ಸಮನ್ತಕೂಟವಣ್ಣನಾ
॥ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ॥
೧.
ಸತತವಿತತ ಕಿತ್ತಿಂ ಧಸ್ತಕನ್ದಪ್ಪದಪ್ಪಂ
ತಿಭವಹಿತವಿಧಾನಂ ಸಬ್ಬಲೋಕೇಕಕೇತುಂ,
ಅಮಿತಮತಿಮನಗ್ಘಂ ಸನ್ತಿದಂ ಮೇರುಸಾರಂ
ಸುಗತಮಹಮುದಾರಂ ರೂಪಸಾರಂ ನಮಾಮಿ।
೨.
ಹತದುರಿತತುಸಾರಂ ಮೋಹಪಙ್ಕೋಪತಾಪಂ
ಮನಕಮಲವಿಕಾಸಂ ಜನ್ತುನಂ ಸೇಸಕಾನಂ,
ಕುಮತಿಕುಮುದನಾಸಂ ಬುದ್ಧಪುಬ್ಬಾಚಲಗ್ಗಾ
ಉದಿತಮಹಮುದಾರಂ ಧಮ್ಮಭಾನುಂ ನಮಾಮಿ।
೩.
ಸಕಲವಿಮಲಸೀಲಂ ಧುತಪಾಪಾರಿಜಾಲಂ
ಸುರನರಮಹನೀಯಂ ಪಾಹುನೇಯ್ಯಾಹುನೇಯ್ಯಂ,
ಉಜುಪಥಪಟಿಪನ್ನಂ ಪುಞ್ಞಖೇತ್ತಂ ಜನಾನಂ
ಗಣಮಹಮಭಿವನ್ದೇ ಸಾರದಂ ಸಾದರೇನ।
೪.
ಇತಿ ಕಳಿತ ಪಣಾಮಾ ಹನ್ತ್ವ ಸಬ್ಬೋಪಸಗ್ಗೇ
ಸುಗತವಿಮಲ ಪಾದಮ್ಭೋಜಸಮ್ಪಾತ ಪೂತಂ,
ಸುಮನಸಿಖರಿರಾಜಂ ವಣ್ಣಯಿಸ್ಸಂ ಸುರಾನಂ
ವಸತಿ ಮತುಲಮೇತಂ ಸಾಧುಜನ್ತು ಸುಣನ್ತು।
೫.
ಸವಣಾ ಲಪನಾ ಚೇವ ಸತಿಯಾ ಚಾಪಿ ವನ್ದನಾ,
ಯಸ್ಸ ಸಮ್ಮಾ ಸುಖೀ ಹೋತೀ ನಿಬ್ಬಾಣಞ್ಚಾಧಿಗಚ್ಛತಿ।
೬.
ತಸ್ಮಾ ಸಪ್ಪುರಿಸೇಹೇ’ದಂ ಪತ್ಥೇನ್ತೇಹಿ ತಿಸಮ್ಪದಂ,
ಸವಣೀಯಞ್ಹಿ ಸಾಧೂಹಿ ಅಚಿಕ್ಖಿತ್ತೇನ ಚೇತಸಾ।
೭.
ಯೋ ಲೋಕತಿಲಕೋ ನಾಥೋ ಪೂರೇತ್ವಾ ದಸ ಪಾರಮೀ,
ಜಾತೋಸಿ ತುಸಿತೇ ಕಾಯೇ ಸನ್ತುಸಿತೋ’ತಿ ವಿಸ್ಸುತೋ।
೮.
ಆರಾಧಿತೋ ಸುರಾದೀಹಿ ಕಾಲೋ ಮಾರಿಸ ತೇ ಅಯಂ,
ತಿಣ್ಣೋ ತಾರಯಿಮಂ ಲೋಕಂ ಬಹೂ ಅಪ್ಪರಜಕ್ಖಕಾ।
೯.
ಏತದತ್ಥಾಯ ತೇ ವೀರ ಪೂರಿತಾ ದಸ ಪಾರಮೀ,
ಬಾಹುಂ ಪಿತುಸ್ಸ ಪುತ್ತೋ’ವ ಲೋಕೋ ಆಲಮ್ಬತೇ ತುವಂ।
೧೦.
ತೇಸಂ ತಂ ವಚನಂ ಸುತ್ವಾ ಮಹಾಸತ್ತೋ ಮಹಾಮತೀ,
ವಿಲೋಕನೇ ವಿಲೋಕೇತ್ವಾ ಪಞ್ಚಾಮಲ ವಿಲೋಚನೋ।
೧೧.
ಜಮ್ಬುದೀಪಗ್ಗಕಮಲೇ ಕಣ್ಣಿಕಾ’ವ ಮನೋರಮಾ,
ಪುರೀ ಕಪಿಳವತ್ಥೂ’ಸಿ ವಿಸಾಣಾ’ವ ಸುಧಾಸಿನಂ।
೧೨.
ಸಿಙ್ಗೀನಿಕ್ಖಮಯಾಭಾಸ ತುಙ್ಗಸಿಙ್ಗಸಮಙ್ಗಿತಾ,
ಮಣಿಸೀಹಪಞ್ಜರಾಕಿಣ್ಣ ಪಾಸಾದಾ ಯತ್ಥ ಭಾಸರೇ।
೧೩.
ಸಘನೇ ಗಗನೇ ನಿಚ್ಚಂ ಸತೇರತಸತಾನಿ’ವ,
ಅನಿಲೇರಿತಪಜ್ಜೋತ ಸೋಣ್ಣಕೇತು ಅಹೂ ಯಹಿಂ।
೧೪.
ಜನಾನಂ ನೀಲನೇತ್ತೇಹಿ ವದನೇಹಿ ತು ಯಾ ಪುರೀ,
ಮಧುಪಾಲಿಸಮೋನದ್ಧ ಕಞ್ಜಿನೀ ಸಿರಿಮಾವಹೇ।
೧೫.
ರಙ್ಗತುಙ್ಗತುರಙ್ಗೇಹಿ ಗಜ್ಜಿತೇಹಿ ಚ ಯಾ ಪುರೀ,
ಸಘೋಸುತ್ತುಙ್ಗಕಲ್ಲೋಲ ಲೋಲಸಾಗರಸನ್ತಿಭಾ।
೧೬.
ಅವ್ಹಮಾನಾ’ವ ದೇವಾನಂ ಪುರಲಖ್ಯಾ ಭುಜಾ ಇವ,
ಮನ್ದಾನಿಲೇರಿತಾ ತುಙ್ಗ ನಾನಾರಾಗದ್ಧಜಾ ಯಹಿಂ।
೧೭.
ನಾನಾವೇಸಧರಾ ಯಸ್ಮಿಂ ನಾನಾಭೂಸಣ ಭೂಸಿತಾ,
ನಾನಾಸಮ್ಪತ್ತಿಸಂಯುತ್ತಾ ನಾನಾವಿಜ್ಜಾಸು ಪಾರಗಾ।
೧೮.
ನವಯೋಬ್ಬನ ಉದ್ದಾಮಾ ರೂಪೇನ ಚ ಮನೋಹರಾ,
ಸಚ್ಚೇಸು ನಿರತಾ ನಿಚ್ಚಂ ಅನಕ್ಕುಟ್ಠಕುಲಾ ಸಿಯುಂ।
೧೯.
ನಿಚ್ಚಂ ಕೀಳಾ ವಿದದ್ಧಾಹಿ ನರನಾರೀಹಿ ಸೇವಿತಾ,
ಯಾ ಪುರೀ ಸಾಧುರೂಪಾ’ಸಿ ಮಧುರಾಲಾಪಿನೀಹಿ ಚ।
೨೦.
ತಸ್ಮಿಂ ಸದ್ಧಾದಯೋಪೇತ ಓಕ್ಕಾಕಕುಲಕೇತುಕೋ,
ಸುದ್ಧೋದನವ್ಹಯೋ ಆಸೀ ವಿಸ್ಸುತೋ ಭುವನತ್ತಯೇ।
೨೧.
ಯಸ್ಸಙ್ಘಿಕಮಲೇ ಸಬ್ಬ ಭುಭುಜಾನಂ ಮಹೀತಲೇ,
ಕಿರೀಟಮಣಿಹಿಙ್ಗಾಲಿ ಕೀಳನ್ತೀ’ವ ನಿರನ್ತರಂ।
೨೨.
ಯಸ್ಸ ಪತ್ಥಟತೇಜೇನ ಪುರನೇತಾಪಿ ದಿವಾಕರೋ,
ವಹನೀಚ’ಮ್ಬರೇ ಲೀಲಂ ಓಸಧೀಪತಿನೋ ದಿವಾ।
೨೩.
ಯಸ್ಸ ದಾನಪ್ಪವಾಹೋ ತು ನಾನಾಯಾಚಕ ಜನ್ತುನಂ,
ಮನೋದಧೀಸು ವೇಲನ್ತೇತಿಕ್ಕಮನ್ತೋವ ಸತ್ತತಂ।
೨೪.
ಮತಿಯಾ ಸುರಮನ್ತೀವ ಧನೇನ ಧನದೋ ವಿಯ,
ರೂಪೇನ ಕುಸುಮೇಸು’ವ ಯೋ ಜುಮ್ಹತಿ ಮಹೀತಲೇ।
೨೫.
ತಸ್ಸಾಭಿಸಿತ್ತಾ ರಜ್ಜೇನ ಮಹಾಮಾಯಾತಿ ವಿಸ್ಸುತಾ,
ಚನ್ದಿಕಾ ವಿಯ ಚನ್ದಸ್ಸ ಗಿರಿರಾಜಾ’ವ ಕಪಾಲಿತೋ।
೨೬.
ಲಕ್ಖೀ’ವ ವಾಸುದೇವಸ್ಸ ಸೀತಾ’ವ ರಾಮರಾಜಿನೋ,
ಮಹೇಸೀಸಿ ವರಾರೋಹಾ ಸುನ್ದರೀ ಸುನ್ದರಾಧರಾ।
೨೭.
ತಸ್ಸಾ ಕುಚ್ಛಿಕರಣ್ಡಮ್ಹಿ ಅನಗ್ಘರತನಂ ವಿಯ,
ಖತ್ತಿಂಸಾಹಿ ನಿಮಿತ್ತೇಹಿ ವಿಮ್ಹಾಪೇನ್ತೋ ಸದೇವಕಂ।
೨೮.
ಸಿತಮ್ಬುಜಕರೋ ಸನ್ತೋ ಸಿತೇಭಚ್ಛಾಪಕೋ ವಿಯ,
ಕತ್ವಾ ಪದಕ್ಖಿಣಂ ಮಾತು ಪಟಿಸನ್ಧಿಮಗಣ್ಹಿ ಸೋ।
೨೯.
ದಸೇಕಾದಸಮಾಸೇನ ತಸ್ಸೇವಂ ಆಸಿ ಚೇತನಾ,
ಪಸ್ಸಿತುಂ ಸಕಞಾತೀನಂ ಗನ್ತ್ವಾನ ನಗರಂ ತದಾ।
೩೦.
ನಿವೇದೇತ್ವಾ ತಮತ್ಥಂ ಸಾ ರಞ್ಞೋ ತೇನ ಸುಸಜ್ಜಿತೇ,
ಸಪರಿಚ್ಛದಾ ತದಾ ಮಗ್ಗೇ ಗಚ್ಛನ್ತಿ ಅನ್ತರಾಪಥೇ।
೩೧.
ದೇವತಾನಂ ಮನೋನನ್ದಕರ ನನ್ದನ ಸನ್ನಿಭಂ,
ದಿಸ್ವಾನ ಲುಮ್ಬಿನಿಂ ನಾಮ ಉಯ್ಯಾನಂ ಮನನನ್ದನಂ।
೩೨.
ತಸ್ಮಿಂ ಕೀಳಿತುಮುಸ್ಸಾಹಾ ಪವಿಸಿತ್ವಾನ ತಂ ವನಂ,
ಕೀಳನ್ತಿ ಉಪಗನ್ತ್ವಾನ ಮಙ್ಗಲಂ ಸಾಲಪಾದಪಂ।
೩೩.
ವಿಲೋಲ ಪಲ್ಲವಾಕಿಣ್ಣಂ ಸುಫುಲ್ಲಕುಸುಮೋನತಂ,
ಗಹೇತ್ವಾ ಸಾಲಸಾಖಂ ಸಾ ಸುರತ್ತಕರ ಪಲ್ಲವಾ।
೩೪.
ದೇವೇಹಿ ಗಹಿತಾ’ರಕ್ಖಾ ಮಹಮಾನೇ ಸದೇವಕೇ,
ಜನೇಸಿ ತನಯಂ ಮಾಯಾ ತತ್ರಟ್ಠಾ ಲೋಕಲೋಚನಂ।
೩೫.
ಬ್ರಹ್ಮಾನೋ ಲೋಕಪಾಲಾ ಚ ಮನುಸ್ಸಾ ಕಮತೋ ತದಾ,
ಸೋಣ್ಣಜಾಲಾಜಿನಾದೀಹಿ ಗಣ್ಹಿಂಸು ಜನನನ್ದನಂ।
೩೬.
ಮಹಿಂ ಪತಿಟ್ಠಿತೋ ಧೀರೋ ಪಸ್ಸಿತ್ವಾನ ತತೋ ದಿಸಾ,
ಉತ್ತರಾಭಿಮುಖೋ ಸತ್ತಪದಂ ಗಣ್ತ್ವಾ’ಮ್ಬುಜೇ ಠಿತೋ।
೩೭.
ದಿಸನ್ತಮವಲೋಕೇತ್ವಾ ಸುಫುಲ್ಲಮ್ಬುಜಲೋಚನೋ,
ನಿಚ್ಛಾರೇಸಾಸಭಿಂ ವಾಚಂ ಅಗ್ಗೋ ಸೇಟ್ಠೋ’ತಿಆದಿನಾ।
೩೮.
ಬ್ರಹ್ಮಾಮರನರಾದೀಹಿ ಪೂಜಿತೋ ಚ ನಮಸ್ಸಿತೋ,
ಕಮೇನ ಅಭಿವಡ್ಢನ್ತೋ ಜುಣ್ಹಪಕ್ಖೇ ಸಸೀ ಯಥಾ।
೩೯.
ಬ್ರಹ್ಮೂನಂ ಛತ್ತಛಾಯಾಯ ಮನ್ದಾರಕುಸುಮನ್ತರೇ,
ಸಾನನ್ದಾಮನ್ದದೇವೇಹಿ ಧುತಚಾಮರಮಜ್ಝಗೋ।
೪೦.
ದಿಬ್ಬೇಹಿ ರೂಪಸದ್ದೇಹಿ ಗನ್ಧೇಹಿ ಚ ರಸೇಹಿ ಚ,
ಫೋಟ್ಠಬ್ಬೇಹಿ ಚ ದಿಬ್ಬೇಹಿ ಮೋದಮಾನೋ ಅನೇಕಧಾ।
೪೧.
ದಿಬ್ಬೇಹಿ ರಮಣೀಯೇಹಿ ನಚ್ಚೇಹಿ ವಾದಿತೇಹಿ ಚ,
ಪದಾನೇಕಸಹಸ್ಸೇಹಿ ಥೂಯಮಾನಗುಣಾಕರೋ।
೪೨.
ಪತ್ವಾ ಸೋಳಸಮಂ ವಸ್ಸಂ ಞಾತಿಸಙ್ಘಸ್ಸ ಮಜ್ಝಗೋ,
ದಸ್ಸೇತ್ವಾ’ಸೇಸಸಿಪ್ಪಂ ತಂ ಲೋಕೇ ವಿಜ್ಜತಿ ಯಂ ತದಾ।
೪೩.
ಞಾತಿಸಙ್ಘಂ ಪಮೋದೇನ್ತೋ ದೇವೇ ಚ ಮನುಜೇ’ಪಿ ಚ,
ಲದ್ಧಾ ಯಸೋಧರಂ ದೇವಿಂ’ನುಕೂಲಂ ಜಾತಿಜಾತಿಯಂ।
೪೪.
ಸೋಣ್ಣದಪ್ಪಣಸಙ್ಕಾಸ ಸೋಮ್ಮಾನನ ವಿಭುಸಿತಂ,
ನೀಲನೀರಜಸಙ್ಕಾಸ ವಿಸಾಲಾಯತ ಲೋಚನಂ।
೪೫.
ಸಿಙ್ಗಾರಮನ್ದಿರದ್ವಾರೇ ಧಜೋಪಮಭಮುದ್ವಯಂ,
ಹೇಮಕಾಹಲಸಙ್ಕಾಸ ನಾಸಿಕಂ ರೂಪಲಕ್ಖಿಯಾ
೪೬.
ನೀಲವೇಲ್ಲಿತಧಮ್ಮಿಲ್ಲ ಜಿಮುತೋಭಯ ಕೋಟಿಯಂ,
ನಿಚ್ಚವಿಜ್ಜುಲ್ಲತಾಚಕ್ಕ ಮನುಞ್ಞಕಣ್ಣಪಾಸಕಂ।
೪೭.
ಸಾತಕುಮ್ಭನಿಭಾಭಾಸ ಪಯೋಧರಘಟದ್ವಂ,
ಸುವಣ್ಣದ್ದಿತಟಾಯಾತ ನಿಜ್ಝರಾಕಾರಹಾರಕಂ
೪೮.
ದೇಹದೇವದ್ದುಮಾಲಮ್ಬ ಪಾರೋಹಾಭಭುಜದ್ವಯಂ,
ಅಙ್ಗುಲೀಪಲ್ಲವನ್ತಮ್ಬು ಬಿನ್ದುಚಾರು ನಖಾವಲಿಂ।
೪೯.
ದೇಹಮಾಲಾಲಿಮಾಲಾಭ ರೋಮರಾಜಿವಿರಾಜಿತಂ,
ರೂಪಣ್ಣವತರಙ್ಗಾಹ ವಲಿತ್ತಯ ವಿಚಿತ್ತಕಂ।
೫೦.
ಸೋಣ್ಣರಮ್ಭಾಸಮಾವಟ್ಟ ಪಿಣೋರುದ್ವಯ ಸುನ್ದರಂ,
ಸನ್ನಿರಕಲಿಕಾಕಾರ ಚಾರುಜಙ್ಘಾ ವಿಭೂಸಿತಂ।
೫೧.
ಪಚ್ಚಕ್ಖರೂಪಲಕ್ಖಿಞ್ಚ ಲೀಲಾನಿಚಯ ಸನ್ನಿಭಂ,
ಗುಣಾನಮಾಕರಂ ಸಾಧು ವೇಲಂವ ರತಿಸಾಗರೇ।
೫೨.
ಕನ್ತೋ ವಸನ್ತರಾಜಾ’ವ ಕನ್ದಪ್ಪೋ’ವ ಸುರೂಪವಾ,
ಸಸೀ’ವ ದಸ್ಸನೀಯೋ ಚ ಸೂರಿಯೋ ವಿಯ ತೇಜವಾ।
೫೩.
ಅಚಲತ್ತೇನ ಮೇರೂವ ಗಮ್ಭೀರೇನಣ್ಣವೋ ವಿಯ,
ಬ್ರಹ್ಮಸ್ಸರೋ ಪಿಯಂವಾದೀ ಪಞ್ಗ್ಞಾಯ ಚ ಅನೂಪಮೋ।
೫೪.
ವಸನ್ತೋ ಸೋ ಮಹಾವೀರೋ ಪುರಸ್ಮಿಂ ಕಪಿಲವ್ಹಯೇ,
ದಿಸ್ವಾ ನಿಮಿತ್ತೇ ಚತುರೋ ಉಯ್ಯಾನ ಗಮನಞ್ಜಸೇ।
೫೫.
ಪಬ್ಬಜ್ಜಾಭಿರತೋ ನಾಥೋ ಗನ್ತ್ವಾ ಉಯ್ಯಾನಭೂಮಿಯಂ,
ಸುಫುಲ್ಲಚಮ್ಪಕಾಸೋಕ ನಾಗಾದಾ’ಗೇಹಿ ಮಣ್ಡಿತಂ।
೫೬.
ಫುಲ್ಲಪಙ್ಕಜ ಕಳ್ಹಾರ ಜಲಾಜಲಯ ಸತಾಕುಲಂ,
ಮನ್ದಮನ್ದಾನಿಲಾಯಾತ ನಾನಾಮೋದೇಹಿ ವಾಸಿತಂ।
೫೭.
ಸರಾ ಸರಂ ಸಮಾಯಾತ ಮಧುಬ್ಬತ ನಿಸೇವಿತಂ,
ಫಲಪುಪ್ಫರಸುದ್ದಾಮ ದ್ವಿಜ ಸಙ್ಘ ನಿಕೂಜಿತಂ।
೫೮.
ನಚ್ಚನ್ತ ಮತ್ತಮೋರಾನಂ ನಿಚ್ಚಂ ಮಣ್ಡಪಸನ್ತಿಭಂ,
ದಿಬ್ಬನ್ತ ಮಿಗಸಗ್ಘಾನಂ ಕೀಳಾಮಣ್ಡಪ ಸನ್ನಿಭಂ।
೫೯.
ಸಮೀರ ಸಿಸಿರೋದಾರ ಧಾರಾಸೀಕರ ವಾರಿಹಿ,
ಧಾರಾಮಣ್ಡಪ ಪನ್ತೀಹಿ ಜನಾನನ್ದಕರಂ ವರಂ।
೬೦.
ಉಯ್ಯಾನವನಮಾಗಮ್ಮ ದೇವರಾಜಾವ ನನ್ದನಂ,
ಕೀಳನ್ತೋ ನಿಜಪುತ್ತಸ್ಸ ಸುತ್ವಾನ ಜಾತಸಾಸನಂ।
೬೧.
ನಿವತ್ತೋ ವಿಸ್ಸಕಮ್ಮೇನ ಸಹಸ್ಸಕ್ಖೋವ ಭೂಸಿತೋ,
ಪುರಂ ಪವಿಸಮಾನೋವ ಕಿಸಾ ಗೋತಮಿ ಭಾಸಿತಂ।
೬೨.
ಸುತ್ವಾನ ನಿಬ್ಬುತಪದಂ ತದಾ ಚಿತ್ತಾನುಕೂಲಕಂ,
ಸನ್ತುಟ್ಠೋ ಸಾನುರಾಗೋ ಚ ಲಕ್ಖಗ್ಘಂ ತಾರಭಾಸುರಂ।
೬೩.
ಹಾರಂ ತಿಸ್ಸಾಯ ಪೇಸೇತ್ವಾ ಗನ್ತ್ವಾನ ಸಕಮನ್ದಿರಂ,
ದೇವರಾಜವಿಲಾಸೇನ ನಿಸೀದಿ ಪವರಾಸನೇ।
೬೪.
ಅಥಾಗಮ್ಮ ತದಾ ನೇಕನಾಟಿಕಾ ಪರಿವಾರಯುಂ,
ವಜ್ಜನ್ತಿ ಭೇರಿಯೋ ತಾಸು ಪಗ್ಗಯ್ಹ ಕಾಚಿ ನಾರಿಯೋ।
೬೫.
ನಾನಾಲಯಸಮಾಕಿಣ್ಣಂ ಗೀತಂ ಗಾಯನ್ತಿ ಕಾಚಿ’ಪಿ,
ಧಮನ್ತಿ ಸುಸಿರಂ ಕಾಚಿ ಕಾಚಿ ವಾದೇನ್ತಿ ತನ್ತಿಯೋ।
೬೬.
ಚಾರು ಬಿಮ್ಬಾಧರಾರಮ್ಮ ಪಯೋಧರಭರಾ ಸುಭಾ,
ವಿಸಾಲಾಯತ ನೀಲಕ್ಖಾ ಸೋಮಸೋಮ್ಮಾನನಾ ತದಾ।
೬೭.
ನಚ್ಚನ್ತಿ ಪುರತೋ ತಸ್ಸ ಭೇರಿಮಣ್ಡಲ ಮಜ್ಝಗಾ,
ದೇವಕಞ್ಞಾವ ರಙ್ಗಮ್ಹೀ ರಸಭಾವನಿರನ್ತರಂ।
೬೮.
ದಿಸ್ವಾನ ಸೋ ತಮಚ್ಛರಿಯಂ ವಿರತ್ತೋ ವಿಸಯೇ ತದಾ,
ಉರತ್ತಾಳಞ್ಚ ಅದ್ದಕ್ಖಿ ಸಬ್ಬನ್ತಂ ಭೇರಿತಾಳನಂ।
೬೯.
ಪರಿದೇವಂ’ಚುಪಟ್ಠಾಸಿ ಗೀತಂ ಸಂಸಾರಸಾಗರೇ,
ವಾಯುವೇಗ ವಿಕಾರಂ’ವ ನಚ್ಚಂ ಚಿನ್ತೇಸಿ ನಾಯಕೋ।
೭೦.
’ಕದಾಹಂ ಘರಮೋಸ್ಸಜ್ಜ ಪಬ್ಬಜ್ಜಾಸಿರಿ ಮುಬ್ಬಹೇ?’
ಇಚ್ಚೇವಂ ಚಿನ್ತಯನ್ತೋ ಸೋ ಸುಪನ್ತೋವ ಸಯೀ ತಹಿಂ।
೭೧.
’ಯಂ ನಿಸ್ಸಾಯ ಮಯಂ ಏತ್ಥ ನಚ್ಚಗೀತೇಸು ವ್ಯಾವಟಾ,
ಸೋ’ಯಂ’ದಾನಿ ಸುಪೀ’ ಅಮ್ಹೇ ಕಸ್ಸದಾನಿ ಕರೋಮ ತಂ?।
೭೨.
ಇತಿ ಚಿನ್ತಿಯ ತೇ ತತ್ಥ ತುರಿಯೇಸು ಸಕೇ ಸಕೇ,
ಆಲಮ್ಬಾ ಸಯಿತಾ ಕಞ್ಞಾ ಸುಸಞ್ಞಾಞ್ಞಮನಿಸ್ಸಿತಾ।
೭೩.
ಖಾದನ್ತಿ ಕಾಚಿ ದನ್ತಾನಿ ಕಾಚಿ ಲಾಲಾ ವಹನ್ತಿಯೋ,
ಕಾಚಿ ರುದನ್ತಿಯೋ ತತ್ಥ ವಿಲಪನ್ತಿ ಅಥಾ’ಪರಾ।
೭೪.
ಕಾಕಚ್ಛನ್ತಿ’ಪಿ ಸೇಮ್ಹಮ್ಪಿ ಗಿಲನ್ತಿ ಚ ಚಮನ್ತಿ ಚ,
ಕರೋನ್ತಿ ನಾದಂ ನಾಸಾಯ ಘರೂ’ತಿ ಚ ಖಿಪನ್ತಿ ಚ।
೭೫.
ಮುತ್ತಯನ್ತಿ ತದಾ ಕಾಚಿ ರಹಸ್ಸಂ ವಿಚರನ್ತಿ ಚ,
ದುಗ್ಗನ್ಧಂ ವಾತಿ ತಂ ಠಾನಂ ಸುಸಾನಂ ಆಮಕಂ ಯಥಾ।
೭೬.
ಪಬುದ್ಧೋ ಅಡ್ಢರತ್ತಮ್ಹಿ ಗತೇ ತತ್ಥ ನಿಸೀದಿಯ,
ಅದ್ದಕ್ಖಿ ತಾಸಂ ನೇಕಾನಿ ವಿಕಾರಾನಿ ತಹಿಂ ತದಾ।
೭೭.
ತಸ್ಸೇವಂ ಪೇಕ್ಖಮಾನಸ್ಸ ಭವೇ ಸಂವಿಗ್ಗಚೇತಸೋ,
ಆದಿತ್ತಂವ ಉಪಟ್ಠಾಸಿ ಮನೇ ಖಲು ಭವತ್ತಯಂ।
೭೮.
ದಾವಾನಲ ಸಮಾದಿತ್ತ ಮಹಾರಞ್ಞಾಯಥಾ ಗಜೋ,
ತಥೇವಾಸಿ ನರಿನ್ದಸ್ಸ ಗೇಹತೋ ಗಮನೇ ಮತೀ।
೭೯.
ತತೋ ವುಟ್ಠಾಯ ಸಯನಾ ಕರೋನ್ತೋ ಅಭಿನಿಕ್ಖಮಂ,
ವಿತಕ್ಕೇಸಿ ಮಹಾರಾಜಾ ಪಸ್ಸಿತುಂ ಸಕಮತ್ರಜಂ।
೮೦.
ಪವಿಸಿತ್ವಾ ತತೋ ಗಬ್ಭಂ ಸನಿಕಂ ಸನ್ತಮಾನಸೋ,
ಪಸ್ಸಿತ್ವಾ ಸಹ ಪುತ್ತೇನ ನಿದ್ದಾಯನ್ತಿಂ ಯಸೋಧರಂ।
೮೧.
ಚಿರಾಗತಂ ಮಹಾಪೇಮಂ ಧಾರಯಂ ಸಕಮಾನಸೇ,
ಬುದ್ಧೋ ಹುತ್ವಾಪಿ’ಮಂ ಸಕ್ಕಾ ಪಸ್ಸಿತುಂ ಇತಿ ಚಿನ್ತಿಯ।
೮೨.
ಗತೋ ನಾಥೋ ತತೋ ಠಾನಾ ಬೋಧಿಯಾ ಬದ್ಧಮಾನಸೋ
ತದಹೇವಾಸಿ ಬುದ್ಧೋತಿ ಕಾಮುಕೋ ಕೋ ನ ಚಿನ್ತಯೇ।
೮೩.
ಸಿನೇರು ಮುದ್ಧರನ್ತೋವ ಪಾದುದ್ಧರಿಯ ನಿಕ್ಖಮಂ,
ಛನ್ನಮಾಹೂಯ ಆನೀತಂ ಕನ್ಥಕಂ ತುರಗಾಧಿಪಂ।
೮೪.
ಅಸ್ಸರಾಜಂ ತಮಾರುಯ್ಹ ಸಹ ಛನ್ನೇನ ರತ್ತಿಯಂ,
ದೇವೇಹಿ ವಿವಟದ್ವರಾ ಪಟಿಪಜ್ಜಿ ಮಹಾಪಥಂ।
೮೫.
ಚಕ್ಕವಾಳೇಸು ನೇಕೇಸು ದೇವತಾ ಸುಸಮಾಗತಾ,
ದೀಪಧೂಪದ್ಧಜೇಹೇ ಚ ಗನ್ಧಮಾಲೇಹಿ ಪೂಜಯುಂ।
೮೬.
ಪುರತೋ ಸಟ್ಠೀಸಹಸ್ಸಾನಿ ದಣ್ಡದೀಪಾನಿ ಧಾರಯುಂ,
ತಥಾ ದಕ್ಖಿಣಪಸ್ಸಮ್ಹಿ ವಾಮಪಸ್ಸೇ ಚ ಪಚ್ಛತೋ।
೮೭.
ಗಗನಾ ಪುಪ್ಫವಸ್ಸಾನಿ ವಸ್ಸಾಪೇಸುಂ ಛ ದೇವತಾ,
ಮನ್ದಾರವಂ ಕೋಕನದಂ ಸುಗನ್ಧಂ ಚಿತ್ತಪಾಟ ಲಿಂ।
೮೮.
ಚಮ್ಪಕಾ ಸೋಕ ಪುನ್ನಾಗ ನಾಗಪೂಗಾಗ ಸಮ್ಭವಂ,
ಮಾಲತೀವಸ್ಸಿಕೀಯಾದೀ ನಾನಾವಲ್ಲೀಹಿ ಸಮ್ಭವಂ।
೮೯.
ಪದುಮುಪ್ಪಲ ಕಲಹಾರ ಕುಮುದಾದ್ಯಾಮ್ಬು ಸಮ್ಭವಂ,
ಸುಗನ್ಧಮಧು ಮತ್ತಾಹಿ ಛಪ್ಪದಾಲೀಹಿ ಕೂಜಿತಂ।
೯೦.
ಪುಪ್ಫವಸ್ಸಂ ಪವಸ್ಸಿತ್ಥ ತಿಂಸಯೋಜನಮಞ್ಜಸೇ,
ಪಸತ್ತೋ ತತ್ಥ ತುರಗೋ ದುಕ್ಖತೋ ಅಗಮೀ ತದಾ।
೯೧.
ಏವಂ ಪೂಜಾವಿಧಾನೇಹಿ ಗನ್ತ್ವಾ’ನೋಮಂ ಮಹಾನದಿಂ,
ಸಿತಸೇಕತ ಸಙ್ಕಿಣ್ಣಂ ಬಹುಮೀನಕುಲಾಕುಲಂ।
೯೨.
ತೀರಟ್ಠೋ ಪಸ್ಸಿ ಸೋ ಧೀರೋ ಗಙ್ಗಾನಾರಿಂ ರಸಾವಹಂ,
ಕರೋನ್ತಿಂ ವೀಚಿಬಾಭಾತಿ ಏಣೇಪುಪ್ಫೋಪಹಾರಕಂ।
೯೩.
ಅಸ್ಸೇನ ತಂ ಮಹಾನೋಮಂ ಲಙ್ಘಾಪೇತ್ವಾ ಮಹಾಮತೀ,
ಪರತೀರೇ ಪತಿಟ್ಠಾಸಿ ವಿಮಲೇ ವಾಲುಕಾ ತಲೇ।
೯೪.
ಪಬ್ಬಜಿತುಂ ಮಯೇತ್ಥೇವ ಯುತ್ತಂ ನೋ ಮೇ ಪಪಞ್ಚಿತುಂ,
ಇತಿ ಚಿನ್ತಿಯ ಓಭಾಯ ಧಾರಿತಾಭರಣಾನಿ ಸೋ।
೯೫.
ಛನ್ನಸ್ಸ ಪಟಿಯಾದೇತ್ವಾ ಕನ್ಥಕಞ್ಚ ಹಯಾಧಿಪಂ,
ನಿಸಿತಂ ಖಗ್ಗಮುಗ್ಗಯ್ಹ ಸಮೋಲಿಂ ಛಿನ್ದಿ ಕುನ್ತಲಂ।
೯೬.
ಏವಮಾವಜ್ಜಯಂ ನಾಥೋ ಸಚೇ’ಹಂ ಸುಗತೋ ಭವೇ,
ತಿಟ್ಠತು ಗಗನೇ ಗನ್ತ್ವಾ ಇತಿ ಉಕ್ಖಿಪಿ ಚ’ಮ್ಬರಂ।
೯೭.
ತತೋ ಸಕ್ಕೋ ಮಹಗ್ಘೇನ ಮಣಿಚಙ್ಗೋಟಕೇನ ತಂ,
ಪಟಿಗ್ಗಹೇತ್ವಾ ಸಿರಸಂ ನೇತ್ವಾ ದೇವಪುರಂ ಚರಂ।
೯೮.
ಕಾರೇತ್ವಾ ಮಣಿಥೂಪಂ ಸೋ ನೀಧೇತ್ವಾ ತಂ ಸಿರೋರುಹಂ,
ಅತ್ಥಾಹಂ ಪತಿಮಾನೇತಿ ಸಹದೇವೇಹಿ ನೇಕಧಾ।
೯೯.
ಮಹಾಬ್ರಹ್ಮೋಪನೀತಟ್ಠಪರಿಕ್ಖಾರಂ ಮಹಾಮತೀ,
ಪಟಿಗ್ಗಹೇತ್ವಾ ಕಾಸಾವಂ ನಿವತ್ಥೋ ಪಾರುತೋ ತದಾ।
೧೦೦.
ಪುಬ್ಬೇ ವಿಯಮ್ಬರಂ ಗಯ್ಹ ಅಮ್ಬರೇ ಖಿಪಿ ನಾಯಕೋ,
ಪಟಿಗ್ಗಹೇತ್ವಾ ತಂ ಬ್ರಹ್ಮಾ ನೇತ್ವಾ ಬ್ರಹ್ಮಪುರಂ ಚರಂ।
೧೦೧.
ದ್ವಾದಸಯೋಜನುಬ್ಬೇಧಂ ಕತ್ವಾ ಥೂಪವರಂ ಸುಭಂ,
ತತ್ಥ ತಂ ನಿದಹಿತ್ವಾನ ಪಣಿಪಾತೇತಿ ಸಬ್ಬದಾ।
೧೦೨.
ಸಮ್ಪುಣ್ಣ ಮನಸಙ್ಕಪ್ಪೋ ಪಬ್ಬಜ್ಜಾಸಿರಿ ಮುಬ್ಬಹಂ,
ಛಾದೇನ್ತೋ ಕಾಮಲೇನೇವ ಮರುಂ ಚಙಕ್ಕಮಿ ನಾಯಕೋ।
೧೦೩.
ತತೋ ಅಮ್ಬವನಂ ಗನ್ತ್ವಾ ವಿನ್ದನ್ತೋ ಪೀತಿಜಂ ಸುಖಂ,
ವೀತಿನಾಮಯಿ ಸತ್ತಾಹಂ ರಮ್ಮೇ ಪಾದಪಮಣ್ಡಪೇ।
೧೦೪.
ತತೋ ರಾಜಗಹಂ ಗನ್ತ್ವಾ ಪಾರುಪಿತ್ವಾ ಚೀವರಂ,
ಗಹೇತ್ವಾ ಮಣಿವಣ್ಣಂ ಸೋ ಪತ್ತಂ ಕರತಲಮ್ಬುಜಾ।
೧೦೫.
ಬತ್ತಿಂಸ ಲಕ್ಖಣೂಪೇತೋ ಅನುಬ್ಯಞ್ಜನ ಮಣ್ಡಿತೋ,
ಬ್ರಹ್ಮುಜ್ಜುಗತ್ತೋ ಭಗವಾ ಪುರಸೇಟ್ಠಮುಪಾಗಮಿ।
೧೦೬.
ವಿಸಿಖನ್ತರೇನ ಗಚ್ಛನ್ತಂ ಲೋಕೇಕನಯನಂ ಜನಾ,
ದಿಸ್ವಾ ಏವಂ ವಿಚಿನ್ತೇಸುಂ ನಾಯಂ ಯೋ ಸೋ ಜನಾಧಿಪೋ।
೧೦೭.
ಕಾಮಂ ಪುರವಧುಸೋಮ್ಮ ವತ್ತಸಮ್ಬನ್ಧಕಾರಣಾ,
ಚನ್ದೋ’ಯಮಾಗತೋ ಅಜ್ಜ ಸಕವೇಸೇನ ನೋ ಮತಿ।
೧೦೮.
ಸುತ್ವಾನ ತಂ ತದಾ ಕೇಚಿ ಹಸನ್ತಾ ವಚನನ್ತರಂ,
ನಾಯಂ ಸಸೀ ಸಸಙೇಕಾ ಸೋ ಭಾನುಮೇಸೋ’ತಿ ನೋ ಮತಿ।
೧೦೯.
ಬೋಧೇತುಮಾಗತೋ ಕಾಮಂ ಪೋರೀನಂ ವದನಮ್ಬುಜೇ,
ಸಕೀಯೇನೇವ ರೂಪೇನ ವಿಮ್ಹಯಂ ಪೋರಿಮಾನುಸೇ।
೧೧೦.
ಕಿಂ ಭೋ ಉಮ್ಮತ್ತಕಾ ಅತ್ಥ ಏವಂ ಮಾ ವದಥಾ’ಧುನಾ,
ಸತರಂಸೀ ಉಣ್ಹರಂಸೀ ನ ಸೋ ಏಸೋ ಅವಿಗ್ಗಹೋ।
೧೧೧.
ಕಾಮೇನಾಲಸಜನ್ತುಹಿ ಕೀಳಿತುಂ ಪುರಮಾಗತೋ,
ಸರೂಪೇನ ನ ನೋ ಅತ್ಥಿ ಸಂಸಯೋ ಬಲು ಮಾನಸೇ।
೧೧೨.
ತೇಸಂ ತಂ ವಚನಂ ಸುತ್ವಾ ಹಸನ್ತಾ ಕೇಚಿ ಜನ್ತುನೋ,
ತುಮ್ಹೇ ಖಲೂ ನ ಜಾನಾಥ ಸಬಾಣೇ ಸಧನೂ ಹಿ ಸೋ।
೧೧೩.
ಇಸ್ಸರೋ ಕನ್ತರೂಪೇನ ತುಙ್ಗಮನ್ದಿರತಾ ಪುರಂ,
ಕೇಲಾಸೋ ಇತಿ ಸಮ್ಪತ್ತೋ ಜಹಾಥ ವಿಮತಿಂ ಇಧ।
೧೧೪.
ತೇಸಮ್ಪಿ ವಚನಂ ಸುತ್ವಾ ಹಸನ್ತೇಕೇ ಜನಾ ತದಾ,
ನಾಯಂ ಹರೋ ತಿನೇತ್ತೋ ಸೋ ಕೇಸವೇಸೋ ಇಧಾಗತೋ।
೧೧೫.
ವಿಚಿಣನ್ತೋ ಸಿರಿಂ ಅಜ್ಜ ಪುರಸೇಟ್ಠಮುಪಾಗತಂ,
ವೇಸೇನಞ್ಞೇನ ಮಞ್ಞಾಮ ಏತ್ಥ ನೋ ನತ್ಥಿ ಸಂಸಯೋ।
೧೧೬.
ಪಹರಿತ್ವಾ ಕರಂ ಕೇಚಿ ಸುತ್ವಾ ತಂ ವಚನಂ ನರಾ,
ಹಸನ್ತೇವಂ ತದಾವೋಚುಂ ವಾಸುದೇವೋ ನ ವೇ ಅಯಂ।
೧೧೭.
ಕಾಮಂ ಸರೋಜನಾಭೋ ಸೋ ವಾಮನೋ ಕಣ್ಹವಿಗ್ಗಹೋ,
ಅಯಮಞ್ಞತರಚಣ್ಣೇನ ಆಗತೋ ಪಾಕಸಾಸನೋ।
೧೧೮.
ಪುರಂ ದೇವಪುರನ್ತೇತಂ ಮಞ್ಞಮಾನೋ ಮಹಾಜುತಿಂ,
ಪಸ್ಸಿತುನ್ತಿ ಪಟಿಞ್ಞಾತೋ ಮಾ ಭೋನ್ತೋ ವಿಲಪನ್ತು ವೇ।
೧೧೯.
ಸುತ್ವಾ ತೇಸಂ ಗಿರಂ ಕೇಚಿ ಕೇಳಿಂ ಕತ್ವಾನ ನೇಕಧಾ,
ತುಮ್ಹೇ ಸಕ್ಕಂ ನ ಜಾನಾಥ ಸೋ ಹಿ ಭೋ ವಜಿರಾಯುಧೋ।
೧೨೦.
ಏಸೋ ಹಿ ಭೋ ಮಹಾಬ್ರಹ್ಮಾ ಬ್ರಹ್ಮಲೋಕಾ ಇಧಾಗತೋ,
ಪಮತ್ತಾ ಕಿನ್ನು ವೇದಮ್ಹೀ ಬ್ರಹ್ಮಬನ್ಧು ಪುರೇ ಇಧ।
೧೨೧.
