ರಾಜಕಣ್ಡ

೨೫೧.

ಮಹಾಜನಂ ಯೋ ರಞ್ಜೇತಿ, ಚತೂಹಿಪಿ ವತ್ಥೂಹಿ ವಾ।

ರಾಜಾತಿ ವುಚ್ಚತೇ ಲೋಕೇ, ಇತಿ ಸಲ್ಲಕ್ಖಯೇ ವಿದ್ವಾ॥

೨೫೨.

ದಾನಞ್ಚ ಅತ್ಥಚರಿಯಾ, ಪಿಯವಾಚಾ ಅತ್ತಸಮಂ।

ಸಙ್ಗಹಾ ಚತುರೋ ಇಮೇ, ಮುನಿನ್ದೇನ ಪಕಾಸಿತಾ॥

ದಾನಮ್ಪಿ ಅತ್ಥಚರಿಯತಞ್ಚ, ಪಿಯವಾದಿತಞ್ಚ ಸಮಾನತ್ತತಞ್ಚ।

ಕರಿಯಚರಿಯಸುಸಙ್ಗಹಂ ಬಹೂನಂ, ಅನವಮತೇನ ಗುಣೇನ ಯಾತಿ ಸಗ್ಗಂ।

ದಾನಞ್ಚ ಪೇಯ್ಯವಜ್ಜಞ್ಚ, ಅತ್ಥಚರಿಯಾ ಚ ಯಾ ಇಧ।

ಸಮಾನತ್ತತಾ ಚ ಧಮ್ಮೇಸು, ತತ್ಥ ತತ್ಥ ಯಥಾರಹಂ।

ಏತೇ ಖೋ ಸಙ್ಗಹಾ ಲೋಕೇ, ರಥಸ್ಸಾಣೀವ ಯಾಯತೋ॥

೨೫೩.

ದಾನಂ ಸೀಲಂ ಪರಿಚ್ಚಾಗಂ, ಅಜ್ಜವಂ ಮದ್ದವಂ ತಪಂ।

ಅಕ್ಕೋಧಂ ಅವಿಹಿಂಸಞ್ಚ, ಖನ್ತೀ ಚ ಅವಿರೋಧನಂ।

ದಸೇತೇ ಧಮ್ಮೇ ರಾಜಾನೋ, ಅಪ್ಪಮತ್ತೇನ ಧಾರಯ್ಯುಂ॥

೨೫೪.

ಏಕಯಾಮಂ ಸಯೇ ರಾಜಾ, ದ್ವಿಯಾ ಮಞ್ಞೇವ ಪಣ್ಡಿತೋ।

ಘರಾವಾಸೋ ತಿಯಾಮೋವ, ಚತುಯಾಮೋ ತು ಯಾಚಕೋ॥

೨೫೫.

ಅಪುತ್ತಕಂ ಘರಂ ಸುಞ್ಞಂ, ರಟ್ಠಂ ಸುಞ್ಞಂ ಅರಾಜಕಂ।

ಅಸಿಪ್ಪಸ್ಸ ಮುಖಂ ಸುಞ್ಞಂ, ಸಬ್ಬಸುಞ್ಞಂ ದಲಿದ್ದತ್ತಂ॥

೨೫೬.

ಧನಮಿಚ್ಛೇ ವಾಣಿಜೇಯ್ಯ, ವಿಜ್ಜಮಿಚ್ಛೇ ಭಜೇ ಸುತಂ।

ಪುತ್ತಮಿಚ್ಛೇ ತರುಣಿತ್ಥಿಂ, ರಾಜಾಮಚ್ಚಂ ಇಚ್ಛಾಗತೇ॥

೨೫೭.

ಪಕ್ಖೀನಂ ಬಲಮಾಕಾಸೋ, ಮಚ್ಛಾನಮುದಕಂ ಬಲಂ।

ದುಬ್ಬಲಸ್ಸ ಬಲಂ ರಾಜಾ, ಕುಮಾರಾನಂ ರುದಂ ಬಲಂ॥

೨೫೮.

