ಮರೀಚವಟ್ಟಿ ವಿಹಾರಕಥಾ

೧೮. ತತೋ ರಾಜಾ ಚಿನ್ತೇಸಿ ಮಹಾಮಹಿಣ್ದತ್ಥೇರೋ ಕಿರ ಮಮ ಅಯ್ಯಕಸ್ಸ ದೇವಾನಮ್ಪಿಯತಿಸ್ಸ ರಞ್ಞೋ ಏವಮಾಹ। ನತ್ತಾ ತೇ ಮಹಾರಾಜ ದುಟ್ಠಗಾಮಣಿ ಅಭಯೋ ವಿಸಂ ಹತ್ಥಸತಿಕಂ ಸೋವಣ್ಣಮಾಲಿಂ ಥೂಪಂ ಕಾರೇಸ್ಸತಿ। ಸಙ್ಘಸ್ಸ ಚ ಉಪೋಸಥಾಗಾರಭೂತಂ ನವಭೂಮಕಂ ಲೋಹಪಾಸಾದಂ ಕಾರೇಸ್ಸತೀತಿ ಚಿನ್ತೇತ್ವಾ ಚ ಪನ ಓಲೋಕೇನ್ತೋ ರಾಜಗೇಹೇ ಕರಣ್ಡಕೇ ಠಪಿತಂ ಸುವಣ್ಣಪಟ್ಟಲೇಖಂ ದಿಸ್ವಾ ತಂ ವಾಚೇಸಿ। ಅನಾಗತೇ ಚತ್ತಾಲೀಸಂ ವಸ್ಸಸತಂ ಅತಿಕ್ಕಮ್ಮ ಕಾಕವಣ್ಣತಿಸ್ಸಸ್ಸ ಪುತ್ತೋ ದುಟ್ಠಗಾಮಣಿ ಅಭಯೋ ಇದಞ್ಚಿದಞ್ಚ ಕಾರೇಸ್ಸತೀತಿ ಸುತ್ವಾ ಹಟ್ಠೋ ಉದಗ್ಗೋ ಅಪ್ಪೋಠೇಸಿ-ಅಯ್ಯೇನ ಕಿರ ವತಮ್ಹಿ ದಿಟ್ಠೋ ಮಹಾ ಮಹಿಣ್ದೇನಾತಿ।

ತತೋ ಪಾತೋವ ಮಹಾಮೇಘವನಂ ಗನ್ತ್ವಾ ಭಿಕ್ಖುಸಙ್ಘಂ ಸನ್ನಿಪಾತೇತ್ವಾ ಏತದವೋಚ? ಭನ್ತೇ ಭಿಕ್ಖುಸಙ್ಘಸ್ಸ ಉಪೋಸಥಾಗಾರಂ ಕತ್ವಾ ದೇವವಿಮಾನ ಸದಿಸಂ ಪಾಸಾದಂ ಕಾರೇಸ್ಸಾಮಿ ದೇವಲೋಕಂ ಪೇಸೇತ್ವಾ ಪಟೇ ವಿಮಾನಾಕಾರಂ ಲಿಖಾಪೇತ್ವಾ ಮೇ ದೇಥಾತಿ? ಸಙ್ಘೋ ಅಟ್ಠ ಖೀಣಾಸವೇ ಪೇಸೇಸಿ। ತೇ ತಾವತಿಂಸಭವನಂ ಗನ್ತ್ವಾ ದ್ವಾದಸಯೋಜನುಬ್ಬೇಧಾ ಅಟ್ಠಚತ್ತಾಲೀಸ ಯೋಜನ ಪರಿಕ್ಖೇಪಂ ಕೂಟಾಗಾರಂ ಸಹಸ್ಸ ಪತಿಮಣ್ಡಿತಂ ನವಭೂಮಕಂ ಸಹಸ್ಸಗಬ್ಭಂ ಖೀರಣ ದೇವಧೀತಾಯ ಪುಞ್ಞಾನುಭಾವನಿಬ್ಬತ್ತಂ ಆಕಾಸಟ್ಠಂ ರತನಪಾಸಾದಂ ಓಲೋಕೇತ್ವಾ ಹಿಙ್ಗುಲಕೇನ ಪಟೇ ತದಾಕಾರಂ ಲಿಖಿತ್ವಾ ಆನೇತ್ವಾ ಭಿಕ್ಖುಸಙ್ಘಸ್ಸ ಅದಂಸು ಸಙ್ಘೋ ರಞ್ಞೋ ಪಾಹೇಸಿ।

