೬. ಕಿಲೇಸಸಂಯುತ್ತವಣ್ಣನಾ

೩೨೨-೩೩೧. ಕಿಲೇಸಸಂಯುತ್ತೇ ಚಿತ್ತಸ್ಸೇಸೋ ಉಪಕ್ಕಿಲೇಸೋತಿ ಕತರಚಿತ್ತಸ್ಸ? ಚತುಭೂಮಕಚಿತ್ತಸ್ಸ। ತೇಭೂಮಕಚಿತ್ತಸ್ಸ ತಾವ ಹೋತು, ಲೋಕುತ್ತರಸ್ಸ ಕಥಂ ಉಪಕ್ಕಿಲೇಸೋ ಹೋತೀತಿ? ಉಪ್ಪತ್ತಿನಿವಾರಣತೋ। ಸೋ ಹಿ ತಸ್ಸ ಉಪ್ಪಜ್ಜಿತುಂ ಅಪ್ಪದಾನೇನ ಉಪಕ್ಕಿಲೇಸೋತಿ ವೇದಿತಬ್ಬೋ। ನೇಕ್ಖಮ್ಮನಿನ್ನನ್ತಿ ನವಲೋಕುತ್ತರಧಮ್ಮನಿನ್ನಂ। ಚಿತ್ತನ್ತಿ ಸಮಥವಿಪಸ್ಸನಾಚಿತ್ತಂ। ಅಭಿಞ್ಞಾ ಸಚ್ಛಿಕರಣೀಯೇಸು ಧಮ್ಮೇಸೂತಿ ಪಚ್ಚವೇಕ್ಖಣಞಾಣೇನ ಅಭಿಜಾನಿತ್ವಾ ಸಚ್ಛಿಕಾತಬ್ಬೇಸು ಛಳಭಿಞ್ಞಾಧಮ್ಮೇಸು, ಏಕಂ ಧಮ್ಮಂ ವಾ ಗಣ್ಹನ್ತೇನ ನೇಕ್ಖಮ್ಮನ್ತಿ ಗಹೇತಬ್ಬಂ। ಸೇಸಂ ಸಬ್ಬತ್ಥ ಉತ್ತಾನಮೇವಾತಿ।

ಕಿಲೇಸಸಂಯುತ್ತವಣ್ಣನಾ ನಿಟ್ಠಿತಾ।