೧೦. ಅಬ್ಯಾಕತಸಂಯುತ್ತಂ
೧. ಖೇಮಾಸುತ್ತವಣ್ಣನಾ
೪೧೦. ಬಿಮ್ಬಿಸಾರಸ್ಸ ಉಪಾಸಿಕಾತಿ ಬಿಮ್ಬಿಸಾರಸ್ಸ ಓರೋಧಭೂತಾ ಉಪಾಸಿಕಾ। ಪಣ್ಡಿಚ್ಚಂ ಸಿಕ್ಖಿತಭಾವೇನ। ವೇಯ್ಯತ್ತಿಯಂ ವಿಸಾರದಭಾವೇನ। ವಿಸಾರದಾ ನಾಮ ತಿಹೇತುಕಪಟಿಸನ್ಧಿಸಿದ್ಧಸಾಭಾವಿಕಪಞ್ಞಾ, ತಾಯ ಸಮನ್ನಾಗತಾ।
ಅಚ್ಛಿದ್ದಕಗಣನಾಯ ಕುಸಲೋತಿ ನವನ್ತಗಣನಾಯ ಕುಸಲೋ। ಅಙ್ಗುಲಿಮುದ್ದಾಯ ಗಣನಾಯ ಕುಸಲೋತಿ ಅಙ್ಗುಲಿಕಾಯ ಏವ ಗಣನಾಯ ಕುಸಲೋ ಸೇಯ್ಯಥಾಪಿ ಪಾದಸಿಕಾ। ಪಿಣ್ಡಗಣನಾಯಾತಿ ಸಙ್ಕಲನಪಟುಪ್ಪನ್ನಕಾರಿನೋ ಪಿಣ್ಡವಸೇನ ಗಣನಾ। ತಥಾಗತೋತಿ ಖೀಣಾಸವೋ, ತಥಾಗತಂ ಸನ್ಧಾಯ ಪುಚ್ಛತೀತಿ ಖೀಣಾಸವೋತಿ ಚಸ್ಸ ಅರಹತ್ತಫಲವಸಿಭಾವಿತಖನ್ಧೇ ಉಪಾದಾಯ ಅಯಂ ಪಞ್ಞತ್ತಿ ಹೋತಿ। ತೇಸು ಖನ್ಧೇಸು ಸತಿ ಖೀಣಾಸವಾ ಸತ್ತಸಙ್ಖಾತಾ ಹೋನ್ತೀತಿ ವೋಹಾರೇನ ಪಞ್ಞಪೇತುಂ ಸಕ್ಕಾ ಭವೇಯ್ಯ, ಅಸನ್ತೇಸು ನ ಸಕ್ಕಾ, ತಸ್ಮಾ ಪರಂ ಮರಣಾತಿ ವುತ್ತತ್ತಾ ತೇಸಂ ಅಭಾವಾ ‘‘ಅಬ್ಯಾಕತಮೇತ’’ನ್ತಿ ವುತ್ತಂ। ಯದಿ ಏವಂ ತೇಸಂ ಅಭಾವತೋ ‘‘ನ ಹೋತಿ ತಥಾಗತೋ ಪರಂ ಮರಣಾ’’ತಿ ಪುಟ್ಠಾಯ ‘‘ಆಮಾ’’ತಿ ಪಟಿಜಾನಿತಬ್ಬಾ ಸಿಯಾ, ತಂ ಪನ ಸತ್ತಸಙ್ಖಾತಸ್ಸ ಪುಚ್ಛಿತತ್ತಾ ನ ಪಟಿಞ್ಞಾತನ್ತಿ ದಟ್ಠಬ್ಬಂ। ಯೇನ ರೂಪೇನಾತಿ ಸತ್ತತಥಾಗತೇ ವುತ್ತರೂಪಂ ಸಬ್ಬಞ್ಞುತಥಾಗತೇ ಪಟಿಕ್ಖಿಪಿತುಂ ‘‘ತಂ ರೂಪ’’ನ್ತಿಆದಿ ವುತ್ತಂ। ಯಂ ಉಪಾದಾಯಾತಿ ಯಂ ಖನ್ಧಪಞ್ಚಕಂ ಉಪಾದಾಯ। ತದಭಾವೇನಾತಿ ತಸ್ಸ ಖನ್ಧಪಞ್ಚಕಸ್ಸ ಅಭಾವೇನ। ತಸ್ಸಾ ಪಞ್ಞತ್ತಿಯಾತಿ ಸತ್ತಪಞ್ಞತ್ತಿಯಾ ಅಭಾವಂ। ನಿರುದ್ಧಂ ನ ನಿದಸ್ಸೇತಿ।
