(೧೦) ೫. ಅಸುರವಗ್ಗೋ

೧-೨. ಅಸುರಸುತ್ತಾದಿವಣ್ಣನಾ

೯೧-೯೨. ಪಞ್ಚಮಸ್ಸ ಪಠಮದುತಿಯಾನಿ ಉತ್ತಾನತ್ಥಾನೇವ।

ಅಸುರಸುತ್ತಾದಿವಣ್ಣನಾ ನಿಟ್ಠಿತಾ।

೩. ದುತಿಯಸಮಾಧಿಸುತ್ತವಣ್ಣನಾ

೯೩. ತತಿಯೇ ಅಪ್ಪಟಿವಾನೀತಿ ಭಾವಪ್ಪಧಾನೋ ನಿದ್ದೇಸೋತಿ ಆಹ ‘‘ಅನಿವತ್ತನತಾ’’ತಿ। ‘‘ಅಪ್ಪಟಿವಾನಿತಾ’’ತಿ ವತ್ತಬ್ಬೇ ‘‘ಅಪ್ಪಟಿವಾನೀ’’ತಿ ವುತ್ತಂ। ತಥಾ ಹಿ ವೀರಿಯಪ್ಪವಾಹೇ ವತ್ತಮಾನೇ ಅನ್ತರಾ ಏವ ಪಟಿಗಮನಂ ನಿವತ್ತನಂ ಪಟಿವಾನಂ, ತಂ ಅಸ್ಸ ಅತ್ಥೀತಿ ಪಟಿವಾನೀ, ನ ಪಟಿವಾನೀ ಅಪ್ಪಟಿವಾನೀ, ತಸ್ಸ ಭಾವೋ ಅಪ್ಪಟಿವಾನಿತಾ, ಅನಿವತ್ತನಾತಿ ಅತ್ಥೋ। ಅಪ್ಪಟಿವಾನೀತಿ ವಾ ಇತ್ಥಿಲಿಙ್ಗವಸೇನೇವಾಯಂ ನಿದ್ದೇಸೋ। ಅನ್ತರಾಯೇವ ಪಟಿಗಮನಂ ನಿವತ್ತನಂ ಪಟಿವಾನೀ, ನ ಪಟಿವಾನೀ ಅಪ್ಪಟಿವಾನೀ, ಅನಿವತ್ತನಾತಿ ಅತ್ಥೋ।

ದುತಿಯಸಮಾಧಿಸುತ್ತವಣ್ಣನಾ ನಿಟ್ಠಿತಾ।

೪. ತತಿಯಸಮಾಧಿಸುತ್ತವಣ್ಣನಾ

೯೪. ಚತುತ್ಥೇ ಸಣ್ಠಪೇತಬ್ಬನ್ತಿ ಸಮ್ಮದೇವ ಠಪೇತಬ್ಬಂ। ಯಥಾ ಪನ ಠಪಿತಂ ಸಣ್ಠಪಿತಂ ಹೋತಿ, ತಂ ದಸ್ಸೇತುಂ ‘‘ಸನ್ನಿಸಾದೇತಬ್ಬ’’ನ್ತಿಆದಿ ವುತ್ತಂ। ತತ್ಥ ಸನ್ನಿಸಾದೇತಬ್ಬನ್ತಿ ಸಮಾಧಿಪ್ಪಟಿಪಕ್ಖೇ ಕಿಲೇಸೇ ಸನ್ನಿಸೀದಾಪೇನ್ತೇನ ಚಿತ್ತಂ ಗೋಚರಜ್ಝತ್ತೇ ಸನ್ನಿಸೀದಾಪೇತಬ್ಬನ್ತಿ। ಏಕೋದಿ ಕಾತಬ್ಬನ್ತಿ ಅಬ್ಯಗ್ಗಭಾವಾಪಾದನೇನ ಏಕಗ್ಗಂ ಕಾತಬ್ಬಂ। ಸಮಾದಹಿತಬ್ಬನ್ತಿ ಯಥಾ ಆರಮ್ಮಣೇ ಸುಟ್ಠು ಅಪ್ಪಿತಂ ಹೋತಿ, ಏವಂ ಸಮ್ಮಾ ಸಮ್ಮದೇವ ಆದಹಿತಬ್ಬಂ, ಸುಟ್ಠು ಆರೋಪೇತಬ್ಬಂ ಸಮಾಹಿತಂ ಕಾತಬ್ಬನ್ತಿ ಅತ್ಥೋ।

ತತಿಯಸಮಾಧಿಸುತ್ತವಣ್ಣನಾ ನಿಟ್ಠಿತಾ।

೫-೬. ಛವಾಲಾತಸುತ್ತಾದಿವಣ್ಣನಾ

೯೫-೯೬. ಪಞ್ಚಮೇ ಛವಾಲಾತನ್ತಿ ಛವಾನಂ ದಡ್ಢಟ್ಠಾನೇ ಅಲಾತಂ। ತೇನೇವಾಹ ‘‘ಸುಸಾನೇ ಅಲಾತ’’ನ್ತಿ। ಮಜ್ಝಟ್ಠಾನೇ ಗೂಥಮಕ್ಖಿತನ್ತಿ ಪಮಾಣೇನ ಅಟ್ಠಙ್ಗುಲಮತ್ತಂ ದ್ವೀಸು ಠಾನೇಸು ಆದಿತ್ತಂ ಮಜ್ಝೇ ಗೂಥಮಕ್ಖಿತಂ। ಕಟ್ಠತ್ಥನ್ತಿ ಕಟ್ಠೇನ ಕಾತಬ್ಬಕಿಚ್ಚಂ। ಸೇಸಮೇತ್ಥ ಉತ್ತಾನಮೇವ। ಛಟ್ಠಂ ಉತ್ತಾನಮೇವ।

