ತೇಲಕಟಾಹಗಾಥಾ

॥ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ॥

೧.

ಲಂಕಿಸ್ಸರೋ ಜಯತು ವಾರಣರಾಜಗಾಮೀ

ಭೋಗಿನ್ದಭೋಗ ರುಚಿರಾಯತ ಪೀಣ ಬಾಹು,

ಸಾಧುಪಚಾರನಿರತೋ ಗುಣಸನ್ನಿವಾಸೋ

ಧಮ್ಮೇ ಠಿತೋ ವೀಗತಕೋಧಮದಾವಲೇಪೋ।

೨.

ಯೋ ಸಬ್ಬಲೋಕಮಹಿತೋ ಕರುಣಾಧಿವಾಸೋ

ಮೋಕ್ಖಾಕರೋ ರವಿಕುಲಮ್ಬರ ಪುಣ್ಣ ಚನ್ದೋ,

ಞೇಯ್ಯೋದಧಿಂ ಸುವಿಪುಲಂ ಸಕಲಂ ವಿಬುದ್ಧೋ

ಲೋಕುತ್ತಮಂ ನಮಥ ತಂ ಸಿರಸಾ ಮುನಿನ್ದಂ।

೩.

ಸೋಪಾನಮಾಲಮಮಲಂ ತಿದಸಾಲಯಸ್ಸ

ಸಂಸಾರ ಸಾಗರಸಮುತ್ತರಣಾಯ ಸೇತುಂ,

ಸಬ್ಬಾಗತೀಭಯ ವಿವಜ್ಜಿತ ಖೇಮ ಮಗ್ಗಂ

ಧಮ್ಮಂ ನಮಸ್ಸಥ ಸದಾ ಮುನಿನಾ ಪಣೀತಂ।

೪.

ದೇಯ್ಯಂ ತದಪ್ಪಮಪಿ ಯತ್ಥ ಪಸನ್ನ ಚಿತ್ತಾ

ದತ್ವಾ ನರಾ ಫಲಮುಳಾರತರಂ ಲಭನ್ತೇ,

ತಂ ಸಬ್ಬದಾ ದಸಬಲೇನಪಿ ಸುಪ್ಪಸತ್ಥಂ

ಸಙ್ಘಂ ನಮಸ್ಸಥ ಸದಾಮಿತಪುಞ್ಞಖೇತ್ತಂ।

೫.

ತೇಜೋ ಬಲೇನ ಮಹತಾ ರತನತ್ತಯಸ್ಸ

ಲೋಕತ್ತಯಂ ಸಮಧಿಗಚ್ಛತಿ ಯೇನ ಮೋಕ್ಖಂ,

ರಕ್ಖಾ ನ ಚತ್ಥಿ ಚ ಸಮಾ ರತನತ್ತಯಸ್ಸ

ತಸ್ಮಾ ಸದಾ ಭಜಥ ತಂ ರತನತ್ತಯಂ ಭೋ।

೬.

ಲಂಕಿಸ್ಸರೋ ಪರಹಿತೇಕರತೋ ನಿರಾಸೋ

ರತ್ತಿಮ್ಪಿ ಜಾಗರರತೋ ಕರುಣಾಧಿವಾಸೋ,

ಲೋಕಂ ವಿಬೋಧಯತಿ ಲೋಕಹಿತಾಯ ಕಾಮಂ

ಧಮ್ಮಂ ಸಮಾಚರಥ ಜಾಗರಿಯಾನುಯುತ್ತಾ।

೭.

ಸತ್ತೋಪಕಾರ ನಿರತಾ ಕುಸಲೇ ಸಹಾಯಾ

ಭೋ ದುಲ್ಲಭಾ ಭುವಿ ನರಾ ವಿಹತಪ್ಪಮಾದಾ,

ಲಂಕಾಧಿಪಂ ಗುಣಧನಂ ಕುಸಲೇ ಸಹಾಯಂ

ಆಗಮ್ಮ ಸಂಚರಥ ಧಮ್ಮಮಲಂ ಪಮಾದಂ।

೮.

ಧಮ್ಮೋ ತಿಲೋಕ ಸರಣೋ ಪರಮೋ ರಸಾನಂ

ಧಮ್ಮೋ ಮಹಗ್ಘರತನೋ ರತನೇಸು ಲೋಕೇ,

ಧಮ್ಮೋ ಭವೇ ತಿಭವದುಕ್ಖ ವಿನಾಸಹೇತು

ಧಮ್ಮಂ ಸಮಾಚರಥ ಜಾಗರಿಯಾನುಯುತ್ತಾ।

೯.

ನಿದ್ದಂ ವಿನೋದಯಥ ಭಾವಯಥಪ್ಪಮೇಯ್ಯಂ

ದುಕ್ಖಂ ಅನಿಚ್ಚಮ್ಪಿ ಚೇಹ ಅನತ್ತತಞ್ಚ,

ದೇಹೇ ರತಿಂ ಜಹಥ ಜ ಜಜ್ಜರಭಾಜನಾಭೋ

ಧಮ್ಮಂ ಸಮಾಚರಥ ಜಾಗರಿಯಾನುಯುತ್ತಾ।

೧೦.

ಓಕಾಸ ಮಜ್ಜ ಮಮ ನತ್ಥಿ ಸುವೇ ಕರಿಸ್ಸಂ

ಧಮ್ಮಂ ಇತೀಹಲಸತಾ ಕುಸಲಪ್ಪಯೋಗೇ,

ನಾ’ಲಂ ತಿಯದ್ಧಸು ತಥಾ ಭುವನತ್ತಯೇ ಚ

ಕಾಮಂ ನ ಚತ್ಥಿ ಮನುಜೋ ಮರಣಾ ಪಮುತ್ತೋ।

೧೧.

ಖಿತ್ತೋ ಯಥಾ ನಭಸಿ ಕೇನಚಿದೇವ ಲೇಡ್ಡು

ಭೂಮಿಂ ಸಮಾಪತ್ತಿ ಭಾರತಯಾ ಖಣೇನ,

ಜಾತತ್ತಮೇವ ಖಲು ಕಾರಣಮೇಕಮತ್ರ

ಲೋಕಂ ಸದಾ ನನು ಧುವಂ ಮರಣಾಯ ಗನ್ತುಂ।

೧೨.

ಕಾಮಂ ನರಸ್ಸ ಪತತೋ ಗಿರಿಮುದ್ಧನಾತೋ

ಮಜ್ಝೇ ನ ಕಿಞ್ಚಿ ಭಯನಿಸ್ಸರಣಾಯ ಹೇತು,

ಕಾಮಂ ವಜನ್ತಿ ಮರಣಂ ತಿಭವೇಸು ಸತ್ತಾ

ಭೋಗೇ ರತಿಂ ಪಜಹಥಾಪಿ ಚ ಜೀವಿತೇ ಚ।

೧೩.

