೧೮. ಚತ್ತಾಲೀಸನಿಪಾತೋ

೧. ಮಹಾಕಸ್ಸಪತ್ಥೇರಗಾಥಾವಣ್ಣನಾ

ಚತ್ತಾಲೀಸನಿಪಾತೇ ನ ಗಣೇನ ಪುರಕ್ಖತೋತಿಆದಿಕಾ ಆಯಸ್ಮತೋ ಮಹಾಕಸ್ಸಪತ್ಥೇರಸ್ಸ ಗಾಥಾ। ಕಾ ಉಪ್ಪತ್ತಿ? ಅಯಂ ಕಿರ ಪದುಮುತ್ತರಸ್ಸ ಭಗವತೋ ಕಾಲೇ ಹಂಸವತೀನಗರೇ ವೇದೇಹೋ ನಾಮ ಅಸೀತಿಕೋಟಿವಿಭವೋ ಕುಟುಮ್ಬಿಕೋ ಅಹೋಸಿ। ಸೋ ಬುದ್ಧಮಾಮಕೋ, ಧಮ್ಮಮಾಮಕೋ, ಸಙ್ಘಮಾಮಕೋ ಉಪಾಸಕೋ ಹುತ್ವಾ ವಿಹರನ್ತೋ ಏಕಸ್ಮಿಂ ಉಪೋಸಥದಿವಸೇ ಪಾತೋವ ಸುಭೋಜನಂ ಭುಞ್ಜಿತ್ವಾ ಉಪೋಸಥಙ್ಗಾನಿ ಅಧಿಟ್ಠಾಯ ಗನ್ಧಪುಪ್ಫಾದೀನಿ ಗಹೇತ್ವಾ ವಿಹಾರಂ ಗನ್ತ್ವಾ ಸತ್ಥಾರಂ ಪೂಜೇತ್ವಾ ವನ್ದಿತ್ವಾ ಏಕಮನ್ತಂ ನಿಸೀದಿ।

ತಸ್ಮಿಞ್ಚ ಖಣೇ ಸತ್ಥಾ ಮಹಾನಿಸಭತ್ಥೇರಂ ನಾಮ ತತಿಯಸಾವಕಂ ‘‘ಏತದಗ್ಗಂ, ಭಿಕ್ಖವೇ, ಮಮ ಸಾವಕಾನಂ ಭಿಕ್ಖೂನಂ ಧುತವಾದಾನಂ, ಯದಿದಂ ನಿಸಭೋ’’ತಿ ಏತದಗ್ಗೇ ಠಪೇಸಿ। ಉಪಾಸಕೋ ತಂ ಸುತ್ವಾ ಪಸನ್ನೋ ಧಮ್ಮಕಥಾವಸಾನೇ ಮಹಾಜನೇ ಉಟ್ಠಾಯ ಗತೇ ಸತ್ಥಾರಂ ವನ್ದಿತ್ವಾ ‘‘ಸ್ವೇ ಮಯ್ಹಂ ಭಿಕ್ಖಂ ಅಧಿವಾಸೇಥಾ’’ತಿ ನಿಮನ್ತೇಸಿ। ‘‘ಮಹಾ ಖೋ, ಉಪಾಸಕ , ಭಿಕ್ಖುಸಙ್ಘೋ’’ತಿ। ‘‘ಕಿತ್ತಕೋ, ಭನ್ತೇ’’ತಿ? ‘‘ಅಟ್ಠಸಟ್ಠಿಭಿಕ್ಖುಸತಸಹಸ್ಸ’’ನ್ತಿ। ‘‘ಭನ್ತೇ, ಏಕಂ ಸಾಮಣೇರಮ್ಪಿ ವಿಹಾರೇ ಅಸೇಸೇತ್ವಾ ಮಯ್ಹಂ ಭಿಕ್ಖಂ ಅಧಿವಾಸೇಥಾ’’ತಿ। ಸತ್ಥಾ ಅಧಿವಾಸೇಸಿ। ಉಪಾಸಕೋ ಸತ್ಥು ಅಧಿವಾಸನಂ ವಿದಿತ್ವಾ ಗೇಹಂ ಗನ್ತ್ವಾ ಮಹಾದಾನಂ ಸಜ್ಜೇತ್ವಾ ಪುನದಿವಸೇ ಸತ್ಥು ಕಾಲಂ ಆರೋಚಾಪೇಸಿ। ಸತ್ಥಾ ಪತ್ತಚೀವರಮಾದಾಯ ಭಿಕ್ಖುಸಙ್ಘಪರಿವುತೋ ಉಪಾಸಕಸ್ಸ ಘರಂ ಗನ್ತ್ವಾ ಪಞ್ಞತ್ತಾಸನೇ ನಿಸಿನ್ನೋ ದಕ್ಖಿಣೋದಕಾವಸಾನೇ ಯಾಗುಆದೀನಿ ಸಮ್ಪಟಿಚ್ಛನ್ತೋ ಭತ್ತವಿಸ್ಸಗ್ಗಂ ಅಕಾಸಿ। ಉಪಾಸಕೋಪಿ ಸತ್ಥು ಸನ್ತಿಕೇ ನಿಸೀದಿ।

ತಸ್ಮಿಂ ಅನ್ತರೇ ಮಹಾನಿಸಭತ್ಥೇರೋ ಪಿಣ್ಡಾಯ ಚರನ್ತೋ ತಮೇವ ವೀಥಿಂ ಪಟಿಪಜ್ಜಿ। ಉಪಾಸಕೋ ದಿಸ್ವಾ ಉಟ್ಠಾಯ ಗನ್ತ್ವಾ ಥೇರಂ ವನ್ದಿತ್ವಾ ‘‘ಪತ್ತಂ, ಭನ್ತೇ, ದೇಥಾ’’ತಿ ಆಹ। ಥೇರೋ ಪತ್ತಂ ಅದಾಸಿ। ‘‘ಭನ್ತೇ, ಇಧೇವ ಪವಿಸಥ, ಸತ್ಥಾಪಿ ಗೇಹೇ ನಿಸಿನ್ನೋ’’ತಿ। ‘‘ನ ವಟ್ಟಿಸ್ಸತಿ, ಉಪಾಸಕಾ’’ತಿ। ಸೋ ಥೇರಸ್ಸ ಪತ್ತಂ ಗಹೇತ್ವಾ ಪಿಣ್ಡಪಾತಸ್ಸ ಪೂರೇತ್ವಾ ಅದಾಸಿ। ತತೋ ಥೇರಂ ಅನುಗನ್ತ್ವಾ ನಿವತ್ತೋ ಸತ್ಥು ಸನ್ತಿಕೇ ನಿಸೀದಿತ್ವಾ ಏವಮಾಹ – ‘‘ಮಹಾನಿಸಭತ್ಥೇರೋ, ಭನ್ತೇ, ‘ಸತ್ಥಾಪಿ ಗೇಹೇ ನಿಸಿನ್ನೋ’ತಿ ವುತ್ತೇಪಿ ಪವಿಸಿತುಂ ನ ಇಚ್ಛಿ, ಅತ್ಥಿ ನು ಖೋ ಏತಸ್ಸ ತುಮ್ಹಾಕಂ ಗುಣೇಹಿ ಅತಿರೇಕಗುಣೋ’’ತಿ। ಬುದ್ಧಾನಞ್ಚ ವಣ್ಣಮಚ್ಛೇರಂ ನಾಮ ನತ್ಥಿ, ತಸ್ಮಾ ಸತ್ಥಾ ಏವಮಾಹ – ‘‘ಉಪಾಸಕ, ಮಯಂ ಭಿಕ್ಖಂ ಆಗಮಯಮಾನಾ ಗೇಹೇ ನಿಸೀದಾಮ, ಸೋ ಪನ ಭಿಕ್ಖು ನ ಏವಂ ನಿಸೀದಿತ್ವಾ ಭಿಕ್ಖಂ ಉದಿಕ್ಖತಿ, ಮಯಂ ಗಾಮನ್ತಸೇನಾಸನೇ ವಸಾಮ, ಸೋ ಅರಞ್ಞಸ್ಮಿಂಯೇವ ವಸತಿ, ಮಯಂ ಛನ್ನೇ ವಸಾಮ, ಸೋ ಅಬ್ಭೋಕಾಸೇಯೇವ ವಸತೀ’’ತಿ ಭಗವಾ ‘‘ಅಯಞ್ಚ ಅಯಞ್ಚೇತಸ್ಸ ಗುಣೋ’’ತಿ ಮಹಾಸಮುದ್ದಂ ಪೂರಯಮಾನೋ ವಿಯ ತಸ್ಸ ಗುಣಂ ಕಥೇಸಿ।

ಉಪಾಸಕೋ ಪಕತಿಯಾಪಿ ಜಲಮಾನಪದೀಪೋ ತೇಲೇನ ಆಸಿತ್ತೋ ವಿಯ ಸುಟ್ಠುತರಂ ಪಸನ್ನೋ ಹುತ್ವಾ ಚಿನ್ತೇಸಿ – ‘‘ಕಿಂ ಮಯ್ಹಂ ಅಞ್ಞಾಯ ಸಮ್ಪತ್ತಿಯಾ, ಅನಾಗತೇ ಏಕಸ್ಸ ಬುದ್ಧಸ್ಸ ಸನ್ತಿಕೇ ಧುತವಾದಾನಂ ಅಗ್ಗಭಾವತ್ಥಾಯ ಪತ್ಥನಂ ಕರಿಸ್ಸಾಮೀ’’ತಿ। ಸೋ ಪುನಪಿ ಸತ್ಥಾರಂ ನಿಮನ್ತೇತ್ವಾ ತೇನೇವ ನಿಯಾಮೇನ ಸತ್ತ ದಿವಸೇ ಮಹಾದಾನಂ ದತ್ವಾ ಸತ್ತಮೇ ದಿವಸೇ ಬುದ್ಧಪ್ಪಮುಖಸ್ಸ ಮಹಾಭಿಕ್ಖುಸಙ್ಘಸ್ಸ ತಿಚೀವರಾನಿ ದತ್ವಾ ಸತ್ಥು ಪಾದಮೂಲೇ ನಿಪಜ್ಜಿತ್ವಾ ಏವಮಾಹ – ‘‘ಯಂ ಮೇ, ಭನ್ತೇ, ಸತ್ತ ದಿವಸೇ ದಾನಂ ದೇನ್ತಸ್ಸ ಮೇತ್ತಂ ಕಾಯಕಮ್ಮಂ, ಮೇತ್ತಂ ವಚೀಕಮ್ಮಂ, ಮೇತ್ತಂ ಮನೋಕಮ್ಮಂ ಪಚ್ಚುಪಟ್ಠಿತಂ, ಇಮಿನಾಹಂ ನ ಅಞ್ಞಂ ದೇವಸಮ್ಪತ್ತಿಂ ವಾ ಸಕ್ಕಮಾರಬ್ರಹ್ಮಸಮ್ಪತ್ತಿಂ ವಾ ಪತ್ಥೇಮಿ, ಇದಂ ಪನ ಮೇ ಕಮ್ಮಂ ಅನಾಗತೇ ಏಕಸ್ಸ ಬುದ್ಧಸ್ಸ ಸನ್ತಿಕೇ ಮಹಾನಿಸಭತ್ಥೇರೇನ ಪತ್ತಟ್ಠಾನನ್ತರಂ ಪಾಪುಣನತ್ಥಾಯ ತೇರಸಧುತಙ್ಗಧರಾನಂ ಅಗ್ಗಭಾವಸ್ಸ ಅಧಿಕಾರೋ ಹೋತೂ’’ತಿ। ಸತ್ಥಾ ‘‘ಮಹನ್ತಂ ಠಾನಂ ಇಮಿನಾ ಪತ್ಥಿತಂ, ಸಮಿಜ್ಝಿಸ್ಸತಿ ನು ಖೋ, ನೋ’’ತಿ ಓಲೋಕೇನ್ತೋ ಸಮಿಜ್ಝನಭಾವಂ ದಿಸ್ವಾ ಆಹ – ‘‘ಮನಾಪಂ ತೇ ಠಾನಂ ಪತ್ಥಿತಂ, ಅನಾಗತೇ ಸತಸಹಸ್ಸಕಪ್ಪಾವಸಾನೇ ಗೋತಮೋ ನಾಮ ಬುದ್ಧೋ ಉಪ್ಪಜ್ಜಿಸ್ಸತಿ , ತಸ್ಸ ತ್ವಂ ತತಿಯಸಾವಕೋ ಮಹಾಕಸ್ಸಪತ್ಥೇರೋ ನಾಮ ಭವಿಸ್ಸಸೀ’’ತಿ ಬ್ಯಾಕಾಸಿ। ತಂ ಸುತ್ವಾ ಉಪಾಸಕೋ ‘‘ಬುದ್ಧಾನಂ ದ್ವೇ ಕಥಾ ನಾಮ ನತ್ಥೀ’’ತಿ ಪುನದಿವಸೇ ಪತ್ತಬ್ಬಂ ವಿಯ ತಂ ಸಮ್ಪತ್ತಿಂ ಅಮಞ್ಞಿತ್ಥ। ಸೋ ಯಾವತಾಯುಕಂ ದಾನಂ ದತ್ವಾ, ಸೀಲಂ ಸಮಾದಾಯ ರಕ್ಖಿತ್ವಾ, ನಾನಪ್ಪಕಾರಂ ಕಲ್ಯಾಣಕಮ್ಮಂ ಕತ್ವಾ, ಕಾಲಂ ಕತ್ವಾ, ಸಗ್ಗೇ ನಿಬ್ಬತ್ತಿ।

ತತೋ ಪಟ್ಠಾಯ ದೇವಮನುಸ್ಸೇಸು ಸಮ್ಪತ್ತಿಂ ಅನುಭವನ್ತೋ ಇತೋ ಏಕನವುತೇ ಕಪ್ಪೇ ವಿಪಸ್ಸಿಸಮ್ಮಾಸಮ್ಬುದ್ಧೇ ಬನ್ಧುಮತೀನಗರಂ ಉಪನಿಸ್ಸಾಯ ಖೇಮೇ ಮಿಗದಾಯೇ ವಿಹರನ್ತೇ ದೇವಲೋಕಾ ಚವಿತ್ವಾ ಅಞ್ಞತರಸ್ಮಿಂ ಪರಿಜಿಣ್ಣಬ್ರಾಹ್ಮಣಕುಲೇ ನಿಬ್ಬತ್ತಿ। ತಸ್ಮಿಞ್ಚ ಕಾಲೇ ವಿಪಸ್ಸೀ ಭಗವಾ ಸತ್ತಮೇ ಸತ್ತಮೇ ಸಂವಚ್ಛರೇ ಧಮ್ಮಂ ಕಥೇಸಿ, ಮಹನ್ತಂ ಕೋಲಾಹಲಂ ಹೋತಿ। ಸಕಲಜಮ್ಬುದೀಪೇ ದೇವತಾ ‘‘ಸತ್ಥಾ ಧಮ್ಮಂ ಕಥೇಸ್ಸತೀ’’ತಿ ಆರೋಚೇಸುಂ। ಬ್ರಾಹ್ಮಣೋ ತಂ ಸಾಸನಂ ಅಸ್ಸೋಸಿ । ತಸ್ಸ ಚ ನಿವಾಸನಸಾಟಕೋ ಏಕೋಯೇವ ಹೋತಿ, ತಥಾ ಬ್ರಾಹ್ಮಣಿಯಾ। ಪಾರುಪನಂ ಪನ ದ್ವಿನ್ನಮ್ಪಿ ಏಕಮೇವ। ಸೋ ಸಕಲನಗರೇ ‘‘ಏಕಸಾಟಕಬ್ರಾಹ್ಮಣೋ’’ತಿ ಪಞ್ಞಾಯಿ। ಸೋ ಬ್ರಾಹ್ಮಣಾನಂ ಕೇನಚಿದೇವ ಕಿಚ್ಚೇನ ಸನ್ನಿಪಾತೇ ಸತಿ ಬ್ರಾಹ್ಮಣಿಂ ಗೇಹೇ ಠಪೇತ್ವಾ ಸಯಂ ತಂ ವತ್ಥಂ ಪಾರುಪಿತ್ವಾ ಗಚ್ಛತಿ। ಬ್ರಾಹ್ಮಣೀನಂ ಸನ್ನಿಪಾತೇ ಸತಿ ಸಯಂ ಗೇಹೇ ಅಚ್ಛತಿ, ಬ್ರಾಹ್ಮಣೀ ತಂ ವತ್ಥಂ ಪಾರುಪಿತ್ವಾ ಗಚ್ಛತಿ। ತಸ್ಮಿಂ ಪನ ದಿವಸೇ ಬ್ರಾಹ್ಮಣೋ ಬ್ರಾಹ್ಮಣಿಂ ಆಹ – ‘‘ಭೋತಿ, ಕಿಂ ರತ್ತಿಂ ಧಮ್ಮಂ ಸುಣಿಸ್ಸಸಿ, ದಿವಾ’’ತಿ? ‘‘ಮಯಂ ಮಾತುಗಾಮಜಾತಿಕಾ ನಾಮ ರತ್ತಿಂ ಸೋತುಂ ನ ಸಕ್ಕೋಮ, ದಿವಾ ಸೋಸ್ಸಾಮಾ’’ತಿ ಬ್ರಾಹ್ಮಣಂ ಗೇಹೇ ಠಪೇತ್ವಾ ತಂ ವತ್ಥಂ ಪಾರುಪಿತ್ವಾ ಉಪಾಸಿಕಾಹಿ ಸದ್ಧಿಂ ದಿವಾ ಗನ್ತ್ವಾ ಸತ್ಥಾರಂ ವನ್ದಿತ್ವಾ ಏಕಮನ್ತೇ ನಿಸಿನ್ನಾ ಧಮ್ಮಂ ಸುತ್ವಾ ಉಪಾಸಿಕಾಹಿಯೇವ ಸದ್ಧಿಂ ಆಗಮಾಸಿ। ಅಥ ಬ್ರಾಹ್ಮಣೋ ಬ್ರಾಹ್ಮಣಿಂ ಗೇಹೇ ಠಪೇತ್ವಾ ತಂ ವತ್ಥಂ ಪಾರುಪಿತ್ವಾ ವಿಹಾರಂ ಗತೋ।

ತಸ್ಮಿಂ ಸಮಯೇ ಸತ್ಥಾ ಪರಿಸಮಜ್ಝೇ ಅಲಙ್ಕತಧಮ್ಮಾಸನೇ ನಿಸಿನ್ನೋ ಚಿತ್ತಬೀಜನಿಂ ಆದಾಯ ಆಕಾಸಗಙ್ಗಂ ಓತಾರೇನ್ತೋ ವಿಯ, ಸಿನೇರುಂ ಮನ್ಥಂ ಕತ್ವಾ ಸಾಗರಂ ನಿಮ್ಮಥೇನ್ತೋ ವಿಯ, ಧಮ್ಮಕಥಂ ಕಥೇಸಿ। ಬ್ರಾಹ್ಮಣಸ್ಸ ಪರಿಸಪರಿಯನ್ತೇ ನಿಸಿನ್ನಸ್ಸ ಧಮ್ಮಂ ಸುಣನ್ತಸ್ಸ ಪಠಮಯಾಮಸ್ಮಿಂಯೇವ ಸಕಲಸರೀರಂ ಪೂರಯಮಾನಾ ಪಞ್ಚವಣ್ಣಾ ಪೀತಿ ಉಪ್ಪಜ್ಜಿ। ಸೋ ಪಾರುತವತ್ಥಂ ಸಙ್ಘರಿತ್ವಾ ‘‘ದಸಬಲಸ್ಸ ದಸ್ಸಾಮೀ’’ತಿ ಚಿನ್ತೇಸಿ। ಅಥಸ್ಸ ಆದೀನವಸಹಸ್ಸಂ ದಸ್ಸಯಮಾನಂ ಮಚ್ಛೇರಂ ಉಪ್ಪಜ್ಜಿ। ಸೋ ‘‘ಬ್ರಾಹ್ಮಣಿಯಾ ಮಯ್ಹಞ್ಚ ಏಕಮೇವ ವತ್ಥಂ, ಅಞ್ಞಂ ಕಿಞ್ಚಿ ಪಾರುಪನಂ ನತ್ಥಿ, ಅಪಾರುಪಿತ್ವಾ ಚ ನಾಮ ಬಹಿ ವಿಚರಿತುಂ ನ ಸಕ್ಕಾ’’ತಿ ಸಬ್ಬಥಾಪಿ ಅದಾತುಕಾಮೋ ಅಹೋಸಿ, ಅಥಸ್ಸ ನಿಕ್ಖನ್ತೇ ಪಠಮಯಾಮೇ ಮಜ್ಝಿಮಯಾಮೇಪಿ ತಥೇವ ಪೀತಿ ಉಪ್ಪಜ್ಜಿ। ತಥೇವ ಚಿನ್ತೇತ್ವಾ ತಥೇವ ಅದಾತುಕಾಮೋ ಅಹೋಸಿ। ಅಥಸ್ಸ ಮಜ್ಝಿಮಯಾಮೇ ನಿಕ್ಖನ್ತೇ ಪಚ್ಛಿಮಯಾಮೇಪಿ ತಥೇವ ಪೀತಿ ಉಪ್ಪಜ್ಜಿ। ತದಾ ಸೋ ‘‘ಯಂ ವಾ ಹೋತು ತಂ ವಾ ಪಚ್ಛಾಪಿ ಜಾನಿಸ್ಸಾಮೀ’’ತಿ ವತ್ಥಂ ಸಙ್ಘರಿತ್ವಾ ಸತ್ಥು ಪಾದಮೂಲೇ ಠಪೇಸಿ। ತತೋ ವಾಮಹತ್ಥಂ ಆಭುಜಿತ್ವಾ ದಕ್ಖಿಣೇನ ಹತ್ಥೇನ ತಿಕ್ಖತ್ತುಂ ಅಪ್ಫೋಟೇತ್ವಾ ‘‘ಜಿತಂ ಮೇ, ಜಿತಂ ಮೇ’’ತಿ ತಯೋ ವಾರೇ ನದಿ।