ತಂ ದಿಸ್ವಾ ರಾಜಾ ತುಟ್ಠಮಾನಸೋ ತದಾ ತಂ ಲೇಖತುಲ್ಯಂ ಲೋಹಪಾಸಾದಂ ಕಾರೇಸಿ। ಕಮ್ಮನ್ತಾರಮ್ಭ ಕಾಲೇ ಪನ ಚತುಸು ದ್ವಾರೇಸು ಅಟ್ಠಸತಸಹಸ್ಸಾನಿ ಹಿರಞ್ಞಾನಿ ಠಪಾಪೇಸಿ ತದಾ ಚತುಸು ದ್ವಾರೇಸು ಸಹಸ್ಸ ಸಹಸ್ಸಂ ವತ್ಥಪುಟಾನಿ ಚೇವ ಗುಳ-ತೇಲ-ಸಕ್ಖರ-ಮಧುಪುರಾ ಅನೇಕಸಹಸ್ಸಚಾಟಿಯೋ ಚ ಠಪಾಪೇಸಿ। ಪಾಸಾದೇ ಅಮೂಲಕೇನ ಕಮ್ಮಂ ನ ಕಾತಬ್ಬನ್ತಿ ಭೇರಿಂ ಚಾರಪೇತ್ವಾ ಅಮೂಲಕೇನ ಕತಕಮ್ಮಂ ಅಗ್ಘಾಪೇತ್ವಾ ಕಾರಕಾನಂ ಮೂಲಂ ದಾಪೇಸಿ। ಪಾಸಾದೋ ಏಕೇಕೇನ ಪಸ್ಸೇನ ಹತ್ಥಸತ ಹತ್ಥಸತಪ್ಪಮಾಣೋ ಅಹೋಸಿ ತಥಾ ಉಬ್ಬೇಧನ, ನವಭೂಮಾಯೋ ಚಸ್ಸ ಅಹೇಸುಂ ಏಕೇಕಿಸ್ಸಾ ಭೂಮಿಯಾ ಸತಂ ಸತಂ ಕೂಟಾಗಾರಾನಿ, ತಾನಿ ಸಬ್ಬಾನಿಪಿ ರತನಖಚಿತಾನಿ ಚೇವ ಸುವಣ್ಣ ಕಿಙ್ಕಿಣಿಕಾಪನ್ತಿ ಪರಿಕ್ಖಿತ್ತಾನಿ ಚ ಅಹೇಸುಂ ತೇಸಂ ಕೂಟಾಗಾರಾನಿ ನಾನಾರತನ ಭೂಸಿಕಾ ಪವಾಳ ವೇದಿಕಾ ಚೇವ, ತಾಸಂ ಪದುಮಾನಿ ಚ ನಾನಾರತನ ವಿಚಿತ್ತಾನೇವ ಅಹೇಸುಂ। ತಥಾ ಸಹಸ್ಸಗಬ್ಭಾ ಚ ನಾನಾರತನ ಖಚಿತಾ ಸೀಯಪಞ್ಜರ ವಿಭೂಸಿತಾ ಚ। ವೇಸ್ಸವನಸ್ಸ ನಾರಿವಾಭನಯಾನಂ ಸುತ್ವಾ ತದಾಕಾರಂ ಮಜ್ಝೇ ರತನ ಮಣ್ಡಪಂ ಕಾರೇಸಿ।