ಅಥೇಸಂ ವಚನಂ ಸುತ್ವಾ ಕೇಚಿ ಪಣ್ಡಿತಜಾತಿಕಾ,
ನೇತೇ ಚನ್ದಾದಯೋ ಕಾಮಂ ಮಾ ಮೋಹಂ ಭೋ ಪಕಾಸಥ।
೧೨೨.
ಚತುರಾನನೋ ಮಹಾಬ್ರಹ್ಮಾ ಸೋಮಸೋಮ್ಮಾನನೋ ಅಯಂ,
ಸಮನ್ತಪೋತ್ಥಕೋ ಬ್ರಹ್ಮಾ ಪತ್ತಹತ್ಥೋ’ಯಮಬ್ಭುತೋ।
೧೨೩.
ಕಾಮಂ ಪಾರಮಿತಾಪುಣ್ಣ ಪಸತ್ಥೋ ಪುರಿಸೋ ಅಯಂ,
ನಿಚ್ಚಂ ವನ್ದಥ ಪೂಜೇಥ ಥೋಮೇಥೇತಂ ಮಹಾಜುತಿಂ।
೧೨೪.
ಏವಂ ವದನ್ತಾ ಸಬ್ಬೇ ತೇ ನಾಗರಾ ಪುರಿಸುತ್ತಮಂ,
ಗನ್ಧಪುಪ್ಫೇಹಿ ಪುಜೇನ್ತಾ ನಮಸ್ಸನ್ತಾ ತಮನ್ವಗುಂ।
೧೨೫.
ನೇತ್ತಾರಿತ್ತೇಹಿ ಪಾಜೇನ್ತಾ ಮುನಿನೋ ರೂಪಸಾಗರೇ,
ಜನ್ತವೋ ಮನನಾವಾಯೋ ಪಾರಂ ಪಸ್ಸಿಂಸು ನೋ ತದಾ।
೧೨೬.
ತದಾ ಲೋಕೇಕನಯನೋ ಸಪದಾನೇನ ವೀಥಿಯಂ,
ಚರಂ ಯಾಪನಮತ್ತಂವ ಲದ್ಧಾಗಮ್ಮ ಪುರಾ ಬಹಿ।
೧೨೭.
ಪಣ್ಡವಂ ಗಿರಿಮಾಸಜ್ಜ ತಸ್ಸಚ್ಛಾಯಾಯ ಸೋ ಮುನಿ।
ಸಙ್ಘಾಟಿಂ ಪಞ್ಞಪೇತ್ವಾನ ನಿಸಜ್ಜ ಪುರಿಸಾಸಭೋ।
೧೨೮.
ಅದಿಟ್ಠಪುಬ್ಬಂ ದಿಸ್ವಾನ ಪತ್ತೇ ಮಿಸ್ಸಕಭೋಜನಂ,
ಸಞ್ಜಾತಪಟಿಕೂಲೋ ತಂ ನುದಿತ್ವಾ ಪಚ್ಚವೇಕ್ಖಣಾ।
೧೨೯.
ಅಮತಂ ವಿಯ ತಂ ಭುತ್ವಾ ವಿಕ್ಖಾಲೇತ್ವಾ ಮುಖಂ ದಕಾ,
ಪತ್ತೇ ವತ್ತಂ ಚರಿತ್ವಾನ ಮುಹುತ್ತಂ ತತ್ಥ ವಿಸ್ಸಮಿ।
೧೩೦.
ಪವತ್ತಿಂ ತಂ ನಿಸಾಮೇತ್ವಾ ಬಿಮ್ಬಿಸಾರೋ ನರಿಸ್ಸರೋ,
ಸೀಘಂ ತಮುಪಗನ್ತ್ವಾನ ಕತಾನುಞ್ಞೋ ನಿಸೀದಿಯ।
೧೩೧.
ನಿಮನ್ತಯಿತ್ವಾ ರಜ್ಜೇನ ಅನಿಚ್ಛನ್ತೇ ಯತಿಸ್ಸರೇ,
ಅನುಗ್ಗಹಾಯ ಮೇ ಯುತ್ತಂ ಬುದ್ಧಭೂತೇನಿಧಾಗಮಂ।
೧೩೨.
ಏವಂ ನಿಮನ್ತಿತೋ ತೇನಾಧಿವಾಸೇತ್ವಾ ಮಹಾಮತೀ,
ಅಗಮಾಸುರುವೇಲಾಯ ಮತುಲೋರು ಪರಕ್ಕಮೋ।
೧೩೩.
ಪಧಾನಂ ಪದಹಿತ್ವಾನ ಛಬ್ಬಸ್ಸಮತಿದುಕ್ಕರಂ,
ಪಕಾಸೇತ್ವಾನ ಲೋಕಸ್ಸ ಮೋಕ್ಖಂ ನತ್ಥಿತಿ ತೇನ ಸೋ।
೧೩೪.
ತತೋಪ್ಪಭುತಿ ವತ್ತನ್ತೋ ಮಜ್ಝಿಮಪ್ಪಟಿ ಪತ್ತಿಯಂ,
ಕಾಯಸ್ಸಾನುಗ್ಗಹಂ ಕತ್ವಾ ತತೋ ಸಮ್ಪಿಣಿತಿ’ನ್ದ್ರಿಯೋ।
೧೩೫.
ಮೂಲೇ’ಜಪಾಲನಿಗ್ರೋಧಪಾದಪಸ್ಸ ಮಹಾಮುನಿ,
ನಿಸೀದಿ ನಿಜಸೋಭಾಹಿ ಓಭಾಸೇನ್ತೋ ದಿಸೋದಿಸಂ।
೧೩೬.
ತದಾ ಸೇನಾನಿ ನಿಗಮೇ ಸುಜಾತಾ ಖೀರ ದಾಯಿಕಾ,
ಸಮ್ಪುಣ್ಣಮನಸಙ್ಕಪ್ಪಾ ಯಾಚಿತ್ವಾ ವಟದೇವತಂ।
೧೩೭.
ಧೀರಂ ದೇವೋತಿ ಮಞ್ಞನ್ತಿ ತುಟ್ಠಹಟ್ಠಾ ಪಮೋದಿತಾ,
ಹೇಮಪಾತಿಂ ಸಪಾಯಾಸಂ ದತ್ವಾನ ಇದಮ’ಬ್ರುವಿ।
೧೩೮.
ಯಥಾ ಮಯ್ಹಂ ಮಹಾದೇವ ಇದ್ಧಾ ಪತ್ಥಿತ ಪತ್ಥನಾ,
ತಥೇವ ತವ ಸಙ್ಕಪ್ಪೋ ಖಿಪ್ಪಮೇವ ಸಮಿಜ್ಝತು।
೧೩೯.
ಇತಿ ವತ್ವಾನ ವನ್ದಿತ್ವಾ ಕತ್ವಾ ಚ ನಂ ಪದಕ್ಖಿಣಂ,
ಪಕ್ಕನ್ತಾಯ ಸುಜಾತಾಯ ಧೀರೋ ಪಾತಿಂ ಸಮಾದಿಯ।
೧೪೦.
ಉಪಗನ್ತ್ವಾನಾತಿರಮ್ಮಂ ನದಿಂ ಸೋ ನೀಲವಾಹಿನಿಂ,
ಸುಪ್ಪತಿಟ್ಠಿತನಾಮಮ್ಹಿ ನದೀತಿತ್ಥೇ ನಿಸೀದಿಯ।
೧೪೧.
ಭುಞ್ಜಿತ್ವಾ ಊನಪಣ್ಣಾಸ ಪಿಣ್ಡಂ ಕತ್ವಾನ ಭೋಜನಂ,
ವಿಸ್ಸಜ್ಜೇತ್ವಾ ತತೋ ಪಾತಿಂ ಪಟಿಸೋತಂ ನರಾಸಭೋ।
೧೪೨.
ತತೋ ಸಾಲವನುಯ್ಯಾನೇ ವಿಸ್ಸಮನ್ತೋ ದಿವಾದಿನೇ,
ದಿಸ್ವಾನ ಸುಪಿನೇ ಪಞ್ಚ ಅತ್ಥಂ ತೇಸಂ ವಿಚಿನ್ತಿಯ।
೧೪೩.
ಆಬೋಧಿಮೂಲತೋ ಮಗ್ಗೇ ದೇವೇಹಿ ಸಮಲಙ್ಕತೇ,
ಮಣಿತೋರಣಪಾಲೀಹಿ ಪುಣ್ಣಕುಮ್ಭದ್ಧಾಜಾದಿಹಿ।
೧೪೪.
ಸಾಯಣ್ಹಸಮಯೇ ನಾಥೋ ಗಚ್ಛನ್ತೋ ಬೋಧಿ ಸನ್ತಿಕಂ,
ದಿಸ್ವಾನ ಸೋತ್ಥಿಯಂ ನಾಮ ಥೂಯಮಾನಂ ದಿಜುತ್ತಮಂ।
೧೪೫.
ತೇನ ದಿನ್ನಟ್ಠ ಮುಟ್ಠಿನ್ತು ಗಹೇತ್ವಾ ನೀಲಸದ್ದಲಂ,
ಬೋಧಿಮೂಲಮುಪಾಗಮ್ಮ ಕತ್ವಾನ ತಂ ಪದಕ್ಖಿಣಂ।
೧೪೬.
ಅಕಾಸಿ ತೀಣಸನ್ಥಾರಂ ಪಾಚೀನಾಭಿಮುಖಂ ತದಾ,
ತತೋ ಮಹಿಂ ದ್ವಿಧಾ ಕತ್ವಾ ಸಮುಟ್ಠಾಸಿ ಮಹಾಸನಂ।
೧೪೭.
ಉಚ್ಚಂ ಚುದ್ದಸಹತ್ಥೇನ ನಾನಾ ಚಿತ್ತ ವಿಚಿತ್ತಿತಂ,
ಅಭಟ್ಠನಹಿತ್ಥ ತತ್ರಟ್ಠೋ ಇಚ್ಚೇವಂ ದಳ್ಹಮಾನಸೋ।
೧೪೮.
ಕಾಮಂ ತಚೋ ನಹಾರೂ ಚ ಅಟ್ಠಿ ಚ ಅವಸಿಸ್ಸತು,
ಉಪಸುಸ್ಸತು ಮೇ ಗತ್ತೇ ಸಬ್ಬನ್ತಂ ಮಂಸಲೋಹಿತಂ।
೧೪೯.
ನ ಉಟ್ಠಹಾಮಬುಜ್ಝಿತ್ವಾ ನ ಜಹೇ ವೀರಿಯಂ ಮಮ,
ಅಧಿಟ್ಠಹಿತ್ವಾ ಏವಂ ಸೋ ನಿಸೀದಿ ವಜಿರಾಸನೇ।
೧೫೦.
ಅನತಿಕ್ಕಮಂ ಠಪೇತ್ವಾನ ಚರಣಂ ಚರಣುಪರಿ,
ಕಮಲಂ ಕಮಲೇನೇವ ಮಣಿಬನ್ಧಂ ವಿಧಾಯ ಸೋ।
೧೫೧.
ಬಾಲಾಸೋಕದಲಾಸತ್ತ ಪರಂ ವಾ’ಸೋಕಪಲ್ಲವಂ,
ನಿಧಾಯ ನಯನಾನತ್ದ ಪಾಣಿಂ ಪಾಣಿತಲೇ ಜಿನೋ।
೧೫೨.
ಯಥಾ ಸಞ್ಝಾಘನಾಲೀಢ ತುಙ್ಗಕಞ್ಚನ ಪಬ್ಬತೋ,
ಸುರತ್ತಚೀವರಚ್ಛನ್ನ ಚಾರಿಗತ್ತ ವಿರಾಜಿತೋ।
೧೫೩.
ಉದಯಾವಲಕೋಟಿಮ್ಹಿ ದಿಪ್ಪನ್ತೋವ ದಿವಾಕರೋ
ಕನ್ಧರೋಪರಿ ದಿಪ್ಪನ್ತ ಮುಖಮಣ್ಡಲಮಣ್ಡಿತೋ।
೧೫೪.
ಯಥಾ ಚಾಮಿಕರಬ್ಯಮ್ಹೇ ಸುನೀಲಂ ಸೀಹಪಞ್ಜರಂ,
ಅಸಮ್ಪಕಮ್ಪಪಮ್ಹೇಹಿ ಪಿಹಿತದ್ಧಸುಲೋಚನೋ।
೧೫೫.
ನೀಲುಪ್ಪಲಕಲಾಪಂಚ ಜನನೇತ್ತಾಲಿಪಾತನಂ,
ಸಜ್ಝುದಣ್ಡಸಮಾಬದ್ಧ ಬೋಧಿಕ್ಖನ್ಧಮಫಸ್ಸಿ ಸೋ।
೧೫೬.
ನಿಸಿನ್ನೋ ಬೋಧಿತೋ ಛೇಜ್ಜ ಪವಾಳತರುಣಙ್ಕುರಾ,
ಪತಮಾನಾ ಸಮನ್ತಾಸುಂ ತೇಜಂ ವಿಯ ಕುಬುದ್ಧೀನಂ।
೧೫೭.
ದೇವಾ ತತ್ಥ ಸಮಾಗಞ್ಜುಂ ಖಿಪ್ಪಂ ದಸಸಹಸ್ಸಿಯಂ,
ಕಮಲಾಸನೋರಗಾ ಚೇವ ಸಿದ್ಧವಿಜ್ಜಾಧರಾದಯೋ
೧೫೮.
ಸಹಮ್ಪತಿ ಮಹಾಬ್ರಹ್ಮಾ ಬ್ರಹ್ಮಸೇನಾಪುರಕ್ಖತೋ,
ಸಿತಾತಪತ್ತಂ ಧಾರೇನ್ತೋ ಠೀತೋ ಸಮ್ಬುದ್ಧ ಸನ್ತಿಕೇ।
೧೫೯.
ವೀಸಂ ರತನ ಸತಾಯಾಮಂ ವಿಜಯುತ್ತರ ನಾಮಕಂ,
ಸಙ್ಖಂ ಧಮೇನ್ತೋ ಅಟ್ಠಾಸಿ ಸಾದರೋ ಪಾಕಸಾಸನೋ।
೧೬೦.
ಸುಯಾಮೋ ಸಹ ಸೇನಾಯ ಥೋಮಯನ್ತೋ ನರಾಧಿಪಂ,
ಮಣಿತಾಲವಣ್ಟಂ ಪಗ್ಗಯ್ಹ ಮನ್ದಮನ್ದೇನ ವೀಜತಿ।
೧೬೧.
ಜಿತಕಿತ್ತಿ ಲತಗ್ಗಮ್ಹಿ ಸಸ್ಸ ಪುಪ್ಫಂಚ ಪುಪ್ಫೀತಂ,
ವಾಳವಿಜನಿಮುಗ್ಗಯ್ಹ ಅಟ್ಠಾ ಸನ್ತುಸಿತೋ ತಹಿಂ।
೧೬೨.
ಬೇಲುವಂ ವೀಣಮಾದಾಯ ಗೀತಂ ನಾನಾಲಯಾನುಗಂ,
ಪಞ್ಚಸಿಖೋ ಠಿತೋ ತತ್ಥ ಗಾಯಮಾನೋ ಅನೇಕಧಾ।
೧೬೩.
ಮಹಾಕಾಲೋ’ಪಿ ನಾಗಿನ್ದೋ ನಾಗಸಙ್ಘಪುರಕ್ಖತೋ,
ಥೋಮೇನ್ತೋ ತತ್ಥ ಅಟ್ಠಾಸಿ ನವಾರಹಗುಣಾದಿಹಿ।
೧೬೪.
ರಙ್ಗಭುಮಿಂ ಮಾಪಯಿತ್ವಾ ಗಹೇತ್ವಾನ ವರಙ್ಗನಾ,
ಉಪಹಾರಂ ಕರೋನ್ತಟ್ಠಾ ತಿಮ್ಬರೂ ಸೂರಿಯವಚ್ಚಸಾ।
೧೬೫.
ಆಗನ್ತ್ವಾ ಸಹ ಸೇನಾಯ ಸಿತಙ್ಗೋ ಸಿತಭುಸನೋ,
ಧತರಟ್ಠೋ ಠಿತೋ ಪುಬ್ಬೇ ಆರಕ್ಖಂ ಕುರುಮಾನಕೋ।
೧೬೬.
ಪೂರೇನ್ತೋ ಸಕಸೇನಾಯ ದಕ್ಖಿಣಸ್ಸಂ ವಿರೂಳ್ಹಕೋ,
ಆರಕ್ಖಂ ಕುರುಮಾನಟ್ಠಾ ನೀಲಙ್ಗೋ ನೀಲಭುಸನೋ।
೧೬೭.
ವಿರೂಪಕ್ಖೋ’ಪಿ ಅಟ್ಠಾಸಿ ಪಾಲಯಂ ಪಚ್ಛಿಮಂ ದಿಸಂ,
ರತ್ತಙ್ಗಾಭರಣೋ ವಮ್ಮೀ ನಿಜಸೇನಾಪುರಕ್ಖತೋ।
೧೬೮.
ಉತ್ತರಸ್ಸಂ ಸಸೇನಾಯ ಆರಕ್ಖಂ ಕುರುಮಾನಕೋ,
ಸೋಣ್ಣವಣ್ಣಙ್ಗಾಭರಣೋ ಅಟ್ಠಾಸಿ ನರವಾಹನೋ।
೧೬೯.
ಕಿಮೇತ್ಥ ಬಹುಲಾಪೇನ ಜಾತಿಕ್ಖೇತ್ತಮ್ಹಿ ದೇವತಾ,
ನಾಗತಾ ನೇವ ವಾಹೇಸುಂ ಸಬ್ಬೇ ಏತ್ಥೇ’ವ ಓಸಟಾ।
೧೭೦.
ಗಗನಾತೋತಿಣ್ಣಕೇತು ಪಾದೇಹಿ ಪಥವೀತಲೇ,
ನಾಗಾದಯೋ ನ ಧುತಾಸುಂ ಕೇತುನಂ ಬಹು ಕಾ ಕಥಾ।
೧೭೧.
ನ ಧೂತಾ ಧಜಪಾದೇಹಿ ವಾಯುತುದ್ದಾಮವುತ್ತಿಹಿ,
ತಾರಕಾ ಗಗನೇ ಬ್ರೂಮೋ ಕಿನ್ನು ತತ್ಥ ಧಜಾಲುತಾ।
೧೭೨.
ಪುಬ್ಬದಿಸಾ ಚಕ್ಕವಾಳ ಸಿಲಾಯುಗ್ಗತಕೇತುನಂ,
ಪಾದಾನಿ ಪರಭಾಗಾದಿ ಚಕ್ಕವಾಳಸಿಲನ್ವಗುಂ।
೧೭೩.
ಚಕ್ಕವಾಳ ಮಹಾಮೇರು ಯುಗನ್ಧರ ನಗಾದಯೋ,
ಪುಪ್ಫಾವತಂಸಕಾ’ವಾಸುಂ ನಾನಾವಣ್ಣೇಹಿ ಸಙ್ಖತಾ।
೧೭೪.
ವಾಮಾಮನ್ದಮಕರನ್ದ ಬಿನ್ದುಸನ್ದೋಹ ಸುನ್ದರಂ,
ಉಲ್ಲೋಲ ಪದುಮಾಕಿಣ್ಣ ವಿತಾನಂ ವಾಸಿ ಅಮ್ಬರಂ।
೧೭೫.
ಖಿತ್ತಸೋಗನ್ಧಚುಣ್ಣಾನಿ ದೇವಬ್ರಹ್ಮಾದಿನಾ ತಹಿಂ,
ವಿತಾನಂ ವಿಯ ಖಾಯನ್ತಿ ಚಕ್ಕವಾಳಗ್ಗಮಣ್ಡಪೇ।
೧೭೬.
ಕಪ್ಪೂರಾಗರುಧೂಪೇಹೀ ತತ್ಥ ತತ್ಥುಗ್ಗತೇಹಿ ಮಾ,
ಕಾಲಬ್ಭಕೂಟಚ್ಛನ್ನೋವ ಆಸಿ ಮಞ್ಞಂ ಕಥೇಮು ಕಿಂ।
೧೭೭.
ಜಾತಿಕ್ಖೇತ್ತೇಸು ದೇವೇಹಿ ಕತಗ್ಘಿಕುಸುಮಾದಿನಾ,
ನೋಸೀನಾ ಧರಣೀ ಭಾರಾ ದಿಸೇಭಾನಂ ಬಲಂ ಅಹೋ।
೧೭೮.
ಅಮ್ಬರಾಲಮ್ಬಮಾನಾನೀ ಪುಪ್ಫದಾಮಾನಿ ಭೂತಲಂ,
ಆಕಡ್ಢನಾಯ ದೇವೇಹಿ ಬದ್ಧರಜ್ಜುವ ಭಾಸರೇ
೧೭೯.
ಅಞ್ಞೋಞ್ಞಕರಮುಗ್ಗಯ್ಹ ಗಗನೇ ಸುರಸುತ್ದರೀ,
ಪರಿಬ್ಭಮನ್ತಾ ಗಾಯನ್ತಿ ತತ್ಥ ತತ್ಥ ಮನೋರಮಂ।
೧೮೦.
ಉಭೋ ಭುಜೇ ವಿಕಾಸೇತ್ವಾ ಮಣ್ಡಿತಂ ಸುರಸುತ್ದರೀ,
ಭಮನ್ತಿ ಭನ್ತಭೇಣ್ಡುವ ತತ್ಥ ತತ್ಥಮ್ಬರೇ ಯುಗಾ।
೧೮೧.
ನೀಲುಪ್ಪಲಕಲಾಪಾದೀ ಗಹೇತ್ವಾನ ಸುರಙ್ಗನಾ,
ಠೀತಾಸುಂ ಪರಿವಾರೇತ್ವಾ ಪೂಜಮಾನಾ ನರಿಸ್ಸರಂ।
೧೮೨.
ರತ್ನಪಲ್ಲವಕಲಹಾರ ಕಮಲುಪ್ಪಲ ಸಙ್ಗತೇ,
ಸನ್ನೀರಕುಸುಮಾಕಿಣ್ಣೇ ಪುಣ್ಣೇಸೋಗನ್ಧವಾರಿಹೀ।
೧೮೩.
ಕಞ್ಚನಾದಿಘಟೇ ಗಯ್ಹ ಅಮ್ಬರೇ ಸುರಸುನ್ದರೀ,
ಕತ್ವಾನ ಸುಗತಂ ಮಜ್ಝೇ ಪೂಜಯಿಂಸು ಸಮನ್ತತೋ
೧೮೪.
ಕಞ್ಚನಾದಾಸಹತ್ಥಾ ಚ ಕಾಚೀ ಕಞ್ಞಾ ತಥಾ ಠಿತಾ,
ತಾಲವಣ್ಟೇ ಗಹೇತ್ವಾನ ಠೀತಾಸುಂ ಕಾಚಿ ದೇವತಾ।
೧೮೫.
ಕಾಚಿ ಮಙ್ಗಲ ಸಂಯುತ್ತ ವಚನಾ ತವ ಪತ್ಥನಾ,
ಸಮಿಜ್ಝತುತಿ ಘೋಸೇನ್ತೀ ಪರಿವಾರೇತ್ವಾ ಠಿತಾ ಜಿನಂ।
೧೮೬.
ಸಿರಿವಚ್ಛಾದಿ ಪಗ್ಗಯ್ಹ ಅಟ್ಠಮಙ್ಗಲಮುತ್ತಮಂ,
ಠಿತಾಸುಂ ಗಗನೇ ನಾರೀ ಪರಿವಾರೇತ್ವಾ ಮುನಿಸ್ಸರಂ।
೧೮೭.
ನಚ್ಚನ್ತಿ ಕೇಚಿ ಕೀಳನ್ತಿ ಸೇಲೇನ್ತಿ ಚ ಲಲನ್ತಿ ಚ,
ವಾದೇನ್ತಿ ಕೇಚಿ ಗಾಯನ್ತಿ ವೇಲುಕ್ಖೇಪಂ ಕರೋನ್ತಿ ಚ।
೧೮೮.
ನೇಕಪುಪ್ಫಗ್ಘಿಪನ್ತೀ ಚ ತಥಾ ದೀಪಗ್ಘಿಪನ್ತಿ ಚ,
ಮಣಿಚಾಮೀಕರಾಸಜ್ಝು ಅಗ್ಘಿಕಾ ಪನ್ತಿಯೋ ತಥಾ।
೧೮೯.
ಆಬ್ರಹ್ಮಭವನುಗ್ಗಮ್ಮ ಚಕ್ಕವಾಳಸಮನ್ತತೋ,
ತಿಟ್ಠನ್ತಿ ಜಲಮಾನಾಯೋ ಬುದ್ಧಸ್ಸ ಮಙ್ಗಲುಸ್ಸವೇ।
೧೯೦.
ಸತ್ತರತನಸಮ್ಭುತಾ ನಾನಾ ತೋರಣಪನ್ತೀಯೋ,
ಹೇಮರಮ್ಭಾಮಯಾ ಚಾಪಿ ತಥಾ ದುಸ್ಸಮಯಾ ಸಿಯುಂ।
೧೯೧.
ನಾನಾವಣ್ಣೇಹಿ ನೇಕೇಹಿ ಛತ್ತೇಹಿ ಚ ನಿರನ್ತರಂ,
ಚಕ್ಕವಾಳೋದರಂ ಆಸಿ ಸರಂಚ ಕಮಲಾಕುಲಂ।
೧೯೨.
ತತ್ಥ ತತ್ಥುಜ್ಜಲಾನೇಕ ಯನ್ತದೀಪಾವಲೀ ಮಹೀ,
ತಾರಕಾಜಾಲಕಾಕಿಣ್ಣ ಗಗನಙ್ಗನಸನ್ತಿಭಾ।
೧೯೩.
ಧಜನ್ತರಿತ ಛತ್ತಾ’ಸುಂ ಚಕ್ಕವಾಳಗಿರೂಪರಿ,
ನಿರನ್ತರಾ’ಸುಂ ತತ್ಥೇವ ಘಟದೀಪಾ ಚ ತೋರಣ।
೧೯೪.
ನಾನಾತುರಿಯನಾದೇಹಿ ನಾನಾಸಙ್ಗೀತಿತಾಹಿ ಚ,
ಸಾಧುವಾದೇಹಿ ನೇಕೇಹಿ ಚಕ್ಕವಾಳೋ ಫುಟೋ ಅಹೂ।
೧೯೫.
ಅಹೋ ಮಹನ್ತತಾ ತಸ್ಸ ಬುದ್ಧಸ್ಸ ಕತಮಙ್ಗಲೇ,
ಪೂಜಾವಿಸೇಸಂ ತಂ ಕೋ ಹಿ ಮುಖೇನೇಕೇನ ಭಾಸತೀ।
೧೯೬.
ಚತುಮ್ಮುಖೋ ಸಹಸ್ಸಕ್ಖೋ ದ್ವಿಸಹಸ್ಸನಯನೋ ಫಣೀ,
ದಸಕಣ್ಠೋ’ಪಿ ತಂ ಸಬ್ಬಂ ನೇವ ಸಕ್ಕೋನ್ತಿ ಭಾಸಿತುಂ।
೧೯೭.
ಏವಂ ಸುರಾಸುರಬ್ರಹ್ಮ ವೇನತೇಯ್ಯೋರಗಾದಿಹಿ,
ನಿರನ್ತರಂ ಕತಾನೇಕ ಮಹಾಮಹ ಸಮಾಕುಲೇ।
೧೯೮.
ತಸ್ಮಿನ್ತು ವಾಸರೇ ಮಾರೋ ಪಸ್ಸಿತ್ವಾ ಭುವನಂ ಇದಂ,
ಆಮನ್ತೇತ್ವಾ ಸಾನುವರೇ ಆಹೇವಂ ಸಕುತೂಹಲೋ।
೧೯೯.
ಸಬ್ಬೇ ದಿಬ್ಬವಿಮಾನಾ ಭೋ ಸುಞ್ಞಾ ದಿಸ್ಸನ್ತಿ ಛಡ್ಡಿತಾ,
ಪುರಪಾಲಮ್ಪಹಾಪೇತ್ವಾ ಕ್ವ ಗತಾ’ಸುಂ ಸದೇವಕಾ।
೨೦೦.
ಕಿಮ್ಭೋ ಮಾರ ನ ಜಾನಾಸಿ ಮತ್ತೋ ಸುತ್ತೋ’ಸಿ ಅಜ್ಜ ಕಿಂ,
ಸುದ್ಧೋದನಿಯ ಸಿದ್ಧತ್ಥೋ ಮಾಯಾಯ ತನಯೋ ಅಯಂ।
೨೦೧.
ಪುರೇತ್ವಾ ಪಾರಮೀ ಸಬ್ಬಾ ಕತ್ವಾನ ಅಭಿನಿಕ್ಖಮಂ,
ಬೋಧಿಮುಲೇ ನಿಸಿನ್ನೋ ಸಿ ಅಜ್ಜ ಬುದ್ಧೋ ಭವಾಮೀತಿ।
೨೦೨.
ತಸ್ಸ ಪೂಜಾವಿಧಾನತ್ಥಂ ದಸಸಹಸ್ಸೀಸು ದೇವತಾ,
ಸಮಾಗತಾ ಹಟ್ಠತುಟ್ಠಾ ಕರೋನ್ತಜ್ಜ ಮಹಾಮಹಂ।
೨೦೩.
ಕಿನ್ನು ತೇ ಬಧಿರಂ ಸೋತಂ ಕಿನ್ನು ಪರಿಹಾಯಿ ಲೋಚನಂ,
ಧಜಗ್ಗಾ ತೇ ನ ದಿಸ್ಸನ್ತಿ ಉಲ್ಲೋಲಂ ತೇ ನ ಸೂಯತಿ।
೨೦೪.
ತೇಸಂ ತಂ ವಚನಂ ಸುತ್ವಾ ಅನ್ತಕೋ ಖಲು ಪಾಪಿಮಾ,
ದುಕ್ಖಿತೋ ದುಮ್ಮನೋ ತೇಸಂ ಸೋಚನ್ತೋ ಇದಮ್ಬ್ರುವಿ।
೨೦೫.
ಅಹೋ ವತಾ’ತಿಪರಿಹಾನಿ ಸಂಸಾರಸ್ಸ ಮಹಾ ಅಯಂ,
ಅಸಾರೋ ಖಲು ಸಂಸಾರೋ ಸಿದ್ಧತ್ಥೇ ವಿಭವಂ ಗತೇ।
೨೦೬.
ಅಹೋ ವತಾ’ತಿ ನಟ್ಠಮ್ಹಾ ತಿವಟ್ಟಂ ಪರಿಪುರಿತಂ,
ಹೋತಿ ಭೋ ದಹನಾ ದಡ್ಢವನಂವಾತಿ ಅಲಕ್ಖಿಕಂ।
೨೦೭.
ನಿರಾಲೋಕಂ ತಿಲೋಕಂ ಭೋ ಅಸುರಂ ವಾಸರಂ ಯಥಾ,
ಪರಿಮೋಸರತನಂ ಹೋತಿ ರಜ್ಜಂ ವೇದಂ ಜಗತ್ತಯಂ।
೨೦೮.
ಮಮೇಸ ವಿಸಯಂ ಹಿತ್ವಾ ಯಾತಿ ಸಿದ್ಧತ್ಥದಾರಕೋ,
ತೇನ ಯಾತೇನ ಮಗ್ಗೇನ ನಿಕ್ಖಮನ್ತಿ ಬಹುಜ್ಜನಾ।
೨೦೯.
ಭವನ್ತಂ ನ ಕರೋತೇಸೋ ಯಾವ ಸುದ್ಧೋದನತ್ರಜೋ,
ಏಥ ಗಚ್ಛಾಮ ಸಿದ್ಧತ್ಥಮಸಿದ್ಧತ್ಥಂ ಕರೋಮ ಭೋ।
೨೧೦.
ಮಾಪೇಥ ಭೇರವಂ ವಣ್ಣಂ ಬೀಭಚ್ಛಂ ದುದ್ದಸಂ ಖರಂ,
ಸದ್ದೇನೇವ ಪಲಾಪೇಥ ತೂಲಭಟ್ಟಂವ ವಾಯುನಾ।
೨೧೧.
ತಸ್ಸ ತಂ ವಚನಂ ಸುತ್ವಾ ಮಾರಸೇನಾ ಸಮಾಗಮುಂ,
ನಾನಾವೇಸಧರಾ ಹುತ್ವಾ ನಾನಾಯುಧ ಸಮಙ್ಗಿನೋ।
೨೧೨.
ಯೋಜನಾನಂ ತದಾ ಮಾರೋ ದಿಯಡ್ಢಸತಮುಚ್ಚತೋ,
ಗಿರಿಮೇಖಲಮಾರುಯ್ಹ ಸೇನಾಯ ಸಹಸಾ’ಗಮೀ।
೨೧೩.
ದಿಸ್ವಾನ ದುರತೋ ಏತ್ತಂ ದೇವಾ ಮಾರಂ ಸವಾಹಿನಿಂ,
ಭಯಟ್ಟಾಪಗಮುಂ ಖಿಪ್ಪಂ ಧಾವಮಾನಾ ದಿಸೋದಿಸಂ।
೨೧೪.
ಸಂಖಿಪ್ಪ ಖಿಪ್ಪಂ ಸಚ್ಛತ್ತಂ ಬ್ರಹ್ಮಾ ಧಾವಿ ಪರಮ್ಮುಖೋ,
ಕತ್ವಾನ ಪಿಟ್ಠಿಯಂ ಸಙ್ಖಂ ಸಕ್ಕೋ ಧಾವಿ ವಿಸಙ್ಕಿತೋ।
೨೧೫.
ಮಹಾಕಾಲೋ’ಪಿ ನಾಗಿನ್ದೋ ನಿಮುಜ್ಜ ಮಹಿಯಂ ತದಾ,
ವತ್ತದತ್ತಕರೋ ಭೀರು ಸಕೇ ನಿಪತಿ ಮಞ್ಚಕೇ।
೨೧೬.
ಸಂ ಸಂ ಪೂಜಾವಿಧಾನನ್ತು ಛಡ್ಡೇತ್ವಾನ ಸದೇವಕಾ,
ಗತಾಸುಂ ಸುಞ್ಞಕಂ ಆಸಿ ಚಕ್ಕವಾಳಮಿದಂ ತದಾ।
೨೧೭.
ನಿಸ್ಸಿರೀಕಂ ಪದೇಸಂ ತಂ ಅಸೋಭಂ ಅಸಮಞ್ಜಸಂ,
ಅಹೋಸಿ ಪತಿತಾನೇಕ ಪೂಜಾಭಣ್ಡಸಮಾಕುಲಂ।
೨೧೮.
ಏಕೋವ ತತ್ಥ ಸುಗತೋ ನಿಸೀದಿ ವಜಿರಾಸನೇ,
ಪಜ್ಜಲಂ ನಿಜಸಿರಿಯಾ ಸೂರಿಯೋವ ಯುಗನ್ಧರೇ।
೨೧೯.
ಅಕಮ್ಪೋ ಚ ಅಸನ್ತ್ರಾಸೀ ಲೋಮಹಂಸ ವಿವಜ್ಜಿತೋ,
ಅಭೀತೋ ಸೀಹರಾಜಾವ ಮಿಗಚ್ಛಾಪಾನಮಗ್ಗತೋ।
೨೨೦.
ತತೋ ಧಮ್ಮಿಸ್ಸರಸ್ಸಗ್ಗೇ ದುನ್ನಿಮಿತ್ತಾನಿ ಜಾಯರುಂ,
ಅನ್ಧಕಾರಂ ದಿಸಾ ಆಸುಂ ಧೂಮಕೇತು ಚ ಅಮ್ಬರೇ।
೨೨೧.
ದಿನಂ ದುದ್ದಿನಕಂ ಆಸಿ ಹತರಂಸಿ ದಿವಾಕರೋ,
ಉಕ್ಕಾಪತೋ’ಪಿ ಪಞ್ಞಾಯಿ ದಿಸಾಡಾಹೋಪಪಜ್ಜಥ।
೨೨೨.
ಅಘನೇ ಗಗನೇ ಆಸುಂ ಇನ್ದಚಾಪವಿರಜ್ಜುತೀ,
ಅನಲಾಸನಿಯೋ’ದಿತ್ತಾ ತತ್ಥ ತತ್ಥ ಪತನ್ತೀ ಚ
೨೨೩.
ಕಾಕೋಲಸಙ್ಘಾ ವಸ್ಸಿಂಸು ಉಣ್ಣ ಸಕುಣಕೋಸಿಯಾ,
ಚರಿಂಸು ಅಮ್ಬರೇ’ಪೇತಾ ಕಬನ್ಧಾ ಚ ಭಯಾವಹಾ।
೨೨೪.
ಸೇನಂ ಸಂವಿದಹಿತ್ವಾನ ತತೋ ಮಾರೋ ಅಭಿದ್ದವಿ,
ಆಗನ್ತ್ವಾ ಚಕ್ಕವಾಳಮ್ಹಿ ಠಿತೋ ಜಿನಮುದಿಕ್ಖಿಯ।
೨೨೫.
ಏಕಕಸ್ಸ ಮನುಸ್ಸಸ್ಸ ಸನ್ತಿಕೋಪಗಮಂ ಮಮ,
ನ ಯುತ್ತಞ್ಹಿ ಗಜೋ ಯಾತಿ ಗಜಂ ನೋ ಯಾತಿ ಕೋತ್ಥುಕಂ।
೨೨೬.
ನೇತಂ ಗರು ಪಲಾಪೇತುಂ ಕಾಲೋ ಇತಿ ವಿಚಿನ್ತಿಯ,
ಮಾಪೇಸಿ ಕುಪಿತೋ ಖಿಪ್ಪಂ ಕಪ್ಪನಿಲ ಸಮಾನಿಲಂ।
೨೨೭.
ಖಿಪನ್ತೋ ಗಗನೇ ಖಿಪ್ಪಂ ಉದ್ಧರಿತ್ವಾ ವನಸ್ಪತೀ,
ಕತ್ವಾನ ವನಮುಮ್ಮೂಲಂ ವಿದ್ಧಂಸೇನ್ತೋ ಅಸೇಸಕಂ।
೨೨೮.
ಚಾಲೇತ್ವಾ ತಾಲಸಾಲಾದಿಂ ಲುಞ್ಚಿತ್ವಾ ಗಗನೇ ಖಿಪಂ,
ಪಾತೇನ್ತೋ ಚಕ್ಕವಾಳನ್ತೇ ವಾಜಿಸೀಹ ಗಜಾದಯೋ।
೨೨೯.
ಪಹರಿತ್ವಾ ವಿವತ್ತೇತ್ವಾ ಗಿರಿಕೂಟಾನಿ ಉಕ್ಖಿಪಂ,
ಭಮಯನ್ತೋ ನಭೋಮಜ್ಝೇ ಧಾವತೇವ ತತೋ ತತೋ।
೨೩೦.
ಸಿಲಾಹಿ ಸಿಲಾಸಙ್ಘಟ್ಟ ಮಹಾನಾದಂ ಪವತ್ತಯಂ,
ಪಾತೇನ್ತೋ ದಹನಞ್ಚಾಪಿ ಧೂಮಮಮ್ಬರ ಮುಕ್ಖಿಪಂ।
೨೩೧.
ಭಮಯನ್ತೋ ಗಹೇತ್ವಾನ ಅಮ್ಬರೇ ಛದನಿಟ್ಠಿಕಾ,
ಪಾಸಾದೇ ಪರಿವತ್ತೇತ್ವಾ ಪಹರನ್ತೋ ನಗಾದಿಸು।
೨೩೨.
ಖನನ್ತೋ ಪಥವಿಂ ಪಂಸುಂ ಗಹೇತ್ವಾಮ್ಬರಮಣ್ಡಲೇ,
ಬನ್ಧನ್ತೋವ ಪರಂ ಭುಮಿಂ ಭಿನ್ದನ್ತೋ ತುಙ್ಗಪಬ್ಬತೇ।
೨೩೩.
ಭಯಾನಕೇನ ಸದ್ದೇನ ಉಪಗಮ್ಮ ಮಹಾಮುನಿಂ,
ಚಾಲೇತುಂ ನೇವ ಸೋ ಸಕ್ಖಿ ಅಂಸುಮತ್ತಮ್ಪಿ ಚೀವರೇ।
೨೩೪.
ತದಾಸಿ ವಿಜಯೋ ತಸ್ಸ ಸಮ್ಬುದ್ಧಸ್ಸ ಸಿರೀಮತೋ,
ಪಠಮೇ ಮಾರಯುದ್ಧಮ್ಹಿ ಮಾರಸ್ಸಾಸಿ ಪರಾಜಯೋ।
೨೩೫.
ಏವಂ ಮಹಾನುಭಾವೋತಿ ಮನ್ತ್ವಾನ ನರಸಾರಥಿಂ,
ನಿಚ್ಚಂ ವನ್ದಥ ಪೂಜೇಥ ಸೋ ಹಿ ವೋ ಸರಣಂ ಸದಾ।
ಇತಿ ಪಠಮೋ ವಿಜಯೋ।
೨೩೬.
ದಿಸ್ವಾ ನಮುಚಿ ಧೀರಸ್ಸ ಮಾಲುತೇನಾನುಪದ್ದವಂ,
ದುಕ್ಖೀ ಚ ದುಮ್ಮನೋ ಆಸಿ ಕೋಧೇನಾತುರಮಾನಸೋ।
೨೩೭.
ಹೋತು ದಾನಿ ಮಹೋಘೇನ ಪವಾಹೇಮಿ ಇಮಂ ಯತಿಂ,
ಮಾಪೇತ್ವಾನ ಮಹಾಮೇಘಂ ಸೋಚನಾಯ ಅಲಂ ಮಮ।
೨೩೮.
ಇತಿ ಚಿನ್ತಿಯ ಸೋ ಮಾರೋ ಮಹಾಮೇಘಮಮಾಪಯಿ,
ದಿಸಾಸುಮ್ಪಿಹಿತಾ ಸಬ್ಬಾ ಅನ್ಧಕಾರೋ ಅವತ್ಥರಿ।
೨೩೯.
ಉಪರೂಪರಿ ಗುಣಾ ಹುತ್ವಾ ಸಹಸ್ಸಾನಿ ಸತಾನಿ’ಪಿ,
ಧಾರಾಧರಾ ಮಹಾಧಾರಾ ವತ್ತಯಿಂಸು ಸಮನ್ತತೋ।
೨೪೦.
ಸೋದಾಮಿನೀಸಹಸ್ಸೇಹಿ ವಿನದ್ಧಂವ ನಭಂ ಅಹೂ,
ತತ್ಥ ತತ್ಥ ದಿಸಾಭಾಗೇ ಇನ್ದಚಾಪಾ ಅವತ್ತಥ।
೨೪೧.
