ಪಕಿಣ್ಣಕಕಣ್ಡ

೩೧೬.

ಕುಲಸೀಲಗುಣೋಪೇತೋ , ಸಬ್ಬಧಮ್ಮಪರಾಯಣೋ।

ಪವೀಣೋ ಪೇಸನಾಜ್ಝಕ್ಖೋ, ಧಮ್ಮಜ್ಝಕ್ಖೋ ವಿಧೀಯತೇ॥

೩೧೭.

ವೇದವೇದಙ್ಗತತ್ವಞ್ಞೋ, ಜಪ್ಪಹೋಮಪರಾಯಣೋ।

ಆಸೀವಾದವಚೋಯುತ್ತೋ, ಏಸ ರಾಜಪುರೋಹಿತೋ॥

ಕಪ್ಪೋ ಬ್ಯಾಕರಣಂ ಜೋತಿ – ಸತ್ಥಂ ಸಿಕ್ಖಾ ನಿರುತ್ತಿ ಚ।

ಛನ್ದೋವಿಚಿತಿ ಚೇತಾನಿ, ವೇದಙ್ಗಾನಿ ವದನ್ತಿ ಛ॥

೩೧೮.

ಸಕಿಂ ವುತ್ತಗಹಿತತ್ತೋ, ಲಹುಹತ್ಥೋ ಜಿತಕ್ಖರೋ।

ಸಬ್ಬಸತ್ಥಸಮಾಲೋಕೀ, ಪಕಟ್ಠೋ ನಾಮ ಲೇಖಕೋ॥

೩೧೯.

ಸಮತ್ತನೀತಿಸತ್ಥಞ್ಞೋ , ವಾಹನೇ ಪೂರಿತಸ್ಸಮೋ।

ಸೂರವೀರಗುಣೋಪೇತೋ, ಸೇನಾಝಕ್ಖೋ ವಿಧೀಯತೇ॥

೩೨೦.

ಸುಧೀ ವಾಕ್ಯಪಟು, ಪಞ್ಞೋ, ಪರಚಿತ್ತೋಪಲಕ್ಖಣೋ।

ಧೀರೋ ಯಥಾತ್ಥವಾದೀ ಚ, ಏಸ ದೂತೋ ವಿಧೀಯತೇ॥

೩೨೧.

ಪುತ್ತನತ್ತಗುಣೋಪೇತೋ, ಸತ್ಥಞ್ಞೋ ರಸಪಾಚಕೋ।

ಸೂರೋ ಚ ಕಥಿನೋ ಚೇವ, ಸೂಪಕಾರೋ ಸ ವುಚ್ಚತೇ॥

೩೨೨.

ಇಙ್ಗಿತಾಕಾರತತ್ತಞ್ಞೋ, ಬಲವಾಪಿಯದಸ್ಸನೋ।

ಅಪ್ಪಮಾದೀ ಸದಾ ದಕ್ಖೋ, ಪತೀಹಾರೋ ಸ ಉಚ್ಚತೇ॥

೩೨೩.

ಇತ್ಥಿಮಿಸ್ಸೇ ಕುತೋ ಸೀಲಂ, ಮಂಸಭಕ್ಖೇ ಕುತೋ ದಯಾ।

ಸುರಾಪಾನೇ ಕುತೋ ಸಚ್ಚಂ, ಮಹಾಲೋಭೇ ಕುತೋ ಲಜ್ಜಾ।

ಮಹಾತನ್ದೇ ಕುತೋ ಸಿಪ್ಪಂ, ಮಹಾಕೋಧೇ ಕುತೋ ಧನಂ॥

೩೨೪.

ಸುರಾಯೋಗೋ ವೇಲಾಲೋ ಚ, ಸಮಜ್ಜಚರಣಙ್ಗತೋ।

ಖಿಡ್ಡಾ ಧುತ್ತೋ ಪಾಪಮಿತ್ತೋ, ಅಲಸೋ ಭೋಗನಾಸಕಾ॥

೩೨೫.

ಜೀವನ್ತಾಪಿ ಮತಾ ಪಞ್ಚ, ಬ್ಯಾಸೇನ ಪರಿಕಿತ್ತಿತಾ।

ದುಕ್ಖಿತೋ ಬ್ಯಾಧಿತಿ ಮೂಳ್ಹೋ, ಇಣವಾ ನಿಚ್ಚಸೇವಕೋ॥

೩೨೬.

