ವಾ ಬ್ರಾಹ್ಮಣಂ ವಾ, ಯಮಹಂ ಸಕ್ಕತ್ವಾ ಗರುಂ ಕತ್ವಾ ಉಪನಿಸ್ಸಾಯ ವಿಹರೇಯ್ಯಂ। ಯಂನೂನಾಹಂ ಯ್ವಾಯಂ ಧಮ್ಮೋ ಮಯಾ ಅಭಿಸಮ್ಬುದ್ಧೋ, ತಮೇವ ಧಮ್ಮಂ ಸಕ್ಕತ್ವಾ ಗರುಂ ಕತ್ವಾ ಉಪನಿಸ್ಸಾಯ ವಿಹರೇಯ್ಯ’’ನ್ತಿ। ಏವಂ ಖೋ ಭನ್ತೇ ಭಗವತೋ ಚೇತಸೋ ಪರಿವಿತಕ್ಕವಸೇನ ಉಪ್ಪನ್ನಂ।

ಯೇ ಚ ಅತೀತಾ ಸಮ್ಬುದ್ಧಾ, ಯೇ ಚ ಬುದ್ಧಾ ಅನಾಗತಾ।

ಯೋ ಚೇತರಹಿ ಸಮ್ಬುದ್ಧೋ, ಬಹೂನಂ ಸೋಕನಾಸನೋ।

ಸಬ್ಬೇ ಸದ್ಧಮ್ಮಗರುನೋ, ವಿಹಂಸು ವಿಹರನ್ತಿ ಚ।

ತಥಾಪಿ ವಿಹರಿಸ್ಸನ್ತಿ, ಏಸಾ ಬುದ್ಧಾನ ಧಮ್ಮತಾ॥

ತಸ್ಮಾ ಹಿ ಅತ್ತಕಾಮೇನ, ಮಹತ್ತಮಭಿಕಙ್ಖತಾ।

ಸದ್ಧಮ್ಮೋ ಗರುಕಾತಬ್ಬೋ, ಸರಂ ಬುದ್ಧಾನ ಸಾಸನಂ॥

ಅಞ್ಞರತಬ್ರಹ್ಮಸುತ್ತ

ಪುಚ್ಛಾ- ತತ್ಥಾವುಸೋ ಪೋರಾಣಕೇಹಿ ಮಹಾಕಸ್ಸಪಾದೀಹಿ ಧಮ್ಮಸಂಗಾಹಕಥೇರವರೇಹಿ ಪಠಮಂ ಸಂಗೀತಂ ಅಞ್ಞತರಬ್ರಹ್ಮಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಬ್ರಹ್ಮಲೋಕೇ ಭನ್ತೇ ಅಞ್ಞತರಂ ಬ್ರಹ್ಮಾನಂ ಆರಬ್ಭ ಆಯಸ್ಮತಾ ಮಹಾಮೋಗ್ಗಲ್ಲಾನತ್ಥೇರೇನ ಭಾಸಿತಂ। ಅಞ್ಞತರಸ್ಸ ಭನ್ತೇ ಬ್ರಹ್ಮುನೋ ಏವರೂಪಂ ಪಾಪಕಂ ದಿಟ್ಠಿಗತಂ ಉಪ್ಪನ್ನಂ ಹೋತಿ ‘‘ನತ್ಥಿ ಸೋ ಸಮಣೋ ವಾ ಬ್ರಾಹ್ಮಣೋ ವಾ, ಯೋ ಇಧ ಆಗಚ್ಛೇಯ್ಯಾ’’ತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ–

ಅಜ್ಜಾಪಿ ತೇ ಆವುಸೋ ಸಾ ದಿಟ್ಠಿ, ಯಾ ತೇ ದಿಟ್ಠಿ ಪುರೇ ಅಹು।

ಪಸ್ಸಸಿ ವೀತಿವತ್ತನ್ತಂ, ಬ್ರಹ್ಮಲೋಕೇ ಪಭಸ್ಸರನ್ತಿ।

ಏವಂ ಖೋ ಭನ್ತೇ ಆಯಸ್ಮತಾ ಮಹಾಮೋಗ್ಗಲ್ಲಾನತ್ಥೇರೇನ ಭಾಸಿತಂ॥

ಅಜ್ಜಾಪಿ ತೇ ಆವುಸೋ ಸಾ ದಿಟ್ಠಿ, ಯಾ ತೇ ದಿಟ್ಠಿ ಪುರೇ ಅಹು।

ಪಸ್ಸಸಿ ವೀತಿವತ್ತನ್ತ, ಬ್ರಹ್ಮಲೋಕೇ ಪಭಸ್ಸರಂ-ಹು–

ನ ಮೇ ಮಾರಿಸ ಸಾ ದಿಟ್ಠಿ, ಯಾ ಮೇ ದಿಟ್ಠಿ ಪುರೇ ಅಹು।

ಪಸ್ಸಾಮಿ ವೀತಿವತ್ತನ್ತಂ, ಬ್ರಹ್ಮಲೋಕೇ ಪಭಸ್ಸರಂ।

ಸ್ವಾಹಂ ಅಜ್ಜ ಕಥಂ ವಜ್ಜಂ, ಅಹಂ ನಿಚ್ಚೋಮ್ಹಿ ಸಸ್ಸತೋ ಹು–

ತೇವಿಜ್ಜಾ ಇದ್ಧಿಪತ್ತಾ ಚ, ಚೇತೋಪರಿಯಾಯ ಕೋವಿದಾ।

ಖೀಣಾಸವಾ ಅರಹನ್ತೋ, ಬಹೂ ಬುದ್ಧಸ್ಸ ಸಾವಕಾ-ಹು–

ಅರುಣವತೀಸುತ್ತ

ಪುಚ್ಛಾ – ತತ್ಥಾವುಸೋ ಅರುಣವತೀಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಭೂತಪುಬ್ಬಂ ಭಿಕ್ಖವೇ ರಾಜಾ ಅಹೋಸಿ ಅರುಣವಾ ನಾಮ। ರಞ್ಞೋ ಖೋ ಪನ ಭಿಕ್ಖವೇ ಅರುಣವತೋ ಅರುಣವತೀ ನಾಮ ರಾಜಧಾನೀ ಅಹೋಸೀ’’ತಿ ಏವಮಾದಿನಾ ಭನ್ತೇ ಭಗವತಾ ಅರುಣವತೀ ಸುತ್ತಂ ಭಾಸಿತಂ।

ಆರಮ್ಭಥ ನಿಕ್ಕಮಥ, ಯುಞ್ಜಥ ಬುದ್ಧಸಾಸನೇ।

ಧುನಾಥ ಮಚ್ಚುನೋ ಸೇನಂ, ನಳಾಗಾರಂವ ಕುಞ್ಜರೋ।

ಯೋ ಇಮಸ್ಮಿಂ ಧಮ್ಮವಿನಯೇ, ಅಪ್ಪಮತ್ತೋ ವಿಹಸ್ಸತಿ।

ಪಹಾಯ ಜಾತಿ ಸಂಸಾರಂ, ದುಕ್ಖಸ್ಸನ್ತಂ ಕರಿಸ್ಸತಿ-ಹು–

ಬ್ರಾಹ್ಮಣಸಂಯುತ್ತ

ಧನಞ್ಜಾನೀಸುತ್ತ

ಪುಚ್ಛಾ – ಬ್ರಾಹ್ಮಣಸಂಯುತ್ತೇ ಆವುಸೋ ಪಠಮಂ ಸಂಗೀತಂ ಧನಞ್ಜಾನೀಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಭಾರದ್ವಾಜಗೋತ್ತಂ ಬ್ರಾಹ್ಮಣಂ ಆರಬ್ಭ ಭಾಸಿತಂ। ಭಾರದ್ವಾಜಗೋತ್ತೋ ಭನ್ತೇ ಬ್ರಾಹ್ಮಣೋ ಭಗವನ್ತಂ ಉಪಸಙ್ಕಮಿತ್ವಾ ಗಾಥಾಯ ಅಜ್ಝಭಾಸಿ।

