೫. ಚೂಳವಗ್ಗೋ

೧. ಸಮ್ಮುಖೀಭಾವಸುತ್ತಂ

೪೧. ‘‘ತಿಣ್ಣಂ , ಭಿಕ್ಖವೇ, ಸಮ್ಮುಖೀಭಾವಾ ಸದ್ಧೋ ಕುಲಪುತ್ತೋ ಬಹುಂ ಪುಞ್ಞಂ ಪಸವತಿ। ಕತಮೇಸಂ ತಿಣ್ಣಂ? ಸದ್ಧಾಯ, ಭಿಕ್ಖವೇ, ಸಮ್ಮುಖೀಭಾವಾ ಸದ್ಧೋ ಕುಲಪುತ್ತೋ ಬಹುಂ ಪುಞ್ಞಂ ಪಸವತಿ। ದೇಯ್ಯಧಮ್ಮಸ್ಸ, ಭಿಕ್ಖವೇ, ಸಮ್ಮುಖೀಭಾವಾ ಸದ್ಧೋ ಕುಲಪುತ್ತೋ ಬಹುಂ ಪುಞ್ಞಂ ಪಸವತಿ। ದಕ್ಖಿಣೇಯ್ಯಾನಂ, ಭಿಕ್ಖವೇ, ಸಮ್ಮುಖೀಭಾವಾ ಸದ್ಧೋ ಕುಲಪುತ್ತೋ ಬಹುಂ ಪುಞ್ಞಂ ಪಸವತಿ। ಇಮೇಸಂ ಖೋ, ಭಿಕ್ಖವೇ, ತಿಣ್ಣಂ ಸಮ್ಮುಖೀಭಾವಾ ಸದ್ಧೋ ಕುಲಪುತ್ತೋ ಬಹುಂ ಪುಞ್ಞಂ ಪಸವತೀ’’ತಿ। ಪಠಮಂ।

೨. ತಿಠಾನಸುತ್ತಂ

೪೨. ‘‘ತೀಹಿ , ಭಿಕ್ಖವೇ, ಠಾನೇಹಿ ಸದ್ಧೋ ಪಸನ್ನೋ ವೇದಿತಬ್ಬೋ। ಕತಮೇಹಿ ತೀಹಿ? ಸೀಲವನ್ತಾನಂ ದಸ್ಸನಕಾಮೋ ಹೋತಿ, ಸದ್ಧಮ್ಮಂ ಸೋತುಕಾಮೋ ಹೋತಿ , ವಿಗತಮಲಮಚ್ಛೇರೇನ ಚೇತಸಾ ಅಗಾರಂ ಅಜ್ಝಾವಸತಿ ಮುತ್ತಚಾಗೋ ಪಯತಪಾಣಿ ವೋಸ್ಸಗ್ಗರತೋ ಯಾಚಯೋಗೋ ದಾನಸಂವಿಭಾಗರತೋ। ಇಮೇಹಿ ಖೋ, ಭಿಕ್ಖವೇ, ತೀಹಿ ಠಾನೇಹಿ ಸದ್ಧೋ ಪಸನ್ನೋ ವೇದಿತಬ್ಬೋ’’।

