೧೫. ಛತ್ತವಗ್ಗೋ

೧. ಅತಿಛತ್ತಿಯತ್ಥೇರಅಪದಾನಂ

೧.

‘‘ಪರಿನಿಬ್ಬುತೇ ಭಗವತಿ, ಅತ್ಥದಸ್ಸೀನರುತ್ತಮೇ।

ಛತ್ತಾತಿಛತ್ತಂ ಛತ್ತಾಧಿಛತ್ತಂ (ಸೀ॰) ಕಾರೇತ್ವಾ, ಥೂಪಮ್ಹಿ ಅಭಿರೋಪಯಿಂ॥

೨.

‘‘ಕಾಲೇನ ಕಾಲಮಾಗನ್ತ್ವಾ, ನಮಸ್ಸಿಂ ಲೋಕನಾಯಕಂ ಸತ್ಥು ಚೇತಿಯಂ (ಸೀ॰)।

ಪುಪ್ಫಚ್ಛದನಂ ಕತ್ವಾನ, ಛತ್ತಮ್ಹಿ ಅಭಿರೋಪಯಿಂ॥

೩.

‘‘ಸತ್ತರಸೇ ಕಪ್ಪಸತೇ, ದೇವರಜ್ಜಮಕಾರಯಿಂ।

ಮನುಸ್ಸತ್ತಂ ನ ಗಚ್ಛಾಮಿ, ಥೂಪಪೂಜಾಯಿದಂ ಫಲಂ॥

೪.

‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ।

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’॥

ಇತ್ಥಂ ಸುದಂ ಆಯಸ್ಮಾ ಅತಿಛತ್ತಿಯೋ ಅಧಿಛತ್ತಿಯೋ (ಸೀ॰ ಸ್ಯಾ॰) ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ।

ಅತಿಛತ್ತಿಯತ್ಥೇರಸ್ಸಾಪದಾನಂ ಪಠಮಂ।

೨. ಥಮ್ಭಾರೋಪಕತ್ಥೇರಅಪದಾನಂ

೫.

‘‘ನಿಬ್ಬುತೇ ಲೋಕನಾಥಮ್ಹಿ, ಧಮ್ಮದಸ್ಸೀನರಾಸಭೇ।

ಆರೋಪೇಸಿಂ ಧಜತ್ಥಮ್ಭಂ, ಬುದ್ಧಸೇಟ್ಠಸ್ಸ ಚೇತಿಯೇ॥

೬.

‘‘ನಿಸ್ಸೇಣಿಂ ಮಾಪಯಿತ್ವಾನ, ಥೂಪಸೇಟ್ಠಂ ಸಮಾರುಹಿಂ।

ಜಾತಿಪುಪ್ಫಂ ಗಹೇತ್ವಾನ, ಥೂಪಮ್ಹಿ ಅಭಿರೋಪಯಿಂ॥

೭.

‘‘ಅಹೋ ಬುದ್ಧೋ ಅಹೋ ಧಮ್ಮೋ, ಅಹೋ ನೋ ಸತ್ಥು ಸಮ್ಪದಾ।

ದುಗ್ಗತಿಂ ನಾಭಿಜಾನಾಮಿ, ಥೂಪಪೂಜಾಯಿದಂ ಫಲಂ॥

೮.

‘‘ಚತುನ್ನವುತಿತೋ ಕಪ್ಪೇ, ಥೂಪಸೀಖಸನಾಮಕಾ।

ಸೋಳಸಾಸಿಂಸು ರಾಜಾನೋ, ಚಕ್ಕವತ್ತೀ ಮಹಬ್ಬಲಾ॥

೯.

‘‘ಪಟಿಸಮ್ಭಿದಾ ಚತಸ್ಸೋ…ಪೇ॰… ಕತಂ ಬುದ್ಧಸ್ಸ ಸಾಸನಂ’’॥

ಇತ್ಥಂ ಸುದಂ ಆಯಸ್ಮಾ ಥಮ್ಭಾರೋಪಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ।

ಥಮ್ಭಾರೋಪಕತ್ಥೇರಸ್ಸಾಪದಾನಂ ದುತಿಯಂ।

೩. ವೇದಿಕಾರಕತ್ಥೇರಅಪದಾನಂ

೧೦.