‘‘ಕಿಂ ಸು ಛೇತ್ವಾ ಸುಖಂ ಸೇತಿ,

ಕಿಂ ಸು ಛೇತ್ವಾ ನ ಸೋಚತಿ।

ಕಿಸ್ಸಸ್ಸು ಏಕಧಮ್ಮಸ್ಸ,

ವಧಂ ರೋಚೇಸಿ ಗೋತಮಾ’’ತಿ–

ತಸ್ಮಿಂ ಭನ್ತೇ ವತ್ಥುಸ್ಮಿಂ–

‘‘ಕೋಧಂ ಛೇತ್ವಾ ಸುಖಂ ಸೇತಿ।

ಕೋಧಂ ಛೇತ್ವಾ ನ ಸೋಚತಿ।

ಕೋಧಸ್ಸ ವಿಸಮೂಲಸ್ಸ,

ಮಧುರಗ್ಗಸ್ಸ ಬ್ರಾಹ್ಮಣ।

ವಧಂ ಅರಿಯಾ ಪಸಂಸನ್ತಿ,

ತಞ್ಹಿ ಛೇತ್ವಾ ನ ಸೋಚತೀ’’ತಿ।

ಏವಂ ಖೋ ಭನ್ತೇ ಭಗವತಾ ಭಾಸಿತಂ।

ಕಿಂ ಸು ಛೇತ್ವಾ ಸುಖಂಸೇತಿ, ಕಿಂ ಸು ಛೇತ್ವಾ ನ ಸೋಚತಿ।

ಕಿಸ್ಸಸ್ಸು ಏಕಧಮ್ಮಸ್ಸ, ವಧಂ ರೋಚೇಸಿ ಗೋತಮ–

ಪುಚ್ಛಾ – ಇಮಞ್ಚ ಪನಾವುಸೋ ಧಮ್ಮದೇಸನಂ ಸುತ್ವಾ ಭಾರದ್ವಾಜಗೋತ್ತೋ ಬ್ರಾಹ್ಮಣೋ ಇಮಸ್ಮಿಂ ಧಮ್ಮವಿನಯೇ ಪಸನ್ನೋ ಕೀದಿಸಂ ಪಸನ್ನಾಕಾರಮಕಾಸಿ, ಕೀವತ್ತಕಞ್ಚ ಅತ್ಥಂ ಸಮ್ಪಾದೇಸಿ।

ವಿಸ್ಸಜ್ಜನಾ – ಇಮಞ್ಚ ಪನ ಭನ್ತೇ ಧಮ್ಮದೇಸನಂ ಸುತ್ವಾ ಭಾರದ್ವಾಜಗೋತ್ತೋ ಬ್ರಾಹ್ಮಣೋ ‘‘ಅಭಿಕ್ಕನ್ತಂ ಭೋ ಗೋತಮ, ಅಭಿಕ್ಕನ್ತಂ ಭೋ ಗೋತಮ, ಸೇಯ್ಯಥಾಪಿ ಭೋ ಗೋತಮ ನಿಕ್ಕುಜ್ಜಿತಂ ವಾ ಉಕ್ಕುಜ್ಜೇಯ್ಯ, ಪಟಿಚ್ಛನ್ನಂ ವಾ ವಿವರೇಯ್ಯ, ಮೂಳ್ಹಸ್ಸ ವಾ ಮಗ್ಗಂ ಆಚಿಕ್ಖೇಯ್ಯ, ಅನ್ಧಕಾರೇ ವಾ ತೇಲಪಜ್ಜೋತಂ ಧಾರೇಯ್ಯ ಚಕ್ಖುಮನ್ತೋ ರೂಪಾನಿ ದಕ್ಖನ್ತೀ’’ತಿ ಏವಮಾದಿನಾ ಭನ್ತೇ ಇಮಸ್ಮಿಂ ಧಮ್ಮವಿನಯೇ ಪಸನ್ನೋ ಪಸನ್ನಾಕಾರಮಕಾಸಿ। ಇಮಞ್ಚ ಪನ ಭನ್ತೇ ಧಮ್ಮದೇಸನಂ ಸುತ್ವಾ ಭಾರದ್ವಾಜಗೋತ್ತೋ ಬ್ರಾಹ್ಮಣೋ ಭಗವತೋ ಸನ್ತಿಕೇ ಪಬ್ಬಜ್ಜಂ ಉಪಸಮ್ಪದಂ ಯಾಚಿತ್ವಾ ಅಚಿರೂಪಸಮ್ಪನ್ನೋ ಯಾವ ಅರಹತ್ತಂ ಸಮ್ಪಾದೇಸಿ।

ಅಕ್ಕೋಸಸುತ್ತ

ಪುಚ್ಛಾ – ಅಕ್ಕೋಸಕಭಾರದ್ವಾಜಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಅಕ್ಕೋಸಕಭಾರದ್ವಾಜಂ ಬ್ರಾಹ್ಮಣಂ ಆರಬ್ಭ ಭಾಸಿತಂ। ಅಕ್ಕೋಸಕಭಾರದ್ವಾಜೋ ಭನ್ತೇ ಬ್ರಾಹ್ಮಣೋ ಭಗವನ್ತಂ ಉಪಸಙ್ಕಮಿತ್ವಾ ಅಸಬ್ಭಾಹಿ ಫರುಸಾಹಿ ವಾಚಾಹಿ ಭಗವನ್ತಂ ಅಕ್ಕೋಸತಿ ಪರಿಭಾಸತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ತಂ ಕಿಂ ಮಞ್ಞಸಿ ಬ್ರಾಹ್ಮಣ, ಅಪಿ ನುಖೋ ತೇ ಆಗಚ್ಛನ್ತಿ ಮಿತ್ತಾಮಚ್ಚಾ ಞಾತಿಸಾಲೋಹಿತಾ ಅತಿತಿಯೋ’’ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ।

ಅಕ್ಕೋಧಸ್ಸ ಕುತೋ ಕೋಧೋ,

ದನ್ತಸ್ಸ ಸಮಜೀವಿನೋ।

ಸಮ್ಮದಞ್ಞಾ ವಿಮುತ್ತಸ್ಸ,

ಉಪಸನ್ತಸ್ಸ ತಾದಿನೋ॥

ತಸ್ಸೇವ ತೇನ ಪಾಪಿಯೋ,

ಯೋ ಕುದ್ಧಂ ಪಟಿಕುಜ್ಝತಿ।

ಕುದ್ಧಂ ಅಪ್ಪಟಿಕುಜ್ಝನ್ತೋ,

ಸಙ್ಗಾಮಂ ಜೇತಿ ದುಜ್ಜಯಂ॥

ಉಭಿನ್ನಮತ್ಥಂ ಚರತಿ,

ಅತ್ತನೋ ಚ ಪರಸ್ಸ ಚ।

ಪರಂ ಸಙ್ಕುಪಿತಂ ಞತ್ವಾ,

ಯೋ ಸತೋ ಉಪಸಮ್ಮತಿ॥

ಉಭಿನ್ನಂ ತಿಕಿಚ್ಛನ್ತಾನಂ,

ಅತ್ತನೋ ಚ ಪರಸ್ಸ ಚ।

ಜನಾ ಮಞ್ಞನ್ತಿ ಬಾಲೋತಿ,

ಯೇ ಧಮ್ಮಸ್ಸ ಅಕೋವಿದಾ॥

ಪುಚ್ಛಾ – ಇಮಞ್ಚ ಪನಾವುಸೋ ಧಮ್ಮದೇಸನಂ ಸುತ್ವಾ ಅಕ್ಕೋಸಕಭಾರದ್ವಾಜೋ ಬ್ರಾಹ್ಮಣೋ ಇಮಸ್ಮಿಂ ಧಮ್ಮವಿನಯೇ ಪಸನ್ನೋ ಕೀದಿಸಂ ಪಸನ್ನಾಕಾರಮಕಾಸಿ। ಕೀವತ್ತಕಞ್ಚ ಅತ್ಥಂ ಸಮ್ಪಾದೇಸಿ।

ವಿಸ್ಸಜ್ಜನಾ – ಇಮಞ್ಚ ಪನ ಭನ್ತೇ ಧಮ್ಮದೇಸನಂ ಸುತ್ವಾ ಅಕ್ಕೋಸಕಭಾರದ್ವಾಜೋ ಬ್ರಾಹ್ಮಣೋ ‘‘ಅಭಿಕ್ಕನ್ತಂ ಭೋ ಗೋತಮ, ಅಭಿಕ್ಕನ್ತಂ ಭೋ ಗೋತಮಾ’’ತಿ ಏವಮಾದಿನಾ ಇಮಸ್ಮಿಂ ಧಮ್ಮವಿನಯೇ ಪಸನ್ನೋ ಪಸನ್ನಾಕಾರಮಕಾಸಿ। ಯಾವ ಅರಹತ್ತಾ ಚ ಪನ ಮಹನ್ತಂ ಅತ್ಥಂ ಸಮ್ಪಾದೇಸಿ।

ಬಹುಧೀತರಸುತ್ತ

ಪುಚ್ಛಾ – ತೇನಾವುಸೋ ಭಗವತಾ ಜಾನತಾ…ಪೇ॰… ಸಮ್ಮಾಸಮ್ಬುದ್ಧೇನ ಬ್ರಾಹ್ಮಣಸಂಯುತ್ತೇ ಬಹುಧೀತರಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಕೋಸಲೇಸು ಭನ್ತೇ ಅಞ್ಞತರಸ್ಮಿಂ ವನಸಣ್ಡೇ ಅಞ್ಞತರಂ ಭಾರದ್ವಾಜಗೋತ್ತಂ ಬ್ರಾಹ್ಮಣಂ ಆರಬ್ಭ ಭಾಸಿತಂ। ಅಞ್ಞತರೋ ಭನ್ತೇ ಭಾರದ್ವಾಜಗೋತ್ತೋ ಬ್ರಾಹ್ಮಣೋ ಗೋಣೇ ನಟ್ಠೇ ಪರಿಯೇಸನ್ತೋ ಭಗವತೋ ಸನ್ತಿಕೇ ಇಮಾ ಗಾಥಾಯೋ ಅಭಾಸಿ।

