೫. ಭಿಕ್ಖುನೀಸಂಯುತ್ತಂ
೧. ಆಳವಿಕಾಸುತ್ತವಣ್ಣನಾ
೧೬೨. ಆಳವಿಯಂ ಜಾತಾತಿ ಆಳವಿಯಂ ವಿಜಾಯಿತ್ವಾ ಸಂವಡ್ಢಮಾನಾ। ತೇನಾಹ ‘‘ಆಳವಿನಗರತೋಯೇವ ಚ ನಿಕ್ಖಮ್ಮ ಪಬ್ಬಜಿತಾ’’ತಿ। ಧನಂ ಸಮಾದಪೇತ್ವಾತಿ ಚೇತಿಯಸ್ಸ ರಾಜಾ ಏಕಂ ಮುಖಂ, ರಾಜಪುತ್ತೋ ಏಕಂ, ಅಮಚ್ಚಾನಂ ಜೇಟ್ಠಕೋ ಹುತ್ವಾ ಸೇನಾಪತಿ ಏಕಂ, ಜನಪದಾನಂ ಜೇಟ್ಠಕೋ ಹುತ್ವಾ ಸೇಟ್ಠಿ ಏಕನ್ತಿ ಏವಂ ಚತೂಸು ಮುಖೇಸು ನವಕಮ್ಮೇ ಕಯಿರಮಾನೇ ಸೇಟ್ಠಿನಾ ಗಹಿತಮುಖೇ ಕಮ್ಮೇ ಓಲೀಯಮಾನೇ ಏಕೋ ಉಪಾಸಕೋ ಅರಿಯಸಾವಕೋ ಪಞ್ಚ ಸಕಟಸತಾನಿ ಯೋಜಾಪೇತ್ವಾ ಜನಪದಂ ಗನ್ತ್ವಾ ‘‘ಯೋ ಯಂ ದಾತುಂ ಉಸ್ಸಹತಿ ಹಿರಞ್ಞಂ ವಾ ಸುವಣ್ಣಂ ವಾ ಸತ್ತವಿಧರತನಂ ವಾ ಹರಿತಾಲಂ ವಾ ಮನೋಸಿಲಂ ವಾ, ಸೋ ಧನಂ ದೇತೂ’’ತಿ ಸಮಾದಪೇತ್ವಾ ಯಥಾಲದ್ಧಂ ಪಠಮಂ ಕಮ್ಮಟ್ಠಾನಂ ಪೇಸೇತ್ವಾ ‘‘ನವಕಮ್ಮಂ ನಿಟ್ಠಿತ’’ನ್ತಿ ಸುತ್ವಾ ಏಕಕಂ ಆಗಚ್ಛನ್ತಂ ಅನ್ತರಾಮಗ್ಗೇ ಚೋರಾ ಪಲಿಬುನ್ಧಿತ್ವಾ ತತೋ ಕಿಞ್ಚಿಪಿ ಧನಂ ಅಲಭನ್ತಾ ‘‘ಸಚೇ ನಂ ಮುಞ್ಚಿಸ್ಸಾಮ, ಅನತ್ಥಂ ನೋ ಕರೇಯ್ಯಾ’’ತಿ ಜೀವಿತಾ ವೋರೋಪೇಸುಂ। ಅನಪರಾಧೇ ಅರಿಯಸಾವಕೇ ಅಪರಾಧಕಾ ತೇ ಚೋರಾ ಅನ್ಧಾ ಜಾತಾ, ತಸ್ಮಾ ತಂ ಠಾನಂ ‘‘ಅನ್ಧವನ’’ನ್ತಿ ಪಞ್ಞಾಯಿತ್ಥಾತಿ ಅಟ್ಠಕಥಾಯಂ ವುತ್ತಂ। ಖೀಣಾಸವಾನಂ ಯಸ್ಮಾ ಯತ್ಥ ಕತ್ಥಚಿ ಚಿತ್ತವಿವೇಕೋ ಹೋತಿಯೇವ ಉಪಧಿವಿವೇಕಸ್ಸ ಸಿದ್ಧತ್ತಾ। ತಸ್ಮಾ ‘‘ಕಾಯವಿವೇಕತ್ಥಿನೀ’’ತಿ ವುತ್ತಂ।