ಖಮಾ ಜಾಗರಿಯುಟ್ಠಾನಂ, ಸಂವಿಭಾಗೋ ದಯಿಕ್ಖಣಾ।

ನಾಯಕಸ್ಸ ಗುಣಾ ಏತೇ, ಇಚ್ಛಿತಬ್ಬಾ ಸತಂ ಸದಾ॥

೨೫೯.

ಸಕಿಂ ವದನ್ತಿ ರಾಜಾನೋ, ಸಕಿಂ ಸಮಣಬ್ರಾಹ್ಮಣಾ।

ಸಕಿಂ ಸಪ್ಪುರಿಸಾ ಲೋಕೇ, ಏಸ ಧಮ್ಮೋ ಸನನ್ತನೋ॥

೨೬೦.

ಅಲಸೋ ಗೀಹಿ ಕಾಮಭೋಗೀ ನ ಸಾಧು,

ಅಸಞ್ಞತೋ ಪಬ್ಬಜಿತೋ ನ ಸಾಧು।

ರಾಜಾ ನ ಸಾಧು ಅನಿಸಮ್ಮಕಾರೀ,

ಯೋ ಪಣ್ಡಿತೋ ಕೋಧನೋ ತಂ ನ ಸಾಧು॥

೨೬೧.

ಆಯಂ ಖಯಂ ಸಯಂ ಜಞ್ಞಾ, ಕತಾಕತಂ ಸಯಂ ಜಞ್ಞಾ।

ನಿಗ್ಗಹೇ ನಿಗ್ಗಹಾರಹಂ, ಪಗ್ಗಹೇ ಪಗ್ಗಹಾರಹಂ॥

೨೬೨.

ಮಾತಾ ಪುತ್ತಕತಂ ಪಾಪಂ, ಸಿಸ್ಸಕತಂ ಗುರು ತಥಾ।

ರಾಜಾ ರಟ್ಠಕತಂ ಪಾಪಂ, ರಾಜಕತಂ ಪುರೋಹಿತೋ॥

೨೬೩.

ಅಕ್ಕೋಧೇನ ಜಿನೇ ಕೋಧಂ, ಅಸಾಧುಂ ಸಾಧುನಾ ಜಿನೇ।

ಜಿನೇ ಕದರಿಯಂ ದಾನೇನ, ಸಚ್ಚೇನಾಲಿಕವಾದಿನಂ॥

೨೬೪.

ಅದನ್ತದಮನಂ ದಾನಂ, ದಾನಂ ಸಬ್ಬತ್ಥಸಾಧಕಂ।

ದಾನೇನ ಪಿಯವಾಚಾಯ, ಉನ್ನಮನ್ತಿ ನಮನ್ತಿ ಚ॥

ಅದನ್ತದಮನಂ ದಾನಂ, ಅದಾನಂ ದನ್ತದೂಸಕಂ।

ದಾನೇನ ಪಿಯವಾಚಾಯ, ಉನ್ನಮನ್ತಿ ನಮನ್ತಿ ಚ॥

೨೬೫.

ದಾನಂ ಸಿನೇಹಭೇಸಜ್ಜಂ, ಮಚ್ಛೇರಂ ದೋಸನೋಸಧಂ।

ದಾನಂ ಯಸಸ್ಸೀಭೇಸಜ್ಜಂ, ಮಚ್ಛೇರಂ ಕಪಣೋಸಧಂ॥

೨೬೬.

ನ ರಞ್ಞಾ ಸಮಕಂ ಭುಞ್ಜೇ, ಕಾಮಭೋಗಂ ಕುದಾಚನಂ।

ಆಕಪ್ಪಂ ರಸಭುತ್ತಂ ವಾ, ಮಾಲಾಗನ್ಧವಿಲೇಪನಂ।

ವತ್ಥಸಬ್ಬಮಲಙ್ಕಾರಂ, ನ ರಞ್ಞಾ ಸದಿಸಂ ಕರೇ॥

೨೬೭.

ನ ಮೇ ರಾಜಾ ಸಖಾ ಹೋತಿ, ನ ರಾಜಾ ಹೋತಿ ಸಮಕೋ।

ಏಸೋ ಸಾಮಿಕೋ ಮಯ್ಹನ್ತಿ, ಚಿತ್ತೇ ನಿಟ್ಠಂ ಸಣ್ಠಾಪಯೇ॥

೨೬೮.

