೧೨. ಪದುಮುತ್ತರಬುದ್ಧವಂಸೋ

೧.

ನಾರದಸ್ಸ ಅಪರೇನ, ಸಮ್ಬುದ್ಧೋ ದ್ವಿಪದುತ್ತಮೋ।

ಪದುಮುತ್ತರೋ ನಾಮ ಜಿನೋ, ಅಕ್ಖೋಭೋ ಸಾಗರೂಪಮೋ॥

೨.

ಮಣ್ಡಕಪ್ಪೋವ ಸೋ ಆಸಿ, ಯಮ್ಹಿ ಬುದ್ಧೋ ಅಜಾಯಥ।

ಉಸ್ಸನ್ನಕುಸಲಾ ಜನತಾ, ತಮ್ಹಿ ಕಪ್ಪೇ ಅಜಾಯಥ॥

೩.

ಪದುಮುತ್ತರಸ್ಸ ಭಗವತೋ, ಪಠಮೇ ಧಮ್ಮದೇಸನೇ।

ಕೋಟಿಸತಸಹಸ್ಸಾನಂ, ಧಮ್ಮಾಭಿಸಮಯೋ ಅಹು॥

೪.

ತತೋ ಪರಮ್ಪಿ ವಸ್ಸನ್ತೇ, ತಪ್ಪಯನ್ತೇ ಚ ಪಾಣಿನೇ।

ಸತ್ತತಿಂಸಸತಸಹಸ್ಸಾನಂ, ದುತಿಯಾಭಿಸಮಯೋ ಅಹು॥

೫.

ಯಮ್ಹಿ ಕಾಲೇ ಮಹಾವೀರೋ, ಆನನ್ದಂ ಉಪಸಙ್ಕಮಿ।

ಪಿತುಸನ್ತಿಕಂ ಉಪಗನ್ತ್ವಾ, ಆಹನೀ ಅಮತದುನ್ದುಭಿಂ॥

೬.

ಆಹತೇ ಅಮತಭೇರಿಮ್ಹಿ, ವಸ್ಸನ್ತೇ ಧಮ್ಮವುಟ್ಠಿಯಾ।

ಪಞ್ಞಾಸಸತಸಹಸ್ಸಾನಂ, ತತಿಯಾಭಿಸಮಯೋ ಅಹು॥

೭.

ಓವಾದಕೋ ವಿಞ್ಞಾಪಕೋ, ತಾರಕೋ ಸಬ್ಬಪಾಣಿನಂ।

ದೇಸನಾಕುಸಲೋ ಬುದ್ಧೋ, ತಾರೇಸಿ ಜನತಂ ಬಹುಂ॥

೮.

ಸನ್ನಿಪಾತಾ ತಯೋ ಆಸುಂ, ಪದುಮುತ್ತರಸ್ಸ ಸತ್ಥುನೋ।

ಕೋಟಿಸತಸಹಸ್ಸಾನಂ, ಪಠಮೋ ಆಸಿ ಸಮಾಗಮೋ॥

೯.

ಯದಾ ಬುದ್ಧೋ ಅಸಮಸಮೋ, ವಸಿ ವೇಭಾರಪಬ್ಬತೇ।

ನವುತಿಕೋಟಿಸಹಸ್ಸಾನಂ, ದುತಿಯೋ ಆಸಿ ಸಮಾಗಮೋ॥

೧೦.

ಪುನ ಚಾರಿಕಂ ಪಕ್ಕನ್ತೇ, ಗಾಮನಿಗಮರಟ್ಠತೋ।

ಅಸೀತಿಕೋಟಿಸಹಸ್ಸಾನಂ, ತತಿಯೋ ಆಸಿ ಸಮಾಗಮೋ॥

೧೧.

