(೨೧) ೧. ಕಿಮಿಲವಗ್ಗೋ
೧-೪. ಕಿಮಿಲಸುತ್ತಾದಿವಣ್ಣನಾ
೨೦೧-೪. ಪಞ್ಚಮಸ್ಸ ಅಧಿವಾಸನಕ್ಖನ್ತಿ। ಸುಭೇ ರತೋತಿ ಸೂರತೋ, ಸುಟ್ಠು ವಾ ಪಾಪತೋ ಓರತೋ ವಿರತೋ ಸೋರತೋ, ತಸ್ಸ ಭಾವೋ ಸೋರಚ್ಚಂ। ತೇನಾಹ ‘‘ಸೋರಚ್ಚೇನಾತಿ ಸುಚಿಸೀಲತಾಯಾ’’ತಿ। ಸಾ ಹಿ ಸೋಭನಕಮ್ಮರತತಾ, ಸುಟ್ಠು ವಾ ಪಾಪತೋ ಓರತಭಾವೋ ವಿರತತಾ। ಚತುತ್ಥೇ ನತ್ಥಿ ವತ್ತಬ್ಬಂ।
ಕಿಮಿಲಸುತ್ತಾದಿವಣ್ಣನಾ ನಿಟ್ಠಿತಾ।
೫. ಚೇತೋಖಿಲಸುತ್ತವಣ್ಣನಾ
೨೦೫. ಪಞ್ಚಮೇ ಚೇತೋಖಿಲಾ ನಾಮ ಅತ್ಥತೋ ವಿಚಿಕಿಚ್ಛಾ ಕೋಧೋ ಚ। ತೇ ಪನ ಯಸ್ಮಿಂ ಸನ್ತಾನೇ ಉಪ್ಪಜ್ಜನ್ತಿ, ತಸ್ಸ ಖರಭಾವೋ ಕಕ್ಖಳಭಾವೋ ಹುತ್ವಾ ಉಪತಿಟ್ಠನ್ತಿ, ಪಗೇವ ಅತ್ತನಾ ಸಮ್ಪಯುತ್ತಚಿತ್ತಸ್ಸಾತಿ ಆಹ ‘‘ಚಿತ್ತಸ್ಸ ಥದ್ಧಭಾವಾ’’ತಿ। ಯಥಾ ಲಕ್ಖಣಪಾರಿಪೂರಿಯಾ ಗಹಿತಾಯ ಸಬ್ಬಾ ಸತ್ಥು ರೂಪಕಾಯಸಿರೀ ಗಹಿತಾ ಏವ ನಾಮ ಹೋತಿ ಏವಂ ಸಬ್ಬಞ್ಞುತಾಯ ಸಬ್ಬಧಮ್ಮಕಾಯಸಿರೀ ಗಹಿತಾ ಏವ ನಾಮ ಹೋತೀತಿ ತದುಭಯವತ್ಥುಕಮೇವ ಕಙ್ಖಂ ದಸ್ಸೇನ್ತೋ ‘‘ಸರೀರೇ ಕಙ್ಖಮಾನೋ’’ತಿಆದಿಮಾಹ। ವಿಚಿನನ್ತೋತಿ ಧಮ್ಮಸಭಾವಂ ವೀಮಂಸನ್ತೋ। ಕಿಚ್ಛತೀತಿ ಕಿಲಮತಿ। ವಿನಿಚ್ಛೇತುಂ ನ ಸಕ್ಕೋತೀತಿ ಸನ್ನಿಟ್ಠಾತುಂ ನ ಸಕ್ಕೋತಿ। ಆತಪತಿ ಕಿಲೇಸೇತಿ ಆತಪ್ಪಂ, ಸಮ್ಮಾವಾಯಾಮೋತಿ ಆಹ ‘‘ಆತಪ್ಪಾಯಾತಿ ಕಿಲೇಸಸನ್ತಾಪನವೀರಿಯಕರಣತ್ಥಾಯಾ’’ತಿ। ಪುನಪ್ಪುನಂ ಯೋಗಾಯಾತಿ ಭಾವನಂ ಪುನಪ್ಪುನಂ ಯುಞ್ಜನಾಯ। ಸತತಕಿರಿಯಾಯಾತಿ ಭಾವನಾಯ ನಿರನ್ತರಪ್ಪಯೋಗಾಯ।
ಪಟಿವೇಧಧಮ್ಮೇ ಕಙ್ಖಮಾನೋತಿ ಏತ್ಥ ಕಥಂ ಲೋಕುತ್ತರಧಮ್ಮೇ ಕಙ್ಖಾ ಪವತ್ತೀತಿ? ನ ಆರಮ್ಮಣಕರಣವಸೇನ ‘‘ವಿಪಸ್ಸನಾ…ಪೇ॰… ವದನ್ತಿ, ತಂ ಅತ್ಥಿ ನು ಖೋ ನತ್ಥೀತಿ ಕಙ್ಖತೀ’’ತಿ। ಸಿಕ್ಖಾತಿ ಚೇತ್ಥ ಪುಬ್ಬಭಾಗಸಿಕ್ಖಾ ವೇದಿತಬ್ಬಾ। ಕಾಮಞ್ಚೇತ್ಥ ವಿಸೇಸುಪ್ಪತ್ತಿಯಾ ಮಹಾಸಾವಜ್ಜತಾಯ ಚೇವ ಸಂವಾಸನಿಮಿತ್ತಂ ಘಟನಾಹೇತು ಅಭಿಣ್ಹುಪ್ಪತ್ತಿಕತಾಯ ಚ ಸಬ್ರಹ್ಮಚಾರೀಸೂತಿ ಕೋಪಸ್ಸ ವಿಸಯೋ ವಿಸೇಸೇತ್ವಾ ವುತ್ತೋ, ಅಞ್ಞತ್ಥಾಪಿ ಕೋಪೋ ನ ಚೇತೋಖಿಲೋತಿ ನ ಸಕ್ಕಾ ವಿಞ್ಞಾತುನ್ತಿ ಕೇಚಿ। ಯದಿ ಏವಂ ವಿಚಿಕಿಚ್ಛಾಯಪಿ ಅಯಂ ನಯೋ ಆಪಜ್ಜತಿ, ತಸ್ಮಾ ಯಥಾರುತವಸೇನ ಗಹೇತಬ್ಬಂ।