‘‘ನಿಬ್ಬುತೇ ಲೋಕನಾಥಮ್ಹಿ, ಪಿಯದಸ್ಸೀನರುತ್ತಮೇ।

ಪಸನ್ನಚಿತ್ತೋ ಸುಮನೋ, ಮುತ್ತಾವೇದಿಮಕಾಸಹಂ॥

೧೧.

‘‘ಮಣೀಹಿ ಪರಿವಾರೇತ್ವಾ, ಅಕಾಸಿಂ ವೇದಿಮುತ್ತಮಂ।

ವೇದಿಕಾಯ ಮಹಂ ಕತ್ವಾ, ತತ್ಥ ಕಾಲಙ್ಕತೋ ಅಹಂ॥

೧೨.

‘‘ಯಂ ಯಂ ಯೋನುಪಪಜ್ಜಾಮಿ, ದೇವತ್ತಂ ಅಥ ಮಾನುಸಂ।

ಮಣೀ ಧಾರೇನ್ತಿ ಆಕಾಸೇ, ಪುಞ್ಞಕಮ್ಮಸ್ಸಿದಂ ಫಲಂ॥

೧೩.

‘‘ಸೋಳಸಿತೋ ಕಪ್ಪಸತೇ, ಮಣಿಪ್ಪಭಾಸನಾಮಕಾ।

ಛತ್ತಿಂಸಾಸಿಂಸು ಬಾತ್ತಿಂಸಾಸಿಂಸು (ಸೀ॰ ಸ್ಯಾ॰) ರಾಜಾನೋ, ಚಕ್ಕವತ್ತೀ ಮಹಬ್ಬಲಾ॥

೧೪.

‘‘ಪಟಿಸಮ್ಭಿದಾ ಚತಸ್ಸೋ…ಪೇ॰… ಕತಂ ಬುದ್ಧಸ್ಸ ಸಾಸನಂ’’॥

ಇತ್ಥಂ ಸುದಂ ಆಯಸ್ಮಾ ವೇದಿಕಾರಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ।

ವೇದಿಕಾರಕತ್ಥೇರಸ್ಸಾಪದಾನಂ ತತಿಯಂ।

೪. ಸಪರಿವಾರಿಯತ್ಥೇರಅಪದಾನಂ

೧೫.

‘‘ಪದುಮುತ್ತರೋ ನಾಮ ಜಿನೋ, ಲೋಕಜೇಟ್ಠೋ ನರಾಸಭೋ।

ಜಲಿತ್ವಾ ಅಗ್ಗಿಕ್ಖನ್ಧೋವ, ಸಮ್ಬುದ್ಧೋ ಪರಿನಿಬ್ಬುತೋ॥

೧೬.

‘‘ನಿಬ್ಬುತೇ ಚ ಮಹಾವೀರೇ, ಥೂಪೋ ವಿತ್ಥಾರಿಕೋ ಅಹು।

ದೂರತೋವ ಅಹೋರತ್ತಂ (ಸೀ॰), ಥೂಪದತ್ತಂ (ಸ್ಯಾ॰) ಉಪಟ್ಠೇನ್ತಿ, ಧಾತುಗೇಹವರುತ್ತಮೇ॥

೧೭.

‘‘ಪಸನ್ನಚಿತ್ತೋ ಸುಮನೋ, ಅಕಂ ಚನ್ದನವೇದಿಕಂ।

ದಿಸ್ಸತಿ ಥೂಪಖನ್ಧೋ ಚ ದೀಯತಿ ಧೂಮಕ್ಖನ್ಧೋ ಚ (ಸೀ॰), ದೀಯತಿ ಧೂಪಗನ್ಧೋ ಚ (ಸ್ಯಾ॰), ಥೂಪಾನುಚ್ಛವಿಕೋ ತದಾ॥

೧೮.