ಅಹಂ ತೇನ ಸಮಯೇನ, ಜಟಿಲೋ ನಾಮ ರಟ್ಠಿಕೋ।

ಸಮ್ಬುದ್ಧಪ್ಪಮುಖಂ ಸಙ್ಘಂ, ಸಭತ್ತಂ ದುಸ್ಸಮದಾಸಹಂ॥

೧೨.

ಸೋಪಿ ಮಂ ಬುದ್ಧೋ ಬ್ಯಾಕಾಸಿ, ಸಙ್ಘಮಜ್ಝೇ ನಿಸೀದಿಯ।

‘‘ಸತಸಹಸ್ಸಿತೋ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ॥

೧೩.

‘‘ಪಧಾನಂ ಪದಹಿತ್ವಾನ…ಪೇ॰… ಹೇಸ್ಸಾಮ ಸಮ್ಮುಖಾ ಇಮಂ’’॥

೧೪.

ತಸ್ಸಾಪಿ ವಚನಂ ಸುತ್ವಾ, ಉತ್ತರಿಂ ವತಮಧಿಟ್ಠಹಿಂ।

ಅಕಾಸಿಂ ಉಗ್ಗದಳ್ಹಂ ಧಿತಿಂ, ದಸಪಾರಮಿಪೂರಿಯಾ॥

೧೫.

ಬ್ಯಾಹತಾ ತಿತ್ಥಿಯಾ ಸಬ್ಬೇ, ವಿಮನಾ ದುಮ್ಮನಾ ತದಾ।

ನ ತೇಸಂ ಕೇಚಿ ಪರಿಚರನ್ತಿ, ರಟ್ಠತೋ ನಿಚ್ಛುಭನ್ತಿ ತೇ॥

೧೬.

ಸಬ್ಬೇ ತತ್ಥ ಸಮಾಗನ್ತ್ವಾ, ಉಪಗಚ್ಛುಂ ಬುದ್ಧಸನ್ತಿಕೇ।

ತುವಂ ನಾಥೋ ಮಹಾವೀರ, ಸರಣಂ ಹೋಹಿ ಚಕ್ಖುಮ॥

೧೭.

ಅನುಕಮ್ಪಕೋ ಕಾರುಣಿಕೋ, ಹಿತೇಸೀ ಸಬ್ಬಪಾಣಿನಂ।

ಸಮ್ಪತ್ತೇ ತಿತ್ಥಿಯೇ ಸಬ್ಬೇ, ಪಞ್ಚಸೀಲೇ ಪತಿಟ್ಠಪಿ॥

೧೮.

ಏವಂ ನಿರಾಕುಲಂ ಆಸಿ, ಸುಞ್ಞತಂ ತಿತ್ಥಿಯೇಹಿ ತಂ।

ವಿಚಿತ್ತಂ ಅರಹನ್ತೇಹಿ, ವಸೀಭೂತೇಹಿ ತಾದಿಹಿ॥

೧೯.

ನಗರಂ ಹಂಸವತೀ ನಾಮ, ಆನನ್ದೋ ನಾಮ ಖತ್ತಿಯೋ।

ಸುಜಾತಾ ನಾಮ ಜನಿಕಾ, ಪದುಮುತ್ತರಸ್ಸ ಸತ್ಥುನೋ॥

೨೦.

ದಸವಸ್ಸಸಹಸ್ಸಾನಿ, ಅಗಾರಂ ಅಜ್ಝ ಸೋ ವಸಿ।

ನರವಾಹನೋ ಯಸೋ ವಸವತ್ತೀ ನಾರಿವಾಹನೋ ಯಸವತೀ (ಸ್ಯಾ॰ ಕಂ॰), ತಯೋ ಪಾಸಾದಮುತ್ತಮಾ॥

೨೧.

ತಿಚತ್ತಾರೀಸಸಹಸ್ಸಾನಿ, ನಾರಿಯೋ ಸಮಲಙ್ಕತಾ।

ವಸುದತ್ತಾ ನಾಮ ನಾರೀ, ಉತ್ತಮೋ ನಾಮ ಅತ್ರಜೋ॥

೨೨.