ತಸ್ಮಿಞ್ಚ ಸಮಯೇ ಬನ್ಧುಮರಾಜಾ ಧಮ್ಮಾಸನಸ್ಸ ಪಚ್ಛತೋ ಅನ್ತೋಸಾಣಿಯಂ ನಿಸಿನ್ನೋ ಧಮ್ಮಂ ಸುಣಾತಿ। ರಞ್ಞೋ ಚ ನಾಮ ‘‘ಜಿತಂ ಮೇ’’ತಿ ಸದ್ದೋ ಅಮನಾಪೋ ಹೋತಿ । ಸೋ ಪುರಿಸಂ ಪೇಸೇಸಿ – ‘‘ಗಚ್ಛ, ಏತಂ ಪುಚ್ಛ ಕಿಂ ವದಸೀ’’ತಿ। ಸೋ ತೇನ ಗನ್ತ್ವಾ ಪುಚ್ಛಿತೋ ‘‘ಅವಸೇಸಾ ಹತ್ಥಿಯಾನಾದೀನಿ ಆರುಯ್ಹ ಅಸಿಚಮ್ಮಾದೀನಿ ಗಹೇತ್ವಾ ಪರಸೇನಂ ಜಿನನ್ತಿ, ನ ತಂ ಅಚ್ಛರಿಯಂ। ಅಹಂ ಪನ ಪಚ್ಛತೋ ಆಗಚ್ಛನ್ತಸ್ಸ ಕೂಟಗೋಣಸ್ಸ ಮುಗ್ಗರೇನ ಸೀಸಂ ಭಿನ್ದಿತ್ವಾ ತಂ ಪಲಾಪೇನ್ತೋ ವಿಯ ಮಚ್ಛೇರಚಿತ್ತಂ ಮದ್ದಿತ್ವಾ ಪಾರುತವತ್ಥಂ ದಸಬಲಸ್ಸ ಅದಾಸಿಂ, ತಂ ಮೇ ಮಚ್ಛರಿಯಂ ಜಿತ’’ನ್ತಿ ಆಹ। ಸೋ ಪುರಿಸೋ ಆಗನ್ತ್ವಾ ತಂ ಪವತ್ತಿಂ ರಞ್ಞೋ ಆರೋಚೇಸಿ। ರಾಜಾ ಆಹ – ‘‘ಅಮ್ಹೇ, ಭಣೇ, ದಸಬಲಸ್ಸ ಅನುರೂಪಂ ನ ಜಾನಿಮ್ಹ, ಬ್ರಾಹ್ಮಣೋ ಜಾನೀ’’ತಿ ವತ್ಥಯುಗಂ ಪೇಸೇಸಿ। ತಂ ದಿಸ್ವಾ ಬ್ರಾಹ್ಮಣೋ ಚಿನ್ತೇಸಿ – ‘‘ಅಯಂ ಮಯ್ಹಂ ತುಣ್ಹೀನಿಸಿನ್ನಸ್ಸ ಪಠಮಂ ಕಿಞ್ಚಿ ಅದತ್ವಾ ಸತ್ಥು ಗುಣೇ ಕಥೇನ್ತಸ್ಸ ಅದಾಸಿ। ಸತ್ಥು ಗುಣೇ ಪಟಿಚ್ಚ ಉಪ್ಪನ್ನೇನ ಪನ ಮಯ್ಹಂ ಕೋ ಅತ್ಥೋ’’ತಿ ತಮ್ಪಿ ವತ್ಥಯುಗಂ ದಸಬಲಸ್ಸೇವ ಅದಾಸಿ। ರಾಜಾಪಿ ‘‘ಕಿಂ ಬ್ರಾಹ್ಮಣೇನ ಕತ’’ನ್ತಿ ಪುಚ್ಛಿತ್ವಾ ‘‘ತಮ್ಪಿ ತೇನ ವತ್ಥಯುಗಂ ತಥಾಗತಸ್ಸೇವ ದಿನ್ನ’’ನ್ತಿ ಸುತ್ವಾ ಅಞ್ಞಾನಿಪಿ ದ್ವೇ ವತ್ಥಯುಗಾನಿ ಪೇಸೇಸಿ, ಸೋ ತಾನಿಪಿ ಅದಾಸಿ। ರಾಜಾ ಅಞ್ಞಾನಿಪಿ ಚತ್ತಾರೀತಿ ಏವಂ ಯಾವ ದ್ವತ್ತಿಂಸವತ್ಥಯುಗಾನಿ ಪೇಸೇಸಿ। ಅಥ ಬ್ರಾಹ್ಮಣೋ ‘‘ಇದಂ ವಡ್ಢೇತ್ವಾ ವಡ್ಢೇತ್ವಾ ಗಹಣಂ ವಿಯ ಹೋತೀ’’ತಿ ಅತ್ತನೋ ಅತ್ಥಾಯ ಏಕಂ, ಬ್ರಾಹ್ಮಣಿಯಾ ಏಕನ್ತಿ ದ್ವೇ ವತ್ಥಯುಗಾನಿ ಗಹೇತ್ವಾ ತಿಂಸಯುಗಾನಿ ತಥಾಗತಸ್ಸೇವ ಅದಾಸಿ। ತತೋ ಪಟ್ಠಾಯ ಚ ಸೋ ಸತ್ಥು ವಿಸ್ಸಾಸಿಕೋ ಜಾತೋ।

ಅಥ ನಂ ರಾಜಾ ಏಕದಿವಸಂ ಸೀತಸಮಯೇ ಸತ್ಥು ಸನ್ತಿಕೇ ಧಮ್ಮಂ ಸುಣನ್ತಂ ದಿಸ್ವಾ ಸತಸಹಸ್ಸಗ್ಘನಕಂ ಅತ್ತನಾ ಪಾರುತರತ್ತಕಮ್ಬಲಂ ದತ್ವಾ ಆಹ – ‘‘ಇತೋ ಪಟ್ಠಾಯ ಇಮಂ ಪಾರುಪಿತ್ವಾ ಧಮ್ಮಂ ಸುಣಾಹೀ’’ತಿ। ಸೋ ‘‘ಕಿಂ ಮೇ ಇಮಿನಾ ಕಮ್ಬಲೇನ ಇಮಸ್ಮಿಂ ಪೂತಿಕಾಯೇ ಉಪನೀತೇನಾ’’ತಿ ಚಿನ್ತೇತ್ವಾ ಅನ್ತೋಗನ್ಧಕುಟಿಯಂ ತಥಾಗತಸ್ಸ ಮಞ್ಚಸ್ಸ ಉಪರಿ ವಿತಾನಂ ಕತ್ವಾ ಅಗಮಾಸಿ। ಅಥೇಕದಿವಸಂ ರಾಜಾ ಪಾತೋವ ವಿಹಾರಂ ಗನ್ತ್ವಾ ಅನ್ತೋಗನ್ಧಕುಟಿಯಂ ಸತ್ಥು ಸನ್ತಿಕೇ ನಿಸೀದಿ। ತಸ್ಮಿಞ್ಚ ಸಮಯೇ ಛಬ್ಬಣ್ಣಾ ಬುದ್ಧರಸ್ಮಿಯೋ ಕಮ್ಬಲೇ ಪಟಿಹಞ್ಞನ್ತಿ, ಕಮ್ಬಲೋ ಅತಿವಿಯ ವಿರೋಚತಿ। ರಾಜಾ ಉಲ್ಲೋಕೇನ್ತೋ ಸಞ್ಜಾನಿತ್ವಾ ಆಹ – ‘‘ಅಮ್ಹಾಕಂ, ಭನ್ತೇ, ಏಸ ಕಮ್ಬಲೋ, ಅಮ್ಹೇಹಿ ಏಕಸಾಟಕಬ್ರಾಹ್ಮಣಸ್ಸ ದಿನ್ನೋ’’ತಿ। ‘‘ತುಮ್ಹೇಹಿ, ಮಹಾರಾಜ, ಬ್ರಾಹ್ಮಣೋ ಪೂಜಿತೋ, ಬ್ರಾಹ್ಮಣೇನ ಮಯಂ ಪೂಜಿತಾ’’ತಿ। ರಾಜಾ ‘‘ಬ್ರಾಹ್ಮಣೋ ಯುತ್ತಂ ಅಞ್ಞಾಸಿ, ನ ಮಯ’’ನ್ತಿ ಪಸೀದಿತ್ವಾ ಯಂ ಮನುಸ್ಸಾನಂ ಉಪಕಾರಭೂತಂ, ತಂ ಸಬ್ಬಂ ಅಟ್ಠಟ್ಠಕಂ ಕತ್ವಾ ಸಬ್ಬಟ್ಠಕಂ ನಾಮ ದಾನಂ ದತ್ವಾ ಪುರೋಹಿತಟ್ಠಾನೇ ಠಪೇಸಿ। ಸೋಪಿ ‘‘ಅಟ್ಠಟ್ಠಕಂ ನಾಲ ಚತುಸಟ್ಠಿ ಹೋತೀ’’ತಿ ಚತುಸಟ್ಠಿ ಸಲಾಕಭತ್ತಾನಿ ಉಪನಿಬನ್ಧಾಪೇತ್ವಾ ಯಾವಜೀವಂ ದಾನಂ ದತ್ವಾ ಸೀಲಂ ರಕ್ಖಿತ್ವಾ ತತೋ ಚುತೋ ಸಗ್ಗೇ ನಿಬ್ಬತ್ತಿ।

ಪುನ ತತೋ ಚುತೋ ಇಮಸ್ಮಿಂ ಕಪ್ಪೇ ಕೋಣಾಗಮನಸ್ಸ ಚ ಭಗವತೋ ಕಸ್ಸಪದಸಬಲಸ್ಸ ಚಾತಿ ದ್ವಿನ್ನಂ ಬುದ್ಧಾನಂ ಅನ್ತರೇ ಬಾರಾಣಸಿಯಂ ಕುಟುಮ್ಬಿಯಘರೇ ನಿಬ್ಬತ್ತೋ। ಸೋ ವುದ್ಧಿಮನ್ವಾಯ ಘರಾವಾಸಂ ವಸನ್ತೋ ಏಕದಿವಸಂ ಅರಞ್ಞೇ ಜಙ್ಘವಿಹಾರಂ ಚರತಿ। ತಸ್ಮಿಞ್ಚ ಸಮಯೇ ಪಚ್ಚೇಕಬುದ್ಧೋ ನದೀತೀರೇ ಚೀವರಕಮ್ಮಂ ಕರೋನ್ತೋ ಅನುವಾತೇ ಅಪ್ಪಹೋನ್ತೇ ಸಙ್ಘರಿತ್ವಾ ಠಪೇತುಂ ಆರದ್ಧೋ। ಸೋ ದಿಸ್ವಾ ‘‘ಕಸ್ಮಾ, ಭನ್ತೇ, ಸಙ್ಘರಿತ್ವಾ ಠಪೇಥಾ’’ತಿ ಆಹ। ‘‘ಅನುವಾತೋ ನಪ್ಪಹೋತೀ’’ತಿ। ‘‘ಇಮಿನಾ, ಭನ್ತೇ, ಕರೋಥಾ’’ತಿ ಉತ್ತರಸಾಟಕಂ ದತ್ವಾ ‘‘ನಿಬ್ಬತ್ತನಿಬ್ಬತ್ತಟ್ಠಾನೇ ಮೇ ಕೇನಚಿ ಪರಿಹಾನಿ ಮಾ ಹೋತೂ’’ತಿ ಪತ್ಥನಂ ಪಟ್ಠಪೇಸಿ।

ಘರೇಪಿಸ್ಸ ಭಗಿನಿಯಾ ಸದ್ಧಿಂ ಭರಿಯಾಯ ಕಲಹಂ ಕರೋನ್ತಿಯಾ ಪಚ್ಚೇಕಬುದ್ಧೋ ಪಿಣ್ಡಾಯ ಪಾವಿಸಿ। ಅಥಸ್ಸ ಭಗಿನೀ ಪಚ್ಚೇಕಬುದ್ಧಸ್ಸ ಪಿಣ್ಡಪಾತಂ ದತ್ವಾ ತಸ್ಸ ಭರಿಯಂ ಸನ್ಧಾಯ ‘‘ಏವರೂಪಂ ಬಾಲಂ ಯೋಜನಸತೇನ ಪರಿವಜ್ಜೇಯ್ಯ’’ನ್ತಿ ಪತ್ಥನಂ ಪಟ್ಠಪೇಸಿ। ಸಾ ಗೇಹಙ್ಗಣೇ ಠಿತಾ ಸುತ್ವಾ ‘‘ಇಮಾಯ ದಿನ್ನಭತ್ತಂ ಮಾ ಏಸ ಭುಞ್ಜತೂ’’ತಿ ಪತ್ತಂ ಗಹೇತ್ವಾ ಪಿಣ್ಡಪಾತಂ ಛಡ್ಡೇತ್ವಾ ಕಲಲಸ್ಸ ಪೂರೇತ್ವಾ ಅದಾಸಿ। ಇತರಾ ದಿಸ್ವಾ ‘‘ಬಾಲೇ, ತ್ವಂ ಮಂ ತಾವ ಅಕ್ಕೋಸ ವಾ ಪಹರ ವಾ, ಏವರೂಪಸ್ಸ ಪನ ದ್ವೇ ಅಸಙ್ಖ್ಯೇಯ್ಯಾನಿ ಪೂರಿತಪಾರಮಿಸ್ಸ ಪತ್ತತೋ ಭತ್ತಂ ಛಡ್ಡೇತ್ವಾ ಕಲಲಂ ದಾತುಂ ನ ಯುತ್ತ’’ನ್ತಿ ಆಹ। ಅಥಸ್ಸ ಭರಿಯಾಯ ಪಟಿಸಙ್ಖಾನಂ ಉಪ್ಪಜ್ಜಿ। ಸಾ ‘‘ತಿಟ್ಠಥ, ಭನ್ತೇ’’ತಿ ಕಲಲಂ ಛಡ್ಡೇತ್ವಾ ಪತ್ತಂ ಧೋವಿತ್ವಾ ಗನ್ಧಚುಣ್ಣೇನ । ಉಬ್ಬಟ್ಟೇತ್ವಾ ಪಣೀತಭತ್ತಸ್ಸ ಚತುಮಧುರಸ್ಸ ಚ ಪೂರೇತ್ವಾ ಉಪರಿ ಆಸಿತ್ತೇನ ಪದುಮಗಬ್ಭವಣ್ಣೇನ ಸಪ್ಪಿನಾ ವಿಜ್ಜೋತಮಾನಂ ಪಚ್ಚೇಕಬುದ್ಧಸ್ಸ ಹತ್ಥೇ ಠಪೇತ್ವಾ ‘‘ಯಥಾ ಅಯಂ ಪಿಣ್ಡಪಾತೋ ಓಭಾಸಜಾತೋ, ಏವಂ ಓಭಾಸಜಾತಂ ಮೇ ಸರೀರಂ ಹೋತೂ’’ತಿ ಪತ್ಥನಂ ಪಟ್ಠಪೇಸಿ। ಪಚ್ಚೇಕಬುದ್ಧೋ ಅನುಮೋದಿತ್ವಾ ಆಕಾಸಂ ಪಕ್ಖನ್ದಿ।

ತೇಪಿ ಜಾಯಮ್ಪತಿಕಾ ಯಾವತಾಯುಕಂ ಕುಸಲಂ ಕತ್ವಾ ಸಗ್ಗೇ ನಿಬ್ಬತ್ತಿತ್ವಾ ಪುನ ತತೋ ಚವಿತ್ವಾ ಉಪಾಸಕೋ ಕಸ್ಸಪಸಮ್ಮಾಸಮ್ಬುದ್ಧಕಾಲೇ ಬಾರಾಣಸಿಯಂ ಅಸೀತಿಕೋಟಿವಿಭವಸ್ಸ ಸೇಟ್ಠಿನೋ ಪುತ್ತೋ ಹುತ್ವಾ ನಿಬ್ಬತ್ತಿ, ಇತರಾಪಿ ತಾದಿಸಸ್ಸೇವ ಸೇಟ್ಠಿನೋ ಧೀತಾ ಹುತ್ವಾ ನಿಬ್ಬತ್ತಿ। ತಸ್ಸ ವುದ್ಧಿಪ್ಪತ್ತಸ್ಸ ತಮೇವ ಸೇಟ್ಠಿಧೀತರಂ ಆನಯಿಂಸು। ತಸ್ಸಾ ಪುಬ್ಬೇ ಅನಿಟ್ಠವಿಪಾಕಸ್ಸ ಪಾಪಕಮ್ಮಸ್ಸ ಆನುಭಾವೇನ ಪತಿಕುಲಂ ಪವಿಟ್ಠಮತ್ತಾಯ ಉಮ್ಮಾರಬ್ಭನ್ತರೇ ಸಕಲಸರೀರಂ ಉಗ್ಘಾಟಿತವಚ್ಚಕುಟಿ ವಿಯ ದುಗ್ಗನ್ಧಂ ಜಾತಂ। ಸೇಟ್ಠಿಕುಮಾರೋ ‘‘ಕಸ್ಸಾಯಂ ಗನ್ಧೋ’’ತಿ ಪುಚ್ಛಿತ್ವಾ, ‘‘ಸೇಟ್ಠಿಕಞ್ಞಾಯಾ’’ತಿ ಸುತ್ವಾ, ‘‘ನೀಹರಥ, ನೀಹರಥಾ’’ತಿ ಆಭತನಿಯಾಮೇನೇವ ಕುಲಘರಂ ಪೇಸೇಸಿ। ಸಾ ಏತೇನೇವ ನೀಹಾರೇನ ಸತ್ತಸು ಠಾನೇಸು ಪಟಿನಿವತ್ತಿತಾ।

ತೇನ ಚ ಸಮಯೇನ ಕಸ್ಸಪದಸಬಲೋ ಪರಿನಿಬ್ಬಾಯಿ। ತಸ್ಸ ಘನಕೋಟ್ಟಿಮಾಹಿ ಸತಸಹಸ್ಸಗ್ಘನಿಕಾಹಿ ರತ್ತಸುವಣ್ಣಿಟ್ಠಕಾಹಿ ಯೋಜನುಬ್ಬೇಧಂ ಚೇತಿಯಂ ಆರಭಿಂಸು। ತಸ್ಮಿಂ ಚೇತಿಯೇ ಕರೀಯಮಾನೇ ಸಾ ಸೇಟ್ಠಿಧೀತಾ ಚಿನ್ತೇಸಿ – ‘‘ಅಹಂ ಸತ್ತಸು ಠಾನೇಸು ಪಟಿನಿವತ್ತಿತಾ, ಕಿಂ ಮೇ ಜೀವಿತೇನಾ’’ತಿ ಅತ್ತನೋ ಆಭರಣಭಣ್ಡಂ ಭಞ್ಜಾಪೇತ್ವಾ ಸುವಣ್ಣಿಟ್ಠಕಂ ಕಾರೇಸಿ ರತನಾಯತಂ ವಿದತ್ಥಿವಿತ್ಥಿನ್ನಂ ಚತುರಙ್ಗುಲುಬ್ಬೇಧಂ। ತತೋ ಹರಿತಾಲಮನೋಸಿಲಾಪಿಣ್ಡಂ ಗಹೇತ್ವಾ ಅಟ್ಠ ಉಪ್ಪಲಹತ್ಥಕೇ ಆದಾಯ ಚೇತಿಯಕರಣಟ್ಠಾನಂ ಗತಾ। ತಸ್ಮಿಞ್ಚ ಖಣೇ ಏಕಾ ಇಟ್ಠಕಾಪನ್ತಿ ಪರಿಕ್ಖಿಪಿತ್ವಾ ಆಗಚ್ಛಮಾನಾ ಘಟನಿಟ್ಠಕಾಯ ಊನಾ ಹೋತಿ, ಸೇಟ್ಠಿಧೀತಾ ವಡ್ಢಕಿಂ ಆಹ – ‘‘ಇಮಂ ಇಟ್ಠಕಂ ಏತ್ಥ ಠಪೇಥಾ’’ತಿ। ‘‘ಅಮ್ಮ, ಭದ್ದಕೇ ಕಾಲೇ ಆಗತಾಸಿ, ಸಯಮೇವ ಠಪೇಹೀ’’ತಿ। ಸಾ ಆರುಯ್ಹ ತೇಲೇನ ಹರಿತಾಲಮನೋಸಿಲಾಪಿಣ್ಡಂ ಯೋಜೇತ್ವಾ ತೇನ ಬನ್ಧನೇನ ಇಟ್ಠಕಂ ಪತಿಟ್ಠಪೇತ್ವಾ ಉಪರಿ ಅಟ್ಠಹಿ ಉಪ್ಪಲಹತ್ಥಕೇಹಿ ಪೂಜಂ ಕತ್ವಾ ವನ್ದಿತ್ವಾ ‘‘ನಿಬ್ಬತ್ತನಿಬ್ಬತ್ತಟ್ಠಾನೇ ಮೇ ಕಾಯತೋ ಚನ್ದನಗನ್ಧೋ ವಾಯತು, ಮುಖತೋ ಉಪ್ಪಲಗನ್ಧೋ’’ತಿ ಪತ್ಥನಂ ಕತ್ವಾ ಚೇತಿಯಂ ವನ್ದಿತ್ವಾ ಪದಕ್ಖಿಣಂ ಕತ್ವಾ ಅಗಮಾಸಿ।

ಅಥ ತಸ್ಮಿಂಯೇವ ಖಣೇ ಯಸ್ಸ ಸೇಟ್ಠಿಪುತ್ತಸ್ಸ ಪಠಮಂ ಗೇಹಂ ನೀತಾ, ತಸ್ಸ ತಂ ಆರಬ್ಭ ಸತಿ ಉದಪಾದಿ। ನಗರೇಪಿ ನಕ್ಖತ್ತಂ ಸಙ್ಘುಟ್ಠಂ ಹೋತಿ। ಸೋ ಉಪಟ್ಠಾಕೇ ಆಹ – ‘‘ತದಾ ಇಧ ಆನೀತಾ ಸೇಟ್ಠಿಧೀತಾ ಅತ್ಥಿ, ಕಹಂ ಸಾ’’ತಿ? ‘‘ಕುಲಗೇಹೇ ಸಾಮೀ’’ತಿ। ‘‘ಆನೇಥ ನಂ, ನಕ್ಖತ್ತಂ ಕೀಳಿಸ್ಸಾಮಾ’’ತಿ। ತೇ ಗನ್ತ್ವಾ ತಂ ವನ್ದಿತ್ವಾ ಠಿತಾ ‘‘ಕಿಂ, ತಾತಾ, ಆಗತತ್ಥಾ’’ತಿ ತಾಯ ಪುಟ್ಠಾ ತಂ ಪವತ್ತಿಂ ಆಚಿಕ್ಖಿಂಸು। ‘‘ತಾತಾ, ಮಯಾ ಆಭರಣಭಣ್ಡೇನ ಚೇತಿಯಂ ಪೂಜಿತಂ, ಆಭರಣಂ ಮೇ ನತ್ಥೀ’’ತಿ । ತೇ ಗನ್ತ್ವಾ ಸೇಟ್ಠಿಪುತ್ತಸ್ಸ ಆರೋಚೇಸುಂ। ಆನೇಥ ನಂ, ಪಿಳನ್ಧನಂ ಲಭಿಸ್ಸತೀತಿ। ತೇ ಆನಯಿಂಸು। ತಸ್ಸಾ ಸಹ ಘರಪವೇಸನೇನ ಸಕಲಗೇಹಂ ಚನ್ದನಗನ್ಧೋ ಚೇವ ನೀಲುಪ್ಪಲಗನ್ಧೋ ಚ ವಾಯಿ। ಸೇಟ್ಠಿಪುತ್ತೋ ತಂ ಪುಚ್ಛಿ – ‘‘ಪಠಮಂ ತವ ಸರೀರತೋ ದುಗ್ಗನ್ಧೋ ವಾಯಿ, ಇದಾನಿ ಪನ ತೇ ಸರೀರತೋ ಚನ್ದನಗನ್ಧೋ, ಮುಖತೋ ಉಪ್ಪಲಗನ್ಧೋ ವಾಯತಿ। ಕಿಂ ಏತ’’ನ್ತಿ? ಸಾ ಆದಿತೋ ಪಟ್ಠಾಯ ಅತ್ತನಾ ಕತಕಮ್ಮಂ ಆರೋಚೇಸಿ। ಸೇಟ್ಠಿಪುತ್ತೋ ‘‘ನಿಯ್ಯಾನಿಕಂ ವತ ಬುದ್ಧಸಾಸನ’’ನ್ತಿ ಪಸೀದಿತ್ವಾ ಯೋಜನಿಕಂ ಸುವಣ್ಣಚೇತಿಯಂ ಕಮ್ಬಲಕಞ್ಚುಕೇನ ಪರಿಕ್ಖಿಪಿತ್ವಾ ತತ್ಥ ತತ್ಥ ರಥಚಕ್ಕಪ್ಪಮಾಣೇಹಿ ಸುವಣ್ಣಪದುಮೇಹಿ ಅಲಙ್ಕರಿ। ತೇಸಂ ದ್ವಾದಸಹತ್ಥಾ ಓಲಮ್ಬಕಾ ಹೋನ್ತಿ।

