೭. ಜಾಲಿಯಸುತ್ತವಣ್ಣನಾ
ದ್ವೇಪಬ್ಬಜಿತವತ್ಥುವಣ್ಣನಾ
೩೭೮. ಏವಂ ‘‘ಏವಂ ಮೇ ಸುತಂ…ಪೇ॰… ಕೋಸಮ್ಬಿಯನ್ತಿ ಜಾಲಿಯಸುತ್ತ’’ನ್ತಿ ಆಹ। ‘‘ಘೋಸಿತೇನಾ’’ತಿಆದಿನಾ ಮಜ್ಝೇಲೋಪಸಮಾಸಂ ದಸ್ಸೇತಿ, ಘೋಸಿತಸ್ಸ ಆರಾಮೋತಿಪಿ ವತ್ತಬ್ಬಂ। ಏವಮ್ಪಿ ಹಿ ‘‘ಅನಾಥಪಿಣ್ಡಿಕಸ್ಸ ಆರಾಮೇ’’ತಿಆದೀಸು (ಪಾರಾ॰ ೨೩೪) ವಿಯ ದಾಯಕಕಿತ್ತನಂ ಹೋತಿ, ಏವಂ ಪನ ಕಿತ್ತೇನ್ತೋ ಆಯಸ್ಮಾ ಆನನ್ದೋ ಅಞ್ಞೇಪಿ ತಸ್ಸ ದಿಟ್ಠಾನುಗತಿಆಪಜ್ಜನೇ ನಿಯೋಜೇತೀತಿ ಅಞ್ಞತ್ಥ ವುತ್ತಂ। ತತ್ಥ ಕೋಯಂ ಘೋಸಿತಸೇಟ್ಠಿ ನಾಮ, ಕಥಞ್ಚಾನೇನ ಆರಾಮೋ ಕಾರಿತೋ, ಕಥಂ ಪನ ತತ್ಥ ಭಗವಾ ವಿಹಾಸೀತಿ ಪುಚ್ಛಾಯ ಸಬ್ಬಂ ತಂ ವಿಸ್ಸಜ್ಜನಂ ಸಮುದಾಗಮತೋ ಪಟ್ಠಾಯ ಸಙ್ಖೇಪತೋವ ದಸ್ಸೇನ್ತೋ ‘‘ಪುಬ್ಬೇ ಕಿರಾ’’ತಿಆದಿಮಾಹ। ಅಲ್ಲಕಪ್ಪರಟ್ಠನ್ತಿ ಬಹೂಸು ಪೋತ್ಥಕೇಸು ದಿಸ್ಸತಿ, ಕತ್ಥಚಿ ಪನ ‘‘ಅದ್ದಿಲರಟ್ಠ’’ನ್ತಿ ಚ ‘‘ದಮಿಳರಟ್ಠ’’ನ್ತಿ ಚ ಲಿಖಿತಂ। ತತೋತಿ ಅಲ್ಲಕಪ್ಪರಟ್ಠತೋ। ‘‘ಪುತ್ತಂ…ಪೇ॰… ಅಗಮಾಸೀ’’ತಿ ಇದಮ್ಪಿ ‘‘ತಸ್ಸೇತಂ ಕಮ್ಮ’’ನ್ತಿ ಞಾಪೇತುಂ ವುತ್ತಂ। ತದಾತಿ ತೇಸಂ ಗಾಮಂ ಪವಿಟ್ಠದಿವಸೇ। ಬಲವಪಾಯಾಸನ್ತಿ ಗರುತರಂ ಬಹುಪಾಯಾಸಂ। ಜೀರಾಪೇತುನ್ತಿ ಸಮವೇಪಾಕಿನಿಯಾ ಗಹಣಿಯಾ ಪಕ್ಕಾಪೇತುಂ। ಅಸನ್ನಿಹಿತೇತಿ ಗೇಹತೋ ಬಹಿ ಅಞ್ಞಂ ಗತೇ। ಭುಸ್ಸತೀತಿ ನದತಿ, ‘‘ಭುಭು’’ಇತಿ ಸುನಖಸದ್ದಂ ಕರೋತೀತಿ ಅತ್ಥೋ। ಇದಮ್ಪಿಸ್ಸ ಏಕಂ ಕಮ್ಮಂ। ಪಚ್ಚೇಕಬುದ್ಧೇ ಪನ ಚೀವರಕಮ್ಮತ್ಥಾಯ ಅಞ್ಞಂ ಠಾನಂ ಗತೇ ಸುನಖಸ್ಸ ಹದಯಂ ಫಾಲಿತಂ। ತಿರಚ್ಛಾನಾ ನಾಮೇತೇ ಉಜುಜಾತಿಕಾ ಹೋನ್ತಿ ಅಕುಟಿಲಾ, ಮನುಸ್ಸಾ ಪನ ಅಞ್ಞಂ ಹದಯೇನ ಚಿನ್ತೇತಿ, ಅಞ್ಞಂ ಮುಖೇನ ಕಥೇನ್ತಿ। ತೇನೇವಾಹ ‘‘ಗಹನಞ್ಹೇತಂ ಭನ್ತೇ ಯದಿದಂ ಮನುಸ್ಸಾ, ಉತ್ತಾನಕಞ್ಹೇತಂ ಭನ್ತೇ ಯದಿದಂ ಪಸವೋ’’ತಿ (ಮ॰ ನಿ॰ ೨.೩)।
ಇತಿ ಸೋ ತಾಯ ಪಚ್ಚೇಕಬುದ್ಧೇ ಸಿನೇಹವಸೇನ ಉಜುದಿಟ್ಠಿತಾಯ ಅಕುಟಿಲತಾಯ ಕಾಲಙ್ಕತ್ವಾ ತಾವತಿಂಸಭವನೇ ನಿಬ್ಬತ್ತೋ। ತಂ ಸನ್ಧಾಯಾಹ ‘‘ಸೋ…ಪೇ॰… ನಿಬ್ಬತ್ತೀ’’ತಿ। ತಸ್ಸ ಪನ ಕಣ್ಣಮೂಲೇ ಕಥೇನ್ತಸ್ಸ ‘‘ಘೋಸಕದೇವಪುತ್ತೋ’’ ತ್ವೇವ ನಾಮಂ ಅಹೋಸಿ। ಅಯಮಸ್ಸ ಪಚ್ಚೇಕಬುದ್ಧೇ ಸಿನೇಹೇನ ಭುಕ್ಕರಣಸ್ಸ ನಿಸ್ಸನ್ದೋ। ಚವಿತ್ವಾತಿ ಆಹಾರಕ್ಖಯೇನ ಚವಿತ್ವಾ। ದೇವಲೋಕತೋ ಹಿ ದೇವಪುತ್ತಾ ಆಯುಕ್ಖಯೇನ, ಪುಞ್ಞಕ್ಖಯೇನ, ಆಹಾರಕ್ಖಯೇನ, ಕೋಪೇನಾತಿ ಚತೂಹಿ ಕಾರಣೇಹಿ ಚವನ್ತಿ। ಇಮಸ್ಸ ಪನ ಕಾಮಗುಣೇ ಪರಿಭುಞ್ಜತೋ ಮುಟ್ಠಸ್ಸತಿಸ್ಸ ಆಹಾರಕ್ಖಯೇನ ಚವನಂ ಹೋತಿ। ಸೋ ಕೋಸಮ್ಬಿಯಂ ನಗರಸೋಭಿನಿಯಾ ಕುಚ್ಛಿಸ್ಮಿಂ ಪಟಿಸನ್ಧಿಂ ಗಣ್ಹಿ। ನಗರಸೋಭಿನಿಯೋ ಕಿರ ಧೀತರಂ ಪಟಿಜಗ್ಗನ್ತಿ, ನ ಪುತ್ತಂ। ಧೀತರೋ ಹಿ ತಾಸಂ ಪವೇಣಿಂ ಘಟಯನ್ತಿ, ತಸ್ಮಾ ಸಾಪಿ ತಂ ಸಙ್ಕಾರಕೂಟೇ ಛಡ್ಡಾಪೇತಿ। ಅಯಮಸ್ಸ ಪುಬ್ಬೇ ಪುತ್ತಛಡ್ಡನಕಮ್ಮಸ್ಸ ನಿಸ್ಸನ್ದೋ। ಪಾಪಕಮ್ಮಞ್ಹಿ ನಾಮೇತಂ ‘‘ಅಪ್ಪಕ’’ನ್ತಿ ನಾವಮಞ್ಞಿತಬ್ಬಂ। ತಮೇಕೋ ಮನುಸ್ಸೋ ಕಾಕಸುನಖಪರಿವಾರಿತಂ ದಿಸ್ವಾ ‘‘ಪುತ್ತೋ ಮೇ ಲದ್ಧೋ’’ತಿ ಗೇಹಂ ನೇಸಿ, ತಸ್ಸ ಪನ ಹತ್ಥತೋ ಕೋಸಮ್ಬಕಸೇಟ್ಠಿ ಕಹಾಪಣಸಹಸ್ಸಂ ದತ್ವಾ ಅಗ್ಗಹೇಸಿ, ತಮತ್ಥಂ ಸನ್ಧಾಯ ‘‘ಕೋಸಮ್ಬಿಯಂ ಏಕಸ್ಸ ಕುಲಸ್ಸ ಘರೇ ನಿಬ್ಬತ್ತೀ’’ತಿಆದಿ ವುತ್ತಂ। ಸತ್ತಕ್ಖತ್ತುಂ ಘಾತಾಪನತ್ಥಂ ಉಪಕ್ಕಮಕರಣಮ್ಪಿ ಪುತ್ತಛಡ್ಡನಕಮ್ಮಸ್ಸೇವ ನಿಸ್ಸನ್ದೋ। ಸೇಟ್ಠಿಧೀತಾಯಾತಿ ಜನಪದಸೇಟ್ಠಿನೋ ಧೀತಾಯ। ವೇಯ್ಯತ್ತಿಯೇನಾತಿ ಪಞ್ಞಾವೇಯ್ಯತ್ತಿಯೇನ। ಸಾ ಹಿ ತಸ್ಸ ಪಿತರಾ ಪೇಸಿತಂ ಮಾರಾಪನಪಣ್ಣಂ ಫಾಲೇತ್ವಾ ವಿವಾಹಪಣ್ಣಂ ಬನ್ಧಿತ್ವಾ ಜೀವಿತಲಾಭಂ ಕರೋತಿ। ತಾಯೇವ ಸರಸಮ್ಪತ್ತಿಯಾ ಘೋಸಿತಸೇಟ್ಠಿ ನಾಮ ಜಾತೋ।
ಸರೀರಸನ್ತಪ್ಪನತ್ಥನ್ತಿ ಹಿಮವನ್ತೇವ ಮೂಲಫಲಾಹಾರತಾಯ ಕಿಲನ್ತಸರೀರಸ್ಸ ಲೋಣಮ್ಬಿಲಸೇವನೇನ ಪೀನನತ್ಥಂ। ತಸಿತಾತಿ ಪಿಪಾಸಿತಾ। ಕಿಲನ್ತಾತಿ ಪರಿಸ್ಸನ್ತಕಾಯಾ। ವಟರುಕ್ಖನ್ತಿ ಮಹಾನಿಗ್ರೋಧರುಕ್ಖಂ। ತೇ ಕಿರ ತಂ ಪತ್ವಾ ತಸ್ಸ ಮೂಲೇ ನಿಸೀದಿಂಸು। ಅಥ ಜೇಟ್ಠಕತಾಪಸೋ ನಿಗ್ರೋಧರುಕ್ಖಸ್ಸ ಸೋಭಾಸಮ್ಪತ್ತಿಂ ಪಸ್ಸಿತ್ವಾ ‘‘ಮಹಾನುಭಾವೋ ಮಞ್ಞೇ ಏತ್ಥ ಅಧಿವುತ್ಥಾ ದೇವತಾ। ಸಾಧು ವತಾಯಂ ದೇವತಾ ಇಸಿಗಣಸ್ಸ ಪಾನೀಯಾದಿದಾನೇನ ಅದ್ಧಾನಪರಿಸ್ಸಮಂ ವಿನೋದೇಯ್ಯಾ’’ತಿ ಚಿನ್ತೇಸಿ। ದೇವತಾಪಿ ತಥಾ ಚಿನ್ತಿತಂ ಉತ್ವಾ ಇಸಿಗಣಸ್ಸ ಪಾನೀಯನ್ಹಾನಕಭೋಜನಾನಿ ಅದಾಸಿ। ತೇನಾಹ ‘‘ತತ್ಥಾ’’ತಿಆದಿ। ಜೇಟ್ಠಕತಾಪಸಸ್ಸ ಪನ ತಥಾ ಚಿನ್ತನಂ ಅವಿಸೇಸತೋ ಸಬ್ಬತ್ಥ ಆರೋಪೇತ್ವಾ ‘‘ಸಙ್ಗಹಂ ಪಚ್ಚಾಸಿಸನ್ತಾ’’ತಿ ವುತ್ತಂ। ‘‘ಹತ್ಥಂ ಪಸಾರೇತ್ವಾ’’ತಿ ಇಮಿನಾ ಹತ್ಥಪ್ಪಸಾರಣಮತ್ತೇನ ತಸ್ಸಾ ಯಥಿಚ್ಛಿತನಿಪ್ಫತ್ತಿಂ ದಸ್ಸೇತಿ। ದೇವತಾ ಆಹಾತಿ ಸಾ ಅತ್ತನೋ ಪುಞ್ಞಸ್ಸ ಪರಿತ್ತಕತ್ತಾ ಲಜ್ಜಾಯ ಕಥೇತುಂ ಅವಿಸಹನ್ತೀಪಿ ಪುನಪ್ಪುನಂ ನಿಪ್ಪೀಳಿಯಮಾನಾ ಸೋತಿ ಅನಾಥಪಿಣ್ಡಿಕೋ ಗಹಪತಿ। ಭತಕಾನನ್ತಿ ಭತಿಯಾ ವೇಯ್ಯಾವಚ್ಚಂ ಕರೋನ್ತಾನಂ ದಾಸಪೇಸಕಮ್ಮಕರಾನಂ। ಪಕತಿಭತ್ತವೇತನಮೇವಾತಿ ಪಕತಿಯಾ ದಾತಬ್ಬಭತ್ತವೇತನಮೇವ। ತದಾ ಉಪೋಸಥಿಕತ್ತಾ ಕಮ್ಮಂ ಅಕರೋನ್ತಾನಮ್ಪಿ ಕಮ್ಮಕರಣದಿವಸೇ ದಾತಬ್ಬಭತ್ತವೇತನಮೇವ, ನ ತತೋ ಊನನ್ತಿ ಅತ್ಥೋ। ಧಮ್ಮಪದಟ್ಠಕಥಾಯಂ ಖುದ್ದಕಭಾಣಕಾನಂ ಮತೇನ ‘‘ಸಾಯಮಾಸತ್ಥಾಯ ಆಗತೋ’’ತಿ (ಧ॰ ಪ॰ ಅಟ್ಠ॰ ೧.೨.ಸಾಮಾವತೀವತ್ಥು) ವುತ್ತಂ, ಇಧ ಪನ ದೀಘಭಾಣಕಾನಂ ಮತೇನ ‘‘ಮಜ್ಝನ್ಹಿಕೇ ಪಾತರಾಸತ್ಥಾಯ ಆಗತೋ’’ತಿ। ಕಞ್ಚೀತಿ ಕಞ್ಚಿಪಿ ಭತಕಂ, ಕಿಞ್ಚಿಪಿ ಭತಕಕಮ್ಮನ್ತಿ ವಾ ಸಮ್ಬನ್ಧೋ। ಮಜ್ಝನ್ಹಿಕಕಾಲತ್ತಾ ‘‘ಉಪಡ್ಢದಿವಸೋ ಗತೋ’’ತಿ ಆಹ, ತೇನ ಉಪಡ್ಢದಿವಸಮೇವ ಸಮಾದಿನ್ನತ್ತಾ ‘‘ಉಪಡ್ಢೂಪೋಸಥೋ’’ತಿ ತಂ ವೋಹರನ್ತೀತಿ ದಸ್ಸೇತಿ। ಧಮ್ಮಪದಟ್ಠಕಥಾಯಂ (ಧ॰ ಪ॰ ಅಟ್ಠ॰ ೧.೨ ಸಾಮಾವತೀವತ್ಥು) ರತ್ತಿಭಾಗೇನ ಉಪಡ್ಢೂಪೋಸಥೋ ವುತ್ತೋ, ಇಧ ಪನ ಮಜ್ಝನ್ಹಿಕತೋ ಪಟ್ಠಾಯ ದಿವಸಭಾಗೇನೇವ, ತದವಸೇಸದಿವಸರತ್ತಿಭಾಗೇನ ವಾ। ಅಸಮೇಪಿ ಹಿ ಭಾಗೇ ಉಪಡ್ಢಸದ್ದೋ ಪವತ್ತತಿ। ತದಹೇವಾತಿ ಅರುಣುಗ್ಗಮನಕಾಲಂ ಸನ್ಧಾಯ ವುತ್ತಂ।
‘‘ಘೋಸೋಪಿ ಖೋ ದುಲ್ಲಭೋ ಲೋಕಸ್ಮಿಂ ಯದಿದಂ ಬುದ್ಧೋ’’ತಿ ಸಞ್ಜಾತಪೀತಿಪಾಮೋಜ್ಜೋ। ತದಹೇವಾತಿ ಕೋಸಮ್ಬಿಂ ಪತ್ತದಿವಸತೋ ದುತಿಯದಿವಸೇಯೇವ। ತುರಿತಾತ್ಥಾತಿ ತುರಿತಾ ಅತ್ಥ, ಸೀಘಯಾಯಿನೋ ಭವಥಾತಿ ಅತ್ಥೋ। ಏಹಿಭಿಕ್ಖುಪಬ್ಬಜ್ಜಂ ಸನ್ಧಾಯ ‘‘ಪಬ್ಬಜಿತ್ವಾ’’ತಿ ವುತ್ತಂ। ಅರಹತ್ತನ್ತಿ ಚತುಪಟಿಸಮ್ಭಿದಾಸಮಲಙ್ಕತಂ ಅರಹನ್ತಭಾವಂ। ತೇಪಿ ಸೇಟ್ಠಿನೋ ಸೋತಾಪತ್ತಿಫಲೇ ಪತಿಟ್ಠಾಯ ಅಡ್ಢಮಾಸಮತ್ತಂ ದಾನಾನಿ ದತ್ವಾ ಪಚ್ಚಾಗಮ್ಮ ತಯೋ ವಿಹಾರೇ ಕಾರೇಸುಂ। ಭಗವಾ ಪನ ದೇವಸಿಕಂ ಏಕೇಕಸ್ಮಿಂ ವಿಹಾರೇ ವಸತಿ। ಯಸ್ಸ ಚ ವಿಹಾರೇ ವುತ್ಥೋ, ತಸ್ಸೇವ ಘರೇ ಪಿಣ್ಡಾಯ ಚರತಿ, ತದಾ ಪನ ಘೋಸಿತಸ್ಸ ವಿಹಾರೇ ವಿಹರತಿ। ತೇನ ವುತ್ತಂ ‘‘ಕೋಸಮ್ಬಿಯಂ ವಿಹರತಿ ಘೋಸಿತಾರಾಮೇ’’ತಿ।
