ಮಹಾವಗ್ಗಸಂಯುತ್ತಪಾಳಿ

ಅವಿಜ್ಜಾವಗ್ಗ

ಉಪಡ್ಢಸುತ್ತ

ಪುಚ್ಛಾ – ಮಹಾವಗ್ಗಸಂಯುತ್ತೇ ಪನಾವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ದುತಿಯಂ ಸಂಗೀತಂ ಉಪಡ್ಢಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಕ್ಕೇಸು ಭನ್ತೇ ಸಕ್ಕರೇ ನಾಮ ಸಕ್ಯಾನಂ ನಿಗಮೇ ಆಯಸ್ಮನ್ತಂ ಆನನ್ದತ್ಥೇರಂ ಆರಬ್ಭ ಭಾಸಿತಂ। ಆಯಸ್ಮಾ ಭನ್ತೇ ಆನನ್ದತ್ಥೇರೋ ಭಗವನ್ತಂ ಏತದವೋಚ ‘‘ಉಪಡ್ಢಮಿದಂ ಭನ್ತೇ ಬ್ರಹ್ಮಚರಿಯಂ ಯದಿದಂ ಕಲ್ಯಾಣಮಿತ್ತತಾ ಕಲ್ಯಾಣಸಹಾಯತಾ ಕಲ್ಯಾಣಸಮ್ಪವಙ್ಕತಾ’’ತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಮಾ ಹೇವಂ ಆನನ್ದ, ಮಾ ಹೇವಂ ಆನನ್ದ, ಸಕಲಮೇವಿದಂ ಆನನ್ದ ಬ್ರಹ್ಮಚರಿಯಂ ಯದಿದಂ ಕಲ್ಯಾಣಮಿತ್ತತಾ ಕಲ್ಯಾಣಸಹಾಯತಾ ಕಲ್ಯಾಣಸಮ್ಪವಙ್ಕತಾ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಮಮಂ ಹಿ ಆನನ್ದ ಕಲ್ಯಾಣಮಿತ್ತಂ ಆಗಮ್ಮ ಜಾತಿಧಮ್ಮಾ ಸತ್ತಾ ಜಾತಿಯಾ ಪರಿಮುಚ್ಚನ್ತಿ।

ಬೋಜ್ಝಙ್ಗಸಂಯುತ್ತ

ಕುಣ್ಡಲಿಯಸುತ್ತ

ಪುಚ್ಛಾ – ಬೋಜ್ಝಙ್ಗಸಂಯುತ್ತೇ ಪನಾವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಛಟ್ಠಂ ಸಂಗೀತಂ ಕುಣ್ಡಲಿಯಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾಕೇತೇ ಭನ್ತೇ ಅಞ್ಜನವನೇ ಮಿಗದಾಯೇ ಕುಣ್ಡಲಿಯಂ ಪರಿಬ್ಬಾಜಕಂ ಆರಬ್ಭ ಭಾಸಿತಂ। ಕುಣ್ಡಲಿಯೋ ಭನ್ತೇ ಪರಿಬ್ಬಾಜಕೋ ಭಗವನ್ತಂ ಉಪಸಙ್ಕಮಿತ್ವಾ ‘‘ಅಹಮಸ್ಮಿ ಭೋ ಗೋತಮ ಆರಾಮನಿಸ್ಸಯೀ ಪರಿಸಾವಚರೋ, ತಸ್ಸ ಮಯ್ಹಂ ಭೋ ಗೋತಮ ಪಚ್ಛಾಭತ್ತಂ ಭುತ್ತಪಾತರಾಸಸ್ಸ ಅಯಮಾಚಾರೋ ಹೋತಿ ಆರಾಮೇನ ಆರಾಮಂ ಉಯ್ಯಾನೇನ ಉಯ್ಯಾನಂ ಅನುಚಙ್ಕಮಾಮಿ ಅನುವಿಚರಾಮಿ, ಸೋ ತತ್ಥ ಪಸ್ಸಾಮಿ ಏಕೇ ಸಮಣಬ್ರಾಹ್ಮಣೇ ಇತಿವಾದಪ್ಪಮೋಕ್ಖಾನಿಸಂಸಞ್ಚೇವ ಕಥಂ ಕಥನ್ತೇ ಉಪಾರಮ್ಭಾನಿಸಂಸಞ್ಚ, ಭವಂ ಪನ ಗೋತಮೋ ಕಿಮಾನಿಸಂಸೋ ವಿಹರತೀ’’ತಿ ಏತಂ ವಚನಂ ಅವೋಚ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ವಿಜ್ಜಾವಿಮುತ್ತಿಫಲಾನಿಸಂಸೋ ಖೋ ಕುಣ್ಡಲಿಯ ತಥಾಗತೋ ವಿಹರತೀ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಪಠಮ ಗಿಲಾನಸುತ್ತ

ಪುಚ್ಛಾ – ತೇನಾವುಸೋ ಭಗವ್ವತಾ ಜಾನತಾ…ಪೇ॰… ಸಮ್ಮಾಸಮ್ಬುದ್ಧೇನ ಬೋಜ್ಝಙ್ಗಸಂಯುತ್ತೇ ದುತಿಯೇ ಗಿಲಾನವಗ್ಗೇ ಪಠಮಗಿಲಾನಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಪಿಪ್ಪಲಿಗುಹಾಯಂ ಆಯಸ್ಮನ್ತಂ ಮಹಾಕಸ್ಸಪತ್ಥೇರಂ ಆರಬ್ಭ ಭಾಸಿತಂ। ಆಯಸ್ಮಾ ಭನ್ತೇ ಮಹಾಕಸ್ಸಪತ್ಥೇರೋ ಪಿಪ್ಪಲಿಗುಹಾಯಂ ವಿಹರತಿ ಆಬಾಧಿಕೋ ದುಕ್ಖಿತೋ ಬಾಳ್ಹಗಿಲಾನೋ। ಅಥ ಖೋ ಭನ್ತೇ ಭಗವಾ ಸಾಯನ್ಹಸಮಯಂ ಪಟಿಸಲ್ಲಾನಾ ವುಟ್ಠಿತೋ ಯೇನಾಯಸ್ಮಾ ಮಹಾಕಸ್ಸಪೋ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಪಞ್ಞತ್ತೇ ಆಸನೇ ನಿಸೀದಿ, ನಿಸಜ್ಜ ಖೋ ಭಗವಾ ಆಯಸ್ಮನ್ತಂ ಮಹಾಕಸ್ಸಪಂ ಏತದವೋಚ– ‘‘ಕಚ್ಚಿ ತೇ ಕಸ್ಸಪ ಖಮನೀಯಂ, ಕಚ್ಚಿ ಯಾಪನೀಯಂ, ಕಚ್ಚಿ ದುಕ್ಖಾ ವೇದನಾ ಪಟಿಕ್ಕಮನ್ತಿ ನೋ ಅಭಿಕ್ಕಮನ್ತಿ, ಪಟಿಕ್ಕಮೋಸಾನಂ ಪಞ್ಞಾಯತಿ ನೋ ಅಭಿಕ್ಕಮೋತಿ। ನ ಮೇ ಭನ್ತೇ ಖಮನೀಯಂ ನ ಯಾಪನೀಯಂ, ಬಾಳ್ಹಾ ಮೇ ದುಕ್ಖಾ ವೇದನಾ ಅಭಿಕ್ಕಮನ್ತಿ ನೋ ಪಟಿಕ್ಕಮನ್ತಿ, ಅಭಿಕ್ಕಮೋಸಾನಂ ಪಞ್ಞಾಯತಿ ನೋ ಪಟಿಕ್ಕಮೋ’’ತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಸತ್ತಿಮೇ ಕಸ್ಸಪ ಬೋಜ್ಝಙ್ಗಾ ಮಯಾ ಸಮ್ಮದಕ್ಖಾತಾ ಭಾವಿತಾ ಬಹುಲೀಕತಾ ಅಭಿಞ್ಞಾಯ ಸಮ್ಬೋಧಾಯ ನಿಬ್ಬಾನಾಯ ಸಂವತ್ತನ್ತೀ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಉದಾಯಿಸುತ್ತ

ಪುಚ್ಛಾ – ತತ್ಥೇವ ಆವುಸೋ ತತಿಯೇ ಉದಾಯಿವಗ್ಗೇ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ದಸಮಂ ಸಂಗೀತಂ ಉದಾಯಿಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸುಮ್ಭೇಸು ಭನ್ತೇ ಸೇತಕೇನಾಮ ಸುಮ್ಭಾನಂ ನಿಗಮೇ ಆಯಸ್ಮನ್ತಂ ಉದಾಯಿತ್ಥೇರಂ ಆರಬ್ಭ ಭಾಸಿತಂ। ಆಯಸ್ಮಾ ಭನ್ತೇ ಉದಾಯಿತ್ಥೇರೋ ಭಗವನ್ತಂ ಉಪಸಙ್ಕಮಿತ್ವಾ ‘‘ಅಚ್ಛರಿಯಂ ಭನ್ತೇ, ಅಬ್ಭುತಂ ಭನ್ತೇ, ಯಾವ ಬಹುಕತಞ್ಚ ಮೇ ಭನ್ತೇ ಭಗವತಿ ಪೇಮಞ್ಚ ಗಾರವೋ ಚ ಹಿರೀ ಚ ಓತ್ತಪ್ಪಞ್ಚಾತಿ ಏವಮಾದಿಕಂ ವಚನಂ ಅವೋಚ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಸಾಧು ಸಾಧು ಉದಾಯಿ ಏಸೋ ಹಿ ತೇ ಉದಾಯಿ ಮಗ್ಗೋ ಪಟಿಲದ್ಧೋ। ಯೋ ತೇ ಭಾವಿತೋ ಬಹುಲೀಕತೋ, ತಥಾ ತಥಾ ವಿಹರನ್ತಂ ತಥತ್ತಾಯ ಉಪನೇಸ್ಸತಿ, ಯಥಾ ತ್ವಂ ‘ಖೀಣಾ ಜಾತಿ, ವುಸಿತಂ ಬ್ರಹ್ಮಚರಿಯಂ, ಕತಂ ಕರಣೀಯಂ, ನಾಪರಂ ಇತ್ಥತ್ತಾಯಾ’ತಿ ಪಜಾನಿಸ್ಸತೀ’’ತಿ। ಏವಂ ಖೋ ಭಗವತಾ ಭಾಸಿತಂ।

