೪. ಅನಮತಗ್ಗಸಂಯುತ್ತಂ
೧. ಪಠಮವಗ್ಗೋ
೧. ತಿಣಕಟ್ಠಸುತ್ತವಣ್ಣನಾ
೧೨೪. ಉಪಸಗ್ಗೋ ‘‘ಞಾಣೇನ ಅನುಗನ್ತ್ವಾಪೀ’’ತಿ। ವಸ್ಸಸತಂ ವಸ್ಸಸಹಸ್ಸನ್ತಿ ನಿದಸ್ಸನಮತ್ತಮೇತಂ, ತತೋ ಭಿಯ್ಯೋಪಿ ಅನುಗನ್ತ್ವಾ ಅನಮತಗ್ಗೋ ಏವ ಸಂಸಾರೋ। ಅಗ್ಗ-ಸದ್ದೋ ಇಧ ಮರಿಯಾದವಚನೋ, ಅನುದ್ದೇಸಿಕಞ್ಚೇತಂ ವಚನನ್ತಿ ಆಹ ‘‘ಅಪರಿಚ್ಛಿನ್ನಪುಬ್ಬಾಪರಕೋಟಿಕೋ’’ತಿ। ಅಞ್ಞಥಾ ಅನ್ತಿಮಭವಿಕಪರಿಚ್ಛಿನ್ನಕತವಿಮುತ್ತಿಪರಿಪಾಚನೀಯಧಮ್ಮಾದೀನಂ ವಸೇನ ಅಪರಿಚ್ಛಿನ್ನಪುಬ್ಬಾಪರಕೋಟಿ ನ ಸಕ್ಕಾ ವತ್ತುಂ। ಸಂಸರಣಂ ಸಂಸಾರೋ। ಪಚ್ಛಿಮಾಪಿ ನ ಪಞ್ಞಾಯತಿ ಅನ್ಧಬಾಲಾನಂ ವಸೇನಾತಿ ಅಧಿಪ್ಪಾಯೋ। ತೇನಾಹ ಭಗವಾ ‘‘ದೀಘೋ ಬಾಲಾನ ಸಂಸಾರೋ’’ತಿ (ಧ॰ ಪ॰ ೬೦)। ವೇಮಜ್ಝೇಯೇವ ಪನ ಸತ್ತಾ ಸಂಸರನ್ತಿ ಪುಬ್ಬಾಪರಕೋಟೀನಂ ಅಲಬ್ಭನೀಯತ್ತಾ। ಅತ್ಥೋ ಪರಿತ್ತೋ ಹೋತಿ ಯಥಾಭೂತಾವಬೋಧಾಭಾವತೋ। ಬುದ್ಧಸಮಯೇತಿ ಸಾಸನೇತಿ ಅತ್ಥೋ। ಅತ್ಥೋ ಮಹಾ ಯಥಾಭೂತಾವಬೋಧಿಸಮ್ಭವತೋ, ಅತ್ಥಸ್ಸ ವಿಪುಲತಾಯ ತಂಸದಿಸಾ ಉಪಮಾ ನತ್ಥೀತಿ ಪರಿತ್ತಂಯೇವ ಉಪಮಂ ಆಹರನ್ತೀತಿ ಅಧಿಪ್ಪಾಯೋ। ಇದಾನಿ ವುತ್ತಮೇವತ್ಥಂ ‘‘ಪಾಳಿಯಂ ಹೀ’’ತಿಆದಿನಾ ಸಮತ್ಥೇತಿ। ಮಾತು ಮಾತರೋತಿ ಮಾತು ಮಾತಾಮಹಿಯೋ। ತಸ್ಸೇವಾತಿ ದುಕ್ಖಸ್ಸೇವ। ತಿಬ್ಬನ್ತಿ ದುಕ್ಖಪರಿಯಾಯೋತಿ।
ತಿಣಕಟ್ಠಸುತ್ತವಣ್ಣನಾ ನಿಟ್ಠಿತಾ।
೨. ಪಥವೀಸುತ್ತವಣ್ಣನಾ