ಬಾಹಿರಸಮಯಮತ್ತೇನ ಉಪಜ್ಝಾಯೋ, ನ ಸಾಸನೇ ವಿಯ ಉಪಜ್ಝಾಯಲಕ್ಖಣೇನ। ಉಪೇಚ್ಚ ಪರಸ್ಸ ವಾಚಾಯ ಆರಮ್ಭನಂ ಬಾಧನಂ ಉಪಾರಮ್ಭೋ, ದೋಸದಸ್ಸನವಸೇನ ಘಟ್ಟನನ್ತಿ ಅತ್ಥೋ। ತೇನಾಹ ‘‘ವಾದಂ ಆರೋಪೇತುಕಾಮಾ ಹುತ್ವಾ’’ತಿ। ವದನ್ತಿ ನಿನ್ದಾವಸೇನ ಕಥೇನ್ತಿ ಏತೇನಾತಿ ಹಿ ವಾದೋ, ದೋಸೋ, ತಮಾರೋಪೇತುಕಾಮಾ ಉಪರಿ ಪತಿಟ್ಠಪೇತುಕಾಮಾ ಹುತ್ವಾತಿ ಅತ್ಥೋ। ಕಥಮಾರೋಪೇತುಕಾಮಾತಿ ಆಹ ‘‘ಇತಿ ಕಿರಾ’’ತಿಆದಿ। ತಂ ಜೀವಂ ತಂ ಸರೀರನ್ತಿ ಯಂ ವತ್ಥು ಜೀವಸಞ್ಞಿತಂ, ತದೇವ ಸರೀರಸಞ್ಞಿತಂ। ಇದಞ್ಹಿ ‘‘ರೂಪಂ ಅತ್ತತೋ ಸಮನುಪಸ್ಸತೀ’’ತಿ ‘‘ಇಧೇವ ಸತ್ತೋ ಭಿಜ್ಜತೀ’’ತಿ। ಅಸ್ಸಾತಿ ಸಮಣಸ್ಸ ಗೋತಮಸ್ಸ। ಭಿಜ್ಜತೀತಿ ನಿರುದಯವಿನಾಸವಸೇನ ವಿನಸ್ಸತಿ। ತೇನ ಜೀವಿತಸರೀರಾನಂ ಅನಞ್ಞತ್ತಾನುಜಾನನತೋ, ಸರೀರಸ್ಸ ಚ ಭೇದದಸ್ಸನತೋ। ನ ಹೇತ್ಥ ಯಥಾ ದಿಟ್ಠಭೇದವತಾ ಸರೀರತೋ ಅನಞ್ಞತ್ತಾ ಅದಿಟ್ಠೋಪಿ ಜೀವಸ್ಸ ಭೇದೋ ವುತ್ತೋ, ಏವಂ ಅದಿಟ್ಠಭೇದವತಾ ಜೀವತೋ ಅನಞ್ಞತ್ತಾ ಸರೀರಸ್ಸಾಪಿ ಅಭೇದೋತಿ ಸಕ್ಕಾ ವತ್ತುಂ ತಸ್ಸ ಭೇದಸ್ಸ ಪಚ್ಚಕ್ಖಸಿದ್ಧತ್ತಾ, ಭೂತುಪಾದಾಯರೂಪವಿನಿಮುತ್ತಸ್ಸ ಚ ಸರೀರಸ್ಸ ಅಭಾವತೋತಿ ಇಮಿನಾ ಅಧಿಪ್ಪಾಯೇನಾಹ ‘‘ಉಚ್ಛೇದವಾದೋ ಹೋತೀ’’ತಿ।
ಅಞ್ಞಂ ಜೀವಂ ಅಞ್ಞಂ ಸರೀರನ್ತಿ ಅಞ್ಞದೇವ ವತ್ಥು ಜೀವಸಞ್ಞಿತಂ, ಅಞ್ಞಂ ಸರೀರಸಞ್ಞಿತಂ। ಇದಞ್ಹಿ ‘‘ರೂಪವನ್ತಂ ಅತ್ತಾನಂ ಸಮನುಪಸ್ಸತೀ’’ತಿಆದಿನಯಪ್ಪವತ್ತವಾದಂ ಗಹೇತ್ವಾ ವದನ್ತಿ। ರೂಪಭೇದಸ್ಸೇವ ದಿಟ್ಠತ್ತಾ ‘‘ಸತ್ತೋ ಸಸ್ಸತೋ ಆಪಜ್ಜತೀ’’ತಿ।