ಸೋ ತತ್ಥ ಯಾವತಾಯುಕಂ ಠತ್ವಾ ಸಗ್ಗೇ ನಿಬ್ಬತ್ತಿತ್ವಾ ತತೋ ಚುತೋ ಬಾರಾಣಸಿತೋ ಯೋಜನಮತ್ತೇ ಠಾನೇ ಅಞ್ಞತರಸ್ಮಿಂ ಅಮಚ್ಚಕುಲೇ ನಿಬ್ಬತ್ತಿ, ಸೇಟ್ಠಿಕಞ್ಞಾಪಿ ದೇವಲೋಕತೋ ಚವಿತ್ವಾ ರಾಜಕುಲೇ ಜೇಟ್ಠಧೀತಾ ಹುತ್ವಾ ನಿಬ್ಬತ್ತಿ। ತೇಸು ವಯಪ್ಪತ್ತೇಸು ಕುಮಾರಸ್ಸ ವಸನಗಾಮೇ ನಕ್ಖತ್ತಂ ಸಙ್ಘುಟ್ಠಂ। ಸೋ ಮಾತರಂ ಆಹ – ‘‘ಸಾಟಕಂ ಮೇ, ಅಮ್ಮ, ದೇಹಿ, ನಕ್ಖತ್ತಂ ಕೀಳಿಸ್ಸಾಮೀ’’ತಿ । ಸಾ ಧೋತವತ್ಥಂ ನೀಹರಿತ್ವಾ ಅದಾಸಿ। ‘‘ಅಮ್ಮ, ಥೂಲಂ ಇದ’’ನ್ತಿ ಆಹ। ಸಾ ಅಞ್ಞಂ ನೀಹರಿತ್ವಾ ಅದಾಸಿ, ತಮ್ಪಿ ಪಟಿಕ್ಖಿಪಿ। ಅಥ ನಂ ಮಾತಾ ಆಹ – ‘‘ತಾತ, ಯಾದಿಸೇ ಗೇಹೇ ಮಯಂ ಜಾತಾ, ನತ್ಥಿ ನೋ ಇತೋ ಸುಖುಮತರಸ್ಸ ಪಟಿಲಾಭಾಯ ಪುಞ್ಞ’’ನ್ತಿ। ‘‘ತೇನ ಹಿ ಲಭನಟ್ಠಾನಂ ಗಚ್ಛಾಮಿ ಅಮ್ಮಾ’’ತಿ। ‘‘ಪುತ್ತ, ಅಹಂ ಅಜ್ಜೇವ ತುಯ್ಹಂ ಬಾರಾಣಸಿನಗರೇ ರಜ್ಜಪಟಿಲಾಭಮ್ಪಿ ಇಚ್ಛಾಮೀ’’ತಿ। ಸೋ ಮಾತರಂ ವನ್ದಿತ್ವಾ ಆಹ – ‘‘ಗಚ್ಛಾಮಿ, ಅಮ್ಮಾ’’ತಿ। ‘‘ಗಚ್ಛ, ತಾತಾ’’ತಿ। ಏವಂ ಕಿರಸ್ಸಾ ಚಿತ್ತಂ ಅಹೋಸಿ – ‘‘ಕಹಂ ಗಮಿಸ್ಸತಿ? ಇಧ ವಾ ಏತ್ಥ ವಾ ಗೇಹೇ ನಿಸೀದಿಸ್ಸತೀ’’ತಿ। ಸೋ ಪನ ಪುಞ್ಞನಿಯಾಮೇನ ನಿಕ್ಖಮಿತ್ವಾ ಬಾರಾಣಸಿಂ ಗನ್ತ್ವಾ ಉಯ್ಯಾನೇ ಮಙ್ಗಲಸಿಲಾಪಟ್ಟೇ ಸಸೀಸಂ ಪಾರುಪಿತ್ವಾ ನಿಪಜ್ಜಿ। ಸೋ ಚ ಬಾರಾಣಸಿರಞ್ಞೋ ಕಾಲಙ್ಕತಸ್ಸ ಸತ್ತಮೋ ದಿವಸೋ ಹೋತಿ।

ಅಮಚ್ಚಾ ರಞ್ಞೋ ಸರೀರಕಿಚ್ಚಂ ಕತ್ವಾ ರಾಜಙ್ಗಣೇ ನಿಸೀದಿತ್ವಾ ಮನ್ತಯಿಂಸು – ‘‘ರಞ್ಞೋ ಏಕಾ ಧೀತಾವ ಅತ್ಥಿ, ಪುತ್ತೋ ನತ್ಥಿ, ಅರಾಜಕಂ ರಜ್ಜಂ ನಸ್ಸತಿ, ಕೋ ರಾಜಾ ಹೋತೀ’’ತಿ? ‘‘ತ್ವಂ ಹೋಹಿ, ತ್ವಂ ಹೋಹೀ’’ತಿ ಆಹಂಸು। ಪುರೋಹಿತೋ ಆಹ – ‘‘ಬಹುಂ ಓಲೋಕೇತುಂ ನ ವಟ್ಟತಿ, ಫುಸ್ಸರಥಂ ವಿಸ್ಸಜ್ಜೇಮಾ’’ತಿ। ತೇ ಕುಮುದವಣ್ಣೇ ಚತ್ತಾರೋ ಸಿನ್ಧವೇ ಯೋಜೇತ್ವಾ ಪಞ್ಚವಿಧಂ ರಾಜಕಕುಧಭಣ್ಡಂ ಸೇತಚ್ಛತ್ತಞ್ಚ ರಥಸ್ಮಿಂಯೇವ ಠಪೇತ್ವಾ ರಥಂ ವಿಸ್ಸಜ್ಜೇತ್ವಾ ಪಚ್ಛತೋ ತೂರಿಯಾನಿ ಪಗ್ಗಣ್ಹಾಪೇಸುಂ। ರಥೋ ಪಾಚೀನದ್ವಾರೇನ ನಿಕ್ಖಮಿತ್ವಾ ಉಯ್ಯಾನಾಭಿಮುಖೋ ಅಹೋಸಿ। ‘‘ಪರಿಚಯೇನ ಉಯ್ಯಾನಾಭಿಮುಖೋ ಗಚ್ಛತಿ, ನಿವತ್ತೇಮಾ’’ತಿ ಕೇಚಿ ಆಹಂಸು। ಪುರೋಹಿತೋ ‘‘ಮಾ ನಿವತ್ತಯಿತ್ಥಾ’’ತಿ ಆಹ। ರಥೋ ಕುಮಾರಂ ಪದಕ್ಖಿಣಂ ಕತ್ವಾ ಆರೋಹನಸಜ್ಜೋ ಹುತ್ವಾ ಅಟ್ಠಾಸಿ, ಪುರೋಹಿತೋ ಪಾರುಪನಕಣ್ಣಂ ಅಪನೇತ್ವಾ ಪಾದತಲಾನಿ ಓಲೋಕೇನ್ತೋ, ‘‘ತಿಟ್ಠತು ಅಯಂ ದೀಪೋ, ದ್ವಿಸಹಸ್ಸದೀಪಪರಿವಾರೇಸು ಚತೂಸು ಮಹಾದೀಪೇಸು ಏಸ ರಜ್ಜಂ ಕಾರೇತುಂ ಯುತ್ತೋ’’ತಿ ವತ್ವಾ ‘‘ಪುನಪಿ ತೂರಿಯಾನಿ ಪಗ್ಗಣ್ಹಥ, ಪುನಪಿ ಪಗ್ಗಣ್ಹಥಾ’’ತಿ ತಿಕ್ಖತ್ತುಂ ತೂರಿಯಾನಿ ಪಗ್ಗಣ್ಹಾಪೇಸಿ।

ಅಥ ಕುಮಾರೋ ಮುಖಂ ವಿವರಿತ್ವಾ ಓಲೋಕೇತ್ವಾ, ‘‘ಕೇನ ಕಮ್ಮೇನ ಆಗತತ್ಥಾ’’ತಿ ಆಹ। ‘‘ದೇವ, ತುಮ್ಹಾಕಂ ರಜ್ಜಂ ಪಾಪುಣಾತೀ’’ತಿ। ‘‘ರಾಜಾ ಕಹ’’ನ್ತಿ? ‘‘ದೇವತ್ತಂ ಗತೋ, ಸಾಮೀ’’ತಿ। ‘‘ಕತಿ ದಿವಸಾ ಅತಿಕ್ಕನ್ತಾ’’ತಿ? ‘‘ಅಜ್ಜ ಸತ್ತಮೋ ದಿವಸೋ’’ತಿ। ‘‘ಪುತ್ತೋ ವಾ ಧೀತಾ ವಾ ನತ್ಥೀ’’ತಿ? ‘‘ಧೀತಾ ಅತ್ಥಿ ದೇವ, ಪುತ್ತೋ ನತ್ಥೀ’’ತಿ। ‘‘ಕರಿಸ್ಸಾಮಿ ರಜ್ಜ’’ನ್ತಿ। ತೇ ತಾವದೇವ ಅಭಿಸೇಕಮಣ್ಡಪಂ ಕಾರೇತ್ವಾ ರಾಜಧೀತರಂ ಸಬ್ಬಾಲಙ್ಕಾರೇಹಿ ಅಲಙ್ಕರಿತ್ವಾ, ಉಯ್ಯಾನಂ ಆನೇತ್ವಾ ಕುಮಾರಸ್ಸ ಅಭಿಸೇಕಂ ಅಕಂಸು। ಅಥಸ್ಸ ಕತಾಭಿಸೇಕಸ್ಸ ಸತಸಹಸ್ಸಗ್ಘನಕಂ ವತ್ಥಂ ಉಪಹರಿಂಸು। ಸೋ ‘‘ಕಿಮಿದಂ, ತಾತಾ’’ತಿ ಆಹ। ‘‘ನಿವಾಸನವತ್ಥಂ ದೇವಾ’’ತಿ। ‘‘ನನು, ತಾತಾ, ಥೂಲ’’ನ್ತಿ? ‘‘ಮನುಸ್ಸಾನಂ ಪರಿಭೋಗವತ್ಥೇಸು ಇತೋ ಸುಖುಮತರಂ ನತ್ಥಿ, ದೇವಾ’’ತಿ। ‘‘ತುಮ್ಹಾಕಂ ರಾಜಾ ಏವರೂಪಂ ನಿವಾಸೇಸೀ’’ತಿ? ‘‘ಆಮ, ದೇವಾ’’ತಿ। ‘‘ನ ಮಞ್ಞೇ ಪುಞ್ಞವಾ ತುಮ್ಹಾಕಂ ರಾಜಾ, ಸುವಣ್ಣಭಿಙ್ಗಾರಂ ಆಹರಥ, ಲಭಿಸ್ಸಾಮ ವತ್ಥ’’ನ್ತಿ। ಸುವಣ್ಣಭಿಙ್ಗಾರಂ ಆಹರಿಂಸು। ಸೋ ಉಟ್ಠಾಯ ಹತ್ಥೇ ಧೋವಿತ್ವಾ ಮುಖಂ ವಿಕ್ಖಾಲೇತ್ವಾ ಹತ್ಥೇನ ಉದಕಂ ಆದಾಯ ಪುರತ್ಥಿಮದಿಸಾಯಂ ಅಬ್ಭುಕ್ಕಿರಿ। ತಾವದೇವ ಘನಪಥವಿಂ ಭಿನ್ದಿತ್ವಾ ಅಟ್ಠ ಕಪ್ಪರುಕ್ಖಾ ಉಟ್ಠಹಿಂಸು। ಪುನ ಉದಕಂ ಗಹೇತ್ವಾ ದಕ್ಖಿಣಾಯಂ ಪಚ್ಛಿಮಾಯಂ ಉತ್ತರಾಯನ್ತಿ ಏವಂ ಚತೂಸು ದಿಸಾಸು ಅಬ್ಭುಕ್ಕಿರಿ। ಸಬ್ಬದಿಸಾಸು ಅಟ್ಠಟ್ಠಕಂ ಕತ್ವಾ ದ್ವತ್ತಿಂಸ ಕಪ್ಪರುಕ್ಖಾ ಉಟ್ಠಹಿಂಸು। ಸೋ ಏಕಂ ದಿಬ್ಬದುಸ್ಸಂ ನಿವಾಸೇತ್ವಾ ಏಕಂ ಪಾರುಪಿತ್ವಾ ‘‘ನನ್ದರಞ್ಞೋ ವಿಜಿತೇ ಸುತ್ತಕನ್ತಿಕಾ ಇತ್ಥಿಯೋ ಮಾ ಸುತ್ತಂ ಕನ್ತಿಂಸೂತಿ ಏವಂ ಭೇರಿಂ ಚರಾಪೇಥಾ’’ತಿ ವತ್ವಾ ಛತ್ತಂ ಉಸ್ಸಾಪೇತ್ವಾ ಅಲಙ್ಕತಪಟಿಯತ್ತೋ ಹತ್ಥಿಕ್ಖನ್ಧವರಗತೋ ನಗರಂ ಪವಿಸಿತ್ವಾ ಪಾಸಾದಂ ಆರುಯ್ಹ ಮಹಾಸಮ್ಪತ್ತಿಂ ಅನುಭವಿ।

ಏವಂ ಕಾಲೇ ಗಚ್ಛನ್ತೇ ಏಕದಿವಸಂ ದೇವೀ ರಞ್ಞೋ ಮಹಾಸಮ್ಪತ್ತಿಂ ದಿಸ್ವಾ, ‘‘ಅಹೋ ತಪಸ್ಸೀ’’ತಿ ಕಾರುಞ್ಞಾಕಾರಂ ದಸ್ಸೇತಿ। ‘‘ಕಿಮಿದಂ, ದೇವೀ’’ತಿ ಚ ಪುಟ್ಠಾ ‘‘ಅತಿಮಹತೀ ತೇ, ದೇವ, ಸಮ್ಪತ್ತಿ। ಅತೀತೇ ಬುದ್ಧಾನಂ ಸದ್ದಹಿತ್ವಾ ಕಲ್ಯಾಣಂ ಅಕತ್ಥ, ಇದಾನಿ ಅನಾಗತಸ್ಸ ಪಚ್ಚಯಂ ಕುಸಲಂ ನ ಕರೋಥಾ’’ತಿ ಆಹ। ‘‘ಕಸ್ಸ ದಸ್ಸಾಮ, ಸೀಲವನ್ತೋ ನತ್ಥೀ’’ತಿ? ‘‘ಅಸುಞ್ಞೋ, ದೇವ, ಜಮ್ಬುದೀಪೋ ಅರಹನ್ತೇಹಿ, ತುಮ್ಹೇ ದಾನಮೇವ ಸಜ್ಜೇಥ, ಅಹಂ ಅರಹನ್ತೇ ಲಚ್ಛಾಮೀ’’ತಿ ಆಹ। ರಾಜಾ ಪುನದಿವಸೇ ಪಾಚೀನದ್ವಾರೇ ದಾನಂ ಸಜ್ಜಾಪೇಸಿ। ದೇವೀ ಪಾತೋವ ಉಪೋಸಥಙ್ಗಾನಿ ಅಧಿಟ್ಠಾಯ ಉಪರಿಪಾಸಾದೇ ಪುರತ್ಥಾಭಿಮುಖಾ ಉರೇನ ನಿಪಜ್ಜಿತ್ವಾ ‘‘ಸಚೇ ಏತಿಸ್ಸಂ ದಿಸಾಯಂ ಅರಹನ್ತೋ ಅತ್ಥಿ, ಸ್ವೇವ ಆಗನ್ತ್ವಾ ಅಮ್ಹಾಕಂ ಭಿಕ್ಖಂ ಗಣ್ಹನ್ತೂ’’ತಿ ಆಹ। ತಸ್ಸಂ ದಿಸಾಯಂ ಅರಹನ್ತೋ ನಾಹೇಸುಂ, ತಂ ಸಕ್ಕಾರಂ ಕಪಣಯಾಚಕಾನಂ ಅದಂಸು। ಪುನದಿವಸೇ ದಕ್ಖಿಣದ್ವಾರೇ ದಾನಂ ಸಜ್ಜೇತ್ವಾ ತಥೇವ ಅಕಾಸಿ, ಪುನದಿವಸೇ ಪಚ್ಛಿಮದ್ವಾರೇ। ಉತ್ತರದ್ವಾರೇ ಸಜ್ಜಿತದಿವಸೇ ಪನ ದೇವಿಯಾ ತಥೇವ ನಿಮನ್ತೇನ್ತಿಯಾ ಹಿಮವನ್ತೇ ವಸನ್ತಾನಂ ಪದುಮವತಿಯಾ ಪುತ್ತಾನಂ ಪಞ್ಚಸತಾನಂ ಪಚ್ಚೇಕಬುದ್ಧಾನಂ ಜೇಟ್ಠಕೋ ಮಹಾಪದುಮಪಚ್ಚೇಕಬುದ್ಧೋ ಭಾತಿಕೇ ಆಮನ್ತೇಸಿ, ‘‘ಮಾರಿಸಾ, ನನ್ದರಾಜಾ, ತುಮ್ಹೇ ನಿಮನ್ತೇತಿ, ಅಧಿವಾಸೇಥ ತಸ್ಸಾ’’ತಿ। ತೇ ಅಧಿವಾಸೇತ್ವಾ ಪುನದಿವಸೇ ಅನೋತತ್ತದಹೇ ಮುಖಂ ಧೋವಿತ್ವಾ, ಆಕಾಸೇನ ಆಗನ್ತ್ವಾ ಉತ್ತರದ್ವಾರೇ ಓತರಿಂಸು। ಮನುಸ್ಸಾ ದಿಸ್ವಾ ಗನ್ತ್ವಾ ‘‘ಪಞ್ಚಸತಾ, ದೇವ, ಪಚ್ಚೇಕಬುದ್ಧಾ ಆಗತಾ’’ತಿ ರಞ್ಜೋ ಆರೋಚೇಸುಂ। ರಾಜಾ ಸದ್ಧಿಂ ದೇವಿಯಾ ಗನ್ತ್ವಾ, ವನ್ದಿತ್ವಾ, ಪತ್ತಂ ಗಹೇತ್ವಾ ಪಚ್ಚೇಕಬುದ್ಧೇ ಪಾಸಾದಂ ಆರೋಪೇತ್ವಾ, ತತ್ರ ನೇಸಂ ದಾನಂ ದತ್ವಾ, ಭತ್ತಕಿಚ್ಚಾವಸಾನೇ ರಾಜಾ ಸಙ್ಘತ್ಥೇರಸ್ಸ, ದೇವೀ, ಸಙ್ಘನವಕಸ್ಸ ಪಾದಮೂಲೇ ನಿಪಜ್ಜಿತ್ವಾ ‘‘ಅಯ್ಯಾ ಪಚ್ಚಯೇಹಿ ನ ಕಿಲಮಿಸ್ಸನ್ತಿ, ಮಯಂ ಪುಞ್ಞೇನ ನ ಹಾಯಿಸ್ಸಾಮ। ಅಮ್ಹಾಕಂ ಯಾವಜೀವಂ ಇಧ ನಿವಾಸಾಯ ಪಟಿಞ್ಞಂ ದೇಥಾ’’ತಿ ಪಟಿಞ್ಞಂ ಕಾರೇತ್ವಾ ಉಯ್ಯಾನೇ ಪಞ್ಚಪಣ್ಣಸಾಲಾಸತಾನಿ ಪಞ್ಚಚಙ್ಕಮನಸತಾನೀತಿ ಸಬ್ಬಾಕಾರೇನ ನಿವಾಸನಟ್ಠಾನಾನಿ ಸಮ್ಪಾದೇತ್ವಾ ತತ್ಥ ವಸಾಪೇಸುಂ।

ಏವಂ ಕಾಲೇ ಗಚ್ಛನ್ತೇ ರಞ್ಞೋ ಪಚ್ಚನ್ತೋ ಕುಪಿತೋ। ಸೋ ‘‘ಅಹಂ ಪಚ್ಚನ್ತಂ ವೂಪಸಮೇತುಂ ಗಚ್ಛಾಮಿ, ತ್ವಂ ಪಚ್ಚೇಕಬುದ್ಧೇಸು ಮಾ ಪಮಜ್ಜೀ’’ತಿ ದೇವಿಂ ಓವದಿತ್ವಾ ಗತೋ। ತಸ್ಮಿಂ ಅನಾಗತೇಯೇವ ಪಚ್ಚೇಕಬುದ್ಧಾನಂ ಆಯುಸಙ್ಖಾರಾ ಖೀಣಾ। ಮಹಾಪದುಮಪಚ್ಚೇಕಬುದ್ಧೋ ತಿಯಾಮರತ್ತಿಂ ಝಾನಕೀಳಂ ಕೀಳಿತ್ವಾ ಅರುಣುಗ್ಗಮನೇ ಆಲಮ್ಬನಫಲಕಂ ಆಲಮ್ಬಿತ್ವಾ ಠಿತಕೋವ ಅನುಪಾದಿಸೇಸಾಯ ನಿಬ್ಬಾನಧಾತುಯಾ ಪರಿನಿಬ್ಬಾಯಿ। ಏತೇನುಪಾಯೇನ ಸೇಸಾಪೀತಿ ಸಬ್ಬೇವ ಪರಿನಿಬ್ಬುತಾ। ಪುನದಿವಸೇ ದೇವೀ ಪಚ್ಚೇಕಬುದ್ಧಾನಂ ನಿಸೀದನಟ್ಠಾನಂ ಹರಿತೂಪಲಿತ್ತಂ ಕಾರೇತ್ವಾ ಪುಪ್ಫಾನಿ ವಿಕಿರಿತ್ವಾ, ಧೂಪಂ ದತ್ವಾ ತೇಸಂ ಆಗಮನಂ ಓಲೋಕಯನ್ತೀ ನಿಸಿನ್ನಾ ಆಗಮನಂ ಅಪಸ್ಸನ್ತೀ ಪುರಿಸಂ ಪೇಸೇಸಿ – ‘‘ಗಚ್ಛ, ತಾತ, ಜಾನಾಹಿ, ಕಿಂ ಅಯ್ಯಾನಂ ಕಿಞ್ಚಿ ಅಫಾಸುಕ’’ನ್ತಿ? ಸೋ ಗನ್ತ್ವಾ ಮಹಾಪದುಮಸ್ಸ ಪಣ್ಣಸಾಲಾಯ ದ್ವಾರಂ ವಿವರಿತ್ವಾ ತತ್ಥ ಅಪಸ್ಸನ್ತೋ ಚಙ್ಕಮನಂ ಗನ್ತ್ವಾ ಆಲಮ್ಬನಫಲಕಂ ನಿಸ್ಸಾಯ ಠಿತಂ ದಿಸ್ವಾ ವನ್ದಿತ್ವಾ ‘‘ಕಾಲೋ, ಭನ್ತೇ’’ತಿ ಆಹ। ‘‘ಪರಿನಿಬ್ಬುತಸರೀರಂ ಕಿಂ ಕಥೇಸ್ಸತಿ? ಸೋ ನಿದ್ದಾಯತಿ ಮಞ್ಞೇ’’ತಿ ಗನ್ತ್ವಾ ಪಿಟ್ಠಿಪಾದೇ ಹತ್ಥೇನ ಪರಾಮಸಿತ್ವಾ ಪಾದಾನಂ ಸೀತಲತಾಯ ಚೇವ ಥದ್ಧತಾಯ ಚ ಪರಿನಿಬ್ಬುತಭಾವಂ ಞತ್ವಾ, ದುತಿಯಸ್ಸ ಸನ್ತಿಕಂ ಅಗಮಾಸಿ। ಏವಂ ತತಿಯಸ್ಸಾತಿ ಸಬ್ಬೇಸಂ ಪರಿನಿಬ್ಬುತಭಾವಂ ಞತ್ವಾ ರಾಜಕುಲಂ ಗತೋ। ‘‘ಕಹಂ, ತಾತ, ಪಚ್ಚೇಕಬುದ್ಧಾ’’ತಿ ಪುಟ್ಠೋ ‘‘ಪರಿನಿಬ್ಬುತಾ, ದೇವೀ’’ತಿ ಆಹ। ದೇವೀ ಕನ್ದನ್ತೀ ರೋದನ್ತೀ ನಿಕ್ಖಮಿತ್ವಾ ನಾಗರೇಹಿ ಸದ್ಧಿಂ ತತ್ಥ ಗನ್ತ್ವಾ ಸಾಧುಕೀಳಿತಂ ಕಾರೇತ್ವಾ ಪಚ್ಚೇಕಬುದ್ಧಾನಂ ಸರೀರಕಿಚ್ಚಂ ಕಾರೇತ್ವಾ ಧಾತುಯೋ ಗಹೇತ್ವಾ ಚೇತಿಯಂ ಪತಿಟ್ಠಾಪೇಸಿ।