೧೨೫. ಮಹಾಪಥವಿನ್ತಿ ಅವಿಸೇಸೇನ ಅನವಸೇಸಪರಿಯಾದಾಯಿನೀತಿ ಆಹ ‘‘ಚಕ್ಕವಾಳಪರಿಯನ್ತ’’ನ್ತಿ। ಪರಿಕಪ್ಪವಚನಞ್ಚೇತಂ।
ಪಥವೀಸುತ್ತವಣ್ಣನಾ ನಿಟ್ಠಿತಾ।
೩. ಅಸ್ಸುಸುತ್ತವಣ್ಣನಾ
೧೨೬. ಕನ್ದನಂ ‘‘ಕನ್ದನ್ತಾನನ್ತಿ ಸಸದ್ದಂ ರುದಮಾನಾನ’’ನ್ತಿ। ಪವತ್ತನ್ತಿ ಸನ್ದನವಸೇನ ಪವತ್ತಂ। ‘‘ಸಿನೇರುರಸ್ಮೀಹಿ ಪರಿಚ್ಛಿನ್ನೇಸೂ’’ತಿ ಸಙ್ಖೇಪೇನ ವುತ್ತಮತ್ಥಂ ವಿವರನ್ತೋ ‘‘ಸಿನೇರುಸ್ಸಾ’’ತಿಆದಿಮಾಹ। ಮಣಿಮಯನ್ತಿ ಇನ್ದನೀಲಮಣಿಮಯಂ। ಸಿನೇರುಸ್ಸ ಪುಬ್ಬದಕ್ಖಿಣಕೋಣಸಮಪದೇಸಾ ‘‘ಪುಬ್ಬದಕ್ಖಿಣಪಸ್ಸಾ’’ತಿ ಅಧಿಪ್ಪೇತಾ। ತೇಹಿ ನಿಕ್ಖನ್ತರಜತರಸ್ಮಿಯೋ ಇನ್ದನೀಲರಸ್ಮಿಯೋ ಚ ಏಕತೋ ಹುತ್ವಾ। ತಾಸಂ ರಸ್ಮೀನಂ ಅನ್ತರೇಸೂತಿ ತಾಸಂ ಚತೂಹಿ ಕೋಣೇಹಿ ನಿಕ್ಖನ್ತರಸ್ಮೀನಂ ಚತೂಸು ಅನ್ತರೇಸು। ಚತ್ತಾರೋತಿ ದಕ್ಖಿಣಾದಿಭೇದಾ ಚತ್ತಾರೋ ಮಹಾಸಮುದ್ದಾ ಹೋನ್ತಿ। ವಿಅಸನನ್ತಿ ವಿಸೇಸೇನ ಖೇಪನಂ। ಕಿಂ ಪನ ತನ್ತಿ ಆಹ ‘‘ವಿನಾಸೋತಿ ಅತ್ಥೋ’’ತಿ।
ಅಸ್ಸುಸುತ್ತವಣ್ಣನಾ ನಿಟ್ಠಿತಾ।
೪. ಖೀರಸುತ್ತವಣ್ಣನಾ
೧೨೭. ಮಾತುಥಞ್ಞನ್ತಿ ಪೀತಂ ಮಾತುಯಾ ಥನತೋ ನಿಬ್ಬತ್ತಖೀರಂ ಬಹುತರನ್ತಿ ವೇದಿತಬ್ಬಂ।
ಖೀರಸುತ್ತವಣ್ಣನಾ ನಿಟ್ಠಿತಾ।
೫. ಪಬ್ಬತಸುತ್ತವಣ್ಣನಾ
೧೨೮. ‘‘ಅನಮತಗ್ಗಸ್ಸ ಸಂಸಾರಸ್ಸ ದೀಘತಮತ್ತಾ ನ ಸುಕರಂ ನಸುಕರ’’ನ್ತಿ ಅಟ್ಠಕಥಾಪಾಠೋ। ಕಥಂ ನಚ್ಛಿನ್ದತೀತಿ ಕಥಂ ನ ಪರಿಯೋಸಾಪೇತಿ, ಕಾಯಚಿಪಿ ಗಹಣತಾಯಾತಿ ಅಧಿಪ್ಪಾಯೋ। ತಯೋ ಕಪ್ಪಾಸಂಸೂತಿ ತಯೋ ಏಕಕಪ್ಪಾಸಂಸೂ। ಯೇಹಿ ನಂ ಫುಟ್ಠಂ, ತತೋಪಿ ಸುಖುಮತರಂ ಸಾಸಪಮತ್ತಂ ಖೀಯೇಯ್ಯ ಪಬ್ಬತಂ ಸಬ್ಬಭಾಗೇಹಿ ಅತಿಚಿರವೇಲಂ ಪರಿಮಜ್ಜನ್ತೇ।