ಮಹಾರಜತರಜ್ಜೂಹಿ ಸಿಬ್ಬಿತಾವ ನಭಾವನೀ,
ಧರಾಧರೋರುಧಾರಾಹಿ ನಿರನ್ತರಪವತ್ತಿಹಿ।
೨೪೨.
ತತ್ಥ ತತ್ಥ ಪತನ್ತಾನಿ ಘೋರಾಸನಿಸತಾ ಅಹುಂ,
ಮಹಾಭೀಮ ನಭೋ ಭೇರಿಸ್ಸನಾ ಆಸುಂ ತಹಿಂ ತಹಿಂ।
೨೪೩.
ಉದ್ಧರನ್ತೋ ಮಹಾಸೇಲೇ ಮಹೋಘೋ ಚ ತದುಬ್ಭವೇ,
ಕೇಲಾಸ ಸಿಖರಾಕಾರ ಏಣೇಪುಞ್ಜೇ ಸಮುಬ್ಬಹಂ।
೨೪೪.
ಮಹಾಥೂಪಪ್ಪಮಾಣಾದಿ ಮಹಾಬುಬ್ಬುಲಮುಬ್ಬಹಂ,
ಗಮ್ಭೀರೋ ಪುಥುಲೋ ಚಣ್ಡೋ ಉಪಗಮ್ಮ ಜಿನನ್ತಿಕಂ।
೨೪೫.
ಸರೀರೇ ಲೋಮಮತ್ತಮ್ಪಿ ತೇಮೇತುಮಸಮತ್ಥಕೋ,
ಗತೋ ಮಹೋಘೋ ಬುದ್ಧಸ್ಸ’ಭೋ’ನುಭಾವಮಹನ್ತತಾ।
೨೪೬.
ತದಾಸಿ ವಿಜಯೋ ತಸ್ಸ ಸಮ್ಬುದ್ಧಸ್ಸ ಸಿರೀಮತೋ,
ದುತಿಯೇ ಮಾರಯುದ್ಧಮ್ಹಿ ಮಾರಸ್ಸಾಸೀ ಪರಾಜಯೋ।
೨೪೭.
ಏವಂ ಮಹಾನುಭಾವೋತಿ ಮನ್ತ್ವಾನ ನರ ಸಾರಥಿಂ,
ನಿಚ್ಚಂ ವನ್ದಥ ಪೂಜೇಥ ಸೋ ಹಿ ವೋ ಸರಣಂ ಸದಾ।
ದುತಿಯೋ ವಿಜಯೋ।
೨೪೮.
ತತೋ ಮಾರೋ ಅಸಕ್ಕೋನ್ತೋ ವಸ್ಸೋಘೇನ ಉಪದ್ದವಂ,
ಕಾತುಂ ತಸ್ಸ ಉಸೂಯಾದಿ ಕೋಪಾಕುಲಮನೋ ತದಾ।
೨೪೯.
ಭವತಜ್ಜ ಕಿಮೇತೇನ ಮಾರಣೇ ತಸ್ಸ ಕಿಂ ಗರು,
ಇದಾನಙ್ಗಾರವುಟ್ಠೀಹಿ ಝಾಪೇಮಿ ಸಹಸಾ ಇಮಂ।
೨೫೦.
ಇತಿ ಚಿನ್ತಿಯ ಸೋ ಮಾರೋ ಮಾಪೇತ್ವಾಙ್ಗಾರ ವುಟ್ಠಿಯೋ,
ಪೇಸೇಸಿ ನಭಸಾ ತಸ್ಸ ಸಮ್ಬುದ್ಧಸ್ಸ ಉಪನ್ತಿಕಂ।
೨೫೧.
ಮಹಾಪಬ್ಬತಸಙ್ಕಾಸ ಜಲಿತಙ್ಗಾರ ರಾಸಯೋ,
ಧಾವಿಂಸು ನಹಸಾ ತತ್ಥ ಅಚ್ಚಿಮನ್ತೋ ಮಹಬ್ಭಯಾ।
೨೫೨.
ಚಿಚ್ಚಿಟಾಯನ ಸದ್ದೇಹಿ ಪೂರಯನ್ತೋ ದಿಸನ್ತರಂ,
ಧೂಪಾಯನ್ತೋ ಫುಲಿಙ್ಗೇಹಿ ಮಾರಸ್ಸಾಪಿ ಭಯಾವಹಾ।
೨೫೩.
ಉಜ್ಜಾಲೇನ್ತಾ ಮಹಾರುಕ್ಖೇ ಪಬ್ಬತೇ’ಪಿ ಚ ಸಮ್ಮುಖೇ,
ನರಕೋದರುಗ್ಗತಾ ಅಗ್ಗೀ ರಾಸೀವಾತಿ ಭಯಾವಹಾ।
೨೫೪.
ಉಪಗನ್ತ್ವಾ ಮುಹುತ್ತೇನ ನಿಸಿನ್ನಂ ಮುನಿಪುಙ್ಗವಂ,
ಮಧುಮತ್ತಾಲಿಝಙ್ಕಾರ ನಾದಾಕುಲದಿಸಾಮುಖಾ।
೨೫೫.
ಪಾತೇನ್ತಿ ಸತತಾಮನ್ದ ಮಕರನ್ದಜ ಬಿನ್ದವೋ,
ಮಾಲಾವತಂಸಕಾ ಹುತ್ವಾ ಪಾದಮುಲೇ ಪತಿಂಸು ತಾ।
೨೫೬.
ತದಾಸಿ ವಿಜಯೋ ತಸ್ಸ ಸಮ್ಬುದ್ಧಸ್ಸ ಸಿರೀಮತೋ,
ತತಿಯೇ ಮಾರ ಯುದ್ಧಮ್ಹಿ ಮಾರಸ್ಸಾಸಿ ಪರಾಜಯೋ।
೨೫೭.
ಏವಂ ಮಹಾನುಭಾವೋತಿ ಮನ್ತ್ವಾನ ನರಸಾರಥಿಂ,
ನಿಚ್ಚಂ ವನ್ದಥ ಪೂಜೇಥ ಸೋ ಹಿ ವೋ ಸರಣಂ ಸದಾ।
ತತಿಯೋ ವಿಜಯೋ।
೨೫೮.
ತೇನಾನುಪದ್ದುತಂ ಬುದ್ಧಂ ಪಸ್ಸಿತ್ವಾನ ಪಜಾಪತಿ,
ದುಕ್ಖಿತೋ ದುಮ್ಮನೋ ಹುತ್ವಾ ಏವಂ ಚಿನ್ತೇಸಿ ದುಮ್ಮತಿ।
೨೫೯.
ಪಾಸಾಣವಸ್ಸಂ ಮಾಪೇತ್ವಾ ಚುಣ್ಣೇತ್ವಾ ಪನಿಮಂ ಯತಿಂ,
ವಿದ್ಧಂಸೇಮೀತಿ ಚಿನ್ತೇತ್ವಾ ಮಾಪೇಸೂಪಲವಸ್ಸಕಂ।
೨೬೦.
ತಸ್ಮಿಂ ವಸ್ಸೇ’ತಿ ಬೀಭಚ್ಛಾ ಧೂಮಾಯನ್ತಾ ಸಜೋತಿಕಾ,
ಜಲಿತಙ್ಗಾರಸಙ್ಕಾಸಾ ಪಾಸಾಣುಚ್ಚಾವಚಾ ಬಹೂ।
೨೬೧.
ಕರಾನಞ್ಞೋಞ್ಞಸಙ್ಘಟ್ಟಾ ಮಹನ್ತಂ ಭೇರವಂ ರವಂ,
ದುದ್ದಿನಂ ಧೂಮಜಾಲಾಹಿ ಕುರುಮಾನಾ ಸಮನ್ತತೋ।
೨೬೨.
ಸತ್ಥೂಪಗನ್ತ್ವಾಭಿಮುಖಂ ಸನ್ತಮಾಲಾಗುಲಾ ವಿಯ,
ಪತಿಂಸು ಸಿರಿಪಾದೇ ತೇ ಅಮನ್ದಾಮೋದವಾಹಿನೋ।
೨೬೩.
ತದಾಸಿ ವಿಜಯೋ ತಸ್ಸ ಸಮ್ಬುದ್ಧಸ್ಸ ಸಿರೀಮತೋ,
ಚತುತ್ಥೇ ಮಾರಯುದ್ಧಮ್ಹಿ ಮಾರಸ್ಸಾಸಿ ಪರಾಜಯೋ।
೨೬೪.
ಏವಂ ಮಹಾನುಭಾವೋತಿ ಮನ್ತ್ವಾನ ನರಸಾರಥಿಂ,
ನಿಚ್ಚಂ ವನ್ದಥ ಪೂಜೇಥ ಸೋ ಹಿ ವೋ ಸರಣಂ ಸದಾ।
ಚತುತ್ಥೋ ವಿಜಯೋ।
೨೬೫.
ದಿಸ್ವಾನತ್ತಮನೋ ಮಾರೋ ದಿತ್ತೋ ಕೋಧಗ್ಗಿನಾ ತದಾ,
ಮಾಪೇತ್ವಾ’ಯುಧವಸ್ಸಂ ಸೋ ಪೇಸೇಸಿ ತದುಪನ್ತಿಕಂ।
೨೬೬.
ನೇತ್ತಿಂಸಚ್ಛೂರಿಕಾ ಸತ್ತಿ ಹೇಣ್ಡಿವಾಲ ಗದಾದಯೋ,
ತಿಣ್ಗಧಾರಾ ಪಜ್ಜಲಿತಾ ಅಚಿರಜ್ಜುತಿ ಸನ್ನಿಭಾ।
೨೬೭.
ಯಥಾ ಪುಪ್ಫೋಪಹಾರೋಪಗನ್ತ್ವಾನ ಗಗನಙ್ಗನಾ,
ಏವಂ ಸಮ್ಬುದ್ಧಪಾದೇಸು ಪತಿಂಸು ಪರಿವತ್ತಿತಾ।
೨೬೮.
ತದಾಸಿ ವಿಜಯೋ ತಸ್ಸ ಸಮ್ಬುದ್ಧಸ್ಸ ಸಿರೀಮತೋ,
ಪಞ್ಚಮೇ ಮಾರಯುದ್ಧಮ್ಹಿ ಮಾರಸ್ಸಾಸಿ ಪರಾಜಯೋ।
೨೬೯.
ಏವಂ ಮಹಾನುಭಾವೋತಿ ಮನ್ತ್ವಾನ ನರಸಾರಥಿಂ,
ನಿಚ್ಚಂ ವನ್ದಥ ಪೂಜೇಥ ಸೋ ಹಿ ವೋ ಸರಣಂ ಸದಾ।
ಪಞ್ಚಮೋ ವಿಜಯೋ।
೨೭೦.
ತಂ ದಿಸ್ವಾ ಪಾಪಿಮಾ ಕುದ್ಧೋ ಯಂ ಯಂ ತಸ್ಸ ಕರೋಮ’ಹಂ,
ತಂ ತಂ’ದಾನೀ ನ ಸಕ್ಕೋತಿ ಕಿಞ್ಚಿ ಕಾಕುಮು’ಪಕ್ಕಮಂ।
೨೭೧.
ಮಾಪೇಸಿ ಕುಕ್ಕುಲಂ ವಸ್ಸಂ ಮಾರಮೀತ’ಧುನಾ ಮುನಿಂ,
ಸೋ’ಗಾ’ಕಾಸಾ ಸಮ್ಪದಿತ್ತೋ ಧೂಮಾಯನ್ತೋವ ಪಜ್ಜಲಂ।
೨೭೨.
ಜಿನಸ್ಸಾಭಿಮುಖಂ ಗನ್ತ್ವಾ ಕುಕ್ಕುಲೋ ಪರಿವತ್ತಿಯ,
ಚನ್ದನಸ್ಸ ಸಿತಬ್ಭಸ್ಸ ಧೂಲೀ ಹುತ್ವಾನ ಪಗ್ಘರಿ।
೨೭೩.
ತದಾಸಿ ವಿಜಯೋ ತಸ್ಸ ಸಮ್ಬುದ್ಧಸ್ಸ ಸಿರೀಮತೋ,
ಛಟ್ಠೇ ನಮುಚಿ ಯುದ್ಧಮ್ಹಿ ಮಾರಸ್ಸಾಸೀ ಪರಾಜಯೋ।
೨೭೪.
ಏವಂ ಮಹಾನುಭಾವೋತಿ ಮನ್ತ್ವಾನ ನರಸಾರಥಿಂ,
ನಿಚ್ಚಂ ವನ್ದಥ ಪೂಜೇಥ ಸೋ ಹಿ ವೋ ಸರಣಂ ಸದಾ।
ಛಟ್ಠೋ ವಿಜಯೋ।
೨೭೫.
ತತೋ ದಿಸ್ವಾನ ತಂ ಕಣ್ಹೋ ಕಣ್ಹಸೇನಾ ಪುರಕ್ಖತೋ,
ಸಙ್ಕುದ್ಧೋ ಪೇಸಯಿ ತತ್ಥ ವಸ್ಸಂ ಸೋ ಸಿಕತಾಮಯಂ।
೨೭೬.
ಖದೀರಙ್ಗಾರ ಸಙ್ಕಾಸಾ ವಾಲುಕಾ ಗಗನಾಗತಾ,
ಭಸ್ಸನ್ತಾ ಜಿನಪಾದನ್ತೇ ವಾಸಚುಣ್ಣತ್ತಮಾಗತಾ।
೨೭೭.
ತದಾಸಿ ವಿಜಯೋ ತಸ್ಸ ಸಮ್ಬುದ್ಧಸ್ಸ ಸಿರೀಮತೋ,
ಸತ್ತಮೇ ಮಾರಯುದ್ಧಮ್ಹಿ ಮಾರಸ್ಸಾಸಿ ಪರಾಜಯೋ।
೨೭೮.
ಏವಂ ಮಹಾನುಭಾವೋತಿ ಮನ್ತ್ವಾನ ನರ ಸಾರಥಿಂ,
ನಿಚ್ಚಂ ವನ್ದಥ ಪೂಜೇಥ ಸೋ ಹಿ ವೋ ಸರಣಂ ಸದಾ।
ಸತ್ತಮೋ ವಿಜಯೋ।
೨೭೯.
ತಮ್ಪಿ ದಿಸ್ವಾ ಅಸಜ್ಜನ್ತೋ ಅಹಿರೀ ಕೋಪಕೇತುಕೋ,
ಮಾಪೇತ್ವಾ ಪಲಿಪನ್ದಾನಿ ತತ್ಥ ಓಸೀದಯಾಮಿ ತಂ।
೨೮೦.
ಇತಿ ಚಿನ್ತಿಯ ಮಾಪೇತ್ವಾ ಪೇಸೇಸಿ ಪಲಿಪಂ ಘನಂ,
ಧೂಪಾಯನ್ತೋ ಪಜ್ಜಲನ್ತೋ ಗನ್ತ್ವಾ ಸೋ ನಭಸಾ ಲಹುಂ।
೨೮೧.
ಸಮ್ಬುದ್ಧಸಿರಿಪಾದಮ್ಹಿ ಸಮ್ಪತ್ತೋ ನಿಬ್ಬುತೋ ತತೋ,
ನಾನಾಸುಗನ್ಧಸಮ್ಭುತ ಗನ್ಧಕದ್ದಮತಂ ಗತೋ।
೨೮೨.
ತದಾಸಿ ವಿಜಯೋ ತಸ್ಸ ಸಮ್ಬುದ್ಧಸ್ಸ ಸಿರೀಮತೋ,
ಅಟ್ಠಮೇ ಮಾರಯುದ್ಧಮ್ಹಿ ಮಾರಸ್ಸಾಸಿ ಪರಾಜಯೋ।
೨೮೩.
ಏವಂ ಮಹಾನುಭಾವೋತಿ ಮನ್ತ್ವಾನ ನರಸಾರಥಿಂ,
ನಿಚ್ಚಂ ವನ್ದಥ ಪೂಜೇಥ ಸೋ ಹಿ ವೋ ಸರಣಂ ಸದಾ।
೨೮೪.
ಓಲೋಕೇನ್ತೋ ತತೋ ಮಾರೋ ಮಾರಾರಿಂ ಸಿರಿಯುಜ್ಜಲಂ,
ದಿಸ್ವಾ ಚಿತ್ತಮ್ಪಸಾದೇತುಮಸಕ್ಕೋನ್ತೋ’ತಿ ಕೋಪವಾ।
೨೮೫.
ಅಜ್ಜೇತಮನ್ಧಕಾರಸ್ಮಿಂ ಪಕ್ಖಿಪಿತ್ವಾ ಪಮೋಹಿತುಂ,
ಮಯ್ಹಂ ಭಾರೋತಿ ಚಿನ್ತೇತ್ವಾ ಮಾಪೇಸಿ ತಿಮಿರಂ ಘನಂ।
೨೮೬.
ಲೋಕನ್ತರೇಸು ಸಮ್ಭುತ ತಿಮಿಸೋ’ವ ಭಯಾವಹೋ,
ಗನ್ತ್ವಾನ ಗಗನಾ ಸೋ ಹಿ ಪತ್ವಾನ ಮುನಿಸನ್ತಿಕಂ।
೨೮೭.
ಯಥಾ ತಿಮಿರಮಾಯಾತಿ ವಿನಾಸಂ ಸುರಿಯುಗ್ಗತೇ,
ಏವಮಾಸಿ ಜಿನಗ್ಗಮ್ಹಿ ಅನ್ಧಕಾರೋ ತಥಾವಿಧೋ।
೨೮೮.
ತದಾಸಿ ವಿಜಯೋ ತಸ್ಸ ಸಮ್ಬುದ್ಧಸ್ಸ ಸಿರೀಮತೋ,
ನವಮೇ ಮಾರಯುದ್ಧಮ್ಹಿ ಮಾರಸ್ಸಾಸಿ ಪರಾಜಯೋ।
೨೮೯.
ಏವಂ ಮಹಾನುಭಾವೋತಿ ಮನ್ತ್ವಾನ ನರಸಾರಥಿಂ,
ನಿಚ್ಚಂ ವನ್ದಥ ಪೂಜೇಥ ಸೋ ಹಿ ವೋ ಸರಣಂ ಸದಾ।
ನವಮೋ ವಿಜಯೋ।
೨೯೦.
ಏವಂ ನವಹಿ ವುಟ್ಠಿಹಿ ಕತ್ವಾ ಮಾರೋ ಮಹಾ ಭವಂ,
ನ ತಸ್ಸೋಪದ್ದವಂ ದಿಸ್ವಾ ದಿತ್ತಕೋಪಾನಲಾಕುಲೋ।
೨೯೧.
ಗಹೇತ್ವಾನ ತತೋ ಖಿಪ್ಪಂ ಠಪಿತಂ ಅತ್ತಗುತ್ತಿಯಾ,
ಚಕ್ಕಾಯುಧಂ ಮಹಾತೇಜಂ ಕುಪಿತೋ ಖಿಪಿ ವೇಗಸಾ।
೨೯೨.
ಧಾರಾಧರಂ ತಮುಗ್ಗಯ್ಹ ಕುದ್ಧೋ ಪಹರತೇ ಯದೀ,
ಕಲೀರಂವ ಅಸಜ್ಜನ್ತೋ ವಿಖಣ್ಡೇತಿ ಪಜಾಪತಿ।
೨೯೩.
ತಥೇವ ಸೋ ಮಹಿಂ ಕುದ್ಧೋ ಮಾರೋ ಖಿಪತಿ ವೇಗವಾ,
ನ ಭವನ್ತೋಸಧಾ ಪಾಣಾ ವಿಸುಸ್ಸನ್ತಿ ಸರಾದಯೋ।
೨೯೪.
ತಥೇವ ಕುಪಿತೋ ತೇನ ಖಿಪತೇ ಸೋ ಮಹಮ್ಬುಧಿಂ,
ವಿಲಯಂ ಜಲಜಾ ಯನ್ತಿ ಸುಸ್ಸತೇ ಸೋ ಮಹಣ್ಣವೋ।
೨೯೫.
ಏವಂ ಮಹಾನುಭಾವೋ ಸೋ ಗಚ್ಛನ್ತೋ ಜಲಮ್ಬರೇ,
ಪತ್ವಾನ ಪತಿತೋ ನಾಥಂ ಹುತ್ವಾನ ಪುಪ್ಫಚುಮ್ಬಟಂ।
೨೯೬.
ತದಾಸಿ ವಿಜಯೋ ತಸ್ಸ ಸಮ್ಬುದ್ಧಸ್ಸ ಸಿರೀಮತೋ,
ದಸಮೇ ಮಾರಯುದ್ಧಮ್ಹಿ ಮಾರಸ್ಸಾಸಿ ಪರಾಜಯೋ।
೨೯೭.
ಏವಂ ಮಹಾನುಭಾವೋತಿ ಮನ್ತ್ವಾನ ನರಸಾರಥಿಂ,
ನಿಚ್ಚಂ ವನ್ದಥ ಪೂಜೇಥ ಸೋ ಹಿ ವೋ ಸರಣಂ ಸದಾ।
ದಸಮೋ ವಿಜಯೋ।
೨೯೮.
ಇತಿ ಕೋಪಗ್ಗಿನಾ ದಿತ್ತಮನಂ ಮಾರಂ ತದಾ ಜಿನೋ,
ಕರುಣಾಜಲಸೇಕೇನ ನಿಬ್ಬಾಪೇನ್ತೋ ನಿಸೀದಿ ಸೋ।
೨೯೯.
ಏವಂ ಕತ್ವಾಪಿ ಸೋ ಕುದ್ಧೋ ಅಲದ್ಧವಿಜಯೋ ತದಾ,
ಆಮನ್ತೇಸಿ ಸಕಂ ಸೇನಂ ಪಲಯಾನಲಭೇರವಂ।
೩೦೦.
ಏಥಾಸು ವತ’ರೇ ಮಯ್ಹಂ ಅಸ್ಸವಾ ಮಾರಕಿಙ್ಕರಾ,
ನಾನಾವೇಸಧರಾ ಹೋಥ ಧಾರೇಥ ವಿವಿಧಾಯುಧೇ।
೩೦೧.
ಸದ್ದೇಹೇತಂ ಪಲಾಪೇಥ ಯಾಥ ಗಣ್ಹಥ ಬನ್ಧಥ,
ಪಾದೇ ಗಹೇತ್ವಾ ಖಿಪಥ ಚಕ್ಕವಾಳನ್ತರಂ ಇತೋ।
೩೦೨.
ಅಥಗಾ ಸಹ ವಾಚಾಹಿ ಭಿಂಸಾ ಸಾ ಮಾರವಾಹಿನೀ,
ತುರಙ್ಗ ವ್ಯಗ್ಘ ಮಾತಙ್ಗ ಸೀಹಾದಿರೂಪ ಭಿಂಸನಾ।
೩೦೩.
ಸಾ ಮಾರಸ್ಸುಭತೋ ಪಸ್ಸೇ ಚತುವೀಸತಿಯೋಜನೇ,
ಠಿತಾ ಪಚ್ಛಿಮಭಾಗಮ್ಹೀ ಚಕ್ಕವಾಳಸಿಲಾವಧಿಂ।
೩೦೪.
ಬಹಲತ್ತೇನ ಸಾ ಆಸಿ ಸಮ್ಪುಣ್ಣ ನವಯೋಜನಾ,
ಯಕ್ಖ ಪೇತ ಪಿಸಾಚಾದಿ ವೇಸೇಹಿ ಭಯವಾಹಿನೀ।
೩೦೫.
ಸಂವಟ್ಟ ವಾತಸಮ್ಪಾತ ಖುಭೀತಮ್ಬುಧಿನೋ ವಿಯ,
ಉಲ್ಲೋಲ ಭಿಮಘೋಸೋ ತು ಗತೋ ಬ್ರಹ್ಮಪುರಾವಧಿಂ।
೩೦೬.
ದನ್ತ ಸಙ್ಘಟ್ಟ ಸಞ್ಜಾತ ಜಾಲಾಮಾಲಾ ಸಮಾಕುಲಾ,
ತೇಸಂಗಾರಾ’ವ ದಿತ್ತಾಸುಂ ಕೋಧುಮ್ಮೀಲಿತ ಲೋಚನಾ
೩೦೭.
ವಹನ್ತಿ ಧೂಮಕ್ಖನ್ಧಾನಿ ಮುಖಕೋಟರ ಕೋಟಿಹೀ,
ನೀಹಟಾ ನೀಹಟಾ ಜಿವ್ಹಾ ಸುಭೀಮೋರಗತಂ ಗತಾ।
೩೦೮.
ಉದ್ಧರಿತ್ವಾನ ತಾಲಾದಿ ಕರಿತ್ವಾನ ಸರಾಸನೇ,
ಭುಜಙ್ಗೇ ಚ ಗುಣೇ ಕೇಚಿ ಗಾಳ್ಹಮಾಕಡ್ಢಯನ್ತಿ ಚ।
೩೦೯.
ಪುಣ್ಡರೀಕಚ್ಛ ಸೀಹಾದೀ ಖಿಪನ್ತಾಭಿಮುಖೇ ತದಾ,
ಧಾವನ್ತೇಕೇ ಸಮುಗ್ಗಯ್ಹ ಪುರತೋ ದಿತ್ತಪಬ್ಬತೇ।
೩೧೦.
ಭಯಾನಕಾತಿ ನೇಕಾನಿ ಸೀಸಾನೇಕ ಕಲೇಬರೇ,
ಮಾಪಯಿತ್ವಾನ ಪುರತೋ ಧಾವನ್ತಿ ಕೇಚಿ ಕಿಙ್ಕರಾ।
೩೧೧.
ಸೀಸೇನ ಸೀಹಸಙ್ಕಾಸಾ ಗತ್ತೇನ ಮನುಜೋಪಮಾ,
ಬುದ್ಧಸ್ಸಾಭಿಮುಖಂ ಕೇಚಿ ಧಾವನ್ತಿ ಮಾರ ಕಿಙ್ಕರಾ।
೩೧೨.
ಕಣ್ಠೀರವಾಕಾರದೇಹಾ ಮುಖೇನ ಖಲು ರಕ್ಖಸಾ,
ಹುತ್ವಾನ ಅಭಿಧಾವನ್ತಿ ಕೇಚಿಮಾರಸ್ಸ ಕಿಙ್ಕರಾ।
೩೧೩.
ದಣ್ಡಮಾನವಕಾ ಸೀಸಭಾಗೇನಾ’ತಿಭಯಾವಹಾ,
ಗತ್ತೇನ ರಕ್ಖಸಾ ಹುತ್ವಾ ಕೇಚಿ ಧಾವನ್ತಿ ಕಿಙಕರಾ।
೩೧೪.
ದೀಪಚ್ಛೇಭ ತುರಙ್ಗಾನಂ ವ್ಯಗ್ಘ ಖಗ್ಗವಿಸಾಣಿನಂ,
ವರಾಹ ಮಹಿಸಾದೀನಂ ಕಣ್ಣಪಾವುರ ಭೋಗಿನಂ।
೩೧೫.
ಸೀಸಾಕಾರ ಮಹಾಸೀಸೇ ತಬ್ಬಿರುದ್ಧೇ ಕಲೇಬರೇ,
ಮಾಪೇತ್ವಾ ಅಭಿಧಾವನ್ತಿ ಕೇಚಿ ಮಾರಸ್ಸ ಕಿಙ್ಕರಾ।
೩೧೬.
ಆಕಡ್ಢೇನ್ತಾ ಕಪೋಲಾನಂ ಕರಸಾಖಾಹಿ ಸಮ್ಮುಖೇ,
ದಸ್ಸಯನ್ತಾ ಮಹಾದಾಠಂ ಕೇಚೇನ್ತಿ ಮಾರಕಿಙ್ಕರಾ।
೩೧೭.
ತಿಖಿಣಗ್ಗನಖಾ ಕೇಚಿ ಫಾಲಯನ್ತಾ ಸಕೋದರೇ,
ಅನ್ತೇ ಗಲೇ ಪಿಲನ್ಧಿತ್ವಾ ಧಾವನ್ತಿ ಕಿಙ್ಕರಾಪರೇ।
೩೧೮.
ಗಿಲನ್ತಾ ಕೇಚಿ ಫಣಿನೋ ಉಗ್ಗಿರನ್ತಾ ತಥೇವ ಚ,
ಸೀಸ ಕನ್ಧರ ಕಣ್ಣನ್ತ ಬಾಹು ಅಙ್ಗುಲಿ ಆದಿಸು।
೩೧೯.
ಸಕಲೇಸು ಸರೀರೇಸು ವಿಸಧೂಮಗ್ಗಿ ಸಙ್ಕುಲೇ,
ಧಾರೇನ್ತಾ’ಸಿವಿಸೇ ಕೇಚಿ ಧಾವನ್ತ್ಯಗ್ಗೇ ಭಯಾವಹಾ।
೩೨೦.
ಪದಿತ್ತಾಯೋಗುಲೇ ಗಯ್ಹ ಖಿಪನ್ತೇಕೇ ಅನೇಕಧಾ,
ದಿತ್ತಪಬ್ಬತಮುದ್ಧಚ್ಚ ಕೇಚಿ ಅಗ್ಗಿಕಪಾಲಕೇ,
ಖಿಪನ್ನಾ ಅಭಿಧಾವನ್ತಿ ದಟ್ಠೋಟ್ಠಾ ಭೀಮಲೋಚನಾ।
೩೨೧.
ಲಾಲಯನ್ತಾ ಸಕಾ ಜಿವ್ಹಾ ಖನ್ಧೇ ಕತ್ವಾನ ಮುಗ್ಗರೇ,
ಮತ್ತಭುಜಙ್ಗ ವೇಸೇನ ಧಾವನ್ತಿ ಅಪರೇ ಭಟಾ।
೩೨೨.
ಪಿಬನ್ತಾ ಲೋಹಿತಾನೇಕೇ ಖಾದನ್ತಾ ಪಿಸಿತೇ ಪರೇ,
ಪಿಸಾಚಾವ’ಚರುಂ ಕೇಚಿ ಮುನಿರಾಜಸ್ಸ ಅಗ್ಗತೋ।
೩೨೩.
ಉಲ್ಲಙ್ಘನ್ತಾ ಚ ಸೇಲೇನ್ತಾ ಧಾವನ್ತಾ ಜಲಿತಾಯುಧಾ,
ಭಿಮವೇಸಧರಾ ಯಕ್ಖಾ ಕೇಚೇನ್ತಿ ಭಕುಟೀಮುಖಾ।
೩೨೪.
ಪಣುಣ್ಣ ಸರವಸ್ಸೇಹಿ ಕುನ್ತತೋಮರ ವುಟ್ಠಿಹಿ,
ಭೇಣ್ಡಿವಾಲಾ’ಸಿಚಕ್ಕೇಹಿ ನಿಬ್ಭರಾಸಿ ದಿಗನ್ತರಂ।
೩೨೫.
ಯಂ ದಿಟ್ಠ ಸುತ ಮತ್ತೇನ ಮರಣಂ ಚಿತ್ತ ವಿಬ್ಭಮಂ,
ಯಾತಿ ಲೋಕೋ ಕಥಂ ಕೋ ತಂ ನಿಸ್ಸೇಸಂ ಭಾಸತೇ ನರೋ।
೩೨೬.
ನೇಕದನ್ತಸಹಸ್ಸೇಹಿ ನಿಕ್ಖನ್ತಗ್ಗಿಸಿಖಾಯುತಂ,
ದಾನನಿಜ್ಝರಸಮ್ಪಾತಂ ಭೀಮಗಜ್ಜನಗಜ್ಜಿತಂ।
೩೨೭.
ನೇಕಸತ ಕರಗ್ಗೇಹಿ ಧತಾಯೋಲಗುಳಾದಿಕಂ,
ಸನ್ನದ್ಧಂ ಕವಚಾದೀಹಿ ಗಿರಿಂಚ ಗಿರಿಮೇಖಲಂ।
೩೨೮.
ಆರೂಳ್ಹೋ ಪಾಪಿಮಾ ತತ್ಥ ಉಸ್ಸಾಪೇತ್ವಾ ಜಯದ್ಧಜಂ,
ವಿಸಾಲಾವತ್ತ ದಾಠಗ್ಗೋ ಚಿಪಿಟಗ್ಗ ಭಗ್ಗ ನಾಸಿಕೋ।
೩೨೯.
ದಟ್ಠೋಟ್ಠ ಭೀಮವದನೋ ಭಕುಟೀ ವಲಿ ಲಲಾಟಕೋ,
ಕೋಧಾನಲೇಹಿ ಸನ್ದಿದ್ಧ ಮಹಕ್ಖೋ ತಮ್ಬದಾಠೀಕೋ।
೩೩೦.
ನೀಲಪಬ್ಬತ ಸಙ್ಕಾಸ ವಿಸಮಙ್ಗೋ ಮಹೋದರೋ,
ಗೋನಸೋರಗ ಸಪ್ಪಾದಿ ಅಙ್ಗೀಕತ ಸುಭಿಂಸನೋ।
೩೩೧.
ಸಹಸ್ಸಬಾಹುಂ ಮಾಪೇತ್ವಾ ಛೂರಿಕಾ ಯಟ್ಠಿ ಸತ್ತಿ ಚ,
ಕೋದಣ್ಡಚಣ್ಡಬಾಣೇ ಚ ಚಕ್ಕ ಕುನ್ತಗದಾದಿ ಚ।
೩೩೨.
ಸಙ್ಕು ವೇತಾಲಿಕಾ ಫರಸು ಪಾಸಮುಗ್ಗರ ಅಙ್ಕುಸೇ,
ಗಹೇತ್ವಾ ಕಣಯಞ್ಚಾಥ ತಿಸೂಲ ವಜಿರಾಯುಧೇ।
೩೩೩.
ಪರಿವತ್ತೇಸಿ ಆಕಾಸೇ ತೇಸಮಞ್ಞೋಞ್ಞ ಘಟ್ಟನಾ,
ಉಗ್ಗತೇಹಿ ಫುಲಿಙ್ಗೇಹಿ ಧಾವನ್ತೇಹಿ ಸಮನ್ತತೋ।
೩೩೪.
ಅಗ್ಗಿ ಚಕ್ಕಪರೀತಂಚ ಕುರುಮಾನೋ ನಿಜಂ ತನುಂ,
ಆವಹನ್ತೋ ಭಯಂ ಬ್ರಹ್ಮ ಸುರ ಸಿದ್ಧಾದೀನಂ ತದಾ,
ಸ ಮಾರಸೇನೋ ಸೋ ಮಾರೋ ಭಗವನ್ತಮುಪಾಗಮಿ।
೩೩೫.
ಉದಯಾವಲಕೂಟಮ್ಹಿ ಭಾಸನ್ತೋವ ಪಭಾಕರೋ,
ಸುಪ್ಪತಿಟ್ಠಿತಮೇರೂ’ವ ತಿಕೂಟಾಚಲ ಮುದ್ಧನಿ।
೩೩೬.
ಕತ್ವಾನ ಪಿಟ್ಠಿತೋ ಬೋಧಿಂ ಭೂರುಹಂ ವಜಿರಾಸನೇ,
ನಿಸಿನ್ನೋ ಭಗವಾ’ತೀವ ನಿಚ್ಚಲೋ ಅತಿರೋಚತಿ।
೩೩೭.
ಅಕಮ್ಪೋ ಸೋ ಮುನೀ ಏವಮಗ್ಗೇ’ಕಾಸಿ ನಿಜಂ ಬಲಂ,
ಸಮ್ಮಪ್ಪಧಾನಸಂಯುತ್ತೋ ದಯಾಮೇತ್ತೋ ಮಹೇಸಿಕೋ।
೩೩೮.
ಚತುಬುದ್ಧಭುಮಿಸಙ್ಖಾತ ಜಯಭುಮಿಮುದಿಕ್ಖಿಯ,
ಚತುಸ್ಸಙ್ಗಹವತ್ಥೂನಂ ಯೋಜೇತ್ವಾ ದ್ವಾರಕೋಟ್ಠಕೇ।
೩೩೯.
ಯೋಜೇತ್ವಾನ ಥಿರಂ ತತ್ಥ ಸದ್ಧಾದಿಬಲಕೋಟ್ಠಕೇ,
ಸತಿಪಟ್ಠಾನಪಾಕಾರೇ ಅಭೇಜ್ಜಿನ್ದ್ರಿಯ ಗೋಪುರೇ।
೩೪೦.
ಥಿರಞಾಣಯುಧಾಕಿಣ್ಣೇ ಮೇತ್ತಾ ಸನ್ನಾಹ ವಮ್ಮಿತೋ,
ಅಭೀತ ಭಾರತೀ ಭುರಿ ಭೇರಿಸಙ್ಖ ಪುರಕ್ಖತೋ।
೩೪೧.
ಚತುರಙ್ಗವಿರಿಯುತ್ತುಙ್ಗ ಮಾತಙ್ಗಕ್ಖನ್ಧಸಙ್ಗತೋ,
ಪುಞ್ಞಸಮ್ಭಾರಭಾರೇನ ಕಮ್ಪಯಂ ವಸುಧಾತಲಂ।
೩೪೨.
ಚರಿಯತ್ತಯ ಸಙ್ಖಾತ’ಮುಸ್ಸಾಪಿತ ಜಯದ್ಧಜೋ,
ಏವಂ ವಿಧಾಯ ಮಾರಾರಿ ಮಾರಸಙ್ಗಾಮ ಮಣ್ಡಲಂ।
೩೪೩.
ದಾನಾದಯೋ ಮಹಾಯೋಧೇ ಆಹೂಯ ಸಹಜಾತಕೇ,
ಸುಣಾಥ ಭೋ ಗಿರಂ ಮಯ್ಹಂ ಭವತಜ್ಜ ಮಹಾ ಭವೋ।
೩೪೪.
ಏಥ ಯಾಥ ಸಮಗ್ಗತ್ಥ ನ ಓಸ್ಸಕ್ಕಥ ಸುಜ್ಝಥ,
ವಿಜೇತುಂ ಮಾರಯುದ್ಧಮ್ಹೀ ನ ಸಕ್ಕಾ’ಸೇಸಜನ್ತುಹಿ।
೩೪೫.
ಅಜ್ಜ ಗಚ್ಛತಿ ನಿಟ್ಠಾನಂ ಸೋ ಭೋ ಪಾರಮಿತಾಭಟಾ,
ಸಹುಸ್ಸಾಹಾ ಮಮಗ್ಗಮ್ಹಿ ದಸ್ಸೇಥ ವೀರಿಯಂ ಸಕಂ।
೩೪೬.
ಅಥ ದಾನಭಟೋ ಆಹ ಅಪ್ಫೋಟಂ ದಿಗುಣಂ ಭುಜಂ,
ಪಸ್ಸದಾನಿ ಮಹಾವೀರ ಬಲಂ ಮೇ ಮಾರಧಂಸನೇ।
೩೪೭.
ಪರಮತ್ಥಪಾರಮಿ ಯೋಧಂ ತಥೇ’ವ ಉಪಪಾರಮಿಂ,
ಉಭೋ ಪಸ್ಸೇ ಕರಿತ್ವಾನ ಸಸೇನೋ ಧಾವಿ ದಪ್ಪವಾ।
೩೪೮.
ತಥೇವ ಸೀಲನಾಮವ್ಹೋ ಪಾರಮೀಭಟ’ಮುತ್ತಮೋ,
ನಿಕ್ಖಮ್ಮ ಸಹ ಸೇನಾಯ ಮಾರಸೇನಮಭಿದ್ದವೀ।
೩೪೯.
ತಥಾನೇಕ್ಖಮ್ಮನಾಮೋಪಿ ಸನ್ನದ್ಧೋ’ಸಭಟೋ ಭಟೋ,
ಮಾರಸೇನಾಮಿಗೇ ಹನ್ತುಂ ಧಾವಿ ದೀಪೀ’ವ ಸಾಹಸೋ।
೩೫೦.
ಪಞ್ಞಾಯೋಧೋ’ಪಿ ಗಚ್ಛನ್ತೋ ಸಾಟೋಪೋ ಧಾವಿ ದಪ್ಪವಾ,
ಮಾರಮೇರುಮಹಾ ಅಜ್ಜ ಸಸೇನುಮ್ಮೂಲಯಾಮಿತಿ।
೩೫೧.
ವೀರಿಯಪಾರಮಿತಾ ಯೋಧೋ ದಟ್ಠೋಟ್ಠೋ ಭೀಮಗಜ್ಜನೋ,
ಸೋಸೇಮಿ ಮಮ ತೇಜೇನ ವದಂ’ಗಾ ಮಾರ ಸಾಗರಂ।
೩೫೨.
ಖನ್ತಿಸಚ್ಚವ್ಹಯಾ ಚೇವ ತತೋ’ಧಿಟ್ಠಾನಕೋ ಭಟೋ,
ಆಸು ಧಾವಿಂಸು ಪಾತೇತುಂ ಮಾರಸ್ಸ ಮಕರದ್ಧಜಂ।
೩೫೩.
ಮೇತ್ತಾನಾಮೋ ಮಹಾಯೋಧೋ ಮಾರೋ ಮಯ್ಹಮಲನ್ತಿ’ಗಾ,
ಉಪೇಕ್ಖಕೋ’ಪೀ ಸೋ ಯೋಧೋ ಮಾರಸೇನಂ ಪದಾಲಿತುಂ।
೩೫೪.
ಪೇಸೇತ್ವೇವಂ ಜಿನೋ ಸೇನಂ’ಸರೀರಂ ದಳ್ಹವಿಕ್ಕಮಂ,
ನಿಸಿದಿ ತಸ್ಸ ತೇಜೇನ ನಿರುಸ್ಸಾಹಾಸಿ ಸಾ ಚಮೂ।
೩೫೫.
ಅಹೋ ಭೋ ವಿಮ್ಹಯಂ ದಾನಿ ಸುಣಾಥ ಮುನಿನೋ ಮಮ,
ಜೇತಿ ಏಕೋ ನಿಸಿನ್ನೋವ ಸಮಾರಂ ಮಾರವಾಹಿನಿಂ।
೩೫೬.
ಕೋಪಾನಲೇನ ಸನ್ದಿತ್ತಂ ದುಟ್ಠ ರುಟ್ಠಂ ಪಜಾಪತಿಂ,
ಅದುಟ್ಠೋ ಜೇತಿ ಸಮ್ಬುದ್ಧೋ ಆನುಭಾವೋ ಹಿ ತಾದಿಸೋ।
೩೫೭.
ದಿತ್ತಾಯುಧೇ ಖಿಪನ್ತೇ’ಪಿ ವಿಜ್ಝನ್ತೇ ವಸವತ್ತಿನೀ,
ನಿರಾಯುಧೋ’ವ ತಂ ಜೇತಿ ಆನುಭಾವೋ ಹಿ ತಾದಿಸೋ।
೩೫೮.
