(೧೨) ೨. ಅನ್ಧಕವಿನ್ದವಗ್ಗೋ

೧-೪. ಕುಲೂಪಕಸುತ್ತಾದಿವಣ್ಣನಾ

೧೧೧-೧೧೪. ದುತಿಯಸ್ಸ ಪಠಮೇ ಅಸನ್ಥವೇಸು ಕುಲೇಸು ವಿಸ್ಸಾಸೋ ಏತಸ್ಸಾತಿ ಅಸನ್ಥವವಿಸ್ಸಾಸೀ। ಅನಿಸ್ಸರೋ ಹುತ್ವಾ ವಿಕಪ್ಪೇತಿ ಸಂವಿದಹತಿ ಸೀಲೇನಾತಿ ಅನಿಸ್ಸರವಿಕಪ್ಪೀ। ವಿಸ್ಸಟ್ಠಾನಿ ವಿಸುಂ ಖಿತ್ತಾನಿ ಭೇದೇನ ಅವತ್ಥಿತಾನಿ ಕುಲಾನಿ ಘಟನತ್ಥಾಯ ಉಪಸೇವತಿ ಸೀಲೇನಾತಿ ವಿಸ್ಸಟ್ಠುಪಸೇವೀ। ದುತಿಯಾದೀನಿ ಉತ್ತಾನತ್ಥಾನೇವ।

ಕುಲೂಪಕಸುತ್ತಾದಿವಣ್ಣನಾ ನಿಟ್ಠಿತಾ।

೫-೧೩. ಮಚ್ಛರಿನೀಸುತ್ತಾದಿವಣ್ಣನಾ

೧೧೫-೧೨೩. ಪಞ್ಚಮೇ ಆವಾಸಮಚ್ಛರಿಯಾದೀನಿ ಪಞ್ಚ ಇಧ ಭಿಕ್ಖುನಿಯಾ ವಸೇನ ಆಗತಾನಿ, ಭಿಕ್ಖುಸ್ಸ ವಸೇನಪಿ ತಾನಿ ವೇದಿತಬ್ಬಾನಿ। ಆವಾಸಮಚ್ಛರಿಯೇನ ಹಿ ಸಮನ್ನಾಗತೋ ಭಿಕ್ಖು ಆಗನ್ತುಕಂ ದಿಸ್ವಾ ‘‘ಏತ್ಥ ಚೇತಿಯಸ್ಸ ವಾ ಸಙ್ಘಸ್ಸ ವಾ ಪರಿಕ್ಖಾರೋ ಠಪಿತೋ’’ತಿಆದೀನಿ ವತ್ವಾ ಸಙ್ಘಿಕಆವಾಸಂ ನ ದೇತಿ। ಕುಲಮಚ್ಛರಿಯೇನ ಸಮನ್ನಾಗತೋ ಭಿಕ್ಖು ತೇಹಿ ತೇಹಿ ಕಾರಣೇಹಿ ಆದೀನವಂ ದಸ್ಸೇತ್ವಾ ಅತ್ತನೋ ಉಪಟ್ಠಾಕೇ ಕುಲೇ ಅಞ್ಞೇಸಂ ಪವೇಸಮ್ಪಿ ನಿವಾರೇತಿ। ಲಾಭಮಚ್ಛರಿಯೇನ ಸಮನ್ನಾಗತೋ ಸಙ್ಘಿಕಮ್ಪಿ ಲಾಭಂ ಮಚ್ಛರಾಯನ್ತೋ ಯಥಾ ಅಞ್ಞೇ ನ ಲಭನ್ತಿ, ಏವಂ ಕರೋತಿ ಅತ್ತನಾ ವಿಸಮನಿಸ್ಸಿತತಾಯ ಬಲವನಿಸ್ಸಿತತಾಯ ಚ। ವಣ್ಣಮಚ್ಛರಿಯೇನ ಸಮನ್ನಾಗತೋ ಅತ್ತನೋ ವಣ್ಣಂ ವಣ್ಣೇತಿ, ಪರೇಸಂ ವಣ್ಣೇ ‘‘ಕಿಂ ವಣ್ಣೋ ಏಸೋ’’ತಿ ತಂ ತಂ ದೋಸಂ ವದತಿ। ವಣ್ಣೋತಿ ಚೇತ್ಥ ಸರೀರವಣ್ಣೋಪಿ, ಗುಣವಣ್ಣೋಪಿ ವೇದಿತಬ್ಬೋ।

