೧೨. ಲೋಹಿಚ್ಚಸುತ್ತವಣ್ಣನಾ
ಲೋಹಿಚ್ಚಬ್ರಾಹ್ಮಣವತ್ಥುವಣ್ಣನಾ
೫೦೧. ಏವಂ ‘‘ಏವಂ ಮೇ ಸುತಂ…ಪೇ॰… ಕೋಸಲೇಸೂತಿ ಲೋಹಿಚ್ಚಸುತ್ತ’’ನ್ತಿ ಆಹ। ಸಾಲವತಿಕಾತಿ ಕಾರಣಮನ್ತರೇನ ಇತ್ಥಿಲಿಙ್ಗವಸೇನ ತಸ್ಸ ಗಾಮಸ್ಸ ನಾಮಂ। ಗಾಮಣಿಕಾಭಾವೇನಾತಿ ಕೇಚಿ। ವತಿಯಾತಿ ಕಣ್ಟಕಸಾಖಾದಿವತಿಯಾ। ಲೋಹಿತೋ ನಾಮ ತಸ್ಸ ಕುಲೇ ಪುಬ್ಬಪುರಿಸೋ, ತಬ್ಬಂಸವಸೇನ ಲೋಹಿತಸ್ಸ ಅಪಚ್ಚಂ ಲೋಹಿಚ್ಚೋತಿ ಬ್ರಾಹ್ಮಣಸ್ಸ ಗೋತ್ತತೋ ಆಗತನಾಮಂ।
೫೦೨. ‘‘ಕಿಞ್ಹಿ ಪರೋ ಪರಸ್ಸ ಕರಿಸ್ಸತೀ’’ತಿ ಪರಾನುಕಮ್ಪಾ ವಿರಹಿತತ್ತಾ ಲಾಮಕಂ। ನ ತು ಉಚ್ಛೇದಸಸ್ಸತಾನಂ ಅಞ್ಞತರಸ್ಸಾತಿ ಆಹ ‘‘ನ ಪನಾ’’ತಿಆದಿ। ದಿಟ್ಠಿಗತನ್ತಿ ಹಿ ಲದ್ಧಿಮತ್ತಂ ಅಧಿಪ್ಪೇತಂ, ಅಞ್ಞಥಾ ಉಚ್ಛೇದಸಸ್ಸತಗ್ಗಾಹವಿನಿಮುತ್ತೋ ಕೋಚಿ ದಿಟ್ಠಿಗ್ಗಾಹೋ ನಾಮ ನತ್ಥೀತಿ ತೇಸಮಞ್ಞತರಂ ಸಿಯಾ। ‘‘ಉಪ್ಪನ್ನಂ ಹೋತೀ’’ತಿ ಇದಂ ಮನಸಿ, ವಚಸಿ ಚ ಉಪ್ಪನ್ನತಾಸಾಧಾರಣವಚನನ್ತಿ ದಸ್ಸೇತಿ ‘‘ನ ಕೇವಲಞ್ಚಾ’’ತಿಆದಿನಾ। ಸೋ ಕಿರ…ಪೇ॰… ಭಾಸತಿಯೇವಾತಿ ಚ ತಸ್ಸಾ ಲದ್ಧಿಯಾ ಲೋಕೇ ಪಾಕಟಭಾವಂ ವದತಿ। ಯಸ್ಮಾ ಪನ ಅತ್ತತೋ ಅಞ್ಞೋ ಪರೋ ಹೋತಿ, ತಸ್ಮಾ ಯಥಾ ಅನುಸಾಸಕತೋ ಅನುಸಾಸಿತಬ್ಬೋ ಪರೋ, ಏವಂ ಅನುಸಾಸಿತಬ್ಬತೋಪಿ ಅನುಸಾಸಕೋತಿ ದಸ್ಸೇತುಂ ‘‘ಪರೋ’’ತಿಆದಿ ವುತ್ತಂ। ಕಿಂ-ಸದ್ದಾಪೇಕ್ಖಾಯ ಚೇತ್ಥ ‘‘ಕರಿಸ್ಸತೀ’’ತಿ ಅನಾಗತಕಾಲವಚನಂ, ಅನಾಗತೇಪಿ ವಾ ತೇನ ತಸ್ಸ ಕಾತಬ್ಬಂ ನತ್ಥೀತಿ ದಸ್ಸನತ್ಥಂ। ಕುಸಲಂ ಧಮ್ಮನ್ತಿ ಅನವಜ್ಜಧಮ್ಮಂ ನಿಕ್ಕಿಲೇಸಧಮ್ಮಂ, ವಿಮೋಕ್ಖಧಮ್ಮನ್ತಿ ಅತ್ಥೋ। ‘‘ಪರೇಸಂ ಧಮ್ಮಂ ಕಥೇಸ್ಸಾಮೀ’’ತಿ ತೇಹಿ ಅತ್ತಾನಂ ಪರಿವಾರಾಪೇತ್ವಾ ವಿಚರಣಂ ಕಿಮತ್ಥಿಯಂ, ಆಸಯವುದ್ಧಸ್ಸಪಿ ಅನುರೋಧೇನ ವಿನಾ ತಂ ನ ಹೋತಿ, ತಸ್ಮಾ ಅತ್ತನಾ…ಪೇ॰… ವಿಹಾತಬ್ಬನ್ತಿ ವದತಿ। ತೇನಾಹ ‘‘ಏವಂಸಮ್ಪದಮಿದಂ ಪಾಪಕಂ ಲೋಭಧಮ್ಮಂ ವದಾಮೀ’’ತಿ।
೫೦೪. ‘‘ಇತ್ಥಿಲಿಙ್ಗವಸೇನಾ’’ತಿ ಸೋತಿ ಲೋಹಿಚ್ಚಬ್ರಾಹ್ಮಣೋ। ಭಾರೋತಿ ಭಗವತೋ ಪರಿಸಬಾಹುಲ್ಲತ್ತಾ, ಅತ್ತನೋ ಚ ಬಹುಕಿಚ್ಚಕರಣೀಯತ್ತಾ ಗರು ದುಕ್ಕರಂ।
೫೦೮. ಕಥಾಫಾಸುಕತ್ಥನ್ತಿ ಅಯಂ ಉಪಾಸಕೋತಿ ರೋಸಿಕನ್ಹಾಪಿತಂ ಆಹ। ಅಪ್ಪೇವ ನಾಮ ಸಿಯಾತಿ ಏತ್ಥ ಪೀತಿವಸೇನ ಆಮೇಡಿತಂ ದಟ್ಠಬ್ಬಂ। ತಥಾ ಹಿ ತಂ ‘‘ಬುದ್ಧಗಜ್ಜಿತ’’ನ್ತಿ ವುಚ್ಚತಿ। ಭಗವಾ ಹಿ ಈದಿಸೇಸು ಠಾನೇಸು ವಿಸೇಸತೋ ಪೀತಿಸೋಮನಸ್ಸಜಾತೋ ಹೋತಿ, ತಸ್ಮಾ ಪೀತಿವಸೇನ ಪಠಮಂ ಗಜ್ಜತಿ, ದುತಿಯಮ್ಪಿ ಅನುಗಜ್ಜತಿ। ಕಿಂ ವಿಸೇಸಂ ಗಜ್ಜನಮನುಗಜ್ಜನನ್ತಿ ವುತ್ತಂ ‘‘ಅಯ’’ನ್ತಿಆದಿ। ಆದೋ ಭಾಸನಂ ಅಲ್ಲಾಪೋ, ಸಞ್ಞೋಗೇ ಪರೇ ರಸ್ಸೋ। ತದುತ್ತರಿ ಸಹ ಭಾಸನಂ ಸಲ್ಲಾಪೋ।