ಸತಿಪಟ್ಠಾನಸಂಯುತ್ತ

ಸತಿಸುತ್ತ

ಪುಚ್ಛಾ – ಸತಿಪಟ್ಠಾನಸಂಯುತ್ತೇ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕ ಮಹಾಥೇರೇಹಿ ದುತಿಯಂ ಸಂಗೀತಂ ಸತಿಸುತ್ತಂ ಭಗವತಾ ಕತ್ಥ ಕಂ ಕಾರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ಅಮ್ಬಪಾಲಿವನೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಸತೋ ಭಿಕ್ಖವೇ ಭಿಕ್ಖು ವಿಹರೇಯ್ಯ ಸಮ್ಪಜಾನೋ ಅಯಂ ವೋ ಅಮ್ಹಾಕಂ ಅನುಸಾಸನೀ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಸಾಲಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಚತುತ್ಥಂ ಸಂಗೀತಂ ಸಾಲಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಕೋಸಲೇಸು ಭನ್ತೇ ಸಾಲಾಯನಾಮ ಕೇಸಲಾನಂ ಬ್ರಾಹ್ಮಣಗಾಮೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಯೇ ತೇ ಭಿಕ್ಖವೇ ಭಿಕ್ಖೂ ನವಾ ಅಚಿರಪಬ್ಬಜಿತಾ ಅಧುನಾಗತಾ ಇಮಂ ಧಮ್ಮವಿನಯಂ, ತೇ ವೋ ಭಿಕ್ಖವೇ ಭಿಕ್ಖೂ ಚತುನ್ನಂ ಸತಿಪಟ್ಠಾನಾನಂ ಭಾವನಾಯ ಸಮಾದಪೇತಬ್ಬಾ ನಿವೇಸೇತಬ್ಬಾ ಪತಿಟ್ಠಾಪೇತಬ್ಬಾ’’ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ।

ಸಕುಣಗ್ಘಿಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಛಟ್ಠಂ ಸಂಗೀತಂ ಸಕುಣಗ್ಘಿಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಭೂತಪುಬ್ಬಂ ಭಿಕ್ಖವೇ ಸಕುಣಗ್ಘಿ ಲಾಪಂ ಸಕುಣಂ ಸಹಸಾ ಅಜ್ಝಪ್ಪತ್ತಾ ಅಗ್ಗಹೇಸಿ। ಅಥ ಖೋ ಭಿಕ್ಖವೇ ಲಾಪೋ ಸಕುಣೋ ಸಕುಣಗ್ಘಿಯಾ ಹರಿಯಮಾನೋ ಏವಂ ಪರಿದೇವಸಿ ಮಯಮೇವಮ್ಹ ಅಲಕ್ಖಿಕಾ, ಮಯಂ ಅಪ್ಪಪುಞ್ಞಾ, ಯೇ ಮಯಂ ಅಗೋಚರೇ ಚರಿಮ್ಹ ಪರವಿಸಯೇ, ಸಚೇಜ್ಜ ಮಯಂ ಗೋಚರೇ ಚರೇಯ್ಯಾಮ ಸಕೇ ಪೇತ್ತಿಕೇ ವಿಸಯೇ, ನ ಮ್ಯಾಹಂ ಸಕುಣಗ್ಘಿ ಅಲಂ ಅಭವಿಸ್ಸ ಯದಿದಂ ಯುದ್ಧಾಯಾ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಮಯಮೇವಮ್ಹ ಅಲಕ್ಖಿಕಾ, ಮಯಂ ಅಪ್ಪಪುಞ್ಞಾ।

ಕೋ ಪನ ತೇ ಲಾಪ ಗೋಚರೋ ಸಕೋ ಪೇತ್ತಿಕೋ ವಿಸಯೋ।

ಯದಿದಂ ನಙ್ಗಲಕಟ್ಠಕರಣಂ ಲೇಡ್ಡುಟ್ಠಾನಂ।

ಏಹಿ ಖೋ ದಾನಿ ಮೇ ಸಕುಣಗ್ಘಿ, ಏಹಿ ಖೋ ದಾನಿ ಮೇ ಸಕುಣಗ್ಘಿ,

(ದಾರುಗುಳೋವಿಯ ವಿನಿವತ್ತಿತ್ವಾ ತಸ್ಸೇವ ಲೇಡ್ಡುಸ್ಸ ಅನ್ತರೇ ಪಚ್ಚುಪಾದಿ। ಅಟ್ಠಕಥಾ)

ಏವಞ್ಹಿ ತಂ ಭಿಕ್ಖವೇ ಹೋತಿ ಯೋ ಅಗೋಚರೇ ಚರತಿ ಪರವಿಸಯೇ।

ತಸ್ಮಾತಿಹ ಭಿಕ್ಖವೇ ಮಾ ಅಗೋಚರೇ ಚರಿತ್ಥ ಪರವಿಸಯೇ।

ಗೋಚರೇ ಭಿಕ್ಖವೇ ಚರಥ ಸಕೇ ಪೇತ್ತಿಕೇ ವಿಸಯೇ।

ಗೋಚರೇ ಭಿಕ್ಖವೇ ಚರತಂ ಸಕೇ ಪೇತ್ತಿಕೇ ವಿಸಯೇ ನ ಲಚ್ಛತಿ ಮಾರೋ ಓತಾರಂ, ನ ಲಚ್ಛತಿ ಮಾರೋ ಆರಮ್ಮಣಂ।

ಭಿಕ್ಖುನುಪಸ್ಸಯಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ದಸಮಂ ಸಂಗೀತಂ ಭಿಕ್ಖುನುಪಸ್ಸಯಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಆನನ್ದತ್ಥೇರಂ ಆರಬ್ಭ ಭಾಸಿತಂ। ಆಯಸ್ಮಾ ಭನ್ತೇ ಆನನ್ದೋ ಯಾವತ್ತಕೋ ಅಹೋಸಿ ಭಿಕ್ಖುನೀಹಿ ಸದ್ಧಿಂ ಕಥಾಸಲ್ಲಾಪೋ ತಂ ಸಬ್ಬಂ ಭಗವತೋ ಆರೋಚೇಸಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಏವಮೇತಂ ಆನನ್ದ, ಏವಮೇತಂ ಆನನ್ದ, ಯೋಹಿ ಕೋಚಿ ಆನನ್ದ ಭಿಕ್ಖು ವಾ ಭಿಕ್ಖುನೀ ವಾ ಚತೂಸು ಸತಿಪಟ್ಠಾನೇಸು ಸುಪ್ಪತಿಟ್ಠಿತಚಿತ್ತೋ ವಿಹರತಿ, ತಸ್ಸೇತಂ ಪಾಟಿಕಙ್ಖಂ ಉಳಾರಂ ಪುಬ್ಬೇನಾಪರಂ ವಿಸೇಸಂ ಸಞ್ಜಾನಿಸ್ಸತೀ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಚುನ್ದಸುತ್ತ