ರಾಜಾ ಪಚ್ಚನ್ತಂ ವೂಪಸಮೇತ್ವಾ ಆಗತೋ ಪಚ್ಚುಗ್ಗಮನಂ ಆಗತಂ ದೇವಿಂ ಪುಚ್ಛಿ – ‘‘ಕಿಂ, ಭದ್ದೇ, ಪಚ್ಚೇಕಬುದ್ಧೇಸು ನಪ್ಪಮಜ್ಜಿ, ನಿರೋಗಾ ಅಯ್ಯಾ’’ತಿ? ‘‘ಪರಿನಿಬ್ಬುತಾ ದೇವಾ’’ತಿ। ರಾಜಾ ಚಿನ್ತೇತಿ ‘‘ಏವರೂಪಾನಮ್ಪಿ ಪಣ್ಡಿತಾನಂ ಮರಣಂ ಉಪ್ಪಜ್ಜತಿ, ಅಮ್ಹಾಕಂ ಕುತೋ ಮೋಕ್ಖೋ’’ತಿ। ಸೋ ನಗರಂ ಅಗನ್ತ್ವಾ, ಉಯ್ಯಾನಮೇವ ಪವಿಸಿತ್ವಾ ಜೇಟ್ಠಪುತ್ತಂ ಪಕ್ಕೋಸಾಪೇತ್ವಾ, ತಸ್ಸ ರಜ್ಜಂ ನಿಯ್ಯಾತೇತ್ವಾ, ಸಯಂ ಸಮಣಪಬ್ಬಜ್ಜಂ ಪಬ್ಬಜಿ। ದೇವೀಪಿ ‘‘ಇಮಸ್ಮಿಂ ಪಬ್ಬಜಿತೇ ಅಹಂ ಕಿಂ ಕರಿಸ್ಸಾಮೀ’’ತಿ ತತ್ಥೇವ ಉಯ್ಯಾನೇ ಪಬ್ಬಜಿತ್ವಾ ದ್ವೇಪಿ ಝಾನಂ ಭಾವೇತ್ವಾ ತತೋ ಚುತಾ ಬ್ರಹ್ಮಲೋಕೇ ನಿಬ್ಬತ್ತಿಂಸು।

ತೇಸು ತತ್ಥೇವ ವಸನ್ತೇಸು ಅಮ್ಹಾಕಂ ಸತ್ಥಾ ಲೋಕೇ ಉಪ್ಪಜ್ಜಿತ್ವಾ ಪವತ್ತಿತವರಧಮ್ಮಚಕ್ಕೋ ಅನುಪುಬ್ಬೇನ ರಾಜಗಹಂ ಪಾವಿಸಿ। ಸತ್ಥರಿ ತತ್ಥ ಪಟಿವಸನ್ತೇ ಅಯಂ ಪಿಪ್ಪಲಿಮಾಣವೋ ಮಗಧರಟ್ಠೇ ಮಹಾತಿತ್ಥಬ್ರಾಹ್ಮಣಗಾಮೇ ಕಪಿಲಬ್ರಾಹ್ಮಣಸ್ಸ ಅಗ್ಗಮಹೇಸಿಯಾ ಕುಚ್ಛಿಮ್ಹಿ ನಿಬ್ಬತ್ತೋ। ಅಯಂ ಭದ್ದಾ ಕಾಪಿಲಾನೀ ಮದ್ದರಟ್ಠೇ ಸಾಗಲನಗರೇ ಕೋಸಿಯಗೋತ್ತಬ್ರಾಹ್ಮಣಸ್ಸ ಅಗ್ಗಮಹೇಸಿಯಾ ಕುಚ್ಛಿಸ್ಮಿಂ ನಿಬ್ಬತ್ತಾ। ತೇಸಂ ಅನುಕ್ಕಮೇನ ವಡ್ಢಮಾನಾನಂ ಪಿಪ್ಪಲಿಮಾಣವಸ್ಸ ವೀಸತಿಮೇ, ಭದ್ದಾಯ ಸೋಳಸಮೇ ವಸ್ಸೇ ಸಮ್ಪತ್ತೇ ಮಾತಾಪಿತರೋ ಪುತ್ತಂ ಓಲೋಕೇತ್ವಾ ‘‘ತಾತ, ತ್ವಂ ವಯಪ್ಪತ್ತೋ, ಕುಲವಂಸೋ ನಾಮ ಪತಿಟ್ಠಪೇತಬ್ಬೋ’’ತಿ ಅತಿವಿಯ ನಿಪ್ಪೀಳಯಿಂಸು। ಮಾಣವೋ ಆಹ ‘‘ಮಯ್ಹಂ ಸೋತಪಥೇ ಏವರೂಪಂ ಕಥಂ ಮಾ ಕಥೇಥ। ಅಹಂ ಯಾವ ತುಮ್ಹೇ ಧರಥ, ತಾವ ಪಟಿಜಗ್ಗಿಸ್ಸಾಮಿ, ತುಮ್ಹಾಕಂ ಅಚ್ಚಯೇನ ನಿಕ್ಖಮಿತ್ವಾ ಪಬ್ಬಜಿಸ್ಸಾಮೀ’’ತಿ। ತೇ ಕತಿಪಾಹಂ ಅತಿಕ್ಕಮಿತ್ವಾ ಪುನ ಕಥಯಿಂಸು। ಸೋಪಿ ತಥೇವ ಪಟಿಕ್ಖಿಪಿ। ತತೋ ಪಟ್ಠಾಯ ನಿರನ್ತರಂ ಕಥೇತಿಯೇವ।

ಮಾಣವೋ ‘‘ಮಮ ಮಾತರಂ ಸಞ್ಞಾಪೇಸ್ಸಾಮೀ’’ತಿ ರತ್ತಸುವಣ್ಣಸ್ಸ ನಿಕ್ಖಸಹಸ್ಸಂ ದತ್ವಾ ಸಬ್ಬಕಾಮೇಹಿ ಸನ್ತಪ್ಪೇತ್ವಾ ಸುವಣ್ಣಕಾರೇಹಿ ಏಕಂ ಇತ್ಥಿರೂಪಂ ಕಾರಾಪೇತ್ವಾ ತಸ್ಸ ಮಜ್ಜನಘಟ್ಟನಾದಿಕಮ್ಮಪರಿಯೋಸಾನೇ ತಂ ರತ್ತವತ್ಥಂ ನಿವಾಸಾಪೇತ್ವಾ ವಣ್ಣಸಮ್ಪನ್ನೇಹಿ ಪುಪ್ಫೇಹಿ ಚೇವ ನಾನಾಅಲಙ್ಕಾರೇಹಿ ಚ ಅಲಙ್ಕಾರಾಪೇತ್ವಾ ಮಾತರಂ ಪಕ್ಕೋಸಾಪೇತ್ವಾ ಆಹ ‘‘ಅಮ್ಮ, ಏವರೂಪಂ ಆರಮ್ಮಣಂ ಲಭನ್ತೋ ಗೇಹೇ ವಸಿಸ್ಸಾಮಿ ಅಲಭನ್ತೋ ನ ವಸಿಸ್ಸಾಮೀ’’ತಿ। ಪಣ್ಡಿತಾ ಬ್ರಾಹ್ಮಣೀ ಚಿನ್ತೇಸಿ – ‘‘ಮಯ್ಹಂ ಪುತ್ತೋ ಪುಞ್ಞವಾ ದಿನ್ನದಾನೋ ಕತಾಭಿನೀಹಾರೋ, ಪುಞ್ಞಂ ಕರೋನ್ತೋ ನ ಏಕಕೋವ ಅಕಾಸಿ, ಅದ್ಧಾ ಏತೇನ ಸಹಕತಪುಞ್ಞಾ ಸುವಣ್ಣರೂಪಪಟಿಭಾಗಾವ ಭವಿಸ್ಸತೀ’’ತಿ ಅಟ್ಠ ಬ್ರಾಹ್ಮಣೇ ಪಕ್ಕೋಸಾಪೇತ್ವಾ ಸಬ್ಬಕಾಮೇಹಿ ಸನ್ತಪ್ಪೇತ್ವಾ ಸುವಣ್ಣರೂಪಕಂ ರಥಂ ಆರೋಪೇತ್ವಾ ‘‘ಗಚ್ಛಥ, ತಾತಾ, ಯತ್ಥ ಅಮ್ಹಾಕಂ ಜಾತಿಗೋತ್ತಭೋಗೇಹಿ ಸಮಾನೇ ಕುಲೇ ಏವರೂಪಂ ದಾರಿಕಂ ಪಸ್ಸಥ, ಇಮಮೇವ ಸುವಣ್ಣರೂಪಕಂ ಪಣ್ಣಾಕಾರಂ ಕತ್ವಾ ಏಥಾ’’ತಿ ಉಯ್ಯೋಜೇಸಿ।

ತೇ ‘‘ಅಮ್ಹಾಕಂ ನಾಮ ಏತಂ ಕಮ್ಮ’’ನ್ತಿ ನಿಕ್ಖಮಿತ್ವಾ ‘‘ಕತ್ಥ ಗಮಿಸ್ಸಾಮಾ’’ತಿ ಚಿನ್ತೇತ್ವಾ ‘‘ಮದ್ದರಟ್ಠಂ ನಾಮ ಇತ್ಥಾಕರೋ, ಮದ್ದರಟ್ಠಂ ಗಮಿಸ್ಸಾಮಾ’’ತಿ ಮದ್ದರಟ್ಠೇ ಸಾಗಲನಗರಂ ಅಗಮಂಸು। ತತ್ಥ ತಂ ಸುವಣ್ಣರೂಪಕಂ ನ್ಹಾನತಿತ್ಥೇ ಠಪೇತ್ವಾ ಏಕಮನ್ತೇ ನಿಸೀದಿಂಸು। ಅಥ ಭದ್ದಾಯ ಧಾತೀ ಭದ್ದಂ ನ್ಹಾಪೇತ್ವಾ, ಅಲಙ್ಕರಿತ್ವಾ, ಸಿರಿಗಬ್ಭೇ ನಿಸೀದಾಪೇತ್ವಾ ಸಯಂ ನ್ಹಾಯಿತುಂ ಉದಕತಿತ್ಥಂ ಗತಾ ತತ್ಥ ತಂ ಸುವಣ್ಣರೂಪಕಂ ದಿಸ್ವಾ ‘‘ಕಿಸ್ಸಾಯಂ ಅವಿನೀತಾ ಇಧಾಗನ್ತ್ವಾ ಠಿತಾ’’ತಿ ಪಿಟ್ಠಿಪಸ್ಸೇ ಪಹರಿತ್ವಾ ‘‘ಸುವಣ್ಣರೂಪಕ’’ನ್ತಿ ಞತ್ವಾ ‘‘ಅಯ್ಯಧೀತಾ ಮೇ’’ತಿ ಸಞ್ಞಂ ಉಪ್ಪಾದೇಸಿಂ, ‘‘ಅಯಂ ಪನ ಮೇ ಅಯ್ಯಧೀತಾಯ ನಿವಾಸನಪಟಿಗ್ಗಾಹಿಕಾಯಾಪಿ ಅಸದಿಸಾ’’ತಿ ಆಹ। ಅಥ ನಂ ತೇ ಮನುಸ್ಸಾ ಪರಿವಾರೇತ್ವಾ ‘‘ಏವರೂಪಾ ತೇ ಸಾಮಿಧೀತಾ’’ತಿ ಪುಚ್ಛಿಂಸು। ‘‘ಕಿಂ ಏಸಾ, ಇಮಾಯ ಸುವಣ್ಣಪಟಿಮಾಯ ಸತಗುಣೇನ ಸಹಸ್ಸಗುಣೇನ ಮಯ್ಹಂ ಅಯ್ಯಧೀತಾ ಅಭಿರೂಪತರಾ, ದ್ವಾದಸಹತ್ಥೇ ಗಬ್ಭೇ ನಿಸಿನ್ನಾಯ ಪದೀಪಕಿಚ್ಚಂ ನತ್ಥಿ, ಸರೀರೋಭಾಸೇನೇವ ತಮಂ ವಿಧಮತೀ’’ತಿ। ‘‘ತೇನ ಹಿ ಆಗಚ್ಛಾ’’ತಿ ತಂ ಖುಜ್ಜಂ ಗಹೇತ್ವಾ ಸುವಣ್ಣರೂಪಕಂ ರಥೇ ಆರೋಪೇತ್ವಾ ಕೋಸಿಯಗೋತ್ತಸ್ಸ ಬ್ರಾಹ್ಮಣಸ್ಸ ಘರದ್ವಾರೇ ಠತ್ವಾ ಆಗಮನಂ ನಿವೇದಯಿಂಸು।

ಬ್ರಾಹ್ಮಣೋ ಪಟಿಸನ್ಥಾರಂ ಕತ್ವಾ ‘‘ಕುತೋ ಆಗತತ್ಥಾ’’ತಿ ಪುಚ್ಛಿ। ‘‘ಮಗಧರಟ್ಠೇ ಮಹಾತಿತ್ಥಗಾಮೇ ಕಪಿಲಬ್ರಾಹ್ಮಣಸ್ಸ ಘರತೋ’’ತಿ। ‘‘ಕಿಂ ಕಾರಣಾ ಆಗತಾ’’ತಿ? ‘‘ಇಮಿನಾ ನಾಮ ಕಾರಣೇನಾ’’ತಿ। ‘‘ಕಲ್ಯಾಣಂ, ತಾತಾ, ಸಮಜಾತಿಗೋತ್ತವಿಭವೋ ಅಮ್ಹಾಕಂ ಬ್ರಾಹ್ಮಣೋ, ದಸ್ಸಾಮಿ ದಾರಿಕ’’ನ್ತಿ ಪಣ್ಣಾಕಾರಂ ಗಣ್ಹಿ। ತೇ ಕಪಿಲಬ್ರಾಹ್ಮಣಸ್ಸ ಸಾಸನಂ ಪಹಿಣಿಂಸು ‘‘ಲದ್ಧಾ ದಾರಿಕಾ , ಕತ್ತಬ್ಬಂ ಕರೋಥಾ’’ತಿ। ತಂ ಸಾಸನಂ ಸುತ್ವಾ ಪಿಪ್ಪಲಿಮಾಣವಸ್ಸ ಆರೋಚಯಿಂಸು ‘‘ಲದ್ಧಾ ಕಿರ ದಾರಿಕಾ’’ತಿ। ಮಾಣವೋ ‘‘ಅಹಂ ‘ನ ಲಭಿಸ್ಸನ್ತೀ’ತಿ ಚಿನ್ತೇಸಿಂ, ಇಮೇ ‘ಲದ್ಧಾ’ತಿ ವದನ್ತಿ, ಅನತ್ಥಿಕೋ ಹುತ್ವಾ ಪಣ್ಣಂ ಪೇಸೇಸ್ಸಾಮೀ’’ತಿ ರಹೋಗತೋ ಪಣ್ಣಂ ಲಿಖಿ ‘‘ಭದ್ದಾ, ಅತ್ತನೋ ಜಾತಿಗೋತ್ತಭೋಗಾನುರೂಪಂ ಘರಾವಾಸಂ ಲಭತು, ಅಹಂ ನಿಕ್ಖಮಿತ್ವಾ ಪಬ್ಬಜಿಸ್ಸಾಮಿ, ಮಾ ಪಚ್ಛಾ ವಿಪ್ಪಟಿಸಾರಿನೀ ಅಹೋಸೀ’’ತಿ। ಭದ್ದಾಪಿ ‘‘ಅಸುಕಸ್ಸ ಕಿರ ಮಂ ದಾತುಕಾಮೋ’’ತಿ ಸುತ್ವಾ ‘‘ಪಣ್ಣಂ ಪೇಸೇಸ್ಸಾಮೀ’’ತಿ ರಹೋಗತಾ ಪಣ್ಣಂ ಲಿಖಿ ‘‘ಅಯ್ಯಪುತ್ತೋ ಅತ್ತನೋ ಜಾತಿಗೋತ್ತಭೋಗಾನುರೂಪಂ ಘರಾವಾಸಂ ಲಭತು, ಅಹಂ ಪಬ್ಬಜಿಸ್ಸಾಮಿ, ಮಾ ಪಚ್ಛಾ ವಿಪ್ಪಟಿಸಾರೀ ಅಹೋಸೀ’’ತಿ। ದ್ವೇಪಿ ಪಣ್ಣಾನಿ ಅನ್ತರಾಮಗ್ಗೇ ಸಮಾಗಚ್ಛಿಂಸು। ‘‘ಇದಂ ಕಸ್ಸ ಪಣ್ಣ’’ನ್ತಿ? ‘‘ಪಿಪ್ಪಲಿಮಾಣವೇನ ಭದ್ದಾಯ ಪಹಿತ’’ನ್ತಿ। ‘‘ಇದಂ ಕಸ್ಸಾ’’ತಿ? ‘‘ಭದ್ದಾಯ ಪಿಪ್ಪಲಿಮಾಣವಸ್ಸ ಪಹಿತ’’ನ್ತಿ ಚ ವುತ್ತೇ ತೇ ದ್ವೇಪಿ ವಾಚೇತ್ವಾ ‘‘ಪಸ್ಸಥ ದಾರಕಾನಂ ಕಮ್ಮ’’ನ್ತಿ ಫಾಲೇತ್ವಾ ಅರಞ್ಞೇ ಛಡ್ಡೇತ್ವಾ ಅಞ್ಞಂ ತಂಸಮಾನಂ ಪಣ್ಣಂ ಲಿಖಿತ್ವಾ ಇತೋ ಏತ್ತೋ ಚ ಪೇಸೇಸುಂ। ಇತಿ ಕುಮಾರಸ್ಸ ಕುಮಾರಿಕಾಯ ಚ ಸದಿಸಂ ಪಣ್ಣಂ ಲೋಕಸ್ಸಾದರಹಿತಮೇವಾತಿ ಅನಿಚ್ಛಮಾನಾನಂಯೇವ ದ್ವಿನ್ನಂ ಸಮಾಗಮೋ ಅಹೋಸಿ।

ತಂ ದಿವಸಂಯೇವ ಪಿಪ್ಪಲಿಮಾಣವೋ ಏಕಂ ಪುಪ್ಫದಾಮಂ ಗನ್ಥಾಪೇಸಿ ಭದ್ದಾಪಿ। ತಾನಿ ಸಯನಮಜ್ಝೇ ಠಪೇಸುಂ ಭುತ್ತಸಾಯಮಾಸಾ ಉಭೋಪಿ ‘‘ಸಯನಂ ಆರುಹಿಸ್ಸಾಮಾ’’ತಿ ಮಾಣವೋ ದಕ್ಖಿಣಪಸ್ಸೇನ ಸಯನಂ ಆರುಹಿ। ಭದ್ದಾ ವಾಮಪಸ್ಸೇನ ಅಭಿರುಹಿತ್ವಾ ಆಹ – ‘‘ಯಸ್ಸ ಪಸ್ಸೇ ಪುಪ್ಫಾನಿ ಮಿಲಾಯನ್ತಿ, ತಸ್ಸ ರಾಗಚಿತ್ತಂ ಉಪ್ಪನ್ನನ್ತಿ ವಿಜಾನಿಸ್ಸಾಮ, ಇಮಂ ಪುಪ್ಫದಾಮಂ ನ ಅಲ್ಲಿಯಿತಬ್ಬ’’ನ್ತಿ। ತೇ ಪನ ಅಞ್ಞಮಞ್ಞಂ ಸರೀರಸಮ್ಫಸ್ಸಭಯೇನ ತಿಯಾಮರತ್ತಿಂ ನಿದ್ದಂ ಅನೋಕ್ಕಮನ್ತಾವ ವೀತಿನಾಮೇನ್ತಿ, ದಿವಾ ಪನ ಹಸಿತಮತ್ತಮ್ಪಿ ನಾಹೋಸಿ। ತೇ ಲೋಕಾಮಿಸೇನ ಅಸಂಸಟ್ಠಾ ಯಾವ ಮಾತಾಪಿತರೋ ಧರನ್ತಿ, ತಾವ ಕುಟುಮ್ಬಂ ಅವಿಚಾರೇತ್ವಾ ತೇಸು ಕಾಲಙ್ಕತೇಸು ವಿಚಾರಯಿಂಸು। ಮಹತೀ ಮಾಣವಸ್ಸ ಸಮ್ಪತ್ತಿ – ಏಕದಿವಸಂ ಸರೀರಂ ಉಬ್ಬಟ್ಟೇತ್ವಾ ಛಡ್ಡೇತಬ್ಬಂ ಸುವಣ್ಣಚುಣ್ಣಂ ಏವ ಮಗಧನಾಳಿಯಾ ದ್ವಾದಸನಾಳಿಮತ್ತಂ ಲದ್ಧುಂ ವಟ್ಟತಿ। ಯನ್ತಬದ್ಧಾನಿ ಸಟ್ಠಿಮಹಾತಳಾಕಾನಿ, ಕಮ್ಮನ್ತೋ ದ್ವಾದಸಯೋಜನಿಕೋ, ಅನುರಾಧಪುರಪಮಾಣಾ ಚುದ್ದಸ ಗಾಮಾ, ಚುದ್ದಸ ಹತ್ಥಾನೀಕಾನಿ, ಚುದ್ದಸ ಅಸ್ಸಾನೀಕಾನಿ, ಚುದ್ದಸ ರಥಾನೀಕಾನಿ।

ಸೋ ಏಕದಿವಸಂ ಅಲಙ್ಕತಅಸ್ಸಂ ಆರುಯ್ಹ ಮಹಾಜನಪರಿವುತೋ ಕಮ್ಮನ್ತಂ ಗನ್ತ್ವಾ ಖೇತ್ತಕೋಟಿಯಂ ಠಿತೋ ನಙ್ಗಲೇಹಿ ಭಿನ್ನಟ್ಠಾನತೋ ಕಾಕಾದಯೋ ಸಕುಣೇ ಗಣ್ಡುಪ್ಪಾದಾದಿಪಾಣಕೇ ಉದ್ಧರಿತ್ವಾ ಖಾದನ್ತೇ ದಿಸ್ವಾ, ‘‘ತಾತಾ, ಇಮೇ ಕಿಂ ಖಾದನ್ತೀ’’ತಿ ಪುಚ್ಛಿ। ‘‘ಗಣ್ಡುಪ್ಪಾದೇ, ಅಯ್ಯಾ’’ತಿ। ‘‘ಏತೇಹಿ ಕತಂ ಪಾಪಂ ಕಸ್ಸ ಹೋತೀ’’ತಿ? ‘‘ತುಮ್ಹಾಕಂ, ಅಯ್ಯಾ’’ತಿ। ಸೋ ಚಿನ್ತೇಸಿ – ‘‘ಸಚೇ ಏತೇಹಿ ಕತಂ ಪಾಪಂ ಮಯ್ಹಂ ಹೋತಿ, ಕಿಂ ಮೇ ಕರಿಸ್ಸತಿ ಸತ್ತಅಸೀತಿಕೋಟಿಧನಂ, ಕಿಂ ದ್ವಾದಸಯೋಜನೋ ಕಮ್ಮನ್ತೋ, ಕಿಂ ಯನ್ತಬದ್ಧಾನಿ ತಳಾಕಾನಿ, ಕಿಂ ಚುದ್ದಸ ಗಾಮಾ, ಸಬ್ಬಮೇತಂ ಭದ್ದಾಯ ಕಾಪಿಲಾನಿಯಾ ನಿಯ್ಯಾತೇತ್ವಾ ನಿಕ್ಖಮ್ಮ ಪಬ್ಬಜಿಸ್ಸಾಮೀ’’ತಿ।