‘‘ದಸ್ಸನಕಾಮೋ ಸೀಲವತಂ, ಸದ್ಧಮ್ಮಂ ಸೋತುಮಿಚ್ಛತಿ।

ವಿನಯೇ ಮಚ್ಛೇರಮಲಂ, ಸ ವೇ ಸದ್ಧೋತಿ ವುಚ್ಚತೀ’’ತಿ॥ ದುತಿಯಂ।

೩. ಅತ್ಥವಸಸುತ್ತಂ

೪೩. ‘‘ತಯೋ , ಭಿಕ್ಖವೇ, ಅತ್ಥವಸೇ ಸಮ್ಪಸ್ಸಮಾನೇನ ಅಲಮೇವ ಪರೇಸಂ ಧಮ್ಮಂ ದೇಸೇತುಂ। ಕತಮೇ ತಯೋ? ಯೋ ಧಮ್ಮಂ ದೇಸೇತಿ ಸೋ ಅತ್ಥಪ್ಪಟಿಸಂವೇದೀ ಚ ಹೋತಿ ಧಮ್ಮಪ್ಪಟಿಸಂವೇದೀ ಚ। ಯೋ ಧಮ್ಮಂ ಸುಣಾತಿ ಸೋ ಅತ್ಥಪ್ಪಟಿಸಂವೇದೀ ಚ ಹೋತಿ ಧಮ್ಮಪ್ಪಟಿಸಂವೇದೀ ಚ। ಯೋ ಚೇವ ಧಮ್ಮಂ ದೇಸೇತಿ ಯೋ ಚ ಧಮ್ಮಂ ಸುಣಾತಿ ಉಭೋ ಅತ್ಥಪ್ಪಟಿಸಂವೇದಿನೋ ಚ ಹೋನ್ತಿ ಧಮ್ಮಪ್ಪಟಿಸಂವೇದಿನೋ ಚ। ಇಮೇ ಖೋ, ಭಿಕ್ಖವೇ, ತಯೋ ಅತ್ಥವಸೇ ಸಮ್ಪಸ್ಸಮಾನೇನ ಅಲಮೇವ ಪರೇಸಂ ಧಮ್ಮಂ ದೇಸೇತು’’ನ್ತಿ। ತತಿಯಂ।

೪. ಕಥಾಪವತ್ತಿಸುತ್ತಂ

೪೪. ‘‘ತೀಹಿ, ಭಿಕ್ಖವೇ, ಠಾನೇಹಿ ಕಥಾ ಪವತ್ತಿನೀ ಹೋತಿ। ಕತಮೇಹಿ ತೀಹಿ? ಯೋ ಧಮ್ಮಂ ದೇಸೇತಿ ಸೋ ಅತ್ಥಪ್ಪಟಿಸಂವೇದೀ ಚ ಹೋತಿ ಧಮ್ಮಪ್ಪಟಿಸಂವೇದೀ ಚ। ಯೋ ಧಮ್ಮಂ ಸುಣಾತಿ ಸೋ ಅತ್ಥಪ್ಪಟಿಸಂವೇದೀ ಚ ಹೋತಿ ಧಮ್ಮಪ್ಪಟಿಸಂವೇದೀ ಚ। ಯೋ ಚೇವ ಧಮ್ಮಂ ದೇಸೇತಿ ಯೋ ಚ ಧಮ್ಮಂ ಸುಣಾತಿ ಉಭೋ ಅತ್ಥಪ್ಪಟಿಸಂವೇದಿನೋ ಚ ಹೋನ್ತಿ ಧಮ್ಮಪ್ಪಟಿಸಂವೇದಿನೋ ಚ। ಇಮೇಹಿ ಖೋ, ಭಿಕ್ಖವೇ, ತೀಹಿ ಠಾನೇಹಿ ಕಥಾ ಪವತ್ತಿನೀ ಹೋತೀ’’ತಿ। ಚತುತ್ಥಂ।

೫. ಪಣ್ಡಿತಸುತ್ತಂ

೪೫. ‘‘ತೀಣಿಮಾನಿ, ಭಿಕ್ಖವೇ, ಪಣ್ಡಿತಪಞ್ಞತ್ತಾನಿ ಸಪ್ಪುರಿಸಪಞ್ಞತ್ತಾನಿ। ಕತಮಾನಿ ತೀಣಿ? ದಾನಂ, ಭಿಕ್ಖವೇ, ಪಣ್ಡಿತಪಞ್ಞತ್ತಂ ಸಪ್ಪುರಿಸಪಞ್ಞತ್ತಂ । ಪಬ್ಬಜ್ಜಾ, ಭಿಕ್ಖವೇ , ಪಣ್ಡಿತಪಞ್ಞತ್ತಾ ಸಪ್ಪುರಿಸಪಞ್ಞತ್ತಾ। ಮಾತಾಪಿತೂನಂ, ಭಿಕ್ಖವೇ, ಉಪಟ್ಠಾನಂ ಪಣ್ಡಿತಪಞ್ಞತ್ತಂ ಸಪ್ಪುರಿಸಪಞ್ಞತ್ತಂ। ಇಮಾನಿ ಖೋ, ಭಿಕ್ಖವೇ, ತೀಣಿ ಪಣ್ಡಿತಪಞ್ಞತ್ತಾನಿ ಸಪ್ಪುರಿಸಪಞ್ಞತ್ತಾನೀ’’ತಿ।