ಪುಚ್ಛಾ – ತತ್ಥೇವ ಆವುಸೋ ದುತಿಯೇ ನಾಲನ್ದವಗ್ಗೇ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ತತಿಯಂ ಸಂಗೀತಂ ಚುನ್ದಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂಯೇವ ಆನನ್ದತ್ಥೇರಂ ಆರಬ್ಭ ಭಾಸಿತಂ। ಆಯಸ್ಮಾ ಭನ್ತೇ ಆನನ್ದತ್ಥೇರೋ ಚುನ್ದೇನ ಸಮಣುದ್ದೇಸೇನ ಸದ್ಧಿಂ ಯೇನ ಭಗವಾ ತೇನುಪಸಙ್ಕಮಿ। ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನೋ ಖೋ ಭನ್ತೇ ಆಯಸ್ಮಾ ಆನನ್ದೋ ಭಗವನ್ತಂ ಏತದವೋಚ ‘‘ಅಯಂ ಭನ್ತೇ ಚುನ್ದೋ ಸಮಣುದ್ದೇಸೋ ಏವಮಾಹ ‘ಆಯಸ್ಮಾ ಭನ್ತೇ ಸಾರಿಪುತ್ತೋ ಪರಿನಿಬ್ಬುತೋ, ಇದಮಸ್ಸ ಪತ್ತಚೀವರ’ನ್ತಿ। ಅಪಿ ಚ ಮೇ ಭನ್ತೇ ಮಧುರಕಜಾತೋ ವಿಯ ಕಾಯೋ, ದಿಸಾಪಿ ಮೇ ನ ಪಕ್ಖಾಯನ್ತಿ, ಧಮ್ಮಾಪಿ ಮಂ ನಪ್ಪಟಿಭನ್ತಿ ‘ಆಯಸ್ಮಾ ಸಾರಿಪುತ್ತೋ ಪರಿನಿಬ್ಬುತೋ’ತಿ ಸುತ್ವಾ’’ತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಕಿಂ ನು ಖೋ ತೇ ಆನನ್ದ ಸಾರಿಪುತ್ತೋ ಸೀಲಕ್ಖನ್ಧಂ ವಾ ಆದಾಯ ಪರಿನಿಬ್ಬುತೋ, ಸಮಾಧಿಕ್ಖನ್ಧಂ ವಾ, ಪಞ್ಞಾಕ್ಖನ್ಧಂವಾ, ವಿಮುತ್ತಿಕ್ಖನ್ಧಂವಾ, ವಿಮುತ್ತಿಞಾಣದಸ್ಸನಕ್ಖನ್ಧಂ ವಾ ಆದಾಯ ಪರಿನಿಬ್ಬುತೋ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಅಯಂ ಭನ್ತೇ ಚುನ್ದೋಸಮಣುದ್ದೇಸೋ ಏವಮಾಹ।

ತಸ್ಮಾತಿಹಾನನ್ದ ಅತ್ತದೀಪಾ ವಿಹರಥ ಅತ್ತಸರಣಾ ಅನಞ್ಞಸರಣಾ ಧಮ್ಮದೀಪಾ ಧಮ್ಮಸರಣಾ ಅನಞ್ಞಸರಣಾ।

ಬಾಹಿಯಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಪಞ್ಚಮಂ ಸಂಗೀತಂ ಬಾಹಿಯಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಆಯಸ್ಮನ್ತಂ ಬಾಹಿಯಂ ಆರಬ್ಭ ಭಾಸಿತಂ। ಆಯಸ್ಮಾ ಭನ್ತೇ ಬಾಹಿಯೋ ಭಗವನ್ತಂ ಏತದವೋಚ ‘‘ಸಾಧು ಮೇ ಭನ್ತೇ ಭಗವಾ ಸಂಖಿತ್ತೇನ ಧಮ್ಮಂ ದೇಸೇತು, ಯಮಹಂ ಭಗವತೋ ಧಮ್ಮಂ ಸುತ್ವಾ ಏಕೋ ವೂಪಕಟ್ಠೋ ಅಪ್ಪಮತ್ತೋ ಆತಾಪೀ ಪಹಿತತ್ತೋ ವಿಹರೇಯ್ಯ’’ನ್ತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ತಸ್ಮಾತಿಹ ತ್ವಂ ಬಾಹಿಯ ಆದಿಮೇವ ವಿಸೋಧೇಹಿ ಕುಸಲೇಸು ಧಮ್ಮೇಸು। ಕೋ ಚಾದಿಕುಸಲಾನಂ ಧಮ್ಮಾನಂ, ಸೀಲಞ್ಚ ಸುವಿಸುದ್ಧಂ ದಿಟ್ಠಿಚ ಉಜುಕಾ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಸೀಲಟ್ಠಿತಿವಗ್ಗ

ಚಿರಟ್ಠಿತಿಸುತ್ತ

ಪುಚ್ಛಾ – ತತ್ಥೇವ ಆವುಸೋ ತತಿಯೇ ಸೀಲಟ್ಠಿತಿವಗ್ಗೇ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ದುತಿಯಂ ಸಂಗೀತಂ ಚಿರಟ್ಠಿತಿಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಪಾಟಲಿಪುತ್ತೇ ಭನ್ತೇ ಆಯಸ್ಮನ್ತಂ ಭದ್ದಂ ಆರಬ್ಭ ಆಯಸ್ಮತಾ ಆನನ್ದತ್ಥೇರೇನ ಧಮ್ಮಭಣ್ಡಾಗಾರಿಕೇನ ಭಾಸಿತಂ। ಆಯಸ್ಮಾ ಭನ್ತೇ ಭದ್ದೋ ಸಾಯನ್ಹಸಮಯಂ ಪಟಿಸಲ್ಲಾನಾ ವುಟ್ಠಿತೋ ಯೇನಾಯಸ್ಮಾ ಆನನ್ದೋ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಆಯಸ್ಮನ್ತಂ ಆನನ್ದಂ ಏತದವೋಚ ‘‘ಕೋ ನು ಖೋ ಆವುಸೋ ಆನನ್ದ ಹೇತು ಕೋ ಪಚ್ಚಯೋ, ಯೇನ ತಥಾಗತೇ ಪರಿನಿಬ್ಬುತೇ ಸದ್ಧಮ್ಮೋ ನ ಚಿರಟ್ಠಿತಿಕೋ ಹೋತಿ, ಕೋ ಪನಾವುಸೋ ಆನನ್ದ ಹೇತು ಕೋ ಪಚ್ಚಯೋ, ಯೇನ ತಥಾಗತೇ ಪರಿನಿಬ್ಬುತೇ ಸದ್ಧಮ್ಮೋ ಚಿರಟ್ಠಿತಿಕೋ ಹೋತೀ’’ತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಸಾಧು ಸಾಧು ಆವುಸೋ ಭದ್ದ, ಭದ್ದಕೋ ಖೋ ತೇ ಆವುಸೋ ಭದ್ದ ಉಮ್ಮಙ್ಗೋ’’ತಿ ಏವಮಾದಿನಾ ಆಯಸ್ಮತಾ ಆನನ್ದತ್ಥೇರೇನ ಧಮ್ಮಭಣ್ಡಾಗಾರಿಕೇನ ಭಾಸಿತಂ।

ಭದ್ದಕೋ ತೇ ಆವುಸೋ ಭದ್ದ ಉಮ್ಮಙ್ಗೋ।

‘‘ಚತುನ್ನಂ ಖೋ ಆವುಸೋ ಸತಿಪಟ್ಠಾನಾನಂ ಅಭಾವಿತತ್ತಾ ಅಬಹುಲೀಕತತ್ತಾ ತಥಾಗತೇ ಪರಿನಿಬ್ಬುತೇ ಸದ್ಧಮ್ಮೋ ನ ಚಿರಟ್ಠಿತಿಕೋ ಹೋತೀ’’ –

ಸಿರಿವಡ್ಢಸುತ್ತ

ಪುಚ್ಛಾ – ತಸ್ಸಾವುಸೋ ಭಗವತಾ ಅರಹತೋ ಸಮ್ಮಾಸಮ್ಬುದ್ಧಸ್ಸ ಪಾವಚನಸಮುದಯಭೂತಾಯ ಮಹಾವಗ್ಗಪಾಳಿಯಾ ಸತಿಪಟ್ಠಾನಸಂಯುತ್ತೇ ಸೀಲಟ್ಠಿತಿವಗ್ಗೇ ನವಮಂ ಸಿರಿವಡ್ಢಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ರಾಜಗಹೇ ಭನ್ತೇ ಸಿರಿವಡ್ಢಂ ಗಹಪತಿಂ ಆರಬ್ಭ ಆಯಸ್ಮತಾ ಆನನ್ದತ್ಥೇರೇನ ಧಮ್ಮಭಣ್ಡಾಗಾರಿಕೇನ ಭಾಸಿತಂ। ಸಿರಿವಡ್ಢೋ ಭನ್ತೇ ಗಹಪತಿ ಆಬಾಧಿಕೋ ಹೋತಿ ದುಕ್ಖಿತೋ ಬಾಳ್ಹಗಿಲಾನೋ। ಅಥಖೋ ಭನ್ತೇ ಆಯಸ್ಮಾ ಆನನ್ದೋ ಯೇನಸಿರಿವಡ್ಢಸ್ಸ ಗಹಪತಿಸ್ಸ ನಿವೇಸನಂ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಪಞ್ಞತ್ತೇ ಆಸನೇ ನಿಸೀದಿ । ನಿಸಜ್ಜ ಖೋ ಆಯಸ್ಮಾ ಆನನ್ದೋ ಸಿರಿವಡ್ಢಂ ಗಹಪತಿಂ ಏತದವೋಚ ‘‘ಕಚ್ಚಿ ತೇ ಗಹಪತಿ ಖಮನೀಯಂ, ಕಚ್ಚಿ ಯಾಪನೀಯಂ, ಕಚ್ಚಿ ದುಕ್ಖಾ ವೇದನಾ ಪಟಿಕ್ಕಮನ್ತಿ ನೋ ಅಭಿಕ್ಕಮನ್ತಿ, ಪಟಿಕ್ಕಮೋಸಾನಂ ಪಞ್ಞಾಯತಿ ನೋ ಅಭಿಕ್ಕಮೋ’’ತಿ। ನ ಮೇ ಭನ್ತೇ ಖಮನೀಯಂ, ನ ಯಾಪನೀಯಂ, ಬಾಳ್ಹಾ ಮೇ ದುಕ್ಖಾ ವೇದನಾ ಅಭಿಕ್ಕಮನ್ತಿ ನೋ ಪಟಿಕ್ಕಮನ್ತಿ, ಅಭಿಕ್ಕಮೋಸಾನಂ ಪಞ್ಞಾಯತಿ ನೋ ಪಟಿಕ್ಕಮೋ’’ತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ತಸ್ಮಾತಿಹ ತೇ ಗಹಪತಿ ಏವಂ ಸಿಕ್ಖಿತಬ್ಬಂ ‘ಕಾಯೇ ಕಾಯಾನುಪಸ್ಸೀ ವಿಹರಿಸ್ಸಾಮಿ ಆತಾಪೀ ಸಮ್ಪಜಾನೋ ಸತಿಮಾ ವಿನೇಯ್ಯ ಲೋಕೇ ಅಭಿಜ್ಝಾ ದೋಮನಸ್ಸಂ। ವೇದನಾಸು। ಚಿತ್ತೇ। ಧಮ್ಮೇಸು ಧಮ್ಮಾನುಪಸ್ಸೀ ವಿಹರಿಸ್ಸಾಮಿ ಆತಾಪೀ ಸಮ್ಪಜಾನೋ ಸತಿಮಾ ವಿನೇಯ್ಯ ಲೋಕೇ ಅಭಿಜ್ಝಾ ದೋಮನಸ್ಸ’ನ್ತಿ। ಏವಞ್ಹಿ ತೇ ಗಹಪತಿ ಸಿಕ್ಖಿತಬ್ಬ’’ನ್ತಿ। ಏವಂ ಖೋ ಆಯಸ್ಮತಾ ಆನನ್ದತ್ಥೇರೇನ ಧಮ್ಮಭಣ್ಡಾಗಾರಿಕೇನ ಭಾಸಿತಂ।

