ನಿದಾನವಗ್ಗಪಾಳಿ

ನಿದಾನಸಂಯುತ್ತ

ಪಟಿಚ್ಚಸಮುಪ್ಪಾದಸುತ್ತ

ಪುಚ್ಛಾ – ತೇನಾವುಸೋ ಭಗವತಾ…ಪೇ॰… ಸಮ್ಮಾಸಮ್ಬುದ್ಧೇನ ನಿದಾನವಗ್ಗಸಂಯುತ್ತೇ ಪಠಮಂ ಸಂಗೀತಂ ಪಟಿಚ್ಚಸಮುಪ್ಪಾದಸುತ್ತಂ ಕತ್ಥ ತಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಚಸತೇ ಜನಪದವಾಸಿನೋ ಭಿಕ್ಖೂ ಆರಬ್ಭ ಭಾಸಿತಂ। ಪಞ್ಚಸತಾ ಭನ್ತೇ ಜನಪದವಾಸಿನೋ ಭಿಕ್ಖೂ ಸಬ್ಬೇ ಉಗ್ಘಾಟಿತಞ್ಞುನೋ ಧುತಙ್ಗಧರಾ ಆರದ್ಧವೀರಿಯಾ ಯುತ್ತಯೋಗಾ ವಿಪಸ್ಸಕಾ ಸಣ್ಹಂ ಸುಖುಮಂ ಸುಞ್ಞತಂ ಪಚ್ಚಯಾಕಾರಧಮ್ಮದೇಸನಂ ಪತ್ಥಯಮಾನಾ ಭಗವನ್ತಂ ಅಭಿವಾದೇತ್ವಾ ಭಗವನ್ತಂ ಪರಿವಾರೇತ್ವಾ ನಿಸೀದಿಂಸು। ತಸ್ಮಿಂ ವತ್ಥುಸ್ಮಿಂ ‘‘ಪಟಿಚ್ಚಸಮುಪ್ಪಾದಂ ವೋ ಭಿಕ್ಖವೇ ದೇಸೇಸ್ಸಾಮಿ, ತಂ ಸುಣಾಥ ಸಾಧುಕಂ ಮನಸಿ ಕರೋಥ, ಭಾಸಿಸ್ಸಾಮೀ’’ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ।

ಕತಮೋ ಚ ಭಿಕ್ಖವೇ ಪಟಿಚ್ಚಸಮುಪ್ಪಾದೋ। ಅವಿಜ್ಜಾಪಚ್ಚಯಾ ಭಿಕ್ಖವೇ ಸಙ್ಖಾರಾ, ಸಙ್ಖಾರಪಚ್ಚಯಾ ವಿಞ್ಞಾಣಂ (ಪೇಯ್ಯಾಲ) ಜಾತಿಪಚ್ಚಯಾ ಜರಾಮರಣಂ ಸೋಕಪರಿದೇವದುಕ್ಖದೋಮನಸ್ಸುಪಾಸಾ ಸಮ್ಭವನ್ತಿ, ಏವಮೇತಸ್ಸ ಕೇವಲಸ್ಸ ದುಕ್ಖನ್ಧಸ್ಸ ಸಮುದಯೋ ಹೋತಿ। ಅಯಂ ವುಚ್ಚತಿ ಭಿಕ್ಖವೇ ಪಟಿಚ್ಚಸಮುಪ್ಪಾದೋ।

ಅವಿಜ್ಜಾಯ ತ್ವೇವ ಅಸೇಸವಿರಾಗನಿರೋಧೋ ಸಙ್ಖಾರನಿರೋಧೋ (ಪೇಯ್ಯಾಲ) ಜಾತಿನಿರೋಧಾ ಜರಾಮರಣಂ ಸೋಕಪರಿದೇವದುಕ್ಖದೋಮನಸ್ಸುಪಾಯಾಸಾ ನಿರುಜ್ಝನ್ತಿ, ಏವಮೇತಸ್ಸ ಕೇವಲಸ್ಸ ದುಕ್ಖಕ್ಖನ್ಧಸ್ಸ ನಿರೋಧೋ ಹೋತಿ –

ವಿಭಙ್ಗಸುತ್ತ

ಪುಚ್ಛಾ – ತತ್ಥಾವುಸೋ ದುತಿಯಂ ಸಂಗೀತಂ ವಿಭಙ್ಗಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಪಞ್ಚಸತೇ ಜನಪದವಾಸಿನೋ ವಿಪಞ್ಚಿತಞ್ಞುನೋ ಭಿಕ್ಖೂ ಆರಬ್ಭ ಭಾಸಿತಂ। ಪಞ್ಚಸತಾ ಭನ್ತೇ ಜನಪದವಾಸಿಕಾ ಭಿಕ್ಖೂ ವಿಪಞ್ಚಿತಞ್ಞುನೋ ಧುತಙ್ಗಧರಾ ಆರದ್ಧವೀರಿಯಾ ಯುತ್ತಯೋಗಾ ವಿಸ್ಸಕಾ ಸಣ್ಹಂ ಸುಖುಮಂ ಸುಞ್ಞತಪಟಿಸಂಯುತ್ತಂ ಪಚ್ಚಯಾಕಾರಧಮ್ಮದೇಸನಂ ಪತ್ಥಯಮಾನಾ ಭಗವನ್ತಂ ಪರಿವಾರೇತ್ವಾ ನಿಸೀದಿಂಸು। ತಸ್ಮಿಂ ವತ್ಥುಸ್ಮಿಂ ‘‘ಪಟಿಚ್ಚ ಸಮುಪ್ಪಾದಂ ವೋ ಭಿಕ್ಖವೇ ದೇದೇಸ್ಸಾಮಿ ವಿಭಜಿಸ್ಸಾಮಿ, ತಂ ಸುಣಾಥ ಸಾಧುಕಂ ಮನಸಿಕರೋಥ, ಭಾಸಿಸ್ಸಾಮೀ’’ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ।

ಪಞ್ಚವೇರಭಯಸುತ್ತ

ಪುಚ್ಛಾ – ಪಞ್ಚವೇರಭಯಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅನಾಥಪಿಣ್ಡಿಕಂ ಗಹಪತಿಂ ಆರಬ್ಭ ‘‘ಯತೋ ಖೋ ಗಹಪತಿ ಅರಿಯಸಾವಕಸ್ಸ ಪಞ್ಚ ಭಯಾನಿ ವೇರಾನಿ ವೂಪಸನ್ತಾನಿ ಹೋನ್ತಿ, ಚತೂಹಿ ಚ ಸೋತಾಪತ್ತಿಯಙ್ಗೇಹಿ ಸಮನ್ನಾಗತೋ ಹೋತಿ, ಅರಿಯೋ ಚಸ್ಸ ಞಾಯೋ ಪಞ್ಞಾಯ ಸುದಿಟ್ಠೋ ಹೋತಿ ಸುಪ್ಪಟಿವಿದ್ಧೋ, ಸೋ ಆಕಙ್ಖಮಾನೋ ಅತ್ತನಾವ ಅತ್ತಾನಂ ಬ್ಯಾಕರೇಯ್ಯ ಖೀಣನಿರಯೋಮಿ ಖೀಣತಿರಚ್ಛಾನಯೋನಿ ಖೀಣಪೇತ್ತಿವಿಸಯೋ ಖೀಣಾಪಾಯದುಗ್ಗತಿವಿನಿಪಾತೋ, ಸೋತಾಪನ್ನೋಹಮಸ್ಮಿ ಅವಿನಿಪಾತಧಮ್ಮೋ ನಿಯತೋ ಸಮ್ಬೋಧಿಪರಾಯನೋ’’ತಿ ಏವಂ ಖೋ ಭನ್ತೇ ಭಗವತಾ ಭಾಸಿತಂ।

ಪುಚ್ಛಾ – ಕಥಞ್ಚಾವುಸೋತತ್ಥ ಭಗವತಾ ಅರಿಯಸಾವಕಸ್ಸ ಪಞ್ಚನ್ನಂ ಭಯಾನಂ ವೇರಾನಂ ವೂಪಸನ್ತತಾ ಪಕಾಸಿತಾ।

ವಿಸ್ಸಜ್ಜನಾ – ‘‘ಕತಮಾನಿ ಪಞ್ಚ ಭಯಾನಿ ವೇರಾನಿ ವೂಪಸನ್ತಾನಿ ಹೋನ್ತಿ। ಯಂ ಗಹಪತಿ ಪಾಣಾತಿಪಾತೀ ಪಾಣಾತಿಪಾತಪಚ್ಚಯಾ ದಿಟ್ಠಧಮ್ಮಿಕಮ್ಪಿ ಭಯಂ ವೇರಂ ಪಸವತಿ, ಸಮ್ಪರಾಯಿಕಮ್ಪಿ ಭಯಂ ವೇರಂ ಪಸವತಿ, ಚೇತಸಿಕಮ್ಪಿ ದುಕ್ಖಂ ದೋಮನಸ್ಸಂ ಪಟಿಸಂವೇದಯತಿ। ಪಾಣಾತಿಪಾತಾ ಟಿವಿರತಸ್ಸ ಏವಂ ತಂ ಭಯಂ ವೇರಂ ವೂಪಸನ್ತಂ ಹೋತೀ’’ತಿ ಏವಮಾದಿನಾ ಭನ್ತೇ ತತ್ಥ ಭಗವತಾ ಅರಿಯಸಾವಕಸ್ಸ ಪಞ್ಚನ್ನಂ ಭಯಾನಂ ವೇರಾನಂ ವೂಪಸನ್ತತಾ ಪಕಾಸಿತಾ।

ಪುಚ್ಛಾ – ಕಥಞ್ಚಾವುಸೋ ತತ್ಥ ಭಗವತಾ ಅರಿಯಸಾವಕಸ್ಸ ಚತೂಹಿ ಸೋತಾಪತ್ತಿಯಙ್ಗೇಹಿ ಸಮನ್ನಾಗತತಾ ಪಕಾಸಿತಾ।

ವಿಸ್ಸಜ್ಜನಾ – ಕತಮೇಹಿ ಚತೂಹಿ ಸೋತಾಪತ್ತಿಯಙ್ಗೇಹಿ ಸಮನ್ನಾಗತೋ ಹೋತಿ। ಇಧ ಗಹಪತಿ ಅರಿಯಸಾವಕೋ ಬುದ್ಧೇ ಅವೇಚ್ಚಪ್ಪಸಾದೇನ ಸಮನ್ನಾಗತೋ ಹೋತಿ ‘‘ಇತಿಪಿಸೋ ಭಗವಾ ಅರಹಂ ಸಮ್ಮಾಸಮ್ಬುದ್ಧೋ ವಿಜ್ಜಾಚರಣಸಮ್ಪನ್ನೋ ಸುಗತೋ ಲೋಕವಿದೂ ಅನುತ್ತರೋಪುರಿಸದಮ್ಮಸಾರಥಿ ಸತ್ಥಾದೇವಮನುಸ್ಸಾನಂ ಬುದ್ಧೋ ಭಗವಾ’’ತಿ ಏವಮಾದಿನಾ ಭನ್ತೇ ತತ್ಥ ಭಗವತಾ ಅರಿಯಸಾವಕಸ್ಸ ಚತೂಹಿ ಸೋತಾಪತ್ತಿಯಙ್ಗೇಹಿ ಸಮನ್ನಾಗತತಾ ಪಕಾಸಿತಾ।