ಸೋ ಅನೇಕೇಹಿ ರತನತ್ಥಮ್ಭೇಹಿ ಸೀಹವ್ಯಗ್ಘಾದಿ ರೂಪೇಹಿ ದೇವತಾ ರೂಪೇಹಿ ಚ ಪತಿಮಣ್ಡಿತೋ ಸಮನ್ತತೋ ಓಲಮ್ಬಕ ಮುತ್ತಾ ಜಾಲೇನ ಚ ಪರಿಕ್ಖಿತ್ತೋ ಅಹೋಸಿ ಪವಾಳವೇದಿಕಾ ಚಸ್ಸ ಪುಬ್ಬೇ ವುತ್ತಪ್ಪಕಾರಾವ ಸತ್ತರತನ ವಿಚಿತ್ತಮಣ್ಡಪ ಮಜ್ಝೇ ಪನ ಏಳಿಕಮಯ ಭೂಮಿಯಾ ದನ್ತಮಯ ಪಲ್ಲಙ್ಕೋ ಅಹೋಸಿ ಅಪಸ್ಸೇನಮ್ಪಿ ದನ್ತಮಯಮೇವ, ಸೋ ಸುವಣ್ಣಸೂರಿಯಮಣ್ಡಲೇಹಿ ರಜತ ಚಣ್ದ ಮಣ್ಡಲೇಹಿ ಮುತ್ತಾಮಯ ತಾರಕಾಹಿ ಚ ವಿಚಿತ್ತೋ ತತ್ಥ ತತ್ಥ ಯಥಾರಹಂ ನಾನಾರತನಮಯ ಪದುಮಾನಿ ಚೇವ ಪಸಾದ ಜನಕಾನಿ ಚ ಜಾತಕಾನಿ ಅನ್ತರನ್ತರಾ ಸುವಣ್ಣಲತಾಯೋ ಚ ಕಾರೇಸಿ। ತತ್ಥ ಮಹಗ್ಘಂ ಪಚ್ಚತ್ಥರಣಂ ಅತ್ಥರಿತ್ವಾ ಮನುಞ್ಞಂ ದನ್ತ ವಿಜನಿಂ ಠಪೇಸಿ। ಪವಾಳಮಯ ಪಾದುಕಾ ಕಾರೇಸಿ। ತಥಾ ಪಲ್ಲಙ್ಕಸ್ಸೋಪರಿ ಏಳಿಕಭೂಮಿಯಾ ಪತಿಟ್ಠಿತಂ ರಜತಮಯದಣ್ಡಂ ಸೇತಚ್ಚತ್ತಂ ಕಾರೇಸಿ। ತತ್ಥ ಸತ್ತರತನಮಯಾನಿ ಅಟ್ಠಮಙ್ಗಲಾನಿ ಅನ್ತರನ್ತರಾ ಚ ಮಣಿಮುತ್ತಾಮಯಾ ಚತುಪ್ಪಾದ ಪನ್ತಿಯೋ ಚ ಕಾರೇಸಿ। ಛತ್ತನ್ತೇ ಚಸ್ಸ ರತನಮಯ ಘಣ್ಟಾಪನ್ತಿಯೋ ಓಲಮ್ಬಿಂಸು।

ಪಾಸಾದೋ ಛತ್ತಂ ಪಲ್ಲಙ್ಕೋ ಮಣ್ಡಪೋ ಚಾತಿ ಚತ್ತಾರೋ ಅನಗ್ಘಾ ಅಹೇಸುಂ ಮಹಗ್ಘಾನಿ ಮಞ್ಚಪೀಠಾನಿ ಪಞ್ಞತ್ವೋ ತತ್ಥ ಮಹಗ್ಘಾನಿ ಕಮ್ಬಲಾನಿ ಭುಮ್ಮತ್ಥರಣಾನಿ ಅತ್ಥರಾಪೇಸಿ ಆವಮನ ಕುಮ್ಹಿ ಉಳುಙ್ಕೋ ಚ ಸೋವಣ್ಣಮಯಾಯೇವ ಅಹೇಸುಂ। ಸೇಸ ಪರಿಭೋಗ ಭಣ್ಡೇಸು ವತ್ತಬ್ಬಮೇವ ನತ್ಥಿ ದ್ವಾರಕೋಟ್ಠಕೋಪಿ ಮನೋಹರ ಪಾಕಾರೇನ ಪರಿಕ್ಖಿತ್ತೋ। ತಮ್ಬಲೋಹಿಟ್ಠಿಕಾಭಿ ಪನ ಛಾದಿತತ್ತಾ ಪಾಸಾದಸ್ಸ ಲೋಹಪಾಸಾದೋತಿ ವೋಹಾರೋ ಅಹೋಸಿ।

ಏವಂ ತಾವತಿಂಸಭವನೇ ದೇವಸಭಾ ವಿಯ ಪಾಸಾದಂ ನಿಟ್ಠಾಪೇತ್ವಾ ಸಙ್ಘಂ ಸನ್ನಿಪಾತೇಸಿ। ಮರಿಚವಟ್ಟಿ ವಿಹಾರಮಗೇ ವಿಯ ಸಙ್ಘೋ ಸನ್ನಿಪತಿ। ಪಠಮಭೂಮಿಯಂ ಪುಥುಜ್ಜನಾಯೇವ ಅಟ್ಠಂಸು ದುತಿಯಭೂಮಿಯಾ ತೇಪಿಟಕಾ, ತತಿಯಾದಿಸು ತೀಸು ಭೂಮಿಸು ಕಮೇನ ಸೋತಾಪನ್ನ - ಸಕದಾಗಾಮಿ - ಅನಾಗಾಮಿನೋ, ಉಪರಿ ಚತುಸು ಭೂಮಿಸು ಖೀಣಾಸವಾಯೇವ ಅಟ್ಠಂಸು। ಏವಂ ಸಙ್ಘಂ ಸನ್ನಿಪಾತೇತ್ವಾ ಸಙ್ಘಸ್ಸ ಪಾಸಾದಂ ದತ್ವಾ ಮರಿಚವಟ್ಟಿ ವಿಹಾರಮಹೇ ವಿಯ ಸತ್ತಾಹಂ ಮಹಾದಾನಮದಾಸೀತಿ।