ಖೇಮಾಯ ಥೇರಿಯಾ ವುತ್ತಂ ಪಠಮಂ ಸುತ್ತಂ ಭಗವತೋ ಸೇಟ್ಠತ್ಥದೀಪನತೋ ಅಗ್ಗಪದಾವಚರಂವ ಹೋತೀತಿ ವುತ್ತಂ ‘‘ಅಗ್ಗಪದಸ್ಮಿ’’ನ್ತಿ।
ಖೇಮಾಸುತ್ತವಣ್ಣನಾ ನಿಟ್ಠಿತಾ।
೨. ಅನುರಾಧಸುತ್ತವಣ್ಣನಾ
೪೧೧. ಇಧ ಸಳಾಯತನವಗ್ಗೇ ಸಙ್ಗಾಯನವಸೇನ ಸಙ್ಗೀತಿಕಾರೇಹಿ ವುತ್ತಂ।
೩-೮. ಪಠಮಸಾರಿಪುತ್ತಕೋಟ್ಠಿಕಸುತ್ತಾದಿವಣ್ಣನಾ
೪೧೨-೪೧೭. ರೂಪಮತ್ತನ್ತಿ ಮತ್ತ-ಸದ್ದೋ ವಿಸೇಸನಿವತ್ತಿಅತ್ಥೋ। ಕೋ ಪನ ಸೋ ವಿಸೇಸೋತಿ? ಯೋ ಬಾಹಿರಪರಿಕಪ್ಪಿತೋ ಇಧ ತಥಾಗತೋತಿ ವುಚ್ಚಮಾನೋ ಅತ್ತಾ। ಅನುಪಲಬ್ಭಿಯಸಭಾವೋತಿ ಅನುಪಲಬ್ಭಿಯತ್ತಾ।
ಪಠಮಸಾರಿಪುತ್ತಕೋಟ್ಠಿಕಸುತ್ತಾದಿವಣ್ಣನಾ ನಿಟ್ಠಿತಾ।
೯. ಕುತೂಹಲಸಾಲಾಸುತ್ತವಣ್ಣನಾ
೪೧೮. ನಾನಾವಿಧನ್ತಿ ತಂತಂದಿಟ್ಠಿವಾದಪಟಿಸಂಯುತ್ತಂ ಅಞ್ಞಮ್ಪಿ ವಾ ನಾನಾವಿಧಂ ತಿರಚ್ಛಾನಕಥಂ। ಬಹೂನಂ ಕುತೂಹಲುಪ್ಪತ್ತಿಟ್ಠಾನತೋತಿ ಯೋಜನಾ। ಯಾವ ಆಭಸ್ಸರಬ್ರಹ್ಮಲೋಕಾ ಗಚ್ಛತೀತಿ ಅಗ್ಗಿನಾ ಕಪ್ಪವುಟ್ಠಾನಕಾಲೇ ಗಚ್ಛತಿ, ತಂ ಸನ್ಧಾಯ ವುತ್ತಂ। ಇಮಞ್ಚ ಕಾಯನ್ತಿ ಇಮಂ ರೂಪಕಾಯಂ। ಚುತಿಚಿತ್ತೇನ ನಿಕ್ಖಿಪತೀತಿ ಚುತಿಚಿತ್ತೇನ ಭಿಜ್ಜಮಾನೇನ ನಿಕ್ಖಿಪತಿ। ಚುತಿಚಿತ್ತಸ್ಸ ಹಿ ಓರಂ ಸತ್ತರಸಮಸ್ಸ ಚಿತ್ತಸ್ಸ ಉಪ್ಪಾದಕ್ಖಣೇ ಉಪ್ಪನ್ನಂ ಕಮ್ಮಜರೂಪಂ ಚುತಿಚಿತ್ತೇನ ಸದ್ಧಿಂ ನಿರುಜ್ಝತಿ, ತತೋ ಪರಂ ಕಮ್ಮಜರೂಪಂ ನ ಉಪ್ಪಜ್ಜತಿ। ಯದಿ ಉಪ್ಪಜ್ಜೇಯ್ಯ, ಮರಣಂ ನ ಸಿಯಾ, ಚುತಿಚಿತ್ತಂ ರೂಪಂ ನ ಸಮುಟ್ಠಾಪೇತಿ, ಆಹಾರಜಸ್ಸ ಚ ಅಸಮ್ಭವೋ ಏವ, ಉತುಜಂ ಪನ ವತ್ತತೇವ। ಯಸ್ಮಾ ಪಟಿಸನ್ಧಿಕ್ಖಣೇ ಸತ್ತೋ ಅಞ್ಞತರಣಾಯ ಉಪಪಜ್ಜತಿ ನಾಮ, ಚುತಿಕ್ಖಣೇ ಪಟಿಸನ್ಧಿಚಿತ್ತಂ ಅಲದ್ಧಂ ಅಞ್ಞತರಣಾಯ, ತಸ್ಮಾ ವುತ್ತಂ ‘‘ಚುತಿಕ್ಖಣೇ…ಪೇ॰… ಹೋತೀ’’ತಿ।
ಕುತೂಹಲಸಾಲಾಸುತ್ತವಣ್ಣನಾ ನಿಟ್ಠಿತಾ।
೧೦. ಆನನ್ದಸುತ್ತವಣ್ಣನಾ
೪೧೯. ತೇಸಂ ಲದ್ಧಿಯಾತಿ ತೇಸಂ ಸಸ್ಸತವಾದಾನಂ ಲದ್ಧಿಯಾ ಸದ್ಧಿಂ ಏತಂ ‘‘ಅತ್ಥತ್ತಾ’’ತಿ ವಚನಂ ಏಕಂ ಅಭವಿಸ್ಸ। ತತೋ ಏವ ಅನುಲೋಮಂ ತಂ ನಾಭವಿಸ್ಸ ಞಾಣಸ್ಸಾತಿ ಅಸಾರಂ ಏತನ್ತಿ ಅಧಿಪ್ಪಾಯೋ। ಅಪಿ ನು ಮೇತಸ್ಸಾತಿ ಮೇ ಏತಸ್ಸ ಅನತ್ತಾತಿ ವಿಪಸ್ಸನಾಞಾಣಸ್ಸ ಅನುಲೋಮಂ ಅಪಿ ನು ಅಭವಿಸ್ಸ, ವಿಲೋಮಕಮೇವ ತಸ್ಸ ಸಿಯಾತಿ ಅತ್ಥೋ।
ಆನನ್ದಸುತ್ತವಣ್ಣನಾ ನಿಟ್ಠಿತಾ।
೧೧. ಸಭಿಯಕಚ್ಚಾನಸುತ್ತವಣ್ಣನಾ
೪೨೦. ಯಸ್ಸಪ’ಸ್ಸಾತಿ
ಸಭಿಯಕಚ್ಚಾನಸುತ್ತವಣ್ಣನಾ ನಿಟ್ಠಿತಾ।
ಅಬ್ಯಾಕತಸಂಯುತ್ತವಣ್ಣನಾ ನಿಟ್ಠಿತಾ।
ಸಾರತ್ಥಪ್ಪಕಾಸಿನಿಯಾ ಸಂಯುತ್ತನಿಕಾಯ-ಅಟ್ಠಕಥಾಯ
ಸಳಾಯತನವಗ್ಗವಣ್ಣನಾಯ ಲೀನತ್ಥಪ್ಪಕಾಸನಾ ಸಮತ್ತಾ।