‘‘ಭವೇ ನಿಬ್ಬತ್ತಮಾನಮ್ಹಿ, ದೇವತ್ತೇ ಅಥ ಮಾನುಸೇ।

ಓಮತ್ತಂ ಮೇ ನ ಪಸ್ಸಾಮಿ, ಪುಬ್ಬಕಮ್ಮಸ್ಸಿದಂ ಫಲಂ॥

೧೯.

‘‘ಪಞ್ಚದಸಕಪ್ಪಸತೇ , ಇತೋ ಅಟ್ಠ ಜನಾ ಅಹುಂ।

ಸಬ್ಬೇ ಸಮತ್ತನಾಮಾ ತೇ, ಚಕ್ಕವತ್ತೀ ಮಹಬ್ಬಲಾ॥

೨೦.

‘‘ಪಟಿಸಮ್ಭಿದಾ ಚತಸ್ಸೋ…ಪೇ॰… ಕತಂ ಬುದ್ಧಸ್ಸ ಸಾಸನಂ’’॥

ಇತ್ಥಂ ಸುದಂ ಆಯಸ್ಮಾ ಸಪರಿವಾರಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ।

ಸಪರಿವಾರಿಯತ್ಥೇರಸ್ಸಾಪದಾನಂ ಚತುತ್ಥಂ।

೫. ಉಮಾಪುಪ್ಫಿಯತ್ಥೇರಅಪದಾನಂ

೨೧.

‘‘ನಿಬ್ಬುತೇ ಲೋಕಮಹಿತೇ ಲೋಕನಾಥಮ್ಹಿ (ಸೀ॰), ಆಹುತೀನಂ ಪಟಿಗ್ಗಹೇ।

ಸಿದ್ಧತ್ಥಮ್ಹಿ ಭಗವತಿ, ಮಹಾಥೂಪಮಹೋ ಅಹು॥

೨೨.

‘‘ಮಹೇ ಪವತ್ತಮಾನಮ್ಹಿ, ಸಿದ್ಧತ್ಥಸ್ಸ ಮಹೇಸಿನೋ।

ಉಮಾಪುಪ್ಫಂ ಉಮ್ಮಾಪುಪ್ಫಂ (ಸಬ್ಬತ್ಥ) ಗಹೇತ್ವಾನ, ಥೂಪಮ್ಹಿ ಅಭಿರೋಪಯಿಂ॥

೨೩.

‘‘ಚತುನ್ನವುತಿತೋ ಕಪ್ಪೇ, ಯಂ ಪುಪ್ಫಮಭಿರೋಪಯಿಂ।

ದುಗ್ಗತಿಂ ನಾಭಿಜಾನಾಮಿ, ಥೂಪಪೂಜಾಯಿದಂ ಪುಪ್ಫಪೂಜಾಯಿದಂ (ಸ್ಯಾ॰), ಬುದ್ಧಪೂಜಾಯಿದಂ (ಕ॰) ಫಲಂ॥

೨೪.

‘‘ಇತೋ ಚ ನವಮೇ ಕಪ್ಪೇ, ಸೋಮದೇವಸನಾಮಕಾ।

ಪಞ್ಚಾಸೀತಿಸು ರಾಜಾನೋ, ಚಕ್ಕವತ್ತೀ ಮಹಬ್ಬಲಾ॥

೨೫.

‘‘ಪಟಿಸಮ್ಭಿದಾ ಚತಸ್ಸೋ…ಪೇ॰… ಕತಂ ಬುದ್ಧಸ್ಸ ಸಾಸನಂ’’॥

ಇತ್ಥಂ ಸುದಂ ಆಯಸ್ಮಾ ಉಮಾಪುಪ್ಫಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ।

ಉಮಾಪುಪ್ಫಿಯತ್ಥೇರಸ್ಸಾಪದಾನಂ ಪಞ್ಚಮಂ।

೬. ಅನುಲೇಪದಾಯಕತ್ಥೇರಅಪದಾನಂ

೨೬.