ಪುಚ್ಛಾ – ಕಥಞ್ಚಾವುಸೋ ತತ್ಥ ಭಗವತಾ ಅರಿಯಸಾವಕೇನ ಅರಿಯಸ್ಸ ಞಾಯಸ್ಸ ಪಞ್ಞಾಯ ಸುದಿಟ್ಠತಾ ಸುಪ್ಪಟಿವಿದ್ಧತಾ ಪಕಾಸಿತಾ।

ವಿಸ್ಸಜ್ಜನಾ – ಕತಮೋ ಚಸ್ಸ ಅರಿಯೋ ಞಾಯೋ ಪಞ್ಞಾಯ ಸುದಿಟ್ಠೋ ಹೋತಿ ಸುಪ್ಪಟಿವಿದ್ಧೋ। ಇಧ ಗಹಪತಿ ಅರಿಯಸಾವಕೋ ಪಟಿಚ್ಚಸಮುಪ್ಪಾದಞ್ಞೇವ ಸಾಧುಕಂ ಯೋನಿಸೋ ಮನಸಿ ಕರೋತಿ ‘‘ಇತಿ ಇಮಸ್ಮಿಂ ಸತಿ ಇದಂ ಹೋತಿ, ಇಮಸ್ಮಿಂ ಅಸತಿ ಇದಂ ನ ಹೋತಿ, ಇಮಸ್ಸುಪ್ಪಾದಾ ಇದಂ ಉಪ್ಪಜ್ಜತಿ, ಇಮಸ್ಸ ನಿರೋಧಾ ಇದಂ ನಿರುಜ್ಝತಿ, ಯದಿದಂ ಅವಿಜ್ಜಾಪಚ್ಚಯಾ (ಪೇಯ್ಯಾಲ) ಏವಮೇತಸ್ಸ ಕೇವಲಸ್ಸ ದುಕ್ಖಕ್ಖನ್ಧಸ್ಸ ನಿರೋಧೋ ಹೋತೀ’’ತಿ, ಏವಂ ಖೋ ಭನ್ತೇ ಭಗವತಾ ತತ್ಥ ಅರಿಯಸಾವಕೇನ ಅರಿಯಸ್ಸ ಞಾಯಸ್ಸ ಪಞ್ಞಾಯ ಸುದಿಟ್ಠತಾ ಸುಪ್ಪಟಿವಿದ್ಧತಾ ಪಕಾಸಿತಾ।

ಯತೋ ಖೋ ಗಹಪತಿ ಅರಿಯಸಾವಕಸ್ಸ ಇಮಾನಿ ಪಞ್ಚ ಭಯಾನಿ ವೇರಾನಿ ವೂಪಸನ್ತಾನಿ ಹೋನ್ತಿ। ಇಮೇಹಿ ಚತೂಹಿ ಸೋತಾಪತ್ತಿಯಙ್ಗೇಹಿ ಸಮನ್ನಾಗತೋ ಹೋತಿ। ಅಯಞ್ಚಸ್ಸ ಅರಿಯೋ ಞಾಯೋ ಪಞ್ಞಾಯ ಸುದಿಟ್ಠೋ ಹೋತಿ ಸುಪ್ಪಟಿವಿದ್ಧೋ–

ದುಕ್ಖಸುತ್ತ

ಪುಚ್ಛಾ – ದುಕ್ಖಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ದುಕ್ಖಸ್ಸ ಭಿಕ್ಖವೇ ಸಮುದಯಞ್ಚ ಅತ್ಥಙ್ಗಮಞ್ಚ ದೇಸೇಸ್ಸಾಮೀ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಪುಚ್ಛಾ – ಕಥಞ್ಚಾವುಸೋ ತತ್ಥ ಭಗವತಾ ದುಕ್ಖಸಮುದಯೋ ಪಕಾಸಿತೋ।

ವಿಸ್ಸಜ್ಜನಾ – ಕತಮೋ ಚ ಭಿಕ್ಖವೇ ದುಕ್ಖಸ್ಸ ಸಮುದಯೋ। ಚಕ್ಖುಞ್ಚ ಪಟಿಚ್ಚ ರೂಪೇ ಚ ಉಪ್ಪಜ್ಜತಿ ಚಕ್ಖುವಿಞ್ಞಾಣಂ, ತಿಣ್ಣಂ ಸಙ್ಗತಿ ಫಸ್ಸೋ, ಫಸ್ಸಪಚ್ಚಯಾ ವೇದನಾ, ವೇದನಾಪಚ್ಚಯಾ ತಣ್ಹಾ। ಅಯಂ ಖೋ ಭಿಕ್ಖವೇ ದುಕ್ಖಸ್ಸ ಸಮುದಯೋ। ಸೋತಞ್ಚ ಪಟಿಚ್ಚ ಸದ್ದೇ ಚ ಉಪ್ಪಜ್ಜತಿ ಸೋತವಿಞ್ಞಾಣಂ…ಪೇ॰… ಘಾನಞ್ಚ ಪಟಿಚ್ಚ ಗನ್ಧೇ ಚ…ಪೇ॰… ಜಿವ್ಹಞ್ಚ ಪಟಿಚ್ಚ ರಸೇ ಚ…ಪೇ॰… ಕಾಯಞ್ಚ ಪಟಿಚ್ಚ ಫೋಟ್ಠಬ್ಬೇ ಚ…ಪೇ॰… ಮನಞ್ಚ ಪಟಿಚ್ಚ ಧಮ್ಮೇ ಚ ಉಪ್ಪಜ್ಜತಿ ಮನೋವಿಞ್ಞಾಣಂ, ತಿಣ್ಣಂ ಸಙ್ಗತಿ ಫಸ್ಸೋ, ಫಸ್ಸಪಚ್ಚಯಾ ವೇದನಾ, ವೇದನಾಪಚ್ಚಯಾ ತಣ್ಹಾ। ಅಯಂ ಖೋ ಭಿಕ್ಖವೇ ದುಕ್ಖಸ್ಸ ಸಮುದಯೋತಿ ಏವಂಖೋ ಭನ್ತೇ ತತ್ಥ ಭಗವತಾ ದುಕ್ಖಸ್ಸ ಸಮುದಯೋ ಪಕಾಸಿತೋ।

ಪುಚ್ಛಾ – ಕಥಞ್ಚಾವುಸೋ ತತ್ಥ ಭಗವತಾ ದುಕ್ಖಸ್ಸ ಅತ್ಥಙ್ಗಮೋ ಪಕಾಸಿತೋ।

ವಿಸ್ಸಜ್ಜನಾ – ಕತಮೋ ಚ ಭಿಕ್ಖವೇ ದುಕ್ಖಸ್ಸ ಅತ್ಥಙ್ಗಮೋ। ಚಕ್ಖುಞ್ಚ ಪಟಿಚ್ಚ ರೂಪೇ ಚ ಉಪ್ಪಜ್ಜತಿ ಚಕ್ಖುವಿಞ್ಞಾಣಂ, ತಿಣ್ಣಂ ಸಙ್ಗತಿ ಫಸ್ಸೋ, ಫಸ್ಸಪಚ್ಚಯಾ ವೇದನಾ, ವೇದನಾಪಚ್ಚಯಾ ತಣ್ಹಾ, ತಸ್ಸಾಯೇವ ತಣ್ಹಾಯ ಅಸೇಸವಿರಾಗನಿರೋಧಾ ಉಪಾದಾನನಿರೋಧೋ ಉಪಾದಾನನಿರೋಧಾ ಭವನಿರೋಧೋ, ಭವನಿರೋಧಾ ಜಾತಿನಿರೋಧೋ, ಜಾತಿನಿರೋಧಾ ಜರಾಮರಣಂ ಸೋಕಪರಿದೇವದುಕ್ಖದೋಮನಸ್ಸುಪಾಯಾಸಾ ನಿರುಜ್ಝನ್ತಿ। ಏವಮೇತಸ್ಸ ಕೇವಲಸ್ಸ ದುಕ್ಖಕ್ಖನ್ಧಸ್ಸ ನಿರೋಧೋ ಹೋತೀತಿ ಏವಮಾದಿನಾ ಭನ್ತೇ ತತ್ಥ ಭಗವತಾ ದುಕ್ಖಸ್ಸ ಅತ್ಥಙ್ಗಮೋ ಪಕಾಸಿತೋ।

ಪುತ್ತಮಂಸೂಪಮಸುತ್ತ

ಪುಚ್ಛಾ – ಪುತ್ತಮಂಸೂಪಮಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಅಧುನಾ ಪಬ್ಬಜಿತೇ ಭಿಕ್ಖೂ ಆರಬ್ಭ ಭಾಸಿತಂ। ಭಗವತೋ ಚ ಭನ್ತೇ ಭಿಕ್ಖುಸಙ್ಘಸ್ಸ ಚ ಮಹಾಲಾಭಸಕ್ಕಾರೋ ಉದಪಾದಿ, ಏಕಚ್ಚೇ ಚ ಭನ್ತೇ ಭಿಕ್ಖೂ ನವಾ ಅಚಿರಪಬ್ಬಜಿತಾ ಕುಲಪುತ್ತಾ ಆಹಾರಂ ಅಪಚ್ಚವೇಕ್ಖಿತ್ವಾ ಪರಿಭುಞ್ಜಿಂಸು। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಚತ್ತಾರೋಮೇ ಭಿಕ್ಖವೇ ಆಹಾರಾ ಭೂತಾನಂ ವಾ ಸತ್ತಾನಂ ಠಿತಿಯಾ ಸಮ್ಭವೇಸೀನಂ ವಾ ಅನುಗ್ಗಹಾಯ। ಕತಮೇ ಚತ್ತಾರೋ ಕಬಳೀಕಾರೋ ಆಹಾರೋ ಓಳಾರಿಕೋ ವಾ ಸುಖುಮೋ ವಾ ಫಸ್ಸೋ ದುತಿಯೋ ಮನೋಸಞ್ಚೇತನಾ ತತಿಯಾ ವಿಞ್ಞಾಣಂ ಚತುತ್ಥ’’ನ್ತಿ ಏವಂ ಖೋ ಭನ್ತೇ ಭಗವತಾ ಭಾಸಿತಂ।

ಪುಚ್ಛಾ – ಕಥಞ್ಚಾವುಸೋ ತತ್ಥ ಕಬಳೀಕಾರಸ್ಸ ಆಹಾರಸ್ಸ ದಟ್ಠಬ್ಬಾಕಾರೋ ಭಗವತಾ ಪಕಾಸಿತೋ।

ವಿಸ್ಸಜ್ಜನಾ – ಸೇಯ್ಯಥಾಪಿ ಭಿಕ್ಖವೇ ದ್ವೇ ಜಾಯಮ್ಪತಿಕಾ ಪರಿತ್ತಂ ಸಮ್ಬಲಂ ಆದಾಯ ಕನ್ತಾರಮಗ್ಗಂ ಪಟಿಪಜ್ಜೇಯ್ಯುಂ। ತೇಸಮಸ್ಸ ಏಕಪುತ್ತಕೋ ಪಿಯೋ ಮನಾಪೋತಿ ಏವಮಾದಿನಾ ಭನ್ತೇ ತತ್ಥ ಭಗವತಾ ಕಬಳೀಕಾರಸ್ಸ ಆಹಾರಸ್ಸ ದಟ್ಠಬ್ಬಾಕಾರೋ ಪಕಾಸಿತೋ।