ನಿಸ್ಸರಣನ್ತಿ ನಿಬ್ಬಾನಂ ಸಬ್ಬಸಙ್ಖತಸ್ಸ ನಿಸ್ಸಟತ್ತಾ। ಪಚ್ಚವೇಕ್ಖಣಞಾಣೇನಾತಿ ಪಚ್ಚವೇಕ್ಖಣಞಾಣೇನ, ಪಗೇವ ಮಗ್ಗಫಲಞಾಣೇಹೀತಿ ಅಧಿಪ್ಪಾಯೋ। ನಿಬ್ಬಾನಪದನ್ತಿ ನಿಬ್ಬಾನಸಙ್ಖಾತಂ ಧಮ್ಮಕೋಟ್ಠಾಸಂ। ವಿನಿವಿಜ್ಝನಟ್ಠೇನಾತಿ ಹದಯಂ ವಿನಿವಿದ್ಧೇನ ಹದಯಮ್ಹಿ ವಿಜ್ಝಿತ್ವಾ ದುಕ್ಖುಪ್ಪಾದನೇನ ಖನ್ಧಾನಂ ಏತೇ ಪಞ್ಚ ಕಾಮಾ ಸತ್ತಿಸೂಲಸದಿಸಾ। ಅಧಿಕುಟ್ಟನಭಣ್ಡಿಕಾತಿ ಆಘಾತನಘಟಿಕಾ।
ಆಳವಿಕಾಸುತ್ತವಣ್ಣನಾ ನಿಟ್ಠಿತಾ।
೨. ಸೋಮಾಸುತ್ತವಣ್ಣನಾ
೧೬೩. ಠಾನನ್ತಿ ದುಪ್ಪಸಹಂ ಅಕಮ್ಪಿಯಭಾವತ್ತಾ। ದ್ವಙ್ಗುಲಪಞ್ಞಾಯಾತಿ ಏತ್ಥ ಇತ್ಥಿಯೋ ಹಿ ದಹರಕುಮಾರಿಕಾಕಾಲತೋ ಪಟ್ಠಾಯ ‘‘ದ್ವಙ್ಗುಲಪಞ್ಞಾ’’ತಿ ವುಚ್ಚನ್ತಿ। ಫಲಸಮಾಪತ್ತಿಞಾಣಪ್ಪವತ್ತಿಕಿತ್ತನೇನ ಚತೂಸು ಸಚ್ಚೇಸು ಅಸಮ್ಮೋಹವಿಹಾರೋ ದೀಪಿತೋ ಹೋತೀತಿ ಆಹ ‘‘ಞಾಣಮ್ಹಿ ವತ್ತಮಾನಮ್ಹೀತಿ ಫಲಸಮಾಪತ್ತಿಞಾಣೇ ಪವತ್ತಮಾನೇ’’ತಿ। ವಿಪಸ್ಸನ್ತಸ್ಸಾತಿ ಅಸಮ್ಮೋಹಪಟಿವೇಧತೋ ವಿಸೇಸೇನ ಪಸ್ಸನ್ತಸ್ಸ ಖನ್ಧಪಞ್ಚಕಮೇವ ಸಚ್ಚಾಭಿಸಮಯತೋ ಪುಬ್ಬಭಾಗೇ ವಿಪಸ್ಸನ್ತಸ್ಸ। ಅಞ್ಞಂ ವಾತಿ ಇತ್ಥಿಪುರಿಸತೋ ಅಞ್ಞಂ ವಾ ಕಿಞ್ಚಿ ವತ್ಥುಂ। ‘‘ಅಹಂ ಅಸ್ಮೀ’’ತಿ ಮಾನದಿಟ್ಠಿಗಾಹತಣ್ಹಾಗಾಹವಸೇನ ಗಹಿತವತ್ಥುಸ್ಮಿಂ ಯೇವಾತಿ ಆಹ ‘‘ಅಹಂ ಅಸ್ಮೀತಿ ತಣ್ಹಾಮಾನದಿಟ್ಠಿವಸೇನಾ’’ತಿ।
