೮. ಲಕ್ಖಣಸಂಯುತ್ತಂ
೧. ಪಠಮವಗ್ಗೋ
೧. ಅಟ್ಠಿಸುತ್ತವಣ್ಣನಾ
೨೦೨. ಆಯಸ್ಮಾ ಚ ಲಕ್ಖಣೋತಿಆದೀಸು ‘‘ಕೋ ನಾಮಾಯಸ್ಮಾ ಲಕ್ಖಣೋ, ಕಸ್ಮಾ ಚ ‘ಲಕ್ಖಣೋ’ತಿ ನಾಮಂ ಅಹೋಸಿ, ಕೋ ಚಾಯಸ್ಮಾ ಮೋಗ್ಗಲ್ಲಾನೋ, ಕಸ್ಮಾ ಚ ಸಿತಂ ಪಾತ್ವಾಕಾಸೀ’’ತಿ ತಂ ಸಬ್ಬಂ ಪಕಾಸೇತುಂ ‘‘ಯ್ವಾಯ’’ನ್ತಿಆದಿ ಆರದ್ಧಂ। ಲಕ್ಖಣಸಮ್ಪನ್ನೇನಾತಿ ಪುರಿಸಲಕ್ಖಣಸಮ್ಪನ್ನೇನ।
ಈಸಂ ಹಸಿತಂ ‘‘ಸಿತ’’ನ್ತಿ ವುಚ್ಚತೀತಿ ಆಹ ‘‘ಮನ್ದಹಸಿತ’’ನ್ತಿ। ಅಟ್ಠಿಸಙ್ಖಲಿಕನ್ತಿ ನಯಿದಂ ಅವಿಞ್ಞಾಣಕಂ ಅಟ್ಠಿಸಙ್ಖಲಿಕಮತ್ತಂ, ಅಥ ಖೋ ಏಕೋ ಪೇತೋತಿ ಆಹ ‘‘ಪೇತಲೋಕೇ ನಿಬ್ಬತ್ತ’’ನ್ತಿ। ಏತೇ ಅತ್ತಭಾವಾತಿ ಪೇತತ್ತಭಾವಾ। ನ ಆಪಾಥಂ ಆಗಚ್ಛನ್ತೀತಿ ದೇವತ್ತಭಾವಾ ವಿಯ ನ ಆಪಾಥಂ ಆಗಚ್ಛನ್ತಿ ಪಕತಿಯಾ। ತೇಸಂ ಪನ ರುಚಿಯಾ ಆಪಾಥಂ ಆಗಚ್ಛೇಯ್ಯುಂ ಮನುಸ್ಸಾನಂ। ದುಕ್ಖಾಭಿಭೂತಾನಂ ಅನಾಥಭಾವದಸ್ಸನಪದಟ್ಠಾನಾ ಕರುಣಾತಿ ಆಹ ‘‘ಕಾರುಞ್ಞೇ ಕತ್ತಬ್ಬೇ’’ತಿ। ಅತ್ತನೋ ಚ ಸಮ್ಪತ್ತಿಂ ಬುದ್ಧಞಾಣಸ್ಸ ಚ ಸಮ್ಪತ್ತಿನ್ತಿ ಪಚ್ಚೇಕಂ ಸಮ್ಪತ್ತಿಸದ್ದೋ ಯೋಜೇತಬ್ಬೋ। ತದುಭಯಂ ವಿಭಾವೇತುಂ ‘‘ತಂ ಹೀ’’ತಿಆದಿ ವುತ್ತಂ। ತತ್ಥ ಅತ್ತನೋ ಸಮ್ಪತ್ತಿಂ ಅನುಸ್ಸರಿತ್ವಾ ಸಿತಂ ಪಾತ್ವಾಕಾಸೀತಿ ಪದಂ ಆನೇತ್ವಾ ಸಮ್ಬನ್ಧಿತಬ್ಬಂ। ಧಮ್ಮಧಾತೂತಿ ಸಬ್ಬಞ್ಞುತಞ್ಞಾಣಂ ಸನ್ಧಾಯ ವದತಿ। ಧಮ್ಮಧಾತೂತಿ ವಾ ಧಮ್ಮಾನಂ ಸಭಾವೋ।