ಪುಚ್ಛಾ – ಕಥಞ್ಚಾವುಸೋ ತತ್ಥ ಭಗವತಾ ಫಸ್ಸಾಹಾರಸ್ಸ ದಟ್ಠಬ್ಬಾಕಾರೋ ಪಕಾಸಿತೋ।

ವಿಸ್ಸಜ್ಜನಾ – ಸೇಯ್ಯಥಾಪಿ ಭಿಕ್ಖವೇ ಗಾವೀ ನಿಚ್ಚಮ್ಮಾ ಕುಟ್ಟಂ ಚೇ ನಿಸ್ಸಾಯ ತಿಟ್ಠೇಯ್ಯ, ಯೇ ಕುಟ್ಟನಿಸ್ಸಿತಾ ಪಾಣಾ, ತೇ ನಂ ಖಾದೇಯ್ಯುಂ। ರುಕ್ಖಂ ಚೇ ನಿಸ್ಸಾಯ ತಿಟ್ಠೇಯ್ಯ। ಉದಕಂ ಚೇ ನಿಸ್ಸಾಯ ತಿಟ್ಠೇಯ್ಯ। ಆಕಾಸಂ ಚೇ ನಿಸ್ಸಾಯ ತಿಟ್ಠೇಯ್ಯ, ಯೇ ಆಕಾಸನಿಸ್ಸಿತಾ ಪಾಣಾ, ತೇ ನಂ ಖಾದೇಯ್ಯುನ್ತಿ ಏವಮಾದಿನಾ ಭನ್ತೇ ತತ್ಥ ಭಗವತಾ ಫಸ್ಸಸ್ಸ ಆಹಾರಸ್ಸ ದಟ್ಠಬ್ಬಾಕಾರೋ ವಿತ್ಥಾರೇತ್ವಾ ಪಕಾಸಿತೋ।

ಏವಮೇವ ಖ್ವಾಹಂ ಭಿಕ್ಖವೇ ಫಸ್ಸಾಹಾರೋ ದಟ್ಠಬ್ಬೋತಿ ವದಾಮಿ।

ಪುಚ್ಛಾ – ಕಥಞ್ಚಾವುಸೋ ತತ್ಥ ಭಗವತಾ ಮನೋಸಞ್ಚೇತನಾಹಾರಸ್ಸ ದಟ್ಠಬ್ಬಾಕಾರೋ ಪಕಾಸಿತೋ।

ವಿಸ್ಸಜ್ಜನಾ – ಸೇಯ್ಯಥಾಪಿ ಭಿಕ್ಖವೇ ಅಙ್ಗಾರಕಾಸು ಸಾಧಿಕಪೋರಿಸಾ ಪುಣ್ಣಾ ಅಙ್ಗಾರಾನಂ ವೀತಚ್ಚಿಕಾನಂ ವೀತಧೂಮಾನಂ। ಅಥ ಪುರಿಸೋ ಆಗಚ್ಛೇಯ್ಯ ಜೀವಿತುಕಾಮೋ ಅಮರಿತುಕಾಮೋ ಸುಖ ಕಾಮೋ ದುಕ್ಖಪ್ಪಟಿಕೂಲೋತಿ ಏವಮಾದಿನಾ ಭನ್ತೇ ತತ್ಥ ಭಗವತಾ ಮನೋಸಞ್ಚೇತನಾಹಾರಸ್ಸ ದಟ್ಠಬ್ಬಾಕಾರೋ ವಿತ್ಥಾರೇನ ಪಕಾಸಿತೋ।

ಪುಚ್ಛಾ – ಕಥಞ್ಚಾವುಸೋ ತತ್ಥ ಭಗವತಾ ವಿಞ್ಞಾಣಾಹಾರಸ್ಸ ದಟ್ಠಬ್ಬಾಕಾರೋ ಪಕಾಸಿತೋ।

ವಿಸ್ಸಜ್ಜನಾ – ಸೇಯ್ಯಥಾಪಿ ಭಿಕ್ಖವೇ ಚೋರಂ ಆಗುಚಾರಿಂ ಗಹೇತ್ವಾ ರಞ್ಞೋ ದಸ್ಸೇಯ್ಯುಂ ‘‘ಅಯಂ ತೇ ದೇವಚೋರೋ ಆಗುಚಾರೀ, ಇಮಸ್ಸ ಯಂ ಇಚ್ಛಸಿ, ತಂ ದಣ್ಡಂ ಪಣೇಹೀ’’ತಿ ಏವಮಾದಿನಾ ಭನ್ತೇ ತತ್ಥ ಭಗವತಾ ವಿಞ್ಞಾಣಾಹಾರಸ್ಸ ದಟ್ಠಬ್ಬಾಕಾರೋ ಪಕಾಸಿತೋ।

ಸುಸಿಮಪರಿಬ್ಬಾಜಕಸುತ್ತ

ಪುಚ್ಛಾ – ತೇನಾವುಸೋ ಭಗವತಾ…ಪೇ॰… ಸಮ್ಮಾಸಮ್ಬುದ್ಧೇನ ಸುಸಿಮಪರಿಬ್ಬಾಜಕ ಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಆಯಸ್ಮನ್ತಂ ಸುಸಿಮಂ ಆರಬ್ಭ ಭಾಸಿತಂ। ಆಯಸ್ಮಾ ಭನ್ತೇ ಸುಸಿಮೋ ಯಾವತಕೋ ಭಿಕ್ಖೂಹಿ ಸದ್ಧಿಂ ಅಹೋಸಿ ಕಥಾಸಲ್ಲಾಪೋ, ತಂ ಸಬ್ಬಂ ಭಗವತೋ ಆರೋಚೇಸಿ। ತಸ್ಮಿಂ ವತ್ಥುಸ್ಮಿಂ ‘‘ಪುಬ್ಬೇ ಖೋ ಸುಸಿಮ ಧಮ್ಮಟ್ಠಿತಿಞಾಣಂ, ಪಚ್ಛಾ ನಿಬ್ಬಾನೇ ಞಾಣ’’ನ್ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ।

ಪುಚ್ಛಾ – ಕಥಞ್ಚಾವುಸೋ ತತ್ಥ ಭಗವಾ ಆಯಸ್ಮತೋ ಸುಸಿಮತ್ಥೇರಸ್ಸ ಸಮ್ಪತಿಅರಹತ್ತಪತ್ತಸ್ಸ ಅನುಯೋಗವಸೇನ ಪಟಿಪುಚ್ಛಿತ್ವಾ ಪಟಿಪುಚ್ಛಿತ್ವಾ ಉತ್ತರಿ ಧಮ್ಮದೇಸನಂ ವಿತ್ಥಾರೇತ್ವಾ ದೇಸೇಸಿ।

ವಿಸ್ಸಜ್ಜನಾ – ಜಾತಿಪಚ್ಚಯಾ ಜರಾಮರಣನ್ತಿ ಸುಸಿಮ ಪಸ್ಸಸೀತಿ। ಏವಂ ಭನ್ತೇ। ಭವಪಚ್ಚಯಾ ಜಾತೀತಿ ಸುಸಿಮ ಪಸ್ಸಸೀತಿ। ಏವಂ ಭನ್ತೇತಿ ಏವಮಾದಿನಾ ಭನ್ತೇ ಭಗವಾ ತತ್ಥ ಆಯಸ್ಮತೋ ಸುಸಿಮಸ್ಸ ಸಮ್ಪತಿಅರಹತ್ತಪತ್ತಸ್ಸ ಉತ್ತರಿಪಿ ಅನುಯೋಗವಸೇನ ಪಟಿಪುಚ್ಛಿತ್ವಾ ಪಟಿಪುಚ್ಛಿತ್ವಾ ವಿತ್ಥಾರತೋ ಧಮ್ಮಂ ದೇಸೇಸಿ।

ತಸ್ಸ ಮೇ ಭನ್ತೇ ಭಗವಾ ಅಚ್ಚಯಂ ಅಚ್ಚಯತೋ ಪಟಿಗ್ಗಣ್ಹಾತು ಆಯತಿಂಸಂವರಾಯ–

ಅಭಿಸಮಯಸಂಯುತ್ತ

ನಖಸಿಖಾಸುತ್ತ

ಪುಚ್ಛಾ – ಅಭಿಸಮಯಸಂಯುತ್ತೇ ಪನಾವುಸೋ ಪಠಮಂ ಸಂಗೀತಂ ನಖಸಿಖಾಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ತಂ ಕಿಂ ಮಞ್ಞಥ ಭಿಕ್ಖವೇ, ಕತಮಂ ನು ಖೋ ಬಹುತರಂ, ಯೋ ವಾಯಂ ಮಯಾ ಪರಿತ್ತೋ ನಖಸಿಖಾಯಂ ಪಂಸುಆರೋಪಿತೋ, ಅಯಂ ವಾ ಮಹಾಪಥವೀ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಧಾತುಸಂಯುತ್ತ

ಚಙ್ಕಮಸುತ್ತ

ಪುಚ್ಛಾ – ಧಾತುಸಂಯುತ್ತೇ ಪನಾವುಸೋ ಚಙ್ಕಮಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಧಾತುಸೋವ ಭಿಕ್ಖವೇ ಸತ್ತಾ ಸಂಸನ್ದನ್ತಿ ಸಮೇನ್ತಿ, ಹೀನಾಧಿಮುತ್ತಿಕಾ ಹೀನಾಧಿಮುತ್ತಿಕೇಹಿ ಸದ್ಧಿಂ ಸಂಸನ್ದನ್ತಿ ಸಮೇನ್ತಿ, ಕಲ್ಯಾಣಾಧಿಮುತ್ತಿಕಾ ಕಲ್ಯಾಣಾಧಿಮುತ್ತಿಕೇಹಿ ಸದ್ಧಿಂ ಸಂಸನ್ದನ್ತಿ ಸಮೇನ್ತೀ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಅಸ್ಸದ್ಧಸಂಸನ್ದನಸುತ್ತ

ಪುಚ್ಛಾ – ಅಸ್ಸದ್ಧಸಂಸನ್ದನಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಧಾತುಸೋವ ಭಿಕ್ಖವೇ ಸತ್ತಾ ಸಂಸನ್ದನ್ತಿ ಸಮೇನ್ತಿ, ಅಸ್ಸದ್ಧಾ ಅಸ್ಸದ್ಧೇಹಿ ಸದ್ಧಿಂ ಸಂಸನ್ದನ್ತಿ ಸಮೇನ್ತಿ, ಅಹಿರಿಕಾ ಅಹಿರಿಕೇಹಿ ಸದ್ಧಿಂ ಸಂಸನ್ದನ್ತಿ ಸಮೇನ್ತಿ, ಅನೋತ್ತಪ್ಪಿನೋ। ಅಪ್ಪಸ್ಸುತಾ। ಕುಸೀತಾ। ಮುಟ್ಠಸ್ಸತಿನೋ। ದುಪ್ಪಞ್ಞಾ ದುಪ್ಪಞ್ಞೇಹಿ ಸದ್ಧಿಂ ಸಂಸನ್ದನ್ತಿ ಸಮೇನ್ತೀ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಅನಮತಗ್ಗಸಂಯುತ್ತ