ನಿದ್ದಾಲುಕೋ ಪಮಾದೋ ಚ, ಸುಖಿತೋ ರೋಗವಾಲಸೋ।

ಕಾಮುಕೋ ಕಮ್ಮಾರಾಮೋ ಚ, ಸತ್ತೇತೇ ಸತ್ಥವಜ್ಜಿತಾ॥

೩೨೭.

ಗೋಣಾಹಿ ಸಬ್ಬಗಿಹೀನಂ, ಪೋಸಕಾ ಭೋಗದಾಯಕೋ।

ತಸ್ಮಾ ಹಿ ಮಾತಾಪಿತೂವ, ಮಾನಯೇ ಸಕ್ಕರೇಯ್ಯ ಚ॥

೩೨೮.

ಯಥಾ ಮಾತಾ ಪಿತಾ ಭಾತಾ, ಅಞ್ಞೇವಾಪಿ ಚ ಞಾತಕಾ।

ಗಾವೋ ನೋ ಪರಮಾ ಮಿತ್ತಾ, ಯಾಸು ಜಾಯನ್ತಿ ಓಸಧಾ॥

೩೨೯.

ಅನ್ನದಾ ಬಲದಾ ಚೇತಾ, ವಣ್ಣದಾ ಸುಖದಾ ತಥಾ।

ಏತಮತ್ಥವಸಂ ಞತ್ವಾ, ನಾಸು ಗಾವೋ ಹನಿಂಸು ತೇ॥

೩೩೦.

ಯೇ ಚ ಖಾದನ್ತಿ ಗೋಮಂಸಂ, ಮಾತುಮಂಸಂವ ಖಾದರೇ।

ಮತೇಸು ತೇಸು ಗಿಜ್ಝಾನಂ, ದದೇ ಸೋತೇ ಚ ವಾಹಯೇ॥

೩೩೧.

ದ್ವಿಗುಣೋ ಥೀನಮಾಹಾರೋ, ಬುದ್ಧಿಚಾಪಿ ಚತುಗ್ಗುಣೋ।

ಛಗ್ಗುಣೋ ಹೋತಿ ವಾಯಾಮೋ, ಕಾಮೋತ್ವಟ್ಠಗುಣೋ ಭವೇ॥

೩೩೨.

ನ ಲೋಕೇ ಸೋಭತೇ ಮೂಳ್ಹೋ, ಕೇವಲತ್ತಪಸಂಸಕೋ।

ಅಪಿ ಸಮ್ಪಿಹಿತೇ ಕೂಪೇ, ಕತವಿಜ್ಜೋ ಪಕಾಸತೇ॥

೩೩೩.

ಕೋಸಜ್ಜಂ ಭಯತೋ ದಿಸ್ವಾ, ವೀರಿಯಾರಮ್ಭಞ್ಚ ಖೇಮತೋ।

ಆರದ್ಧವೀರಿಯಾ ಹೋಥ, ಏಸಾ ಬುದ್ಧಾನುಸಾಸನೀ॥

೩೩೪.

ವಿವಾದಂ ಭಯತೋ ದಿಸ್ವಾ, ಅವಿವಾದಞ್ಚ ಖೇಮತೋ।

ಸಮಗ್ಗಾ ಸಖಿಲಾ ಹೋಥ, ಏಸಾ ಬುದ್ಧಾನುಸಾಸನೀ॥

೩೩೫.

ಪಮಾದಂ ಭಯತೋ ದಿಸ್ವಾ, ಅಪ್ಪಮಾದಞ್ಚ ಖೇಮತೋ।

ಭಾವೇಥಟ್ಠಙ್ಗಿಕಂ ಮಗ್ಗಂ, ಏಸಾ ಬುದ್ಧಾನುಸಾಸನೀ॥

೩೩೬.

ಗರಹಾ ಚ ಪಸಂಸಾ ಚ, ಅನಿಚ್ಚಾ ತಾವಕಾಲಿಕಾ।

ಅಪ್ಪಕಾಚೇಕದೇಸಾವ, ನ ತಾ ಇಕ್ಖೇಯ್ಯ ಪಣ್ಡಿತೋ।

ಧಮ್ಮಾಧಮ್ಮಂವ ಇಕ್ಖೇಯ್ಯ, ಅತ್ಥಾನತ್ಥಂ ಹಿತಾಹಿತಂ॥