೧೦. ಆನಿಸಂಸವಗ್ಗೋ

೧-೨. ಪಾತುಭಾವಸುತ್ತಾದಿವಣ್ಣನಾ

೯೬-೯೭. ದಸಮಸ್ಸ ಪಠಮೇ ಅರಿಯಾಯತನೇತಿ ಮಜ್ಝಿಮದೇಸೇ। ಇನ್ದ್ರಿಯಾನನ್ತಿ ಮನಚ್ಛಟ್ಠಾನಂ। ದುತಿಯೇ ಸದ್ಧಮ್ಮನಿಯತೋತಿ ಸಾಸನಸದ್ಧಮ್ಮೇ ನಿಯತೋ। ಅಸಾಧಾರಣೇನಾತಿ ಪುಥುಜ್ಜನೇಹಿ ಅಸಾಧಾರಣೇನ।

೭. ಅನವತ್ಥಿತಸುತ್ತವಣ್ಣನಾ

೧೦೨. ಸತ್ತಮೇ ಅನೋಧಿಂ ಕರಿತ್ವಾತಿ ‘‘ಏತ್ತಕಾವ ಸಙ್ಖಾರಾ ಅನಿಚ್ಚಾ, ನ ಇತೋ ಪರೇ’’ತಿ ಏವಂ ಸೀಮಂ ಮರಿಯಾದಂ ಅಕತ್ವಾ। ಅನವತ್ಥಿತಾತಿ ಅವತ್ಥಿತಾಯ ರಹಿತಾ, ಭಿಜ್ಜಮಾನಾವ ಹುತ್ವಾ ಉಪಟ್ಠಹಿಸ್ಸನ್ತೀತಿ ಅತ್ಥೋ। ಸಬ್ಬಲೋಕೇತಿ ಸಕಲೇ ತೇಧಾತುಕೇ। ಸಾಮಞ್ಞೇನಾತಿ ಸಮಣಭಾವೇನ, ಅರಿಯಮಗ್ಗೇನಾತಿ ಅತ್ಥೋ।

೮. ಉಕ್ಖಿತ್ತಾಸಿಕಸುತ್ತವಣ್ಣನಾ

೧೦೩. ಅಟ್ಠಮೇ ಮೇತ್ತಾವತಾಯಾತಿ ಮೇತ್ತಾಯುತ್ತಾಯ ಪಾರಿಚರಿಯಾಯ। ಸತ್ತ ಹಿ ಸೇಖಾ ತಥಾಗತಂ ಮೇತ್ತಾವತಾಯ ಪರಿಚರನ್ತಿ, ಖೀಣಾಸವೋ ಪರಿಚಿಣ್ಣಸತ್ಥುಕೋ।

೯. ಅತಮ್ಮಯಸುತ್ತವಣ್ಣನಾ

೧೦೪. ನವಮೇ ಅತಮ್ಮಯೋತಿ ತಮ್ಮಯಾ ವುಚ್ಚನ್ತಿ ತಣ್ಹಾದಿಟ್ಠಿಯೋ, ತಾಹಿ ರಹಿತೋ। ಅಹಂಕಾರಾತಿ ಅಹಂಕಾರದಿಟ್ಠಿ। ಮಮಂಕಾರಾತಿ ಮಮಂಕಾರತಣ್ಹಾ। ಸೇಸಂ ಸಬ್ಬತ್ಥ ಉತ್ತಾನಮೇವಾತಿ।

ಆನಿಸಂಸವಗ್ಗೋ ದಸಮೋ।

ದುತಿಯಪಣ್ಣಾಸಕಂ ನಿಟ್ಠಿತಂ।