‘‘ನ ಹಿ ನೂನಿಮಸ್ಸ ಸಮಣಸ್ಸ, ಬಲೀಬದ್ದಾ ಚತುದ್ದಸ।

ಅಜ್ಜಸಟ್ಠಿಂ ನ ದಿಸ್ಸನ್ತಿ, ತೇನಾಯಂ ಸಮಣೋ ಸುಖೀ।

ನ ಹಿ ನೂನಿಮಸ್ಸ ಸಮಣಸ್ಸ, ತಿಲಾಖೇತ್ತಸ್ಮಿ ಪಾಪಕಾ।

ಏಕಪಣ್ಣಾ ದುಪಣ್ಣಾ ಚ, ತೇನಾಯಂ ಸಮಣೋ ಸುಖೀ॥

(ಪೇಯ್ಯಾಲ)

ನ ಹಿ ನೂನಿಮಸ್ಸ ಸಮಣಸ್ಸ, ಪಚ್ಚೂಸಮ್ಹಿ ಇಣಾಯಿಕಾ।

ದೇಥ ದೇಥಾತಿ ಚೋದೇನ್ತಿ, ತೇನಾಯಂ ಸಮಣೋ ಸುಖೀ’’ತಿ॥

ತಸ್ಮಿಂ ಭನ್ತೇ ವತ್ಥುಸ್ಮಿಂ–

ನ ಹಿ ಮಯ್ಹಂ ಬ್ರಾಹ್ಮಣ, ಬಲೀಬದ್ದಾ ಚತುದ್ದಸ।

ಅಜ್ಜಸಟ್ಠಿಂ ನ ದಿಸ್ಸನ್ತಿ, ತೇನಾಹಂ ಬ್ರಾಹ್ಮಣಾ ಸುಖೀ।

ನ ಹಿ ಮಯ್ಹಂ ಬ್ರಾಹ್ಮಣ, ತಿಲಾಖೇತ್ತಸ್ಮಿ ಪಾಪಕಾ।

ಏಕಪಣ್ಣಾ ದುಪಣ್ಣಾ ಚ, ತೇನಾಹಂ ಬ್ರಾಹ್ಮಣಾ ಸುಖೀ॥

(ಪೇಯ್ಯಾಲ)

ನ ಹಿ ಮಯ್ಹಂ ಬ್ರಾಹ್ಮಣ, ಪಚ್ಚೂಸಮ್ಹಿ ಇಣಾಯಿಕಾ।

ದೇಥ ದೇಥಾತಿ ಚೋದೇನ್ತಿ, ತೇನಾಹಂ ಬ್ರಾಹ್ಮಣಾ ಸುಖೀತಿ॥

ಏವಂ ಖೋ ಭನ್ತೇ ಭಗವತಾ ಭಾಸಿತಂ।

(೧)

ನ ಹಿ ನೂನಿಮಸ್ಸ ಸಮಣಸ್ಸ, ಬಲೀಬದ್ದಾ ಚತುದ್ದಸ।

ಅಜ್ಜಸಟ್ಠಿಂ ನ ದಿಸ್ಸನ್ತಿ, ತೇನಾಹಂ ಸಮಣೋ ಸುಖೀ॥

(೨)

ನ ಹಿ ನೂನಿಮಸ್ಸ ಸಮಣಸ್ಸ, ತಿಲಾಖೇತ್ತಸ್ಮಿ ಪಾಪಕಾ।

ಏಕಪಣ್ಣಾ ದುಪಣ್ಣಾ ಚ, ತೇನಾಯಂ ಸಮಣೋ ಸುಖೀ॥

(೩)

ನ ಹಿ ನೂನಿಮಸ್ಸ ಸಮಣಸ್ಸ, ತುಚ್ಛಕೋಟ್ಠಸ್ಮಿ ಮೂಸಿಕಾ।

ಉಸ್ಸೋಳ್ಹಿಕಾಯ ನಚ್ಚನ್ತಿ, ತೇನಾಯಂ ಸಮಣೋ ಸುಖೀ॥

(೪)

ನ ಹಿ ನೂನಿಮಸ್ಸ ಸಮಣಸ್ಸ, ಸನ್ಥಾರೋ ಸತ್ತಮಾಸಿಕೋ।

ಉಪ್ಪಾಟಕೇಹಿ ಸಞ್ಛನ್ನೋ, ತೇನಾಯಂ ಸಮಣೋ ಸುಖೀ॥

(೫)

ನ ಹಿ ನೂನಿಮಸ್ಸ ಸಮಣಸ್ಸ, ವಿಧವಾ ಸತ್ತ ಧೀತರೋ।

ಏಕಪುತ್ತಾ ದುಪುತ್ತಾ ಚ, ತೇನಾಯಂ ಸಮಣೋ ಸುಖೀ॥

(೬)

ನ ಹಿ ನೂನಿಮಸ್ಸ ಸಮಣಸ್ಸ, ಪಿಙ್ಗಲಾ ತಿಲಕಾಹತಾ।

ಸೋತ್ತಂ ಪಾದೇನ ಬೋಧೇತಿ, ತೇನಾಯಂ ಸಮಣೋ ಸುಖೀ॥

(೭)

ನ ಹಿ ನೂನಿಮಸ್ಸ ಸಮಣಸ್ಸ, ಪಚ್ಚೂಸಮಿ ಇಣಾಯಿಕಾ।

ದೇಥ ದೇಥಾತಿ ಚೋದೇನ್ತಿ, ತೇನಾಯಂ ಸಮಣೋ ಸುಖೀ॥

(೧)

ನ ಹಿ ಮಯ್ಹಂ ಬ್ರಾಹ್ಮಣ, ಬಲೀಬದ್ದಾ ಚತುದ್ದಸ।

ಅಜ್ಜಸಟ್ಠಿಂ ನ ದಿಸ್ಸನ್ತಿ, ತೇನಾಹಂ ಬ್ರಾಹ್ಮಣಾ ಸುಖೀ॥

(೨)

ನ ಹಿ ಮಯ್ಹಂ ಬ್ರಾಹ್ಮಣ, ತಿಲಾಖೇತ್ತಸ್ಮಿ ಪಾಪಕಾ।

ಏಕಪಣ್ಣಾ ದುಪಣ್ಣಾ ಚ, ತೇನಾಹಂ ಬ್ರಾಹ್ಮಣಾ ಸುಖೀ॥

(೩)

ನ ಹಿ ಮಯ್ಹಂ ಬ್ರಾಹ್ಮಣ, ತುಚ್ಛಕೋಟ್ಠಸ್ಮಿ ಮೂಸಿಕಾ।

ಉಸ್ಸೋಳ್ಹೀಕಾಯ ನಚ್ಚನ್ತಿ, ತೇನಾಹಂ ಬ್ರಾಹ್ಮಣಾ ಸುಖೀ॥

(೪)

ನ ಹಿ ಮಯ್ಹಂ ಬ್ರಾಹ್ಮಣ, ಸನ್ಥಾರೋ ಸತ್ತಮಾಸಿಕೋ।

ಉಪ್ಪಾಟಕೇಹಿ ಸಞ್ಛನ್ನೋ, ತೇನಾಹಂ ಬ್ರಾಹ್ಮಣಾ ಸುಖೀ॥

(೫)

ನ ಹಿ ಮಯ್ಹಂ ಬ್ರಾಹ್ಮಣ, ವಿಧವಾ ಸತ್ತ ಧೀತರೋ।

ಏಕಪುತ್ತಾ ದುಪುತ್ತಾ ಚ, ತೇನಾಹಂ ಬ್ರಾಹ್ಮಣಾ ಸುಖೀ॥

(೬)

ನ ಹಿ ಮಯ್ಹಂ ಬ್ರಾಹ್ಮಣ, ಪಿಙ್ಗಲಾ ತಿಲಕಾಹತಾ।

ಸೋತ್ತಂ ಪಾದೇನ ಬೋಧೇತಿ, ತೇನಾಹಂ ಬ್ರಾಹ್ಮಣಾ ಸುಖೀ॥

(೭)

ನ ಹಿ ಮಯ್ಹಂ ಬ್ರಾಹ್ಮಣ, ಪಚ್ಚೂಸಮ್ಹಿ ಇಣಾಯಿಕಾ।

ದೇಥ ದೇಥಾತಿ ಚೋದೇನ್ತಿ, ತೇನಾಹಂ ಬ್ರಾಹ್ಮಣಾ ಸುಖೀ॥

ಪುಚ್ಛಾ – ಇಮಞ್ಚ ಪನಾವುಸೋ ಧಮ್ಮದೇಸನಂ ಸುತ್ವಾ ಸೋ ಭಾರದ್ವಾಜಗೋತ್ತೋ ಬ್ರಾಹ್ಮಣೋ ಇಮಸ್ಮಿಂ ಧಮ್ಮವಿನಯೇ ಪಸನ್ನೋ ಕೀದಿಸಂ ಪಸನ್ನಾಕಾರಮಕಾಸಿ। ಕೀವ ಮಹನ್ತಞ್ಚ ಇಮಸ್ಮಿಂ ಧಮ್ಮವಿನಯೇ ಅತ್ಥಂ ಸಮ್ಪಾದೇಸಿ।

ವಿಸ್ಸಜ್ಜನಾ – ಇಮಞ್ಚ ಪನ ಭನ್ತೇ ಧಮ್ಮದೇಸನಂ ಸುತ್ವಾ ಸೋ ಭಾರದ್ವಾಜಗೋತ್ತೋ ಬ್ರಾಹ್ಮಣೋ ‘‘ಅಭಿಕ್ಕನ್ತಂ ಭೋ ಗೋತಮ ಅಭಿಕ್ಕನ್ತಂ ಭೋ ಗೋತಮ, ಸೇಯ್ಯಥಾಪಿ ಭೋಗೋತಮ, ನಿಕ್ಕುಜ್ಜಿತಂ ವಾ ಉಕ್ಕುಜ್ಜೇಯ್ಯ, ಪಟಿಚ್ಛನ್ನಂ ವಾ ವಿವರೇಯ್ಯ, ಮೂಳ್ಹಸ್ಸ ವಾ ಮಗ್ಗಂ ಆಚಿಕ್ಖೇಯ್ಯ, ಅನ್ಧಕಾರೇ ವಾ ತೇಲಪಜ್ಜೋತಂ ಧಾರೇಯ್ಯ, ಚಕ್ಖುಮನ್ತೋ ರೂಪಾನಿ ದುಕ್ಖನ್ತೀ’’ತಿ ಏವಮಾದಿನಾ ಇಮಸ್ಮಿ ಧಮ್ಮವಿನಯೇ ಪಸನ್ನೋ ಪಸನ್ನಾಕಾರಮಕಾಸಿ। ಭಗವತೋ ಚ ಸನ್ತಿಕೇ ‘‘ಲಭೇಯ್ಯಾಹಂ ಭೋತೋ ಗೋತಮಸ್ಸ ಸನ್ತಿಕೇ ಪಬ್ಬಜಂ, ಲಭೇಯ್ಯಂ ಉಪಸಮ್ಪದ’’ನ್ತಿ ಏವಮಾದಿನಾ ಪಬ್ಬಜ್ಜಂ ಉಪಸಮ್ಪದಂ ಯಾಚಿತ್ವಾ ಅಚಿರೂಪಸಮ್ಪನ್ನೋ ಯಾವ ಅರಹತ್ತಾ ಮಹನ್ತಂ ವಿಸೇಸಂ ಸಮ್ಪಾದೇಸಿ।

ಕಸಿಭಾರದ್ವಾಜಸುತ್ತ

ಪುಚ್ಛಾ – ತತ್ಥಾವುಸೋ ಏಕಾದಸಮಂ ಮಹಾಕಸ್ಸಪಾದೀಹಿ ಪೋರಾಣಧಮ್ಮಸಂಗಾಹಕಥೇರೇಹಿ ಸಂಗೀತಂ ಕಸಿಭಾರದ್ವಾಜಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಮಗಧೇಸು ಭನ್ತೇ ದಕ್ಖಿಣಾಗಿರಿಸ್ಮಿಂ ಏಕನಾಳಾಯಂ ಬ್ರಾಹ್ಮಣಗಾಮೇ ಕಸಿಭಾರದ್ವಾಜಂ ಬ್ರಾಹ್ಮಣಂ ಆರಬ್ಭ ಭಾಸಿತಂ। ಕಸಿಭಾರದ್ವಾಜೋ ಭನ್ತೇ ಬ್ರಾಹ್ಮಣೋ ಭಗವನ್ತಂ ಗಾಥಾಯ ಅಜ್ಝಭಾಸಿ।

‘‘ಕಸ್ಸಕೋ ಪಟಿಜಾನಾಸಿ, ನ ಚ ಪಸ್ಸಾಮಿ ತೇ ಕಸಿಂ। ಕಸ್ಸಕೋ ಪುಚ್ಛಿತೋ ಬ್ರೂಹಿ, ಕಥಂ ಜಾನೇಮು ತಂ ಕಸಿ’’ನ್ತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ–

‘‘ಸದ್ಧಾ ಬೀಜಂ ತಪೋ ವುಟ್ಠಿ, ಪಞ್ಞಾ ಮೇ ಯುಗನಙ್ಗಲಂ।

ಹಿರೀ ಈಸಾ ಮನೋ ಯೋತ್ತಂ, ಸತಿ ಮೇ ಫಾಲಪಾಚನಂ॥

ಕಾಯಗುತ್ತೋ ವಚೀಗುತ್ತೋ, ಆಹಾರೇ ಉದರೇ ಯತೋ।

ಸಚ್ಚಂ ಕರೋಮಿ ನಿದ್ದಾನಂ, ಸೋರಚ್ಚಂ ಮೇ ಪಮೋಚನಂ॥

ವೀರಿಯಂ ಮೇ ಧುರಧೋರಯ್ಹಂ, ಯೋಗಕ್ಖೇಮಾಧಿವಾಹನಂ।

ಗಚ್ಛತಿ ಅನಿವತ್ತನ್ತಂ, ಯತ್ಥ ಗನ್ತ್ವಾ ನ ಸೋಚತಿ॥

ಏವಮೇಸಾ ಕಸೀ ಕಟ್ಠಾ, ಸಾ ಹೋತಿ ಅಮತಪ್ಫಲಾ।

ಏತಂ ಕಸಿಂ ಕಸಿತ್ವಾನ, ಸಬ್ಬದುಕ್ಖಾ ಪಮುಚ್ಚತೀ’’ತಿ॥

ಏವಂ ಖೋ ಭನ್ತೇ ಭಗವತಾ ಭಾಸಿತಂ।

ಕಸ್ಸಕೋ ಪಟಿಜಾನಾಸಿ, ನ ಚ ಪಸ್ಸಾಮಿ ತೇ ಕಸಿಂ।

ಕಸ್ಸಕೋ ಪುಚ್ಛಿತೋ ಬ್ರೂಹಿ, ಕಥಂ ಜಾನೇಮು ತಂ ಕಸಿಂ॥

ಸದ್ಧಾ ಬೀಜಂ ತಪೋ ವುಟ್ಠಿ, ಪಞ್ಞಾ ಮೇ ಯುಗನಙ್ಗಲಂ।

ಹಿರೀ ಈಸಾ ಮನೋ ಯೋತ್ತಂ, ಸತಿ ಮೇ ಫಾಲಪಾಚನಂ॥

ಪುಚ್ಛಾ – ಇಮಞ್ಚ ಪನಾವುಸೋ ಧಮ್ಮದೇಸನಂ ಸುತ್ವಾ ಸೋ ಕಸಿಭಾರದ್ವಾಜೋ ಬ್ರಾಹ್ಮಣೋ ಇಮಸ್ಮಿಂ ಧಮ್ಮವಿನಯೇ ಪಸನ್ನೋ ಕೀದಿಸಂ ಪಸನ್ನಾಕಾರಮಕಾಸಿ।

ವಿಸ್ಸಜ್ಜನಾ – ಇಮಞ್ಚ ಪನ ಭನ್ತೇ ಧಮ್ಮದೇಸನಂ ಸುತ್ವಾ ಕಸಿಭಾರದ್ವಾಜೋ ಬ್ರಾಹ್ಮಣೋ ‘‘ಅಭಿಕ್ಕನ್ತಂ ಭೋ ಗೋತಮ, ಅಭಿಕ್ಕನ್ತಂ ಭೋ ಗೋತಮಾ’’ತಿಏವಮಾದಿನಾ ಇಮಸ್ಮಿಂ ಧಮ್ಮವಿನಯೇ ಪಸನ್ನೋ ಪಸನ್ನಾಕಾರಮಕಾಸಿ।

ಸೇಯ್ಯಥಾಪಿ ಭೋ ಗೋತಮ ಉಕ್ಕುಜ್ಜಿತಂ ವಾ ನಿಕ್ಕುಜ್ಜೇಯ್ಯ।

ಉದಯಸುತ್ತ

ಪುಚ್ಛಾ – ಉದಯಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಉದಯಂ ಬ್ರಾಹ್ಮಣಂ ಆರಬ್ಭ ಭಾಸಿತಂ। ಉದಯೋ ಭನ್ತೇ ಬ್ರಾಹ್ಮಣೋ ಭಗವನ್ತಂ ಏತದವೋಚ ‘‘ಪಕಟ್ಠಕೋಯಂ ಸಮಣೋ ಗೋತಮೋ ಪುನಪ್ಪುನಂ ಆಗಚ್ಛತೀ’’ತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ–