ಪಥವೀಸುತ್ತ

ಪುಚ್ಛಾ – ಅನಮತಗ್ಗಸಂಯುತ್ತೇ ಆವುಸೋ ದುತಿಯಂ ಸಂಗೀತಂ ಪಥವೀಸುತ್ತಂ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಅನಮತಗ್ಗೋಯಂ ಭಿಕ್ಖವೇ ಸಂಸಾರೋ, ಪುಬ್ಬಾ ಕೋಟಿ ನ ಪಞ್ಞಾಯತಿ ಅವಿಜ್ಜಾನೀವರಣಾನಂ ಸತ್ತಾನಂ ತಣ್ಹಾಸಂಯೋಜನಾನಂ ಸನ್ಧಾವತಂ ಸಂಸರತಂ। ಸೇಯ್ಯಥಾಪಿ ಭಿಕ್ಖವೇ ಪುರಿಸೋ ಇಮಂ ಮಹಾಪಥವಿಂ ಕೋಲಟ್ಠಿಮತ್ತಂ ಕೋಲಟ್ಠಿಮತ್ತಂ ಮತ್ತಿಕಾಗುಳಿಕಂ ಕರಿತ್ವಾ ನಿಕ್ಖಿಪೇಯ್ಯ ‘ಅಯಂ ಮೇ ಪಿಯಾ, ತಸ್ಸ ಮೇ ಪಿತು ಅಯಂ ಪಿತಾ’ತಿ। ಅಪರಿಯಾದಿನ್ನಾವ ಭಿಕ್ಖವೇ ತಸ್ಸ ಪುರಿಸಸ್ಸ ಪಿತುಪಿತರೋ ಅಸ್ಸು। ಅಥಾಯಂ ಮಹಾಪಥವೀ ಪರಿಕ್ಖಯಂ ಪರಿಯಾದಾನಂ ಗಚ್ಛೇಯ್ಯ। ತಂ ಕಿಸ್ಸಹೇತು, ಅನಮತಗ್ಗೋಯಂ ಭಿಕ್ಖವೇ ಸಂಸಾರೋ, ಪುಬ್ಬಾ ಕೋಟಿ ನ ಪಞ್ಞಾಯತಿ ಅವಿಜ್ಜಾನೀವರಣಾನಂ ಸತ್ತಾನಂ ತಣ್ಹಾ ಸಂಯೋಜನಾನಂ ಸನ್ಧಾವತಂ ಸಂಸರತಂ’’ ಏವಮಾದಿನಾ ಭಗವತಾ ಭಾಸಿತಂ।

ಏವಂ ದೀಘರತ್ತಂ ವೋ ಭಿಕ್ಖವೇ ದುಕ್ಖಂ ಪಚ್ಚನುಭೂತಂ ತಿಬ್ಬಂ ಪಚ್ಚನುಭೂತಂ ಬ್ಯಸನಂ ಪಚ್ಚನುಭೂತಂ ಕಟಸೀ ವಡ್ಢಿತಾ।

ಅಲಮೇವ ಸಬ್ಬಸಙ್ಖಾರೇಸು ನಿಬ್ಬಿನ್ದಿತುಂ,

ಅಲಂ ವಿರಜ್ಜಿತುಂ, ಅಲಂ ವಿಮುಚ್ಚಿತುಂ,

ಅಸ್ಸುಸುತ್ತ

ಪುಚ್ಛಾ – ತತ್ಥಾವುಸೋ ತತಿಯಂ ಸಂಗೀತಂ ಅಸ್ಸುಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇಯೇವ ಭಿಕ್ಖೂ ಆರಬ್ಭ ‘‘ತಂ ಕಿಂ ಮಞ್ಞಥ ಭಿಕ್ಖವೇ, ಕತಮಂ ನು ಖೋ ಬಹುತರಂ, ಯಂ ವಾ ವೋ ಇಮಿನಾ ದೀಘೇನ ಅದ್ಧುನಾ ಸನ್ಧಾವತಂ ಸಂಸರತಂ ಅಮನಾಪಸಮ್ಪಯೋಗಾ ಮನಾಪವಿಪ್ಪಯೋಗಾ ಕನ್ದನ್ತಾನಂ ರೋದನ್ತಾನಂ ಅಸ್ಸು ಪಸ್ಸನ್ನಂ ಪಗ್ಘರಿತಂ, ಯಂ ವಾ ಚತೂಸು ಮಹಾಸಮುದ್ದೇಸು ಉದಕ’’ನ್ತಿ ಏವಮಾದಿನಾ ಭಗವತಾ ಭಾಸಿತಂ।

ಸಾಸಪಸುತ್ತ

ಪುಚ್ಛಾ – ತತ್ಥಾವುಸೋ ಛಟ್ಠಂ ಸಂಗೀತಂ ಸಾಸಪಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ಭಿಕ್ಖುಂ ಆರಬ್ಭ ಭಾಸಿತಂ। ಅಞ್ಞತರೋ ಭನ್ತೇ ಭಿಕ್ಖು ಭಗವನ್ತಂ ಏತದವೋಚ ‘‘ಕೀವದೀಘೋ ನು ಖೋ ಭನ್ತೇ ಕಪ್ಪೋ’’ತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ದೀಘೋ ಖೋ ಭಿಕ್ಖು ಕಪ್ಪೋ, ಸೋ ನ ಸುಕರೋ ಸಙ್ಖಾತುಂ ಏತ್ತಕಾನಿ ವಸ್ಸಾನಿ ಇತಿವಾ, (ಪೇಯ್ಯಾಲ) ಏತ್ತಕಾನಿ ವಸ್ಸಸತಸಹಸ್ಸಾನಿ ಇತಿವಾತಿ ಏವಮಾದಿನಾ ಭಗವತಾ ಭಾಸಿತಂ।

ಗಙ್ಗಾಸುತ್ತ

ಪುಚ್ಛಾ – ತೇನಾವುಸೋ…ಪೇ॰… ಸಮ್ಮಾಸಮ್ಬುದ್ಧೇನ ಅನಮತಗ್ಗಸಂಯುತ್ತೇ ಗಙ್ಗಾಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಅಞ್ಞತರಂ ಬ್ರಾಹ್ಮಣಂ ಆರಬ್ಭ ಭಾಸಿತಂ। ಅಞ್ಞತರೋ ಭನ್ತೇ ಬ್ರಾಹ್ಮಣೋ ಭಗವನ್ತಂ ಏತದವೋಚ ‘‘ಕೀವ-

ಬಹುಕಾ ನು ಖೋ ಭೋ ಗೋತಮ ಕಪ್ಪಾ ಅಬ್ಭತೀತಾ ಅತಿಕ್ಕನ್ತಾ’’ತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಬಹುಕಾ ಖೋ ಬ್ರಾಹ್ಮಣ ಕಪ್ಪಾ ಅಬ್ಭತೀತಾ ಅತಿಕ್ಕನ್ತಾ, ತೇ ನ ಸುಕರಾ ಸಙ್ಖಾತುಂ ‘ಏತ್ತಕಾ ಕಪ್ಪಾ’ ಇತಿ ವಾ ‘ಏತ್ತಕಾನಿ ಕಪ್ಪಸತಾನಿ’ ಇತಿ ವಾ ‘ಏತ್ತಕಾನಿ ಕಪ್ಪಸಹಸ್ಸಾನಿ’ ಇತಿವಾ ‘ಏತ್ತಕಾನಿ ಕಪ್ಪಸತಸಹಸ್ಸಾನಿ’ ಇತಿ ವಾ’’ತಿ ಏವ ಮಾದಿನಾ ಭಗವತಾ ಭಾಸಿತಂ।

ಪುಗ್ಗಲಸುತ್ತ

ಪುಚ್ಛಾ – ಪುಗ್ಗಲಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಅನಮತಗ್ಗೋಯಂ ಭಿಕ್ಖವೇ ಸಂಸಾರೋ, ಪುಬ್ಬಾಕೋಟಿ ನ ಪಞ್ಞಾಯತಿ ಅವಿಜ್ಜಾ ನೀವರಣಾನಂ ಸತ್ತಾನಂ ತಣ್ಹಾಸಂಯೋಜನಾನಂ ಸನ್ಧಾವತಂ ಸಂಸರತಂ। ಏಕಪುಗ್ಗಲಸ್ಸ ಭಿಕ್ಖವೇ ಕಪ್ಪಂ ಸನ್ಧಾವತೋ ಸಂಸರತೋ ಸಿಯಾ ಏವಂ ಮಹಾ ಅಟ್ಠಿಕಙ್ಕಲೋ ಅಟ್ಠಿಪುಞ್ಜೋ ಅಟ್ಠಿರಾಸಿ, ಯಥಾ ಯಂ ವೇಪುಲ್ಲೋ ಪಬ್ಬತೋ। ಸಚೇ ಸಂಹಾರಕೋ ಅಸ್ಸ, ಸಮ್ಭತಞ್ಚ ನ ವಿನಸ್ಸೇತ್ಯಾ’’ತಿ ಏವಮಾದಿನಾ ಭಗವತಾ ಭಾಸಿತಂ।

ದುಗ್ಗತಸುತ್ತ, ಸುಖಿತಸುತ್ತ

ಪುಚ್ಛಾ – ತತ್ಥಾವುಸೋ ದುಗ್ಗತಸುತ್ತಞ್ಚ ಸುಖಿತಸುತ್ತಞ್ಚ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಅನಮತಗ್ಗೋಯಂ ಭಿಕ್ಖವೇ ಸಂಸಾರೋ, ಪುಬ್ಬಾ ಕೋಟಿ ನ ಪಞ್ಞಾಯತಿ ಅವಿಜ್ಜಾನೀವರಣಾನಂ ಸತ್ತಾನಂ ತಣ್ಹಾಸಂಯೋಜನಾನಂ ಸನ್ಧಾವತಂ ಸಂಸರತಂ। ಯಂ ಭಿಕ್ಖವೇ ಪಸ್ಸೇಯ್ಯಾಥ ದುಗ್ಗತಂ ದುರೂಪೇತಂ, ನಿಟ್ಠಮೇತ್ಥ ಗನ್ತಬ್ಬಂ ‘ಅಮ್ಹೇಹಿಪಿ ಏವರೂಪಂ ಪಚ್ಚನುಭೂತಂ ಇಮಿನಾ ದೀಘೇನ ಅದ್ಧುನಾ’ತಿ, ಯಂ ಭಿಕ್ಖವೇ ಪಸ್ಸೇಯ್ಯಾಥ ಸುಖಿತಂ ಸುಸಜ್ಜಿತಂ,

ನಿಟ್ಠಮೇತ್ಥ ಗನ್ತಬ್ಬಂ, ‘‘ಅಮ್ಹೇಹಿಪಿ ಪಚ್ಚನುಭೂತಂ ಇಮಿನಾ ದೀಘೇನ ಅದ್ಧುನಾ’’ತಿ ಏವಮಾದಿನಾ ಭಗವತಾ ಭಾಸಿತಂ।

ತಿಂಸಮತ್ತಸುತ್ತ

ಪುಚ್ಛಾ – ತಿಂಸಮತ್ತಸುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ರಾಜಗಹೇ ಭನ್ತೇ ತಿಂಸಮತ್ತೇ ಪಾವೇಯ್ಯಕೇ ಭಿಕ್ಖೂ ಆರಬ್ಭ ‘‘ಅನಮತಗ್ಗೋಯಂ ಭಿಕ್ಖವೇ ಸಂಸಾರೋ, ಪುಬ್ಬಾಕೋಟಿ ನ ಪಞ್ಞಾಯತಿ ಅವಿಜ್ಜಾನೀವರಣಾನಂ ಸತ್ತಾನಂ ತಣ್ಹಾಸಂಯೋಜನಾನಂ ಸನ್ಧಾವತಂ ಸಂಸರತಂ। ತಂ ಕಿಂ ಮಞ್ಞಥ ಭಿಕ್ಖವೇ, ಕತಮಂ ನು ಖೋ ಬಹುತರಂ, ಯಂ ವಾ ವೋ ಇಮಿನಾ ದೀಘೇನ ಅದ್ಧುನಾ ಸನ್ಧಾವತಂ ಸಂಸರತಂ ಸೀಸಚ್ಛಿನ್ನಾನಂ ಲೋಹಿತಂ ಪಸ್ಸನ್ನಂ ಪಗ್ಘರಿತಂ, ಯಂ ವಾ ಚತೂಸು ಮಹಾಸಮುದ್ದೇಸು ಉದಕ’’ನ್ತಿ ಏವಮಾದಿನಾ ಭವಗತಾ ಭಾಸಿತಂ।

ಮಾತುಸುತ್ತ

ಪುಚ್ಛಾ – ಮಾತುಸುತ್ತಾದೀನಿ ಪನಾವುಸೋ ಛಸುತ್ತಾನಿ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಅನಮತಗ್ಗೋಯಂ ಭಿಕ್ಖವೇ ಸಂಸಾರೋ, ಪುಬ್ಬಾ ಕೋಟಿ ನ ಪಞ್ಞಾಯತಿ ಅವಿಜ್ಜಾನೀವರಣಾನಂ ಸತ್ತಾನಂ ತಣ್ಹಾಸಂಯೋಜನಾನಂ ಸನ್ಧಾವತಂ ಸಂಸರತಂ। ನ ಸೋ ಭಿಕ್ಖವೇ ಸತ್ತೋ ಸುಲಭರೂಪೋ, ಯೋ ನ ಮಾತಾಭೂತಪುಬ್ಬೋ ಇಮಿನಾ ದೀಘೇನ ಅದ್ಧುನಾ। ಯೋ ನ ಪಿತಾಭೂತಪುಬ್ಬೋ। ಯೋ ನ ಭಾತಾಭೂತಪುಬ್ಬೋ। ಯೋ ನ ಭಗಿನಿಭೂತಪುಬ್ಬೋ। ಯೋ ನ ಪುತ್ತಭೂತಪುಬ್ಬೋ। ಯೋ ನ ಧೀತಾಭೂತಪುಬ್ಬೋ ಇಮಿನಾ ದೀಘೇನ ಅದ್ಧುನಾ’’ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ।

ಕಸ್ಸಪಸಂಯುತ್ತ

ಚನ್ದೂಪಮಸುತ್ತ

ಪುಚ್ಛಾ – ಕಸ್ಸಪಸಂಯುತ್ತೇ ಪನಾವುಸೋ ಚನ್ದೂಪಮಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಚನ್ದೂಪಮಾ ಭಿಕ್ಖವೇ ಕುಲಾನಿ ಉಪಸಙ್ಕಮಥ ಅಪಕಸ್ಸೇವ ಕಾಯಂ ಅಪಕಸ್ಸ ಚಿತ್ತಂ ನಿಚ್ಚನವಕಾ ಕುಲೇಸು ಅಪ್ಪಗಬ್ಭಾ। ಸೇಯ್ಯಥಾಪಿ ಭಿಕ್ಖವೇ ಪುರಿಸೋ ಜರುದಪಾನಂ ವಾ ಓಲೋಕೇಯ್ಯ ಪಬ್ಬತವಿಸಮಂ ವಾ ನದೀವಿದುಗ್ಗಂ ವಾ ಅಪಕಸ್ಸೇವ ಕಾಯಂ ಅಪಕಸ್ಸ ಚಿತ್ತಂ। ಏವಮೇವ ಖೋ ಭಿಕ್ಖವೇ ಚನ್ದೂಪಮಾ ಕುಲಾನಿ ಉಪಸಙ್ಕಮಥ ಅಪಕಸ್ಸೇವ ಕಾಯಂ ಅಪಕಸ್ಸ ಚಿತ್ತಂ ನಿಚ್ಚನವಕಾ ಕುಲೇಸು ಅಪ್ಪಗಬ್ಭಾ’’ತಿ ಏವಮಾದಿನಾ ಭಗವತಾ ಭಾಸಿತಂ।

ತಂ ಕಿಂ ಮಞ್ಞಥ ಭಿಕ್ಖವೇ, ಕಥಂ ರೂಪಾ ಭಿಕ್ಖು ಅರಹತಿ ಕುಲಾನಿ ಉಪಸಙ್ಕಮಿತುಂ।

ಪುಚ್ಛಾ – ಕಥಞ್ಚಾವುಸೋ ತತ್ಥ ಭಗವತಾ ಪರಿಸುದ್ಧಾಪರಿಸುದ್ಧ ಧಮ್ಮದೇಸನಂ ದಸ್ಸೇತ್ವಾ ಭಿಕ್ಖೂನಂ ಓವಾದೋ ದಿನ್ನೋ।

ವಿಸ್ಸಜ್ಜನಾ – ‘‘ತಂ ಕಿಂ ಮಞ್ಞಥ ಭಿಕ್ಖವೇ, ಕಥಂ ರೂಪಸ್ಸ ಭಿಕ್ಖುನೋ ಅಪರಿಸುದ್ಧಾ ಧಮ್ಮದೇಸನಾ ಹೋತಿ, ಕಥಂ ರೂಪಸ್ಸ ಭಿಕ್ಖುನೋ ಪರಿಸುದ್ಧಾ ಧಮ್ಮದೇಸನಾ ಹೋತೀ’’ತಿ ಏವಮಾದಿನಾ ಪರಿಸುದ್ಧಾಪರಿಸುದ್ಧಧಮ್ಮದೇಸನಾ ವಿತ್ಥಾರತೋ ದಸ್ಸೇತ್ವಾ ‘‘ಕಸ್ಸಪೇನ ವಾ ಹಿ ವೋ ಭಿಕ್ಖವೇ ಓವದಿಸ್ಸಾಮಿ ಯೋ ವಾ ಪನಸ್ಸ ಕಸ್ಸಪಸದಿಸೋ, ಓವದಿತೇಹಿ ಚ ಪನ ವೋ ತಥತ್ತಾಯ ಪಟಿಪಜ್ಜಿತಬ್ಬ’’ನ್ತಿ। ಏವಂ ಖೋ ಭನ್ತೇ ಭಗವತೋ ಭಿಕ್ಖೂನಂ ಓವಾದೋ ದಿನ್ನೋ।

ಯೋ ಹಿ ಕೋಚಿ ಭಿಕ್ಖವೇ ಭಿಕ್ಖು ಏವಂಚಿತ್ತೋ ಪರೇಸಂ ಧಮ್ಮಂ ದೇಸೇತಿ ‘‘ಅಹೋ ವತ ಮೇ ಧಮ್ಮಂ ಸುಣೇಯ್ಯುಂ, ಸುತ್ವಾ ಚ ಪನ ಧಮ್ಮಂ ಪಸೀದೇಯ್ಯುಂ, ಪಸನ್ನಾ ಚ ಮೇ ಪಸನ್ನಾಕಾರಂ ಕರೇಯ್ಯುಂ–

ಸ್ವಾಕ್ಖಾತೋ ಭಗವತಾ ಧಮ್ಮೋ ಸನ್ದಿಟ್ಠಿಕೋ ಅಕಾಲಿಕೋ ಏಹಿ ಪಸ್ಸಿಕೋ ಓಪನೇಯ್ಯಿಕೋ ಪಚ್ಚತ್ತಂ ವೇದಿತಬ್ಬೋ ವಿಞ್ಞೂಹಿ–

ಕಸ್ಸಪೇನ ವಾ ಹಿ ವೋ ಭಿಕ್ಖವೇ ಓವದಿಸ್ಸಾಮಿ ಯೋ ವಾ ಪನಸ್ಸ ಕಸ್ಸಪಸದಿಸೋ, ಓವದಿತೇಹಿ ಚ ಪನ ವೋ ತಥತ್ತಾಯ ಪಟಿಪಜ್ಜಿತಬ್ಬಂ–

ಕುಲೂಪಕಸುತ್ತ

ಪುಚ್ಛಾ – ತೇನಾವುಸೋ ಭಗವತಾ…ಪೇ॰… ಸಮ್ಮಾಸಮ್ಬುದ್ಧೇನ ಕಸ್ಸಪಸಂಯುತ್ತೇ ಚತುತ್ಥಂ ಕುಲೂಪಕಸುತ್ತಂ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ತಂ ಕಿಂ ಮಞ್ಞಥ ಭಿಕ್ಖವೇ, ಕಥಂ ರೂಪೋ ಭಿಕ್ಖು ಅರಹತಿ ಕುಲೂಪಕೋ ಹೋತುಂ, ಕಥಂ ರೂಪೋ ಭಿಕ್ಖು ನ ಅರಹತಿ ಕುಲೂಪಕೋ ಹೋತು’’ನ್ತಿ ಏವಮಾದಿನಾ ಭಗವತಾ ಭಾಸಿತಂ।

ಕಸ್ಸಪೇನ ವಾ ಹಿ ವೋ ಭಿಕ್ಖವೇ ಓವದಿಸ್ಸಾಮಿ ಯೋ ವಾ ಪನಸ್ಸ ಕಸ್ಸಪಸದಿಸೋ, ಓವದಿತೇಹಿ ಚ ಪನ ವೋ ತಥತ್ತಾಯ ಪಟಿಪಜ್ಜಿತಬ್ಬಂ।

ದುತಿಯ ಓವಾದಸುತ್ತ

ಪುಚ್ಛಾ – ತತ್ಥೇವಾವುಸೋ ಭಗವತಾ ದುತಿಯ ಓವಾದಸುತ್ತಂ ಕತ್ಥ ಕೇನ ಸದ್ಧಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಆಯಸ್ಮತಾ ಮಹಾಕಸ್ಸಪೇನ ಸದ್ಧಿಂ ‘‘ಓವದ ಕಸ್ಸಪ ಭಿಕ್ಖೂ, ಕರೋಹಿ ಕಸ್ಸಪ ಭಿಕ್ಖೂನಂ ಧಮ್ಮಿಂ ಕಥಂ, ಅಹಂ ವಾ ಕಸ್ಸಪ ಭಿಕ್ಖೂ ಓವದೇಯ್ಯಂ ತ್ವಂ ವಾ, ಅಹಂ ವಾ ಭಿಕ್ಖೂನಂ ಧಮ್ಮಿಂ ಕಥಂ ಕರೇಯ್ಯಂ ತ್ವಂ ವಾ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಯಸ್ಸ ಕಸ್ಸಚಿ ಭನ್ತೇ ಸದ್ಧಾ ನತ್ಥಿ ಕುಸಲೇಸು ಧಮ್ಮೇಸು, ಹಿರೀ ನತ್ಥಿ। ಓತ್ತಪ್ಪಂ ನತ್ಥಿ। ವೀರಿಯಂ ನತ್ಥಿ। ಪಞ್ಞಾ ನತ್ಥಿ ಕುಸಲೇಸು ಧಮ್ಮೇಸು।

ತತಿಯ ಓವಾದಸುತ್ತ

ಪುಚ್ಛಾ – ತತ್ಥೇವಾವುಸೋ ಭಗವತಾ ತತಿಯಓವಾದಸುತ್ತಂ ಕತ್ಥ ಕೇನ ಸದ್ಧಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಆಯಸ್ಮತಾಯೇವ ಮಹಾಕಸ್ಸಪೇನ ಸದ್ಧಿಂ ‘‘ಓವದ ಕಸ್ಸಪ ಭಿಕ್ಖೂ। ಕರೋಹಿ ಕಸ್ಸಪ ಭಿಕ್ಖೂನಂ ಧಮ್ಮಿಂ ಕಥಂ, ಅಹಂ ವಾ ಕಸ್ಸಪ ಭಿಕ್ಖೂ ಓವದೇಯ್ಯಂ ತ್ವಂ ವಾ। ಅಹಂ ವಾ ಭಿಕ್ಖೂನಂ ಧಮ್ಮಂ ಕಥಂ ಕರೇಯ್ಯಂ ತ್ವಂ ವಾ’’ತಿ ಏವಮಾದಿನಾ ಭಗವತಾ ಭಾಸಿತಂ।