‘‘ಪಾಸಾದಹೇತು ಚತ್ತಾನಿ-ಮಹಾಚಾಗೇನ ರಾಜಿನಾ,

ಅನಗ್ಘಾನಿ ಠಪೇತ್ವಾನ-ಅಹೇಸುಂ ತಿಂಸಕೋಟಿಯೋ।’’

ಪಹಾಯ ಗಮನೀಯನ್ತಂ-ದತ್ವಾನ ಧನಸಞ್ಚಯಂ,

ಅನುಗಾಮಿಧನಂ ದಾನಂ-ಏವಂ ಕುಬ್ಬನ್ತಿ ಪಣ್ಡಿತಾ।

೧೯. ಅಥೇಕದಿವಸಂ ರಾಜಾ ಸತಸಹಸ್ಸಂ ವಿಸ್ಸಜ್ಜೇತ್ವಾ ಮಹಾಬೋಧಿ ಪೂಜಂ ಕಾರೇತ್ವಾ ನಗರಂ ಪವಿಸನ್ತೋ ಥೂಪಟ್ಠಾನೇ ಪತಿಟ್ಠಿತಂ ಸಿಲಾಥೂಪಂ ದಿಸ್ವಾ ಮಹಿಣ್ದತ್ಥೇರೇನ ವುತ್ತವಚನಂ ಅನುಸ್ಸರಿತ್ವಾ ಮಹಾಥೂಪಂ ಕಾರೇಸ್ಸಾಮೀತಿ ಕತಸನ್ನಿಟ್ಠಾನೋ ನಗರಂ ಪವಿಸಿತ್ವಾ ಮಹಂತಲಂ ಆರುಯ್ಹ ಸುಭೋಜನಂ ಭುಞ್ಜಿತ್ವಾ ಸಿರಿಸಯನಗತೋ ಏವಂ ಚಿನ್ತೇಸಿ ಮಯಾ ದಮಿಳೇ ಮದ್ದಮಾನೇನ ಅಯಂ ಲೋಕೋ ಅತಿವಿಯ ಪೀಳಿತೋ, ಕೇನ ನು ಖೋ ಉಪಾಯೇನ ಲೋಕಸ್ಸ ಪಿಳನಂ ಅಕತ್ವಾ ಧಮ್ಮೇನ ಸಮೇನ ಮಹಾ ಚೇತಿಯಸ್ಸ ಅನುಚ್ಛವಿಕಂ ಇಟ್ಠಕಾ ಉಪ್ಪಾದೇಸ್ಸಾಮೀತಿ ತಂ ಚಿನ್ತಿತಂ ಛತ್ತಂ ಅಧಿವತ್ಥಾ ದೇವತಾ ಜಾನಿತ್ವಾ ರಾಜಾ ಏವಂ ಚಿನ್ತೇಸೀತಿ ಉಗ್ಘೋಸೇಸಿ।

ಪರಮ್ಪರಾಯ ದೇವಲೋಕೇಪಿ ಕೋಲಾಹಲಮಹೋಸಿ ತಂ ಞತ್ವಾ ಸಕ್ಕೋ ದೇವರಾಜಂ ವಿಸ್ಸಕಮ್ಮಂ ಆಮನ್ತೇತ್ವಾ’ತಾತ! ವಿಸ್ಸ ಕಮ್ಮ! ದುಟ್ಠಗಾಮಣಿ ಅಭಯ ಮಹಾರಾಜಾ ಮಹಾ ಚೇತಿಯಸ್ಸ ಇಟ್ಠಕತ್ಥಾಯ ಚಿನ್ತೇಸಿ। ತ್ವಂ ಗನ್ತ್ವಾ ಉತ್ತರಪಸ್ಸೇ ನಗರತೋ ಯೋಜನಪ್ಪಮಾಣೇ ಠಾನೇ ಗಮ್ಭಿರ ನದಿಯಾ ತೀರೇ ಇಟ್ಠಕಾ ಮಾಪೇತ್ವಾ ಏಹಿ’ತಿ ಪೇಸೇಸಿ।