‘‘ಅನೋಮದಸ್ಸೀಮುನಿನೋ , ಬೋಧಿವೇದಿಮಕಾಸಹಂ।

ಸುಧಾಯ ಪಿಣ್ಡಂ ದತ್ವಾನ, ಪಾಣಿಕಮ್ಮಂ ಅಕಾಸಹಂ॥

೨೭.

‘‘ದಿಸ್ವಾ ತಂ ಸುಕತಂ ಕಮ್ಮಂ, ಅನೋಮದಸ್ಸೀ ನರುತ್ತಮೋ।

ಭಿಕ್ಖುಸಙ್ಘೇ ಠಿತೋ ಸತ್ಥಾ, ಇಮಂ ಗಾಥಂ ಅಭಾಸಥ॥

೨೮.

‘‘‘ಇಮಿನಾ ಸುಧಕಮ್ಮೇನ, ಚೇತನಾಪಣಿಧೀಹಿ ಚ।

ಸಮ್ಪತ್ತಿಂ ಅನುಭೋತ್ವಾನ, ದುಕ್ಖಸ್ಸನ್ತಂ ಕರಿಸ್ಸತಿ’॥

೨೯.

‘‘ಪಸನ್ನಮುಖವಣ್ಣೋಮ್ಹಿ , ಏಕಗ್ಗೋ ಸುಸಮಾಹಿತೋ।

ಧಾರೇಮಿ ಅನ್ತಿಮಂ ದೇಹಂ, ಸಮ್ಮಾಸಮ್ಬುದ್ಧಸಾಸನೇ॥

೩೦.

‘‘ಇತೋ ಕಪ್ಪಸತೇ ಆಸಿಂ, ಪರಿಪುಣ್ಣೇ ಅನೂನಕೇ ಪರಿಪುಣ್ಣೋ ಅನೂನಕೋ (ಸ್ಯಾ॰)।

ರಾಜಾ ಸಬ್ಬಘನೋ ನಾಮ, ಚಕ್ಕವತ್ತೀ ಮಹಬ್ಬಲೋ॥

೩೧.

‘‘ಪಟಿಸಮ್ಭಿದಾ ಚತಸ್ಸೋ…ಪೇ॰… ಕತಂ ಬುದ್ಧಸ್ಸ ಸಾಸನಂ’’॥

ಇತ್ಥಂ ಸುದಂ ಆಯಸ್ಮಾ ಅನುಲೇಪದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ।

ಅನುಲೇಪದಾಯಕತ್ಥೇರಸ್ಸಾಪದಾನಂ ಛಟ್ಠಂ।

೭. ಮಗ್ಗದಾಯಕತ್ಥೇರಅಪದಾನಂ

೩೨.

‘‘ಉತ್ತರಿತ್ವಾನ ನದಿಕಂ, ವನಂ ಗಚ್ಛತಿ ಚಕ್ಖುಮಾ।

ತಮದ್ದಸಾಸಿಂ ಸಮ್ಬುದ್ಧಂ, ಸಿದ್ಧತ್ಥಂ ವರಲಕ್ಖಣಂ॥

೩೩.

‘‘ಕುದಾಲ ಕುದ್ದಾಲ (ಸೀ॰ ಸ್ಯಾ॰) ಪಿಟಕಮಾದಾಯ, ಸಮಂ ಕತ್ವಾನ ತಂ ಪಥಂ।

ಸತ್ಥಾರಂ ಅಭಿವಾದೇತ್ವಾ, ಸಕಂ ಚಿತ್ತಂ ಪಸಾದಯಿಂ॥

೩೪.

‘‘ಚತುನ್ನವುತಿತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ।

ದುಗ್ಗತಿಂ ನಾಭಿಜಾನಾಮಿ, ಮಗ್ಗದಾನಸ್ಸಿದಂ ಫಲಂ॥

೩೫.