ಪುನಪ್ಪುನಞ್ಚೇವ ವಪನ್ತಿ ಬೀಜಂ, ಪುನಪ್ಪುನಂ ವಸ್ಸತಿ ದೇವರಾಜಾ।

ಪುನಪ್ಪುನಂ ಖೇತ್ತಂ ಕಸನ್ತಿ ಕಸ್ಸಕಾ, ಪುನಪ್ಪುನಂ ಧಞ್ಞಮುಪೇತಿ ರಟ್ಠಂ॥

ಏವಮಾದಿನಾ ಭನ್ತೇ ಭಗವತಾ ಭಾಸಿತಂ।

ಪುನಪ್ಪುನಂ ಚೇವ ವಪನ್ತಿ ಬೀಜಂ, ಪುನಪ್ಪುನಂ ವಸ್ಸತಿ ದೇವ ರಾಜಾ।

ಪುನಪ್ಪುನಂ ಖೇತ್ತಂ ಕಸನ್ತಿ ಕಸ್ಸಕಾ, ಪುನಪ್ಪುನಂ ಧಞ್ಞಮುಪೇತಿ ರಟ್ಠಂ॥

ಪುನಪ್ಪುನಂ ಯಾಚಕಾ ಯಾಚಯನ್ತಿ, ಪುನಪ್ಪುನಂ ದಾನಪತೀ ದದನ್ತಿ।

ಪುನಪ್ಪುನಂ ದಾನಪತೀ ದದಿತ್ವಾ, ಪುನಪ್ಪುನಂ ಸಗ್ಗಮುಪೇತಿ ಠಾನಂ॥

ಪುನಪ್ಪುನಂ ಖೀರನಿಕಾ ದುಹನ್ತಿ, ಪುನಪ್ಪುನಂ ವಚ್ಛೋ ಉಪೇತಿ ಮಾತರಂ।

ಪುನಪ್ಪುನಂ ಕಿಲಮತಿ ಫನ್ದತಿ ಚ, ಪುನಪ್ಪುನಂ ಗಬ್ಭಮುಪೇತಿ ಮನ್ದೋ॥

ಪುನಪ್ಪುನಂ ಜಾಯತಿ ಮೀಯತಿ ಚ, ಪುನಪ್ಪುನಂ ಸಿವಥಿಕಂ ಹರನ್ತಿ।

ಮಗ್ಗಞ್ಚ ಲದ್ಧಾ ಅಪುನಬ್ಭವಾಯ, ನ ಪುನಪ್ಪುನಂ ಜಾಯತಿ ಭೂರಿಪಞ್ಞೋ-ಹು–

ಮಾತುಪೋಸಕಸುತ್ತ

ಪುಚ್ಛಾ – ಮಾತುಪೋಸಕಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಮಾತುಪೋಸಕಂ ಬ್ರಾಹ್ಮಣಂ ಆರಬ್ಭ ಭಾಸಿತಂ। ಮಾತುಪೋಸಕೋ ಭನ್ತೇ ಬ್ರಾಹ್ಮಣೋ ಭಗವನ್ತಂ ಏತದವೋಚ ‘‘ಅಹಞ್ಹಿ ಭೋ ಗೋತಮ ಧಮ್ಮೇನ ಭಿಕ್ಖಂ ಪರಿಯೇಸಾಮಿ, ಧಮ್ಮೇನ ಭಿಕ್ಖಂ ಪರಿಯೇಸಿತ್ವಾ ಮಾತಾಪಿತರೋ ಪೋಸೇಮಿ, ಕಚ್ಚಾಹಂ ಭೋ ಗೋತಮ ಏವಂಕಾರೀ ಕಿಚ್ಚಕಾರೀ ಹೋಮೀ’’ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ತಗ್ಘ ತ್ವಂ ಬ್ರಾಹ್ಮಣ ಏವಂಕಾರೀ ಕಿಚ್ಚಕಾರೀ ಹೋಸಿ, ಯೋ ಖೋ ಬ್ರಾಹ್ಮಣ ಧಮ್ಮೇನ ಭಿಕ್ಖಂ ಪರಿಯೇಸತಿ, ಧಮ್ಮೇನ ಭಿಕ್ಖಂ ಪರಿಯೇಸಿತ್ವಾ ಮಾತಾಪಿತರೋ ಪೋಸೇತಿ, ಬಹುಂ ಸೋ ಪುಞ್ಞಂ ಪಸವತೀ’’ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಾ।

ಯೋ ಮಾತರಂ ವಾ ಪಿತರಂ ವಾ, ಮಚ್ಚೋ ಧಮ್ಮೇನ ಪೋಸತಿ।

ತಾಯ ನಂ ಪಾರಿಚರಿಯಾಯ, ಮಾತಾಪಿತೂಸು ಪಣ್ಡಿತಾ।

ಇಧೇವ ನಂ ಪಸಂಸನ್ತಿ, ಪೇಚ್ಚ ಸಗ್ಗೇ ಪಮೋದತಿ–

ಖೋಮದುಸ್ಸಸುತ್ತ

ಪುಚ್ಛಾ – ತೇನಾವುಸೋ ಭಗವತಾ…ಪೇ॰… ಸಮ್ಮಾಸಮ್ಬುದ್ಧೇನ ಬ್ರಾಹ್ಮಣಸಂಯುತ್ತೇ ಖೋಮದುಸ್ಸಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಕ್ಕೇಸು ಭನ್ತೇ ಖೋಮದುಸ್ಸೇ ನಾಮ ಸಕ್ಯಾನಂ ನಿಗಮೇ ಖೋಮದುಸ್ಸಕೇ ಬ್ರಾಹ್ಮಣಗಹಪತಿಕೇ ಆರಬ್ಭ ಭಾಸಿತ, ಖೋಮದುಸ್ಸಕಾ ಭನ್ತೇ ಬ್ರಾಹ್ಮಣಗಹಪತಿಕಾ ಭಗವನ್ತಂ ಏತದವೋಚುಂ ‘‘ಕೇ ಚ ಮುಣ್ಡಕಾ ಸಮಣಕಾ, ಕೇ ಚ ಸಭಾಧಮ್ಮಂ ಜಾನಿಸ್ಸನ್ತೀ’’ತಿ।

ತಸ್ಮಿಂ ಭನ್ತೇ ವತ್ಥುಸ್ಮಿಂ–

‘‘ನೇಸಾ ಸಭಾ ಯತ್ಥ ನ ಸನ್ತಿ ಸನ್ತೋ,

ಸನ್ತೋ ನ ತೇ ಯೇ ನ ವದನ್ತಿ ಧಮ್ಮಂ।

ರಾಗಞ್ಚ ದೋಸಞ್ಚ ಪಹಾಯ ಮೋಹಂ,

ಧಮ್ಮಂ ವದನ್ತಾ ಚ ಭವನ್ತಿ ಸನ್ತೋ’’ತಿ॥

ಏವಂ ಖೋ ಭನ್ತೇ ಭಗವತಾ ಭಾಸಿತಂ।

ನೇಸಾ ಸಭಾ ಯತ್ಥ ನಸನ್ತಿ ಸನ್ತೋ,

ಸನ್ತೋ ನ ತೇ ಯೇ ನ ವದನ್ತಿ ಧಮ್ಮಂ।

ರಾಗಞ್ಚ ದೋಸಞ್ಚ ಪಹಾಯ ಮೋಹಂ,

ಧಮ್ಮಂ ವದನ್ತಾ ಚ ಭವನ್ತಿ ಸನ್ತೋ–

ವಙ್ಗೀಸಸಂಯುತ್ತ

ಆನನ್ದಸುತ್ತ

ಪುಚ್ಛಾ – ವಙ್ಗೀಸಸಂಯುತ್ತೇ ಪನಾವುಸೋ ಚತುತ್ಥಂ ಸಂಙ್ಗೀತಂ ಆನನ್ದಸುತ್ತಂ ಕತ್ಥಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ವಙ್ಗೀಸತ್ಥೇರಂ ಆರಬ್ಭ ಆಯಸ್ಮತಾ ಆನನ್ದತ್ಥೇರೇನ ಧಮ್ಮಭಣ್ಡಾಗಾರಿಕೇನ ಭಾಸಿತಂ। ಆಯಸ್ಮತಾ ಭನ್ತೇ ವಙ್ಗೀಸೋ ಆಯಸ್ಮನ್ತಂ ಆನನ್ದಂ ಗಾಥಾಯ ಅಜ್ಝಭಾಸಿ–

‘‘ಕಾಮರಾಗೇನ ಡಯ್ಹಾಮಿ, ಚಿತ್ತಂ ಮೇ ಪರಿಡಯ್ಹತಿ।

ಸಾಧು ನಿಬ್ಬಾಪನಂ ಬ್ರೂಹಿ, ಅನುಕಮ್ಪಾಯ ಗೋತಮಾ’’ತಿ॥

ತಸ್ಮಿಂ ಭನ್ತೇ ವತ್ಥುಸ್ಮಿಂ–

‘‘ಸಞ್ಞಾಯ ವಿಪರಿಯೇಸಾ, ಚಿತ್ತಂ ತೇ ಪರಿಡಯ್ಹತಿ।

ನಿಮಿತ್ತಂ ಪರಿವಜ್ಜೇಹಿ, ಸುಭಂ ರಾಗೂಪಸಂಹಿತಂ।

ಸಙ್ಖಾರೇ ಪರತೋ ಪಸ್ಸ, ದುಕ್ಖತೋ ಮಾ ಚ ಅತ್ತತೋ।

ನಿಬ್ಬಾಪೇಹಿ ಮಹಾರಾಗಂ, ಮಾ ಡಯ್ಹಿತ್ಥೋ ಪುನಪ್ಪುನಂ।

ಅಸುಭಾಯ ಚಿತ್ತಂ ಭಾವೇಹಿ, ಏಕಗ್ಗಂ ಸುಸಮಾಹಿತಂ।

ಸತಿ ಕಾಯಗತಾ ತ್ಯತ್ಥು, ನಿಬ್ಬಿದಾಬಹುಲೋ ಭವ।

ಅನಿಮಿತ್ತಞ್ಚ ಭಾವೇಹಿ, ಮಾನಾನುಸಯಮುಜ್ಜಹ।

ತತೋ ಮಾನಾಭಿಸಮಯಾ, ಉಪಸನ್ತೋ ಚರಿಸ್ಸಸೀ’’ತಿ॥

ಏವಂ ಖೋ ಭನ್ತೇ ಆಯಸ್ಮತಾ ಆನನ್ದತ್ಥೇರೇನ ಧಮ್ಮಭಣ್ಡಾಗಾರಿಕೇನ ಭಾಸಿತಂ।

ಕಾಮರಾಗೇನ ಡಯ್ಹಾಮಿ, ಚಿತ್ತಂ ಮೇ ಪರಿಡಯ್ಹತಿ।

ಸಾಧು ನಿಬ್ಬಾಪನಂ ಬ್ರೂಹಿ, ಅನುಕಮ್ಪಾಯ ಗೋತಮ–

ಸಞ್ಞಾಯ ವಿಪರಿಯೇಸಾ, ಚಿತ್ತಂ ತೇ ಪರಿಡಯ್ಹತಿ।

ನಿಮಿತ್ತಂ ಪರಿವಜ್ಜೇಹಿ, ಸುಭಂ ರಾಗೂಪಸಂಹಿತಂ॥

ಸಙ್ಖಾರೇ ಪರತೋಪಸ್ಸ, ದುಕ್ಖತೋ ಮಾ ಚ ಅತ್ತತೋ।

ನಿಬ್ಬಾಪೇಹಿ ಮಹಾರಾಗಂ, ಮಾ ಡಯ್ಹಿತ್ಥೋ ಪುನಪ್ಪುನಂ॥

ಅಸುಭಾಯ ಚಿತ್ತಂ ಭಾವೇಹಿ, ಏಕಗ್ಗಂ ಸುಸಮಾಹಿತಂ।

ಸತಿ ಕಾಯಗತಾ ತ್ಯತ್ಥು, ನಿಬ್ಬಿದಾಬಹುಲೋ ಭವ॥

ಅನಿಮಿತ್ತಞ್ಚ ಭಾವೇಹಿ, ಮಾನಾನುಸಯಮುಜ್ಜಹ।

ತತೋ ಮಾನಾಭಿಸಮಯಾ, ಉಪಸನ್ತೋ ಚರಿಸ್ಸಸಿ॥

ವಙ್ಗೀಸಸುತ್ತ

ಪುಚ್ಛಾ – ತತ್ಥ ಆವುಸೋ ದ್ವಾದಸಮಂ ವಙ್ಗೀಸಸುತ್ತಂ ಕತ್ಥ ಕೇನ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮತಾ ವಙ್ಗೀಸತ್ಥೇರೇನ ಅಚಿರ ಅರಹತ್ತಪ್ಪತ್ತೇನ ವಿಮುತ್ತಿಸುಖಪಟಿಸಂವೇದಿನಾ–

‘‘ಕಾವೇಯ್ಯಮತ್ತಾ ವಿಚರಿಮ್ಹ ಪುಬ್ಬೇ, ಗಾಮಾಗಾಮಂ ಪುರಾಪುರಂ,

ಅಥದ್ದಸಾಮ ಸಮ್ಬುದ್ಧಂ, ಸದ್ಧಾ ನೋ ಉಪಪಜ್ಜಥ।

ಸೋ ಮೇ ಧಮ್ಮ ಮದೇಸೇಸಿ, ಖನ್ಧಾಯತನ ಧಾತುಯೋ।

ತಸ್ಸಾಹಂ ಧಮ್ಮಂ ಸುತ್ವಾನ, ಪಬ್ಬಜಿಂ ಅನಗಾರಿಯಂ।

ಬಹುನ್ನಂ ವತ ಅತ್ಥಾಯ, ಬೋಧಿಂ ಅಜ್ಝಗಮಾ ಮುನಿ।

ಭಿಕ್ಖೂನಂ ಭಿಕ್ಖೂನೀನಞ್ಚ, ಯೇ ನಿಯಾಮಗತದ್ದಸಾ।

ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ।

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ।

ಪುಬ್ಬೇ ನಿವಾಸಂ ಜಾನಾಮಿ, ದಿಬ್ಬಚಕ್ಖುಂ ವಿಸೋಧಿತಂ।

ತೇವಿಜ್ಜೋ ಇದ್ಧಿಪತ್ತೋಮ್ಹಿ, ಚೇತೋಪರಿಯಾಯ ಕೋವಿದೋ॥

ಏವಂ ಖೋ ಭನ್ತೇ ಉದಾನವಸೇನ ಭಾಸಿತಂ।

ಕಾವೇಯ್ಯ ಮತ್ತಾ ವಿಚರಿಮ್ಹ ಪುಬ್ಬೇ। ಗಾಮಾಗಾಮಂಪುರಾಪುರಂ,

ಅಥದ್ದಸಾಮ ಸಮ್ಬುದ್ಧಂ, ಸದ್ಧಾ ನೋ ಉಪಪಜ್ಜಥ॥

ಸೋ ಮೇ ಧಮ್ಮಮದೇಸೇಸಿ, ಖನ್ಧಾಯತನ ಧಾತುಯೋ।

ತಸ್ಸಾಹಂ ಧಮ್ಮಂ ಸುತ್ವಾನ, ಪಬ್ಬಜಿಂ ಅನಗಾರಿಯಂ॥

ಬಹುನ್ನಂ ವತ ಅತ್ಥಾಯ, ಬೋಧಿಂ ಅಜ್ಝಗಮಾ ಮುನಿ।

ಭಿಕ್ಖೂನಂ ಭಿಕ್ಖುನೀ ನಞ್ಚ, ಯೇ ನಿಯಾಮಗತದ್ದಸಾ॥

ಸ್ವಾಗತಂ ವತ ಮೇ ಆಸಿ, ಮಮ ಬುದ್ಧಸ್ಸ ಸನ್ತಿಕೇ।

ತಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ॥

ಪುಬ್ಬೇನಿವಾಸಂ ಜಾನಾಮಿ। ದಿಬ್ಬಚಕ್ಖು ವಿಸೋಧಿತಂ।

ತೇವಿಜ್ಜೋ ಇದ್ಧಿಪತ್ತೋಮ್ಹಿ, ಚೇತೋಪರಿಯಾಯಕೋವಿದೋ॥

ವನಸಂಯುತ್ತ

ಆನನ್ದಸುತ್ತ

ಪುಚ್ಛಾ – ವನಸಂಯುತ್ತೇ ಪನಾವುಸೋ ಪಞ್ಚಮಂ ಸಂಗೀತಂ ಆನನ್ದಸುತ್ತಂ ಕದಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಕೋಸಲೇಸು ಭನ್ತೇ ಅಞ್ಞತರಸ್ಮಿಂ ವನಸಣ್ಡೇ ಅಚಿರಪರಿನಿಬ್ಬುತೇ ಭಗವತಿ ಆಯಸ್ಮನ್ತಂ ಆನನ್ದಂ ಆರಬ್ಭ ತಸ್ಮಿಂ ವನಸಣ್ಡೇ ಅಧಿವತ್ಥಾಯ ದೇವತಾಯ ಭಾಸಿತಂ। ಆಯಸ್ಮಾ ಭನ್ತೇ ಆನನ್ದೋ ಅಚಿರಪರಿನಿಬ್ಬುತೇ ಭಗವತಿ ಅತಿವೇಲಂ ಗಿಹಿಸಞ್ಞತ್ತಿಬಹುಲೋ ವಿಹರತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ–

‘‘ರುಕ್ಖಮೂಲಗಹನಂ ಪಸಕ್ಕಿಯ,

ನಿಬ್ಬಾನಂ ಹದಯಸ್ಮಿಂ ಓಪಿಯ।

ಝಾಯ ಗೋತಮ ಮಾ ಪಮಾದೋ,

ಕಿಂ ತೇ ಬಿಳಿಬಿಳಿಕಾ ಕರಿಸ್ಸತೀ’’ತಿ॥

ಏವಂ ಖೋ ಭನ್ತೇ ವನಸಣ್ಡೇ ಅಧಿವತ್ಥಾಯ ದೇವತಾಯ ಆಯಸ್ಮತೋ ಆನನ್ದತ್ಥೇರಸ್ಸ ಅನುಕಮ್ಪಿಕಾಯ ಅತ್ಥಕಾಮಾಯ ಭಾಸಿತಂ।

ರುಕ್ಖಮೂಲ ಗಹನಂ ಪಸಕ್ಕಿಯ, ನಿಬ್ಬಾನಂ ಹದಯಸ್ಮಿಂ ಓಪಿಯ।

ಝಾಯ ಗೋತಮ ಮಾ ಪಮಾದೋ, ಕಿಂ ತೇ ಬಿಳಿಬಿಳಿಕಾ ಕರಿಸ್ಸತಿ-ಹು–

ಯಕ್ಖಸಂಯುತ್ತ

ಇನ್ದಕಸುತ್ತ

ಪುಚ್ಛಾ – ಯಕ್ಖಸಂಯುತ್ತೇ ಪನಾವುಸೋ ಪಠಮಂ ಸಂಗೀತಂ ಇನ್ದಕಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಇನ್ದಕೂಟೇ ಪಬ್ಬತೇ ಇನ್ದಕಸ್ಸ ಯಕ್ಖಸ್ಸ ಭವನೇ ಇನ್ದಕಂ ಯಕ್ಖಂ ಆರಬ್ಭ ಭಾಸಿತಂ। ಇನ್ದಕೋ ಭನ್ತೇ ಯಕ್ಖೋ ಅತ್ತವಾದೋ ಭಗವನ್ತಂ ಉಪಸಙ್ಕಮಿತ್ವಾ ಗಾಥಾಯ ಅಜ್ಝಭಾಸಿ–

‘‘ರೂಪಂ ನ ಜೀವನ್ತಿ ವದನ್ತಿ ಬುದ್ಧಾ,

ಕಥಂ ನ್ವಯಂ ವಿನ್ದತಿಮಂ ಸರೀರಂ।

ಕುತಸ್ಸ ಅಟ್ಠೀಯಕಪಿಣ್ಡಮೇಭಿ,

ಕಥಂ ನ್ವಯಂ ಸಜ್ಜತಿ ಗಬ್ಭರಸ್ಮಿ’’ನ್ತಿ॥

ತಸ್ಮಿಂ ಭನ್ತೇ ವತ್ಥುಸ್ಮಿಂ–

‘‘ಪಠಮಂ ಕಲಲಂ ಹೋತಿ, ಕಲಲಾ ಹೋತಿ ಅಬ್ಬುದಂ,

ಅಬ್ಬುದಾ ಜಾಯತೇ ಪೇಸಿ, ಪೇಸಿ ನಿಬ್ಬತ್ತತೀ ಘನೋ।

ಘನಾ ಪಸಾಖಾ ಜಾಯನ್ತಿ, ಕೇಸಾ ಲೋಮಾ ನಖಾಪಿಚ।

ಯಞ್ಚಸ್ಸ ಭುಞ್ಜತೀ ಮಾತಾ, ಅನ್ನಂ ಪಾನಞ್ಚ ಭೋಜನಂ।

ತೇನ ಸೋ ತತ್ಥ ಯಾಪೇತಿ, ಮಾತುಕುಚ್ಛಿಗತೋನರೋ’’ತಿ॥

ಏವಂ ಖೋ ಭನ್ತೇ ಭಗವತಾ ಭಾಸಿತಂ।

ಆಳವಕಸುತ್ತ

ಪುಚ್ಛಾ – ತೇನಾವುಸೋ ಭಗವತಾ…ಪೇ॰… ಸಮ್ಮಾಸಮ್ಬುದ್ಧೇನ ಯಕ್ಖಸಂಯುತ್ತೇ ಆಳವಕಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಆಳವಿಯಂ ಭನ್ತೇ ಆಳವಕಸ್ಸ ಯಕ್ಖಸ್ಸ ಭವನೇ ಆಳವಕಂ ಯಕ್ಖಂ ಆರಬ್ಭ ಭಾಸಿತಂ। ಆಳವಕೋ ಭನ್ತೇ ಯಕ್ಖೋ ಭಗವನ್ತಂ ಗಾಥಾಯ ಅಜ್ಝಭಾಸಿ–

ಕಿಂ ಸೂಧವಿತ್ತಂ ಪುರಿಸಸ್ಸ ಸೇಟ್ಠಂ,

ಕಿಂ ಸು ಸುಚಿಣ್ಣಂ ಸುಖಮಾವಹಾತಿ।

ಕಿಂ ಸು ಹವೇ ಸಾದುತರಂ ರಸಾನಂ,

ಕಥಂ ಜೀವಿಂ ಜೀವಿತಾಮಾಹು ಸೇಟ್ಠನ್ತಿ॥

ತಸ್ಮಿಂ ಭನ್ತೇ ವತ್ಥುಸ್ಮಿಂ–

ಸದ್ಧೀಚ ವಿತ್ತಂ ಪುರಿಸಸ್ಸ ಸೇಟ್ಠಂ,

ಧಮ್ಮೋ ಸುಚಿಣ್ಣೋ ಸುಖಮಾವಹಾತಿ।

ಸಚ್ಚಂ ಹವೇ ಸಾದುತರಂ ರಸಾನಂ,

ಪಞ್ಞಾಜೀವಿಂ ಜೀವಿತಮಾಹು ಸೇಟ್ಠನ್ತಿ॥

ಏವಮಾದಿನಾ ಭನ್ತೇ ಭಗವತಾ ಭಾಸಿತಂ।

ನ ಖ್ವಾಹಂ ತಂ ಆವುಸೋ ನಿಕ್ಖಮಿಸ್ಸಾಮಿ, ಯಂ ತೇ ಕರಣೀಯಂ, ತಂ ಕರೋಹಿ,

ಪಞ್ಹಂ ತಂ ಸಮಣ ಪುಚ್ಛಿಸ್ಸಾಮಿ, ಸಚೇ ಮೇ ನ ಬ್ಯಾಕರಿಸ್ಸಸಿ, ಚಿತ್ತಂ ವಾ ತೇ ಖಿಪಿಸ್ಸಾಮಿ, ಹದಯಂ ವಾ ತೇ ಫಾಲೇಸ್ಸಾಮಿ, ಪಾದೇಸು ವಾ ಗಹೇತ್ವಾ ಪಾರಗಙ್ಗಾಯ ಖಿಪಿಸ್ಸಾಮಿ–