ಇದ್ಧಿಪಾದಸಂಯುತ್ತ

ಮೋಗ್ಗಲ್ಲಾನಸುತ್ತ

ಪುಚ್ಛಾ – ಇದ್ಧಿಪಾದಸಂಯುತ್ತೇ ಆವುಸೋ ಚತುತ್ಥಂ ಮೋಗ್ಗಲ್ಲಾನಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಭಾಸಿತಂ। ಸಮ್ಬಹುಲಾ ಭನ್ತೇ ಭಿಕ್ಖೂ ಹೇಟ್ಠಾಮಿಗಾರಮಾತುಪಾಸಾದೇ ವಿಹರನ್ತಿ ಉದ್ಧತಾ ಉನ್ನಳಾ ಚಪಲಾ ಮುಖರಾ ವಿಕಿಣ್ಣವಾಚಾ ಮುಟ್ಠಸ್ಸತಿನೋ ಅಸಮ್ಪಜಾನಾ ಅಸಮಾಹಿತಾ ಭನ್ತಚಿತ್ತಾ ಪಾಕತಿನ್ದ್ರಿಯಾ। ತಸ್ಮಿಂ ಭನ್ತೇ ವತ್ಥುಸ್ಮಿಂ ಆಯಸ್ಮನ್ತಂ ಮಹಾಮೋಗ್ಗಲ್ಲಾನಂ ತೇ ಭಿಕ್ಖೂ ಸಂವೇಜೇತ್ವಾ ‘‘ಕಿಂ ನು ತುಮ್ಹೇ ಭಿಕ್ಖವೇ ಸಂವಿಗ್ಗಾ ಲೋಮಹಟ್ಠಜಾತಾ ಏಕಮನ್ತಂ ಠಿತಾ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಅಚ್ಛರಿಯಂ ವತ ಭೋ, ಅಬ್ಭುತಂ ವತ ಭೋ।

ನಿವಾತಞ್ಚ ವತ।

ಅಯಞ್ಚ ಮಿಗಾರಮಾತುಪಾಸಾದೋ ಗಮ್ಭೀರನೇಮೋ।

ತುಮ್ಹೇವ ಖೋ ಭಿಕ್ಖವೇ ಸಂವೇಜೇತುಕಾಮೇನ ಮೋಗ್ಗಲ್ಲಾನೇನ ಭಿಕ್ಖುನಾ ಪಾದಙ್ಗುಟ್ಠಕೇನ ಮಿಗಾರಮಾತುಪಾಸಾದೋ ಸಙ್ಕಮ್ಪಿತೋ ಸಮ್ಪಕಮ್ಪಿತೋ ಸಮ್ಪಧಾಲಿತೋ।

ತಂ ಕಿಂ ಮಞ್ಞಥ ಭಿಕ್ಖವೇ, ಕತಮೇಸಂ ಧಮ್ಮಾನಂ ಭಾವಿತತ್ತಾ ಬಹುಲೀಕತತ್ತಾ ಮೋಗ್ಗಲ್ಲಾನೋ ಭಿಕ್ಖು ಏವಂ ಮಹಿದ್ಧಿಕೋ ಏವಂ ಮಹಾನುಭಾವೋ।

ಅನುರುದ್ಧಸಂಯುತ್ತ

ಬಾಳ್ಹಗಿಲಾನಸುತ್ತ

ಪುಚ್ಛಾ – ಅನುರುದ್ಧಸಂಯುತ್ತೇ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ದಸಮಂ ಸಂಗೀತಂ ಬಾಳ್ಹಗಿನಾನಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಆಯಸ್ಮತಾ ಅನುರುದ್ಧತ್ಥೇರೇನ ಭಾಸಿತಂ। ಸಮ್ಬಹುಲಾ ಭನ್ತೇ ಭಿಕ್ಖೂ ಆಯಸ್ಮನ್ತಂ ಅನುರುದ್ಧಂ ಆಬಾಧಿಕಂ ದುಕ್ಖಿತಂ ಬಾಳ್ಹಗಿಲಾನಂ ಏತದವೋಚುಂ ‘‘ಕತಮೇನಾಯಸ್ಮತೋ ಅನುರುದ್ಧಸ್ಸ ವಿಹಾರೇನ ವಿಹರತೋ ಉಪ್ಪನ್ನಾ ಸಾರೀರಿಕಾ ದುಕ್ಖಾ ವೇದನಾ ಚಿತ್ತಂ ನ ಪರಿಯಾದಾಯ ತಿಟ್ಠನ್ತೀ’’ತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಚತೂಸು ಖೋ ಮೇ ಆವುಸೋ ಸತಿಪಟ್ಠಾನೇಸು ಸುಪ್ಪತಿಟ್ಠಿತಚಿತ್ತಸ್ಸ ವಿಹರತೋ ಉಪ್ಪನ್ನಾ ಸಾರೀರಿಕಾ ದುಕ್ಖಾ ವೇದನಾ ಚಿತ್ತಂ ನ ಪರಿಯಾದಾಯ ತಿಟ್ಠನ್ತೀ’’ತಿ ಏವಮಾದಿನಾ ಆಯಸ್ಮತಾ ಅನುರುದ್ಧತ್ಥೇರೇನ ಭಾಸಿತಂ।

ಆನಾಪಾನಸಂಯುತ್ತ

ಮಹಾಕಪ್ಪಿನಸುತ್ತ

ಪುಚ್ಛಾ – ಆನಾಪಾನಸಂಯುತ್ತೇ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಸತ್ತಮಂ ಸಂಗೀತಂ ಮಹಾಕಪ್ಪಿನಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಪಸ್ಸಥ ನೋ ತುಮ್ಹೇ ಭಿಕ್ಖವೇ ಏತಸ್ಸ ಭಿಕ್ಖುನೋ ಕಾಯಸ್ಸ ಇಞ್ಜಿತತ್ತಂ ವಾ ಫನ್ದಿತಬ್ಬಂ ವಾ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಇಚ್ಛಾನಙ್ಗಲಸುತ್ತ

ಪುಚ್ಛಾ – ತತ್ಥೇವ ಆವುಸೋ ದುತಿಯವಗ್ಗೇ ಪಠಮಂ ಇಚ್ಛಾನಙ್ಗಲಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಇಚ್ಛಾನಙ್ಗಲೇ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಸಚೇ ಖೋ ಭಿಕ್ಖವೇ ಅಞ್ಞತಿತ್ಥಿಯಾ ಪರಿಬ್ಬಾಜಕಾ ಏವಂ ಪುಚ್ಛೇಯ್ಯುಂ ‘ಕತಮೇ ನಾವುಸೋ ವಿಹಾರೇನ ಸಮಣೋ ಗೋತಮೋ ವಸ್ಸಾವಾಸಂ ಬಹುಲಂ ವಿಹಾಸೀ’ತಿ। ಏವಂ ಪುಟ್ಠಾ ತುಮ್ಹೇ ಭಿಕ್ಖವೇ ತೇಸಂ ಅಞ್ಞತಿತ್ಥಿಯಾನಂ ಪರಿಬ್ಬಾಜಕಾನಂ ಏವಂ ಬ್ಯಾಕರೇಯ್ಯಾಥ ಆನಾಪಾನಸ್ಸತಿಸಮಾಧಿನಾ ಖೋ ಆವುಸೋ ಭಗವಾ ವಸ್ಸಾವಾಸಂ ಬಹುಲಂ ವಿಹಾಸೀ’’ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ।