ಕಾಮಂ ಪತನ್ತಿ ಮಹಿಯಾ ಖಲು ವಸ್ಸಧಾರಾ

ವಿಜ್ಜುಲ್ಲತಾ ವಿತತಮೇಘ ಮುಖಾ ಪಮುತ್ತಾ,

ಏವಂ ನರಾ ಮರಣಭೀಮ ಪಪಾತಮಜ್ಝೇ

ಕಾಮಂ ಪತನ್ತಿ ನಹಿ ಕೋಚಿ ಭವೇಸು ನಿಚ್ಚೋ।

೧೪.

ವೇಲಾತಟೇ ಪಟುತರೋರು ತರಂಗಮಾಲಾ

ನಾಸಂ ವಜನ್ತಿ ಸತತಂ ಸಲಿಲಾಲಯಸ್ಸ,

ನಾಸಂ ತಥಾ ಸಮುಪಯನ್ತಿ ನರಾಮರಾನಂ

ಪಾಣಾನಿ ದಾರುಣತರೇ ಮರಣೋದಧಿಮ್ಹಿ।

೧೫.

ರುದ್ಧೋಪಿ ಸೋ ರಥವರಸ್ಸಗಜಾಧಿಪೇಹಿ

ಯೋಧೇಹಿ ಚಾಪಿ ಸಬಲೇಹಿ ಚ ಸಾಯುಧೇಹಿ,

ಲೋಕಂ ವಿವಂಚಿಯ ಸದಾ ಮರಣೂಸಭೋ ಸೋ

ಕಾಮಂ ನಿಹನ್ತಿ ಭುವನತ್ತಯ ಸಾಲಿ ದಣ್ಡಂ।

೧೬.

ಭೋ ಮಾರುತೇನ ಮಹತಾ ವಿಹತೋ ಪದೀಪೋ

ಖಿಪ್ಪಂ ವಿನಾಸ ಮುಖಮೇತಿ ಮಹಪ್ಪಭೋಪಿ,

ಲೋಕೇ ತಥಾ ಮರಣಚಣ್ಡ ಸಮೀರಣೇನ

ಖಿಪ್ಪಂ ವಿನಸ್ಸತಿ ನರಾಯುಮಹಾ ಪದೀಪೋ।

೧೭

ರಾಮಜ್ಜುನಪ್ಪಭೂತಿ ಭೂಪತಿ ಪುಂಗವಾ ಚ

ಸೂರಾ ಪುರೇ ರಣಮುಖೇ ವಿಜಿತಾರಿ ಸಙ್ಘಾ,

ತೇಪೀಹ ಚಣ್ಡ ಮರಣೋಘ ನಿಮುಗ್ಗದೇಹಾ

ನಾಸಂ ಗತಾ ಜಗತಿ ಕೇ ಮರಣಾ ಪಮುತ್ತಾ?

೧೮.

ಲಕ್ಖೀ ಚ ಸಾಗರಪಟಾ ಸಧರಾಧರಾ ಚ

ಸಮ್ಪತ್ತಿಯೋ ಚ ವಿವಿಧಾ ಅಪಿ ರೂಪಸೋಭಾ,

ಸಬ್ಬಾ ಚ ತಾ ಅಪಿ ಚ ಮಿತ್ತಸುತಾ ಚ ದಾರಾ

ಕೇ ಚಾಪಿ ಕಂ ಅನುಗತಾ ಮರಣಂ ವಜನ್ತಂ?

೧೯.

ಬ್ರಹ್ಮಾಸುರಾಸುರಗಣಾ ಚ ಮಹಾನುಭಾವಾ

ಗನ್ಧಬ್ಬಕಿನ್ನರಮಹೋರಗರಕ್ಖಸಾ ಚ,

ತೇ ಚಾ ಪರೇ ಚ ಮರಣಗ್ಗಿಸಿಖಾಯ ಸಬ್ಬೇ

ಅನ್ತೇ ಪತನ್ತಿ ಸಲಭಾ ಇವ ಖೀಣಪುಞ್ಞಾ।

೨೦.

ಯೇ ಸಾರಿಪುತ್ತಪಮುಖಾ ಮುನಿಸಾವಕಾ ಚ

ಸುದ್ಧಾ ಸದಾಸವನುದಾ ಪರಮಿದ್ಧಿಪತ್ತಾ,

ತೇ ಚಾಪಿ ಮಚ್ಚುವಳಭಾ ಮುಖ ಸನ್ನಿಮುಗ್ಗಾ

ದೀಪಾನಿವಾನಲಹತಾ ಖಯತಂ ಉಪೇತಾ।

೨೧.

ಬುದ್ಧಾಪಿ ಬುದ್ಧಕಮಲಾಮಲಚಾರುನೇತ್ತಾ

ಬತ್ತಿಂಸಲಕ್ಖಣ ವಿರಾಜಿತ ರೂಪಸೋಭಾ,

ಸಬ್ಬಾಸಚಕ್ಖಯಕರಾಪಿ ಚ ಲೋಕನಾಥಾ

ಸಮ್ಮದ್ದಿತಾ ಮರಣಮತ್ತಮಹಾಗಜೇನ।

೨೨.

ರೋಗಾತುರೇಸು ಕರುಣಾ ನ ಜರಾತುರೇಸು

ಖಿಡ್ಡಾಪರೇಸು ಸುಕುಮಾರಕುಮಾರಕೇಸು,

ಲೋಕಂ ಸದಾ ಹನತಿ ಮಚ್ಚು ಮಹಾಗಜಿನ್ದೋ

ದವಾನಲೋ ವನಮಿವಾವರತಂ ಅಸೇಸಂ।

೨೩.

ಆಪುಣ್ಣತಾ ನ ಸಲಿಲೇ ನ ಜಲಾಸಯಸ್ಸ

ಕಟ್ಠಸ್ಸ ಚಾಪಿ ಬಹುತಾ ನ ಹುತಾಸನಸ್ಸ,

ಭುತ್ವಾನ ಸೋ ತಿಭೂವನಮ್ಪಿ ತಥಾ ಅಸೇಸಂ

ಭೋ ನಿದ್ದಯೋ ನ ಖಲು ಪೀತಿಮುಪೇತಿ ಮಚ್ಚು।

೨೪.

ಭೋ ಮೋಹ ಮೋಹಿತತಯಾ ವಿವಸೋ ಅಧಞ್ಞೋ

ಲೋಕೋ ಪತತ್ಯಪಿಪಿ ಮಚ್ಚುಮುಖೇ ಸುಭೀಮೇ,

ಭೋಗೇ ರತಿಂ ಸಮುಪಯಾತಿ ನಿಹೀನಪಞ್ಞೋ

ದೋಲಾ ತರಙ್ಗಚಪಲೇ ಸುಪಿನೋಪಮೇಯ್ಯೇ।

೨೫.

ಏಕೋಪಿ ಮಚ್ಚುರಭಿಹನ್ತುಮಲಂ ತಿಲೋಕಂ

ಕಿಂ ನಿದ್ದಯಾ ಅಪಿ ಜರಾಮರಣಾನುಯಾಯೀ,

ಕೋ ವಾ ಕರೇಯ್ಯ ವಿಭಸುವೇಸು ಚ ಜೀವಿತಾಸಂ

ಜಾತೋ ನರೋ ಸುಪಿನ ಸಂಗಮ ಸನ್ನಿಭೇಸು।

೨೬.

