೩. ಮಾತುಗಾಮಸಂಯುತ್ತಂ
೧. ಪಠಮಪೇಯ್ಯಾಲವಗ್ಗೋ
೧-೨. ಮಾತುಗಾಮಸುತ್ತಾದಿವಣ್ಣನಾ
೨೮೦-೨೮೧. ಅಗುಣಙ್ಗೇಹೀತಿ ನ ಚ ರೂಪವಾ, ಸಮ್ಪನ್ನರೂಪೋ ನ ಹೋತೀತಿ ಅತ್ಥೋ। ಞಾತಿಕುಲತೋ ಅಞ್ಞತೋ ವಾ ಆಗತಾಯ ಭೋಗಸಮ್ಪದಾಯ ಅಭಾವೇನ ನ ಭೋಗಸಮ್ಪನ್ನೋ। ದುಸ್ಸೀಲೋತಿ ನಿಸ್ಸೀಲೋ। ನಿಸ್ಸೀಲತಾಯ ಏವ ಚಸ್ಸಾ ಪುಬ್ಬುಟ್ಠಾಯಿತಾದಿಆಚಾರಾಭಾವೋ ವುತ್ತೋ। ಆಲಸಿಯೋತಿ ಆಲಸಿಯತಾಯ ಯುತ್ತೋ। ಪಜಞ್ಚಸ್ಸ ನ ಲಭತೀತಿ ಪಜಾಭಾವಸೀಸೇನ ತಸ್ಸಾ ಪರಿವಾರಹಾನಿ ವುತ್ತಾ। ಪರಿವತ್ತೇತಬ್ಬನ್ತಿ ಪುರಿಸವಸೇನ ಪರಿವತ್ತೇತಬ್ಬಂ।
ಮಾತುಗಾಮಸುತ್ತಾದಿವಣ್ಣನಾ ನಿಟ್ಠಿತಾ।
೩. ಆವೇಣಿಕದುಕ್ಖಸುತ್ತವಣ್ಣನಾ
೨೮೨. ಆವೇಣಿತಬ್ಬತೋ ಮರಿಯಾದಾಯ ವಿಸುಂ ಅಸಾಧಾರಣತೋ ಪಸ್ಸಿತಬ್ಬತೋ ಆವೇಣಿಕಾನಿ। ಪಟಿಪಚ್ಚೇಕೇ ಪುಗ್ಗಲೇ ನಿಯುತ್ತಾನೀತಿ ಪಾಟಿಪುಗ್ಗಲಿಕಾನಿ। ಪರಿಚಾರಿಕಭಾವನ್ತಿ ಉಪಟ್ಠಾಯಿಕಭಾವಂ।
ಆವೇಣಿಕದುಕ್ಖಸುತ್ತವಣ್ಣನಾ ನಿಟ್ಠಿತಾ।
೪. ತೀಹಿಧಮ್ಮೇಹಿಸುತ್ತಾದಿವಣ್ಣನಾ
೨೮೩-೩೦೩. ಮಚ್ಛೇರಮಲಪರಿಯುಟ್ಠಿತೇನಾತಿ ಮಚ್ಛರಿಯಮಲೇನ ಅಭಿಭೂತೇನ। ತೇನಾತಿ ಕಸ್ಸಚಿ ಕಿಞ್ಚಿ ಅದಾನೇನ ಚ। ಏತಂ ‘‘ಮಚ್ಛೇರಮಲಪರಿಯುಟ್ಠಿತೇನಾ’’ತಿಆದಿ ವುತ್ತಂ। ವಿಲೋಕೇನ್ತೋ ವಿಚರತಿ ಇಸ್ಸಾಪಕತಚಿತ್ತತಾಯ। ಪಞ್ಚಮಾದೀನಿ ಯಾವ ಏಕಾದಸಮಾ ಉತ್ತಾನತ್ಥಾನೇವ।
ತೀಹಿಧಮ್ಮೇಹಿಸುತ್ತಾದಿವಣ್ಣನಾ ನಿಟ್ಠಿತಾ।
೩. ಬಲವಗ್ಗೋ
೧. ವಿಸಾರದಸುತ್ತವಣ್ಣನಾ
೩೦೪. ರೂಪಸಮ್ಪತ್ತಿ ರೂಪಬಲಂ ತಂಸಮಙ್ಗಿನೋ ಉಪತ್ಥಮ್ಭಕಭಾವತೋ। ಏಸ ನಯೋ ಸೇಸೇಸುಪಿ। ಬಲಾನಿ ಹಿ ಸತ್ತಾನಂ ವುಡ್ಢಿಯಾ ಉಪತ್ಥಮ್ಭಕಪಚ್ಚಯೋ ಹೋತಿ, ಯಥಾ ತಂ ಆಹಾರೋ। ತೇನಾಹ – ‘‘ಇಮಾನೀ’’ತಿಆದಿ।
ವಿಸಾರದಸುತ್ತವಣ್ಣನಾ ನಿಟ್ಠಿತಾ।
೨-೧೦. ಪಸಯ್ಹಸುತ್ತಾದಿವಣ್ಣನಾ
೩೦೫-೩೧೩. ಅಭಿಭವಿತ್ವಾ ಸಬ್ಬಂ ಅನ್ತೋಜನಂ ಸಾಮಿಕಞ್ಚ। ನಾಸೇನ್ತೀತಿ ನಾಸನಂ ಅದಸ್ಸನಂ ನೇನ್ತಿ ನೀಹರನ್ತೀತಿ ಅತ್ಥೋ।
ಪಸಯ್ಹಸುತ್ತಾದಿವಣ್ಣನಾ ನಿಟ್ಠಿತಾ।
ಮಾತುಗಾಮಸಂಯುತ್ತವಣ್ಣನಾ ನಿಟ್ಠಿತಾ।