೭. ಸಾರಿಪುತ್ತಸಂಯುತ್ತಂ

೧-೯. ವಿವೇಕಜಸುತ್ತಾದಿವಣ್ಣನಾ

೩೩೨-೩೪೦. ನ ಏವಂ ಹೋತೀತಿ ಏತ್ಥ ‘‘ಅಹಂ ಸಮಾಪಜ್ಜಾಮೀ’’ತಿ ವಾ, ‘‘ಅಹಂ ಸಮಾಪನ್ನೋ’’ತಿ ವಾ ಮಾ ಹೋತು ತದಾ ತಾದಿಸಾಭೋಗಾಭಾವತೋ। ‘‘ಅಹಂ ವುಟ್ಠಿತೋ’’ತಿ ಪನ ಕಸ್ಮಾ ನ ಹೋತೀತಿ? ಸಬ್ಬಥಾಪಿ ನ ಹೋತ್ವೇವ ಅಹಙ್ಕಾರಸ್ಸ ಸಬ್ಬಸೋ ಪಹೀನತ್ತಾ।

ವಿವೇಕಜಸುತ್ತಾದಿವಣ್ಣನಾ ನಿಟ್ಠಿತಾ।

೧೦. ಸೂಚಿಮುಖೀಸುತ್ತವಣ್ಣನಾ

೩೪೧. ತಸ್ಮಿಂ ವಚನೇ ಪಟಿಕ್ಖಿತ್ತೇತಿ – ‘‘ಅಧೋಮುಖೋ ಭುಞ್ಜಸೀ’’ತಿ ಪರಿಬ್ಬಾಜಿಕಾಯ ವುತ್ತವಚನೇ – ‘‘ನ ಖ್ವಾಹಂ ಭಗಿನೀ’’ತಿ ಪಟಿಕ್ಖಿತ್ತೇ। ವಾದನ್ತಿ ದೋಸಂ। ಉಬ್ಭಮುಖೋತಿ ಉಪರಿಮುಖೋ। ಪುರತ್ಥಿಮಾದಿಕಾ ಚತಸ್ಸೋ ದಿಸಾ। ದಕ್ಖಿಣಪುರತ್ಥಿಮಾದಿಕಾ ಚತಸ್ಸೋ ವಿದಿಸಾ।

ಆರಾಮಆರಾಮವತ್ಥುಆದೀಸು ಭೂಮಿಪರಿಕಮ್ಮಬೀಜಾಭಿಸಙ್ಖರಣಾದಿಪಟಿಸಂಯುತ್ತಾ ವಿಜ್ಜಾ ವತ್ಥುವಿಜ್ಜಾ, ತಸ್ಸಾ ಪನ ಮಿಚ್ಛಾಜೀವಭಾವಂ ದಸ್ಸೇತುಂ ‘‘ತೇಸ’’ನ್ತಿಆದಿ ವುತ್ತಂ। ತೇಸಂ ತೇಸಂ ಅತ್ತನೋ ಪಚ್ಚಯದಾಯಕಾನಂ। ತತ್ಥ ತತ್ಥ ಗಮನನ್ತಿ ತೇಸಂ ಸಾಸನಹರಣವಸೇನ ತಂ ತಂ ಗಾಮನ್ತರದೇಸನ್ತರಂ। ಏವಮಾರೋಚೇಸೀತಿ ಅತ್ತುಕ್ಕಂಸನಪರವಮ್ಭನರಹಿತಂ ಕಣ್ಣಸುಖಂ ಪೇಮನೀಯಂ ಹದಯಙ್ಗಮಂ ಥೇರಸ್ಸ ಧಮ್ಮಕಥಂ ಸುತ್ವಾ ಪಸನ್ನಮಾನಸಾ ಏವಂ ‘‘ಧಮ್ಮಿಕಂ ಸಮಣಾ ಸಕ್ಯಪುತ್ತಿಯಾ’’ತಿಆದಿನಾ ಸಾಸನಸ್ಸ ಗುಣಸಂಕಿತ್ತನವಾಚಂ ಕುಲಾನಂ ಆರೋಚೇಸಿ।

ಸೂಚಿಮುಖೀಸುತ್ತವಣ್ಣನಾ ನಿಟ್ಠಿತಾ।

ಸಾರಿಪುತ್ತಸಂಯುತ್ತವಣ್ಣನಾ ನಿಟ್ಠಿತಾ।