‘‘ಸಬ್ಭಿ ದಾನಂ ಉಪಞ್ಞತ್ತಂ, ಅಹಿಂಸಾ ಸಂಯಮೋ ದಮೋ।

ಮಾತಾಪಿತು ಉಪಟ್ಠಾನಂ, ಸನ್ತಾನಂ ಬ್ರಹ್ಮಚಾರಿನಂ॥

‘‘ಸತಂ ಏತಾನಿ ಠಾನಾನಿ, ಯಾನಿ ಸೇವೇಥ ಪಣ್ಡಿತೋ।

ಅರಿಯೋ ದಸ್ಸನಸಮ್ಪನ್ನೋ, ಸ ಲೋಕಂ ಭಜತೇ ಸಿವ’’ನ್ತಿ॥ ಪಞ್ಚಮಂ।

೬. ಸೀಲವನ್ತಸುತ್ತಂ

೪೬. ‘‘ಯಂ, ಭಿಕ್ಖವೇ, ಸೀಲವನ್ತೋ ಪಬ್ಬಜಿತಾ ಗಾಮಂ ವಾ ನಿಗಮಂ ವಾ ಉಪನಿಸ್ಸಾಯ ವಿಹರನ್ತಿ। ತತ್ಥ ಮನುಸ್ಸಾ ತೀಹಿ ಠಾನೇಹಿ ಬಹುಂ ಪುಞ್ಞಂ ಪಸವನ್ತಿ। ಕತಮೇಹಿ ತೀಹಿ? ಕಾಯೇನ , ವಾಚಾಯ , ಮನಸಾ। ಯಂ, ಭಿಕ್ಖವೇ, ಸೀಲವನ್ತೋ ಪಬ್ಬಜಿತಾ ಗಾಮಂ ವಾ ನಿಗಮಂ ವಾ ಉಪನಿಸ್ಸಾಯ ವಿಹರನ್ತಿ। ತತ್ಥ ಮನುಸ್ಸಾ ಇಮೇಹಿ ತೀಹಿ ಠಾನೇಹಿ ಬಹುಂ ಪುಞ್ಞಂ ಪಸವನ್ತೀ’’ತಿ। ಛಟ್ಠಂ।

೭. ಸಙ್ಖತಲಕ್ಖಣಸುತ್ತಂ

೪೭. ‘‘ತೀಣಿಮಾನಿ, ಭಿಕ್ಖವೇ, ಸಙ್ಖತಸ್ಸ ಸಙ್ಖತಲಕ್ಖಣಾನಿ। ಕತಮಾನಿ ತೀಣಿ? ಉಪ್ಪಾದೋ ಪಞ್ಞಾಯತಿ, ವಯೋ ಪಞ್ಞಾಯತಿ, ಠಿತಸ್ಸ ಅಞ್ಞಥತ್ತಂ ಪಞ್ಞಾಯತಿ। ಇಮಾನಿ ಖೋ, ಭಿಕ್ಖವೇ, ತೀಣಿ ಸಙ್ಖತಸ್ಸ ಸಙ್ಖತಲಕ್ಖಣಾನೀ’’ತಿ। ಸತ್ತಮಂ।

೮. ಅಸಙ್ಖತಲಕ್ಖಣಸುತ್ತಂ

೪೮. ‘‘ತೀಣಿಮಾನಿ, ಭಿಕ್ಖವೇ, ಅಸಙ್ಖತಸ್ಸ ಅಸಙ್ಖತಲಕ್ಖಣಾನಿ। ಕತಮಾನಿ ತೀಣಿ? ನ ಉಪ್ಪಾದೋ ಪಞ್ಞಾಯತಿ, ನ ವಯೋ ಪಞ್ಞಾಯತಿ, ನ ಠಿತಸ್ಸ ಅಞ್ಞಥತ್ತಂ ಪಞ್ಞಾಯತಿ। ಇಮಾನಿ ಖೋ, ಭಿಕ್ಖವೇ, ತೀಣಿ ಅಸಙ್ಖತಸ್ಸ ಅಸಙ್ಖತಲಕ್ಖಣಾನೀ’’ತಿ। ಅಟ್ಠಮಂ।

