(೨೨) ೨. ಅಕ್ಕೋಸಕವಗ್ಗೋ

೧-೨. ಅಕ್ಕೋಸಕಸುತ್ತಾದಿವಣ್ಣನಾ

೨೧೧-೨. ದುತಿಯಸ್ಸ ಪಠಮೇ ದಸಹಿ ಅಕ್ಕೋಸವತ್ಥೂಹಿ ಅಕ್ಕೋಸಕೋತಿ ‘‘ಬಾಲೋಸಿ, ಮೂಳ್ಹೋಸಿ, ಓಟ್ಠೋಸಿ, ಗೋಣೋಸಿ, ಗದ್ರಭೋಸೀ’’ತಿಆದಿನಾ ದಸಹಿ ಅಕ್ಕೋಸವತ್ಥೂಹಿ ಅಕ್ಕೋಸಕೋ। ‘‘ಹೋತು, ಮುಣ್ಡಕಸಮಣ, ಅದಣ್ಡೋ ಅಹನ್ತಿ ಕರೋಸಿ, ಇದಾನಿ ತೇ ರಾಜಕುಲಂ ಗನ್ತ್ವಾ ದಣ್ಡಂ ಆರೋಪೇಸ್ಸಾಮೀ’’ತಿಆದೀನಿ ವದನ್ತೋ ಪರಿಭಾಸಕೋ ನಾಮಾತಿ ಆಹ ‘‘ಭಯದಸ್ಸನೇನ ಪರಿಭಾಸಕೋ’’ತಿ। ಲೋಕುತ್ತರಧಮ್ಮಾ ಅಪಾಯಮಗ್ಗಸ್ಸ ಪರಿಪನ್ಥಭಾವತೋ ಪರಿಪನ್ಥೋ ನಾಮಾತಿ ಆಹ ‘‘ಲೋಕುತ್ತರಪರಿಪನ್ಥಸ್ಸ ಛಿನ್ನತ್ತಾ’’ತಿ, ಲೋಕುತ್ತರಸಙ್ಖಾತಸ್ಸ ಅಪಾಯಮಗ್ಗಪರಿಪನ್ಥಸ್ಸ ಛಿನ್ನತ್ತಾತಿ ಅತ್ಥೋ। ದುತಿಯೇ ನತ್ಥಿ ವತ್ತಬ್ಬಂ।

ಅಕ್ಕೋಸಕಸುತ್ತಾದಿವಣ್ಣನಾ ನಿಟ್ಠಿತಾ।

೩-೧೦. ಸೀಲಸುತ್ತಾದಿವಣ್ಣನಾ

೨೧೩-೨೨೦. ತತಿಯೇ (ದೀ॰ ನಿ॰ ಟೀ॰ ೨.೧೪೯) ದುಸ್ಸೀಲೋತಿ ಏತ್ಥ ದು-ಸದ್ದೋ ಅಭಾವತ್ಥೋ ‘‘ದುಪ್ಪಞ್ಞೋ’’ತಿಆದೀಸು (ಮ॰ ನಿ॰ ೧.೪೪೯) ವಿಯ, ನ ಗರಹಣತ್ಥೋತಿ ಆಹ ‘‘ಅಸೀಲೋ ನಿಸ್ಸೀಲೋ’’ತಿ। ಭಿನ್ನಸಂವರೋತಿ ಏತ್ಥ ಸಮಾದಿನ್ನಸೀಲೋ ಕೇನಚಿ ಕಾರಣೇನ ಸೀಲಭೇದಂ ಪತ್ತೋ, ಸೋ ತಾವ ಭಿನ್ನಸಂವರೋ ಹೋತು। ಯೋ ಪನ ಸಬ್ಬೇನ ಸಬ್ಬಂ ಅಸಮಾದಿನ್ನಸೀಲೋ ಆಚಾರಹೀನೋ, ಸೋ ಕಥಂ ಭಿನ್ನಸಂವರೋ ನಾಮ ಹೋತೀತಿ ? ಸೋಪಿ ಸಾಧುಸಮಾಚಾರಸ್ಸ ಪರಿಹರಣೀಯಸ್ಸ ಭೇದಿತತ್ತಾ ಭಿನ್ನಸಂವರೋ ಏವ ನಾಮ। ವಿನಟ್ಠಸಂವರೋ ಸಂವರರಹಿತೋತಿ ಹಿ ವುತ್ತಂ ಹೋತಿ। ತಂ ತಂ ಸಿಪ್ಪಟ್ಠಾನಂ। ಮಾಘಾತಕಾಲೇತಿ ‘‘ಮಾ ಘಾತೇಥ ಪಾಣೀನ’’ನ್ತಿ ಏವಂ ಮಾಘಾತಘೋಸನಂ ಘೋಸಿತದಿವಸೇ। ಅಬ್ಭುಗ್ಗಚ್ಛತಿ ಪಾಪಕೋ ಕಿತ್ತಿಸದ್ದೋ। ಅಜ್ಝಾಸಯೇನ ಮಙ್ಕು ಹೋತಿಯೇವ ವಿಪ್ಪಟಿಸಾರಿಭಾವತೋ।