ಕಿಂ ಸೂಖ ವಿತ್ತಂ ಪುರಿಸಸ್ಸ ಸೇಟ್ಠಂ, ಕಿಂ ಸು ಸುಚಿಣ್ಣಂ ಸುಖಮಾವಹಾತಿ।

ಕಿಂ ಸು ಹವೇ ಸಾದುಭರಂ ರಸಾನಂ, ಕಥಂ ಜೀವಿಂ ಜೀವಿತಮಾಹು ಸೇಟ್ಠಂ–

ಸದ್ಧೀಧ ವಿತ್ತಂ ಪುರಿಸಸ್ಸ ಸೇಟ್ಠಂ, ಧಮ್ಮೋ ಸುಚಿಣ್ಣೋ ಸುಖಮಾವಹಾತಿ।

ಸಚ್ಚಂ ಹವೇ ಸಾದುತರಂ ರಸಾನಂ, ಪಞ್ಞಾಜೀವಿಂ ಜೀವಿತಮಾಹು ಸೇಟ್ಠಂ।

ಕಥಂಸು ತರತಿ ಓಘಂ, ಕಥಂಸು ತರತಿ ಅಣ್ಣವಂ।

ಕಥಂಸು ದುಕ್ಖ ಮಚ್ಚೇತಿ, ಕಥಂಸು ಪರಿಸುಜ್ಝತಿ॥

ಸದ್ಧಾಯ ತರತಿ ಓಘಂ, ಅಪ್ಪಮಾದೇನ ಅಣ್ಣವಂ।

ವೀರಿಯೇನ ದುಕ್ಖ ಮಚ್ಚೇತಿ, ಪಞ್ಞಾಯ ಪರಿಸುಜ್ಝತಿ–

ಕಥಂಸು ಲಭತೇ ಪಞ್ಞಂ, ಕಥಂಸು ವಿನ್ದತೇ ಧನಂ।

ಕಥಂಸು ಕಿತ್ತಿಂ ಪಪ್ಪೋತಿ, ಕಥಂ ಮಿತ್ತಾನಿ ಗನ್ಥತಿ।

ಅಸ್ಮಾ ಲೋಕಾ ಪರಂ ಲೋಕಂ, ಕಥಂ ಪೇಚ್ಚ ನ ಸೋಚತಿ–

ಸದ್ದಹಾನೋ ಅರಹತಂ, ಧಮ್ಮಂ ನಿಬ್ಬಾನಪತ್ತಿಯಾ।

ಸುಸ್ಸೂಸಂ ಲಭತೇ ಪಞ್ಞಂ, ಅಪ್ಪಮತ್ತೋ ವಿಚಕ್ಖಣೋ।

ಪತಿರೂಪಕಾರೀ ಧುರವಾ, ಉಟ್ಠಾತಾ ವಿನ್ದತೇ ಧನಂ।

ಸಚ್ಚೇನ ಕಿತ್ತಿಂ ಪಪ್ಪೋತಿ, ದದಂ ಮಿತ್ತಾನಿ ಗನ್ಥತಿ।

ಅಸ್ಮಾ ಲೋಕಾ ಪರಂ ಲೋಕಂ, ಏವಂ ಪೇಚ್ಚ ನ ಸೋಚತಿ।

ಯಸ್ಸೇತೇ ಚತುರೋ ಧಮ್ಮಾ, ಸದ್ಧಸ್ಸ ಘರಮೇಸಿನೋ।

ಸಚ್ಚಂ ಧಮ್ಮೋ ಧಿತಿ ಚಾಗೋ, ಸ ವೇ ಪೇಚ್ಚನ ಸೋಚತಿ–

ಸಕ್ಕಸಂಯುತ್ತ

ವತಪದಸುತ್ತ

ಪುಚ್ಛಾ – ಸಕ್ಕಸಂಯುತ್ತೇ ಪನಾವುಸೋ ವತಪದಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಸಕ್ಕಸ್ಸ ಭಿಕ್ಖವೇ ದೇವಾನಮಿನ್ದಸ್ಸ ಪುಬ್ಬೇ ಮನುಸ್ಸಭೂತಸ್ಸ ಸತ್ತ ವತಪದಾನಿ ಸಮತ್ತಾನಿ ಸಮಾದಿನ್ನಾನಿ ಅಹೇಸುಂ, ಯೇಸಂ ಸಮಾದಿನ್ನತ್ತಾ ಸಕ್ಕೋ ಸಕ್ಕತ್ತಂ ಅಜ್ಝಗಾತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ।

ಸಕ್ಕಸ್ಸ ಭಿಕ್ಖವೇ ದೇವಾನಮಿನ್ದಸ್ಸ ಪುಬ್ಬೇ ಮನುಸ್ಸಭೂತಸ್ಸ ಇಮಾನಿ ಸತ್ತ ವತಪದಾನಿ ಸಮತ್ತಾನಿ ಸಮಾದಿನ್ನಾನಿ ಅಹೇಸುಂ।

ಮಾತಾಪೇತ್ತಿಭರಂ ಜನ್ತುಂ, ಕುಲೇ ಜೇಟ್ಠಾಪಚಾಯಿನಂ।

ಸಣ್ಹಂ ಸಖಿಲಸಮ್ಭಾಸಂ, ಪೇಸುಣೇಯ್ಯಪ್ಪಹಾಯಿನಂ।

ಮಚ್ಛೇರವಿನಯೇ ಯುತ್ತಂ, ಸಚ್ಚಂ ಕೋಧಾಭಿಭುಂ ನರಂ।

ತಂ ವೇ ದೇವಾ ತಾವತಿಂಸಾ, ಆಹು ‘‘ಸಪ್ಪುರಿಸೋ’’ಇತಿ॥

ದಲಿದ್ದಸುತ್ತ

ಪುಚ್ಛಾ – ದಲಿದ್ದಸುತ್ತಂ ಪನಾವುಸೋ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ। ವಿಸ್ಸಜ್ಜನಾ। ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಭೂತಪುಬ್ಬಂ ಭಿಕ್ಖವೇ ಅಞ್ಞತರೋ ಪುರಿಸೋ ಇಮಸ್ಮಿಂಯೇವ ರಾಜಗಹೇ ಮನುಸ್ಸದಲಿದ್ದೋ ಅಹೋಸಿ ಮನುಸ್ಸಕಪಣೋ ಮನುಸ್ಸವರಾಕೋ, ಸೋ ತಥಾಗತಪ್ಪವೇದಿತೇ ಧಮ್ಮವಿನಯೇ ಸದ್ಧಂ ಸಮಾದಿಯಿ, ಸೀಲಂ, ಸುತಂ, ಚಾಗಂ, ಪಞ್ಞಂ ಸಮಾದಿಯೀ’’ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ।

ಯಸ್ಸ ಸದ್ಧಾ ತಥಾಗತೇ, ಅಚಲಾ ಸುಪ್ಪತಿಟ್ಠಿತಾ।

ಸೀಲಞ್ಚ ಯಸ್ಸ ಕಲ್ಯಾಣಂ, ಅರಿಯಕನ್ತಂ ಪಸಂಸಿತಂ॥

ಯಜಮಾನಸುತ್ತ

ಪುಚ್ಛಾ – ಯಜಮಾನಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಕ್ಕಂ ದೇವಾನಮಿನ್ದಂ ಆರಬ್ಭ ಭಾಸಿತಂ। ಸಕ್ಕೋ ಭನ್ತೇ ದೇವಾನಮಿನ್ದೋ ಭಗವನ್ತಂ ಗಾಥಾಯ ಅಜ್ಝಭಾಸಿ–

‘‘ಯಜಮಾನಾನಂ ಮನುಸ್ಸಾನಂ, ಪುಞ್ಞಪೇಕ್ಖಾನ ಪಾಣಿನಂ।

ಕರೋತಂ ಓಪಧಿಕಂ ಪುಞ್ಞಂ, ಕತ್ಥ ದಿನ್ನಂ ಮಹಪ್ಫಲ’’ನ್ತಿ॥

ತಸ್ಮಿಂ ಭನ್ತೇ ವತ್ಥುಸ್ಮಿಂ–

‘‘ಚತ್ತಾರೋ ಚ ಪಟಿಪನ್ನಾ, ಚತ್ತಾರೋಚ ಫಲೇ ಠಿತಾ।

ಏಸ ಸಙ್ಘೋ ಉಜುಭೂತೋ, ಪಞ್ಞಾಸೀಲಸಮಾಹಿತೋ।

ಯಜಮಾನಾನಂ ಮನುಸ್ಸಾನಂ, ಪುಞ್ಞಪೇಕ್ಖಾನ ಪಾಣಿನಂ।

ಕರೋತಂ ಓಪಧಿಕಂ ಪುಞ್ಞಂ, ಸಙ್ಘೇ ದಿನ್ನಂ ಮಹಪ್ಫಲಂ’’ನ್ತಿ॥

ಏವಂ ಖೋ ಭನ್ತೇ ಭಗವತಾ ಭಾಸಿತಂ।

ಯಜಮಾನಾನಂ ಮನುಸ್ಸಾನಂ, ಪುಞ್ಞಪೇಕ್ಖಾನ ಪಾಣಿನಂ,

ಕರೋತಂ ಓಪಧಿತಂ ಪುಞ್ಞಂ, ಕತ್ಥ ದಿನ್ನಂ ಮಹಪ್ಫಲಂ–

ಚತ್ತಾರೋ ಚ ಪಟಿಪನ್ನಾ, ಚತ್ತಾರೋ ಚ ಫಲೇ ಠಿತಾ।

ಏಸ ಸಙ್ಘೋ ಉಜುಭೂತೋ, ಪಞ್ಞಾಸೀಲಸಮಾಹಿತೋ।

ಯಜಮಾನಾನಂ ಮನುಸ್ಸಾನಂ, ಪುಞ್ಞಪೇಕ್ಖಾನ ಪಾಣಿನಂ।

ಕರೋತಂ ಓಪಧಿಕಂ ಪುಞ್ಞಂ, ಸಙ್ಘೇ ದಿನ್ನಂ ಮಹಪ್ಫಲಂ–

ಗಹಟ್ಠವನ್ದನಾಸುತ್ತ

ಪುಚ್ಛಾ – ಗಹಟ್ಠವನ್ದನಾಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಭೂತಪುಬ್ಬಂ ಭಿಕ್ಖವೇ ಸಕ್ಕೋ ದೇವಾನಮಿನ್ದೋ ಮಾತಲಿಂ ಸಙ್ಗಾಹಕಂ ಆಮನ್ತೇಸೀ’’ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ।

ತಂ ನಮಸ್ಸನ್ತಿ ತೇವಿಜ್ಜಾ, ಸಬ್ಬೇ ಭುಮ್ಮಾಚ ಖತ್ತಿಯಾ।

ಚತ್ತಾರೋ ಚ ಮಹಾರಾಜಾ, ತಿದಸಾಚ ಯಸಸ್ಸಿನೋ।

ಅಥಕೋ ನಾಮ ಸೋ ಯಕ್ಖೋ, ಯಂ ತ್ವಂ ಸಕ್ಕ ನಮಸ್ಸಸಿ–

ಅಹಞ್ಚ ಸೀಲಸಮ್ಪನ್ನೇ, ಚಿರರತ್ತಸಮಾಹಿತೇ।

ಸಮ್ಮಾಪಬ್ಬಜಿತೇ ವನ್ದೇ, ಬ್ರಹ್ಮಚರಿಯಪರಾಯನೇ॥

ಯೇ ಗಹಟ್ಠಾ ಪುಞ್ಞಕರಾ, ಸೀಲವನ್ತೋ ಉಪಾಸಕಾ।

ಧಮ್ಮೇನ ದಾರಂ ಪೋಸೇನ್ತಿ, ತೇ ನಮಸ್ಸಾಮಿ ಮಾತಲಿ॥