ಭದ್ದಾಪಿ ಕಾಪಿಲಾನೀ ತಸ್ಮಿಂ ಖಣೇ ಅನ್ತರವತ್ಥುಮ್ಹಿ ತಯೋ ತಿಲಕುಮ್ಭೇ ಪತ್ಥರಾಪೇತ್ವಾ ಧಾತೀಹಿ ಪರಿವುತಾ ನಿಸಿನ್ನಾ ಕಾಕೇ ತಿಲಪಾಣಕೇ ಖಾದಮಾನೇ ದಿಸ್ವಾ, ‘‘ಅಮ್ಮಾ, ಕಿಂ ಇಮೇ ಖಾದನ್ತೀ’’ತಿ ಪುಚ್ಛಿ। ‘‘ಪಾಣಕೇ ಅಯ್ಯೇ’’ತಿ। ‘‘ಅಕುಸಲಂ ಕಸ್ಸ ಹೋತೀ’’ತಿ? ‘‘ತುಮ್ಹಾಕಂ, ಅಯ್ಯೇ’’ತಿ। ಸಾ ಚಿನ್ತೇಸಿ – ‘‘ಮಯ್ಹಂ ಚತುಹತ್ಥವತ್ಥಂ ನಾಳಿಕೋದನಮತ್ತಞ್ಚ ಲದ್ಧುಂ ವಟ್ಟತಿ, ಯದಿ ಪನೇತಂ ಏತ್ತಕೇನ ಜನೇನ ಕತಂ ಅಕುಸಲಂ ಮಯ್ಹಂ ಹೋತಿ, ಭವಸಹಸ್ಸೇನಪಿ ವಟ್ಟತೋ ಸೀಸಂ ಉಕ್ಖಿಪಿತುಂ ನ ಸಕ್ಕಾ। ಅಯ್ಯಪುತ್ತೇ ಆಗತಮತ್ತೇಯೇವ ಸಬ್ಬಂ ತಸ್ಸ ನಿಯ್ಯಾತೇತ್ವಾ ನಿಕ್ಖಮ್ಮ ಪಬ್ಬಜಿಸ್ಸಾಮೀ’’ತಿ।

ಮಾಣವೋ ಆಗನ್ತ್ವಾ, ನ್ಹತ್ವಾ ಪಾಸಾದಂ ಆರುಯ್ಹ ಮಹಾರಹೇ ಪಲ್ಲಙ್ಕೇ ನಿಸೀದಿ। ಅಥಸ್ಸ ಚಕ್ಕವತ್ತಿನೋ ಅನುಚ್ಛವಿಕಂ ಭೋಜನಂ ಸಜ್ಜಯಿಂಸು। ದ್ವೇಪಿ ಭುಞ್ಜಿತ್ವಾ ಪರಿಜನೇ ನಿಕ್ಖನ್ತೇ ರಹೋಗತಾ ಫಾಸುಕಟ್ಠಾನೇ ನಿಸೀದಿಂಸು। ತತೋ ಮಾಣವೋ ಭದ್ದಂ ಆಹ – ‘‘ಭದ್ದೇ, ಇಮಂ ಘರಂ ಆಗಚ್ಛನ್ತೀ ತ್ವಂ ಕಿತ್ತಕಂ ಧನಂ ಆಹರಸೀ’’ತಿ? ‘‘ಪಞ್ಚಪಣ್ಣಾಸ ಸಕಟಸಹಸ್ಸಾನಿ, ಅಯ್ಯಾ’’ತಿ। ‘‘ತಂ ಸಬ್ಬಂ, ಯಾ ಚ ಇಮಸ್ಮಿಂ ಘರೇ ಸತ್ತಅಸೀತಿಕೋಟಿಯೋ ಯನ್ತಬದ್ಧಸಟ್ಠಿತಳಾಕಾದಿಭೇದಾ ಚ ಸಮ್ಪತ್ತಿ ಅತ್ಥಿ, ತಂ ಸಬ್ಬಞ್ಚ ತುಯ್ಹಂಯೇವ ನಿಯ್ಯಾದೇಮೀ’’ತಿ। ‘‘ತುಮ್ಹೇ ಪನ ಕಹಂ ಗಚ್ಛಥ, ಅಯ್ಯಾ’’ತಿ? ‘‘ಅಹಂ ಪಬ್ಬಜಿಸ್ಸಾಮೀ’’ತಿ। ‘‘ಅಯ್ಯ, ಅಹಮ್ಪಿ ತುಮ್ಹಾಕಂಯೇವ ಆಗಮನಂ ಓಲೋಕಯಮಾನಾ ನಿಸಿನ್ನಾ। ಅಹಮ್ಪಿ ಪಬ್ಬಜಿಸ್ಸಾಮೀ’’ತಿ। ತೇಸಂ ಆದಿತ್ತಪಣ್ಣಕುಟಿ ವಿಯ ತಯೋ ಭವಾ ಉಪಟ್ಠಹಿಂಸು। ತೇ ಅನ್ತರಾಪಣತೋ ಕಸಾಯರಸಪೀತಾನಿ ವತ್ಥಾನಿ ಮತ್ತಿಕಾಪತ್ತೇ ಚ ಆಹರಾಪೇತ್ವಾ ಅಞ್ಞಮಞ್ಞಂ ಕೇಸೇ ಓರೋಪೇತ್ವಾ ‘‘ಯೇ ಲೋಕೇ ಅರಹನ್ತೋ, ತೇ ಉದ್ದಿಸ್ಸ ಅಮ್ಹಾಕಂ ಪಬ್ಬಜ್ಜಾ’’ತಿ ಪಬ್ಬಜಿತ್ವಾ, ಥವಿಕಾಸು ಪತ್ತೇ ಪಕ್ಖಿಪಿತ್ವಾ ಅಂಸೇ ಲಗ್ಗೇತ್ವಾ ಪಾಸಾದತೋ ಓತರಿಂಸು। ಗೇಹೇ ದಾಸೇಸು ವಾ ಕಮ್ಮಕರೇಸು ವಾ ನ ಕೋಚಿ ಸಞ್ಜಾನಿ।

ಅಥ ನೇ ಬ್ರಾಹ್ಮಣಗಾಮತೋ ನಿಕ್ಖಮ್ಮ ದಾಸಗಾಮದ್ವಾರೇನ ಗಚ್ಛನ್ತೇ ಆಕಪ್ಪಕುತ್ತವಸೇನ ದಾಸಗಾಮವಾಸಿನೋ ಸಞ್ಜಾನಿಂಸು। ತೇ ರೋದನ್ತಾ ಪಾದೇಸು ನಿಪತಿತ್ವಾ ‘‘ಕಿಂ, ಅಮ್ಹೇ, ಅನಾಥೇ ಕರೋಥ ಅಯ್ಯಾ’’ತಿ ಆಹಂಸು। ‘‘ಮಯಂ, ‘ಭಣೇ, ಆದಿತ್ತಪಣ್ಣಸಾಲಾ ವಿಯ ತಯೋ ಭವಾ’ತಿ ಪಬ್ಬಜಿಮ್ಹಾ। ಸಚೇ ತುಮ್ಹೇಸು ಏಕೇಕಂ ಭುಜಿಸ್ಸಂ ಕರೋಮ, ವಸ್ಸಸತಮ್ಪಿ ನಪ್ಪಹೋತಿ। ತುಮ್ಹೇವ ತುಮ್ಹಾಕಂ ಸೀಸಂ ಧೋವಿತ್ವಾ ಭುಜಿಸ್ಸಾ ಹುತ್ವಾ ಜೀವಥಾ’’ತಿ ವತ್ವಾ ತೇಸಂ ರೋದನ್ತಾನಂಯೇವ ಪಕ್ಕಮಿಂಸು।

ಥೇರೋ ಪುರತೋ ಗಚ್ಛನ್ತೋ ನಿವತ್ತಿತ್ವಾ ಓಲೋಕೇನ್ತೋ ಚಿನ್ತೇಸಿ – ‘‘ಅಯಂ, ಭದ್ದಾ ಕಾಪಿಲಾನೀ, ಸಕಲಜಮ್ಬುದೀಪಗ್ಘನಿಕಾ ಇತ್ಥೀ ಮಯ್ಹಂ ಪಚ್ಛತೋ ಆಗಚ್ಛತಿ, ಠಾನಂ ಖೋ ಪನೇತಂ ವಿಜ್ಜತಿ, ಯಂ ಕೋಚಿದೇವ ಏವಂ ಚಿನ್ತೇಯ್ಯ ‘ಇಮೇ ಪಬ್ಬಜಿತಾಪಿ ವಿನಾ ಭವಿತುಂ ನ ಸಕ್ಕೋನ್ತಿ, ಅನನುಚ್ಛವಿಕಂ ಕರೋನ್ತೀ’ತಿ, ಕೋಚಿ ಪಾಪೇನ ಮನಂ ಪದೂಸೇತ್ವಾ ಅಪಾಯಪೂರಕೋ ಭವೇಯ್ಯ, ಇಮಂ ಪಹಾಯ ಮಯ್ಹಂ ಗನ್ತುಂ ವಟ್ಟತೀ’’ತಿ ಚಿತ್ತಂ ಉಪ್ಪಾದೇಸಿ। ಸೋ ಪುರತೋ ಗಚ್ಛನ್ತೋ ದ್ವೇಧಾಪಥಂ ದಿಸ್ವಾ ತಸ್ಸ ಮತ್ಥಕೇ ಅಟ್ಠಾಸಿ। ಭದ್ದಾಪಿ ಆಗನ್ತ್ವಾ, ವನ್ದಿತ್ವಾ ಅಟ್ಠಾಸಿ। ಅಥ ನಂ ಆಹ – ‘‘ಭದ್ದೇ, ತಾದಿಸಿಂ ಇತ್ಥಿಂ ಮಮ ಪಚ್ಛತೋ ಆಗಚ್ಛನ್ತಿಂ ದಿಸ್ವಾ ‘ಇಮೇ ಪಬ್ಬಜಿತಾಪಿ ವಿನಾ ಭವಿತುಂ ನ ಸಕ್ಕೋನ್ತೀ’ತಿ ಚಿನ್ತೇತ್ವಾ ಅಮ್ಹೇಸು ಪದುಟ್ಠಚಿತ್ತೋ ಮಹಾಜನೋ ಅಪಾಯಪೂರಕೋ ಭವೇಯ್ಯ। ಇಮಸ್ಮಿಂ ದ್ವೇಧಾಪಥೇ ತ್ವಂ ಏಕಂ ಗಣ್ಹ, ಅಹಮೇಕೇನ ಗಮಿಸ್ಸಾಮೀ’’ತಿ। ‘‘ಆಮ, ಅಯ್ಯ, ಪಬ್ಬಜಿತಾನಂ ಮಾತುಗಾಮೋ ಪಲಿಬೋಧೋ, ‘ಪಬ್ಬಜಿತ್ವಾಪಿ ವಿನಾ ನ ಭವನ್ತೀ’ತಿ ಅಮ್ಹಾಕಂ ದೋಸಂ ದಸ್ಸೇಸ್ಸನ್ತಿ, ತುಮ್ಹೇ ಏಕಂ ಮಗ್ಗಂ ಗಣ್ಹಥ, ವಿನಾ ಭವಿಸ್ಸಾಮಾ’’ತಿ ತಿಕ್ಖತ್ತುಂ ಪದಕ್ಖಿಣಂ ಕತ್ವಾ ಚತೂಸು ಠಾನೇಸು ಪಞ್ಚಪತಿಟ್ಠಿತೇನ ವನ್ದಿತ್ವಾ ದಸನಖಸಮೋಧಾನಸಮುಜ್ಜಲಂ ಅಞ್ಜಲಿಂ ಪಗ್ಗಯ್ಹ ‘‘ಸತಸಹಸ್ಸಕಪ್ಪಪರಿಮಾಣೇ ಅದ್ಧಾನೇ ಕತೋ ಮಿತ್ತಸನ್ಥವೋ ಅಜ್ಜ ಭಿಜ್ಜತೀ’’ತಿ ವತ್ವಾ ‘‘ತುಮ್ಹೇ ದಕ್ಖಿಣಜಾತಿಕಾ ನಾಮ, ತುಮ್ಹಾಕಂ ದಕ್ಖಿಣಮಗ್ಗೋ ವಟ್ಟತಿ, ಮಯಂ ಮಾತುಗಾಮಾ ನಾಮ ವಾಮಜಾತಿಕಾ, ಅಮ್ಹಾಕಂ ವಾಮಮಗ್ಗೋ ವಟ್ಟತೀ’’ತಿ ವನ್ದಿತ್ವಾ ಮಗ್ಗಂ ಪಟಿಪನ್ನಾ। ತೇಸಂ ದ್ವೇಧಾಭೂತಕಾಲೇ ಅಯಂ ಮಹಾಪಥವೀ ‘‘ಅಹಂ ಚಕ್ಕವಾಳಸಿನೇರುಪಬ್ಬತೇ ಧಾರೇತುಂ ಸಕ್ಕೋನ್ತೀಪಿ ತುಮ್ಹಾಕಂ ಗುಣೇ ಧಾರೇತುಂ ನ ಸಕ್ಕೋಮೀ’’ತಿ ವದನ್ತೀ ವಿಯ ವಿರವಮಾನಾ ಕಮ್ಪಿ, ಆಕಾಸೇ ಅಸನಿಸದ್ದೋ ವಿಯ ಪವತ್ತಿ, ಚಕ್ಕವಾಳಸಿನೇರುಪಬ್ಬತೋ ಉನ್ನದಿ।

ಸಮ್ಮಾಸಮ್ಬುದ್ಧೋ ವೇಳುವನಮಹಾವಿಹಾರೇ ಗನ್ಧಕುಟಿಯಂ ನಿಸಿನ್ನೋ ಪಥವೀಕಮ್ಪನಸದ್ದಂ ಸುತ್ವಾ ‘‘ಕಿಸ್ಸ ನು ಖೋ ಪಥವೀ ಕಮ್ಪತೀ’’ತಿ ಆವಜ್ಜೇನ್ತೋ ‘‘ಪಿಪ್ಪಲಿಮಾಣವೋ ಚ ಭದ್ದಾ ಚ ಕಾಪಿಲಾನೀ ಮಂ ಉದ್ದಿಸ್ಸ ಅಪ್ಪಮೇಯ್ಯಂ ಸಮ್ಪತ್ತಿಂ ಪಹಾಯ ಪಬ್ಬಜಿತಾ। ತೇಸಂ ವಿಯೋಗಟ್ಠಾನೇ ಉಭಿನ್ನಂ ಗುಣಬಲೇನ ಅಯಂ ಪಥವೀಕಮ್ಪೋ ಜಾತೋ। ಮಯಾಪಿ ಏತೇಸಂ ಸಙ್ಗಹಂ ಕಾತುಂ ವಟ್ಟತೀ’’ತಿ ಗನ್ಧಕುಟಿತೋ ನಿಕ್ಖಮ್ಮ ಸಯಮೇವ ಪತ್ತಚೀವರಮಾದಾಯ ಅಸೀತಿಮಹಾಥೇರೇಸು ಕಞ್ಚಿಪಿ ಅನಾಮನ್ತೇತ್ವಾ ತಿಗಾವುತಂ ಮಗ್ಗಂ ಪಚ್ಚುಗ್ಗಮನಂ ಕತ್ವಾ ರಾಜಗಹಸ್ಸ ಚ ನಾಲನ್ದಾಯ ಚ ಅನ್ತರೇ ಬಹುಪುತ್ತಕನಿಗ್ರೋಧರುಕ್ಖಮೂಲೇ ಪಲ್ಲಙ್ಕಂ ಆಭುಜಿತ್ವಾ ನಿಸೀದಿ। ನಿಸೀದನ್ತೋ ಪನ ಅಞ್ಞತರಪಂಸುಕೂಲಿಕೋ ವಿಯ ಅನಿಸೀದಿತ್ವಾ ಬುದ್ಧವೇಸಂ ಗಹೇತ್ವಾ ಅಸೀತಿಹತ್ಥಘನಬುದ್ಧರಸ್ಮಿಯೋ ವಿಸ್ಸಜ್ಜೇನ್ತೋ ನಿಸೀದಿ। ಇತಿ ತಸ್ಮಿಂ ಖಣೇ ಪಣ್ಣಚ್ಛತ್ತಸಕಟಚಕ್ಕಕೂಟಾಗಾರಾದಿಪ್ಪಮಾಣಾ ಬುದ್ಧರಸ್ಮಿಯೋ ಇತೋ ಚಿತೋ ಚ ವಿಪ್ಫರನ್ತಿಯೋ ವಿಧಾವನ್ತಿಯೋ ಚನ್ದಸಹಸ್ಸಸೂರಿಯಸಹಸ್ಸಉಗ್ಗಮನಕಾಲೋ ವಿಯ ಕುರುಮಾನಾ ತಂ ವನನ್ತಂ ಏಕೋಭಾಸಂ ಅಕಂಸು। ದ್ವತ್ತಿಂಸಮಹಾಪುರಿಸಲಕ್ಖಣಸಿರಿಯಾ ಸಮುಜ್ಜಲತಾರಾಗಣೇನ ವಿಯ ಗಗನಂ, ಸುಪುಪ್ಫಿತಕಮಲಕುವಲಯೇನ ವಿಯ ಸಲಿಲಂ, ವನನ್ತಂ ವಿರೋಚಿತ್ಥ। ನಿಗ್ರೋಧರುಕ್ಖಸ್ಸ ನಾಮ ಖನ್ಧೋ ಸೇತೋ ಹೋತಿ, ಪತ್ತಾನಿ ನೀಲಾನಿ, ಪಕ್ಕಾನಿ ರತ್ತಾನಿ। ತಸ್ಮಿಂ ಪನ ದಿವಸೇ ಸತಸಾಖೋ ನಿಗ್ರೋಧೋ ಸುವಣ್ಣವಣ್ಣೋವ ಅಹೋಸಿ।

ಮಹಾಕಸ್ಸಪತ್ಥೇರೋ ‘‘ಅಯಂ ಅಮ್ಹಾಕಂ ಸತ್ಥಾ ಭವಿಸ್ಸತಿ, ಇಮಂ ಅಹಂ ಉದ್ದಿಸ್ಸ ಪಬ್ಬಜಿತೋ’’ತಿ ದಿಟ್ಠಟ್ಠಾನತೋ ಪಟ್ಠಾಯ ಓಣತೋಣತೋವ ಗನ್ತ್ವಾ ತೀಸು ಠಾನೇಸು ವನ್ದಿತ್ವಾ ‘‘ಸತ್ಥಾ ಮೇ, ಭನ್ತೇ, ಭಗವಾ, ಸಾವಕೋಹಮಸ್ಮಿ, ಸತ್ಥಾ ಮೇ, ಭನ್ತೇ, ಭಗವಾ ಸಾವಕೋಹಮಸ್ಮೀ’’ತಿ (ಸಂ॰ ನಿ॰ ೨.೧೫೪) ಆಹ। ಅಥ ನಂ ಭಗವಾ ಆಹ ‘‘ಕಸ್ಸಪ, ಸಚೇ ತ್ವಂ ಇಮಂ ನಿಪಚ್ಚಕಾರಂ ಮಹಾಪಥವಿಯಾ ಕರೇಯ್ಯಾಸಿ, ಸಾಪಿ ಧಾರೇತುಂ ನ ಸಕ್ಕುಣೇಯ್ಯ। ತಥಾಗತಸ್ಸ ಏವಂ ಗುಣಮಹನ್ತತಂ ಜಾನತಾ ತಯಾ ಕತೋ ನಿಪಚ್ಚಕಾರೋ ಮಯ್ಹಂ, ಲೋಮಮ್ಪಿ ಚಾಲೇತುಂ ನ ಸಕ್ಕೋತಿ। ನಿಸೀದ, ಕಸ್ಸಪ, ದಾಯಜ್ಜಂ ತೇ ದಸ್ಸಾಮೀ’’ತಿ। ಅಥಸ್ಸ ಭಗವಾ ತೀಹಿ ಓವಾದೇಹಿ ಉಪಸಮ್ಪದಮದಾಸಿ। ದತ್ವಾ ಬಹುಪುತ್ತಕನಿಗ್ರೋಧಮೂಲತೋ ನಿಕ್ಖಮಿತ್ವಾ ಥೇರಂ ಪಚ್ಛಾಸಮಣಂ ಕತ್ವಾ ಮಗ್ಗಂ ಪಟಿಪಜ್ಜಿ। ಸತ್ಥು ಸರೀರಂ ದ್ವತ್ತಿಂಸಮಹಾಪುರಿಸಲಕ್ಖಣವಿಚಿತ್ತಂ, ಮಹಾಕಸ್ಸಪಸ್ಸ ಸರೀರಂ ಸತ್ತಮಹಾಪುರಿಸಲಕ್ಖಣಪಟಿಮಣ್ಡಿತಂ, ಸೋ ಕಞ್ಚನಮಹಾನಾವಾಯ ಪಚ್ಛಾಬದ್ಧೋ ವಿಯ ಸತ್ಥು ಪದಾನುಪದಿಕಂ ಅನುಗಚ್ಛಿ। ಸತ್ಥಾ ಥೋಕಂ ಮಗ್ಗಂ ಗನ್ತ್ವಾ ಮಗ್ಗಾ ಓಕ್ಕಮ್ಮ ಅಞ್ಞತರಸ್ಮಿಂ ರುಕ್ಖಮೂಲೇ ನಿಸಜ್ಜಾಕಾರಂ ದಸ್ಸೇಸಿ। ಥೇರೋ ‘‘ನಿಸೀದಿತುಕಾಮೋ ಸತ್ಥಾ’’ತಿ ಞತ್ವಾ ಅತ್ತನೋ ಪಾರುಪಿತಪಟಪಿಲೋತಿಕಸಙ್ಘಾಟಿಂ ಚತುಗ್ಗುಣಂ ಕತ್ವಾ ಪಞ್ಞಪೇಸಿ।

ಸತ್ಥಾ ತತ್ಥ ನಿಸೀದಿತ್ವಾ ಹತ್ಥೇನ ಚೀವರಂ ಪರಿಮಜ್ಜನ್ತೋ ‘‘ಮುದುಕಾ ಖೋ ತ್ಯಾಯಂ, ಕಸ್ಸಪ, ಪಟಪಿಲೋತಿಕಸಙ್ಘಾಟೀ’’ತಿ (ಸಂ॰ ನಿ॰ ೨.೧೫೪) ಆಹ। ಥೇರೋ ‘‘ಸತ್ಥಾ ಮಮ ಸಙ್ಘಾಟಿಯಾ ಮುದುಭಾವಂ ಕಥೇತಿ, ಪಾರುಪಿತುಕಾಮೋ ಭವಿಸ್ಸತೀ’’ತಿ ಞತ್ವಾ ‘‘ಪಾರುಪತು, ಭನ್ತೇ, ಭಗವಾ ಸಙ್ಘಾಟಿ’’ನ್ತಿ ಆಹ। ‘‘ತ್ವಂ ಕಿಂ ಪಾರುಪಿಸ್ಸಸಿ, ಕಸ್ಸಪಾ’’ತಿ? ‘‘ತುಮ್ಹಾಕಂ ನಿವಾಸನಂ ಲಭನ್ತೋ ಪಾರುಪಿಸ್ಸಾಮಿ, ಭನ್ತೇ’’ತಿ। ‘‘ಕಿಂ ಪನ ತ್ವಂ, ಕಸ್ಸಪ, ಇಮಂ ಪರಿಭೋಗಜಿಣ್ಣಂ ಪಂಸುಕೂಲಂ ಧಾರೇತುಂ ಸಕ್ಖಿಸ್ಸಸಿ? ಮಯಾ ಹಿ ಇಮಸ್ಸ ಪಂಸುಕೂಲಸ್ಸ ಗಹಿತದಿವಸೇ ಉದಕಪರಿಯನ್ತಂ ಕತ್ವಾ ಮಹಾಪಥವೀ ಕಮ್ಪಿ, ಇಮಂ ಬುದ್ಧಾನಂ ಪರಿಭೋಗಜಿಣ್ಣಚೀವರಂ ನಾಮ ನ ಸಕ್ಕಾ ಪರಿತ್ತಗುಣೇನ ಧಾರೇತುಂ, ಪಟಿಬಲೇನೇವಿದಂ ಪಟಿಪತ್ತಿಪೂರಣಸಮತ್ಥೇನ ಜಾತಿಪಂಸುಕೂಲಿಕೇನ ಧಾರೇತುಂ ವಟ್ಟತೀ’’ತಿ ವತ್ವಾ ಥೇರೇನ ಸದ್ಧಿಂ ಚೀವರಂ ಪರಿವತ್ತೇಸಿ।