ಸೋಮಾಸುತ್ತವಣ್ಣನಾ ನಿಟ್ಠಿತಾ।
೩. ಕಿಸಾಗೋತಮೀಸುತ್ತವಣ್ಣನಾ
೧೬೪. ‘‘ಕಿಸಾಗೋತಮೀ’’ತಿ ಏತ್ಥ ಕಾ ಪನಾಯಂ ಕಿಸಾಗೋತಮೀ, ಕಿಸ್ಸ ಅಯಂ ಭಿಕ್ಖುನೀ ಹುತ್ವಾ ಸಮಣಧಮ್ಮಂ ಮತ್ಥಕಂ ಪಾಪೇಸೀತಿ ತಮತ್ಥಂ ವಿಭಾವೇತುಂ ‘‘ಪುಬ್ಬೇ ಕಿರಾ’’ತಿಆದಿಮಾರದ್ಧಂ। ಅಙ್ಗಾರಾವಾತಿ ಅದ್ದಾರಿಟ್ಠಕವಣ್ಣಅಙ್ಗಾರಾ ಏವ ಜಾತಾ। ದಾರುಸಾಕನ್ತಿ ಅದ್ಧಮಾಸಕೇನ ದಾರುಂ ಸಾಕಞ್ಚ ಆಹರಿಸ್ಸಾಮೀತಿ ಅನ್ತರಾಪಣೇ ಅನ್ತರವೀಥಿಂ ಗತಾ।
ಸಿದ್ಧತ್ಥಕನ್ತಿ ಸಾಸಪಂ। ಸಾಲಾಯನ್ತಿ ಅನಾಥಸಾಲಾಯಂ। ಖುರಗ್ಗೇಯೇವಾತಿ ಖುರಸಿಖೇ ಏವ, ಕೇಸೋರೋಹನಕ್ಖಣೇ ಏವಾತಿ ಅತ್ಥೋ।
ಏಕಮಾಸೀತಿ ಏತ್ಥ ಮ-ಕಾರೋ ಪದಸನ್ಧಿಕರೋ। ಸಂಹಿತಾವಸೇನ ಚ ಪುರಿಮಪದೇ ವಾ ರಸ್ಸತ್ತಂ। ಪರಪದೇ ವಾ ದೀಘತ್ತನ್ತಿ ಆಹ ‘‘ಏಕಾ ಆಸೀ’’ತಿ। ಭಾವನಪುಂಸಕಮೇತಂ ‘‘ಏಕಮನ್ತಂ ನಿಸೀದೀ’’ತಿಆದೀಸು ವಿಯ। ಪುತ್ತಮರಣಂ ಅನ್ತಂ ಅತೀತಂ ಇದಾನಿ ಪುತ್ತಮರಣಸ್ಸ ಅಭಾವತೋ। ತೇನೇವಾಹ ‘‘ಪುತ್ತಮರಣಂ ನಾಮ ನತ್ಥೀ’’ತಿ। ಪುರಿಸಂ ಗವೇಸಿತುನ್ತಿ ಯಥಾ ಮಯ್ಹಂ ಪುರಿಸಗವೇಸನಾ ನಾಮ ಸಬ್ಬಸೋ ನತ್ಥಿ, ತಥಾ ಏವ ಪುತ್ತಗವೇಸನಾಪಿ ನತ್ಥಿ, ತಸ್ಮಾ ಮೇ ಪುತ್ತಮರಣಂ ಏತದನ್ತಂ, ಸಬ್ಬೇಸು ಖನ್ಧಾದೀಸು ಭವಾದೀಸು ಚ ತಣ್ಹಾನನ್ದಿಯಾ
ಕಿಸಾಗೋತಮೀಸುತ್ತವಣ್ಣನಾ ನಿಟ್ಠಿತಾ।
೪. ವಿಜಯಾಸುತ್ತವಣ್ಣನಾ