ನಿಚ್ಚಾತುರಂ ಜಗದಿದಂ ಸಭಯಂ ಸಸೋಕಂ

ದಿಸ್ವಾ ಚ ಕೋಧಮದಮೋಹಜರಾಭಿಭೂತಂ,

ಉಬ್ಬೇಗಮತ್ತಮಪಿ ಯಸ್ಸ ನ ವಿಜ್ಜತೀ ಚೇ

ಸೋ ದಾರುಣೋನ ಮರಣಂ ವತ ತಂ ಧಿರತ್ಥು!

ಭೋ ಭೋ ನ ಪಸ್ಸಥ ಜರಾಸಿಧರಞ್ಹಿ ಮಚ್ಚು

ಮಾಹಞ್ಞಮಾನಮಖಿಲಂ ಸತತಂ ತಿಲೋಕಂ,

ಕಿಂ ನಿದ್ದಯಾ ನಯಥ ವೀತಭಯಾ ತಿಯಾಮಂ

ಧಮ್ಮಂ ಸದಾ’ಸವನುದಂ ಚರಥ’ಪ್ಪಮತ್ತಾ।

೨೮.

ಭಾವೇಥ ಭೋ ಮರಣಮಾರವಿವಜ್ಜನಾಯ

ಲೋಕೇ ಸದಾ ಮರಣ ಸಞ್ಞಮಿಮಂ ಯತತ್ತಾ,

ಏವಞ್ಹಿ ಭಾವನರತಸ್ಸ ನರಸ್ಸ ತಸ್ಸ

ತಣ್ಹಾ ಪಹೀಯತಿ ಸರೀರಗತಾ ಅಸೇಸಾ।

೨೯.

ರೂಪಂ ಜರಾ ಪಿಯತರಂ ಮಲಿನೀಕರೋತಿ

ಸಬ್ಬಂ ಬಲಂ ಹರತಿ ಅತ್ತನಿ ಘೋರರೋಗೋ,

ನಾನೂಪಭೋಗ ಪರಿರಕ್ಖಿತ ಮತ್ತಭಾವಂ

ಭೋ ಮಚ್ಚು ಸಂಹರತಿ ಕಿಂ ಫಲಮತ್ತಭಾವೇ?

೩೦.

ಕಮ್ಮಾನಿಲಾಪಹತರೋಗತರಂಗಭಂಗೇ

ಸಂಸಾರ ಸಾಗರ ಮುಖೇ ವಿತತೇ ವಿಪನ್ನಾ,

ಮಾ ಮಾಪಮಾದಮಕರಿತ್ಥ ಕರೋಥ ಮೋಕ್ಖಂ

ದುಕ್ಖೋದಯೋ ನನು ಪಮಾದಮಯಂ ನರಾನಂ।

೩೧.

ಭೋಗಾ ಚ ಮಿತ್ತಸುತಪೋರಿಸ ಬನ್ಧವಾ ಚ

ನಾರೀ ಚ ಜೀವಿತಸಮಾ ಅಪಿ ಖೇತ್ತವತ್ಥು,

ಸಬ್ಬಾನಿ ತಾನಿ ಪರಲೋಕಮಿತೋ ವಜನ್ತಂ

ನಾನುಬ್ಬಜನ್ತಿ ಕುಸಲಾಕುಸಲಂವ ಲೋಕೇ।

೩೨.

ಭೋ ವಿಜ್ಜುಚಂಚಲತರೇ ಭವಸಾಗರಮ್ಹಿ

ಖಿತ್ತಾ ಪುರಾ ಕತಮಹಾಪವನೇನ ತೇನ,

ಕಾಮಂ ವಿಭಿಜ್ಜತಿ ಖಣೇನ ಸರೀರನಾವಾ

ಹತ್ಥೇ ಕರೋಥ ಪರಮಂ ಗುಣಹತ್ಥಸಾರಂ।

೩೩.

ನಿಚ್ಚಂ ವಿಭಿಜ್ಜತಿಹ ಆಮಕ ಭಾಜನಂವ

ಸಂರಕ್ಖಿತೋಪಿ ಬಹುಧಾ ಇಹ ಅತ್ತಭಾವೋ,

ಧಮ್ಮಂ ಸಮಾಚರಥ ಸಗ್ಗಪತಿಪ್ಪತಿಟ್ಠಂ

ಧಮ್ಮೋ ಸುಚಿಣ್ಣಮಿಹಮೇವ ಫಲಂ ದದಾತಿ।

೩೪.

ರನ್ತ್ವಾ ಸದಾ ಪಿಯತರೇ ದಿವಿ ದೇವರಜ್ಜೇ

ನಮ್ಹಾ ಚವನ್ತಿ ವಿಬುಧಾ ಅಪಿ ಖೀಣಪುಞ್ಞಾ,

ಸಬ್ಬಂ ಸುಖಂ ದಿವಿ ಭುವೀಹ ವಿಯೋಗನಿಟ್ಠಂ

ಕೋ ಪಞ್ಞವಾ ಭವಸುಖೇಸು ರತಿಂ ಕರೇಯ್ಯ?

೩೫.

ಬುದ್ಧೋ ಸಸಾವಕಗಣೋ ಜಗದೇಕನಾಥೋ

ತಾರಾವಲೀಪರಿವುತೋಪಿ ಚ ಪುಣ್ಣಚನ್ದೋ,

ಇನ್ದೋಪಿ ದೇವಮಕುಟಂಕಿತ ಪಾದಕಞ್ಜೋ

ಕೋ ಫೇಣಪಿಣ್ಡ-ನ-ಸಮೋ ತಿಭವೇಸು ಜಾತೋ?

೩೬.

ಲೀಲಾವತಂಸಮಪಿ ಯೋಬ್ಬನ ರೂಪಸೋಭಂ

ಅತ್ತೂಪಮಂ ಪಿಯಜನೇನ ಚ ಸಮ್ಪಯೋಗಂ,

ದಿಸ್ವಾಪಿ ವಿಜ್ಜುಚಪಲಂ ಕುರುತೇ ಪಮಾದಂ

ಭೋ ಮೋಹಮೋಹಿತಜನೋ ಭವರಾಗರತ್ತೋ।

೩೭.

ಪುತ್ತೋ ಪಿತಾ ಭವತಿ ಮಾತು ಪತೀಹ ಪುತ್ತೋ

ನಾರೀ ಕದಾಚಿ ಜನನೀ ಚ ಪಿತಾ ಚ ಪುತ್ತೋ,

ಏವಂ ಸದಾ ವಿಪರಿವತ್ತತಿ ಜೀವಲೋಕೋ

ಚಿತ್ತೇ ಸದಾತಿಚಪಲೇ ಖಲು ಜಾತಿರಙ್ಗೇ।

೩೮.

ರನ್ತ್ವಾ ಪುರೇ ವಿವಿಧಫುಲ್ಲಲತಾಕುಲೇಹಿ

ದೇವಾಪಿ ನನ್ದನವನೇ ಸುರಸುನ್ದರೀಹಿ,

ತೇ ವೇ’ಕದಾ ವಿತತಕಣ್ಟಕಸಂಕಟೇಸು

ಭೋ ಕೋಟಿಸಿಮ್ಬಲಿವನೇಸು ಫುಸನ್ತಿ ದುಕ್ಖಂ।

೩೯.