ಏವಂ ಪನ ಚೀವರಪರಿವತ್ತನಂ ಕತ್ವಾ ಥೇರಸ್ಸ ಪಾರುತಚೀವರಂ ಭಗವಾ ಪಾರುಪಿ, ಸತ್ಥು ಚೀವರಂ ಥೇರೋ। ತಸ್ಮಿಂ ಸಮಯೇ ಅಚೇತನಾಪಿ ಅಯಂ ಮಹಾಪಥವೀ ‘‘ದುಕ್ಕರಂ, ಭನ್ತೇ, ಅಕತ್ಥ, ಅತ್ತನಾ ಪಾರುತಚೀವರಂ ಸಾವಕಸ್ಸ ದಿನ್ನಪುಬ್ಬೋ ನಾಮ ನತ್ಥಿ, ಅಹಂ ತುಮ್ಹಾಕಂ ಗುಣಂ ಧಾರೇತುಂ ನ ಸಕ್ಕೋಮೀ’’ತಿ ವದನ್ತೀ ವಿಯ ಉದಕಪರಿಯನ್ತಂ ಕತ್ವಾ ಕಮ್ಪಿ। ಥೇರೋಪಿ ‘‘ಲದ್ಧಂ ದಾನಿ ಮಯಾ ಬುದ್ಧಾನಂ ಪರಿಭೋಗಚೀವರಂ, ಕಿಂ ಮೇ ಇದಾನಿ ಉತ್ತರಿ ಕತ್ತಬ್ಬಂ ಅತ್ಥೀ’’ತಿ ಉನ್ನತಿಂ ಅಕತ್ವಾ ಬುದ್ಧಾನಂ ಸನ್ತಿಕೇಯೇವ ತೇರಸ ಧುತಗುಣೇ ಸಮಾದಾಯ ಸತ್ತದಿವಸಮತ್ತಂ ಪುಥುಜ್ಜನೋ ಅಹೋಸಿ, ಅಟ್ಠಮೇ ದಿವಸೇ ಸಹ ಪಟಿಸಮ್ಭಿದಾಹಿ ಅರಹತ್ತಂ ಪಾಪುಣಿ। ತೇನ ವುತ್ತಂ ಅಪದಾನೇ (ಅಪ॰ ಥೇರ ೧.೧.೩೯೮-೪೨೦) –

‘‘ಪದುಮುತ್ತರಸ್ಸ ಭಗವತೋ, ಲೋಕಜೇಟ್ಠಸ್ಸ ತಾದಿನೋ।

ನಿಬ್ಬುತೇ ಲೋಕನಾಥಮ್ಹಿ, ಪೂಜಂ ಕುಬ್ಬನ್ತಿ ಸತ್ಥುನೋ॥

‘‘ಉದಗ್ಗಚಿತ್ತಾ ಜನತಾ, ಆಮೋದಿತಪಮೋದಿತಾ।

ತೇಸು ಸಂವೇಗಜಾತೇಸು, ಪೀತಿ ಸೇ ಉದಪಜ್ಜಥ॥

‘‘ಞಾತಿಮಿತ್ತೇ ಸಮಾನೇತ್ವಾ, ಇದಂ ವಚನಮಬ್ರವಿಂ।

ಪರಿನಿಬ್ಬುತೋ ಮಹಾವೀರೋ, ಹನ್ದ ಪೂಜಂ ಕರೋಮಸೇ॥

‘‘ಸಾಧೂತಿ ತೇ ಪಟಿಸ್ಸುತ್ವಾ, ಭಿಯ್ಯೋ ಹಾಸಂ ಜನಿಂಸು ಮೇ।

ಬುದ್ಧಸ್ಮಿಂ ಲೋಕನಾಥಮ್ಹಿ, ಕಾಹಾಮ ಪುಞ್ಞಸಞ್ಚಯಂ॥

‘‘ಅಗ್ಘಿಯಂ ಸುಕತಂ ಕತ್ವಾ, ಸತಹತ್ಥಸಮುಗ್ಗತಂ।

ದಿಯಡ್ಢಹತ್ಥಪತ್ಥಟಂ, ವಿಮಾನಂ ನಭಮುಗ್ಗತಂ॥

‘‘ಕತ್ವಾನ ಹಮ್ಮಿಯಂ ತತ್ಥ, ತಾಲಪನ್ತೀಹಿ ಚಿತ್ತಿತಂ।

ಸಕಂ ಚಿತ್ತಂ ಪಸಾದೇತ್ವಾ, ಚೇತಿಯಂ ಪೂಜಯುತ್ತಮಂ॥

‘‘ಅಗ್ಗಿಕ್ಖನ್ಧೋವ ಜಲಿತೋ, ಕಿಂಸುಕೋ ಇವ ಫುಲ್ಲಿತೋ।

ಇನ್ದಲಟ್ಠೀವ ಆಕಾಸೇ, ಓಭಾಸೇತಿ ಚತುದ್ದಿಸಾ॥

‘‘ತತ್ಥ ಚಿತ್ತಂ ಪಸಾದೇತ್ವಾ, ಕತ್ವಾನ ಕುಸಲಂ ಬಹುಂ।

ಪುಬ್ಬಕಮ್ಮಂ ಸರಿತ್ವಾನ, ತಿದಸಂ ಉಪಪಜ್ಜಹಂ॥

‘‘ಸಹಸ್ಸಯುತ್ತಂ ಹಯವಾಹಿಂ, ದಿಬ್ಬಯಾನಮಧಿಟ್ಠಿತೋ।

ಉಬ್ಬಿದ್ಧಂ ಭವನಂ ಮಯ್ಹಂ, ಸತ್ತಭೂಮಂ ಸಮುಗ್ಗತಂ॥

‘‘ಕೂಟಾಗಾರಸಹಸ್ಸಾನಿ, ಸಬ್ಬಸೋಣ್ಣಮಯಾ ಅಹುಂ।

ಜಲನ್ತಿ ಸಕತೇಜೇನ, ದಿಸಾ ಸಬ್ಬಾ ಪಭಾಸಯಂ॥

‘‘ಸನ್ತಿ ಅಞ್ಞೇಪಿ ನಿಯ್ಯೂಹಾ, ಲೋಹಿತಙ್ಗಮಯಾ ತದಾ।

ತೇಪಿ ಜೋತನ್ತಿ ಆಭಾಯ, ಸಮನ್ತಾ ಚತುರೋ ದಿಸಾ॥

‘‘ಪುಞ್ಞಕಮ್ಮಾಭಿನಿಬ್ಬತ್ತಾ, ಕೂಟಾಗಾರಾ ಸುನಿಮ್ಮಿತಾ।

ಮಣಿಮಯಾಪಿ ಜೋತನ್ತಿ, ದಿಸಾ ದಸ ಸಮನ್ತತೋ॥

‘‘ತೇಸಂ ಉಜ್ಜೋತಮಾನಾನಂ, ಓಭಾಸೋ ವಿಪುಲೋ ಅಹು।

ಸಬ್ಬೇ ದೇವೇ ಅಭಿಭೋಮಿ, ಪುಞ್ಞಕಮ್ಮಸ್ಸಿದಂ ಫಲಂ॥

‘‘ಸಟ್ಠಿಕಪ್ಪಸಹಸ್ಸಮ್ಹಿ, ಉಬ್ಬಿದ್ಧೋ ನಾಮ ಖತ್ತಿಯೋ।

ಚಾತುರನ್ತೋ ವಿಜಿತಾವೀ, ಪಥವಿಂ ಆವಸಿಂ ಅಹಂ॥

‘‘ತಥೇವ ಭದ್ದಕೇ ಕಪ್ಪೇ, ತಿಂಸಕ್ಖತ್ತುಂ ಅಹೋಸಹಂ।

ಸಕಕಮ್ಮಾಭಿರದ್ಧೋಮ್ಹಿ, ಚಕ್ಕವತ್ತೀ ಮಹಬ್ಬಲೋ॥

‘‘ಸತ್ತರತನಸಮ್ಪನ್ನೋ, ಚತುದೀಪಮ್ಹಿ ಇಸ್ಸರೋ।

ತತ್ಥಾಪಿ ಭವನಂ ಮಯ್ಹಂ, ಇನ್ದಲಟ್ಠೀವ ಉಗ್ಗತಂ॥

‘‘ಆಯಾಮತೋ ಚತುಬ್ಬೀಸಂ, ವಿತ್ಥಾರೇನ ಚ ದ್ವಾದಸ।

ರಮ್ಮಣಂ ನಾಮ ನಗರಂ, ದಳ್ಹಪಾಕಾರತೋರಣಂ॥

‘‘ಆಯಾಮತೋ ಪಞ್ಚಸತಂ, ವಿತ್ಥಾರೇನ ತದಡ್ಢಕಂ।

ಆಕಿಣ್ಣಂ ಜನಕಾಯೇಹಿ, ತಿದಸಾನಂ ಪುರಂ ವಿಯ॥

‘‘ಯಥಾ ಸೂಚಿಘರೇ ಸೂಚೀ, ಪಕ್ಖಿತ್ತಾ ಪಣ್ಣವೀಸತಿ।

ಅಞ್ಞಮಞ್ಞಂ ಪಘಟ್ಟೇನ್ತಿ, ಆಕಿಣ್ಣಂ ಹೋತಿ ಲಙ್ಕತಂ॥

‘‘ಏವಮ್ಪಿ ನಗರಂ ಮಯ್ಹಂ, ಹತ್ಥಿಸ್ಸರಥಸಂಕುಲಂ।

ಮನುಸ್ಸೇಹಿ ಸದಾಕಿಣ್ಣಂ, ರಮ್ಮಣಂ ನಗರುತ್ತಮಂ॥

‘‘ತತ್ಥ ಭುತ್ವಾ ಪಿವಿತ್ವಾ ಚ, ಪುನ ದೇವತ್ತನಂ ಗತೋ।

ಭವೇ ಪಚ್ಛಿಮಕೇ ಮಯ್ಹಂ, ಅಹೋಸಿ ಕುಲಸಮ್ಪದಾ॥

‘‘ಬ್ರಹ್ಮಞ್ಞಕುಲಸಮ್ಭೂತೋ, ಮಹಾರತನಸಞ್ಚಯೋ।

ಅಸೀತಿಕೋಟಿಯೋ ಹಿತ್ವಾ, ಹಿರಞ್ಞಸ್ಸಾಪಿ ಪಬ್ಬಜಿಂ॥

‘‘ಪಟಿಸಮ್ಭಿದಾ ಚತಸ್ಸೋ…ಪೇ॰… ಕತಂ ಬುದ್ಧಸ್ಸ ಸಾಸನ’’ನ್ತಿ॥

ಅಥ ನಂ ಸತ್ಥಾ ‘‘ಕಸ್ಸಪೋ, ಭಿಕ್ಖವೇ, ಚನ್ದೂಪಮೋ ಕುಲಾನಿ ಉಪಸಙ್ಕಮತಿ ಅಪಕಸ್ಸೇವ ಕಾಯಂ, ಅಪಕಸ್ಸ ಚಿತ್ತಂ, ನಿಚ್ಚನವಕೋ ಕುಲೇಸು ಅಪ್ಪಗಬ್ಭೋ’’ತಿ ಏವಮಾದಿನಾ (ಸಂ॰ ನಿ॰ ೨.೧೪೬) ಪಸಂಸಿತ್ವಾ ಅಪರಭಾಗೇ ಅರಿಯಗಣಮಜ್ಝೇ ನಿಸಿನ್ನೋ ‘‘ಏತದಗ್ಗಂ, ಭಿಕ್ಖವೇ, ಮಮ ಸಾವಕಾನಂ ಭಿಕ್ಖೂನಂ ಧುತವಾದಾನಂ ಯದಿದಂ ಮಹಾಕಸ್ಸಪೋ’’ತಿ (ಅ॰ ನಿ॰ ೧.೧೮೮, ೧೯೧) ಧುತಙ್ಗಧರಾನಂ ಅಗ್ಗಟ್ಠಾನೇ ಠಪೇಸಿ। ಸೋ ವಿವೇಕಾಭಿರತಿಕಿತ್ತನಮುಖೇನ ಭಿಕ್ಖೂನಂ ಓವಾದಂ ದೇನ್ತೋ ಅತ್ತನೋ ಪಟಿಪತ್ತಿಂ ಪಕಾಸೇನ್ತೋ –

೧೦೫೪.

‘‘ನ ಗಣೇನ ಪುರಕ್ಖತೋ ಚರೇ, ವಿಮನೋ ಹೋತಿ ಸಮಾಧಿ ದುಲ್ಲಭೋ।

ನಾನಾಜನಸಙ್ಗಹೋ ದುಖೋ, ಇತಿ ದಿಸ್ವಾನ ಗಣಂ ನ ರೋಚಯೇ॥

೧೦೫೫.

‘‘ನ ಕುಲಾನಿ ಉಪಬ್ಬಜೇ ಮುನಿ, ವಿಮನೋ ಹೋತಿ ಸಮಾಧಿ ದುಲ್ಲಭೋ।

ಸೋ ಉಸ್ಸುಕ್ಕೋ ರಸಾನುಗಿದ್ಧೋ, ಅತ್ಥಂ ರಿಞ್ಚತಿ ಯೋ ಸುಖಾವಹೋ॥

೧೦೫೬.

‘‘ಪಙ್ಕೋತಿ ಹಿ ನಂ ಅವೇದಯುಂ, ಯಾಯಂ ವನ್ದನಪೂಜನಾ ಕುಲೇಸು।

ಸುಖುಮಂ ಸಲ್ಲಂ ದುರುಬ್ಬಹಂ, ಸಕ್ಕಾರೋ ಕಾಪುರಿಸೇನ ದುಜ್ಜಹೋ॥

೧೦೫೭.

‘‘ಸೇನಾಸನಮ್ಹಾ ಓರುಯ್ಹ, ನಗರಂ ಪಿಣ್ಡಾಯ ಪಾವಿಸಿಂ।

ಭುಞ್ಜನ್ತಂ ಪುರಿಸಂ ಕುಟ್ಠಿಂ, ಸಕ್ಕಚ್ಚಂ ತಂ ಉಪಟ್ಠಹಿಂ॥

೧೦೫೮.

‘‘ಸೋ ಮೇ ಪಕ್ಕೇನ ಹತ್ಥೇನ, ಆಲೋಪಂ ಉಪನಾಮಯಿ।

ಆಲೋಪಂ ಪಕ್ಖಿಪನ್ತಸ್ಸ, ಅಙ್ಗುಲಿ ಚೇತ್ಥ ಛಿಜ್ಜಥ॥

೧೦೫೯.

‘‘ಕುಟ್ಟಮೂಲಞ್ಚ ನಿಸ್ಸಾಯ, ಆಲೋಪಂ ತಂ ಅಭುಞ್ಜಿಸಂ।

ಭುಞ್ಜಮಾನೇ ವಾ ಭುತ್ತೇ ವಾ, ಜೇಗುಚ್ಛಂ ಮೇ ನ ವಿಜ್ಜತಿ॥

೧೦೬೦.

‘‘ಉತ್ತಿಟ್ಠಪಿಣ್ಡೋ ಆಹಾರೋ, ಪೂತಿಮುತ್ತಞ್ಚ ಓಸಧಂ।

ಸೇನಾಸನಂ ರುಕ್ಖಮೂಲಂ, ಪಂಸುಕೂಲಞ್ಚ ಚೀವರಂ।

ಯಸ್ಸೇತೇ ಅಭಿಸಮ್ಭುತ್ವಾ, ಸ ವೇ ಚಾತುದ್ದಿಸೋ ನರೋ॥

೧೦೬೧.

‘‘ಯತ್ಥ ಏಕೇ ವಿಹಞ್ಞನ್ತಿ, ಆರುಹನ್ತಾ ಸಿಲುಚ್ಚಯಂ।

ತತ್ಥ ಬುದ್ಧಸ್ಸ ದಾಯಾದೋ, ಸಮ್ಪಜಾನೋ ಪಟಿಸ್ಸತೋ।

ಇದ್ಧಿಬಲೇನುಪತ್ಥದ್ಧೋ, ಕಸ್ಸಪೋ ಅಭಿರೂಹತಿ॥

೧೦೬೨.

‘‘ಪಿಣ್ಡಪಾತಪಟಿಕ್ಕನ್ತೋ, ಸೇಲಮಾರುಯ್ಹ ಕಸ್ಸಪೋ।

ಝಾಯತಿ ಅನುಪಾದಾನೋ, ಪಹೀನಭಯಭೇರವೋ॥

೧೦೬೩.

‘‘ಪಿಣ್ಡಪಾತಪಟಿಕ್ಕನ್ತೋ, ಸೇಲಮಾರುಯ್ಹ ಕಸ್ಸಪೋ।

ಝಾಯತಿ ಅನುಪಾದಾನೋ, ಡಯ್ಹಮಾನೇಸು ನಿಬ್ಬುತೋ॥

೧೦೬೪.

‘‘ಪಿಣ್ಡಪಾತಪಟಿಕ್ಕನ್ತೋ, ಸೇಲಮಾರುಯ್ಹ ಕಸ್ಸಪೋ।

ಝಾಯತಿ ಅನುಪಾದಾನೋ, ಕತಕಿಚ್ಚೋ ಅನಾಸವೋ॥

೧೦೬೫.

‘‘ಕರೇರಿಮಾಲಾವಿತತಾ, ಭೂಮಿಭಾಗಾ ಮನೋರಮಾ।

ಕುಞ್ಜರಾಭಿರುದಾ ರಮ್ಮಾ, ತೇ ಸೇಲಾ ರಮಯನ್ತಿ ಮಂ॥

೧೦೬೬.

‘‘ನೀಲಬ್ಭವಣ್ಣಾ ರುಚಿರಾ, ವಾರಿಸೀತಾ ಸುಚಿನ್ಧರಾ।

ಇನ್ದಗೋಪಕಸಞ್ಛನ್ನಾ, ತೇ ಸೇಲಾ ರಮಯನ್ತಿ ಮಂ॥

೧೦೬೭.

‘‘ನೀಲಬ್ಭಕೂಟಸದಿಸಾ, ಕೂಟಾಗಾರವರೂಪಮಾ।

ವಾರಣಾಭಿರುದಾ ರಮ್ಮಾ, ತೇ ಸೇಲಾ ರಮಯನ್ತಿ ಮಂ॥

೧೦೬೮.

‘‘ಅಭಿವುಟ್ಠಾ ರಮ್ಮತಲಾ, ನಗಾ ಇಸಿಭಿ ಸೇವಿತಾ।

ಅಬ್ಭುನ್ನದಿತಾ ಸಿಖೀಹಿ, ತೇ ಸೇಲಾ ರಮಯನ್ತಿ ಮಂ॥

೧೦೬೯.

‘‘ಅಲಂ ಝಾಯಿತುಕಾಮಸ್ಸ, ಪಹಿತತ್ತಸ್ಸ ಮೇ ಸತೋ।

ಅಲಂ ಮೇ ಅತ್ಥಕಾಮಸ್ಸ, ಪಹಿತತ್ತಸ್ಸ ಭಿಕ್ಖುನೋ॥

೧೦೭೦.

‘‘ಅಲಂ ಮೇ ಫಾಸುಕಾಮಸ್ಸ, ಪಹಿತತ್ತಸ್ಸ ಭಿಕ್ಖುನೋ।

ಅಲಂ ಮೇ ಯೋಗಕಾಮಸ್ಸ, ಪಹಿತತ್ತಸ್ಸ ತಾದಿನೋ॥

೧೦೭೧.

‘‘ಉಮಾಪುಪ್ಫೇನ ಸಮಾನಾ, ಗಗನಾವಬ್ಭಛಾದಿತಾ।

ನಾನಾದಿಜಗಣಾಕಿಣ್ಣಾ, ತೇ ಸೇಲಾ ರಮಯನ್ತಿ ಮಂ॥

೧೦೭೨.

‘‘ಅನಾಕಿಣ್ಣಾ ಗಹಟ್ಠೇಹಿ, ಮಿಗಸಙ್ಘನಿಸೇವಿತಾ।

ನಾನಾದಿಜಗಣಾಕಿಣ್ಣಾ, ತೇ ಸೇಲಾ ರಮಯನ್ತಿ ಮಂ॥

೧೦೭೩.

‘‘ಅಚ್ಛೋದಿಕಾ ಪುಥುಸಿಲಾ, ಗೋನಙ್ಗುಲಮಿಗಾಯುತಾ।

ಅಮ್ಬುಸೇವಾಲಸಞ್ಛನ್ನಾ, ತೇ ಸೇಲಾ ರಮಯನ್ತಿ ಮಂ॥

೧೦೭೪.

‘‘ನ ಪಞ್ಚಙ್ಗಿಕೇನ ತೂರಿಯೇನ, ರತಿ ಮೇ ಹೋತಿ ತಾದಿಸೀ।

ಯಥಾ ಏಕಗ್ಗಚಿತ್ತಸ್ಸ, ಸಮ್ಮಾ ಧಮ್ಮಂ ವಿಪಸ್ಸತೋ॥

೧೦೭೫.

‘‘ಕಮ್ಮಂ ಬಹುಕಂ ನ ಕಾರಯೇ, ಪರಿವಜ್ಜೇಯ್ಯ ಜನಂ ನ ಉಯ್ಯಮೇ।

ಉಸ್ಸುಕ್ಕೋ ಸೋ ರಸಾನುಗಿದ್ಧೋ, ಅತ್ಥಂ ರಿಞ್ಚತಿ ಯೋ ಸುಖಾವಹೋ॥

೧೦೭೬.

‘‘ಕಮ್ಮಂ ಬಹುಕಂ ನ ಕಾರಯೇ, ಪರಿವಜ್ಜೇಯ್ಯ ಅನತ್ತನೇಯ್ಯಮೇತಂ।

ಕಿಚ್ಛತಿ ಕಾಯೋ ಕಿಲಮತಿ, ದುಕ್ಖಿತೋ ಸೋ ಸಮಥಂ ನ ವಿನ್ದತಿ॥

೧೦೭೭.

‘‘ಓಟ್ಠಪ್ಪಹತಮತ್ತೇನ, ಅತ್ತಾನಮ್ಪಿ ನ ಪಸ್ಸತಿ।

ಪತ್ಥದ್ಧಗೀವೋ ಚರತಿ, ಅಹಂ ಸೇಯ್ಯೋತಿ ಮಞ್ಞತಿ॥

೧೦೭೮.

‘‘ಅಸೇಯ್ಯೋ ಸೇಯ್ಯಸಮಾನಂ, ಬಾಲೋ ಮಞ್ಞತಿ ಅತ್ತಾನಂ।

ನ ತಂ ವಿಞ್ಞೂ ಪಸಂಸನ್ತಿ, ಪತ್ಥದ್ಧಮಾನಸಂ ನರಂ॥

೧೦೭೯.

‘‘ಯೋ ಚ ಸೇಯ್ಯೋಹಮಸ್ಮೀತಿ, ನಾಹಂ ಸೇಯ್ಯೋತಿ ವಾ ಪನ।

ಹೀನೋ ತಂಸದಿಸೋ ವಾತಿ, ವಿಧಾಸು ನ ವಿಕಮ್ಪತಿ॥

೧೦೮೦.

‘‘ಪಞ್ಞವನ್ತಂ ತಥಾ ತಾದಿಂ, ಸೀಲೇಸು ಸುಸಮಾಹಿತಂ।

ಚೇತೋಸಮಥಮನುಯುತ್ತಂ, ತಞ್ಚೇ ವಿಞ್ಞೂ ಪಸಂಸರೇ॥

೧೦೮೧.

‘‘ಯಸ್ಸ ಸಬ್ರಹ್ಮಚಾರೀಸು, ಗಾರವೋ ನೂಪಲಬ್ಭತಿ।

ಆರಕಾ ಹೋತಿ ಸದ್ಧಮ್ಮಾ, ನಭತೋ ಪುಥವೀ ಯಥಾ॥

೧೦೮೨.

