೧೦. ಗನ್ಧಬ್ಬಕಾಯಸಂಯುತ್ತವಣ್ಣನಾ

೪೩೮-೫೪೯. ಗನ್ಧಬ್ಬಕಾಯಸಂಯುತ್ತೇ ಮೂಲಗನ್ಧೇ ಅಧಿವತ್ಥಾತಿ ಯಸ್ಸ ರುಕ್ಖಸ್ಸ ಮೂಲೇ ಗನ್ಧೋ ಅತ್ಥಿ, ತಂ ನಿಸ್ಸಾಯ ನಿಬ್ಬತ್ತಾ। ಸೋ ಹಿ ಸಕಲೋಪಿ ರುಕ್ಖೋ ತೇಸಂ ಉಪಕಪ್ಪತಿ। ಸೇಸಪದೇಸುಪಿ ಏಸೇವ ನಯೋ। ಗನ್ಧಗನ್ಧೇತಿ ಮೂಲಾದಿಗನ್ಧಾನಂ ಗನ್ಧೇ। ಯಸ್ಸ ಹಿ ರುಕ್ಖಸ್ಸ ಸಬ್ಬೇಸಮ್ಪಿ ಮೂಲಾದೀನಂ ಗನ್ಧೋ ಅತ್ಥಿ, ಸೋ ಇಧ ಗನ್ಧೋ ನಾಮ। ತಸ್ಸ ಗನ್ಧಸ್ಸ ಗನ್ಧೇ, ತಸ್ಮಿಂ ಅಧಿವತ್ಥಾ। ಇಧ ಮೂಲಾದೀನಿ ಸಬ್ಬಾನಿ ತೇಸಂಯೇವ ಉಪಕಪ್ಪನ್ತಿ। ಸೋ ದಾತಾ ಹೋತಿ ಮೂಲಗನ್ಧಾನನ್ತಿ ಸೋ ಕಾಳಾನುಸಾರಿಕಾದೀನಂ ಮೂಲಗನ್ಧಾನಂ ದಾತಾ ಹೋತಿ। ಏವಂ ಸಬ್ಬಪದೇಸು ಅತ್ಥೋ ವೇದಿತಬ್ಬೋ। ಏವಞ್ಹಿ ಸರಿಕ್ಖದಾನಮ್ಪಿ ದತ್ವಾ ಪತ್ಥನಂ ಠಪೇನ್ತಿ, ಅಸರಿಕ್ಖದಾನಮ್ಪಿ। ತಂ ದಸ್ಸೇತುಂ ಸೋ ಅನ್ನಂ ದೇತೀತಿಆದಿ ದಸವಿಧಂ ದಾನವತ್ಥು ವುತ್ತಂ। ಸೇಸಂ ಸಬ್ಬತ್ಥ ಉತ್ತಾನಮೇವಾತಿ।

ಗನ್ಧಬ್ಬಕಾಯಸಂಯುತ್ತವಣ್ಣನಾ ನಿಟ್ಠಿತಾ।