೭. ದೇವತಾವಗ್ಗೋ

೧-೩. ಅನಾಗಾಮಿಫಲಸುತ್ತಾದಿವಣ್ಣನಾ

೬೫-೬೭. ಸತ್ತಮಸ್ಸ ಪಠಮೇ ಅಸ್ಸದ್ಧಿಯನ್ತಿ ಅಸ್ಸದ್ಧಭಾವಂ। ದುಪ್ಪಞ್ಞತನ್ತಿ ನಿಪ್ಪಞ್ಞಭಾವಂ। ದುತಿಯೇ ಪಮಾದನ್ತಿ ಸತಿವಿಪ್ಪವಾಸಂ। ತತಿಯೇ ಆಭಿಸಮಾಚಾರಿಕನ್ತಿ ಉತ್ತಮಸಮಾಚಾರಭೂತಂ ವತ್ತವಸೇನ ಪಣ್ಣತ್ತಿಸೀಲಂ। ಸೇಖಧಮ್ಮನ್ತಿ ಸೇಖಪಣ್ಣತ್ತಿಸೀಲಂ। ಸೀಲಾನೀತಿ ಚತ್ತಾರಿ ಮಹಾಸೀಲಾನಿ।

೪. ಸಙ್ಗಣಿಕಾರಾಮಸುತ್ತವಣ್ಣನಾ

೬೮. ಚತುತ್ಥೇ ಸಙ್ಗಣಿಕಾರಾಮೋತಿ ಗಣಸಙ್ಗಣಿಕಾರಾಮೋ। ಸುತ್ತನ್ತಿಕಗಣಾದೀಸು ಪನ ಗಣೇಸು ಅತ್ತನೋ ವಾ ಪರಿಸಾಸಙ್ಖಾತೇ ಗಣೇ ರಮತೀತಿ ಗಣಾರಾಮೋ। ಪವಿವೇಕೇತಿ ಕಾಯವಿವೇಕೇ। ಚಿತ್ತಸ್ಸ ನಿಮಿತ್ತನ್ತಿ ಸಮಾಧಿವಿಪಸ್ಸನಾಚಿತ್ತಸ್ಸ ನಿಮಿತ್ತಂ ಸಮಾಧಿವಿಪಸ್ಸನಾಕಾರಂ। ಸಮ್ಮಾದಿಟ್ಠಿನ್ತಿ ವಿಪಸ್ಸನಾಸಮ್ಮಾದಿಟ್ಠಿಂ। ಸಮಾಧಿನ್ತಿ ಮಗ್ಗಸಮಾಧಿಞ್ಚೇವ ಫಲಸಮಾಧಿಞ್ಚ। ಸಂಯೋಜನಾನೀತಿ ದಸ ಸಂಯೋಜನಾನಿ। ನಿಬ್ಬಾನನ್ತಿ ಅಪಚ್ಚಯಪರಿನಿಬ್ಬಾನಂ।

೫. ದೇವತಾಸುತ್ತವಣ್ಣನಾ

೬೯. ಪಞ್ಚಮೇ ಸೋವಚಸ್ಸತಾತಿ ಸುಬ್ಬಚಭಾವೋ। ಕಲ್ಯಾಣಮಿತ್ತತಾತಿ ಸುಚಿಮಿತ್ತತಾ। ಸತ್ಥುಗಾರವೋತಿ ಸತ್ಥರಿ ಗಾರವಯುತ್ತೋ। ಏಸ ನಯೋ ಸಬ್ಬತ್ಥ।

೬. ಸಮಾಧಿಸುತ್ತವಣ್ಣನಾ

೭೦. ಛಟ್ಠೇ ನ ಸನ್ತೇನಾತಿ ಪಚ್ಚನೀಕಕಿಲೇಸೇಹಿ ಅವೂಪಸನ್ತೇನ। ನ ಪಣೀತೇನಾತಿ ನ ಅತಪ್ಪಕೇನ। ನ ಪಟಿಪ್ಪಸ್ಸದ್ಧಿಲದ್ಧೇನಾತಿ ಕಿಲೇಸಪ್ಪಟಿಪ್ಪಸ್ಸದ್ಧಿಯಾ ಅಲದ್ಧೇನ ಅಪ್ಪತ್ತೇನ। ನ ಏಕೋದಿಭಾವಾಧಿಗತೇನಾತಿ ನ ಏಕಗ್ಗಭಾವಂ ಉಪಗತೇನ।

೭. ಸಕ್ಖಿಭಬ್ಬಸುತ್ತವಣ್ಣನಾ

೭೧. ಸತ್ತಮೇ ತತ್ರ ತತ್ರಾತಿ ತಸ್ಮಿಂ ತಸ್ಮಿಂ ವಿಸೇಸೇ। ಸಕ್ಖಿಭಬ್ಬತನ್ತಿ ಪಚ್ಚಕ್ಖಭಾವಂ। ಆಯತನೇತಿ ಕಾರಣೇ। ಹಾನಭಾಗಿಯಾದಯೋ ವಿಸುದ್ಧಿಮಗ್ಗೇ (ವಿಸುದ್ಧಿ॰ ೧.೩೯) ಸಂವಣ್ಣಿತಾ। ಅಸಕ್ಕಚ್ಚಕಾರೀತಿ ನ ಸುಕತಕಾರೀ, ನ ಆದರಕಾರೀ। ಅಸಪ್ಪಾಯಕಾರೀತಿ ನ ಸಪ್ಪಾಯಕಾರೀ, ನ ಉಪಕಾರಭೂತಧಮ್ಮಕಾರೀ।

೮. ಬಲಸುತ್ತವಣ್ಣನಾ

೭೨. ಅಟ್ಠಮೇ ಬಲತನ್ತಿ ಬಲಭಾವಂ ಥಾಮಭಾವಂ। ಅಸಾತಚ್ಚಕಾರೀತಿ ನ ಸತತಕಾರೀ। ಸೇಸಂ ಹೇಟ್ಠಾ ವುತ್ತನಯಮೇವ।

೯-೧೦. ತಜ್ಝಾನಸುತ್ತದ್ವಯವಣ್ಣನಾ

೭೩-೭೪. ನವಮೇ ನ ಯಥಾಭೂತಂ ಸಮ್ಮಪ್ಪಞ್ಞಾಯ ಸುದಿಟ್ಠೋ ಹೋತೀತಿ ವತ್ಥುಕಾಮಕಿಲೇಸಕಾಮೇಸು ಆದೀನವೋ ನ ಯಥಾಸಭಾವತೋ ಝಾನಪಞ್ಞಾಯ ಸುದಿಟ್ಠೋ ಹೋತಿ। ದಸಮಂ ಉತ್ತಾನತ್ಥಮೇವಾತಿ।

ದೇವತಾವಗ್ಗೋ ಸತ್ತಮೋ।