ದುಬ್ಬಚಾ ಖೋ ಭನ್ತೇ ಏತರಹಿ ಭಿಕ್ಖೂ ದೋವಚಸ್ಸಕರಣೇಹಿ ಧಮ್ಮೇಹಿ ಸಮನ್ನಾಗತಾ ಅಕ್ಖಮಾ ಅಪ್ಪದಕ್ಖಿಣಗ್ಗಾಹಿನೋ ಅನುಸಾಸನಿಂ–

ಸದ್ಧಮ್ಮಪ್ಪತಿರೂಪಕಸುತ್ತ

ಪುಚ್ಛಾ – ತತ್ಥೇವಾವುಸೋ ಭಗವತಾ ಪರಿಯೋಸಾನಂ ಸದ್ಧಮ್ಮಪ್ಪತಿರೂಪಕಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂಯೇವ ಮಹಾಕಸ್ಸಪಂ ಆರಬ್ಭ ಭಾಸಿತಂ। ಆಯಸ್ಮಾ ಭನ್ತೇ ಮಹಾಕಸ್ಸಪೋ ಭಗವನ್ತಂ ಏತದೇವೋಚ ‘‘ಕೋ ನು ಖೋ ಭನ್ತೇ ಹೇತು ಕೋ ಪಚ್ಚಯೋ, ಯೇನ ಪುಬ್ಬೇ ಅಪ್ಪತರಾನಿ ಚೇವ ಸಿಕ್ಖಾಪದಾನಿ ಅಹೇಸುಂ, ಬಹುತರಾ ಚ ಭಿಕ್ಖೂ ಅಞ್ಞಾಯ ಸಣ್ಠಹಿಂಸು। ಕೋ ಪನ ಭನ್ತೇ ಹೇತು ಕೋ ಪಚ್ಚಯೋ, ಯೇನೇತರಹಿ ಬಹುತರಾನಿ ಚೇವ ಸಕ್ಖಾಪದಾನಿ ಅಪ್ಪತರಾ ಚ ಭಿಕ್ಖೂ ಅಞ್ಞಾಯ ಸಣ್ಠಹನ್ತೀ’’ತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಏವಞ್ಚೇತಂ ಕಸ್ಸಪ ಹೋತಿ ಸತ್ತೇಸು ಹಾಯಮಾನೇಸು ಸದ್ಧಮ್ಮೇ ಅನ್ತರಧಾಯಮಾನೇ ಬಹುತರಾನಿಚೇವ ಸಿಕ್ಖಾಪದಾನಿ ಹೋನ್ತಿ, ಅಪ್ಪತರಾಚ ಭಿಕ್ಖೂ ಅಞ್ಞಾಯ ಸಣ್ಠಹನ್ತೀ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಲಾಭಸಕ್ಕಾರಸಂಯುತ್ತ

ಮೀಳ್ಹಕಸುತ್ತ

ಪುಚ್ಛಾ – ತೇನಾವುಸೋ…ಪೇ॰… ಸಮ್ಮಾಸಮ್ಬುದ್ಧೇನ ಲಾಭಸಕ್ಕಾರಂಯುತ್ತೇ ಪಞ್ಚಮಂ ಸಂಗೀತಂ ಮೀಳ್ಹಕಸುತ್ತಂ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ದಾರುಣೋ ಭಿಕ್ಖವೇ ಲಾಭಸಕ್ಕಾರಸಿಲೋಕೋ ಫರುಸೋ ಅನ್ತರಾಯಿಕೋ ಅನುತ್ತರಸ್ಸ ಯೋಗಕ್ಖೇಮಸ್ಸ ಅಧಿಗಮಾಯ। ಸೇಯ್ಯಥಾಪಿ ಭಿಕ್ಖವೇ ಮೀಳ್ಹಕಾ ಗೂಥಾದೀ ಗೂಥಪೂರಾ ಪುಣ್ಣಾ ಗೂಥಸ್ಸ, ಪುರತೋ ಚಸ್ಸ ಮಹಾಗೂಥಪುಞ್ಜೋ, ಸಾ ತೇನ ಅಞ್ಞಾ ಮೀಳ್ಹಕಾ ಅತಿಮಞ್ಞೇಯ್ಯ ‘‘ಅಹಮ್ಹಿ ಗೂಥಾದೀ ಗೂಥಪೂರಾ ಪುಣ್ಣಾ ಗೂಥಸ್ಸ, ಪುರತೋ ಚ ಮ್ಯಾಯಂ ಮಹಾಗೂಥಪುಞ್ಜೋ’’ತಿ ಏವಮಾದಿನಾ ಭಗವತಾ ಭಾಸಿತಂ।

ತಂ ಹಿ ತಸ್ಸ ಭಿಕ್ಖವೇ ಮೋಘಪುರಿಸಸ್ಸ ಹೋತಿ ದೀಘರತ್ತಂ ಅಹಿತಾಯ ದುಕ್ಖಾಯ।

ಏವಂ ದಾರುಣೋ ಖೋ ಭಿಕ್ಖವೇ ಲಾಭಸಕ್ಕಾರಸಿಲೋಕೋ।

ತಸ್ಮಾತಿಹ ಭಿಕ್ಖವೇ ಏವಂ ಸಿಕ್ಖಿತಬ್ಬಂ, ‘‘ಉಪ್ಪನ್ನಂ ಲಾಭಸಕ್ಕಾರಸಿ ಲೋಕಂ ಪಜಹಿಸ್ಸಾಮ, ನ ಚ ನೋ ಉಪ್ಪನ್ನೋ ಲಾಭಸಕ್ಕಾರಸಿಲೋಕೋ ಚಿತ್ತಂ ಪರಿಯಾದಾಯ ಠಸ್ಸಭೀ’’ತಿ, ಏವಞ್ಹಿ ಖೋ ಭಿಕ್ಖವೇ ಸಿಕ್ಖಿತಬ್ಬಂ।

ಏಕಪುತ್ತಕಸುತ್ತ

ಪುಚ್ಛಾ – ತತ್ಥೋ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕೇಹಿ ಸಂಗೀತಂ ಏಕಪುತ್ತಕಸುತ್ತಂ ಕತ್ಥ ಕಂ ಆರಬ್ಭಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ದಾರುಣೋ ಭಿಕ್ಖವೇ ಲಾಭಸಕ್ಕಾರಸಿಲೋಕೋ ಕಟುಕೋ ಫರುಸೋ ಅನ್ತರಾಯಿಕೋ ಅನುತ್ತರಸ್ಸ ಯೋಗಕ್ಖೇಮಸ್ಸ ಅಧಿಗಮಾಯ, ಸದ್ಧಾ ಭಿಕ್ಖವೇ ಉಪಾಸಿಕಾ ಏಕಪುತ್ತಕಂ ಪಿಯಂ ಮನಾಪಂ ಏವಂ ಸಮ್ಮಾಆಯಾಚಮಾನಾ ಆಯಾಚೇಯ್ಯ ತಾದಿಸೋ ತಾತ ಭವಾಹಿ, ಯಾದಿಸೋ ಚಿತ್ತೋ ಚ ಗಹಪತಿ ಹತ್ಥಕೋ ಚ ಆಳವಕೋ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಏಸಾ ಭಿಕ್ಖವೇ ತುಲಾ ಏತಂ ಪಮಾಣಂ ಮಮ ಸಾವಕಾನಂ ಉಪಾಸಕಾನಂ ಯದಿದಂ ಚಿತ್ತೋ ಚ ಗಹಪತಿ ಹತ್ಥಕೋ ಚ ಆಳವಕೋ।

ಸಚೇ ಖೋ ತ್ವಂ ತಾತ ಅಗಾರಸ್ಮಾ ಅನಗಾರಿಯಂ ಪಬ್ಬಜಸಿ, ತಾದಿಸೋ ತಾತ ಭವಾಹಿ, ಯಾದಿಸಾ ಸಾರಿಪುತ್ತಮೋಗ್ಗಲ್ಲಾನಾ।

ಮಾ ಚ ಖೋ ತ್ವಂ ತಾತ ಸೇಖಂ ಅಪ್ಪತ್ತಮಾನಸಂ ಲಾಭಸಕ್ಕಾರಸಿಲೋಕೋ ಅನುಪಾಪುಣಾತು–

ಏವಂ ದಾರುಣೋ ಭಿಕ್ಖವೇ ಲಾಭಸಕ್ಕಾರಸಿಲೋಕೋ ಕಟುಕೋ ಫರುಸೋ ಅನ್ತರಾಯಿಕೋ ಅನುತ್ತರಸ್ಸ ಯೋಗಕ್ಖೇಮಸ್ಸ ಅಧಿಗಮಾಯ।

ಏಕವೀತುಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಯಕೇಹಿ ಸಂಗೀತಂ ಏಕಧೀತುಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂಯೇವ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ದಾರುಣೋ ಭಿಕ್ಖವೇ ಲಾಭಸಕ್ಕಾರಸಿಲೋಕೋ ಕಟುಕೋ ಫರುಸೋ ಅನ್ತರಾಯಿಕೋ ಅನುತ್ತರಸ್ಸ ಯೋಗಕ್ಖೇಮಸ್ಸ ಅಧಿಗಮಾಯ। ಸದ್ಧಾ ಭಿಕ್ಖವೇ ಉಪಾಸಿಕಾ ಏಕಂ ಧೀತರಂ ಪಿಯಂ ಮನಾಪಂ ಏವಂ ಸಮ್ಮಾ ಆಯಾಚಮಾನಾ ಆಯಾಚೇಯ್ಯ ‘ತಾದಿಸಾ ಅಯ್ಯೇ ಭವಾಹಿ, ಯಾದಿಸಾ ಖುಜ್ಜುತ್ತರಾ ಚ ಉಪಾಸಿಕಾ ವೇಳುಕಣ್ಡಕಿಯಾ ಚ ನನ್ದಮಾತಾ’ತಿ। ಏಸಾ ಭಿಕ್ಖವೇ ತುಲಾ ಏತಂ ಪಮಾಣಂ ಮಮ ಸಾವಿಕಾನಂ ಉಪಾಸಿಕಾನಂ, ಯದಿದಂ ಖುಜ್ಜುತ್ತರಾ ಚ ಉಪಾಸಿಕಾ ವೇಳುಕಣ್ಡಕಿಯಾ ಚ ನನ್ದಮಾತಾ’’ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ।

ಸಚೇ ಖೋ ತ್ವಂ ಅಯ್ಯೇ ಅಗಾರಸ್ಮಾ ಅನಗಾರಿಯಂ ಪಬ್ಬಜಸಿ, ಭಾದಿಸಾ ಅಯ್ಯೇ ಭವಾಹಿ, ಯಾದಿಸಾ ಖೇಮಾ ಚ ಭಿಕ್ಖುನೀ ಉಪ್ಪಲವಣ್ಣಾ ಚ–

