೧೧. ಏಕಾದಸನಿಪಾತೋ

೧. ಸಂಕಿಚ್ಚತ್ಥೇರಗಾಥಾ

೫೯೭.

‘‘ಕಿಂ ತವತ್ಥೋ ವನೇ ತಾತ, ಉಜ್ಜುಹಾನೋವ ಪಾವುಸೇ।

ವೇರಮ್ಭಾ ರಮಣೀಯಾ ತೇ, ಪವಿವೇಕೋ ಹಿ ಝಾಯಿನಂ॥

೫೯೮.

‘‘ಯಥಾ ಅಬ್ಭಾನಿ ವೇರಮ್ಭೋ, ವಾತೋ ನುದತಿ ಪಾವುಸೇ।

ಸಞ್ಞಾ ಮೇ ಅಭಿಕಿರನ್ತಿ, ವಿವೇಕಪಟಿಸಞ್ಞುತಾ॥

೫೯೯.

‘‘ಅಪಣ್ಡರೋ ಅಣ್ಡಸಮ್ಭವೋ, ಸೀವಥಿಕಾಯ ನಿಕೇತಚಾರಿಕೋ।

ಉಪ್ಪಾದಯತೇವ ಮೇ ಸತಿಂ, ಸನ್ದೇಹಸ್ಮಿಂ ವಿರಾಗನಿಸ್ಸಿತಂ॥

೬೦೦.

‘‘ಯಞ್ಚ ಅಞ್ಞೇ ನ ರಕ್ಖನ್ತಿ, ಯೋ ಚ ಅಞ್ಞೇ ನ ರಕ್ಖತಿ।

ಸ ವೇ ಭಿಕ್ಖು ಸುಖಂ ಸೇತಿ, ಕಾಮೇಸು ಅನಪೇಕ್ಖವಾ॥

೬೦೧.

‘‘ಅಚ್ಛೋದಿಕಾ ಪುಥುಸಿಲಾ, ಗೋನಙ್ಗುಲಮಿಗಾಯುತಾ।

ಅಮ್ಬುಸೇವಾಲಸಞ್ಛನ್ನಾ, ತೇ ಸೇಲಾ ರಮಯನ್ತಿ ಮಂ॥

೬೦೨.

‘‘ವಸಿತಂ ಮೇ ಅರಞ್ಞೇಸು, ಕನ್ದರಾಸು ಗುಹಾಸು ಚ।

ಸೇನಾಸನೇಸು ಪನ್ತೇಸು, ವಾಳಮಿಗನಿಸೇವಿತೇ॥

೬೦೩.

‘‘‘ಇಮೇ ಹಞ್ಞನ್ತು ವಜ್ಝನ್ತು, ದುಕ್ಖಂ ಪಪ್ಪೋನ್ತು ಪಾಣಿನೋ’।

ಸಙ್ಕಪ್ಪಂ ನಾಭಿಜಾನಾಮಿ, ಅನರಿಯಂ ದೋಸಸಂಹಿತಂ॥

೬೦೪.

‘‘ಪರಿಚಿಣ್ಣೋ ಮಯಾ ಸತ್ಥಾ, ಕತಂ ಬುದ್ಧಸ್ಸ ಸಾಸನಂ।

ಓಹಿತೋ ಗರುಕೋ ಭಾರೋ, ಭವನೇತ್ತಿ ಸಮೂಹತಾ॥

೬೦೫.

‘‘ಯಸ್ಸ ಚತ್ಥಾಯ ಯಸ್ಸತ್ಥಾಯ (ಸೀ॰) ಪಬ್ಬಜಿತೋ, ಅಗಾರಸ್ಮಾನಗಾರಿಯಂ।

ಸೋ ಮೇ ಅತ್ಥೋ ಅನುಪ್ಪತ್ತೋ, ಸಬ್ಬಸಂಯೋಜನಕ್ಖಯೋ॥

೬೦೬.

‘‘ನಾಭಿನನ್ದಾಮಿ ಮರಣಂ, ನಾಭಿನನ್ದಾಮಿ ಜೀವಿತಂ।

ಕಾಲಞ್ಚ ಪಟಿಕಙ್ಖಾಮಿ, ನಿಬ್ಬಿಸಂ ಭತಕೋ ಯಥಾ॥

೬೦೭.

‘‘ನಾಭಿನನ್ದಾಮಿ ಮರಣಂ, ನಾಭಿನನ್ದಾಮಿ ಜೀವಿತಂ।

ಕಾಲಞ್ಚ ಪಟಿಕಙ್ಖಾಮಿ, ಸಮ್ಪಜಾನೋ ಪತಿಸ್ಸತೋ’’ತಿ॥

… ಸಂಕಿಚ್ಚೋ ಥೇರೋ…।

ಏಕಾದಸನಿಪಾತೋ ನಿಟ್ಠಿತೋ।

ತತ್ರುದ್ದಾನಂ –

ಸಂಕಿಚ್ಚಥೇರೋ ಏಕೋವ, ಕತಕಿಚ್ಚೋ ಅನಾಸವೋ।

ಏಕಾದಸನಿಪಾತಮ್ಹಿ, ಗಾಥಾ ಏಕಾದಸೇವ ಚಾತಿ॥