೯. ಪಬ್ಬತರಾಜಸುತ್ತಂ

೪೯. ‘‘ಹಿಮವನ್ತಂ, ಭಿಕ್ಖವೇ, ಪಬ್ಬತರಾಜಂ ನಿಸ್ಸಾಯ ಮಹಾಸಾಲಾ ತೀಹಿ ವಡ್ಢೀಹಿ ವಡ್ಢನ್ತಿ। ಕತಮಾಹಿ ತೀಹಿ? ಸಾಖಾಪತ್ತಪಲಾಸೇನ ವಡ್ಢನ್ತಿ, ತಚಪಪಟಿಕಾಯ ವಡ್ಢನ್ತಿ , ಫೇಗ್ಗುಸಾರೇನ ವಡ್ಢನ್ತಿ। ಹಿಮವನ್ತಂ, ಭಿಕ್ಖವೇ, ಪಬ್ಬತರಾಜಂ ನಿಸ್ಸಾಯ ಮಹಾಸಾಲಾ ಇಮಾಹಿ ತೀಹಿ ವಡ್ಢೀಹಿ ವಡ್ಢನ್ತಿ।

‘‘ಏವಮೇವಂ ಖೋ, ಭಿಕ್ಖವೇ, ಸದ್ಧಂ ಕುಲಪತಿಂ ನಿಸ್ಸಾಯ ಅನ್ತೋ ಜನೋ ತೀಹಿ ವಡ್ಢೀಹಿ ವಡ್ಢತಿ। ಕತಮಾಹಿ ತೀಹಿ? ಸದ್ಧಾಯ ವಡ್ಢತಿ, ಸೀಲೇನ ವಡ್ಢತಿ, ಪಞ್ಞಾಯ ವಡ್ಢತಿ। ಸದ್ಧಂ, ಭಿಕ್ಖವೇ, ಕುಲಪತಿಂ ನಿಸ್ಸಾಯ ಅನ್ತೋ ಜನೋ ಇಮಾಹಿ ತೀಹಿ ವಡ್ಢೀಹಿ ವಡ್ಢತೀ’’ತಿ।