ತಸ್ಮಾತಿಹ ಭಿಕ್ಖವೇ ಏವಂ ಸಿಕ್ಖಿತಬ್ಬಂ।

ರಾಹುಲಸಂಯುತ್ತ

ಪುಚ್ಛಾ – ರಾಹುಲಸಂಯುತ್ತಂ ಪನಾವುಸೋ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ರಾಹುಲಂ ಆರಬ್ಭ ಭಾಸಿತಂ। ಆಯಸ್ಮಾ ಭನ್ತೇ ರಾಹುಲೋ ಭಗವನ್ತಂ ಏತದವೋಚ ‘‘ಸಾಧು ಮೇ ಭನ್ತೇ ಭಗವಾ ಸಂಖಿತ್ತೇನ ಧಮ್ಮಂ ದೇಸೇತು, ಯಮಹಂ ಭಗವತೋ ಧಮ್ಮಂ ಸುತ್ವಾ ಏಕೋ ವೂಪಕಟ್ಠೋ ಅಪ್ಪಮತ್ತೋ ಆತಾಪೀ ಪಹಿತತ್ತೋ ವಿಹರೇಯ್ಯ’’ನ್ತಿ, ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ತಂ ಕಿಂ ಮಞ್ಞಸಿ ರಾಹುಲ, ಚಕ್ಖುನಿಚ್ಚಂ ವಾ ಅನಿಚ್ಚಂ ವಾತಿ। ಅನಿಚ್ಚಂ ಭನ್ತೇ। ಯಂ ಪನಾನಿಚ್ಚಂ, ದುಕ್ಖಂ ವಾ ತಂ ಸುಖಂ ವಾತಿ। ದುಕ್ಖಂ ಭನ್ತೇ। ಯಂ ಪನಾನಿಚ್ಚಂ ದುಕ್ಖಂ ವಿಪರಿಣಾಮಧಮ್ಮಂ, ಕಲ್ಲಂ ನು ತಂ ಸಮನುಪಸ್ಸಿತುಂ ‘ಏತಂ ಮಮ, ಏಸೋ ಹಮಸ್ಮಿ, ಏಸೋ ಮೇ ಅತ್ತಾ’ತಿ। ನೋ ಹೇತಂ ಭನ್ತೇ’’ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ।

ಲಕ್ಖಣಸಂಯುತ್ತ

ಅಟ್ಠಿಸುತ್ತ

ಪುಚ್ಛಾ – ಲಕ್ಖಣಸಂಯುತ್ತೇ ಪನಾವುಸೋ ಪೋರಾಣಕೇಹಿ ಧಮ್ಮಸಂಗಾಹಕತ್ಥೇರೇಹಿ ಪಠಮಂ ಸಂಗೀತಂ ಅಟ್ಠಿಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಆಯಸ್ಮನ್ತಞ್ಚ ಲಕ್ಖಣಂ ಆಯಸ್ಮನ್ತಞ್ಚ ಮಹಾಮೋಗ್ಗಲ್ಲಾನಂ ಆರಬ್ಭ ಭಾಸಿತಂ। ಆಯಸ್ಮಾ ಭನ್ತೇ ಲಕ್ಖಣೋ ಭಗವತಾ ಸಮ್ಮುಖೇ ಆಯಸ್ಮನ್ತಂ ಮಹಾಮೋಗ್ಗಲ್ಲಾನಂ ಏತದವೋಚ ‘‘ಇಧಾಯಸ್ಮಾ ಮಹಾಮೋಗ್ಗಲ್ಲಾನೋ ಗಿಜ್ಝಕೂಟಾ ಪಬ್ಬತಾ ಓರೋಹನ್ತೋ ಅಞ್ಞತರಸ್ಮಿಂ ಪದೇಸೇ ಸಿತಂ ಪಾತ್ವಾಕಾಸಿ, ಕೋ ನು ಖೋ ಆವುಸೋ ಮೋಗ್ಗಲ್ಲಾನ ಹೇತು, ಕೋ ಪಚ್ಚಯೋ ಸಿತಸ್ಸ ಪಾತುಕಮ್ಮಾಯಾ’’ತಿ। ಆಯಸ್ಮಾ ಚ ಭನ್ತೇ ಮಹಾಮೋಗ್ಗಲ್ಲಾನೋ ‘‘ಇಧಾಹಂ ಆವುಸೋ ಗಿಜ್ಝಕೂಟಾ ಪಬ್ಬತಾ ಓರೋಹನ್ತೋ ಅದ್ದಸಂ ಅಟ್ಠಿಕಸಙ್ಖಲಿಕಂ ವೇಹಾಸಂ ಗಚ್ಛನ್ತಿಂ’’ತಿ ಏವಮಾದಿನಾ ಆರೋಚೇಸಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಚಕ್ಖುಭೂತಾ ವತ ಭಿಕ್ಖವೇ ಸಾವಕಾ ವಿಹರನ್ತಿ, ಞಾಣಭೂತಾ ವತ ಭಿಕ್ಖವೇ ಸಾವಕಾ ವಿಹರನ್ತಿ, ಯತ್ರಹಿ ನಾಮ ಸಾವಕೋ ಏವರೂಪಂ ಞಸ್ಸತಿ ವಾ ದಕ್ಖತಿ ವಾ ಸಕ್ಖಿಂ ವಾ ಕರಿಸ್ಸತೀ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಅಚ್ಛರಿಯಂ ವತ ಭೋ, ಅಬ್ಭುತಂ ವತ ಭೋ।

ಏವರೂಪೋಪಿ ನಾಮ ಸತ್ತೋ ಭವಿಸ್ಸತಿ॥

ಪಿಣ್ಡಸುತ್ತ

ಪುಚ್ಛಾ – ತೇನಾವುಸೋ ಜಾನತಾ…ಪೇ॰… ಸಮ್ಮಾಸಮ್ಬುದ್ಧೇನ ಲಕ್ಖಣಸಂಯುತ್ತೇ ತತಿಯಂ ಸಂಗೀತಂ ಪಿಣ್ಡಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಆಯಸ್ಮನ್ತಞ್ಚ ಲಕ್ಖಣಂ ಆಯಸ್ಮನ್ತಞ್ಚ ಮಹಾಮೋಗ್ಗಲ್ಲಾನಂ ಆರಬ್ಭ ಭಾಸಿತಂ। ಆಯಸ್ಮಾ ಭನ್ತೇ ಲಕ್ಖಣೋ ಭಗ್ಗವತೋ ಸಮ್ಮುಖೇ ಆಯಸ್ಮನ್ತಂ ಮಹಾಮೋಗ್ಗಲ್ಲಾನಂ ಏತದವೋಚ ‘‘ಇಧಾಯಸ್ಮಾ ಮಹಾಮೋಗ್ಗಲ್ಲಾನೋ ಗಿಜ್ಝಕೂಟಾ ಪಬ್ಬತಾ ಓರೋಹನ್ತೋ ಅಞ್ಞತರಸ್ಮಿಂ ಪದೇಸೇ ಸಿತಂ ಪಾತ್ವಾಕಾಸಿ , ಕೋ ನುಖೋ ಆವುಸೋ ಮೋಗ್ಗಲ್ಲಾನಹೇತು, ಕೋ ಪಚ್ಚಯೋ ಸಿತಸ್ಸ ಪಾತುಕಮ್ಮಾಯಾ’’ತಿ। ಆಯಸ್ಮಾ ಚ ಭನ್ತೇ ಮಹಾಮೋಗ್ಗಲ್ಲಾನೋ ‘‘ಇಧಾಹಂ ಆವುಸೋ ಗಿಜ್ಝಕೂಟಾ ಪಬ್ಬತಾ ಓರೋಹನ್ತೋ ಅದ್ದಸಂ ಮಂಸಪಿಣ್ಡಂ ವೇಹಾಸಂ ಗಚ್ಛನ್ತಂ, ತಮೇನಂ ಗಿಜ್ಝಾಪಿ ಕಾಕಾಪಿ ಕುಲಲಾಪಿ ಅನುಪತಿತ್ವಾ ಅನುಪತಿತ್ವಾ ವಿತಚ್ಛೇನ್ತಿ ವಿರಾಜೇನ್ತಿ। ಸಾ ಸುದಂ ಅಟ್ಟಸ್ಸರಂ ಕರೋತೀ’’ತಿ ಏವಮಾದಿನಾ ಆರೋಚೇಸಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಚಕ್ಖುಭೂತಾ ವತ ಭಿಕ್ಖವೇ ಸಾವಕಾ ವಿಹರನ್ತಿ, ಞಾಣಭೂತಾ ವತ ಭಿಕ್ಖವೇ ಸಾವಕಾ ವಿಹರನ್ತಿ, ಯತ್ರಹಿ ನಾಮ ಸಾವಕೋ ಏವರೂಪಂ ಞಸ್ಸತಿ ವಾ ದಕ್ಖತಿ ವಾ ಸಕ್ಖಿಂ ವಾ ಕರಿಸ್ಸತೀ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಅಸಿಲೋಮಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕೇಹಿ ಮಹಾಥೇರೇಹಿ ಸಂಗೀತಂ ಅಸಿಲೋಮಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಆಯಸ್ಮನ್ತಞ್ಚ ಲಕ್ಖಣಂ ಆಯಸ್ಮನ್ತಞ್ಚ ಮಹಾಮೋಗ್ಗಲ್ಲಾನಂ ಆರಬ್ಭ ಭಾಸಿತಂ। ಆಯಸ್ಮಾ ಭನ್ತೇ ಲಕ್ಖಣೋ ಭಗವತೋ ಸಮ್ಮುಖೇ ಆಯಸ್ಮನ್ತಂ ಮಹಾಮೋಗ್ಗಲ್ಲಾನಂ ಏತದವೋಚ ‘‘ಕೋ ನು ಖೋ ಆವುಸೋ ಮೋಗ್ಗಲ್ಲಾನ ಹೇತು, ಕೋ ಪಚ್ಚಯೋ ಸಿತಸ್ಸ ಪಾತುಕಮ್ಮಾಯಾ’’ತಿ। ಆಯಸ್ಮಾ ಚ ಭನ್ತೇ ಮಹಾಮೋಗ್ಗಲ್ಲಾನತ್ಥೇರೋ ‘‘ಇಧಾಹಂ ಆವುಸೋ ಗಿಜ್ಝಕೂಟಾ ಪಬ್ಬತಾ ಓರೋಹನ್ತೋ ಅದ್ದಸಂ ಅಸಿಲೋಮಂ ವೇಹಾಸಂ ಗಚ್ಛನ್ತಂ’’ತಿ ಏವಮಾದಿನಾ ಆರೋಚೇಸಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ಚಕ್ಖುಭೂತಾ ವತ ಭಿಕ್ಖವೇ ಸಾವಕಾ ವಿಹರನ್ತಿ, ಞಾಣಭೂತಾ ವತ ಭಿಕ್ಖವೇ ಸಾವಕಾ ವಿಹರನ್ತಿ। (ಪೇಯ್ಯಾಲ) ಏಸೋ ಭಿಕ್ಖವೇ ಸತ್ತೋ ಇಮಸ್ಮಿಂಯೇವ ರಾಜಗಹೇ ಸೂಕರಿಕೋ ಅಹೋಸೀ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಸೂಚಿಲೋಮಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಸಂಗೀತಂ ಸೂಚಿಲೋಮಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ತತ್ಥೇವ ಭನ್ತೇ ರಾಜಗಹೇ ಆಯಸ್ಮನ್ತಞ್ಚ ಲಕ್ಖಣಂ ಆಯಸ್ಮನ್ತಞ್ಚ ಮಹಾಮೋಗ್ಗಲ್ಲಾನಂ ಆರಬ್ಭ ಭಾಸಿತಂ। ಆಯಸ್ಮಾ ಭನ್ತೇ ಲಕ್ಖಣೋ ಭಗವತೋ ಸಮ್ಮುಖೇ ತಥೇವ ಅವೋಚ।