೩೭೯-೩೮೦. ತಯಿದಂ ನೇಸಂ ವಞ್ಝಾಪುತ್ತಸ್ಸ ದೀಘರಸ್ಸತಾದಿಪರಿಕಪ್ಪನಸದಿಸಂ, ತಸ್ಮಾಯಂ ಪಞ್ಹೋ ಠಪನೀಯೋ। ನ ಹೇಸ ಅತ್ಥನಿಸ್ಸಿತೋ, ನ ಧಮ್ಮನಿಸ್ಸಿತೋ, ನಾದಿಬ್ರಹ್ಮಚರಿಯಕೋ, ನ ನಿಬ್ಬಿದಾದಿಅತ್ಥಾಯ ಸಂವತ್ತತಿ। ಪೋಟ್ಠಪಾದಸುತ್ತಞ್ಚೇತ್ಥ ನಿದಸ್ಸನಂ। ತಂ ತತ್ಥ ರಾಜನಿಮೀಲನಂ ಕತ್ವಾ ‘‘ತೇನ ಹಾವುಸೋಸುಣಾಥಾ’’ತಿಆದಿನಾ ಸತ್ಥಾ ನೇಸಂ ಉಪರಿ ಧಮ್ಮದೇಸನಮಾರಭೀತಿ ಆಹ ‘‘ಅಥ ಭಗವಾ’’ತಿಆದಿ। ಸಸ್ಸತುಚ್ಛೇದದಿಟ್ಠಿಯೋ ದ್ವೇ ಅನ್ತಾ। ಅರಿಯಮಗ್ಗೋ ಮಜ್ಝಿಮಾ ಪಟಿಪದಾ। ತಸ್ಸಾಯೇವ ಪಟಿಪದಾಯಾತಿ ಮಿಚ್ಛಾಪಟಿಪದಾಯ ಏವ।
ಸದ್ಧಾಪಬ್ಬಜಿತಸ್ಸಾತಿ ಸದ್ಧಾಯ ಪಬ್ಬಜಿತಸ್ಸ ‘‘ಏವಮಹಂ ಇತೋ ವಟ್ಟದುಕ್ಖತೋ ನಿಸ್ಸರಿಸ್ಸಾಮೀ’’ತಿ ಪಬ್ಬಜ್ಜಮುಪಗತಸ್ಸ, ತದನುರೂಪಞ್ಚ ಸೀಲಂ ಪೂರೇತ್ವಾ ಪಠಮಜ್ಝಾನೇನ ಸಮಾಹಿತಚಿತ್ತಸ್ಸ। ಏತನ್ತಿ ಕಿಲೇಸವಟ್ಟಪರಿವುದ್ಧಿದೀಪನಂ ‘‘ತಂ ಜೀವಂ ತಂ ಸರೀರ’’ನ್ತಿಆದಿಕಂ ದಿಟ್ಠಿಸಂಕಿಲೇಸನಿಸ್ಸಿತವಚನಂ। ನಿಬ್ಬಿಚಿಕಿಚ್ಛೋ ನ ಹೋತೀತಿ ಧಮ್ಮೇಸು ತಿಣ್ಣವಿಚಿಕಿಚ್ಛೋ ನ ಹೋತಿ, ತತ್ಥ ತತ್ಥ ಆಸಪ್ಪನಪರಿಸಪ್ಪನವಸೇನ ಪವತ್ತತೀತಿ ಅತ್ಥೋ।