೧೬೫. ಪಞ್ಚ ಅಙ್ಗಾನಿ ಏತಸ್ಸಾತಿ ಪಞ್ಚಙ್ಗಂ, ಪಞ್ಚಙ್ಗಮೇವ ಪಞ್ಚಙ್ಗಿಕಂ, ತೇನ ಪಞ್ಚಙ್ಗಿಕೇನ। ಆತತನ್ತಿಆದೀಸು ಆತತಂ ನಾಮ ಚಮ್ಮಪರಿಯೋನದ್ಧೇಸು ಭೇರಿಆದೀಸು ಏಕತಲಂ ತೂರಿಯಂ। ವಿತತಂ ನಾಮ ಉಭಯತಲಂ। ಆತತವಿತತಂ ನಾಮ ತನ್ತಿಬದ್ಧವೀಣಾದಿ। ಸುಸಿರಂ ವಂಸಾದಿ। ಘನಂ ಸಮ್ಮಾದಿ। ತತಆದಿವಿಸೇಸೋಪಿ ಆತತಮೇವಾತಿ ‘‘ಚಮ್ಮಪರಿಯೋನದ್ಧೇಸೂ’’ತಿ ವಿಸೇಸನಂ। ಏಕತಲಂ ಕುಮ್ಭಥೂಣದದ್ದರಾದಿ। ಉಭಯತಲಂ ಭೇರಿಮುದಿಙ್ಗಾದಿ। ಚಮ್ಮಪರಿಯೋನದ್ಧಂ ಸೇಸಂ ತನ್ತಿಬದ್ಧಂ ಸಬ್ಬಂ ಆತತವಿತತಂ ನಾಮ, ಗೋಮುಖೀಆದೀನಮ್ಪಿ ಏತ್ಥೇವ ಸಙ್ಗಹೋ ದಟ್ಠಬ್ಬೋ। ವಂಸಾದೀತಿ ಆದಿಸದ್ದೇನ ಸಙ್ಖಸಿಙ್ಗಾನಮ್ಪಿ ಸಙ್ಗಹೋ। ಸಮ್ಮತಾಳ-ಕಂಸತಾಳ-ಸಿಲಾತಾಳ-ಸಲಾಕತಾಳಾದಿ ಸಮ್ಮಾದಿ ನಾಮ। ತತ್ಥ ಸಮ್ಮತಾಳಂ ನಾಮ ದಣ್ಡಮಯತಾಳಂ, ಕಂಸಮಯತಾಳಂ ಕಂಸತಾಳಂ, ಸಿಲಾಯಂ ಅಯೋಪತ್ತೇನ ಚ ತಾಳನತಾಳಂ। ಸಬ್ಬೇ ಕಾಮಗುಣೇ। ಉಗ್ಘರಿತಪಗ್ಘರಿತಟ್ಠೇನಾತಿ ಉಪರಿ ಘರಣೇನ ಚ ವಿಸ್ಸನ್ದನೇನ ಚ। ಏವನ್ತಿ ‘‘ಇಮಿನಾ ಪೂತಿಕಾಯೇನಾ’’ತಿ। ಅರೂಪಟ್ಠಾಯಿನೋತಿ ಸತ್ತಾಧಿಟ್ಠಾನೇನಾಯಂ ಧಮ್ಮದೇಸನಾತಿ ಆಹ ‘‘ಸಬ್ಬತ್ಥಾತಿ ಸಬ್ಬೇಸು ರೂಪಾರೂಪಭವೇಸೂ’’ತಿ। ತೇಸಂ ದ್ವಿನ್ನಂ ರೂಪಾರೂಪಭವಾನಂ ಗಹಿತತ್ತಾ। ಭವಭಾವಸಾಮಞ್ಞತೋ, ತದಧಿಟ್ಠಾನತೋ ಗಹಿತೇ ಕಾಮಭವೇ। ಅವಿಜ್ಜಾತಮೋ ವಿಹತೋ ಅಗ್ಗಮಗ್ಗೇನ ಸಮುಗ್ಘಾತಿತತ್ತಾ।
ವಿಜಯಾಸುತ್ತವಣ್ಣನಾ ನಿಟ್ಠಿತಾ।