ಸಹಾಟೋಪಂ ಸಹಙಕಾರಂ ಮಾರಂ ಸಾಡಮ್ಬರಂ ತದಾ,
ನಿಚ್ಚಲೋ ಜೇತಿ ಸಮ್ಬುದ್ಧೋ ಆನುಭಾವೋ ಹಿ ತಾದಿಸೋ।
೩೫೯.
ಹತ್ಥಸ್ಸ ರಥಪತ್ತೀಹಿ ಧಾವನ್ತಂ ತಮಿತೋಚಿತೋ,
ನಿಸಿನ್ನೋವ ಜಿನೋ ಜೇತಿ ಆನುಭಾವೋ ಹಿ ತಾದಿಸೋ।
೩೬೦.
ಭಾಸನ್ತಂ ನೇಕಧಾ ಕಣ್ಣ ಕಠೋರ ಗಿರಮನ್ತಕಂ,
ನಿಸ್ಸದ್ದೋ ಜೇತಿ ಸಮ್ಬುದ್ಧೋ ಆನುಭಾವೋ ಹಿ ತಾದಿಸೋ।
೩೬೧.
ಮಾರೋಪಾಗಮ್ಮ ಅಟ್ಠಾಸಿ ಲಙ್ಘಿತುಂ ಅಸಮತ್ಥಕೋ,
ಬುದ್ಧತೇಜಗ್ಗಿ ಪಾಕಾರಂ ದಿತ್ತಮಬ್ಭುಗ್ಗತಂ ಥಿರಂ।
೩೬೨.
ತದಾಹ ನಮುಚಿ ಕುದ್ಧೋ ಭುಜಮುಕ್ಖಿಪ್ಪ’ಮೀದಿಸಂ,
ಖಿಪ್ಪಂ ಸಿದ್ಧತ್ಥ ಹೇ ಗಚ್ಛ ಸನ್ತಕೇದಂ ಮಮಾಸನಂ।
೩೬೩.
ನೋ ಚೇ ಗಚ್ಛಸಿ ತೇ ಹದಯಂ ಫಾಲೇಮಿ ನಖಸತ್ತಿಹಿ,
ವಿಚುಣ್ಣೇಮಿ ತುವಂ ಪಾದೇ ಗಹೇತ್ವಾ ಪಥವೀತಲೇ।
೩೬೪.
ಪಸ್ಸ ಮೇ ಮಹತಿಂ ಸೇನಂ ಪಸ್ಸ ಆಯುಧಸಞ್ಚಯಂ,
ತೇನ ತಂ ಅಭಿಮದ್ದಾಮಿ ತುವಟಂ ಗಚ್ಛಿದಂ ಮಮ।
೩೬೫.
ಅಥಸ್ಸ ವಚನಂ ಸುತ್ವಾ ಜಿನೋ’ಹ ಮಧುರಙ್ಗಿರೋ,
ಕದಾ ತೇ ಪೂರಿತಾ ಮಾರ ಪಲ್ಲಙ್ಕತ್ಥಾಯ ಪಾರಮೀ।
೩೬೬.
ಕದಾ ಅದಾಸಿ ಸೀಸಾದೀ ದಾನಂ ಸೀಲಂ ಕಥಂ ತವ,
ತದತ್ಥಾಯ ಕಥಾಪೇಹಿ ಕೇ ತೇ ಪಚ್ಚಕ್ಖಕಾರಕಾ।
೩೬೭.
ಅಥಾ’ಹ ಫರುಸೋ ಮಾರೋ ನೇತಂ ಗರು ಮುನೇ ಮಮ,
ಅಯಂ ಸಾ ಪರಿಸಾ ಸಬ್ಬಾ ತಸ್ಸ ಪಚ್ಚಕ್ಖಕಾರಕಂ।
೩೬೮.
ಉಗ್ಘೋಸೇಸಿ ಮಹಾಸೇನಾ ಪಕ್ಖೀ’ಹನ್ತಿ ವಿಸುಂ ವಿಸುಂ,
ಭುಮುದ್ರಿಯನ ಮತ್ತೋವ ತತೋ ಕೋಲಾಹಲೋ ಅಹು।
೩೬೯.
ಅಥಾಹ ಮಾರೋ ಸಮಣ ಅಹಂ ಸಕ್ಖಿ ಕಥಾಪಯಿಂ,
ತವ ಕೋ ಸಕ್ಖಿ ಯಜ್ಜತ್ಥಿ ಕಥಾಪೇಹಿ ಲಹುಂ ಮಮ।
೩೭೦.
ಅಥಾಹ ಭಗವಾ ತಸ್ಸ ಗಮ್ಭೀರಂ ಮಧುರಂ ಗಿರಂ,
ನಿಚ್ಛಾರೇನ್ತಾ ಮಯೂರಸ್ಸ ಸುನಾದಂ ಫಣಿನೋ ಯಥಾ।
೩೭೧.
ತವೇವ ಮೇ ನ ಸನ್ತೀಧ ಪಚ್ಚಕ್ಖತ್ಥಂ ಸಚೇತನಾ,
ಅಚೇತನಾವ ಮೇದಾನಿ ಸನ್ತಿ ಪಚ್ಚಕ್ಖವಾದಿನೋ।
೩೭೨.
ಇತಿ ವತ್ವಾನ ಮಾರಾರಿ ಸಞ್ತ್ಧಾ ಜಿಮೂತ ಗಬ್ಭತೋ,
ನಿಕ್ಖನ್ತ ವಿಜ್ಜುಸಙ್ಕಾಸಂ ಕರಂ ಚಾಮೀಕರಜ್ಜುತಿಂ।
೩೭೩.
ರತ್ತ ಚೀವರಗಬ್ಭಮ್ಹಾ ನೀಹರಿತ್ವಾ ಜಿನೋ ತದಾ,
ಧರಣ್ಯಭಿಮುಖಂ’ಕಾಸಿ ಉದ್ದಿಸ್ಸ ಭುಮಿಕಾಮಿನಿಂ।
೩೭೪.
ದಾನಮಾನಾದಿಕಮ್ಮೇ ಮೇ ಕಮ್ಪನ್ತೀ ಜಾತಿಜಾತಿಯಂ,
ಕಿಮಜ್ಜ ನಿಸ್ಸಣಾಸೀ’ತಿ ಜಿನೋ ವಾಚಮುದಾಹರೀ।
೩೭೫.
ಸಕ್ಖಿ’ಹನ್ತಿ ವದನ್ತೀವ ತತೋ ಭುಮಿವರಙ್ಗನಾ,
ಸಳಿಲಾವನಿಪರಿಯನ್ತಾ ಗಜ್ಜನ್ತಿ ನಚ್ಚಿ ತಾವದೇ।
೩೭೬.
ಮಹೀ ಸಾಗರ ಊಮೀ’ವ ಉಟ್ಠಾಪೇನ್ತಿ ಮಹೂಮಿಯೋ,
ಛದ್ಧಾ ಕಮ್ಪಿ ಕುಲಾಲಸ್ಸ ಚಕ್ಕಂವಾತಿ ಪರಿಬ್ಭಮಿ।
೩೭೭.
ಹಿಮವಾ ಗಿರಿರಾಜಾ ಚ ಯುಗನ್ಧರ ನಗಾದಯೋ,
ಕೂಟಬಾಗಾ ಸಮುಕ್ಖಿಪ್ಪ ನಚ್ಚಿಂಸು ನಟಕಾ ವಿಯ।
೩೭೮.
ದಿಸ್ವಾ ಸುತ್ವಾ ತಮಚ್ಛೇರಂ ಗಯೇನುಬ್ಬಿಗ್ಗ ಮಾನಸಾ,
ಮಾರಸೇನಾ ಪಭಿನ್ನಾಸಿ ಭಿನ್ನವೇಲೋವ ಸಾಗರೋ।
೩೭೯.
ಭಯೇನಟ್ಟಸ್ಸರಾ ಭನ್ತಾ ಪತನ್ತಞ್ಞೋಞ್ಞ ಘಟ್ಟನಾ,
ವಿಕಿರಿತ್ವಾ ಕಚೇ ಪಿಟ್ಠೇ ಧಾವಿಂಸು ಮಾರಕಿಙ್ಕರಾ।
೩೮೦.
ಗಹಿತಾಯುಧಾನಿ ಛಡ್ಡೇನ್ತಾ ಪಿದಹನ್ತಾನನಂ ಕರಾ,
ನಿವತ್ಥವತ್ಥಮತ್ತೇ’ಪಿ ಧಾವಿಂಸು ಅನಪೇಕ್ಖಕಾ।
೩೮೧.
ಅಙ್ಗುಲಿಯೋ ಮುಖೇ ಕೇಚಿ ಪಕ್ಖಿಪನ್ತಿ ರುದನ್ತಿ ಚ,
ಕೇಚಿ ವನ್ದನ್ತಿ ಯಾವನ್ತಿ ಅಭಯಂ ಸಾಮಿ ದೇಹಿ ನೋ।
೩೮೨.
ಸಿದ್ಧತ್ಥೋ’ಯಂ ಜಿತೋ ಕಿನ್ನು ನಿಸ್ಸಾಸಾ ರುದ್ಧಭಾಸನಾ,
ಪಿಟ್ಠಿಪಸ್ಸಮುದಿಕ್ಖನ್ತಿ ಧಾವಿಂಸು ಚಕಿತಾ ಪರೇ।
೩೮೩.
ಗಿರಿಮೇಖಲೋ’ಪಿ ನಾಗಿನ್ದೋ ಜನ್ನುಕೇನ ಪತೀ ತದಾ,
ಮಾರೋ’ಪಿ ಪತಿತೋ ಖಿಪ್ಪಂ ಧಾವಿತ್ವಾ’ದಸ್ಸನಂ ಗತೋ।
೩೮೪.
ತಙ್ಕಣೇ ಉಗ್ಗತೋ ಆಸಿ ಸತ್ಥು ಕಿತ್ತಿ ಜಯದ್ಧಜೋ,
ಅವಹೇನ್ತೋವ ಸುರಾದೀನಂ ಬ್ರಹ್ಮಲೋಕಾವಧಿಂ ಗತೋ।
೩೮೫.
ತದಾಸಿ ವಿಜಯೋ ತಸ್ಸ ಸಮ್ಬುದ್ಧಸ್ಸ ಸಿರೀಮತೋ,
ಚರಿಮೇ ಮಾರಯುದ್ಧಮ್ಹಿ ಮಾರಸ್ಸಾಸಿ ಪರಾಜಯೋ।
೩೮೬.
ಏವಂ ಮಹಾನುಭಾವೋತಿ ಮನ್ತ್ವಾನ ನರಸಾರಥಿಂ,
ನಿಚ್ಚಂ ವನ್ದಥ ಪೂಜೇಥ ಸೋ ಹಿ ವೋ ಸರಣಂ ಸದಾ।
ಏಕಾದಸಮೋ ವಿಜಯೋ।
೩೮೭.
ಲದ್ಧಾಭಿವಿಜಯೇ ಬುದ್ಧೇ ನಿಸಿನ್ನೇ ವಜಿರಾಸನೇ,
ಪರಿವಾರಯುಂ ಗತಾಗಮ್ಮ ಪುರೇ ವಿಯ ಸುರಾದಯೋ।
೩೮೮.
ದೇವಾ ತೇ ನಿಖಿಲಾ ನೇತ್ವಾ ನಾನಾಪೂಜಾವಿಧಿಂ ತತೋ,
ಸನ್ತುಟ್ಠಾ ಮುನಿನೋ’ಕಾಸುಂ ಮಹನ್ತಂ ಜಯಮಙ್ಗಲಂ।
೩೮೯.
ಸಮ್ಪತ್ತಾಥ ನಿಸಾಕನ್ತಾ ಮಾನೇತುಂಚ ಮುನಿಸ್ಸರಂ,
ಪುಬ್ಬಾಪರಮ್ಬರೇ ಲಗ್ಗ ಸಸೀಣಕ್ಕಣ್ಣ ಭುಸಣ।
೩೯೦.
ಸುನೀಲಾಕಾಸ ಧಮ್ಮಿಲ್ಲೇ ಧತ್ತ ತಾರಾಲಿಮಾಲಿಕಾ,
ವೀಜೇನ್ತೀವ ದಿಸಾ ಬಾಹಾ ಫುಲ್ಲಚೂತಕ ಚಾಮರೇ।
೩೯೧.
ಮಲ್ಲಿಕಾ ಮುಕುಲಾಸತ್ತ ಸಮ್ಮತ್ತಾಲಿಗಣಾ ತದಾ,
ಧಮೇನ್ತಾ ವಿಯ ಸಙ್ಖಾನಿ ಕೂಜೇನ್ತಿ ಮಧುರಂ ಗಿರಂ।
೩೯೨.
ಸಾಮೋದ ಮಕರನ್ದೇಹಿ ಮನ್ದಮನ್ದಾನಿಲಾಗತಾ,
ಸಜುಣ್ಹಾ ಜಿನಬಿಮ್ಬಮ್ಹಿ ಉತುಂ ಗಾಹೇನ್ತಿ ಸೀತಲಂ।
೩೯೩.
ಅವಿಜ್ಜಾದಿ ಮಹಾಮೂಲಂ ತಿವಟ್ಟತ್ಥಿರ ಖನ್ಧಕಂ,
ಸಂಸಾರ ವಿಸರುಕ್ಖಂ ಸೋ ಆರದ್ಧುಮ್ಮುಲಿತುಂ ತದಾ।
೩೯೪.
ಭಾವೇನ್ತೋ ಪುರಿಮೇ ಯಾಮೇ ಸರನ್ತೋ ಖನ್ಧಸನ್ತತಿಂ,
ಪುಬ್ಬೇನಿವಾಸಾನುಸ್ಸತಿ ಞಾಣಂ ಲದ್ಧಾ ನರಿಸ್ಸರೋ।
೩೯೫.
ತಥಾ ಮಜ್ಝಿಮ ಯಾಮಮ್ಹಿ ದಿಬ್ಬಚಕ್ಖು ವಿಸೋಧನಾ,
ಚುತುಪಪಾತ ಞಾಣಞ್ಚ ಅಧಿಗಂತ್ವಾನ ಸಬ್ಬಸೋ।
೩೯೬.
ರತ್ತಿಯಾ ಪಚ್ಛಿಮೇ ಯಾಮೇ ಚಿನ್ತಯನ್ತೋ ಜರಾದಯೋ,
ವಿಪಸ್ಸಿತ್ವಾ ನಾಮರೂಪೇ ಆರೋಪೇತ್ವಾ ತಿಲಕ್ಖಣಂ।
೩೯೭.
ಸಮ್ಮಸನ್ತೋ ಕಿಲೇಸೇಹಿ ವಿವೇಚೇತ್ವಾ ಸಕಂ ಮನಂ,
ಆಸವಾನಂ ಖಯೇ ಞಾಣಾ ಲದ್ಧಾ ಅಗ್ಗಫಲಂ ತದಾ।
೩೯೮.
ಪತ್ತೋ ನಿಬ್ಬಾಣನಗರಂ ಬೋಜ್ಝಙ್ಗ ರತನಿಸ್ಸರೋ,
ಸದ್ಧಮ್ಮರಾಜಾ ಹುತ್ವಾನ ಪೀತಿವಾಚಮುದಾಹರೀ।
೩೯೯.
ಅನೇಕಜಾತಿ ಸಂಸಾರಂ ಸನ್ಧಾವಿಸ್ಸಂ ಅನಿಬ್ಬಿಸಂ,
ಗಹಕಾರಕಂ ಗವೇಸನ್ತೋ ದುಕ್ಖಾ ಜಾತಿ ಪುನಪ್ಪುನಂ।
೪೦೦.
ಗಹಕಾರಕ ದಿಟ್ಠೋಸಿ ಪುನ ಗೇಹಂ ನ ಕಾಹಸಿ,
ಸಬ್ಬಾ ತೇ ಫಾಸುಕಾ ಭಗ್ಗಾ ಗಹಕೂಟಂ ವಿಸಙ್ಖಿತಂ,
ವಿಸಙ್ಖಾರಗತಂ ಚಿತ್ತಂ ತಣ್ಹಾನಂ ಖಯಮಜ್ಝಗಾ।
೪೦೧.
ಇಚ್ಚೇವ ಮಗ್ಗಮತದಾನವಿಧಿಪ್ಪವೀಣ,
ಕಾರುಞ್ಞಪುಞ್ಞಹದಯೇನ ಮಹೋದಯೇನ,
ಪತ್ವಾ ಭವಣ್ಣವಮಪಾರಮನನ್ತದುಕ್ಖಂ,
ಯೇನೋಚಿತಾ ಪರಮಪಾರಮಿತಾ ಜಿನೇನ।
೪೦೨.
ಯೋಚೇವ ಸಬ್ಬವಿಭವಂ ಪಣುದಿತ್ವ ರಜ್ಜಂ
ನಿಕ್ಖಮ್ಮ ಪತ್ವ ಚಲಪತ್ತಮಹೀರುಹಸ್ಸ,
ಮೂಲೇ ನಿಸಜ್ಜ ಸಬಲಂ ಪಬಲಞ್ಚ ಮಾರಂ,
ಪಾಪಾರಯೋ ಚ ವಿಜಿತೋ ಸ ದದಾತು ಸನ್ತಿಂ।
ಅಭಿಸಮ್ಬೋಧಿ ಕಥಾ।
೪೦೩.
ತಿಲೋಕನಾಥೋ ಸುಗತೋ ತತೋ ತದಾ
ಉದಾನವಾಚಂ ಸಮುದಾಹರಿತ್ವಾ,
ಪಲ್ಲಙ್ಕಮಾಭುಜ್ಜ ದುಮಿನ್ದಮೂಲೇ
ಚಿನ್ತೇಸಿ ಏವಂ ವಜಿರಾಸನಸ್ಮಿಂ।
೪೦೪.
ದಾನಾದಯೋ ಪಾರಮಿತಾ ಚಿನಿತ್ವಾ
ಅಸಙ್ಖಕಪ್ಪಾನಿ ಚ ಖೇಪಯಿತ್ವಾ,
ಅಸ್ಸೇವ ಪಲ್ಲಙ್ಕವರಸ್ಸ ಹೇತು
ಸನ್ಧಾವಿತಂ ತಂ ಭಜಿತಂ ವಯಜ್ಜ।
೪೦೫.
ಯಾವಸ್ಸು ಪುಣ್ಣ ಮಮ ಚೇತನಾಯೋ
ತಾವೇತ್ಥ ಅಚ್ಛಾಮಿ ನ ವುಟ್ಠಹಾಮಿ,
ಮಂತ್ವಾನ ಸೋ ನೇಕಸಹಸ್ಸಸಙ್ಖಾ
ಜಿನೋ ಸಮಾಪತ್ತಿ ವಲಞ್ಜಿ ತತ್ಥ।
೪೦೬.
ದೇವಾತಿದೇವೋ ತಿಭವೇಕನಾಥೋ
ಹತಾವಕಾಸೋ ಜಿತಪಞ್ಚಮಾರೋ,
ಪಿತಾಮಹಾದೀಹಿ ಮಹೀಯಮಾನೋ
ಖೇಪೇಸಿ ಸತ್ಥಾ ದಿವಸಾನಿ ಸತ್ತ।
ಇತಿ ಪಠಮ ಸತ್ತಾಹಂ।
೪೦೭.
ಯಸ್ಮಾಸನಂ ನೇವ ಜಹಾತಿ ತಸ್ಮಾ
ತಿಸನ್ಧಿಯುತ್ತೇನ ನಿಸೀದಿತೇವ,
ಅಜ್ಜಾಪಿ ಕತ್ತಬ್ಬಮನೇನ ಅತ್ಥಿ
ದೇವಾನಮಿಚ್ಛಾಸಿ ಮನಮ್ಹಿ ಕಙ್ಖಾ।
೪೦೮.
ತೇಸಂ ಮನಂ ಸೋ ಮನಸಾ ವಿದಿತ್ವಾ
ವಿನೋದನತ್ಥಂ ವಿಮತಿನ್ತು ತೇಸಂ,
ಉಟ್ಠಾಯ ತಮ್ಹಾ ನಭಮುಪ್ಪತಿತ್ವಾ
ದಸ್ಸೇಸಿ ತೇಸಂ ಮುನಿಪಾಟಿಹೇರಂ।
೪೦೯.
ವಿನೋದಯಿತ್ವಾ ಸುಗತೋ ತದೇವಂ
ಸುಧಾಸಿನಂ ಚೇತಸಿ ಕಙ್ಖರಾಸಿಂ,
ಪಲ್ಲಙ್ಕತೋ ಉತ್ತರಪುಬ್ಬಕಣ್ಣಂ
ಆಕಾಸತೋರುಯ್ಹ ಜಲಂ ರವೀವ।
೪೧೦.
ಜಿನೋ ದುಮಿನ್ದಸ್ಸ ಚ ಆಸನಸ್ಸ
ಬಹೂಪಕಾರತ್ತಮನುಸ್ಸರನ್ತೋ,
ಠಿತೋ ಪದಂ ಕಿಞ್ಚಿ ಅಕೋಪಯನ್ತೋ
ಇತೋ ಚಿತೋ ಲೋಕ ನ ಮುಜ್ಜಹನ್ತೋ।
೪೧೧.
ನೀಲಾಯತಕ್ಖಾಮಲಕನ್ತಿತೋಯ
ಧಾರಾನಿಪಾತೇನ ದುಮಿನ್ದರಾಜಂ,
ನಿಸಿಞ್ಚಮಾನೋ ದಿವಸಾನಿ ಸತ್ತ
ಪೂಜೇಸಿ ತಂ’ನಿಮಿಸಲೋಚನೇಹಿ।
೪೧೨.
ಅಜ್ಜಾಪಿ ತಸ್ಮಿಂ ಧರಣಿಪ್ಪದೇಸೇ
ಕತಸ್ಸ ಥೂಪಸ್ಸ ತದೇವ ನಾಮಂ,
ಅಹೋಸಿ ದೇವಾ ಚ ನರೋ’ರಗಾ ಚ
ಮಹೇನ್ತಿ ತೇ ತೇನ ದಿವಂ ಪಯನ್ತಿ।
ಇತಿ ದುತಿಯ ಸತ್ತಾಹಂ।
೪೧೩.
ದೇವಾ ತತೋ ದೇವವರಸ್ಸ ತಸ್ಸ
ಸುಚಙ್ಕಮಂ’ಕಂಸು ಮಣೀಹಿ ನಾನಾ,
ಪಲ್ಲಙ್ಕತೋ ಠಾನವರಸ್ಸ ಮಜ್ಝೇ
ಪುಬ್ಬಾಪರಾಸಾಯನಮನ್ತರಾಲೇ।
೪೧೪.
ನರಿನ್ದ ನಾಗಿನ್ದ ಸುರಿನ್ದ ಪೂಜಿತೋ
ಛಬ್ಬಣ್ಣರಂಸೀಹಿ ಸಮುಜ್ಜಲನ್ತೋ,
ನೀಲಮ್ಬರೇ ತಾರಕಿತೋ ಸಸೀ’ವ
ಸೋ ಚಙ್ಕಮೀ ಸತ್ತ ಅಹಾನಿ ತತ್ಥ।
೪೧೫.
ಅಜ್ಜಾಪಿ ತಸ್ಮಿಂ ಧರಣಿಪ್ಪದೇಸೇ
ಕತಸ್ಸ ಥೂಪಸ್ಸ ತದೇವ ನಾಮಂ,
ಅಹೋಸಿ ದೇವಾ ಚ ನರೋರಗಾ ಚ
ಮಹೇನ್ತಿ ತೇ ತೇನ ದಿವಂ ಪಯನ್ತಿ।
ಇತಿ ತತಿಯ ಸತ್ತಾಹಂ।
೪೧೬.
ತತೋ ದುಮಿನ್ದಸ್ಸ ಸುರಾಸುರಿನ್ದಾ
ಮಹೀತಲೇ ಪಚ್ಛಿಮೋತ್ತರಾಯಂ,
ಮಾಪಿಂಸು ನಾನಾರತನಾಲಯಗ್ಗಂ
ನಿಸಜ್ಜ ಪಲ್ಲಙ್ಕವರೇ ತಹಿಂ ಸೋ।
೪೧೭.
ಸುದುದ್ದಸಾಗಾಧಮಪಾರಪಾರಂ
ಸಮನ್ತಪಟ್ಠಾನತರಙ್ಗಭಙ್ಗಿಂ,
ಧಮ್ಮೋದಧಿಂ ಞಾಣಸುಮೇರುಮತ್ಥಾ
ಸಾಲೋಲಯಂ ಖೇಪಯಹಾನಿ ಸತ್ತ।
೪೧೮.
ಅಜ್ಜಾಪಿ ತಸ್ಮಿಂ ಧರಣಿಪ್ಪದೇಸೇ
ಕತಸ್ಸ ಥೂಪಸ್ಸ ತದೇವ ನಾಮಂ,
ಅಹೋಸಿ ದೇವಾ ಚ ನರೋರಗಾ ಚ
ಮಹೇನ್ತಿ ತೇ ತೇನ ದಿವಂ ಪಯನ್ತಿ।
ಇತಿ ಚತುತ್ಥ ಸತ್ತಾಹಂ।
೪೧೯.
ತತೋ ಜಿನೋ ಗನ್ತ್ವ’ಜಪಾಲಮೂಲೇ
ವಿಮುತ್ತಿಜಂ ಸಾದುಫಲಂ’ನುಭೋನ್ತೋ,
ಸತ್ತಾಹಮತ್ತಂ ಅತಿವತ್ತಯೀ ಸೋ
ದೇವಾತಿದೇವೋ ಕರುಣಾಗುಣಗ್ಗೋ।
೪೨೦.
ತದಾಗತಾ ಮಾರವಧೂ ಮುನಿತ್ದಂ
ಪಲೋಭಿತುಂ ಯಾ ಪಿತುನೋ ಸಕಾಸಾ,
ತಾಸಂ ಪಯೋಗಮ್ಪಿಧ ಬಿನ್ದುಮತ್ತಂ
ಕಥೀಯತೇ ತಂ ಸಮುಪಾಗತತ್ತಾ।
೪೨೧.
ತದಾ ಸ ಮಾರೋ ಸಮರೇ ಜಿನೇನ
ಪರಾಜಿತೋ ಸೋಚನಕೋ’ಪಗಂತ್ವಾ,
ಪಜ್ಝಾಯಮಾನೋ’ಥ ಅಧೋಮುಖೋ’ಚ
ನಿಸೀದಿ ತುಣ್ಹೀ ವಿಲಿಖಂ ಛಮಾಯಂ।
೪೨೨.
ಪರಾಜಯಂ ಮಯ್ಹ ಮಮೇವ ದೋಸೋ
ನ ತಸ್ಸ ಕಸ್ಮಾಹಮಯಂ’ಚ ನಾಸಿಂ,
ಸೀಸಕ್ಖಿಮಂಸಾದಿ ಚ ಪುತ್ತದಾರೇ
ನಾದನ್ತಿ ಏವಂ ಮನಸೀ ಕರೋನ್ತೋ।
೪೨೩.
ಪವತ್ತಿಮೇತಂ ಮಕರದ್ಧಜಸ್ಸ
ಸುತ್ವಾನ ತಣ್ಹಾ ಅರತೀ ರಗಾ ಚ,
ಯತ್ಥಚ್ಛಿ ಮಾರೋ ಪರಿಸೋಚಯನ್ತೋ
ತತ್ಥಾಗಮುಂ ತಾ ಚಕಿತಾ ಖಣೇನ।
೪೨೪.
ದಿಸ್ವಾನ ತಂ ತತ್ಥ ತಥಾ ನಿಸಿನ್ನಂ
ನಿಸ್ಸಾಸರುದ್ಧಂ ಗಿರಮುಗ್ಗಿರನ್ತೀ,
ತುಸಾರ ಬಿನ್ದುನಿವಹೇಹಿ’ಸಾರ
ಪಙ್ಕೇರುಹಾಕಾರ ವಿಸಾಲನೇತ್ತಾ।
೪೨೫.
ಹಾ ತಾತ ಹಾ ತಾತ ಕಿಮಾಸಿ ತೇದಂ
ನಟ್ಠನ್ನು ತೇ ಕಿಂ ವದ ಪತ್ಥಸೀ ಕಿಂ,
ಕೋ ತೇ ದಿಸೋ ಕೇನ ಪರಾಜಿತೋ’ಸಿ
ಕಿಮಾನಯಿಸ್ಸಾಮ ಹನಾಮ ಕಂ ನೋ।
೪೨೬.
ಕಿಮ್ಹೋತಿಯೋದಾನಿ ನ ಪಸ್ಸಥೇತಂ
ಸುದ್ಧೋದನೀಯಂ ತತಕಿತ್ತಿಘೋಸಂ,
ಮುಖಮ್ಹಿ ಮಯ್ಹಂ ಮಸಿಮಕ್ಖಯನ್ತಂ
ಅತಿಚ್ಚ ಯನ್ತಂ ವಿಸಯಂ ಪಸಯ್ಹ।
೪೨೭.
ನ ಭಾರಿಯಾ ತಾತ ಮನುಸ್ಸಭೂತಂ
ಕತ್ತುಂ ವಸಂ ಕೋ ವಸಮೇತಿ ನಾಮ್ಹಂ,
ತಂ ರಾಗಪಾಸೇನ ಗಜಂ’ವ ಮತ್ತಂ
ಸುಬನ್ಧಕಂ ಬನ್ಧಿಯ ಆನಯೇಮ।
೪೨೮.
ನ ರಾಗಪಾಸೇನ ಹಿ ಆನನೀಯೋ
ಮಾರಸ್ಸ ಧೇಯ್ಯಂ ಸಮತಿಕ್ಕಮೀವ,
ಅಪೇತರಾಗೋ ಅರಹಾ ಅಕಮ್ಪೋ
ಸೋವಾಮ ತಸ್ಮಾ ಸುಭಗಾ ತನುಜಾ।
೪೨೯.
ಸಚೇತನೋ ಸೋ ಹಿ ಮನುಸ್ಸಭುತೋ
ಅಚೇತನಞ್ಚೇ ಸಮುಪಾಗಮಾಮ,
ಕರೋಮ ತಂ ನೋ ವಸಗಂ ಕಿಮೇತ್ಥ
ಚಿತ್ತಂ ಬಲಂ ಪಸ್ಸಥ ನೋ ಖಣೇನ।
೪೩೦.
ರೂಪೇನ ನೇತ್ತಂ ಸುಮನೋಹರೇನ
ಗನ್ಧೇನ ಘಾಣಂ ಸವಣಂ ಸರೇನ,
ಫಸ್ಸೇನ ಗತ್ತಂ ರಸಸಾ ರಸಞ್ಞಂ
ಮನಞ್ಚ ಪಾಸೇನ ಚ ಕಾಮಜೇನ
೪೩೧.
ಸುಬಾಹುಪಾಸೇನ ಚ ತಸ್ಸ ಗೀವಂ
ಬಾಹುದ್ವಯಂ ಧಾರಿತಮಾಲದಾಮಾ,
ಬನ್ಧಿತ್ವದಾನೇವ ತಮಾ’ನಯಾಮ
ಬಲಞ್ಹಿ ನೋ ಪಸ್ಸಥ ತಾತ’ದಾನಿ।
೪೩೨.
ವತ್ವಾನ ಏವಂ ವಚನಂ ಪಿತುಸ್ಸ
ಪಣಮ್ಮ ಪಾದಾನಿ ಪಗಬ್ಭಿತನ್ತಾ,
ಯತ್ಥಚ್ಛಿ ಮಾರಾರಿ ವಿರೋಚಮಾನೋ
ತತ್ಥಾ’ಗಮುಂ ಖಿಪ್ಪಮುದಗ್ಗಚಿತ್ತಾ।
೪೩೩.
ಸಾಮೋದಮಾಲಾಕುಲಕೇಸಭಾರ
ಪಯೋಧರಾ ಕುಙಕ್ಕುಮಹಾರಿಹಾರಾ,
ಬಿಮ್ಬಾಧರಾ ಚಾರುಸಭಾ ಪಭಾಸಾ
ಉಮ್ಮಾದಯನ್ತೀ ಜನಮಾನಸಾನಿ।
೪೩೪.
ಮುದ್ಧೇನ ಮಿಸ್ಸಂ ಮಧುರೇ ನಿಮುಗ್ಗಂ
ಸ್ನೇಹೇನ ತಿನ್ತಂ ರಸತೋ’ನುವಿದ್ಧಂ,
ಭಾಸಿಂಸು ವಾಚಂ ಹದಯಙ್ಗಮನ್ತಾ
ವಿಲೋಕನೇನೇವ ಧಿತಿಂ ಹರನ್ತೀ।
೪೩೫.
ವಸನ್ತಕನ್ತೋ ನವಯೋಬ್ಬನೋ’ಸಿ
ಸುವಣ್ಣವಣ್ಣೋ ಹದಯಙ್ಗಮೋ’ಸಿ
ಏಕೋ ನಿಸಿನ್ನೋ’ಸಿ ವಟಸ್ಸ ಮೂಲೇ
ಸಿಮನ್ತಿನೀ ಸಾಮಿ ಕುಹಿನ್ನು ತುಯ್ಹಂ।
೪೩೬.
ತರಙ್ಗಹೀನೋ’ಪಿ ತರಙ್ಗಮಾಲೀ
ಸಸಙ್ಕಹೀನಾ ರಜನೀ ಚ ಸಾಮೀ,
ಹಂಸಾ’ಲಿಹೀನಾ ಸರಸೀ ಸುಫುಲ್ಲಾ
ನಾಭಾತಿ ಕನ್ತಾ ವಿರತೋ ಧವೋ’ಪಿ।
೪೩೭.
ವಸನ್ತಕಾಲೋ ಚ ವನಂ ಸುಫುಲ್ಲಂ
ನಿಸಾಕರಾಭಾ ಭಮರಾಲಿಗೀತಂ,
ಸುಗನ್ಧಮನ್ದೋಪಗತಾ ಸಮೀರಾ
ವಿರೋಚಸಿ ತ್ವಮ್ಪಿ ಚ ಯೋಬ್ಬನೇನ।
೪೩೮.
ಮಯಮ್ಪಿ ಚೇತ್ಥೇವ ಸಮಾಗತಮ್ಹ
ಮನೋ’ನುಕೂಲಾ ಚ ಮನುಞ್ಞರೂಪಾ,
ಕರೋತಿ ಕಿಂತ್ವ’ಜ್ಜ ಸಕಾಮದಾಹೋ
ಕಾಮಾಕರೋ’ದಾನಿ ಸಮಾಗತೋ ನೋ।
೪೩೯.
ಮಾ ತೇದಿಸಂ ಯೋಬ್ಬನರೂಪಸಾರಂ
ಸುವಿಗ್ಗಹಂ ಛಾದಯ ಚೀವರೇನ,
ತೇನೇವ ನೋ ನೇತ್ತಮನಮ್ಹಿ ಸಾಮಿ
ಮಾ ದೇಹಿ ದಾಹಂ ತವ ದಾಸಿಭುತೇ।
೪೪೦.
ನಖಂಸು ಸುತ್ತೇ’ರುಣಪಾನಿಪಾದೇ
ನೇತ್ತಿನ್ದನೀಲಾನಿ’ವ ಆವುಣನ್ತೋ,
ತ್ವಮಚ್ಛಿ ನೋ ಸಾಮಿ ಮುಖಮ್ಬುಜೇಸು
ನ ಏನ್ತಿ ಕಿನ್ತೇ ನಯನಾಲಿಮಾಲಾ।
೪೪೧.
ಸುಧಾಸಿಲಾಗೀಞ್ಜಕ ಲೋಹದಾರು
ಜಾತೇಹಿ ತ್ವಂ ಧೀರ ನ ನಿಮ್ಮಿತೋ’ಸಿ,
ರೂಪೀ’ಸಿ ಸೋಮ್ಮೋ’ಸಿ ತಥಾಪಿ ಸಾಮಿ
ಕಿಂ ಕಾಮರಾಗಂ ಮನಸಾ ನುದೇಸಿ।
೪೪೨.
ಅಯಞ್ಚ ಬಾಲಾ ಚತುರಾ ರತೀಸು
ಬಾಲೇತಿ ಕಙ್ಖಂ ಜಹ ಮಾನಸಮ್ಹಿ,
ಕಿಂ ಮಞ್ಜರೀ ಭಿಜ್ಜತಿ ಸಮ್ಪಫುಲ್ಲಾ
ಮತ್ತಾಲಿರಾಜೇ ಪರಿಚುಮ್ಬಮಾನೇ।
೪೪೩.
ಅಯಞ್ಚ ರಾಮಾ ರಮಣೀಯರೂಪಾ
ಪೀಣೋರುಗಣ್ಡಾ ಕುವಮಣ್ಡಲಾ ಚ,
ತಂ ಕಾಮಿನಿಂ ಕಾಮಯ ಫುಲ್ಲಕಞ್ಜೇ
ಹಂಸೋ ಯಥಾ ಕೇಸರ ಸಮ್ಪಗಿದ್ಧೋ।
೪೪೪.
ಚಿನ್ತಾಮಣಿಂ ಭದ್ದಘಟಞ್ಚ ಕಪ್ಪ
ತರುಂ ಸಮಾಪಜ್ಜ ದಳಿದ್ದಭಾವಾ,
ನಾಪೇನ್ತಿ ಸತ್ತಾ ಖಲು ದುಬ್ಭಗತ್ತಾ
ತಥೇವ ನೋ’ಸೀ ತವ ಪಾದಸೇವಾ।
೪೪೫.
ಏವಞ್ಹಿ ತಾ ರಞ್ಜನಮಞ್ಜುಭಾಸಾ
ಸಹಸ್ಸಮೇಕಞ್ಚ ಸತಾನಿ ಅಟ್ಠ,
ವೇಸಾನಿ ಸಮ್ಮಾ ಅಭಿನಿಮ್ಮಿಣಿತ್ವಾ
ಪಲೋಭಯುನ್ತಂ ಬಹೂಧಾ ಮುನಿನ್ದಂ।
ತತೋ ತಣ್ಹಾ?।
೪೪೬.
ಯಕ್ಖೋಸಿ ಮತ್ತೋಸಿ ಸಿಲಾಮಯೋಸಿ
ಅಚೇತನೋಸಾ’ಥ ಅಯೋಮಯೋಸಿ,
ಅವೀತರಾಗಞ್ಹಿ ಸಚೇತನಞ್ಚೇ
ಅನೇನುಪಾಯೇನು’ಪಸಙ್ಕಮಾಮ।
೪೪೭.
ಫಲೇಯ್ಯ ಖೀಪ್ಪಂ ಹದಯಞ್ಹಿ ತಸ್ಸ
ಉಣ್ಹಂವ ರತ್ತಂ ಮುಖತು’ಗ್ಗಮೇಯ್ಯ,
ಸಿಯಾವ ಖಿಪ್ಪಂ ಅಪಿ ಚಿತ್ತಖೇಪಂ
ಉಮ್ಮಾದಭಾವಂಚ ಸ ಪಾಪುಣೇಯ್ಯ।
೪೪೮.
ಯಥಾ ಪಲುತ್ತೋ ಹರಿತೋಪಲಮ್ಹಿ
ಖಿತ್ತೋ ನಳೋ ಸುಸ್ಸತಿ ಆತಪೇನ,
ಏವಂ ವಿಸುಸ್ಸೇತಿ ವಿಸಾದಮೇತಿ
ಸೋ ಮುಚ್ಛತಿ ಮುಯ್ಹತಿ ದುಕ್ಖಮೇತಿ।
೪೪೯.
ಸೋಕಾವಕಿಣ್ಣೇ ನು ವನಮ್ಹಿ ಝಾಯಸಿ
ವಿತ್ತನ್ನು ಜಿತೋ ಉದ ಪತ್ಥಯಾನೋ,
ಆಗುನ್ನೂ ಗಾಮಸ್ಮಿಂ ಅಕಾಸಿ ಕಿಞ್ಚಿ
ಜನೇನ ಕಸ್ಮಾ ನ ಕರೋಸಿ ಸಕ್ಖಿಂ।
ಸತ್ಥಾ?।
೪೫೦.
ಅತ್ಥಸ್ಸ ಪತ್ತಿಂ ಹದಯಸ್ಸ ಸನ್ತಿಂ
ಛೇತ್ವಾನ ಸೇನಂ ಪಿಯಸಾತರೂಪಂ
ಏಕೋ’ಹಂ ಝಾಯಂ ಸುಖಮನುಬೋಧಿಂ
ಜನೇನ ತಸ್ಮಾ ನ ಕರೋಮ ಸಕ್ಖಿಂ।
ಇಮಾ
೪೫೧.
ಪಲುಟ್ಠಗತ್ತಂ ದಹನೇನ ಮಕ್ಕಟಿಂ
ಸುಸಾನಪೇತಿಞ್ಚ ಜಿಗುಚ್ಛನೀಯಂ,
ಜೇಗುಚ್ಛಿಯಂ ಜಙ್ಗಮ ಮೀಳ್ಹರಾಸಿಂ
ದಿಸ್ವಾನ ಕೋ ತಂ ವರಯೇ ಸಪಞ್ಞೋ।
ಅಥ ಅರತಿ?।
೪೫೨.
ಕಥಂ ವಿಹಾರೀ ಬಹುಲೋ ಚ ಭಿಕ್ಖು
ಪಞ್ಚೋಘತಿಣ್ಣೇ ಅತರೀಧ ಛಟ್ಠಂ,
ಕಥಂ ಝಾಯಿಂ ಬಹುಲಂ ಕಾಮಸಞ್ಞಾ
ಪರಿಬಾಹಿರಾ ಹೋನ್ತಿ ಅಲದ್ಧ ಯೋ ತಂ।
ಸತ್ಥಾ?।
೪೫೩.
ಪಸ್ಸದ್ಧಕಾಯೋ ಸುವಿಮುತ್ತಚಿತ್ತೋ
ಅಸಙ್ಖರಾನೋ ಸತಿಮಾ ಅನೋಕೋ,
ಅಞ್ಞಾಯ ಧಮ್ಮಂ ಅವಿತಕ್ಕ ಝಾಯೀ
ನ ಕುಪ್ಪತೀ ನಸ್ಸರತೀ ನ ಥೀನೋ।
೪೫೪.
ಏವಂ ವಿಹಾರೀ ಬಹುಲೋ ಚ ಭಿಕ್ಖು
ಪಞ್ಚೋಘತಿಣ್ಣೇ ಅತರೀಧ ಛಟ್ಠಂ,
ಏವಂ ಝಾಯಿಂ ಬಹುಲಂ ಕಾಮಸಞ್ಞಾ
ಪರಿಬಾಹಿರಾ ಹೋನ್ತಿ ಅಲದ್ಧ ಯೋ ತಂ।
ಅಥ ರಗಾ?।
೪೫೫.