ತಂ ಞತ್ವಾ ವಿಸ್ಸಕಮ್ಮ ದೇವಪುತ್ತೋ ಆಗನ್ತ್ವಾ ತತ್ಥೇವ ಮಹಾಚೇತಿಯಾನುಚ್ಛವಿಕಂ ಇಟ್ಠಕಾ ಮಾಪೇತ್ವಾ ದೇವಪುರಮೇವ ಗತೋ। ಪುನ ದಿವಸೇ ಏಕೋ ಸುನಖಲುದ್ದೋ ಸುನಖೇ ಗಹೇತ್ವಾ ಅರಞ್ಞಂ ಗನ್ತ್ವಾ ತತ್ಥ ತತ್ಥ ವಿಚರನ್ತೋ ತಂ ಠಾನಂ ಪತ್ವಾ ಇಟ್ಠಕಾ ಅದಿಸ್ವಾ ಚ ನಿಕ್ಖಮಿ। ತಸ್ಮಿಂ ಖಣೇ ಏಕಾ ಭುಮ್ಮಾ ದೇವತಾ ತಸ್ಸ ಇಟ್ಠಕಾ ದಸ್ಸೇತುಂ ಮಹನ್ತಂ ಗೋಧಾವಣ್ಣಂ ಗಹೇತ್ವಾ ಲುದ್ದಸ್ಸ ಸುನಖಾನಞ್ಚ ಅತ್ತಾನಂ ದಸ್ಸೇತ್ವಾ ತೇಹಿ ಅನುಬದ್ಧೋ ಇಟ್ಠಕಾಭಿಮುಖಂ ಅತ್ತ್ವಾ ಅನ್ತರಧಾಯಿ।

ಸುನಖಲುದ್ದೋ ಇಟ್ಠಕಾ ದಿಸ್ವಾ ಅಮ್ಹಾಕಂ ರಾಜಾ ಥೂಪಂ ಕಾರೇತುಕಾಮೋ, ಮಹನ್ತೋ ವತ ನೋ ಪಣ್ಣಾಕಾರೋ ಲದ್ಧೋತಿ ಹಟ್ಠಮಾನಸೋ ಪುನ ದಿವಸೇ ಪಾತೋಚ ಆಗನ್ತ್ವಾ ಅತ್ತನಾ ದಿಟ್ಠಂ ಇಟ್ಠಕ ಪಣ್ಣಾಕಾರಂ ರಞ್ಞೋ ನಿವೇದೇಸಿ। ರಾಜಾ ತಂ ಸಾಸನಂ ಸುತ್ವಾ ಅತ್ತಮನೋ ಹುತ್ವಾ ತಸ್ಸ ಮಹನ್ತಂ ಸಕ್ಕಾರಂ ಕಾರೇತ್ವಾ ತಂಯೇವ ಇಟ್ಠಕ ಗೋಪನಂ ಕಾರೇಸಿ। ತತೋ ರಾಜಾ ಅಹಮೇವ ಇಟ್ಠಕೋಲೋಕನತ್ಥಾಯ ಗಚ್ಛಾಮಿ - ಕುನ್ತಂ ವಡ್ಢೇಥಾತಿ ಆಹ।

ತಸ್ಮಿಂಯೇವ ಖಣೇ ಪುನ ಅಞ್ಞಂ ಸಾಸನಂ ಆಹರಿಂಸು। ನಗರತೋ ತಿಯೋಜನಮತ್ಥಕೇ ಠಾನೇ ಪುಬ್ಬುತ್ತರಕಣ್ಣೇ ಆಚಾರ ವಿಟ್ಠಿಗಾಮೇ ತಿಯಾಮರತ್ತಿಂ ಅಭಿಪ್ಪವಟ್ಟೇ ದೇವೇ ಸೋಳಸ ಕರೀಸಪ್ಪಮಾಣೇ ಪದೇಸೇ ಸುವಣ್ಣಬೀಜಾನಿ ಉಟ್ಠಹಿಂಸು। ತಾನಿ ಪಮಾಣತೋ ಉಕ್ಕಟ್ಠಾನಿ ವಿದತ್ಥಿಪ್ಪಮಾಣಾನಿ। ಓಮಕಾನಿ ಅಟ್ಠಙ್ಗುಲಪ್ಪಮಾಣಾನಿ ಅಹೇಸುಂ, ಅಥ ವಿಭಾತಾಯ ರತ್ತಿಯಾ ಗಾಮವಾಸಿನೋ ಸುವಣ್ಣಬಿಜಾನಿ ದಿಸ್ವಾ ರಾಛಾ’ರಹಂ ವತ ಭಣ್ಡಂ ಉಪ್ಪನ್ನನ್ತಿ ಸಮನ್ತತೋ ಆರಕ್ಖಾ ಸಂವಿದಹಿತ್ವಾ ಸುವಣ್ಣಬೀಜಾನಿ ಪಾತಿಯಂ ಪೂರೇತ್ವಾ ಆಗನ್ತ್ವಾ ರಞ್ಞೋ ದಸ್ಸೇಸುಂ ರಾಜಾ ತೇಸಮ್ಪಿ ಯಥಾರಹಂ ಸಕ್ಕಾರಂ ಕಾರೇತ್ವಾ ತೇಯೇವ ಸುವಣ್ಣ ಗೋಪಕೇ ಅಕಾಸಿ।