ಸೋತಾಪತ್ತಿಸಂಯುತ್ತ

ಚಕ್ಕವತ್ತಿರಾಜಸುತ್ತ

ಪುಚ್ಛಾ – ಸೋತಾಪತ್ತಿಸಂಯುತ್ತೇ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಪಠಮಂ ಸಂಗೀತಂ ಚಕ್ಕವತ್ತಿರಾಜಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಕಿಞ್ಚಾಪಿ ಭಿಕ್ಖವೇ ರಾಜಾ ಚಕ್ಕವತ್ತೀ ಚತುನ್ನಂ ದೀಪಾನಂ ಇಸ್ಸರಿಯಾಧಿಪಚ್ಚಂ ರಜ್ಜಂ ಕಾರೇತ್ವಾ ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಸಗ್ಗಂ ಲೋಕಂ ಉಪಪಜ್ಜತಿ ದೇವಾನಂ ತಾವತಿಂಸಾನಂ ಸಹಬ್ಯತಂ, ಸೋ ತತ್ಥ ನನ್ದನೇ ವನೇ ಅಚ್ಛರಾಸಙ್ಘಪರಿವುತೋ ದಿಬ್ಬೇಹಿ ಚ ಪಞ್ಚಹಿ ಕಾಮಗುಣೇಹಿ ಸಮಪ್ಪಿತೋ ಸಮಙ್ಗೀಭೂತೋ ಪರಿಚಾರೇತಿ ಸೋ ಚತೂಹಿ ಧಮ್ಮೇಹಿ ಅಸಮನ್ನಾಗತೋ, ಅಥ ಖೋ ಸೋ ಅಪರಿಮುತ್ತೋವ ನಿರಯಾ, ಅಪರಿಮುತ್ತೋ ತಿರಚ್ಛಾನಯೋನಿಯಾ, ಅಪರಿಮುತ್ತೋ ಪೇತ್ತಿವಿಸಯಾ, ಅಪರಿಮುತ್ತೋ ಅಪಾಯದುಗ್ಗತಿವಿನಿಪಾತಾ’’ತಿ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ।

ದೀಘಾವು ಉಪಾಸಕಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ತತಿಯಂ ಸಂಗೀತಂ ದೀಘಾವುಉಪಾಸಕಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ರಾಜಗಹೇ ಭನ್ತೇ ದೀಘಾವುಂ ಉಪಾಸಕಂ ಆರಬ್ಭ ಭಾಸಿತಂ। ಭಗವಾ ಭನ್ತೇ ದೀಘಾವುಂ ಉಪಾಸಕಂ ಆಬಾಧಿಕಂ ದುಕ್ಖಿತಂ ಬಾಳ್ಹಗಿಲಾನಂ ಏತದವೋಚ ‘‘ಕಚ್ಚಿ ತೇ ದೀಘಾವು ಖಮನೀಯಂ, ಕಚ್ಚಿ ಯಾಪನೀಯಂ, ಕಚ್ಚಿ ದುಕ್ಖಾ ವೇದನಾ ಪಟಿಕ್ಕಮನ್ತಿ ನೋ ಅಭಿಕ್ಕಮನ್ತಿ, ಪಟಿಕ್ಕಮೋಸಾನಂ ಪಞ್ಞಾಯತಿ ನೋ ಅಭಿಕ್ಕಮೋ’’ತಿ। ನ ಮೇ ಭನ್ತೇ ಖಮನೀಯಂ, ನ ಯಾಪನೀಯಂ ಬಾಳ್ಹಾ ಮೇ ದುಕ್ಖಾ ವೇದನಾ ಅಭಿಕ್ಕಮನ್ತಿ ನೋ ಪಟಿಕ್ಕಮನ್ತಿ, ಅಭಿಕ್ಕಮೋಸಾನಂ ಪಞ್ಞಾಯತಿ ನೋ ಪಟಿಕ್ಕಮೋತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ತಸ್ಮಾತಿಹ ತೇ ದೀಘಾವು ಏವಂ ಸಿಕ್ಖಿತಬ್ಬಂ ಬುದ್ಧೇ ಅವೇಚ್ಚಪ್ಪಸಾದೇನ ಸಮನ್ನಾಗತೋ ಭವಿಸ್ಸಾಮೀ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಯಾನಿಮಾನಿ ಭನ್ತೇ ಭಗವತಾ ಚತ್ತಾರಿ ಸೋತಾಪತ್ತಿಯಙ್ಗಾನಿ ದೇಸಿತಾನಿ, ಸಂವಿಜ್ಜನ್ತೇ ತೇ ಧಮ್ಮಾ ಮಯಿ–

ತಸ್ಮಾತಿಹ ತ್ವಂ ದೀಘಾವು ಇಮೇಸು ಚತೂಸು ಸೋತಾಪತ್ತಿಯಙ್ಗೇಸು ಪತಿಟ್ಠಾಯ ಛ ವಿಜ್ಜಾಭಾಗಿಯೇ ಧಮ್ಮೇ ಉತ್ತರಿ ಭಾವೇಯ್ಯಾಸಿ–

ಮಾ ತ್ವಂ ತಾತ ದೀಘಾವು ಏವಂ ಮನಸಾಕಾಸಿ।

ಇಙ್ಘ ತ್ವಂ ತಾತ ದೀಘಾವು ಯದೇವ ತೇ ಭಗವಾ ಆಹ, ತದೇವ ತ್ವಂ ಸಾಧುಕಂ ಮನಸಿಕರೋಹಿ।

ಪಣ್ಡಿತೋ ಭಿಕ್ಖವೇ ದೀಘಾವು ಉಪಾಸಕೋ।

ಪಚ್ಚಪಾದಿ ಧಮ್ಮಸ್ಸಾನುಧಮ್ಮಂ।

ನ ಚ ಮಂ ಧಮ್ಮಾಧಿಕರಣಂ ವಿಹೇಠೇಸಿ।

ದೀಘಾವು ಭಿಕ್ಖವೇ ಉಪಾಸಕೋ ಪಞ್ಚನ್ನಂ ಓರಮ್ಭಾಗಿಯಾನಂ ಸಂಯೋಜನಾನಂ ಪರಿಕ್ಖಯಾ ಓಪಪಾತಿಕೋ ತತ್ಥ ಪರಿನಿಬ್ಬಾಯೀ ಅನಾವತ್ತಿಧಮ್ಮೋ ತಸ್ಮಾ ಲೋಕಾ।

ವೇಳುದ್ವಾರೇಯ್ಯಸುತ್ತ

ಪುಚ್ಛಾ – ತೇನಾವುಸೋ ಭಗವತಾ…ಪೇ॰… ಸಮ್ಮಾಸಮ್ಬುದ್ಧೇನ ಸೋತಾಪತ್ತಿಸಂಯುತ್ತೇ ಸತ್ತಮಂ ಸಂಗೀತಂ ವೇಳುದ್ವಾರೇಯ್ಯಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಕೋಸಲೇಸು ಭನ್ತೇ ವೇಳುದ್ವಾರೇ ನಾಮ ಕೋಸಲಾನಂ ಬ್ರಾಹ್ಮಣ ಗಾಮೇ ವೇಳುದ್ವಾರೇಯ್ಯಕೇ ಬ್ರಾಹ್ಮಣಗಹಪತಿಕೇ ಆರಬ್ಭ ಭಾಸಿತಂ।

ವೇಳುದ್ವಾರೇಯ್ಯಕಾ ಭನ್ತೇ ಬ್ರಾಹ್ಮಣಗಹಪತಿಕಾ ಭಗವನ್ತಂ ಏತದವೋಚುಂ ‘‘ಮಯಂ ಭೋ ಗೋತಮ ಏವಂಕಾಮಾ ಏವಂಛನ್ದಾ ಏವಂಅಧಿಪ್ಪಾಯಾ ಪುತ್ತಸಮ್ಬಾಧಸಯನಂ ಅಜ್ಝಾವಸೇಯ್ಯಾಮ…ಪೇ॰… ಜಾತರೂಪರಜತಂ ಸಾದಿಯೇಯ್ಯಾಮ, ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಸಗ್ಗಂ ಲೋಕಂ ಉಪಪಜ್ಜೇಯ್ಯಾಮ, ತೇಸಂ ನೋ ಭವಂ ಗೋತಮೋ ಅಮ್ಹಾಕಂ ಏವಂಕಾಮಾನಂ ಏವಂಛನ್ದಾನಂ ಏವಂಅಧಿಪ್ಪಾಯಾನಂ ತಥಾ ದಮ್ಮಂ ದೇಸೇತು, ಯಥಾ ಮಯಂ ಪುತ್ತಸಮ್ಬಾಧಸಯನಂ ಅಜ್ಝಾವಸೇಯ್ಯಾಮ…ಪೇ॰… ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಸಗ್ಗಂ ಲೋಕಂ ಉಪಪಜ್ಜೇಯ್ಯಾಮಾ’’ತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಅತ್ತೂಪನಾಯಿಕಂ ವೋ ಗಹಪತಯೋ ಧಮ್ಮಪರಿಯಾಯಂ ದೇಸೇಸ್ಸಾಮಿ, ತಂ ಸುಣಾಥ ಸಾಧುಕಂ ಮನಸಿ ಕರೋಥ, ಭಾಸಿಸ್ಸಾಮೀ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಸರಣಾನಿವಗ್ಗ

ಪಠಮ ಮಹಾನಾಮಸುತ್ತ

ಪುಚ್ಛಾ – ತತ್ಥೇವ ಆವುಸೋ ತತಿಯೇ ಸರಣಾನಿವಗ್ಗೇ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಪಠಮಂ ಸಂಗೀತಂ ಪಠಮಮಹಾನಾಮಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಕ್ಕೇಸು ಭನ್ತೇ ಕಪಿಲವತ್ಥುಸ್ಮಿಂ ನಿಗ್ರೋಧಾರಾಮೇ ಮಹಾನಾಮಂ ಸಕ್ಕಂ ಆರಬ್ಭ ಭಾಸಿತಂ। ಮಹಾನಾಮೋ ಭನ್ತೇ ಸಕ್ಕೋ ಭಗವನ್ತಂ ಏತದವೋಚ ‘‘ಇದಂ ಭನ್ತೇ ಕಪಿಲವತ್ಥು ಇದ್ಧಞ್ಚೇವ ಫೀತಞ್ಚ ಬಾಹುಜಞ್ಞಂ ಆಕಿಣ್ಣಮನುಸ್ಸಂ ಸಮ್ಬಾಧಬ್ಯೂಹಂ, ಸೋ ಖ್ವಾಹಂ ಭನ್ತೇ ಭಗವನ್ತಂ ವಾ ಪಯಿರುಪಾಸಿತ್ವಾ ಮನೋಭಾವನೀಯೇ ವಾ ಭಿಕ್ಖೂ ಸಾಯನ್ಹಸಮಯಂ ಕಪಿಲವತ್ಥುಂ ಪವಿಸನ್ತೋ ಭನ್ತೇನಪಿ ಹತ್ಥಿನಾ ಸಮಾಗಚ್ಛಾಮಿ, ಭನ್ತೇನಪಿ ಅಸ್ಸೇನ ಸಮಾಗಚ್ಛಾಮಿ, ಭನ್ತೇನಪಿ ರಥೇನ ಸಮಾಗಚ್ಛಾಮಿ, ಭನ್ತೇನಪಿ ಸಕಟೇನ ಸಮಾಗಚ್ಛಾಮಿ, ಭನ್ತೇನಪಿ ಪುರಿಸೇನ ಸಮಾಗಚ್ಛಾಮಿ, ತಸ್ಸ ಮಯ್ಹಂ ಭನ್ತೇ ತಸ್ಮಿಂ ಸಮಯೇ ಮುಸ್ಸತೇವ ಭಗವನ್ತಂ ಆರಬ್ಭ ಸತಿ, ಮುಸ್ಸತಿ ಧಮ್ಮಂ ಆರಬ್ಭ ಸತಿ, ಮುಸ್ಸತಿ ಸಙ್ಘಂ ಆರಬ್ಭ ಸತಿ, ತಸ್ಸ ಮಯ್ಹಂ ಭನ್ತೇ ಏವಂ ಹೋತಿ ಇಮಮ್ಹಿ ಚಾಹಂ ಸಮಯೇ ಕಾಲಂ ಕರೇಯ್ಯಂ, ಕಾ ಮಯ್ಹಂ ಗತಿ, ಕೋ ಅಭಿಸಮ್ಪರಾಯೋ’’ತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಮಾ ಭಾಯಿ ಮಹಾನಾಮ, ಮಾ ಭಾಯಿ ಮಹಾನಾಮ, ಅಪಾಪಕಂ ತೇ ಮರಣಂ ಭವಿಸ್ಸತಿ ಅಪಾಪಿಕಾ ಕಾಲಂ ಕಿರಿಯಾ’’ತಿ ಏವಮಾದಿನಾ ಭಗವತಾ ಭಾಸಿತಂ।

ದುತಿಯ ಸರಣಾನಿಸಕ್ಕಸುತ್ತ

ಪುಚ್ಛಾ – ತತ್ಥೇವ ಆವುಸೋ ಧಮ್ಮಸಂಗಾಹಕಮಹಾಥೇರೇಹಿ ಪಞ್ಚಮಂ ಸಂಗೀತಂ ದುತಿಯಸರಣಾನಿಸಕ್ಕಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಕ್ಕೇಸು ಭನ್ತೇ ಕಪಿಲವತ್ಥುಸ್ಮಿಂ ನಿಗ್ರೋಧಾರಾಮೇ ಮಹಾನಾಮಂಯೇವ ಸಕ್ಕಂ ಆರಬ್ಭ ಭಾಸಿತಂ।

ಮಹಾನಾಮೋ ಭನ್ತೇ ಸಕ್ಕೋ ಭಗವನ್ತಂ ಏತದವೋಚ ‘‘ಇಧ ಭನ್ತೇ ಸರಣಾನಿ ಸಕ್ಕೋ ಕಾಲಙ್ಕತೋ, ಸೋ ಭಗವತಾ ಬ್ಯಾಕತೋ ‘ಸೋತಾಪನ್ನೋ ಅವಿನಿಪಾತಧಮ್ಮೋ ನಿಯತೋ ಸಮ್ಬೋಧಿಪರಾಯಣೋ’ತಿ। ತತ್ರ ಸುದಂ ಭನ್ತೇ ಸಮ್ಬಹುಲಾ ಸಕ್ಕಾ ಸಙ್ಗಮ್ಮ ಸಮಾಗಮ್ಮ ಉಜ್ಝಾಯನ್ತಿ ಖೀಯನ್ತಿ ವಿಪಾಚೇನ್ತಿ ‘ಅಚ್ಛರಿಯಂ ವತ ಭೋ, ಅಬ್ಭುತಂ ವತ

ಭೋ , ಏತ್ಥ ದಾನಿ ಕೋ ನ ಸೋತಾಪನ್ನೋ ಭವಿಸ್ಸತಿ, ಯತ್ರ ಹಿ ನಾಮ ಸರಣಾನಿ ಸಕ್ಕೋ ಕಾಲಙ್ಕತೋ, ಸೋ ಭಗವತಾ ಬ್ಯಾಕತೋ ‘ಸೋತಾಪನ್ನೋ ಅವಿನಿಪಾತಧಮ್ಮೋ ನಿಯತೋ ಸಮ್ಬೋಧಿಪರಾಯಣೋ’ತಿ, ಸರಣಾನಿ ಸಕ್ಕೋ ಸಿಕ್ಖಾಯ ಅಪರಿಪೂರಕಾರೀ ಅಹೋಸೀ’’ತಿ ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಯೋ ಸೋ ಮಹಾನಾಮ ದೀಘರತ್ತಂ ಉಪಾಸಕೋ ಬುದ್ಧಂ ಸರಣಂ ಗತೋ, ಧಮ್ಮಂ ಸರಣಂ ಗತೋ, ಸಙ್ಘಂ ಸರಣಂ ಗತೋ, ಸೋ ಕಥಂ ವಿನಿಪಾತಂ ಗಚ್ಛೇಯ್ಯಾ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಪಠಮ ಅನಾಥಪಿಣ್ಡಿಕಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಛಟ್ಠಂ ಸಂಗೀತಂ ಪಠಮಅನಾಥಪಿಣ್ಡಿಕಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕೇನ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಅನಾಥಪಿಣ್ಡಿಕಂ ಗಹಪತಿಂ ಆರಬ್ಭ ಆಯಸ್ಮತಾ ಸಾರಿಪುತ್ತತ್ಥೇರೇನ ಧಮ್ಮಸೇನಾಪತಿನಾ ಭಾಸಿತಂ।

ಆಯಸ್ಮಾ ಭನ್ತೇ ಸಾರಿಪುತ್ತತ್ಥೇರೋ ಆಯಸ್ಮತಾ ಆನನ್ದತ್ಥೇರೇನ ಪಚ್ಛಾಸಮಣೇನ ಸದ್ಧಿಂ ಯೇನ ಅನಾಥಪಿಣ್ಡಿಕಸ್ಸ ಗಹಪತಿಸ್ಸ ನಿವೇಸನಂ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಪಞ್ಞತ್ತೇ ಆಸನೇ ನಿಸೀದಿ, ನಿಸಜ್ಜ ಖೋ ಆಯಸ್ಮಾ ಸಾರಿಪುತ್ತೋ ಅನಾಥಪಿಣ್ಡಿಕಂ ಗಹಪತಿಂ ಆಬಾಧಿಕಂ ದುಕ್ಖಿತಂ ಬಾಳ್ಹಗಿಲಾನಂ ಏತದವೋಚ ‘‘ಕಚ್ಚಿ ತೇ ಗಹಪತಿ ಖಮನೀಯಂ ಕಚ್ಚಿ ಯಾಪನೀಯಂ, ಕಚ್ಚಿ ದುಕ್ಖಾ ವೇದನಾ ಪಟಿಕ್ಕಮನ್ತಿ, ನೋ ಅಭಿಕ್ಕಮನ್ತಿ, ಪಟಿಕ್ಕಮೋಸಾನಂ ಪಞ್ಞಾಯತಿ, ನೋ ಅಭಿಕ್ಕಮೋ’’ತಿ, ನ ಮೇ ಭನ್ತೇ ಖಮನೀಯಂ, ನ ಯಾಪನೀಯಂ, ಬಾಳ್ಹಾ ಮೇ ದುಕ್ಖಾ ವೇದನಾ ಅಭಿಕ್ಕಮನ್ತಿ, ನೋ ಪಟಿಕ್ಕಮನ್ತಿ, ಅಭಿಕ್ಕಮೋಸಾನಂ ಪಞ್ಞಾಯತಿ, ನೋ ಪಟಿಕ್ಕಮೋತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಯಥಾ ರೂಪೇನ ಖೋ ಗಹಪತಿ ಬುದ್ಧೇ ಅಪ್ಪಸಾದೇನ ಸಮನ್ನಾಗತೋ ಅಸ್ಸುತವಾ ಪುಥುಜ್ಜನೋ ಕಾಯಸ್ಸ ಭೇದಾ ಪರಂ ಮರಣಾ ಅಪಾಯಂ ದುಗ್ಗತಿಂ ವಿನಿಪಾತಂ ನಿಯರಂ ಉಪಪಜ್ಜತಿ ತಥಾರೂಪೋ ತೇ ಬುದ್ಧೇ ಅಪ್ಪಸಾದೋ ನತ್ಥಿ, ಅತ್ಥಿ ಚ ಖೋ ತೇ ಗಹಪತಿ ಬುದ್ಧೇ ಅವೇಚ್ಚಪ್ಪಸಾದೋ ‘ಇತಿಪಿ ಸೋ ಭಗವಾ ಅರಹಂ ಸಮ್ಮಾಸಮ್ಬುದ್ಧೋ…ಪೇ॰… ಭಗವಾ’ತಿ ತಞ್ಚ ಪನ ತೇ ಬುದ್ಧೇ ಅವೇಚ್ಚಪ್ಪಸಾದಂ ಅತ್ತನಿ ಸಮನುಪಸ್ಸತೋ ಠಾನಸೋ ವೇದನಾ ಪಟಿಪ್ಪಸ್ಸಮ್ಭೇಯ್ಯಾ’’ತಿ ಏವಮಾದಿನಾ ಆಯಸ್ಮತಾ ಸಾರಿಪುತ್ತತ್ಥೇರೇನ ಧಮ್ಮಸೇನಾಪತಿನಾ ಭಾಸಿತಂ।