೫. ಉಪ್ಪಲವಣ್ಣಾಸುತ್ತವಣ್ಣನಾ
೧೬೬. ಅಗ್ಗತೋ ಪಟ್ಠಾಯಾತಿ ಸಬ್ಬಅಗ್ಗತೋ ಪಭುತಿ ಯಾವ ಮೂಲಾ ಅನ್ತರಾಯುತ್ತಂ ಸಮ್ಮದೇವ ಪುಪ್ಫಿತಂ ಸಾಲರುಕ್ಖಂ। ವಣ್ಣಧಾತುಸೀಸೇನ ವಣ್ಣಧಾತುಸಮ್ಪನ್ನಂ ದುತಿಯಂ ಭಿಕ್ಖುನಿಂ ವದತೀತಿ ಆಹ ‘‘ತಯಾ ಸದಿಸಾ ಅಞ್ಞಾ ಭಿಕ್ಖುನೀ ನತ್ಥೀ’’ತಿ। ಪಖುಮಸೀಸೇನ ಅಕ್ಖಿಭಣ್ಡಂ ವುಚ್ಚತೀತಿ ಆಹ ‘‘ಪಖುಮನ್ತರಿಕಾಯನ್ತಿ ದ್ವಿನ್ನಂ ಅಕ್ಖೀನಂ ಮಜ್ಝೇ’’ತಿ। ನಾಸವಂಸೇತಿ ನಾಸವಂಸಮೂಲೇ। ‘‘ನ ಪಸ್ಸಸೀ’’ತಿ ವತ್ವಾ ಅದಸ್ಸನೇ ಕಾರಣಂ ಆಹ ‘‘ವಸೀಭೂತಮ್ಹೀ’’ತಿ।
ಉಪ್ಪಲವಣ್ಣಾಸುತ್ತವಣ್ಣನಾ ನಿಟ್ಠಿತಾ।
೬. ಚಾಲಾಸುತ್ತವಣ್ಣನಾ
೧೬೭. ಇದನ್ತಿ ಗಾಹಾಪೇಸೀತಿ ಸಮಾದಾಪೇಸಿ ‘‘ಜಾತಿಂ ಮಾ ರೋಚಾ’’ತಿ। ಅಞ್ಞನ್ತಿ ಬನ್ಧವಧತೋ ಅಞ್ಞಂ ಛೇದನಾದಿಂ। ನಿವೇಸೇಸೀತಿ ಪವಿಸಾಪೇಸಿ।
ಚಾಲಾಸುತ್ತವಣ್ಣನಾ ನಿಟ್ಠಿತಾ।
೭. ಉಪಚಾಲಾಸುತ್ತವಣ್ಣನಾ
೧೬೮. ಪುನಪ್ಪುನಂ…ಪೇ॰… ಆಗಚ್ಛನ್ತಿ ಕಾರಣಸ್ಸ ಅಸಮೂಹತತ್ತಾ। ಸನ್ತಾಪಿತೋ ಕಿಲೇಸಸನ್ತಾಪೇಹಿ। ಅಗತೀತಿ ಅವಿಸಯೋ।
ಉಪಚಾಲಾಸುತ್ತವಣ್ಣನಾ ನಿಟ್ಠಿತಾ।
೮. ಸೀಸುಪಚಾಲಾಸುತ್ತವಣ್ಣನಾ
೧೬೯. ಸಮಣಿಸದಿಸಾತಿ ಸಮಣಲಿಙ್ಗಸ್ಸ ಧಾರಣೇನ ಸಮಣಿಸದಿಸಾ, ಕಸ್ಸಚಿಪಿ ಪಾಸಣ್ಡಸ್ಸ ಅರುಚ್ಚನತೋ ಮೋನಮಗ್ಗಸ್ಸ ಅಪ್ಪಟಿಪಜ್ಜನತೋ ತವ ಸಮಣಿಭಾವಂ ನಾನುಪಸ್ಸಾಮೀತಿ ಅಧಿಪ್ಪಾಯೋ। ಪಾಸಂ ಡೇನ್ತೀತಿ ಪಾಸಂ ಸಜ್ಜೇನ್ತಿ, ಯಥಾ ‘‘ಚಿತ್ತೇಸು ದಿಟ್ಠಿಪಾಸಂ ಖಿಪನ್ತೀತಿ ಅತ್ಥೋ’’ತಿ। ಪಾಸೇ ಮೋಚೇತೀತಿ ದಿಟ್ಠಿಪಾಸೇ ಸತ್ತಾನಂ ಚಿತ್ತಸನ್ತಾನತೋ ನೀಹರತಿ ಧಮ್ಮಸುಧಮ್ಮತಾಯ। ತಸ್ಮಾತಿ ಪಾಸಮೋಚನತೋ ಪಾಸಣ್ಡೋತಿ ನ ವುಚ್ಚತಿ। ‘‘ಇತೋ ಬಹಿದ್ಧಾಯೇವ ಪಾಸಣ್ಡಾ ಹೋನ್ತೀ’’ತಿ ವುತ್ತಸ್ಸ ಅತ್ಥಸ್ಸ ನಿಗಮನಂ। ಏವಞ್ಚ ಕತ್ವಾ ಸಬ್ಬೇಪಿ ಬಾಹಿರಕಸಮಯೇ ಸನ್ಧಾಯ ಚೂಳಸೀಹನಾದಸುತ್ತೇ ‘‘ಛನ್ನವುತಿ ಪಾಸಣ್ಡಾ’’ತಿ ವುತ್ತಂ। ಪಸೀದನ್ತೀತಿ ದಿಟ್ಠಿಪಙ್ಕೇ ಸಂಸಾರಪಙ್ಕೇ ಚ ಪಕಾರೇಹಿ ಅಗಾಧಾ ಓಸೀದನ್ತಿ।
ಅಭಿಭವಿತ್ವಾತಿ ಸಬ್ಬಸಂಕಿಲೇಸಪ್ಪಹಾನೇನ ಅಭಿಭುಯ್ಯ ಅತಿಕ್ಕಮಿತ್ವಾ। ಅಜಿತೋತಿ ಅಜಿನಿ ಅವಿಜಯತ್ತಾ। ಸಬ್ಬಾನಿ ಅಕುಸಲಕಮ್ಮಾನಿ ಕುಸಲಕಮ್ಮಾನಿ ಚ ಖೀಣಾನಿ ಏತ್ಥಾತಿ ಸಬ್ಬಕಮ್ಮಕ್ಖಯೋ, ಅರಹತ್ತಂ। ಉಪಧಯೋ ಸಮ್ಮದೇವ ಖೀಯನ್ತಿ ಏತ್ಥಾತಿ ಉಪಧಿಸಙ್ಖಯೋ, ನಿಬ್ಬಾನಂ।
ಸೀಸುಪಚಾಲಾಸುತ್ತವಣ್ಣನಾ ನಿಟ್ಠಿತಾ।
೯. ಸೇಲಾಸುತ್ತವಣ್ಣನಾ
೧೭೦. ಕೇನಿದಂ ಪಕತಂ ಬಿಮ್ಬನ್ತಿ ಇದಂ ಅತ್ತಭಾವಸಞ್ಞಿತಂ ಬಿಮ್ಬಂ ಬ್ರಹ್ಮಾ-ವಿಸಣುಪುರಿಸ-ಪಜಾಪತಿಆದೀಸು ಕೇನ ಕತಂ ನಿಮ್ಮಿತಂ ನಿಬ್ಬತ್ತಿತನ್ತಿ ಕತ್ತಬ್ಬಮೋಹಂ ನಾಮ ಕಾತುಕಾಮೋ ಪುಚ್ಛತಿ। ಅಘನ್ತಿ ಅಘವತ್ಥು। ತೇನಾಹ ‘‘ದುಕ್ಖಪತಿಟ್ಠಾನತ್ತಾ’’ತಿ। ಹೇತುನಿರೋಧೇನಾತಿ ತಣ್ಹಾಸಙ್ಖತಸ್ಸ ಹೇತುನೋ ಅನುಪ್ಪಾದನಿರೋಧೇನ। ಪಚ್ಚಯವೇಕಲ್ಲೇನಾತಿ ತದವಸಿಟ್ಠಕಿಲೇಸಾಭಿಸಙ್ಖಾರಾದಿಪಚ್ಚಯಸ್ಸ ವೇಕಲ್ಲಭಾವೇನ, ಅಪಚ್ಚಯಭಾವೂಪಗಮನೇನಾತಿ ಅತ್ಥೋ।