ತಸ್ಸಾತಿ ದುಸ್ಸೀಲಸ್ಸ। ಸಮಾದಾಯ ವತ್ತಿತಟ್ಠಾನನ್ತಿ ಉಟ್ಠಾಯ ಸಮುಟ್ಠಾಯ ಕತಕಾರಣಂ। ಆಪಾಥಂ ಆಗಚ್ಛತೀತಿ ತಂ ಮನಸೋ ಉಪಟ್ಠಾತಿ। ಉಮ್ಮೀಲೇತ್ವಾ ಇಧಲೋಕನ್ತಿ ಉಮ್ಮೀಲನಕಾಲೇ ಅತ್ತನೋ ಪುತ್ತದಾರಾದಿವಸೇನ ಇಧಲೋಕಂ ಪಸ್ಸತಿ। ನಿಮೀಲೇತ್ವಾ ಪರಲೋಕನ್ತಿ ನಿಮೀಲನಕಾಲೇ ಗತಿನಿಮಿತ್ತುಪಟ್ಠಾನವಸೇನ ಪರಲೋಕಂ ಪಸ್ಸತಿ। ತೇನಾಹ ‘‘ಚತ್ತಾರೋ ಅಪಾಯಾ’’ತಿಆದಿ। ಪಞ್ಚಮಪದನ್ತಿ ‘‘ಕಾಯಸ್ಸ ಭೇದಾ’’ತಿಆದಿನಾ ವುತ್ತೋ ಪಞ್ಚಮೋ ಆದೀನವಕೋಟ್ಠಾಸೋ। ವುತ್ತವಿಪರಿಯಾಯೇನಾತಿ ವುತ್ತತ್ಥಾಯ ಆದೀನವಕಥಾಯ ವಿಪರಿಯಾಯೇನ ‘‘ಅಪ್ಪಮತ್ತೋ ತಂ ತಂ ಕಸಿವಣಿಜ್ಜಾದಿಂ ಯಥಾಕಾಲಂ ಸಮ್ಪಾದೇತುಂ ಸಕ್ಕೋತೀ’’ತಿಆದಿನಾ। ಪಾಸಂಸಂ ಸೀಲಮಸ್ಸ ಅತ್ಥೀತಿ ಸೀಲವಾ। ಸೀಲಸಮ್ಪನ್ನೋತಿ ಸೀಲೇನ ಸಮನ್ನಾಗತೋ ಸಮ್ಪನ್ನಸೀಲೋತಿ ಏವಮಾದಿಕಂ ಪನ ಅತ್ಥವಚನಂ ಸುಕರನ್ತಿ ಅನಾಮಟ್ಠಂ। ಚತುತ್ಥಾದೀನಿ ಉತ್ತಾನತ್ಥಾನೇವ।

ಸೀಲಸುತ್ತಾದಿವಣ್ಣನಾ ನಿಟ್ಠಿತಾ।

ಅಕ್ಕೋಸಕವಗ್ಗವಣ್ಣನಾ ನಿಟ್ಠಿತಾ।