‘‘ಯೇಸಞ್ಚ ಹಿರಿ ಓತ್ತಪ್ಪಂ, ಸದಾ ಸಮ್ಮಾ ಉಪಟ್ಠಿತಂ।

ವಿರೂಳ್ಹಬ್ರಹ್ಮಚರಿಯಾ ತೇ, ತೇಸಂ ಖೀಣಾ ಪುನಬ್ಭವಾ॥

೧೦೮೩.

‘‘ಉದ್ಧತೋ ಚಪಲೋ ಭಿಕ್ಖು, ಪಂಸುಕೂಲೇನ ಪಾರುತೋ।

ಕಪೀವ ಸೀಹಚಮ್ಮೇನ, ನ ಸೋ ತೇನುಪಸೋಭತಿ॥

೧೦೮೪.

‘‘ಅನುದ್ಧತೋ ಅಚಪಲೋ, ನಿಪಕೋ ಸಂವುತಿನ್ದ್ರಿಯೋ।

ಸೋಭತಿ ಪಂಸುಕೂಲೇನ, ಸೀಹೋವ ಗಿರಿಗಬ್ಭರೇ॥

೧೦೮೫.

‘‘ಏತೇ ಸಮ್ಬಹುಲಾ ದೇವಾ, ಇದ್ಧಿಮನ್ತೋ ಯಸಸ್ಸಿನೋ।

ದಸದೇವಸಹಸ್ಸಾನಿ, ಸಬ್ಬೇ ತೇ ಬ್ರಹ್ಮಕಾಯಿಕಾ॥

೧೦೮೬.

‘‘ಧಮ್ಮಸೇನಾಪತಿಂ ವೀರಂ, ಮಹಾಝಾಯಿಂ ಸಮಾಹಿತಂ।

ಸಾರಿಪುತ್ತಂ ನಮಸ್ಸನ್ತಾ, ತಿಟ್ಠನ್ತಿ ಪಞ್ಜಲೀಕತಾ॥

೧೦೮೭.

‘‘ನಮೋ ತೇ ಪುರಿಸಾಜಞ್ಞ, ನಮೋ ತೇ ಪುರಿಸುತ್ತಮ।

ಯಸ್ಸ ತೇ ನಾಭಿಜಾನಾಮ, ಯಮ್ಪಿ ನಿಸ್ಸಾಯ ಝಾಯತಿ॥

೧೦೮೮.

‘‘ಅಚ್ಛೇರಂ ವತ ಬುದ್ಧಾನಂ, ಗಮ್ಭೀರೋ ಗೋಚರೋ ಸಕೋ।

ಯೇ ಮಯಂ ನಾಭಿಜಾನಾಮ, ವಾಲವೇಧಿಸಮಾಗತಾ॥

೧೦೮೯.

‘‘ತಂ ತಥಾ ದೇವಕಾಯೇಹಿ, ಪೂಜಿತಂ ಪೂಜನಾರಹಂ।

ಸಾರಿಪುತ್ತಂ ತದಾ ದಿಸ್ವಾ, ಕಪ್ಪಿನಸ್ಸ ಸಿತಂ ಅಹು॥

೧೦೯೦.

‘‘ಯಾವತಾ ಬುದ್ಧಖೇತ್ತಮ್ಹಿ, ಠಪಯಿತ್ವಾ ಮಹಾಮುನಿಂ।

ಧುತಗುಣೇ ವಿಸಿಟ್ಠೋಹಂ, ಸದಿಸೋ ಮೇ ನ ವಿಜ್ಜತಿ॥

೧೦೯೧.

‘‘ಪರಿಚಿಣ್ಣೋ ಮಯಾ ಸತ್ಥಾ, ಕತಂ ಬುದ್ಧಸ್ಸ ಸಾಸನಂ।

ಓಹಿತೋ ಗರುಕೋ ಭಾರೋ, ನತ್ಥಿ ದಾನಿ ಪುನಬ್ಭವೋ॥

೧೦೯೨.

‘‘ನ ಚೀವರೇ ನ ಸಯನೇ, ಭೋಜನೇ ನುಪಲಿಮ್ಪತಿ।

ಗೋತಮೋ ಅನಪ್ಪಮೇಯ್ಯೋ, ಮೂಳಾಲಪುಪ್ಫಂ ವಿಮಲಂವ।

ಅಮ್ಬುನಾ ನೇಕ್ಖಮ್ಮನಿನ್ನೋ, ತಿಭವಾಭಿನಿಸ್ಸಟೋ॥

೧೦೯೩.

‘‘ಸತಿಪಟ್ಠಾನಗೀವೋ ಸೋ, ಸದ್ಧಾಹತ್ಥೋ ಮಹಾಮುನಿ।

ಪಞ್ಞಾಸೀಸೋ ಮಹಾಞಾಣೀ, ಸದಾ ಚರತಿ ನಿಬ್ಬುತೋ’’ತಿ॥ –

ಇಮಾ ಗಾಥಾ ಅಭಾಸಿ। ತತ್ಥ ಆದಿತೋ ತಿಸ್ಸೋ ಗಾಥಾ ಗಣೇಸು ಕುಲೇಸು ಚ ಸಂಸಟ್ಠೇ ಭಿಕ್ಖೂ ದಿಸ್ವಾ ತೇಸಂ ಓವಾದದಾನವಸೇನ ವುತ್ತಾ।

ತತ್ಥ ನ ಗಣೇನ ಪುರಕ್ಖತೋ ಚರೇತಿ ಭಿಕ್ಖುಗಣೇಹಿ ಪುರಕ್ಖತೋ ಪರಿವಾರಿತೋ ಹುತ್ವಾ ನ ಚರೇಯ್ಯ ನ ವಿಹರೇಯ್ಯ। ಕಸ್ಮಾ? ವಿಮನೋ ಹೋತಿ ಸಮಾಧಿ ದುಲ್ಲಭೋ ಗಣಂ ಪರಿಹರನ್ತಸ್ಸ ದುಕ್ಖುಪ್ಪತ್ತಿಯಾ ಬ್ಯಾಕುಲಮನತಾಯ, ಉದ್ದೇಸೇನ ಓವಾದೇನ ಅನುಸಾಸನಿಯಾ ಅನುಗ್ಗಹಂ ಕರೋನ್ತೋ ಯಥಾನುಸಿಟ್ಠಂ ಅಪ್ಪಟಿಪತ್ತಿಯಾ ಚ ವಿಮನೋ ವಿಕಾರಿಭೂತಚಿತ್ತೋ ಹೋತಿ, ತತೋ ಸಂಸಗ್ಗೇನ ಏಕಗ್ಗತಂ ಅಲಭನ್ತಸ್ಸ ಸಮಾಧಿ ದುಲ್ಲಭೋ ಹೋತಿ। ತಥಾರೂಪಸ್ಸ ಹಿ ಉಪಚಾರಸಮಾಧಿಮತ್ತಮ್ಪಿ ನ ಇಜ್ಝತಿ, ಪಗೇವ ಇತರೋ। ನಾನಾಜನಸಙ್ಗಹೋತಿ ನಾನಜ್ಝಾಸಯಸ್ಸ ನಾನಾರುಚಿಕಸ್ಸ ಜನಸ್ಸ ಪೇಯ್ಯಖಜ್ಜಾದಿನಾ ಸಙ್ಗಹೋ। ದುಖೋತಿ ಕಿಚ್ಛೋ ಕಸಿರೋ। ಇತಿ ದಿಸ್ವಾನಾತಿ ಏವಂ ಗಣಸಙ್ಗಹೇ ಬಹುವಿಧಂ ಆದೀನವಂ ದಿಸ್ವಾ ಞಾಣಚಕ್ಖುನಾ ಓಲೋಕೇತ್ವಾ। ಗಣಂ ಗಣವಾಸಂ ನ ರೋಚಯೇ ನ ರೋಚೇಯ್ಯ ನ ಇಚ್ಛೇಯ್ಯ।

ನ ಕುಲಾನಿ ಉಪಬ್ಬಜೇ ಮುನೀತಿ ಇಮಸ್ಮಿಂ ಸಾಸನೇ ಪಬ್ಬಜಿತೋ ಖತ್ತಿಯಾದಿಕುಲೂಪಕೋ ಹುತ್ವಾ ನ ಉಪಗಚ್ಛೇಯ್ಯ। ಕಿಂಕಾರಣಾ? ವಿಮನೋ ಹೋತಿ ಸಮಾಧಿ ದುಲ್ಲಭೋ। ಸೋ ಉಸ್ಸುಕ್ಕೋ ಕುಲೂಪಸಙ್ಕಮನೇ ಉಸ್ಸುಕ್ಕಂ ಆಪನ್ನೋ ಕುಲೇಸು ಲದ್ಧಬ್ಬೇಸು ಮಧುರಾದಿರಸೇಸು ಅನುಗಿದ್ಧೋ ಗೇಧಂ ಆಪನ್ನೋ ತತ್ಥ ಉಪ್ಪನ್ನೇಸು ಕಿಚ್ಚಕರಣೀಯೇಸು ಅತ್ತನಾವ ಯೋಗಂ ಆಪಜ್ಜನ್ತೋ। ಅತ್ಥಂ ರಿಞ್ಚತಿ ಯೋ ಸುಖಾವಹೋತಿ ಯೋ ಅತ್ತನೋ ಮಗ್ಗಫಲನಿಬ್ಬಾನಸುಖಾವಹೋ ತಂ ಸೀಲವಿಸುದ್ಧಿಆದಿಸಙ್ಖಾತಂ ಅತ್ಥಂ ರಿಞ್ಚತಿ ಜಹತಿ, ನಾನುಯುಞ್ಜತೀತಿ ಅತ್ಥೋ।

ತತಿಯಗಾಥಾ ಹೇಟ್ಠಾ ವುತ್ತಾ ಏವ।

ಸೇನಾಸನಮ್ಹಾ ಓರುಯ್ಹಾತಿಆದಿಕಾ ಚತಸ್ಸೋ ಗಾಥಾ ಪಚ್ಚಯೇಸು ಅತ್ತನೋ ಸನ್ತೋಸದಸ್ಸನಮುಖೇನ ‘‘ಭಿಕ್ಖುನಾ ನಾಮ ಏವಂ ಪಟಿಪಜ್ಜಿತಬ್ಬ’’ನ್ತಿ ಭಿಕ್ಖೂನಂ ಓವಾದದಾನವಸೇನ ವುತ್ತಾ। ತತ್ಥ ಸೇನಾಸನಮ್ಹಾ ಓರುಯ್ಹಾತಿ ಪಬ್ಬತಸೇನಾಸನತ್ತಾ ವುತ್ತಂ। ಸಕ್ಕಚ್ಚಂ ತಂ ಉಪಟ್ಠಹಿನ್ತಿ ತಂ ಕುಟ್ಠಿಪುರಿಸಂ ಉಳಾರಸಮ್ಪತ್ತಿಂ ಪಾಪೇತುಕಾಮತಾಯ ಭಿಕ್ಖಾಯ ಅತ್ಥಿಕೋ ಹುತ್ವಾ ಪಣೀತಭಿಕ್ಖದಾಯಕಂ ಕುಲಂ ಮಹಿಚ್ಛಪುಗ್ಗಲೋ ವಿಯ ಆದರೇನ ಉಪಗನ್ತ್ವಾ ಅಟ್ಠಾಸಿಂ।

ಪಕ್ಕೇನಾತಿ ಅಟ್ಠಿಗತಕುಟ್ಠರೋಗತಾಯ ಉಪಕ್ಕೇನ ಕುಥಿತೇನ। ಅಙ್ಗುಲಿ ಚೇತ್ಥ ಛಿಜ್ಜಥಾತಿ ಏತ್ಥ ಪತ್ತೇ ತಸ್ಸ ಅಙ್ಗುಲಿ ಛಿಜ್ಜಿತ್ವಾ ಆಹಾರೇನ ಸದ್ಧಿಂ ಪತತೀತಿ ಅತ್ಥೋ।

ಕುಟ್ಟಮೂಲಂ ನಿಸ್ಸಾಯಾತಿ ತಸ್ಸ ಪುರಿಸಸ್ಸ ಪಸಾದಜನನತ್ಥಂ ತಾದಿಸೇ ಘರಭಿತ್ತಿಸಮೀಪೇ ನಿಸೀದಿತ್ವಾ ಆಲೋಪಂ ತಂ ಅಭುಞ್ಜಿಸಂ ಪರಿಭುಞ್ಜಿಂ। ಅಯಂ ಪನ ಥೇರಸ್ಸ ಪಟಿಪತ್ತಿ ಸಿಕ್ಖಾಪದೇ ಅಪಞ್ಞತ್ತೇತಿ ದಟ್ಠಬ್ಬಂ। ಪಟಿಕ್ಕೂಲೇ ಚ ಅಪ್ಪಟಿಕ್ಕೂಲೇ ಇವ ಅಪ್ಪಟಿಕ್ಕೂಲಸಞ್ಞಿತಾಯ ಅರಿಯಿದ್ಧಿಯಾ ಉಕ್ಕಂಸಗತತ್ತಾ ಥೇರಸ್ಸ ತಂ ಅಜ್ಝೋಹರನ್ತಸ್ಸ ಜಿಗುಚ್ಛಾ ನ ಉಪ್ಪಜ್ಜಿ, ಪುಥುಜ್ಜನಸ್ಸ ಪನ ತಾದಿಸಂ ಭುಞ್ಜನ್ತಸ್ಸ ಅನ್ತಾನಿ ನಿಕ್ಖಮೇಯ್ಯುಂ। ತೇನಾಹ ‘‘ಭುಞ್ಜಮಾನೇ ವಾ ಭುತ್ತೇ ವಾ, ಜೇಗುಚ್ಛಂ ಮೇ ನ ವಿಜ್ಜತೀ’’ತಿ।

ಉತ್ತಿಟ್ಠಪಿಣ್ಡೋತಿ ಉತ್ತಿಟ್ಠಿತ್ವಾ ಪರೇಸಂ ಘರದ್ವಾರೇ ಠತ್ವಾ ಗಹೇತಬ್ಬಪಿಣ್ಡೋ, ಜಙ್ಘಬಲಂ ನಿಸ್ಸಾಯ ಅನುಘರಂ ಗನ್ತ್ವಾ ಲದ್ಧಬ್ಬಮಿಸ್ಸಕಭಿಕ್ಖಾತಿ ಅತ್ಥೋ। ಪೂತಿಮುತ್ತನ್ತಿ ಗೋಮುತ್ತಪರಿಭಾವಿತಹರೀಟಕಾದಿ ಚ। ಯಸ್ಸೇತೇ ಅಭಿಸಮ್ಭುತ್ವಾತಿ, ಯೋ ಭಿಕ್ಖು ಏತೇ ಉತ್ತಿಟ್ಠಪಿಣ್ಡಾದಯೋ ಚತ್ತಾರೋ ಪಚ್ಚಯೇ ಅನ್ತಿಮನ್ತೇನ ಅಭಿರಮಿತ್ವಾ ಪರಿಭುಞ್ಜತಿ। ಸ ವೇ ಚಾತುದ್ದಿಸೋ ನರೋತಿ ಸೋ ಪುಗ್ಗಲೋ ಏಕಂಸೇನ ಚಾತುದ್ದಿಸೋ ಪುರತ್ಥಿಮಾದಿಚತುದಿಸಾಯೋಗ್ಯೋ, ಕತ್ಥಚಿ ಅಪ್ಪಟಿಘೋ ಯಾಯ ಕಾಯಚಿ ದಿಸಾಯ ವಿಹರಿತುಂ ಸಕ್ಕೋತೀತಿ ಅತ್ಥೋ।

ಅಥ ಥೇರೋ ಅತ್ತನೋ ಮಹಲ್ಲಕಕಾಲೇ ಮನುಸ್ಸೇಹಿ ‘‘ಕಥಂ, ಭನ್ತೇ, ತುಮ್ಹೇ ಏವರೂಪಾಯ ಜರಾಯ ವತ್ತಮಾನಾಯ ದಿನೇ ದಿನೇ ಪಬ್ಬತಂ ಅಭಿರುಹಥಾ’’ತಿ ವುತ್ತೇ ‘‘ಯತ್ಥ ಏಕೇ’’ತಿಆದಿಕಾ ಚತಸ್ಸೋ ಗಾಥಾ ಅಭಾಸಿ। ತತ್ಥ ಯತ್ಥಾತಿ ಯಸ್ಮಿಂ ಪಚ್ಛಿಮವಯೇ। ಏಕೇತಿ ಏಕಚ್ಚೇ। ವಿಹಞ್ಞನ್ತೀತಿ ಸರೀರಕಿಲಮಥೇನ ಚಿತ್ತೇನ ವಿಘಾತಂ ಆಪಜ್ಜನ್ತಿ। ಸಿಲುಚ್ಚಯನ್ತಿ ಪಬ್ಬತಂ। ತತ್ಥಾತಿ ತಸ್ಮಿಂ ಜರಾಜಿಣ್ಣಕಾಲೇಪಿ। ಸಮ್ಪಜಾನೋ ಪಟಿಸ್ಸತೋತಿ ಇಮಿನಾ ಚಿತ್ತಖೇದಾಭಾವಂ ದಸ್ಸೇತಿ, ಇದ್ಧಿಬಲೇನುಪತ್ಥದ್ಧೋತಿ ಇಮಿನಾ ಸರೀರಖೇದಾಭಾವಂ।

ಭಯಹೇತೂನಂ ಕಿಲೇಸಾನಂ ಸಮುಚ್ಛಿನ್ನತ್ತಾ ಪಹೀನಭಯಭೇರವೋ।

ಡಯ್ಹಮಾನೇಸೂತಿ ರಾಗಗ್ಗಿಆದೀಹಿ ಏಕಾದಸಹಿ ಅಗ್ಗೀಹಿ ಸತ್ತೇಸು ಡಯ್ಹಮಾನೇಸು। ಸಂಕಿಲೇಸಪರಿಳಾಹಾಭಾವೇನ ನಿಬ್ಬುತೋ ಸೀತಿಭೂತೋ।

ಪುನ ಮನುಸ್ಸೇಹಿ ‘‘ಕಿಂ, ಭನ್ತೇ, ಜಿಣ್ಣಕಾಲೇಪಿ ಅರಞ್ಞಪಬ್ಬತೇಯೇವ ವಿಹರಥ, ನನು ಇಮೇ ವೇಳುವನಾದಯೋ ವಿಹಾರಾ ಮನೋರಮಾ’’ತಿ ವುತ್ತೇ ಅರಞ್ಞಪಬ್ಬತಾ ಏವ ಮಯ್ಹಂ ಮನೋರಮಾತಿ ದಸ್ಸೇನ್ತೋ ‘‘ಕರೇರಿಮಾಲಾವಿತತಾ’’ತಿಆದಿಕಾ ದ್ವಾದಸ ಗಾಥಾ ಅಭಾಸಿ। ತತ್ಥ ಕರೇರಿಮಾಲಾವಿತತಾತಿ ವರುಣರುಕ್ಖಪನ್ತೀಹಿ ಸಮಾಗತಾ। ‘‘ಕಾಲವಣ್ಣಪುಪ್ಫೇಹಿ ಓತ್ಥಟಾ’’ತಿಪಿ ವದನ್ತಿ। ಕುಞ್ಜರಾಭಿರುದಾತಿ ಪಟಿಘೋಸಾದಿಗುಣೀಭೂತೇಹಿ ಹತ್ಥೀನಂ ಗೋಚರೇಸೀನಂ ಗಜ್ಜಿತೇಹಿ ಅಭಿತ್ಥನಿತಾ।

ಅಭಿವುಟ್ಠಾತಿ ಮಹಾಮೇಘೇನ ಅಭಿಪ್ಪವುಟ್ಠಾ। ರಮ್ಮತಲಾತಿ ತೇನೇವ ರಜೋಜಲ್ಲಪಣ್ಣೇಯ್ಯಾದೀನಂ ಅಪಗಮೇನ ರಮಣೀಯತಲಾ। ನಗಾತಿ ದೇಸನ್ತರಂ ಅಗಮನತೋ ‘‘ನಗಾ’’ತಿ ಸೇಲಮಯತಾಯ ‘‘ಸೇಲಾ’’ತಿ ಚ ಲದ್ಧನಾಮಾ ಪಬ್ಬತಾ। ಅಬ್ಭುನ್ನದಿತಾ ಸಿಖೀಹೀತಿ ಮಧುರಸ್ಸರೇನ ಉನ್ನದಿತಾ।

ಅಲನ್ತಿ ಯುತ್ತಂ ಸಮತ್ಥಂ ವಾ। ಝಾಯಿತುಕಾಮಸ್ಸ ಅತ್ಥಕಾಮಸ್ಸಾತಿಆದೀಸುಪಿ ಇಮಿನಾ ನಯೇನ ಯೋಜೇತಬ್ಬಂ। ಭಿಕ್ಖುನೋತಿ ಭಿನ್ನಕಿಲೇಸಭಿಕ್ಖುನೋ, ಮೇತಿ ಸಮ್ಬನ್ಧೋ।

ಉಮಾಪುಪ್ಫೇನ ಸಮಾನಾತಿ ಮೇಚಕನಿಭತಾಯ ಉಮಾಕುಸುಮಸದಿಸಾ। ಗಗನಾವಬ್ಭ ಛಾದಿತಾತಿ ತತೋ ಏವ ಸರದಸ್ಸ ಗಗನಅಬ್ಭಾ ವಿಯ ಕಾಳಮೇಘಸಞ್ಛಾದಿತಾ, ನೀಲವಣ್ಣಾತಿ ಅತ್ಥೋ।

ಅನಾಕಿಣ್ಣಾತಿ ಅಸಂಕಿಣ್ಣಾ ಅಸಮ್ಬಾಧಾ। ಪಞ್ಚಙ್ಗಿಕೇನಾತಿ ಆತತಾದೀಹಿ ಪಞ್ಚಹಿ ಅಙ್ಗೇಹಿ ಯುತ್ತೇನ ತೂರಿಯೇನ ಪರಿವಾರಿಯಮಾನಸ್ಸ ತಾದಿಸೀಪಿ ನ ಹೋತಿ, ಯಥಾ ಯಾದಿಸೀ ಏಕಗ್ಗಚಿತ್ತಸ್ಸ ಸಮಾಹಿತಚಿತ್ತಸ್ಸ ಸಮ್ಮದೇವ ರೂಪಾರೂಪಧಮ್ಮಂ ಅನಿಚ್ಚಾದಿವಸೇನ ವಿಪಸ್ಸನ್ತಸ್ಸ ರತಿ ಹೋತಿ। ತೇನಾಹ ಭಗವಾ –

‘‘ಯತೋ ಯತೋ ಸಮ್ಮಸತಿ, ಖನ್ಧಾನಂ ಉದಯಬ್ಬಯಂ।

ಲಭತೀ ಪೀತಿಪಾಮೋಜ್ಜಂ, ಅಮತಂ ತಂ ವಿಜಾನತ’’ನ್ತಿ॥ (ಧ॰ ಪ॰ ೩೭೪)

ಕಮ್ಮಂ ಬಹುಕನ್ತಿಆದಿನಾ ದ್ವೇ ಗಾಥಾ ಕಮ್ಮಾರಾಮಾನಂ ಪಚ್ಚಯಗಿದ್ಧಾನಂ ಭಿಕ್ಖೂನಂ ಓವಾದದಾನವಸೇನ ವುತ್ತಾ। ತತ್ಥ ಕಮ್ಮಂ ಬಹುಕಂ ನ ಕಾರಯೇತಿ ಕಮ್ಮಾರಾಮೋ ಹುತ್ವಾ ಬಹುಂ ನಾಮ ಕಮ್ಮಂ ನ ಕಾರಯೇ ನ ಅಧಿಟ್ಠಹೇ, ಖಣ್ಡಫುಲ್ಲಪಟಿಸಙ್ಖರಣಂ ಪನ ಸತ್ಥಾರಾ ಅನುಞ್ಞಾತಮೇವ। ಪರಿವಜ್ಜೇಯ್ಯ ಜನನ್ತಿ ಅಕಲ್ಯಾಣಮಿತ್ತಭೂತಂ ಜನಂ ವಜ್ಜೇಯ್ಯ। ನ ಉಯ್ಯಮೇತಿ ಪಚ್ಚಯುಪ್ಪಾದನಗಣಬನ್ಧಾದಿವಸೇನ ವಾಯಾಮಂ ನ ಕರೇಯ್ಯ।