ಭುತ್ವಾ ಸುಧನ್ನಮಪಿ ಕಞ್ಚನಭಾಜನೇಸು

ಸಗ್ಗೇ ಪುರೇ ಸುರವರಾ ಪರಮಿದ್ಧಿಪತ್ತಾ,

ತೇ ಚಾಪಿ ಪಜ್ಜಲಿತಲೋಹಗುಲಂ ಗಿಲನ್ತಿ

ಕಾಮಂ ಕದಾಚಿ ನರಕಾಲಯ ವಾಸಭೂತಾ।

೪೦.

ಭುತ್ವಾ ನರಿಸ್ಸರವರಾ ಚ ಮಹಿಂ ಅಸೇಸಂ

ದೇವಾಧಿಪಾ ಚ ದಿವಿ ದಿಬ್ಬಸುಖಂ ಸುರಮ್ಮಂ,

ವಾಸಂ ಕದಾಚಿ ಖುರಸಞ್ಚಿತಭೂತಲೇಸು

ತೇ ವಾ ಮಹಾರಥಗಣಾನುಗತಾ ದಿವೀಹ।

೪೧.

ದೇವಙ್ಗನಾ ಲಲಿತಭಿನ್ನತರಙ್ಗಮಾಲೇ

ರಙ್ಗೇ ಮಹಿಸ್ಸರಜಟಾಮಕುಟಾನುಯಾತೇ,

ರನ್ತ್ವಾ ಪುರೇ ಸುರವರಾ ಪಮದಾಸಹಾಯಾ

ತೇ ಚಾಪಿ ಘೋರತರವೇತರಣಿಂ ಪತನ್ತಿ।

೪೨.

ಫುಲ್ಲಾನಿ ಪಲ್ಲವಲತಾಫಲಸಂಕುಲಾನಿ

ರಮ್ಮಾನಿ ನನ್ದನವನಾನಿ ಮನೋರಮಾನಿ,

ದಿಬ್ಬಚ್ಛರಾಲಲಿತಪುಣ್ಣದರೀಮುಖಾನಿ

ಕೇಲಾಸಮೇರುಸಿಖರಾನಿ ಚ ಯನ್ತಿ ನಾಸಂ।

೪೩.

ದೋಲಾ’ನಿಲಾ’ನಲತರಂಗಸಮಾ ಹಿ ಭೋಗಾ

ವಿಜ್ಜುಪ್ಪಭಾತಿಚಪಲಾನಿ ಚ ಜೀವಿತಾನಿ,

ಮಾಯಾಮರೀಚಿಜಲಸೋಮಸಮಂ ಸರೀರಂ

ಕೋ ಜೀವಿತೇ ಚ ವಿಭವೇ ಚ ಕರೇಯ್ಯ ರಾಗಂ?

೪೪.

ಕಿಂ ದುಕ್ಖಮತ್ಥಿ ನ ಭವೇಸು ಚ ದಾರುಣೇಸು

ಸತ್ತೋಪಿ ತಸ್ಸ ವಿವಿಧಸ್ಸ ನ ಭಾಜನೋ ಕೋ,

ಜಾತೋ ಯಥಾ ಮರಣರೋಗಜರಾಭಿಭೂತೋ

ಕೋ ಸಜ್ಜನೋ ಭವರತಿಂ ಪಿಹಯೇಯ್ಯ’ಬಾಲೋ?

೪೫.

ಕೇ ವಾಪಿ ಪಜ್ಜಲಿತಲೋಹಗುಲಂ ಗಿಲನ್ತಿ

ಸಕ್ಕಾ ಕಥಞ್ಚಿದಪಿ ಪಾಣಿತಲೇನ ಭೀಮಂ,

ದುಕ್ಖೋದಯಂ ಅಸುಚಿನಿಸ್ಸವನಂ ಅನನ್ತಂ

ಕೋ ಕಾಮಯೇಥ ಖಲು ದೇಹಮಿಮಂ ಅಬಾಲೋ?

೪೬.

ಲೋಕೇ ನ ಮಚ್ಚುಸಮಮತ್ಥಿ ಭಯಂ ನರಾನಂ

ನ ವ್ಯಾಧಿದುಕ್ಖಸಮಮತ್ಥಿ ಚ ಕಿಂಚಿ ದುಕ್ಖಂ,

ಏವಂ ವಿರೂಪಕರಣಂ ನ ಜರಾಸಮಾನಂ

ಮೋಹೇನ ಭೋ ರತಿಮುಪೇತಿ ತಥಾಪಿ ದೇಹೇ।

೪೭.

ನಿಸ್ಸಾರತೋ ನಲಕಲೀಕದಲೀಸಮಾನಂ

ಅತ್ತಾನಮೇವ ಪರಿಹಞ್ಞತಿ ಅತ್ತಹೇತು,

ಸಮ್ಪೋಸಿತೋಪಿ ಕುಸಹಾಯ ಇವಾಕತಞ್ಞೂ

ಕಾಯೋ ನ ಯಸ್ಸ ಅನುಗಚ್ಛತಿ ಕಾಲಕೇರಾ।

೪೮.

ತಂ ಫೇಣಪಿಣ್ಡಸದಿಸಂ ವಿಸಸೂಲಕಪ್ಪಂ

ತೋಯಾ’ನಿಲಾ’ನಲಮಹೀಉರಗಾಧಿವಾಸಂ,

ಜಿಣ್ಣಾಲಯಂವ ಪರಿದುಬ್ಬಲಮತ್ತಭಾವಂ

ದಿಸ್ವಾ ನರೋ ಕಥಮುಪೇತಿ ರತಿಂ ಸಪಞ್ಞೋ?

೪೯.

ಆಯುಕ್ಖಯಂ ಸಮುಪಯಾತಿ ಖಣೇ ಖಣೇಪಿ

ಅನ್ವೇತಿ ಮಚ್ಚು ಹನನಾಯ ಜರಾಸಿಪಾಣೀ,

ಕಾಲಂ ತಥಾ ನ ಪರಿವತ್ತತಿ ತಂ ಅತೀತಂ

ದುಕ್ಖಂ ಇದಂ ನನು ಭವೇಸು ಅಚಿನ್ತನೀಯಂ?

೫೦.

ಅಪ್ಪಾಯುಕಸ್ಸ ಮರಣಂ ಸುಲಭಂ ಭವೇಸು

ದೀಘಾಯುಕಸ್ಸ ಚ ಜರಾ ವ್ಯಸನಂ ಚ’ನೇಕಂ,

ಏವಂ ಭವೇ ಉಭಯತೋಪಿ ಚ ದುಕ್ಖಮೇವ

ಧಮ್ಮಂ ಸಮಾಚರಥ ದುಕ್ಖವಿನಾಸನಾಯ।

೫೧.