ಅಚ್ಛೇಚ್ಛಿ ತಣ್ಹಂ ಗಣಸಙ್ಘಚಾರೀ
ಅದ್ಧಾ ತರಿಸ್ಸನ್ತೀ ಬಹೂ ಚ ಸದ್ಧಾ,
ಬಹುಂ ವತಾಯಂ ಜನತ’ಮನೋಕೋ
ಅಚ್ಛಿಜ್ಜ ನೇಸ್ಸತಿ ಮಚ್ಚುರಾಜಸ್ಸ ಪಾರಂ।
ಸತ್ಥಾ?
೪೫೬.
ನಯನ್ತಿ ವೇ ಮಹಾವೀರಾ ಸದ್ಧಮ್ಮೇನ ತಥಾಗತಾ,
ಧಮ್ಮೇನ ನಯಮಾನಾನಂ ಕಾ ಉಸೂಯಾ ವಿಜಾನತಂ।
ಇಮಾ ಪಞ್ಚ ಪಾಲಿಯಂ?।
೪೫೭.
ಸುತ್ವಾನ ತಂ ಧಮ್ಮವರಂ ಜಿನಸ್ಸ
ಪಮತ್ತಬನ್ಧುಸ್ಸ ರಗಾದಿರಾಮಾ,
ಪಲೋಭಿತುಂ ನೇ’ವ ಸಮತ್ಥಕಾ ತಂ
ಅಗಂಸು ಖಿಪ್ಪಂ ಪಿತುನೋ ಸಕಾಸಂ।
೪೫೮.
ಮಾರೋ ತದಾರಾ’ವ ಸಮೇಕ್ಖಮಾನೋ
ದಿಸ್ವಾಗತಾ ಕೇವಲಮೇವ ತಾಯೋ,
ಮಾ ಕತ್ಥ ಕಾಮಂ ಮಮ ಭಾಸಿತಾನಿ
ಕಾಮತ್ಥ ಪಾತುಂ ಮಿಗತಣ್ಹಿಕಾಪಂ।
೪೫೯.
ಬಾಲಾ ಕುಮುದನಾಳೇಹಿ ಪಬ್ಬತಂ ಅಭಿಮನ್ಥಥ,
ಗಿರಿಂ ನಖೇನ ಖಣಥ ಅಯೋ ದನ್ತೇಹಿ ಖಾದಥ।
೪೬೦.
ಸೇಲಂವ ಸಿರಸಿ ಊಹಚ್ಚ ಪಾತಾಲೇ ಗಾಧಮೇಸಥ,
ಖಾನುಂವ ಉರಸಾ’ಸಜ್ಜ ನಿಬ್ಬಿಜ್ಜಾಪೇಥ ಗೋತಮಾ।
ಇಮಾ ದ್ವೇ ಪಾಲಿಯಂ?।
೪೬೧.
ವತ್ವಾನ ಏವಂ ವಿಮನೋ ಸ ಮಾರೋ
ಸಟೀತುಕೋ ಸಮ್ಭವನಂ ಪಯಾಸಿ,
ಸತ್ಥಾಥ ರಾಗಾ ಪರಿಮುತ್ತಚಿತ್ತೋ
ಜಹಾಸಿ ತಸ್ಮಿಂ ದಿವಸಾನಿ ಸತ್ತ।
೪೬೨.
ಅಜ್ಜಾಪಿ ತಂ ಸಾಖಿವರಮ್ಪಿತೇನ
’ನುಭುತಮತ್ತೇನ ಮಹೇನ್ತಿ ಸಬ್ಬೇ,
ತೇನೇವ ತೇ ಸಗ್ಗಗತಾ ವಿಮಾನೇ
ಮೋದನ್ತಿ ಕಾಮೇಹಿ ಅನೂಪಮೇಹಿ।
ಇತಿ ಪಞ್ಚಮ ಸತ್ತಾಹಂ।
೪೬೩.
ತತೋ ಮುನಿನ್ದೋ ಮುಚಲಿನ್ದಮೂಲೇ
ನಿಸೀದಿ ಗನ್ತ್ವಾ ಪವರಾಸನಮ್ಹಿ,
ಯುಗನ್ಧರೇ ಬಾಲರವೀ’ವ ರಂಸಿ
ಜಾಲಾಹಿ ಲೋಕಂ ಪರಿಪೂರಯನ್ತೋ।
೪೬೪.
ಅಥಾನ ಮೇಘೋ ಜಲದಾ ಸತೇಹಿ
ಪಪೂರಯಂ ಖಂ ಥನಯಂ ಸವಿಜ್ಜು,
ಸಸೀತವಾತೋ ಕಿರಮಮ್ಬುಧಾರಂ
ವಿರೋಚಮಾನೋ ವಿಸಕಣ್ಠಿಕಾಹಿ।
೪೬೫.
ಅಮನ್ದನಣ್ದೋ ಮುಚಲಿನ್ದಭೋಗೀ
ದಿಸ್ವಾ ಮುನಿನ್ದಂ ಮುಚಲಿನ್ದಮೂಲೇ,
ಪರಿಕ್ಖಿಪಿತ್ವಾನ ವಿಸಾಲಭೋಗಾ
ಛಾದೇತ್ವ ಸಮ್ಮಾ ಸಫಣೋ ಫಣೇನ।
೪೬೬.
ಅಜ್ಝೇಸಿ ಸೋ ತಸ್ಸ ಅನುಗ್ಗಹಾಯ
ನಿಸೀದಿ ಗನ್ತ್ವಾ ಭುಜಗಾ’ಸನಮ್ಹಿ,
ಸತ್ಥಾ ತದಾ ರೂಪಿಯಮನ್ದಿರೇವ
ಸತ್ತಾಮಹತ್ತಂ ಸುವಿಮುತ್ತಚಿತ್ತೋ।
೪೬೭.
ಅಜ್ಜಾಪಿ ತಂ ಸಾಖಿವರಮ್ಪಿ ತೇನ
’ನುಭುತಮತ್ತೇನ ಮಹೇನ್ತಿ ಸಬ್ಬೇ,
ತೇನೇವ ತೇ ಸಗ್ಗಗತಾ ವಿಮಾನೇ
ಮೋದನ್ತಿ ಕಾಮೇಹಿ ಅನೂಪಮೇಹಿ।
ಇತಿ ಛಟ್ಠಮ ಸತ್ತಾಹಂ।
೪೬೮.
ತತೋ’ಪಗನ್ತ್ವಾ ಯತಿರಾಜ ರಾಜಾ
ನಿಸೀದಿ ರಾಜಾಯತನಸ್ಸ ಮೂಲೇ,
ವಿಮುತ್ತಿಜಂ ಪೀತಿಸುಖಂ’ನುಭೋನ್ತೋ
ಸತ್ತಾಹಮತ್ತಂ ಕರುಣಾಗುಣಗ್ಗೋ।
೪೬೯.
ಅಜ್ಜಾಪಿ ತಂ ಸಾಖಿವರಮ್ಪಿ ತೇನ
’ನುಭುತಮತ್ತೇನ ಮಹೇನ್ತೀ ಸಬ್ಬೇ,
ತೇನೇವ ತೇ ಸಗ್ಗಗತಾ ವಿಮಾನೇ
ಮೋದನ್ತಿ ಕಾಮೇಹಿ ಅನೂಪಮೇಹಿ।
ಇತಿ ಸತ್ತಮ ಸತ್ತಾಹಂ।
೪೭೦.
ಆಹಾರ ಕಿಚ್ಚಾದಿ ವಿವಜ್ಜಿತಸ್ಸ
ಸುಖಾನುಭೋನ್ತಸ್ಸ ವಿಮುತ್ತಿಜಾನಿ,
ಸಮ್ಪೀಣಿತಙ್ಗಸ್ಸ ಜಿನಸ್ಸ ತಸ್ಸ
ಇಚ್ಚಚ್ಚಗುಂ ಸತ್ತದಿನಾನಿ ಸತ್ತ।
೪೭೧.
ದೇವಾನಮಿನ್ದೇನ ತತೋ’ಪನೀತ
ಮುಖೋದಕಾದಿಮ್ಪರಿಭುಞ್ಜಿಯಾನ,
ನಿಸಿನ್ನಮತ್ತೇ ಯತಿರಾಜ ರಾಜೇ
ತತ್ಥಾ’ಗಮುಂ ದ್ವೇ ವಾಣಿಜಾ ಖಣೇನ।
೪೭೨.
ಉಸ್ಸಾಹಿತಾ ದೇವವರೇನ ಸಮ್ಮಾ
ಸಾಲೋಹಿತಾ ತಸ್ಸ ತಪುಸ್ಸ-ಭಲ್ಲಿಕಾ,
ಮನ್ಥಞ್ಚ ಸಾದುಂ ಮಧುಪಿಣ್ಡಿಕಞ್ಚ
ಆದಾಯ ನಾಥಂ ಇದಮಬ್ರುವುನ್ತೇ।
೪೭೩.
ಇದಞ್ಹಿ ನೋ ಧೀರ ಅನುಗ್ಗಹಾಯ
ಪಟಿಗ್ಗಹೇತ್ವ ಪರಿಭುಞ್ಜ ದಾನಂ,
ಹಿತಾಯ ತಂ ಹೋತಿ ಸುಖಾಯ ಚೇವ
ಅನಪ್ಪಕಪ್ಪೇಸು ಅನಾಗತೇಸು।
೪೭೪.
ಪಟಿಗ್ಗಹೇತ್ವಾ ಮುನಿ ದೇವದಿನ್ನ
ಪತ್ತೇನ ಪಚ್ಚಗ್ಘಸಿಲಾಮಯೇನ,
ಭುತ್ವಾನ ತೇಸಂ ಅನುಮೋದನತ್ಥಂ
ದೇಸೇಸಿ ಧಮ್ಮಂ ವರದಂ ಪಸತ್ಥಂ।
೪೭೫.
ದ್ವೇ ಭಾತಿಕಾ ವಾಣೀಜಕಾ ಜಿನಸ್ಸ
ಧಮ್ಮಂ ಸುಣಿತ್ವಾನ ಪಸನ್ನಚಿತ್ತಾ,
ದ್ವೇ ವಾಚಿಕೋಪಾಸಕತಂ ಗತಾಸುಂ
ಯಾಚಿಂಸು ತೇ ತಂ ಪುನ ಪೂಜನೀಯಂ।
೪೭೬.
ಪರಾಮಸಿತ್ವಾನ ಸಿರಂ ತತೋ ಸೋ
ಅದಾ ಜಿನೋ ಕುನ್ತಲ ಧಾತುಮುಟ್ಠಿಂ,
ತೇ ತೇನ ತುಟ್ಠಾ ಸುಮನಾ ಪತೀತಾ
ಮಹಿಂಸು ನೇತ್ವಾ ವಿಭವಾನುರೂಪಂ।
೪೭೭.
ಸತ್ಥಾ’ಥ ಗನ್ತ್ವಾ ಅಜಪಾಲಮೂಲೇ
ಸಹಸ್ಸ ರಂಸೀವ ಯುಗನ್ಧರಮ್ಹಿ,
ನಿಸಜ್ಜ ಲೋಕಂ ಅನುಲೋಕಯನ್ತೋ
ವಿತಕ್ಕಿ ಏವಂ ಮನಸಾ ವಿತಕ್ಕಂ।
೪೭೮.
ಮಯಜ್ಝಪನ್ನೋ ವರಧಮ್ಮಸಾರೋ
ಸಸಸ್ಸ ಸಿನ್ಧೂ’ವ ಅಗಾಧಪಾರೋ,
ಅಬುದ್ಧಸತ್ತೇಹಿ ತಮಜ್ಜ ಕಸ್ಸ
ಪಕಾಸಯಿಸ್ಸಞ್ಹಿ ಜಳೋ ಹಿ ಲೋಕೋ।
೪೭೯.
ದೇಸೇಮಿ ಚೇ ಧಮ್ಮವರಂ ಪಣೀತಂ
ಕಿಲನ್ತಭಾವೋವ ಮಮಸ್ಸ ಅಸ್ಮಾ,
ಕಿಮತ್ತದುಕ್ಖೇ ನಿತಿ ಚಿನ್ತಯನ್ತೋ
ನುಯ್ಯಾಮಮಾಕಾ ಮುನಿ ದೇಸನಮ್ಹಿ।
೪೮೦.
ಸಹಮ್ಪತೀ ನಾಮ ತತೋ ವಿಧಾತಾ
ಸಚೇತಸಾ ತಸ್ಸ ಮನಂ ವಿದಿತ್ವಾ,
ವಿನಸ್ಸತೀದಂ ಖಲು ಸಬ್ಬಲೋಕಂ
ಅದೇಸಿತೇ ತೇನಿ’ತಿ ಕಮ್ಪಮಾನೋ।
೪೮೧.
ಸಕಾಸಮಾಗಮ್ಮ ಜಿನಸ್ಸ ತಸ್ಸ
ಸಗಾರವೋ ಬ್ರಹ್ಮಗಣೇನ ತತ್ಥ,
ನಿಹಚ್ಚ ಜಾನುಂ ಪಥವೀತಲಮ್ಹಿ
ನಮಸ್ಸಮಾನೋ ಇದಮಬ್ರೂವೀ ಸೋ।
೪೮೨.
ತ್ವಂ ದೇವದೇವೋ ಸ ಸುಮೇಧಕಾಲೇ
ಪಲೋಕಿತಂ ಲೋಕಮುದಿಕ್ಖಮಾನೋ,
ವಿಹಾಯ ದೀಪಙ್ಕರಪಾದಮೂಲೇ
ಲದ್ಧಾ’ಮತಂ ತಂ ಕರುಣಾಗುಣೇನ।
೪೮೩.
ಪವಿಸ್ಸ ಸಂಸಾರವನಂ ವಿದುಗ್ಗಂ
ಮಂಸಕ್ಖಿಸೀಸಾದಿಮ’ದಾಸಿ ದಾನಂ,
ವೇದೇಸಿ ದುಕ್ಖಂ ಅಮಿತಂ ಅಸಯ್ಹಂ
ತಂ ತೇ ಪರತ್ಥಂ’ವ ನ ಅತ್ತಹೇತುಂ।
೪೮೪.
ಸನ್ತೀಧ ಸತ್ತಾ ಖಲು ಮನ್ದರಾಗಾ
ಞಾತುಂ ಸಮತ್ಥಾ ಸುಗತಸ್ಸ ಧಮ್ಮಂ,
ಆರಾಧಿತೋ ಮೇ ಕರುಣಾಗುಣಗ್ಗೋ
ದೇಸೇಹಿ ಧಮ್ಮಂ ಅನುಕಮ್ಪಮಾನೋ।
೪೮೫.
ಕಾಲೇ ವಿಕಾಸನ್ತಿ ಖರಂಸು ಮಿಸ್ಸಾ
ಥಲಮ್ಬುಜಾತಾ ಕುಸುಮಾನಿ ನಾನಾ,
ತಥೇ’ವ ತೇ ಧಮ್ಮಕರಾಭಿಫುಟ್ಠಾ
ವಿಕಾಸಮಾಯನ್ತೀ ಜನಾ ಅನೇಕಾ
೪೮೬.
ಸಮ್ಪನ್ನ ವಿಜ್ಜಾಚರಣೋ ಸತೀಮಾ
ಜುತಿನ್ಧರೋ ಅನ್ತಿಮದೇಹಧಾರೀ,
ಪಟಿಗ್ಗಹೇತ್ವಾಸ್ಸ ನಿಮನ್ತಣಂ ಸೋ
ಜನೇಸಿ ಸತ್ತೇ ಕರುಣಾ ಮನಸ್ಮಿಂ।
೪೮೭.
ಅಪಾರುತಾ ತೇಸಂ ಅಮತಸ್ಸ ದ್ವಾರಾ
ಯೇ ಸೋತವನ್ತೋ ಪಮುಞ್ಚನ್ತು ಸದ್ಧಂ,
ವಿಹಿಂಸಸಞ್ಞೀ ಪಗುಣಂ ನ ಭಾಸಿಂ
ಧಮ್ಮಂ ಪಣೀತಂ ಮನುಜೇಸು ಬ್ರಹ್ಮೇ।
೪೮೮.
ಪಟಿಗ್ಗಹೇಸೀತಿ ಉದಗ್ಗಚಿತ್ತೋ
ಅಜ್ಝೇಸನಂ ಮೇ ಚತುರಾಣನೋ ಸೋ,
ನತ್ವಾನ ನಾಥಂ ಸಹಪಾರಿಸಜ್ಜೋ
ಪಕ್ಕಾಮಿ ತಮ್ಹಾ ಭವನಂ ಖಣೇನ।
೪೮೯.
ತತೋ ಜಿನೋ ತೇನ ಗಹಿತನುಞ್ಞೋ
ದೇಸೇಮಿ ಕಸ್ಸೇತಿ ಉದಿಕ್ಖಮಾನೋ,
ಆಳಾರ-ಉದ್ದೇ ಸಮುದಿಕ್ಖ ಧೀರೋ,
ಮನ್ತ್ವಾನ ತೇಸಂ ಅಚಿರಚ್ಚುತಿತ್ತಂ।
೪೯೦.
ಕಹನ್ನುಖೋ’ಹಂ ವರಧಮ್ಮಚಕ್ಕಂ
ಅಞ್ಞೇನ ಕೇನಾಪಿ ಅವತ್ತನೀಯಂ,
ಲೋಕಸ್ಸ ಚಿನ್ತಾಮಣಿಸನ್ತಿಭಗ್ಗಂ
ಪವತ್ತಯಿಸ್ಸನ್ತೀ ವಿಚಿನ್ತಯನ್ತೋ।
೪೯೧.
ದಿಸ್ವಾನ ಭಿಕ್ಖೂ ಮುನಿ ಪಞ್ಚವಗ್ಗೇ
ಆದಾಯ ಪತ್ತಞ್ಚ ತಿಚೀವರಞ್ಚ,
ಬಾರಾಣಸೀಯಂ ಮಿಗದಾಯಮೇನ್ತೋ
ಅದ್ಧಾನಮಗ್ಗಂ ಪಟಿಪಜ್ಜಿ ಸತ್ಥಾ।
೪೯೨.
ತತ್ಥಾಮರಬ್ರಹ್ಮಗಣೇಹಿ ಪೂತ
ಪಥೇ ಫಣೀ ಪಕ್ಖಿ ಚತುಪ್ಪದಾ ಚ,
ಆರಞ್ಞದೇವಾ ತರುಪಬ್ಬತಾ ಚ
ಮಹಿಂಸು ನೇಕೇಹಿ ಸುವಿಮ್ಹಯೇಹಿ।
೪೯೩.
ತತೋಪಗಾ ಸೋ ಮಿಗದಾಯಮಗ್ಗೇ
ದಿಸ್ವಾ ಯತೀಸಂ ಯತಯೋ’ಪಗನ್ತ್ವಾ,
ಅಕಂಸು ವತ್ತಂ ಪಟಿಪತ್ತಿಸಾರಾ
ಪವತ್ತಯೀ ತತ್ಥ ಸ ಧಮ್ಮಚಕ್ಕಂ।
೪೯೪.
ಅಞ್ಞಾದಿಕೋಣ್ಡಞ್ಞವಸಿಪ್ಪಧಾನಾ
ಕೋಟೀನಮಟ್ಠಾರಸ ಕಞ್ಜಯೋನೀ,
ಅಸೀತಿಕೋಟೀ’ಪಿ ಸುಧಾಸಿ ಸಙ್ಘಾ
ಅಞ್ಞಾಸುಮಗ್ಗಂ ಕಮತೋ ತದಾ ತೇ।
೪೯೫.
ಅತಿಚ್ಚಯಾತಮ್ಹಿ ನಿದಾಘಕಾಲೇ
ವಸ್ಸಾನಕಾಲೇ ಸಮುಪಾಗತಸ್ಮಿಂ,
ತತ್ಥೇವ ವಸ್ಸಂ ಉಪಗಮ್ಮ ಧೀರೋ
ತೇಮಾಸಮತ್ತಂ ಅವಸೀ ವಸೀಸೋ।
೪೯೬.
ತತೋ ಯಸಂ ತಸ್ಸ ಸಹಾಯಕೇಪಿ
ಪತಿಟ್ಠಪೇತ್ವಾ ಅರಹತ್ತಮಗ್ಗೇ,
ಭುತಿಂ ಜನಾನಂ ಅನುಬ್ರೂಹಯನ್ತೋ
ವಸ್ಸಸ್ಸ ಅನ್ತಂ ಅಕರೀ ತಹಿಂ ಸೋ।
೪೯೭.
ವಸ್ಸಚ್ಚಯೇ ಲೋಕವಿದೂ ಮುನಿನ್ದೋ
ಆಮನ್ತಯೀ ತೇ ಯತಯೋ ಸಪುತ್ತೇ,
ತೇ’ಥಾಗಮುಂ ನಿಬ್ಬಣಥಾ ಕತಞ್ಜಲೀ
’ದಮಬ್ರುವಿ ತೇಸಮ’ನನ್ತ ಪಞ್ಞೋ।
೪೯೮.
ಉಗ್ಘೋಸಯನ್ತಾ ಮಮ ಧಮ್ಮಘೋಸಂ
ಸಮಾಹನನ್ತಾ ಮಮ ಧಮ್ಮಭೇರಿಂ,
ಸಾಧುಂ ಧಮೇನ್ತಾ ಮಮ ಧಮ್ಮಸಙ್ಖಂ
ಚರಾಥ ತುಮ್ಹೇ ಸನರಾಮರಾನಂ।
೪೯೯.
ಜಯದ್ಧಜಂ ಮೇ ಭುವನುಕ್ಖಿಪನ್ತಾ
ಉಸ್ಸಾಪಯನ್ತಾ ಮಮ ಧಮ್ಮಕೇತುಂ,
ಅಥುಕ್ಖಿಪನ್ತಾ ಮಮ ಧಮ್ಮಕುನ್ತಂ
ಚರಾಥ ಲೋಕೇಸು ಸದೇವಕೇಸು।
೫೦೦.
ಸುಸಜ್ಜಿತತ್ತಂ ಅಮತಸ್ಸ ಮಗ್ಗಂ
ಸಕಣ್ಟಕತ್ತಂ ನರಕಾಯನಸ್ಸ,
ಮಾರಾನನಸ್ಮಿಂ ಮಸಿಮಕ್ಖಿತತ್ತಂ
ಕಥೇಥ ಲೋಕಸ್ಸ ಸದೇವಕಸ್ಸ।
೫೦೧.
ಬುದ್ಧನ್ತರಂ ಸುಪ್ಪಿಹಿತಂ ಅಚಾರಂ
ಪುರಸ್ಸ ಮೋಕ್ಖಸ್ಸ ವಿಸಾಲದ್ವಾರಂ,
ಅವಾಪುರೀ ನೋ ಭಗವಾ’ಧುನಾ ಭೋ
ಯಥಜ್ಜ ಸಬ್ಬೇತೀ ನಿವೇದಯವ್ಹೋ।
೫೦೨.
ಉಪ್ಪನ್ನಭಾವಂ ಭುವನೇ ಮಮಜ್ಜ
ತಥೇವ ಧಮ್ಮಸ್ಸ ಚ ಪಾತುಭಾವಂ,
ಉಪ್ಪನ್ನಭಾವಞ್ಚ ಮಮೋರಸಾನಂ
ಪಕಾಸಯನ್ತಾ ಜಗತಿಂ ಚರಾಥ।
೫೦೩.
ವನಮ್ಹಿ ಪನ್ತೇ ಗಿರಿಗಬ್ಭರಾಯಂ
ರುಕ್ಖಸ್ಸ ಮೂಲೇ’ಪಿ ಚ ಸುಞ್ಞಾ’ಗಾರೇ,
ವಸಂ ಯತತ್ತಾ ಮಮ ಧಮ್ಮಮಗ್ಗಂ
ದೇಸೇಥ ಲೋಕೇ ಸನರಾಮರಾನಂ।
೫೦೪.
ವತ್ವಾನ ಏವಂ ಯತಯೋ ದಿಸಾಸು
ಪೇಸೇತ್ವ ನಾಥೋ ಉರುವೇಲಗಾಮೀ,
ಪಟಿಪಜ್ಜಿ ಮಗ್ಗಂ ಅಥ ಅನ್ತರಾಲೇ
ಕಪ್ಪಾಸಿಕವ್ಹಂ ವಿಪಿನಂ ಪವಿಸ್ಸ।
೫೦೫.
ತಸ್ಮಿಂ ರಮನ್ತೇ ಸಮತಿಂಸಮತ್ತೇ
ರಾಜೋರಸೇ ಸೋ ಪವರೋ ವಿನೇತ್ವಾ,
ದತ್ವಾ’ಮತಂ ಧಮ್ಮಮಥುದ್ದಿಸಿತ್ವಾ
ಅಗೋರುವೇಲಂ ಗಜರಾಜಗಾಮೀ।
೫೦೬.
ತತ್ಥೋರುವೇಲಾಧಿಕಕಸ್ಸಪೋತಿ
ಪಸಿದ್ಧನಾಮಸ್ಸ ಸಸಿಸ್ಸಕಸ್ಸ,
ಅಗ್ಗಂ ಫಲಂ ಸೋ ಪರಿಪಾವಯನ್ತೋ
ವಸೀ ವಸನ್ತೇ ವಸೀನಂ ವರಿಟ್ಠೋ।
೫೦೭.
ತದಾಹರುಂ ನೇಗಮ ನಾಗರಾ ಚ
ಯಞ್ಞಂ ಮಹಾಕಸ್ಸಪ ತಾಪಸಸ್ಸ,
ಜಿನೋ ವಿದಿತ್ವಾಸ್ಸ ಮನಂ ಮನೇನ
ವಸೀ ವಿಸುಂ ತಸ್ಸ ಪಸಾದ ಹೇತು।
ಕಥಂ?
೫೦೮.
ಗನ್ತ್ವಾನ ಉತ್ತರಕುರುಂ ಭಗವಾ ತದಾನಿ
ಪಿಣ್ಡಞ್ಚರಿತ್ವ ರಮಣೀಯ ಹಿಮಾಲಯದ್ದಿಂ,
ಆಗಮ್ಮ ಸಾದುರಸ ನೀರ ಭರಾಭಿರಾಮೇ
’ನೋತತ್ತಕೇ ಮುನಿವರೋ ಪರಿಭುಞ್ಜಿಯಾನ।
೫೦೯.
ಚಿನ್ತೇಸಿ ಏವಮಹಮಪ್ಪತರಂವ ಕಾಲಂ
ಠಸ್ಸಾಮಿ ಸಾಸನ ಮಮಞ್ಹಿ ಅನಾಗತೇಸು,
ಲಙ್ಕಾತಲೇ ಭವತಿ ತತ್ಥ ಇದಾನಿ ಯಕ್ಖ
ಸಮ್ಬಾಧಮತ್ಥಿ ಮಮ ತತ್ಥ ಗತೇಸು’ದಾನಿ।
೫೧೦.
ಸಬ್ಬಾ’ಮನುಸ್ಸಜ ಭಯಂ ಪವಿನಸ್ಸತೀ’ತಿ
ಮನ್ತ್ವಾ ತತೋ ಯತಿವರೋ ಕರುಣಾಯ ಸತ್ತೇ,
ಸಞ್ಝಾಘನೇಹಿ ಪರಿನದ್ಧ ರವೀವ ರತ್ತ
ನಿಗ್ರೋಧಪಕ್ಕ ಸದಿಸಂ ಚರಪಂಸುಕೂಲಂ।
೫೧೧.
ಧಾರೇತ್ವ ಸೇಲಮಯ ಸುನ್ದರ ಪತ್ತಹತ್ಥೋ
ಛಬ್ಬಣ್ಣರಂಸಿ ನಿವಹಂ ದಿಸಿ ಪೂರಯನ್ತೋ,
ಸಮ್ಬೋಧಿತೋ ನವಮ ಫುಸ್ಸಜ ಪುಣ್ಣಮಾಯಂ
ಲಙ್ಕಾತಲಂ ವಿಜಯಿತುಂ ನಭಸಾ’ಗಮಾಸಿ।
೫೧೨.
ಬ್ರಹ್ಮಾಸುರಾಮರ ಫಣಿ ಗರುಳಾ ಚ ಸಿದ್ಧ
ವಿಜ್ಜಾಧರಾದಿ ಜನತಾ ಸಹಪಾರಿಸಜ್ಜಾ,
ಕೇತಾ’ತಪತ್ತ ಘಟ ದೀಪುರು ತೋರಣೇಹಿ
ಪೂಜಂ ಅಕಂಸು ಮಹತಿಂ ಗಗನಾಯನಮ್ಹಿ।
೫೧೩.
ಲಙ್ಕಙ್ಗನಾ ಉರಸಿ ಭಾಸುರ ತಾರ ಹಾರ
ಸಙ್ಕಾಸ ಸೀತಲ ಮನೋಹರ ನೀರ ಪೂರಾ,
ತಸ್ಮಿಂ ಮಹಾದಿಪದ ವಾಲುಕ ನಾಮ ಗಙ್ಗಾ
ಭುಮಜ್ಝಗಾಸಿ ಜನ ನೇತ್ತ ಹರಾಭಿರಾಮಾ।
೫೧೪.
ತಸ್ಸಾವಿದೂರ ಸುಚಿ ರಮ್ಮತರೇ ಪದೇಸೇ
ಆಯಾಮತೋ ಮಿತತಿಯೋಜನ ವಿತ್ಥತೇನ,
ಚತ್ತಾರಿ ಗಾವುತಮಿತಂ ನಯನಾಭಿರಾಮಂ
ಆಸಾರ ಸೀತಜಲ ನಿಜ್ಝರ ಭುರಿಘೋಸಂ।
೫೧೫.
ಮತ್ತಾಲಿಪಾಲಿ ಖಗ ಗೀತಿಜ ಮಿಸ್ಸರಾಗಂ
ಸಮ್ಮತ್ತ ಚಿತ್ತ ಮಿಗಸಙ್ಘ ನಿಸೇವಿತಂ ತಂ,
ನಚ್ಚನ್ತ ನೇಕಸಿಖಿ ಸಙ್ಗತ ಪಾದಪಿಣ್ಡಂ
ಉಯ್ಯಾನಮಾಸಿ ಉರುನಾಗವನಾಭಿಧಾನಂ।
೫೧೬.
ರಮ್ಮೇ ತದಾ ರತನದೀಪವರಮ್ಹಿ ಲಙ್ಕಾ
ಲೋಕಾಭಿಧಾನ ಹರಿಕಣ್ಡಕ ಯಕ್ಖದಾಸೇ,
ಓದುಮ್ಬರೇ ಸುಮನಕೂಟಕ ತಣ್ಡುಲೇಯ್ಯೇ
ಸೇಲೇಸು ಮಾರಗಿರಿ ಮಿಸ್ಸಕರಿಟ್ಠನಾಮೇ।
೫೧೭.
ಯೇ’ಞ್ಞೇಪಿ ಸನ್ತಿ ಗಿರಯೋ ವನರಾಮಣೇಯ್ಯಾ
ಗಙ್ಗಾ ನದೀ ಗಿರಿಗುಹಾ ಸಿಕತಾತಲಾ ಚ,
ತತ್ಥಾವಸನ್ತಿ ರಹಸಾ ಫರುಸಾನಿರುದ್ದಾ
ಪಾಣಾತಿಪಾತ ನಿರತಾ ಸಠಕೂಟ ಯಕ್ಖಾ।
೫೧೮.
ಸಙ್ಗಮ್ಮ ತೇ ಮಹತಿ ನಾಗವನಮ್ಹಿ ತಮ್ಹಿ
ಸಮ್ಮನ್ತಯಿಂಸು ಸಭಟಾ ಸಹ ಪಾರಿಸಜ್ಜಾ,
ತ್ವಂ ಕೋ’ಸಿ ರೇ! ಇತಿ ಪರೋ ಅಪರಂ ಖರೇನ
ತಿಕ್ಖೇನ ವಾದಕಣಯೇನ ಅರುನ್ತುದನ್ತಾ।
೫೧೯.
ಕುಜ್ಝಿಂಸು ತೇ ಅಥಿತರೀತರ ಕಾರಣೇನ
ವಾಕ್ಯೇನ ಯುದ್ಧ ಪರಿರದ್ಧ ಪಗಬ್ಭಿತತ್ತಾ,
ಸಙ್ಖಾಭಿತಾಪಗ ಪತೀವ’ನವಟ್ಠಚಿತ್ತಾ
ಸಾರಮ್ಭಗಬ್ಬಿತಮನಾ ಪರಿರಾವಯನ್ತಿ।
೫೨೦.
ತಸ್ಮಿಂ ಖಣೇ’ಭಿಮತದೋ ಸುಗತೋ ನಭಮ್ಹಿ
ಆಗಮ್ಮ ತೇಸ’ಮನುಕಮ್ಪಿತ ಮಾನಸೇನ,
ಗೋಪಾನಸೀ ಸಮ ಮನೋಹರ ರಂಸಿಮಾಲಿ
ತತ್ಥಚ್ಛಿ ಖೇ ಗುಣಮಣೀ ಮಣಿಕಣ್ಣಿಕಾವ।
೫೨೧.
ತೇಸಂ ಜಿನೋ ಕಲಹವೂಪಸಮಾಯ ಹೇತು
ಮಾಪೇಸಿ ವುಟ್ಠಿ ತಿಮಿರಾ’ನಿಲಸೀತಭೀತಿಂ,
ತತ್ಥಾಸಿ ಗಜ್ಜಿತಘನೋ ಸುರಚಾಪಖಿತ್ತ
ಧಾರಾಸರೇಹಿ ವಿತುದಂ ನಿಸಿವಾರ ಸಙ್ಘಂ।
೫೨೨.
ಅನ್ಧಾವ ತೇ ಘನತರೇ ತಿಮಿರೇ ನಿಮುಗ್ಗಾ
ಮುಳ್ಹಾ ದಿಸಞ್ಚ ವಿದಿಸಂ ನ ವಿದಿಂಸು ಭೀತಾ,
ಚಣ್ಡಾನಿಲುದ್ಧಟ ಮಹಾ ಗಿರಿಕೂಟರುಕ್ಖ
ಸಮ್ಪಾತ ಭೀತ ರುದಿತಾ ಗತಿಮೇಸಯನ್ತಿ।
೫೨೩.
ಸೀತೇನ ತೇ ಅಥ ದಿಜೇ ಪರಿಕೋಟಯನ್ತಾ
ಅಞ್ಞೋಞ್ಞಗತ್ತಮವಲಮ್ಬ ಪರೋದಯಿಂಸು,
ರೂಪಾನಿ ನೇಕಭಯದಾನಿ ಚ ಘೋಸಣಾನಿ
ವತ್ತಿಂಸು ತೇನ ವಿವಿಧಂ ಭಯಮಾಸಿ ತೇಸಂ।
೫೨೪.
ಬುದ್ಧಾಪಿ ದುಕ್ಖಿತಮನಾ ಪರದುಕ್ಖಕೇನ
ಕಸ್ಮಾ ಕರೋನ್ತಿ ಅನಯಂ’ತಿ ನ ಚಿನ್ತನೀಯಂ,
ಲೋಕೋ ಹನಾತಿ ವಿಟಪಿ ಫಲದಾನ ಹೇತು
ಸತ್ಥೇನ ಸೋಮ ರಿಪುಗಾಹಕ ವಾಸರಮ್ಹಿ।
೫೨೫.
ಸತ್ಥಾ ತತೋ ತಮನುದೋ ಸಭಯೇ ಸಸೋಕೇ
ದಿಸ್ವಾನ ಗುಯ್ಹಕ ಜನೇ ಕರುಣಾಯಿತತ್ತೋ,
ವುಟ್ಠಿಂ ತಮಞ್ಚ ಪವನಂ ಪಣುದಿತ್ವ ಸಬ್ಬಂ
ದಸ್ಸೇಸಿ ಅತ್ತಮಖಿಲಂ ದುಮಣೀವ ಖಮ್ಹಿ।
೫೨೬.
ದಿಸ್ವಾನ ತೇ ಮುನಿವರ’ಞ್ಜಲಿ ಪಙ್ಕಜೇಹಿ
ಸಜ್ಜೇತ್ವ ಸೀಸ ಸರಸೀ ಇದಮ’ಬ್ರುವಿಂಸು,
ಯಾಚಾಮ ನೋ’ಭಯಪದಂ ಭವತೋ ಸಕಾಸಾ
ದಾಸೇಸು ಧೀರ ಕರುಣಂ ಕರಣೀಯಮೇವ।
೫೨೭.
ಏವಂ ತದಾ’ವಚ ಜಿನೋ ಮಧುರಸ್ಸರೇನ
ಆಮನ್ತ ತೇ ನಿಸಿಚರೇ’ವನತೇ ಸಮೇಕ್ಖ,
ತುಮ್ಹೇ ದದಾಥ ಯದಿ ಠಾನಮಮೇಕದೇಸಂ
ಸಬ್ಬೇ ಅಪೇನ್ತೀ ಘನವಾತಜ ಸೀತದುಕ್ಖಾ।
೫೨೮.
ಯಜ್ಜೇವಮೀತಿಮ’ಪಯಾತಿ ಕರೋಮ ಭೋ ತಂ
ಗಣ್ಹಾಹಿ ಧೀರ ಯದಿ ಇಚ್ಛಸಿ ಸಬ್ಬದೀಪಂ,
ವತ್ವಾನ ತೇಹಿ ಪರಿದಿನ್ನ ಛಮಾಯ ಮಗ್ಗೋ
ಓಗಮ್ಮ ತತ್ಥ ಪುಥು ಪತ್ಥರಿ ಚಮ್ಮ ಕಣ್ಡಂ।
೫೨೯.
ತಸ್ಮಿಂ ನಿಸಜ್ಜ ಕಸಿಣಂ ಸಮಾಪಜ್ಜ ತೇಜೋ
ಜಾಲಾಕುಲಂ ಜಲಿತ ಮಗ್ಗೀಮಮಾಪಯೀ ಸೋ,
ಸೋ ಧೂಮಕೇತು ಗಗನುಗ್ಗತ ತುಙ್ಗಸಿಙ್ಗೋ
ಸನ್ದಡ್ಢಯಂ ಗಿರಿವನಾನು’ರುಘೋಸಯನ್ತೋ।
೫೩೦.
ರುಕ್ಖೇಹಿ ರುಕ್ಖವನ ಪಬ್ಬತ ಲಙ್ಘನೇನ
ಸಾಖಾಮಿಗೇ ಚ ವಿಹಗೇ ಅನುಬನ್ಧಯಂ’ವ,
ವೇಸ್ಸಾನರೋ ವನಮರೂ ಮಿಗಸೂಕರೇ’ಪಿ
ಸನ್ಧಾವಿ ಗುಯ್ಹಕ ಜನೇ ಇತಿ ಚಿನ್ತಯನ್ತೋ।
೫೩೧.
ದಿಸ್ವಾನ ತತ್ಥ ಪಚುರಾತನ ವಿಪ್ಫುಲಿಙ್ಗ
ಸಮ್ಮಿಸ್ಸ ಜಾಲ ದಹನಂ ಗುಹಕಾ ಸಮೇಚ್ಚ,
ಧಾವುಂ ವಿಕಿಣ್ಣಕಚ ಬಪ್ಪಜಲ’ದ್ದನೇತ್ತಾ
ದಾರತ್ತಜೇಹಿ ಸಹಿತಾ ಗತಿಮೇಸಮಾನಾ।
೫೩೨.
ಸಮ್ಬುದ್ಧತೇಜ ಪರಿದಡ್ಢ ಸರೀರಚಿತ್ತಾ
ಆಹಚ್ಚ ಸಾಗರತಟಂ ಪರಿಧಾವಮಾನಾ,
ತಸ್ಮಿಮ್ಪಿ ತೇ ಪವಿಸಿತುಂ ಸರಣಂ ನ ಲದ್ಧಾ
ಛಮ್ಹಿ ತತೋ ಸಪದಿ ಸನ್ನಿಪತಿಂಸು ಸಬ್ಬೇ।
೫೩೩.
ದಿಸ್ವಾನ ತೇ ಮುನಿವರೋ ಸಹಯೇ ಸಸೋಕೇ
ರಮ್ಮಂ ತದಾ ಜಲಧಿಮಜ್ಝಗತಂ ಮಹನ್ತಂ,
ಇದ್ಧೀಹಿ ಸೇಹಿ ಗಿರಿದೀಪಮಿ’ಧಾನಯಿತ್ವಾ
ಆರೋಪಯಿತ್ವ ನಿಖಿಲೇ ಪುನ ತತ್ಥ’ಕಾಸಿ।
೫೩೪.
ಕತ್ವೇವಮೇ’ಸಮಸಮೋ’ಪಸಮನ್ತ’ಮೀತಿಂ
ತತ್ಥೇವ ಭಾಸುರತರೋ ಭಗವಾ ನಿಸೀದಿ,
ಬ್ರಹ್ಮಾಮರಾ’ಸುರಫಣೀ ಗರುಳಾದಿ ಸಿದ್ಧಾ
ಸಙ್ಗಮ್ಮ’ಕಂಸು ಮಹತಿಂ ಮಹಮ’ಗ್ಗರೂಪಂ।
೫೩೫.
ದೇಸೇಸಿ ಸಂಸದಿ ಜಿನೋ ಸುತಿಸಾಧು ಧಮ್ಮಂ
ತಸ್ಮಿಂ ಸದಾಸವನುದಂ ಸಿವದಂ ಜನಾನಂ,
ಸುತ್ವಾನ ನೇಕಸತಕೋಟಿ ಪಮಾಣ ಪಾಣಾ
ಲದ್ಧಾ ತದಾ ಸಮಭವುಂ ಚರಧಮ್ಮಚಕ್ಖುಂ।
೫೩೬.
ತಸ್ಮಿಂ ದಿನೇ ಸುಮನಕೂಟ ವರಾಧಿವಾಸೋ
ತೇಜಿದ್ಧಿಬುದ್ಧಿವಿಭವೋ ಸುಮನಾಭಿಧಾನೋ,
ದೇವೋ ಪಸನ್ನಹದಯೋ ರತನತ್ತಯಮ್ಹಿ
ಸಮ್ಪಾಪುಣಿತ್ಥ ಪಠಮಂ ಫಲಮುತ್ತಮಂ ಸೋ।
೫೩೭.
ಉಟ್ಠಾಯ ತುಟ್ಠವದನೋ ಕತಪಞ್ಜಲೀಕೋ
ಮುಗ್ಗೋ ಜಿನಗ್ಗ ನಖರಂಸಿ ಪಯೋದಧಿಮ್ಹಿ
ವನ್ದಿತ್ವ ಏವಮವಚಾ’ತುಲ ವೀರ ಧೀರ
ಲೋಕಗ್ಗ ಪುಗ್ಗಲ ವರಂ ದದ ಸಾಮಿ ಧೀಸ।
೫೩೮.