ಇತರೋತಿ ಲಕ್ಖಣತ್ಥೇರೋ। ಉಪಪತ್ತೀತಿ ಜಾತಿ। ಉಪಪತ್ತಿಸೀಸೇನ ಹಿ ತಥಾರೂಪಂ ಅತ್ತಭಾವಂ ವದತಿ। ಲೋಹತುಣ್ಡಕೇಹೀತಿ ಲೋಹಮಯೇಹೇವ ತುಣ್ಡಕೇಹಿ। ಚರನ್ತೀತಿ ಆಕಾಸೇನ ಗಚ್ಛನ್ತಿ। ಅಚ್ಛರಿಯಂ ವತಾತಿ ಗರಹಚ್ಛರಿಯಂ ನಾಮೇತಂ। ಚಕ್ಖುಭೂತಾತಿ ಸಮ್ಪತ್ತದಿಬ್ಬಚಕ್ಖುಕಾ, ಲೋಕಸ್ಸ ಚಕ್ಖುಭೂತಾತಿ ಏವಂ ವಾ ಏತ್ಥ ಅತ್ಥೋ ದಟ್ಠಬ್ಬೋ।
ಯತ್ರಾತಿ ಹೇತುಅತ್ಥೇ ನಿಪಾತೋತಿ ಆಹ ‘‘ಯತ್ರಾತಿ ಕಾರಣವಚನ’’ನ್ತಿ। ಅಞ್ಞತ್ರ ಹಿ ‘‘ಯತ್ರ ಹಿ ನಾಮಾ’’ತಿ ಅತ್ಥೋ ವುಚ್ಚತಿ। ಅಪ್ಪಮಾಣೇ ಸತ್ತನಿಕಾಯೇ ತೇ ಚ ಖೋ ವಿಭಾಗೇನ ಕಾಮಭವಾದಿಭೇದೇ ಭವೇ, ನಿರಯಾದಿಭೇದಾ ಪಚ್ಚಕ್ಖಂ ಕರೋನ್ತೇನ।
ಗೋಘಾತಕೋತಿ ‘‘ವಧಿತ್ವಾ ವಧಿತ್ವಾ’’ತಿ। ತಸ್ಸಾತಿ ಗುನ್ನಂ ವಧಕಕಮ್ಮಸ್ಸ। ಅಪರಾಪರಿಯಕಮ್ಮಸ್ಸಾತಿ ಅಪರಾಪರಿಯವೇದನೀಯಕಮ್ಮಸ್ಸ। ಬಲವತಾ ಗೋಘಾತಕಕಮ್ಮೇನ ವಿಪಾಕೇ ದೀಯಮಾನೇ ಅಲದ್ಧೋಕಾಸಂ ಅಪರಾಪರಿಯವೇದನೀಯಂ ತಸ್ಮಿಂ ವಿಪಕ್ಕವಿಪಾಕೇ ಇದಾನಿ ಲದ್ಧೋಕಾಸಂ ‘‘ಅವಸೇಸಕಮ್ಮ’’ನ್ತಿ ವುತ್ತಂ। ಪಟಿಸನ್ಧೀತಿ ಪಾಪಕಮ್ಮಜನಿತಾ ಪಟಿಸನ್ಧಿ। ಕಮ್ಮಸಭಾಗತಾಯಾತಿ ಕಮ್ಮಸದಿಸಭಾವೇನ। ಆರಮ್ಮಣಸಭಾಗತಾಯಾತಿ ಆರಮ್ಮಣಸ್ಸ ಸಭಾಗಭಾವೇನ ಸದಿಸಭಾವೇನ। ಯಾದಿಸೇ ಹಿ ಆರಮ್ಮಣೇ ಪುಬ್ಬೇ ತಂ ಕಮ್ಮಂ ತಸ್ಸ ಚ ವಿಪಾಕೋ ಪವತ್ತೋ, ತಾದಿಸೇಯೇವ ಆರಮ್ಮಣೇ ಇದಂ ಕಮ್ಮಂ ಇಮಸ್ಸ ವಿಪಾಕೋ ಚ ಪವತ್ತೋತಿ ಕತ್ವಾ ವುತ್ತಂ ‘‘ತಸ್ಸೇವ ಕಮ್ಮಸ್ಸ ವಿಪಾಕಾವಸೇಸೇನಾ’’ತಿ। ಭವತಿ ಹಿ ತಂಸದಿಸೇಪಿ ತಬ್ಬೋಹಾರೋ ಯಥಾ ‘‘ಸೋ ಏವ ತಿತ್ತಿರೋ, ತಾನಿಯೇವ ಓಸಧಾನೀ’’ತಿ। ನಿಮಿತ್ತಂ ಅಹೋಸೀತಿ ಪುಬ್ಬೇ ಕತೂಪಚಿತಸ್ಸ ಪೇತೂಪಪತ್ತಿನಿಬ್ಬತ್ತನವಸೇನ ಕತೋಕಾಸಸ್ಸ ತಸ್ಸ ಕಮ್ಮಸ್ಸ ನಿಮಿತ್ತಭೂತಂ ಇದಾನಿ ತಥಾ ಉಪಟ್ಠಹನ್ತಂ ತಸ್ಸ ವಿಪಾಕಸ್ಸ ನಿಮಿತ್ತಂ ಆರಮ್ಮಣಂ ಅಹೋಸಿ। ಸೋತಿ ಗೋಘಾತಕೋ। ಅಟ್ಠಿಸಙ್ಖಲಿಕಪೇತೋ ಜಾತೋ ಕಮ್ಮಸರಿಕ್ಖಕವಿಪಾಕತಾವಸೇನ।
ಅಟ್ಠಿಸುತ್ತವಣ್ಣನಾ ನಿಟ್ಠಿತಾ।
೨. ಪೇಸಿಸುತ್ತವಣ್ಣನಾ
೨೦೩. ಗೋಮಂಸಪೇಸಿಯೋ ಕತ್ವಾತಿ ಗಾವಿಂ ವಧಿತ್ವಾ ವಧಿತ್ವಾ ಗೋಮಂಸಂ ಫಾಲೇತ್ವಾ ಪೇಸಿಯೋ ಕತ್ವಾ। ಸುಕ್ಖಾಪೇತ್ವಾತಿ ಕಾಲನ್ತರಂ ಠಪನತ್ಥಂ ಸುಕ್ಖಾಪೇತ್ವಾ। ಸುಕ್ಖಾಪಿಯಮಾನಾನಂ ಮಂಸಪೇಸೀನಞ್ಹಿ ವಲ್ಲೂರಸಮಞ್ಞಾ।
ಪೇಸಿಸುತ್ತವಣ್ಣನಾ ನಿಟ್ಠಿತಾ।
೩. ಪಿಣ್ಡಸುತ್ತವಣ್ಣನಾ
೨೦೪. ನಿಪ್ಪಕ್ಖಚಮ್ಮೇತಿ ವಿಗತಪಕ್ಖಚಮ್ಮೇ।
೪. ನಿಚ್ಛವಿಸುತ್ತವಣ್ಣನಾ
೨೦೫. ಉರಬ್ಭೇ ಹನತೀತಿ ಓರಬ್ಭಿಕೋ। ಏಳಕೇತಿ ಅಜೇ।
೫. ಅಸಿಲೋಮಸುತ್ತವಣ್ಣನಾ
೨೦೬. ನಿವಾಪಪುಟ್ಠೇತಿ ಅಸಿನಾ ವಧಿತ್ವಾ ವಧಿತ್ವಾ ವಿಕ್ಕಿಣನ್ತೋ।