ನಾತಿದೂರೇ ಭಜೇ ರಞ್ಞೋ, ನಚ್ಚಾಸನ್ನೇ ಪವಾತಕೇ।

ಉಜುಕೇ ನಾತಿನಿನ್ನೇ ಚ, ನ ಭಜೇ ಉಚ್ಚಮಾಸನೇ।

ಛ ದೋಸೇ ವಜ್ಜೇ ಸೇವಕೋ, ಅಗ್ಗೀವ ಸಂಯತೋ ತಿಟ್ಠೇ॥

ನ ಪಚ್ಛತೋ ನ ಪುರತೋ, ನಾಪಿ ಆಸನ್ನದೂರತೋ।

ನ ಕಚ್ಛೇ ನೋಪಿ ಪಟಿವಾತೇ, ನ ಚಾಪಿ ಓಣತುಣ್ಣತೇ।

ಇಮೇ ದೋಸೇ ವಿವಜ್ಜೇತ್ವಾ, ಏಕಮನ್ತಂ ಠಿತಾ ಅಹು –

೨೬೯.

ಜಪ್ಪೇನ ಮನ್ತೇನ ಸುಭಾಸಿತೇನ,

ಅನುಪ್ಪದಾನೇನ ಪವೇಣಿಯಾ ವಾ।

ಯಥಾ ಯಥಾ ಯತ್ಥ ಲಭೇಥ ಅತ್ಥಂ,

ತಥಾ ತಥಾ ತತ್ಥ ಪರಕ್ಕಮೇಯ್ಯ॥

೨೭೦.

ಕಸ್ಸಕೋ ವಾಣಿಜೋ ಮಚ್ಚೋ, ಸಮಣೋ ಸುತಸೀಲ ವಾ।

ತೇಸು ವಿಪುಲಜಾತೇಸು, ರಟ್ಠಮ್ಪಿ ವಿಪುಲಂ ಸಿಯಾ॥

೨೭೧.

ತೇಸು ದುಬ್ಬಲಜಾತೇಸು, ರಟ್ಠಮ್ಪಿ ದುಬ್ಬಲಂ ಸಿಯಾ।

ತಸ್ಮಾ ಸರಟ್ಠಂ ವಿಪುಲಂ, ಧಾರಯೇ ರಟ್ಠಭಾರವಾ॥

೨೭೨.

ಮಹಾರುಕ್ಖಸ್ಸ ಫಲಿನೋ, ಆಮಂ ಛಿನ್ದತಿ ಯೋ ಫಲಂ।

ರಸಞ್ಚಸ್ಸ ನ ಜಾನಾತಿ, ಬೀಜಞ್ಚಸ್ಸ ವಿನಸ್ಸತಿ॥

೨೭೩.

ಮಹಾರುಕ್ಖೂಪಮಂ ರಟ್ಠಂ, ಅಧಮ್ಮೇನ ಪಸಾಸತಿ।

ರಸಞ್ಚಸ್ಸ ನ ಜಾನಾತಿ, ರಟ್ಠಞ್ಚಸ್ಸ ವಿನಸ್ಸತಿ॥

೨೭೪.

ಮಹಾರುಕ್ಖಸ್ಸ ಫಲಿನೋ, ಪಕ್ಕಂ ಛಿನ್ದತಿ ಯೋ ಫಲಂ।

ರಸಞ್ಚಸ್ಸ ವಿಜಾನಾತಿ, ಬೀಜಞ್ಜಸ್ಸ ನ ನಸ್ಸತಿ॥

೨೭೫.

ಮಹಾರುಕ್ಖೂಪಮಂ ರಟ್ಠಂ, ಧಮ್ಮೇನ ಯೋ ಪಸಾಸತಿ।

ರಸಞ್ಚಸ್ಸ ವಿಜಾನಾತಿ, ರಟ್ಠಞ್ಚಸ್ಸ ನ ನಸ್ಸತಿ॥