ದಾಸೋಸ್ಮಿ ತೇ ಚರಣ ಪಙ್ಕಜ ಪೂಜಕೋಹಂ
ಸದ್ಧಾದಯಾದಿ ವಿಭವೋ ತನಯೋ’ಹಮಸ್ಮಿ,
ತುಮ್ಹೇ ವಿನಾ ಖಣಲವಂ ವಸಿತುಂ ನ ಇಚ್ಛೇ
ತಸ್ಮಾ ದದಾತು ಭಗವಾ ಮಮ ಪೂಜನೀಯಂ।
೫೩೯.
ಸುತ್ವಾನ ತಂ ಧಿತಿಮತೀ ಪರಿಮಜ್ಜ ಸೀಸಂ
ಸಂಸತ್ತ ಛಪ್ಪದ ಸರೋರುಹ ಸನ್ನಿಭೇನ,
ಹತ್ಥೇನ ನೀಲ ಸಕ ಕುನ್ತಲ ಧಾತುಮುಟ್ಠಿಂ
ದಜ್ಜಾಥ ಸೋ ಮಣಿಮಯೇನ ಕರಣ್ಡಕೇನ।
೫೪೦.
ಪಗ್ಗಯ್ಹ ಬಾಹುಯುಗಲೇನ ಠೀತೋ ನಮಿತ್ವಾ
ಮುದ್ಧಾ ದಧಾಸಿ ಮಕುಟಂ ವಿಯ ಪೀಣಿತತ್ತೋ,
ಕತ್ವಾ’ಥ ಸೋ ವರ ಮಹಂ ತಿದಿವೇಹಿ ಸದ್ಧಿ
’ಮಪ್ಪೇತ್ವ ಧೀರ ಫರಿಭುತ್ತ ವಸುನ್ಧರಾಯಂ।
೫೪೧.
ಸೋ’ಕಾಸಿ ನೀಲರತನೇಹಿ ಮಹಾರಹೇಹಿ
ಉಬ್ಬೇಧತೋ ರತನ ಸತ್ತ ಪಮಾಣ ಥೂಪಂ,
ನಾಥೇ ಧರನ್ತಸಮಯೇವ ಪತಿಟ್ಠಹೀ ಸೋ
ಥೂಪೋ ತಿಲೋಕಸುಖದೋ ಮಣಿ ಕಾಮದೋ’ವ।
೫೪೨.
ಪಚ್ಛಾ ತಿಲೋಕಸರಣೇ ಪರಿನಿಬ್ಬುತಮ್ಹಿ
ಖೀಣಾ ಸವೋ ಸಮಹಿಮೋ ಸರಭು ಯತಿನ್ದೋ,
ಆದಾಯ ತಂ ಚಿತಕತೋ ಜಿನಗೀವಧಾತುಂ
ತಸ್ಮಿಂ ನಿಧಾಯ’ಕರಿ ಬಾರಸ ಹತ್ಥಥೂಪಂ।
೫೪೩.
ಚೂಳಾಭಯಹ್ವವನಿಪೋ ಸಮಯೇ’ಪರಸ್ಮಿಂ
ಬತ್ತಿಂಸ ಹತ್ಥಮ’ಕರಿಯತ್ಥ ವರೋರುಥೂಪಂ,
ದುಟ್ಠಾದಿಗಾಮಣಿ ನುಪೋ ದಮಿಳೇ ಹನನ್ತೋ
ಕಾರೇಸಿ ಕಞ್ಚುಕಮಥೋ ಚತುಸಟ್ಠಿಹತ್ಥಂ।
೫೪೪.
ಏವಂ ಸ ಸೀಹಲಮಹಾಸರಮಜಝರೂಳ್ಹಂ
ಸೇತಮ್ಬುಜಂ’ವ ಮಧುಪಾವಲಿ ಸೇವನೀಯಂ,
ಭುಮಙ್ಗನಾ ಕರತಲೇ ಸಿತವಿತ್ಥಲೀಲೋ
ಥೂಪೋ ದದಾತು ಮಸಮೋಪಸಮಂ ಜನಾನಂ।
೫೪೫.
ಲಙ್ಕೋಪಸಗ್ಗಮ’ವಧೂಯ ವಿಧಾಯ ಖೇಮಂ
ಲಙ್ಕಂ ನಿಜಾಯ ವರಕುನ್ತಲ ಧಾತುಯಾ ತಂ,
ಕತ್ವಾನ ಭಾಸುರತರಂ ಮುನಿ ಮಙ್ಗಲಾಯ
ಪಾಯಾಸಿ ತಾರಕ ಪಥೇ’ನುರುವೇಲಮೇವ।
೫೪೬.
ತಸ್ಮಿಂ ವಿಧಾಯ ಬಹುವಿಮ್ಹಿತ ಪಾಟಿಹೇರಂ
ಭೇತ್ವಾ ಸಸಿಸ್ಸಕಿ’ಸಿನೋ ಪುನ ದಿಟ್ಠಿಜಾಲಂ,
ದತ್ವಾನ ನಿಬ್ಬುತಿಪದಂ ಸಹಸಿಸ್ಸಕಸ್ಸ
ನಿಬ್ಬಾಣ ಸುನ್ದರ ಪುರಂ ಪರಿಪೂರಯಿತ್ಥ।
೫೪೭.
ತಮ್ಹಾ ವಿಕಾಸಿತ ಕುಸೇಸಯ ಕಾನನಾಭ
ವೀತಾಸವೇಹಿ ನಿವುತೋ ಸುಗತೇಭಗಾಮೀ,
ಪಾಯಾಸಿ ರಾಜಗಹ ಗಾಮೀ’ಮುದಾರಮಗ್ಗಂ
ವೇನೇಯ್ಯ ಜನ್ತು ಕಮಲಾಕರ ಭಾನುರೂಪೋ।
೫೪೮.
ತಸ್ಮಿಂ ಗತೇ ಜಿನವರೇ ವರ ಬಿಮ್ಬಿಸಾರೋ
ಪೂಜಂ ಅಕಾಸಿ ಮಹತಿಂ ಸಹ ದೇವತಾಹಿ,
ತಸ್ಮಿಞ್ಹಿ ಸಂಸದಿ ಲಭಿಂಸು ಅನಪ್ಪಪಾಣಾ
ಮಗ್ಗೇ ಫಲೇ ಚ ಸರಣೇ ಚ ಪತಿಟ್ಠಹಿಂಸು
೫೪೯.
ರಾಜಾ ತತೋ ವಿಪುಲ ವೇಲುವನಾಭಿರಾಮಂ
ಸಾಲಙ್ಕತಂ ವಿವಿಧ ಪಾದಪ ಮಣ್ಡಪೇಹಿ,
ಪಾದಾಸಿ ದಕ್ಖಿಣಕರೇ ಜಲಪಾತನೇನ
ಕತ್ವಾ ಧರಾಧರಧರಂ ಹಿಮವಞ್ಚ ಕಮ್ಪಂ।
೫೫೦.
ತಸ್ಮಿಂ ಸಮನ್ತನಯನೋ ನಯನಾಭಿರಾಮೋ
ಭುತಿಂ ಜನಸ್ಸ ಸತತಂ ಅಭಿವಡ್ಢಯನ್ತೋ,
ಧಮ್ಮಮ್ಬು ವುಟ್ಠಿ ನಿಕರಂ ಪರಿವಸ್ಸಯನ್ತೋ
ವಸ್ಸಂ ವಸೀ ಅದುತಿಯೋ ದುತಿಯಮ್ಹಿ ವಸ್ಸೇ।
೫೫೧.
ದೇವಿನ್ದ ಮೋಲಿ ಸಮಲಙ್ಕತ ಪಾದಪಿಟ್ಠೋ
ಲೋಕಸ್ಸ ಅತ್ಥಚರಣೇ ಸತತಾಭಿಯುತ್ತೋ,
ತತ್ಥೇವ ಸೋ ಹಿ ತತಿಯೇ’ಪಿ ಚತುತ್ಥವಸ್ಸೇ
ವಾಸಂ ಅಕಾಸಿ ಸುಗತೋ ಸಿರಿಸನ್ತಿವಾಸೋ।
೫೫೨.
ಲೋಕಸ್ಸ ಧಮ್ಮ ಮ’ಮಲಂ ಸತತಂ ವಹನ್ತೋ
ಸಾವತ್ಥಿಯಂ ರುಚಿರ ಜೇತವನೇ’ಭಿರಾಮೇ,
ವಾಸಂ ಅಕಾಸಿ ಸುಖದೋ ಮುನಿಪಞ್ಚಮಸ್ಮಿಂ
ವೇನೇಯ್ಯ ಸತ್ತಸಮಯಂ ಸಮುದಿಕ್ಖಮಾನೋ।
ಇತಿ ಲಙ್ಕಾಯ ಪಠಮಾ’ಗಮನಂ।
೫೫೩.
ಅಥ ಭಗವತಿ ತಸ್ಮಿಂ ಜೇತನಾಮೇ ವನಸ್ಮಿಂ
ನಿವಸತಿ ಸತಿಲಙ್ಕಾ ಮಙ್ಗಲಾ’ವಾಸರೂಪಾ,
ಉಪವನಮಿವ ನಾಕೇ ನನ್ದನಂ ದೇವತಾನಂ
ಅಮರ ಉರಗವಾಸಾ ರಮ್ಮರೂಪಾ ಬಭೂವ।
೫೫೪.
ತಹಿಮತಿ ರುಚಿರಸ್ಮಿಂ ವಡ್ಢಮಾನಾದಿ ಸೇಲೇ
ಮಧುರ ಸಲಿಲವಾಹೇ ರಮ್ಮಕಲ್ಯಾಣಿಕಾದೋ,
ಉದಧಿ ಭುಜಗವಾಸೇ ನಾಗದೀಪನ್ತಿಕೇ ಚ
ಮಹತಿ ಮಹಿಮ ಯುತ್ತಾ ನಾಗಸಙ್ಘಾ ವಸನ್ತಿ।
೫೫೫.
ಪಚುರ ಮಹಿಮ ಯುತ್ತೋ ವಡ್ಢಮಾನಾಚಲಸ್ಮಿಂ
ಅಧಿಪತಿ ಭುಜಗಾನಂ ಆಸಿ ಚೂಲೋದರವ್ಹೋ,
ಮಹುದರ ಇತಿ ನಾಮೋ ನಾಗದೀಪೋದಧಿಮ್ಹಿ
ನಿವಸತಿ ಅಥ ತೇಸಂ ಪಬ್ಬತೇಯ್ಯೋ’ರಗಿನ್ದೋ।
೫೫೬.
ಇತರ ಭುಜಗ ರಞ್ಞೋ ಧೀತರಂ ನಾಗಕಞ್ಞಂ
ಪಿಯತರಮ’ಭಿರೂಪಂ’ಕಾಸಿ ದಾರಂ ತದಾ ಹಿ,
ಅಥ ಚ ದುಹಿತುಯಾ ಸೋ ದೀಯಮಾನಂ ದದನ್ತೋ
ರುಚಿರ ಮಣೀಮಯಗ್ಘಂ ಆಸನಞ್ಚಾಪದಾಸಿ।
೫೫೭.
ದುಹಿತರಿ ಮತಕಾಲೇ ತೇ’ಥ ಪಲ್ಲಙ್ಕಹೇತು
ಜಲಜ ಥಲಜ ನಾಗಾ ಯುದ್ಧಸಜ್ಜಾ ಅಹೇಸುಂ,
ಅಥ ಥಲಜ ಭುಜಙ್ಗಾ ಭಙ್ಗಕಲ್ಲೋಲಮಾಲಾ
ಸದಿಸ ಲೂಲಿತ ಚಿತ್ತಾ ಗಬ್ಬಿತೇವಂ ರವನ್ತಿ।
೫೫೮.
ಕಿಮು’ದಧಿಜ ಫಣೀನಂ ಕಿತ್ತಿ ಸಮ್ಪತ್ತಿಯಾ ನೋ
ಅಪಿ ಯಸಪರಿವಾರಾ ಕಿಂ ಬಲೇನಿದ್ಧಿಯಾ ಕಿಂ,
ಅಹಮಹಮೀತಿ ಗಬ್ಬಾ ಕಿಂ ಕಿಮಿಸ್ಸಾಯ ತೇಸಂ
ಭವತಿ ತಿಮಿರ’ರೀನಂ ಭಾನುಮಗ್ಗುನ್ನತೀ ಕಾ।
೫೫೯.
ಅಥ ಜಲಜ’ಲಗದ್ದಾ ಗಜ್ಜನಂ ಗಜ್ಜಯನ್ತಾ
ಭಯಜನಕ ಪಗಬ್ಭಾ ಫೋಟಯನ್ತಾ ಭೂಜಾನಂ,
ಅಹಮಹ ಪಭೂ ರೇ!ರೇ! ಪಬ್ಬತೇಯ್ಯಾನ’ಮೇತಂ
ಪಟುತರಡಸಿತೋಟ್ಠಾ ಕಕ್ಖ’ಳೇವಂ ರವನ್ತಿ।
೫೬೦.
ಪಟುತರ ಗರುನಾದಾ ತಾವ ಗಜ್ಜನ್ತಿ ದನ್ತೀ
ನಯನ ಪಥಮು’ಪೇನ್ತೇ ಯಾವ ಕಣ್ಠಿರವಾನಂ,
ತಥರಿವ ಥಲಜಾತಾ ಜುಮ್ಹಯನ್ತಾ ಸಮಗ್ಗಾ
ನಯನ ಪಥಗತಾ ನೋ ಸುಞ್ಞದಪ್ಪಾ ಭವನ್ತಿ।
೫೬೧.
ಇತಿ ತದುಭಯಸೇನಾ ಘಟ್ಟಯನ್ತಾ’ಞ್ಞಮಞ್ಞಂ
ವಿವಿಧ ಪಹರಣ್ಹೋ ಉಗ್ಗಿರನ್ತೀ ಗಿರನ್ತಿ,
ಸತತ ಖುಭಿತ ವೇಲಾ ಸಾಗರೂಮೀವ ಭನ್ತಾ
ಲುಲಿತ ಲುಲಿತ ಚಿತ್ತಾ ಯುದ್ಧನಿನ್ನಾ ಠಿತಾಸುಂ।
೫೬೨.
ಅಥ ತದಹು ಮುನಿನ್ದೋ ಯಾಮಿನೀಯಾಮ’ಮನ್ತೇ
ಪತಿನಿಯ ಮತಿಜಾಲಂ ಲೋಕಮೋಲೋಕಯನ್ತೋ,
ಸಮರ ವಸಗತಾನಂ ಭೋಗೀನಂ ಭಾವಿಭುತಿಂ
ತದುಪರಿ ಚ’ಭಿವುದ್ಧಿಂ ಪಸ್ಸಿ ಲಙ್ಕಾತಲಸ್ಸ।
೫೬೩.
ಅಥ ಮುನಿ ಮಧುಮಾಸೇ’ಪೋಸಥೇ ಕಾಲಪಕ್ಖೇ
ಕತ ನಿಖಿಲ ವಿಧಾನೋ ಗಯ್ಹ ಸಙ್ಘಾಟಿಕಾದಿಂ,
ಅನುಗತಿಕಮುದಿಕ್ಖಂ ಪಞ್ಚನೇತ್ತೋ ಸಮನ್ತಾ
ಸುಮನ ಸುಮನ ನಾಮಂ ಪಸ್ಸಿ ದೇವಂ ಸಮಿದ್ಧಿಂ।
೫೬೪.
ತದಹು ಸುಮನದೇವೋ ಜೇತನಾಮೇ ಸುರಮ್ಮೇ
ಅಧಿವಸತಿ ವಿಹಾರೇ ದ್ವಾರಕೋಟ್ಠೋಪಕಟ್ಠೇ,
ಠಿತ ವಿಟಪ ಸಮಿದ್ಧೇ ಖೀರಿಕಾಪಾದಪಸ್ಮಿಂ
ಸುಗತ ಮಭಿನಮನ್ತೋ ಅನ್ವಹಂ ಪೂಜಯನ್ತೋ।
೫೬೫.
ತಮಸಮ್ಮುನಿ ದಿಸ್ವಾ’ಮನ್ತಯಿತ್ವಾ’ಗತೇ ತಂ
ಇದಮವಚ ಮಯಾ ಭೋ ಸದ್ಧಿಮಾಗಚ್ಛ ಲಙ್ಕಂ,
ಸಹ ತವ ಭವನಮ್ಹಾ ಪುಬ್ಬವುತ್ಥಪ್ಪದೇಸೇ
ತವ ಭವತಿ ಪತಿಟ್ಠಾ ಭೋಗಿನಞ್ಜಾ’ಭಿವುದ್ಧಿ।
೫೬೬.
ಅಥ ಮುನಿವಚನಂ ಸೋ ಮುದ್ಧನಾಮ’ಗ್ಗಹೇತ್ವಾ
ಸಮುದಿತಹದಯೋ ತಂ ರುಕ್ಖಮುದ್ಧಚ್ಚ ಮೂಲಾ,
ಸುಗತಮುಪರಿ ಕತ್ವಾ ಧಾರಯನ್ತೋ ಸುಫುಲ್ಲಂ
ಬರಿಹಿ ಬರಿಹಿ ಛತ್ತಾಕಾರಮಾಗಾ ನಭಮ್ಹೀ।
೫೬೭.
ದಸಬಲ ತನುಭಾ’ಭಿಸ್ಸಙ್ಗಮಾ ಸೋ ದುಮನ್ದೋ
ತರಲ ಮಣೀವ ನಾನಾ’ಭಾಹಿ ಸಮ್ಭಾವನೀಯೋ,
ವಿಲಸಿತ ಇವ ಸಬ್ಬೇ ರುಕ್ಖಸೇಲಾದಯೋ’ಪಿ
ಅಪಗತ ಸಕವಣ್ಣಾವಣ್ಣವನ್ತಾ ವಿರೇಜುಂ।
೫೬೮.
ಖಗ ಭುಜಗ ಸುರಾದಿ ಮಸ್ಸಿತಾ ಛಪ್ಪಭಾಹಿ
ನಿಜಪತಿ ನಿಜಜಾಯಾ ಸ್ವಞ್ಞಮಞ್ಞಾಸು ಮುಯ್ಹುಂ,
ಅಸಿತ ಗಗನ ಮಜ್ಝೇ ಸೋಭಮಾನೋ ಮುನಿನ್ದೋ
ವಿತತ ವಿವಿಧ ರಂಸೀ ರಂಸಿಮಾಲೀವ ಗಞ್ಛಿ।
೫೬೯.
ಜಲದ ಪಟಲ ಸಣ್ಡೇ ವಜ್ಝಮುದ್ದಾಳಯಿತ್ವಾ
ಬಹಿ ವಿಲಸಿತಕಾಯೋ ಸೋಮ್ಮದೋಸಾಕರೋ,ವ
ಕತುಪರಿ ತರುಛಾಯೋ ಜೋತಮಾನೋ ಸಮಾನೋ
ಉರಗ ಸಮರಠಾನಂ ಗನ್ಥ್ವಾ’ಕಾಸೇ ನಿಸಜ್ಜ।
೫೭೦.
ಘನತರ ತಿಮಿರಂ ಸೋ ಇದ್ಧಿಯಾ ಸಙ್ಘರಿತ್ವಾ
ತಹಿಮತಿರವ ಭೀಮಂ ಘೋರಸಂರಮ್ಭವನ್ತಂ,
ಅಸನಿ ಸತ ನಿಪಾತಂ ವಸ್ಸಧಾರಾ ಕರಾಲಂ
ಉರುತರ ತತ ಮೇಘಂ ಮಾಪಯೀ ಸೀತವಾತಂ।
೫೭೧.
ಇತಿ ತಿಭುವನನಾಥೋ ದಪ್ಪಿತೇ ನಾಗಸಙ್ಘೇ
ವಿಮದ ಕರಣ ಹೇತು ದಸ್ಸಯೀ ಭೇರವಾನೀ,
ಅಥ’ಪಗತ ಪಗಬ್ಭೇ ತೇ ವಿದಿತ್ವಾನ ಸತ್ಥಾ
ಅಪನುದಿ ಭಯಜಾತಂ ತಙ್ಖಣಂಯೇವ ತತ್ಥ।
೫೭೨.
ತರುಣ ತರಣಿಸೋಭಾ ಕೇತುಮಾಲಾವಿಲಾಸಿಂ
ಸುಭರುಚಿ ಮುಖವನ್ದಂ ಲಕ್ಖಣಾಕಿಣ್ಣಗತ್ತಂ,
ತಿಭವ ವಿಭವದಾಯಿಂ ತಂ ವಿದಿತ್ವಾನ ನಾಗಾ
ಚುತಪಹರಣ ಹತ್ಥಾ ವನ್ದಮಾನಾ ಮಹಿಂಸು।
೫೭೩.
ಸಿರಸೀ ನಿಹಿತಪಾಣೀ ರತ್ತಪಙ್ಕೇರುಹೇಹಿ
ವಿಕಚ ವದನ ನೇತ್ತಾ’ಮನ್ದ ಕಞ್ಜುಪ್ಪಲೇಹಿ,
ಸಕ ಸಕ ಧತ ನಾನಾವಣ್ಣ ವಮ್ಮಾದಿಕೇಹಿ
ವಿವಿಧ ಕುಸುಮವತ್ಥಾ’ಮನ್ದ ದೀಪದ್ಧಜೇಹಿ।
೫೭೪.
ಉರಗ ಭವನವಾಸಾ ನಾಗಕಞ್ಞಾ ಸಮೇಚ್ಚ
ಕುಚ ಕಲಸ ಸಹಸ್ಸಂ ಧಾರಯನ್ತಿ ಸಲೀಲಂ,
ಲಲಿತ ಕಣಕ ವಲ್ಲಿ ಲೀಲಮಾಧತ್ತ ಗತ್ತಾ
ಥುತಿ ಮುಖರ ಮುಖಾ ತಾ ಸಾಧು ಕೀಳಂ ಅಕಂಸು।
೫೭೫.
ಅಥ ಮುನಿ ಉರಗಾನಂ ವಿಗ್ಗಹಂ ತಂ ಸಮೇತುಂ
ಸುತಿಮನ ಕಮನೀಯಂ ನಿಚ್ಛರಂ ಬ್ರಹ್ಮಘೋಸಂ,
ಅಜರಮಮರ ಮಗ್ಗಂ ಸುಪ್ಪಸತ್ಥಂ ಸುಧಿಹಿ
ವರಮತಿ ವರಧಮ್ಮಂ ದೇಸಯೀ ನಂ ಫಣೀನಂ।
೫೭೬.
ನ ಭೋ ಭೋ ಸಂಸಾರೇ ಖಲು ಭವತಿ ಸಾರಂ ಲವಮ್ಪಿ
ವಿಸೇಸಾ ತಂ ಸೀತಂ ಜಲಿತ ದಹನೇ ವಿಜ್ಜತಿ ಕದಾ,
ಸದಾ ರಾಗಂ ರೋಗಂ ಬ್ಯಧತಿ ಜನತಂ ನೇಕದುರಿತಂ
ತಥಾಪಾ’ಯುಂ ಪಾತೋ ರವಿರಭಿಮುಖುಸ್ಸಾವ ಸದಿಸಂ।
೫೭೭.
ಸರೀರೋ’ಯಂ ಬತ್ತಿಂಸ ವಿಧ ಕುಣಪೋ ಸಾರ ರಹಿತೋ
ಪರಿತ್ತಂ ಯೋಬ್ಬಞ್ಞಂ ಕುಸುಮ ಸದಿಸಂ ನಿಗ್ಗತಸಿರಿ,
ಪಹನ್ತ್ವಾ ಗನ್ತಬ್ಬಂ ಭವಜ ವಿಭವಂ ಸಮ್ಭತಮಿದಂ
ಅಥೇವಂ ಸನ್ತೇ ಭೋ ವರಯತಿ ಭವಂ ಕೋ ನು ಹಿ ಬುಧೋ।
೫೭೮.
ಪಲಾಸೀ ಮಕ್ಖೀ ಕೋಧೂಪಹ ಮತೋ ಮಾನವಿಭವೋ
ಜನೋ’ತೀತೋ’ತೋ ಭೋ ಪಯತಿ ನರಕಂ ದಾರುಣತರಂ,
ಫಣೀ ಮಜ್ಜಾರೋ ಸಾ ಗುಹಕ ಕಪಯೋ ಭೂಯ ಬಹುಸೋ
ವಧೇನ್ತಞ್ಞೋಞ್ಞಂ ತೇ ನನುಭವಮಿದಂ ದುಕ್ಖಮ’ನಿಸಂ।
೫೭೯.
ಪುರೇ ಕಾಕೋ’ಲುಕಾ ಅಥ ವನಭವಾ ಫನ್ದನ ಇಸಾ
ಕರಿತ್ವಾ’ಟ್ಠಾನೇ’ಘಂ ಚಿರಮನುಭವುಂ ದುಕ್ಖಮನಿಸಂ,
ಅಹೋ ಕಪ್ಪಟ್ಠನ್ತಂ ಸರಥ ದುರಿತಂ ವೇರಜಮಿದಂ
ನ ಹೇತ್ಥಸ್ಸಾದೋ ಭೋ’ಣುಮಪಿ ಕಲಹೇ ಮೇತ್ತಿಮ’ಮತಂ।
೫೮೦.
ಬಲಂ ಬಾಲಾನಂ ಭೋ ಸಕ ಸಕ ವಧಾಯೇವ ಭವತಿ
ಅತೀತೇಕಾ ಖುದ್ದಾ ಲಟುಕಿಕದಿಜಾ ನಟ್ಠತನಯಾ,
ಗಜಂ ಬಾಲಂ ಮತ್ತಂ ಪವಿಧಿ ನ ಬಲಂ ಹೋತಿ ಸರಣಂ
ಅಥಟ್ಠಾನೇ ಕಿಂ ಭೋ ಕುರುಥ ವೀರಿಯಂ ಭುತಿ ಹನನಂ।
೫೮೧.
ನ ದುಕ್ಖಂ ತೇಸಂ ಯೇ ವಿಗತ ಕಲಹಾ ಏಕಮನಸಾ
ಅತೀತೇ ಭೋ ಲಾಪಾ ಅಘಟಿತ ಮಾನಾ ಪೇಯ್ಯವಚನಾ,
ಸುಖಂ ವಾಸಂ’ಕಾಸುಂ ಯದಹನಿ ಭವುಂ ತೇ’ಥ ವಿಧುರಾ
ವಸಂ ವ್ಯಾಧಸ್ಸಾಗುಂ ತದಹನಿ ಅಹೋ!ಮೇಧಗ ಬಲಂ।
೫೮೨.
ಇತಿ ತಿಖಿಣ ಸುಧಿಮಾ ಕತ್ತುಮೇತೇ ಸಮಗ್ಗೇ
ಅವದಿ ಪವರ ಧಮ್ಮಂ ಸಾಧು ವಿಞ್ಞುಪ್ಪಸತ್ಥಂ,
ಅಥ ಮುದಿತಮನಾ ತೇ ಪೀಣಿತಾ ತಸ್ಸ ನಾಗಾ
ಮಣಿಮಯಮ’ತುಲಂ ತಂ ಆಸನಂ ಪೂಜಯಿಂಸು।
೫೮೩.
ಅಥ ಮುನಿ ಗಗನಮ್ಬೋರುಯ್ಹ ಭುಮಿಪ್ಪದೇಸಂ
ತರುಣ ರವಿವ ತಸ್ಮಿಂ ಆಸನೇ ಆಸಿ ಭಾಸಂ,
ಅಥ ಭುಜಗಗಣಾ ತೇ ದಿಬ್ಬ ಖಜ್ಜಾದಿಕೇಹಿ
ಪರಿವಿಸಿಯ ಮುನಿನ್ದಂ ಸಾಧು ಧಮ್ಮಂ ಸುಣಿಂಸು।
೫೮೪.
ಅಥ ಜಲ ಥಲಜಾನಂ ತತ್ಥ ಯುದ್ಧಾ’ಗತಾನಂ
ಅಗಣಿತ ಭೂಜಗಾನಂ’ಸೀತಿಕೋಟೀ ಭುಜಙ್ಗಾ,
ವಿಮಲ ಸರಣಸೀಲೇ ಸುಪ್ಪತಿಟ್ಠಾ ಸುತುಟ್ಠಾ
ಅಕರು’ಮತಿಮುಳಾರಂ ಸತ್ಥು ಪೂಜಾವಿಧಾನಂ।
೫೮೫.
ಅಥ ಮಹುದರ ರಞ್ಗ್ಞೋ ಮಾತುಲೋ ನಾಗರಾಜಾ
ಮನಿನಯನಕನಾಮೋ ರಮ್ಮಕಳ್ಯಾಣದೇಸಾ,
ಉರಗ ಸಮರ ಹೇತೂ ಆಗತೋ ನಾಗದೀಪಂ
ಸುಗತವರ ಸರೀರಂ ದಿಸ್ವ ನತ್ವಾಲಪೇವಂ।
೫೮೬.
ಯದಿ ಸುಗತ! ಇಮಂ ತ್ವಂ ನಾಗತೋ ಅಸ್ಸ ಠಾನಂ
ಮಯಮಪಗತ ಪಾಣಾ ಹೋಮ ಝತ್ವಾ’ಞ್ಞಮಞ್ಞಂ,
ರುಧಿರವಹ ವಿಕಿಣ್ಣೋ ಅಸ್ಸ ಭುಮಿಪ್ಪದೇಸೋ
ಪಸಮಿ ದಹನ ದಿತ್ತಂ ಅಮ್ಬುದೇನೇವ ತಂ ತ್ವಂ।
೫೮೭.
ಮಮ ಭಗವ! ಪುರಾಮೇ ದಿಟ್ಠಪುಬ್ಬಂ ತವೇತಂ
ರುಚಿರ ಸಿರಿಸರೀರಂ ರಂಸಿಜಾಲಾ’ಭಿಕಿಣ್ಣಂ,
ಅಪಿ ಸುಮಧುರ ಧಮ್ಮಂ ದೇಸಯನ್ತೇ ಸುರಾನಂ
ದಸಬಲ ಸುತಪುಬ್ಬಂ ಆನುಭಾವಞ್ಚ ತುಯ್ಹಂ।
೫೮೮.
ಅಹಮಸಮ ಪುರೇ ತೇ ವಿಸ್ಸುತೋಯೇವ ದಾಸೋ
ಯದಿ ಮನಸಿ ದಯಾ ತೇ ಹೋತಿ ದಾಸೇ ಪುನಾ’ಪಿ,
ಪವರ ರತನದೀಪೇ ಹೋತಿ ಕಳ್ಯಾಣಿಗಙ್ಗಾ
ಮಮ ವಸತಿ ತಹಿಂ ತಂ ದಟ್ಠುಕಾಮೋ’ಭಿಯಾಚೇ।
೫೮೯.
ಇತಿ ಯತಿಪತಿ ತಸ್ಸಾ’ರಾಧನಂ ಪಗ್ಗಹೇತ್ವಾ
ಸಕ ಪರಿಚಿತ ಭುಮ್ಯಾ ಚೇತಿಯತ್ಥಂ ವಿಧಾಯ,
ಮಣಿಮಯ ಪರಿಭುತ್ತಂ ಆಸನಂ ಚಾ’ಪಿ ತೇಸಂ
ಸ ಸುಮನ ತರು ರಾಜಂ ಪೂಜನತ್ಥಂ ವಿಧಾಯ।
೫೯೦.
ದಸಬಲ ಪರಿಭುತ್ತಂ ಸಬ್ಬಮೇತಂ ಭುಜಙ್ಗಾ
ಮಣಿರಿವ ರುಚೀದಂ ತೇ ಧಾತುಯೋಯೇವ ತಸ್ಮಾ,
ಮಹಥ ನಮಥ ನಿಚ್ಚಂ ಮಂವ ಸಗ್ಗಾ’ಪವಗ್ಗಂ
ದದತಿ ಇತಿ ಚ ವತ್ವಾ ಓವದಿತ್ವಾನ ಸತ್ಥಾ।
೫೯೧.
ನಭತಲ’ಮು’ಪಗನ್ತ್ವಾ ದೇವನಾಗೇ ಮಹೇನ್ತೇ
ದಿಸಿ ದಿಸಿ ವಿಸರನ್ತೋ ನೀಲಪೀತಾದಿ ರಂಸಿ,
ಮನ ನಯನ ಹರನ್ತೋ ಜನ್ತುನಂ ಲೋಕಸಾರೋ
ಅಗಮಿ ರವಿ’ವ ಖಮ್ಹಾ ಜೇತನಾಮಂ ವಿಹಾರಂ।
೫೯೨.
ಅಥ ಮನುಜಮರಾನಂ ನತ್ತಸಿದ್ಧಾದಿಕಾನಂ
ಸತತ’ಮಮತ ಧಮ್ಮಂ ದೇಸಯನ್ತೋ ಫಣೀನಂ,
ವನಭವನ ಸುರಮ್ಮೇ ಮಙ್ಕುಲವ್ಹೇ ನಗಿನ್ದೇ
ಅಕರಿ ಮುನಿ ನಿವಾಸಂ ಛಟ್ಠಮೇ ಹಾಯನಮ್ಹಿ।
೫೯೩.
ಸುರಪುರುಪವನೇ’ಥೋ ಪಾರಿಜಾತಸ್ಸ ಮೂಲೇ
ಅರುಣ ಮುದುಸಿಲಾಯಂ ಭಾಸಮಾನೋ ಮುನಿನ್ದೋ
ಸುನಿಪುಣ’ಮಭಿಧಮ್ಮಂ ದೇಸಯನ್ತೋ ಸುರಾನಂ
ಅಕರಿ ವರನಿವಾಸಂ ಸತ್ತಮೇ ತತ್ಥ ವಸ್ಸೇ।
೫೯೪.
ಅಥ ಸುಖದ ಮುನಿನ್ದೋ ಜೇತನಾಮೇ ವಿಹಾರೇ
ಅವಸಿ ವಿಮಲಪಞ್ಞೋ ಅಟ್ಠಮೇ ಸಾರದಸ್ಮಿಂ,
ಅಜರ’ಮಮರ ಸನ್ತಿಂ ಫಸಮಾನೋ ಪರೇಸಂ
ವಿವಿಧ ನಯ ವಿಚಿತ್ತಂ ದೇಸನಂ ದೇಸಯನ್ತೋ।
ಇತಿ ಲಙ್ಕಾಯ ದುತಿಯಾಗಮನಂ।
೫೯೫.
ಏವಂ ಜಿನೋ ಜೇತವನೇ ವಸನ್ತೋ
ನೀಸ್ಸಾಯ ಸಾವತ್ಥಿಪುರಂ ವಿಹಾಸಿ,
ಸಾ ಕಿದಿಸೀ ಆಸಿ ಪುರೀ ತದಾನೀ
ತಂ ಕೀದಿಸಂ ಜೇತವನಂ ವಿಹಾರಂ।
೫೯೬.
ಭೂಮಙ್ಗನಾಯಾಹಿತ ಉತ್ತಮಙ್ಗೇ
ಭಾಸನ್ತ ನಾನಾರತನಾಭಿರಾಮಾ,
ವಿಸಾಲಮೋಲೀವ ವಿಸಾಲಭೋಗಾ
ಸಾ ಜಮ್ಬುದೀಪಮ್ಹೀ ಬಭುವ ರಮ್ಮಾ।
೫೯೭.
ಸಿರೀನಿಕೇತೇ ಸಿರಿಮಾವಹನ್ತೀ
ವಿರಾಜತೇ ಯಾ ವಸುಧಾ ತಲಸ್ಮಿಂ,
ಸಾ ದೇವರಾಜಸ್ಸ’ಮರಾವತೀ’ವ
ರಞ್ಞೋ ಕುವೇರಸ್ಸ’ಲಕಾವ ರಮ್ಮಾ।
೫೯೮.
ಸಾ ಪುಞ್ಞಪಞ್ಞಾಲು ಜನಾಧಿವುತ್ಥಾ
ಸೋಣ್ಣಾದಿ ಪುಣ್ಣಾಪನಾಕಿಣ್ಣವೀಥೀ,
ಉತ್ತುಙ್ಗ ಮಾತಙ್ಗ ತುರಙ್ಗ ರಙ್ಗಾ
ಸಾ ರಾಜತೇ ಕಞ್ಚನ ಮನ್ದಿರಾಲೀ।
೫೯೯.
ರರಾಜ ಸಾ ಭಾಸುರ ರಾಜಪುತ್ತಾ
ಪುಞ್ಞಙ್ಗನಾಲಾಸ ವಿಲಾಸಯನ್ತೀ,
ವೇದಙ್ಗಪಾರಙ್ಗತ ವಿಪ್ಪಚಾರಾ
ದ್ವಿಪಞ್ಚ ಸದ್ದೇಹಿ ಚ ನಿಚ್ಚಘೋಸಾ।
೬೦೦.
ಅನೇಕಸಿಪ್ಪೀ ಸತ ಸಮ್ಪಕಿಣ್ಣಾ
ನಾನಾದಿಸಾಹಾ’ಗತ ಸತ್ಥವಾಹಾ,
ಪಹುತಖೀಣಾಸವಪಾದಪೂತಾ
ಬಭಾಸ ಸಾ ಮಙ್ಗಲ ಮನ್ದಿರಂ’ವ।
೬೦೧.
ಭವನ್ತರೇ ಯೋ ಚರಿಯಂ ಚರನ್ತೋ
ಸುವೋ’ಪನಿಸ್ಸಾಯ ವಸಂ ಗುಣೇನ,
ಯಞ್ಞಙ್ಗಸಾಖಿಂ ಮತಸೀನಪತ್ತಂ
ಅಕಾ ಸಮಿದ್ಧಂ ಫಲಪಲ್ಲವೇಹಿ।
೬೦೨.
ಇದಾನಿ ಪತ್ವಾನ ಭವಸ್ಸ ಅನ್ತಂ
ನಿಸ್ಸಾಯ ಯಂ ಸೋ ವಸತೇ ಮುನಿನ್ದೋ,
ತಸ್ಸಾ ಗುಣಂ ಕೋ ಹಿ ಅಸೇಸಯಿತ್ವಾ
ಕಥೇತಿ ಸಾ ವಸ್ಸೂ’ಪಮಾಯ ತಸ್ಸಾ।
೬೦೩.
ತಸ್ಸೋಪಕಟ್ಠೇ ರತನಂವ’ನಗ್ಘಂ
ಮನೋಹರೋ ಉತ್ತಮಸತ್ತಸೇವಿ,
ಜನಾನಮಾಕಖಿಙತದೋ ವಿಹಾರೋ
ಬಭುವ ಜೇತಾದಿ ವನವ್ಹಯೇನ।
೬೦೪.
ಸಮಫುಲ್ಲ ಪುಪ್ಫರಸ ಮೋದಿತ ಛಪ್ಪದಾಲೀ
ಝಙ್ಕಾರ ನಾದ ಪರಿವಾದಿತ ತನ್ತಿನಾದಾ,
ಸಮ್ಮತ್ತ’ನನ್ತ ದಿಜ ಕುಜಿತ ಗೀತವನ್ತಾ
ತಿಟ್ಠನ್ತಿ ಯತ್ಥ ತರವೋ ನಟಕಾವ ಛೇಕಾ।
೬೦೫.
ಖೀರಣ್ಣವಾಹರಿಯ ಧೋವಿಯ ಖೀರನೀರಾ
ಸೋಸೇತ್ವ ಸಜ್ಝುಮಲಯೇ ಸಸಿಕನ್ತಿ ಮಸ್ಸಂ
ಯತ್ಥೋಕಿರಿತ್ವ ತನಿತಾ ವಿಯ ವಾಲುಕಾಯೋ
ಸಾ ಮಾಲಕಾವಲಿ ಬಭಾಸ ಪಯೋದಧಿ’ವ।
೬೦೬.
ವಿಜ್ಜೋತಮಾನ ರತನಪ್ಪಮುಖಾನನಮ್ಹಿ
ಸೋಪಾನ ಮಾಲ ಪದಗಣ್ಠಿದುಜೇಹಿ ಹಾಸಂ,
ಕತ್ವೇವ ದೇವಭವನಾನಮಹಂ ವಿರಾಗ
ವನ್ತೀ’ತಿ ಗನ್ಧಕುಟಿ ಯತ್ಥ ಪಹಾಸಯಿತ್ಥ।
೬೦೭.
ಕಮ್ಮಾರ ಗಗ್ಗರಿ ಮುಖೋ’ಪರಿ ಸಮ್ಪಪುಣ್ಣಾ
ಅಙ್ಗಾರ ಕನ್ತರ ವಿನಿಗ್ಗತ ಜಾಲಕಾವ,
ಸಮ್ಬುದ್ಧದೇಹ ಪರಿನಿಗ್ಗತ ರಂಸಿಮಾಲಾ
ದಾಯಗ್ಗ ನಿಗ್ಗತ ಕರಾ ವಿಸರನ್ತಿ ಯಸ್ಮಿಂ।
೬೦೮.
ತುಮ್ಹೇ ಸರಾಗ ಜನಸಙ್ಗಮತೋ’ತಿ ಗೀತಾ
ಧಞ್ಞಾ ಮಯನ್ತೀ ವಿಮಲೇಹೀ ಸಮಙ್ಗಿತತ್ತಾ,
ತುಟ್ಠಾವ ಹಾಸ ಮಕರಾ ಸುರಪಾದಪಾನಂ
ರಾಜೇನ್ತಿ ಯತ್ಥ ಯತಿನಿಸ್ಸಿತ ಪಾದಪಿನ್ದಾ।
೬೦೯.
ಪುನ್ನಾಗ ನೀಪ ವಕುಲ’ಜ್ಜುನ ರಾಜರುಕ್ಖ
ನಾಗಾ’ಗ ಚೂತ ಯುಗಪತ್ತಕ ಚಮ್ಪಕಾನಂ,
ಪುಪ್ಫಾಭಿಕಿಣ್ಣ ಧರಣೀ ರತನೇಹಿ ನಾನಾ
ಪಚ್ಛನ್ನ ದಿಬ್ಬಭವನಂ ವಿಯ ಭಾತಿ ಯತ್ಥ।
೬೧೦.
ಬ್ರಹ್ಮಾಸುರಾಸುರ ನರೋರಗ ಲಿಙ್ಗಿಸಿದ್ಧ
ವಿಜ್ಜಾಧರಾದಿ ಜನತಾ ಕತವನ್ದನೇಹಿ,
ತೇಹೇವ ಘುಟ್ಠ ಥುತಿಮಙ್ಗಲ ಗೀತಿಕಾಹಿ
ಯತ್ಥೋಪಗಾನ ಮನನೇತ್ತಗಣಾ ಮುದೇನ್ತಿ।
೬೧೧.