ಅನತ್ತನೇಯ್ಯಮೇತನ್ತಿ ಏತಂ ನವಕಮ್ಮಾಧಿಟ್ಠಾನಾದಿಕಂ ಅತ್ತನೋ ಅತ್ಥಾವಹಂ ನ ಹೋತೀತಿ ಅತ್ಥೋ। ತತ್ಥ ಕಾರಣಮಾಹ ‘‘ಕಿಚ್ಛತಿ ಕಾಯೋ ಕಿಲಮತೀ’’ತಿ। ನವಕಮ್ಮಾದಿಪಸುತಸ್ಸ ಹಿ ತಹಂ ತಹಂ ವಿಚರತೋ ಕಾಯಸುಖಾದಿಅಲಾಭೇನ ಕಿಚ್ಛಪ್ಪತ್ತೋ ಹೋತಿ ಕಿಲಮತಿ ಖೇದಂ ಆಪಜ್ಜತಿ, ತೇನ ಚ ಕಾಯಕಿಲಮಥೇನ ದುಕ್ಖಿತೋ। ವತ್ಥುವಿಸದಅತ್ತನೇಯ್ಯಕಿರಿಯಾದೀನಂ ಅಭಾವೇನ ಸೋ ಪುಗ್ಗಲೋ ಸಮಥಂ ನ ವಿನ್ದತಿ ಚಿತ್ತಸಮಾಧಾನಂ ನ ಲಭತೀತಿ।

ಓಟ್ಠಪ್ಪಹತಮತ್ತೇನಾತಿಆದಿನಾ ದ್ವೇ ಗಾಥಾ ಸುತಪರಮಸ್ಸ ಪಣ್ಡಿತಮಾನಿನೋ ಗರಹವಸೇನ, ತತೋ ಪರಾ ದ್ವೇ ಪಣ್ಡಿತಸ್ಸ ಪಸಂಸಾವಸೇನ ವುತ್ತಾ। ತತ್ಥ ಓಟ್ಠಪ್ಪಹತಮತ್ತೇನಾತಿ ಸಜ್ಝಾಯಸೀಸೇನ ಓಟ್ಠಪರಿವತ್ತನಮತ್ತೇನ, ಬುದ್ಧವಚನಂ ಸಜ್ಝಾಯಕರಣಮತ್ತೇನಾತಿ ಅತ್ಥೋ। ಅತ್ತಾನಮ್ಪಿ ನ ಪಸ್ಸತೀತಿ ಅನತ್ಥಞ್ಞುತಾಯ ಅತ್ತನೋ ಪಚ್ಚಕ್ಖಭೂತಮ್ಪಿ ಅತ್ಥಂ ನ ಜಾನಾತಿ, ಯಾಥಾವತೋ ಅತ್ತನೋ ಪಮಾಣಂ ನ ಪರಿಚ್ಛಿನ್ದತೀತಿ ಅತ್ಥೋ। ಪತ್ಥದ್ಧಗೀವೋ ಚರತೀತಿ ‘‘ಅಹಂ ಬಹುಸ್ಸುತೋ, ಸತಿಮಾ, ಪಞ್ಞವಾ, ನ ಮಯಾ ಸದಿಸೋ ಅಞ್ಞೋ ಅತ್ಥೀ’’ತಿ ಮಾನತ್ಥದ್ಧೋ ಹುತ್ವಾ ಗರುಟ್ಠಾನಿಯಾನಮ್ಪಿ ಅಪಚಿತಿಂ ಅದಸ್ಸೇನ್ತೋ ಅಯೋಸಲಾಕಂ ಗಿಲಿತ್ವಾ ಠಿತೋ ವಿಯ ಥದ್ಧಗೀವೋ ಚರತಿ। ಅಹಂ ಸೇಯ್ಯೋತಿ ಮಞ್ಞತೀತಿ ಅಹಮೇವ ಸೇಯ್ಯೋ ಉತ್ತಮೋತಿ ಮಞ್ಞತಿ।

ಅಸೇಯ್ಯೋ ಸೇಯ್ಯಸಮಾನಂ, ಬಾಲೋ ಮಞ್ಞತಿ ಅತ್ತಾನನ್ತಿ ಅಯಂ ಅಸೇಯ್ಯೋ ಹೀನೋ ಸಮಾನೋ ಅಞ್ಞೇನ ಸೇಯ್ಯೇನ ಉತ್ತಮೇನ ಸಮಾನಂ ಸದಿಸಂ ಕತ್ವಾ ಅತ್ತಾನಂ ಬಾಲೋ ಮನ್ದಬುದ್ಧಿ ಬಾಲಭಾವೇನೇವ ಮಞ್ಞತೀತಿ। ನ ತಂ ವಿಞ್ಞೂ ಪಸಂಸನ್ತೀತಿ ತಂ ತಾದಿಸಂ ಬಾಲಂ ಪಗ್ಗಹಿತಚಿತ್ತತಾಯ ಪತ್ಥದ್ಧಮಾನಸಂ ಥಮ್ಭಿತತ್ತಂ ನರಂ ವಿಞ್ಞೂ ಪಣ್ಡಿತಾ ನ ಪಸಂಸನ್ತಿ, ಅಞ್ಞದತ್ಥು ಗರಹನ್ತಿಯೇವ।

ಸೇಯ್ಯೋಹಮಸ್ಮೀತಿ ಯೋ ಪನ ಪಣ್ಡಿತೋ ಪುಗ್ಗಲೋ ‘‘ಸೇಯ್ಯೋಹಮಸ್ಮೀ’’ತಿ ವಾ ಹೀನಸದಿಸಮಾನವಸೇನ ‘‘ನಾಹಂ ಸೇಯ್ಯೋ’’ತಿ ವಾ ಕಞ್ಚಿಪಿ ಮಾನಂ ಅಜಪ್ಪೇನ್ತೋ ವಿಧಾಸು ನವಸು ಮಾನಕೋಟ್ಠಾಸೇಸು ಕಸ್ಸಚಿಪಿ ವಸೇನ ನ ವಿಕಮ್ಪತಿ।

ಪಞ್ಞವನ್ತನ್ತಿ ಅಗ್ಗಫಲಪಞ್ಞಾವಸೇನ ಪಞ್ಞವನ್ತಂ ಇಟ್ಠಾದೀಸು ತಾದಿಭಾವಪ್ಪತ್ತಿಯಾ ತಾದಿಂ, ಅಸೇಕ್ಖಫಲಸೀಲೇಸು ಸುಟ್ಠು ಪತಿಟ್ಠಿತತ್ತಾ ಸೀಲೇಸು ಸುಸಮಾಹಿತಂ, ಅರಹತ್ತಫಲಸಮಾಪತ್ತಿಸಮಾಪಜ್ಜನೇನ ಚೇತೋಸಮಥಮನುಯುತ್ತನ್ತಿ ತಾದಿಸಂ ಸಬ್ಬಸೋ ಪಹೀನಮಾನಂ ಖೀಣಾಸವಂ ವಿಞ್ಞೂ ಬುದ್ಧಾದಯೋ ಪಣ್ಡಿತಾ ಪಸಂಸರೇ ವಣ್ಣೇನ್ತಿ ಥೋಮೇನ್ತೀತಿ ಅತ್ಥೋ।

ಪುನ ಅಞ್ಞತರಂ ದುಬ್ಬಚಂ ಭಿಕ್ಖುಂ ದಿಸ್ವಾ ದೋವಚಸ್ಸತಾಯ ಆದೀನವಂ, ಸೋವಚಸ್ಸತಾಯ ಆನಿಸಂಸಞ್ಚ ಪಕಾಸೇನ್ತೋ ‘‘ಯಸ್ಸ ಸಬ್ರಹ್ಮಚಾರೀಸೂ’’ತಿಆದಿಕಾ ದ್ವೇ ಗಾಥಾ ಅಭಾಸಿ। ತಾ ವುತ್ತತ್ಥಾ ಏವ।

ಪುನ ಉದ್ಧತಂ ಉನ್ನಳಂ ಏಕಂ ಭಿಕ್ಖುಂ ದಿಸ್ವಾ ಉದ್ಧತಾದಿಭಾವೇ ದೋಸಂ, ಅನುದ್ಧತಾದಿಭಾವೇ ಚ ಗುಣಂ ವಿಭಾವೇನ್ತೋ ‘‘ಉದ್ಧತೋ ಚಪಲೋ ಭಿಕ್ಖೂ’’ತಿಆದಿಕಾ ದ್ವೇ ಗಾಥಾ ಅಭಾಸಿ। ತತ್ಥ ಕಪೀವ ಸೀಹಚಮ್ಮೇನಾತಿ ಸೀಹಚಮ್ಮೇನ ಪಾರುತೋ ಮಕ್ಕಟೋ ವಿಯ। ಸೋ ಉದ್ಧತಾದಿದೋಸಸಂಯುತ್ತೋ ಭಿಕ್ಖು ತೇನ ಪಂಸುಕೂಲೇನ ಅರಿಯದ್ಧಜೇನ ನ ಉಪಸೋಭತಿ ಅರಿಯಗುಣಾನಂ ಅಭಾವತೋ।

ಯೋ ಪನ ಉಪಸೋಭತಿ, ತಂ ದಸ್ಸೇತುಂ ‘‘ಅನುದ್ಧತೋ’’ತಿಆದಿ ವುತ್ತಂ।

ಏತೇ ಸಮ್ಬಹುಲಾತಿಆದಿಕಾ ಪಞ್ಚ ಗಾಥಾ ಆಯಸ್ಮನ್ತಂ ಸಾರಿಪುತ್ತಂ ನಮಸ್ಸನ್ತೇ ಬ್ರಹ್ಮಕಾಯಿಕೇ ದೇವೇ ದಿಸ್ವಾ ಆಯಸ್ಮತೋ ಕಪ್ಪಿನಸ್ಸ ಸಿತಪಾತುಕಮ್ಮನಿಮಿತ್ತಂ ವುತ್ತಾ। ತತ್ಥ ಏತೇತಿ ತೇಸಂ ಪಚ್ಚಕ್ಖತಾಯ ವುತ್ತಂ । ಸಮ್ಬಹುಲಾತಿ ಬಹುಭಾವತೋ, ತಂ ಪನ ಬಹುಭಾವಂ ‘‘ದಸದೇವಸಹಸ್ಸಾನೀ’’ತಿ ಪರಿಚ್ಛಿನ್ದಿತ್ವಾ ಆಹ। ದೇವಾತಿ ಉಪಪತ್ತಿದೇವಾ। ತಂ ತೇಸಂ ದೇವಭಾವಂ ಅಞ್ಞೇಹಿ ವಿಸೇಸೇತ್ವಾ ದಸ್ಸೇನ್ತೋ ‘‘ಸಬ್ಬೇ ತೇ ಬ್ರಹ್ಮಕಾಯಿಕಾ’’ತಿ ಆಹ। ಯಸ್ಮಾ ತೇ ಅತ್ತನೋ ಉಪಪತ್ತಿದ್ಧಿಯಾ ಮಹತಿಯಾ ದೇವಿದ್ಧಿಯಾ ಸಮನ್ನಾಗತಾ ಪರಿವಾರಸಮ್ಪನ್ನಾ ಚ, ತಸ್ಮಾ ಆಹ ‘‘ಇದ್ಧಿಮನ್ತೋ ಯಸಸ್ಸಿನೋ’’ತಿ।

‘‘ಕೋ ನು ಸೇನಾಪತಿ ಭೋತೋ’’ತಿ ಪುಚ್ಛಾಯ ವಿಸ್ಸಜ್ಜನವಸೇನ ‘‘ಮಯಾ ಪವತ್ತಿತಂ ಧಮ್ಮಚಕ್ಕಂ ಅನುತ್ತರಂ ಸಾರಿಪುತ್ತೋ ಅನುವತ್ತೇತೀ’’ತಿ (ಮ॰ ನಿ॰ ೨.೩೯೯) ವದನ್ತೇನ ಭಗವತಾ ಆಯಸ್ಮತೋ ಸಾರಿಪುತ್ತತ್ಥೇರಸ್ಸ ಧಮ್ಮಸೇನಾಪತಿಭಾವೋ ಅನುಞ್ಞಾತೋತಿ ಆಹ – ‘‘ಧಮ್ಮಸೇನಾಪತಿಂ ವೀರಂ ಮಹಾಝಾಯಿಂ ಸಮಾಹಿತಂ ಸಾರಿಪುತ್ತ’’ನ್ತಿ। ತತ್ಥ ವೀರನ್ತಿ ಕಿಲೇಸಮಾರಾದೀನಂ ನಿಮ್ಮಥನೇನ ವೀರಿಯವನ್ತಂ ಮಹಾವಿಕ್ಕನ್ತಂ। ಮಹಾಝಾಯಿನ್ತಿ ದಿಬ್ಬವಿಹಾರಾದೀನಂ ಉಕ್ಕಂಸಗಮನೇನ ಮಹನ್ತಂ ಝಾಯಿಂ। ತತೋ ಏವ ಸಬ್ಬಸೋ ವಿಕ್ಖೇಪವಿದ್ಧಂಸನವಸೇನ ಸಮಾಹಿತಂ। ನಮಸ್ಸನ್ತಾತಿ ಸಿರಸಿ ಅಞ್ಜಲಿಂ ಪಗ್ಗಯ್ಹ ನಮಸ್ಸಮಾನಾ ತಿಟ್ಠನ್ತಿ।

ಯಮ್ಪಿ ನಿಸ್ಸಾಯಾತಿ ಯಂ ನು ಖೋ ಆರಮ್ಮಣಂ ನಿಸ್ಸಾಯ ಆರಬ್ಭ ಝಾಯತೀತಿ ನಾಭಿಜಾನಾಮಾತಿ ಪುಥುಜ್ಜನಭಾವೇನ ಬ್ರಹ್ಮಾನೋ ಏವಂ ಆಹಂಸು।

ಅಚ್ಛೇರಂ ವತಾತಿ ಅಚ್ಛರಿಯಂ ವತ। ಬುದ್ಧಾನನ್ತಿ ಚತುಸಚ್ಚಬುದ್ಧಾನಂ। ಗಮ್ಭೀರೋ ಗೋಚರೋ ಸಕೋತಿ ಪರಮಗಮ್ಭೀರೋ ಅತಿದುದ್ದಸೋ ದುರನುಬೋಧೋ ಪುಥುಜ್ಜನೇಹಿ ಅಸಾಧಾರಣೋ ಅವಿಸಯೋ। ಇದಾನಿ ತಸ್ಸ ಗಮ್ಭೀರಭಾವೇ ಕಾರಣಂ ದಸ್ಸೇತುಂ ‘‘ಯೇ ಮಯ’’ನ್ತಿಆದಿ ವುತ್ತಂ। ತತ್ಥ ವಾಲವೇಧಿಸಮಾಗತಾತಿ ಯೇ ಮಯಂ ವಾಲವೇಧಿಧನುಗ್ಗಹಸದಿಸಾ ಅತಿಸುಖುಮಮ್ಪಿ ವಿಸಯಂ ಪಟಿವಿಜ್ಝಿತುಂ ಸಮತ್ಥಾ ಆಗತಾ ಉಪಪರಿಕ್ಖನ್ತಾ ನಾಭಿಜಾನಾಮ, ಗಮ್ಭೀರೋ ವತ ಬುದ್ಧಾನಂ ವಿಸಯೋತಿ ಅತ್ಥೋ। ತಂ ತಥಾ ದೇವಕಾಯೇಹೀತಿ ತಂ ತಥಾರೂಪಂ ಸಾರಿಪುತ್ತಂ ಸದೇವಕಸ್ಸ ಲೋಕಸ್ಸ ಪೂಜನಾರಹಂ ತೇಹಿ ಬ್ರಹ್ಮಕಾಯಿಕೇಹಿ ತದಾ ತಥಾ ಪೂಜಿತಂ ದಿಸ್ವಾ ಆಯಸ್ಮತೋ ಮಹಾಕಪ್ಪಿನಸ್ಸ ಸಿತಂ ಅಹೋಸಿ। ಇಮೇಸಂ ಲೋಕಸಮ್ಮತಾನಂ ಬ್ರಹ್ಮೂನಮ್ಪಿ ಅವಿಸಯೋ, ಯತ್ಥ ಸಾವಕಾನಂ ವಿಸಯೋತಿ।

ಯಾವತಾ ಬುದ್ಧಖೇತ್ತಮ್ಹೀತಿ ಗಾಥಾ ಥೇರೇನ ಅತ್ತಾನಂ ಆರಬ್ಭ ಸೀಹನಾದಂ ನದನ್ತೇನ ಭಾಸಿತಾ। ತತ್ಥ ಬುದ್ಧಖೇತ್ತಮ್ಹೀತಿ ಆಣಾಖೇತ್ತಂ ಸನ್ಧಾಯ ವದತಿ। ಠಪಯಿತ್ವಾ ಮಹಾಮುನಿನ್ತಿ ಸಮ್ಮಾಸಮ್ಬುದ್ಧಂ ಠಪೇತ್ವಾ । ಬುದ್ಧಾ ಹಿ ಭಗವನ್ತೋ ಧುತಗುಣೇಹಿಪಿ ಸಬ್ಬಸತ್ತೇಹಿ ಪರಮುಕ್ಕಂಸಗತಾ ಏವ, ಕೇವಲಂ ಪನ ಮಹಾಕರುಣಾಸಞ್ಚೋದಿತಮಾನಸಾ ಸತ್ತಾನಂ ತಾದಿಸಂ ಮಹನ್ತಂ ಉಪಕಾರಂ ಓಲೋಕೇತ್ವಾ ಗಾಮನ್ತಸೇನಾಸನವಾಸಾದಿಂ ಅನುವತ್ತನ್ತೀತಿ ತಂ ತಂ ಧುತಧಮ್ಮವಿರೋಧೀ ಹೋತಿ। ಧುತಗುಣೇತಿ ಕಿಲೇಸಾನಂ ಧುತೇನ ಗುಣೇನ ಆರಞ್ಞಕಾದಿಭಾವೇನ ಅಪೇಕ್ಖಿತಗುಣೇ। ಕರಣತ್ಥೇ ವಾ ಏತಂ ಭುಮ್ಮವಚನಂ। ಸದಿಸೋ ಮೇ ನ ವಿಜ್ಜತಿ, ಕುತೋ ಪನ ಉತ್ತರೀತಿ ಅಧಿಪ್ಪಾಯೋ। ತಥಾ ಹೇಸ ಥೇರೋ ತತ್ಥ ಅಗ್ಗಟ್ಠಾನೇ ಠಪಿತೋ।

ನ ಚೀವರೇತಿ ಗಾಥಾಯ ‘‘ಠಪಯಿತ್ವಾ ಮಹಾಮುನಿ’’ನ್ತಿ ವುತ್ತಮೇವತ್ಥಂ ಪಾಕಟತರಂ ಕರೋತಿ, ಚೀವರಾದೀಸು ತಣ್ಹಾಯ ಅನುಪಲೇಪೋ ಧುತಙ್ಗಫಲಂ। ತತ್ಥ ನ ಚೀವರೇ ಸಮ್ಪತ್ತೇ ತಣ್ಹಾಲೇಪೇನಾತಿ ಯೋಜನಾ। ಸಯನೇತಿ ಸೇನಾಸನೇ। ಗೋತಮೋತಿ ಭಗವನ್ತಂ ಗೋತ್ತೇನ ಕಿತ್ತೇತಿ। ಅನಪ್ಪಮೇಯ್ಯೋತಿ ಪಮಾಣಕರಕಿಲೇಸಾಭಾವತೋ ಅಪರಿಮಾಣಗುಣತಾಯ ಚ ಅನಪ್ಪಮೇಯ್ಯೋ। ಮುಳಾಲಪುಪ್ಫಂ ವಿಮಲಂವ ಅಮ್ಬುನಾತಿ ಯಥಾ ನಿಮ್ಮಲಂ ವಿರಜಂ ನಳಿನಂ ಉದಕೇನ ನ ಲಿಮ್ಪತಿ, ಏವಂ ಗೋತಮೋ ಭಗವಾ ತಣ್ಹಾಲೇಪಾದಿನಾ ನ ಲಿಮ್ಪತೀತಿ ಅತ್ಥೋ। ನೇಕ್ಖಮ್ಮನಿನ್ನೋ ಅಭಿನಿಕ್ಖಮ್ಮನಿನ್ನೋ ತತೋ ಏವ ತಿಭವಾಭಿನಿಸ್ಸಟೋ ಭವತ್ತಯತೋ ವಿನಿಸ್ಸಟೋ ವಿಸಂಯುತ್ತೋ।

ಯೇಸಂ ಸತಿಪಟ್ಠಾನಗೀವಾದೀನಂ ಭಾವನಾಪಾರಿಪೂರಿಯಾ ಯತ್ಥ ಕತ್ಥಚಿ ಅನುಪಲಿತ್ತೋ ನೇಕ್ಖಮ್ಮನಿನ್ನೋವ ಅಹೋಸಿ, ತೇ ಅಙ್ಗಭೂತೇ ದಸ್ಸೇನ್ತೋ ‘‘ಸತಿಪಟ್ಠಾನಗೀವೋ’’ತಿ ಓಸಾನಗಾಥಮಾಹ। ತತ್ಥ ಗುಣರಾಸಿತೋ ಉತ್ತಮಙ್ಗಭೂತಾಯ ಪಞ್ಞಾಯ ಅಧಿಟ್ಠಾನಭಾವತೋ ಸತಿಪಟ್ಠಾನಂ ಗೀವಾ ಏತಸ್ಸಾತಿ ಸತಿಪಟ್ಠಾನಗೀವೋ, ಅನವಜ್ಜಧಮ್ಮಾನಂ ಆದಾನೇ ಸದ್ಧಾ ಹತ್ಥೋ ಏತಸ್ಸಾತಿ ಸದ್ಧಾಹತ್ಥೋ। ಗುಣಸರೀರಸ್ಸ ಉತ್ತಮಙ್ಗಭಾವತೋ ಪಞ್ಞಾ ಸೀಸಂ ಏತಸ್ಸಾತಿ ಪಞ್ಞಾಸೀಸೋ। ಮಹಾಸಮುದಾಗಮನತಾಯ ಮಹಾವಿಸಯತಾಯ ಮಹಾನುಭಾವತಾಯ ಮಹಾಬಲತಾಯ ಚ ಮಹನ್ತಂ ಸಬ್ಬಞ್ಞುತಸಙ್ಖಾತಂ ಞಾಣಂ ಏತಸ್ಸ ಅತ್ಥೀತಿ ಮಹಾಞಾಣೀ। ಸದಾ ಸಬ್ಬಕಾಲಂ ನಿಬ್ಬುತೋ ಸೀತಿಭೂತೋ ಚರತಿ। ‘‘ಸುಸಮಾಹಿತೋ…ಪೇ॰… ನಾಗೋ’’ತಿ (ಅ॰ ನಿ॰ ೬.೪೩) ಸುತ್ತಪದಞ್ಚೇತ್ಥ ನಿದಸ್ಸೇತಬ್ಬಂ। ಯಂ ಪನೇತ್ಥ ಅತ್ಥತೋ ಅವಿಭತ್ತಂ, ತಂ ಹೇಟ್ಠಾ ವುತ್ತನಯಮೇವ।

ಮಹಾಕಸ್ಸಪತ್ಥೇರಗಾಥಾವಣ್ಣನಾ ನಿಟ್ಠಿತಾ।

ಚತ್ತಾಲೀಸನಿಪಾತವಣ್ಣನಾ ನಿಟ್ಠಿತಾ।