ನಿಮಿತ್ತೇ ಚತುರೋ ದಿಸ್ವಾ, ಪಾಸಾದೇನಾಭಿನಿಕ್ಖಮಿ।

ಸತ್ತಾಹಂ ಪಧಾನಚಾರಂ, ಅಚರೀ ಪುರಿಸುತ್ತಮೋ॥

೨೩.

ಬ್ರಹ್ಮುನಾ ಯಾಚಿತೋ ಸನ್ತೋ, ಪದುಮುತ್ತರೋ ವಿನಾಯಕೋ।

ವತ್ತಿ ಚಕ್ಕಂ ಮಹಾವೀರೋ, ಮಿಥಿಲುಯ್ಯಾನಮುತ್ತಮೇ॥

೨೪.

ದೇವಲೋ ಚ ಸುಜಾತೋ ಚ, ಅಹೇಸುಂ ಅಗ್ಗಸಾವಕಾ।

ಸುಮನೋ ನಾಮುಪಟ್ಠಾಕೋ, ಪದುಮುತ್ತರಸ್ಸ ಮಹೇಸಿನೋ॥

೨೫.

ಅಮಿತಾ ಚ ಅಸಮಾ ಚ, ಅಹೇಸುಂ ಅಗ್ಗಸಾವಿಕಾ।

ಬೋಧಿ ತಸ್ಸ ಭಗವತೋ, ಸಲಲೋತಿ ಪವುಚ್ಚತಿ॥

೨೬.

ವಿತಿಣ್ಣೋ ಚೇವ ಅಮಿತೋ ಚೇವ (ಸ್ಯಾ॰) ತಿಸ್ಸೋ ಚ, ಅಹೇಸುಂ ಅಗ್ಗುಪಟ್ಠಕಾ।

ಹಟ್ಠಾ ಚೇವ ವಿಚಿತ್ತಾ ಚ, ಅಹೇಸುಂ ಅಗ್ಗುಪಟ್ಠಿಕಾ॥

೨೭.

ಅಟ್ಠಪಣ್ಣಾಸರತನಂ, ಅಚ್ಚುಗ್ಗತೋ ಮಹಾಮುನಿ।

ಕಞ್ಚನಗ್ಘಿಯಸಙ್ಕಾಸೋ, ದ್ವತ್ತಿಂಸವರಲಕ್ಖಣೋ॥

೨೮.

ಕುಟ್ಟಾ ಕವಾಟಾ ಭಿತ್ತೀ ಚ, ರುಕ್ಖಾ ನಗಸಿಲುಚ್ಚಯಾ।

ನ ತಸ್ಸಾವರಣಂ ಅತ್ಥಿ, ಸಮನ್ತಾ ದ್ವಾದಸಯೋಜನೇ॥

೨೯.

ವಸ್ಸಸತಸಹಸ್ಸಾನಿ, ಆಯು ವಿಜ್ಜತಿ ತಾವದೇ।

ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ॥

೩೦.

ಸನ್ತಾರೇತ್ವಾ ಬಹುಜನಂ, ಛಿನ್ದಿತ್ವಾ ಸಬ್ಬಸಂಸಯಂ।

ಜಲಿತ್ವಾ ಅಗ್ಗಿಕ್ಖನ್ಧೋವ ನಿಬ್ಬುತೋ ಸೋ ಸಸಾವಕೋ॥

೩೧.

ಪದುಮುತ್ತರೋ ಜಿನೋ ಬುದ್ಧೋ, ನನ್ದಾರಾಮಮ್ಹಿ ನಿಬ್ಬುತೋ।

ತತ್ಥೇವಸ್ಸ ಥೂಪವರೋ, ದ್ವಾದಸುಬ್ಬೇಧಯೋಜನೋತಿ॥

ಪದುಮುತ್ತರಸ್ಸ ಭಗವತೋ ವಂಸೋ ದಸಮೋ।