ಏತಮೇವಂ ಜಾನಾಮೀತಿ ಯೇನ ಸೋ ಭಿಕ್ಖು ಪಠಮಂ ಝಾನಂ ಉಪಸಮ್ಪಜ್ಜ ವಿಹರತಿ, ಏತಂ ಸಸಮ್ಪಯುತ್ತಂ ಧಮ್ಮಂ ‘‘ಮಹಗ್ಗತಚಿತ್ತ’’ನ್ತಿ ಏವಂ ಜಾನಾಮಿ। ತಥಾ ಹಿ ವುತ್ತಂ ‘‘ಮಹಗ್ಗತಚಿತ್ತಮೇತನ್ತಿ ಸಞ್ಞಂ ಠಪೇಸಿ’’ನ್ತಿ। ನೋ ಚ ಏವಂ ವದಾಮೀತಿ ಯಥಾ ದಿಟ್ಠಿಗತಿಕಾ ತಂ ಧಮ್ಮಜಾತಂ ಸನಿಸ್ಸಯಂ ಅಭೇದತೋ ಗಣ್ಹನ್ತಾ ‘‘ತಂ ಜೀವಂ ತಂ ಸರೀರ’’ನ್ತಿ, ತದುಭಯಂ ವಾ ಭೇದತೋ ಗಣ್ಹನ್ತಾ ‘‘ಅಞ್ಞಂ ಜೀವಂ ಅಞ್ಞ ಸರೀರ’’ನ್ತಿ ಅತ್ತನೋ ಮಿಚ್ಛಾಗಾಹಂ ಪವೇದೇನ್ತಿ, ಏವಮಹಂ ನ ವದಾಮಿ ತಸ್ಸ ಧಮ್ಮಸ್ಸ ಸುಪರಿಞ್ಞಾತತ್ತಾ। ತೇನಾಹ ‘‘ಅಥ ಖೋ’’ತಿಆದಿ। ಬಾಹಿರಕಾ ಯೇಭುಯ್ಯೇನ ಕಸಿಣಜ್ಝಾನಾನಿ ಏವ ನಿಬ್ಬತ್ತೇನ್ತೀತಿ ವುತ್ತಂ ‘‘ಕಸಿಣಪರಿಕಮ್ಮಂ ಭಾವೇನ್ತಸ್ಸಾ’’ತಿ। ಯಸ್ಮಾ ಭಾವನಾನುಭಾವೇನ ಝಾನಾಧಿಗಮೋ, ಭಾವನಾ ಚ ಪಥವೀಕಸಿಣಾದಿಸಞ್ಜಾನನಮುಖೇನ ಹೋತೀತಿ ಕತ್ವಾ ಸಞ್ಞಾಸೀಸೇನ ನಿದ್ದಿಸೀಯತಿ, ತಸ್ಮಾ ‘‘ಸಞ್ಞಾಬಲೇನ ಉಪ್ಪನ್ನ’’ನ್ತಿ ಆಹ। ತೇನ ವುತ್ತಂ ‘‘ಪಥವೀಕಸಿಣಮೇಕೋ ಸಞ್ಜಾನಾತೀ’’ತಿಆದಿ। ಯಸ್ಮಾ ಪನ ಭಗವತಾ ತತ್ಥ ತತ್ಥ ವಾರೇ ‘‘ಅಥ ಚ ಪನಾಹಂ ನ ವದಾಮೀ’’ತಿ ವುತ್ತಂ, ತಸ್ಮಾ ಭಗವತೋ ವಚನಮುಪದೇಸಂ ಕತ್ವಾ ನ ವತ್ತಬ್ಬಂ ಕಿರೇತಂ ಕೇವಲಿನಾ ಉತ್ತಮಪುರಿಸೇನಾತಿ ಅಧಿಪ್ಪಾಯೇನ ‘‘ನ ಕಲ್ಲಂ ತಸ್ಸೇತ’’ನ್ತಿ ಆಹಂಸು, ನ ಸಯಂ ಪಟಿಭಾನೇನಾತಿ ದಸ್ಸೇತುಂ ‘‘ಮಞ್ಞಮಾನಾ ವದನ್ತೀ’’ತಿ ವುತ್ತಂ। ಸೇಸಂ ಅನನ್ತರಸುತ್ತೇ ವುತ್ತನಯತ್ತಾ, ಪಾಕಟತ್ತಾ ಚ ಸುವಿಞ್ಞೇಯ್ಯಮೇವ।
ಇತಿ
ಜಾಲಿಯಸುತ್ತವಣ್ಣನಾ ನಿಟ್ಠಿತಾ।