ನಿಗ್ಘೋಸಿತಾಮಲ ಸುಸೀತಲ ನಿಜ್ಝರೇಹಿ
ಸಮ್ಮತ್ತ ನೇಕದಿಜ ಘುಟ್ಠ ಜಲಾಸಯೇಹಿ,
ಕಿಞ್ಜಕ್ಖ ಪತ್ತ ಪರಿಕಿಣ್ಣ ಸಿಲಾತಲೇಹಿ
ತುಸ್ಸನ್ತಿ ಯತ್ಥ ಸತತಂ ಯತೀನಂ ಮನಾತಿ।
೬೧೨.
ಯೋ ನೇಕ ಕಪ್ಪ ಸತ ಸಞ್ಚಿತ ಪುಞ್ಞರಾಸಿ
ಹಿತ್ವಾ’ಮಿತಂ ಕಪಿಲವತ್ಥು ಮಹಾಸಿರಿಮ್ಪಿ,
ಆಗಮ್ಮ ಯತ್ಥ ನೀರತೋ ಸುಗತೋ ಮಹೇಸಿ
ಕೋ ತತ್ಥ ಭುತಿ ಮತುಲಂ ಕಥಿಕೋ ಕಥೇತಿ।
೬೧೩.
ತಸ್ಮಿಂ ಜಿನೋ ವಸತಿ ಜೇತವನೇ ವಿಹಾರೇ
ಇನ್ದೋ ಯಥಾ ರುಚಿರ ನನ್ದನ ಕಾನನಮ್ಹಿ,
ಬ್ರಹ್ಮಾ’ವ ಬ್ರಹ್ಮಭವನೇ ಸಪಿತಾಮಹೇಹಿ
ತಾರಾವಲೀ ಪರಿವುತೋ ಗಗನೇ’ವ ವನ್ದೋ।
೬೧೪.
ತದಾಗಮ್ಮ ಮಹಾನಾಗೋ ಮಣಿ ಅಕ್ಖಿಕನಾಮಕೋ,
ಲಙ್ಕಾತೋ ಜಿನಪಾದಸ್ಮಿಂ ಫಣಿಂ ಪಚ್ಚೇದ’ಮಬ್ರುವಿ।
೬೧೫.
ಸಮ್ಬುದ್ಧಾ ಧೀರ ಲೋಕಸ್ಮಿಂ ಲೋಕಸ್ಸತ್ಥಾಭಿವುದ್ಧಿಯಾ,
ಜಾಯನ್ತಿ ಸಾಮಿ ತುಮ್ಹಾಕಂ ದಯಾಯನ್ತೋ’ಗಧಾ ಮಯಂ।
೬೧೬.
ತೇನ ಮೇ ದಾಸಭುತಸ್ಸ ಸಂಸಾರನ್ದುಘರಾ ಥಿರಾ,
ಮುತ್ತಿಂ ಯದಿಚ್ಛಸೇ ಮಯ್ಹಂ ಗಹಣೀಯಂ ನಿಮನ್ತಣಂ।
೬೧೭.
ಸುತ್ವಾನ ತಂ ಮಹಾನಾಗೋ ಮಹಾನಾಗ ನಿಮನ್ತಣಂ,
ಪಟಿಗ್ಗಹೇಸಿ ತಂ ತುಣ್ಹೀಭಾವೇನ ಕರುಣಾಯ ಸೋ।
೬೧೮.
ಞತ್ವಾ ತಂ ಸುಮನೋ ನಾಗೋ ಲಹುಮಾಗಮ್ಮ ಸೀಹಲಂ,
ಕಳ್ಯಾಣಾಪಗಪಸ್ಸಮ್ಹಿ ಮನೋನನ್ದನ ಭುತಲೇ।
೬೧೯.
ಸಜ್ಝು ಕಮ್ಬುಮಣಿ ಮುತ್ತ ಪವಾಲ ವಜಿರಾಮಯೇ,
ವಹಾರಹೇ ಮಹಾಥೂನೇ ಘಟಕಾದಿಂ ನಿಧಾಪಿಯ।
೬೨೦.
ದತ್ವಾ ತುಲಾದಯೋ ಸೇಸ ಮನ್ದಿರಙ್ಗೇ ತಥೇವ ಚ,
ವಿಟಙ್ಕ ವ್ಯಾಲ ಸೀಹಾದಿ ಪನ್ತಿಯೋ’ಪಿ ತಥೇವಹಿ।
೬೨೧.
ಸಾತಕುಮ್ಹಮಯಾ’ನೇಕ ಚಿತ್ತೇಹಿ ಸಾಧು ಚಿತ್ತಿತಂ,
ನಿಮ್ಮಾಯ ಗೋಪಾನಸಿಯೋ ಪಕ್ಖಪಾಸೇ ಚ ಕಣ್ಣಿಕಂ।
೬೨೨.
ಸಿಙ್ಗಿ ನಿಕ್ಖೇನ ಸಿಙ್ಗಞ್ಚ ಛದನಿನ್ದಮಣೀಹಿ ಚ,
ಸೋಣ್ಣ ಕಿಙ್ಕಿಣಿ ಮಾಲಾಯೋ ಕಣ್ಣಮಾಲಾ ಚ ಮಾಪಿಯ।
೬೨೩.
ಚಿತ್ತವಿತಾನಂ ಬನ್ಧಿತ್ವಾ ಮುತ್ತೋಲಮ್ಬೇ ತಹಿಂ ತಹಿಂ,
ಕತ್ವಾನ ಗನ್ಧದಾಮೇಹಿ ಪುಪ್ಫದಾಮೇಹಿ ಸಙ್ಕುಲಂ।
೬೨೪.
ಇನ್ದನೀಲಮಯಂ ಭುಮಿ ಮಜ್ಝೇ’ನಗ್ಘ ಮಹಾಸನಂ,
ಮಾಪೇಸಿ ಪರಿತೋ ಸೇಸ ಭಿಕ್ಖೂನಞ್ಚ ಸುಭಾಸನೇ।
೬೨೫.
ರತನೇಹೇ’ವಾಪಸ್ಸಯೇ ವೇದಿಕಾ ಏಳಿಕಾಮಯೇ,
ಮುತ್ತಾ ವಾಲುಕ ಸಙ್ಕಿಣ್ಣಂ ಮಾಲಕಞ್ಚ ಮನೋರಮಂ।
೬೨೬.
ಸತ್ತ ರತನ ಸಮ್ಭುತ ತೋರಣೂ’ಪರಿ ತೋರಣೇ,
ಸನ್ತೀರ ಕುಸುಮಾ’ಕಿಣ್ಣ ಹಾಟಕಾದಿ ಘಟಾಕುಲಂ।
೬೨೭.
ನೇಕ ರಾಗದ್ಧಜಾಕಿಣ್ಣ ವಿತಾನ ಸಮಲಙ್ಕತಂ,
ದೀಪ ಧೂಪಾಲಿ ಸಙ್ಕಿಣ್ಣ ಗನ್ಧಪುಪ್ಫ ಸಮಾಕುಲಂ।
೬೨೮.
ಏವಮಾದಿಹಿ ನೇಕೇಹಿ ವಣ್ಣೇಹಿ ಸಮಲಙ್ಕತಂ,
ಮಾಪೇತ್ವಾ ಮಣ್ಡಪಂ ಸೇಟ್ಠಂ ದೇವಮಣ್ಡಪ ಸನ್ತಿಭಂ।
೬೨೯.
ಸೀತ ವಾಲುಕ ಸಞ್ಛನ್ನಂ ಮುದು ಪಾದಪಟತ್ಥತಂ,
ಮಾಪೇತ್ವೇವಂ ಮಹಾಮಗ್ಗಂ ಸುರಞ್ಜಸ ಸಮಞ್ಜಸಂ।
೬೩೦.
ಸಞ್ಚಿನಿತ್ವಾನ ತೇ ನಾಗಾ ಖಜ್ಜ ಭೋಜ್ಜ ಫಲಾಫಲೇ,
ದಿಬ್ಬನ್ನಪಾನೇ ಪಚುರೇ ಪಟಿಮಗ್ಗಂ ಗಮುಂ ತದಾ।
೬೩೧.
ತತೋ ಕಾರುಣಿಕೋ ನಾಥೋ ಬೋಧಿತೋ ಅಟ್ಠಮೇ ಸಮೇ,
ವೇಸಾಖ ಪುಣ್ಣಮಾಸಿಮ್ಹಿ ಸನ್ನಿಪಾತಿಯ ಸಾವಕೇ।
೬೩೨.
ಏಥಜ್ಜ ಭಿಕ್ಖವೋ ಲಙ್ಕಂ ನಾಗಾನಂ’ನುಗ್ಗಹಾಯ ಭೋ,
ಮಣಿಅಕ್ಖಿಕೋ ನಿಮನ್ತೇಸಿ ಪಸನ್ನೋ ಬುದ್ಧಸಾಸನೇ।
೬೩೩.
ಸುತ್ವಾನ ವಚನಂ ತಸ್ಸ ಸಮ್ಬುದ್ಧಸ್ಸ ಸಿರೀಮತೋ,
ಅಸ್ಸವಾ ಪೇಸಲಾ ಭಿಕ್ಖೂ ಪಚ್ಚಸ್ಸೋಸುಂ ಸಮಾಹಿತಾ।
೬೩೪.
ಸಾರಿಪುತ್ತೋ ತತೋ ಥೇರೋ ಪಞ್ಞಾಯ’ಗ್ಗ ಧುರನ್ಧರೋ,
ಪತ್ತಚೀವರಮಾ’ದಾಯ ಅಗಮಾ ಜಿನು’ಪನ್ತಿಕಂ।
೬೩೫.
ಮೋಗ್ಗಲ್ಲಾನೋ ಮಹಾಥೇರೋ ದುತಿಯೋ ಅಗ್ಗಸಾವಕೋ,
ಪತ್ತಚೀವರಮಾದಾಯ ಸೋಪಾಗ ಜಿನ ಸನ್ತಿಕಂ।
೬೩೬.
ಧೂತಪಾಪೋ ಧುತಙ್ಗಗ್ಗೋ ಮಹಾಕಸ್ಸಪ ನಾಮಕೋ,
ಪತ್ತಚೀವರಮಾದಾಯ ಆಗಮಾ ಜಿನಸನ್ತಿಕಂ।
೬೩೭.
ಸಾಸನೇ ವಿನಯಞ್ಞ ನಮಗ್ಗೋ’ ಪಾಲಿವ್ಹಯೋ ಯತ,
ಪತ್ತಚೀವರಮಾದಾಯ ಜಿನನ್ತಿಕಮು’ಪಾಗಮಿ।
೬೩೮.
ದಿಬ್ಬಚಕ್ಖೂನಮಗ್ಗೋ ಯೋ ರುದ್ಧಪಾಪಾರಿ ದಪ್ಪಕೋ,
ಥೇರೋ’ನುರುದ್ಧೋ ವರದೋ ಸೋಪಾಗ ಮುನಿಸನ್ತಿಕಂ।
೬೩೯.
ಮಣಿವ ಕಾಮದೋ ಕಾಮಮು’ಪವಾನೋ’ತಿ ವಿಸ್ಸುತೋ,
ಞಾಣೀ ಗಣೀ ದಕ್ಖಿಣೇಯ್ಯೋ ಥೇರೋಪಾಗ ಜಿನನ್ತಿಕಂ।
೬೪೦.
ಬಕ್ಕುಲೋ ವಿಮಲೋ ಸೀಲ ಸಮಾಧಾದಿ ಗುಣಾಕರೋ,
ಆಗತೋ ಸಪರಿಕ್ಖಾರೋ ಭಿಕ್ಖೂನಂ ಸಮಿತಿಂ ತದಾ।
೬೪೧.
ಬುದ್ಧಸಾಸನ ಧೋರಯ್ಹೋ ಥೇರೋ ಅಙ್ಗುಲಿಮಾಲಕೋ,
ಸಹಾ’ಗನ್ತುಂ ಮುನಿನ್ದೇನ ಸನ್ನದ್ಧೋ ಸಹಸಾ ಗತೋ।
೬೪೨.
ಸಾಸನೋದಯ ಸೇಲಗ್ಗೇ ಸೂರಿಯೋ ವಿಯ ಭಾತಿ ಯೋ,
ಸೋ’ಯಂ ರಾಹುಲಥೇರೋ’ಪಿ ಲಹು’ಗಾ ಪಿತು ಸನ್ತಿಕಂ।
೬೪೩.
ಭದ್ದಾಚಾರೋ ಭದ್ದಿಯವ್ಹೋ ಥೇರೋ ಭದ್ದಘಟೋ ವಿಯ,
ಪಾಕಟೋ ಭುವನೇ ಸೋ’ಪಿ ಗತೋ ಸಮ್ಬುದ್ಧ ಸನ್ತಿಕಂ।
೬೪೪.
ದೇವದ್ದುಮೋ’ವ ಲೋಕಸ್ಸ ಯೋ ದದಾತಿ’ಚ್ಛಿತಿ’ಚ್ಛಿತಂ,
ಜಿನೋರಸೋಪಿ ಸೇಲವ್ಹೋ ಗತೋ ಸಮ್ಬುದ್ಧಸನ್ತಿಕಂ।
೬೪೫.
ಯಾಮಿನೀ ಸಾಮಿಕೋ’ವಾತಿ ಭಾತಿ ಯೋ ಸಾಸನಮ್ಬರೇ,
ಮಹಾನಾಮ ಮಹಾಥೇರೋ ಸೋಪಾಗ ಮುನಿಸನ್ತಿಕಂ।
೬೪೬.
ಮನೋಸಿಲಾತಲಗ್ಗಮ್ಹಿ ಜುಮ್ಹಮಾನೋ’ವ ಕೇಸರೀ,
ಸುಭುತಿವ್ಹ ಮಹಾಥೇರೋ ಬುದ್ಧುಪನ್ತಿಕ ಮಾಗತೋ।
೬೪೭.
ಬುದ್ಧಸಾಸನ ಛದ್ದನ್ತ ಸರಸೀ ಸಾರಸೋ ವಿಯ,
ವಿಸ್ಸುತೋ ತಿಸ್ಸಥೇರೋ’ಪಿ ಗತೋ ಭಿಕ್ಖುಸಮಾಗಮಂ।
೬೪೮.
ಜಿನಸಾಸನ ಸಮ್ಫುಲ್ಲಸರಸೀರುಹ ಮಜ್ಝಗೋ,
ಮಧುಬ್ಬತ ನಿಭೋ ರಾಧಥೇರೋ’ಪಿ ಸಹಸಾ ಗತೋ।
೬೪೯.
ಭಗು ದಬ್ಬೋಪ’ಸೇನೋ ಚ ಕೋಣ್ಡಞ್ಞ’ಸ್ಸಜಿ ಸೀವಲಿ,
ಏತೇ ಜಿನತ್ರಜಾ ಥೇರಾ ಗತಾಸುಂ ಮುನಿಸನ್ತಿಕಂ।
೬೫೦.
ಕುಮಾರಕಸ್ಸಪೋ ಪುಣ್ಣೋಸೋಣೋಸೋಭಿತ ರೇವತಾ,
ಥೇರಾಪೇತೇ ಅಭಿಞ್ಞಾತಾ ಗತಾಸುಂ ಸತ್ಥುಸನ್ತಿಕಂ।
೬೫೧.
ವಙ್ಗೀಸೋ ಸಾಗತೋ ನನ್ದೋ ಭಾರದ್ವಾಜೋ ಗವಮ್ಪತಿ,
ಪತ್ತಚೀವರಮಾದಾಯ ಗತಾಸುಂ ಜಿನಸನ್ತಿಕಂ।
೬೫೨.
ಏವಮಾದಿ ಮಹಾನಾಗಾ ಪಞ್ಚಸತ ಜಿನೋರಸಾ,
ಸಮಾಗಞ್ಛುಂ ಸಹಾಗನ್ತುಂ ಮುನಿನಾ ಲೋಕಸಾಮಿನಂ।
೬೫೩.
ತತೋ ಸೋ ಜಗದಾನನ್ದೋ ಕರುಣಾಯಾಭಿರಾಧಿತೋ,
ಮೇರುಂ ಪರಿಕ್ಖಿಪನ್ತೋವ ಅನೇಕಜ್ಜುತಿ ವಿಜ್ಜುಯಾ।
೬೫೪.
ನಿವಾಸೇತ್ವಾ ಸುದ್ಧರಂಸಿ ವಿಸರನ್ತರವಾಸಕಂ,
ತಸ್ಸೂಪರಿ ಜಿನೋ ರತ್ತಂ ಬನ್ಧಿತ್ವಾ ಕಾಯಬನ್ಧಂ।
೬೫೫.
ಅಚ್ಚುಗ್ಗತಂ ಮಹಾಥೂಪಂ ಚಾರು ಚಾಮೀಕರಜ್ಜುತಿಂ,
ಪಟಿಚ್ಛಾದಯಮಾನೋವ ರತ್ತಕಮ್ಬಲ ಕಞ್ಚುನಾ।
೬೫೬.
ವಣ್ಣ ನಿಗ್ರೋಧಪಕ್ಕಂವ ಸುರತ್ತಂ ಪಂಸುಕುಲಿಕಂ,
ಸಙ್ಘಾಟಿಯಾ ಕರಿತ್ವಾನ ಸಗುಣಂ ಉತ್ತರೀಯಕಂ।
೬೫೭.
ಹುತ್ವಾನ ಸುಪಟಿಚ್ಛನ್ತೋ ಪಾರುಪಿತ್ವಾನ ಸಾಧುಕಂ,
ಪತ್ತತ್ಥಾಯ ಪಸಾರೇಸಿ ಜಾಲಾಕುಲಕರಞ್ಜಿನೋ।
೬೫೮.
ಲೋಕನಾಥಪ್ಪಭಾವೇನ ತತೋ ಪತ್ತಮಧುಬ್ಬತೋ,
ಪಾಣಿ ಸರೋರುಹಸ್ಸನ್ತೋ ಸಮ್ಪತ್ತೋಸಿ ತಮಗ್ಗಹಿ।
೬೫೯.
ತತೋ ಸಸಿಸ್ಸಕೋ ನಾಥೋ ಉಗ್ಗನ್ತ್ವಾ ಗಗನಙ್ಗನಂ,
ನಾನಾವಣ್ಣಮ್ಬುದೇ ತತ್ಥ ಮದ್ದನ್ತೋ ಗನ್ತುಮಾರಹಭಿ।
೬೬೦.
ತತೋ ಸಮ್ಬುದ್ಧ ದೇಹಸ್ಮಾ ನಿಕ್ಖನ್ತಾಸುಂ ಛ ರಂಸಿಯೋ,
ಹೇಮಕಣ್ಣಿಕತೋ ಯಾತ ಮಣಿಗೋಪಾನಸೀ ಯಥಾ।
೬೬೧.
ಬಾಣಿನ್ದೀವರ ಪುಪ್ಫೇಹಿ ಮೇವ’ಕಿನ್ದಮಣಿಹಿ ಚ,
ಛಾದೇನ್ತಿ ವಿಯ ನಕ್ಖತ್ತಾ ನೀಲಂ’ಸು ಮುನಿದೇಹತೋ।
೬೬೨.
ಚಮ್ಪಕುದ್ದಾಲಮಾಲಾಭೀ ಹೇಮಚುಣ್ಣಮ್ಬರೇಹಿ ಚ,
ಪೂರಯನ್ತಿ ವಿಯಾಸಙ್ಗ ಪೀತಂಸೂ ಜಿನದೇಹತೋ।
೬೬೩.
ಭಣ್ಡೀಪುಪ್ಫಕದಮ್ಬೇಹಿ ಲೋಹಿತಙ್ಕಮಣಿಹಿ ಚ,
ಲೋಹಿತಾಭಾ ಪಪೂರೇನ್ತಿ ದಿಸಾ’ಗಾ ಮುನಿದೇಹತೋ।
೬೬೪.
ಹಾರ ಮಲ್ಲಿಕ ಮಾಲಾಹಿ ಸೋಮಂಸು ಫಲಿಕಾದಿಹಿ,
ಪೂರಯನ್ತಿ ವಿಯಾಸಙ್ಗ ಓದಾತಾ ಮುನಿದೇಹತೋ।
೬೬೫.
ಪಿಞ್ಜುಮಞ್ಜೇಟ್ಠರಾಸೀಹಿ ಪದುಮಾಭಮಣೀಹಿ ಚ,
ದಿಸಂ ಛಾದಯಮಾನಾಗಾ ಮಞ್ಜಿಟ್ಠಾಭಾ ಜಿನಙ್ಗತೋ।
೬೬೬.
ನೇಕಿನ್ದಚಾಪ ಕಿಣ್ಣಂವ ದಿವಸಂ ರತನುತ್ಥತಂ,
ಚಿತ್ತಪಟಂವ ಮುಞ್ಚನ್ತಂ ಮಿಸ್ಸಾಭಾಗಾ ಜಿನಙ್ಗತೋ।
೬೬೭.
ಗಿರಿಕೂಟ ಕೂಟಾಗಾರ ಮತ್ತಾ ಛಬ್ಬಣ್ಣ ರಂಸಿಯೋ,
ಆವೇಲವೇಲಾ ಧಾವನ್ತಿ ದಿಪ್ಪಮಾನೇತರೇತರಾ।
೬೬೮.
ಗಚ್ಛಮಾನಾ’ಹನಿತ್ವಾನ ಚಕ್ಕವಾಳ ಸಿಲುಚ್ಚಯೇ,
ಉಗ್ಗನ್ತ್ವಾ ಪರತೋ ಯನ್ತೀ ನೀರ ನಿಜ್ಝರ ಸನ್ನೀಭಾ।
೬೬೯.
ಸಮ್ಮುಖೇ ಸಮ್ಮುಖೇ ತಾಯೋ ರುಕ್ಖಪಬ್ಬತ ಆದಯೋ,
ಕಾರಯನ್ತಾ ಸಕಂ ವಣ್ಣಂ ಧಾವನ್ತಾ’ಪಿ ಚ ಸಿನ್ಧವೋ।
೬೭೦.
ಉದ್ಧಮುಗ್ಗತರಂಸೀಹಿ ರಞ್ಜಿತಾ ಜಲದಾ ತದಾ,
ನಾನಾವಣ್ಣೇ ಪುನೇವಾಸಿ ನೂತನೋ ರವಿಮಣ್ಡಲೋ।
೬೭೧.
ಜಿನಪ್ಪಹಾ ಪವಾಹೇಸು ನಿಮುಗ್ಗಾ ದೇವತಾ ಗತಾ,
ಪೂಜೇತುಂವ ನಿಜತ್ತೇಹಿ ನಾನಾವಣ್ಣಾ ಸಿಯುಂ ತದಾ।
೬೭೨.
ಪವಿಟ್ಠಾ ಬುದ್ಧರಂಸೀನಮನ್ತರಂ ದೇವಧೀತರೋ,
ಅಸಞ್ಜಾನೀಯ ಮುಯ್ಹಿಂಸು ಮುಹುತ್ತಂ ಅತ್ತನೋ ಧವಂ।
೬೭೩.
ಸುರಾ ಸುರೋರಗ ಬ್ರಹ್ಮ ಸಿದ್ಧ ವಿಜ್ಜಾಧರಾದಯೋ,
ಚಾಮರಚ್ಛತ್ತಕೇತುಹಿ ಪೂಜಯನ್ತಾ ಜಿನನ್ತ್ವಗುಂ।
೬೭೪.
ಅಗ್ಘಿಕಂ ಪನ್ತಿಯೋ ಕೇಚಿ ತೋರಣೂಪರಿ ತೋರಣೇ,
ಘಟದೀಪಾಲಿಯೋ ತನ್ಥ ಕರೋನ್ತಿ ಅಭಿತೋ’ಭಿತೋ।
೬೭೫.
ಪಾದಪಟೇ ಪತ್ಥರನ್ತಿ ವಿತತ್ವನ್ತಿ ವಿತಾನಕೇ,
ತತ್ಥೂಪರಿ ಅನೇಕಾನೀ ಕುಸುಮಾನೋ’ಕಿರನ್ತಿ ಚ।
೬೭೬.
ಕತಮಂ ದೇವಲೋಕನ್ನುಯಾತಿ ಲೋಕಗ್ಗನಾಯಕೋ,
ಯಾತಿ ಕಿಂ ಬುಹ್ಮಲೋಕನ್ನು ಅಮ್ಹಾಕಂ ಭವನನ್ನು ಖೋ।
೬೭೭.
ಕತ್ಥ ನು ಖೋ ದೇವದೇವೋ ಕಸ್ಸನುಗ್ಗಹಬುದ್ಧೀಯಾ,
ಯಾತೀ’ತಿ ಕಙ್ಖಿತಾ ಕೇಚಿ ಸಂಸರನ್ತಿ ಇತೋಚಿತೋ।
೬೭೮.
ಮಾಪೇತ್ವಾ ಅಭಿತೋ ಮಗ್ಗೇ ಮಣ್ಡಪೇ ರತನಾಮಯೇ,
ಸಯನಾಸನಂ ಪಞ್ಞಪೇತ್ವಾ ಕಾಚಿ ತಿಟ್ಠನ್ತಿ ದೇವತಾ।
೬೭೯.
ತಹಿಂ ತಹಿಂ ಪಟ್ಠಪೇನ್ತಾ ಸುಧನ್ತ ಮಧುರೋದಕಂ,
ಯಾವಮಾನಾ ಜಿನಂ ಕೇಚಿ ತಿಟ್ಠನ್ತಿ ಚ ಮಹನ್ತಿ ಚ।
೬೮೦.
ಏವಂ ಮಹಾಮಹೇ ನಾಥೋ ವತ್ತಮಾನೇ ಅನೂಪಮೇ,
ಜಲಂ ಸಮ್ಬುದ್ಧಸಿರಿಯಾ ನೂತನೋ ಸೂರಿಯೋ ವಿಯ।
೬೮೧.
ಬ್ರಹ್ಮಸೇನಾಭಿತೋ ಯಾನ ಬ್ರಹ್ಮಾವಾಥ ಸಹಮ್ಪತಿ,
ಸುರಸೇನಾಭಿತೋ ಯಾನ ಸಕ್ಕೋವ ಸಮಲಙ್ಕತೋ।
೬೮೨.
ಗಗಾಲಿಮಭಿತೋ ಯಾನ ಗಹಙ್ಗಾ ಮಣಿ ಸನ್ನಿಭೋ,
ಧತರಟ್ಠಖಗಿನ್ದೋವ ಹಂಸಸೇನಾಲಿ ಪುಬ್ಬಗೋ।
೬೮೩.
ಅಪೇತ ರಾಗದೋಸೇಹಿ ವೀತಮೋಹೇಹಿ ಸಬ್ಬಸೋ,
ಪಟಿಸಮ್ಭಿದತ್ತ ಸಮ್ಪತ್ತ ಸಾವಕೇಹಿ ಅನುಗ್ಗತೋ।
೬೮೪.
ಯೇಸಂ ಯೇಸಂ ಮನಸ್ಮಿಂ ಯಂ ಯಮತ್ಥಿ ಕಿಞ್ಚಿ ಸಂಸಯಂ,
ತೇಸಂ ತಂ ತಂ ಪಣುದೇನ್ತೋ ದೇಸನಾಯ ಸುಧಾಸಿನಂ।
೬೮೫.
ತತ್ಥ ತತ್ಥಾನುರೂಪೇನ ಪಾಟಿಹಾರಿಯ ಕಮ್ಬುನಾ,
ಲೋಕಸ್ಸ ನಯನಾಲೀ ಸೋ ತೋಸಸ್ಸುಸು ನಿಮುಜ್ಜಯಂ।
೬೮೬.
ಸಮ್ಪತ್ತೋ’ಲಙ್ಕತಂ ಲಙ್ಕಮಥಾಗು ಫಣಿನೋ ತದಾ,
ಪಟಿಮಗ್ಗಂ ಕರೋನ್ತಾ ತೇ ತತ್ಥ ತತ್ಥ ಮಹಾಮಹಂ।
೬೮೭.
ಉರಗಾನಮನ್ತರೇ ದೇವಾ ಬ್ರಹ್ಮಾಸುಂ ತೇಸಮನ್ತರೇ,
ಏವಂ ಸಮ್ಮಿಸ್ಸಕೋ ಲೋಕೇ ಬ್ರಹ್ಮಲೋಕಾ ಪಪೂರಯಿ।
೬೮೮.
ಯೇ ಪಸ್ಸನ್ತಿ ಜಿನಂ ತತ್ಥ ಸಸಿಸ್ಸಂ ಸಿರಿಯಾ ಜಲಂ,
ಸುಲದ್ಧಾ ತೇಹಿ ನೇತ್ತಾನಿ ತೇಸಮಕ್ಖೀನಿ ಲೋಚನಾ।
೬೮೯.
ಯೇ ಸುಣನ್ತಿ ತದಾ ಧಮ್ಮಂ ಧಮ್ಮಿಸ್ಸರ ಪಭಾವಿತಂ,
ಸುಲದ್ಧಾ ತೇಹಿ ಸೋತಾನಿ ತೇಸಂ ಸೋತಾನಿ ಸೋತಕಾ।
೬೯೦.
ಯೇ ಲಪನ್ತಿ ತದಾ ಬುದ್ಧಗುಣಞ್ಹಿ ಗುಣಭೂಸಣಾ,
ಸುಲದ್ಧಾ ತೇಹಿ ವೇ ಜಿವ್ಹಾ ತೇಸಂ ಜಿವ್ಹಾ ರಸಞ್ಞಕಾ
೬೯೧.
ಯೇ ವನ್ದನ್ತಿ ಜಿನಂ ಯನ್ತಂ ಸಸಙ್ಘಂ ಗಗನಙ್ಗನೇ,
ಸುಲದ್ಧಾ ತೇಹಿ ಹತ್ಥಾನಿ ತೇಸಂಯೇವ ಭುಜಾ ಭುಜಾ।
೬೯೨.
ತದಾ ತಥಾಗತಂ ದಿಸ್ವಾ ಯೇ ಸನ್ತುಟ್ಠಾ ತಥಾಗತಂ,
ತಥಾಗತಾನಂ ಸಬ್ಬೇಸಂ ಯೋ ತೋಸೋ ಹೋತು ಸಬ್ಬದಾ।
೬೯೩.
ಗತೋ ಕಲ್ಯಾಣೀಯಂ ನಾಥೋ ಮಹೇನ್ತೇವಂ ಸದೇವಕೇ,
ತೇಸಂ ಪೂಜಾವಿಧಾನಂ ಕೋ ಮುಖೇನೇಕೇನ ಭಾಸತಿ।
೬೯೪.
ತತೋ ಗಙ್ಗಾ ಮನುಞ್ಞಞ್ಹಿ ಸಮ್ಪತ್ತಂ ತಂ ಸಪುತ್ತಕಂ,
ತರಙ್ಗ ಮುದು ಬಾಹಾಹಿ ಗಹೇತ್ವಾ ಚರಣಮ್ಬುಜೇ।
೬೯೫.
ಪಾದೇ ಪಕ್ಖಾಲಯಿ ಸಮ್ಮಾ ಫೇಣ ಪುಪ್ಫುಪಹಾರಿಕಾ,
ತತೋ ತತೋತುಂ ಗಣ್ಹಿತ್ವಾ ಅಕಾ ದೇಹಸ್ಸನುಗ್ಗಹಂ।
೬೯೬.
ತತೋ ಸೋ ಯಾಚಿತೋ ಸತ್ಥಾ ನಾಗಸಙ್ಘೇಹಿ ವನ್ದಿಯ,
ಅಗಮಾ ಮಣ್ಡಪಂ ರಮ್ಮಂ ಮನೋನನ್ದನಮಾವಹಂ।
೬೯೭.
ಗನ್ತ್ವಾ ಮಣ್ಡಪ ಮಜ್ಝಮ್ಹಿ ಬುದ್ಧಾರಹ ಮಹಾಸನೇ,
ನಿಸೀದೋಭಾಸಯಂ ಆಸಾ ರವೀವ ಉದಯಾವಲೇ।
೬೯೮.
ತತೋ ಭಿಕ್ಖು ನಿಸೀದಿಂಸು ಪತ್ತ ಪತ್ತಾಸನೇ ತದಾ,
ಬಭಾಸ ಮಣ್ಡಪಂ’ತೀವ ಸರಂವ ಪದುಮಾಕುಲಂ।
೬೯೯.
ಜನನೇತ್ತಾಲಿನೋ’ಗಮ್ಮ ವಸೀ ಸೋಮ್ಮಮುಖಮ್ಬುಜೇ,
ಪತನ್ತಾ ಕುಸಲಾಮೋದೇ ಗಣ್ಹನ್ತಾ ತಿತ್ತಿನೋ ಗತಾ।
೭೦೦.
ತಥಾ ಸಭಿಕ್ಖುಕಾ ನಾಗಾ ಮುನಿನೋ ರೂಪಸಾಗರೇ,
ನೇತ್ತಿನ್ದ ಮಣಿನಾವಾಹಿ ಪಾರಂ ಗನ್ತುಂ ನ ತೇ ಪಭು।
೭೦೧.
ತತೋ ಸಸಙ್ಘಂ ಸುಗತಂ ಸಜನೋ ಮಣಿ ಅಕ್ಖಿಕೋ,
ಸಕ್ಕಚ್ಚಂ ಸಕಹತ್ಥೇಹಿ ಅನ್ನಪಾನೇನ ತಪ್ಪಯೀ।
೭೦೨.
ಅಥೋನೀತ ಪತ್ತಪಾಣಿಮ’ಚ್ಚಯಿತ್ವಾ ತಥಾಗತಂ,
ಭತ್ತಿನಿನ್ನೋ ನಿಮನ್ತೇಸಿ ದೇಸನತ್ಥಾನುಮೋದನಂ।
೭೦೩.
ತತೋ ಬ್ರಹ್ಮಸ್ಸರೋ ಸತ್ಥಾ ನಿಚ್ಛರಂ ಬ್ರಹ್ಮಘೋಸನಂ,
ವಿಞ್ಞಾಪೇನ್ತೋ ಜನೇ ಸಬ್ಬೇ ಸಕಸದ್ದೇನ ದೇಸನಂ।
೭೦೪.
ದೇಸೇಸ್ವೇವಂ ಜಿನೋ ಧಮ್ಮ’ಮನಿಲಾಸನಕಾದಿನಂ,
ಪೀತಿಪಾಮೋಜ್ಜ ಜನನಂ ನಿಬ್ಬಾಣಾಮತ’ಮಾವಹಂ।
೭೦೫.
ಭೋ ಭೋ ಸುಣಾಥ ಭುಜಗಾ ಭವಸಾಗರಮ್ಹಿ
ಪಾಪಾರಿನಕ್ಕಮಕರಾಕುಲ ದುಗ್ಗಮಮ್ಹಿ,
ಮಗ್ಗಾ ಜನಾ ಖಲು ಲಭನ್ತಿ ಕದಾ ಪತಿಟ್ಠಂ,
ಓಹಾಯ ಬುದ್ಧಥಿರಸಾರತರಿಂ ವಿಸಾಲಂ।
೭೦೬.
ಲದ್ಧಾನ ದುಲ್ಲಭತರಂ ಮುನಿಪಾತುಭೂತ
ಕಾಲಂ ಚಿರೇನ ಭುಜಗಾ ನ ಪಮಾದಯಿತ್ಥ,
ಜಾತೀ ಜರಾ ಮರಣ ದುಕ್ಖ ಪರಿದ್ದವಾ ಚ
ಸಂಸಾರಿಕಸ್ಸ ನ ತತೋಪ’ಗತಸ್ಸ ಹೋತಿ।
೭೦೭.
ತಾರುಞ್ಞಮಮ್ಬುಜಸಿರಿಂವ ಪರಿತ್ತಕಾಲಂ
ಪಾಣಂ ತುಸಾರಲವ’ಸಾರತರಂ ಜನಾನಂ,
ಭೋಗಂ ದಧಾತಿ ಜಲಧಿಮ್ಹಿ ತರಙ್ಗಭಙ್ಗಿಂ
ನಿಚ್ಚಂ ಮನೋ ದಹತಿ ಸೋಕಸಿಖೀಭಿ ನಾನಾ।
೭೦೮.
ಕತ್ವಾನ ರಾಗಮಿಸಯೋ’ಪಿ ಖಗಾ ದುಪಞ್ಞಾ
ಥಿರೂಪಿ ನಾರಿಕುಸುಮೇಸುಪಿ ರೂಪಗಿದ್ಧಾ,
ಪತ್ತಾ’ನಯಂ ಖಲು ಪುರೇ ಪರಿಹೀನ ಝಾನಾ
ರೂಪೇ ನ ರಜ್ಜಥ ತತೋ ಖಲು ಸಾಧುಪಞ್ಞಾ।
೭೦೯.
ಸದ್ದಾನುರಾಗಮನುಗೋಪಿ ಪುರೇ ಸಿಖಣ್ಡೀ
ಸುತ್ವಾನ ಮೋರಿ ಮಧುರಂ ಗಿರಮಞ್ಜಿತಙ್ಗೋ,
ವ್ಯಾಧಸ್ಸ ಹತ್ಥಮಗಮಾಸಿ ಭವೇಸು ತಸ್ಮಾ
ನತ್ಥೇವ ಸದ್ದಸಮದುಕ್ಖಕರಂ ಜನಾನಂ।
೭೧೦.
ಓಹಾಯ ನೇಕಕುಸುಮೇಸು ಪರಾಗರಾಗಂ
ಮತ್ತೇಭಕುಮ್ಭ ಮಗಮಾ ಮದಗನ್ಧಲುದ್ಧೋ,
ಭಿಙ್ಗೋ ಪಭಗ್ಗ ತನುಕೋ ಕರಿಕಣ್ಣತಾಲಾ
ನತ್ಥೇವ ಗನ್ಧಸದಿಸಂ ತಿಭವೇಸು ಪಾಸಂ।
೭೧೧.
ಗಮ್ಭೀರ ನೀರಧಿಭವೋ ಪವುರಾಸನೋ’ಪಿ
ಮಿಚ್ಛೋ ಗಿಲಿತ್ವ ಬಲಿಸಂ ರಸಗೇಧಹೇತು,
ಪಪ್ಪೋತಿ ದುಕ್ಖಮತುಲಂ ನ ರಸೇಸು ಸಾತ
ಮತ್ಥಿತಿ ಮನ್ತ್ವ ಪಜಭಾಥ ರಸೇಸು ಗೇಧಂ।
೭೧೨.
ಭೋ ಬುಹ್ಮಲೋಕಾ’ಗತ ಸುದ್ಧಸತ್ತೋ
ಬುದ್ಧತ್ತಮೇವ ನಿಯತೋ ಅಪಿ ಬೋಧಿಸತ್ತೋ,
ಥಿಸಙ್ಗಮಾಯ ಪರಿಹಾಯಿ ಸರಜ್ಜತೋ’ಪಿ
ತಸ್ಮಾ ಹಿ ಫಸ್ಸಸದಿಸೋ ಅನಯೋ ನವತ್ಥಿ।
೭೧೩.
ಭೇರಣ್ಡ ಪೇಲಕ ಕಪು’ದ್ದಕ ಹೇತುಹೀನ
ಸತ್ತಾಪಿ ದಾನರುಚಿ ದಾನಮಣಿಪ್ಪಭಾವಾ,
ಪತ್ತಾ’ಪವಗ್ಗ ವರಸಾರಪುರಂ ಭುಜಙ್ಗಾ
ಕೋ ನಪ್ಪದಾತಿ ಧನಿಕೋ ಸಿವ’ಮೇಸಮಾನೋ।
೭೧೪.
ಪಾಲೇತ್ವ ಸೀಲಮ’ಮಲಂ ವಿಸಕಣ್ಠಿಕಾಪಿ
ಇನ್ದಸ್ಸ ನನ್ದನವನೇ’ಸಿ ಪಿಯಾ ಮಹೇಸೀ,
ತಸ್ಮಾ ಪಸತ್ಥವಿಭವಂ ಯದಿ ಪತ್ಥಯವ್ಹೋ
ಪಾಲೇಥ ಸೀಲಮ’ಮಲಂ ಖಲು ಜಿವಿತಂ’ವ।
೭೧೫.
ಸಗ್ಗೋ ವಿಸಾಲ ರತನಾಲಯ ಸಮ್ಪಕಿಣ್ಣೋ
ಸಾನನ್ದ’ಮನ್ದ ಸುರಸುನ್ದರಿ ಸುನ್ದರೋ ಸೋ,
ಫುಲ್ಲಮ್ಬುಜಾಕರ ವನಾದಿಹಿ ನನ್ದನೀಯೋ
ತತ್ಥಾಮರಾ ವಿಯ’ಮರಾ’ವಿರತಂ ರಮನ್ತಿ।
೭೧೬.
ತಮ್ಹಾಪಿ ಭೋ ರುಚಿರ ಬ್ರಹ್ಮನಿಕಾಯ ಭುತಿ
ರಮ್ಮಾ ತತೋಪಿ ಮಹಿತಂ ಅಮತಂ ವರಿಟ್ಠಂ,
ತಸ್ಮಾತ್ತಕಾಮ ನಿರತಾ ಜನತಾ ಸಪಞ್ಞಾ
ತಣ್ಹಕ್ಖಯಾಯ ಸತತಂ ವೀರಿಯಂ ಕರೋಥ।
೭೧೭.
ಏವಂ ಸದ್ಧಮ್ಮಮಗ್ಗಂ ವರಮತಿ ಸುಗತೋ ದೇಸಯಿ ಪನ್ನಗಾನಂ
ಸುತ್ವಾ ತೇ ಸಮ್ಪಹಟ್ಠಾ ಮಹಮಹಮಕರುಂ ನಿಜ್ಜರಾದೀಹಿ ಸದ್ಧಿಂ,
ತೇಸಂ ವೇ ದೇಸನಾಯಂ ಸುರವಿಟಪಿ ಸಮಾ ಸಾತ್ಥಿಕಾ ತತ್ಥ ಜಾತಾ
ಸೋ ನಾಥೋ ತಞ್ಚ ಧಮ್ಮಂ ಭಗವತಿ ತನಯಾ ತೇ ಚ ವೋ ಪಾಲಯನ್ತು
ಕಲ್ಯಾಣಿ ದೇಸಾಗಮನಂ।
೭೧೮.
ನಗಾಧಿರಾಜೇ ಸುಮನಾಭಿಧಾನೇ
ವಸಂ ಸುಮೇಧೋ ಸುಮನಾಭಿಧಾನೋ,
ದೇವೋ ತದಾ’ಗಮ್ಮ ಸಪಾರಿಸಜ್ಜೋ
ಕಲ್ಯಾಣಿಯಂ ತತ್ಥ ಫಣೀಹಿ ಸದ್ಧಿಂ।
೭೧೯.