ದುಕ್ಖಗ್ಗಿನಾ ಸುಮಹತಾ ಪರಿಪೀಳಿತೇಸು

ಲೋಕತ್ತಯಸ್ಸ ವಸತೋ ಭವವಾರಕೇಸು,

ಸಬ್ಬತ್ತತಾ ಸುಚರಿತಸ್ಸ ಪಮಾದಕಾಲೋ

ಭೋ ಭೋ ನ ಹೋತಿ ಪರಮಂ ಕುಸಲಂ ಚಿಣಾಥ।

೫೨.

ಅಪ್ಪಂ ಸುಖಂ ಜಲಲವಂ ವಿಯ ಭೋ ತಿಣಗ್ಗೇ

ದುಕ್ಖನ್ತು ಸಾಗರಜಲಂ ವಿಯ ಸಬ್ಬಲೋಕೇ,

ಸಂಕಪ್ಪನಾ ತದಪಿ ಹೋತಿ ಸಭಾವತೋ ಹಿ

ಸಬ್ಬಂ ತಿಲೋಕಮಪಿ ಕೇವಲದುಕ್ಖಮೇವ।

೫೩.

ಕಾಯೋ ನ ಯಸ್ಸ ಅನುಗಚ್ಛತಿ ಕಾಯಹೇತು

ಬಾಲೋ ಅನೇಕವಿಧಮಾಚರತೀಹ ದುಕ್ಖಂ,

ಕಾಯೋ ಸದಾ ಕಲಿ ಮಲಾಕಲಿಲಞ್ಹಿ ಲೋಕೇ

ಕಾಯೇ ರತೋ’ನವರತಂ ವ್ಯಸನಂ ಪರೇತಿ

೫೪.

ಮೀಳ್ಹಾಕರಂ ಕಲಿಮಲಾಕರಮಾಮಗನ್ಧಂ

ಸೂಳಾಸಿಸಲ್ಲವಿಸಪನ್ನಗರೋಗಭೂತಂ,

ದೇಹಂ ವಿಪಸ್ಸಥ ಜರಾಮರಣಾಧಿವಾಸಂ

ತುಚ್ಛಂ ಸದಾ ವಿಗತಸಾರಮಿಮಂ ವಿನಿನ್ದ್ಯಂ।

೫೫.

ದುಕ್ಖಂ ಅನಿಚ್ಚಮಸುಭಂ ವತ ಅತ್ತಭಾವಂ

ಮಾ ಸಂಕಿಲೇಸಯ ನ ವಿಜ್ಜತಿ ಜಾತು ನಿಚ್ಚೋ,

ಅಮ್ಭೋ ನ ವಿಜ್ಜತಿ ಹಿ ಅಪ್ಪಮಪೀಹ ಸಾರಂ

ಸಾರಂ ಸಮಾಚರಥ ಧಮ್ಮಮಲಂ ಪಮಾದಂ।

೫೬.

ಮಾಯಾಮರೀಚಿಕದಲೀನಲಫೇಣಪುಞ್ಜ-

ಗಂಗಾತರಙ್ಗಜಲಬುಬ್ಬುಲಸನ್ನಿಭೇಸು,

ಖನ್ಧೇಸು ಪಞ್ಚಸು ಛಳಾಯತನೇಸು ತೇಸು

ಅತ್ತಾ ನ ವಿಜ್ಜತಿ ಹಿ ಕೋ ನ ವದೇಯ್ಯ’ಬಾಲೋ?

೫೭.

ವಞ್ಝಾಸುತೋ ಸಸವಿಸಾಣಮಯೇ ರಥೇ ತು,

ಧಾವೇಯ್ಯ ಚೇ ಚಿರತರಂ ಸಧುರಂ ಗಹೇತ್ವಾ,

ದೀಪಚ್ಚಿಮಾಲಮಿವ ತಂ ಖಣಭಙ್ಗಭೂತಂ

ಅತ್ತಾತಿ ದುಬ್ಬಲತರನ್ತು ವದೇಯ್ಯ ದೇಹಂ।

೫೮.

ಬಾಲೋ ಯಥಾ ಸಲಿಲಬುಬ್ಬುಲಭಾಜನೇನ

ಆಕಣ್ಠತೋ ವತ ಪಿಬೇಯ್ಯ ಮರೀಚಿತೋಯಂ,

ಅತ್ತಾನಿ ಸಾರರಹಿತಂ ಕದಲೀಸಮಾನಂ

ಮೋಹಾ ಭಣೇಯ್ಯ ಖಲು ದೇಹಮಿಮಂ ಅನತ್ತಂ।

೫೯.

ಯೋ’ದುಮ್ಬರಸ್ಸ ಕುಸುಮೇನ ಮರೀಚಿತೋಯಂ

ವಾಸಂ ಯದಿಚ್ಛತಿ ಸ ಖೇದಮುಪೇತಿ ಬಾಲೋ,

ಅತ್ತಾನಮೇವ ಪರಿಹಞ್ಞತಿ ಅತ್ತಹೇತು

ಅತ್ತಾ ನ ವಿಜ್ಜತಿ ಕದಾಚಿದಪೀಹ ದೇಹೇ।

೬೦.

ಪೋಸೋ ಯಥಾ ಹಿ ಕದಲೀ ಸುವಿನಿಬ್ಭುಜನ್ತೋ

ಸಾರಂ ತದಪ್ಪಮ್ಪಿ ನೋಪಲಭೇಯ್ಯ ಕಾಮಂ,

ಖನ್ಧೇಸು ಪಂಚಸು ಛಳಾಯತನೇಸು ತೇಸು

ಸುಞ್ಞೇಸು ಕಿಞ್ಚಿದಪಿ ನೋಪಲಭೇಯ್ಯ ಸಾರಂ।

೬೧.

ಸುತ್ತಂ ವಿನಾ ನ ಪಟಭಾವಮಿಹತ್ಥಿ ಕಿಂಚಿ

ದೇಹಂ ವಿನಾ ನ ಖಲು ಕೋಚಿ ಮಿಹತ್ಥಿ ಸತ್ತೋ,

ದೇಹೋ ಸಭಾವರಹಿತೋ ಖಣಭಂಗಯುತ್ತೋ,

ಕೋ ಅತ್ತಹೇತು ಅಪರೋ ಭುವಿ ವಿಜ್ಜತೀಹ?

೬೨.

ದಿಸ್ವಾ ಮರೀಚಿಸಲಿಲಞ್ಹಿ ಸುದೂರತೋ ಭೋ

ಬಾಲೋ ಮಿಗೋ ಸಮುಪಧಾವತಿ ತೋಯಸಞ್ಞೀ,

ಏವಂ ಸಭಾವರಹಿತೇ ವಿಪರೀತಸಿದ್ಧೇ

ದೇಹೇ ಪರೇತಿ ಪರಿಕಪ್ಪನಯಾ ಹಿ ರಾಗಂ।

೬೩.

ದೇಹೇ ಸಭಾವರಹಿತೇ ಪರಿಕಪ್ಪಸಿದ್ಧೇ

ಅತ್ತಾ ನ ವಿಜ್ಜತಿ ಹಿ ವಿಜ್ಜುಮಿವನ್ತಲಿಕ್ಖೇ,

ಭಾವೇಥ ಭಾವನರತಾ ವಿಗತಪ್ಪಮಾದಾ

ಸಬ್ಬಾಸವಪ್ಪಹನನಾಯ ಅನತ್ತಸಞ್ಞಂ।

೬೪.