ಧಮ್ಮಮಚ್ಛರಿಯೇನ ಸಮನ್ನಾಗತೋ – ‘‘ಇಮಂ ಧಮ್ಮಂ ಪರಿಯಾಪುಣಿತ್ವಾ ಏಸೋ ಮಂ ಅಭಿಭವಿಸ್ಸತೀ’’ತಿ ಅಞ್ಞಸ್ಸ ನ ದೇತಿ। ಯೋ ಪನ – ‘‘ಅಯಂ ಇಮಂ ಧಮ್ಮಂ ಉಗ್ಗಹೇತ್ವಾ ಅಞ್ಞಥಾ ಅತ್ಥಂ ವಿಪರಿವತ್ತೇತ್ವಾ ನಾಸೇಸ್ಸತೀ’’ತಿ ಧಮ್ಮನುಗ್ಗಹೇನ ವಾ – ‘‘ಅಯಂ ಇಮಂ ಧಮ್ಮಂ ಉಗ್ಗಹೇತ್ವಾ ಉದ್ಧತೋ ಉನ್ನಳೋ ಅವೂಪಸನ್ತಚಿತ್ತೋ ಅಪುಞ್ಞಂ ಪಸವಿಸ್ಸತೀ’’ತಿ ಪುಗ್ಗಲಾನುಗ್ಗಹೇನ ವಾ ನ ದೇತಿ, ನ ತಂ ಮಚ್ಛರಿಯಂ। ಧಮ್ಮೋತಿ ಚೇತ್ಥ ಪರಿಯತ್ತಿಧಮ್ಮೋ ಅಧಿಪ್ಪೇತೋ। ಪಟಿವೇಧಧಮ್ಮೋ ಹಿ ಅರಿಯಾನಂಯೇವ ಹೋತಿ, ತೇ ಚ ನಂ ನ ಮಚ್ಛರಾಯನ್ತಿ ಮಚ್ಛರಿಯಸ್ಸ ಸಬ್ಬಸೋ ಪಹೀನತ್ತಾತಿ ತಸ್ಸ ಅಸಮ್ಭವೋ ಏವ। ತತ್ಥ ಆವಾಸಮಚ್ಛರಿಯೇನ ಲೋಹಗೇಹೇ ಪಚ್ಚತಿ, ಯಕ್ಖೋ ವಾ ಪೇತೋ ವಾ ಹುತ್ವಾ ತಸ್ಸೇವ ಆವಾಸಸ್ಸ ಸಙ್ಕಾರಂ ಸೀಸೇನ ಉಕ್ಖಿಪಿತ್ವಾ ಚರತಿ। ಕುಲಮಚ್ಛರಿಯೇನ ಅಪ್ಪಭೋಗೋ ಹೋತಿ। ಲಾಭಮಚ್ಛರಿಯೇನ ಗೂಥನಿರಯೇ ನಿಬ್ಬತ್ತತಿ, ಸಙ್ಘಸ್ಸ ವಾ ಗಣಸ್ಸ ವಾ ಲಾಭಂ ಮಚ್ಛರಾಯಿತ್ವಾ ಪುಗ್ಗಲಿಕಪರಿಭೋಗೇನ ವಾ ಪರಿಭುಞ್ಜಿತ್ವಾ ಯಕ್ಖೋ ವಾ ಪೇತೋ ವಾ ಮಹಾಅಜಗರೋ ವಾ ಹುತ್ವಾ ನಿಬ್ಬತ್ತತಿ। ವಣ್ಣಮಚ್ಛರಿಯೇನ ಭವೇಸು ನಿಬ್ಬತ್ತಸ್ಸ ವಣ್ಣೋ ನಾಮ ನ ಹೋತಿ। ಧಮ್ಮಮಚ್ಛರಿಯೇನ ಕುಕ್ಕುಳನಿರಯೇ ನಿಬ್ಬತ್ತತಿ। ಛಟ್ಠಾದೀನಿ ಉತ್ತಾನತ್ಥಾನೇವ।

ಮಚ್ಛರಿನೀಸುತ್ತಾದಿವಣ್ಣನಾ ನಿಟ್ಠಿತಾ।

ಅನ್ಧಕವಿನ್ದವಗ್ಗವಣ್ಣನಾ ನಿಟ್ಠಿತಾ।