ದತ್ವಾ’ಪವಗ್ಗಸ್ಸ ನಿದಾನದಾನಂ
ಸುತ್ವಾನ ಧಮ್ಮಂ ಸುತಿಸೀತಿಭುತಂ,
ಪಹಟ್ಠಚಿತ್ತೋ ಉಪಗಮ್ಮ ಬುದ್ಧಂ
ನತ್ವಾಹ ಏವಂ ಕತಪಞ್ಜಲೀಕೋ।
೭೨೦.
ನ ವೇ ಫಣೀನಂ ನಪಿ ಮಾನುಸಾನಂ
ನಾನಿಮ್ಮಿಸಾನಂ ನ ಪಿತಾಮಹಾನಂ,
ಹಿತತ್ಥ ಮೇವಾಖಿಲ ಲೋಕನಾಥಾ
ಜಾಯನ್ತೀ ಲೋಕೇ ಕರುಣಾಗುಣಗ್ಗಾ।
೭೨೧.
ಅನ್ತೋಗಧಾ ನೂನ ಮಯಮ್ಪಿ ತುಯ್ಹಂ
ದಯಾಯ ತಸ್ಮಾ ಫಣೀನಂ ವಿಮೇಸಂ,
ಕರೋಹಿ ಮಯ್ಹಂ ಭವನಮ್ಹಿ ಧೀರ
ಪಾದಂ’ಸುನಾ’ತೀವ ಪವಿತ್ತರೂಪಂ।
೭೨೨.
ಯೋ’ಯಂ ನಗೋ ದಿಸ್ಸತಿ’ತೋ ಪುರತ್ಥ
ಭುಮಙ್ಗನಾ ಮೋಲಿಸಿರಿಂ ವಹನ್ತೋ,
ಸಮನ್ತಕೂಟೋತಿ ಸಮನ್ತಚಕ್ಖು
ಜಾನಾತಿ ಲೋಕೋ ವಸತಿಂ ಮಮೇತಂ।
೭೨೩.
ಯೋ ನೀಲ ನಾನಾ ವನರಾಜಿ ರಾಜಿತೋ
ಆಸಾರ ಧಾರಾ ಗಿರಿ ನಿಜ್ಝರಾಕುಲೋ,
ಆಪೀತ ನೀಲಾರುಣ ಪಲ್ಲವಾವಲೀ
ಜಿಮೂತಕೂಟೋ ವಿಯ ಭಾತಿ ಉಗ್ಗತೋ।
೭೨೪.
ಯೋ ಸಿನ್ಧುವಾರಿಂ ಉರಸಾ ಪಭೇಜ್ಜ
ಆಗಮ್ಮ ತೇ ಪಾದಪಣಾಮ ಹೇತು,
ವಿಜ್ಜೋತಮಾನೋ ವಿಯಚಕ್ಕಪಾಣಿ
ಮಹಾತಿ ತುಙ್ಗಗ್ಗ ಧರಾಧರಿನ್ದೋ।
೭೨೫.
ಗಙ್ಗಾವಧೂ ಕುಟಕಿರೀಟಧಾರೀ
ಸಾಮನ್ತ ಸೇಲಿನ್ದ ಚಮೂಪತೀಕೋ,
ಯೋ’ಯಂ ಧರಾಧಾರ ಮಹಾಮಹೀಪೋ
ರ ರಾಜ ಲಙ್ಕಾ ನಗರಙ್ಗಣಮ್ಹಿ।
೭೨೬.
ಪಾರೋಹ ದನ್ತೋ ಚಿತಕೂಟ ಕುಮ್ಭೋ
ಅನೇಕ ಸೋಣ್ಡಿಕ್ಖ ಸವನ್ತಿ ಹತ್ಥೋ,
ಯೋ ನಿಜ್ಝರಾಸಾರ ಮದಪ್ಪವಾಹೋ
ಗಜೋರಿವಾ’ಭಾತಿ ಸುರಾಧಿಪಸ್ಸ।
೭೨೭.
ಸಮ್ಫೂಲ್ಲ ಪುಪ್ಫತ್ಥಬಕಾ’ನಪತ್ತಾ
ಸತ್ಧತ್ತ ರತ್ತಙ್ಕುರಮೋಲಿಮಾಲಾ,
ಕನ್ತಾಲತಾ’ಲಿಙ್ಗಿತ ಖನ್ಧದೇಹಾ
ತಿಟ್ಠನ್ತಿ ಭೂಪಾವ ಯಹಿಂ ಕುಜಿನ್ದಾ।
೭೨೮.
ಸಿದ್ಧಙ್ಗನಾ ರತ್ತಪದಮ್ಬುಜಾಲೀ
ಸಮ್ಹಿನ್ನ ಹತ್ಥಾಭರಣಾಲಿ ಯುತ್ತಾ,
ಕೇಕೀಕಲಾಪುಪ್ಪಲ ಮಾಲಮಾಲೀ
ಸಿಲಾತಲಾಕಞ್ಜ ನಿಭನ್ತಿ ಯತ್ಥ।
೭೨೯.
ಮಙ್ಗುರ ಪಾಠೀನ ಸವಙ್ಕ ಸಿಙ್ಗು
ರೋಹಿಚ್ಚ ಮುಞ್ಜಾ?ಮರ ಪಾವುಸೇಹಿ,
ಕುಲೀರನಕ್ಕಾದ’ನಿಮೇಸಕೇಹಿ
ನಿಕೀಳೀತಂ ದದ್ದರ ರತ್ತಪೇಹಿ।
೭೩೦.
ನಿಚ್ಚಞ್ಹಿ ಸಂರಾವ ವಿರಾಚಿತಾನಂ
ಬಲಾಕ ಕಾದಮ್ಬ ಕದಮ್ಬಕಾನಂ,
ಆಪಾನಸಾಲಾ ವಿಯ ಸಾರಸಾನಂ
ಹಂಸಾಲಿನಂ ಮಙ್ಗಲ ವಾಸಭೂತಂ।
೭೩೧.
ನಿರನ್ತರಾಮೋದ ಮುದಾವಗೇಹಿ
ಸುಫುಲ್ಲ ಕೋಕಾಸ’ರವಿನ್ದಕೇಹಿ,
ಸೋಗನ್ಧಿ’ಕಿನ್ದೀವರ ಕೇರವೇಹಿ
ಕಿಞ್ಜಕ್ಖ ಛನ್ನಣ್ಣತಲೇಹಿ ಚಿತ್ತಂ।
೭೩೨.
ಸೀತಚ್ಛ ಸಾತೋದಕ ಸಮ್ಪಪುಣ್ಣ
ಸರೋಜಿನೀ ಲಙ್ಕತ ಭುಮಿಭಾಗೋ,
ಯೋ’ಯಂ ಪುರೇ ಭಾತಿ ಮನುಞ್ಞರೂಪೋ
ಸಮನ್ತಕೂಟೋ ಸ ಸಮನ್ತಕೂಟೋ।
೭೩೩.
ದಲಿತ ವಿಪಿನಸಣ್ಡಾ ಯತ್ಥ ಸೇಲೇ ಸಮನ್ತಾ
ಸಮುಪಗತ ಜನಾನಂ ಚಿತ್ತಮಾಮೋದಯನ್ತಿ,
ಮಧುಕ ವಟ ಕರೇರಿ ಬೋಧಿ ಜಮ್ಬೀರ ಭಲ್ಲಿ
ಖದಿರ’ಭಯ ಕದಮ್ಬಾ ಫುಲ್ಲ ಸೇಲ್ಲೂ ಪಲಾಸಾ।
೭೩೪.
ಪಣಸ’ಮತ ಪಿಲಕ್ಖಾ ಕಣ್ಹವಣ್ಟ’ಕ್ಖ ಚಿಞ್ಚಾ
ಲಬುಜ ಬದರಿ ನೀಪಾ ಫನ್ದನಿ’ನ್ದೀವರಾವ
ಮಕುಲ’ಸನ ಪಿಯಾಲಾ ಗದ್ದಭಣ್ಡ’ಜ್ಜುನಾ ಚ
ಕಮುಕ ಸಲ್ಲ ತಿನ್ದು’ದುಮ್ಬರಮ್ಬಸ್ಸ’ಕಣ್ಣಾ।
೭೩೫.
ಪುನ್ನಾಗ ಚಮ್ಪಕ ದುಮುಪ್ಪಲ ದಾಡಿಮಾ ಚ
ಖಜ್ಜೂರಿ ತಾಲ ಗಿರಿಮಲ್ಲಿಕ’ಸೋಕ ತಾಲಾ,
ಹಿನ್ತಾಲ ನಾಗ ನಿವುಲಾ ಯುಗಪತ್ತ’ರಿಟ್ಠ
ಸೇತಮ್ಬ ಏರವತಕಾಪಿ ಚ ಕೇತಕಾ ಚ
೭೩೬.
ಸಮಫುಲ್ಲಭಣ್ಡಿ ಸುಮನ’ಜ್ಜಕ ಯೂಥಿಕಾ ಚ
ವಾಸನ್ತಿ ಚಿತ್ತಕ ಜಪಾ ರವಿಮಾಲತೀ ಚ,
ಕುನ್ದಸ್ಸ’ಮಾರಕ ಕುರಣ್ಡಕ ಬೀಜಪೂರ
ಸೇಫಾಲಿಕಾ ಚ ತಿಣಸೂಲ ಸಮೀರಣಾ ಚ।
೭೩೭.
ವೋಚು’ಚ್ಜು ಕೀಚಕ ಹಲಿದ್ದಿ ವಿಳಙ್ಗಿ ಬಿಮ್ಬಿ
ನೀಲೀ ವಚಾ’ತಿವಿಸಾಲಾಬು ಚ ನಾಗವಲ್ಲೀ,
ವಲ್ಲೀಹ ಸಾರದ’ಪರಾಜಿತವಾರು’ಸೀರಾ
ಫಲಾದಿ ನೇಕ ವನರಾಜಿ ವಿರಾಜಿತೋ ಸೋ।
೭೩೮.
ತಿಟ್ಠನ್ತಿ ಕೇಚಿ ತರವೋ ಸುರಭಿಂ ಕಿರನ್ತಾ
ತತ್ಥೇವ ಕೇಚಿ ಫಲಿತಾ ಮಧುರಪ್ಫಲಾನಿ,
ಅನ್ದೋಲಿತಾ ಫಲಿತಪಲ್ಲವಿತಾ ಲತಾಯೋ
ಸನ್ಧಾರಯಂ ವಿಟಪ ಜತ್ತುಸು ಭನ್ತಿ ಕೇಚಿ।
೭೩೯.
ಸಾಮನ್ತಗೇ ಜನಗಣೇ ಸತತಂ ದುಮಿನ್ದಾ
ಸಮ್ಪೀಣಯನ್ತಿ ದಲಿತಾ ಫಲಿನೋ ಚ ಯಸ್ಮಿಂ,
ತೇ ಅವ್ಹಯನ್ತಿ ವಿಯ ಲೋಚನ ಗೋಚರೇಹಿ
ವಾತೇ’ರಿತೇಹಿ ತರುಣಾರುಣ ಪಲ್ಲವೇಹಿ।
೭೪೦.
ತಸ್ಮಿಂ ವನೇ ವನಸುರಾ ನಿಜವಸುನ್ದರೀಹಿ
ರಮ್ಮೇ ಸಿಲಾತಲದಹೇ ಸಿಕತಾತಲೇ ಚ,
ನಚ್ಚನ್ತಿ ತನ್ತಿ ತುರಿಯಾನಿ ಚ ವಾದಯನ್ತಿ
ಗಾಯನ್ತಿ ಮಾಲಭರಿನೋ ಸತತಂ ಪತೀತಾ।
೭೪೧.
ಸಿದ್ಧಾ ಚ ಸಿದ್ಧವನಿತಾ ಹಿ ತಹಿಂ ತಹಿಂ ತೇ
ದಿಬ್ಬನ್ತಿ ಪುಪ್ಫಫಲ ಪತ್ತರಸಾಹಿನನ್ದಿ,
ಅಚ್ಛನ್ತಿ ತತ್ಥ ಗಿರಿಪಾದಪ ರಾಮಣೇಯ್ಯೇ
ಯೋಗೇಹಿ ಸಙ್ಗತ ಮನಾ ಬಹಿತಾಪಸಾಪಿ।
೭೪೨.
ತಸ್ಮಿಂ ವನೇ ಹರಿಣ ರೋಹಿತ ಪುಣ್ಡರೀಕ
ಗೋಕಣ್ಣ ಸಲ್ಲ ಸಸ ಜಮ್ಬುಕ ಸೂಕರಾ ಚ,
ಸಾಖಾಮಿಗೇ’ಣಿವಗ ಬಬ್ಬು ರುರೂ ಕುರುಙ್ಗ
ಗೋಧಾ’ಖು ಪಮ್ಪಕ ಕಪೀ ಗವಯಾ ಚ’ನೇಕಾ।
೭೪೩.
ತೇ ವಗ್ಗ ವಗ್ಗ ಚರಿನೋ ಹಯಮಾರಕಾದೀ
ನಾನಾ ಚತುಪ್ಪದಗಣಾ ಮುದಿತಾ ವಸನ್ತಿ,
ಪಕ್ಖೀಪಿ ಕೋಸಿಯ ಕಪೋತಕ ನೀಲಗೀವ
ಧಙ್ಕಾ’ಟ ಲಾಪ ಪರಪುಟ್ಠ ಮಧುಬ್ಬತಾವ।
೭೪೪.
ನಿಜ್ಜಿವ್ಹ ದಿನ್ದಿಹ ಚಕೋರಕ ಸಾಳಿಕಾ ಚ
ಚಕ್ಕವ್ಹ ಕೀರ ಕುರರಾ ಕುಲಲಾ ಚ ಕಙ್ಕಾ,
ಚಿತ್ರಚ್ಛದಾ ಮಧುರ ಕೂಜಕ ನೇಕಪಕ್ಖೀ
ಸಙ್ಗಮ್ಮ ಯತ್ಥ ನಿವಸನ್ತಿ ಮನುಞ್ಞರೂಪಾ।
೭೪೫.
ತೇಸಂ ವನನ್ತಮಥ ನಾಟಕಮಣ್ಡಲಾ’ಚ
ಗೀತಾಲಯಂ ವಿಯ ಅಹೋಸಿ ಚ ಗಾಯಕಾನಂ,
ಆಪಾನಭುಮಿ ಸದಿಸಂ ಮಿಗಪಕ್ಖಿಕಾನಂ
ನಿಚ್ಚುಸ್ಸವಂ ರತಿಕರಂ ನಯನಾಭಿರಾಮಂ।
೭೪೬.
ಏವಂ ವಿಧೋ ವಿಪಿನರಾಜಿ ವಿರಾಜಿತೇಹಿ
ಕೂಟೇಹಿ ನೇಕಸುರ ಸುನ್ದರಿ ಮಣ್ಡಿತೇಹಿ,
ಅತ್ಯುಚ್ಚ ನೀಲಸಿಖಿಗೀವ ಸಮಾನ ವಣ್ಣೋ
ಏಸೋ ಸಮನ್ತಗಿರಿ ಮೇ ವಸತೀ ಮುನಿನ್ದ।
೭೪೭.
ಏವಂ ಪತೀತ ಮನಸೋ ಸುಮನಾಭಿಧಾನೋ
ವತ್ವಾನ ನತ್ವಮಸಮಂ ಗಮನೋಪಯುತ್ತಂ,
ಕಾಸಾಥ ಸೋಪಿ ಮುನಿ ತಸ್ಸ ವಚಂ ಪಟಿಚ್ಚ
ಸಬ್ಭಿಕ್ಖು ನಿಕ್ಖಮಿ ಜಿನೋ ಗಗನಾಯನಮ್ಹಿ।
೭೪೮.
ನಿಚ್ಚೇತನಾಪಿ ಗಿರಿಪಾದಪ ಆದಯೋಪಿ
ನಾಗಾ ಸುಪಣ್ಣ ಮಿಗ ಪಕ್ಖಿಕ ಹೇತುಕಾಪಿ,
ವಿಜ್ಜಾಧರಾಮರ’ಸುರಾ ಚತುರಾಣನಾಪಿ
ಸಙ್ಗಮ್ಮ’ಕಂಸು ಸುಮನಾ ಮಹಮಬ್ಭುತಂ ತೇ।
೭೪೯.
ಮುನಿನ್ದೇ ಪಯನ್ತೇ ಸಮಿದ್ಧಂ ತಿಲೋಕಂ
ಗಿರಿನ್ದಾಭಿನನ್ದಾ ದುಮಿನ್ದಾ ಪಬುದ್ಧಾ,
ಮಿಗಿನ್ದಾ ಸುತುಟ್ಠಾ ಖಗಿನ್ದಾ ಸುಘುಟ್ಠಾ
ಪವುಟ್ಠೋ ಮಹಿನ್ದೋ ಪಣಟ್ಠೋ ನಿದಾಘೋ।
೭೫೦.
ಗಚ್ಛನ್ತೇ ಗಗನಾಯನೇನ ಸುಗತೇ ಭಾನು’ಸಿ ಸನ್ತೋ ತದಾ
ವಾರೇಸುಂ ಸೂರಿಯಾತಪಞ್ಚ ಜಲದಾ ಸಿಞ್ಜಿಂಸು ಭುಮ್ಯಾ ಜಲಂ,
ಮನ್ದಾಮನ್ದ ಸುಗನ್ಧ ಮುದ್ಧ ಪವನೋ ಪಾಪೇತಿ ಸಿತಂ ಸುಖಂ,
ದೇವಾದಿ ಧಜ ಛತ್ತ ಚಾಮರಕರಾ ಪೂಜೇನ್ತಿ ಮಾನೇನ್ತಿ ಚ।
೭೫೧.
ಸನ್ನೀರ ಹಿನ್ತಾಲ’ಗ ಸಿನ್ದಿ ಪೂಗ
ತಾಲಮ್ಬಸಾಲಾದಿ ಮಹೀರುಹಿತ್ದಾ,
ತಿಟ್ಠನ್ತಿ ತೇ ಚಾಮರಹತ್ಥಕಾ’ವ
ಪುಪ್ಫೇಹಿ ಛನ್ನೋ ಗಗನಙ್ಗನೋಪಿ।
೭೫೨.
ಅನೇನ ವಿಧಿನಾ ಜಗದೇಕ ನಾಥೋ
ಪವತ್ತಮಾನೇಸು ಮಹಾಮಹೇಸು,
ದಿಸಞ್ಚ ವಿದಿಸಂ ಪರಿಪೂರಯನ್ತೋ
ಜಬ್ಬಣ್ಣರಂಸೀಹಿ ಅಗಾ ನಗಿನ್ದಂ।
೭೫೩.
ತಸ್ಮಿಂ ಸಮನ್ತನಗಮುದ್ಧನಿ ಲೋಕನಾಥೋ
ಛಬ್ಬಣ್ಣರಂಸಿ ನಿಕರಂ ದಿಸಿ ಪತ್ಥರನ್ತೋ,
ಭಿಕ್ಖೂಹಿ ಸೋ ಪರಿವುತೋ ಪರಸಾಗರನ್ತಂ
ಓಲೋಕಯಂ ಠಿತಿಮಕಾಸಿ ಅಅನೋಮವಣ್ಣೋ।
೭೫೪.
ಲಙ್ಕಾವಧೂ ಸುಮನಕೂಟ ಕಿರೀಟ ಕೂಟಂ
ಸಜ್ಜೇಸಿ’ನಗ್ಘ ಜನ ರಾಜ ಮಣೀ ಮಹನ್ತೋ,
ಇಚ್ಛತ್ಥದಂ ಸಿವದಮಪ್ಪಟಿಮಂ ತಿಲೋಕೇ
ತಂ’ದಾನಿ ಭೋ ಭಜಥ ಸೇವಥ ಸಬ್ಬಕಾಲಂ।
೭೫೫.
ಕಾಸುಂ ತದಾ ಸುರವರಾ ಸುರಸುನ್ದರೀಹಿ
ಲಙ್ಕಾಯ ಸೇಲಸಿಖರೇಸು ಮಹಾಸಮಜ್ಜಂ,
ವಜ್ಜಿಂಸು ಭೇರಿ ವಿಕತೀ ಸಯಮೇವ ಸಬ್ಬಾ
ಭಸ್ಸಿಂಸು ದಿಬ್ಬಕುಸುಮಾಭರಣಾ ನಭಮ್ಹಾ।
೭೫೬.
ಲಙ್ಕಮ್ಬರಂ ನಿಖಿಲಮಾಸಿ ಚ ಛತ್ತಛತ್ತಂ
ನಾನಾ ವಿರಾಗ ಧಜ ಕೇತು ಸಮಾಕುಲಞ್ಚ,
ನಾನಾಸುಗನ್ಧ ಕುಸುಮಾದಿ ದಿಸನ್ತರಾಲಂ,
ನಾನಗ್ಘಿಕಾವಲಿ ವಿರಾಜಿತ ಮನ್ತಳಿಕ್ಖಂ।
೭೫೭.
ತಸ್ಮಿಂ ದಿನೇ’ಸಿ ರತನಂ ಮಣಿತೋರಣೇಹಿ
ದೀಪಾಲಿ ಪುಣ್ಣಘಟಪನ್ತೀಹಿ ದಸ್ಸನೀಯಂ,
ಸಮ್ಬುದ್ಧ ದೇಹಪರಿತೋಗತ ಛಪ್ಪಭಾಹಿ
ರತ್ತಂ ನಭಾವನಿ ಚರಾಚರ ಸಬ್ಬದಬ್ಬಂ।
೭೫೮.
ಮಾಲಾವತಂಸ ಸಮಕಾ ಗಿರಯೋ ಸಮನ್ತಾ
ಹುತ್ವಾ ನಮನ್ತಿ ಚ ಭಮನ್ತಿ ಸಚೇತನಾ’ವ,
ಸಬ್ಬೇಪಿ ತತ್ಥ ತರವೋಚ ಲತಾದಯೋ ಚ
ನಚ್ಚನ್ತಿ ದಿಬ್ಬನಟಕಾ ವಿಯ ಓನತಗ್ಗಾ।
೭೫೯.
ಏವಂ ತದಾ ಮಹತ ವಿಮ್ಹಯ ಪಾಟಿಹೇರೇ
ಬುದ್ಧಾನುಭಾವ ಜನಿತೇ ಇಧ ವತ್ತಮಾನೇ,
ತತ್ವಾನ ಧೀರಚರಣಂ ಸಮನೋ ಸುಧಾಸೀ
ಏವಂ ವದೀ ಪರಮ ಪಿತಿಮನೋ ಉದಗ್ಗೋ।
೭೬೦.
ಯೇ ತೇ ಮುದು ಕೋಮಲ ರತ್ತಪಾದಾ
ಸುರತ್ತ ಫುಲ್ಲಮ್ಬುರುಹೋಪಮಾನಾ,
ವಟ್ಟಾನುಪುಬ್ಬಾಯತ ಅಙ್ಗುಲಿಕಾ
ಸುತಮ್ಬತುಙ್ಗಗ್ಗ ನಖಾವಲೀಕಾ।
೭೬೧.
ಸುವಣ್ಣಕುಮ್ಮು’ನ್ನತ ಪಾದಪಿಟ್ಠಿ
ನಿಗುಳ್ಹ ಗೋಪ್ಫಾಯತ ಪಣ್ಹಿಭಾಗಾ
ಸಮಚ್ಛಮಾಯಂ ಸಕಲಂ ಪತಿಟ್ಠಿತಾ
ನ ಲಿಮ್ಪತೇ ಸುಚ್ಛವಿತಾ ರಜಾದಿ।
೭೬೨.
ಸಮ್ಮತ್ತ ಹತ್ಥೋಸಭ ಹಂಸ ಸೀಹ
ಸಮಾನ ಲೀಲಾಯ ಯಹಿಂ ಪಯಾತಿ,
ನಿನ್ನುನ್ನತಾ ಭೇರಿತಲಾ’ವ ಭುಮಿ
ಹೋತಾಥ ಪುಪ್ಫಾದಿ ಸುಮಣ್ಡಿತಾ ಚ।
೭೬೩.
ಅಪೇನ್ತಿ ಮಗ್ಗಾ ಸಯಮೇವ ಖಾಣು
ಸಕಣ್ಟಮೂಲಾ ಕಠಲಾ ಚ ಸಬ್ಬೇ,
ಗಮ್ಭೀರ ನೀರಾಪಗ ಪಙ್ಕದುಗ್ಗಾ
ಹಿತ್ವಾ ಸಭಾವಂ ರಮಣೀಯಮೇನ್ತಿ।
೭೬೪.
ವಜನ್ತಿ ಭುಮಿಂ ಗಿರಯೋ ಪುರತ್ಥ
ಪಸಾರಿತೇ ಪಾದವರೇ ಜಿನಸ್ಸ,
ನಿಬ್ಬಾತಿ ಅಗ್ಗೀ ನರಕೋದರೇಪಿ
ಗಣ್ಹನ್ತಿ ಪಾದೇ ಪದುಮಾದಯೋ ಚ।
೭೬೫.
ಇದಞ್ಹಿ ತೇ ಪಾದತಲೇ ಯತೀಸ
ಸನಾಭಿ ನೇಮಿ ಘಟಿಕಾವಲೀಹಿ,
ಸುಸಣ್ಠಿತಂ ಚಾ’ರಸಹಸ್ಸವನ್ತಂ
ಸನ್ದಿಸ್ಸತೇ ಚಕ್ಕವರಂ ಮಹನ್ತಂ।
೭೬೬.
ತಮೇವ ಚಕ್ಕಂ ಪರಿವಾರಯಿತ್ವಾ
ಸಿರಿವಚ್ಛ ಸೋವತ್ಥಿ’ವತಂಸಕಾ ಚ,
ಪಾಸಾದ ಭದ್ರಾಸನ ಪುಣ್ಣಪಾತಿ
ಸಿತಾತಪತ್ತಾಸಿ ಮಯೂರಹತ್ಥಾ।
೭೬೭.
ನೀಲಾದಿಭೇದಾ ಕಮಲುಪ್ಪಲಾ ಚ
ಸಮೇರು ಸತ್ತದ್ದಿ ಮಹಾಸಮುದ್ದಾ,
ಸತ್ತಾಪಗಾ ಸತ್ತ ಮಹಾಸರಾ ಚ
ಹಿಮಾಲಯೋ ಚಕ್ಕವಾಳದ್ದಿಕೋ ಚ।
೭೬೮.
ಚನ್ದಕ್ಕತಾರಾ ಚ ಛದೇವಲೋಕಾ
ಪಿತಾಮಹಾವಾಸ ಮನುಸ್ಸಲೋಕಂ,
ಸುವಣ್ಣ ನಾವಾ ಸಿವಿಕಾ ಚ ಸಙ್ಖಂ
ಕೇಲಾಸಸೇಲಂ ಧಜತೋರಣಾ ಚ।
೭೬೯.
ಚಿನ್ತಾಮಣುಣ್ಹೀಸ ಸವಚ್ಛ ಧೇನೂ
ಮೀನದ್ವಯಂ ಚಕ್ಕವತ್ತಿ ಸಸೇನೋ,
ಸೀಹ’ಸ್ಸ ಮಾತಙ್ಗ ವಿಯಗ್ಘರಾಜಾ
ಹಂಸೋಸಭೋ ಕಿಮ್ಪುರಿಸೋ ಮಯೂರೋ।
೭೭೦.
ಕೋಞ್ಚಾ ಚ ಏರಾವಣ ಹತ್ಥಿರಾಜಾ
ಸಚಕ್ಕವಾಕಾ ಮಕರಾದಯೋ ಚ,
ನಾನಾ ಮಹಾಮಙ್ಗಲ ಲಕ್ಖಣಾ ತೇ
ವಿರೋಚಮಾನಾ ವಿಲಸನ್ತಿ ನಿಚ್ಚಂ।
೭೭೧.
ಜಾತಕ್ಖಣೇ ಯಸ್ಸ ಮಹಿಂ ಪಭೇಜ್ಜ
ವಿಸಾಲ ಸತ್ತುದ್ದಯ ಪಙ್ಕಜಾನಿ,
ಪಟಿಗ್ಗಹೇಸುಂ ಚರಣಾನಿ ಯಾನಿ
ತೇ ತಾನಿಮಾನಚ್ಛರಿಯಾನಿ ಲೋಕೇ।
೭೭೨.
ವನ್ದಾಪನತ್ಥಾಯು’ಪನೀತಕಾಲೇ
ಪಿತೂಹಿ ತೇ ದೇವಲ ತಾಪಸಿನ್ದಂ,
ಪಾದಾನಿ ಗನ್ತ್ವಾನ ಜಟಾಸು ತಸ್ಸ
ಆಸುಂ ತವೇ’ತಙ್ಘಿಯುಗಂ ಅಹೋ ಭೋ।
೭೭೩.
ಸುದ್ಧೋದನವ್ಹಸ್ಸ ನರಾಧಿಪಸ್ಸ
ಸನ್ತೋಸ ತೋಯೇಹಿ ಪಪೂರಿತಸ್ಸ,
ಸಿರೋ ವಿಸುದ್ಧಮ್ಬು ರುಹಾಕರಸ್ಸ
ಸರೋರು ಹಾಸುಂ ಚರಣಾನಿ ತುಯ್ಹಂ।
೭೭೪.
ಯೇ ಚಙ್ಕಮೇ ಚಙ್ಕಮಣಾವಸಾನೇ
ಓನಮ್ಮ ಮೇರೂದಯ ಪಬ್ಬನಿಣ್ದಾ,
ಪಟಿಗ್ಗಹೇಸುಂ ಚರಣಾನಿ ಯಾನಿ
ತೇ ತಾನಿಮಾ’ನಚ್ಛರಿಯಾನಿ ಲೋಕೇ।
೭೭೫.
ಯಂ ವನ್ದಮಾನೋ ತಿದಿವಾಧಿಪೋ ಸೋ
ಯಸ್ಸಾನುಭಾವೇನ ಗತಾಯುಕೋಪಿ,
ಸಕಿಯಠಾನೇ’ಸಿನಪುನಾಪಿ ತೇ’ವಂ
ಪಾದಮ್ಬುಜಂ ಧೀರ!ಮಹಾನುಭಾವಂ।
೭೭೬.
ದೇಹೀನಮಗ್ಗೋಪಿ ನಿಸಾಕರಾರಿ
ಮಾನುನ್ನತೋ ಸೋ ಸಯಿತಸ್ಸ ತುಯ್ಹಂ,
ಪಾದಸ್ಸ ಅನ್ತಮ್ಪಿ ನ ಸಕ್ಖಿ ದಟ್ಠುಂ
ಅಚ್ಛೇರ ರೂಪಂ ಇದಮಙ್ಘಿಕಞ್ಜಂ।
೭೭೭.
ಗಙ್ಗಾಯ ಗಙ್ಗಾಪತಿ ಸನ್ನಿಧಾನೇ
ತೀರೇ ತದಾ ನಮ್ಮದ ಜಿಮ್ಹಗಸ್ಸ,
ಪಾದಸ್ಸ ಲಞ್ಛಂ ಅಕರೀ ಮುನಿನ್ದ
ಮಯ್ಹಂ’ಪಿ ಹೋತಂ ಕರುಣಾ ತವೇಸಾ।
೭೭೮.
ಆರಾಧಿತೋ ಸಚ್ಚಕ ತಾಪಸೇನ
ಅಕಾ ತುವಂ ಸಚ್ಚಕ ಬದ್ಧಸೇಲೇ,
ಪಾದಸ್ಸ ಲಞ್ಛಂ ಜಗತೋ ಹಿತಾಯ
ಮಯ್ಹಮ್ಪಿ ಹೋತಂ ತಮನುಗ್ಗಹನ್ತೇ।
೭೭೯.
ಸುತ್ವಾನ ನಾಥೋ ಗಿರಮೇತಮಸ್ಸ
ಪಸ್ಸಂ ಮಹಾಭುತಿ’ಮನಾಗತೇಸು,
ಲೋಕಸ್ಸ ಲೋಕೇಹಿ ಮಹೀಯ ಮಾನೋ
ಅಕಾಸಿ ವಾಮೇನ ಪದೇನ ಲಞ್ಛಂ।
೭೮೦.
ಸಮ್ಬೋಧಿತೋ ಅಟ್ಠಮ ಸಾರದಸ್ಮಿಂ
ವೇಸಾಖಮಾಸೇ ಮುಣಿ ಪುಣ್ಣಮಾಯಂ,
ಪಾದಸ್ಸ’ಭಿಞ್ಞಾಣಮಕಾ’ಪರಣ್ಹೇ
ಸದೇವಕೇ ಸಸ್ಸಮಣೇ ಮಹೇನ್ತೇ।
೭೮೧.
ಪತಙಕ್ಗಿಕಾ ಸಿತ್ಥಕ ಮತ್ಥಕಮ್ಹಿ
ಯಥಙ್ಕಿತಾ ಖತ್ತಿಯ ಮುದ್ದಿಕಾಯ,
ಆಸೇವ’ಮೇವಂ ಜಿನಪಾದಲಞ್ಛಂ
ಸಮನ್ತಕೂಟಮ್ಹಿ ನಮಸ್ಸನೀಯಂ।
೭೮೨.
ಅಕಾಲಮೇಘೋ ಚ ತತೋ ಪವಸ್ಸಿ
ವಸ್ಸಿಂಸು ನಾನಾರತನಾನಿ ಖಮ್ಹಾ,
ತಥಾ ಪರಿತೋ ಕುಸುಮಮ್ಬರಾನಿ
ಸುವಣ್ಣಚುಣ್ಣಾನಿ ಜಿನೇಕವಣ್ಣಾ।
೭೮೩.
ತತೋ’ಪಗನ್ತ್ವಾ ಸುಗತೇಭಗಾಮೀ
ತಸ್ಮಿಂ ನಿತಮ್ಬೇ ಗಿರಿಗಬ್ಭರಾಯಂ,
ದಿವಾವಿಹಾರಾಯ ನಿಸೀದಿ ಯತ್ಥ
ಸುಪಾಕಟಂ ತಂ ಭಗವಾಗುಹಾ’ತಿ।
೭೮೪.
ತತೋರಹನ್ತಾ ಸುಗತೋರಸಾ ತೇ
ಗನ್ಧಾದಿನಾ ಸಾಧು ಮಹೇತ್ವ ಸಬ್ಬೇ,
ವನ್ದಿತ್ವ ಕತ್ವಾನ ಪದಕ್ಖಿಣನ್ತಂ
ತಹಂ ತಹಂ’ಕಂಸು ದಿವಾವಿಹಾರಂ।
೭೮೫.
ಲತಙ್ಗನಾಯೋ ವಿಟಪೀಧವಾನ
ಮಾಲಮ್ಬ ಸಾಖಾಪುಥುಲಂ’ಸಪಸ್ಸೇ,
ಸುಫುಲ್ಲ ನಮಞ್ಜೂಕರ ಮಞ್ಜರೀಹಿ
ನಮಸ್ಸಮಾನಾ’ವ ಸದೋನತಗ್ಗಾ।
೭೮೬.
ತಿಟ್ಠನ್ತಿ ರುಕ್ಖಾ ನಟಕಾ’ವ ತತ್ಥ
ಸುಫುಲ್ಲ ಸಾಖಾಕರ’ಮುಕ್ಖಿಪಿತ್ವಾ,
ನಮಸ್ಸಮಾನಾ ವಿಯ ಓನತಗ್ಗಾ
ವತ್ತನ್ತಿ ಮಾನಚ್ಛರಿಯಾನಿ ನಿಚ್ಚಂ।
೭೮೭.
ತಥೇವ ಉಚ್ಚಾವಚ ಪಬ್ಬತಾ ಚ
ನಮಸ್ಸಮಾನಾ ವಿಯ ಪಾದಲಞ್ಛಂ,
ತಿಟ್ಠನ್ತಿ ನಿನ್ನಗ್ಗ ಸಿಖಾ ಸಮನ್ತಾ
ಇದಮ್ಪಿ ನಿಚ್ಚಬಭುತಮೇವ ತತ್ಥ।
೭೮೮.
ತಸ್ಮಿಂ ನಗೇ ಪಾದವರಙ್ಕಿತಸ್ಮಿಂ
ಖಲಮಣ್ಡಲೋಕಾಸ ಪದೇಸಮತ್ತೇ,
ಸಮೋಸರನ್ತೇ ಬಹುಕೇ ಜನೇಪಿ
ಹೋತೇವ ಓಕಾಸಮ,ಹೋ ಪದಙ್ಕಂ।
೭೮೯.
ಸಮೋಸರಿತ್ವಾನ ಮಹೇತ್ವ ಸತ್ತೇ
ನಿಕ್ಖನ್ತಮತ್ತೇ ಜಲದಾ ಸಮೇಚ್ಚ,
ಸೋಧೇನ್ತಿ ಮಾಲ’ಮ್ಬುವಹೇಹಿ ಸಾಧು
ಇದಮ್ಪಿ ನಿಚ್ಚಬ್ಭುತಮೇವ ತತ್ಥ।
೭೯೦.
ಪಾದೇನ ಫುಟ್ಠಸ್ಸ ಸಿಲಾತಲಸ್ಸ
ಏತಾದಿಸಾನಚ್ಛರಿಯಾನಿ ಹೋನ್ತಿ,
ಲೋಕೇಕನಾಥಸ್ಸ ಅನಾಸವಸ್ಸ
ಮಹಬ್ಭುತಂ ಕೋನು ಕಥಂ ಭಣೇಯ್ಯ।
೭೯೧.
ದಿವಾವಿಹಾರಂ ಭಗವಾ ಸಸಙ್ಘೋ
ಕತ್ವಾನ ತಸ್ಮಿಂ ಪನ ಕಿಞ್ಚಿಕಾಲಂ,
ಮಹೀಯಮಾನೇಸು ಸದೇವಕೇಸು
ತತೋ ಗತೋ ರೋಹಣಮಮ್ಬರಮ್ಹಾ।
೭೯೨.
ತಸ್ಮಿಂ ಸಸಙ್ಘೋ ಮುನಿ ದೀಘವಾಪಿಯಂ
ಥೂಪಸ್ಸ ಠಾನೇ ಪರಮಾಯ ಭುಮಿಯಾ,
ಗರುಂ ಕರೋನ್ತೋ ಪನ ತಂ ಮಹೀತಲಂ
ನಿರೋಧಭಾವೇನ ನಿಸೀದಿ ಸತ್ರಜೋ।
೭೯೩.
ತತೋ’ನುರಾಧಂ ಭಗವಾ ನಭಮ್ಹಾ
ಗನ್ತ್ವಾನ ಬೋಧಿಟ್ಠಿತಭುಮಿಯಾ ಚ,
ಠಾನೇ ಮಹಾಮಙ್ಗಲಚೇತಿಯಸ್ಸ
ತಥೇವ ಅಕ್ಖನ್ತಿನಹಿತಸ್ಸ ಠಾನೇ।
೭೯೪.
ನಿಸೀದಿ ಪತ್ವಾನ ನಿರಾಧಪೀತಿಂ
ಸಸಾವಕೋ ಪೇಕ್ಖಮ’ನಾಗತದ್ಧಂ,
ಪತಿಟ್ಠಿತಾ ಮೇ ಪನ ಬೋಧಿಧಾತು
ಕರೋನ್ತಿ ಲೋಕೇ’ತಿ ಜನಸ್ಸ ವುದ್ಧಿಂ।
೭೯೫.
ವುಟ್ಠಾಯ ತುಟ್ಠೋ ಭಗವಾ ನಿರೋಧಾ
ಗತೋ ಸಿಲಾಥೂಪವರಸ್ಸ ಠಾನಂ,
ಠಿತೋ ತಹಿಂ ಧಮ್ಮಮಥುದ್ದಿಸಿತ್ವಾ
ಗತೋ ನಭಾ ಜೇತವನಂ ಸುರಮ್ಮಂ।
೭೯೬.
ಏವಂ ಸೋ ಧಮ್ಮರಾಜಾ ಜನಹಿತವಿಹಿತೋ ವೀತ ದೋಸಾರಿವಗ್ಗೋ
ಲಙ್ಕಾರಾಮಾಯ ರಮ್ಮೇ ಸುಮನಗಿರಿಸಿರೇ’ಕಾಸಿ ಯಂ ಪಾದಲಞ್ಛಂ
ತಂ ವೋ ಸಗ್ಗಾ’ಪವಗ್ಗಂ ದದತಿ ಮುನಿಸಮಂ ಚಿತ್ತ ಮತ್ತೇ ಪಸನ್ನೇ
ತಸ್ಮಾ ಭೋ!ಭೋ! ಪಹಟ್ಠಾ ನಮಥ ಮಹಥ ತಂ ಸಾಧು ಸಾಧುಪ್ಪಸತ್ಥಂ।
ಇತಿ ಸಮನ್ತಕೂಟ ವಣ್ಣನಾ ನಿಟ್ಠಿತಾ।
ಗ್ರನ್ಥ ಸಮಾಪ್ತಿಯ।
೧.
ಅನನ್ತರಾ ಸಮತ್ತಾಯಂ ಸುಮಣದ್ದಿಸು ವಣ್ಣನಾ,
ತಥೇವ ಸಾಧೂ ಸಙ್ಕಪ್ಪಾ ಖಿಪ್ಪಂ ಪಪ್ಪೋನ್ತು ಪಾಣಿನಂ।
೨.
ಯೋ ಯಾಚಿತೋ’ರಞ್ಞವಾಸೀ ಗುಣಾಧಾರ ಸುಧೀಮತಾ,
ರಾಹುಲತ್ಥೇರನಾಮೇನ ವಿಸ್ಸುತೇನ ಮಹೀತಲೇ।
೩.
ಭುವನೋದರಮ್ಹಿ ಪಞ್ಞಾತೋ ರವೀವಮ್ಬರ ಮಣ್ಡಲೇ,
ಅರಞ್ಞರತನಾನನ್ದ ಮಹಾಥೇರೋ ಮಹಾಗಣೀ।
೪.
ಜೀವಿತಂ ವಿಯ ಯೋ ಸತ್ಥುಸಾಸನಸ್ಸ ಮಹಾಕವೀ,
ಸಾರೋ ಸುಪ್ಪಟಿಪತ್ತೀಸು ಸತ್ಥಸಾಗರ ಪಾರಗೋ।
೫.
ತಸ್ಸ ಸಿಸ್ಸೋ’ಸಿ ಯೋ ವಿಪ್ಪಗಾಮ ವಂಸೇಕ ಕೇತುಕೋ
ಞಾತಾಗಮೋ’ರಞ್ಞವಾಸೀ ಸೀಲಾದಿ ಗುಣಭೂಸಣೋ।
೬.
ಯೋ’ಕಾ ಸೀಹಲಭಾಸಾಯ ಸೀಹಲಂ ಸದ್ದಲಕ್ಖಣಂ,
ತೇನ ವೇದೇಹಥೇರೇನ ಕತಾಯಮ್ಪಿಯಸೀಲಿನಾ।
ಸಿದ್ಧಿರತ್ಥು।