ಪಬ್ಬತಸುತ್ತವಣ್ಣನಾ ನಿಟ್ಠಿತಾ।
೬. ಸಾಸಪಸುತ್ತವಣ್ಣನಾ
೧೨೯. ನಗರನ್ತಿ ‘‘ನ ಪನ…ಪೇ॰… ದಟ್ಠಬ್ಬ’’ನ್ತಿ।
ಸಾಸಪಸುತ್ತವಣ್ಣನಾ ನಿಟ್ಠಿತಾ।
೭. ಸಾವಕಸುತ್ತವಣ್ಣನಾ
೧೩೦. ತಸ್ಸ ಠಿತಟ್ಠಾನತೋತಿ ಭಿಕ್ಖುನೋ ಅನುಸ್ಸರಿತ್ವಾ ಠಿತಟ್ಠಾನತೋ, ತೇನ ಅನುಸ್ಸರಿತಸ್ಸ ಸತಸಹಸ್ಸಕಪ್ಪಸ್ಸ ಅನನ್ತರಕಪ್ಪತೋ ಪಟ್ಠಾಯಾತಿ ಅತ್ಥೋ। ಏವನ್ತಿ ವುತ್ತಪ್ಪಕಾರೇನ। ಚತ್ತಾರೋಪಿ ಭಿಕ್ಖೂ ಅಭಿಞ್ಞಾಲಾಭಿನೋ। ಚತ್ತಾರಿ ಕಪ್ಪಸತಸಹಸ್ಸಾನಿ ದಿವಸೇ ದಿವಸೇ ಅನುಸ್ಸರೇಯ್ಯುನ್ತಿ ಪರಿಕಪ್ಪನವಸೇನ ವದನ್ತಿ।
ಸಾವಕಸುತ್ತವಣ್ಣನಾ ನಿಟ್ಠಿತಾ।
೮. ಗಙ್ಗಾಸುತ್ತವಣ್ಣನಾ
೧೩೧. ಏತಸ್ಮಿಂ ಅನ್ತರೇತಿ ಏತಸ್ಮಿಂ ಪಭವಸಮುದ್ದಪದೇಸಪರಿಚ್ಛಿನ್ನೇ ಆಯಾಮತೋ ಪಞ್ಚಯೋಜನಸತಿಕೇ ಅತಿರೇಕಯೋಜನಸತಿಕೇ ವಾ ಠಾನೇ।
ಗಙ್ಗಾಸುತ್ತವಣ್ಣನಾ ನಿಟ್ಠಿತಾ।
೯. ದಣ್ಡಸುತ್ತವಣ್ಣನಾ
೧೩೨. ನವಮೇ ಖಿತ್ತೋತಿ ಪುನಪ್ಪುನಂ ಖಿತ್ತೋ। ಏಕವಾರಞ್ಹಿ ಖಿತ್ತೋ ಮೂಲಾದೀಸು ಏಕೇನೇವ ನಿಪತೇಯ್ಯ। ತಥಾ ಸತಿ ಅಧಿಪ್ಪೇತೋ ಪಾತಸ್ಸ ಅನಿಯಮೋ ನ ನಿದಸ್ಸಿತೋ ಸಿಯಾ। ತತ್ಥ ಚ ಧಮ್ಮಂ ಸುಣನ್ತಾ ಭಿಕ್ಖೂ ಮನುಸ್ಸಲೋಕೇ, ತೇ ಸನ್ಧಾಯ ‘‘ಅಸ್ಮಾ ಲೋಕಾ’’ತಿ ಆಹ, ತದಞ್ಞಂ ಸನ್ಧಾಯ ‘‘ಪರಲೋಕ’’ನ್ತಿ। ತಸ್ಸ ತಸ್ಸ ವಾ ಪುಗ್ಗಲಸ್ಸ ಯಥಾಧಿಪ್ಪೇತೋ ಅಯಂ ಲೋಕೋ, ತದಞ್ಞೋ ಪರಲೋಕೋ।
ದಣ್ಡಸುತ್ತವಣ್ಣನಾ ನಿಟ್ಠಿತಾ।
೧೦. ಪುಗ್ಗಲಸುತ್ತವಣ್ಣನಾ
೧೩೩. ಸಮಟ್ಠಿಕಾಲೋತಿ ಗಿರಿಪರಿಕ್ಖೇಪೇತಿ ಪಞ್ಚಹಿ ಗಿರೀಹಿ ಪರಿಕ್ಖಿತ್ತತ್ತಾ ‘‘ಗಿರಿಪರಿಕ್ಖೇಪೋ’’ತಿ ಲದ್ಧನಾಮೇ ರಾಜಗಹೇ।
ಪುಗ್ಗಲಸುತ್ತವಣ್ಣನಾ ನಿಟ್ಠಿತಾ।
ಪಠಮವಗ್ಗವಣ್ಣನಾ ನಿಟ್ಠಿತಾ।
೨. ದುತಿಯವಗ್ಗೋ
೧. ದುಗ್ಗತಸುತ್ತವಣ್ಣನಾ
೧೩೪. ದುಗ್ಗತನ್ತಿ ‘‘ದಲಿದ್ದಂ ಕಪಣ’’ನ್ತಿ। ಹತ್ಥಪಾದೇಹೀತಿ ನಿದಸ್ಸನಮತ್ತಂ, ಅಞ್ಞೇಹಿಪಿ ಸರೀರಾವಯವೇಹಿ ದುಸ್ಸಣ್ಠಾನೇಹಿ ಉಪೇತೋ ದುರುಪೇತೋ ಏವಾತಿ।
ದುಗ್ಗತಸುತ್ತವಣ್ಣನಾ ನಿಟ್ಠಿತಾ।
೨. ಸುಖಿತಸುತ್ತವಣ್ಣನಾ
೧೩೫. ಸುಖಿತನ್ತಿ ಸಞ್ಜಾತಸುಖಂ। ತೇನಾಹ ‘‘ಸುಖಸಮಪ್ಪಿತ’’ನ್ತಿಆದಿ। ಸುಸಜ್ಜಿತನ್ತಿ ಸುಖುಮುಪಕರಣೇಹಿ ಸಬ್ಬಥಾ ಸಜ್ಜಿತಂ।
ಸುಖಿತಸುತ್ತವಣ್ಣನಾ ನಿಟ್ಠಿತಾ।
೩. ತಿಂಸಮತ್ತಸುತ್ತವಣ್ಣನಾ
೧೩೬. ಧುತಙ್ಗಸಮಾದಾನವಸೇನ, ನ ಅರಞ್ಞವಾಸಾದಿಮತ್ತೇನ। ಸಸಂಯೋಜನಾ ಸಬ್ಬಸೋ ಸಂಯೋಜನಾನಂ ಅಪ್ಪಹೀನತ್ತಾ, ನ ಪುಥುಜ್ಜನಭಾವತೋ। ಏಕೇಕವಣ್ಣಕಾಲೋವ ಗಹೇತಬ್ಬೋತಿ ಏತೇನ ಮಹಿಂಸಾದೀನಂ ರಸ್ಸದೀಘಪಿಙ್ಗಲಾದೀಸು ಏಕೇಕಾನೇವ ಗಹೇತ್ವಾ ದಸ್ಸೇತಿ।
ತಿಂಸಮತ್ತಸುತ್ತವಣ್ಣನಾ ನಿಟ್ಠಿತಾ।
೪-೯. ಮಾತುಸುತ್ತಾದಿವಣ್ಣನಾ