೬. ಸತ್ತಿಸುತ್ತವಣ್ಣನಾ
೨೦೭. ಏಕಂ ಮಿಗನ್ತಿ ಏಕಂ ದೀಪಕಮಿಗಂ।
೭. ಉಸುಲೋಮಸುತ್ತವಣ್ಣನಾ
೨೦೮. ಕಾರಣಾಹೀತಿ ಯಾತನಾಹಿ। ಞತ್ವಾತಿ ಕಮ್ಮಟ್ಠಾನಂ ಞತ್ವಾ।
೮. ಸೂಚಿಲೋಮಸುತ್ತವಣ್ಣನಾ
೨೦೯. ಸುಣೋತಿ ಪೂರೇತೀತಿ ಸೂತೋ, ಅಸ್ಸದಮಕಾದಿಕೋ।
೯. ದುತಿಯಸೂಚಿಲೋಮಸುತ್ತವಣ್ಣನಾ
೨೧೦. ಪೇಸುಞ್ಞೂಪಸಂಹಾರವಸೇನ ಇತೋ ಸುತಂ ಅಮುತ್ರ, ಅಮುತ್ರ ವಾ ಸುತಂ ಇಧ ಸೂಚೇತೀತಿ ಸೂಚಕೋ। ಅನಯಬ್ಯಸನಂ ಪಾಪೇಸಿ ಮನುಸ್ಸೇತಿ ಸಮ್ಬನ್ಧೋ।
೧೦. ಕುಮ್ಭಣ್ಡಸುತ್ತವಣ್ಣನಾ
೨೧೧. ವಿನಿಚ್ಛಯಾಮಚ್ಚೋತಿ ರಞ್ಞಾ ಅಡ್ಡಕರಣೇ ಠಪಿತೋ ವಿನಿಚ್ಛಯಮಹಾಮತ್ತೋ। ಸೋ ಹಿ ಗಾಮಜನಕಾಯಂ ಕೂಟೇತಿ ವಞ್ಚೇತೀತಿ ಗಾಮಕೂಟಕೋತಿ ವುಚ್ಚತಿ। ಕೇಚಿ ‘‘ತಾದಿಸೋ ಏವ ಗಾಮಜೇಟ್ಠಕೋ ಗಾಮಕೂಟಕೋ’’ತಿ ವದನ್ತಿ। ಸಮೇನ ಭವಿತಬ್ಬಂ, ‘‘ಧಮ್ಮಟ್ಠೋ’’ತಿ ವತ್ತಬ್ಬತೋ। ರಹಸ್ಸಙ್ಗೇ ನಿಸೀದನವಸೇನ ವಿಸಮಾ ನಿಸಜ್ಜಾವ ಅಹೋಸಿ।
ಕುಮ್ಭಣ್ಡಸುತ್ತವಣ್ಣನಾ ನಿಟ್ಠಿತಾ।
ಪಠಮವಗ್ಗವಣ್ಣನಾ ನಿಟ್ಠಿತಾ।
೨. ದುತಿಯವಗ್ಗೋ
೧. ಸಸೀಸಕಸುತ್ತವಣ್ಣನಾ
೨೧೨. ಫುಸನ್ತೋತಿ
೩. ನಿಚ್ಛವಿತ್ಥಿಸುತ್ತವಣ್ಣನಾ
೨೧೪. ಮಾತುಗಾಮೋ ಸಸ್ಸಾಮಿಕೋ ಅತ್ತನೋ ಫಸ್ಸೇ ಅನಿಸ್ಸರೋ। ವಟ್ಟಿತ್ವಾತಿ ಭಸ್ಸಿತ್ವಾ ಅಪರಂ ಗನ್ತ್ವಾ।
೪. ಮಙ್ಗುಲಿತ್ಥಿಸುತ್ತವಣ್ಣನಾ