ಯಸ್ಸ ಸದ್ಧಾ ತಥಾಗತೇ, ಅಚಲಾ ಸುಪ್ಪತಿಟ್ಠಿತಾ।

ಸೀಲಞ್ಚ ಯಸ್ಸ ಕಲ್ಯಾಣಂ, ಅರಿಯಕನ್ತಂ ಪಸಂಸಿತಂ॥

ಸಙ್ಘೇ ಪಸಾದೋ ಯಸ್ಸತ್ಥಿ, ಉಜುಭೂತಞ್ಚ ದಸ್ಸನಂ।

ಅದಲಿದ್ದೋತಿ ತಂ ಆಹು, ಅಮೋಘಂ ತಸ್ಸ ಜೀವಿತಂ॥

ತಸ್ಮಾ ಸದ್ಧಞ್ಚ ಸೀಲಞ್ಚ, ಪಸಾದಂ ಧಮ್ಮದಸ್ಸನಂ।

ಅನುಯುಞ್ಜೇಥ ಮೇಧಾವೀ, ಸರಂ ಬುದ್ಧಾನಸಾಸನಂ॥

ಪುಞ್ಞಾಭಿಸನ್ದವಗ್ಗ

ಮಹಾನಾಮಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪುಞ್ಞಾಭಿಸನ್ದವಗ್ಗೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಸತ್ತಮಂ ಸಂಗೀತಂ ಮಹಾನಾಮಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಕ್ಕೇಸು ಭನ್ತೇ ಕಪಿಲವತ್ಥುಸ್ಮಿಂ ಮಹಾನಾಮಂ ಸಕ್ಕಂ ಆರಬ್ಭ ಭಾಸಿತಂ।

ಮಹಾನಾಮೋ ಭನ್ತೇ ಸಕ್ಕೋ ಭಗವನ್ತಂ ಏತದವೋಚ ‘‘ಕಿತ್ತಾವತಾ ನು ಖೋ ಭನ್ತೇ ಉಪಾಸಕೋ ಹೋತೀ’’ತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಯತೋ ಖೋ ಮಹಾನಾಮ ಬುದ್ಧಂ ಸರಣಂ ಗತೋ ಹೋತಿ, ಧಮ್ಮಂ ಸರಣಂ ಗತೋ ಹೋತಿ, ಸಙ್ಘಂ ಸರಣಂ ಗತೋ ಹೋತೀ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಕಿತ್ತಾವತಾ ನು ಖೋ ಭನ್ತೇ ಉಪಾಸಕೋ ಹೋತಿ।

ಕಾಳಿಗೋಧಸುತ್ತ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ನವಮಂ ಸಂಗೀತಂ ಕಾಳಿಗೋಧಸುತ್ತಂ ಭಗವತಾ ಕತ್ಥ ಕಂ ಕಾರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಕ್ಕೇಸು ಭನ್ತೇ ಕಾಳಿಗೋಧಂ ನಾಮ ಸಾಕಿಯಾನಿಂ ಆರಬ್ಭ ‘‘ಚತೂಹಿ ಖೋ ಗೋಧೇ ಧಮ್ಮೇಹಿ ಸಮನ್ನಾಗತಾ ಅರಿಯಸಾವಿಕಾ ಸೋತಾಪನ್ನಾ ಹೋತಿ ಅವಿನಿಪಾತಧಮ್ಮಾ ನಿಯತಾ ಸಮ್ಬೋಧಿಪರಾಯಣಾ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಲಾಭಾ ತೇ ಗೋಧೇ, ಸುಲದ್ಧಂ ತೇ ಗೋಧೇ, ಸೋತಾಪತ್ತಿಫಲಂ ತಯಾ ಗೋಧೇ –

ನನ್ದಿಯಸಕ್ಕಸುತ್ತ

ಪುಚ್ಛಾ – ತೇನಾವುಸೋ ಜಾನತಾ…ಪೇ॰… ಸಮ್ಮಾಸಮ್ಬುದ್ಧೇನ ಸೋತಾಪತ್ತಿಸಂಯುತ್ತೇ ಪುಞ್ಞಾಭಿಸನ್ದವಗ್ಗೇ ದಸಮಂ ನನ್ದಿಯಸಕ್ಕಸುತ್ತಂ ಕತ್ಥ ಕಂ ಆರಬ್ಭ ಕಿಸ್ಮಿಂ ವತ್ಥುಸ್ಮಿಂ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಕ್ಕೇಸು ಭನ್ತೇ ಕಪಿಲವತ್ಥುಸ್ಮಿಂ ನಿಗ್ರೋಧಾರಾಮೇ ನನ್ದಿಯಂ ಸಕ್ಕಂ ಆರಬ್ಭ ಭಾಸಿತಂ। ನನ್ದಿಯೋ ಭನ್ತೇ ಸಕ್ಕೋ ಭಗವನ್ತಂ ಏತದವೋಚ ‘‘ಯಸ್ಸೇವ ನು ಖೋ ಭನ್ತೇ ಅರಿಯಸಾವಕಸ್ಸ ಚತ್ತಾರಿ ಸೋತಾಪತ್ತಿಯಙ್ಗಾನಿ ಸಬ್ಬೇನ ಸಬ್ಬಂ ಸಬ್ಬಥಾಸಬ್ಬಂ ನತ್ಥಿ, ಸ್ವೇವ ನು ಖೋ ಭನ್ತೇ ಅರಿಯಸಾವಕೋ ಪಮಾದವಿಹಾರೀ’’ತಿ। ತಸ್ಮಿಂ ಭನ್ತೇ ವತ್ಥುಸ್ಮಿಂ ‘‘ಯಸ್ಸ ಖೋ ನನ್ದಿಯ ಚತ್ತಾರಿ ಸೋತಾಪತ್ತಿಯಙ್ಗಾನಿ ಸಬ್ಬೇನಸಬ್ಬಂ ಸಬ್ಬಥಾಸಬ್ಬಂ ನತ್ಥಿ, ತಮಹಂ ಬಾಹಿರೋ ಪುಥುಜ್ಜನಪಕ್ಖೇ ಠಿತೋತಿ ವದಾಮೀ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಸಚ್ಚಸಂಯುತ್ತ

ತಿರಚ್ಛಾನಕಥಾಸುತ್ತ

ಪುಚ್ಛಾ – ಸಚ್ಚಸಂಯುತ್ತೇ ಆವುಸೋ ಪೋರಾಣಕೇಹಿ ಧಮ್ಮಸಂಗಾಯಕಮಹಾಥೇರೇಹಿ ದಸಮಂ ಸಂಗೀತಂ ತಿರಚ್ಛಾನಕಥಾಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ಮಾ ಭಿಕ್ಖವೇ ಅನೇಕವಿಹಿತಂ ತಿರಚ್ಛಾನಕಥಂ ಕಥೇಯ್ಯಾಥ। ಸೇಯ್ಯಥಿದಂ, ರಾಜಕಥಂ ಚೋರಕಥಂ ಮಹಾಮತ್ತಕಥಂ ಸೇನಾಕಥಂ ಭಯಕಥಂ ಯುದ್ಧಕಥಂ ಅನ್ನಕಥಂ ಪಾನಕಥಂ ವತ್ಥಕಥಂ ಸಯನಕಥಂ ಏವಮಾದಿನಾ ಭನ್ತೇ ಭಗವತಾ ಭಾಸಿತಂ।