ಅಥ ತಸ್ಮಿಂಯೇವ ಖಣೇ ಅಞ್ಞಂ ಸಾಸನಂ ಆಹರಿಂಸು। ನಗರತೋ ಪಾಚೀನಪಸ್ಸೇ ಸತ್ತಯೋಜನ ಮತ್ಥಕೋ ಠಾನೇ ಪಾರಗಙ್ಗಾಯ ತಮ್ಬವಿಟ್ಠಿ ನಾಮ ಜನಪದೇ ತಮ್ಬಲೋಹಂ ಉಪ್ಪಜ್ಜಿ। ಗಾಮಿಕಾ ಪಾತಿಂ ಪೂರೇತ್ವಾ ತಮ್ಬಲೋಹಂ ಗಹೇತ್ವಾ ಆಗನ್ತ್ವಾ ರಞ್ಞೋ ದಸ್ಸೇಸುಂ ರಾಜಾ ಯಥಾನುರೂಪಂ ಸಕ್ಕಾರಂ ತೇಸಮ್ಪಿ ಕಾರೇತ್ವಾ ತೇಯೇವ ಗೋಪಕೇ ಅಕಾಸಿ।

ತದನನ್ತರಂ ಅಞ್ಞಂ ಸಾಸನಂ ಆಹರಿಂಸು। ಪುರತೋ ಚತುಯೋಜನಮತ್ಥಕೋ ಠಾನೇ ಪುಬ್ಬದಕ್ಖಿಣ ಕಣ್ಣೇ ಸುಮನವಾಪಿಗಾಮೇ ಉಪ್ಪಲಕುರುವಿಣ್ದ ಮಿಸ್ಸಕಾ ಬಹೂ ಮಣಯೋ ಉಪ್ಪಜ್ಜಿಂಸು ಗಾಮಿಕಾ ಪಾತಿಂ ಪೂರೇತ್ವಾ ಆಗನ್ತ್ವಾ ಮಾನಯೋ ರಞ್ಞೋ ದಸ್ಸೇಸುಂ। ರಾಜಾ ತೇಸಮ್ಪಿ ಸಕ್ಕಾರಂ ಕಾರೇತ್ವಾ ತೇಯೇವ ಗೋಪಕೇ ಅಕಾಸಿ।

ತದನನ್ತರಂ ಅಞ್ಞಮ್ಪಿ ಸಾಸನಂ ಆಹರಿಂಸು। ನಗರತೋ ದಕ್ಖಿಣ ಪಸ್ಸೇ ಅಟ್ಠಯೋಜನ ಮತ್ಥಕೇ ಠಾನೇ ಅಮ್ಬಟ್ಠಕೋಲ ಜನಪದೇ ಏಕಸ್ಮಿಂ ಲೇಣೇ ರಜತಂ ಉಪ್ಪಜ್ಜಿ ತಸ್ಮಿಂ ಸಮಯೇ ನಗರವಾಸಿಕೋ ಏಕೋ ವಾಣಿಜೋ ಬಹೂಹಿ ಸಕಟೇಹಿ ಹಳಿದ್ದಿ ಸಿಙ್ಗಿವೇರಾದೀನಮತ್ಥಾಯ ಮಲಯಂ ಗತೋ, ಲೇಣಸ್ಸ ಅವಿದೂರೇ ಸಕಟಾನಿ ಮುಞ್ಚಿತ್ವಾ ಪತೋದದಾರುಂ ಪರಿಯೇಸನ್ತೋ ತಂ ಪಬ್ಬತಂ ಅಭಿರೂಳ್ಹೋ ಏಕಂ ಪಣಸಯಟ್ಠಿಂ ಅದ್ದಸ।