ಲಾಲಾಕರೀಸರುಧಿರಸ್ಸುವಸಾನುಲಿತ್ತಂ

ದೇಹಂ ಇಮಂ ಕಲಿಮಲಾಕಲಿಲಂ ಅಸಾರಂ,

ಸತ್ತಾ ಸದಾ ಪರಿಹರನ್ತಿ ಜಿಗುಚ್ಛನೀಯಂ

ನಾನಾಸುಚೀಹಿ ಪರಿಪುಣ್ಣಘಟಂ ಯಥೇವ।

೬೫.

ಣಹಾತ್ವಾ ಜಲಞ್ಹಿ ಸಕಲಂ ಚತುಸಾಗರಸ್ಸ

ಮೇರುಪ್ಪಮಾಣಮಪಿ ಗನ್ಧಮನುತ್ತರಞ್ಚ,

ಪಪ್ಪೋತಿ ನೇವ ಮನುಜೋ ಹಿ ಸುಚಿಂ ಕದಾಚಿ

ಕಿಂ ಭೋ ವಿಪಸ್ಸಥ ಗುಣಂ ಕಿಮು ಅತ್ತಭಾವೇ?

೬೬.

ದೇಹೋ ಸ ಏವ ವಿವಿಧಾಸುಚಿಸನ್ನಿಧಾನೋ

ದೇಹೋ ಸ ಏವ ವಧಬನ್ಧನರೋಗಭೂತೋ,

ದೇಹೋ ಸ ಏವ ನವಧಾ ಪರಿಭಿನ್ನಗಣ್ಡೋ

ದೇಹಂ ವಿನಾ ಭಯಕರಂ ನ ಸುಸಾನಮತ್ಥಿ।

೬೭.

ಅನ್ತೋಗತಂ ಯದಿವ ಮುತ್ತಕರೀಸಭಾಗೋ

ದೇಹಾ ಬಹಿಂ ಅತಿಚರೇಯ್ಯ ವಿನಿಕ್ಖಮಿತ್ವಾ,

ಮಾತಾ ಪಿತಾ ವಿಕರುಣಾ ಚ ವಿನಟ್ಠಪೇಮಾ

ಕಾಮಂ ಭವೇಯ್ಯು ಕಿಮು ಬನ್ಧುಸುತಾ ಚ ದಾರಾ?

೬೮.

ದೇಹಂ ಯಥಾ ನವಮುಖಂ ಕಿಮಿಸಙ್ಘಗೇಹಂ

ಮಂಸಟ್ಠಿಸೇದರುಧಿರಾಕಲಿಲಂ ವಿಗನ್ಧಂ,

ಪೋಸೇನ್ತಿ ಯೇ ವಿವಿಧಪಾಪಮಿಹಾಚರಿತ್ವಾ

ತೇ ಮೋಹಿತಾ ಮರಣಧಮ್ಮಮಹೋ ವತೇವಂ!

೬೯.

ಗಣ್ಡೂಪಮೇ ವಿವಿಧರೋಗ ನಿವಾಸಭೂತೇ

ಕಾಯೇ ಸದಾ ರುಧಿರಮುತ್ತಕರೀಸಪುಣ್ಣೇ,

ಯೋ ಏತ್ಥ ನನ್ದತಿ ನರೋ ಸಸಿಗಾಲಭಕ್ಖೇ

ಕಾಮಞ್ಹಿ ಸೋಚತಿ ಪರತ್ಥ ಸ ಬಾಲಬುದ್ಧಿ।

೭೦.

ಭೋ ಫೇಣಪಿಣ್ಡಸದಿಸೋ ವಿಯ ಸಾರಹೀನೋ

ಮೀಳ್ಹಾಲಯೋ ವಿಯ ಸದಾ ಪಟಿಕೂಲಗನ್ಧೋ,

ಆಸೀವಿಸಾಲಯನಿಭೋ ಸಭಯೋ ಸದುಕ್ಖೋ

ದೇಹೋ ಸದಾ ಸವತಿ ಲೋಣಘಟೋವ ಭಿನ್ನೋ।

೭೧.

ಜಾತಂ ಯಥಾ ನ ಕಮಲಂ ಭುವಿ ನಿನ್ದನೀಯಂ

ಪಙ್ಕೇಸು ಭೋ ಅಸುಚಿತೋಯ ಸಮಾಕುಲೇಸು,

ಜಾತಂ ತಥಾ ಪರಹಿತಮ್ಪಿ ಚ ದೇಹಭೂತಂ

ತಂ ನಿನ್ದನೀಯಮಿಹ ಜಾತು ನ ಹೋತಿ ಲೋಕೇ।

೭೨.

ದ್ವತ್ತಿಂಸಭಾಗಪರಿಪೂರತರೋ ವಿಸೇಸೋ

ಕಾಯೋ ಯಥಾ ಹಿ ನರನಾರಿ ಗಣಸ್ಸ ಲೋಕೇ,

ಕಾಯೇಸು ಕಿಂ ಫಲಮಿಹತ್ಥಿ ಚ ಪಣ್ಡಿತಾನಂ

ಕಾಮಂ ತದೇವ ನನು ಹೋತಿ ಪರೋಪಕಾರಂ।

೭೩.

ಪೋಸೋನ ಪಣ್ಡಿತತರೇನ ತಥಾಪಿ ದೇಹೋ

ಸಬ್ಬತ್ತನಾ ಚಿರತರಂ ಪರಿಪಾಲನೀಯೋ,

ಧಮ್ಮಂ ಚರೇಯ್ಯ ಸುಚಿರಂ ಖಲು ಜೀವಮಾನೋ

ಧಮ್ಮೇ ಹವೇ ಮಣಿವರೋ ಇವ ಕಾಮದೋ ಭೋ

೭೪.

ಖೀರೇ ಯಥಾ ಸುಪರಿಭಾವಿತಮೋಸಧಮ್ಹಿ

ಸ್ನೇಹೇನ ಓಸಧಬಲಂ ಪರಿಭಾಸತೇವ,

ಧಮ್ಮೋ ತಥಾ ಇಹ ಸಮಾಚರಿತೋ ಹಿ ಲೋಕೇ

ಛಾಯಾವ ಯಾತಿ ಪರಲೋಕ ಮಿತೋ ವಜನ್ತಂ।

೭೫.

ಕಾಯಸ್ಸ ಭೋ ವಿರಚಿತಸ್ಸ ಯಥಾನುಕೂಲಂ

ಛಾಯಾ ವಿಭಾತಿ ರುಚಿರಾಮಲದಪ್ಪಣೇ ತು,

ಕತ್ವಾ ತಥೇವ ಪರಮಂ ಕುಸಲಂ ಪರತ್ಥ

ಸಮ್ಭೂಸಿತಾ ಇವ ಭವನ್ತಿ ಫಲೇನ ತೇನ।

೭೬.