ಛವಾಲಾತಸುತ್ತಾದಿವಣ್ಣನಾ ನಿಟ್ಠಿತಾ।

೭-೧೦. ಖಿಪ್ಪನಿಸನ್ತಿಸುತ್ತಾದಿವಣ್ಣನಾ

೯೭-೧೦೦. ಸತ್ತಮೇ ಖಿಪ್ಪನಿಸನ್ತೀತಿ ಖಿಪ್ಪಪಞ್ಞೋ। ತೇನಾಹ ‘‘ಖಿಪ್ಪನಿಸಾಮನೋ’’ತಿಆದಿ। ಅನುರೂಪಧಮ್ಮನ್ತಿ ಲೋಕುತ್ತರಾಧಿಗಮಸ್ಸ ಅನುಚ್ಛವಿಕಸಭಾವಂ। ಕಲ್ಯಾಣಾ ಸುನ್ದರಾ ಪರಿಮಣ್ಡಲಪದಬ್ಯಞ್ಜನಾ ವಾಚಾ ಅಸ್ಸಾತಿ ಕಲ್ಯಾಣವಾಚೋ। ತೇನಾಹ ‘‘ಸುನ್ದರವಚನೋ’’ತಿ। ಕಲ್ಯಾಣಂ ಮಧುರಂ ವಾಕ್ಕರಣಂ ಉದಾಹಾರಘೋಸೋ ಅಸ್ಸಾತಿ ಕಲ್ಯಾಣವಾಕ್ಕರಣೋ। ಗುಣಪರಿಪುಣ್ಣಭಾವೇನ ಪೂರೇ ಪುಣ್ಣಭಾವೇ ಭವಾತಿ ಪೋರೀ, ತಾಯ ಪೋರಿಯಾ। ತೇನಾಹ ‘‘ಗುಣಪರಿಪುಣ್ಣಾಯಾ’’ತಿ। ಪುರೇ ಭವತ್ತಾ ಪೋರಿಯಾ ನಾಗರಿಕಿತ್ಥಿಯಾ ಸುಖುಮಾಲತ್ತನೇನ ಸದಿಸಾತಿ ಪೋರೀ, ತಾಯ ಪೋರಿಯಾ। ‘‘ಸುಖುಮಾಲತ್ತನೇನಾ’’ತಿ ಇಮಿನಾ ತಸ್ಸಾ ವಾಚಾಯ ಮುದುಸಣ್ಹಭಾವೋ ವುತ್ತೋ। ಅಪಲಿಬುದ್ಧಾಯಾತಿ ಪಿತ್ತಸೇಮ್ಹಾದೀಹಿ ನ ಪಲಿವೇಠಿತಾಯ। ಅದೋಸಾಯಾತಿ ಸನ್ದಿದ್ಧವಿಲಮ್ಬಿತಾದಿದೋಸರಹಿತಾಯ ಅಗಳಿತಪದಬ್ಯಞ್ಜನಾಯಾತಿ ಅಪತಿತಪದಬ್ಯಞ್ಜನಾಯ ಅವಿರಹಿತಪದಬ್ಯಞ್ಜನಾಯ। ಉಭಯಮೇತಂ ಅನೇಲಗಲಾಯಾತಿ ಇಮಸ್ಸೇವ ಅತ್ಥವಚನಂ। ಅನೇಲಗಲಾಯಾತಿ ಹಿ ಅನೇಲಾಯ ಚೇವ ಅಗಲಾಯ ಚಾತಿ ಅತ್ಥೋ। ಅತ್ಥಂ ವಿಞ್ಞಾಪೇತುಂ ಸಮತ್ಥಾಯಾತಿ ಆದಿಮಜ್ಝಪರಿಯೋಸಾನಂ ಪಾಕಟಂ ಕತ್ವಾ ಭಾಸಿತತ್ಥಸ್ಸ ವಿಞ್ಞಾಪನಸತ್ಥಾಯ। ಅಟ್ಠಮನವಮದಸಮಾನಿ ಉತ್ತಾನತ್ಥಾನೇವ।

ಖಿಪ್ಪನಿಸನ್ತಿಸುತ್ತಾದಿವಣ್ಣನಾ ನಿಟ್ಠಿತಾ।

ಅಸುರವಗ್ಗವಣ್ಣನಾ ನಿಟ್ಠಿತಾ।

ದುತಿಯಪಣ್ಣಾಸಕಂ ನಿಟ್ಠಿತಂ।

೩. ತತಿಯಪಣ್ಣಾಸಕಂ