ತಸ್ಸ ಮಹನ್ತಂ ಚಾಟಿಪ್ಪಮಾಣಂ ಏಕಮೇವ ಪಣಸ ಫಲಂ ನರುಣಯಟ್ಠಿಂ ನಾಮೇತ್ವಾ ಹೇಟ್ಠಾ ಪಾಸಾಣಪಿಟ್ಠಿಯಂ ಅಟ್ಠಾಸಿ। ಸೋ ತಂ ಫಲಭಾರೇನ ನಮಿತಂ ದಿಸ್ವಾ ಉಪಗನ್ತ್ವಾ ಹತ್ಥೇನ ಪರಾಮಸಿತ್ವಾ ಪಕ್ಕಭಾವಂ ಞತ್ವಾ ವಣ್ಟಂ ಛಿಣ್ದಿ ಪಣಸಯಟ್ಠಿ ಉಗ್ಗನ್ತ್ವಾ ಯಟಾಟ್ಠಾನಂ ಅಟ್ಠಾಸಿ ವಾಣಿಜೋ ಅಗ್ಗಂ ದತ್ವಾ ಭುಞ್ಜಿಸ್ಸಾಮೀತಿ ಚಿನ್ತೇತ್ವಾ ಕಾಲಂ ಘೋಸೇಸಿ। ತದಾ ಚತ್ತಾರೋ ಖೀಣಾಸವ ಆಗನ್ತ್ವಾ ತಸ್ಸ ಪುರತೋ ಪಾತುರಹೇಸುಂ। ವಾಣಿಜೋ ತೇ ದಿಸ್ವಾ ಅತ್ತಮನೋ ಪಾದೇ ವನ್ದಿತ್ವಾ ನಿಸೀದಾಪೇತ್ವಾ ತಸ್ಸ ಫಲಸ್ಸ ವಣ್ಟಾಸಮನ್ತಾ ವಾಸಿಯಾ ತಚ್ಛೇತ್ವಾ ಅಪಸ್ಸಯಂ ಲುಞ್ಚಿತ್ವಾ ಅಪನಾಮೇಸಿ। ಸಮನ್ತತೋ ಯುಸಂ ಓತರಿತ್ವಾ ಅಪಸ್ಸಯಾನಿತಂ ಆವಾಟಂ ಪೂರೇಸಿ ವಾಣಿಜೋ ಮನೋಸಿಲೋದಕವಣ್ಣ ಪಣಸಯುಸಂ ಪತ್ತೇ ಪೂರೇತ್ವಾ ಅದಾಸಿ। ತೇ ಖೀಣಾಸವಾ ತಸ್ಸ ಪಸ್ಸನ್ತಸ್ಸೇವ ಆಕಾಸಮಬ್ಭುಗ್ಗನ್ತ್ವಾ ಪಕ್ಕಮಿಂಸು।

ಸೋ ಪುನ ಕಾಲಂಘೋಸೇಸಿ ಅಞ್ಞೇ ಚತ್ತರೋ ಖೀಣಾಸವಾ ಆಗಮಿಂಸು। ತೇಸಮ್ಪಿ ಹತ್ಥತೋ ಪತ್ತೇ ಗಹೇತ್ವಾ ಸುವಣ್ಣವಣ್ಣೇಹಿ ಪನ ಸಮಿಞ್ಜೇಹಿ ಪೂರೇತ್ವಾ ಅದಾಸಿ ತೇಸು ತಯೋ ಥೇರಾ ಆಕಾಸೇನ ಪಕ್ಕಮಿಂಸು ಇತರೋ ಇಣ್ದಗುತ್ತತ್ಥೇರೋ ನಾಮ ಖೀಣಾಸವೋ ತಸ್ಸ ತಂ ರಜತಂ ದಸ್ಸೇತುಕಾಮೋ ಉಪರಿ ಪಬ್ಬತಾ ಓತರಿತ್ವಾ ತಸ್ಸ ಲೇಣಸ್ಸ ಅವಿದೂರೇ ನಿಸೀದಿತ್ವಾ ಪಣಸ ಮಿಞ್ಜಂ ಪರಿಭುಞ್ಜತಿ ಉಪಾಸಕೋ ಥೇರಸ್ಸ ಗತಕಾಲೇ ಅವಸೇಸ ಮಿಞ್ಜಂ ಅತ್ತನಾಪಿ ಖಾದಿತ್ವಾ ಸೇಸಕಂ ಭಣ್ಡಿಕಂ ಕತ್ವಾ ಆದಾಯ ಗಚ್ಛನ್ತೋ ಥೇರಂ ದಿಸ್ವಾ ಉದಕಞ್ಚ ಪತ್ತಧೋವನಸಾಖಞ್ಚ ಅದಾಸಿ।