‘‘ಯಥಾಪಿ ಪಬ್ಬತೋ ಸೇಲೋ, ಅರಞ್ಞಸ್ಮಿಂ ಬ್ರಹಾವನೇ।

ತಂ ರುಕ್ಖಾ ಉಪನಿಸ್ಸಾಯ, ವಡ್ಢನ್ತೇ ತೇ ವನಪ್ಪತೀ॥

‘‘ತಥೇವ ಸೀಲಸಮ್ಪನ್ನಂ, ಸದ್ಧಂ ಕುಲಪತಿಂ ಇಧ।

ಉಪನಿಸ್ಸಾಯ ವಡ್ಢನ್ತಿ, ಪುತ್ತದಾರಾ ಚ ಬನ್ಧವಾ।

ಅಮಚ್ಚಾ ಞಾತಿಸಙ್ಘಾ ಚ, ಯೇ ಚಸ್ಸ ಅನುಜೀವಿನೋ॥

‘‘ತ್ಯಾಸ್ಸ ಸೀಲವತೋ ಸೀಲಂ, ಚಾಗಂ ಸುಚರಿತಾನಿ ಚ।

ಪಸ್ಸಮಾನಾನುಕುಬ್ಬನ್ತಿ, ಅತ್ತಮತ್ಥಂ ಯೇ ಭವನ್ತಿ (ಸೀ॰ ಸ್ಯಾ॰ ಕಂ॰ ಪೀ॰) ವಿಚಕ್ಖಣಾ॥

‘‘ಇಧ ಧಮ್ಮಂ ಚರಿತ್ವಾನ, ಮಗ್ಗಂ ಸುಗತಿಗಾಮಿನಂ।

ನನ್ದಿನೋ ದೇವಲೋಕಸ್ಮಿಂ, ಮೋದನ್ತಿ ಕಾಮಕಾಮಿನೋ’’ತಿ॥ ನವಮಂ।

೧೦. ಆತಪ್ಪಕರಣೀಯಸುತ್ತಂ

೫೦. ‘‘ತೀಹಿ, ಭಿಕ್ಖವೇ, ಠಾನೇಹಿ ಆತಪ್ಪಂ ಕರಣೀಯಂ। ಕತಮೇಹಿ ತೀಹಿ? ಅನುಪ್ಪನ್ನಾನಂ ಪಾಪಕಾನಂ ಅಕುಸಲಾನಂ ಧಮ್ಮಾನಂ ಅನುಪ್ಪಾದಾಯ ಆತಪ್ಪಂ ಕರಣೀಯಂ , ಅನುಪ್ಪನ್ನಾನಂ ಕುಸಲಾನಂ ಧಮ್ಮಾನಂ ಉಪ್ಪಾದಾಯ ಆತಪ್ಪಂ ಕರಣೀಯಂ, ಉಪ್ಪನ್ನಾನಂ ಸಾರೀರಿಕಾನಂ ವೇದನಾನಂ ದುಕ್ಖಾನಂ ತಿಬ್ಬಾನಂ ಖರಾನಂ ಕಟುಕಾನಂ ಅಸಾತಾನಂ ಅಮನಾಪಾನಂ ಪಾಣಹರಾನಂ ಅಧಿವಾಸನಾಯ ಆತಪ್ಪಂ ಕರಣೀಯಂ। ಇಮೇಹಿ ತೀಹಿ, ಭಿಕ್ಖವೇ, ಠಾನೇಹಿ ಆತಪ್ಪಂ ಕರಣೀಯಂ।

‘‘ಯತೋ ಖೋ, ಭಿಕ್ಖವೇ, ಭಿಕ್ಖು ಅನುಪ್ಪನ್ನಾನಂ ಪಾಪಕಾನಂ ಅಕುಸಲಾನಂ ಧಮ್ಮಾನಂ ಅನುಪ್ಪಾದಾಯ ಆತಪ್ಪಂ ಕರೋತಿ, ಅನುಪ್ಪನ್ನಾನಂ ಕುಸಲಾನಂ ಧಮ್ಮಾನಂ ಉಪ್ಪಾದಾಯ ಆತಪ್ಪಂ ಕರೋತಿ, ಉಪ್ಪನ್ನಾನಂ ಸಾರೀರಿಕಾನಂ ವೇದನಾನಂ ದುಕ್ಖಾನಂ ತಿಬ್ಬಾನಂ ಖರಾನಂ ಕಟುಕಾನಂ ಅಸಾತಾನಂ ಅಮನಾಪಾನಂ ಪಾಣಹರಾನಂ ಅಧಿವಾಸನಾಯ ಆತಪ್ಪಂ ಕರೋತಿ। ಅಯಂ ವುಚ್ಚತಿ, ಭಿಕ್ಖವೇ, ಭಿಕ್ಖು ಆತಾಪೀ ನಿಪಕೋ ಸತೋ ಸಮ್ಮಾ ದುಕ್ಖಸ್ಸ ಅನ್ತಕಿರಿಯಾಯಾ’’ತಿ। ದಸಮಂ।

೧೧. ಮಹಾಚೋರಸುತ್ತಂ

೫೧. ‘‘ತೀಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತೋ ಮಹಾಚೋರೋ ಸನ್ಧಿಮ್ಪಿ ಛಿನ್ದತಿ, ನಿಲ್ಲೋಪಮ್ಪಿ ಹರತಿ, ಏಕಾಗಾರಿಕಮ್ಪಿ ಕರೋತಿ, ಪರಿಪನ್ಥೇಪಿ ತಿಟ್ಠತಿ। ಕತಮೇಹಿ ತೀಹಿ? ಇಧ, ಭಿಕ್ಖವೇ, ಮಹಾಚೋರೋ ವಿಸಮನಿಸ್ಸಿತೋ ಚ ಹೋತಿ, ಗಹನನಿಸ್ಸಿತೋ ಚ ಹೋತಿ, ಬಲವನಿಸ್ಸಿತೋ ಚ ಹೋತಿ। ಕಥಞ್ಚ, ಭಿಕ್ಖವೇ, ಮಹಾಚೋರೋ ವಿಸಮನಿಸ್ಸಿತೋ ಹೋತಿ? ಇಧ, ಭಿಕ್ಖವೇ, ಮಹಾಚೋರೋ ನದೀವಿದುಗ್ಗಂ ವಾ ನಿಸ್ಸಿತೋ ಹೋತಿ ಪಬ್ಬತವಿಸಮಂ ವಾ। ಏವಂ ಖೋ, ಭಿಕ್ಖವೇ, ಮಹಾಚೋರೋ ವಿಸಮನಿಸ್ಸಿತೋ ಹೋತಿ।

