ಬೋಧಿ ಆಗಮನಕಥಾ
೧೪. ಅನುಲಾದೇವೀ ಪಞ್ಚಹಿ ಕಞ್ಞಾಸತೇಹಿ ಪಞ್ಚಹಿ ಅನ್ತೇಪುರಿಸಾ ಸತೇಹೀತಿ ಮಾತುಗಾಮಸಹಸ್ಸೇನ ಸದ್ಧಿಂ ಸಙ್ಘಮಿತ್ತತ್ಥೇರಿಯಾ ಸನ್ತಿಕೇ ಪಬ್ಬಜಿತ್ವಾ ನಚಿರಸ್ಸೇವ ಸಪರಿವಾರಾ ಅರಹತ್ತೇ ಪತಿಟ್ಠಾಸಿ। ಅರಿಟ್ಠೋಪಿ ಖೋ ರಞ್ಞೋ ಭಾಗಿನೇಯ್ಯೋ ಪಞ್ಚಹಿ ಪುರಿಸ ಸತೇಹಿ ಸದ್ಧಿಂ ಥೇರಸ್ಸ ಸನ್ತಿಕೇ ಪಬ್ಬಜಿತ್ವಾ ಸಪರಿವಾರೋ ನಚಿರಸ್ಸೇವ ಅರಹತ್ತೇ ಪತಿಟ್ಠಾಸಿ। ಅಥೇಕದಿವಸಂ ರಾಜಾ ಬೋಧಿಂ ವನ್ದಿತ್ವಾ ಥೇರೇನ ಸದ್ಧಿಂ ಥೂಪಾರಾಮಂ ಗಚ್ಛತಿ। ತಸ್ಸ ಲೋಹಪಾಸಾದಟ್ಠಾನಂ ಸಮ್ಪತ್ತಸ್ಸ ಪುರಿಸಾ ಪುಪ್ಫಾನಿ ಆಹರಿಂಸು ರಾಜಾ ಥೇರಸ್ಸ ಪುಪ್ಫಾನಿ ಅದಾಸಿ। ಥೇರೋ ಪುಪ್ಫೇಹಿ ಲೋಹಪಾಸಾದಟ್ಠಾನಂ ಪೂಜೇಸಿ ಪುಪ್ಫೇಸು ಭೂಮಿಯಾ ಪತಿತ ಮತ್ತೇಸು ಮಹಾಭೂಮಿಚಾಲೋ ಅಹೋಸಿ?
ರಾಜಾ ಕಸ್ಮಾ ಭನ್ತೇ ಭೂಮಿ ಚಲಿತಾನಿ ಪುಚ್ಛಿ। ಇಮಸ್ಮಿಂ ಮಹಾರಾಜ ಓಕಾಸೇ ಅನಾಗತೇ ಸಙ್ಘಸ್ಸ ಉಪೋಸಥಾಗಾರಂ ಭವಿಸ್ಸತಿ। ತಸ್ಸೇತಂ ಪುಬ್ಬನಿಮಿತ್ತನ್ತಿ ಆಹ। ಪುನ ತಸ್ಸ ಮಹಾಚೇತಿಯಟ್ಠಾನಂ ಸಮ್ಪತ್ತಸ್ಸ ಚಮ್ಪಕ ಪುಪ್ಫಾನಿ ಅಭಿಹರಿಂಸು। ತಾನಿಪಿ ರಾಜಾ ಥೇರಸ್ಸ ಅದಾಸಿ। ಥೇರೋ ಮಹಾಚೇತಿಯಟ್ಠಾನಂ ಪುಪ್ಫೇಹಿ ಪೂಜೇತ್ವಾ ವನ್ದಿ ತಾವದೇವ ಮಹಾಪಥವೀ ಸಂಕಮ್ಪಿ। ರಾಜಾ ಭನ್ತೇ ಕಸ್ಮಾ ಪಥವೀ ಕಮ್ಪಿತ್ಥಾತಿ ಪುಚ್ಛಿ। ಮಹಾರಾಜ ಇಮಸ್ಮಿಂ ಠಾನೇ ಅನಾಗತೇ ಬುದ್ಧಸ್ಸ ಭಗವತೋ ಅಸದಿಸೋ ಮಹಾಥೂಪೋ ಭವಿಸ್ಸತಿ। ತಸ್ಸೇತಂ ಪುಬ್ಬನಿಮಿತ್ತನ್ತಿ ಆಹ। ಅಹಮೇವ ಕರೋಮಿ ಭನ್ತೇತಿ। ಅಲಂ ಮಹಾರಾಜ ತುಮ್ಹಾಕಂ ಅಞ್ಞಂ ಬಹುಂ ಕಮ್ಮಂ ಅತ್ಥಿ। ತುಮ್ಹಾಕಂ ಪನ ನನ್ತಾ ದುಟ್ಠಗಾಮಣೀ ಅಭಯೋ ನಾಮ ಕಾರೇಸ್ಸತೀತಿ।
ಅಥ ರಾಜಾ ಸಚೇ ಭನ್ತೇ ಮಯ್ಹಂ ನನ್ತಾ ಕರಿಸ್ಸತಿ। ಕತಂಯೇವ ಮಯಾತಿ ದ್ವಾದಸಹತ್ಥಂ ಪಾಸಾಣತ್ಥಮ್ಹಂ ಆಹರಾಪೇತ್ವಾ ದೇವಾನಮ್ಪಿಯತಿಸ್ಸ ರಞ್ಞೋ ನತ್ತಾ ದುಟ್ಠಗಾಮಣಿ ಅಭಯೋ ನಾಮ ಇಮಸ್ಮಿಂ ಪದೇಸೇ ಥೂಪಂ ಕರೋತೀತಿ ಅಕ್ಖರಾನಿ ಲಿಖಾಪೇತ್ವಾ ಪತಿಟ್ಠಾಪೇಸೀತಿ ಅಥ ದೇವಾನಮ್ಪಿಯತಿಸ್ಸರಾಜಾ ಚೇತಿಯಪಪ್ಪತೇ ನಿಹಿತಾ ಸಮ್ಮಾಸಮ್ಬುದ್ಧ ಭುತ್ತ ಪತ್ತ ಪೂರೇತ್ವಾ ಆಹಟಾ ಧಾತುಯೋಹತ್ಥಿಕ್ಖಣ್ಧೇನ ಆಹರಾಪೇತ್ವಾ ಸಕಲತಮ್ಬಪಣ್ಣಿದೀಪೇ
ನಿಧಾಪೇತ್ವಾನ ಸಮ್ಬುದ್ಧ-ಧಾತುಯೋ ಪತ್ತಮತ್ತಕಾ,
ಕಾರಾಪೇಸಿ ಮಹಾರಾಜ-ಥೂಪೇ ಯೋಜನ ಯೋಜನೇತಿ।