ಲೋಹಿಚ್ಚಬ್ರಾಹ್ಮಣಾನುಯೋಗವಣ್ಣನಾ
೫೦೯. ಸಮುದಯಸಞ್ಜಾತೀತಿ ಆಯುಪ್ಪಾದೋತಿ ಆಹ ‘‘ಭೋಗುಪ್ಪಾದೋ’’ತಿ। ತತೋತಿ ಸಾಲವತಿಕಾಯ। ಲಾಭನ್ತರಾಯಕರೋತಿ ಧನಧಞ್ಞಲಾಭಸ್ಸ ಅನ್ತರಾಯಕರೋ। ಅನುಪುಬ್ಬೋ ಕಪಿ-ಸದ್ದೋ ಆಕಙ್ಖನತ್ಥೋತಿ ದಸ್ಸೇತಿ ‘‘ಇಚ್ಛತೀ’’ತಿ ಇಮಿನಾ। ಅಯಂ ಅಟ್ಠಕಥಾತೋ ಅಪರೋ ನಯೋ – ಸಾತಿಸಯೇನ ಹಿತೇನ ಅನುಕಮ್ಪಕೋ ಅನುಗ್ಗಣ್ಹನಕೋ ಹಿತಾನುಕಮ್ಪೀತಿ। ಸಮ್ಪಜ್ಜತೀತಿ ಆಸೇವನಲಾಭೇನ ನಿಪ್ಪಜ್ಜತಿ, ಬಲವತೀ ಹೋತಿ ಅವಗ್ಗಹಾತಿ ಅತ್ಥೋ। ತೇನ ವುತ್ತಂ ‘‘ನಿಯತಾ ಹೋತೀ’’ತಿ।
೫೧೦-೫೧೧. ದುತಿಯಂ ಉಪಪತ್ತಿನ್ತಿ ‘‘ನನು ರಾಜಾ ಪಸೇನದಿಕೋಸಲೋ’’ತಿಆದಿನಾ ವುತ್ತಂ ದುತಿಯಂ ಉಪಪತ್ತಿಂ ಠಾನಂ ಯುತ್ತಿಂ। ಕಾರಣಞ್ಹಿ ಭಗವಾ ಉಪಮಾಮುಖೇನ ದಸ್ಸೇತಿ, ಇಮಾಯ ಚ ಉಪಪತ್ತಿಯಾ ತುಮ್ಹೇ ಚೇವ ಅಞ್ಞೇ ಚಾತಿ ಲೋಹಿಚ್ಚಮ್ಪಿ ಅನ್ತೋಕತ್ವಾ ಸಂವೇಜನಂ ಕತಂ ಹೋತಿ। ಯೇ ಚ ಇಮೇ ಕುಲಪುತ್ತಾ ದಿಬ್ಬಾ ಗಬ್ಭಾ ಪರಿಪಾಚೇನ್ತೀತಿ ಯೋಜನಾ। ಉಪನಿಸ್ಸಯಸಮ್ಪತ್ತಿಯಾ, ಞಾಣಪರಿಪಾಕಸ್ಸ ವಾ ಅಭಾವೇನ ಅಸಕ್ಕೋನ್ತಾ। ಕಮ್ಮಪದೇನ ಅತುಲ್ಯಾಧಿಕರಣತ್ತಾ ಪರಿಪಾಚೇನ್ತಿ ಕಿರಿಯಾಯ ವಿಭತ್ತಿವಿಪಲ್ಲಾಸೇನ ಉಪಯೋಗತ್ಥೇ ಪಚ್ಚತ್ತವಚನಂ। ಯೇ ಪನ ‘‘ಪರಿಪಚ್ಚನ್ತೀ’’ತಿ ಕಮ್ಮರೂಪೇನ ಪಠನ್ತಿ, ತೇಸಂ ಮತೇ ವಿಭತ್ತಿವಿಪಲ್ಲಾಸೇನ ಪಯೋಜನಂ ನತ್ಥಿ ಕಮ್ಮಕತ್ತುಭಾವತೋ, ಅತ್ಥೋ ಪನಸ್ಸ ದುತಿಯವಿಕಪ್ಪೇ ವುತ್ತನಯೇನ ದಾನಾದಿಪುಞ್ಞವಿಸೇಸೋ ವೇದಿತಬ್ಬೋ। ಅಹಿತಾನುಕಮ್ಪಾದಿತಾ ಚ ತಸ್ಸ ತಂಸಮಙ್ಗೀಸತ್ತವಸೇನ ಹೋತಿ। ದಿವಿ ಭವಾತಿ ದಿಬ್ಬಾ। ಗಬ್ಭೇನ್ತಿ ಪರಿಪಚ್ಚನವಸೇನ ಅತ್ತನಿ ಪಬನ್ಧೇನ್ತೀತಿ ಗಬ್ಭಾ, ದೇವಲೋಕಾ। ‘‘ಛನ್ನಂ ದೇವಲೋಕಾನ’’ನ್ತಿ ನಿದಸ್ಸನವಚನಮೇತಂ। ಬ್ರಹ್ಮಲೋಕಸ್ಸಾಪಿ ಹಿ ದಿಬ್ಬಗಬ್ಭಭಾವೋ ಲಬ್ಭತೇವ ದಿಬ್ಬವಿಹಾರಹೇತುಕತ್ತಾ। ಏವಞ್ಚ ಕತ್ವಾ ‘‘ಭಾವನಂ ಭಾವಯಮಾನಾ’’ತಿ ಇದಮ್ಪಿ ವಚನಂ ‘‘ದಾನಂ ದದಮಾನಾ’’ತಿಆದಿ ವುತ್ತಂ। ಭವನ್ತಿ ಏತ್ಥ ಯಥಾರುಚಿ ಸುಖಸಮಪ್ಪಿತಾತಿ ಭವಾ, ವಿಮಾನಾನಿ। ದೇವಭಾವಾವಹತ್ತಾ ದಿಬ್ಬಾ। ವುತ್ತನಯೇನೇವ ಗಬ್ಭಾ। ದಾನಾದಯೋ ದೇವಲೋಕಸಂವತ್ತನಿಕ ಪುಞ್ಞವಿಸೇಸಾ। ದಿಬ್ಬಾ ಭವಾತಿ ಇಧ ದೇವಲೋಕಪರಿಯಾಪನ್ನಾ ಉಪಪತ್ತಿಭವಾ ಅಧಿಪ್ಪೇತಾ। ತದಾವಹೋ ಹಿ ಕಮ್ಮಭವೋ ಪುಬ್ಬೇ ಗಹಿತೋತಿ ಆಹ ‘‘ದೇವಲೋಕೇ ವಿಪಾಕಕ್ಖನ್ಧಾ’’ತಿ।
ತಯೋಚೋದನಾರಹವಣ್ಣನಾ
೫೧೩. ಅನಿಯಾಮಿತೇನೇವಾತಿ ಅನಿಯಮಿತೇನೇವ, ‘‘ತ್ವಂ ಏವಂ ದಿಟ್ಠಿಕೋ, ಏವಂ ಸತ್ತಾನಂ ಅನತ್ಥಸ್ಸ ಕಾರಕೋ’’ತಿ ಏವಂ ಅನುದ್ದೇಸಿಕೇನೇವ। ಸಬ್ಬಲೋಕಪತ್ಥಟಾಯ ಲದ್ಧಿಯಾ ಸಮುಪ್ಪಜ್ಜನತೋ ಯಾವ ಭವಗ್ಗಾ ಉಗ್ಗತಂ। ಮಾನನ್ತಿ ‘‘ಅಹಮೇತಂ ಜಾನಾಮಿ, ಅಹಮೇತಂ ಪಸ್ಸಾಮೀ’’ತಿ ಏವಂ ಪವತ್ತಂ ಪಣ್ಡಿತಮಾನಂ। ಭಿನ್ದಿತ್ವಾತಿ ವಿಧಮೇತ್ವಾ, ಜಹಾಪೇತ್ವಾತಿ ಅತ್ಥೋ। ತಯೋ ಸತ್ಥಾರೇತಿ ಅಸಮ್ಪಾದಿತಅತ್ತಹಿತೋ ಅನೋವಾದಕರಸಾವಕೋ ಚ ಅಸಮ್ಪಾದಿತಅತ್ತಹಿತೋ ಓವಾದಕರಸಾವಕೋ ಚ ಸಮ್ಪಾದಿತಅತ್ತಹಿತೋ ಅನೋವಾದಕರಸಾವಕೋ ಚೇತಿ ಇಮೇ ತಯೋ ಸತ್ಥಾರೇ। ಚತುತ್ಥೋ ಪನ ಸಮ್ಮಾಸಮ್ಬುದ್ಧೋ ನ ಚೋದನಾರಹೋ, ತಸ್ಮಾ ‘‘ತಂ ತೇನ ಪುಚ್ಛಿತೋ ಏವ ಕಥೇಸ್ಸಾಮೀ’’ತಿ ಚೋದನಾರಹೇವ ತಯೋ ಸತ್ಥಾರೇ ಪಠಮಂ ದಸ್ಸೇತಿ, ಪಚ್ಛಾ ಚತುತ್ಥಂ ಸತ್ಥಾರಂ। ಕಾಮಞ್ಚೇತ್ಥ ಚತುತ್ಥೋ ಸತ್ಥಾ ಏಕೋ ಅದುತಿಯೋ ಅನಞ್ಞಸಾಧಾರಣೋ, ತಥಾಪಿ ಸೋ ಯೇಸಂ ಉತ್ತರಿಮನುಸ್ಸಧಮ್ಮಾನಂ ವಸೇನ ‘‘ಧಮ್ಮಮಯೋ ಕಾಯೋ’’ತಿ ವುಚ್ಚತಿ, ತೇಸಂ ಸಮುದಾಯಭೂತೋಪಿ ತೇ ಗುಣಾವಯವೇ ಸತ್ಥುಟ್ಠಾನಿಯೇ ಕತ್ವಾ ದಸ್ಸೇನ್ತೋ ಭಗವಾ ‘‘ಅಯಮ್ಪಿ ಖೋ ಲೋಹಿಚ್ಚ ಸತ್ಥಾ’’ತಿ ಅಭಾಸಿ।
ಅಞ್ಞಾತಿ ಯ-ಕಾರಲೋಪನಿದ್ದೇಸೋ ‘‘ಸಯಂ ಅಭಿಞ್ಞಾ’’ತಿಆದೀಸು (ದೀ॰ ನಿ॰ ೧.೨೮, ೩೭; ಮ॰ ನಿ॰ ೧.೧೫೪, ೪೪೪) ವಿಯ, ತದತ್ಥೇ ಚೇತಂ ಸಮ್ಪದಾನವಚನನ್ತಿ ದಸ್ಸೇತಿ ‘‘ಅಞ್ಞಾಯಾ’’ತಿಆದಿನಾ। ಸಾವಕತ್ತಂ ಪಟಿಜಾನಿತ್ವಾ ಠಿತತ್ತಾ ಏಕದೇಸೇನಸ್ಸ ಸಾಸನಂ ಕರೋನ್ತೀತಿ ಆಹ ‘‘ನಿರನ್ತರಂ ತಸ್ಸ ಸಾಸನಂ ಅಕತ್ವಾ’’ತಿ। ಉಕ್ಕಮಿತ್ವಾ ಉಕ್ಕಮಿತ್ವಾತಿ ಕದಾಚಿ ತಥಾ ಕರಣಂ, ಕದಾಚಿ ತಥಾ ಅಕರಣಞ್ಚ ಸನ್ಧಾಯ ವಿಚ್ಛಾವಚನಂ, ಯದಿಚ್ಛಿತಂ ಕರೋನ್ತೀತಿ ಅಧಿಪ್ಪಾಯೋ ಪಟಿಕ್ಕಮನ್ತಿಯಾತಿ ಅನಭಿರತಿಯಾ ಅಗಾರವೇನ ಅಪಗಚ್ಛನ್ತಿಯಾ। ತೇನ ವುತ್ತಂ ‘‘ಅನಿಚ್ಛನ್ತಿಯಾ’’ತಿಆದಿ। ಏಕಾಯಾತಿ ಅದುತಿಯಾಯ ಇತ್ಥಿಯಾ, ಸಮ್ಪಯೋಗನ್ತಿ ಮೇಥುನಧಮ್ಮಸಮಾಯೋಗಂ। ಏಕೋ ಇಚ್ಛೇಯ್ಯಾತಿ ಅದುತಿಯೋ ಪುರಿಸೋ ಸಮ್ಪಯೋಗಂ ಇಚ್ಛೇಯ್ಯಾತಿ ಆನೇತ್ವಾ ಸಮ್ಬನ್ಧೋ। ಓಸಕ್ಕನಾದಿಮುಖೇನ ಇತ್ಥಿಪುರಿಸಸಮ್ಬನ್ಧನಿದಸ್ಸನಂ ಗೇಹಸ್ಸಿತಾಗೇಹಸ್ಸಿತಅಪೇಕ್ಖವಸೇನ ತಸ್ಸ ಸತ್ಥುನೋ ಸಾವಕೇಸು ಪಟಿಪತ್ತಿದಸ್ಸನತ್ಥಂ। ಅತಿವಿರತ್ತಭಾವತೋ ದಟ್ಠುಮ್ಪಿ ಅನಿಚ್ಛಮಾನಂ ಪರಮ್ಮುಖಿಂ ಠಿತಂ ಇತ್ಥಿಂ। ಲೋಭೇನಾತಿ ಪರಿವಾರಂ ನಿಸ್ಸಾಯ ಉಪ್ಪಜ್ಜನಕಲಾಭಸಕ್ಕಾರಲೋಭೇನ। ಈದಿಸೋತಿ ಏವಂಸಭಾವೋ ಸತ್ಥಾ। ಯೇನಾತಿ ತತ್ಥ ಸಮ್ಪಾದೇಹೀತಿ ತಸ್ಮಿಂ ಪಟಿಪತ್ತಿಧಮ್ಮೇ ಪತಿಟ್ಠಿತಂ ಕತ್ವಾ ಸಮ್ಪಾದೇಹಿ। ಕಾಯವಙ್ಕಾದಿವಿಗಮೇನ ಉಜುಂ ಕರೋಹಿ।
೫೧೪. ಸಸ್ಸರೂಪಕಾನಿ ತಿಣಾನೀತಿ ಸಸ್ಸಸದಿಸಾನಿ ನೀವಾರಾದಿತಿಣಾನಿ।
೫೧೫. ಏವಂ ಚೋದನಂ ಅರಹತೀತಿ ವುತ್ತನಯೇನ ಸಾವಕೇಸು ಅಪ್ಪೋಸ್ಸುಕ್ಕಭಾವಾಪಾದನೇ ನಿಯೋಜನವಸೇನ ಚೋದನಂ ಅರಹತಿ, ನ ಪಠಮೋ ವಿಯ ‘‘ಏವರೂಪೋ ತವ ಲೋಭಧಮ್ಮೋ’’ತಿಆದಿನಾ, ನ ಚ ದುತಿಯೋ ವಿಯ ‘‘ಅತ್ತಾನಮೇವ ತಾವ ತತ್ಥ ಸಮ್ಪಾದೇಹೀ’’ತಿಆದಿನಾ। ಕಸ್ಮಾ? ಸಮ್ಪಾದಿತಅತ್ತಹಿತತಾಯ ತತಿಯಸ್ಸ।