‘‘ಕಥಞ್ಚ, ಭಿಕ್ಖವೇ, ಮಹಾಚೋರೋ ಗಹನನಿಸ್ಸಿತೋ ಹೋತಿ? ಇಧ, ಭಿಕ್ಖವೇ, ಮಹಾಚೋರೋ ತಿಣಗಹನಂ ವಾ ನಿಸ್ಸಿತೋ ಹೋತಿ, ರುಕ್ಖಗಹನಂ ವಾ ರೋಧಂ ಗೇಧಂ (ಸೀ॰ ಪೀ॰) ವಾ ಮಹಾವನಸಣ್ಡಂ ವಾ। ಏವಂ ಖೋ, ಭಿಕ್ಖವೇ, ಮಹಾಚೋರೋ ಗಹನನಿಸ್ಸಿತೋ ಹೋತಿ।

‘‘ಕಥಞ್ಚ, ಭಿಕ್ಖವೇ, ಮಹಾಚೋರೋ ಬಲವನಿಸ್ಸಿತೋ ಹೋತಿ? ಇಧ , ಭಿಕ್ಖವೇ, ಮಹಾಚೋರೋ ರಾಜಾನಂ ವಾ ರಾಜಮಹಾಮತ್ತಾನಂ ವಾ ನಿಸ್ಸಿತೋ ಹೋತಿ। ತಸ್ಸ ಏವಂ ಹೋತಿ – ‘ಸಚೇ ಮಂ ಕೋಚಿ ಕಿಞ್ಚಿ ವಕ್ಖತಿ, ಇಮೇ ಮೇ ರಾಜಾನೋ ವಾ ರಾಜಮಹಾಮತ್ತಾ ವಾ ಪರಿಯೋಧಾಯ ಅತ್ಥಂ ಭಣಿಸ್ಸನ್ತೀ’ತಿ। ಸಚೇ ನಂ ಕೋಚಿ ಕಿಞ್ಚಿ ಆಹ, ತ್ಯಾಸ್ಸ ರಾಜಾನೋ ವಾ ರಾಜಮಹಾಮತ್ತಾ ವಾ ಪರಿಯೋಧಾಯ ಅತ್ಥಂ ಭಣನ್ತಿ। ಏವಂ ಖೋ, ಭಿಕ್ಖವೇ, ಮಹಾಚೋರೋ ಬಲವನಿಸ್ಸಿತೋ ಹೋತಿ। ಇಮೇ ಖೋ, ಭಿಕ್ಖವೇ, ತೀಹಿ ಅಙ್ಗೇಹಿ ಸಮನ್ನಾಗತೋ ಮಹಾಚೋರೋ ಸನ್ಧಿಮ್ಪಿ ಛಿನ್ದತಿ, ನಿಲ್ಲೋಪಮ್ಪಿ ಹರತಿ, ಏಕಾಗಾರಿಕಮ್ಪಿ ಕರೋತಿ, ಪರಿಪನ್ಥೇಪಿ ತಿಟ್ಠತಿ।

‘‘ಏವಮೇವಂ ಖೋ, ಭಿಕ್ಖವೇ, ತೀಹಿ ಅಙ್ಗೇಹಿ ಸಮನ್ನಾಗತೋ ಪಾಪಭಿಕ್ಖು ಖತಂ ಉಪಹತಂ ಅತ್ತಾನಂ ಪರಿಹರತಿ, ಸಾವಜ್ಜೋ ಚ ಹೋತಿ ಸಾನುವಜ್ಜೋ ಚ ವಿಞ್ಞೂನಂ, ಬಹುಞ್ಚ ಅಪುಞ್ಞಂ ಪಸವತಿ। ಕತಮೇಹಿ ತೀಹಿ? ಇಧ, ಭಿಕ್ಖವೇ, ಪಾಪಭಿಕ್ಖು ವಿಸಮನಿಸ್ಸಿತೋ ಚ ಹೋತಿ ಗಹನನಿಸ್ಸಿತೋ ಚ ಬಲವನಿಸ್ಸಿತೋ ಚ।

‘‘ಕಥಞ್ಚ, ಭಿಕ್ಖವೇ, ಪಾಪಭಿಕ್ಖು ವಿಸಮನಿಸ್ಸಿತೋ ಹೋತಿ? ಇಧ, ಭಿಕ್ಖವೇ, ಪಾಪಭಿಕ್ಖು ವಿಸಮೇನ ಕಾಯಕಮ್ಮೇನ ಸಮನ್ನಾಗತೋ ಹೋತಿ, ವಿಸಮೇನ ವಚೀಕಮ್ಮೇನ ಸಮನ್ನಾಗತೋ ಹೋತಿ, ವಿಸಮೇನ ಮನೋಕಮ್ಮೇನ ಸಮನ್ನಾಗತೋ ಹೋತಿ। ಏವಂ ಖೋ, ಭಿಕ್ಖವೇ, ಪಾಪಭಿಕ್ಖು ವಿಸಮನಿಸ್ಸಿತೋ ಹೋತಿ।