ದೇಹೇ ತಥಾ ವಿವಿಧದುಕ್ಖ ನಿವಾಸಭೂತೇ

ಮೋಹಾ ಪಮಾದವಸಗಾ ಸುಖಸಞ್ಞಮೂಳ್ಹಾ,

ತಿಕ್ಖೇ ಯಥಾ ಖುರಮುಖೇ ಮಧುಲೇಹಮಾನೋ

ಬಾಳ್ಹಞ್ಚ ದುಕ್ಖಮನುಗಚ್ಛತಿ ಹೀನಪಞ್ಞೋ।

೭೭.

ಸಂಕಪ್ಪರಾಗವಿಗತೇ ನಿರತತ್ತಭಾವೇ

ದುಕ್ಖಂ ಸದಾ ಸಮಧಿಗಚ್ಛತಿ ಅಪ್ಪಪಞ್ಞೋ,

ಮೂಳ್ಹಸ್ಸ ಚೇವ ಸುಖಸಞ್ಞಮಿಹತ್ಥಿಲೋಕೇ

ಕಿಂಪಕ್ಕಮೇವ ನನು ಹೋತಿ ವಿಚಾರಮಾನೇ।

೭೮.

ಸಬ್ಬೋಪಭೋಗ ಧನಧಞ್ಞವಿಸೇಸಲಾಭೀ

ರೂಪೇನ ಭೋ ಸ ಮಕರದ್ಧಜಸನ್ನಿಭೋಪಿ,

ಯೋ ಯೋಬ್ಬನೇಪಿ ಮರಣಂ ಲಭತೇ ಅಕಾಮಂ

ಕಾಮಂ ಪರತ್ಥಪರಪಾಣಹರೋ ನರೋ ಹಿ।

೭೯.

ಸೋ ಯಾಚಕೋ ಭವತಿ ಭಿನ್ನಕಪಾಲಹತ್ಥೋ

ಮುಣ್ಡೋ ಧಿಗಕ್ಖರಸತೇಹಿ ಚ ತಜ್ಜಯನ್ತೋ,

ಭಿಕ್ಖಂ ಸದಾರಿಭವನೇ ಸಕುಚೇಲವಾಸೋ

ದೇಹೇ ಪರತ್ಥಿ ಪರಚಿತ್ತಹರೋ ನರೋ ಯೋ।

೮೦.

ಇತ್ಥೀ ನಮುಞ್ಚತಿ ಸದಾ ಪುನ ಇತ್ಥಿಭಾವಾ

ನಾರೀ ಸದಾ ಭವತಿ ಸೋ ಪುರಿಸೋ ಪರತ್ಥ,

ಯೋ ಆಚರೇಯ್ಯ ಪರದಾರಮಲಙ್ಘನೀಯಂ

ಘೋರಞ್ಚ ವಿನ್ದತಿ ಸದಾ ವ್ಯಸನಞ್ಚ ನೇಕಂ।

೮೧.

ದೀನೋ ವಿಗನ್ಧವದನೋ ಚ ಜಳೋ ಅಪಞ್ಞೋ

ಮೂಗೋ ಸದಾ ಭವತಿ ಅಪ್ಪಿಯದಸ್ಸನೋ ಚ,

ಪಪ್ಪೋತಿ ದುಕ್ಖಮತುಲಞ್ಚ ಮನುಸ್ಸಭೂತೋ

ವಾಚಂ ಮುಸಾ ಭಣತಿ ಯೋ ಹಿ ಅಪಞ್ಞಸತ್ತೋ।

೮೨.

ಉಮ್ಮತ್ತಕಾ ವಿಗತಲಜ್ಜಗುಣಾ ಭವನ್ತಿ

ದೀನಾ ಸದಾ ವ್ಯಸನಸೋಕಪರಾಯಣಾ ಚ,

ಜಾತಾ ಭವೇಸು ವಿವಿಧೇಸು ವಿರೂಪದೇಹಾ

ಪೀತ್ವಾ ಹಲಾಹಲವಿಸಂವ ಸುರಂ ವಿಪಞ್ಞಾ।

೮೩.

ಪಾಪಾನಿ ಯೇನ ಇಹ ಆಚರಿತಾನಿ ಯಾನಿ

ಯೋ ವಸ್ಸಕೋಟಿನಹುತಾನಿ ಅನಪ್ಪಕಾನಿ,

ಲದ್ಧಾನ ಘೋರಮತುಲಂ ನರಕೇಸು ದುಕ್ಖಂ

ಪಪ್ಪೋತಿ ಚೇತ್ಥ ವಿವಿಧವ್ಯಸನಞ್ಚ ನೇಕಂ।

೮೪.

ಲೋಕತ್ತಯೇಸು ಸಕಲೇಸು ಸಮಂ ನ ಕಿಂಚಿ

ಲೋಕಸ್ಸ ಸನ್ತಿಕರಣಂ ರತನತ್ತಯೇನ,

ತಂತೇಜಸಾ ಸುಮಹತಾ ಜಿತಸಬ್ಬಪಾಪೋ

ಸೋಹಂ ಸದಾಧಿಗತಸಬ್ಬಸುಖೋ ಭವೇಯ್ಯಂ।

೮೫.

ಲೋಕತ್ತಯೇಸು ಸಕಲೇಸು ಚ ಸಬ್ಬಸತ್ತಾ

ಮಿತ್ತಾ ಚ ಮಜ್ಝರಿಪುಬನ್ಧುಜನಾ ಚ ಸಬ್ಬೇ,

ತೇ ಸಬ್ಬದಾ ವಿಗತರೋಗಭಯಾ ವಿಸೋಕಾ

ಸಬ್ಬಂ ಸುಖಂ ಅಧಿಗತಾ ಮುದಿತಾ ಭವನ್ತು।

೮೬.

ಕಾಯೋ ಕರೀಸಭರಿತೋ ವಿಯ ಭಿನ್ನಕುಮ್ಭೋ

ಕಾಯೋ ಸದಾ ಕಲಿಮಲವ್ಯಸನಾಧಿವಾಸೋ,

ಕಾಯೇ ವಿಹಞ್ಞತಿ ಚ ಸಬ್ಬಸುಖನ್ತಿ ಲೋಕೋ

ಕಾಯೋ ಸದಾ ಮರಣರೋಗಜರಾಧಿವಾಸೋ।

೮೭.

ಸೋ ಯೋಬ್ಬನೋತಿ ಥವಿರೋತಿ ಚ ಬಾಲಕೋತಿ

ಸತ್ತೇ ನ ಪೇಕ್ಖತಿ ವಿಹಞ್ಞತಿರೇವ ಮಚ್ಚು,

ಸೋಹಂ ಠಿತೋಪಿ ಸಯಿತೋಪಿ ಚ ಪಕ್ಕಮನ್ತೋ

ಗಚ್ಛಾಮಿ ಮಚ್ಚುವದನಂ ನಿಯತಂ ತಥಾ ಹಿ।

೮೮.

ಏವಂ ಯಥಾ ವಿಹಿತದೋಸಮಿದಂ ಸರೀರಂ

ನಿಚ್ಚಂವ ತಗ್ಗತಮನಾ ಹದಯೇ ಕರೋಥ,

ಮೇತ್ತಂ ಪರಿತ್ತಮಸುಭಂ ಮರಣಸ್ಸತಿಞ್ಚ

ಭಾವೇಥ ಭಾವನರತಾ ಸತತಂ ಯತತ್ತಾ।

೮೯.