ನಚೋದನಾರಹಸತ್ಥುವಣ್ಣನಾ
೫೧೬. ನ ಚೋದನಾರಹೋತಿ ಏತ್ಥ ಯಸ್ಮಾ ಚೋದನಾರಹತಾ ನಾಮ ಸತ್ಥುವಿಪ್ಪಟಿಪತ್ತಿಯಾ ವಾ ಸಾವಕವಿಪ್ಪಟಿಪತ್ತಿಯಾ ವಾ ಉಭಯವಿಪ್ಪಟಿಪತ್ತಿಯಾ ವಾ ಹೋತಿ, ತಯಿದಂ ಸಬ್ಬಮ್ಪಿ ಇಮಸ್ಮಿಂ ಸತ್ಥರಿ ನತ್ಥಿ, ತಸ್ಮಾ ನ ಚೋದನಾರಹೋತಿ ಇಮಮತ್ಥಂ ದಸ್ಸೇತುಂ ‘‘ಅಯಞ್ಹೀ’’ತಿಆದಿ ವುತ್ತಂ। ಅಸ್ಸವಾತಿ ಪಟಿಸ್ಸವಾ।
೫೧೭. ಮಯಾ ಗಹಿತಾಯ ದಿಟ್ಠಿಯಾತಿ ಸಬ್ಬಸೋ ಅನವಜ್ಜೇ ಅನುಪವಜ್ಜೇ ಸಮ್ಮಾಪಟಿಪನ್ನೇ, ಪರೇಸಞ್ಚ ಸಮ್ಮದೇವ ಸಮ್ಮಾಪಟಿಪತ್ತಿಂ ದಸ್ಸೇನ್ತೇ ಸತ್ಥರಿ ಅಭೂತದೋಸಾರೋಪನವಸೇನ ಮಿಚ್ಛಾಗಹಿತಾಯ ನಿರಯಗಾಮಿನಿಯಾ ಪಾಪದಿಟ್ಠಿಯಾ। ನರಕಪಪಾತನ್ತಿ ನರಕಸಙ್ಖಾತಂ ಮಹಾಪಪಾತಂ। ಪಪತನ್ತಿ ಏತ್ಥಾತಿ ಹಿ ಪಪಾತೋ। ಧಮ್ಮದೇಸನಾಹತ್ಥೇನಾತಿ ಧಮ್ಮದೇಸನಾಸಙ್ಖಾತೇನ ಹತ್ಥೇನ। ಸಗ್ಗಮಗ್ಗಥಲೇತಿ ಸಗ್ಗಗಾಮಿಮಗ್ಗಭೂತೇ
ಇತಿ ಸುಮಙ್ಗಲವಿಲಾಸಿನಿಯಾ ದೀಘನಿಕಾಯಟ್ಠಕಥಾಯ ಪರಮಸುಖುಮಗಮ್ಭೀರದುರನುಬೋಧತ್ಥಪರಿದೀಪನಾಯ ಸುವಿಮಲವಿಪುಲಪಞ್ಞಾವೇಯ್ಯತ್ತಿಯಜನನಾಯ ಸಾಧುವಿಲಾಸಿನಿಯಾ ನಾಮ ಲೀನತ್ಥಪಕಾಸನಿಯಾ ಲೋಹಿಚ್ಚಸುತ್ತವಣ್ಣನಾಯ ಲೀನತ್ಥಪಕಾಸನಾ।
ಲೋಹಿಚ್ಚಸುತ್ತವಣ್ಣನಾ ನಿಟ್ಠಿತಾ।