‘‘ಕಥಞ್ಚ, ಭಿಕ್ಖವೇ, ಪಾಪಭಿಕ್ಖು ಗಹನನಿಸ್ಸಿತೋ ಹೋತಿ? ಇಧ, ಭಿಕ್ಖವೇ, ಪಾಪಭಿಕ್ಖು ಮಿಚ್ಛಾದಿಟ್ಠಿಕೋ ಹೋತಿ, ಅನ್ತಗ್ಗಾಹಿಕಾಯ ದಿಟ್ಠಿಯಾ ಸಮನ್ನಾಗತೋ ಹೋತಿ। ಏವಂ ಖೋ, ಭಿಕ್ಖವೇ, ಪಾಪಭಿಕ್ಖು ಗಹನನಿಸ್ಸಿತೋ ಹೋತಿ।

‘‘ಕಥಞ್ಚ, ಭಿಕ್ಖವೇ, ಪಾಪಭಿಕ್ಖು ಬಲವನಿಸ್ಸಿತೋ ಹೋತಿ? ಇಧ, ಭಿಕ್ಖವೇ, ಪಾಪಭಿಕ್ಖು ರಾಜಾನಂ ವಾ ರಾಜಮಹಾಮತ್ತಾನಂ ವಾ ನಿಸ್ಸಿತೋ ಹೋತಿ। ತಸ್ಸ ಏವಂ ಹೋತಿ – ‘ಸಚೇ ಮಂ ಕೋಚಿ ಕಿಞ್ಚಿ ವಕ್ಖತಿ, ಇಮೇ ಮೇ ರಾಜಾನೋ ವಾ ರಾಜಮಹಾಮತ್ತಾ ವಾ ಪರಿಯೋಧಾಯ ಅತ್ಥಂ ಭಣಿಸ್ಸನ್ತೀ’ತಿ। ಸಚೇ ನಂ ಕೋಚಿ ಕಿಞ್ಚಿ ಆಹ, ತ್ಯಾಸ್ಸ ರಾಜಾನೋ ವಾ ರಾಜಮಹಾಮತ್ತಾ ವಾ ಪರಿಯೋಧಾಯ ಅತ್ಥಂ ಭಣನ್ತಿ। ಏವಂ ಖೋ, ಭಿಕ್ಖವೇ, ಪಾಪಭಿಕ್ಖು ಬಲವನಿಸ್ಸಿತೋ ಹೋತಿ। ಇಮೇಹಿ ಖೋ , ಭಿಕ್ಖವೇ, ತೀಹಿ ಧಮ್ಮೇಹಿ ಸಮನ್ನಾಗತೋ ಪಾಪಭಿಕ್ಖು ಖತಂ ಉಪಹತಂ ಅತ್ತಾನಂ ಪರಿಹರತಿ, ಸಾವಜ್ಜೋ ಚ ಹೋತಿ ಸಾನುವಜ್ಜೋ ಚ ವಿಞ್ಞೂನಂ, ಬಹುಞ್ಚ ಅಪುಞ್ಞಂ ಪಸವತೀ’’ತಿ। ಏಕಾದಸಮಂ।

ಚೂಳವಗ್ಗೋ ಪಞ್ಚಮೋ।

ತಸ್ಸುದ್ದಾನಂ –

ಸಮ್ಮುಖೀ ಠಾನತ್ಥವಸಂ, ಪವತ್ತಿ ಪಣ್ಡಿತ ಸೀಲವಂ।

ಸಙ್ಖತಂ ಪಬ್ಬತಾತಪ್ಪಂ, ಮಹಾಚೋರೇನೇಕಾದಸಾತಿ ಮಹಾಚೋರೇನ ತೇ ದಸಾತಿ (ಕ॰)॥

ಪಠಮೋ ಪಣ್ಣಾಸಕೋ ಸಮತ್ತೋ।

೨. ದುತಿಯಪಣ್ಣಾಸಕಂ