(೧೯) ೪. ಅರಞ್ಞವಗ್ಗೋ
೧. ಆರಞ್ಞಿಕಸುತ್ತವಣ್ಣನಾ
೧೮೧. ಚತುತ್ಥಸ್ಸ ಅಪ್ಪೀಚ್ಛತಂಯೇವ ನಿಸ್ಸಾಯಾತಿಆದೀಸು ‘‘ಇತಿ ಅಪ್ಪಿಚ್ಛೋ ಭವಿಸ್ಸಾಮೀ’’ತಿ ಇದಂ ಮೇ ಆರಞ್ಞಿಕಙ್ಗಂ ಅಪ್ಪಿಚ್ಛತಾಯ ಸಂವತ್ತಿಸ್ಸತಿ, ‘‘ಇತಿ ಸನ್ತುಟ್ಠೋ ಭವಿಸ್ಸಾಮೀ’’ತಿ ಇದಂ ಮೇ ಆರಞ್ಞಿಕಙ್ಗಂ ಸನ್ತುಟ್ಠಿಯಾ ಸಂವತ್ತಿಸ್ಸತಿ, ‘‘ಇತಿ ಕಿಲೇಸೇ ಸಲ್ಲಿಖಿಸ್ಸಾಮೀ’’ತಿ ಇದಂ ಮೇ ಆರಞ್ಞಿಕಙ್ಗಂ ಕಿಲೇಸಸಲ್ಲಿಖನತ್ಥಾಯ ಸಂವತ್ತಿಸ್ಸತೀತಿ ಆರಞ್ಞಿಕೋ ಹೋತಿ। ಅಗ್ಗೋತಿ ಜೇಟ್ಠಕೋ। ಸೇಸಾನಿ ತಸ್ಸೇವ ವೇವಚನಾನಿ।
ಗವಾ ಖೀರನ್ತಿ ಗಾವಿತೋ ಖೀರಂ ನಾಮ ಹೋತಿ, ನ ಗಾವಿಯಾ ದಧಿ। ಖೀರಮ್ಹಾ ದಧೀತಿಆದೀಸುಪಿ ಏಸೇವ ನಯೋ। ಏವಮೇವನ್ತಿ ಯಥಾ ಏತೇಸು ಪಞ್ಚಸು ಗೋರಸೇಸು ಸಪ್ಪಿಮಣ್ಡೋ ಅಗ್ಗೋ, ಏವಮೇವಂ ಇಮೇಸು ಪಞ್ಚಸು ಆರಞ್ಞಿಕೇಸು ಯೋ ಅಯಂ ಅಪ್ಪಿಚ್ಛತಾದೀನಿ ನಿಸ್ಸಾಯ ಆರಞ್ಞಿಕೋ ಹೋತಿ, ಅಯಂ ಅಗ್ಗೋ ಚೇವ ಸೇಟ್ಠೋ ಚ ಮೋಕ್ಖೋ ಚ ಪವರೋ ಚ। ಇಮೇಸು ಆರಞ್ಞಿಕೇಸು ಜಾತಿಆರಞ್ಞಿಕಾ ವೇದಿತಬ್ಬಾ, ನ ಆರಞ್ಞಿಕನಾಮಮತ್ತೇನ ಆರಞ್ಞಿಕಾತಿ ವೇದಿತಬ್ಬಾ। ಪಂಸುಕೂಲಿಕಾದೀಸುಪಿ ಏಸೇವ ನಯೋ।
ಆರಞ್ಞಿಕಸುತ್ತವಣ್ಣನಾ ನಿಟ್ಠಿತಾ।
ಅರಞ್ಞವಗ್ಗವಣ್ಣನಾ ನಿಟ್ಠಿತಾ।