೪. ಓಕ್ಕನ್ತಸಂಯುತ್ತಂ

೧-೧೦. ಚಕ್ಖುಸುತ್ತಾದಿವಣ್ಣನಾ

೩೦೨-೩೧೧. ಓಕ್ಕನ್ತಸಂಯುತ್ತೇ ಅಧಿಮುಚ್ಚತೀತಿ ಸದ್ಧಾಧಿಮೋಕ್ಖಂ ಪಟಿಲಭತಿ। ಓಕ್ಕನ್ತೋ ಸಮ್ಮತ್ತನಿಯಾಮನ್ತಿ ಪವಿಟ್ಠೋ ಅರಿಯಮಗ್ಗಂ। ಅಭಬ್ಬೋ ಚ ತಾವ ಕಾಲಂ ಕಾತುನ್ತಿ ಇಮಿನಾ ಉಪ್ಪನ್ನೇ ಮಗ್ಗೇ ಫಲಸ್ಸ ಅನನ್ತರಾಯತಂ ದೀಪೇತಿ। ಉಪ್ಪನ್ನಸ್ಮಿಞ್ಹಿ ಮಗ್ಗೇ ಫಲಸ್ಸ ಅನ್ತರಾಯಕರಣಂ ನಾಮ ನತ್ಥಿ। ತೇನೇವಾಹ – ‘‘ಅಯಞ್ಚ ಪುಗ್ಗಲೋ ಸೋತಾಪತ್ತಿಫಲಸಚ್ಛಿಕಿರಿಯಾಯ ಪಟಿಪನ್ನೋ ಅಸ್ಸ, ಕಪ್ಪಸ್ಸ ಚ ಉಡ್ಡಯ್ಹನವೇಲಾ ಅಸ್ಸ, ನೇವ ತಾವ ಕಪ್ಪೋ ಉಡ್ಡಯ್ಹೇಯ್ಯ, ಯಾವಾಯಂ ಪುಗ್ಗಲೋ ನ ಸೋತಾಪತ್ತಿಫಲಂ ಸಚ್ಛಿಕರೋತಿ, ಅಯಂ ವುಚ್ಚತಿ ಪುಗ್ಗಲೋ ಠಿತಕಪ್ಪೀ’’ತಿ (ಪು॰ ಪ॰ ೧೭)। ಮತ್ತಸೋ ನಿಜ್ಝಾನಂ ಖಮನ್ತೀತಿ ಪಮಾಣತೋ ಓಲೋಕನಂ ಖಮನ್ತಿ। ಸೇಸಂ ಸಬ್ಬತ್ಥ ಉತ್ತಾನಮೇವಾತಿ।

ಓಕ್ಕನ್ತಸಂಯುತ್ತವಣ್ಣನಾ ನಿಟ್ಠಿತಾ।