(೭) ೨. ಸಞ್ಞಾವಗ್ಗೋ
೧-೫. ಸಞ್ಞಾಸುತ್ತಾದಿವಣ್ಣನಾ
೬೧-೬೫. ದುತಿಯಸ್ಸ ಪಠಮೇ ‘‘ಮಹಪ್ಫಲಾ ಮಹಾನಿಸಂಸಾ’’ತಿ ಉಭಯಮ್ಪೇತಂ ಅತ್ಥತೋ ಏಕಂ, ಬ್ಯಞ್ಜನಮೇವ ನಾನನ್ತಿ ಆಹ ‘‘ಮಹಪ್ಫಲಾ’’ತಿಆದಿ। ‘‘ಪಞ್ಚಿಮೇ ಗಹಪತಯೋ ಆನಿಸಂಸಾ’’ತಿಆದೀಸು (ಉದಾ॰ ೭೬) ಆನಿಸಂಸ-ಸದ್ದೋ ಫಲಪರಿಯಾಯೋಪಿ ಹೋತಿ ಮಹಾನಿಸಂಸಾ। ಅಮತೋಗಧಾತಿ ಅಮತಬ್ಭನ್ತರಾ ಅಮತಂ ಅನುಪ್ಪವಿಟ್ಠಾ ನಿಬ್ಬಾನದಿಟ್ಠತ್ತಾ, ತತೋ ಪರಂ ನ ಗಚ್ಛನ್ತಿ। ತೇನ ವುತ್ತಂ ‘‘ಅಮತಪರಿಯೋಸಾನಾ’’ತಿ। ಅಮತಂ ಪರಿಯೋಸಾನಂ ಅವಸಾನಂ ಏತಾಸನ್ತಿ ಅಮತಪರಿಯೋಸಾನಾ। ಮರಣಸಞ್ಞಾತಿ ಮರಣಾನುಪಸ್ಸನಾಞಾಣೇನ ಸಞ್ಞಾ। ಆಹಾರೇ ಪಟಿಕೂಲಸಞ್ಞಾತಿ ಆಹಾರಂ ಗಮನಾದಿವಸೇನ ಪಟಿಕೂಲತೋ ಪರಿಗ್ಗಣ್ಹನ್ತಸ್ಸ ಉಪ್ಪನ್ನಸಞ್ಞಾ। ಉಕ್ಕಣ್ಠಿತಸ್ಸಾತಿ ನಿಬ್ಬಿನ್ದನ್ತಸ್ಸ ಕತ್ಥಚಿಪಿ ಅಸಜ್ಜನ್ತಸ್ಸ। ದುತಿಯಾದೀನಿ ಉತ್ತಾನತ್ಥಾನೇವ।
ಸಞ್ಞಾಸುತ್ತಾದಿವಣ್ಣನಾ ನಿಟ್ಠಿತಾ।
೬-೧೦. ಸಾಜೀವಸುತ್ತಾದಿವಣ್ಣನಾ
೬೬-೭೦. ಛಟ್ಠೇ ಸಹ ಆಜೀವನ್ತಿ ಏತ್ಥಾತಿ ಸಾಜೀವೋ, ಪಞ್ಹಸ್ಸ ಪುಚ್ಛನಂ ವಿಸ್ಸಜ್ಜನಞ್ಚ। ತೇನಾಹ ‘‘ಸಾಜೀವೋತಿ ಪಞ್ಹಪುಚ್ಛನಞ್ಚೇವ ಪಞ್ಹವಿಸ್ಸಜ್ಜನಞ್ಚಾ’’ತಿಆದಿ। ಅಭಿಸಙ್ಖತನ್ತಿ ಚಿತಂ। ಸತ್ತಮಾದೀನಿ ಉತ್ತಾನತ್ಥಾನೇವ।
ಸಾಜೀವಸುತ್ತಾದಿವಣ್ಣನಾ ನಿಟ್ಠಿತಾ।
ಸಞ್ಞಾವಗ್ಗವಣ್ಣನಾ ನಿಟ್ಠಿತಾ।