ಥೇರೋಪಿ ಲೇಣದ್ವಾರೇನ ಸಕಟ ಸಮೀಪಗಾಮಿ ಮಗ್ಗಂ ಮಾಪೇತ್ವಾ ಇಮಿನಾ ಮಗ್ಗೇನ ಗಚ್ಛ ಉಪಾಸಕಾತಿ ಆಹ। ಸೋ ಥೇರಂ ವನ್ದಿತ್ವಾ ತೇನ ಮಗ್ಗೇನ ಗಚ್ಛನ್ತೋ ಲೇಣದ್ವಾರಂ ಪತ್ವಾ ಸಮನ್ತಾ ಲೇಣಂ ಓಲೋಕೇನ್ತೋ ತಂ ರಜತರಾಸಿಂ ದಿಸ್ವಾ ರಜತಪಿಣ್ಡಂ ಗಹೇತ್ವಾ ಚಾಸಿಯಾ ಛಿಣ್ದಿತ್ವಾ ರಜತಭಾವಂ ಞತ್ವಾ ಮಹನ್ತಂ ಸಜ್ಝಪಿಣ್ಡಂ ಗಹೇತ್ವಾ ಸಕಟ ಸನ್ತಿಕಂ ಗನ್ತ್ವಾ ತಿಣೋದಕ ಸಮ್ಪನ್ನೇ ಠಾನೇ ಸಕಟಾನಿ ನಿವೇಸೇತ್ವಾ ಲಹುಂ ಅನುರಾಧಪುರಂ ಗನ್ತ್ವಾ ರಞ್ಞ್ಞೋ ದಸ್ಸೇತ್ವಾ ತಮತ್ಥಂ ನಿವೇದೇಸಿ ರಾಜಾ ತಸ್ಸಾಪಿ ಯಥಾರಹಂ ಸಕ್ಕಾರಂ ಕಾರೇಸಿ।

ತದನ್ತರಂ ಅಞ್ಞಮ್ಪಿ ಸಾಸನಂ ಆಹರಿಂಸು ನಗರತೋ ಪಚ್ಛಿಮ ದಿಸಾಭಾಗೇ ಪಞ್ಚ ಯೋಜನ ಮತ್ಥಕೇ ಠಾನೇ ಉರುವೇಲ ಪಬ್ಬತ ಮಹಾಮಲಕಮತ್ತಾ ಪಚಾಳ ಮಿಸ್ಸಕಾ ಸಟ್ಠಿ ಸಕಟಪ್ಪಮಾಣಮುತ್ತಾ ಸಮುದ್ದತೋ ಥಲಮುಗ್ಗಮಿಂಸು ಕೇವಟ್ಟಾ ದಿಸ್ವಾ ರಾಜಾರಹಂ ವತ ಭಣ್ಡಂ ಉಪ್ಪನ್ನನ್ತಿ ರಾಸಿಂ ಕತ್ವಾ ಆರಕ್ಖಂ ದತ್ವಾ ಪಾತಿಂ ಪೂರೇತ್ವಾ ಆಗನ್ತ್ವಾ ರಞ್ಞೋ ದಸ್ಸೇತ್ವಾ ತಮತ್ಥಂ ನಿವೇದೇಸುಂ। ರಾಜಾ ತೇಸಮ್ಪಿ ಯಥಾರಹಂ ಸಕ್ಕಾರಂ ಕಾರೇಸಿ।

ಪುನ ಅಞ್ಞಂ ಸಾಸನಂ ಆಹರಿಂಸು ನಗರತೋ ಪಚ್ಛಿಮುತ್ತರ ಕಣ್ಣೇ ಸತ್ತಯೋಜನ ಮತ್ಥಕೇ ಠಾನೇ ಪೇಳಿವಾಪಿ ಗಾಮಸ್ಸ ವಾಪಿಯಾ ಓತಿಣ್ಣ ಕಣ್ದರೇ ಪುಲಿನ ಪುಟ್ಠೇ ನಿಸದಪೋತಪ್ಪಮಾಣ ದೀಘತೋ ವಿದತ್ಥಿಚತುರಙ್ಗುಲಾ ಉಮ್ಮಾಪುಪ್ಫವಣ್ಣಾ ಚತ್ತಾರೋ ಮಹಾಮಣಿ ಉಪ್ಪಜ್ಜಿಂಸು। ಅಥೇಕೋ ಮತ್ತೋ ನಾಮ ಸುನಖಲುದ್ದೋ ಸುನಖೇ ಗಹೇತ್ವಾ ತತ್ಥ ವಿಚರನ್ತೋ ತಂ ಠಾನಂ ಪತ್ವಾ ದಿಸ್ವಾ ರಾಜಾರಹಂ ವತ ಭಣ್ಡನ್ತಿ ವಾಲಿಕಾಹಿ ಪಟಿಚ್ಛಾದೇತ್ವಾ ಆಗನ್ತ್ವಾ ರಞ್ಞೋ ನಿವೇದೇಸಿ। ರಾಜಾ ತಸ್ಸಾಪಿ ಯಥಾರಹಂ ಸಕ್ಕಾರಂ ಕಾರೇಸಿ। ಏವಂ ರಾಜಾ ಥೂಪತ್ಥಾಯ ಉಪ್ಪನ್ನಾನಿ ಇಟ್ಠಕಾದೀನಿ ತದಹೇವ ಅಸ್ಸೋಸಿ ಇಟ್ಠಕ ರಜತಾನಂ ಉಪ್ಪನ್ನಟ್ಠಾನಂ ತೇನೇವ ನಾಮಂ ಲಭಿ।