೧೦. ಗನ್ಧಬ್ಬಕಾಯಸಂಯುತ್ತವಣ್ಣನಾ
೪೩೮-೫೪೯. ಮೂಲಗನ್ಧಾದಿಭೇದಂ ಗನ್ಧಬ್ಬಕಾಯಿಕಾ। ತೇಸಂ ತೇಸಂ ರುಕ್ಖಗಚ್ಛಲತಾನಂ ಮೂಲಂ ಪಟಿಚ್ಚ ಪವತ್ತೋ ಗನ್ಧೋ ಮೂಲಗನ್ಧೋ, ತಸ್ಮಿಂ ಮೂಲಗನ್ಧೇ। ಅಧಿವತ್ಥಾತಿ ಮೂಲಗನ್ಧಂ ಅಧಿಟ್ಠಾಯ, ಅಭಿಭುಯ್ಯ ವಾ ವಸನ್ತಾ। ಏಸ ನಯೋ ಸೇಸೇಸುಪಿ। ತಂ ನಿಸ್ಸಾಯಾತಿ ತಂ ಮೂಲಗನ್ಧಂ ರುಕ್ಖಂ ಪಚ್ಚಯಂ ಕತ್ವಾ ನಿಬ್ಬತ್ತಾ। ನ ಕೇವಲಂ ತತ್ಥ ಗನ್ಧೋ ಏವ, ಮೂಲಮೇವ ವಾ ತೇಸಂ ಪಚ್ಚಯೋತಿ ದಸ್ಸೇನ್ತೋ ‘‘ಸೋ ಹೀ’’ತಿಆದಿಮಾಹ। ಉಪಕಪ್ಪತೀತಿ ನಿವಾಸಟ್ಠಾನಭಾವೇನ ವಿನಿಯುಞ್ಜತಿ। ಗನ್ಧಗನ್ಧೇತಿ ಗನ್ಧಾನಂ ಗನ್ಧಸಮುದಾಯೇ। ಮೂಲಾದಿಗನ್ಧಾನಂ ಗನ್ಧೇತಿ ಮೂಲಾದಿಗತಅವಯವಗನ್ಧಾನಂ ಗನ್ಧೇ, ತಿಮೂಲಾದಿಗತಸಮುದಾಯಭೂತೇತಿ ಅತ್ಥೋ। ಪುಬ್ಬೇ ಹಿ ‘‘ಮೂಲಗನ್ಧೇ’’ತಿಆದಿನಾ ರುಕ್ಖಾನಂ ಅವಯವಗನ್ಧೋ ‘‘ಯಸ್ಸ ಹಿ ರುಕ್ಖಸ್ಸಾ’’ತಿಆದಿ। ಸೋತಿ ಸೋ ಸಬ್ಬೋ ಮೂಲಾದಿಗತೋ ಗನ್ಧೋ ಗನ್ಧಸಮುದಾಯೋ ಇಧ ಗನ್ಧಗನ್ಧೋ ನಾಮ। ತಸ್ಸ ಗನ್ಧಸ್ಸ ಗನ್ಧೇತಿ ತಸ್ಸ ಸಮುದಾಯಗನ್ಧಸ್ಸ ತಥಾಭೂತೇ ಗನ್ಧೇ। ಸರಿಕ್ಖಂ ಸದಿಸಂ ಪಟಿದಾನಂ ಏತಿಸ್ಸಾತಿ ಸರಿಕ್ಖದಾನಂ, ಪತ್ಥನಾ। ಯಥಾಧಿಪ್ಪೇತಫಲಾನಿ ಸರಿಕ್ಖದಾನತ್ತಾವ ಅಧಿಪ್ಪೇತಫಲಂ ದೇನ್ತು, ಅಸರಿಕ್ಖದಾನಂ ಕಥನ್ತಿ? ತಮ್ಪಿ ದೇತಿಯೇವ ಪುಞ್ಞಸ್ಸ ಸಬ್ಬಕಾಮದದತ್ತಾತಿ ಆಹ ‘‘ಅಸರಿಕ್ಖದಾನಮ್ಪೀ’’ತಿಆದಿ।
ಗನ್ಧಬ್ಬಕಾಯಸಂಯುತ್ತವಣ್ಣನಾ ನಿಟ್ಠಿತಾ।