೨೧೫. ಮಙ್ಗನವಸೇನ ಉಲತೀತಿ ಮಙ್ಗುಲಿ, ವಿರೂಪಬೀಭಚ್ಛಭಾವೇನ ಪವತ್ತತೀತಿ ಅತ್ಥೋ। ತೇನಾಹ ‘‘ವಿರೂಪಂ ದುದ್ದಸಿಕಂ ಬೀಭಚ್ಛ’’ನ್ತಿ।
೫. ಓಕಿಲಿನೀಸುತ್ತವಣ್ಣನಾ
೨೧೬. ಉದ್ಧಂ ಉದ್ಧಂ ಅಗ್ಗಿನಾ ಪಕ್ಕಸರೀರತಾಯ ಉಪ್ಪಕ್ಕಂ। ಹೇಟ್ಠತೋ ಪಗ್ಘರಣವಸೇನ ಕಿಲಿನ್ನಸರೀರತಾಯ ಓಕಿಲಿನೀ। ಇತೋ ಚಿತೋ ಚ ಅಙ್ಗಾರಸಮ್ಪರಿಕಿಣ್ಣತಾಯ ಓಕಿರಿನೀ। ತೇನಾಹ ‘‘ಸಾ ಕಿರಾ’’ತಿಆದಿ। ಅಙ್ಗಾರಚಿತಕೇತಿ ಅಙ್ಗಾರಸಞ್ಚಯೇ। ಸರೀರತೋ ಪಗ್ಘರನ್ತಿ ಅಸುಚಿದುಗ್ಗನ್ಧಜೇಗುಚ್ಛಾನಿ ಸೇದಗತಾನಿ। ತಸ್ಸ ಕಿರ ರಞ್ಞೋತಿ ತಸ್ಸ ಕಾಲಿಙ್ಗಸ್ಸ ರಞ್ಞೋ। ನಾಟಕಿನೀತಿ ನಚ್ಚೇ ಅಧಿಕತಾ ಇತ್ಥೀ। ಸೇದನ್ತಿ ಸೇದನಂ, ತಾಪನನ್ತಿ ಅತ್ಥೋ।
ಓಕಿಲಿನೀಸುತ್ತವಣ್ಣನಾ ನಿಟ್ಠಿತಾ।
೬. ಅಸೀಸಕಸುತ್ತವಣ್ಣನಾ
೨೧೭. ಅಸೀಸಕಂ ಕಬನ್ಧಂ ಹುತ್ವಾ ನಿಬ್ಬತ್ತಿ ಕಮ್ಮಾಯೂಹನಕಾಲೇ ತಥಾ ನಿಮಿತ್ತಗ್ಗಹಣಪರಿಚಯತೋ।
೭-೧೧. ಪಾಪಭಿಕ್ಖುಸುತ್ತಾದಿವಣ್ಣನಾ
೨೧೮-೨೨೨. ಲಾಮಕಭಿಕ್ಖೂತಿ ಚಿತ್ತಕೇಳಿನ್ತಿ ಚಿತ್ತರುಚಿಯಂ ತಂ ತಂ ಕೀಳನ್ತೋ। ಅಯಮೇವಾತಿ ಭಿಕ್ಖುವತ್ಥುಸ್ಮಿಂ ವುತ್ತನಯೋ ಏವ।
ಪಾಪಭಿಕ್ಖುಸುತ್ತಾದಿವಣ್ಣನಾ ನಿಟ್ಠಿತಾ।
ಸಾರತ್ಥಪ್ಪಕಾಸಿನಿಯಾ ಸಂಯುತ್ತನಿಕಾಯ-ಅಟ್ಠಕಥಾಯ
ಲಕ್ಖಣಸಂಯುತ್ತವಣ್ಣನಾಯ ಲೀನತ್ಥಪ್ಪಕಾಸನಾ ಸಮತ್ತಾ।