ಚೇತೋಖಿಲಸುತ್ತವಣ್ಣನಾ ನಿಟ್ಠಿತಾ।
೬-೮. ವಿನಿಬನ್ಧಸುತ್ತಾದಿವಣ್ಣನಾ
೨೦೬-೮. ಛಟ್ಠೇ ಪವತ್ತಿತುಂ ಅಪ್ಪದಾನವಸೇನ ಕುಸಲಚಿತ್ತಂ ವಿನಿಬನ್ಧನ್ತೀತಿ ಚೇತಸೋವಿನಿಬನ್ಧಾ। ತಂ ಪನ ವಿನಿಬನ್ಧನ್ತಾ ಮುಟ್ಠಿಗ್ಗಾಹಂ ಗಣ್ಹನ್ತಾ ವಿಯ ಹೋನ್ತೀತಿ ಆಹ ‘‘ಚಿತ್ತಂ ವಿನಿಬನ್ಧಿತ್ವಾ’’ತಿಆದಿ। ಕಾಮಗಿದ್ಧೋ ಪುಗ್ಗಲೋ ವತ್ಥುಕಾಮೇಪಿ ಕಿಲೇಸಕಾಮೇಪಿ ಅಸ್ಸಾದೇತಿ ಅಭಿನನ್ದತೀತಿ ವುತ್ತಂ ‘‘ವತ್ಥುಕಾಮೇಪಿ ಕಿಲೇಸಕಾಮೇಪೀ’’ತಿ। ಅತ್ತನೋ ಕಾಯೇತಿ ಅತ್ತನೋ ನಾಮಕಾಯೇ, ಅತ್ತಭಾವೇ ವಾ। ಬಹಿದ್ಧಾರೂಪೇತಿ ಪರೇಸಂ ಕಾಯೇ ಅನಿನ್ದ್ರಿಯಬದ್ಧರೂಪೇ ಚ। ಉದರಂ ಅವದಿಹತಿ ಉಪಚಿನೋತಿ ಪೂರೇತೀತಿ ಉದರಾವದೇಹಕಂ। ಸೇಯ್ಯಸುಖನ್ತಿ ಸೇಯ್ಯಾಯ ಸಯನವಸೇನ ಉಪ್ಪಜ್ಜನಕಸುಖಂ। ಸಮ್ಪರಿವತ್ತಕನ್ತಿ ಸಮ್ಪರಿವತ್ತಿತ್ವಾ। ಪಣಿಧಾಯಾತಿ ತಣ್ಹಾವಸೇನೇವ ಪಣಿದಹಿತ್ವಾ। ಇತಿ ಪಞ್ಚವಿಧೋಪಿ ಲೋಭವಿಸೇಸೋ ಏವ ‘‘ಚೇತೋವಿನಿಬನ್ಧೋ’’ತಿ ವುತ್ತೋತಿ ವೇದಿತಬ್ಬೋ। ಸತ್ತಮಟ್ಠಮೇಸು ನತ್ಥಿ ವತ್ತಬ್ಬಂ।
ವಿನಿಬನ್ಧಸುತ್ತಾದಿವಣ್ಣನಾ ನಿಟ್ಠಿತಾ।
೯-೧೦. ಗೀತಸ್ಸರಸುತ್ತಾದಿವಣ್ಣನಾ
೨೦೯-೨೧೦. ನವಮೇ ಆಯತಕೋ ನಾಮ ಗೀತಸ್ಸರೋ ತಂ ತಂ ವತ್ತಂ ಭಿನ್ದಿತ್ವಾ ಅಕ್ಖರಾನಿ ವಿನಾಸೇತ್ವಾ ಪವತ್ತೋತಿ ಆಹ ‘‘ಆಯತಕೇನಾ’’ತಿಆದಿ। ಧಮ್ಮೇಹಿ ಸುತ್ತವತ್ತಂ ನಾಮ ಅತ್ಥಿ, ಗಾಥಾವತ್ತಂ ನಾಮ ಅತ್ಥಿ, ತಂ ವಿನಾಸೇತ್ವಾ ಅತಿದೀಘಂ ಕಾತುಂ ನ ವಟ್ಟತಿ। ಧಮ್ಮಞ್ಹಿ ಭಾಸನ್ತೇನ ಚತುರಸ್ಸೇನ ವತ್ತೇನ ಪರಿಮಣ್ಡಲಾನಿ
ಗೀತಸ್ಸರಸುತ್ತಾದಿವಣ್ಣನಾ ನಿಟ್ಠಿತಾ।
ಕಿಮಿಲವಗ್ಗವಣ್ಣನಾ ನಿಟ್ಠಿತಾ।