‘‘ಸತ್ತಪಞ್ಞಾಸಕಪ್ಪಮ್ಹಿ, ಏಕೋ ಆಸಿಂ ಜನಾಧಿಪೋ।

ನಾಮೇನ ಸುಪ್ಪಬುದ್ಧೋತಿ, ನಾಯಕೋ ಸೋ ನರಿಸ್ಸರೋ॥

೩೬.

‘‘ಪಟಿಸಮ್ಭಿದಾ ಚತಸ್ಸೋ…ಪೇ॰… ಕತಂ ಬುದ್ಧಸ್ಸ ಸಾಸನಂ’’॥

ಇತ್ಥಂ ಸುದಂ ಆಯಸ್ಮಾ ಮಗ್ಗದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ।

ಮಗ್ಗದಾಯಕತ್ಥೇರಸ್ಸಾಪದಾನಂ ಸತ್ತಮಂ।

೮. ಫಲಕದಾಯಕತ್ಥೇರಅಪದಾನಂ

೩೭.

‘‘ಯಾನಕಾರೋ ಪುರೇ ಆಸಿಂ, ದಾರುಕಮ್ಮೇ ಸುಸಿಕ್ಖಿತೋ।

ಚನ್ದನಂ ಫಲಕಂ ಕತ್ವಾ, ಅದಾಸಿಂ ಲೋಕಬನ್ಧುನೋ॥

೩೮.

‘‘ಪಭಾಸತಿ ಇದಂ ಬ್ಯಮ್ಹಂ, ಸುವಣ್ಣಸ್ಸ ಸುನಿಮ್ಮಿತಂ।

ಹತ್ಥಿಯಾನಂ ಅಸ್ಸಯಾನಂ, ದಿಬ್ಬಯಾನಂ ಉಪಟ್ಠಿತಂ॥

೩೯.

‘‘ಪಾಸಾದಾ ಸಿವಿಕಾ ಚೇವ, ನಿಬ್ಬತ್ತನ್ತಿ ಯದಿಚ್ಛಕಂ।

ಅಕ್ಖುಬ್ಭಂ ಅಕ್ಖೋಭಂ (ಸೀ॰) ರತನಂ ಮಯ್ಹಂ, ಫಲಕಸ್ಸ ಇದಂ ಫಲಂ॥

೪೦.

‘‘ಏಕನವುತಿತೋ ಕಪ್ಪೇ, ಫಲಕಂ ಯಮಹಂ ದದಿಂ।

ದುಗ್ಗತಿಂ ನಾಭಿಜಾನಾಮಿ, ಫಲಕಸ್ಸ ಇದಂ ಫಲಂ॥

೪೧.

‘‘ಸತ್ತಪಞ್ಞಾಸಕಪ್ಪಮ್ಹಿ, ಚತುರೋ ನಿಮ್ಮಿತಾವ್ಹಯಾ।

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ॥

೪೨.

‘‘ಪಟಿಸಮ್ಭಿದಾ ಚತಸ್ಸೋ…ಪೇ॰… ಕತಂ ಬುದ್ಧಸ್ಸ ಸಾಸನಂ’’॥

ಇತ್ಥಂ ಸುದಂ ಆಯಸ್ಮಾ ಫಲಕದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ।

ಫಲಕದಾಯಕತ್ಥೇರಸ್ಸಾಪದಾನಂ ಅಟ್ಠಮಂ।

೯. ವಟಂಸಕಿಯತ್ಥೇರಅಪದಾನಂ

೪೩.

‘‘ಸುಮೇಧೋ ನಾಮ ನಾಮೇನ, ಸಯಮ್ಭೂ ಅಪರಾಜಿತೋ।

ವಿವೇಕಮನುಬ್ರೂಹನ್ತೋ, ಅಜ್ಝೋಗಹಿ ಮಹಾವನಂ॥

೪೪.

‘‘ಸಳಲಂ ಪುಪ್ಫಿತಂ ದಿಸ್ವಾ, ಗನ್ಥಿತ್ವಾನ ಬನ್ಧಿತ್ವಾನ (ಸೀ॰) ವಟಂಸಕಂ।

ಬುದ್ಧಸ್ಸ ಅಭಿರೋಪೇಸಿಂ, ಸಮ್ಮುಖಾ ಲೋಕನಾಯಕಂ॥

೪೫.