ದಾನಾದಿ ಪುಞ್ಞಕಿರಿಯಾನಿ ಸುಖುದ್ರಯಾನಿ

ಕತ್ವಾ ಚ ತಮ್ಫಲಮಸೇಸ ಮಿಹಪ್ಪಮೇಯ್ಯಂ,

ದೇಯ್ಯಂ ಸದಾ ಪರಹಿತಾಯ ಸುಖಾಯ ಚೇವ

ಕಿಮ್ಭೋ ತದೇವ ನನು ಹತ್ಥಗತಞ್ಹಿ ಸಾರಂ?

೯೦.

ಹೇತುಂ ವಿನಾ ನ ಭವತೀ ಹಿ ಚ ಕಿಂಚಿ ಲೋಕೇ

ಸದ್ದೋವ ಪಾಣಿತಲಘಟ್ಟನಹೇತುಜಾತೋ,

ಏವಞ್ಚ ಹೇತುಫಲ ಭಾವವಿಭಾಗಭಿನ್ನೋ

ಲೋಕೋ ಉದೇತಿ ಚ ವಿನಸ್ಸತಿ ತಿಟ್ಠತೀ ಚ।

೯೧.

ಕಮ್ಮಸ್ಸ ಕಾರಣಾಮಯಞ್ಹಿ ಯಥಾ ಅವಿಜ್ಜಾ

ಭೋ ಕಮ್ಮನಾ ಸಮಧಿಗಚ್ಛತಿ ಜಾತಿಭೇದಂ,

ಜಾತಿಂ ಪಟಿಚ್ಚ ಚ ಜರಾಮರಣಾದಿದುಕ್ಖಂ

ಸತ್ತಾ ಸದಾ ಪಟಿಲಭನ್ತಿ ಅನಾದಿಕಾಲೇ।

೯೨.

ಕಮ್ಮಂ ಯಥಾ ನ ಭವತೀಹ ಚ ಮೋಹನಾಸಾ

ಕಮ್ಮಕ್ಖಯಾಪಿ ಚ ನ ಹೋತಿ ಭವೇಸು ಜಾತಿ,

ಜಾತಿಕ್ಖಯಾ ಇಹ ಜರಾಮರಣಾದಿದುಕ್ಖಂ

ಸಬ್ಬಕ್ಖಯೋ ಭವತಿ ದೀಪೇವಾನಿಲೇನ।

೯೩.

ಯೋ ಪಸ್ಸತೀಹ ಸತತಂ ಮುನಿಧಮ್ಮಕಾಯಂ

ಬುದ್ಧಂ ಸ ಪಸ್ಸತಿ ನರೋ ಇತಿ ಸೋ ಅವೋಚ,

ಬುದ್ಧಞ್ಚ ಧಮ್ಮಮಮಲಞ್ಚ ತಿಲೋಕನಾಥಂ

ಸಮ್ಪಸ್ಸಿತುಂ ವಿಚಿನಥಾ’ಪಿ ಚ ಧಮ್ಮತಂ ಭೋ।

೯೪.

ಸಲ್ಲಂವ ಭೋ ಸುನಿಸಿತಂ ಹದಯೇ ನಿಮುಗ್ಗಂ

ದೋಸತ್ತಯಂ ವಿವಿಧಪಾಪಮಲೇನ ಲಿತ್ತಂ,

ನಾನಾವಿಧಬ್ಯಸನಭಾಜನಮಪ್ಪಸನ್ನಂ

ಪಞ್ಞಾಮಯೇನ ಬಲಿಸೇನ ನಿರಾಕರೋಥ।

೯೫.

ನಾಕಮ್ಪಯನ್ತಿ ಸಕಲಾಪಿ ಚ ಲೋಕಧಮ್ಮಾ

ಚಿತ್ತಂ ಸದಾಪಗತಪಾಪಕಿಲೇಸಸಲ್ಲಂ,

ರೂಪಾದಯೋ ಚ ವಿವಿಧಾ ವಿಸಯಾ ಸಮಗ್ಗಾ

ಫುಟ್ಠಂವ ಮೇರುಸಿಖರಂ ಮಹತಾನಿಲೇನ।

೯೬.

ಸಂಸಾರದುಕ್ಖಮಗಣೇಯ್ಯ ಯಥಾ ಮುನಿನ್ದೋ

ಗಮ್ಭಿರಪಾರಮಿತ ಸಾಗರಮುತ್ತರಿತ್ವಾ,

ಞೇಯ್ಯಂ ಅಬೋಧಿ ನಿಪುಣಂ ಹತಮೋಹಜಾಲೋ

ತಸ್ಮಾ ಸದಾ ಪರಹಿತಂ ಪರಮಂ ಚಿಣಾಥ।

೯೭.

ಓಹಾಯ ಸೋ’ಧಿಗತಮೋಕ್ಖಸುಖಂ ಪರೇಸಂ

ಅತ್ಥಾಯ ಸಂಚರಿ ಭವೇಸು ಮಹಬ್ಭಯೇಸು,

ಏವಂ ಸದಾ ಪರಹಿತಂ ಪುರತೋ ಕರಿತ್ವಾ

ಧಮ್ಮೋ ಮಯಾನುಚರಿತೋ ಜಗದತ್ಥಮೇವ।

೯೮.

ಲದ್ಧಾನ ದುಲ್ಲಭತರಞ್ಚ ಮನುಸ್ಸಯೋನಿಂ

ಸಬ್ಬಂ ಪಪಞ್ಚರಹಿತಂ ಖಣಸಮ್ಪದಞ್ಚ,

ಞತ್ವಾನ ಆಸವನುದೇಕಹಿತಞ್ಚ ಧಮ್ಮಂ

ಕೋ ಪಞ್ಞವಾ ಅನವರಂ ನ ಭಜೇಯ್ಯ ಧಮ್ಮಂ?

೯೯.

ಲದ್ಧಾನ ಬುದ್ಧಸಮಯಂ ಅತಿದುಲ್ಲಭಂಚ

ಸದ್ಧಮ್ಮ ಮಗ್ಗಮಸಮಂ ಸಿವದಂ ತಥೇವ,

ಕಲ್ಯಾಣಮಿತ್ತಪವರೇ ಮತಿಸಮ್ಪದಞ್ಚ

ಕೋ ಬುದ್ಧಿಮಾ ಅನವರಂ ನ ಭಜೇಯ್ಯ ಧಮ್ಮಂ?

೧೦೦.

ಏವಮ್ಪಿ ದುಲ್ಲಭತರಂ ವಿಭವೇ ಸುಲದ್ಧಾ

ಮಚ್ಛೇರದೋಸ ವಿರತಾ ಉಭಯತ್ಥಕಾಮಾ,

ಸದ್ಧಾದಿಧಮ್ಮಸಹಿತಾ ಸತತಪ್ಪಮತ್ತಾ

ಭೋ! ಭೋ! ಕರೋಥ ಅಮತಾಧಿಗಮಾಯ ಪುಞ್ಞಂ।