ಸೇಲಾಸುತ್ತವಣ್ಣನಾ ನಿಟ್ಠಿತಾ।
೧೦. ವಜಿರಾಸುತ್ತವಣ್ಣನಾ
೧೭೧. ಸುದ್ಧಸಙ್ಖಾರಪುಞ್ಜೇತಿ ರೂಪಾರೂಪವಿಭಾಗೇ ಕಿಲೇಸಸಙ್ಖಾರಸಮೂಹೇ। ಪರಮತ್ಥತೋತಿ ಸಭಾವೇನ। ಯಥಾ ನ ಹಿ ಸತ್ತಸಞ್ಞಿತಸಙ್ಖಾರಪುಞ್ಜೋ ನಾಮ ಪರಮತ್ಥತೋ ವಿಜ್ಜಮಾನೇಸೂತಿ ಯಥಾಪಚ್ಚಯಸಮ್ಪತ್ತಿಯಾ ಲಬ್ಭಮಾನೇಸು। ತೇನಾಕಾರೇನಾತಿ ಇತ್ಥಿಪುರಿಸಾದಿಆಕಾರೇನ। ವವತ್ಥಿತೇಸೂತಿ ಪಚ್ಚೇಕಂ ಪಚ್ಚಯವಿಸೇಸಸಮುಟ್ಠಿತಂ ಸಣ್ಠಾನವಿಸೇಸಂ ಉಪಾದಾಯ ‘‘ಪುರಿಸೋ ಹತ್ಥೀ ಅಸ್ಸೋ’’ತಿಆದಿನಾ ಅಭಿಸಙ್ಗತೋ ಪವತ್ತೇಸು। ಸಮ್ಮುತೀತಿ ಸತ್ತೋತಿ ವೋಹಾರೋ। ತೇನಾಹ ‘‘ಸಮಞ್ಞಾಮತ್ತಮೇವಾ’’ತಿ। ಪಞ್ಚಕ್ಖನ್ಧದುಕ್ಖನ್ತಿ ಪಞ್ಚಕ್ಖನ್ಧಸಞ್ಞಿತಂ ದುಕ್ಖಂ। ವುತ್ತಂ ಹೇತಂ ಭಗವತಾ ‘‘ಸಂಖಿತ್ತೇನ ಪಞ್ಚುಪಾದಾನಕ್ಖನ್ಧಾ ದುಕ್ಖಾ’’ತಿ (ದೀ॰ ನಿ॰ ೨.೩೮೭; ಮ॰ ನಿ॰ ೧.೧೨೦; ೩.೩೭೩; ವಿಭ॰ ೨೦೨) ಅಞ್ಞೋ ನೇವ ಸಮ್ಭೋತಿ ಯಥಾವುತ್ತದುಕ್ಖತೋ ಅಞ್ಞಸ್ಸ ಸಙ್ಖತಧಮ್ಮಸ್ಸ ಅಭಾವತೋ। ನ ನಿರುಜ್ಝತೀತಿ ತತೋ ಅಞ್ಞಂ ನ ನಿರುಜ್ಝತಿ, ಉಪ್ಪಾದತೋ ಹೋತಿ ನಿರೋಧೋತಿ।
ವಜಿರಾಸುತ್ತವಣ್ಣನಾ ನಿಟ್ಠಿತಾ।
ಸಾರತ್ಥಪ್ಪಕಾಸಿನಿಯಾ ಸಂಯುತ್ತನಿಕಾಯ-ಅಟ್ಠಕಥಾಯ
ಭಿಕ್ಖುನೀಸಂಯುತ್ತವಣ್ಣನಾಯ ಲೀನತ್ಥಪ್ಪಕಾಸನಾ ಸಮತ್ತಾ।