೧೩೭-೧೪೨. ಲಿಙ್ಗನಿಯಮೇನ ಚೇವ ಚಕ್ಕವಾಳನಿಯಮೇನ ಚಾತಿ ‘‘ಪುರಿಸಾನಞ್ಹಿ ಮಾತುಗಾಮಕಾಲೋ, ಮಾತುಗಾಮಾನಞ್ಚ ಪುರಿಸಕಾಲೋ’’ತಿ ಯಥಾ ಸತ್ತಸನ್ತಾನೇ ಲಿಙ್ಗನಿಯಮೋ ನತ್ಥಿ, ಏವಂ ಕದಾಚಿ ಇಮಸ್ಮಿಂ ಚಕ್ಕವಾಳೇ ನಿಬ್ಬತ್ತನ್ತಿ, ಕದಾಚಿ ಅಞ್ಞತರಸ್ಮಿನ್ತಿ ಚಕ್ಕವಾಳನಿಯಮೋಪಿ ನತ್ಥಿ। ಏವಮೇವ ಠಿತೇ
ಚಕ್ಕವಾಳೇ ‘‘ತೇಸೂ’’ತಿಆದಿ।
ಮಾತುಸುತ್ತಾದಿವಣ್ಣನಾ ನಿಟ್ಠಿತಾ।
೧೦. ವೇಪುಲ್ಲಪಬ್ಬತಸುತ್ತವಣ್ಣನಾ
೧೪೩. ಏಕಂ ಅಪದಾನಂ ಆಹರಿತ್ವಾ ದಸ್ಸೇತಿ ‘‘ಏವಂ ಸಂವೇಗಂ ಜನೇತ್ವಾ ಭಿಕ್ಖೂ ವಿಸೇಸಂ ಪಾಪೇಸ್ಸಾಮೀ’’ತಿ। ಚತೂಹೇನ ಆರೋಹನ್ತಿ ಚತುಯೋಜನುಬ್ಬೇಧತ್ತಾ। ದ್ವಿನ್ನಂ ಬುದ್ಧಾನನ್ತಿ ಕಕುಸನ್ಧಸ್ಸ ಕೋಣಾಗಮನಸ್ಸ ಚಾತಿ ಇಮೇಸಂ ದ್ವಿನ್ನಂ ಬುದ್ಧಾನಂ। ‘‘ತಿವರಾ ರೋಹಿತಸ್ಸಾ ಸುಪ್ಪಿಯಾ’’ತಿ ಮನುಸ್ಸಾನಂ ತಸ್ಮಿಂ ತಸ್ಮಿಂ ಕಾಲೇ ಸಮಞ್ಞಾ ತತ್ಥ ದೇಸನಾಮವಸೇನ ಜಾತಾತಿ ವೇದಿತಬ್ಬಾ, ಯಥಾ ಏತರಹಿ ಮಾಗಧಾತಿ।
ಪುನ ವಸ್ಸಸತನ್ತಿ ಪಠಮವಸ್ಸಸತತೋ ಉಪರಿವಸ್ಸಸತಂ ಜೀವನಕೋ ನಾಮ ಮನುಸ್ಸೋ ನತ್ಥಿ। ಪರಿಹೀನಸದಿಸಂ ಕತಂ ದೇಸನಾಯ। ವಡ್ಢಿತ್ವಾತಿ ದಸವಸ್ಸಾಯುಕಭಾವತೋ ಪಟ್ಠಾಯ ಯಾವ ಅಸಙ್ಖ್ಯೇಯ್ಯಾಯುಕಭಾವಾ ವಡ್ಢಿತ್ವಾ। ‘‘ಪರಿಹೀನ’’ನ್ತಿ ವತ್ವಾ ತಂ ಪರಿಹೀನಭಾವಂ ದಸ್ಸೇನ್ತೋ ‘‘ಕಥ’’ನ್ತಿಆದಿಮಾಹ। ಯಂ ಆಯುಪ್ಪಮಾಣೇಸೂತಿ ಯತ್ತಕಂ ಆಯುಪ್ಪಮಾಣೇಸೂತಿ।
ವೇಪುಲ್ಲಪಬ್ಬತಸುತ್ತವಣ್ಣನಾ ನಿಟ್ಠಿತಾ।
ದುತಿಯವಗ್ಗವಣ್ಣನಾ ನಿಟ್ಠಿತಾ।
ಸಾರತ್ಥಪ್ಪಕಾಸಿನಿಯಾ ಸಂಯುತ್ತನಿಕಾಯ-ಅಟ್ಠಕಥಾಯ
ಅನಮತಗ್ಗಸಂಯುತ್ತವಣ್ಣನಾಯ ಲೀನತ್ಥಪ್ಪಕಾಸನಾ ಸಮತ್ತಾ।