ಆಯಸ್ಮಾ ಚ ಭನ್ತೇ ಮಹಾಮೋಗ್ಗಲ್ಲಾನೋ ತಥೇವ ಆರೋಚೇಸಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಚಕ್ಖುಭೂತಾ ವತ ಭಿಕ್ಖವೇ ಸಾವಕಾ ವಿಹರನ್ತಿ, ಞಾಣಭೂತಾ ವತ ಭಿಕ್ಖವೇ ಸಾವಕಾ ವಿಹರನ್ತಿ, (ಪೇಯ್ಯಾಲ) ಏಸೋ ಭಿಕ್ಖವೇ ಸತ್ತೋ ಇಮಸ್ಮಿಂಯೇವ ರಾಜಗಹೇ ಸೂತೋ ಅಹೋಸೀ’’ತಿ ಏವಮಾದಿನಾ ಭಗವತಾ ಭಾಸಿತಾ।

ಪಾಪಭಿಕ್ಖುಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಸಂಗೀತಾನಿ ಪಾಪಭಿಕ್ಖುಸುತ್ತಾದೀನಿ ಪಞ್ಚಸುತ್ತಾನಿ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಾನಿ।

ವಿಸ್ಸಜ್ಜನಾ – ರಾಜಗಹೇ ಆಯಸ್ಮನ್ತಞ್ಚ ಲಕ್ಖಣಂ ಆಯಸ್ಮನ್ತಞ್ಚ ಮಹಾಮೋಗ್ಗಲ್ಲಾನಂ ಆರಬ್ಭ ಭಾಸಿತಾನಿ। ಆಯಸ್ಮಾ ಭನ್ತೇ ಲಕ್ಖಣೋ ಭಗವತೋ ಸಮ್ಮುಖೇ ಪುಬ್ಬೇ ವುತ್ತನಯೇನೇವ ಆರೋಚೇಸಿ। ಆಯಸ್ಮಾ ಚ ಭನ್ತೇ ಮಹಾಮೋಗ್ಗಲ್ಲಾನೋ ‘‘ಇಧಾಹಂ ಆವುಸೋ ಗಿಜ್ಝಕೂಟಾ ಪಬ್ಬತಾ ಓರೋಹನ್ತೋ ಅದ್ದಸಂ ಭಿಕ್ಖುಂ ವೇಹಾಸಂ ಗಚ್ಛನ್ತಂ। ಅದ್ದಸಂ ಭಿಕ್ಖುನಿಂ ವೇಹಾಸಂ ಗಚ್ಛನ್ತಿಂ। ಅದ್ದಸಂ ಸಿಕ್ಖಮಾನಂ ವೇಹಾಸಂ ಗಚ್ಛನ್ತಿಂ। ಅದ್ದಸಂ ಸಾಮಣೇರಂ ವೇಹಾಸಂ ಗಚ್ಛನ್ತಂ। ಅದ್ದಸಂ ಸಾಮಣೇರಿಂ ವೇಹಾಸಂ ಗಚ್ಛನ್ತಿಂ। ತಸ್ಸಾ ಸಙ್ಘಾಟಿಪಿ ಆದಿತ್ತಾ ಸಮ್ಪಜ್ಜಲಿತಾ ಸಜೋತಿಭೂತಾ, ಪತ್ತೋಪಿ ಆದಿತ್ತೋ ಸಮ್ಪಜ್ಜಲಿತೋ ಸಜೋತಿಭೂತೋ, ಕಾಯಬನ್ಧನಮ್ಪಿ ಆದಿತ್ತಂ ಸಮ್ಪಜ್ಜಲಿತಂ ಸಜೋತಿಭೂತಂ , ಕಾಯೋಪಿ ಆದಿತ್ತೋ ಸಮ್ಪಜ್ಜಲಿತೋ ಸಜೋತಿಭೂತೋ, ಸಾ ಸುದಂ ಅಟ್ಟಸ್ಸರಂ ಕರೋತೀ’’ತಿ ಏವಮಾದಿನಾ ಆರೋಚೇಸಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಚಕ್ಖುಭೂತಾ ವತ ಭಿಕ್ಖವೇ ಸಾವಕಾ ವಿಹರನ್ತಿ ಞಾಣಭೂತಾ ವತ ಭಿಕ್ಖವೇ ಸಾವಕಾ ವಿಹರನ್ತಿ। (ಪೇಯ್ಯಾಲ)। ಏಸೋ ಭಿಕ್ಖವೇ ಭಿಕ್ಖು ಕಸ್ಸಪಸ್ಸಸಮ್ಮಾಸಮ್ಬುದ್ಧಸ್ಸ ಪಾವಚನೇ ಪಾಪಭಿಕ್ಖು ಅಹೋಸಿ। ಏಸಾ ಭಿಕ್ಖವೇ ಭಿಕ್ಖುನೀ ಕಸ್ಸಪಸ್ಸ ಸಮ್ಮಾಸಮ್ಬುದ್ಧಸ್ಸ ಪಾವಚನೇ ಪಾಪಭಿಕ್ಖುನೀ ಅಹೋಸಿ। ಏಸಾ ಭಿಕ್ಖವೇ ಸಿಕ್ಖಮಾನಾ ಕಸ್ಸಪಸ್ಸ ಸಮ್ಮಾಸಮ್ಬುದ್ಧಸ್ಸ ಪಾವಚನೇ ಪಾಪಸಿಕ್ಖಮಾನಾ ಅಹೋಸಿ। ಏಸೋ ಭಿಕ್ಖವೇ ಸಾಮಣೇರೋ ಕಸ್ಸಪಸ್ಸಸಮ್ಮಾಸಮ್ಬುದ್ಧಸ್ಸ ಪಾವಚನೇ ಪಾಪಸಾಮಣೇರೋ ಅಹೋಸಿ। ಏಸಾ ಭಿಕ್ಖವೇ ಸಾಮಣೇರೀ ಕಸ್ಸಪಸ್ಸ ಸಮ್ಮಾಸಮ್ಬುದ್ಧಸ್ಸ ಪಾವಚನೇ ಪಾಪಸಾಮಣೇರೀ ಅಹೋಸೀ’’ತಿ ಏವಮಾದಿನಾ ಭಗವತಾ ಭಾಸಿತಾನಿ।

ಓಪಮ್ಮಸಂಯುತ್ತ

ನಖಸಿಖಸುತ್ತ

ಪುಚ್ಛಾ – ಓಪಮ್ಮಸಂಯುತ್ತೇ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಸಂಗೀತಂ ನಖಸಿಖಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ತಂ ಕಿಂ ಮಞ್ಞಥ ಭಿಕ್ಖವೇ, ಕತಮಂ ನು ಖೋ ಬಹುತರಂ, ಯೋ ಚಾಯಂ ಮಯಾ ಪರಿತ್ತೋ ನಖಸಿಖಾಯಂ ಪಂಸು ಆರೋಪಿತೋ, ಯಾ ಚಾಯಂ ಮಹಾಪಥವೀ’’ತಿ ಏವಮಾದಿನಾ ಭಗವತಾ ಭಾಸಿತಂ।

ತಂ ಕಿಂ ಮಞ್ಞಥ ಭಿಕ್ಖವೇ, ಕತಮಂ ನು ಖೋ ಬಹುತರಂ।

ತಸ್ಮಾತಿಹ ಭಿಕ್ಖವೇ ಏವಂ ಸಿಕ್ಖಿತಬ್ಬಂ।

ಆಣಿಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಸಂಗೀತಂ ಆಣಿಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂಯೇವ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಭೂತಪುಬ್ಬಂ ಭಿಕ್ಖವೇ ದಸಾರಹಾನಂ ಆನಕೋ ನಾಮ ಮುದಿಙ್ಗೋ ಅಹೋಸಿ, ತಸ್ಸ ದಸಾರಹಾ ಆನಕೇ ಘಟಿತೇ ಅಞ್ಞಂ ಆಣಿಂ ಓದಹಿಂಸು, ಅಹು ಖೋ ಸೋ ಭಿಕ್ಖವೇ ಸಮಯೋ ಯಂ ಆನಕಸ್ಸ ಮುದಿಙ್ಗಸ್ಸ ಪೋರಾಣಂ ಪೋಕ್ಖರಫಲಕಂ ಅನ್ತರಧಾಯಿ , ಆಣಿಸಙ್ಘಾಟೋವ ಅವಸಿಸ್ಸೀ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಭಿಕ್ಖುಸಂಯುತ್ತ

ನವಸುತ್ತ

ಪುಚ್ಛಾ – ಭಿಕ್ಖುಸಂಯುತ್ತೇ ಆವುಸೋ ಭಗವತಾ ನವಸುತ್ತಂ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅಞ್ಞತರಂ ನವಂ ಭಿಕ್ಖುಂ ಆರಬ್ಭ ಭಾಸಿತಂ। ಅಞ್ಞತರೋ ಭನ್ತೇ ನವೋ ಭಿಕ್ಖು ಪಚ್ಛಾಭತ್ತಂ ಪಿಣ್ಡಪಾತಪಟಿಕ್ಕನ್ತೋ ವಿಹಾರಂ ಪವಿಸಿತ್ವಾ ಅಪ್ಪೋಸುಕ್ಕೋ ತುಣ್ಹೀಭೂತೋ ಸಙ್ಕಸಾಯಭಿ, ನ ಭಿಕ್ಖೂನಂ ವೇಯ್ಯಾವಚ್ಚಂ ಕರೋತಿ ಚೀವರಕಾರಸಮಯೇ ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಮಾ ಖೋ ತುಮ್ಹೇ ಭಿಕ್ಖವೇ ಏತಸ್ಸ ಭಿಕ್ಖುನೋ ಉಜ್ಝಾಯಿತ್ಥಾ ಏಸೋ ಖೋ ಭಿಕ್ಖವೇ ಭಿಕ್ಖು ಚತುನ್ನಂ ಝಾನಾನಂ ಆಭಿಚೇತಸಿಕಾನಂ ದಿಟ್ಠಧಮ್ಮ ಸುಖವಿಹಾರಾನಂ ನಿಕಾಮಲಾಭೀ ಅಕಿಚ್ಛಲಾಭೀ ಅಕಸಿರಲಾಭೀ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಅಹಮ್ಪಿ ಖೋ ಭನ್ತೇ ಸಕಂ ಕಿಚ್ಚಂ ಕರೋಮಿ,

ಏಸೋ ಖೋ ಭಿಕ್ಖವೇ ಭಿಕ್ಖು ಚತುನ್ನಂ ಝಾನಾನಂ ಆಭಿಚೇತಸಿಕಾನಂ ದಿಟ್ಠಧಮ್ಮಸುಖವಿಹಾರಾನಂ ನಿಕಾಮಲಾಭೀ ಅಕಿಚ್ಛಲಾಭೀ ಅಕಸಿರಲಾಭೀ –

ನಯಿದಂ ಸಿಥಿಲಮಾರಬ್ಭ, ನಯಿದಂ ಅಪ್ಪೇನ ಥಾಮಸಾ।

ನಿಬ್ಬಾನಂ ಅಧಿಗನ್ತಬ್ಬಂ, ಸಬ್ಬದುಕ್ಖಪ್ಪಮೋಚನಂ।

ಅಯಞ್ಚ ದಹರೋ ಭಿಕ್ಖು, ಅಯಮುತ್ತಮಪುರಿಸೋ।

ಧಾರೇತಿ ಅನ್ತಿಮಂ ದೇಹಂ, ಜೇತ್ವಾ ಮಾರಂ ಸವಾಹಿನಿಂ–