‘‘ತಿಂಸಕಪ್ಪಸಹಸ್ಸಮ್ಹಿ , ಯಂ ಪುಪ್ಫಮಭಿರೋಪಯಿಂ।

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ॥

೪೬.

‘‘ಊನವೀಸೇ ಕಪ್ಪಸತೇ, ಸೋಳಸಾಸುಂ ಸುನಿಮ್ಮಿತಾ।

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ॥

೪೭.

‘‘ಪಟಿಸಮ್ಭಿದಾ ಚತಸ್ಸೋ…ಪೇ॰… ಕತಂ ಬುದ್ಧಸ್ಸ ಸಾಸನಂ’’॥

ಇತ್ಥಂ ಸುದಂ ಆಯಸ್ಮಾ ವಟಂಸಕಿಯೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ।

ವಟಂಸಕಿಯತ್ಥೇರಸ್ಸಾಪದಾನಂ ನವಮಂ।

೧೦. ಪಲ್ಲಙ್ಕದಾಯಕತ್ಥೇರಅಪದಾನಂ

೪೮.

‘‘ಸುಮೇಧಸ್ಸ ಭಗವತೋ, ಲೋಕಜೇಟ್ಠಸ್ಸ ತಾದಿನೋ।

ಪಲ್ಲಙ್ಕೋ ಹಿ ಮಯಾ ದಿನ್ನೋ, ಸಉತ್ತರಸಪಚ್ಛದೋ॥

೪೯.

‘‘ಸತ್ತರತನಸಮ್ಪನ್ನೋ , ಪಲ್ಲಙ್ಕೋ ಆಸಿ ಸೋ ತದಾ।

ಮಮ ಸಙ್ಕಪ್ಪಮಞ್ಞಾಯ, ನಿಬ್ಬತ್ತತಿ ಸದಾ ಮಮ॥

೫೦.

‘‘ತಿಂಸಕಪ್ಪಸಹಸ್ಸಮ್ಹಿ, ಪಲ್ಲಙ್ಕಮದದಿಂ ತದಾ।

ದುಗ್ಗತಿಂ ನಾಭಿಜಾನಾಮಿ, ಪಲ್ಲಙ್ಕಸ್ಸ ಇದಂ ಫಲಂ॥

೫೧.

‘‘ವೀಸಕಪ್ಪಸಹಸ್ಸಮ್ಹಿ, ಸುವಣ್ಣಾಭಾ ತಯೋ ಜನಾ।

ಸತ್ತರತನಸಮ್ಪನ್ನಾ, ಚಕ್ಕವತ್ತೀ ಮಹಬ್ಬಲಾ॥

೫೨.

‘‘ಪಟಿಸಮ್ಭಿದಾ ಚತಸ್ಸೋ…ಪೇ॰… ಕತಂ ಬುದ್ಧಸ್ಸ ಸಾಸನಂ’’॥

ಇತ್ಥಂ ಸುದಂ ಆಯಸ್ಮಾ ಪಲ್ಲಙ್ಕದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ।

ಪಲ್ಲಙ್ಕದಾಯಕತ್ಥೇರಸ್ಸಾಪದಾನಂ ದಸಮಂ।

ಛತ್ತವಗ್ಗೋ ಪನ್ನರಸಮೋ।

ತಸ್ಸುದ್ದಾನಂ –

ಛತ್ತಂ ಥಮ್ಭೋ ಚ ವೇದಿ ಚ, ಪರಿವಾರುಮಪುಪ್ಫಿಯೋ।

ಅನುಲೇಪೋ ಚ ಮಗ್ಗೋ ಚ, ಫಲಕೋ ಚ ವಟಂಸಕೋ।

ಪಲ್ಲಙ್ಕದಾಯೀ ಚ ಗಾಥಾಯೋ, ಛಪ್ಪಞ್ಞಾಸ ಪಕಿತ್ತಿತಾತಿ॥