ಇದಂ ದುಕ್ಖನ್ತಿ ಕಥೇಯ್ಯಾಥ।

ತಸ್ಮಾತಿಹ ಭಿಕ್ಖವೇ ಇದಂ ದುಕ್ಖನ್ತಿ ಯೋಗೋ ಕರಣೀಯೋ…ಪೇ॰… ಅಯಂ ದುಕ್ಖನಿರೋಧಗಾಮಿನೀ ಪಟಿಪದಾತಿ ಯೋಗೋ ಕರಣೀಯೋ।

ಧಮ್ಮಚಕ್ಕಪವತ್ತನಸುತ್ತ

ಪುಚ್ಛಾ – ತತ್ಥೇವ ಆವುಸೋ ಧಮ್ಮಚಕ್ಕಪ್ಪವತ್ತನವಗ್ಗೇ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಪಠಮಂ ಸಂಗೀತಂ ಧಮ್ಮಚಕ್ಕಪವತ್ತನಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಬಾರಾಣಸಿಯಂ ಭನ್ತೇ ಇಸಿಪತನೇ ಮಿಗದಾಯೇ ಪಞ್ಚವಗ್ಗಿಯೇ ಭಿಕ್ಖೂ ಆರಬ್ಭ ‘‘ದ್ವೇ ಮೇ ಭಿಕ್ಖವೇ ಅನ್ತಾ ಪಬ್ಬಜಿತೇನ ನಸೇವಿತಬ್ಬಾ। ಕತಮೇ ದ್ವೇ, ಯೋ ಚಾಯಂ ಕಾಮೇಸು ಕಾಮಸುಖಲ್ಲಿಕಾನುಯೋಗೋ ಹೀನೋ ಗಮ್ಮೋ ಪೋಥುಜ್ಜನಿಕೋ ಅನರಿಯೋ ಅನತ್ಥಸಂಹಿತೋ, ಯೋ ಚಾಯಂ ಅತ್ತಕಿಲಮಥಾನುಯೋಗೋ ದುಕ್ಖೋ ಅನರಿಯೋ ಅನತ್ಥಸಂಹಿತೋ, ಏತೇ ಖೋ ಭಿಕ್ಖವೇ ಉಭೋ ಅನ್ತೇ ಅನುಪಗಮ್ಮ ಮಜ್ಝಿಮಾಪಟಿಪದಾ ತಥಾಗತೇನ ಅಭಿಸಮ್ಬುದ್ಧಾ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಆಸವಕ್ಖಯಸುತ್ತ

ಪುಚ್ಛಾ – ತತ್ಥೇವ ಆವುಸೋ ಕೋಟಿಗಾಮವಗ್ಗೇ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಪಞ್ಚಮಂ ಸಂಗೀತಂ ಆಸವಕ್ಖಯಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಸಾವತ್ಥಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ಜಾನತೋಹಂ ಭಿಕ್ಖವೇ ಪಸ್ಸತೋ ಆಸವಾನಂ ಖಯಂ ವದಾಮಿ, ನೋ ಅಜಾನತೋ ಅಪಸ್ಸತೋ। ಕಿಞ್ಚ ಭಿಕ್ಖವೇ ಜಾನತೋ ಪಸ್ಸತೋ ಆಸವಾನಂ ಖಯೋ ಹೋತಿ, ಇದಂ ದುಕ್ಖನ್ತಿ ಭಿಕ್ಖವೇ ಜಾನತೋ ಪಸ್ಸತೋ ಆಸವಾನಂ ಖಯೋ ಹೋತಿ, ಅಯಂ ದುಕ್ಖಸಮುದಯೋತಿ, ಅಯಂ ದುಕ್ಖನಿರೋಧೋತಿ, ಅಯಂ ದುಕ್ಖನಿರೋಧಗಾಮಿನೀಪಟಿಪದಾತಿ ಜಾನತೋ ಪಸ್ಸತೋ ಆಸವಾನಂ ಖಯೋ ಹೋತಿ। ಏವಂ ಖೋ ಭಿಕ್ಖವೇ ಜಾನತೋ ಏವಂ ಪಸ್ಸತೋ ಆಸವಾನಂ ಖಯೋ ಹೋತಿ। ತಸ್ಮಾತಿಹ ಭಿಕ್ಖವೇ ‘‘ಇದಂ ದುಕ್ಖ’’ನ್ತಿ ಯೋಗೋ ಕರಣೀಯೋ, ಅಯಂ ದುಕ್ಖಸಮುದಯೋತಿ, ಅಯಂ ದುಕ್ಖನಿರೋಧೋತಿ, ಅಯಂ ದುಕ್ಖನಿರೋಧಗಾಮಿನೀಪಟಿಪದಾತಿ ಯೋಗೋ ಕರಣೀಯೋ’’ತಿ ಏವಂ ಖೋ ಭಗವತಾ ಭಾಸಿತಂ।

ಸೀಸಪಾವನಸುತ್ತ

ಪುಚ್ಛಾ – ತತ್ಥೇವ ಆವುಸೋ ಸೀಸಪಾವನವಗ್ಗೇ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಪಠಮಂ ಸಂಗೀತಂ ಸೀಸಪಾವನಸುತ್ತಂ ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತಂ।

ವಿಸ್ಸಜ್ಜನಾ – ಕೋಸಮ್ಬಿಯಂ ಭನ್ತೇ ಸೀಸಪಾವನೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ತಂ ಕಿಂ ಮಞ್ಞಥ ಭಿಕ್ಖವೇ, ಕತಮಂ ನುಖೋ ಬಹುತರಂ ಯಾನಿ ವಾ ಮಯಾ ಪರಿತ್ತಾನಿ ಸೀಸಪಾಪಣ್ಣಾನಿ ಪಾಣಿನಾ ಗಹಿತಾನಿ ಯದಿದಂ ಉಪರಿ ಸೀಸಪಾವನೇ’’ತಿ ಏವಮಾದಿನಾ ಭಗವತಾ ಭಾಸಿತಂ।

ಪಞ್ಚಗತಿಪೇಯ್ಯಾಲವಗ್ಗ

ಪುಚ್ಛಾ – ತತ್ಥೇವ ಆವುಸೋ ಪೋರಾಣಕೇಹಿ ಧಮ್ಮಸಂಗಾಹಕಮಹಾಥೇರೇಹಿ ಪರಿಯೋಸಾನಭಾವೇನ ಸಂಗೀತೋ ಪಞ್ಚಗತಿಪೇಯ್ಯಾಲವಗ್ಗೇ, ಭಗವತಾ ಕತ್ಥ ಕಂ ಆರಬ್ಭ ಕಥಞ್ಚ ಭಾಸಿತೋ।

ವಿಸ್ಸಜ್ಜನಾ – ವೇಸಾಲಿಯಂ ಭನ್ತೇ ಸಮ್ಬಹುಲೇ ಭಿಕ್ಖೂ ಆರಬ್ಭ ‘‘ತಂ ಕಿಂ ಮಞ್ಞಥ ಭಿಕ್ಖವೇ, ಕತಮಂ ನು ಖೋ ಬಹುತರಂ, ಯೋ ವಾಯಂ ಮಯಾ ಪರಿತ್ತೋ ನಖಸಿಖಾಯಂ ಪಂಸು ಆರೋಪಿತೋ, ಅಯಂ ವಾ ಮಹಾಪಥವೀ’’ತಿ ಏವಮಾದಿನಾ ಭಗವತಾ ಭಾಸಿತೋ।

ಪುಚ್ಛಾ – ಕೇ ಆವುಸೋ ಸಿಕ್ಖನ್ತಿ।

ವಿಸ್ಸಜ್ಜನಾ – ಸೇಕ್ಖಾ ಚ ಭನ್ತೇ ಪುಥುಜ್ಜನಕಲ್ಯಾಣಕಾ ಚ ಸಿಕ್ಖನ್ತಿ।

ಪುಚ್ಛಾ – ಕೇ ಆವುಸೋ ಸಿಕ್ಖಿತಸಿಕ್ಖಾ।

ವಿಸ್ಸಜ್ಜನಾ – ಅರಹನ್ತೋ ಭನ್ತೇ ಸಿಕ್ಖಿತಸಿಕ್ಖಾ।

ಪುಚ್ಛಾ – ಕತ್ಥ ಆವುಸೋ ಠಿತಂ।

ವಿಸ್ಸಜ್ಜನಾ – ಸಿಕ್ಖಾಕಾಮೇಸು ಭನ್ತೇ ಠಿತಂ।

ಪುಚ್ಛಾ – ಕೇ ಆವುಸೋ ಧಾರೇನ್ತಿ।

ವಿಸ್ಸಜ್ಜನಾ – ಯೇಸಂ ಭನ್ತೇ ವತ್ತತಿ ತೇ ಧಾರೇನ್ತಿ।

ಪುಚ್ಛಾ – ಕಸ್ಸ ಆವುಸೋ ವಚನಂ।

ವಿಸ್ಸಜ್ಜನಾ – ಭಗವತೋ ಭನ್ತೇ ವಚನಂ ಅರಹತೋ ಸಮ್ಮಾಸಮ್ಬುದ್ಧಸ್ಸ।

ಪುಚ್ಛಾ – ಕೇನ ಆವುಸೋ ಆಭತಂ।

ವಿಸ್ಸಜ್ಜನಾ – ಪರಮ್ಪರಾಯ ಭನ್ತೇ ಆಭತಂ।